လွောင်ႏလွောင်ႏဗူႏဗူႏ

"လွောင်ႏလွောင်ႏဗူႏဗူႏ မဉ်ႏအွဉ်ႏထွော့နွောင်ꩻဒျာႏမꩻ ပအိုဝ်ႏအာႏဇာႏနည်ႏမွူးနီꩻယို အီႏထွူႏတွုမ်" ခမ်းထီတဖြုံႏယို ခမ်းထီကထွာလွဉ်၊ ခမ်းထီကအဝ်ႏတဉ်ႏခွေါင်လွဉ်၊ ခမ်းထီကအဝ်ႏမွန်ဗွန်လွဉ် ဗꩻတွိုႏဟန်ႏသနီꩻနဝ်ꩻ အတိတ်မွူးနီꩻကို တွူႏကာႏလွဉ်ဗာႏ ခမ်းထီသမဲင်ꩻ၊ လိုꩻမျိုꩻသမဲင်ꩻ၊ တောႏလန်ႏရေꩻသမဲင်ꩻဖုံႏယို အဝ်ႏလွဉ်ဗာလွဉ်းလွဉ်းနဝ်ꩻသွူ၊ ဗွိုန်နုဲင်းနဝ်ꩻနေနေ လိုꩻမျိုꩻတမျိုꩻယိုလဲ့ လိုꩻမျိုꩻတမျိုꩻအတာႏ အွဉ်ႏဖေင်ꩻတလꩻတဝ်း အထိန်ꩻအမတ်ကထွာဒါႏ လိုꩻမျိုꩻသမဲင်ꩻဖုံႏယို အဝ်ႏဗာႏနေနေနဝ်ꩻသွူ။ နဝ်ꩻမꩻ ပွိုင်းဝွို့တောမ်ႏ ခမ်းထီအတာႏ ကထွာအီဒါႏ ထူꩻချာꩻမု၊ ကမ္ဘာႏအတာႏ ကထွာအီဒါႏ မုဲင်တောင်ꩻအီ ထာꩻမာꩻအမျိုꩻဖုံႏ၊ လိုꩻမျိုꩻတမျိုꩻအတာႏ အွဉ်ႏဖေင်ꩻတလꩻတဝ်း သမဲင်ꩻမတ်တန်ꩻဖုံႏယို မီႏတွိုႏလွဉ် အနေင်ႏနဝ်ꩻ၊ အလာနဝ်ꩻ၊ အမွူးနီꩻနဝ်ꩻ၊ အခိန်ႏနဝ်ꩻနဝ်ꩻ ယံကမတ်တောင်ꩻ ယူႏလꩻနွောင်ꩻအီအတာႏ အွဉ်ႏထွာလွေꩻလွဝင်ꩻ အထိန်ꩻအမတ်မွူးနီꩻ၊ သမဲင်ႏဝင်ႏမွူးနီꩻဖုံႏနဝ်ꩻသွူ။ နဝ်ꩻတဲင် ကမ္ဘာႏလောင်းလဲ့ တွက်လဲင်ꩻတလို့နွောင်ꩻဒုမ် အထိန်ꩻအမတ်မွူးနီꩻ၊ သမဲင်ꩻဝင်ႏမွူးနီꩻဖုံႏယို အဝ်ႏအတွိုင်ꩻ ခမ်းထီတွိုင်ꩻဖုံႏ မြန်မာခမ်းထီဖုံႏယို သမဲင်ꩻဝင်ႏမွူးနီꩻဖုံႏ၊ အထိန်ꩻအမတ်မွူးနီꩻဖုံႏ အဝ်ႏနဝ်ꩻသွူ၊ မြန်မာခမ်းထီအကို ကထွာဒါႏ ခမ်းရင်ꩻသား လိုꩻမျိုꩻစုမ်ႏသီးဖုံႏယိုလဲ့ လိုꩻမျိုꩻအလွောက်ꩻ ပငါပရာꩻ မွူးနီꩻထူꩻမွူးနီꩻမျတ်၊ သမဲင်ꩻဝင်ႏမွူးနီꩻဖုံႏယို အဝ်ႏထူႏဂုဏ်ႏမာꩻလွဉ်ဝင်ꩻ အထိန်ꩻအမတ် မွူးနီꩻဖုံႏနဝ်ꩻသွူ။ မီႏတွိုႏတွိုႏလွဉ်သွူ စက်တင်ဘာလာယိုနဝ်ꩻ ပအိုဝ်ႏလိုꩻမျိုꩻသီးအတာႏ၊ ပအိုဝ်ႏတစွိုးခွိုꩻလုမ်းသီးအတာႏ အာႏဇာႏနည်ႏမွူးနီꩻ ကရိုꩻဒါႏ မွူးနီꩻထူꩻယို အဝ်ႏထူႏဂုဏ်ႏမာꩻလွဉ် အထိန်ꩻအမတ် ပွယ်ꩻမွူးနီꩻသွူ၊ နဝ်ꩻမꩻ မီႏတွိုႏတွိုႏလွဉ် စက်တင်ဘာလာယို ကထွာပအိုဝ်ႏလိုꩻမျိုꩻသီး ယူႏလꩻခွုန်ꩻချာ ပအိုဝ်ႏအာႏဇာႏနည်ႏမွူးနီꩻနဝ်ꩻသွူ။ နဝ်ꩻမꩻ ပအိုဝ်ႏလိုꩻမျိုꩻယို အာႏဇာႏနည်ႏမွူးနီꩻ အဝ်ႏဒျာႏနုဲင်းနုဲင်းနဝ်ꩻသွူ၊ ပအိုဝ်ႏဇာႏဇာႏနည်ႏမွူးနီꩻနဝ်ꩻ နေင်ႏ ၁၃၃၇-ဗာႏ၊ တောႏလင်ꩻလာလောင်း ၅-နီꩻ (ထွာ ၁၉၇၅-ဗာႏ၊ စက်တင်ဘာလာ ၂၄-နီꩻ)၊ မွူးနီꩻ-ဗုဒ္ဓဟူꩻ အဝ်ႏနုဲင်းနဝ်ꩻတဲင် သေထွꩻဗာႏနဝ်ꩻသွူ။ မွူးနီꩻနဝ်ꩻနဝ်ꩻ ထွာပအိုဝ်ႏအွဉ်ငါ ဖြားဗွာဦးလှဖေ ဖဝကုဲင်ထိုꩻမွူးနီꩻနဝ်ꩻသွူ၊ ဖြားဗွာလှဖေနဝ်ꩻ ကုဲင်ထိုꩻတောမ်ႏ ၉၆-ပါꩻရောႏဂါႏနဝ်ꩻ သေထွꩻဗာႏနဝ်ꩻသွူ။ မြန်မာခမ်းထီ အာႏဇာႏနည်ႏမွူးနီꩻနဝ်ꩻ ထွာအွဉ်ႏထွော့လွေꩻ နေင်ႏ ၁၉၄၇-ဗာႏ၊ ဇူလိုင်လာ ၁၉-နီꩻနဝ်ꩻသွူ၊ အနီꩻနဝ်ꩻနဝ်ꩻ ဗိုလ်ချုပ်အောင်ဆန်းတောမ်ႏ အွဉ်ငါလင်(၈)ဖြာꩻသီးနဝ်ꩻ ခံႏဗာႏဝင်ꩻကျမ်ႏသီတဲင် ကထွာဒါႏ ခမ်းထီအွဉ်ငါ အိုပ်ချုပ်သားတောမ်ႏ ခမ်းသားအမျာꩻသီးနဝ်ꩻ ဟဲ့ꩻအွဉ်ႏထွော့ထွာလွေꩻ မြန်မာခမ်းထီ အာႏဇာႏနည်ႏမွူးနီꩻနဝ်ꩻသွူ။ ကဟဲ့ꩻအွဉ်ႏထွာဗာႏ အာႏဇာႏနည်ႏမွူးနီꩻအတွိုင်ꩻ ကထွာခမ်းသားထီသားသီးလဲ့ လက်ခံႏတဲင် မိဉ်းတွိုႏတွိုႏဇူလိုင်လာ ၁၉-နီꩻ အာႏဇာႏနည်ႏမွူးနီꩻနဝ်ꩻ တခမ်းလုမ်း တယ်ႏခမ်းထီသမ္မတအစ ဗꩻခမ်းသားလို့စွုမ်ႏဖြီးစွုမ်ႏဖြာꩻ တွိုႏရာꩻအရပ် အွဉ်ႏအရေꩻ ခမ်ႏနောင် အုံယေန်ဝင်ꩻနဝ်ꩻသွူ။ ကထွာယင်းဒါႏ ခင်လိုꩻမျိုꩻသီးနဝ်ꩻ မာꩻလွဉ်တောႏလန်ႏရေꩻ တယ်ႏစနေင်ႏ ၁၉၆၉-ဗာႏကိုနဝ်ꩻသွူ၊ ခင်လိုꩻမျိုꩻအတာႏ အီႏအွဉ်ႏထွော့လွေꩻအီ ခင်လိုꩻမျိုꩻအာႏဇာႏနည်ႏမွူးနီꩻ အာႏဇာႏနည်ႏလိုꩻပုဂ္ဂိုလ်ႏ တအဝ်ႏတဝ်းတဲင် ကတယ်ႏစဖေႏဒါႏ ခင်လိုꩻမျိုꩻတောႏလန်ႏရေꩻသား စိုင်းဇော်ညီနောင် ဖူးဝေးဝင်ꩻသိုမ်ကို အတန်သွတ်ꩻတဖြာꩻ ကကုဲင်ထိုꩻဒါႏ မွူးနီꩻနဝ်ꩻ အွဉ်ႏထွော့လွေꩻ ခင်လိုꩻမျိုꩻအာႏဇာႏနည်ႏမွူးနီꩻနဝ်ꩻသွူ။ ဗွိုန်နုဲင်းနဝ်ꩻနေနေ ကထွာယင်းဒါႏ ဖူးဝေးစောက်ꩻလိုꩻမျိုꩻသီးနဝ်ꩻ စောက်ꩻလိုꩻမျိုꩻအွဉ်ငါ စောဘဦး ကကုဲင်ထိုꩻဒါႏမွူးနိꩻယို အွဉ်ႏထွော့လွေꩻ စောက်ꩻလိုꩻမျိုꩻသီး အာႏဇာႏနည်ႏမွူးနီꩻနဝ်ꩻသွူ၊ စောက်ꩻလိုꩻမျိုꩻအွဉ်ငါ စောဘဦးနဝ်ꩻ ထွာဒျာႏစဲ့ꩻမန်းတပ်သီး ခꩻသီထိုꩻတဲင် ပွိုင်းဝွို့တောမ်ႏ စောက်ꩻသီးကအွဉ်ႏထွော့လွေꩻ အာႏဇာႏနည်ႏပုဂ္ဂိုလ်ႏ ကကုဲင်ထိုꩻမွူးနီꩻ စောက်ꩻလိုꩻမျိုꩻအာႏဇာႏနည်ႏမွူးနီꩻနဝ်ꩻနဝ်ꩻ ဗꩻတွိုႏဟန်ႏသနီꩻ စောက်ꩻလိုꩻမျိုꩻသီးအနေႏ လွစ်လွစ်တခြင်ခြင် မာꩻခွင်ꩻတအဝ်ႏလꩻတဝ်းနဝ်ꩻသွူ၊ မီႏမာꩻစောက်ꩻလိုꩻမျိုꩻ အာႏဇာႏနည်ႏမွူးနီꩻ အထိန်ꩻအမတ်ကရိုꩻလဲ့ အရဲးအပေ့ꩻဖုံႏယိုနဝ်ꩻ မော့ꩻကျုံႏလွဉ်ဗာႏနဝ်ꩻသွူ၊ ခင်လိုꩻမျိုꩻသီးလဲ့ နုဲင်းနဝ်ꩻနေနေ ခင်လိုꩻမျိုꩻအာႏဇာႏနည်ႏမွူးနီꩻယို လွစ်လွစ်တခြင်ခြင် ခုမ်မာꩻခွင်ꩻယို အဗွေတဗာႏ တအဝ်ႏလꩻတဝ်းနေနေနဝ်ꩻသွူ။ ကွဲးတွော့ꩻ ပအိုဝ်ႏလိုꩻမျိုꩻသီးအတာႏ အာႏဇာႏနည်ႏပုဂ္ဂိုလ်ႏမွူးနီꩻ မာꩻခွင်ꩻဖုံႏ အဝ်ႏစုမ်ႏလꩻလို့ဒျာႏလဲ့ ပအိုဝ်ႏလိုꩻမျိုꩻသီးအတာႏ အာႏပေႏအီအချက်နဝ်ꩻ ပွိုင်းဝွို့တောမ်ႏ ပအိုဝ်ႏအာႏဇာႏနည်ႏမွူးနီꩻယို လွောင်ႏလွောင်ႏဗူႏဗူႏ ဝင်ꩻတအွဉ်ႏထွော့တဝ်း၊ ရတနာႏအဝ်ႏထွူလဲဉ်းစူကိုလဲ့ ဖြွမ်းဖြွမ်းဗူႏဗူႏ အွဉ်ႏတန်ႏဖိုꩻ ထိန်ꩻသိမ်ꩻမု အဲဉ်ထဝ်းနဝ်ꩻသွူ။ အထွာနုဲင်းမုဲင်ꩻဟောင်းနဲးတဲင် ပအိုဝ်ႏအာႏဇာႏနည်ႏမွူးနီꩻနဝ်ꩻ ထွာအွဉ်ႏထွော့လွေꩻ ပအိုဝ်ႏအွဉ်ငါ ဖြားဗွာဦးလှဖေ ဖဝကုဲင်ထိုꩻဒါႏ မွူးနီꩻ နေင်ႏ ၁၉၇၅-ဗာႏ၊ စက်တင်ဘာလာ ၂၄-နီꩻ (နေင်ႏ ၁၃၃၇-ဗာႏ၊ တောႏလင်ꩻလာလောင်း ၅-နီꩻ)ရိုꩻနုဲင်းနဝ်ꩻလဲ့ မွူးနီꩻယိုနီဗာႏနဝ်ꩻ အွိုးနေင်ႏနဝ်ꩻခါနဝ်ꩻ ထွာတနꩻတနီꩻချင်ꩻတဲင် အဗာႏခုဲင်ႏငါႏတဝ်းနဝ်ꩻသွူ၊ တွိုႏလွေꩻနေင်ႏအလင်လင်ကိုနဝ်ꩻ မွူးနီꩻယိုနီဗာႏယို သမ်းတနꩻတဝ်းဒုမ်ဝင်ꩻ တနီꩻချင်ႏတဲင် လိုꩻကမဉ်မာꩻဒျာႏ တောမ်ႏအေန်ႏကလေက် နေင်ႏလာသားနဝ်ꩻ မာꩻလွေꩻ စက်တင်ဘာလာ ၂၄-နီꩻလဲ့ အဝ်ႏမာꩻလွေꩻဒျာႏ၊ လိုꩻကမဉ်မာꩻဒါႏ တောမ်ႏမြန်မာခမ်း နေင်ႏလာသားနဝ်ꩻ မာꩻလွေꩻလုဲင်ႏဒျာႏ တောႏလင်ꩻလာလောင်း ၅-နီꩻနဝ်ꩻတဲ့ အဝ်ႏမာꩻလွေꩻဒျာႏနဝ်ꩻ အဝ်ႏထီႏဒျာႏဝင်ꩻ စုမ်ႏဖြာꩻနဝ်ꩻသွူ။ စက်တင်ဘာလာ ၂၄-နီꩻတောမ်ႏ တောႏလင်ꩻလာလောင်း ၅-နီꩻ မွူးနီꩻယိုနီနီꩻအလောင်း ပအိုဝ်ႏလိုꩻမျိုꩻသီးအတာႏ လွောင်ႏလွောင်ႏဗူႏဗူႏတွော့ꩻ မဉ်ႏအွဉ်ႏထွော့လွေꩻတဗာႏဗာႏ မွေးတဝ်းနဲ့ တနီꩻနီꩻနဝ်ꩻ အအီႏဟဝ်သွူ၊ ကထွာဒါႏ ပအိုဝ်ႏလိုꩻမျိုꩻအာႏဇာႏနည်ႏမွူးနီꩻယိုလဲ့ ထွူႏတွုမ်မုအဝ်ႏနဝ်ꩻသွူ၊ မိဉ်ႏတမွေးတဝ်းနဝ်ꩻ ယိုတစွိုꩻလဲ့ မာꩻဒျာႏတလဲင်ႏ၊ နဝ်ꩻတစွိုꩻတဲ့ မာꩻဒျာႏတလဲင်ႏနဝ်ꩻ ပအိုဝ်ႏလိုꩻမျိုꩻ အာႏဇာႏနည်ႏမွူးနီꩻယို အထန်ႏပြာထိုꩻငါႏထာꩻနဝ်ꩻသွူ။ ပအိုဝ်ႏလိုꩻမျိုꩻယိုနဝ်ꩻ ပအိုဝ်ႏလိုꩻမျိုꩻအတာႏ အထျꩻအထောင်ꩻ ကထွာဒါႏ အရွီးအခိုႏဖုံႏယို လွောင်ႏလွောင်ႏဗူႏဗူႏ အဝ်ႏလိုႏဗွိုန်ပီငါႏဝင်ꩻ၊ အဝ်ႏလိုႏအဝ်ႏငီꩻငါႏဝင်ꩻ တဗာႏချင်ႏသွူ၊ အွိုးအရေꩻအလင်နဝ်ꩻ အရေꩻတတန်တဝ်းရိုꩻနုဲင်းနဝ်ꩻ အဝ်ႏလꩻလဲ့ ထွိုင်ႏတွိုႏဒါႏ ပအိုဝ်ႏလိုꩻမျိုꩻအတာႏ အသက်သွီႏဖြွီꩻ အရွီးအခိုႏကထွာ နုဲင်းလိတ်မွူဖုံႏတောမ်ႏ ယင်းလိုꩻမျိုꩻတမျိုꩻ သမဲင်ꩻဝင်ႏမွူးနီꩻ အာႏဇာႏနည်ႏမွူးနီꩻယိုဖုံႏယို အအဝ်ႏသင်ꩻတဝ်း နီသိုမ်စွိုး နီသိုမ်ခဝ် နီသိုမ်မျိုꩻနဝ်ꩻသွူ။ အဝ်ႏသင်ꩻတဝ်းကရိုꩻနဝ်ꩻ ကခံႏထူႏဒါႏ နမ်းတောမ်ႏနမ်း လိုꩻမျိုꩻအွဉ်ငါသားဖုံႏ သေနာႏတဝ်းဟောင်း၊ လိုꩻပေႏဒုံခင်ꩻခါႏငါမွုန်းတဲ့ အဝ်ႏယူႏထွꩻနွောင်ꩻနဝ်ꩻသွူ။