လိုꩻမုꩻအုံအောဝ်ႏရေꩻ

"လိုꩻမုအုံအောဝ်ႏရေꩻပညာႏ" "ပညာသမာ အာဘာ နတ္ထိ-ကအီႏဗွိုန်နုဲင်းဒါႏပညာႏနောဝ်ꩻ တမုဲင်ꩻမုဲင်ꩻအဲဉ်ထောဝ်း" ကအီႏတယ်ႏထောင်ႏဗာႏ နဲင်ႏငံႏတနဲင်ႏငံႏယို အခေႏခံႏဗာႏတွမ်ႏ ပညာႏရေꩻမꩻ အီႏခွေါင်ခံႏညဆွာꩻသွူတကာႏတောဝ်း လိုꩻအစွိုꩻအဗူႏဖုံႏယိုလဲ့ ဥစ္စာႏဓန အီႏလွိုင်ႏကွုန်ꩻသာႏယာႏလွဉ်နောဝ်ꩻသွူ။ မဉ်ႏဒေါ့ꩻဗာႏယင်းတနယ်ꩻလဲ့ ခိုးလျားခရာႏ၊ နန်းခရာႏတလိုႏတောဝ်း၊ မဉ်ႏထွို့ꩻဗူႏဒါႏ အစွိုꩻအဗူႏလဲ့ အဆင်ႏပြေႏနောဝ်ꩻသွူ။ ပညာႏရေꩻကရိုꩻဒါႏငေါဝ်းယို အောဝ်ႏကွို့ꩻဒျာႏ သွံဖြုံႏလွုမ်ꩻလဲ့ အခရာႏလုဲင်းတန်နောဝ်ꩻသွူ။ အောဝ်ႏနောဝ်ꩻမꩻ မတ်ဖေႏကတောင်ꩻယိုꩻတဲင် အောဝ်ႏနုဲင်းလယိုသွူ- ပညာႏရေꩻ- လောကုတ္တရာႏပညာႏရေꩻ၊ လောကီႏပညာႏရေꩻ၊ လိုꩻဘဝအဓိပ္ပါယ်ႏအောဝ်ႏအောဝ်ႏ ဖေႏကအုံနွောင်ꩻတဲင် ကယီးနယ်ဖေႏဒါႏ ပညာႏရေꩻ၊ လွူးအီနမ်း ကမ်းအီကြို ပညာႏရေꩻ၊ လောကအုံအောဝ်ႏနယ်ꩻ ပညာႏရေꩻ၊ ဖေႏကလွစ်ထန်ႏလꩻ သံႏသရာႏအရေꩻ၊ နီဘဝယို ဖေႏကဗွေစွုမ်ႏဟောဝ်တဲင် ကအောဝ်ႏတယ်ႏထောင်ႏဒါႏအရေꩻ စတဲင်အရေꩻဖုံႏယိုနောဝ်ꩻသွူ။ အောဝ်ႏနောဝ်ꩻတွော့ꩻ ပထမပညာႏရေꩻကရိုꩻနောဝ်ꩻ တမုဲင်ꩻ? မဉ်ႏဖွင်ꩻထန်ႏအဓိပ္ပါယ်ႏနောဝ်ꩻ အမာႏတွမ်ႏအမဲဉ်ႏ၊ အဟောဝ်တွမ်ႏအကုဲင် ကဝွေႏဖန်ႏနွောင်ꩻနောဝ်ꩻ ဟဲ့ꩻပညာႏနောဝ်ꩻသွူ။ ပညာႏကရိုꩻနောဝ်ꩻ ဆုံးယော့ငါႏသွူတကာႏတောဝ်း သွဉ်ယိုခါ ဒါႏယိုခါ တမွေးတောဝ်းသွူ။ ထူႏဗာႏအခိန်ႏကာႏလတဲ့ ဆေ့ꩻဆေ့ꩻပေႏမွေးတောဝ်း၊ ကွဲးတွော့ꩻ နီမဲဉ်လွူꩻထွားနုဲင်းမုဲင်ꩻလွူꩻထွား အလို့နွောင်ꩻဒါႏနေဟောင်း? လိုနွောင်ꩻတောဝ်းသွူ။ နီထွားလွူꩻတခွုင်းမုဲင်ꩻတဲ့ သေနာႏတခွုင်းမုဲင်ꩻလွုမ်ꩻ၊ ကားကအောဝ်ႏ ပြဲ့ꩻစွုံႏလဲဉ်း နောဝ်ꩻစားလဲ့ တအောဝ်ႏတောဝ်း၊ နုဲင်းယိုခါ ကအောဝ်ႏသွဉ်ထူႏဒါႏ မူလရန်း၊ အထာႏဝရန်း၊ အရန်းထိုဖုံႏနောဝ်ꩻ ဟဲ့ꩻဗာႏတောဝ်းဒွိုန်း ပညာႏစဲစ်စဲစ်နောဝ်ꩻသွူ။ အီႏထင်ႏငါအီတာႏ ထွာအီဒျာႏ အခေႏခံႏသဖော်ꩻတရာꩻနောဝ်ꩻသွူ။ နောဝ်ꩻမꩻ ပညာႏကရိုꩻနောဝ်ꩻ ခွဲထန်ႏယင်းနီခေါဝ်၊ တခါနောဝ်ꩻ လောကုတ္တရာႏပညာႏ၊ တခေါဝ်နောဝ်ꩻ လောကီႏပညာႏနောဝ်ꩻသွူ။ လောကုတ္တရာႏပညာႏနောဝ်ꩻ ပေါႏတဲက်ဆဲင်ႏတောဝ်း တွမ်ႏနီလိတ်ကတူႏစဲဉ်ႏတဲင် လောကုတ္တရာႏပညာႏရေꩻနောဝ်ꩻ ဆဲင်ႏဒျာႏတွမ်ႏဘာႏသာႏရေꩻလွုမ်ꩻနောဝ်ꩻစားလဲ့ တမွေးတောဝ်း၊ ဆဲင်ႏလို့ဒျာႏသွူ။ ယိုခါ ကလွူꩻထွားဗာႏဒါႏ လောကီႏပညာႏယို အီႏဒင်ႏပျꩻနယ်ဖေႏနောဝ်ꩻသွူ။ မဉ်ႏတွက်တွမ်ႏ နီလိုꩻလမ်းသီးနောဝ်ꩻ လောကီႏပညာႏယို ခွဲꩻဗာႏယင်းနီခေါဝ်၊ သက်ဖေႏကမွန်ဗန်အီတာႏ ကလိုႏအပ်ဒါႏ လွူးနမ်းကမ်းကြိုထာꩻဒါႏတွမ်ႏ ဘဝအုံအောဝ်ႏရေꩻပညာႏနောဝ်ꩻသွူ။ ယိုနီဗာႏနောဝ်ꩻ နီလိုꩻသီးတာႏ လိုႏဒါႏငါႏ၊ ဒါႏတောဝ်းလꩻတောဝ်း၊ လိုႏအပ်ငါႏနောဝ်ꩻသွူ။ နောဝ်ꩻနီချက်အကို ဘဝအုံအောဝ်ႏနယ်ꩻပညာႏယို အီႏသွဉ်ဗာႏလဲ့ ပေါင်းယပ်ꩻခုဲင်ႏ၊ ယော့ဆုံးငါႏတဲင် နီလိုꩻသီးဘဝအတာႏလဲ့ အရေꩻတန်ငါႏနောဝ်ꩻ ထာꩻဒါႏပညာႏနောဝ်ꩻသွူ။ လွူးနမ်းပညာႏ မဲဉ်ဒါႏနုဲင်းမုဲင်ꩻဒါႏ ပေါႏတဒါႏတောဝ်း လိုꩻဘဝအုံအောဝ်ႏနယ်ꩻပညာႏနောဝ်ꩻ ထွာဒျာႏလိုꩻတန်ႏဖိုꩻဆေ့ꩻနောဝ်ꩻသွူ။ လွူးနမ်းကမ်းကြိုပညာႏ-ကရိုꩻနောဝ်ꩻ ကအောဝ်ႏသွဉ်ဒါႏကျောင်ꩻကို သိပ္ပံ၊ ဝိဇ္ဇာႏဘာႏသာႏယိုဖုံႏနောဝ်ꩻသွူ။ နီဘဝအုံအောဝ်ႏရေꩻ ဖေႏကတနွောင်းအီဒါႏ ကလိုႏအပ်ဒါႏ အံႏတာႏအွꩻတာႏဖုံႏယို ဖြဲ့ꩻထဲမ်သော့ꩻဖေႏ၊ မဉ်ႏဒေါ့ꩻဗာႏစွဉ်ႏစွဉ်ႏလဲ့ ထုမ်ႏအီရွဉ်တာႏ ပညာႏရေꩻတမျိုꩻနောဝ်ꩻသွူ။ အကွာႏဒျာႏကွို့ꩻ အင်ဂျင်နီယာလဲင်း၊ ဆို့ꩻရုဲင်ရေꩻလဲင်း၊ ဆရာႏဝွန်ႏလဲင်း၊ တရာꩻခြေႏသား နောဝ်ꩻစားလွုမ်ꩻ၊ အဓိကရေႏရွယ်ႏချက်နောဝ်ꩻ လွူးနီနမ်းတာႏဖေႏကလꩻ ထာꩻမာꩻတဗာႏလွုမ်ꩻသွူ။ နီကသွဉ်ဒါႏ ကျောင်ꩻကိုတွမ်ႏ နီကမာꩻလွဉ်ထာꩻမာꩻအလောင်းယို စပ်ဆွိုင်ꩻလို့ဝင်ꩻတဲင် လꩻလွဉ်အခွဲးအကျုံႏ၊ မာႏတခါႏခါႏ၊ မဲဉ်ႏတခါႏခါႏ၊ လွူꩻထွားခါႏခါႏ၊ အခွဲးအကျုံႏထွိုင်ႏအာလွဉ်တဲင် ဒါႏလျင်ႏလွဉ်ဒျာႏနောဝ်ꩻသွူ။ စက်အင်ဂျင်နီယာသားလဲ့ သေနာႏဗာႏစက်ဖဲ့ꩻဆဲင်ႏရာꩻ၊ ပေါႏခွုမ်စာႏရင်ꩻသားလဲ့ ဝွေꩻသေနာႏဗာႏ စာႏရင်ꩻဖဲ့ꩻဆဲင်ႏရာꩻ၊ မဉ်ႏထွာဆရာႏဝွန်ႏတဲ့ လိုꩻဆာယို တဖြာꩻအထွာနုဲင်းမုဲင်ꩻ၊ အီႏဖေႏဗာႏတသီႏအမျိုꩻမုဲင်ꩻကရိုꩻနောဝ်ꩻစားလဲ့ သေနာႏဗာႏသွူ။ နောဝ်ꩻမꩻ ဆရာႏဝွန်ႏဖုံႏ၊ အင်ဂျင်နီယာသားဖုံႏသူꩻနောဝ်ꩻ ဝွေꩻသီးထာꩻမာꩻ ဝွေꩻသီးထာꩻမာꩻဒျာႏ ဆဲင်ႏတောဝ်းတွမ်ႏ လိတ်တဲမ်းဆရာႏထာꩻမာꩻ၊ တဲမ်းလတ်ဆရာႏသီးအတာႏနောဝ်ꩻ လိုႏဒျာႏ တဲမ်းလိတ်ဒါႏလိတ်ပညာႏနောဝ်ꩻသွူ။ လိတ်တဲမ်းဆရာႏတဖြာꩻ အီႏဖောႏဖေႏလိုꩻဆာ တသီႏကရိုꩻနောဝ်ꩻ အယပ်ꩻအခုဲင်ႏအောဝ်ႏတဲင် ဖောႏဖေႏဒါႏတောဝ်းတယောဝ်း အရေꩻတတန်တောဝ်း၊ ကွဲးတွော့ꩻ ဘဝအုံအောဝ်ႏရေꩻပညာႏယို ပသီႏဆရာႏ၊ အင်ဂျင်နီယာ စစွဉ်ႏစက်မုဖဲ့ꩻဆဲင်ႏရာꩻစွုမ်ႏဖြာꩻ ပါတွမ်ႏနီထာꩻလုပ်ꩻသားယိုနောဝ်ꩻ တဲက်ဆဲင်ႏလို့ဒျာႏစွုမ်ႏဖြာꩻ၊ ဒါႏတောဝ်းထွာတောဝ်း နောꩻစားအရန်းစွဉ်ႏသွူ။ နောဝ်ꩻမꩻ ခေတ်ယိုခါနောဝ်ꩻ ဖုန်းခေတ်အင်တာနက်ခေတ်တဲင် နီကမဲဉ်သေရာꩻ၊ ကမဲဉ်ဒါႏရာꩻနောဝ်ꩻ အောဝ်ႏဗွေစွုမ်ႏငါႏနောဝ်ꩻ လိုႏငါႏဒျာႏထူႏဒါႏဒါႏလွုမ်ꩻ၊ ခံႏလို့ဖုန်းဘေ ဒေါ့ꩻရီပါꩻမူႏ အင်တာနက်လောင်းတွမ်ႏ ခံႏလို့ဖုန်းရွဉ် ဗွောင်ထွားအီဒျာႏ နီကလိုႏရာꩻ၊ ကမဲဉ်သေရာꩻ ဗဟုသုတဖဲ့ꩻဆဲင်ႏရာꩻနောဝ်ꩻ အွဉ်ႏထွော့အငိုꩻလꩻနွောင်ꩻတောဝ်းထဲင်းသွူ။ ကျိုꩻစာꩻဒျာႏသွော့ဝင်ꩻအကျောင်ꩻ-