လေက်ပအိုဝ်ႏကပေါႏလွဉ်ပုံႏ

အွိုးစခါ မန္တလေꩻနဝ်ꩻ မင်ꩻတုင်ꩻခွန်၊ ဝေင်ꩻညောင်ႏရွီႏနဝ်ꩻ ဆာစောမောင်စိုး (သက္ကရာဇ်သေတဝ်း၊ လွိုးရ-၁၂၂၁-ဗာႏရပ်) မွိုင်ꩻပျိုꩻ၊ ပွေးလှ၊ တောင်ကီးကျပ် မျောက်မေဆျား-စင်ꩻပေႏသိုမ်ပါꩻ လင်ꩻသွောန်လေက်မန္တလေꩻ၊ တွိုႏတနီꩻ ထင်ႏသိမ်ႏအဝ်ႏကုဲင်ဝင်ꩻတဲင် သာႏသနာႏပဲင်ႏဆရာႏတောႏ ဖေႏတမ်ႏ၊ ထွောန်ႏသဲင်ꩻပျုသာႏသနာႏ ခမ်းကောင်။ ကထင်ႏသဲင်ꩻပျုခါ ဟော်ꩻတရာꩻ၊ သွောန်လေက်၊ တဲမ်းလေက်၊ မာꩻဗာႏနုဲင်းနဝ်ꩻ၊ တောမ်ႏစောက်ꩻဖါးရွီႏ ထွာဝင်ꩻပျဿနာႏ၊ မဟာႏတမ်ႏဖုံႏ အဝ်ႏထိုမ်ႏယား၊ ထိုမ်ႏဆောမ်ꩻ၊ လွင်းဗာႏမဟာႏတမ်ႏ၊ ထင်ႏတွိုႏခန်း ဆောင်ႏဖိုးကောင်လောင်းနဝ်ꩻမꩻ ကွဲးထွာ၊ တဲမ်းရီးလွိုဝင်ꩻ လေက်သုတ္တနိဗ္ဗာန်ႏ၊ ထွာဝင်ꩻပျဿနာႏတဲင် လင်ꩻထေ့ချာဗာႏ သာႏသနာႏပဲင်ႏဆရာႏတောႏ မန္တလေꩻထျꩻ၊ ကထင်ႏသေမွေးမဲန်ႏဒျာႏနဝ်ꩻမꩻ လꩻယင်းအခွင်ꩻ၊ ပအိုဝ်ႏကို လေက်တဲ့ပေါႏ၊ မော်တဲ့ပေါႏလွောန်ဗာႏ (ပဲယဉ်းတောင်ဒေါ့ꩻနယ်)။ ဆုဲင်ꩻနဝ်ꩻ ဂျပန်ဝုဲင်ꩻခိန်ႏ စောက်ꩻဖါးညောင်ႏရွီႏ ငမ်းတွိုက်ꩻကိုဗာႏ ဂျပန်စဲ့ꩻတဲင် မာꩻကွို့ꩻဒျာႏ ညောင်ႏရွီႏ ကျောင်ꩻရန်ႏကုင်ႏကို၊ မာꩻစာမေးပွဲးအတုꩻ၊ ဗိုန်ဖြားနောင်ကာꩻ ဦးပဏ္ဍိတ ဝါႏတောႏလꩻ ၂-ဝါႏ၊ ဗိုန်ဖြားထီသိမ်ႏ ဦးသုနန္ဒ (စာမေးပွဲရွီႏကို တွိုႏအငယ်တန်ꩻ) ဝါႏတောႏလꩻ ၈-ဝါႏ အဝ်ႏပါ၊ သင်္ဃာႏဖြဝ်ꩻဖုံႏ အွောန်ႏပအိုဝ်ႏစူꩻငီꩻလေက်ဖြဝ်ꩻ ဗိုန်ဖြားထီသိမ်ႏစူꩻတဝ်း၊ အဝ်ႏနဝ်ꩻသဲင်ꩻချာ ပရိယတ်လွယ်ဖြီ အဝ်ႏဟိုပုံꩻခကွောန်ႏ၊ ခိုလမ်ခတွို့ꩻထင်ꩻ ကာတဖူꩻခထင်ꩻ၊ ဗိုန်ဖြားစငဝ်ꩻသီးတဲ့ အုံဗာႏ၊ ထွားထွား မွိုင်ꩻပျိုꩻလေက်ကို ကဗိုန်ဗိုန်လေက်ဖြဝ်ꩻဖုံႏနဝ်ꩻ ထေထန်ႏထိုꩻ၊ အွောန်ႏကုဲင် ကဗိုန်ဗိုန်မန်းနဝ်ꩻလုမ်ꩻတဲင် လေက်ထီသိမ်ႏပေါႏလွောန်ဗာႏ (ဗိုန်ဖြားနောင်ကာꩻဒေါ့ꩻနယ်)။

ဗိုန်ဖြားထီသိမ်ႏ ကထွင်ႏလေက်ခိင်ႏ မွိုင်ꩻပျိုꩻလေက်၊ စငဝ်ꩻ ဒုံလီꩻကောင်၊ ထီအုံႏပုတ်ꩻ လေက်မွူးပေါႏရီးလဲန်း (စင်ꩻတန်ဝိဇ္ဇာနန္ဒဒေါ့ꩻနယ်၊ ဝွေꩻဗွေႏထျꩻသူꩻ လေက်မူအဝ်ႏ) နီသွောန်းအဝ်ႏထီႏဗာႏ၊ ဗိုန်ဖြားမွိုင်ꩻပျိုꩻလေက်နဝ်ꩻ ထူႏမန်းတစိꩻ ဖြဝ်ꩻတစိꩻ ထေ၊ ဗိုန်ဖြားထီသိမ်ႏလေက်နဝ်ꩻ ပြွဉ်း(ပြွောန်း)ထိုꩻကဗိုန်ဖြဝ်ꩻ အွောန်ႏဗိုန်မန်း၊ ဗိုန်ဖြားကျိုးဝဲင်းလေက်နဝ်ꩻ ပြွဉ်းထိုꩻကဗိုန်မန်းတဲင် အွောန်ႏဗိုန်မဲင်ꩻ၊ လေက်ညောင်ႏရွီႏကန်ကြီးနဝ်ꩻ ပြွဉ်းထိုꩻကဗိုန်မဲင်ꩻတဲင် အွောန်ႏဗိုန်ပါဠိ၊ ပါဠိကို ကပါတဝ်းနဝ်ꩻ ထွင်ႏသော့ꩻ၊ ထီႏဗာႏနုဲင်းနဝ်ꩻ။

မွိုင်ꩻပျိုꩻကောလဲင်း

မွိုင်ꩻပျိုꩻနဝ်ꩻ ကျင်ႏလယ်ႏဒျာႏ မန်းဖဲ့ꩻပါဠိဖဲ့ꩻ ထေလေက်ရိုꩻရိုꩻလုမ်ꩻ၊ မော်စအွန်တဖြာꩻ ဝါႏသနာႏငါႏ ကဗျာလင်္ကာႏ ဗုဲင်ရဟန်ꩻ လင်ꩻအုံသီႏသဲင်ႏ စောက်ꩻဖါးထျꩻ၊ ဝွေꩻဗွေႏသီးနီပါꩻ ထင်ႏမော့ꩻလို့ဝင်ꩻမꩻ အလင်္ကာႏကွဲးပေါႏ၊ ပေါႏတဝ်းတဲ့ တလꩻတဝ်းဒျာႏရင်ꩻ၊ ထွာအလင်္ကာႏမꩻ ဖမ်ꩻဗာႏသက်သာႏ "မွိုင်ꩻပျိုꩻကေားလဲင်း နောင်ဟဲင်းကေားယွိုႏ"။

အခိင်ႏနဝ်ꩻ တောင်ႏကီꩻခကီကွောန်ႏ ကမ္မဋ္ဌာန်ꩻဆရာႏစခြွီလဲ့ ထေနုဲင်းနုဲင်း ကမ္မဋ္ဌာန်ꩻသံပေါက်ဖုံႏ "စခြွီဖူထောက်"၊ ဗိုန်ဖြားသီးလေက်ဖုံႏနဝ်ꩻ တွိုႏလွေꩻဆောင်ႏပြောင်း ဒေါ့ꩻနယ်ပင်ပွံ(ပိုမ်)၊ ဝွေꩻဗွေႏသီးလဲ့ ထေနုဲင်းနုဲင်းလေက် လိုꩻမူႏလိုꩻပေႏကျွိုက်စား "သဲင်ꩻပꩻဆောင်ႏပြောင်း၊ သဲင်ꩻဖေါင်းပင်ပိုမ်"၊ "မွိုင်ꩻပျိုꩻတောမ်ႏနောင်ဟဲင်းနဝ်ꩻ ငဝ်းပညာႏဆိ၊ စခြွီနဝ်ꩻ ငဝ်းခိုဗင်ႏ၊ ဆောင်ႏပြောင်းပင်ပိုမ်နဝ်ꩻ ငဝ်းမူႏနမ်ꩻ"ငဝ်းနဝ်ꩻတဲ့ ပေါႏလွောန်ထဲင်းဗာႏ။

ပေါးဖြားပမွိုင်ꩻ ကွောက်ꩻထော့ꩻယာႏ

"ပေါးဖြားပမွိုင်ꩻ ကွောက်ꩻသဲင်ꩻလဲန်းသွူ(အ)ထော့ယာႏ" (ပမွိုင်ꩻကရိုꩻဒါႏ ပအိုဝ်ႏလိုꩻမျိုꩻယို အီႏကွောန်ကꩻဗွာကဒွို့ထာꩻ)၊ "ပေါးဖြားပမာႏ ကွောက်ꩻသဲင်ꩻလဲန်း အဒဝ်ကောင်ႏ"(အအီႏခွုမ်ပါပတီꩻ)၊ "ကကွောက်ꩻသဲင်ꩻထော့ꩻယာႏနဝ်ꩻ အီႏတွိုႏလွေꩻ နောင်သန်ထောင်ႏ၊ ကကွောက်ꩻသဲင်ꩻဒဝ်ကောင်ႏနဝ်ꩻ အီႏတွိုႏလွေꩻ နောင်ညောင်ႏရွီႏ"(ပအိုဝ်ႏဖုံႏ အီႏလင်ꩻသွောန်လေက် အွိုးညောင်ႏရွီႏ)၊ "နောင်သန်ထောင်ႏနဝ်ꩻ ထီသိုမ်တဗွီႏ၊ နောင်ညောင်ႏရွီႏနဝ်ꩻ ထီသိုမ်တကောက်ꩻ (ပရိယတ်၊ ပဋိပတ်၊ ပဋိဝေဓ သာႏသနာႏသိုမ်ပါꩻ ထီသိုမ်တဗွီႏ)။

"ထီနောင်မီႏသေ့ꩻနဝ်ꩻ ကြေ့ꩻခံꩻပေါႏ"(ပအိုဝ်ႏဖုံႏ မီႏဒါႏသွူလေက်နဝ်ꩻ ကြေ့ꩻခံꩻကရိုꩻဒါႏ နိဗ္ဗာန်ႏအီႏပေါႏ၊ အလောင်ꩻအလျာႏတဲ့ အဝ်ႏရိုꩻဒျာႏ နဝ်ꩻလဲ့အီႏပေါႏ၊ လေက်အမဲန်ႏသွတ်ꩻကရိုꩻဒါႏ ကြေ့ꩻခမ်ꩻနဝ်ꩻလဲ့ အီႏပေါႏ) မဲန်ရိုꩻနုဲင်းနဝ်ꩻ။