လိုꩻယွဲသီးတာႏငေါဝ်းတမာ

"လိုꩻယွဲးသီးတာႏ ငေါဝ်းတမာ" လိုꩻယွဲးကရိုꩻယို ထွာအနာႏဂတ်အာႏရဲင်ꩻ၊ စွိုးခွိုꩻဘာႏသာႏ သာႏသနာႏဝွန်ႏဖုံႏယို လုဲင်ႏပြေင် အီႏထူႏသွုပ်အီသား၊ တနီꩻခါ အီႏသဲင်ꩻထွာ ခွိုꩻခေါင်းဆောင် အွဉ်ငါသား၊ အီႏဆောင်ႏရွက် ခမ်းထီရပ်ရာႏ၊ ဒုံဆောင်ႏအကျိုꩻတရာꩻနုဲင်းနောဝ်ꩻသွူ။ ခေတ်ကရိုꩻယိုလဲ့ အောဝ်ႏပြောင်ꩻလုဲင်ႏလွေꩻမပ်မပ်၊ နဲင်ႏငံႏရေꩻလဲ့သင်၊ စီꩻပွာꩻရေꩻလဲ့သင်၊ လိုꩻအုံအောဝ်ႏမုꩻလဲ့သင် ခေတ်ထီထွတ်ꩻတဖူꩻခြောင်ꩻ အောဝ်ႏပြောင်ꩻသေႏသေႏနောဝ်ꩻသွူ။ ခေတ်အလောင်း ပျဿနာႏကရိုꩻယိုလဲ့ တစွိုးတမျိုꩻ အောဝ်ႏလွဉ်တသေႏသေႏ၊ နီလိုꩻသီးလဲ့ အောဝ်ႏဖြေႏသျင်ꩻဗာႏ စွုမ်ႏနီꩻစွုမ်ႏဟာနောဝ်ꩻသွူ၊ ပညာႏမဉ်ႏအောဝ်ႏ ဖြေႏသျင်ꩻယိုꩻဒါႏ၊ ပညာႏမဉ်ႏဆေ့ꩻ အမာႏအမဲဉ်ႏသေတောဝ်းတဲင် ရော့ꩻယပ်ꩻတောဝ်းတဲ့ ယပ်ꩻဗာႏဒါႏသွူ၊ တခမ်းတွမ်ႏတခမ်း၊ တဒေႏသတွမ်ႏတဒေႏသ အုံကင်ꩻညာꩻဝင်ꩻတဲ့ တလꩻတောဝ်းဒွုမ်၊ အရေꩻအရာႏကိစ္စပေါင်ꩻစွုမ်ႏ အောဝ်ႏသွုပ်ဆွိုက်သွုပ်သံႏဗာႏ၊ နီတွမ်ႏနီ နီအုံဒျာႏလဲ့ ပျဿနာႏကိစ္စပေႏတန် အောဝ်ႏဖျော်လွဉ်ဒါႏ နီတခါꩻငွါနောဝ်ꩻမꩻ အုံဗွီႏဗွီႏ ဗွိုန်နုဲင်းပွိုင်းလဲင်ႏ၊ အုံယေန်သူႏ ဗွိုန်နုဲင်းခေတ်စခါ တလꩻတောဝ်းဒွုမ်လာꩻလာꩻကရိုꩻယို အောဝ်ႏလိုႏသေနာႏ၊ အောဝ်ႏလိုႏသဖော်ꩻဖြောင်ငါႏနောဝ်ꩻသွူ။ ခေတ်ကာႏလ ကွီကော့ꩻမောင်ꩻချက်အလꩻ နီလိုꩻယွဲးသီးယိုနောဝ်ꩻ တနီꩻခါ အီႏထွာလွဉ် စွိုးခွိုꩻ ဘာႏသာႏ သာႏသနာႏ ထာꩻအာႏကွိုꩻ၊ အီႏဆောင်ႏရွက်ခွုမ်မာꩻဗာႏ စွိုးခွိုꩻ ဘာႏသာႏ သာႏသနာႏ ဒုံဆောင်ႏရပ်ရာႏအကျိုꩻဖုံႏတဲင် စွန်ꩻအာႏတလာလာ ဖေႏနေးကဆောင်ႏရွက်နွောင်ꩻ၊ စွန်ꩻအာႏလဲင်ꩻလဲင်ꩻ ဖေႏကဆောင်ႏရွက်နွောင်ꩻထင်ႏနောဝ်ꩻ ကအောဝ်ႏလိုႏဒါႏထွိုက်ဒါႏသင်ꩻဒါႏ ပညာႏဖုံႏယို အောဝ်ႏလိုႏသွဉ်ခါꩻ၊ အောဝ်ႏလိုႏလွူꩻခါꩻသွူ။ မဉ်ႏအုံဖွီ အုံပျင်ႏဗော့ꩻထာꩻ ပွိုင်းလဲင်ႏတဲးတဲ့ ဝင်ꩻဒေါ့ꩻမုဲင်ꩻတဲ့အွူ၊ ဝင်ꩻထွူမုဲင်ꩻတဲ့အော်၊ ကွပ်တသေထွꩻတောဝ်း ဗွိုန်နုဲင်းဝင်ꩻတဲင် ကအောဝ်ႏလိုႏလꩻထွိုက်လꩻသင်ꩻ၊ ကထွာထွိုက် ကထွာသင်ꩻဒါႏ နီခမ်းထီ၊ နီစွိုးခွိုꩻ ဘာႏသာႏ သာႏသနာႏအကျိုꩻဖုံႏယို မဲ့ꩻအောဝ်ႏဒါႏ ဝင်ꩻစူဆꩻလသွူ။ နီတွမ်ႏနီ နီအကျိုꩻတရာꩻယို ဖေႏနေးကဖန်ဆင်ꩻနွောင်ꩻနောဝ်ꩻ ခွိုꩻသွုပ်တသာ အထီအသွီႏအောဝ်ႏတအောဝ်ႏတောဝ်းအလောင်း အရေꩻတန်ငါႏသွူ၊ မဲဉ်ထွားခမ်းမုဲင်ꩻထီမုဲင်ꩻ လိုꩻမျိုꩻမုဲင်ꩻတယောဝ်း ကတိုꩻတက်ထင်ႏထိုဒါႏ ခမ်းထီနောဝ်ꩻ လိုꩻယွဲးအထီအသွီႏယို ဝင်ꩻအွဉ်ႏမွေးစွဉ်ႏအရေꩻ၊ ဝင်ꩻသတ်မတ်လွေꩻနေးစွဉ်ႏ ကိစ္စတန်သွူ။ တခမ်းတွမ်ႏတခမ်း၊ တနယ်ႏတွမ်ႏတနယ်ႏ၊ တဒေႏသတွမ်ႏတဒေႏသ ခေးပြဲင်ႏမုꩻအာႏသန်လွဉ်ꩻငါႏ မရေႏမရာႏတဲင် လိုꩻယွဲးအထီအသွီႏ ကဆေ့ꩻဒါႏ ခမ်းထီနောဝ်ꩻ၊ လိုꩻမျိုꩻနောဝ်ꩻနောဝ်ꩻ လဲဉ်းဆုဲင်ꩻဒါႏဝင်ꩻ၊ ကိစ္စရေꩻရာႏမန်ႏသမျ ခံႏဩခဗာႏဒျာႏ ဝင်ꩻခမ်းတန်၊ ဝင်ꩻလိုꩻမျိုꩻနောဝ်ꩻသွူ။ နောဝ်ꩻမꩻတဲင် နီသွဉ်းသီး ပအိုဝ်ႏလိုꩻယွဲး အခေႏနေႏနောဝ်ꩻကား အောဝ်ႏနေးမုဲင်ꩻ- နီသွဉ်းသီး ပအိုဝ်ႏလိုꩻယွဲး အထီအသွီႏယို ယံကယ်ꩻလဲဉ်းဝင်ꩻနဲ့၊ နီသွဉ်းသီး ပအိုဝ်ႏလိုꩻယွဲးဖုံႏယိုနောဝ်ꩻ အထီထွူႏလဲဉ်းနဲ့ကရိုꩻယို အောဝ်ႏလိုႏသွုံꩻသပ်ငါႏလဲဉ်းသွူ၊ ကအောဝ်ႏလဲဉ်းသားနောဝ်ꩻဆေ့ꩻ၊ ကအောဝ်ႏလိုႏသားနောဝ်ꩻအာ၊ အောဝ်ႏထွာနေဒွိုန်းကနုဲင်းနောဝ်ꩻကရိုꩻယို ခွေသီနီနာꩻ အောဝ်ႏသေဒျာႏ ပငါပရာꩻသွူ။ လိုꩻယွဲးသီး အထီအသွီႏကအောဝ်ႏအာဒါႏအရပ်နောဝ်ꩻ ဟမ်းပေါင်းတိုꩻတက်၊ ပညာႏအထီအသွီႏ ကဆေ့ꩻဒါႏအရပ်နောဝ်ꩻ နန်ꩻတိုꩻတက်၊ အောဝ်ႏထွာလွေꩻနုဲင်းနောဝ်ꩻသွူ။ ပညာႏအထီအသွီႏကရိုꩻယို အောင်ႏလိတ် ဒါႏလိတ်နေးနောဝ်ꩻလွုမ်ꩻတဲ့ တကာႏတောဝ်း တဖြာꩻတွမ်ႏတဖြာꩻ သွုပ်သံႏအီဝင်ꩻ အထီအသွီႏ၊ ပျဿနာႏကိစ္စပေႏတန် တွိုင်ႏပင်ႏအုံကွံ ဖြေႏသျင်ꩻအီဒါႏ စစွဉ်ႏခေတ်ကာႏလ ကအောဝ်ႏလိုႏအပ်ဒါႏ အထီအသွီႏဖုံႏယိုတဲ့ ဟဲ့ꩻဗာႏအထီအသွီႏနေနေသွူ။ ဒေါ့ꩻဒါႏ၊ တဲမ်းဒါႏ ဝင်ꩻဘာႏသာႏ ငေါဝ်းငွါ(အင်္ဂလိပ်၊ ဂျပန်၊ ခယ်ႏ၊ ဂျာမနီ)စစွဉ်ႏ Globalskiklls ပဲင်ꩻယို အောဝ်ႏလိုႏဒါႏငါႏ၊ ကွန်ပျူတာပဲင်ꩻ (Computing Skill)တဲ့ အောဝ်ႏလိုႏဒါႏ၊ တဲမ်းထွို့ꩻအစီႏအစဲဉ်ႏတဲင် မာꩻလွေꩻဒါႏထာꩻမာꩻ Action Plan ယိုတဲ့ အောဝ်ႏလိုႏဒါႏ၊ ယူႏတွေꩻကဉ်ꩻစာꩻမုꩻ Critical Thinking ယိုတဲ့ အောဝ်ႏလိုႏထင်၊ သွုပ်သံႏဒါႏဝင်ꩻ Communiction Skill ယိုတဲ့ အောဝ်ႏလိုႏဒါႏ၊ သꩻဓာတ်ရုဲင်းထင်ထင် Enthusiasm ယိုတဲ့ အောဝ်ႏလိုႏအောဝ်ႏငါႏ၊ စီႏမံႏဖန်းဖြယ်ရေꩻခရာႏ (မာꩻညီꩻဝင်ꩻ အမျာꩻထာꩻမာꩻ၊ အုပ်ချွုတ်ရေꩻရာႏကိစ္စ၊ တွမ်ႏမဟာဗျူဟာယံယံတဲင် မာꩻလွေꩻနွောင်ꩻထာꩻမာꩻ) Managementskillယိုတဲ့ အောဝ်ႏလိုႏသေ၊ သꩻဓာတ်တဉ်ႏခွေါင်မုꩻ၊ လောကဓံႏတံႏ ခံႏနွောင်ꩻမုꩻ သꩻဓာတ်အာႏ Stress Tolerance ယိုတဲ့ အောဝ်ႏလိုႏအောဝ်ႏငါႏသွူ။ အထီအသွီႏကရိုꩻယို ဒါႏလိတ် လꩻဘွဲ့လွုမ်ꩻတဲ့ တမွေးတောဝ်း၊ ပွိုင်းဝွို့တွမ်ႏ တဖြာꩻစီႏ ကအောဝ်ႏလိုႏဒါႏ အထီအသွီႏ နုဲင်းဆꩻကီယို မဉ်ႏအောဝ်ႏမꩻ မဉ်ႏကျိုꩻဆောင်ႏ စွိုးခွိုꩻ ဘာႏသာႏ သာႏသနာႏထာꩻမာꩻကိစ္စနောဝ်ꩻ အောင်ႏမျင်ႏယိုꩻငါႏသွူ၊ ခေတ်ထီထွတ်ꩻယို တအုံစွူတောဝ်း၊ အောဝ်ႏပြောင်ꩻလုဲင်ႏတသေႏသေႏတဲင် ခေတ်အလွောက်ꩻ ကိစ္စပေႏတန် ခွုမ်စံႏဆောင်ႏရွက် ဖေႏကနွောင်ꩻနောဝ်ꩻ တွမ်ႏခေတ်ကအောဝ်ႏလိုႏဒါႏ အထီအသွီႏယို မဉ်ႏအောဝ်ႏမꩻ အဆင်ႏပြေႏလꩻကရိုꩻယို ခေတ်လိုꩻယွဲးဖုံႏ အောဝ်ႏလိုႏသေနာႏ သဖော်ꩻဖြောင်ငါႏသွူ။ ထင်ႏတက္ကသိုလ်ႏ လꩻလဲဉ်းဘွဲ့ရိုꩻကီနုဲင်းနောဝ်ꩻလဲ့ ထွိုင်ႏတွိုႏအထန်ႏဖဲ့ꩻ ထာꩻမာꩻခွင်ႏကိုနောဝ်ꩻ ဝင်ꩻအောဝ်ႏလိုႏဒျာႏ စွန်ꩻထီထင်၊ သꩻဓာတ်မဲဉ်ႏစားနုဲင်းနောဝ်ꩻဒျာႏတဲင် "နီယိုလꩻလဲဉ်းဘွဲ့၊ နီယိုယံငါႏလဲဉ်း"ယူႏနုဲင်းနောဝ်ꩻတဲ့ တလꩻတောဝ်းဒွိုန်းသွူ၊ ခေတ်ယိုခါ အခေႏအနေႏနောဝ်ꩻ အထီအသွီႏယို ယိန်းအရေꩻတန်တန်ကရိုꩻယို အောဝ်ႏလိုႏသေနာႏငါႏသွူ၊ ထင်ႏတက္ကသိုလ်ႏ အခိန်ႏလင် သွဉ်ထူႏပါ ပညာႏတစွိုးစွိုးမꩻ အနာႏဂတ်အဆင်ႏပြေႏလꩻသွူ။ အရွယ်ႏအောဝ်ႏဟောဝ်ခိန်ႏ အခိန်ႏလို့ဗော့ꩻထာꩻရက်၊ ထာꩻပျောႏလွုမ်ꩻနောဝ်ꩻ တနီꩻနီꩻ တခိန်ႏခိန်ႏမဲ့ꩻ လဲဉ်းဆုဲင်ꩻထိုꩻဝင်ꩻ၊ ဝင်ꩻလိုꩻမျိုꩻ လိုꩻယွဲးဖုံႏ အောဝ်ႏကျိုꩻစာꩻခေ့ꩻလေနီꩻနာꩻ တွိုႏနီနာꩻ အောဝ်ႏနေဒွိုန်းက ထာꩻပျောႏခြာနောဝ်ꩻ တထွာထွိုက်တောဝ်းနောဝ်ꩻသွူ။ လိုꩻဖြားလိုꩻတန်ဖုံႏနောဝ်ꩻလဲ့ အောဝ်ႏလိုႏစွိႏထင်ႏငါႏ လိုꩻယွဲးစူ၊ အောဝ်ႏလိုႏမူဖေႏငါႏ လိုꩻယွဲးသီးစွန်ꩻထီ၊ ဖေႏနေး ကထွာလွဉ် လိုꩻယွဲးအထီထွူႏစား ကဲဉ်းအာအာနောဝ်ꩻ အောဝ်ႏလိုႏမာꩻဖေႏသွူ။ နောဝ်ꩻမꩻ ခွိုꩻနွယ်ႏပအိုဝ်ႏ လိုꩻယွဲးဖုံႏဟွေး- နမ်းတွမ်ႏနမ်းတဲ့ ဖေႏကသေချာ၊ နီနမ်းအောဝ်ႏလိုႏ အထီအသွီႏနုဲင်းမုဲင်ꩻတဲ့ အောဝ်ႏလိုႏမူ၊ နီစူနွောင်ꩻရာꩻ တခွိုင်းမုဲင်ꩻလဲ့ ထေင်းထံႏကိုသွော့ အမျာꩻထာꩻမာꩻ၊ တနီꩻခါ ဖေႏနေးကထွာနွောင်ꩻ စွိုးခွိုꩻ ဘာႏသာႏ သာႏသနာႏအတာႏ အာႏကွိုꩻခရာႏစူဗောင်တန်ဖုံႏအကျောင်ꩻ တဲမ်းဖြုဲင်ꩻနယ်ဗာႏ တခွိုင်းယိုသွူ။