ဝင်ꩻခမ်းပညာႏရေꩻ

"ဝင်ꩻခမ်းပညာႏရေꩻ" ဟံႏတဗီႏလောင်းကီ ကထင်ႏထိုတသွောင်းထွူလဲဉ်းဒါႏ ခမ်းထီဖုံႏနောဝ်ꩻ ကွပ်စွဉ်ႏ ဝင်ꩻခမ်းထီကို ဗွောင်သွဉ် ပညာႏရေꩻစနစ်ကျယံငါႏတဲင် တယ်ႏစွဉ်ႏကျောင်ꩻပျောႏအရန်း ဗꩻထံစွဉ်ႏ ကလꩻဘွဲ့သူꩻနောဝ်ꩻ ဝင်ꩻထူႏသုံꩻသွဉ်လွေꩻဒျာႏ Child Center Approve-ကရိုꩻဒါႏ CCA (ကလေးဗဟိုပြုသင်ကြားနည်း)အောဝ်ႏလိုꩻပေႏ သွဉ်ထူႏလွေꩻပညာႏရေꩻစနစ်နုဲင်းနောဝ်ꩻသွူ။ နီမြန်မာနွောင်ꩻဟံႏ ပညာႏရေꩻစနစ်ယိုခါနောဝ်ꩻ Teacher Centre Approve-အောဝ်ႏဆရာႏသွဉ်လွေꩻပညာႏရေꩻစနစ်နောဝ်ꩻသွူ။ ဆရာႏဒါႏအတွိုင်ꩻ အုံဆꩻငါ ယီးနယ်လိုꩻပေႏ "ရွစ်နုဲင်းယိုဟုဲင်း၊ သွဉ်နုဲင်းယို၊ ကျပ်အုမ်ဗာႏအပုဒ်ယို၊ အပုဒ်နောဝ်ꩻ၊ ကျပ်တောဝ်းလꩻတောဝ်း၊ ဒါႏတောဝ်း အောင်ႏတောဝ်း"စနစ်နုဲင်းနောဝ်ꩻသွူ။ ဝင်ꩻခမ်းနောဝ်ꩻ ဆရာႏဗွောင်နယ်ဗော့ꩻ အမော့အဆွုမ်ႏလွုမ်ꩻ၊ လိုꩻပေႏတွမ်ႏလိုꩻပေႏ သွဉ်ထူႏချာဒျာႏ၊ သွဉ်ထွင်ႏချာဒျာႏ၊ သွဉ်မာꩻချာဒျာႏ၊ အောဝ်ႏလိုꩻပေႏသွဉ်ထူႏ၊ သွဉ်ထွင်ႏ၊ သွဉ်မာꩻကိုတွော့ꩻ သေလွဉ်၊ ဒါႏလွဉ်၊ အောင်ႏမျင်ႏလွဉ်နုဲင်းနောဝ်ꩻသွူ။ ဥပမာႏ- ဆရာႏအောဝ်ႏဆꩻငါ ရီဒျာႏလိုꩻပေႏ "ဟန်ႏသနီꩻယို နီအီႏသွဉ်ထူႏဗာႏအမျိုꩻမုဲင်ꩻ"နုဲင်းနောဝ်ꩻသွူ၊ လိုꩻပေႏဆꩻချာလဲ့ ဝွေꩻသီးသꩻကပါ၊ ဝွေꩻသီးသꩻကဝါႏသနာႏဒါႏ တစွိုးစွိုးနောဝ်ꩻ ဒေါ့ꩻထန်ႏလွဉ်သွူတွော့ꩻ "နီသွဉ်းသီး မဲဉ်သွဉ်ထူႏ မာꩻလမ်းနယ်ꩻဩ"နုဲင်းနောဝ်ꩻသွူ။ အောဝ်ႏနောဝ်ꩻတွော့ꩻ ဆရာႏနောဝ်ꩻ "မွေးသွူ- နီကအီႏတယ်ႏဗာႏလမ်းယို ရီးသွတ်ꩻအနေႏ နီအောဝ်ႏလိုႏယူႏရီးဗာႏ အမျိုꩻမုဲင်ꩻ? ယူႏရီးရီးသွော့ ကွန်ႏကျံꩻနောဝ်ꩻလုဲင်း"ဆရာႏရိုꩻယင်းနုဲင်းနောဝ်ꩻ၊ လိုꩻပေႏလဲ့ ယူႏလွေꩻကွန်ႏကျံꩻ "အောဝ်ႏလိုႏထာꩻထွန်ႏ၊ အောဝ်ႏလိုႏသုဲင်ꩻ၊ အောဝ်ႏလိုႏဟံႏဘိလပ်၊ အောဝ်ႏလိုႏပတဲင်ႏပေါက်"စတဲင်နုဲင်းနောဝ်ꩻဖုံႏဒျာႏသွူ။ "အောဝ်ႏလိုႏတမုဲင်ꩻမုဲင်ꩻနောဝ်ꩻ တဲမ်းခါꩻဝင်ꩻလုဲင်း"ဆရာႏဒေါ့ꩻယင်းနုဲင်းနောဝ်ꩻတွော့ꩻ လိုꩻပေႏတဲ့ မတ်တောင်ꩻသေꩻခါꩻယင်းဝင်ꩻဖုံႏ နုဲင်းနောဝ်ꩻသွူ။ အောဝ်ႏနောဝ်ꩻတွော့ꩻ ခွိုင်းလိုꩻပေႏ ကယူႏဖြောင်ဖြောင်နောဝ်ꩻ ကေားထွာဆရာႏ ထွဉ်ႏမတ်လွဉ်ꩻဖေႏနုဲင်းနောဝ်ꩻ၊ လိုꩻပေႏယူႏမဉ်ႏတဖြောင်တောဝ်းဒွုမ်မꩻ ဆရာႏထဲမ်သော့ꩻကိုဖေႏယင်း၊ "ပနာꩻ အောဝ်ႏလိုႏတောဝ်းနဲ့?"၊ "အောဝ်ႏလိုႏဩ"၊ "နောဝ်ꩻတဲ့ မတ်ပါယင်းလုဲင်း"နုဲင်းနောဝ်ꩻဖုံႏသွူ။ ခွိုင်းလိုꩻပေႏယူႏကဖြောင်နောဝ်ꩻ တဲမ်းမုဲင်ခါꩻလို့ဖေႏထွူမꩻ ဆရာႏအောဝ်ႏဆꩻငါနောဝ်ꩻ ရိုꩻဖေႏယင်း "မွေးသွူ၊ သီမဲဉ်လꩻ လမ်းပွုံႏနုဲင်းမုဲင်ꩻ ကဉ်းထွို့ꩻစံꩻအပွုံႏမုဲင်ꩻ"ရိုꩻထွူနောဝ်ꩻတွော့ꩻ လိုꩻပေႏဖုံႏလဲ့ ခွိုင်းဝွေꩻသီးကမဲဉ်လꩻအပွုံႏနောဝ်ꩻ ခွေတဲမ်းထွို့ꩻဒျာႏတမျိုꩻ၊ နာꩻတဲမ်းထွို့ꩻဒျာႏတစား၊ ခွိုင်းကားကကျွိုက်ပငါပရာꩻ ကျံႏထွင်ႏကျံႏမာꩻလွဒျာႏဝင်ꩻဖုံႏနောဝ်ꩻသွူ။ အောဝ်ႏလိုꩻပေႏထာꩻယူႏ ထွဉ်ႏထွို့ꩻတဲမ်းနေးအရုတ်၊ အောဝ်ႏအရုတ် ထွဉ်ႏမာꩻနယ်ဖေႏနေး အပွုံႏစံႏကျံꩻ၊ အောဝ်ႏအပွုံႏစံႏကျံꩻနောဝ်ꩻတွော့ꩻ အွဉ်လွေနယ်ဗာႏ လိုꩻကမာꩻမွေးဒါႏ လမ်းထျꩻနုဲင်းနောဝ်ꩻသွူ၊ လိုꩻပေႏမဉ်ႏလွေꩻထီႏဗာႏ လက်သမာꩻပယန် မာꩻပွုံႏမာꩻနယ်ꩻနုဲင်းယိုနုဲင်းနောဝ်ꩻလဲ့ လိုꩻပေႏမတ်တောင်ꩻသေꩻခါꩻတဲင် အောဝ်ႏပါꩻကမာꩻနယ်ဝွေꩻသီးအတွိုင်ꩻ ဖေႏကယံကယ်ꩻထဲင်းနောဝ်ꩻနောဝ်ꩻ လိုꩻပေႏကျံႏယူႏ၊ ကျံႏတယ်ႏထွင်ႏတွော့ꩻ သေလွဉ်ဒါႏလွဉ်နုဲင်းနောဝ်ꩻသွူ။ နုဲင်းမွူးရောဝ်ꩻနီꩻ တရူꩻနီꩻလဲ့ လိုꩻပေႏမဲဉ်သွဉ်ထူႏနုဲင်းမုဲင်ꩻ၊ မဲဉ်သေမဲဉ်ဒါႏနုဲင်းမုဲင်ꩻလဲ့ ရီယင်းလိုꩻပေႏ၊ အောဝ်ႏလိုꩻပေႏ ကမဲဉ်သေဒါႏအတွိုင်ꩻ ဆရာႏအောဝ်ႏဆꩻငါ ဗွောင်နယ်၊ အွဉ်နယ်၊ သွဉ်နယ်ဖေႏဗာႏ ပညာႏအစွိုးစွိုးအမျိုꩻမျိုꩻနောဝ်ꩻသွူ။ လိုꩻပေႏမီႏမဲဉ်ဒါႏ စက်ပညာႏလဲ့ အွဉ်ႏနယ်ဗာႏ စက်ပညာႏ၊ စက်အမျိုꩻယိုနောဝ်ꩻ ထွို့ꩻလꩻထီ၊ စက်အမျိုꩻယိုနောဝ်ꩻ လေလꩻမေႏ၊ စက်အမျိုꩻယိုနောဝ်ꩻ ကွင်ႏအီဒါႏထာꩻစတဲင်နုဲင်းနောဝ်ꩻဖုံႏနောဝ်ꩻ ကောထွာဆရာႏ ခွယ်ꩻနေးဖေႏဗာႏအစွိုးစွိုး အမျိုꩻမျိုꩻနောဝ်ꩻသွူ။ လိုꩻပေႏကဝါႏသနာႏဒါႏ ထီစက်သားလဲ့ အွဉ်ႏနယ်ဖေႏဗာႏထီစက်၊ အွဉ်ႏနယ်ထွူထီစက်တွော့ꩻ ထွဉ်ႏလိုꩻပေႏတဲမ်းထွို့ꩻဗာႏအရုတ်၊ အောဝ်ႏအရုတ် ထွဉ်ႏမာꩻနယ်ဗာႏယင်း ထီစက်ပွုံႏစံႏကျံꩻ၊ အောဝ်ႏအပွုံႏစံႏကျံꩻနောဝ်ꩻ မဉ်ႏထွူမꩻ ဖျꩻနယ်၊ ဒပ်ꩻနယ်ဖေႏဗာႏ ထီစက်နမ်းမွေးမွေးနောဝ်ꩻသွူ။ လိုꩻပေႏကဝါႏသနာႏဒါႏ မေႏစက်သားလဲ့ နုဲင်းနောဝ်ꩻနေနေ၊ ထွဉ်ႏလိုꩻပေႏယူႏရီး၊ အောဝ်ႏထာꩻယူႏ ထွဉ်ႏတဲမ်းထွို့ꩻနယ်အရုတ်၊ အောဝ်ႏအရုတ် ထွဉ်ႏဗွော့ꩻနယ်ပွုံႏစံႏကျံꩻ၊ အောဝ်ႏပွုံႏစံႏကျံꩻ ဗွောင်နယ် ဖျꩻနယ်ဗာႏအနမ်းမွေးနုဲင်းနောဝ်ꩻသွူ။ နုဲင်းအပတ်ငါ လိုꩻပေႏ မီႏမဲဉ်ဒါႏ တသီႏပညာႏဖဲ့ꩻလဲ့ ဗွိုန်ပီနုဲင်းဆꩻချာယိုနေနေ၊ ထွဉ်ႏလိုꩻပေႏယူႏချာ အနမ်းလောင်း အထွာတမုဲင်ꩻ၊ အကဲင်အောဝ်ႏနဲ့၊ အဆာအောဝ်ႏနဲ့၊ ပွိုင်းတမုဲင်ꩻ ကဲင်ဆာဗာႏ၊ ကကဲင်ဆာယို မာꩻဗာႏနုဲင်းမုဲင်ꩻ ဖေႏကဟောဝ်၊ ကောထွာဆရာႏဆꩻငါ ဗွောင်ခြုဲင်းစေသျင်ꩻနယ်ဗာႏ ပဉ်စွိုးစွိုး ပဉ်မျိုꩻမျိုꩻစီႏနောဝ်ꩻသွူ။ ဆရာႏနောဝ်ꩻ ဗွောင်နယ်ဖေႏဗာႏ ဓာတ်လစ်ꩻပါꩻခရာႏ၊ ပထဝီႏဓာတ်နောဝ်ꩻ တမုဲင်ꩻ၊ အာပေါဓာတ်၊ ဝွယောဓာတ်၊ တေဇောဓာတ်နောဝ်ꩻ နုဲင်းမုဲင်ꩻ ထွဉ်ႏလိုꩻပေႏယူႏ၊ ထွဉ်ႏလိုꩻပေႏ မော့ꩻခွဲးသွူ ဓာတ်လစ်ꩻပါꩻထွူမꩻ ပထဝီႏဓာတ်နောဝ်ꩻ ဟံႏဓာတ်၊ ဟံႏနောဝ်ꩻ နုဲင်းယို၊ အပေါနောဝ်ꩻ ထီဓာတ်၊ ကူလွဉ်ထီတွော့ꩻ ယိုနောဝ်ꩻ ထီဓာတ်အကျောင်ꩻ၊ ယိုနောဝ်ꩻ ဝါယော-တလီꩻဓာတ်၊ ယိုနောဝ်ꩻ တေဇော-မေႏဓာတ်၊ ပထဝီႏဓာတ်နောဝ်ꩻ အမာꩻဆွော့ꩻဖေႏ နီနမ်းခန္ဓာႏ၊ အာပေါဓာတ်နောဝ်ꩻ အမာꩻပနဲဉ်ႏဖေႏနီနမ်းခန္ဓာႏ၊ ဝါယောဓာတ်နောဝ်ꩻ အမာꩻတသွိုးဖေႏ နီနမ်းခန္ဓာႏ၊ တေဇောဓာတ်နောဝ်ꩻ အမာꩻမဉ်၊ အမာꩻလျား၊ အမာꩻလွုမ်ꩻဖေႏ နီနမ်းခန္ဓာႏစတဲင် ခြုဲင်းနယ်သျင်ꩻနယ်ဖေႏဗာႏနုဲင်းနောဝ်ꩻသွူ။ အောဝ်ႏနောဝ်ꩻတွော့ꩻ ပတာꩻတဲင်ႏ မဉ်ႏအောဝ်ႏနုဲင်းယို ထာꩻဆာထွာလွဉ်ဒါႏနုဲင်းယို၊ စက်ချဉ်ႏသွီႏ(သွေးပေါင်ချိန်)မဉ်ႏယွမ်ꩻ မဉ်ႏထင်ႏ အထွာလွဉ်နုဲင်းယို၊ အမဉ်ႏထွာနုဲင်းယို အံႏဗာႏတသီႏအမျိုꩻယို၊ သေင်ႏမွူးမျိုꩻယိုနောဝ်ꩻ လꩻတသီႏနုဲင်းယို၊ ဟောဝ်ထာꩻဆာနုဲင်းယို၊ လွေꩻဘီတာမေင်အေ/ဘီ/သီ/အီးနုဲင်းယို စတဲင်ခြုဲင်းနယ်သျင်ꩻဗာႏ ပဉ်စားစားနောဝ်ꩻသွူ။ သေင်ႏမွူးအမျိုꩻယိုနောဝ်ꩻ အလꩻတမုဲင်ꩻဓာတ်၊ နွောင်ꩻထာꩻဆာမျိုꩻမုဲင်ꩻ၊ အကျိုꩻဖေႏအီ နီလိုꩻသီးရုတ်ခန္ဓာႏနုဲင်းမုဲင်ꩻ-စတဲင် လိုꩻပေႏတဲ့ ရီဆရာႏ၊ ဆရာႏတဲ့ ဗွောင်နယ်တပဲ့ꩻတွော့ꩻ လိုꩻပေႏနောဝ်ꩻ အရင်ꩻခံႏတဉ်ႏခွေါင်ထွူစွဉ်ႏ အွိုးပေႏခါလွဉ်ကာႏနောဝ်ꩻသွူ။ စိမ်စွဉ်ႏမဉ်ႏသွဉ်ထူႏလွူꩻဟံႏခရာႏလဲ့ ဟံႏအရောင်ႏယို ထွာအယံသွတ်ꩻ၊ ဟံႏအရောင်ႏယို ထွာအဆျာႏဓာတ်၊ အဆျာႏဓာတ်နောဝ်ꩻ လွုပ်ꩻအံႏပေါႏဟောဝ်တောဝ်း၊ အဆွဲဓာတ်နောဝ်ꩻ လွုပ်အံႏဟောဝ်၊ တဲ့ꩻခေါဝ်းအစွိုးအခြွီမျိုꩻယို စတဲင်နုဲင်းနောဝ်ꩻဖုံႏ ဝင်ꩻသွဉ်ထူႏထွူစွဉ်ႏ ပေႏပေႏခါကာႏနောဝ်ꩻသွူ။ နုဲင်းလုံးသဲင် ပတ္တမျာꩻလဲ့ နုဲင်းနောဝ်ꩻနေနေ၊ လုံးသွမ်ႏ(ကျောက်စိမ်း)အထီအသွီႏ မဉ်ႏအောဝ်ႏနုဲင်းယိုနောဝ်ꩻ အယာႏဖြား၊ အထီဖြား၊ အငိုꩻတန်၊ အရောင်ႏအယာႏ မဉ်ႏအောဝ်ႏနုဲင်းယိုနောဝ်ꩻ အငိုꩻပေႏ၊ နွို့တောဝ်းဆေꩻကွက်ꩻ နုဲင်းနောဝ်ꩻအစ ဝင်ꩻသွဉ်ထူႏထွူစွဉ်ႏ ပေႏခါလွဉ်ကိုနောဝ်ꩻသွူ။ မဉ်ႏထုမ်ႏလွူꩻ တိရစ္ဆာန်ႏ အသက်ဖုံႏလဲ့ နုဲင်းနောဝ်ꩻနေနေ၊ ယိုနောဝ်ꩻ အသွုန်ႏသိုႏ၊ အသွုန်ႏဆꩻ၊ အသꩻရာႏ၊ ယိုနောဝ်ꩻ အလုံးသူ(ကျောက်ကပ်)၊ ယိုနောဝ်ꩻ အသွီႏ၊ အယာႏ၊ အဗဲ့ꩻ၊ အဆွတ်ꩻခီးဗဲ့ꩻစတဲင်နုဲင်းနောဝ်ꩻဖုံႏ ဝင်ꩻဖြယ်ဖနယ်ဖေႏစွဉ်ႏ ထာꩻသောင်ꩻထာꩻသားသီးဖုံႏနောဝ်ꩻသွူ။ လိုꩻပေႏသီး သဘာဝနောဝ်ꩻ သꩻမဲဉ်ခွုမ်လွူꩻပဆိုးအာ၊ သꩻမဲဉ်တယ်ႏထွင်ႏအာ၊ မဲဉ်သေ၊ မဲဉ်ဒါႏ၊ မဲဉ်ထီႏ၊ မဲဉ်ထွင်ႏသꩻအာႏတလာနောဝ်ꩻမꩻ မဉ်ႏထီႏဗာႏသွူ ဝင်ꩻလိုꩻတန် မာꩻထာꩻမာꩻလဲ့ ကုဲင်းထွားနုဲင်းလွဉ်ꩻ၊ မာꩻနုဲင်းလွဉ်ꩻ၊ ထွင်ႏနုဲင်းလွဉ်ꩻဒါႏနောဝ်ꩻမꩻ လိုꩻပေႏဉာဏ်ႏဖုဲင်ထင်၊ ကျံႏထွင်ႏဖျင်တသာသာ အထွာလွဉ်နုဲင်းနောဝ်ꩻ ကဲဉ်းအာအာနောဝ်ꩻသွူ။ ကွပ်နောဝ်ꩻမ ဝင်ꩻခမ်းပညာႏရေꩻနောဝ်ꩻ သွဉ်လိတ်၊ အောင်ႏလိတ်အုပ်ကိုအတွိုင်ꩻ မွေးတောဝ်း၊ တလဲင်ႏချင်ꩻ ဝင်ꩻအွဉ်ႏနယ်၊ မာꩻနယ်နေးစွဉ်ႏ အနမ်းအခြုံတဲင် လိုꩻပေႏဖုံႏနောဝ်ꩻ မဉ်ႏတန်လွဉ်လဲ့ အထီအသွီႏဗွေထွူ၊ ထွဉ်ႏမာꩻထာꩻမာꩻအမျိုꩻမုဲင်ꩻ ဒါႏထွူနောဝ်ꩻသွူ။ မဉ်ႏလꩻသွူ စက်မုအင်ဂျင်နီယာဘွဲ့လဲ့ ဝင်ꩻတယ်ႏထွင်ႏကာꩻကုမ္ပဏီႏဒါႏစွဉ်ႏ၊ မဉ်ႏလꩻတသီႏပညာႏဘွဲ့လဲ့ ထာꩻဆာမျိုꩻမုဲင်ꩻ လွုမ်ꩻလာꩻဒါႏထွူလို့စွဉ်ႏ၊ မဉ်ႏလꩻစီꩻပွာꩻရေꩻဖဲ့ꩻဆဲင်ႏရာꩻဘွဲ့လဲ့ ဝင်ꩻတဲႏထွင်ႏနွောင်ꩻ၊ ဗွောင်နွောင်ꩻစွဉ်ႏပွယ်ꩻယွုံႏ၊ ပလာသာစတိုး၊ ကွန်ႏနွို့ကွန်ႏထန်ႏ ဝင်ꩻဒါႏလျင်ႏထွူစွဉ်ႏ တလဲင်ႏချင်ꩻနောဝ်ꩻသွူ။ နဲင်းနီမြန်မာခမ်းပညာႏရေꩻနောဝ်ꩻ TCA နယ်ꩻတွော့ꩻ ဆရာႏအောဝ်ႏဆꩻငါ ခြောဝ်ဖေႏ/သွဉ်ဖေႏ၊ လိုꩻပေႏအောဝ်ႏဆꩻချာ ရွစ်လွဉ်ꩻ၊ မဉ်ႏတတောင်ꩻတောဝ်း ထွဉ်ႏကျပ်အွံ၊ လိုꩻပေႏကဒါႏအံဒါႏ အပုဒ်နောဝ်ꩻ မဉ်ႏထင်ႏကီတရန်းလဲ့ လိတ်အောဝ်ႏတဖိန်ꩻလဲဉ်း၊ မဉ်ႏလꩻလဲဉ်းဘွဲ့လဲ့ မာꩻထာꩻမာꩻတမုဲင်ꩻ တစွိုးတဒါႏတောဝ်း၊ ထွာထိုꩻဒျာႏနုဲင်းနောဝ်ꩻဖုံႏသွူ။ လိုꩻပေႏသွဉ်တွော့ꩻ လိုꩻပေႏဒါႏတမွေးတောဝ်း၊ ဆရာႏဒါႏတွော့ꩻ ဆရာႏသွဉ်ဒျာႏတဲင် လိုꩻပေႏလောင်း ထာꩻမျတ်တမုဲင်ꩻမုဲင်ꩻ တအောဝ်ႏကုဲင်သေꩻတောဝ်း၊ လိုꩻပေႏမဉ်ႏတန် မဉ်ႏလွူးနမ်း ကမ်းကြိုလဲ့ တယ်ႏစဗာႏယင်းဒျာႏ အခေႏခံႏ ဘဝသုညကိုနောဝ်ꩻသွူ။ လꩻလဲဉ်းသွူဘွဲ့လဲ့ ယဖြာꩻဖြာꩻ ကထွာဖိုးတီသားလဲ့ ထီႏဗာႏနေနေ၊ လုပ်ꩻမာꩻထာꩻ၊ ဖြေꩻစာကူꩻကားထာꩻ တဒါႏတောဝ်းဒွိုန်းနောဝ်ꩻသွူ၊ ယိုနောဝ်ꩻ ပါႏတောဝ်းလိုꩻပေႏ၊ ပါႏဒျာႏပညာႏရေꩻစနစ်သိုႏဖျင်ꩻဒျာႏနောဝ်ꩻသွူ။ ယွူးဆရာႏအပဲစ်တဲ့ တမွေးတောဝ်း၊ စနစ်တယံတောဝ်းတွော့ꩻ လိုꩻပေႏသိုႏဖျင်ꩻထိုꩻလို့ဗာႏ တခမ်းလွုမ်းနုဲင်းနောဝ်ꩻဒျာႏသွူ။ ခွိုင်းယိုမာꩻငါ ဖျင်တသာခန်းသွော့ဝင်ꩻ ပညာႏရေꩻစနစ်အကျောင်ꩻ- တွမ်ႏမေတ္တာႏတဲင်-