သဌေꩻပေါတလိယ

"ပေါတလိယသုတ် (နီဗွေႏဘုရာꩻဟော်ꩻဖေႏ သဌေꩻပေါတလိယတရာꩻ)" အွိုးခꩻတလဲင်ႏ- ပေါတလိယသဌေꩻနဝ်ꩻ ကွဉ်ကꩻတွမ်ႏခွမ်ꩻလာꩻဟောဝ် ထိုမ်ႏခင်ႏဖါႏ ကင်းထီꩻ၊ ထောင်တဖူꩻ၊ တွိုႏတခြာကို လွေꩻထီႏခန်း နီဗွေႏဘုရာꩻ သွုံꩻသွမ်ꩻယာထွူ အုံပဆားသေင်ႏမွူးတမွူးဆလ၊ ပေါတလိယ လွေꩻထေ့ဗွေႏဘုရာꩻ၊ သꩻရောင်းသꩻရေꩻ ဒေါ့ꩻငေါဝ်းနစ်သက် စွော့ꩻတက်ထွူတဲ့ ပေါတလိယနဝ်ꩻ သမ်းအုံထွိုင်ႏဒျာႏစွူစွူတွော့ꩻ ဗွေႏဘုရာꩻရိုꩻ- "သဌေꩻပေါတလိယ- ခင်ႏလမ်းအုံ အဝ်ႏဗောႏထာꩻနဝ်ꩻ မဉ်အုံလင်ꩻအထွောင်းမုဲင်ꩻ အုံလင်ꩻဟုဲင်း" ဗွေႏဘုရာꩻဟဲ့ꩻဝွေꩻ 'သဌေꩻ'နဝ်ꩻ ဝွေꩻကျွိုက်တဝ်း၊ သꩻလျားစွဉ်ႏထာꩻ၊ အွဉ်ႏတကုဲင်ထွူစွဉ်ႏအလွိုး၊ အုံဒျာႏတေ့ꩻတေ့ꩻ၊ နီဗွေႏဘုရာꩻ ထွဉ်ႏအုံလင်ꩻစွဉ်ႏ သွံလဲင်ႏတရေꩻရေꩻနဝ်ꩻမꩻ နေးတွမ်ႏငေါဝ်းဟမ်းဆွော့ꩻဆွော့ꩻ ဒေါ့ꩻချာနီဗွေႏဘုရာꩻနုဲင်းယို- "ဗွေႏဂေါတမ- ဗွေႏဂေါတမနဝ်ꩻ ဟောဝ်ဟဲ့ꩻတဝ်းခွေ 'သဌေꩻ၊ သဌေꩻ'နုဲင်းနဝ်ꩻ" "ထွားနာꩻအကွဉ်အကꩻ၊ အအုံအအောဝ်ႏနဝ်ꩻ ဗွန်ပီသဌေꩻနဝ်ꩻမꩻ ခွေဟဲ့ꩻ'သဌေꩻ၊ သဌေꩻ'နုဲင်းနဝ်ꩻသနယ်ဟွေး" "ဗွေႏဂေါတမ- ခွေယိုခါနောဝ်ꩻ လိုꩻလမ်းကိစ္စ ကားကအဝ်ႏနဝ်ꩻ ခွေပယ်ႏထိုꩻလဲဉ်း၊ ခွေမာꩻတဝ်းဒွုမ် ထမုဲင်ꩻမုဲင်ꩻ၊ ခွုင်းကားတဲင် လိုꩻလမ်းအသွုံꩻအနွုန်ꩻ အဟဲ့ꩻအဟောင်ဖုံႏနဝ်ꩻ ခွေမာꩻထဲ့ တဒွေါ့ꩻဖြတ်ꩻထိုꩻလဲဉ်း"(ဝွေꩻကယူႏ ဝွေꩻနမ်းနဝ်ꩻ လိုꩻလမ်းမွေးဒွုမ်)။ "သဌေꩻဟွေး- နာꩻပယ်ႏထိုꩻ လိုꩻလမ်းကိစ္စနုဲင်းမုဲင်ꩻ၊ နာꩻတဒွေါ့ꩻဖြတ်ꩻ အဟဲ့ꩻအဟောင် အသွုံꩻအနွုန်ꩻနုဲင်းမုဲင်ꩻ" "ဗွေႏဂေါတမ- ခွေဥစ္စာႏ ဗွူဟူ ရွဉ်ခံꩻတခြိုꩻကားကအဝ်ႏ အမွေႏအနေႏ ဖန်းဖေႏလို့လဲဉ်း ပိုခိုပိုမူႏသီးဖုံႏ၊ ပွိုင်းဝွို့တွမ်ႏ တခြိုꩻဥစ္စာႏဖုံႏနဝ်ꩻ ခွေတဒေါ့ꩻတဝ်းဒွုမ်၊ ခွေတစွော့ꩻတဝ်းဒူမ်နုဲင်းမုဲင်ꩻမုဲင်ꩻ၊ အွဉ်ႏကုဲင်ကွို့ꩻခွေအံႏတာႏ အွꩻတာႏ ကွဉ်ကꩻတာႏ တစူးတစိꩻပေႏဒျာႏ၊ ခွေပယ်ႏနုဲင်းနဝ်ꩻ မာꩻဖြတ်ꩻနုဲင်းနဝ်ꩻသွူ"(ကွပ်နဝ်ꩻမꩻ ခွေယိုနဝ်ꩻ ဟဲ့ꩻသဌေꩻနုဲင်းနဝ်ꩻ၊ ဟဲ့ꩻလိုꩻလမ်း အသွုံꩻအနွုန်ꩻနုဲင်းနဝ်ꩻနဝ်ꩻ တသေန်ႏလျောႏတဝ်းသွူ)။ "သဌေꩻပေါတလိယ- နာꩻမာꩻဖြတ်ꩻပွုံႏ အဟဲ့ꩻအဟောင်၊ အသွုံꩻအနွုန်ꩻနဝ်ꩻ တမျိုꩻခေါ်တန်ဒျာႏ၊ ဘုရာꩻခွေအဆွုံꩻအမꩻကို အဟဲ့ꩻအဟောင် အသွုံꩻအနွုန်ꩻနဝ်ꩻ (ဗွန်တဝ်းနာꩻ) တမျိုꩻခေါ်ဒျာႏ" "ဗွေႏဂေါတမ- နီဗွေႏဘုရာꩻ အဆွုံꩻအမꩻကိုနဝ်ꩻ မာꩻထဲ့ဖြတ်ꩻ (ငေါဝ်းလိုꩻလမ်း) အသွုံꩻအနွုန်ꩻနုဲင်းမုဲင်ꩻအီ ဟော်ꩻနယ်ခွေမွိုင်" တောင်ꩻပြန်ႏလောဝ်းနုဲင်းနဝ်ꩻတဲင် နီဗွေႏဘုရာꩻ အွဉ်ႏသꩻဆွာꩻဆွာꩻ နေးတွမ်ႏမေတ္တာႏ၊ နေးတွမ်ႏကရုဏာႏ ထာꩻသညင်ꩻဝွေꩻ တန်တန်အာအာ သျင်ꩻနယ်ချာ ပဉ်မျိုꩻပဉ်မျိုꩻနုဲင်းယို- သဌေꩻပေါတလိယ- ဗွေႏဘုရာꩻ အဆွုံꩻအမꩻကို ကမာꩻထဲ့ဖြတ်ꩻ ငေါဝ်းလိုꩻလမ်းနဝ်ꩻ အဝ်ႏသွစ်ꩻမျိုꩻ၊ သွစ်ꩻမျိုꩻကရိုꩻနဝ်ꩻ- ၁။ ပါဏာတိပါတံ နိဿာယ ပါဏာတိပါတော ပဟာတဗ္ဗော- အာႏကွိုꩻဒျာႏ မာꩻသီတဝ်း ဝင်ꩻသက်တဲင် ထာꩻမာꩻကမာꩻသီ ဝင်ꩻသက်နောဝ်ꩻ ပယ်ႏထိုꩻဗာႏ၊ (မာꩻသီတဝ်းဝင်ꩻသက်)။ ၂။ ဒိန္နာဒါနံ နိဿာယ အဒိန္နာဒါနံ ပဟာတဗ္ဗံ- အာႏကွိုꩻဒျာႏ ထူႏတခွန်ꩻတဝ်း ဝင်ꩻတခြိုꩻတဲင် ထာꩻမာꩻထူႏတခွန်ꩻ ဝင်ꩻတခြိုꩻနဝ်ꩻ ပယ်ႏထိုꩻဗာႏ၊ (ထူႏတခွန်ꩻတဝ်း ဝင်ꩻတခြိုꩻ)။ ၃။ သစ္စဝါဒံ (သစ္စံ ဝါဒံ) နိဿာယ မုသာဝါဒေါ ပဟာတဗ္ဗော- အာႏကွိုꩻဒျာႏ ငေါဝ်းမွေးငါမဲဉ်ႏတဲင် ဒေါ့ꩻလိန်ႏဒေါ့ꩻလဲဉ်ထာꩻနဝ်ꩻ ပယ်ႏထိုꩻဗာႏ၊ (ဒေါ့ꩻလဲဉ်တဝ်းထာꩻ)။ ၄။ အပိသုဏံ ဝါစံ နိဿာယ ပိသုဏဝါစာ ပဟာတဗ္ဗော- အာႏကွိုꩻဒျာႏ အံႏစာတဝ်းဝင်ꩻမဉ်ꩻတဲင် ငေါဝ်းအံႏစာဝင်ꩻမဉ်ꩻနဝ်ꩻ ပယ်ႏထိုꩻဗာႏ(အံႏစာတဝ်းဝင်ꩻမဉ်ꩻ)။ ၅။ အဂိဒ္ဓိလောဘံ နိဿာယ ဂိဒ္ဓိလောဘော ပဟာတဗ္ဗော- အာႏကွိုꩻဒျာႏ ထာꩻတထဲ့ꩻတဝ်းတဲင် ထာꩻတထဲ့ꩻ (လောႏဘꩻ)နဝ်ꩻ ပယ်ႏထိုꩻဗာႏ (ပယ်ႏထိုꩻဗာႏလောႏဘꩻ) ၆။ အနိန္ဒာရောသံ နိဿာယ နိန္ဒာရောသော ပဟာတဗ္ဗော- အာႏကွိုꩻဒျာႏ ထာꩻသဲ့ꩻသွမ်ꩻတောဝ်းဝင်ꩻတဲင် ထာꩻသဲ့ꩻသွမ်ꩻ(တေက်ꩻနျꩻ)ဝင်ꩻနဝ်ꩻ ပယ်ႏထိုꩻဗာႏ၊ (သဲ့ꩻသွမ်ꩻတဝ်းဝင်ꩻ)။ ၇။ အက္ကောဓူပါယာသံ နိဿာယ ကောဓူပါယာသော ပဟာတဗ္ဗော- အာႏကွိုꩻဒျာႏ သꩻလျားဒါႏတဝ်းဝင်ꩻတဲင် ထာꩻသꩻလျားဝင်ꩻနဝ်ꩻ ပယ်ႏထိုꩻဗာႏ(သꩻလျားဒါႏတဝ်းဝင်ꩻ)။ ၈။ အနတိမာနံ နိဿာယ အနတိမာနော ပဟာတဗ္ဗော- အာႏကွိုꩻဒျာႏ သꩻဖြုံႏထိုတဝ်း (ကျွားတဝ်းထာꩻ)တဲင် သꩻဖြုံႏထို ထာꩻကျွားနောဝ်ꩻ ပယ်ႏထိုꩻဗာႏ၊ (ပယ်ႏထိုꩻဗာႏမာႏန) သဌေꩻပေါတလိယဟွေး- ယုနဝ်ꩻ ခွေဟော်ꩻနယ်ကွို့ꩻ အအဲဉ်ႏပေႏလွုမ်ꩻ၊ ဟော်ꩻနယ်အလုဲင်း ခြုဲင်းနယ်အစွုမ်ႏ လꩻမွေးတဝ်းဒွိုန်း၊ ခွေဘုရာꩻ အဆွုံꩻအမꩻကို တရာꩻယိုသွစ်ꩻမျိုꩻနဝ်ꩻ မာꩻထဲ့ဖြတ်ꩻအီ ငေါဝ်းလိုꩻလမ်း (အဟဲ့ꩻအဟောင်၊ အသွုံꩻအနွုန်ꩻ)နောဝ်ꩻသွူ။ "ဩဗွေႏ- တရာꩻအအဲဉ်ႏ ယိုသွစ်ꩻပါꩻနဝ်ꩻ ခွေသွဉ်းမဉ်သေငါႏအလုဲင်း ဟော်ꩻဖေႏခွေသွဉ်းလုဲင်းလုဲင်း ခြုဲင်းဖေႏ ခွေသွဉ်းစွုမ်ႏစူမ်ႏမွိုင် ဗွေႏဩ" ပေါတလိယ လောဝ်းတောင်ꩻပြန်ႏ ဗွေႏဘုရာꩻနုဲင်းနဝ်ꩻတဲင် နီဗွေႏဘုရာꩻရိုꩻ- "သဌေꩻပေါတလိယ- ပေါႏနဝ်ꩻတဲ့ နာႏစဲင်းစဲင်းဟုဲင်း၊ ခွေဟော်ꩻဖေႏနာꩻယို" "ဩဗွေႏ- ဟောဝ်သွူဗွေႏဩ၊ နာႏစဲင်းစဲင်းဒျာႏ ဗွေႏဩ" သဌေꩻပေါတလိယဟွေး- ၁။ "အာႏကွိုꩻဒျာႏ မာꩻသီတဝ်းဝင်ꩻသက်တဲင် ထာꩻမာꩻကမာꩻသီဝင်ꩻသက်နဝ်ꩻ ပယ်ႏထိုꩻဗာႏ"ကရိုꩻဒါႏ ငေါဝ်းနဝ်ꩻနဝ်ꩻ ဘုရာꩻခွေယိုဟော်ꩻခါꩻ၊ ကွပ်ပွိုးထမုဲင်ꩻ မဟော်ꩻခါꩻဗာႏတွိုးနုဲင်းနဝ်ꩻနဲတဲင်- သဌေꩻပေါတလိယ နာႏစဲင်းစဲင်းဟုဲင်း- သာႏသနာႏတောႏကိုယို ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏခံႏနုဲင်းယို- "ကွပ်သံယော်ꩻဇဉ်ႏတစွိုးစွိုး၊ ပွိုးတမျိုꩻမျိုꩻတဲင် ခွေအဝ်ႏမာꩻသီဗာႏဝင်ꩻသက်၊ ဖေႏနေးကတွမ်ႏမာꩻသီဗာႏမွုန်းဒွုမ် ဝင်ꩻသက်ယိုနဝ်ꩻ ယိုခါ ခွေကံကျင်ꩻပယ်ႏထိုꩻ၊ ခွေမဉ်ႏအဝ်ႏမာꩻသီက ဝင်ꩻသက်နဝ်ꩻ ခွေနမ်းဒျာႏသွူတဲ့ ခွေအီႏထီႏဖွီချာ၊ လိုꩻဟောဝ်ပညာႏသားဖုံႏတဲ့ အီႏသဲ့ꩻသွမ်ꩻခွေ၊ ကွပ်မာꩻသီဝင်ꩻသက်တဲင် ခန္ဓာႏကုဲင်လီ မဉ်ႏသီသူꩻနဝ်ꩻ အီႏလွေꩻဗာႏ ဘဝကုဲင်ရင်ꩻရင်ꩻ၊ ထာꩻမာꩻသီ ဝင်ꩻသက်နဝ်ꩻ ထွာဒါႏထာꩻစွယ်ꩻတဉ်ႏ-ထွာဒါႏသံယော်ꩻဇဉ်ႏတမျိုꩻ၊ ထာꩻမာꩻသီဝင်ꩻသက်ယိုနဝ်ꩻ ထွာနီဝရဏတရာꩻ၊ ပေ့ꩻရဲခါꩻဒါႏ ဈာန်ႏမဂ်ဖိုလ်ႏ၊ မဉ်ႏမာꩻသီတဝ်း ဝင်ꩻသက်နောဝ်ꩻ အာသဝတရာꩻ (လောႏဘꩻ၊ ဒိဋ္ဌိ)ဖုံႏ ခိုးလျားဒုက္ခ၊ နောင်ႏတကော့ꩻမာႏဖုံႏ တထွာနွောင်ꩻတောဝ်း၊ ကွပ်ပွိုးအကျောင်ꩻနဝ်ꩻဖုံႏမꩻ "အာႏကွိုꩻဒျာႏ မာꩻသီတဝ်းဝင်ꩻသက်တဲင် ထာꩻမာꩻကမာꩻသီဝင်ꩻသက်နဝ်ꩻ ပယ်ႏထိုꩻဗာႏ"ခွေဟော်ꩻခါꩻနုဲင်းနောဝ်ꩻသွူ။ သဌေꩻပေါတလိယဟွေး- ၂။ "အာႏကွိုꩻဒျာႏ ထူႏတခွန်ꩻတဝ်း ဝင်ꩻတခြိုꩻတဲင် ထာꩻမာꩻထူႏတခွန်ꩻဝင်ꩻတခြိုꩻနဝ်ꩻ ပယ်ႏထိုꩻဗာႏ"ကရိုꩻနဝ်ꩻ ငေါဝ်းနဝ်ꩻနဝ်ꩻ ဘုရာꩻခွေဟော်ꩻခါꩻ၊ ကွပ်ပွိုးထမုဲင်ꩻ မဟော်ꩻခါꩻဗာႏတွိုးနုဲင်းနဝ်ꩻနဲတဲင်- သာႏသနာႏတောႏကိုယို ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏခံႏနုဲင်းယို- "ကွပ်သံယော်ꩻဇဉ်ႏတစွိုးစွိုး၊ ပွိုးတမျိုꩻမျိုꩻတဲင် ခွေအဝ်ႏထူႏတခွန်ꩻဗာႏဝင်ꩻတခြိုꩻ၊ ဖေႏနေးကတွမ်ႏထူႏတခွန်ꩻဗာႏမွုန်းဒွုမ် ဝင်ꩻတခြိုꩻနဝ်ꩻ ယိုခါ ခွေအဝ်ႏကံကျင်ꩻပယ်ႏထိုꩻ၊ ခွေမဉ်ႏအဝ်ႏထူႏတခွန်ꩻက ဝင်ꩻတခြိုꩻနဝ်ꩻ ခွေနမ်းဒျာႏသွူတဲ့ ခွေအီႏထီႏဖွီချာ၊ လိုꩻဟောဝ်ပညာႏသားဖုံႏတဲ့ အီႏသဲ့ꩻသွမ်ꩻခွေ။ ကွပ်ထူႏတခွန်ꩻဝင်ꩻတခြိုꩻတဲင် ခန္ဓာႏကုဲင်လီ မဉ်ႏသီသူꩻနဝ်ꩻ အီႏလွေꩻဗာႏ ဘဝကုဲင်ရင်ꩻရင်ꩻ၊ ထာꩻထူႏတခွန်ꩻဝင်ꩻတခြိုꩻယိုနဝ်ꩻ ထွာဒါႏထာꩻစွယ်ꩻတဉ်ႏ-ထွာဒါႏ သံယော်ꩻဇဉ်ႏတမျိုꩻ၊ ထာꩻထူႏတခွန်ꩻတခြိုꩻယိုနဝ်ꩻ ထွာနီဝရဏတရာꩻ၊ ပေ့ꩻရဲခါꩻဒါႏ ဈာန်ႏမဂ်ဖိုလ်ႏ မဉ်ႏထူႏတခွန်ꩻတဝ်း ဝင်ꩻတခြိုꩻနဝ်ꩻ အာသဝတရာꩻ (လောႏဘꩻ၊ ဒိဋ္ဌိ)ဖုံႏ၊ ခိုးလျားဒုက္ခ၊ နောင်ႏတကော့ꩻမာႏဖုံႏ၊ တထွာနွောင်ꩻတောဝ်း။ ကွပ်ပွိုး အကျောင်ꩻနဝ်ꩻဖုံႏမꩻ "အာႏကွိုꩻဒျာႏ ထူႏတခွန်ꩻတဝ်း ဝင်ꩻတခြိုꩻတဲင် ထာꩻမာꩻထူႏတခွန်ꩻ ဝင်ꩻတခြိုꩻနဝ်ꩻ ပယ်ႏထိုꩻဗာႏ"ခွေဟော်ꩻခါꩻနုဲင်းနောဝ်ꩻသွူ။ သဌေꩻပေါတလိယဟွေး- ၃။ "အာႏကွိုꩻဒျာႏ ငေါဝ်းမွေးငွါမဲဉ်ႏတဲင် ဒေါ့ꩻလိန်ႏဒေါ့ꩻလဲဉ်ထာꩻနဝ်ꩻ ပယ်ႏထိုꩻဗာႏ"ကရိုꩻဒါႏငေါဝ်းနဝ်ꩻနဝ်ꩻ ဘုရာꩻခွေယိုဟော်ꩻခါꩻ၊ ကွပ်ပွိုးထမုဲင်ꩻ မဟော်ꩻခါꩻဗာႏတွိုးနုဲင်းနဝ်ꩻတဲင်- သာႏသနာႏတောႏကိုယို ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏခံႏနုဲင်းယို- "ကွပ်သံယော်ꩻဇဉ်ႏတစွိုးစွိုး၊ ပွိုးတမျိုꩻမျိုꩻတဲင် ခွေဒေါ့ꩻလိန်ႏဒေါ့ꩻလဲဉ်ဗာႏထာꩻ၊ ဖေႏနေးကတွမ်ႏဒေါ့ꩻလိန်ႏဒေါ့ꩻလဲဉ်ဗာႏမွုန်းဒွုမ်နဝ်ꩻ ယိုခါ ခွေကံကျင်ꩻပယ်ႏထိုꩻ၊ ခွေမဉ်ႏအဝ်ႏဒေါ့ꩻလိန်ႏဒေါ့ꩻလဲဉ်နေကနဝ်ꩻ ခွေနမ်းဒျာႏသွူတဲ့ ခွေအီႏထီႏဖွီချာ၊ လိုꩻဟောဝ်ပညာႏသားဖုံႏတဲ့ အီႏသဲ့ꩻသွမ်ꩻခွေ၊ ကွပ်ခွေဒေါ့ꩻလိန်ႏဒေါ့ꩻလဲဉ်ထာꩻတဲင် ခန္ဓာႏကုဲင်လီ မဉ်ႏသီသူꩻနဝ်ꩻ အီႏလွေꩻဗာႏ ဘဝကုဲင်ရင်ꩻရင်ꩻ၊ ထာꩻဒေါ့ꩻလိန်ႏဒေါ့ꩻလဲဉ်ယိုနဝ်ꩻ ထွာဒါႏထာꩻစွယ်ꩻတဉ်ႏ-ထွာဒါႏသံယော်ꩻဇဉ်ႏတမျိုꩻ၊ ထာꩻဒေါ့ꩻလိန်ႏဒေါ့ꩻလဲဉ်ယိုနဝ်ꩻ ထွာနီဝရဏတရာꩻ၊ ပေ့ꩻရဲခါꩻဒါႏ ဈာန်ႏမဂ်ဖိုလ်ႏ၊ မဉ်ႏတလိန်ႏလဲဉ်တဝ်းထာꩻနဝ်ꩻ အာသဝတရာꩻ (လောႏဘꩻ၊ ဒိဋ္ဌိ)ဖုံႏ၊ ခိုးလျားဒုက္ခ၊ နောင်ႏတကော့ꩻမာႏဖုံႏ တထွာနွောင်ꩻတဝ်း။ ကွပ်ပွိုးအကျောင်ꩻနောဝ်ꩻဖုံႏမꩻ "အာႏကွိုꩻဒျာႏ ငေါဝ်းမွေးငွါမဲဉ်ႏတဲင် ဒေါ့ꩻလိန်ႏဒေါ့ꩻလဲဉ်ထာꩻနောဝ်ꩻ ပယ်ႏထိုꩻဗာႏ"ခွေဟော်ꩻခါꩻနုဲင်းနောဝ်ꩻသွူ။ သဌေꩻပေါတလိယဟွေး- ၄။ "အာႏကွိုꩻဒျာႏ အံႏစာတဝ်းဝင်ꩻမဉ်ꩻတဲင် ငေါဝ်းအံႏစာဝင်ꩻမဉ်ꩻနဝ်ꩻ ပယ်ႏထိုꩻဗာႏ"ကရိုꩻဒါႏငေါဝ်းနဝ်ꩻနဝ်ꩻ ဘုရာꩻခွေယိုဟော်ꩻခါꩻ၊ ကွပ်ပွိုးထမုဲင်ꩻ မဟော်ꩻခါꩻဗာႏတွိုး နုဲင်းနဝ်ꩻနဲတဲင်- သာႏသနာႏကိုယို ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏခံႏနုဲင်းယို- "ကွပ်သံယော်ꩻဇဉ်ႏတစွိုးစွိုး၊ ပွိုးတမျိုꩻမျိုꩻတဲင် ခွေအံႏစာဗာႏဝင်ꩻမဉ်ꩻ၊ ဖေႏနေးကတွမ်ႏအံႏစာဗာႏမွုန်းဒွုမ် ဝင်ꩻမဉ်ꩻနဝ်ꩻ ယိုခါ ခွေအဝ်ႏကံကျင်ꩻပယ်ႏထိုꩻ၊ ခွေမဉ်ႏအံႏစာက ဝင်ꩻမဉ်ꩻနဝ်ꩻ ခွေနမ်းဒျာႏသွူတဲ့ ခွေအီႏထီႏဖွီချာ၊ လိုꩻဟောဝ်ပညာႏသားဖုံႏတဲ့ အီႏသဲ့ꩻသွမ်ꩻခွေ။ ကွပ်ပွိုးအံႏစာဝင်ꩻမဉ်ꩻတဲင် ခန္ဓာႏကုဲင်လီ မဉ်ႏသီသူꩻနဝ်ꩻ အီႏလွေꩻဗာႏ ဘဝကုဲင်ရင်ꩻရင်ꩻ၊ ထာꩻအံႏစာꩻဝင်ꩻမဉ်ꩻယိုနဝ်ꩻ ထွာဒါႏထာꩻစွယ်ꩻတဉ်ႏ-ထွာဒါႏသံယော်ꩻဇဉ်ႏတမျိုꩻ၊ ထာꩻအံႏစာဝင်ꩻမဉ်ꩻယိုနဝ်ꩻ ထွာနီဝရဏတရာꩻ၊ ပေ့ꩻရဲခါꩻဒါႏ ဈာန်ႏမဂ်ဖိုလ်ႏ၊ မဉ်ႏအံႏစာတဝ်း ဝင်ꩻမဉ်ꩻနဝ်ꩻ အာသဝတရာꩻ (လောႏဘꩻ၊ ဒိဋ္ဌိ)ဖုံႏ၊ ခိုးလျားဒုက္ခ၊ နောင်ႏတကော့ꩻမာႏဖုံႏ တထွာနွောင်ꩻတောဝ်း။ ကွပ်ပွိုးအကျောင်ꩻနဝ်ꩻဖုံႏမꩻ "အာႏကွိုꩻဒျာႏ အံႏစာတဝ်းဝင်ꩻမဉ်ꩻတဲင် ငေါဝ်းအံႏစာꩻဝင်ꩻမဉ်ꩻနောဝ်ꩻ ပယ်ႏထိုꩻဗာႏ"ခွေဟော်ꩻခါꩻနုဲင်းနောဝ်ꩻသွူ။ သဌေꩻပေါတလိယဟွေး- ၅။ "အာႏကွိုꩻဒျာႏ ထာꩻတထဲ့ꩻတဝ်းတဲင် ထာꩻတထဲ့ꩻ(လောႏဘꩻ)နဝ်ꩻ ပယ်ႏထိုꩻဗာႏ"ကရိုꩻဒါႏငေါဝ်းနဝ်ꩻနဝ်ꩻ ဘုရာꩻခွေယိုဟော်ꩻခါꩻ၊ ကွပ်ပွိုးထမုဲင်ꩻ မဟော်ꩻခါꩻဗာႏတွိုး နုဲင်းနဝ်ꩻနဲတဲင်- သာႏသနာႏကိုယို ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏခံႏနုဲင်းယို- "ကွပ်သံယော်ꩻဇဉ်ႏတစွိုးစွိုး၊ ပွိုးတမျိုꩻမျိုꩻတဲင် ခွေတထဲ့ꩻဗာႏထာꩻ၊ ဖေႏနေးကတွမ်ႏတထဲ့ꩻဗာႏမွုန်းဒွုမ် ယိုခါ ခွေအဝ်ႏကံကျင်ꩻပယ်ႏထိုꩻ၊ ခွေမဉ်ႏအဝ်ႏတထဲ့ꩻနေကနဝ်ꩻ ခွေနမ်းဒျာႏသွူတဲ့ ခွေအီႏထီႏဖွီချာ၊ လိုꩻဟောဝ်ပညာႏသားဖုံႏတဲ့ အီႏသဲ့ꩻသွမ်ꩻခွေ။ ကွပ်ပွိုးခွေတထဲ့ꩻထာꩻတဲင် ခန္ဓာႏကုဲင်လီ မဉ်ႏသီသူꩻနဝ်ꩻ အီႏလွေꩻဗာႏ ဘဝကုဲင်ရင်ꩻရင်ꩻ၊ ထာꩻတထဲ့ꩻယိုနဝ်ꩻ ထွာဒါႏထာꩻစွယ်ꩻတဉ်ႏ-ထွာဒါႏသံယော်ꩻဇဉ်ႏတမျိုꩻ၊ ထာꩻတထဲ့ꩻယိုနဝ်ꩻ ထွာနီဝရဏတရာꩻ၊ ပေ့ꩻရဲခါꩻဒါႏ ဈာန်ႏမဂ်ဖိုလ်ႏ၊ မဉ်ႏတထဲ့ꩻတဝ်းထာꩻနဝ်ꩻ အာသဝတရာꩻ (လောႏဘꩻ၊ ဒိဋ္ဌိ)ဖုံႏ၊ ခိုးလျားဒုက္ခ၊ နောင်ႏတကော့ꩻမာႏဖုံႏ တထွာနွောင်ꩻတဝ်း။ ကွပ်ပွိုးအကျောင်ꩻနဝ်ꩻဖုံႏမꩻ "အာႏကွိုꩻဒျာႏ ထာꩻတထဲ့ꩻတဝ်းတဲင် ထာꩻတထဲ့ꩻ(လောႏဘꩻ)နောဝ်ꩻ ပယ်ႏထိုꩻဗာႏ"ခွေဟော်ꩻခါꩻနုဲင်းနောဝ်ꩻသွူ။ သဌေꩻပေါတလိယဟွေး- ၆။ "အာႏကွိုꩻဒျာႏ ထာꩻသဲ့ꩻသွမ်ꩻတဝ်းဝင်ꩻတဲင် ထာꩻသဲ့ꩻသွမ်ꩻ(တေက်ꩻနျꩻ)ဝင်ꩻနဝ်ꩻ ပယ်ႏထိုꩻဗာႏ"ကရိုꩻဒါႏငေါဝ်းနဝ်ꩻနဝ်ꩻ ဘုရာꩻခွေယိုဟော်ꩻခါꩻ၊ ကွပ်ပွိုးထမုဲင်ꩻ မဟော်ꩻခါꩻဗာႏတွိုး နုဲင်းနဝ်ꩻနဲတဲင်- သာႏသနာႏကိုယို ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏခံႏနုဲင်းယို- "ကွပ်သံယော်ꩻဇဉ်ႏတစွိုးစွိုး၊ ပွိုးတမျိုꩻမျိုꩻတဲင် ခွေသဲ့ꩻသွမ်ꩻ(တေက်ꩻနျꩻ)ဗာႏဝင်ꩻ၊ ဖေႏနေးကတွမ်ႏသဲ့ꩻသွမ်ꩻဗာႏမွုန်းဒူမ်နဝ်ꩻ ယိုခါ ခွေအဝ်ႏကံကျင်ꩻပယ်ႏထိုꩻ၊ ခွေမဉ်ႏအဝ်ႏသဲ့ꩻသွမ်ꩻနေကဝင်ꩻနဝ်ꩻ ခွေနမ်းဒျာႏသွူတဲ့ ခွေအီႏထီႏဖွီချာ၊ လိုꩻဟောဝ်ပညာႏသားဖုံႏတဲ့ အီႏသဲ့ꩻသွမ်ꩻခွေ။ ကွပ်ပွိုးထာꩻသဲ့ꩻသွမ်ꩻ(တေက်ꩻနျꩻ)ဝင်ꩻတဲင် ခန္ဓာႏကုဲင်လီ မဉ်ႏသီသူꩻနဝ်ꩻ အီႏလွေꩻဗာႏ ဘဝကုဲင်ရင်ꩻရင်ꩻ၊ ထာꩻသဲ့ꩻသွမ်ꩻဝင်ꩻယိုနဝ်ꩻ ထွာဒါႏထာꩻစွယ်ꩻတဉ်ႏ-ထွာဒါႏသံယော်ꩻဇဉ်ႏတမျိုꩻ၊ ထာꩻသဲ့ꩻသွမ်ꩻဝင်ꩻယိုနဝ်ꩻ ထွာနီဝရဏတရာꩻ၊ ပေ့ꩻရဲခါꩻဒါႏ ဈာန်ႏမဂ်ဖိုလ်ႏ၊ မဉ်ႏသဲ့ꩻသွမ်ꩻတဝ်းဝင်ꩻနဝ်ꩻ အာသဝတရာꩻ (လောႏဘꩻ၊ ဒိဋ္ဌိ)ဖုံႏ၊ ခိုးလျားဒုက္ခ၊ နောင်ႏတကော့ꩻမာႏဖုံႏ တထွာနွောင်ꩻတောဝ်း။ ကွပ်ပွိုးအကျောင်ꩻနဝ်ꩻဖုံႏမꩻ "အာႏကွိုꩻဒျာႏ ထာꩻသဲ့ꩻသွမ်ꩻတဝ်းဝင်ꩻတဲင် ထာꩻသဲ့ꩻသွမ်ꩻ(တေက်ꩻနျꩻ)ဝင်ꩻနောဝ်ꩻ ပယ်ႏထိုꩻဗာႏ"ခွေဟော်ꩻခါꩻနုဲင်းနောဝ်ꩻသွူ။ သဌေꩻပေါတလိယဟွေး- ၇။ "အာႏကွိုꩻဒျာႏ သꩻလျားဒါႏတဝ်းဝင်ꩻတဲင် ထာꩻသꩻလျားနောဝ်ꩻ ပယ်ႏထိုꩻဗာႏ"ကရိုꩻဒါႏ ငေါဝ်းနဝ်ꩻနဝ်ꩻ ဘုရာꩻခွေယိုဟော်ꩻခါ ခွေတပဲ့ꩻ(ဖုံႏ)နဝ်ꩻ မဟော်ꩻခါꩻဗာႏတွိုးနုဲင်းနဝ်ꩻတဲတဲင်- သာႏသနာႏကိုယို ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏခံႏနုဲင်းယို- "ကွပ်သံယော်ꩻဇဉ်ႏတစွိုးစွိုး၊ ပွိုးတမျိုꩻမျိုꩻတဲင် ခွေꩻလျားဗာႏဝင်ꩻ၊ ဖေႏနေးကတွမ်ႏ သꩻလျားဗာႏမွုန်းဒူမ်နဝ်ꩻ ယိုခါ ခွေကံကျင်ꩻပယ်ႏထိုꩻ၊ ခွေမဉ်ႏအဝ်ႏသꩻလျားနေကဝင်ꩻနဝ်ꩻ ခွေနမ်းဒျာႏသွူတဲ့ ခွေအီႏထီႏဖွိချာ၊ လိုꩻဟောဝ်ပညာႏသားဖုံႏတဲ့ အီႏသဲ့ꩻသွမ်ꩻခွေ။ ကွပ်ပွိုးသꩻလျားဝင်ꩻတဲင် ခန္ဓာႏကုဲင်လီ မဉ်ႏသီသူꩻနဝ်ꩻ အီႏလွေꩻဗာႏ ဘဝကုဲင်ရင်ꩻရင်ꩻ၊ ထာꩻသꩻလျားဝင်ꩻယိုနဝ်ꩻ ထွာဒါႏထာꩻစွယ်ꩻတဉ်ႏ-ထွာဒါႏသံယော်ꩻဇဉ်ႏတမျိုꩻ၊ ထာꩻသꩻလျားယိုနောဝ်ꩻ ထွာနီဝရဏတရာꩻ၊ ပေ့ꩻရဲခါꩻဒါႏ ဈာန်ႏမဂ်ဖိုလ်ႏ၊ မဉ်ႏသꩻလျားတဝ်းဝင်ꩻနဝ်ꩻ အာသဝတရာꩻ (လောႏဘꩻ၊ ဒိဋ္ဌိ)ဖုံႏ၊ ခိုးလျားဒုက္ခ၊ နောင်ႏတကော့ꩻမာႏဖုံႏ တထွာနွောင်ꩻတဝ်း။ ကွပ်ပွိုးအကျောင်ꩻနောဝ်ꩻဖုံႏမꩻ "အာႏကွိုꩻဒျာႏ သꩻလျားဒါႏတဝ်းဝင်ꩻတဲင် ထာꩻသꩻလျားဝင်ꩻနောဝ်ꩻ ပယ်ႏထိုꩻဗာႏ"ခွေဟော်ꩻနုဲင်းနောဝ်ꩻသွူ။ သဌေꩻပေါတလိယဟွေး- ၈။ "အာႏကွိုꩻဒျာႏ သꩻဖြုံႏထိုတဝ်း (ကျွားတဝ်းထာꩻ)တဲင် သꩻဖြုံႏ ထာꩻကျွားနဝ်ꩻ ပယ်ႏထိုꩻဗာႏ"ကရိုꩻဒါႏငေါဝ်းနဝ်ꩻနဝ်ꩻ ဘုရာꩻခွေယိုဟော်ꩻခါꩻ၊ ကွပ်ပွိုးထမုဲင်ꩻ မဟော်ꩻခါꩻဗာႏတွိုး နုဲင်းနဝ်ꩻနဲတဲင်- သာႏသနာႏကိုယို ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏခံႏနုဲင်းယို- "ကွပ်သံယော်ꩻဇဉ်ႏတစွိုးစွိုး၊ ပွိုးတမျိုꩻမျိုꩻတဲင် ခွေသꩻဖြုံႏထို ကျွားမာႏဗာႏထာꩻ"ဖေႏနေးသဖြုံႏကထိုဗာႏမွုန်းဒူမ်၊ (ဖေႏနေးကကျွားမွုန်းဒူမ်)နဝ်ꩻ ယိုခါ ခွေအဝ်ႏကံကျင်ꩻပယ်ႏထိုꩻ၊ ခွေသꩻဖြုံႏမဉ်ႏထိုနေကနဝ်ꩻ (ခွေမဉ်ႏအဝ်ႏကျွားနေက)နဝ်ꩻ ခွေနမ်းဒျာႏသွူတဲ့ ခွေအီႏထီႏဖွီချာ၊ လိုꩻဟောဝ်ပညာႏသားဖုံႏတဲ့ အီႏသဲ့ꩻသွမ်ꩻခွေ။ ကွပ်ပွိုးသꩻဖြုံႏထို ကျွားထာꩻတဲင် ခန္ဓာႏကုဲင်လီ မဉ်ႏသီသူꩻနောဝ်ꩻ အီႏလွေꩻဗာႏ ဘဝကုဲင်ရင်ꩻရင်ꩻ၊ သꩻဖြုံႏထို ထာꩻကျွားယို ထွာဒါႏထာꩻစွယ်ꩻတဉ်ႏ-ထွာဒါႏသံယော်ꩻဇဉ်ႏတမျိုꩻ၊ သꩻဖြုံႏထို ထာꩻကျွားယိုနောဝ်ꩻ ထွာနီဝရဏတရာꩻ၊ ပေ့ꩻရဲခါꩻဒါႏ ဈာန်ႏမဂ်ဖိုလ်ႏ၊ သꩻဖြုံႏမဉ်ႏထိုတဝ်း (မဉ်ႏကျွားတဝ်း)နဝ်ꩻ အာသဝတရာꩻ (လောႏဘꩻ၊ ဒိဋ္ဌိ)ဖုံႏ၊ ခိုးလျားဒုက္ခ၊ နောင်ႏတကော့ꩻမာႏဖုံႏ တထွာနွောင်ꩻတောဝ်း။ ကွပ်ပွိုး အကျောင်ꩻနဝ်ꩻဖုံႏမꩻ "အာႏကွိုꩻဒျာႏ သꩻဖြုံႏထိုတောဝ်း (ကျွားတဝ်းထာꩻ)တဲင် သꩻဖြုံႏထို ထာꩻကျွားနဝ်ꩻ ပယ်ႏထိုꩻဗာႏ"ခွေဟော်ꩻခါꩻနုဲင်းနောဝ်ꩻသွူ။ "သဌေꩻပေါတလိယဟွေး- ကျင်ꩻလွဉ်ꩻသွူယို သွစ်ꩻမျိုꩻမဉ်ႏတဲ့ ငေါဝ်းလိုꩻလမ်းနဝ်ꩻ လꩻထဲ့မွေးမွေးတဝ်းဒွိုန်း" "ဩဗွေႏ- ငေါဝ်းလိုꩻလမ်း-အသွုံꩻအနွုန်ꩻလိုꩻလမ်း ဖေႏနေးကဟဲ့ꩻလꩻမွုန်းဒူမ်လာꩻလာꩻနဝ်ꩻ အီႏမာꩻဗာႏနုဲင်းမုဲင်ꩻဗွေႏ' ဟော်ꩻနယ်ဖေႏ ခွေသွဉ်းမွိုင်ဗွေႏဩ" "မွေးသွူ ပေါတလိယ- ပေါႏနဝ်ꩻတဲ့ နာႏစဲင်းစဲင်းသွော့နော ခွေအီႏဟော်ꩻဖေႏနာꩻယို" "ဩဗွေႏ- ရိုႏရိုႏသေႏသေႏ နာႏစဲင်းစဲင်းဒျာႏဗွေႏဩ" "သဌေꩻပေါတလိယဟွေး- ဥပမာႏ- ပါꩻဆရာႏတပဲ့ꩻဝင်ꩻနီ အဝ်ႏဖို့ꩻဖိုးတွင်ꩻ ထွီႏဟို့ꩻခိုးအဆာႏတဗာႏနဝ်ꩻ လွေꩻအုံထွာခန်း ပါꩻအဝ်ႏကူႏဖိုးယားထျꩻ၊ ဖိုးဆွတ်ꩻတကွို့ꩻနဝ်ꩻ အယာႏတဲး ဝင်ꩻခြွꩻလို့လဲဉ်း၊ အဝ်ႏကုဲင်ဖိုးသွီႏအဝ်ႏဗွို့ꩻ အဆွတ်ꩻနဝ်ꩻလွုမ်ꩻ၊ ဖိုးဆွန်ꩻနဝ်ꩻနဝ်ꩻ အဆရာႏတရိုꩻတဝ်း၊ အတပဲ့ꩻတရိုꩻတဝ်း ဗေက်ꩻလွေꩻဖေႏထွီႏထျꩻ၊ ထွီႏနဝ်ꩻ ဟို့ꩻခိုးသန်ငါႏလဲဉ်းတဲင် အံႏမွစ်ဖိုးသွီႏနဝ်ꩻ အွီႏမွေးစွဉ်ႏထာꩻ၊ အဝ်ႏကုဲင်အဆွတ်ꩻခြေင်ခြေင်နဝ်ꩻတဲ့ အဲင်ႏပꩻတလꩻတဝ်း၊ အံႏတလꩻတဝ်းစွဉ်ႏတဲ့ အဝ်ႏကျံႏအံႏခြယ်ꩻ၊ အံႏမွစ်ꩻချာဗော့ꩻဒျာႏ အယုဲင်ꩻထီနဝ်ꩻနဝ်ꩻ ရိုꩻအွီႏတဲ့၊ ထွီႏနဝ်ꩻ အံႏကျံႏအံႏခြယ်ꩻတိတ်ꩻတိက်ꩻဒျာႏ ဖိုးဆွတ်ꩻနောဝ်ꩻသွူ။ "အံႏခြယ်ꩻကွို့ꩻ အဆွတ်ꩻနုဲင်းနဝ်ꩻနဝ်ꩻ ဟို့ꩻကွိုꩻ့နေဟောင်း၊ ထွာနေအာႏရဲင်ꩻဟောင်း" "ဩဗွေႏ- အဆွတ်ꩻလောင်းနဝ်ꩻ အယာႏတပါတဝ်း၊ အံႏခြယ်ꩻနွိုင်ႏကွို့ꩻ အဆွတ်ꩻနုဲင်းနဝ်ꩻနဝ်ꩻ ယပ်ꩻဒုက္ခခြေင်၊ အွိုးအွန်း(အိုန်း) ခြေင်လွုမ်ꩻ၊ ဟို့ꩻတကွို့ꩻနွောင်ꩻတဝ်း၊ တထွာနွောင်ꩻတဝ်း အာႏရဲင်ꩻဗွေႏဩ" "သဌေꩻပေါတလိယဟွေး- အနုဲင်းနဝ်ꩻနေနေ ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏဆင်ႏချင်ႏနုဲင်းယို- "ထီႏတရေꩻ၊ ဟွူန်တလေ့၊ နွုမ်ꩻဟွမ်၊ အွီႏဗွမ်ႏ၊ ချော်ꩻပြေ-ကရိုꩻဒါႏ ကာမဂွုဏ်ႏဖုံႏနဝ်ꩻ အဗွန်ပီနုဲင်းထာꩻဆွတ်ꩻနဝ်ꩻ၊ မာꩻယပ်ꩻဒုက္ခလိုꩻအာတန်၊ ရွိုးအွန်းဗာႏအာတန်၊ ကာမဂွုဏ်ႏယိုနဝ်ꩻ အပဲ့စ်အဝ်ႏအာတန်" နီဗွေႏဘုရာꩻ ဟော်ꩻခါꩻနုဲင်းနဝ်ꩻ။ နေးတွမ်ႏထာꩻသေဉာဏ်ႏပညာႏတဲင် အမွေးအမဲဉ်ႏအတွိုင်ꩻ ထီႏသေကာမဂွုဏ်ႏခရာႏတွော့ꩻ ကာမဂွုဏ်ႏတာႏနောဝ်ꩻ ယူႏယာႏတဝ်းဒွုမ် ထမုဲင်ꩻမုဲင်ꩻ "ယူႏကျိုꩻစာꩻဗော့ꩻ ဖေႏကပယ်ႏထိုꩻနွောင်ꩻ ကာမဂွုဏ်ႏ"နဝ်ꩻတစွိုးလွုမ်ꩻသွူ။ သဌေꩻပေါတလိယဟွေး- ဥပမာႏ-လင်းတတဲ့နောဝ်ꩻ၊ စောက်အာႏတဲ့နဝ်ꩻ၊ လေ့တဲ့နဝ်ꩻ "ဖူꩻစဉ်ꩻတူႏတတူႏ ကျောင်ꩻထာꩻမို့ꩻလောင်း"ရိုꩻခန်းနုဲင်းနဝ်ꩻဟုဲင်း၊ အသွꩻဖုံႏ မဉ်လꩻအစဉ်ႏတူႏနဝ်ꩻတဲင် ကျောင်ႏယုဲင်လွဉ်ꩻဆချာ၊ ဖေႏနေးကအွဉ်ႏထဲ့ထိုꩻ စဉ်ႏတူႏနဝ်ꩻတွော့ꩻ ခွေပေါက်ꩻနာꩻပေါက်ꩻတဲင် ဝွေꩻဆာမွေးမုဲင်းစွဉ်ႏထာꩻ။ ယူႏစံꩻဟုဲင်း သဌေꩻပေါတလိယ- ပေါႏဝွေꩻမဉ်ႏတအွဉ်ႏစွꩻတဝ်း (ပေါႏဝွေꩻမဉ်ႏအဝ်ႏဖူꩻတဉ်ႏစွူစွူ) စဉ်ႏတူႏနဝ်ꩻ ကွပ်စဉ်ႏတူႏနဝ်ꩻတဲင် အသွꩻဖုံႏ အဝ်ႏယုဲင်ပေါက်ꩻတိတ်ꩻတိက်ꩻတွော့ꩻ "သီထိုꩻစွဉ်ႏ၊ မွေးတဝ်းတဲ့ ဗော့ꩻဗော့ꩻသီထိုꩻစွဉ်ႏ"မွေးတဝ်းနဲ့။ "မွေး- ဗွေႏဩ- သဌေꩻပေါတလိယဟွေး- အနုဲင်းနဝ်ꩻနေနေ ခွေတပဲ့ꩻ(ဖုံႏနဝ်ꩻ) နေးတွမ်ႏဉာဏ်ႏ ဆင်ႏချင်ႏနုဲင်းယို- "ထီႏတရေꩻ့၊ ဟွူန်တလေ့၊ နူမ်ꩻဟွမ်၊ အွီႏဗွမ်ႏ၊ ချော်ꩻပြေ-ကရိုꩻဒါႏ ကာႏမဂွုဏ်ႏဖုံႏနဝ်ꩻ အဗွန်ပီနုဲင်း စဉ်ႏတူႏနဝ်ꩻ၊ (ပေါႏတအွဉ်ႏစွတဝ်းနဝ်ꩻ) မာꩻယပ်ꩻဒုက္ခလိုꩻအာတန်၊ ရွိုးအွန်းဗာႏအာတန်၊ ကာမဂွုဏ်ႏယိုနဝ်ꩻ အပဲ့စ်အာတန်" နီဗွေႏဘုရာꩻ ဟော်ꩻခါꩻနုဲင်းနဝ်ꩻ။ နေးတွမ်ႏ ထာꩻသေဉာဏ်ႏပညာႏတဲင် အမွေးအမဲဉ်ႏအတွိုင်ꩻ ထီႏသေ ကာမဂွုဏ်ႏခရာႏတွော့ꩻ ကာမဏွုဏ်ႏတနာႏနဝ်ꩻ ယူႏယာႏတဝ်းဒွုမ်ထမုဲင်ꩻမုဲင်ꩻ 'ယူႏကျိုꩻစာꩻဗော့ꩻဒျာႏ ဖေႏကယ်ႏထိုꩻနွောင်ꩻ ကာမမဂွုမ်ႏ"နဝ်ꩻတစွိုးလွုမ်ꩻသွူ။ သဌေꩻ ပေါတလိယဟွေး- ဥပမာႏ- ပါꩻတဖြာꩻနဝ်ꩻ "ခွုမ်မာꩻမေႏခြဲ"မေႏအဝ်ႏတင်ႏရဲပ်ရဲပ်နဝ်ꩻတဲင် မဉ်ႏဖါႏလွေꩻတလီꩻနောဝ်ꩻ တလီꩻတောင်ႏမေႏတွော့ꩻ (ပေါႏဝွေꩻတအွဉ်ႏထိုꩻတဝ်း) မေႏခြဲနဝ်ꩻ ခိုးပါꩻနဝ်ꩻစူတရိုꩻတဝ်း၊ ခိုးစူလောင်ꩻ ခိုးစူဗောင်တရိုꩻတဝ်း၊ ခိုးနမ်းလောင်း တထွောင်းထွောင်းတရိုꩻတဝ်း မွေးတဝ်းနဲ့။ "မွေး-ဗွေႏဩ" အနုဲင်းနဝ်ꩻနေနေ ခွေတပဲ့ꩻ(ဖုံႏ)နဝ်ꩻ နတွမ်ႏဉာဏ်ႏ ယူႏဆင်ႏချင်ႏနုဲင်းယို- "ထီႏတရေꩻ၊ ဟွူန်တလေ့၊ နူမ်ꩻဟွမ်၊ ချော်ပြေ-ကရိုꩻဒါႏ ကာႏမဂွုဏ်ႏဖုံႏနဝ်ꩻ အဗွန်ပီနုဲင်းမီꩻမေႏခြဲ့စ်ꩻ (ပေါႏတအွဉ်ႏစွꩻထိုꩻတဝ်းနဝ်ꩻ) မာꩻယပ်ꩻဒုက္ခလိုꩻအာတန်၊ ရွိုးအွန်းဗာႏအာတန်၊ ကာမဂွုဏ်ႏယိုနဝ်ꩻ အပဲစ်အာတန်"နီဗွေႏဘုရာꩻ ဟော်ꩻခါꩻနုဲင်းနဝ်ꩻ။ နေးတွမ်ႏ ထာꩻသေဉာဏ်ႏပညာႏတဲင် အမွေးအမဲဉ်ႏအတွိုင်ꩻ ထီႏသေ ကာမႏဂွုဏ်ႏခရာႏတွော့ꩻ ကာႏမဂွုဏ်ႏတာႏနဝ်ꩻ ယူႏယာႏတဝ်းဒွမ်ုထမုဲင်ꩻမုဲင်ꩻ"ယူႏကျိုꩻစာꩻဗော့ꩻ ဖေႏကပယ်ႏနွောင်ꩻထိုꩻနွောင်ꩻ ကာမႏဂွုဏ်ႏ"နဝ်ꩻအစွိုးလူမ်ꩻသွူ။ သဌေꩻ ပေါတလိယသဌေꩻဟွေး- ဥပမာႏ-ထာꩻအောင်အဝ်ႏထွိုင်ႏလိုꩻကိုနဝ်ꩻ မေႏအူအဝ်ႏသော့ꩻဗွေဗိတ်စွဉ်ႏ၊ (မေႏအူတနျာႏတဲက်ꩻ-လျားစွဉ်ႏဟွုက်ဟွုက်) ပါꩻတဖြာꩻနဝ်ꩻ ဖျော်လွဉ်မေႏအူအောင်ထꩻ၊ ပါꩻအာႏတလာဝင်ꩻနီနဝ်ꩻ လောႏစက်ꩻပါꩻနဝ်ꩻ စူဗောင် တဖြာꩻတဖဲ့ꩻတဲင် ငင်ႏသော့ꩻမေႏအောင်တွော့ꩻ ပါꩻနဝ်ꩻ မဉ်သီတောဝ်းထာꩻ၊ မဉ်ဒုက္ခတဝ်းထာꩻ၊ မဉ်အုံသက်ဆွာꩻဆွာꩻနဝ်ꩻမꩻ (ခြောဝ်တအꩻတအိꩻအငေါဝ်း) နေးအာႏရွန်ꩻရန်ꩻစွဉ်ႏထာꩻ။ "ပါꩻနဝ်ꩻ ရွန်ꩻနေထာꩻဟောင်း" "ဟူး- ရွန်ꩻကာႏဒွုမ်ဟောင်း၊ နေးအာႏရွန်ꩻမွေးစွဉ်ႏသနယ်အော်" "ကွပ်ပွိုးထမုဲင်ꩻ မရွန်ꩻတွိုးထာꩻဟောင်း" "မဉ်ႏထဲ့သော့ꩻ မေႏအောင်ႏကိုနဝ်ꩻသီ၊ မွေးတဝ်းတဲ့ လျားဒုက္ခအဝ်ႏသေႏနုဲင်းနဝ်ꩻတဲင် အမဉ်သီတဝ်းထာꩻ၊ အမဉ်လျားဒုက္ခတဝ်းထာꩻ၊ အမဉ်အုံသက်ဆွာꩻဆွာꩻနဝ်ꩻမꩻ ခြောဝ်တအꩻတအꩻဗာႏအငေါဝ်း၊ ခံႏနွို့ꩻတဝ်းအမေႏအောင်၊ နေးအာႏရွန်ꩻဗာႏထာꩻနဝ်ꩻသနယ်ဟွေး။ သဌေꩻပေါတလိယဟွေး- အနုဲင်းနဝ်ꩻနေနေ ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏချင်ႏနုဲင်းယို- "ထီႏတရေꩻ၊ ဟွူန်တလေ့၊ နူမ်ꩻဟွမ်၊ အွီႏဗွမ်ႏ၊ ချော်ꩻပြေ-ကရိုꩻဒါႏ ကာႏမဂွုဏ်ႏငတ်ꩻပါꩻဖုံႏနောဝ်ꩻ အဗွန်ပီနုဲင်း 'မေႏအူအောင်'နဝ်ꩻ(ပေါႏထဲ့သော့ꩻ ကာႏမဂွုဏ်ႏအောင်နဝ်ꩻ) မာꩻယပ်ꩻဒုက္ခလိုꩻအာတန်၊ ရွိုးအွန်းဗာႏ အာတန်၊ ကာမဂွုဏ်ႏယိုနဝ်ꩻ အပဲ့အဝ်ႏအာတန်"နီဗွေႏဘုရာꩻဟော်ꩻခါꩻနုဲင်းနဝ်ꩻ။ နေးတွမ်ႏ ထာꩻသေဉာဏ်ႏပညာႏတဲင် အမွေးအမဲဉ်ႏအတွိုင်ꩻ ထီႏသေ ကာႏမဂွုဏ်ႏခရာႏတွော့ꩻ ကာမဂွုဏ်ႏတာႏနဝ်ꩻ ယူႏယာႏတဝ်းဒူမ်ထမုဲင်ꩻမုဲင်ꩻ 'ယူႏကျိုꩻစာꩻဗော့ꩻ ဖေႏကပယ်ႏနွောင်ꩻ ကာမဂွုဏ်ႏ"နဝ်ꩻ တစွိုးလွုမ်ꩻသွူ။ သဌေꩻ ပေါတလိယဟွေး- ဥပမာႏ-ပါꩻတဖြာꩻနဝ်ꩻ ဗေင်ႏမင်းထာꩻ "ပျောႏခရာႏဟောဝ်ငါႏ၊ ဥယျာဉ်ႏခြံ၊ ပျောႏခရာႏဟောဝ်ငါႏ တခြာတန်၊ ပျောႏခရာႏဟောဝ်ငါႏ ခင်ႏလမ်းဟောဝ်ထာꩻပြင်ႏ၊ ပျောႏခရာႏဟဝ်ငါႏ ထီနောင်တန်"ဗေင်ႏမင်းနုဲင်းနဝ်ꩻ၊ (ထာꩻဗေင်ႏမင်းကိုနဝ်ꩻ ပျောႏခရာႏဟောတ်ငါႏစွဉ်ႏတဲ့) မဲ့ကထင်ႏသေနဝ်ꩻ ထမုဲင်ꩻမုဲင်ꩻတဲ့ တထီႏတဝ်း (ထမုဲင်မုဲင်ꩻ တမွေးတဝ်းခြာ)။ သဌေꩻပေါတလိယဟွေး- အနုဲင်းနဝ်ꩻနေနေ၊ ခွေတပဲ့ꩻ(ဖုံႏ)နဝ်ꩻ နေးတွမ်ႏဉာဏ်ႏ ယူႏဆင်ႏချင်ႏနုဲင်းယို- "ထီႏတရေꩻ၊ ဟွူန်တလေ့၊ နွုမ်ꩻဟွမ်၊ အွီႏဗွမ်ႏ၊ ချော်ꩻပြေ-ကရိုꩻဒါႏ ကာႏမဂွုဏ်ႏငတ်ꩻပါꩻဖုံႏနောဝ်ꩻ အဗွန်ပီနုဲင်း ထာꩻဗေင်ႏမင်းနဝ်ꩻ၊ (ထမုဲင်ꩻတဲ့ တမွေးတဝ်းခြာ)၊ မာꩻယပ်ꩻဒုက္ခလိုꩻအာတန်၊ ရွိုးအွန်းဗာႏအာတန်၊ ကာမဂွုဏ်ႏယိုနဝ်ꩻ အပဲ့စ်အဝ်ႏအာတန်" နီဗွေႏဘုရာꩻဟော်ꩻခါꩻနုဲင်းနဝ်ꩻသွူ။ နေးတွမ်ႏ ထာꩻသေဉာဏ်ႏပညာႏတဲင် အမွေးအမဲဉ်ႏအတွိုင်ꩻ ထီႏသေ ကာမဂွုဏ်ႏခရာႏတွော့ꩻ ကာမဂွုဏ်ႏတာႏနဝ်ꩻ ယူႏယာႏတဝ်းဒူမ်ထမုဲင်ꩻမုဲင်ꩻ"ယူႏကျိုꩻစာꩻဗော့ꩻ ဖေႏကပယ်ႏထိုꩻနွောင်ꩻ ကာမဂွုဏ်ႏ"နဝ်ꩻတစွိုးလွုမ်ꩻသွူ။ သဌေꩻပေါတလိယဟွေး- "ဥပမာႏ-"ပါꩻတဖြာꩻနောဝ်ꩻ ကွီလဝင်ꩻ "ပေႏလာႏပတ္တမျာႏ"တဲင် ဆွကျွားထွူတွော့ꩻ လွေꩻဆေ့ꩻကို၊ တွိုႏဆေꩻကိုနဝ်ꩻ လိုꩻဖံႏထီႏတဲင် 'ယိုယို ပါꩻစးနဝ်ꩻ- ထွားပါꩻသူꩻမွိုင်ႏ၊ ဆွနွောင်ꩻစွဉ်ႏ ပေလာႏပတ္တမျာꩻတန်ဟွေး၊ ပေါႏလိုꩻခြွေနဝ်ꩻ ခံႏစာꩻဗာႏနုဲင်းနဝ်ꩻသနယ်ꩻ"၊ အံႏဖြာႏလွဝွေꩻနုဲင်းနဝ်ꩻ၊ (တဆင်ႏလွုမ်ꩻတွော့ꩻ) တခြိုꩻဗွေႏသားမော့ꩻဝွေꩻတဲင် ပါꩻထူႏချာခန်းဒျာႏ ပေႏလာႏပတ္တမျာꩻ၊ ပါꩻနဝ်ꩻနဝ်ꩻ ထွာထိုꩻစွဉ်ႏတမျိုꩻနဲ့ ထွာတောဝ်းနဲ့။ "ထွာထိုꩻစွဉ်ႏ တမျိုꩻဗွေႏဩ" "ပွိုးထမုဲင်ꩻအီ အထွာထိုꩻနုဲင်းမုဲင်ꩻအီ" "ဝင်ꩻဗွေႏထူႏချာ၊ ဝင်ꩻပေလာႏပတ္တမျာꩻတဲင် ပါꩻနဝ်ꩻ သေန်ႏဒူမ်လိုꩻခြွေ၊ သေန်ႏတောဒျာႏ လိုꩻကေန်ꩻဗွေႏဩ" "သဌေꩻပေါတလိယဟွေး- အနုဲင်းနဝ်ꩻနေနေ၊ ခွေတပဲ့ꩻ(ဖုံႏ)နဝ်ꩻ နေးတွမ်ႏဉဏ်ႏ ယူႏဆင်ႏနုဲင်းယို- "ထီႏတရေꩻ၊ ဟွူန်တလေ့၊ နူမ်ꩻဟွမ်၊ အွီႏဗွမ်ႏ၊ ချော်ꩻပြေ-ကရိုꩻဒါႏ ကာမဂွုဏ်ႏငတ်ꩻပါꩻဖုံႏနောဝ်ꩻ အဗွန်ပီနုဲင်း တခြိုꩻထူႏလနဝ်ꩻနေနေ၊ (အတရေꩻဆောင်းလဲႏကွို့ꩻလွုမ်ꩻ)၊ မာꩻယပ်ဒုက္ခလိုꩻအာတန်၊ ရွိုးအွန်းဗာႏအာတန်၊ ကာမဂွုဏ်ႏယိုနဝ်ꩻ အပဲ့စ်အဝ်ႏအာတန်"၊ နီဗွေႏဘုရာꩻဟော်ꩻခါꩻနုဲင်းနဝ်ꩻ။ နေးတွမ်ႏ ထာꩻသေဉာဏ်ႏပညာႏတဲင် အမွေးအမဲဉ်ႏအတွိုင်ꩻ ထီႏသေ ကာမဂွုဏ်ႏခရာႏတွော့ꩻ ကာမဂွုဏ်ႏနဝ်ꩻ ယူႏတဝ်းဒွုမ်" ယူႏကျိုꩻစာꩻဗော့ꩻ ဖေႏကပယ်ႏထိုꩻနွောင်ꩻ ကာမဂွုဏ်ႏ"နဝ်ꩻ တစွိုးလွုမ်ꩻသွူ။ သဌေꩻပေါတလိယဟွေး- ဥပမာႏ-ဒုံပေႏထျꩻတရိုꩻတဝ်း၊ ဒုံတန်ထျꩻတရိုꩻတဝ်း မဗော့ꩻမညာꩻနဝ်ꩻ တခြာအဝ်ႏ၊ တခြာကိုနဝ်ꩻ သေင်ႏမွူးအရာႏနွိုးနွိုး အဝ်ႏတမွူး၊ အရာႏအာမွေးစွဉ်ႏထာꩻ၊ ကွဲးတွော့ꩻ ထဲ့လင်ꩻတဝ်းဟံႏလောင်းတဖြုံႏဖြုံႏ၊ ပါꩻတဖြာꩻနဝ်ꩻ မဉ်အံႏသေင်ႏရာႏမဉ်နွိုးနွိုးနဝ်ꩻတဲင် ထင်ႏသေင်ႏမွူးသမ်းဒါႏတွော့ꩻ ထင်ႏသေင်ႏမွူးလောင်း၊ ထင်ႏအံႏဒဲ့ꩻ သေင်ႏရာႏမဉ်၊ (ဝွေꩻကအဝ်ႏနေ သေင်ႏမွူးလောင်းတွင်ꩻနဝ်ꩻ)- ပါꩻခꩻတဖြာꩻဖျော်လွဉ် ဝွေꩻမဉ်အံႏသေင်ႏရာႏမဉ်တဲ့ ထင်ႏသေင်ႏသမ်းတဒါႏတဝ်း၊ (ပါꩻသေင်ႏမွူးလောင်းသားနဝ်ꩻတဲ့ သံးတခံႏဒဲ့ꩻဖေႏတဝ်း)တဲင် တွမ်ႏဝွေꩻနꩻမွူး (ကုက်း)ထင်ထင် ဝွေꩻခွစွဉ်ႏဒျာႏ သေင်ႏမွူးနဝ်ꩻ။ ပထမပါꩻတဖြာꩻ ကအဝ်ႏသေင်ႏမွူးလောင်းနဝ်ꩻ အမဉ်ႏတနဲ့စ်လင်ꩻတဝ်း၊ သေင်ႏမွူးမဉ်ႏဝꩻထံတွမ်ႏဝွေꩻနဝ်ꩻ သီထိုꩻစွဉ်ႏ၊ မွေးတဝ်းတဲ့ ဗော့ꩻဗော့ꩻသီထိုꩻစွဉ်ႏ၊ မွေးတဝ်းတဲ့ စူထို့ခင်ႏထို့ထိုꩻစွဉ်ႏ မွေးတဝ်းနဲ့။ "မွေး- ဗွေႏဩ" အနုဲင်းနဝ်ꩻနေနေ၊ ကာမဂွုဏ်ႏဖုံႏနောဝ်ꩻ အဗွန်ပီနုဲင်း သေင်ႏရာႏနွိုးနဝ်ꩻနေနေ၊ (ပေါႏတလင်ꩻထိုꩻတဝ်းနဝ်ꩻ) မာꩻယပ်ꩻဒုက္ခလိုꩻအာတန်၊ အပဲ့စ်အာတန်"နီဗွေႏဘုရာꩻ ဟော်ꩻခါꩻနုဲင်းနဝ်ꩻ။ နေးတွမ်ႏ ထာꩻသေဉာဏ်ႏပညာႏတဲင် အမွေးအမဲဉ်ႏအတွိုင်ꩻ ထီႏသေ ကာမဂွုဏ်ႏခရာႏတွော့ꩻ ကာမဂွုဏ်ႏတာႏနဝ်ꩻ ယူႏယာႏတဝ်းဒွုမ်ထမုဲင်ꩻမုဲင်ꩻ၊ "ယူႏကျိုꩻစာꩻဗော့ꩻ ဖေႏကပယ်ႏထိုꩻနွောင်ꩻ ကာမဂွုဏ်ႏ"နဝ်ꩻတစွိုးလွုမ်ꩻသွူ။ သဌေꩻပေါတလိယဟွေး- ဘုရာꩻခွေတပဲ့ꩻ(ဖုံႏ)နဝ်ꩻ ကာမဂွုဏ်ႏတာႏ ယူႏယာႏဒူမ်ထမုဲင်ꩻမုဲင်ꩻ၊ "ယူႏကျိုꩻစာꩻဗော့ꩻ ဖေႏကပယ်ႏထိုꩻနွောင်ꩻ ကာမဂွုဏ်ႏ"နဝ်ꩻ တစွိုးလူမ်ꩻနဝ်ꩻမꩻ သတိꩻဗွို့ꩻခြꩻဟဝ်ငါႏ လꩻစွဉ်ႏဒျာႏ "ပုဗ္ဗေနိဝါသာနုဿတိဉာဏ်ႏ"၊ ကွပ်ပွိုးလꩻဉာဏ်ႏနဝ်ꩻတဲင် ဇာတ်ကရီးပန်အွဉ် ကထွာလွဉ်ခန္ဓာႏ၊ ကထွာဗာႏဘဝ၊ စခါသေနွောင်ꩻ၊ နီဘဝ သွံဘဝစတဲင်နုဲင်းနဝ်ꩻ၊ ဘဝမုဲင်ꩻထွာထမုဲင်ꩻ၊ အနုဲင်းမုဲင်ꩻ-တရေꩻတကုဲင်၊ ခြွေခြာႏ-ဒုက္ခစတဲင်နုဲင်းနဝ်ꩻ သလို့နောဝ်ꩻသွူ။ သဌေꩻပေါတလိယဟွေး- ဘုရာꩻခွေတပဲ့ꩻ(ဖုံႏ)နဝ်ꩻ ကာမဂွုဏ်ႏတာႏ ယူႏဒူမ်ထမုဲင်ꩻမုဲင်ꩻ၊ "ယူႏကျိုꩻစာꩻဗော့ꩻ ဖေႏကပယ်ႏထိုꩻနွောင်ꩻ ကာမဂွုဏ်ႏ"နဝ်ꩻ တစွိုးလွုမ်ꩻနဝ်ꩻမꩻ သတိꩻဗွို့ꩻခြꩻဟဝ်ငါႏ လꩻစွဉ်ႏဒျာႏ "ဒိဗ္ဗစက္ခုဉာဏ်ႏ"၊ ကွပ်ပွိုးလꩻဉာဏ်ႏနဝ်ꩻတဲင် ထီႏသတ္တဝါႏဖုံႏ၊ သတ္တဝါႏ ကသီတွင်ꩻဖုံႏတဲ့နဝ်ꩻ၊ သတ္တဝါႏ ကကွုတ်တွင်ꩻဖုံႏတဲ့နဝ်ꩻ၊ သတ္တဝါႏယွုတ်ဖုံႏတဲ့နဝ်ꩻ၊ သတ္တဝါႏမျတ်ဖုံႏတဲ့နဝ်ꩻ၊ သတ္တဝါႏတရေꩻဖုံႏတဲ့နဝ်ꩻ၊ သတ္တဝါႏတကုဲင်ဖုံႏတဲ့နဝ်ꩻ၊ သတ္တဝါႏကလွေꩻ ဘဝကုဲင်တဲ့နဝ်ꩻ၊ သတ္တဝါႏကလွေꩻ ဘဝဟောဝ်တဲ့နဝ်ꩻ၊ ကံႏဟောဝ်ကံႏကုဲင်အလွိုက် ထွိုက်ရာꩻထွိုက်ရာꩻ ကတွိုႏလွေꩻဒါႏ သတ္တဝါႏဖုံႏနဝ်ꩻ ထီႏလို့နောဝ်ꩻသွူ။ သဌေꩻပေါတလိယဟွေး- ဘုရာꩻခွေတပဲ့ꩻ(ဖုံႏ)နဝ်ꩻ ကာမဂွုဏ်ႏတာႏ ယူႏယာႏဒူမ်ထမုဲင်ꩻမုဲင်ꩻ၊ "ယူႏကျိုꩻစာꩻဗော့ꩻ ဖေႏကပယ်ႏထိုꩻနွောင်ꩻ ကာမဂွုဏ်ႏ"နဝ်ꩻ တစွိုးလူမ်ꩻနဝ်ꩻမꩻ သတိꩻဗွို့ꩻခြꩻဟဝ်ငါႏ၊ ကိလေႏသာႏအာသဝ၊ လို့စင်ဖြွိုး၊ တသီးရွိုးရောင်ႏထန်ႏ၊ လꩻစွဉ်ႏဒျာႏ "အရဟတ္တမဂ်ဉာဏ်ႏ၊ အရဟတ္တဖိုလ်ႏဉာဏ်ႏ"နောဝ်ꩻသွူ။ ကွပ်လꩻ အရဟတ္တမဂ်ဉာဏ်ႏ၊ အရဟတ္တဖိုလ်ႏဉာဏ်ႏနောဝ်ꩻတဲင် ထွာ"ရဟန္တာႏ"၊ ခွေဘုရာꩻသာႏသနောႏတောႏကိုယိုနောဝ်ꩻ ထွာလဲဉ်းပုဂ္ဂိုလ်ႏအမျတ်သွတ်ꩻ၊ ပုဂ္ဂိုလ်ႏအမျတ်သွတ်ꩻ ကထွာဒါႏ ရဟန္တာႏနဝ်ꩻ ငေါဝ်းလိုꩻလမ်းအနေႏတဲ့ (ဟဲ့ꩻသဌေꩻ၊ ဟဲ့ꩻပုဏ္ဏာꩻ၊ ဟဲ့ꩻခွန်-စတဲင်နုဲင်းနဝ်ꩻ တလꩻတဝ်းဒူမ်)ထဲ့ဖြတ်ꩻလို့လဲဉ်းသွူ။ သဌေꩻပေါတလိယဟွေး- ငေါဝ်းလိုꩻလမ်း ဖေႏကထဲ့ဖြတ်ꩻထိုꩻ ခွေကရိုꩻတရာꩻဖုံႏနဝ်ꩻနဝ်ꩻ နာꩻနမ်းခန္ဓာႏကို အဝ်ႏသော့ꩻကားမုဲင်ꩻပါꩻဟောင်း" "ဩဗွေႏ- ခွေသွဉ်းယိုနဝ်ꩻ လိုꩻနုဲင်းမုဲင်ꩻတန်ကဲး၊ တွမ်ႏတရာꩻနဝ်ꩻနဝ်ꩻ အဝ်ႏညာꩻတန်ဒျာႏဗွေႏအော်၊ (ယိုခါ ခွေသွဉ်းသေလဲဉ်း၊ အမွေးအမာႏ၊ လောဝ်းစွဉ်ႏစွဉ်ႏ-စွဉ်ႏဒျာႏ ဗွေႏဘုရာꩻယို) "ဩဗွေႏ- ဘုရာꩻမျတ်ဗွေႏဩ- ကရီးခါ ခွေသွဉ်းယိုနဝ်ꩻ (ကွပ်သူႏသေတဝ်းထာꩻတဲင်) ပရိဗိုဇ်တက္ကတွဉ်ꩻဖုံႏနဝ်ꩻ ထင်းဒျာႏထီႏသေတရာꩻ၊ လူႏတောဒျာႏဝွေꩻသီး၊ ဆယ်ꩻကပ်ကိုꩻကွယ်ႏမာႏတောဒျာႏဝွေꩻသီး၊ ကေႏညိုႏတောဒျာႏဝွေꩻသီး၊ တွိုႏကထီႏသေတရာꩻ ဗွေႏသံဃာႏသီးနဝ်ꩻ ထင်းဒျာႏသေတဝ်းတရာꩻ၊ လူႏတဝ်း၊ ဆယ်ꩻကပ်တဝ်းဗွေႏဩ၊ 'ကားယိုမာꩻငါနဝ်ꩻ ခွေသွဉ်းကိုꩻကွယ်ႏ ဆယ်ꩻကပ်ဒျာႏ ဘုရာꩻ တရာꩻ သံဃာႏ ရတနာႏသွံပါꩻ'၊ အီႏလူႏအီႏတန်ꩻဒျာႏ ဗွေႏဘုရာꩻ ဗွေႏသံဃာႏ၊ ခွေသွဉ်းယိုနဝ်ꩻ မတ်ဒျာႏသွော့ ဗုဒ္ဓဘာႏသာႏ ဥပါႏသကာႏတဖြာꩻဗွေႏဩ"လောဝ်းနီဗွေႏဘုရာꩻ စတဲင်နုဲင်းနောဝ်ꩻသွူ။ (သုတ္တန်ပိဋကတ်၊ မဇ္ဈိမပဏ္ဏာသပါဠိတောႏ၊ ပေါတလိယသုတ်)