သတိယိန်းယံ

အဝ်ႏ ဝီခီပီးဒီးယား ကို

"သတိယိန်းယံ-စွန်ꩻယိန်းထင်" သတိကရိုꩻနဝ်ꩻ အဝ်ႏပါဠိပုဒ်ကို လွူးဖွာꩻလင်ꩻလွဉ်ဒျာႏ ဝေါဟာရတဖြုံႏနဝ်ꩻသွူ၊ ပအိုဝ်ႏနဝ်ꩻ ဟဲ့ꩻယူလꩻတသေႏနုဲင်းနဝ်ꩻသွူ၊ စိတ္တေန နီယတေ လောကော-လောကကို သꩻယို ထွာဟောခံꩻနဝ်ꩻသွူ၊ သတိနဝ်ꩻ ထွာလွဉ်ꩻဖေႏတသေႏ သꩻပရိတ်(ထိန်ꩻချုတ်သꩻ)နဝ်ꩻသွူ။ "သတိꩻတရာꩻ အွဉ်ႏသꩻကို၊ အမာႏယို မော့ꩻနွောင်ꩻတဝ်း"ပအိုဝ်ႏငဝ်းအဝ်ႏအတွိုင်ꩻ မာꩻထာꩻမာꩻအမျိုꩻမုဲင်ꩻခန်းတယဝ်း သတိမဉ်ႏလိုမ်းကိုမ်ႏနဝ်ꩻ မာꩻတရွို့ꩻကြွို့ꩻတဝ်း၊ မဲဉ်ႏစွို့ꩻလွေꩻဒျာႏ ကဲဉ်းအာအာနဝ်ꩻသွူ၊ "သတိꩻမဉ်ႏကုဲင် ထံယုဲင်ဗွော့ꩻလꩻ"ငဝ်းရာႏဆꩻ အဝ်ႏဖျင်နုဲင်းနဝ်ꩻတဲင် "သတိမဉ်ႏလွင်း ထီႏတဝ်းထမ်း၊ အဝ်ႏငမ်းတသေႏသေႏ"လိုꩻဖြားဒေါ့ꩻခါꩻ သမ်းအဝ်ႏဖျင်နဝ်ꩻမꩻ မာꩻစွဉ်ႏမုဲင်ꩻယဝ်း အဝ်ႏလိုႏဟဝ်းခွုမ်သေႏသေႏ သတိꩻနဝ်ꩻသွူ။ လိုꩻအားထုတ်တရာꩻသားတဲ့နဝ်ꩻ၊ လိုꩻဝါးကာꩻသားတဲ့နဝ်ꩻ၊ လိုꩻတွိုက်ꩻခꩻစဲ့ꩻသားတဲ့နဝ်ꩻ၊ ထိုမ်ႏစီꩻပွာꩻရေꩻသားတဲ့နဝ်ꩻ၊ ခြွိုင်ႏသန်ꩻရေꩻသားတဲ့နဝ်ꩻ သတိꩻတဗာႏ မဉ်ႏတလိုမ်းကုမ်ႏတဝ်းနဝ်ꩻ ကုဲင်းကွင်ကယ်ဗာႏဒါႏ၊ ထဲ့ဒါႏတခြောက်ꩻ၊ အနီꩻအရင်ꩻ ကုဲင်းသွုမ်ꩻတန်ဒါႏနဝ်ꩻသွူ။ မဉ်ႏဒေါ့ꩻဗာႏ လောကကို သတိယို အရေꩻတန်လွိုငါႏနဝ်ꩻသွူ၊ နဝ်ꩻမꩻ နီပအိုဝ်ႏသီး မဉ်ႏအုံတွမ်ႏသတိꩻ၊ လွေꩻတွမ်ႏသတိꩻ၊ အံႏတွမ်ႏသတိꩻ၊ ခွုမ်စံႏမာꩻတွမ်ႏသတိနဝ်ꩻ ဟဝ်ငါႏသွူ။ နုဲင်းယိုခါ နီပအိုဝ်ႏမျိုꩻသီးဟွေး- သတိꩻလိုမ်းကိုမ်ႏမုꩻ အဝ်ႏလဲဉ်းသွူ တခွုင်းမုဲင်ꩻတန်ဟောင်း၊ မဲ့အွဉ်ႏသတိꩻ၊ နားအွဉ်ႏသတိꩻ၊ သꩻအွဉ်ႏသတိꩻ၊ ကတူးခီးဉာဏ်ႏ အွဉ်ႏသတိꩻမု အဝ်ႏနေဟောင်း၊ သတိမဉ်ႏအဝ်ႏ၊ မဉ်ႏအွဉ်ႏလွဒျာႏဝင်ꩻ ပငါပရာꩻလဲ့ ယံငါႏ၊ ထူႏဂုဏ်ႏငါႏသွူ၊ ကွဲတွော့ꩻ တဉ်ႏခွေါင်တတွာမုဲင်ꩻကရိုꩻနဝ်ꩻ- ရူးတန် လွဉ်အံႏမျောႏစသွူ နီခွိုꩻနွယ်ႏဖုံႏနဝ်ꩻ နီခွိုꩻသီး ထီႏနေဟောင်း၊ မိစ္ဆာႏလွဉ်ခြီခြဝ်ငဝ်းဖုံႏနဝ်ꩻ ဟွုန်နေဟောင်း၊ ကေကုဲင်ထံကုဲင် လွဉ်ယုဲင်ခြူလဲဉ်း နီဖိုးနီပနား၊ လွဉ်ယားလို့လဲဉ်း နီသွို့ꩻခြံဟံႏယာႏ၊ လွဉ်ထွို့ꩻငင်ႏအံႏတွာႏထိုꩻသွူ နီဖြို့ꩻပီဖုံႏနဝ်ꩻ ထီႏနေဝင်ꩻဖုံႏဟောင်း။ ဝင်ꩻလွဉ်ဖြူꩻသွူ အစွူႏအာႏဏာႏ၊ ဝင်ꩻလွဉ်ချာႏတခို့ တအာနီ နုဲင်းခိုးပေါင်ꩻဗာႏနဝ်ꩻ တွမ်ႏပညာႏမဲ့ဖြုံႏ ထီႏထွားဆွုမ်ႏဒါႏနေဟောင်း၊ ဝင်ꩻအဝ်ႏလွဉ်ဒွါႏသော့ꩻလဲဉ်းသွူ စူခင်ႏ နီဟံႏနယ်ႏဧရိယာႏကို၊ ခရစ်တွမ်ႏအစ် အဝ်ႏလွဉ်လေပ်သွူ သီလမ်းထျꩻ၊ ဝင်ꩻအင်းတရွူꩻဝꩻသွူ သီလမ်းပါႏနဝ်ꩻ အဝ်ႏဗေင်ႏအွီႏနေကထာꩻဖုံႏဟောင်း။ နီခင်ႏလမ်းအုံရော့ꩻကိုယို စိမ်စွဉ်ႏ စီꩻပွာꩻ၊ ပညာႏ၊ ခြွိုင်ႏသန်ꩻ၊ လိုꩻအခွင်ꩻအရေꩻစစွဉ်ႏယို ဝင်ꩻအဝ်ႏအံႏဒင်ႏ၊ ထိုမ်းထင်ႏနီကတူႏလောင်းတွော့ꩻ ဝင်ꩻအဝ်ႏကျံႏစယ်ႏတေက်ꩻနျꩻ နီခွိုꩻသီးဘဝ အဆင်ႏရန်းနဝ်ꩻ သေအွဉ်ႏသတိꩻနေဝင်ꩻဟောင်း၊ မာꩻပဲင်ႏခွင်ꩻအာႏဏာႏ အဗွေတဗာႏ ကအဝ်ႏဒါႏခင်ႏလမ်းဖုံႏလဲ့ ဝင်ꩻရိုပ်တဉ်ႏတွော့ꩻခါꩻဒျာႏ ဝင်ꩻလိုꩻမျိုꩻတန်ဝါႏဒစူကို၊ နီခွိုꩻယို ဝင်ꩻအွဉ်ႏထွာတွိုင်ꩻတွိုင်ꩻဒျာႏဝင်ꩻသွဉ်း၊ မာꩻပဲင်ႏခွင်ꩻဖုံႏ ဝင်ꩻတဖေႏတဝ်း၊ ဝင်ꩻသဲဉ်ꩻခြွဉ်းလို့ဒျာႏ ဝင်ꩻထျꩻ၊ နီလꩻပဲင်ႏခွင်ꩻအဲဉ်ထဝ်း တစွိုးစွိုးနဝ်ꩻ သေအွဉ်ႏသတိꩻနေဟောင်း။ နီအွဉ်ငါသီး ပွိုင်းလဲင်ႏစခါ ရင်ꩻတွမ်ႏသွီႏသက်တဲင် ကွီထူႏဒါႏတန်ႏတူႏခွင်ꩻဖုံႏ ခမ်းကောင်တွမ်ႏခမ်းဒွမ်ရွို့ꩻ၊ ခမ်းတွိုꩻ့တွမ်ႏခမ်းကွဉ်ႏ ထေင်ကရေင်သျုတ်ဒါႏ သမဲင်ꩻစေးလာႏလောင်း ပွိုင်းလဲင်ႏခါနဝ်ꩻလဲ့ လိုꩻသꩻကဲင်ႏသား စူခြောင်ꩻဒျာႏကွေႏကွေႏ၊ လိုꩻသꩻဟွေႏသား တခြဲစ်ꩻယားလီ နီပအိုဝ်ႏသီး သွီႏထီꩻရက်ပဲင်ꩻရေꩻတဲင် နီပအိုဝ်ႏသွီႏ ပꩻဖြီထိုꩻဗာႏ မွေးတဝ်းဟောင်း။ နုဲင်းယိုခါ နီပအိုဝ်ႏချင်ꩻချင်ꩻ အဝ်ႏလိုႏဖြွမ်းဗူႏဝင်ꩻ၊ အဝ်ႏလိုႏရက်ရက်ပဲင်ꩻပဲင်ꩻဒျာႏ၊ ဝင်ꩻနဝ်ꩻ ဝင်ꩻလိုꩻမျိုꩻတန်သား ကခွုမ်ပဆိုးအတွိုင်ꩻ နီမဉ်ႏအဝ်ႏပါလွဉ်ꩻ၊ အဝ်ႏထွာလွေꩻတေားတွော့ꩻ နီအချင်ꩻမဉ်ႏအဝ်ႏထေင်၊ အဝ်ႏပြုဲင်လီ အဝ်ႏဖြီဒျာႏတဝင်ꩻနဝ်ꩻ နီတမျိုꩻသာꩻလွုမ်းတာႏ အီႏလွစ်ထန်ႏဗာႏ ဝင်ꩻဆျာတောႏကွက်ကို တယိုꩻတဝ်းနဝ်ꩻသွူ၊ အွဉ်ငါသား ဖါဖြားသီးပွိုင်းလဲင်ႏ ကကျိုꩻစာꩻဒါႏ ထာꩻကျိုꩻစာꩻဖုံႏယိုလဲ့ ထွာထိုꩻဗော့ꩻ ထောက်ꩻထီသုဲင်ꩻကို တထီႏတဝ်းအခြောင်ꩻ၊ တတောင်ꩻတဝ်းအနမ်း၊ အဝ်ႏရွိုးသမ်းလွေꩻဗာႏအတာႏဆွာꩻနဝ်ꩻသွူ။ နုဲင်းယိုခါ နီပအိုဝ်ႏချင်ꩻချင်ꩻ တစွိုꩻတွမ်ႏတစွိုꩻယို အမျိုꩻထေင်ညင်ꩻဗာႏတဝင်ꩻ၊ အမျိုꩻထီꩻသင်ꩻတဝ်းဗာႏတဝင်ꩻ၊ အမျိုꩻထီႏရန်ႏသူႏဗာႏတဝင်ꩻ တမွေးတဝ်း၊ ကထွာလိုꩻမျိုꩻတန်သားသူꩻ နီပအိုဝ်ႏ ဖေႏကထွာလွဉ်နုဲင်းယို၊ နီပအိုဝ်ႏ ဖေႏကတဆွူႏတဆုဲင်၊ နီပအိုဝ်ႏ တစွိုꩻတွမ်ႏတစွိုꩻ ဖေႏကအဲင်ႏချာတဝင်ꩻ၊ ပအိုဝ်ႏအာႏရဲင်ꩻ ဖေႏကဆေ့ꩻတသေႏသေႏနဝ်ꩻ ဝင်ꩻအဝ်ႏအသောင် ကအဝ်ႏတောႏပဆိုးသူꩻ နီအဝ်ႏလိုႏထီႏဒါႏငါႏသွူ၊ နီအွဉ်ႏသတိꩻ ချင်းပေါင်ꩻဗာႏနဝ်ꩻ လိုꩻအထန်ႏဒျာႏသွူ။ ထွားနုဲင်းယိုခါ နီပအိုဝ်ႏယို လိုꩻအကိုချင်ꩻချင်ꩻဒျာႏ မဉ်ႏမာꩻထာꩻမာꩻ အမွေးအမဲဉ်ႏဒျာႏလဲ့ ရိုꩻမာꩻထာꩻမွေးမဲဉ်ႏတဝ်းတွော့ꩻ ကန့်ကွက်ရောင်ဒျာႏ၊ ထွိုင်ႏတွိုႏလိုꩻအထန်ႏ မာꩻထာꩻတမွေးမဲဉ်ႏတဝ်း အဝ်ႏထီႏထီႏငါႏအမာႏလဲ့ ရိုꩻမာꩻထာꩻ မွေးမဲဉ်ႏတဲင် လွေꩻထောက်ခံႏဖေႏအာႏလုဲင်ႏဒျာႏ၊ လွေꩻအိုပ်ꩻဒျာႏလိုꩻအထန်ႏ၊ လွေꩻခြꩻဒျာႏ လိုꩻအထန်ႏ၊ တွိုႏလိုꩻအကို ခွုမ်မာꩻဖေႏကို နေင်ႏပေါင်ꩻကအာလဲ့ ဒေါ့ꩻရိုꩻစွဉ်ႏ မာꩻထာꩻမွေးမဲဉ်ႏတဝ်းတွော့ꩻ တေက်ꩻနျꩻချာ၊ ခွဲꩻသွီႏချာ စတဲင်နုဲင်းယိုဖုံႏနဝ်ꩻ နီမဉ်ႏဖြွမ်းဗူႏဒျာႏအဖဲ့ꩻဖဲ့ꩻ အခဝ်ခဝ်နဝ်ꩻ ပအိုဝ်ႏယို အာႏတလာထာꩻ တခွုင်းမုဲင်ꩻဟောင်း။ နုဲင်းယိုခါ နီခွိုꩻပအိုဝ်ႏ အဝ်ႏလဲဉ်းတွမ်ႏဗဟိုႏသံႏဃာႏအစွိုꩻ၊ အဝ်ႏလဲဉ်းတွမ်ႏ ဒါႏပညာႏသား၊ လꩻဘွဲ့သား အစားစား၊ လိုꩻတဲးဝါးစွန်ꩻထင်ဖုံႏ အဝ်ႏပြုံႏပြင်ႏဒျာႏလဲ့ ကွပ်စွဉ်ႏ အွဉ်ငါသား အုပ်ချုက်တဒါႏတဝ်း၊ ခွုမ်စံႏတဒါႏတဝ်း၊ သွုံꩻရုဲင်ꩻတသွိုးဖေႏ ခင်ႏလမ်းအခြောင်ꩻ တမဲဉ်ႏတဝ်းတဲင် အကျိုꩻတတွိုႏခြောင်ꩻငါႏတဝ်းနဝ်ꩻသွူ။ နေးတွမ်ႏသတိꩻမဲ့နား၊ ကတူႏခီးတဲးဝါးတဲင် အဝ်ႏလိုႏထွားစီႏရင်ႏဒါႏဒါႏ၊ ပွိုင်ဆင်သေႏသေႏချာႏချာႏ တွမ်ႏပညာႏအဝ်ႏအဝ်ႏ၊ တွမ်ႏသတိစွန်ꩻအာႏ၊ တွမ်ႏပညာႏစွန်ꩻထီ စွဲးပင်ႏတသွောင်းထိုကီ ညီꩻညီꩻခန်းဝင်ꩻ ခွိုꩻပအိုဝ်ႏ ဖဝအဆင်ႏအရန်းကရိုꩻနဝ်ꩻ-[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခွန်ကံႏထွိုက်ရော့ꩻ-ပင်သာႏ
  2. ခမ်းသားငဝ်း အမုဲင်-၂၊ အစဲဉ်ႏ-၈