လိုꩻမျိုꩻတောမ်ႏခမ်းထီ
"လိုꩻမျိုꩻတောမ်ႏ ခမ်းထီအတာႏ စဲ့ꩻတပ်မတောႏကရိုꩻနဝ်ꩻ" လိုꩻမျိုꩻတာႏ စွိုးခွိုꩻစဲ့ꩻတပ်မတောႏ၊ ခမ်းထီတာႏ စွိုးခွိုꩻစဲ့ꩻတပ်မတောႏကရိုꩻနဝ်ꩻ- လိုꩻမျိုꩻတမျိုꩻ ခမ်းထီတဖြုံႏကိုယို ဝွေꩻလိုꩻမျိုꩻတောမ်ႏ ဝွေꩻခမ်းထီအကို ကအဝ်ႏဒါႏ ခမ်းသားသီးအတာႏ ဖဝလိုမ်းဗဉ်ႏရေꩻ၊ ယံအုံအဝ်ႏဗာႏ ညိမ်ꩻညိမ်ꩻချံꩻချံꩻအရေꩻ ရဲးကမ်းဖေႏခမ်းသားသီး အန္တရာယ်ႏတူႏ ဒုက္ခဆူႏနာႏအဒေါဝ်ႏဒေါဝ်ႏဖုံႏ၊ ရဲးကမ်းကာႏကွယ်ႏဖေႏ လိုꩻမျိုꩻတောမ်ႏခမ်းထီအတွက်နဝ်ꩻ လိုꩻမျိုꩻစဲ့ꩻမွေးတဝ်းလဲ့ ခမ်းထီစဲ့ꩻတပ်မတောႏယို အဝ်ႏလိုႏအဝ်ႏနဝ်ꩻသွူ။ လိုꩻမျိုꩻတမျိုꩻကိုယို ရဲးကမ်းအီလိုꩻမျိုꩻတာႏ လိုꩻမျိုꩻစဲ့ꩻတပ်မတောႏကရိုꩻယို အဝ်ႏဗာႏဒျာႏရင်ꩻသွူ၊ ခမ်းထီတဖြုံႏကိုယို ရဲးကမ်းအီခမ်းထီတာႏ ခမ်းထီစဲ့ꩻတပ်မတောႏယို အဝ်ႏဗာႏဒျာႏရင်ꩻသွူ၊ ခမ်းထီကို ကအဝ်ႏခမ်းသားသီး တဖြာꩻတောမ်ႏတဖြာꩻ အံႏနွောင်ꩻလွဝင်ꩻ ဖေႏကအဝ်ႏဗာႏမွုန်း၊ တခွန်ꩻစွန်ထူႏလွဝင်ꩻထာꩻခြိုꩻ အဝ်ႏဗာႏမွုန်း၊ ဥပဒေႏဒို့ꩻတခြို့မုယို ခမ်းသားစွုမ်ႏဖြာꩻ ယအုံကွူꩻဗာႏနုဲင်းနုဲင်းတွာတွာနဝ်ꩻ ကထွာဒါႏ ထိန်ꩻတီတရာꩻဥပဒေႏ ဒို့ꩻတခြို့ရေꩻတာႏ ခမ်းထီယယ်ꩻယိုဖုံႏ အဝ်ႏဗာႏနဝ်ꩻသွူ။ နဝ်ꩻမꩻ ကမ္ဘာႏလောင်း ခမ်းထီတွိုင်ꩻ ခမ်းထီတွိုင်ꩻ ကဲဉ်းအာအာနဝ်ꩻ ခမ်းထီစဲ့ꩻတပ်မတောႏယို အဝ်ႏအွဉ်ႏဗာႏလွနဝ်ꩻသွူ၊ မြန်မာခမ်းထီယိုလဲ့ ရဲးကမ်းခမ်းထီတာႏ၊ ခမ်းသားသီး ဘဝလိုမ်းဗဉ်ႏမု အဝ်ႏအဝ်ႏယံအုံအဝ်ႏဗာႏရေꩻ၊ ခမ်းသားသီး ညိမ်ꩻညိမ်ꩻချံꩻချံꩻ ယံအုံအဝ်ႏဗာႏရေꩻ-စတဲင်စတဲင် ရဲးကမ်းအီအရေꩻဖုံႏယိုတာႏ အွဉ်ႏဗာႏမြန်မာခမ်းထီ စဲ့ꩻတပ်မတောႏနဝ်ꩻသွူ။ မိဉ်ႏထွားချာ မြန်မာခမ်းထီ စဲ့ꩻတပ်မတောႏနဝ်ꩻ မြန်မာခမ်း အဝ်ႏကိုလိုနီအိင်္ဂလိပ်သီးစူကို ယံလွစ်ထန်ႏရေꩻတာႏ တောႏလန်ႏတဲင် မြန်မာခမ်းထီယို နေင်ႏ ၁၉၄၈-ဗာႏ၊ ဇန်နဝါရီလာ ၄-နီꩻနဝ်ꩻ လွစ်ထန်ႏလꩻအိင်္ဂလိပ်သီးစူကို၊ လꩻလွေꩻလွတ်လပ်(လွစ်တခြင်)ရေꩻနဝ်ꩻသွူ။ နဝ်ꩻမꩻ စဲ့ꩻတပ်မတောႏယို ခမ်းထီဖေႏကသုမ်ꩻထိုꩻဗာႏမွုန်း၊ ခမ်းထီဖေႏကထိုꩻမားဗာႏမွုန်း၊ လိုꩻမျိုꩻဖေႏကထိုꩻမားဗာႏမွုန်းနဝ်ꩻ ထိန်ꩻတီရဲးကမ်းဖေႏတသေႏသေႏဗာႏ ခမ်းထီတောမ်ႏလိုꩻမျိုꩻအတာႏဒျာႏနဝ်ꩻသွူ။ မိဉ်ႏထွားယင်း နုဲင်းမြန်မာခမ်းထီအကို ကထွာဒါႏ ခမ်းရင်ꩻသားသီး လိုꩻမျိုꩻဖုံႏယိုလဲ့ ဝွေꩻလိုꩻမျိုꩻယို ဝင်ꩻဖေႏကအံႏနွောင်ꩻဗာႏမွုန်း၊ ဝင်ꩻဖေႏကထီႏပေႏဗာႏမွုန်း၊ လိုꩻမျိုꩻယံကထိုꩻမားဗာႏမွုန်းနဝ်ꩻ ခမ်းရင်ꩻသားသီးနဝ်ꩻ လိုꩻမျိုꩻစဲ့ꩻတပ်မတောႏ အဝ်ႏအွဉ်ႏလွနဝ်ꩻသွူ။ နဝ်ꩻအကို ကထွာဒါႏ ပအိုဝ်ႏလိုꩻမျိုꩻသီးလဲ့ လိုꩻမျိုꩻအတာႏ ပအိုဝ်ႏလိုꩻမျိုꩻစဲ့ꩻတပ်မတောႏယို မိဉ်ႏထွားချာယင်းသမဲင်ꩻကိုနဝ်ꩻ ခေတ်အလွောက်ꩻ ကကျုံႏခွဲးဗာႏဒါႏ ပအိုဝ်ႏခမ်းသားအတာႏ အန္တရာယ်ႏဖုံႏယို ရဲးကမ်းကာႏကွယ်ႏအီတာႏဒျာႏနဝ်ꩻသွူ။ နုဲင်းပဒေႏသရာဇ်ခေတ်နဝ်ꩻ ပဒေႏသရာဇ်စနစ်ယို ပအိုဝ်ႏလိုꩻမျိုꩻအတာႏ လိုꩻမျိုꩻထိုꩻမားအီဒါႏ ဒေါဝ်ထီသူႏရာႏ ယာလံဖေင်ꩻဖင်ꩻ ထာꩻတောႏထာꩻလောင်ꩻဖုံႏ စတဲင်တောမ်ႏစနစ်ကုဲင်ယို တွိုက်ꩻပြုဲင်ယားပြင်ꩻအီ ခမ်းသားသီးအကျင်ꩻ ထာꩻမာꩻနဝ်ꩻသွူ၊ တောမ်ႏယင်းခမ်းသားသီး ကဆို့ꩻကရုဲင်ဒါႏ ဗွူ ဟူ ဗေဖုံႏယို ကွီတမွိုꩻတမာꩻအခွဉ်ႏဖုံႏနဝ်ꩻသွူ၊ ကောပ်အဝ်ႏစနစ်ကုဲင်ဆလ နေင်ႏလာမွူးနီꩻညဆွာꩻ တသယ်ꩻခံႏနွောင်ꩻတဝ်းတဲင် တောႏလန်ႏရေꩻကရိုꩻနဝ်ꩻ ထွိုင်ႏမာꩻအဝ်ႏလွဉ်ဗာႏနဝ်ꩻသွူ။ အဝ်ႏနဝ်ꩻထွူ ဆုဲင်ꩻနဝ်ꩻ တခေတ်ထွူတခေတ် ပအိုဝ်ႏလိုꩻမျိုꩻတောႏလန်ႏရေꩻ အသွုပ်သွုပ်နဝ်ꩻ အဝ်ႏလွဉ်နဝ်ꩻသွူ၊ မိဉ်ႏထွားချာ ပအိုဝ်ႏလိုꩻမျိုႏတောႏလန်ႏရေꩻကိုနဝ်ꩻ ပအိုဝ်ႏလိုꩻမျိုꩻ စဲ့ꩻတပ်မတောႏယို ထွာဒျာႏရဲးကမ်းဖေႏ ပအိုဝ်ႏခမ်းသားအတာႏ ပအိုဝ်ႏလိုꩻမျိုꩻအတာႏ ပအိုဝ်ႏစဲ့ꩻတပ်မတောႏနဝ်ꩻသွူ၊ ယိုနဝ်ꩻ သမဲင်ꩻကိုသွူ။ ဗꩻတွိုႏဟန်ႏသနီꩻ ပအိုဝ်ႏစွိုးခွိုꩻစဲ့ꩻမတောႏ အဝ်ႏနေဒွုန်းဒျာႏနဝ်ꩻသွူ။ နဝ်ꩻမꩻ ဟန်ႏသနီꩻ ပအိုဝ်ႏစွိုးခွိုꩻစဲ့ꩻတပ်မတောႏနဝ်ꩻ အဝ်ႏမာꩻထာꩻမာꩻအမျိုꩻမုဲင်ꩻဟောင်း၊ ကရိုꩻဒါႏနုဲင်းချာယိုဟွဉ်ႏဖုံႏအတွိုင်ꩻ ပအိုဝ်ႏလိုꩻမျိုꩻအတာႏ မွေးနေဟောင်း၊ ပအိုဝ်ႏခမ်းသားသီး ဘဝလိုမ်းဗဉ်ႏရေꩻတာႏ၊ ပအိုဝ်ႏခမ်းသားသီး ယံအုံအဝ်ႏဗာႏညိမ်ꩻညိမ်ꩻချံꩻချံꩻတာႏ၊ ပအိုဝ်ႏလိုꩻမျိုꩻယံထိုꩻမားဗာႏမွုန်းတာႏ မွေးနေဟောင်း။ ပအိုဝ်ႏလိုꩻမျိုꩻစဲ့ꩻတပ်မတောႏ၊ ပအိုဝ်ႏခမ်းသားစဲ့ꩻတပ်မတောႏ အမိဉ်ꩻနဝ်ꩻ ခံႏထူႏနုဲင်းနဝ်ꩻအတွိုင်ꩻ အဝ်ႏလိုႏရဲးကမ်း ကာႏကွယ်ႏဖေႏဗာႏဒျာႏ ပအိုဝ်ႏခမ်းသားသွူ။ အမိဉ်ꩻနဝ်ꩻ ခံႏထူႏသွူခမ်းသားစဲ့ꩻတပ်မတောႏနုဲင်းနဝ်ꩻတွဗာ့ꩻ မိဉ်ႏအဝ်ႏလွေꩻရဲးကမ်းတေားဒျာႏ လိုꩻတစုတဗူႏအကျိုꩻစီꩻပွါꩻ၊ မိဉ်ႏအဝ်ႏလွေꩻရဲးကမ်းဖေႏဒျာႏ ကုမ္ပဏီႏတဗာႏဗာႏအကျိုꩻစီꩻပွါꩻနဝ်ꩻ တထွာသင်ꩻတဝ်း လိုꩻမျိုꩻစဲ့ꩻတပ်မတောႏနဝ်ꩻသွူ။ ထွာဒျာႏ လိုꩻတစုတဗူႏ လိုမ်းဗဉ်ႏရေꩻသား၊ ထွာဒျာႏ ကုမ္ပဏီႏ ထာꩻထွဉ်ႏအံႏပွေါးဂိတ်သား၊ ကုမ္ပဏီႏလိုမ်းဗဉ်ႏရေꩻသားနဝ်ꩻသွူ။ ပအိုဝ်ႏဒေႏသကို ကဲဉ်းအာအာနဝ်ꩻ ပအိုဝ်ႏခမ်းသားတောမ်ႏ ပအိုဝ်ႏစဲ့ꩻတပ်မတောႏယို ကျုံႏတလူႏဗာႏချာဒျာႏနဝ်ꩻသွူ၊ အခေႏနေႏနုဲင်းနဝ်ꩻခိန်ႏနဝ်ꩻ ပအိုဝ်ႏခမ်းသားတောမ်ႏ ပအိုဝ်ႏစဲ့ꩻတပ်မတောႏယို တဖြာꩻတောမ်ႏတဖြာꩻ အီႏအာႏကွိုꩻလူႏလုဲင်ႏတဝင်ꩻ၊ တဖြာꩻတောမ်ႏတဖြာꩻ အီႏရဲးကမ်းလူႏလုဲင်ႏတဝင်ꩻ တအဝ်ႏတဝ်းသွူတကာႏတဝ်း အချင်ꩻချင်ꩻ ထွာထဲင်းဒျာႏ ခွေဟနာႏဟနဝ်ꩻသွူ။ လိုꩻမျိုꩻမုဲင်ꩻတယဝ်း ခမ်းထီမုဲင်ꩻတယဝ်း ခမ်းသားတောမ်ႏစဲ့ꩻသားနဝ်ꩻ အဝ်ႏထီꩻထီꩻသင်ꩻသင်ꩻတဝင်ꩻမꩻ၊ ခမ်းသားတောမ်ႏစဲ့ꩻယို အဝ်ႏတဖဲ့ꩻချင်ႏမꩻ၊ လိုꩻမျိုꩻနဝ်ꩻ ခမ်းထီနဝ်ꩻနဝ်ꩻ အာႏရဲင်ꩻအီႏအဝ်ႏနဝ်ꩻသွူ။ စွဉ်ꩻသွီႏစွဉ်ꩻသက် ခံႏစွိုးခွိုꩻတာႏ၊ ရေႏလိုꩻမျိုꩻအတွက်တဲင် ကဖေႏအပ်မာꩻလွေꩻဒါႏ စွိုးခွိုꩻစဲ့ꩻသားသီးသꩻဓာတ်နဝ်ꩻတဲ့ အံႏဖြာႏထူႏဂုဏ်ႏ တသွတ်ꩻနွောင်ꩻတဝ်းသွူ၊ ကွဲးတွော့ꩻ ကထွာဒါႏ နဲင်ႏငံႏရေꩻသားယဟန်ႏတောမ်ႏ စီꩻပွါꩻရေꩻစူတန်သား ယဟန်ႏဖုံႏယို အသုံꩻချ အသုံꩻအံႏဒါႏ လိုꩻသꩻရက်စွိုးခွိုꩻအစဲစ်အမဲန်ႏသား စူဗောင်အာႏရဲင်ꩻနဝ်ꩻ အဝ်ႏလိုႏထွာသင်ꩻတဝ်း ခမ်းသားငေါဝ်းအယ်ဒီတာစွိုꩻ တဲမ်းဖြုဲင်ꩻဒင်ႏနယ်လွေꩻဗာႏနဝ်ꩻသွူ။[၁][၂]