လုပ်ꩻမွုန်းဒွုမ်ယာ-အသွုပ်
( ၅ )
မာꩻလမ်းမာꩻပါႏ သေင်ႏတွမ်ႏဝါႏယို
ထွာဒျာႏအထျꩻ သုံꩻတွိုင်ꩻလꩻလဲ့
ခွဝꩻယားကုဲင် ဝွစ်ထိုꩻလဲဉ်း ။
ပဉ္စမကဗျာယိုလဲ့ အွဉ်ႏနယ်လုပ်ꩻယာအပဲစ်နေနေသွူ၊ လင်္ကာႏစပ်နယ်ꩻနဝ်ꩻ ( ၄-၃-၂) နီလဲင်ႏ ။
( ၆ )
သေင်ႏဝါႏလို့စူꩻ တနီꩻသူꩻနဝ်ꩻ
ရပ်ဖူꩻဒုံကို လိုꩻသီးယိုတာႏ
လမ်းပါႏမီႏမာꩻ ယပ်ꩻတဝ်းနဲ့ ။
ဆဋ္ဌမကဗျာယိုလဲ့ အွဉ်ႏနယ်လုပ်ꩻယာအပဲစ်နေနေ၊ ပထမ၊ ဒုတိယ၊ တတိယတွမ်ႏ စတုတ္ထနဝ်ꩻ ( ၄-၃-၂)၊ တတိယတွမ်ႏ စတုတ္ထနဝ်ꩻ ( ၄-၃)၊ စတုတ္ထတွမ်ႏ ပဉ္စမနဝ်ꩻ ( ၄-၂ ) စပ်တဝင်ꩻတဲင် ထွာစပ်နယ်ꩻရော်ꩻရယ်ꩻသွူ ။
ကွပ်နဝ်ꩻမꩻ ကဗျာယိုနဝ်ꩻ ကဗျာဟဝ်ငါႏလဲ့ ရိုꩻထွိုက်တဝ်းသွူ ။
( ၇ )
လွိုဒွိုန်းလမ်းပါႏ သိုႏစို့ꩻတာႏလဲ့
ယပ်ꩻဒျာႏနေနေ မွေးတဝ်းနဲ့ ။
( ၈ )
သေင်ႏဝါႏသီးမျိုꩻ ထွိုင်ႏလို့ထိုꩻနဝ်ꩻ
ထီရိုꩻသေ့ꩻပါ မွေးတဝ်းနဲ့ ။
သတ္တမတွမ်ႏ အဋ္ဌမကဗျာ ယိုနီပွိုက်လဲ့ အွဉ်ႏနယ်လုပ်ꩻယာအပဲစ်နေနေ၊ လင်္ကာႏစပ်နယ်ꩻ ( ၄-၃-၂) တလဲင်ႏစီႏသွူ ။ လင်္ကာႏနံပါတ် (၃-၄-၅-၆-၇-၈) ယိုသူပွိုက်နဝ်ꩻ အွဉ်ႏနယ်လုပ်ꩻယာအပဲစ်လွဉ်းလွဉ်းတဲင် လုပ်ꩻယာအပဲစ်နဝ်ꩻ ထွာစွဉ်ႏလင်္ကာႏသူပုဒ်သွူ ။
ကွပ်နဝ်ꩻမꩻ ကဗျာဟမ်းထိုဆွာꩻထိုꩻသွူ၊ မီႏမဲဉ်မာꩻဒွေါင်ႏနဝ်ꩻ နံပါတ် (၇-၈)ယို အွဉ်ႏကုဲင်ထိုꩻလဲ့ ကဗျာတပုဒ်လွုမ်း အဓိပ္ပါယ်ႏ ရေႏရွယ်ႏချက် တကုဲင်တဝ်းသွူ ။
တဲမ်းစီႏလင်္ကာႏလဲ့နဝ်ꩻ၊ ရွမ်ဖြုဲင်ꩻ၊ ဝတ္ထုလဲ့နဝ်ꩻ ကလိုႏအပ်ဒါႏ ပျꩻအကျောင်ꩻ၊ အကျိုꩻ၊ အပဲစ်ယို ခွိုင်းကသေအတွိုင်ꩻ တဲမ်းလို့ခရာႏလိုႏတဝ်း၊ ဗော့ꩻလိတ်အရသာႏ ဗွေစွုမ်ႏအီလဲ့ လꩻလဲဉ်း၊ ခွိုင်းကသေအတွိုင်ꩻ မီႏတဲမ်းလို့နဝ်ꩻ ဇာတ်ခြောင်ꩻနန်ꩻလွေꩻတဲင် ဟော်ꩻလိတ်သား လွꩻဒါႏသွူ ။
( ၉ )
နီစွိုးနီခွိုꩻ ပအိုဝ်ႏမျိုꩻဟွေး
အငိုꩻတန်ႏငါႏ ရိုꩻစွဉ်ႏဒျာႏယဝ်း
စွူႏရာႏကဝ်ႏတုဲင် မဉ်ꩻတကုဲင်ယို
ဆို့ꩻရုဲင်မွုန်းဒွုမ် အွဉ်ႏထွူခန်း ။
အမုဲင် (၉) လင်္ကာႏယိုနဝ်ꩻ ငဝ်းတောင်ꩻပြန်ႏ (မေတ္တာႏရပ်ခံႏ) လုပ်ꩻယာသားသွူ၊ လင်ႏကာႏစပ်နယ်ꩻနဝ်ꩻ ( ၄-၃-၂) သွံလဲင်ႏသွူ ။
( ၁၀ )
အငိုꩻအဲဉ်ထဝ်း ခန်ထိုတဝ်းလဲ့
လွစ်ငဝ်းဒေါ့ꩻနယ်ꩻ မျိုꩻရော်ꩻရယ်ꩻယို
သꩻစွယ်ꩻကျံႏထုမ်ႏ ဆို့ꩻရုဲင်သွော့ ။
( ၁၁ )
တွမ်ႏနီရပ်ရာႏ ခြံဟံႏယာႏယို
ခ၀်းဒါႏကရိုꩻ စာလꩻငိုꩻစား
ဗာႏမျိုꩻဗေဟံႏ ကျံႏဆို့ꩻသွော့။
ကဗျာယိုနီပုဒ်နဝ်ꩻ ဖေႏလုပ်ꩻလꩻတဝ်းယာတဲင် " လုပ်ꩻတဝ်းယာက အီႏလုပ်ꩻထာꩻမုဲင်ꩻ " ဝင်ꩻမီႏရီနဝ်ꩻ ဖြေႏနယ်ကဗျာသွူ၊ သွူတကာႏတဝ်း " ဆို့ꩻရုဲင်သွော့၊ ကျံႏဆို့ꩻသွော့ " ကရိုꩻဒါႏ ငဝ်းယိုပါတဲင် မီႏရိုꩻငဝ်းတဲက်တွန်ꩻ ငဝ်းနိုꩻဆောႏတမာလဲ့ အဝ်ႏလꩻဒျာႏသွူ ။ လင်္ကာႏစပ်နယ်ꩻ ( ၄-၃-၂) နီလဲင်ႏလွဉ်းလွဉ်းသွူ၊ အလင်ခြုဲင်းနယ်ခရာႏအဲဉ်ထဝ်း။
(၁၂)
နေင်းတွမ်ႏသေင်ႏလာႏ အမျိုꩻရာႏစား
မောက်ꩻဖါးမောက်ꩻဝန် မွူးတန်ထော့ပတ်
ခဝ်းအပ်မျိုꩻယို (ဟံႏဓာတ်တဲ့ꩻရာꩻ) ကျံႏဆို့ꩻသွော့ ။
ကဗျာယိုနဝ်ꩻ တွမ်ႏနံပါတ် (၁၀-၁၁)နဝ်ꩻ အခရာႏ လွေꩻတခြောင်ꩻချင်ႏ၊ တဲက်တွန်ꩻနိုꩻဆောႏ လုပ်ꩻယာသားနေနေ ။ ကွဲႏတွော့ꩻ လင်္ကာႏစပ်နယ်ꩻနဝ်ꩻ ပွိုင်းပသာႏသာႏ၊ ပထမတွမ်ႏ ဒုတိယနဝ်ꩻ (၄-၃)၊ ဒုတိယတွမ်ႏ တတိယ၊ တတိယတွမ်ႏ စတုတ္ထ၊ စတုတ္ထတွမ်ႏ ပဉ္စမပွိုက်နဝ်ꩻ (၄-၂) လင်္ကာႏစပ်တဝင်ꩻသွူ။ စတုတ္ထပွိုက် လစ်ꩻဖြုံႏကို (ပတ်)တွမ်ႏ ပဉ္စမပွိုက် နီဖြုံႏကို (အပ်)နဝ်ꩻ သရဗွိုန်၊ ငဝ်းရန်းဗွိုန်စွဉ်ႏလဲ့ တသွတ်ꩻ (တ်) တွမ်ႏ ပသွတ်ꩻ (ပ်)နဝ်ꩻ ဗီးဗွိုန်တဝ်းတဝင်ꩻတဲင် လင်္ကာႏဟဝ်ငါႏ ဟဲ့ꩻထွိုက်တဝ်းနေနေသွူ။
ကွပ်နဝ်ꩻမꩻ (ခဝ်းအပ်မျိုꩻယို) ခင်ႏလမ်းအကို မီႏသော့ꩻလုဲင်ႏ (ဟံႏဓာတ်တဲ့ꩻရာꩻ) နုဲင်းနဝ်ꩻနဝ်ꩻ ထွာတ်-သွတ်ꩻနုဲင်းနုဲင်းတဲင် ထွာလင်္ကာႏဟဝ်သွူ ။ ပွိုင်းဝွို့တွမ်ႏ " လုပ်ꩻပုဲင်ႏဒွုမ်ယာ " ကဗျာယို အဓိပ္ပါယ်ႏ ဗွောင်လုဲင်းအခရာႏနဝ်ꩻ အဝ်ႏတခွုင်းယိုလွုမ်ꩻသွူ။ တဲမ်းကဗျာနဝ်ꩻ လိုႏတဲမ်းငါႏတဝ်း အပွိုက်ဆွာꩻ၊ မီႏတဲမ်းအပွိုက်ဆွာꩻနဝ်ꩻ ထုမ်ႏကာရန်ယပ်ꩻသွူတကာႏတဝ်း အဓိပ္ပါယ်ႏလဲ့ တသျင်ꩻလꩻတဝ်း၊ သျွုတ်သျက်ရော်ꩻရယ်ꩻထိုꩻဒါႏတဝင်ꩻသွူ။ တဲမ်းကဗျာနဝ်ꩻ အဓိပ္ပါယ်ႏလဲ့ မီႏသျင်ꩻ၊ မီႏစဲင်း၊ လင်္ကာႏစပ်နယ်ꩻ၊ ကဗျာစီꩻကန်ꩻလဲ့ မီႏမဲဉ်ႏ၊ ကသုံꩻဒါႏ ငဝ်းဖုံႏယိုလဲ့ မီႏတလေ့ဖုဲင်ႏနာႏနဝ်ꩻမꩻ ထွာကဗျာဟဝ်၊ ထွာကဗျာအထီဗွေသွူ။ [၁]
အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]
- ↑ ဒဲဉ်သီႏလက်ဆောင်ႏအမုဲင်(၂၄) ခွန်ကုဝေ