လိုꩻပေႏလိုꩻဆားဘဝ
"လိုꩻပေႏလိုꩻဆားဘဝ" "လိုꩻပေႏ"ကရိုꩻနဝ်ꩻ အဓိပ္ပါယ်ႏလꩻ ပိုခိုပေႏပိုမူႏပေႏ၊ လိုꩻသက်အရွယ်ႏပေႏ၊ လိုꩻအရွယ်ႏတွိုႏတဝ်းဒွိုန်း၊ အဝ်ႏပေႏအဝ်ႏဆားနုဲင်းနဝ်ꩻသွူ၊ လိုꩻပေႏသန္ဓေႏ လꩻ(၂၃)နီꩻကိုနဝ်ꩻ အသꩻရာႏတသွိုးစ၊ အဝ်ႏအထန်ႏဖဲ့ꩻ တဟွုန်နွောင်ꩻတဝ်း ဗွီႏပေႏလွုမ်ꩻ၊ သန္ဓေႏမဉ်ႏလꩻ ၂၁-နီꩻရပ်နဝ်ꩻ အသွုန်ႏပေါႏလွဉ်စ၊ သန္ဓေႏမဉ်ႏလꩻ ၄၅-နီꩻနဝ်ꩻ အဆာႏခြုံတွမ်ႏဖြေ့ဖုံႏ ပြွူႏဖြိုလွဉ်၊ သန္ဓေႏမဉ်ႏလꩻ ၆၃-နီꩻရပ်နဝ်ꩻ အဆာႏတဖူꩻခြောင်ꩻ ထျꩻထျꩻနာနာ ပြွူႏဖြိုလွဉ်၊ သန္ဓေႏမဉ်ႏလꩻ ၇၇-နီꩻရပ်နဝ်ꩻ အဖြေ့ဖုံႏ ရုဲင်ꩻတသွိုးလွဉ်နဝ်ꩻသွူ။ သန္ဓေႏမဉ်ႏလꩻ ၈၂-နီꩻရပ်နဝ်ꩻ သေထွꩻနွောင်ꩻစဲင်းစဲင်းလဲဉ်း အမူႏအခို၊ သန္ဓေႏမဉ်ႏလꩻ ၄-လာရပ်နဝ်ꩻ အသွုန်ႏသိုႏပြွူႏဖြိုလွဉ်၊ လိုꩻပေႏဆား ထွိုင်ႏလꩻတလာတွင်ꩻနဝ်ꩻ ပယွုမ်းလွဉ်ဒါႏစထာꩻ၊ လိုꩻပေႏဆား ဗꩻသိုမ်လာအကိုနဝ်ꩻ ထာꩻရာꩻတမျိုꩻမျိုꩻ ပေါႏမဉ်ႏသော့ꩻဖေႏအစူကိုနဝ်ꩻ ကုဲင်းထိုမ်ꩻတဉ်ႏခါꩻဒါႏနဝ်ꩻသွူ။ လိုꩻပေႏဆား ပေါႏအရွယ်ႏသိုမ်လာလွိုသွူနဝ်ꩻ ကုဲင်းလျာဒါႏလွဉ်သွူ အစူယာꩻ၊ လိုꩻပေႏဆား အရွယ်ႏမဉ်ႏလꩻလစ်ꩻလာကိုနဝ်ꩻ အီႏဖေႏအံႏသွူ အဆာႏအာဟာႏရ၊ ပေါႏရဲဉ်ꩻအီႏအွဉ်ႏနဲဉ်းသွူနဝ်ꩻ အပျောႏမွေးမုဲင်းစွဉ်ႏထာꩻ၊ လိုꩻပေႏဆား အရွယ်ႏမဉ်ႏလꩻသွူငတ်ꩻလာကိုနဝ်ꩻ ပေါႏအဝ်ႏဗေင်ႏတခို့ထာꩻလဲ့ ချာႏတအာဒါႏစသွူအနမ်း၊ လိုꩻပေႏဆား အရွယ်ႏသူလာခွဲꩻနဝ်ꩻ တွမ်ႏအစူခွုမ်သဲဉ်ꩻထွူတဲင် လုဲင်ႏအစူတပင်ထွူတပင်နဝ်ꩻ သဘော်ꩻလꩻမွေးစွဉ်ႏနဝ်ꩻသွူ။ အရွယ်ႏနဝ်ꩻနဝ်ꩻ အတငါပေႏဖုံႏ ဒေါ့ꩻထန်ႏလွဉ်လဲဉ်းတဲင် အံႏစုဲင်ဒါႏစသွူ ထာꩻအံႏပေါင်းဆွော့ꩻဆွော့ꩻစား၊ လိုꩻပေႏဆား အရွယ်ႏနွုတ်ꩻလာကိုနဝ်ꩻ ပေါႏမဉ်ႏအွဉ်ႏဗေင်ႏတအာလဲ့ ဝွေꩻတွမ်ႏဝွေꩻ ချာႏတခို့ဒါႏလွဉ်စွဉ်ႏအနမ်း၊ လိုꩻပေႏဆား အရွယ်ႏကွတ်ꩻလာသားနဝ်ꩻ ထာꩻရာꩻတဗာႏဗာႏယို လျာအစူယာꩻတဲင် တွမ်ထူႏနုဲင်းပေႏခါ မွေးတဝ်းဒွုမ်တွော့ꩻ ထူႏအီဒါႏလွဉ်စသွူ တွမ်ႏစူယီး၊ စူနုံနဝ်ꩻသွူ၊ လိုꩻပေႏဆား အရွယ်ႏတဆီလာသားနဝ်ꩻ တွမ်ႏသꩻအင်တရျာႏလွေꩻဒါႏစသွူ ပဲဉ်(ထာꩻဒါ)လောင်း၊ ပေါႏလိုꩻတန်အွဉ်ႏနယ်စူ "တာ့-တာꩻ"နုဲင်းနဝ်ꩻလဲ့ အွဉ်ႏနယ်ချာဒါႏစနုဲင်း(အစူ)သွူ။ လိုꩻပေႏ အရွယ်ႏကလꩻ တဆီပုဲင်လာသားနဝ်ꩻ တခွဒါႏစသွူထာꩻတဲင် ဒေါ့ꩻဒါႏစသွူ ငဝ်းအဓိပ္ပါယ်ႏပါစား တငွါနီငွါပေႏသွူ၊ လိုꩻပေႏအရွယ်ႏ ကလꩻတနေင်ႏသားနဝ်ꩻ အုံဖွို့ထွိုင်ႏတနွောင်းဒါႏစသွူ ကလာꩻထဲင်ခုံႏ-စတဲင်အစားစား၊ ခွုင်းတခြိုꩻကဖေႏဝွေꩻနဝ်ꩻ အအီႏဝေါင်းညာꩻ(မွေးတဝ်းလဲ့) ဝေါင်းလလင်ꩻဒါႏသွူ၊ အရွယ်ႏကလꩻ တဆီပုဲင်လာတွင်ꩻနဝ်ꩻ အလွေꩻဒါႏစလဲဉ်းသွူထာꩻနဝ်ꩻသွူ။ အရွယ်ႏကလꩻ တဆီသိုမ်လာတွင်ꩻနဝ်ꩻ ထူႏတကောက်ꩻ(ဝန်ႏ)တဗာႏဗာႏထွူ ငို့အွꩻဒါႏသွူ၊ အွဉ်ႏလင်ꩻချာဒါႏသွူ၊ အရွယ်ႏနဝ်ꩻနဝ်ꩻ ပေါႏအီႏအေႏထာꩻလဲ့ ကွီဒါႏသွူတကောက်ꩻ၊ လိုꩻပေႏအရွယ်ႏကလꩻ တနေင်ႏခွဲꩻသားနဝ်ꩻ မွူးယာခိုႏ ပေါႏတဆီႏဒါႏကြွို့ꩻဒွုမ်ထာꩻ၊ လိုꩻပေႏကလွူးစတွိုင်ꩻ အဝ်ႏကျင်ႏလဲပ်တထွူဒျာႏ၊ ဖေႏနေးကသွုပ်ဆွိုက်နွောင်ꩻတွမ်ႏမွိုးအတာႏ လိုꩻပေႏတွိုင်ꩻနဝ်ꩻ အဝ်ႏပါတထွူလွဒျာႏနဝ်ꩻသွူ။ အမွိုးတရိုꩻတဝ်း၊ ကေားနေးဖေႏသားတရိုꩻတဝ်း ဒေါ့ꩻရီသွုပ်ဆွိုက်ငဝ်း တွမ်ႏမဲ့ဖြုံႏချင်ꩻချင်ꩻနဝ်ꩻ လိုꩻပေႏသီး မဉ်လꩻတွိုႏသꩻမွေးစွဉ်ႏထာꩻ၊ ကထီႏဗာႏဒါႏ လိုꩻအဝ်ႏခါႏဆီစူမွူးကိုတွိုင်ꩻယို အသꩻမွဉ်ပြန်ႏခွုန်ꩻအဝ်ႏလွ၊ သေနာႏစဲင်းလဲဉ်း ကေားထိန်ꩻထွား လွူးခွမ်ꩻသားငဝ်းတဲင် အတောင်ꩻခါꩻဒါႏလဲဉ်းနဝ်ꩻသွူ။ အဝ်ႏအရွယ်ႏ ခင်ႏယာꩻတစူနီ' ပြေင်တစူနီတဲင် တရန်းထွူတရန်း ပြွူႏဖြိုနပ်ဖြားလွဉ်တွော့ꩻ ကတွိုႏလွဉ်လွဗာႏ လိုꩻတန်အရန်းနဝ်ꩻ ထွာစွဉ်ႏဒျာႏ အံႏအော်ꩻခရာႏတစားတန်သွူ၊ လိုꩻတွိုင်ꩻ တန်ပြွူႏလွဉ်နုဲင်းယိုလွဉ်းလွဉ်း၊ လိုꩻသီးကတန်ပြွူလွဉ်ထာꩻပုံႏယို တဲႏစွဉ်ႏဒျာႏကလွူးစတဲင် အဝ်ႏလိုႏထိုမ်ႏကြမ်ꩻငါႏ အသက်အနေႏ အရွယ်ႏအနေႏ တန်ပြွူႏလွဉ်ထာꩻပုံႏနဝ်ꩻသွူ။ လိုꩻသီးတန်ပြွူႏလွဉ်ထာꩻနဝ်ꩻ တွမ်ႏတိရစ္ဆာန်ႏသီး တန်ပြွူႏလွဉ်ထာꩻယို ကွာႏအာအေားတန်၊ လိုꩻသီးဖုံႏ သော့ꩻဗာႏညမွေးစွဉ်ႏ လိုꩻပေႏဘဝ၊ သတ္တဝါႏ အဆင်းရန်းထိုဖုံႏနဝ်ꩻ လွူးဆေ့ꩻမွေးစွဉ်ႏအပေႏလဲ့ သတ္တဝါႏအရန်းဖွိုႏသားဖုံႏနဝ်ꩻ လွူးအာမွေးစွဉ်ႏ(အပေႏ)ဖုံႏ၊ သတ္တဝါႏအရန်းဖွိုႏသားဖုံႏနဝ်ꩻ လွူးခေါမ်ꩻပွေါးထိန်ꩻနွောင်ꩻညမွေးစွဉ်ႏ အပေႏဖုံႏသွူ။ လိုꩻသီးကတဲႏစစသန္ဓေႏနဝ်ꩻ တအောင်သယို မဉ်ႏဖꩻခဝ်(၅၆)ခဝ်လဲ့ သန္ဓေႏနမ်းနဝ်ꩻ အဝ်ႏတခဝ်တာႏလွုမ်ꩻ၊ တနီꩻထွူတနီꩻ အလေꩻထွူႏလွဉ်တဲင် အဝ်ႏလွဉ်စွဉ်ႏ ၇-ပေါင်ရပ်၊ မဉ်ႏလꩻသူလာနဝ်ꩻ ထွာတေားစွဉ်ႏနီပွန်း၊ (နမ်း)ဖွိုႏထိုလဲ့ အဝ်ႏလွဉ်စွဉ်ႏ နီစူမွူးရပ်၊ အရွယ်ႏနဲဉ်းထာꩻခိန်ႏနဝ်ꩻ တန်ပြွူႏယိုꩻမွေးစွဉ်ႏထာꩻ၊ အရွယ်ႏအုံထွိုင်ႏဒါႏထာꩻခိန်ႏနဝ်ꩻ အထင်ႏမွိုင်ငါႏ နုဲင်းထာꩻခိန်ႏ တမွေးတဝ်းဒွုမ်၊ သက်(၁၂)အရွယ်ႏတွင်ꩻနဝ်ꩻ အနမ်းဆွာꩻလွိုလွဉ်ကယ်ꩻ ကလွူးစခိန်ႏ၊ လိုꩻမူႏနဝ်ꩻ အရွယ်ႏတွိုႏစဝ်းကယ်ꩻလဲဉ်း လိုꩻခို၊ သက်(၁၄)အရွယ်ႏနဝ်ꩻ နမ်းဆွာꩻလွဉ်လွိုကယ်ꩻ တွမ်ႏကလွူးစသိုမ်ပွန်းရပ်၊ လိုꩻမူႏနဝ်ꩻ အနမ်းယာႏခဉ်ႏတွမ်ႏ အဖွိုႏထိုနဝ်ꩻ လွိုကယ်ꩻထဲင်း လိုꩻခိုအရွယ်ႏဗိုန်(ဝွေꩻသီး)နဝ်ꩻသွူ၊ လိုꩻပေႏသီးကတူႏခီးနဝ်ꩻ အရွယ်ႏအဝ်ႏပေႏတွင်ꩻနဝ်ꩻ တန်ပြွူႏယိုꩻ၊ အရွယ်ႏ(၆)နေင်ႏသား လိုꩻပေႏကတူႏခီးနဝ်ꩻ တွမ်ႏလိုꩻတန်သီးကတူႏခီး တတွာဒျာႏလို့ဝင်ꩻနဝ်ꩻသွူ။ လိုꩻပေႏဖုံႏယို အသက်အလွောက်ꩻ မဉ်ႏခန်ꩻထွော့ဗာႏနဝ်ꩻ- တဲႏလွူးစ ဗꩻကလွေꩻဒါႏထာꩻအရွယ်ႏနဝ်ꩻ အရွယ်ႏနဲဉ်းထာꩻ၊ တဲႏတနေင်ႏ ဗꩻသိုမ်နေင်ႏအရွယ်ႏနဝ်ꩻ အရွယ်ႏအုံထွိုင်ႏ'ဖင်းဒါႏထာꩻ၊ တဲႏသိုမ်နေင်ႏ ဗꩻသူနေင်ႏအရွယ်ႏနဝ်ꩻ အရွယ်ႏသွဉ်ဒေါ့ꩻငဝ်း-အရွယ်ႏအဝ်ႏသိုမ်မျိုꩻ၊ ဘဝအရွယ်ႏသိုမ်မျိုꩻယိုနဝ်ꩻ ဟဲ့ꩻလွ"လိုꩻပေႏအစဘဝ"နဝ်ꩻသွူ။ လိုꩻပေႏဘဝဆုဲင်ꩻနဝ်ꩻ တဲႏသက်(၁၀)ဗꩻ (၁၆)ခါႏ ထွာအခိန်ႏဗုဲင်သျင်ႏနဝ်ꩻသွူ၊ ခိုဗင်ႏတရဝ်း မူႏနံꩻတရဝ်းအခိန်ႏနဝ်ꩻ တဲႏသက်(၁၈)ဗꩻ(၃၀)ခါႏအရွယ်ႏ၊ အရွယ်ႏ တဲႏသက်(၂၀)ဗꩻ (၃၀)ခါႏနဝ်ꩻ ထွာအရွယ်ႏ ကာယဗလ၊ ဉာဏဗလ၊ ရူပဗလ ပြွူႏဖြိုခိန်ႏနဝ်ꩻသွူ။ တဲႏသက်(၄၀)ဗꩻ(၆)ခါႏအရွယ်ႏနဝ်ꩻ ထွာလိုꩻတန်၊ တဲႏအရွယ်ႏဖြားတကော့တကဲ့ ဗꩻတငယ်ႏပြန်ႏအရွယ်ႏ တွိုႏစွဉ်ႏကသီကမားခိန်ႏနဝ်ꩻသွူ၊ လိုꩻဘဝနဝ်ꩻ တဲႏကလွူး ဗꩻကသီခိန်ႏ အဝ်ႏပြောင်ꩻလုဲင်ႏလွဉ် အရန်းရန်း၊ အမူႏတွမ်ႏအခို လိုꩻမျိုꩻတမျိုꩻတွမ်ႏတမျိုꩻ တန်ပြွူႏလွဉ်ပုံႏ တဗိုန်တဝ်း၊ အကွာႏလွဒျာႏသွူ၊ လိုꩻသီးအနမ်းပွိုင် အပုံႏအငုဲင်ꩻ အယာႏခဉ်ႏကကွာႏဗာႏလို့ဝင်ꩻနဝ်ꩻ ကွပ်ထီဟံႏရာႏသီႏဥတု အအံႏအအွꩻဖုံႏကွာႏနဝ်ꩻမꩻသွူ။ လိုꩻပေႏဖုံႏ တန်ပြွူႏလွဉ်ထာꩻပုံႏနဝ်ꩻ သꩻဝင်ႏစာꩻခရာႏဟဝ်မွေးစွဉ်ႏထာꩻ၊ လိုꩻပေႏလွူးစနဝ်ꩻ တသွဉ်ဗာႏတဝ်းလဲ့ နဲဉ်းဒါႏဒျာႏထာꩻ၊ လိုꩻပေႏဖုံႏနဝ်ꩻ စမ်ႏစမ်ဝွေꩻနမ်းအင်္ဂါႏတဲင် သွဉ်လွေꩻတလဲင်ႏတစိꩻစိꩻသွူ၊ လိုꩻပေႏနဝ်ꩻ သဲစ်တဲင်ကလွူးလင်ꩻလဲ့ အသုံꩻဒါႏထွူဒျာႏ၊ တဲႏစသက်တနေင်ႏနဝ်ꩻ ခံႏစာꩻဒါႏစသွူ အာရုံႏငတ်ꩻပါꩻတွော့ꩻ သꩻမဉ်ထွားနုဲင်းဝင်ꩻ ပေါႏလွဉ်စခန်းဒျာႏ၊ ဆွမ်ꩻဝင်ꩻငဝ်းထွူတဲင် ပေါႏဝင်ꩻမဉ်ႏချော်ꩻသွူနဝ်ꩻ အကုဲင်းပျောႏသွင်ႏ ကုဲင်းငဒါႏထာꩻ၊ လိုꩻပေႏသက်သိုမ်နေင်ႏတွမ်ႏ လစ်ꩻနေင်ႏခါႏနဝ်ꩻ ဒါႏယိုꩻလွမွေးစွဉ်ႏငဝ်း၊ သက်(၁၆)နေင်ႏတွင်ꩻနဝ်ꩻ ထာꩻသေဉာဏ်ႏ ပြွူႏဖြိုထင်ႏမွေးစွဉ်ႏ၊ နမ်းကာယလဲ့ တွိုႏစွဉ်ႏဒျာႏ အပြွူႏဖြိုသွတ်ꩻအရန်းသွူ။ လိုꩻပေႏသီး ဆရာႏရီးရီးနဝ်ꩻ ထွာဒျာႏမွိုးတွမ်ႏဖါ၊ ကထွာမွိုးနဝ်ꩻ သွဉ်ဖေႏရီးရီးဗာႏ၊ အွိုးဖါနဝ်ꩻ အသက်မဉ်ႏလꩻပသာႏသာႏသွူမꩻ ကွဲးသွဉ်ဖေႏဗာႏနဝ်ꩻသွူ၊ လိုꩻပေႏဖုံႏ ကပိုန်းမူလတန်ꩻခိန်ႏနဝ်ꩻ ထွာအခိန်ႏ ခွဲးတလူႏနွောင်ꩻဒါႏ ထာꩻယောင်ႏသွီႏထာꩻကဝ်ꩻဖုံႏ၊ အဝ်ႏခြေင်ခိန်ႏနဝ်ꩻ လိုꩻပေႏဖုံႏ အဝ်ႏလိုႏသုံꩻဒါႏဒါႏငါႏ၊ ထာꩻရေႏရွယ်ႏတအဲဉ်ထဝ်း ထာꩻအုံခြေင်နဝ်ꩻ ထွာအီဒါႏ ထာꩻဗွိုႏအန်ꩻတဲင် အန္တရာယ်ႏအဝ်ႏနဝ်ꩻသွူ။ လိုꩻပေႏတဖြာꩻ ကကွီကကော့ꩻ ကမဉ်လꩻဒါႏအချက်ဖုံႏနဝ်ꩻ ဖေႏလိုꩻတန်ဖုံႏ ကရက်ဝွေꩻသီး၊ ဖေႏရန်ႏကင်ꩻကင်ꩻ ဖေႏကအုံနွောင်ꩻ၊ မဉ်လꩻလိုꩻတန်ဖုံႏ ကအွဉ်ႏရေꩻဝွေꩻသီး၊ မဉ်လꩻလွ ဖေႏဝင်ꩻကသွင်ꩻသော့ꩻလိုꩻခြာဖုံႏ၊ ဝွေꩻသီးမွိုးဖါယိုလဲ့ မဉ်အွဉ်ႏထွာဒျာႏ မွိုးဖါအာႏကွိုꩻလꩻ၊ မဉ်အွဉ်ႏထွာဒျာႏ မွိုးဖါပြဲ့ꩻစွုမ်ႏလိုမ်းကိုမ်ႏနဝ်ꩻသွူ။ ဝါးသီးအာႏနဝ်ꩻ အဝ်ႏဒျာႏကောင်ႏကင်ႏ၊ ထသီးအာႏနဝ်ꩻ အဝ်ႏဒျာႏထီ၊ ဗိုန်ပီနဝ်ꩻအတွိုင်ꩻ လိုꩻပေႏသီးအာႏနဝ်ꩻ အဝ်ႏဒျာႏထာꩻငွိုးလွုမ်ꩻ၊ လိုꩻဘဝနဝ်ꩻ အဝ်ႏစမ်ႏဖြွꩻတသေႏသေႏ လိုꩻဖုံႏ၊ လိုꩻပေႏဖုံႏ မဉ်ႏဖဉ်းမွိုတ်တွမ်ႏ အသောင်အရင်ꩻ ကဒင်ႏဒါႏဝင်ꩻအပဲစ်သားလဲ့ အီႏဒါႏလွဉ် ထာꩻသဲ့ꩻသွမ်ꩻ၊ လိုꩻပေႏသီး မဉ်ႏအုံဒျာႏ အသောင်အရင်ꩻကမဉ်ရန်ႏဒါႏထာꩻသားခြာလဲ့ အီႏဒါႏလွဉ်ဒျာႏ ထာꩻတွိုက်ꩻထာꩻနက်၊ လိုꩻပေႏဖုံႏ မဉ်ႏဖိဉ်းမွိုတ်ဒျာႏတွမ်ႏ အသောင်အရင်ꩻ ကဒေါ့ꩻစွပ်ဒေါ့ꩻမောင်းဒါႏထာꩻသားလဲ့ အီႏဒါႏလွဉ်ဒျာႏ ထာꩻဝင်ꩻသꩻထာꩻငမ်းတန်သွူ။ လိုꩻပေႏဖုံႏ မဉ်ႏအုံအဝ်ႏဒျာႏ အသောင်အရင်ꩻ ကဝင်ꩻသꩻသေႏသေႏဒါႏဝင်ꩻသားထျꩻလဲ့ အီႏဒါႏလွဉ်ဒျာႏ တဝွန်ႏခံႏဒါႏတဝ်းအပဲစ်သဘော်ꩻရင်ꩻသွူ၊ လိုꩻပေႏဖုံႏ မဉ်ႏအုံအဝ်ႏယွုန်းယေားဒါႏလဲ့ အီႏဒါႏလွဉ်ဒျာႏ ထာꩻသꩻဆွာꩻ-ထာꩻယွုန်း၊ လိုꩻပေႏဖုံႏ မဉ်ႏအုံဗာႏဒျာႏ တွမ်ႏထာꩻဖေႏအာႏ-ထာꩻပင်ႏထိုလဲ့ အီႏဒါႏလွဉ် ထာꩻခံႏနွမ်ꩻ-ထာꩻအွဉ်ႏတန်ႏဖိုꩻနဝ်ꩻသွူ။ လိုꩻပေႏဖုံႏ မဉ်ႏအုံအဝ်ႏဗာႏ အသောင်အရင်ꩻ တရာꩻတတွာတွောင်းမုꩻသားထျꩻလဲ့ အီႏဒါႏလွဉ် အကျင်ꩻတရာꩻတတွာတွောင်းစား၊ လိုꩻပေႏဖုံႏ မဉ်ႏအုံအဝ်ႏဗာႏ ဘေꩻကင်ꩻလိုမ်းဗဉ်ႏမုꩻလဲ့ အီႏဒါႏလွဉ် ထာꩻယွုမ်းအံႏမုꩻ၊ လိုꩻပေႏဖုံႏ မဉ်ႏအုံအဝ်ႏဗာႏ တွမ်ႏသဘော်ꩻဗိုန်မုꩻလဲ့ အီႏဒါႏလွဉ် ဝွေꩻတွမ်ႏဝွေꩻ ထာꩻကျွိုက်ထာꩻစွုမ်းသꩻနဝ်ꩻသွူ၊ လိုꩻပေႏဖုံႏ မဉ်ႏအုံအဝ်ႏဗာႏ အသောင်အရင်ꩻသီး ဖဉ်းမွိုတ်မုꩻ ယွုမ်းအံႏ လက်ခံႏမုꩻလဲ့ အီႏဒါႏလွဉ် လောကတန်အကို အဝ်ႏလိုႏထိုမ်ႏမေတ္တာႏ-ကရိုꩻနဝ်ꩻ ဒင်ႏပျꩻနယ်ဗာႏသွူ။ လိုꩻဘဝသက်တန်ꩻတဗာႏအကို အရွယ်ႏအဝ်ႏ(၁၀)ပါꩻသွူ၊ တဲႏကလွူး ဗꩻနေင်ႏ(၁၀)အရွယ်ႏနဝ်ꩻ ထွာအရွယ်ႏဆား၊ တဲႏနေင်ႏ(၁၀)ဗꩻ(၂၀)ကိုအရွယ်ႏနဝ်ꩻ ထွာအရွယ်ႏပျောႏမွန်း၊ တဲႏနေင်ႏ(၂၀)ဗꩻ နေင်ႏ(၃၀)ကိုအရွယ်ႏနဝ်ꩻ ယောင်ꩻရေꩻအရွယ်ႏ၊ တဲႏနေင်ႏ(၃၀) ဗꩻနေင်ႏ(၄၀)အရွယ်ႏနဝ်ꩻ ထွာအရွယ်ႏအာႏရဲင်ꩻဗွေ၊ တဲႏနေင်ႏ(၄၀)ဗꩻ နေင်ႏ(၅၀)အရွယ်ႏနဝ်ꩻ အရွယ်ႏထာꩻသေဉာဏ်ႏပညာႏဗွေ၊ တဲႏနေင်ႏ(၅၀)ဗꩻ နေင်ႏ(၆၀)အရွယ်ႏနဝ်ꩻ ထွာဒျာႏ အရွယ်ႏနမ်းအာႏဉာဏ်ႏအာႏယွမ်ꩻလင်ꩻစ၊ တဲႏနေင်ႏ(၇၀)ဗꩻ နေင်ႏ(၈၀)အရွယ်ႏနဝ်ꩻ အရွယ်ႏငင်းတကောင်ႏ၊ တဲႏနေင်ႏ(၈၀)ဗꩻနေင်ႏ(၉၀)အရွယ်ႏနဝ်ꩻ ထွာဒျာႏအရွယ်ႏ တဖေင်ꩻတဖင်ꩻ(လိန်းလွုမ်ꩻ)၊ တဲႏနေင်ႏ(၉၀)ဗꩻနေင်ႏ(၁၀၀)အရွယ်ႏနဝ်ꩻ ထွာဒျာႏအရွယ်ႏ အဝ်ႏပြာႏသော့ꩻခင်ႏလမ်းဗေင်ႏကို-အရွယ်ႏအဝ်ႏ(၁၀)ပါꩻနုဲင်းနဝ်ꩻအကျောင်ꩻ သေထွꩻဗာႏနဝ်ꩻသွူ။ (ဝွန်ႏခံႏချက်- အဗွေႏဖြားကတဲမ်းနဝ်ꩻ တဲမ်းမန်းနေးဒျာႏ၊ ယိုကိုနဝ်ꩻ လွောက်ꩻရာꩻ ပြန်ႏပအိုဝ်ႏချာဖေႏနေးအကျောင်ꩻ၊ ငဝ်းတချော်ꩻပြေတဝ်း မဉ်ႏပါစိန်ႏစွော့ꩻလဲ့ သေနာႏစွꩻခွင်ꩻဖေႏသွော့အကျောင်ꩻ)[၁][၂]