လိုꩻငမ်း'ငမ်းတဝ်းထာꩻသီ

"အဘယသုတ် (လိုꩻငမ်းထာꩻသီ-လိုꩻငမ်းတဝ်းထာꩻသီ)" ဇာဏုဿောဏိပုဏ္ဏာꩻ လောဝ်းဗွေႏဘုရာꩻနုဲင်းယို- ဩဗွေႏဂေါတမ- 'လိုꩻငမ်းတဝ်းထာꩻသီ အဲဉ်ထဝ်းတဖြာꩻဖြာꩻ'ခွေသွဉ်းရိုꩻနုဲင်းနဝ်ꩻ။ တကာႏပုဏ္ဏာꩻဟွေး- လိုꩻငမ်းထာꩻသီ အဝ်ႏလစ်ꩻမျိုꩻ၊ လစ်ꩻမျိုꩻကရိုꩻနောဝ်ꩻ- ၁။ လိုꩻစွယ်ꩻသန် ကာႏမဂွုဏ်ႏ၊ အာႏရွုံႏငတ်ꩻပါꩻ၊ မော့ꩻတဝ်ရောႏဂါႏ တိန်ႏအီႏသီဗာႏတဲင် မဉ်ဖထိုꩻတဝ်း ကာႏမဂွုဏ်ႏနဝ်ꩻတွော့ꩻ ငမ်းငါႏသီဗာႏထာꩻ၊ ငမ်းထာꩻသီ။ ၂။ လိုꩻယဖြာꩻဖြာꩻနဝ်ꩻ အတ္တသန်၊ ထင်းတန်အနမ်း၊ ရက်အနမ်း၊ လောႏကာႏအနမ်း၊ မော့ꩻတဝ်ရောႏဂါႏ ထွိုင်ႏအီႏသီဗာႏတဲင် အီႏစွဉ်ꩻထိုꩻဗာႏအနမ်းတွော့ꩻ ငမ်းထာꩻသီ။ ၃။ လိုꩻယင်ဟန်ႏနဝ်ꩻ မာꩻဗာႏဒွိုန်းကုသိုလ်ႏ၊ ငမ်းတွိုႏလွေꩻဗာႏငါးရုဲင်ꩻ၊ တိရစ္ဆာန်ႏ၊ ပိတ္တာႏတွော့ꩻ ငမ်းငါႏထာꩻသီ။ ၄။ လိုꩻယင်ဟန်ႏနဝ်ꩻ အားထွုတ်ဗာႏတဝ်းတရာꩻ၊ မာꩻဗာႏတဝ်း ဝိပဿနာႏတဲင် ငမ်းငါႏလွေꩻတယ်ႏ အပါယ်ႏခမ်းသူꩻတွော့ꩻ ငမ်းထာꩻသီ။ လိုꩻငမ်းထာꩻသီ အဝ်ႏလစ်ꩻမျိုꩻနုဲင်းနောဝ်ꩻသွူ။ တကာႏပုဏ္ဏာꩻဟွေး- ၁။ လိုꩻယင်ဟန်ႏနဝ်ꩻ စွယ်ꩻတဝ်းကာႏမဂွုဏ်ႏ၊ အာႏရွုံႏငတ်ꩻပါꩻ၊ သꩻဝင်ႏစာꩻဒျာႏကုသိုလ်ႏတဲင် ခွေမဉ်ႏသီနဝ်ꩻ တတွိုႏနွောင်ꩻတဝ်း အပါယ်ႏခမ်း၊ ယွုမ်းနမ်းကျင်ꩻဟောဝ်၊ ဆာတဝ်တဲ့ယဝ်း၊ ငမ်းတဝ်းထာꩻသီ။ ၂။ လိုꩻယင်ဟန်ႏနဝ်ꩻ ခွေယိုအသုဘတန်ဒျာႏ၊ အနိစ္စတန်ဒျာႏ၊ သေနာႏနုဲင်းနဝ်ꩻတဲင် ထင်းတန်တဝ်းအနမ်း၊ ငမ်းတောဝ်းထာꩻသီ။ ၃။ လိုꩻယင်ဟန်ႏနဝ်ꩻ မာꩻတဝ်းအကုသိုလ်ႏ၊ အကုသိုလ်ႏ အကျံꩻစားတဲ့ မာꩻတဝ်း၊ အကုသိုလ်ႏအဝွေႏစားတဲ့ မာꩻတဝ်း၊ မာꩻဒျာႏ ကုသိုလ်ႏလွုမ်ꩻ၊ အီႏတွိုႏလွေꩻဒျာႏ ဘွုံႏဟောဝ်တဲင် ငမ်းတောဝ်းထာꩻသီ။ ၄။ လိုꩻယင်ဟန်ႏနဝ်ꩻ အားထွုတ်ဗာႏလဲဉ်းတရာꩻ၊ မာꩻဗာႏလဲဉ်း ဝိပဿနာႏ၊ ခန္ဓာႏအနိစ္စ၊ ခန္ဓာႏဒုက္ခ၊ ခန္ဓာႏအနတ္တ-စတဲင်နုဲင်းနဝ်ꩻသေ၊ ခွေယိုမဉ်ႏသီ၊ လဲဉ်းကီသေႏချာႏ၊ နန်းခရာႏအဲဉ်ထဝ်း၊ ငမ်းတဝ်းထာꩻသီ။ လိုꩻငမ်းတောဝ်းထာꩻသီ အဝ်ႏလစ်ꩻမျိုꩻနုဲင်းနောဝ်ꩻသွူ။ "ဩဗွေႏဂေါတမ- နီဗွေႏတရာꩻနဝ်ꩻ နစ်သက်ခရာႏဟောဝ်ငါႏ၊ ခွေသွဉ်းယိုနဝ်ꩻ တဲႏစွဉ်ႏဟန်ႏနီꩻယိုမာꩻငါ တသက်လိုမ်း ကိုꩻကွယ်ႏဘုရာꩻ တရာꩻ သံဃာႏ နီဗွေႏမတ်သွော့ ဥပါႏသကာႏ တဖြာꩻဗွေႏဩ"သꩻရောင်းသꩻရေꩻ လောဝ်းလွေꩻနုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ အဘယသုတ်)