လိုꩻယွဲးတွမ်ႏစီꩻကန်ꩻ
"လိုꩻယွဲးတွမ်ႏစီꩻကန်ꩻ" လိုꩻယွဲးသီး နမ်းရင်ꩻအထီအသွီႏဖုံႏ ဖေႏနေးကဟဝ်လွဉ် ကအဝ်ႏလိုႏမွဉ်းဖျင်ဖေႏဒါႏ အခင်ႏမွဉ်နဝ်ꩻ အဝ်ႏလိုႏမွဉ်းဖျင်ဖေႏဒျာႏ အွိုးလမ်းကိုသွူ၊ ကအဝ်ႏလိုႏလွူꩻကျင်ꩻဖေႏဒါႏ အလောင်ႏအလင်ဖုံႏလဲ့ မာꩻဖေႏဗာႏဒျာႏ အွိုးလမ်းကိုကာႏသွူ၊ လိုꩻယွဲးသီးအဟဝ်အကုဲင်နဝ်ꩻ အဝ်ႏဒင်ႏဒျာႏ အွိုးလမ်းကို ကမွဉ်းဖျင်ကသွဉ်ဖေႏအလောင်းဖုံႏသွူ။ အခင်ႏမွဉ်ႏအွဉ်ႏ အဝ်ႏလမ်းကိုကသွဉ်ဖေႏအလောင်းနဝ်ꩻတဲင် တွိုႏကျောင်ꩻကိုခိန်ႏနဝ်ꩻ ဆရာႏမွဉ်ႏဖျင်တဲႏသွုပ်လွေꩻယင်း၊ မဉ်ႏတလꩻသေꩻခါꩻတဝ်း အခင်ႏမွဉ်ဟဝ် အွိုးလမ်းကိုနဝ်ꩻ အွိုးကျောင်ꩻကို ဆရာႏအီႏဖျင်စွို့ꩻဗာႏ တယိုꩻတဝ်း၊ ယိုခါ လိုꩻယွဲးသီး ကထွာဗာႏအမုꩻနဝ်ꩻ ကွပ်စွဉ်ႏမွိုးဖါသီးထွားလွိုဒျာႏ၊ လိုꩻပေႏသီးယို တဲႏစွဉ်ႏပေႏပေႏခါကာႏ "ယိုနဝ်ꩻ အမဲဉ်ႏဖုံႏ၊ ယိုဖုံႏနဝ်ꩻ အမာႏ" ဖေႏကဒေါ့ꩻဒျာႏသွော့ငဝ်းမဲဉ်ႏနဝ်ꩻ အဝ်ႏလိုႏသွဉ်ဖေႏသွူးစွဉ်ႏနဝ်ꩻသွူ။ ဖေႏနေးကရုဲင်းထင်နဝ်ꩻလဲ့ သွဉ်ဖေႏဗာႏ၊ ဖေႏနေးကစွဲးကမ်းဒါႏ လိုꩻအာႏပေႏသားလဲ့ သွဉ်ဖေႏဗာႏ၊ ဖေႏကယေန်ႏငဲးနဝ်ꩻလဲ့ သွဉ်ဖေႏဗာႏ၊ လိုꩻသီးကျင်ꩻဝတ်တွမ်ႏ ပုဂ္ဂိုလ်ႏဆဲင်ႏရာꩻ အထီအသွီႏယံဖုံႏ ဖေႏကထင်ႏထိုနဝ်ꩻလဲ့ မွဉ်းဖျင်သွဉ်ဖေႏလွဗာႏ၊ ဖေႏနေးလိုꩻယွဲးသီး ကလက်ခံႏလွဉ် ထာꩻယူႏထာꩻတွေꩻဟဝ်နဝ်ꩻ အရေꩻတန်အဝ်ႏလိုႏသွဉ်ဖေႏငါႏနဝ်ꩻသွူ။ ဖေႏနေးအသꩻ ကမဉ်ခွုမ်စံႏငီꩻတွမ်ႏ လိုꩻအသောင်အရင်ꩻဖုံႏနဝ်ꩻ သွဉ်ဖေႏဗာႏ၊ ဒီမိုကရေစီ အခင်ႏမွဉ်လိုꩻဘဝအကို အခင်ႏမွဉ်တဗာႏကိုပေႏငါလဲ့ ရေႏမိုးလွေꩻ အစွိုꩻအဗူႏသီးအကျိုꩻဟဝ်တဲင် နမ်းတွမ်ႏနမ်း ဖေႏနေးကထိန်ꩻချာနွောင်ꩻနဝ်ꩻ စီꩻကန်ꩻနဝ်ꩻဒျာႏသွူ၊လိုꩻယွဲးသီး အတ္တလွဉ်ꩻချိုꩻမုꩻယို ထိန်ꩻကမ်းနွောင်ꩻဗာႏ၊ လိုꩻယွဲးသီးဖုံႏ ထာꩻရာꩻအမျိုꩻမုဲင်ꩻတဲ့ယဝ်း အဝ်ႏလိုႏထီႏတရျားရျားဒါႏငါႏနဝ်ꩻသွူ။ လိုꩻယွဲးဖုံႏ ဘဝယို အဝ်ႏလိုႏထီႏတရျားရျားဒါႏ၊ ကအီႏသွဉ်ဖေႏလိုꩻပေႏသီးယို မွိုးဖါနီပါꩻလို့လို့ သွဉ်ဖေႏဗာႏ၊ မွိုးနဝ်ꩻ သွဉ်ဖေႏရီးရီးဗာႏ၊ အဝ်ႏကုဲင်ဖါနဝ်ꩻ သက်မဉ်ႏပေါင်းလꩻမꩻ ကွဲးသွဉ်လွေꩻဖေႏငါႏသွူ၊ မဉ်ႏပိုန်းလဲဉ်းမူလတန်ꩻခိန်ႏနဝ်ꩻ ကုဲင်းကျုံႏတလူႏလွဉ်ဒါႏ ဝင်ꩻယောင်ႏအသွီႏဝင်ꩻကဝ်ꩻဖုံႏနဝ်ꩻသွူ။ လိုꩻယွဲးဖုံႏနဝ်ꩻ အဝ်ႏခြေင်ခိန်ႏယို အဝ်ႏလိုႏသုံꩻဒါႏဒါႏငါႏ၊ ထာꩻရေႏမိုးတအဲဉ်ထဝ်း အဝ်ႏပျင်ႏခြေင်ထာꩻနဝ်ꩻ ထွာအီထဲင်းထာꩻဗွိုႏအန်ꩻတဲင် အန္တရာယ်ႏအဝ်ႏနွောင်ꩻသွူ၊ သက်မဉ်ႏတွိုႏ (၁၃)နေင်ႏနဝ်ꩻ အဝ်ႏလိုႏဖန်ဆင်ꩻဖေႏ တဖူꩻခြောင်ꩻထန်ႏအီတဗာႏဗာႏသွူ၊ ဘဝကရိုꩻနဝ်ꩻ နေးထူႏတာႏတမွေးတဝ်း ထွာဒျာႏဖေႏဆပ်တာႏဒျာႏကရိုꩻနဝ်ꩻ ဖေႏလိုꩻယွဲးသီး ကသေနာႏလွဉ်အီနဝ်ꩻသွူ။ "ခံႏနွောင်ꩻအနာႏမꩻ စံႏစာꩻဗာႏအသာႏ"၊ နမ်းယင်သꩻယင် မဉ်ႏကျိုꩻစာꩻထူႏတာႏဝွန်ႏမꩻ လꩻနွောင်ꩻလွဉ်အခွင်ꩻအရေꩻကရိုꩻနဝ်ꩻ ဖေႏကထီႏလွဉ်နွောင်ꩻ၊ ဘဝအကို ခွုမ်မာꩻစွဲးကမ်းဖေႏဗာႏဝင်ꩻနဝ်ꩻ ထွာဒျာႏသꩻသွိုꩻခရာႏ အခွဲးအကျုံႏတမျိုꩻကရိုꩻနဝ်ꩻ သွဉ်နယ်ဖေႏဗာႏနဝ်ꩻသွူ။ သွုပ်ဆွိုက်လိုꩻယွဲးနဝ်ꩻ အဝ်ႏလိုႏသွုပ်ဆွိုက်နေးဒျာႏ လိုꩻယွဲးဟဝ်တဖြာꩻအနေႏ၊ အဒေါ့ꩻအဖြဝ်ꩻပုံႏငုဲင်ꩻအလꩻ အဝ်ႏလိုႏသွုပ်ဆွိုက်နေးတဝ်း လိုꩻယွဲးကုဲင်တဖြာꩻအနေႏနဝ်ꩻသွူ၊ ပေါႏတမာꩻတဝ်း ထာꩻမာꩻကုဲင်တဗာႏဗာႏနဝ်ꩻ အဝ်ႏထွာနေကဒွိုန်းဒျာႏ လိုꩻဟဝ်၊ အဝ်ႏလိုႏဖေႏအာႏသွုပ်ငါႏ လိုꩻယွဲးသီးအကျင်ꩻဟဝ်၊ အဝ်ႏလိုႏပဲစ်တင်ႏတေက်ꩻနျꩻတဝ်း ဝွေꩻသီးအပဲစ်' ဝွေꩻသီးအကျင်ꩻကုဲင်။ ဥပမာႏ- ခြံသားတဖြာꩻနဝ်ꩻ အဝ်ႏမွိုင်းသဲ့ꩻကြေင်းဗာႏဒျာႏ မီꩻဖုံႏထာꩻအီႏဖုံႏ ခူꩻလိမ်ꩻခူꩻပြန်ႏတဲင် ခံႏလို့နေးအခိန်ႏစား အခိန်ႏကအီႏဆို့ꩻဗာႏကဝ်ႏမွူးတာႏနဝ်ꩻ တအဝ်ႏနွောင်ꩻတဝ်း၊ အွဉ်ငါအွဉ်ႏနယ်ဒျာႏ လိုꩻယွဲးသီးအကျင်ꩻဖေႏကကုဲင်အီနဝ်ꩻ ထွာအဟုဲင်းသွတ်ꩻအပဲစ်တန်သွူ၊ အဝ်ႏလိုႏမာꩻထွို့ꩻဗူႏနွောင်ꩻလꩻလꩻ လိုꩻယွဲးဖုံႏ၊ ဖေႏကထွာဒျာႏ ထွားနုဲင်းခရာႏစံႏမူႏနာႏ-ရိုꩻဗာႏနုဲင်းနဝ်ꩻသွူ။ လွောက်ꩻနာႏလွဉ် ငဝ်းသွဉ်သင်ဆုံꩻမꩻနဝ်ꩻ ထွာဘဝဥပဒေသတဲင် ထွာစွဉ်ႏဒျာႏ အထီအသွီႏယံစားတန်နဝ်ꩻသွူ၊ သစ္စာႏအဝ်ႏ၊ ရေးမိုႏလွေꩻဒျာႏလိုꩻမုꩻရေꩻ၊ ထူႏနာႏဒျာႏ လိုꩻတန်သီးအငဝ်း၊ ခံႏနောမ်ꩻဒျာႏ-စတဲင်နုဲင်းနဝ်ꩻဖုံႏနဝ်ꩻ ထွာစွဉ်ႏဒျာႏ လိုꩻမျိုꩻတမျိုꩻအတာႏ ထာꩻမောင်ꩻချက်အထိုအမျတ်စားတန်သွူ။ အခိန်ႏသွဉ်လိတ်တွမ်ႏ အခိန်ႏမာꩻထာꩻမာꩻနဝ်ꩻ ဆေ့ꩻဒွေါင်ႏလွဉ်ꩻမွေးငါႏထာꩻ၊ အဝ်ႏအုံကျောင်ꩻတွင်ꩻ မဉ်ႏယားပျင်ႏခြေင်ထိုꩻ အခိန်ႏတနားရီႏနဝ်ꩻ နမ်းအနာႏဂတ်ဘဝတာႏ ဖေႏထာꩻကုဲင်တဗာႏကပေါႏ တွမ်ႏကဗွောင်သေꩻခါꩻဖေႏ တဖွောင်ꩻငွါနဝ်ꩻဗိုန်ဝင်ꩻ၊ မုဲင်ꩻခါခါတဲ့ယဝ်း အဝ်ႏလိုႏလွꩻတဝ်းထာꩻ၊ ရွယ်ႏအဝ်ႏပေႏ ကသွဉ်ပညာႏနဝ်ꩻ မဉ်ႏတန်တနီꩻခါ ထာꩻသေတရာꩻတွမ်ႏဗဟုသုတဖေႏကလွိုင်ႏကွုန်ꩻ တွမ်ႏကတဲႏကောႏစလွေꩻတဖူꩻနဝ်ꩻ ဗိုန်ပီဝင်ꩻသွူ။ "စီꩻ"ကရိုꩻနဝ်ꩻ ထွာဒျာႏနယ်ႏနိမိတ် အဆင်ႏအဖွေါင်ꩻ၊ ထွာနုဲင်းစီꩻခါꩻစီႏခါꩻ(ဖွေါင်ꩻခါꩻ)၊ ထွာတဖွောင်ꩻ၊ အွဉ်ႏခါတဖွောင်ꩻသိုမ်ရန်း၊ တဖွေါင်ဗွောင်ထိုꩻ၊ တဖွေါင်ကုဲင်ထိုꩻ-ဖောႏအခရာႏနုဲင်းနဝ်ꩻသွူ၊ "ကန်ꩻ"ကရိုꩻနဝ်ꩻ မန်းလိတ်ကိုနဝ်ꩻ တဲမ်းဒျာႏ"ကမ်း"နုဲင်းနဝ်ꩻတဲင် အခရာႏနဝ်ꩻ ကအွဉ်ႏခါႏအီဖေႏဒါႏ ကောင်လောင်းတွမ်ႏထီနဝ်ꩻသွူ၊ ဥပမာႏ- မန်းသီးဗွောင်သေꩻခါꩻ "ကမ်းကပ်သည်၊ ကမ်းဆိုက်သည်၊ ကမ်းရောက်သည်၊ ကမ်းကုန်သည်"နုဲင်းနဝ်ꩻတဲင် မဉ်ႏထွာပအိုဝ်ႏနဝ်ꩻ ဗော့ꩻလွေꩻအဖင်ႏ၊ ဆွိုက်လွေꩻအဖင်ႏ၊ တွိုႏလွေꩻအဖင်ႏ၊ အဖင်ႏသွတ်ꩻထိုꩻ-ရိုꩻဗာႏနုဲင်းနဝ်ꩻသွူ။ "စီꩻကန်ꩻ"ကရိုꩻနဝ်ꩻ ထွာဒျာႏလွောက်ꩻနာႏ ထိန်ꩻတီခရာႏကျင်ꩻဝတ်တမျိုꩻ-အဓိပ္ပါယ်ႏလꩻနုဲင်းနဝ်ꩻသွူ၊ ဖြောမ်းဗူႏဝင်ꩻ၊ ညီႏဝင်ꩻ၊ ခြွဉ်းငီꩻဝင်ꩻ-အဓိပ္ပါယ်ႏလꩻနုဲင်းနဝ်ꩻယင်၊ စီꩻမဉ်ꩻကရိုꩻနဝ်ꩻ လိုꩻသီးကအဝ်ႏလိုႏလွောက်ꩻနာႏ ထိန်ꩻတီဗာႏဒါႏ ကျင်ꩻထုံꩻကျင်ꩻစဲဉ်ႏဖုံႏ-အဓိပ္ပါယ်ႏလꩻနုဲင်းနဝ်ꩻသွူ။ ကျင်ꩻဝတ်ကရိုꩻနဝ်ꩻလဲ့ ထွာဒျာႏ လွောက်ꩻနာႏခရာႏ ဟဝ်ထိန်ꩻတီဗာႏ ဝတ္တရာꩻ၊ ဝတ္တရာꩻလဲ့ ထွာဒျာႏကလိုႏခွုမ်မာꩻဒါႏ ဝတ္တရာꩻမျိုꩻနဝ်ꩻသွူ၊ ဥပဒေႏကရိုꩻနဝ်ꩻ အစဲဉ်ႏအဆက် ကလွောက်ꩻနာႏလွဉ်ဒါႏစီꩻကန်ꩻ၊ ဖေႏနေးအမျာꩻလိုꩻအာသီး ကလွောက်ꩻနာႏတဲင် ဆဲင်ႏရာꩻအာႏဏာႏပဲင်ႏအစွိုꩻသား ကပျဌာန်းကထေသေꩻခါꩻဒါႏမျိုꩻနဝ်ꩻသွူ။ စီꩻကန်ꩻကရိုꩻနဝ်ꩻ အကျမ်ꩻသဘော်ꩻအနေႏ အဝ်ႏနီစားသွူ၊ စီꩻကန်ꩻကရဲးခါꩻဖုံႏ၊ ဥပမာႏ "ခံႏနောမ်ꩻသွော့အလံႏ၊ ဖြေꩻလက်မတ်ဟုဲင်း"စတဲင်နုဲင်းနဝ်ꩻဖုံႏသွူ၊ စီꩻကန်ꩻလဲ့ အဝ်ႏနေဒွိုန်းကအမျိုꩻမျိုꩻ၊ ရပ်ကွက်ဒုံဆောင်ႏစီꩻကန်ꩻဖုံႏ၊ ကောင်သီအရန်းရန်းစီꩻကန်ꩻဖုံႏ၊ ထာꩻမာꩻခွင်ႏစီꩻကန်ꩻဖုံႏ၊ တရာꩻဥပဒေႏစီꩻကန်ꩻဖုံႏ-စတဲင်နုဲင်းနဝ်ꩻသွူ။ ကျောင်ꩻသားမူႏခို သွဉ်ပညာႏစီꩻကန်ꩻတအဲဉ်ထဝ်းနဝ်ꩻ ဗိုန်နုဲင်းဒျာႏ ပါꩻကတွောင်ထီတွမ်ႏချင်ႏရွောင်၊ ဗိုန်နုဲင်းဒျာႏ ဆွမ်ꩻဒေႏကသော့ꩻတောင်းပွိုတို၊ ဗိုန်နုဲင်းပါꩻကထောက်ꩻသော့ꩻထီသုဲင်ꩻပွုမ်ႏကိုနဝ်ꩻအတွိုင်ꩻ အကျိုꩻအဲဉ်ထဝ်း(ထွာထိုꩻဒျာႏအဟောသိကံႏ)နဝ်ꩻသွူ၊ နေးတွမ်ႏစီꩻကန်ꩻအဝ်ႏအဝ်ႏ မဉ်ႏသွဉ်ပညာႏနဝ်ꩻ ကျောင်ꩻသားမူႏခိုဖုံႏ ဒါႏလွဉ်ပညာႏ၊ အောင်ႏပွယ်ꩻရီလိတ်စွုမ်ႏနေင်ႏ၊ ခံႏဗာႏဆရာႏဆရာႏမူႏသီး ထူႏဂုဏ်ႏပင်ႏတသွောင်း၊ ခံႏဗာႏ ခမ်းထီသီးပင်ႏတသွောင်း၊ နမ်းတွမ်ႏနမ်းဘဝလဲ့ သာႏယာႏစွို့ꩻစွဉ်ႏနွောင်ꩻအီ၊ ခံႏဗာႏ ဝင်ꩻဖေႏတာႏဝွန်ႏ ကထွိုက်တန်ႏတွမ်ႏ နမ်းအထီအသွီႏ၊ ခံႏထူႏဗာႏ ခမ်းထီသီးထာꩻမာꩻသားယံ၊ အွဉ်ငါယံဘဝဖုံႏနဝ်ꩻသွူ။ ကအွဉ်ႏထွော့ဗာႏ ကျောင်ꩻစီꩻကန်ꩻဖုံႏနဝ်ꩻ ထွာဒျာႏဖေႏကျောင်ꩻသားမူႏခိုသီး ကထင်ႏထိုအီတာႏဒျာႏသွူ၊ ထွာဒျာႏ အနယ်ꩻမဲဉ်ႏမဲဉ်ႏ ဖေႏနေးကသွဉ်သွတ်ꩻသွတ်ꩻလꩻပညာႏ၊ ထွာဒျာႏ ဖေႏအကျင်ꩻစာရိတ္တကဟဝ်အီတာႏ၊ ထွာဒျာႏ သျောင်ႏထိုꩻအမာႏထွူတဲင် ဖေႏကခွုမ်မာꩻနွောင်ꩻအမဲဉ်ႏတာႏဒျာႏနဝ်ꩻသွူ။ ထွာဒျာႏ နဲင်ႏငံႏတောႏ အကျိုꩻစီꩻပွါꩻယိုခါတွမ်ႏ အတာႏဆွာꩻ အကျိုꩻစီꩻပွာꩻဖေႏကထွာအီတာႏ၊ ကအွဉ်ႏထွော့ဗာႏ ကျောင်ꩻစီꩻကန်ꩻ အတာႏဆွာꩻအကျိုꩻကေꩻဇူꩻဖုံႏနဝ်ꩻ ထွာဒျာႏကျောင်ꩻသားမူႏခိုသီး ဖေႏကထင်ႏထိုအီတာႏဒျာႏ၊ ကျောင်ꩻသားမူႏခိုတွိုင်ꩻ ရဲးကမ်းခါꩻဗာႏနဲင်ႏငံႏတောႏ ထာꩻယွုမ်းအံႏ ဖေႏကအဝ်ႏလွဗာႏ၊ ထိန်ꩻသိမ်ꩻဗာႏ နဲင်ႏငံႏတောႏလွတ်လတ်ရေꩻတွမ်ႏ ခွုမ်သဲဉ်ꩻအချုပ်အာႏဏာႏ ယွုမ်းအံႏဗာႏနုဲင်းနဝ်ꩻသွူ။ နဲင်ႏငံႏတောႏကဗွောင်ခါꩻဖေႏ ကျောင်ꩻသီးအစီꩻကန်ꩻဖုံႏယို လွောက်ꩻနာႏထိန်ꩻတီဗာႏ-ကရိုꩻဒါႏ အွဉ်ႏဗာႏထာꩻယွုမ်းအံႏနုဲင်းနဝ်ꩻ၊ ကျောင်ꩻစီꩻကန်ꩻ အတာႏဆွာꩻအကျိုꩻကေꩻဇူꩻဖုံႏနဝ်ꩻ မာꩻထွာအီဖေႏ ပညာႏရေꩻအသောင်အရင်ꩻဟဝ်၊ မာꩻထွာဖေႏအီ သွဉ်ထူႏဗာႏပညာႏငိမ်ꩻငိမ်ꩻခွꩻခွꩻ၊ ဖေႏပညာႏရေꩻစနစ်တဗာႏလိုမ်း ကအောင်ႏမျင်ႏလို့လို့၊ ပညာႏရေꩻစနစ်မဉ်ႏအောင်ႏမျင်ႏမꩻ တဲႏဆို့ꩻခမ်းထီအရေꩻလဲ့ အောင်ႏမျင်ႏအီသွူ။ စီꩻပွာꩻရေꩻ၊ လိုꩻမုꩻရေꩻဖုံႏလဲ့ ထင်ႏထိုလွဉ်၊ နဲင်ႏငံႏလွတ်လတ်ရေꩻ ခွုမ်သဲဉ်ꩻအချုပ်အာႏဏာႏလဲ့ ယိန်းတဉ်ႏခွေါင်လွဉ်-စတဲင် လꩻနွောင်ꩻအီ အတာႏဆွာꩻအကျိုꩻနုဲင်းနဝ်ꩻဖုံႏသွူ၊ ကားတဲင်မန်းနဲင်ႏငံႏတခြောင်ႏကို ကအဝ်ႏဒါႏ ကျောင်ꩻသားမူႏခိုတွိုင်ꩻ ဖေႏကထင်ႏမဲဉ်ႏမဲဉ်ႏကျောင်ꩻ၊ တနီꩻငါဖေႏကလွတ်မွုန်းကျောင်ꩻ ကျိုꩻစာꩻလွေꩻဗာႏ၊ ကျောင်ꩻသားမူႏခို အချင်ꩻချင်ꩻ ရက်ပဲင်ꩻဖဉ်းမွိုတ်သွုပ်ဆွိုက်ပေါင်ꩻကွိုက်ꩻ၊ ရိုႏရိုႏသေႏသေႏ လွောက်ꩻနာႏဆရာႏသမာꩻသီး အဆုံꩻအမꩻဩဝါဒတဲင် ဖေႏကကျိုꩻစာꩻသွဉ်ထူႏပညာႏ၊ ကျိုꩻစာꩻခွုမ်မာꩻ ဆရာႏတွမ်ႏတပဲ့ꩻ သွုပ်ဆွိုက်ရေꩻ ဖေႏကပြွစ်ပြေ၊ ဖေႏကခြွိုင်ႏသန်ꩻ ဖေႏကကြောင်းစင်၊ အကျင်ꩻစာရိတ္တတွမ်ႏ နမ်းကျင်ꩻတရာꩻဖေႏကဟဝ်၊ တာႏဝွန်ႏဝတ္တရာꩻဖုံႏ ယံကကေႏ၊ ထာꩻကျိုꩻစာꩻဝီရိယဖေႏကအဝ်ႏ၊ စီꩻကန်ꩻတဲပ်တဲပ် ဖေႏကသွဉ်လွေꩻဗာႏပညာႏ-စတဲင် အဝ်ႏလိုႏအွဉ်ႏရေꩻငါႏနုဲင်းနဝ်ꩻသွူ။ ကျောင်ꩻသားမူႏခိုဖုံႏတွမ်ႏ ခမ်းသားလိုꩻအမျာꩻသီး စီꩻကန်ꩻတအဲဉ်ထဝ်းနဝ်ꩻ ကွပ်ထာꩻသေတရာꩻချို့ꩻယွင်ꩻ အာႏပေႏငါႏမꩻ စီꩻကန်ꩻအဝ်ႏလွတဝ်းဒျာႏ၊ ကွပ်စီꩻပွာꩻရေꩻ တလိုမ်းကိုမ်ႏတဝ်းနဝ်ꩻမꩻ စီꩻကန်ꩻကုဲင်လွဗာႏ၊ ကွပ်အကျင်ꩻပေႏခါ အဝ်ႏပယ်ခြꩻလွဉ်တဲင် စီꩻကန်ꩻကုဲင်လွဗာႏ၊ ကွပ်ခေတ်စနစ် အမွေႏကုဲင်တဲင် စီꩻကန်ꩻကုဲင်လွဗာႏ၊ တနဲင်ႏငံႏလို့ ကထိန်ꩻတီစီꩻကန်ꩻနုဲင်းနဝ်ꩻနဝ်ꩻ ငမ်းအပဲစ်တံႏတဲင် လွောက်ꩻနာႏထိန်ꩻတီစီꩻကန်ꩻမွေးတဝ်းတွော့ꩻ မဉ်ႏလွောက်ꩻနာႏထိန်ꩻတီဒျာႏ တွမ်ႏနမ်းထာꩻသေတရာꩻ ထာꩻယွုမ်းအံႏ ခံႏထူႏချက်နဝ်ꩻ ယိန်းတွိုႏခြောင်ꩻထဲင်းနဝ်ꩻသွူ။ လိုꩻငမ်းအပဲစ်တံႏတွော့ꩻ ကထိန်ꩻတီဗာႏစီꩻကန်ꩻသားနဝ်ꩻ ထိန်ꩻတီလဲႏကွို့ꩻ တရာꩻဥပဒေႏမဲ့ဆလလွုမ်ꩻ၊ သဲစ်ကတရွို့ꩻသစ်ညာꩻထိုꩻ ဥပဒေႏအထိန်ꩻအဒို့ꩻလဲ့ ယားကုဲင်ပိုန်းလွဒျာႏသွူ၊ လိုꩻကထိန်ꩻတီဒျာႏ စီꩻကန်ꩻတွမ်ႏနမ်းထာꩻသေတရာꩻ' ထာꩻယွုမ်းအံႏ'ခံႏထူႏချက်သားဖုံႏနဝ်ꩻတဲး အပွေါးရဲပ်အဝ်ႏတဲ့နဝ်ꩻ အဲဉ်ထဝ်းတဲ့နဝ်ꩻ၊ တရာꩻဥပဒေႏမဲ့ဆꩻငါတဲ့နဝ်ꩻ မဲ့ဗꩻတဲ့နဝ်ꩻ၊ အခိန်ႏရိုꩻရိုꩻတွင်ꩻတဲ့သင်၊ မော့ꩻထာꩻယပ်ꩻခုဲင်ႏခိန်ႏတဲ့သင် လွောက်ꩻနာႏထိန်ꩻတီမဲဉ်ႏမဲဉ်ႏဒျာႏ စီꩻကန်ꩻနဝ်ꩻသွူ၊ အာႏဇာႏနီႏပုဂ္ဂိုလ်ႏရက်ခွိုꩻယင်ဟန်ႏသားနဝ်ꩻထဲင်း လုဲင်ႏနေးတွမ်ႏအသက် ထိန်ꩻတီလွမွေးစွဉ်ႏ စီꩻကန်ꩻနဝ်ꩻသွူ။ ကွပ်နဝ်ꩻမꩻ စီꩻကန်ꩻကရိုꩻနဝ်ꩻ ထွာလိုꩻသီးအငိုꩻ၊ လွောက်ꩻနာႏဒါႏစီꩻကန်ꩻနဝ်ꩻ ထွာလိုꩻသီးအထီအသွီႏတမျိုꩻ၊ ထာꩻမာꩻကိစ္စအမျိုꩻမုဲင်ꩻတဲ့ယဝ်း၊ ခင်ႏလံးဌာႏနမုဲင်ꩻတယဝ်း၊ ခွုမ်မာꩻထာꩻမာꩻမုဲင်ꩻတဲ့ယဝ်း အဝ်ႏလိုႏခွုမ်မာꩻ မဲဉ်ႏမဲဉ်ႏတွမ်ႏစီꩻကန်ꩻသွူ၊ စီꩻကန်ꩻမဉ်ႏအဝ်ႏနဝ်ꩻ လꩻနွောင်ꩻအီ အကျိုꩻတရာꩻဖုံႏ၊ စီꩻကန်ꩻအဲဉ်ထဝ်းနဝ်ꩻ လꩻနွောင်ꩻအီဒါႏ အကျိုꩻကုဲင်ဖုံႏလွုမ်ꩻကရိုꩻနဝ်ꩻ ဒင်ႏပျꩻနယ်ဗာႏနုဲင်းယိုသွူ။[၁][၂]