လိုꩻဗွန်သင်ႏခဲင်ꩻငတ်ꩻစား
"သိဝထိကသုတ် (သင်ႏခဲင်ꩻအပဲ့စ်ငတ်ꩻမျိုꩻ၊ လိုꩻဗွန်သင်ႏခဲင်ꩻငတ်ꩻစား)" ရဟန်ꩻသီးဖုံႏဟွေး- သင်ႏခဲင်ꩻနဝ်ꩻ အပဲစ်အဝ်ႏငတ်ꩻမျိုꩻ၊ ငတ်ꩻမျိုꩻကရိုꩻနောဝ်ꩻ- ၁။ အသုစိ - ခင်ႏလမ်းကြောင်းစင်မွေးတဝ်း ၂။ ဒုဂ္ဂန္ဓာ - ခင်ႏလမ်းနွုမ်ꩻသေင်တန် ၃။ သပ္ပဋိဘယာ - ခင်ႏလမ်းငမ်းခရာႏတန် ၄။ ဝါဠာနံ အမနုဿာနံ အာဝါသော - တကောင်ႏတကုဲင်အုံ ၅။ ဗဟုဇနော ဇနဿ အာရောဒနော - လိုꩻဖုံႏလွဉ်ငွိုးသော့ꩻထာꩻ။ ရဟန်ꩻသီးဖုံႏဟွေး- ၁။ လောကကိုယို ပုဂ္ဂိုလ်ႏယင်ဟန်ႏနဝ်ꩻ မာꩻထာꩻကုဲင်တဲင် ကာယကံႏကြောင်းစင်တဝ်း၊ ဒေါ့ꩻထာꩻကုဲင်တွော့ꩻ ဝစီꩻကံႏကြောင်းစင်တဝ်း၊ သꩻယူႏထာꩻကုဲင်တွော့ꩻ မနော်ꩻကံႏကြောင်းစင်တဝ်း၊ ပုဂ္ဂိုလ်ႏနဝ်ꩻစားနဝ်ꩻ တွမ်ႏသင်ႏခဲင်ꩻကြောင်းစင်တဝ်းနဝ်ꩻ ဗွန်ဝင်ꩻနောဝ်ꩻသွူ။ ၂။ လောကကိုယို ပုဂ္ဂိုလ်ႏယင်ဟန်ႏနဝ်ꩻ ကာယကံႏကြောင်းစင်တဝ်း၊ ဝစီꩻကံႏကြောင်းစင်တဝ်း၊ မနော်ꩻကံႏကြောင်းစင်တဝ်း၊ အမဉ်ꩻအွီႏတဝ်း၊ ပုဂ္ဂိုလ်ႏစားနဝ်ꩻစားနဝ်ꩻ တွမ်ႏသင်ႏခဲင်ꩻလွီးနွုမ်ꩻသေင်နဝ်ꩻ ပီဝင်ꩻနောဝ်ꩻသွူ။ ၃။ လောကကိုယို ပုဂ္ဂိုလ်ႏယင်ဟန်ႏနဝ်ꩻ မာꩻထာꩻမာꩻကုဲင်၊ ဒေါ့ꩻထာꩻဒေါ့ꩻကုဲင်၊ ကျံႏထာꩻကျံႏကုဲင်တဲင်တွော့ꩻ လိုꩻသီႏလသား လိုꩻဟောဝ်ဖုံႏငမ်း၊ မဉ်လွေꩻထေ့တတ်း၊ ပုဂ္ဂိုလ်ႏနဝ်ꩻစားနဝ်ꩻ တွမ်ႏငမ်းခရာႏသင်ႏခဲင်ꩻ၊ တွမ်ႏလိုꩻလွေꩻထေ့တဝ်း သင်ႏခဲင်ꩻနဝ်ꩻ ဗွန်ပီလို့ဝင်ꩻနောဝ်ꩻသွူ။ ၄။ လောကကိုယို ပုဂ္ဂိုလ်ႏယင်ဟန်ႏနဝ်ꩻ မာꩻထာꩻမာꩻကုဲင်၊ ဒေါ့ꩻထာꩻဒေါ့ꩻကုဲင်၊ ကျံႏထာꩻကျံႏကုဲင်တဲင် ပွိုင်းဝွို့တွမ်ႏထာꩻမာꩻတဲ့ မာꩻဒုက္ခဒါႏလိုꩻ၊ ပွိုင်းဝွို့တွမ်ႏထာꩻဒေါ့ꩻတဲ့ မာꩻခိုးလျားဒါႏလိုꩻ၊ ပွိုင်းဝွို့တွမ်ႏထာꩻကျံႏတဲ့ မာꩻယပ်ꩻသꩻဒါႏလိုꩻ၊ ကွပ်နဝ်ꩻမꩻ ပုဂ္ဂိုလ်ႏနဝ်ꩻစားနဝ်ꩻ ဝင်ꩻငမ်းနုဲင်းစွဉ်ႏ တကောင်ႏတကုဲင်၊ ဝွေꩻသီးနဝ်ꩻ ဗွန်စွဉ်ႏတကောင်ႏတကုဲင် သင်ႏခဲင်ꩻကိုနောဝ်ꩻသွူ။ ၅။ လောကကိုယို ပုဂ္ဂိုလ်ႏယင်ဟန်ႏနဝ်ꩻ မာꩻထာꩻမာꩻကုဲင်၊ ဒေါ့ꩻထာꩻဒေါ့ꩻကုဲင်၊ ကျံႏထာꩻကျံႏကုဲင်တဲင်တွော့ꩻ ပွိုင်းဝွို့တွမ်ႏထာꩻမာꩻမာႏတဲင် ငွိုးလွဉ်ꩻဗာႏဝွေꩻသီး၊ ပွိုင်းဝွို့တွမ်ႏထာꩻဒေါ့ꩻမာႏတွော့ꩻ ငွိုးလွဉ်ꩻဗာႏဝွေꩻသီး၊ ပွိုင်းဝွို့တွမ်ႏထာꩻကျံႏမာႏတဲင်တွော့ꩻ ငွိုးလွဉ်ꩻဗာႏဝွေꩻသီး၊ လောကလိုꩻခမ်းယို သင်ႏခဲင်ꩻနဝ်ꩻ ဝွေꩻလွေꩻလို့ꩻသော့ꩻလိုꩻသီ၊ လိုꩻပေါႏတွိုႏလွေꩻ သင်ႏခဲင်ꩻကိုနောဝ်ꩻ ငွိုးလွဉ်ꩻမွိုးသီတဲ့အဝ်ႏ၊ ငွိုးလွဉ်ꩻဖါသီတဲ့အဝ်ႏ၊ ငွိုးလွဉ်ꩻပိုခိုသီတဲ့အဝ်ႏ၊ ငွိုးလွဉ်ꩻပိုမူႏသီတဲ့အဝ်ႏ၊ ယိုတဲ့ နုဲင်းနဝ်ꩻနေနေ၊ ကွပ်ပွိုးလိုꩻကုဲင်ဖုံႏနဝ်ꩻ ဆွမ်ꩻကျꩻ၊ တွိုႏဝွေꩻသီးထျꩻတဲင် ဝွေꩻသီးနိစ္စက်တွော့ꩻ မွိုးကငွိုးဗာႏထာꩻတဲ့အဝ်ႏ၊ ဖါကငွိုးဗာႏထာꩻတဲ့အဝ်ႏ၊ ပိုကငွိုးဗာႏထာꩻတဲ့အဝ်ႏ။ ကွပ်ပွိုးနဝ်ꩻမꩻ ပုဂ္ဂိုလ်ႏစားနဝ်ꩻနဝ်ꩻ တွမ်ႏထာꩻငွိုးခင်ႏလမ်း သင်ႏခဲင်ꩻနဝ်ꩻ ပီဝင်ꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ပဉ္စကနိပါတ်၊ သိဝထိကသုတ်) လိုꩻတွိုင်ꩻဖေႏနေးကသေနာႏတဲင် တဲမ်းဗာႏနုဲင်းယိုသွူ။ [၁][၂]