သထုံႏဘုရာꩻတွမ်ႏရန်ႏကုန်ႏဘုရာꩻ

ကောတဲမ်းထွဝ်ထေသား လက်သမာꩻအုပ် ပအိုဝ်ႏဘာႏသာႏ သထုံႏဘုရာꩻ တွမ်ႏ ရန်ႏကုန်ႏဘုရာꩻသမဲင်ꩻ သက္ကရာဇ် ၁၃၂၂-နေင်ႏ၊ သတင်ꩻကျွစ်လာဆန်ꩻ ၁-နီꩻ ( အုပ်ပေါင်ꩻ- နီရေင်ဗွေဗွေ ) ((( မဲ့ငါ-ဒို့ꩻတွမ်ႏ အကိုဒို့ꩻ လိတ်ယာႏဗိုန်ပီဝင်ꩻ ))) ဇေယျတု သဗ္ဗမင်္ဂလံ နမော တဿ ဘဂဝတော အရဟတော သမ္မာသမ္ဗုဒ္ဓဿ တိသရဏံ အဟံ ဝန္ဒာမိ

သထုံႏတွမ်ႏရန်ႏကုန်ႏသမဲင်ꩻ

ဟန်ႏသလဲင်ႏခါနောဝ်ꩻ၊ ဘုရာꩻတရာꩻသင်္ဃာႏ၊ ရတနာႏသိုမ်ဆူႏ၊ ဂုဏ်ႏတောႏသိုမ်ပါꩻ၊ နာလဲဉ်းခွန်လူꩻ၊ ကျူႏလဲဉ်းသိကျာꩻ၊ သာႏလဲဉ်းအဝင်ꩻ၊ တင်ꩻလုဲင်မင်ꩻမျိုꩻ၊ မီႏခိုႏကိုꩻကွယ်ႏ၊ သူသွယ်ႏရောင်ႏခေ၊ လေဗွာရောင်ႏချို၊ ညိုစိန်ႏနီႏလာႏ၊ ဥပမာႏစွိုးနုဲင်း၊ ထုဲင်ႏပီမျစိန်ႏ၊ လေထိန်ႏတောက်ပ၊ ကီလခိုႏဒေါမ်၊ သိုမ်ခမ်းတလွာႏ၊ ဘုရာꩻသျင်ႏအရောင်ႏ၊ တောက်တောင်ႏဒူ(သူ)မျိုꩻ၊ ဗိုန်ထိုသခင်၊ ရှင်တောဘုရာꩻ၊ အံႏဖြာႏမယောမ်ꩻ၊ ခီႏမောမ်ꩻမလို့၊ အတုငထောဝ်း၊ ကျွန်ꩻနောဝ်တီႏပါႏ၊ ဗျဟ္မာႏလူꩻလိုꩻ၊ မူႏခိုပေႏတန်၊ ကိုႏယံထေင်းထင်ႏ၊ အွဉ်ႏဒင်ႏကတူႏ၊ ပူႏဇောႏခေါက်ဝုဲင်ႏ၊ ကိုꩻကွယ်ႏရိုႏသေႏ၊ အစိန္တေယျ၊ သမ္ဗုဒ္ဓဘုရာꩻ၊ တရာꩻသင်္ဃာႏ၊ သိုမ်ပါꩻအပဲစ်၊ ကာယနမ်းကီ၊ မီႏအောဝ်ႏရိုꩻလဲ့၊ ယံကထဲ့ဟူႏ၊ မနော်ꩻအပဲစ်၊ မီႏအောဝ်ႏရိုꩻလဲ့၊ ယံကထဲ့စင်၊ စူခင်ႏကာယ၊ သွုန်ႏသꩻမနော်ꩻ၊ ပူႏဇောႏကွီလွစ်၊ အပဲစ်တသဲဉ်၊ ယံဖေႏကထိုꩻ၊ အကျိုꩻတသဲဉ်၊ ယံလွဉ်သော့ꩻလုဲႏ၊ ခေါက်ဝုဲႏကွီဆုꩻ၊ သဗ္ဗညုဘုရာꩻ၊ အငါအသောင်၊ ဆုတောင်ꩻငရီး၊ ကွီထွူနောဝ်ꩻမꩻ၊ ကာလပေႏခါ၊ ကထွာခွေဆရာႏ၊ သွဉ်ဒါႏအစ၊ ကာလအုံညီꩻ၊ မီꩻခိုႏဆယ်ꩻကပ်၊ အပ်ဖေႏသင်ဖုံꩻ၊ အုံအောဝ်ႏပြသ၊ အစသွဉ်ဖေႏ၊ ခွေသွဉ်းအရင်ꩻ၊ သညင်ꩻမေတ္တာႏ၊ ဝိဟာႏကျောင်ꩻကီ၊ စွုမ်ႏနီꩻသွဉ်ဖေႏ၊ စာပေႏတရာꩻ၊ ယံဒါႏယံသေ၊ ယံလေယံစဲင်း၊ လိတ်သဲင်လုဲꩻခံꩻ၊ သွဉ်သင်စွုမ်ႏနီꩻ၊ ပန်ꩻကြီꩻစွုမ်ႏဟာ၊ တရာꩻစာႏပေႏ၊ နယ်ဖေႏအစ၊ နမောကကြီး၊ သိုမ်ဆီသိုမ်ဖြုံႏ၊ သင်ဖုံꩻပေႏလာႏ၊ အက္ခရာႏလွဉ်၊ အစသွဉ်ဖေႏ၊ ပေႏခါခွေဉာဏ်ႏ၊ သန္ဓိသဒ္ဒါႏ၊ ဆရာႏကေꩻဇူꩻ၊ ထိုခြူႏတန်ကတ်၊ နဝ်ꩻမꩻခွေသွဉ်း၊ အုံခွမ်ꩻရိုႏသေႏ၊ ခွေသွဉ်းကိုꩻကွယ်ႏ၊ ခေါက်ဝုဲႏကွီလွစ်၊ အပဲစ်သိုမ်ပါꩻ၊ ကာယဝစီႏ၊ သိုမ်ဗီႏမနော်ꩻ၊ ငံးစောကာꩻမာႏ၊ သယ်ꩻခံႏညာတ၊ ယံစွꩻခွင်ꩻဩော၊ စင်ချော်ꩻစွိုးနုဲး၊ ထုဲႏပီဥပမာႏ၊ ထီသူႏလာႏလောင်း၊ ဟူႏကြောင်းရီႏစင်၊ စူခင်ႏအပဲစ်၊ ကွီလွစ်ထွူတဲင်၊ အဝ်ႏကုဲထဲင်းက၊ ပီတမာတာ၊ မွိုးဖါနီဆူႏ၊ ကေꩻဇူꩻတန်ထို၊ မွိုးမူႏနမ်းကီ၊ လာနဆီလာကွတ်ꩻ၊ ဗွုတ်ꩻထံႏဆဲင်ဟွဲ၊ လွေꩻသဲင်ꩻနီႏနွိုင်ႏ၊ အုံထွိုင်ႏလဲ့ခြင်ꩻ၊ အုံလင်ꩻလဲ့အွုန်၊ ဟွုန်တောဝ်းချမ်ꩻသာႏ၊ ခံႏဗာႏပင်ႏပန်ꩻ၊ မွိုးမူႏနမ်းကီ၊ မွူးနီꩻခိန်ႏမန်ႏ၊ ဖွာꩻထန်ႏမဲ့လေ၊ မွိုးဗွေႏတွမ်ႏဖါ၊ လွမ်ꩻလာꩻလွမ်ဒို့ꩻ၊ ဂုရုရက်ပဲင်ꩻ၊ သဲင်ခံꩻမကာႏ၊ ရတနာႏမက၊ ယွော့ဗဟွဲဆဲင်၊ ခံꩻလဲင်ပိုခို၊ ခါးလားထိုတန်၊ ပင်ႏပန်ꩻခံႏဗာႏ၊ နဲဉ်းရာႏနီဖြုံႏ၊ ငင်းအုံႏတအင်၊ ဆီႏဒင်ႏအေႏလူး၊ မအုံသူႏဗာႏ၊ ဩဇာႏဒဲဉ်ဟန်ႏ၊ ဖေႏအံႏဖေႏအွꩻ၊ တန်လꩻအောင်ႏမျင်ႏ၊ ကေꩻဇူႏသျင်ႏမွိုးဖါ၊ နဝ်ꩻမꩻခွေသွဉ်း၊ ခံႏနွမ်ꩻအုံဖွိုႏ၊ ရိုႏသေႏကန္တော့ꩻ၊ ဒေါ့ꩻထန်ႏကွီလွစ်၊ အပဲစ်နမ်းကီ၊ ဆီပါꩻဒုစရဲက်၊ ပိတ်မန်ႏသျင်ꩻလျင်ꩻ၊ ကင်ꩻထွူတဲင်ခါ၊ ဆငါအဝ်ႏက၊ သူရဿတီ၊ နမ်းကီကိုႏစောင်ꩻ၊ ရှစ်သောင်းနင်ꩻမျတ်၊ ပိဋကတ်ထိန်ꩻတီ၊ စွုမ်ႏနီꩻအုံပွိုး(ပွေါး)၊ လိတ်တွိုက်အထျꩻ၊ စွဲမꩻထဲမ်ကို၊ ဖူးခိုပညာႏ၊ နည်းနာနိဿရယ်ꩻ၊ ခွေသွဉ်းဆယ်ꩻကပ်၊ မပျတ်စွုမ်ႏနီꩻ၊ ခွေသွဉ်းမီꩻခိုႏ၊ ခွေသွဉ်းကိုꩻကွယ်ႏ၊ သူရဿတီ၊ သမာႏဓိနီဆီ၊ သူရဿတီသူဖြာꩻ၊ ကထွာခွေဆရာႏ၊ သွုန်ႏခါႏသꩻဖူꩻ၊ ထူႏထန်ႏဖေႏဖန်း၊ ခွေသွဉ်းအရင်ꩻ၊ သညင်ꩻဖန်းတပဲ့ꩻ၊ မဲ့ထွားစူတဲမ်း၊ နယ်တဲင်အထျꩻ၊ ယံဗꩻအနာ၊ ငေါဝ်းငွါဘုရာꩻ၊ ဗျာႏဒိတ်(တိတ်)ငသေꩻ၊ ပြည်ကြီးရွှေထုံ၊ နုတ်ငုံအွံဖြောင်း၊ မတ်တောင်ꩻအထျꩻ၊ စခါမွိုးနန်း၊ ခမ်းတန်ရွှေထုံ၊ ခွန်စဲဉ်ႏမင်ꩻဆက်၊ နင်ꩻမျတ်တောင်ꩻသေꩻ၊ စာပေသမဲင်ꩻ၊ ဘုရာꩻရွှေထုံ၊ နဝ်ꩻမꩻခွေသွဉ်း၊ တွိုင်ႏထွူသူရ၊ မစဖန်းကို၊ ခွေသွဉ်းယိုအရင်ꩻ၊ သညင်ꩻမေတ္တာႏ၊ ဆရာႏနင်ꩻမျတ်၊ လိတ်ဖတ်လင်္ကာႏ၊ တံꩻဆာႏရင်းခြွိုင်း၊ ထဲင်းကိုအစော့ꩻ၊ သော့ꩻကိုအလာႏ၊ ခွေဆရာႏနင်ꩻငံ၊ ကံႏတန်သူႏရာႏ၊ သွꩻချင်ꩻဝင်ꩻသူ၊ မုံလူꩻမော်နွယ်ႏ၊ စရွယ်ႏသွဉ်ပွိုက်၊ အပွိုင်သိပ္ပ၊ ဉာဏပညာႏ၊ ဆရာႏသူဆီ၊ သူရဿတီသူဖြာꩻ၊ ကျိုꩻစာꩻကျွꩻရွစ်၊ အွဉ်ႏလွစ်မွုန်းဖါ၊ ဝံꩻသာစဝ်းနောင်ႏ၊ ဆောင်ႏတွံႏပညာႏ၊ အီပါတွမ်ႏမော်၊ ခေါ်ချလဝင်ꩻ၊ လင်ထွူကောင်းဖါ၊ ကာထွူကောင်းဗွေႏ၊ ခွေသွဉ်းဖစ်ပင်ꩻ၊ ခွေသွဉ်းပင်ꩻသဲင်၊ သီစဲင်ဗဟိုႏ၊ ဟံႏခိုႏဟံႏလောင်း၊ တွိုင်ႏကြောင်းပင်ꩻဗူႏ၊ မော်မူႏမော်ခို၊ လွဉ်ရိုꩻဖြွမ်းလွ၊ ပုဂ္ဂိုလ်ႏစသင်ꩻ၊ ပင်ꩻစူꩻဖစ်လို့၊ တစုကျွန်ꩻလုံ၊ ယံအုံရံꩻမွုန်း၊ ယွုန်းယောချꩻသꩻ၊ ကျွꩻကျွꩻကာကာ၊ လာလာမာႏမာႏ၊ ဆန်ꩻပျာꩻသီဉာဏ်ႏ၊ ပဋိဘာန်ႏဟွမ်အွီႏ၊ စွီႏတွမ်ႏအထီ၊ အီတွမ်ႏအက္ခရာႏ၊ ကိရိယာႏထူꩻဆန်ꩻ၊ ရွှေပန်းပုံႏတု၊ လွဉ်လို့လုဲးဖါ၊ ကာလို့လုဲးစောဝ်း၊ ဖျောဝ်လို့ထွူမꩻ၊ အာစရိယဆရာႏ၊ သွဉ်ဒါႏကစ၊ နမောဗုဒ္ဓါ၊ စခါဆရာႏကျောင်ꩻ၊ အာပေါင်ꩻသင်္ဃာႏစဲဉ်ႏ၊ ပဉ်ရဲဉ်ႏလို့ကြေင်း၊ တယ်ꩻနေင်းကံယာ၊ တထီႏငှက်ပျော၊ ပန်းတောကဝ်ႏကတော့ꩻ၊ သော့ꩻတွမ်ႏဗွူဖေါင်း၊ ဒေါင်းလန်းတလန်ခိုႏ၊ အကိုဟူဗွာ၊ ဖြော့ပါစင်ဖြွိုး၊ အီႏနွိုးဩဇာႏ၊ နံႏသာႏကတိုꩻ၊ ဇာတိဖိုလ်ႏလေညင်ꩻ၊ မူလင်ꩻအထီ၊ ဖြစ်ꩻအီဖြွူးထင်ႏ၊ စင်ႏလောင်းခြေင်ႏကီ၊ ထီဖွိုင်ꩻမော်နမ်း၊ တံꩻခွဉ်ႏစေးတာ၊ ထီꩻထာထီꩻခံꩻ၊ နင်ꩻငံဒေႏဝါႏ၊ ယံမꩻစꩻခွေသွဉ်း၊ နောင်းအွဉ်တပဲ့ꩻတောႏ၊ အီႏဖောႏထန်ႏစံꩻမွိုင်၊ ခွိုင်းကာႏရွှေထုံ၊ ဒုံဆောင်ႏရပ်မ၊ စခါမွိုးနန်း၊ ခမ်းတန်နုပျို၊ ပအိုတန်ဌာန၊ သုဝဏ္ဏအမဉ်ꩻထန်ႏ၊ ဒဲဉ်ဟန်ႏပြန်ꩻပြော်ꩻ၊ ဩဇာႏကွုန်ꩻလွိုင်ႏ၊ ဟွိုင်ꩻဟွိုင်ꩻပျောႏပတာ၊ နံနာကိုန်ႏကတ်၊ အာဟွိုန်ႏထုထ၊ စဲ့မလဲ့ငိမ်ꩻ၊ ခမ်းထီသာႏယာႏ၊ ငတ်ꩻပါꩻရန်ႏသူႏ၊ ခုသကျံႏဟာ၊ တချာꩻနဲင်ႏကန်ႏ၊ အီႏပုံႏကန်ႏတွိုက်ꩻတော၊ ဟော်ခံရွှေထုံ၊ လုံးဝမဟွုန်၊ ဘုံꩻတွမ်ႏတန်ꩻခိုꩻ၊ ကယ်ꩻမွိုꩻလွိုဝင်ꩻ၊ ကံႏအခွင်ꩻဗွန်မျောက်၊ ရောင်ႏတောက်ဟော်ထာ၊ စခါမွိုးနန်း၊ ခင်ႏလမ်းနီပအိုဝ်ႏ၊ ခွိုꩻနွယ်ႏပါဦး၊ မူႏခိုဖြားဆား။ ဟန်ႏလဲင်ႏခါယို၊ ကျိုꩻစာꩻမတ်နော၊ သူႏတောႏသီးယာ၊ စခါမွိုးနန်း၊ ကတယ်ႏထောင်ႏစ၊ ရမ္မဝတီႏ၊ ပြည်ကြီးခမ်းတန်၊ ပွိုင်ႏခမ်းပွိုင်ႏထီ၊ ရွှေထီးရွှေနန်း၊ ဟော်ခံꩻဟော်ထာ၊ ထွာဝင်ꩻအတန်၊ စေꩻစိန်ႏချမ်ꩻသာႏ၊ စံႏစာꩻအုံအောဝ်ႏ၊ မော့ꩻနောဝ်ꩻစခါ၊ သုဗြဟ္မစာရီ၊ ထွားတီစောင်ꩻစယ်ꩻ၊ တရာꩻဆယ်ပါး၊ ပုဏ္ဏလိုꩻမျိုꩻ၊ အုပ်စိုꩻပွိုင်ႏခမ်း၊ ရမ္မဝတီႏ၊ ဝင်ꩻနီမာဝါꩻ၊ သုဗြဟ္မစာရီ၊ ထင်ႏထီႏပိုမဲ့၊ အမွိုးဟဲ့ꩻဟောင်၊ အမည်နာမ၊ သုမေဓာကွိုတောဝ်း၊ အုံရောဝ်းအောဝ်ႏညီꩻ၊ ဟော်ကီနန်ꩻတွင်ꩻ၊ ဝင်ꩻနီမွိုးဖါ၊ နောဝ်ꩻခါကာလ၊ ဒုက္ခဝေဒနာႏ၊ ဇရာႏမရဏ၊ ဘဝထင်ႏပြောင်ꩻ၊ ပိုမောင်ႏအောဝ်ႏကုဲင်၊ ဆုဲင်ꩻချာဟော်ကို၊ အုံအောဝ်ႏစံႏစာꩻ၊ နောဝ်ꩻခါထင်ႏထီႏ၊ ဟော်ကီဟော်လောင်း၊ ရွဉ်တောင်ꩻဥစ္စာႏ၊ မွိုးဖါအမွေႏ၊ အောဝ်ႏကုဲပြုံႏဒွါႏ၊ ဆချာလိုꩻခမ်း၊ လမ်းပါႏအဖူꩻ၊ ယူႏလꩻနန်းသေ၊ မရေႏမရာႏ၊ ဘဏ္ဍာႏစားယို၊ နီမွိုးနီဖါ၊ ကထွာတောႏလမ်း၊ လွူးနမ်းမွီႏသက်၊ ရံမက်လောဘ၊ ဓနဥစ္စာႏ၊ ရတနာႏရွဉ်ထာ၊ မရက်ငါႏစွဉ်ႏ၊ ရွဉ်ခံꩻယိုနဲ၊ သျင်ꩻဆယ်စုဗူႏ၊ တွိုက်တောႏစူကို၊ လိုꩻတန်လိုꩻဖြား၊ မွိုးဖါဖူဖီ၊ တအီႏလွေꩻပါတောဝ်း၊ ရွဉ်ခံꩻစားယို၊ နီမွိုးနီဖါ၊ ထွာမုဲꩻမအွဉ်ႏကုဲ၊ တွိုက်တာႏအကို၊ အောဝ်ႏတအိုႏသာႏသစ်၊ ဟော်တန်အဖူꩻ၊ အီႏထူႏစံႏစာꩻ၊ ဥစ္စာႏရွဉ်ထာ၊ မွိုးဖါအမွေႏ၊ ခွေလဲ့မီႏထွာ၊ ထာꩻဖြားမီႏထူႏ၊ လူမင်ꩻမီႏနေး၊ သေမင်ꩻမီႏအီ၊ ထာသီမရဏ၊ ကာလမီႏတွိုႏ၊ အွိုးနောခွေယို၊ ရိုꩻလဲ့အီႏပါ၊ တလꩻခြာတောဝ်း၊ နောဝ်ꩻလဲ့အီႏအောဝ်ႏကုဲ၊ စွိုးနုဲးယိုနေ၊ ပစ္စေꩻရွဉ်ယို၊ ထူႏလွေꩻကနောဝ်ꩻမꩻ၊ အီႏထွာအဗွာ၊ နမ်းငါသင်္သရာႏ၊ အီႏထွာနီꩻရင်ꩻ၊ သျင်ႏသုမေဓာႏ၊ နဝ်ꩻမꩻရွဉ်ခံꩻ၊ တွိုက်တာႏအဖူꩻ၊ ထူႏထန်ႏထွတ်ထေ၊ ပစ္စေꩻဥစ္စာႏ၊ မွိုးဖါအမွေႏ၊ ဝေဝက်စွဉ်ႏကြယ်ꩻ၊ ဆင်ꩻရဲꩻသားလိုꩻ၊ မူႏခိုဖြားဆား၊ ပုဏ္ဏာꩻရဟန်ꩻ၊ ရွဉ်ခံꩻဥစ္စာႏ၊ သဒ္ဓါႏလူႏတန်ꩻ၊ လိုꩻဖြန်ꩻလိုꩻယက်၊ ဝေဝက်လူႏသေꩻ၊ သေႏချာႏထွူမꩻ၊ ထူႏယထီတခြာ၊ တွိုင်ꩻကျာꩻသက်သေႏ၊ ဝသုန္ဓရေႏနင်ꩻ၊ ယံဖေႏတောင်ꩻမတ်၊ ရေစက္ချဆျာꩻထီ၊ နင်ꩻဖီလူꩻမူႏ၊ အလူႏဒါႏန၊ အမျဝေႏလင်ꩻ၊ သင်္သရာႏနမ်းငါ၊ ယံထွာသက်သေႏ၊ ဝသုန္ဓရေႏနင်ꩻဟွေး၊ မတ်ကိုတောင်ꩻတောင်ꩻ၊ ကောင်းမုဒါန၊ ဘဝနမ်းငါ၊ သဒ္ဓါကြည်ဖြူ၊ လူႏတန်ꩻငသေꩻ၊ ပေႏတန်မူႏခို၊ လိုꩻဝေင်ꩻလိုꩻခူꩻ၊ လူႏတန်ꩻထွူမꩻ၊ သꩻရေꩻဟွုန်ဟောဝ်၊ အုံအောဝ်ႏငပေ၊ ဌာနေရပ်မ၊ ဌာနရပ်သာႏ၊ ဟိမ္မာဝန္တာႏ၊ ထာꩻခြာတန်ကို၊ ထမ်းအိုဦꩻမင်ႏ၊ ထိုꩻထင်ႏလွေꩻအုံ၊ သေင်ႏဝါႏကလ၊ ရုက္ခဓုတင်ႏ၊ ကံကျင်ꩻသွုန်ႏသꩻ၊ အာရညကျင်ꩻ၊ အွꩻအံႏဘုဉ်ꩻပေႏ၊ သေင်ႏရာႏပေႏတန်၊ သင်္ကန်ꩻသောဝ်ႏပီ၊ ဖန်ထီစိုမ်ႏယွုံႏ၊ ကွန်ဗုဲဝတ်ရုံ၊ အုံအောဝ်ႏလယ်ႏဒွါႏ၊ သေင်ႏဝါႏအထျꩻ၊ တောရတခြာဒွုန်၊ ဟွုန်တောဝ်းလိုꩻငေါဝ်း၊ စိန်ႏလောဝ်းကူꩻကာႏ၊ ယို့ချာႏကေထံ၊ ထာꩻငမ်းအခြာ၊ လာꩻလာꩻမကျောက်၊ တစ်ယောက်ထဲတိုလျို၊ ခွေယိုနမ်းတဖြာꩻ၊ တခြာတောအုတ်၊ ရုက္ခမွေးရာ၊ အရာႏဘိက္ခု၊ ထူႏနေးရသေ့ꩻ၊ အလေ့ꩻသူႏတောႏ၊ မွေးလျောႏကမ္မဋ္ဌာန်ꩻ၊ စီꩻဖျန်ꩻဘာႏဝနာႏ၊ ရဟန္တာႏရသေ့ꩻ၊ မွိုးနီꩻစေ့ꩻခိန်ႏမန်ႏ၊ ဈာန်ႏဉာဏ်ႏထင်ႏလꩻ၊ နဝ်ꩻမꩻကျောင်ႏထင်ႏ၊ ကင်ဟောဝ်မို့ꩻလောင်း၊ ကျောင်ႏယ်ႏချာငါ၊ နဝ်ꩻခါထီႏလင်ꩻ၊ ရမ္မဝတီႏ၊ ပြည်ကြီးနိဂုံး၊ ဒုံဝေင်ꩻတိုင်းရွာ၊ လိုꩻအာခိုမူႏ၊ ပြုစုဖျင်ကြုဲ၊ မာꩻဒါႏထာꩻမုဲꩻ၊ သဲ့ꩻဟောဝ်ပွိုခူႏ၊ တဖူꩻလမ်းမ၊ ချꩻတာႏဖန်းပွန်း၊ ဟွုန်ဟဝ်သုတ်သင်ႏ၊ ထီထွင်ႏသဲ့ꩻပက်၊ ဖွစ်ꩻခန်းထာꩻအီႏ၊ လောႏညီႏထိုမ်သုဲꩻ၊ စဲဉ်ႏယုဲဆျာထီႏ၊ စီႏတွမ်ႏရာဇမတ်၊ ပရိသတ်မူႏခို၊ လိုꩻဖုံႏတင်ꩻလုဲ၊ ကြုဲတန်သုတ်သင်ႏ၊ ခမ်းခွင်ႏဝတီႏ၊ လိုꩻထီလိုꩻခမ်း၊ ပေႏတန်ဖြားဆား၊ ယောက်ျားမိန်းမ၊ ဌာနလိုꩻဒုံ၊ အုံအဝ်ႏမွေးလျော်၊ တရော်ꩻထွေတိန်ႏ၊ ခြိန်ႏဝင်ꩻအံႏအွို၊ ပဉ်စွိုꩻပဉ်ဖုံႏ၊ လိုꩻဖုံႏတကာႏ၊ နမ်ႏနꩻတွမ်ႏခွါ၊ ကျိုꩻစာꩻဖျိုးကြောင်း၊ တွဲႏမောင်းဒုံႏထုံ၊ အုံအောဝ်ႏထီထွင်ႏ၊ သုတ်သင်ႏတဖူꩻ၊ မူႏခိုဖြားဆား၊ နဝ်ꩻခါကာလ၊ သျင်ႏသုမေဓာႏ၊ နဝ်ꩻခါထင်ႏထီႏ၊ မာꩻလင်ထေ့စူꩻ၊ မူႏခိုအငါ၊ ရီစွဉ်ႏဦပါ၊ တကာႏလိုꩻအာ၊ မာꩻဒါႏထာꩻမုဲꩻ၊ ကြုဲကပွိုသဲ့ꩻ၊ လိုꩻဖုံႏလဲ့လောဝ်း၊ ဩစဝ်းထေရ၊ ဝစနဓမ္မော၊ ဝစနောဓမ္မေ၊ မဉ်သေကောင်းစဝ်း၊ မွူးရဝ်ꩻယိုတဲင်၊ ဒီပင်္ကရာ၊ သင်္ဃာႏလစ်ꩻသဲဉ်၊ စဲဉ်ႏလွဉ်ꩻအချာ၊ တကာႏသွဉ်းသီး၊ နီလိုꩻဖစ်ပင်ꩻ၊ ကျွꩻသဲင်ꩻတုံꩻသွမ်ꩻ၊ ဒုံခြင်ꩻလမ်းငါ၊ ဒီပင်္ကရာ၊ ဘုရာꩻပဉ္စောဝ်း၊ နဝ်ꩻမꩻသွဉ်းသီး၊ ညီႏညာꩻဖြွမ်းဝင်ꩻ၊ တီထွင်ႏသဲ့ꩻလွ၊ ပိဏ္ဍပအလူႏ၊ ပူႏဇောႏဘုရာꩻ၊ သဒ္ဓါႏလူႏကပ်၊ ပိဏ္ဍပါတ်ဒဲဉ်သွမ်ꩻ၊ ဖြွမ်းဝင်ꩻသဲ့ꩻလွ၊ လမ်းမဩစဝ်း၊ လျောက်လဝ်းရိုႏသေႏ၊ သေႏချာႏထွူမꩻ၊ ကာလနဝ်ꩻခါ၊ သုမေဓာသျင်ႏ၊ ထင်ႏဟွုန်လိုꩻဝေင်ꩻ၊ ပေႏတန်အငေါဝ်း၊ ဗွေႏစဝ်းဘုရာꩻ၊ မွူးရဝ်ꩻအီႏကျွꩻ၊ သွုန်ႏသꩻနုညံꩻ၊ သဏ္ဌာန်ႏစွိုးနုဲး၊ ထုဲႏပီဖုဲဆား၊ ပါꩻကစိုပ်ꩻဆီ၊ ထီဗွမ်ႏနမ်းမန်ꩻ၊ ပီတိစုမ်းဖျော်၊ လျော်တွမ်ႏသွုန်ႏသꩻ၊ နဝ်ꩻမꩻအုံငို၊ သာထိုနန်းတန်၊ သွမ်ꩻပန်ꩻဩဇာႏ၊ သဒ္ဓါႏမဉ်လူႏ၊ ပူႏဇောႏနုဲးဝင်ꩻ၊ တင်ꩻလုဲခိုမူႏ၊ ခွေယိုဟန်ႏလဲင်ႏ၊ နန်းသဲင်ꩻသꩻဖူꩻ၊ ယူႏဒွါႏသꩻကို၊ ခွေယိုနဝ်ꩻကောင်း၊ ဟူသွမ်ꩻဒဲဉ်ဗွာ၊ ခါလဲ့အဲဉ်ထဝ်း၊ အုံအဝ်ႏနန်းယူႏ၊ သွုန်ႏသꩻပူႏဆာႏ၊ ပမာႏစွိုးနုဲး၊ ထုဲႏပီရွှေကျာꩻ၊ အဝ်ႏညာꩻထီႏကန်၊ စွိုးဆင်တရ၊ ကထျယာခိုး၊ ကလိုႏယာဗာႏ၊ သုမေဓာသျင်ႏ၊ ထင်ႏဟွုန်ပေႏတန်၊ ဒေါ့ꩻထန်ႏအငဝ်း၊ ကွီဖျောဝ်အရင်ꩻ၊ မဉ်သုတ်သင်ႏနုဲး၊ ထုဲႏပီတင်ꩻလုဲ၊ ကြုဲင်တန်မင်ꩻလမ်း၊ နမ်ႏလဲ့ငထောဝ်း၊ နဝ်ꩻမꩻကွဲကွီ၊ ကြီးငယ်ပေႏတန်၊ အဝင်ꩻလဲ့ဖေႏ၊ နေးတထူအာႏ၊ အတာႏနွတ်ꩻသောင်ꩻ၊ ခြောင်ယော့ဟံႏဗော့ꩻ၊ ထာယော့အဖူꩻ၊ မူႏခိုနယ်ဖေႏ၊ သုမေဓာသျင်ႏ၊ ကထွာထင်ႏလိုꩻ၊ နမ်ႏထိုးနုဲးမုဲꩻ၊ တသေဖိုတဝ်း၊ ဟဝ်ထွူနုဲးခွေ၊ အဝင်ꩻဖေႏဖန်း၊ ခွေရင်ꩻခွေပွန်း၊ ထာꩻပြွန်ခုဲႏယပ်ꩻ၊ မာꩻကျပ်ဗာႏမꩻ၊ အကျိုꩻလꩻအာ၊ တနီꩻဟာမွူး၊ လဲင်ꩻလူးငသိုꩻ၊ လဲင်ꩻရွိုးလဲင်ꩻပျောင်ꩻ၊ ထာꩻအောင်လဲ့ထိုမ်၊ ထာꩻယူႏလဲ့မွိုး၊ ရွိုးပျောင်ꩻညောင်းညာ၊ တနီꩻဟာမွူး၊ တထွူတန်ꩻတဝ်း၊ အဝ်ႏရင်းဝီႏဝါး၊ မွူးလဲ့ဟာလင်ꩻ၊ နေမင်ꩻသူရိယာ၊ ခွယ်ꩻချာႏလဲဉ်းဖွိုႏ၊ စွိုးဆင်ပါꩻကထွို့ꩻ၊ တွို့ꩻကွဉ်ႏနဝ်ထင်ꩻ၊ ငင်ႏထွို့ꩻအီထိုꩻ၊ အဆင်နဝ်ꩻထွူ၊ တထွူတန်ꩻတဝ်း၊ အဝ်ႏရင်းကုဲသေꩻ၊ သေင်ႏလဲ့နေးယောင်ꩻ၊ ကောင်လဲ့နေးဟေ့ꩻ၊ ထာꩻခေ့ꩻတခြို၊ မူႏခိုတင်ꩻလုဲ၊ အွဉ်ႏကုဲသေꩻဒွါႏ၊ သျင်ႏသုမေႏဓာႏ၊ အွဉ်ႏချꩻနမ်ႏထိုး၊ တစိုးဗေင်ႏလင်ꩻ၊ အမဲ့ထင်ႏသေ၊ ထာꩻလေဖူꩻဖါ၊ ဝါးတောင်ꩻသာဦႏရောင်၊ ကောင်ခံသူရိယာ၊ အာကာလေစွူး၊ ခွန်မွူးရောင်ႏဗꩻ၊ တဒူႏဆီꩻထီ၊ ပꩻလီပြုဲင်လင်ꩻ၊ ကောင်ကင်လေဟိုး၊ ဆာတီးရောင်ႏထန်ႏ၊ ဆာႏတန်လဲ့ပေါ်၊ ဆာႏသင်္ဘောꩻတခေတ်ꩻ၊ တရစ်ꩻပေႏငဝ်းယေန်၊ တလွိုးခိန်ႏခါႏ၊ ထာꩻလေပသဝ်း၊ ဝါးငဝ်းဖြေင်ꩻဦႏ၊ ဖူႏဖါႏဖူႏဖါး၊ သုမေဓာခါလဲ့၊ နာႏထင်ႏဆျာငေါဝ်း၊ အဝ်ႏထွာဆာႏတန်၊ တရန်ဖြပေါ်၊ ဆကွဉ်ႏလေဗွာ၊ ရောင်ဝါရောင်ႏနီ၊ ဆျာမီꩻတဖုံ၊ ဆျာဒုံဟွိုန်းကူႏ၊ ဇမ္ဗူႏလေဗွာ၊ နဝ်ꩻခါသုမေဓာႏ၊ နာႏထင်ႏဆျာငဝ်း၊ နဝ်ꩻခါသာလိကာႏ၊ သုမေဓာအဆျာ၊ မာꩻစွဉ်ႏအငဝ်း၊ ဖြေင်ꩻလဝ်းစိန်ႏစိန်ႏ၊ ဝိန်ႏစလိန်ႏဝိန်ႏစလိန်ႏ၊ အစိန္တေယျ၊ သမ္ဗုဒ္ဓဘုရာꩻ၊ ခါလဲ့ကျွꩻကာ၊ သုမေဓာသျင်ႏ၊ ထူႏထင်ႏထီတခြာ၊ ဖြားမဲ့ဟွာႏစူ၊ တဖြူအဖြောင်း၊ သေႏချောင်းသေႏချာႏ၊ ဒီပင်္ကရာႏခါလဲ့၊ တွမ်ႏတပဲ့ꩻတပန်ꩻ၊ ရဟန္တာႏဖုံႏ၊ ကွဉ်ရုံႏသင်္ကန်ꩻ၊ လင်ꩻကျောင်ꩻကျွꩻကာ၊ ပိဏ္ဍပါတံ၊ ဒဲဉ်ဟန်ႏဩဇာႏ၊ လမ်းခါႏဒုံခြင်ꩻ၊ ပင်ꩻတွမ်ႏသပိတ်၊ ပရိက္ခရာႏ၊ ခင်ႏဖါႏထီꩻဝီꩻ၊ ပတီꩻသရေႏနုဲႏ၊ စဲဉ်ႏယုဲရံႏခူ၊ ဘုရာꩻပဉ်စဝ်း၊ ကျွꩻကာထောင်လွဉ်ꩻ၊ မင်ꩻလမ်ကြုဲတန်၊ ရဟန်ꩻလစ်ꩻသဲဉ်၊ စဲဉ်ႏလွဉ်ꩻအချာ၊ လက်ဝဲလက်ျာ၊ နဝ်ꩻခါကာလ၊ သျင်ႏသုမေႏဓာ၊ ခါလဲ့ထင်ႏထီႏ၊ နီဗွေႏဘုရာꩻ၊ ကျွꩻကာလွဉ်စူꩻ၊ သုမေဓာခါလဲ့၊ နမ်းယပ်ꩻခုဲင်ႏငါႏ၊ မာꩻဗာႏပီးမုဲꩻ၊ ကြုဲယိုခွေတာႏ၊ ယပ်ꩻငါဟံႏပြွန်၊ တထွူတန်ꩻတဝ်း၊ ပွိုးပီးနဝ်ꩻမꩻ၊ သျင်ႏသုမေႏဓာႏ၊ နန်းဒွါႏသꩻဖူꩻ၊ ယူႏဒွါႏသꩻကို၊ ခွေယိုဟန်ႏရဝ်ꩻ၊ ဗွေႏစဝ်းဘုရာꩻ၊ ဒီပင်္ကရာ၊ ခါလဲ့ကျွꩻလွဉ်၊ ပါတွမ်တပဲ့ꩻ၊ နဝ်ꩻမꩻသုမေဓာ၊ ကုဲႏယွားတခို့၊ ဗေင်ႏသို့ကိန်ꩻမီ၊ ထုဲႏပီသေင်ႏခြုံး၊ တုံးလုံးတဲပ်တဲ့၊ ဟံႏပဲစ်ꩻမွဉ်ကမ်း၊ မာꩻနမ်း(မ)တထာ၊ နဝ်ꩻခါဘုရာꩻ၊ ထီႏတငါတွေꩻဖျောဝ်၊ အဝ်ႏမီတခု၊ သုမေဓာသျင်ႏ၊ သုတ်သင်ႏခါꩻရီး၊ မပီးမနိုင်၊ တထွူတန်ꩻတဝ်း၊ အဝ်ႏကုဲဝီႏဝါး၊ ထာꩻပြွန်ဟံႏဗော့ꩻ၊ အဝ်ႏသော့ꩻဗေင်ႏယွေး၊ အခါႏထာႏဝ၊ ဆာကာလဟံႏ၊ ယုဲꩻကသန်ဆုံးယော့၊ ဟံႏဗော့ꩻထီသေင်၊ ဖြွီꩻခြေင်အခြာ၊ ဝွေꩻမာꩻအနမ်း၊ စွိုးနုဲး(တ)မထာ၊ ဘုရာꩻနီဗွေႏ၊ ယေႏနယ်သင်္ဃာႏ၊ သီကိင်းထွားမွိုင်၊ သုမေဓာႏငါဆူꩻ၊ လိုꩻလူꩻအဗွေႏ၊ ဝွေꩻအီႏထွာဗာႏ၊ ဘုရာꩻပဉ်စဝ်း၊ ငဝ်းငွါဟော်ꩻဖေႏ၊ ဘိက္ခဝေဖူးရက်၊ ခွန်ခံꩻသီးယာ၊ နဝ်ꩻခါကာလ၊ သုမေဓာလဲ့၊ စေလျာကလူꩻ၊ အစူလဲ့ဝုဲႏ၊ ကုဲႏယွားအနမ်း၊ ဟံႏဗော့ꩻဆကီ၊ ပီနုဲး(တ)မိထာ၊ ငဝ်းငွါလျောက်လဝ်း၊ ဩစဝ်းဩဗွေႏ၊ ဝေနေႏအဖါ၊ ယံကယမ်းကျွꩻ၊ ပါဒ-ခြေတော်၊ ကျွꩻထောင်ယမ်းလွေꩻ၊ ခွေသွဉ်းငင်းလောင်း၊ တောင်ꩻပြန်ႏလျောက်လဝ်း၊ ဗွေႏစဝ်းဘုရာꩻ၊ ဘိက္စဏပါဒေါ၊ ဘိက္စဏောပါဒေ၊ ယံဖေႏကျွꩻကာ၊ ပါဒယမ်းဆန်၊ နိဗ္ဗာန်ႏအခြွီ၊ ခွေသွဉ်းကွီဆု၊ ကောင်းမုယံထွာ၊ ကာယမ်းတရွေ၊ ခွေသွဉ်းခွင်ꩻဖေႏ၊ ကာယေ(တ)မထာ၊ ကာသွော့ဩစဝ်း၊ နဝ်ꩻခါကာလ၊ လောကမန်ႏကင်၊ ဒီပင်္ကရာ၊ ပညာစက္ခု၊ ထွားရှုကွဲထီႏ၊ မီႏတွိုႏနဝ်ꩻခါ၊ ဗျာဒိပ်ခါꩻဖေႏ၊ လစ်ꩻသင်္ခေႏတွမ်ႏ၊ တသဲဉ်ကမ္ဘာႏ၊ မီႏလဲဉ်းကာလ၊ ဝေနေယျသတ္တဝါႏ၊ ဗြဟ္မာႏလူꩻလိုꩻ၊ မူꩻခိုဖြားဆား၊ သုမေဓာယို၊ မီႏတွိုႏကမ္ဘာႏ၊ အကာသာႏမီႏပေါႏ၊ ညာႏတောႏဘဒ္ဒကပ်၊ ဇမ္ဗူႏတီႏပါꩻ၊ ဘုရာꩻငတ်ꩻဆူႏ၊ ဗိုဖူႏငတ်ꩻတုဲ၊ (ကောကက္ကသံတုံ၊ ကောဏဂုံက၊ ကဿပ္ပ) ကကုသန္ဓ၊ ကောဏာဂမန၊ ကဿပဘုံႏထူꩻ၊ သိုမ်ဆူႏပွင်ꩻရဲဉ်ႏ၊ လဲဉ်းတဲင်ကာလ၊ နဝ်ꩻမꩻလဲ့နာ၊ သုမေဓာသျင်ႏ၊ နာꩻအီႏထွာဗာႏ၊ ဘုရာꩻဂေါတမ၊ မိတေယျဝေး၊ ရိုꩻဖေႏဟော်ꩻကျာꩻ၊ သုမေဓာသျင်ႏ၊ မီႏတွိုႏနဝ်ꩻငါ၊ မွိုးမဉ်ꩻမာႏယာႏ၊ ဘာမဉ်ꩻသုဒ္ဓေါ၊ ယသောႏလမ်းသား၊ ရာဟုလာႏနာꩻပို၊ မွိုးနင်ဂေါတမီႏ၊ တဆီသူနေင်ႏ၊ စေꩻစိန်ႏချမ်ꩻသာႏ၊ စံႏစာꩻထွာလမ်း၊ ခမ်းမွန်ကပ္ပီႏ၊ နီဆီကွတ်ꩻနေင်ႏ၊ အခိန်ႏထင်ႏလꩻ၊ နိမိတ်ပျꩻနယ်၊ နဝ်ꩻမꩻတောႏထွက်၊ သက်တောႏသွစ်ꩻဆီ၊ ဒီပင်္ကရာ၊ ထင်ႏဖေႏဗျာႏဒိပ်၊ နိဗ္ဗာန်ႏအသက်၊ ပီနုဲးအီႏထွာ၊ တမွာမွာစွဉ်ႏ၊ မွူးဟာမွူးရဝ်ꩻ၊ အဝ်ႏထီႏတမွာ၊ နဝ်ꩻခါကာလ၊ သမ္ဗုဒ္ဓဘုရာꩻ၊ ဆုဲꩻချာဒီပင်၊ ကဖေႏဗျာႏဒိပ်၊ နီဆီကွတ်ꩻဆူႏ၊ ပွင်ꩻတောႏမူႏအချာ၊ နဝ်ꩻမꩻသဲင်ꩻကွုတ်၊ သီဓတ်မင်ꩻသာꩻ၊ ဟော်ထာလောင်းကီ၊ ပိတ်ကင်းထီꩻဗွာ၊ စံႏစာꩻအုံအဝ်ႏ၊ နဝ်ꩻမꩻထင်ႏထီႏ၊ နိမိတ်လစ်ꩻပါꩻ၊ လိုꩻဖြားလိုꩻဆာ၊ ထီႏဗာႏလိုꩻသီ၊ ထီႏဗာႏရဟန်ꩻ၊ သꩻဝꩻထိတ်လန်း၊ အွဉ်ႏကုဲခန်းဟော်၊ တောႏထွက်ထိုꩻထန်ႏ၊ ထိုမ်းတွမ်ႏသေဗွာ၊ ပဆွာꩻထန်ႏဝေင်ꩻ၊ တိန်ႏတိန်ႏမွူးနာꩻ၊ လွိုန်ရုတ်ꩻလာဗွေ၊ စူထွေတီႏပါႏ၊ စန္တာႏလာရောင်ႏ၊ လေတောင်ႏစွစ်ꩻလို့၊ ဇမ္ဗုဟံႏဆကီ၊ မွူးနီꩻတနင်လာႏ၊ နောႏမာႏခြောင်တန်၊ တဝဲဉ်လဲဉ်းခန်း၊ ခြောင်တန်တဖဲ့ꩻ၊ ကဲ့ꩻခန်းကလူꩻ၊ ထူႏခန်းကာႏဆွဉ်ႏ၊ ဗုဲင်တွမ်ႏသင်္ကန်ꩻ၊ တနံခွန်ဖီ၊ အီလင်ꩻလူႏကပ်၊ ရတနာႏဗိုကဝ်ႏ၊ တဆဝ်ရောင်ႏသာႏ၊ ရွှေကျာသင်္ကန်ꩻ၊ ကွဉ်ရုံႏသပ္ပါယ်ႏ၊ တင်ႏတယ်ႏထွူမꩻ၊ ကျွꩻနွို့တုံꩻသွမ်ꩻ၊ ရာႏဇဂြိုဟ်ႏဝေင်ꩻတန်၊ လမ်းပေႏလမ်းတန်၊ တခါꩻငွါဆꩻကွဉ်ႏ၊ ထန်ႏလွေꩻယွယွ၊ နဝ်ꩻမꩻတွိုႏလွေꩻ၊ ပဏ္ဍဝကောင်ဒွို၊ ဗွောင်ထွားသပိတ်ဖူꩻ၊ ပြောင်သွီႏခဝ်းမူရော၊ ရော်ꩻရယ်ꩻလွဝင်ꩻ၊ ကျံႏအံႏဘုဉ်ꩻပေႏ၊ သေနန်းငချာ၊ ပိုမာသွမ်ꩻပန်ꩻ၊ တအံႏဗွုန်ႏတဝ်းယိုꩻယိုꩻ၊ ခွုင်းကားလိုꩻထာꩻအံႏ၊ လမ်းခါႏဒုံခြင်ꩻ၊ သွမ်ꩻပန်ꩻနဝ်ꩻရာꩻ၊ စွိုးနုဲးယိုထွူ၊ အွꩻအံႏဘုဉ်ꩻပေႏ၊ သေႏချောင်းသေႏချာႏ၊ နဝ်ꩻခါကာလ၊ တနံပိုမူႏ၊ နင်သုစိတ္တာ၊ သဒ္ဓါႏရေႏရောႏ၊ လူႏတန်ꩻထောပတ်၊ ဖိုးမွူးနဲဉ်းထီ၊ လစ်ꩻဆီကွတ်ꩻထိုမ်ꩻ၊ ဘုဉ်ꩻပေႏအွꩻအံႏ၊ သွမ်ꩻပန်ꩻဩဇာႏ၊ သေႏချာႏထွူမꩻ၊ ကျွꩻကာလွေꩻစူꩻ၊ နေရဉ္ဇ(ကေ)ရာ၊ သီတာထီခြောင်၊ သဲင်ꩻဖြောင်ခွဲယား၊ ဘုရာꩻပဉ်စဝ်း၊ မော့ꩻနဝ်ꩻစခါ၊ ကထွာခွေဝေး၊ ဘုရာꩻကကုသန်တုံ၊ ကောဂဂုံတွမ်ႏ၊ ဘုရာꩻကဿပ၊ စခါဝွေꩻသီးဗွေႏ၊ သိုမ်ပါꩻသိုမ်ဆူႏ၊ နင်ꩻမူႏလူႏတန်ꩻ၊ သွမ်ꩻပန်ꩻဩဇာႏ၊ ထန်ႏထာဝန်ႏခံꩻ၊ သွမ်ꩻပန်ꩻခင်ႏလမ်း၊ ဝန်ႏခံꩻနဝ်ꩻရာꩻ၊ ဘုရာꩻခွေဝေး၊ အွဉ်ႏသေꩻအွိုးမုဲꩻ၊ စွိုးနုဲးခွေဝေး၊ ခွေယိုဟန်ႏလဲင်ႏ၊ ဝန်ႏသဲင်ဝန်ႏခံꩻ၊ ကျောင်ႏဆန်ငခိုႏ၊ စွိုးနုဲးကမ်ႏပုဲး၊ ပီနုဲးဟင်္သာႏ၊ နွိုးယားထင်ႏထီ၊ စဝ်းပီအဝန်ႏ၊ ကကုသန်တုံ၊ ကောဏဒံးကစ၊ ကဿပဘုံႏထူꩻ၊ သိုမ်ဆူႏအဝန်ႏ၊ လင်ꩻဆင်းလင်ꩻဗာႏ၊ ဝန်ႏထာအငဝ်း၊ သင်ႏလဝ်းရိန်ႏရိန်ႏ၊ ဟွုန်ရွစ်တွိုႏစွဉ်ႏ၊ ခွန်တန်နဂါꩻ၊ ဘုရာꩻပွင်ꩻထွူ၊ လိုꩻပေႏအခမ်း၊ ဇမ္ဗူတီႏပါႏ၊ မျက်နာႏကျွန်ꩻနဝ်၊ ဗွေႏစဝ်းဘုရာꩻ၊ နဂါꩻထင်ႏသေ၊ နေးတွမ်ႏကဝ်ႏထာ၊ ရတနာႏနွတ်ꩻစွိုး၊ ပလယ်ꩻကော်မုတ်၊ ဥဿဘယား၊ သန္တာႏမျစိန်ႏ၊ ဣန္ဒနီလာ၊ ပတ္တမျာꩻစိန်ႏဖူႏ၊ နဂါꩻလူႏတန်ꩻ၊ သျင်ႏတောႏဘုရာꩻ၊ ရဟန်ꩻဂေါတမ၊ ထိတ်ရသေႏချာႏ၊ ဖြီꩻစီꩻထွူမꩻ၊ သမ္ဗုဒ္ဓဘုရာꩻ၊ နဝ်ꩻခါကာလ၊ သမ်းကျွꩻသမ်းကာ၊ မာꩻငကွဉ်ႏထင်ꩻ၊ ဆင်ꩻရဲꩻလိုꩻဖြန်၊ သုဒ္ဓိယလုတ်လင်ႏ၊ လင်ꩻရဲ့သေဆာႏ၊ နဝ်ꩻခါထင်ႏထီႏ၊ နီဗွေႏဘုရာꩻ၊ သဒ္ဓါႏရဲဉ်ꩻလူႏ၊ ယာသုဲꩻသွစ်ꩻသဲဉ်ꩻ၊ ကျꩻရစ်သေႏချာႏ၊ နဝ်ꩻမꩻလူႏကပ်၊ ဗွေႏမျတ်ဘုရာꩻ၊ သဒ္ဓါကြည်ဖြူ၊ လူႏတန်ꩻထွူမꩻ၊ ဗုဒ္ဓစိန္တေ၊ နီဗွေႏဘုရာꩻ၊ သုဒ္ဓိငစင်၊ ဒါနရဲဉ်ꩻလူႏ၊ ယာရူႏသွစ်ꩻသဲဉ်ꩻ၊ ရဲဉ်ႏလွေꩻအုံဒါႏ၊ မာꩻလွေꩻစူꩻထေ့၊ ဗောဓိညောင်ပင်၊ အသောင်ကွဉ်ႏထင်ꩻ၊ အွဉ်ႏလင်ꩻယာသုဲꩻ၊ မာꩻနုဲးပလ္လင်ႏ၊ ညောင်ပင်မွူးထျꩻ၊ ဉေယျသစ္စာႏ၊ ယာသုဲင်ꩻထွာထင်ႏ၊ ပလ္လင်ႏခံꩻထာ၊ ငဝ်းငွါဓိဋ္ဌာန်ႏ၊ ပေါက်လန်ႏတဟျာႏ၊ ဘုရာꩻပဉ်စဝ်း၊ အုံအဝ်ႏဒင်ႏထင်ႏ၊ ပလ္လင်ႏခံꩻထာ၊ နွုတ်နာꩻနွတ်ꩻနီꩻ၊ ဖြီꩻဖြီꩻသတင်ꩻသုံꩻ၊ အုံအဝ်ႏစီꩻဖျန်ꩻ၊ ကမ္မဋ္ဌာန်ꩻဘာႏဝနာႏ၊ နဝ်ꩻခါကာလ၊ ဒေဝခမ်းကီ၊ ခွန်ဖီမာနတ်၊ ဝတ္တဝတ္တီႏ၊ ခီႏလွဉ်စဲ့ꩻမ၊ ရွစ်ဖြဖျော်လင်ꩻ၊ ထိုမ်းတွမ်ႏဆင်တန်၊ အာႏသန်ဟတ္ထိ၊ ဂိရိမေခလာ၊ အဝ်ႏတရျာꩻပုဲသွစ်ꩻဆီ၊ ထိုငကီထင်ႏ၊ ဖန်ဆင်ꩻစူဗောင်၊ စူလောင်းတရိန်၊ လရျင်ꩻလင်ꩻရန်ႏ၊ လင်ꩻတဖန်ရုဲင့်ꩻထျ၊ နီဗွေႏဘုရာꩻ၊ ရတနာႏပလ္လင်ႏခံꩻ၊ မာနတ်ခွန်သုံ၊ စဲ့ꩻဖုံရိန်သဲဉ်၊ ရိန်ရျာꩻသင်္ချာႏ၊ ကုဋာႏကုဋေႏ၊ မာနတ်သာꩻစဲ့ꩻ၊ အင်းဖဲ့အင်းဟျာႏ၊ ဘုရာꩻပဉ်စဝ်း၊ ငထဝ်းသွꩻခွ၊ နဝ်ꩻမꩻဝွေꩻဗွေႏ၊ ကဖေႏအလူႏ၊ ရေႏစူꩻတွိုင်ႏကျာꩻ၊ စခါသက်သေႏ၊ ကဖေႏလူႏတန်ꩻ၊ ဝွေႏလင်ꩻကုသိုလ်ႏ၊ အကျိုꩻနင်ꩻငံ၊ ဝသုန္ဓရေႏ၊ သက်သေႏဟံႏတန်၊ လွဉ်ဖျော်ထင်ႏစူꩻ၊ ကလူꩻကထိုမ်း၊ သဲဉ်ခွုမ်ရိုမ်းညီႏ၊ ဖြွꩻဆေ့ꩻကလူꩻထီ၊ ပီဗိုန်သမုဒ္ဒရာႏ၊ မာနတ်သာꩻစဲ့ꩻဖုံႏ၊ သွုမ်ꩻခန်းချက်ချင်ႏ၊ အောင်ႏခန်းခွန်ဖီ၊ နီဗွေႏဘုရာꩻ၊ စခါမွိုးနန်း၊ စွိုးနုဲးထုဲႏပီ၊ မွူးကလဲဉ်းစကောင်၊ ထင်ႏအောင်ႏခွန်သုံ၊ အုံအဝ်ႏစီꩻဖျန်ꩻ၊ ကမ္မဋ္ဌာန်ꩻဘာႏဝနာႏ၊ အဝိဇ္ဇာႏယ၊ ပဋိစ္စသမုပ္ပါဒ်၊ ထီႏရွစ်သေဖျော်၊ မော့ꩻနဝ်ꩻစခါ၊ ဒိဗ္ဗစက္ခု၊ ပုဗ္ဗေနိဝါသ၊ အာသဝက္ခယ၊ လလို့သေဖြောင်၊ နဝ်ꩻမꩻနီဗွေႏ၊ ဝေနေယျအဖါ၊ ကျွꩻကာသဲင်ꩻစူꩻ၊ သုဝဏ္ဏအခမ်း၊ ရာဇဌာနီ၊ ပြည်ကြီးရွှေထုံ၊ အုံအဝ်ႏဗာႏဖူꩻ၊ ကေꩻဇူꩻနဝ်ꩻမꩻ၊ ကာလငခါ၊ နီနာꩻပအိုဝ်ႏ၊ မူႏခိုခွေသီ၊ သံႏထီႏဗာႏယား(ယင်း)၊ မွိုးဖါခင်ႏလမ်း၊ ရွှေထုံကွိုနဲ၊ ထောဝ်းကဲးသီးယာ၊ တဖုံႏတဉ်ဟွေး။ ((( တဲႏမဲ့ငါ-၁ ဗꩻမဲ့ငါ-၇)))

ပွိုးပီးနဝ်ꩻမꩻ၊ ကျောင်ꩻတကာႏသီးယာ၊ သုဝဏ္ဏဘူမိ၊ ဖီဖူနေႏရာႏ၊ ပြည်ရွာသထုံႏ၊ အုံအဝ်ႏဖူꩻဗာႏ၊ နေႏရာႏမွိုးဖါ၊ ခွေသွဉ်းကထွာမော်၊ ဟော်ꩻထန်ႏထေဖေႏ၊ နီပအိုဝ်ႏဦꩻတန်ꩻ၊ ယံယူႏသေနာႏ၊ ငဝ်းငွါတောင်ႏမာႏ၊ ကောသေနာႏလိုꩻ၊ ရိုꩻလဲ့အဝ်ႏနေ၊ ထေထန်ႏဗွုန်ႏတဝ်း၊ မွိုးငဝ်းဖါငွါ၊ ငခါခွေသွဉ်း၊ ထေထန်ႏထွတ်တဲမ်း၊ ပရပဲက်လောင်းကီ၊ ညီႏနေမကောင်း၊ ကျောင်ꩻတကာႏသီးယာ၊ မာႏဒွါႏမကောင်း၊ စဝ်းနောင်းကျောင်ꩻဦꩻ၊ လိတ်ဖူꩻလုဲꩻကို၊ နီပအိုဝ်ႏခင်ႏလမ်း၊ ခမ်းတန်ရွှေထုံ၊ ဒုံဆောင်ႏလိုꩻအာ၊ ရာဇဌာနီ၊ မီႏတညီႏတဝ်း၊ တွမ်ႏမန်းငဝ်းကရိုꩻ၊ နီပအိုဝ်ႏနေႏရာႏ၊ တမွေးဗာႏတဝ်း၊ နဝ်ꩻလဲ့စဝ်းသီး၊ မီႏဟွုန်လွဉ်ꩻဗာႏ၊ သမဲင်ꩻစာႏနဝ်ꩻ၊ အွဉ်ႏဒေါ့ꩻဖြဝ်ႏဟွုန်၊ ခွေသွဉ်းစာႏရေꩻ၊ စာႏပေႏယံဟွုန်ရဝ်းဗာႏ၊ ကျောင်ꩻတကာႏတင်ꩻလုဲ၊ ကောကြုဲင်ꩻလိုꩻဖြား၊ ကောထွာလိုꩻကယ်ႏ၊ တယ်ႏထောင်ႏအုံအဝ်ႏ၊ ရွှေထုံရပ်မ၊ စခါမွိုးနန်း၊ ပန်ပန်ဆက်ဆက်၊ နီတကြက်ꩻခမ်းထီ၊ ဖူဖီအစိုး၊ လိုꩻဖြားအပန်၊ ထိုꩻထန်ႏလဲဉ်းတဝ်း၊ အဝ်ႏတွိုႏငခါ၊ ကောထွာပအိုဝ်ႏ၊ ရိုꩻလဲ့အဝ်ႏဗွေ၊ ဝေင်ꩻကိုဝေင်ꩻဖူꩻ၊ မူႏခိုခွေသီ၊ ပွိုးပီမုဲꩻခါ၊ မထွာဝင်ꩻလိုꩻ၊ တရိုꩻတန်ꩻတဝ်း၊ မော့ꩻနဝ်ꩻစခါ၊ ကထွာယော်ခမ်း၊ သူရိယစန္တာႏ၊ ရာႏဇာႏမင်ꩻကြီꩻ၊ တယ်ႏထောင်ႏပြုစု၊ သုဝဏ္ဏဘူမိ၊ နီဗွေႏဘုရာꩻ၊ ဗျာဒိပ်ငသေꩻ၊ ဖေႏဝင်ꩻနဝ်ꩻမꩻ၊ ထင်ႏလꩻသဲင်ꩻထွာ၊ ရာဇာဥက္ကဋ္ဌ၊ အစမော့ꩻနဝ်ꩻ၊ ဗွေႏစဝ်းဘုရာꩻ၊ ကကုသန်တွမ်ႏ၊ သူရိယစန္တာႏ၊ ထွာဗာႏတဖူးဝေး၊ မော့ꩻနဝ်ꩻအစ၊ ဌာနခင်ႏလမ်း၊ သာဝတ္ထိခမ်းဖူꩻ၊ လမ်းတန်အဗွေႏ၊ ဝွေꩻသီးတဖူးဝေး၊ ဖူးတွေ့မော့ꩻဗာႏ၊ သုမေဓာဘုရာꩻ၊ ဩဇာႏသွမ်ꩻပန်ꩻ၊ လူႏတန်ꩻဗာႏဖူꩻ၊ ဆုခါလဲ့ကွီ၊ ဝွေꩻသီးဝင်ꩻနီ၊ နာႏလွဉ်ꩻအကျိုꩻ၊ လူꩻလိုꩻစေꩻစိန်ႏ၊ ခွန်ဖီချမ်ꩻသာႏ၊ ဘုရာꩻလဲ့ဟော်ꩻ၊ နုမောဒနာႏ၊ စံႏစာꩻထွူမꩻ၊ ဘဝထင်ႏသွတ်ꩻ၊ သဲင်ꩻကွုတ်ထွာဗာႏ၊ ရာဇာဟော်ခံꩻ၊ ခွန်တန်ရာဇာ၊ စန္တသူရိဘ၊ မဟာႏမင်ꩻလောင်ꩻ၊ ထွိုက်ပွိုင်ႏခမ်းထီ၊ နီဝင်ꩻပအိုဝ်ႏ၊ အမျိုꩻအနွယ်ႏ၊ ခွေသွဉ်းစာႏရေႏ၊ ထေထန်ႏထွတ်တဲမ်း၊ နဝ်ꩻထွူကွိုနဲ၊ တင်ꩻလုဲသီးယာ၊ သူရိယစန္တာ၊ မဟာႏမင်ꩻကီꩻ၊ နီဝင်ꩻပအိုဝ်ႏ၊ မွိုးနန်းစခါ၊ ထွာဝင်ꩻအတန်၊ ဟော်ခံꩻရာႏဇာႏ၊ သူꩻရီးမော့ꩻနဝ်ꩻ၊ ခွန်စဝ်းအလောင်ꩻ၊ မင်ꩻကောင်ꩻအဇာတ်၊ လိတ်ဖတ်လင်္ကာႏ၊ သထုံသမဲင်ꩻ၊ လိတ်သဲင်လိတ်ခံꩻ၊ ထေထန်ႏစံꩻမွိုင်၊ ရင်းခြွိုင်းတံဆာ၊ စခါအပန်၊ ခွန်တန်အဇာတ်၊ ယံကစပ်စီႏ၊ ခီႏထန်ႏခွယ်ꩻပျာꩻ၊ မတ်နာႏစဲင်းစဲင်း၊ လိတ်သဲင်လုဲꩻခံꩻ၊ ထေထန်ႏစံꩻမွိုင်၊ စခါမွိုးနန်း၊ ပိယဒဿီ၊ နီဗွေႏဘုရာꩻ၊ မြတ်စွာအစိုး၊ ဝါႏတောႏထင်ႏလꩻ၊ နီဆီနွတ်ꩻဝါႏ၊ ကပိလဝတ်ခမ်း၊ ခီႏဆန်ꩻကျွꩻကာ၊ သာဝတ္ထိခမ်း၊ ဝေဠုဝန်ႏကျောင်ꩻ၊ သတင်ꩻသုံꩻကာလ၊ ဝါႏတောႏလꩻလာဗွေ၊ နီဆီငတ်ꩻဝါႏ၊ ရဟန်ꩻသင်္ဃာႏ၊ နွတ်ꩻသဲဉ်ဗွေဗွေ၊ ဝေဠုဝန်ႏကျောင်ꩻ၊ သတင်ꩻသုံꩻကာလ၊ ဝါႏတောႏထင်ႏဗွေ၊ နီဆီငတ်ꩻဝါႏ၊ တွမ်ႏသင်္ဃာႏဖုံႏ၊ ကွဉ်ရုံႏသင်္ကန်ꩻ၊ ခီႏဆန်ကျွꩻလွေꩻ၊ သုဝဏ္ဏခမ်း၊ တခြာတန်ကို၊ လိုꩻယေန်အရပ်၊ လျောက်ပတ်သာႏယာႏ၊ ရဟန္တာႏသီးယာ၊ ဌာနရပ်ယို၊ မီႏတွိုႏနဝ်ꩻခါ၊ အီႏထွာဝေင်ꩻဒုံ၊ ဟုံဟင်သာႏယာႏ၊ ရပ်ရွာႏအီႏထွန်ꩻ၊ အီႏကွုန်ꩻအီႏဗွေ၊ အီႏထွာအမန်ႏ၊ ဧကန်ႏမုက္ချ၊ တလွစ်လꩻတဝ်း၊ နဝ်ꩻမꩻရဟန္တာႏ၊ ငဝ်းငွါလျောက်လဝ်း၊ ဩစဝ်းဩဗွေႏ၊ ဝေနေယျအဖါ၊ မုဲꩻခါထွာဗာႏ၊ အွိုးနဲချစ်သား၊ ရဟန္တာႏထေရ်ႏကျောႏ၊ မီႏတွိုႏနဝ်ꩻခါ၊ ကမ္ဘာႏဘဒ္ဒကပ်၊ ဘုရာꩻငတ်ꩻဆူႏ၊ လူꩻလိုꩻအစော့ꩻ၊ ပွင်ꩻသော့ꩻကျွန်ꩻနဝ်၊ ကျွန်ꩻဟဝ်အရပ်၊ အီႏကာအီႏကျွꩻ၊ ဌာနရပ်ယို၊ ဝွေꩻသီးငတ်ꩻပါꩻ၊ ဘုရာꩻသျင်ႏဗွေႏ၊ အီႏသွင်ꩻသော့ꩻဗာႏ၊ ဓာတ်တောႏမွေႏတောႏ၊ အီႏကောႏစေႏတီႏ၊ အီႏတလွစ်ဒွုမ်တဝ်း၊ ပဉ္စဝ်းဘုရာꩻ၊ ရဟန္တာႏဗွေႏ၊ ယံသေဗာႏရဝ်း၊ ဗွေႏစဝ်းကရိုꩻ၊ လိုꩻမျိုꩻကစ၊ တရတပါꩻ၊ တရျာꩻတစွိုး၊ လိုꩻမျိုꩻမုဲꩻကောင်း၊ အီႏထွာဟော်ခံꩻ၊ အီႏပွိုင်ႏခမ်းထီ၊ နဝ်ꩻမꩻနီဗွေႏ၊ ဝေနေယျအဖါ၊ ငဝ်းငွါမိန်းတောႏ၊ ဟော်ꩻဖေႏရဟန္တာႏ၊ လိုꩻမျိုꩻနဝ်ꩻကောင်း၊ စဝ်းနောင်းဘိက္ခူႏ၊ သူဆီသူမျိုꩻ၊ ခွန်မွူးနေနတ်၊ စပ်ဆဲင်ႏခွိုꩻနွယ်ႏ၊ ပအိုဝ်ႏကွိုတဝ်း၊ ဗွေႏစဝ်းဘုရာꩻ၊ ပိယဒဿီ၊ ဗျာဒိပ်ငေသꩻ၊ ထဲစ်စွဉ်ႏနဝ်ꩻကာႏ၊ ဆုဲꩻချာနဝ်ꩻမꩻ၊ အနောမဒဿီ၊ နီဗွေႏဘုရာꩻ၊ သတင်ꩻသုံꩻဆုဲꩻ၊ ကေလဝယခမ်း၊ ဝါႏတောႏထင်ႏလꩻ၊ သိုမ်ဆီနွုတ်ꩻဝါႏ၊ ကျွꩻကာသဲင်ꩻစူꩻ၊ သုဝဏ္ဏခမ်း၊ စတွမ်ႏရဟန္တာႏ၊ သွစ်ꩻသဲဉ်နဝ်ꩻနေ၊ ထွေရဲဉ်ႏကျွꩻကာ၊ နဝ်ꩻခါသဲင်ꩻတွိုႏ၊ သုဝဏ္ဏခမ်း၊ သဲင်ꩻထီႏစွဉ်ႏမား၊ ထာꩻသားယူးဝီꩻ၊ နီဒူနီဗာႏ၊ သွာႏပွီမာꩻလမ်း၊ တခြာတန်ဖူꩻ၊ သူႏယေန်အရပ်၊ မွူးထီးနီဗာႏ၊ မာဝါꩻနီဒူ၊ ဝတခြာဖူꩻအုံအဝ်ႏ၊ နဝ်ꩻမꩻနီဗွေႏ၊ ဝေနေယျအဖါ၊ အနောမဒဿီ၊ ထင်ႏထီႏယူးဝီꩻ၊ နီဒူနီဗာႏ၊ သွာႏပွီမာꩻလမ်း၊ ထီႏဆွုမ်ႏဘုရာꩻ၊ ကျွꩻကာဖျော်လွဉ်၊ လူႏတန်ꩻစရာႏ၊ ခါလဲ့မအဝ်ႏ၊ ငထဝ်းယူႏစရာႏ၊ မာဝါꩻမွူးထီး၊ ကျံႏဝင်ꩻပီးမုဲꩻ၊ ခုဲႏသွုန်ႏယပ်ꩻသꩻ၊ ကြေားကြပူဆာႏ၊ နန်းဒွါႏသꩻဖူꩻ၊ ယူႏဒွါႏသꩻကို၊ ဝါꩻခိုမာမူႏ၊ အိမ်ႏသူႏလမ်းသား၊ ငဝ်းငွါတွိုင်ႏပင်ႏ၊ ခွေယိုတွမ်ႏနာꩻ၊ ထာꩻလီꩻပန်လင်၊ စခါကုသိုလ်ႏကံႏ၊ သန်ဟဝ်နဝ်ꩻမꩻ၊ ထီႏဗာႏဘုရာꩻ၊ သာမညမွေးတဝ်း၊ ဝါꩻစဝ်းဝါꩻဗွေႏ၊ ခွေယိုတွမ်ႏနာꩻ၊ ယံဖေႏဘုရာꩻ၊ သတင်ꩻကသုံꩻဗာႏ၊ ခင်ႏလမ်းနေႏရာႏ၊ ကျိုꩻစာꩻဗစ်ꩻထန်ႏ၊ ဟံႏခြုံးဟံႏဖွန်ႏ၊ နွန်ႏထင်ႏအာအာ၊ မာꩻနုဲင်းပလ္လင်ႏ၊ တင်ႏတယ်ႏလျောက်ပတ်၊ ရေႏမတ်လူႏတန်ꩻ၊ မီꩻဟွမ်အလာႏ၊ ကျိုꩻစာꩻအဲင်ႏထူႏ၊ မာမူႏဝါꩻခို၊ နီယိုꩻမာꩻနုဲး၊ ထုဲႏပီပလ္လင်ႏ၊ စွိုးဆင်ႏကမ္ဗလာႏ၊ လူႏတန်ꩻနီဗွေႏ၊ အနောမဒဿီ၊ ဘုံႏကီꩻဘုရာꩻ၊ ခါလဲ့သတင်ꩻသုံꩻ၊ တဆင်ႏတစိုး၊ ထာꩻရွိုးထင်ႏပြေႏ၊ ဟော်ꩻဖေႏတရာꩻ၊ ယူးဗွာတမွူးထီး၊ ပန္နက်ကွီဆုꩻ၊ ယံဗွေယံလꩻ၊ ဘဝနမ်းငါ၊ မီႏထွာသဲင်ꩻလိုꩻ၊ ရိုꩻလဲ့ရပ်ယို၊ ယံဇေႏထွာဗာႏ၊ ရာဇာဥက္ကဋ္ဌ၊ ထွာဒါႏဝင်ꩻအတန်၊ ဟော်ခံꩻရာႏဇာႏ၊ ယံထွာမန်ႏမန်ႏ၊ ပန္နက်ကွီဆုꩻ၊ သဗ္ဗညုဘုရာꩻ၊ အနောမဒဿီ၊ နီဗွေႏဘုရာꩻ၊ ဖြောင်းထာဖြေꩻခံꩻ၊ ဟော်ꩻထန်ႏနယ်ဖေႏ၊ ယေႏနယ်စူစနုံ၊ ငတ်ꩻစုံႏငတ်ꩻလီး၊ မီႏတွိုႏနဝ်ꩻခါ၊ ဘဒ္ဒကပ်ကမ္ဘာ၊ ဌာနရပ်ယို၊ ဘုရာꩻငတ်ꩻဆူႏ၊ ဘုံႏထူꩻငတ်ꩻတွန်၊ ကျွန်ꩻယိုအလောင်း၊ နဝ်ꩻကောင်းအီႏထွာ၊ တကာႏယူးဝီꩻ၊ မွူးထီးမာဝါꩻ၊ တလွစ်သာꩻတဝ်း၊ ဗွေႏစဝ်းဘုရာꩻ၊ သိုမ်ပါꩻအချာ၊ နမ်းငါကာလ၊ ဂေါတမအစိုး၊ ဌာနရပ်ယို၊ လိုꩻလဲ့အီႏကွုန်ꩻအာ၊ မွေႏတောႏဘုရာꩻ၊ ခါလဲ့သွဉ်ꩻလောႏ၊ ဟော်ထာဟော်ခံꩻ၊ နန်ꩻတောႏလဲ့အီႏဆို့ꩻ၊ ဘုမ္မိရပ်ရွာႏ၊ တကာႏယူးဝီꩻ၊ နီဗာႏနီဒူ၊ ပရူးထွာဗာႏ၊ ရာဇာဟော်ခံꩻ၊ ခွန်တန်ကွိုတဝ်း၊ လမ်းသားမိဖြာꩻ၊ နာꩻခါသုဝဏ္ဏ၊ ရာဇထွာဗွေႏ၊ ဝွေꩻနဝ်ꩻမဉ်ꩻဗာႏ၊ သူရိ(ယ)စန္တာႏ၊ ရာဇာႏဟော်ခံꩻ၊ မွိုးမဉ်ꩻကလျာႏ၊ ဖါမဉ်ꩻသက္က၊ ရာဇာဟော်ခံꩻ၊ ခွန်တန်ကွူတဝ်း၊ လမ်းသားမိဖြာꩻ၊ မဉ်ꩻဗာႏနာမ၊ သုဘဒ္ဒါဒေဝီ၊ မိဘုရာꩻနော်၊ ဟော်ခံꩻဟော်ထာ၊ ပုတ္တပိုခို၊ ဟောင်ရိုꩻနာမ၊ သုဓမ္မရာဇာ၊ ကွယ်ကားပိုမူႏ၊ တဖူးဖဲ့ဗွာစီ၊ အမဉ်ꩻအွီႏနွိုး၊ မွိုးဖါဖန်ဖေႏ၊ အမဉ်ꩻနာမ၊ ပိန္တသင်္ဃ၊ အီႏလꩻအီႏထွာ၊ တကာႏနာꩻယို၊ တခြာကိုဖူꩻ၊ ဘုံႏထူꩻဘုရာꩻ၊ အနောမဒဿီ၊ ဗျာဒိပ်ဟော်ꩻဖေႏ၊ ဖြောင်းခံꩻဖြေꩻထာ၊ သေချာႏထွူမꩻ၊ ကွဲကာကွဲကျွꩻ၊ ကပိလခမ်း၊ ကွဲယံးကွဲကျွꩻ၊ ဆချာယူးဝီꩻ၊ နီဗာႏနီဒူ၊ စွုမ်ႏဟာစွုမ်ႏရဝ်ꩻ၊ အုံအဝ်ႏသေနန်း၊ ကံကျင်ꩻဆောက်တယ်ႏ၊ ထုမ်ႏလယ်ႏအဆာႏ၊ ယူးဗွာနီဗာႏ၊ တခြာဖူꩻကို၊ ညာꩻယန်လိုꩻရပ်၊ အွꩻအံႏလယ်ႏဒွါႏ၊ သူႏဗွာနွယ်ဒီႏ၊ တနီꩻဟာမွူး၊ လွူးမွီးအသက်၊ လက်လဲဉ်လိမ္မာႏ၊ ယူးဗွာမင်ꩻကောင်ꩻ၊ အလောင်ꩻအလျာႏ၊ နီဗာႏနီဒူ၊ တခြာဖူꩻကို၊ ထိုမ်ႏအံႏလော်လယ်ႏ၊ တောႏထဲႏထာꩻခြာ၊ ကောင်ခါႏကောင်ဒေင်၊ သေင်ႏတန်အခြာ၊ ဝါႏတန်အခမ်း၊ ခင်ႏလမ်းရွှေႏထုံ၊ သုဝဏ္ဏဘုမ္မိ၊ စွုမ်ႏနီꩻစွုမ်ႏဟာ၊ တခြာတန်ဖူꩻ၊ ယူးမူႏယူးခို၊ လိုꩻယေန်အရပ်၊ ကောင်မျတ်အလောင်း၊ သာႏယောင်းသာႏယာႏ၊ ယူးဗွာနီဒူ၊ မာမူႏဝါꩻခို၊ ထင်ႏထွူနဝ်ꩻတနီꩻ၊ လွေꩻထီႏထွူစွဉ်ႏ၊ ရဟန်ꩻရသေ့ꩻ၊ အလေ့ꩻသူႏတောႏ၊ မွေးလျောႏခမ်းတခြာ၊ ကောင်နာသုဝဏ္ဏ၊ တောရဟေမှန်ႏ၊ တခြာတန်ကို၊ လိုꩻငဝ်းမဟွုန်၊ ထွုန်းလုံတောကြီး၊ ထင်ႏထီႏရဟန်ꩻ၊ ဝံꩻမျောက်ဝံꩻသာႏ၊ အာႏရဟွုန်ဟဝ်၊ အုံအဝ်ႏနစ်သက်၊ ရက်ပဲင်ꩻနမ်းကဝ်ႏ၊ ဟွုန်ဟဝ်ကုသိုလ်ႏ၊ တခြာကိုဖူꩻ၊ ကွဲယူႏကွဲနန်း၊ ခွုင်းကားအံႏဒါႏ၊ အဝ်ႏဗာႏနေကွိုး၊ တစွိုးစွိုးနဲး၊ နားလယ်နန်းယူႏ၊ သူႏတောႏယူးဗွာ၊ သꩻကိုဟို့ꩻဖူꩻ၊ ကွဲယူႏကွဲနန်း၊ လိုꩻကအံႏဒါႏ၊ ဩဇာႏနဝ်ꩻရာꩻ၊ အီႏထွာငကွို့ꩻ၊ သူႏဗွာနွယ်ဒီႏ၊ နီဒူနီဗာႏ၊ နဝ်ꩻမꩻဖူꩻသဲင်ꩻ၊ အဲင်ႏတွမ်ႏအဖြောင်း၊ သညောင်းသညင်ꩻ၊ မဉ်တန်ꩻမဉ်လူႏ၊ ဆယ်ꩻဖူꩻနမ်းတာႏ၊ သတ္တဝါႏယူးဗွာ၊ သဒ္ဓါႏလူႏတန်ꩻ၊ ရဟန်ꩻရသေ့ꩻ၊ အလေ့ꩻသူႏတောႏ၊ မွေးလျောႏကမ္မဋ္ဌာန်ꩻ၊ စီꩻဖျန်ꩻဘာႏဝနာႏ၊ နဝ်ꩻခါရသေ့ꩻ၊ နေးဆွုမ်ႏရပ်ထူႏ၊ သူႏဗွာနွယ်ဒီႏ၊ ကွီလွဉ်ꩻဆုꩻဟဝ်၊ မီႏတွိုႏနဝ်ꩻခါ၊ ဌာနရပ်ယို၊ နီသွဉ်းတကာႏ၊ မာဝါꩻဝင်ꩻနီ၊ မီႏထွာသဲင်ꩻလိုꩻ၊ ကရိုꩻနဝ်ꩻရာꩻ၊ ယံထွာသဲင်ꩻဗာႏ၊ ရာဇာဥက္ကဋ္ဌ၊ ယံလꩻထွာဗာႏ၊ သဲင်ꩻဒွါႏဝင်ꩻအတန်၊ ရဟန်ꩻသုမေဓာ၊ တောရရသေ့ꩻ၊ အလေ့ꩻသူႏတောႏ၊ ခါလဲ့ဟော်ꩻဖေႏ၊ ယံဖေႏလꩻနုဲး၊ ထုဲႏပီနီဗွေႏဘုရာꩻ၊ အွိုးချာနဝ်ꩻဟွဉ်ႏ၊ ယူးဗွာနီဗာႏ၊ အာႏရꩻမဲ့စွုမ်ႏ၊ ဝံꩻမျောက်ဝံꩻသာႏ၊ ပီဗိုန်အီႏထွာ၊ တမွာမွာစွဉ်ႏ၊ ဟန်ႏဟာမွူးရဝ်း၊ အုံအဝ်ႏသေနမ်း၊ ပီတိသောမနဿ၊ အာႏရꩻနစ်သက်၊ ရက်ပဲင်ꩻနမ်းကဝ်ႏ၊ ဆုဟဝ်ဆုဒါႏ၊ ပတ္ထနာႏကွီထွာ၊ ရာဇာဟော်ခံꩻ၊ ရဟန်ꩻရသေ့ꩻ၊ ဟော်ꩻဖေႏထွူမꩻ၊ နီဗာႏနီဒူ၊ ယူးဗွာတမွူးထီး၊ စွုမ်ႏနီꩻသေနန်း၊ စိုးညသက်ဆွာꩻ၊ ခန္ဓာႏထင်ႏပြောင်ꩻ၊ မျင်ꩻမိုရ်ႏကောင်နာ၊ နိမ္မာနရတိဘုံႏ၊ ကင်းတွမ်ႏထီꩻဗွာ၊ ထင်ႏထွာဖူꩻဗာႏ၊ ဒေဝါႏလူꩻပို၊ ဟော်ထိုလောင်းကီ၊ ဝင်ꩻနီမာဝါꩻ၊ နတ်သာꩻတနံ၊ ရံႏခူနီပြက်ꩻ၊ လူႏသက်တရေင်၊ အနေင်ႏတွက်ဆ၊ လꩻစွဉ်ႏခွုင်းနဝ်ꩻ၊ စဝ်းခွန်မင်ꩻလောင်ꩻ၊ သူရိ(ယ)စန္တာႏ၊ မွူးထန်ႏဟော်ခံꩻ၊ တွိုႏလင်ꩻကမ္ဘာႏ၊ မဟာဘဒ္ဒကပ်၊ ဗွေႏမျတ်ငတ်ꩻဆူႏ၊ ဇမ္ဗူႏကျွန်ꩻနဝ်၊ ဗွေႏစဝ်းဘုရာꩻ၊ သိုမ်ပါꩻအချာ၊ သုဝဏ္ဏခမ်း၊ စဝ်းခွန်အလောင်ꩻ၊ ပြောင်ꩻလင်ꩻလိုꩻခမ်း၊ တွမ်ႏနင်ꩻမိဖြာꩻ၊ ကလျာဝတီ၊ ဒေဝီနဝ်ꩻကောင်း၊ နံးလောင်းသန္ဓေႏ၊ တယ်ႏနေးကိုယ်ဝန်၊ နင်ꩻငံနမ်းကီ၊ လာတဆီထင်ႏလꩻ၊ နဝ်ꩻမꩻဖွာꩻလင်ꩻ၊ စင်ကြောင်းဗွာစီ၊ ပီနုဲးတရꩻလောႏ၊ ယောင်ꩻရေꩻယောင်ꩻသား၊ ဖုဲႏထွားဖုဲႏထီႏ၊ ဟော်ကီနန်ꩻတွင်ꩻ၊ ထီႏလင်ꩻမဲ့ငါ၊ ကောဇာသက္ကရာဇ်၊ တစ်နှစ်အထျꩻ၊ လမန်ႏတဖြုံႏ၊ ဝိသုကြုံႏနက္ခတ်၊ နီဆီငတ်ꩻဗာႏ၊ လာမျတ်လွိုန်သီ၊ တဆီငတ်ꩻသာ၊ လာဗွေရက်ထွန်ꩻ၊ မွူးနီꩻစနေႏ၊ ထာꩻလေဆျာဦႏ၊ ရောင်ဖြူရောင်နီ၊ ထီႏလင်ꩻမဲငါ၊ မွိုးဖါဖန်ဖေႏ၊ အမဉ်ꩻနာမ၊ မင်ꩻသာသူရိ(ယ)စန္တာႏ၊ ရာႏဇင်ႏမင်ꩻကောင်ꩻ၊ အလောင်ꩻအလျာႏ၊ လိမ္မာႏလက်လဲဉ်၊ နဝ်ꩻခါအသက်၊ နပ်တွက်ထင်ႏလꩻ၊ တဆီလစ်ꩻနေင်ႏ၊ ရွှေအိမ်ဟော်ကီ၊ အဖါသက္က၊ ရာဇဟော်ခံꩻ၊ ယံဖေႏပွိုင်ႏဝေင်ꩻ၊ စွုမ်ႏနီꩻမွန်းသွိုꩻ၊ တွမ်ႏချွေႏတွမ်ႏရံႏ၊ မိဿံမောင်းမ၊ ခင်ႏထျꩻခြေရင်း၊ တွမ်ႏနင်ꩻတွမ်ႏစွိုင်ႏ၊ ဗွိုင်းဗင်းမွန်းပျောႏ၊ ဟော်ခံꩻလောင်းကီ၊ ထီꩻဗွာကလ၊ ရာဇပလ္လင်ႏ၊ အသက်ထင်ႏလꩻ၊ နီဆီလစ်ꩻနေင်ႏ၊ အိမ်ရှေ့ရာဇာ၊ ဖါစဝ်းသက္က၊ ရာဇဟော်ခံꩻ၊ ခွန်တန်မင်ꩻကြီꩻ၊ အံႏထီပွိုင်ႏခမ်း၊ အပ်နမ်းပုံႏစု၊ ဟဲ့ꩻတွမ်ႏမူꩻမတ်၊ စာဖတ်စာႏရေꩻ၊ မတ်ပေႏမတ်တန်၊ ဖြွမ်းဝင်ꩻညီႏညာ၊ ဖါစဝ်းခင်ႏလမ်း၊ ယံဖေႏစီႏရင်ႏ၊ နင်းဟော်ပွိုင်ႏဝေင်ꩻ၊ ရွှေအိမ်ဟော်ထာ၊ ယံဖေႏစံႏစာꩻ၊ နွိုနာငထဝ်း၊ နဝ်ꩻမꩻအသက်၊ နပ်တွက်ထင်ႏလꩻ၊ သွံဆီလစ်ꩻနေင်ႏ၊ နဝ်ꩻမꩻသက္က၊ ရာဇဟော်ခံꩻ၊ ခွန်တန်သမ်းသီ၊ အနိစ္စပြောင်ꩻ၊ အလောင်ꩻအလျာႏ၊ စခါအစိုး၊ ပအိုဝ်ႏဟော်ခံꩻ၊ ခွန်တန်လက်ထက်၊ မီႏရိုꩻရွှေထုံ၊ သုဝဏ္ဏဘူမိ၊ နီဝင်ꩻပအိုဝ်ႏ၊ ဟော်ခံꩻအစွိုး၊ လိုꩻလဲ့ကွုန်ꩻကပ်၊ အရပ်လဲ့ဗွေ၊ မင်ꩻမုလဲ့ပေႏ၊ ဆယ်လီနီမွူး၊ နွိုနဝ်းငထဝ်း၊ မော့ꩻနဝ်ꩻစခါ၊ သူရိ(ယ)စန္တာ၊ ရာဇာဟော်ခံꩻ၊ အာႏဏာႏလဲ့ထို၊ တံꩻခိုꩻလဲ့တန်၊ အဝ်ႏထိုမ်းဆင်ဗွာ၊ သိုမ်ဆီသိုမ်ထိုမ်း၊ တဖဲ့ꩻရန်ႏသူႏ၊ မီႏခီႏမီႏလွဉ်၊ ကဝ်ႏတွမ်ႏဗွူဖေါင်း၊ တတောင်တွမ်ႏကဝ်ႏ၊ ထွားထင်ႏလူꩻတနံ၊ မွုန်ႏသဲဉ်ရေင်ရျာꩻ၊ ဆီꩻတာရဲဆွုမ်ႏ၊ တဖဲ့ꩻရန်ႏသူႏ၊ ထိုꩻမားပꩻပြုဲ၊ ပီနုဲးခမ်းဆူꩻ၊ ကရီလူးဗာႏ၊ သူႏလာႏလောင်းကီ၊ အဝ်ႏသူꩻရေꩻရေꩻ၊ ပီနုဲးမေႏအူ၊ ဖီးထူꩻတခြေ့၊ ကျောင်ꩻထေ့ဗွုန်ႏတဝ်း၊ မော့ꩻနဝ်ꩻစခါ၊ ဟော်ခံꩻစားယို၊ ပိုလီꩻလဲ့အာ၊ ထာꩻလိုပ်ꩻထာꩻခွုမ်၊ သွို့ꩻကောင်တွမ်ႏလုဲး၊ ဗွူဖုဲခွဉ်ႏအဝ်ႏ၊ စဝ်းခွန်ဟော်ခံꩻ၊ ဘုံႏတန်ꩻခိုꩻလဲ့တန်၊ နမ်းကျင်ꩻတရာꩻ၊ ဆီပါꩻကစ၊ သီလသတင်ꩻ၊ ကံကျင်ꩻဆောက်တယ်ႏ၊ မြဲꩻသေႏနမ်းလောင်း၊ ကောင်ဆောင်ႏထာꩻခြာ၊ သတ္တဝါယူးဝါး၊ ခါလဲ့ဟွုန်ဟဝ်၊ ဝံꩻမျောက်ဝံꩻသာႏ၊ တဗင်ႏမိင်ꩻငေါꩻ၊ စွူႏသားစွူႏကျံꩻ၊ အီႏရန်ႏနီလိုꩻ၊ ရိုꩻလဲ့ငထဝ်း၊ အုံဟဝ်အဝ်ႏသန်ꩻ၊ တနာတလွေး၊ ကရဝေမိစ္ဆာႏ၊ လူꩻဝါလူꩻဖျင်ꩻ၊ အီႏစင်ꩻရန်ႏယား၊ လာꩻလာꩻငထဝ်း၊ စတွမ်ႏကရဝေႏ၊ မိစ္ဆေမိစ္ဆာႏ၊ ထာꩻပူႏထာꩻအောင်၊ အီႏစောင်ꩻအီႏမွို့ꩻ၊ မောင်ꩻအံႏမောင်ꩻအိုမ်၊ ဒဲဉ်ဟန်ႏသေင်ႏလာႏ၊ တဖူꩻခါႏတဖူꩻဖ၊ စတွမ်ႏစက်ခဝ်း၊ တထီႏဒွုမ်တဝ်း၊ အဝ်ႏကုဲစွဉ်ႏရွုမ်ꩻ၊ လူꩻဟဝ်လူꩻဒါႏ၊ ထွားတီဒုံဝေင်ꩻ၊ ထိန်ꩻစောင်ꩻဘုရာꩻ၊ စခါမွိုးနန်း၊ ခွန်တန်အစိုး၊ ပအိုဝ်ႏဟော်ခံꩻ၊ စခါပွိုင်ႏဝေင်ꩻ၊ ပိုမာလမ်းသား၊ မဉ်ꩻဗာႏနာမ၊ သုဘဒ္ဒါမိဖြာꩻ၊ မင်ꩻသာပိုမာ၊ ပိုမူႏနဝ်ꩻရာꩻ၊ အမဉ်ꩻနာႏမ၊ ပိဏ္ဍသင်္ဃ၊ ကဉ္စစံႏသီ၊ အမဉ်ꩻအွီႏနွိုး၊ ပိုခိုနဝ်ꩻရာꩻ၊ အမေနာမ၊ သုဓမ္မရာဇာ၊ ဟော်ထာလောင်းကီ၊ စွုမ်ႏနီꩻစံႏစာꩻ၊ စခါဟော်ခံꩻ၊ မီႏထွာရေႏတွက်၊ သက်တောႏနဝ်ꩻရာꩻ၊ တရျာꩻနီဆီ၊ လွိုတကီသွစ်ꩻနေင်ႏ၊ စေꩻစိန်ႏချမ်ꩻသာႏ၊ မီႏရေႏတွက်သာႏသနာႏ၊ စင်ႏပင်ႏခွုင်းနဝ်ꩻ၊ ဗွေႏစဝ်းဘုရာꩻ၊ သာႏသနာႏအွဉ်ႏကုဲ၊ လိတ်လုဲꩻစာႏပေႏ၊ နီဗွေႏဂေါတမ၊ သုဝဏ္ဏဝေင်ꩻ၊ ဟော်ခံꩻအစိုး၊ စံႏစာꩻပွိုင်ႏဝေင်ꩻ၊ သူဆီနွုတ်ꩻနေင်ႏ၊ ထင်ႏလꩻနဝ်ꩻမꩻ၊ ဂေါတမဘုရာꩻ၊ မာယာနမ်းကီ၊ ထီႏလင်ꩻမဲ့ငါ၊ ကောဇာဒီဃ၊ လꩻမန်ႏဖြီႏဖြီႏ၊ သူဆီသွစ်ꩻဗာႏ၊ ပြိဿရာသီ၊ လွိုန်ရုတ်ꩻလာဗွေ၊ မွူးနီꩻသောကျာႏ၊ သီရိမာယာ၊ ရတနာႏကဝ်ႏခြံ၊ ဥယျာဉ်ႏအဖူꩻ၊ ထီႏလင်ꩻမဲ့ငါ၊ ကျွꩻကာမာꩻငထင်ꩻ၊ နွုတ်ꩻဆင်ႏဖဝါႏ၊ နွိုခွေပါꩻလင်၊ ပြဲင်ႏသေꩻငထဝ်း၊ ဗွေႏစဝ်းဘုရာꩻ၊ သက်တောႏထင်ႏလꩻ၊ တဆီသူနေင်ႏ၊ စေꩻစိန်ႏချမ်ꩻသာႏ၊ ထွာပါဟော်လမ်း၊ နင်ꩻငံယသောႏ၊ နန်ꩻတောႏဟော်ကီ၊ စွုမ်ႏနီꩻမွန်းသွို၊ ဟော်ကိုစံႏစာꩻ၊ ရမ္မ သုဘ သုရမ္မ၊ ရောင်ႏခလေတောင်ႏ၊ သိုမ်ဆောင်ႏပျသာဒ်၊ တွမ်ႏနင်ꩻယသောႏ၊ နန်ꩻတောႏဟော်ကီ၊ စွုမ်ႏနီꩻအံႏအွို၊ တဆီကွတ်ꩻနေင်ႏ၊ အခိန်ႏထင်ႏဗာႏ၊ သက်တောႏထင်ႏလꩻ၊ သိုမ်ဆီငတ်ꩻနေင်ႏ၊ ထန်ႏဝေင်ꩻတောႏထွက်၊ သွဉ်းရက်ငဆန်ႏ၊ ကဏ္ဍကသေဗွာ၊ ပဆွာထန်ႏဝေင်ꩻ၊ တိန်ႏတိန်ႏမွူးနာꩻ၊ လွိုန်ရုတ်ꩻလာဗွေ၊ မွူးနီꩻတနင်္လာႏ၊ သုဲꩻဗွာလောင်းကီ၊ နီဗွေႏဘုရာꩻ၊ ကျင်ꩻဗာႏသူနေင်ႏ၊ သက်တောႏထင်ႏဗွေ၊ လစ်ꩻဆီကွတ်ꩻနေင်ႏ၊ ကျွꩻသဲင်ꩻရာဇဂြိုဟ်ႏ၊ လိုꩻဝေင်ꩻထွားရောင်၊ လောင်ꩻသွမ်ꩻလူႏတန်ꩻ၊ နီဗွေႏဘုရာꩻ၊ တသေငါꩻတဝ်း၊ သင်းဟန်ႏနဝ်ꩻထိုꩻ၊ လိုꩻဝေင်ꩻပေႏတန်၊ သင်းဟန်ႏခါငွိုး၊ သင်းဟန်ႏခါင၊ တဗꩻဒွါႏသꩻအောင်၊ ပငါပရင်ꩻ၊ သင်းဟန်ႏနောဝ်ꩻရိုꩻ၊ ရုက္ခစိုꩻတနံ၊ သိကျာꩻခွန်ဖီ၊ အီႏထွာနဂါꩻ၊ ကောသားကရိုꩻ၊ စွိုးယိုလဲ့အဝ်ႏ၊ ဗွေႏစဝ်းဘုရာꩻ၊ ထီႏဗာႏဖိုတဝ်း၊ ပွိုးပီးနဝ်ꩻမꩻ၊ သေငါꩻလွတဝ်း၊ နဝ္ꩻမꩻခွန်တန်၊ ဟော်ခံꩻရာဇဂြိုဟ်ႏ၊ လိုꩻဝေင်ꩻလျောက်လဝ်း၊ ဩစဝ်းဩဗွေႏ၊ လိုꩻထာꩻမုဲꩻကောင်း၊ နီသွဉ်းတင်ꩻလုဲ၊ တခုဲႏသေငါꩻတဝ်း၊ ဗွေႏစဝ်းဟော်ခံꩻ၊ ထန်ႏထွားစံꩻမွိုင်၊ ယံဖေႏကသေ၊ ပေႏပေႏတန်၊ နီသွဉ်းနဝ်ꩻရာꩻ၊ တထွားဗွုန်ႏတဝ်း၊ ဟဝ်ဟဝ်စဲင်းစဲင်း၊ နဝ်ꩻတဲင်ဟော်ခံꩻ၊ ဟဲ့ꩻတွမ်ႏမူꩻမတ်၊ စာႏဖတ်စာႏရေꩻ၊ မတ်ပေႏမတ်တန်၊ ဟော်ခံꩻထင်ႏထီႏ၊ အီးအီးဝွေꩻယို၊ လိုꩻခိုဖြီသꩻ၊ ရူပယောင်ꩻဆင်ꩻ၊ ရင်းအင်လက္ခဏာႏ၊ ခွုင်းကားကျွန်ꩻနဝ်၊ အီႏပီဝွေꩻယို၊ လိုꩻခိုတကာ၊ ကနာငထဝ်း၊ မတရေꩻငါႏစွဉ်ႏ၊ ထန်းဆူꩻနဲးဝွေꩻ၊ ထွားထင်ႏယဲင်ꩻစဲင်း၊ ယွိုင်း(ယိင်း)ထွားယွိုင်းမဉ်ထီႏ၊ မဲ့ဗီႏလဲင်ꩻဆွော့ꩻ၊ တအွဉ်ႏဒေါ့ꩻဒွုမ်တဝ်း၊ ငဝ်းငွါထာꩻရာꩻ၊ ဟော်ထာမင်ꩻကြီꩻ၊ နီဗွေႏဘုရာꩻ၊ တရာꩻကျမ်ꩻဂန်ႏ၊ သမဲင်ꩻစာႏကို၊ ရိုꩻထာꩻပီးနဝ်ꩻကွိုနဲ၊ ထဝ်းကဲသီးယာ၊ တဖုံႏတဉ်ဟွေး ။

ဘုရာꩻပဉ္စဝ်း၊ မော့ꩻနဝ်ꩻစခါ၊ ရာဇဂြိုဟ်ႏခမ်း၊ ဇေႏတဝန်ႏကျောင်ꩻ၊ သတင်ꩻသုံꩻကာလ၊ ဟော်ꩻပျနယ်ဖေႏ၊ ဝေနေယျသတ္တဝါႏ၊ ဗြဟ္မာႏလိုꩻလူꩻ၊ မူႏခိုပေႏတန်၊ ဖြောင်းခံꩻဖြေꩻထာ၊ ငဝ်းငွါထင်ႏဟော်ꩻ၊ သောတာႏပန်ႏ၊ သကဒါႏဂါမ်ႏ၊ အနာႏဂါမ်ႏလဲ့တယ်ႏ၊ ဘုရာꩻကေꩻဇူꩻ၊ လိုꩻလူꩻဗျဟ္မာႏ၊ မတ်နာႏတရာꩻ၊ ဘုရာꩻကဟော်ꩻ၊ ကျောင်ꩻတောႏလောင်းကီ၊ တဆီပုဲတဝါႏ၊ ထင်ႏဗွေကာလ၊ တိုးကစွစ်ꩻစဲစ်ꩻ၊ ဟွုန်ရွစ်ဖျော်တွိုႏ၊ လူꩻလိုꩻအနား၊ ဘုရာꩻပွင်ꩻထွူဆူꩻ၊ လူꩻလိုꩻအစော့ꩻ၊ ဖြော့ထန်ႏစွိုးနုဲး၊ ထုဲႏပီကဝ်ႏခံꩻ၊ ဟံႏတန်ဆကီ၊ သိုမ်ဆီတဘုံႏ၊ ခွုင်းကားလောက၊ တထွꩻလꩻတဝ်း၊ ငထဝ်းတဲက်တွိုင်ꩻ၊ ပါမုဲꩻနွိုင်ꩻလꩻ၊ အီႏထွꩻဗိုန်ပီ၊ နီဗွေႏဘုရာꩻ၊ လာꩻလာꩻငထဝ်း၊ ဗွေႏစဝ်းဘုရာꩻ၊ ဗြဟ္မာႏလူꩻလိုꩻ၊ မူႏခိုဖြားဆား၊ သတ္တဝါႏတင်ꩻလုဲ၊ ဆယ်ꩻကပ်လွဉ်လူႏ၊ ပူႏဇောႏလွဉ်ဝုဲႏ၊ ကိုꩻကွယ်ႏမီႏခိုႏ၊ ရိုႏသေႏကိုႏယံ၊ နေးခံႏအုံနာႏ၊ ပငါပရင်ꩻ၊ ရဟန်ꩻသျင်ႏလူꩻ၊ မူႏခိုဖြားဆား၊ နဝ်ꩻခါကာလ၊ သုပန္နခမ်း၊ ဒဲဉ်ဟန်ႏဝပြော်ꩻ၊ နင်းဟော်ပွိုင်ႏဝေင်ꩻ၊ စေꩻစိန်ႏချမ်ꩻသာႏ၊ စံႏစာꩻအုံအဝ်ႏ၊ ထွာစဝ်းထွာခွန်၊ ဘုံႏတွမ်ႏတံꩻခိုꩻ၊ ကျောႏဟိုးဟုံဟင်၊ သတင်ꩻအလွီး၊ နွုမ်ꩻအွီႏနွုမ်ꩻဟောမ်၊ ဟော်ခံꩻဟော်ထာ၊ အာႏဏာႏပြင်ꩻကတ်၊ ပျသာဒ်ဟော်ခံꩻ၊ ဝေဇယန္တာ၊ စံႏစာအုံအဝ်ႏ၊ စဝ်းခွန်ဟော်ခံꩻ၊ ထင်ႏဟွုန်ထင်ႏသေ၊ ပေႏတန်အမျာꩻ၊ သားဟုံဒေါ့ꩻရောင်၊ ဟွုန်ဖြောင်တဲင်ခါ၊ ရာဇဂြိုဟ်ႏခမ်း၊ ဗွေႏစဝ်းဘုရာꩻ၊ ကျွꩻကာသဲင်ꩻစူꩻ၊ မူꩻမတ်အငဝ်း၊ ထင်ႏလျောက်လဝ်းတဲင်၊ ဗွေႏစဝ်းမင်ꩻကြီꩻ၊ မီႏထွာပီးနဝ်ꩻ၊ မူꩻမတ်သီးယာ၊ မွေးဒါႏနေမကောင်း၊ ဟော်လောင်းဟော်ကီ၊ တီပါလိုꩻခမ်း၊ ဟံႏလောင်းဟံႏခိုႏ၊ လိုꩻခမ်းဘုရာꩻ၊ ငခါမီႏအဝ်ႏ၊ စဝ်းသီးပညာႏရှိ၊ ကဝိသူႏတောႏ၊ လိုꩻမော်လိုꩻဒါႏ၊ တရာꩻကျမ်ꩻဂန်ႏ၊ လိတ်ခံꩻလုဲꩻထာ၊ ဖတ်ထွားကမ္ပယ်ႏ၊ ထင်ႏသေထင်ႏဟွုန်၊ မွေးမန်ႏအဝ်ႏနဲ၊ ကွယ်ကားနီခမ်း၊ အီႏကျွꩻအီႏကာ၊ လွဉ်ဒါႏနေမကောင်း၊ ကျွꩻတဝ်းနေမကောင်း၊ အုံအဝ်ႏနောင်ႏတ၊ သွုန်ႏဖူꩻသꩻကို၊ ဗွန်ထိုဘုံႏကြီꩻ၊ မဉ်ႏထီႏမဉ်ႏမော့ꩻ၊ အဝ်ႏကော့ꩻအုံမောင်ꩻ၊ ဟော်ခံꩻလောင်းကီ၊ မီႏဗေင်ႏအွꩻအံႏ၊ လဲင်ꩻရံꩻလဲင်ꩻသူႏ၊ မာꩻပီးမုဲꩻခွေ၊ ယံဖေႏထီႏဗာႏ၊ ဘုရာꩻပဉ္စဝ်း၊ နဝ်ꩻမꩻဟဲ့ꩻဟောင်၊ ဟော်လောင်းဟော်ကီ၊ မူꩻမတ်ပေႏတန်၊ ဟန်ႏလဲင်ႏခါယို၊ ရိုꩻဖေႏမောင်ႏမွိုင်၊ တွိုင်ႏပင်ႏငဝ်းငွါ၊ ငခါယိုခွေ၊ မဉ်မော့ꩻမဉ်ထီႏ၊ ဘုံႏကြီꩻဗိုန်ထို၊ လူꩻလိုꩻအဗွေႏ၊ သီလွေꩻမွိုင်နော၊ မိန်းတောႏရိုꩻဖေႏ၊ မူꩻမတ်ပေႏတန်၊ ဟော်ခံꩻလောင်းကီ၊ မူꩻမတ်သီးအငါ၊ နဝ်ꩻခါကာလ၊ ဗြဟ္မဏပုဏ္ဏာꩻ၊ နန်းဒွါႏအရင်ꩻ၊ ငံးဝင်ꩻကေႏညိုႏကုဲ၊ တရိုႏသေႏတဝ်း၊ ဝွေꩻငဝ်းဝွေꩻငွါ၊ သေနာႏအနမ်း၊ ငံးဝွေꩻအံႏမ၊ ဘုရာꩻမီႏကျွꩻလွဉ်၊ ငံးလိုꩻယွုမ်းလို့၊ သဗ္ဗညုဘုရာꩻ၊ ငဝ်းသဲင်ငွါခံꩻ၊ ငံးဝင်ꩻသွမ်ꩻဝွေꩻ၊ ပေႏတင်ႏဂဏန်ꩻ၊ သင်ဖုံꩻကံကူႏ၊ ကိင်းထူႏကိင်းဟော်ꩻ၊ ဩစဝ်းဩဗွေႏ၊ မီႏထွာလွေꩻပင်ꩻ၊ ဗွေႏသျင်ႏဘုရာꩻ၊ မီႏစာႏနာႏနုဲးခွေ၊ ပေႏတင်ႏအလိုႏ၊ ကိုႏကျောင်ꩻကထန်ႏ၊ တြတြိန်း၊ အချိန်ႏအခါႏ၊ ဆာလာနက္ခတ်၊ ကမ္ပတ်ဖီလာ၊ ဘဝါနားရီႏ၊ ဃဋီမိဿ၊ နဝနဝင်း၊ ကိင်းတွက်ကိင်းထွား၊ ကာလပေႏတင်ႏ၊ တွက်ထင်ႏကဟော်ꩻ၊ ဗုဒ္ဓေါဘုရာꩻ၊ မီႏစာႏနာႏနုဲး၊ ပေႏတင်ႏလိုႏ၊ ကရိုꩻနဝ်ꩻရာꩻ၊ ခုဲႏကျွꩻလွဉ်တဝ်း၊ ယံလွေꩻမွုန်းတ၊ ကန္တရတဖူꩻ၊ ယူႏဇနာႏအာဟွုန်ႏ၊ သွစ်ꩻမွုန်ႏလစ်ꩻရေင်၊ တခဝ်ညာꩻကတ်၊ ယပ်ꩻသꩻလယ်ႏရွုမ်ꩻ၊ တဗူႏကညာ၊ လစ်ꩻလာမꩻတွိုႏ၊ ရာဇဂြိုဟ်ႏခမ်း၊ ကေထံဖီလူꩻ၊ ရေႏဆူꩻသွီႏပူ၊ လုံးဆူႏထာꩻခြာ၊ တဗင်အစွူႏပြင်ꩻ၊ နပ်တောလိုꩻတွိုင်ꩻ၊ တလွေꩻနွိုင်ꩻတဝ်း၊ ငထဝ်းတဖူꩻ၊ ညာꩻယန်ယူဇနာႏ၊ မာႏယာႏပရိယာယ်ႏ၊ ရာဇာဟော်ခံꩻ၊ ခွန်တန်အငါ၊ ငဝ်းငွါလျောက်လဝ်း၊ ဩစဝ်းဩဗွေႏ၊ ယံဖေႏလွေꩻမွုန်း၊ ခွန်တန်ဟော်ခံꩻ၊ ကျောင်ꩻလမ်ꩻယံသေ၊ ပုဏ္ဏာꩻငဝ်းငွါ၊ ဆဿလဲင်ႏချင်ꩻ၊ မင်ꩻကြီꩻဟော်ခံꩻ၊ ခွေငဝ်းခွေငွါ၊ ထွာမုဲꩻနာꩻယို၊ ဖျက်ယားဗာႏကောင်း၊ ဟဲ့ꩻလောင်းလုလ္လင်ႏ၊ တောတွင်ꩻထာꩻခြာ၊ ပသာလွေꩻခန်း၊ ဆရာႏဗြဟ္မဏ၊ ဝစနပြန်ႏလဝ်း၊ ဩစဝ်းဩဗွေႏ၊ ပသာပုဲႏမွုန်း၊ ယွုန်းယောဒွိုန်းက၊ ဗြဟ္မဏပုဏ္ဏာꩻ၊ ယံဖေႏသယ်ꩻခံႏ၊ တောင်ꩻပြန်ႏငဝ်းငွါ၊ အမတ်ခါလဲ့၊ ထွို့ꩻထဲ့လင်ꩻခန်း၊ ဟော်တန်လဲင်ႏချင်ꩻ၊ တောႏတွင်ꩻတခြာ၊ ပသာခန်းဆူꩻ၊ မူꩻမတ်အငါ၊ ငဝ်းငွါမိန်းတောႏ၊ ဟော်ထာဟော်ခံꩻ၊ မာတန်တဖြာꩻ၊ ကညာဒေဝီ၊ မိဖြာꩻနဝ်ꩻ၊ ငဝ်းငွတောင်ꩻပြန်ႏ၊ ယံပသာမွုန်းဗွေႏ၊ တင်ꩻလုဲတကာႏ၊ မီႏသေမီႏဟွုန်၊ ခွန်စဝ်းဟော်ခံꩻ၊ ငမ်းဝင်ꩻကဲ့ꩻရဲ့ꩻ၊ သယ်ꩻခံꩻကဩ၊ ဟော်ခံꩻဟော်ထာ၊ သꩻဆာသꩻခိုး၊ ပိုမာလမ်းသား၊ ကညာဒေဝီ၊ နင်ꩻမိဘုရာꩻ၊ တခြာတန်ဖူꩻ၊ ထူႏလွေꩻပသာ၊ တခြာတန်ကို၊ လိုꩻယဉ်အရပ်၊ ပသာခန်းညာꩻညာꩻ၊ မိဘုရာꩻလမ်းထင်ႏ၊ ကျောင်ꩻလမ်ꩻထင်ႏသေ၊ ငဝ်းငွါလွေꩻလဝ်း၊ နင်ꩻတန်မိဖြာꩻ၊ ကညာဒေဝီ၊ တောကြီထာꩻခြာ၊ ပသာမွုန်းနုဲးဗွေႏ၊ ယံဖေႏသယ်ꩻခံႏ၊ သꩻထန်ႏနဝ်ꩻနေ၊ ထူႏလွေꩻပသာ၊ မိဖြာꩻသမ်းထင်ႏ၊ ပသာလင်ꩻခန်း၊ လဲဉ်းနဝ်ꩻအချာ၊ နင်ꩻမူႏဒေဝီႏ၊ မိဖြာꩻအပေႏ၊ ရိုႏသေႏလျောက်လဝ်း၊ ဩစဝ်းဩဗွေႏ၊ မီႏမဲဉ်ဖူးတွေ့မော့ꩻ၊ အဝ်ႏကော့ꩻအုံမောင်ꩻ၊ နောင်ႏတဘုရာꩻ၊ အာႏရောင်းအာႏရꩻ၊ ဗာႏသꩻစွိုးနုဲး၊ ထုဲႏပီနီဗွေႏ၊ ဟော်ထာဟော်ခံꩻ၊ အကျံႏနဝ်ꩻရာꩻ၊ ဖျက်ယားဒွိုန်းက၊ သွုန်ႏသꩻခိုးလျား၊ ယံမာꩻမွုန်းဩ၊ လိုꩻမော်လိုꩻဒါႏ၊ တရာꩻကျမ်ꩻဂန်ႏ၊ လိတ်တန်လုဲꩻကြီꩻ၊ အဝ်ႏမုဲꩻနီဗွေႏ၊ ကျိုꩻစာꩻဒွိုန်းက၊ နဝ်ꩻမꩻအီႏမော့ꩻ၊ အုံကော့ꩻအဝ်ႏမောင်ꩻ၊ နောင်ႏတဘုရာꩻ၊ အီႏမော့ꩻဗာႏနုဲး၊ ထုဲႏပီမောင်ꩻကော့ꩻ၊ ကျံႏရော့ꩻရော့ꩻမꩻ၊ မိဖြာꩻပေႏ၊ ထင်ႏလျောက်နဝ်ꩻမꩻ၊ သွုန်ႏသꩻခိုးလျား၊ ထိုꩻမားယေန်လင်ꩻ၊ နန်ꩻတွင်ꩻဟော်ကီ၊ အီႏမာꩻပီးမုဲꩻ၊ ခုဲႏသွုန်ႏခုဲႏသꩻ၊ နောင်ႏတမဉ်ထီႏ၊ ပန်ꩻကီꩻမဉ်မော့ꩻ၊ ကြောင်းကြပူႏဆာႏ၊ နဝ်ꩻခါကာလ၊ မတ်တန်တဖြာꩻ၊ ပဏ္ဍိသာရ၊ နာမဟဲ့ꩻဟောင်၊ ဟော်လောင်းဟော်ကီ၊ ပဏ္ဍိသာရအမတ်၊ လိတ်ဖတ်လဲ့ဒါႏ၊ လိမ္မာႏလက်ꩻလဲဉ်၊ ဉာဏ်ႏတွမ်ႏပညာႏ၊ အဋ္ဌာရသ၊ ရာဇဟော်ခံꩻ၊ ခွန်တန်အငါ၊ ငဝ်းငွါလျောက်လဝ်း၊ ဩစဝ်းဩဗွေႏ၊ ခွေသွဉ်းကသေ၊ စာပေကျံꩻဂန်ႏ၊ ထန်ႏလွဉ်နဝ်ꩻရာꩻ၊ ဗွေႏစဝ်းဟော်ထာ၊ မတ်နာႏစံꩻနော၊ နီဗွေႏဟော်ခံꩻ၊ မီႏထွာမဉ်ဝုဲႏ၊ ကိုꩻကွယ်ႏလူႏတန်ꩻ၊ ကန္တော့ꩻရိုႏသေႏ၊ ဗွေႏစဝ်းဘုရာꩻ၊ နဝ်ꩻရာꩻယံဖေႏ၊ နီဗွေႏရေႏမတ်၊ လူႏကပ်ရတနာႏ၊ ပျသာဒ်ဟော်ခံꩻ၊ တံꩻခွဉ်ႏတွမ်ႏထီꩻ၊ ဆီမီးတန်ဆောင်၊ လောင်ꩻသွမ်ꩻလောင်ꩻပန်ꩻ၊ သင်္ကန်ꩻသပိတ်၊ ပရိက္ခရာႏ၊ ကျက်သာႏဗွူဖေါင်း၊ ကဝ်ႏတောင်ꩻကဝ်ႏရွဉ်၊ ကဝ်ႏခံꩻကဝ်ႏထာ၊ တစွိုးတရေင်စီႏ၊ နွတ်ꩻနီꩻမီႏလ၊ နဝ်ꩻမꩻဓိဋ္ဌာန်ႏ၊ ကဝ်ႏတွမ်ႏဗွူဖေါင်း၊ ကတောင်လောင်းကီ၊ မဉ်ပူႏဇောႏဝုဲႏ၊ စူတဆီရွမ်းဗူႏ၊ ကတူႏကီအွဉ်ႏဒင်ႏ၊ ဝုဲႏထင်ႏသိုမ်ပေါက်၊ ငေါက်လင်ꩻသိုမ်ဆင်ႏ၊ သိုမ်ခြင်ႏထွူမꩻ၊ ယံဖေႏကျွꩻလွဉ်၊ အွဉ်ႏစွꩻဗွူဖေါင်း၊ ကတောင်လောင်းကီ၊ မဉ်ပူႏဇောႏဝုဲႏ၊ ကိုꩻကွယ်ႏဗာႏနုဲး၊ ထုဲႏပီသꩻအင်း၊ အမတ်ထင်ႏလဝ်း၊ နဝ်ꩻမꩻဟော်ခံꩻ၊ ထင်ႏဟွုန်ထင်ႏသေ၊ ပေႏသꩻလဲင်ႏချင်ꩻ၊ မဟာမင်ꩻကြီꩻ၊ သူရိ(ယ)စန္တာႏ၊ နဝ်ꩻမꩻကွဲရိုꩻ၊ နာꩻယိုလျောက်လဝ်း၊ ခွေစဝ်းအငါ၊ ငဝ်းငွါယိုနဝ်ꩻ၊ မွေးတဲဖေႏဝင်ꩻ၊ ခွေလဲ့နာႏသာႏ၊ ဟန်ႏလဲင်ႏယိုနဝ်ꩻ၊ ပဏ္ဍိသာရ၊ နာꩻရဲဉ်ꩻဖေႏခွေ၊ စွိုးနုဲးလိတ်ကို၊ နာꩻကရိုꩻနဝ်ꩻ၊ ဟဝ်ထွူအမတ်၊ ယံဖေႏကရဲဉ်ꩻ၊ ဝံꩻမျောက်ဝံꩻသာႏ၊ ငဝ်းငွါပုံႏစု၊ အပ်လို့အမတ်၊ ရွဉ်ခံꩻဥစ္စာႏ၊ ရတနာႏတွိုက်ဖူꩻ၊ ထူႏထန်ႏအပ်ဖေႏ၊ သꩻရေꩻဟွုန်ဟဝ်၊ နဝ်ꩻမꩻအမတ်၊ လိုꩻကတ်လိုꩻဒါႏ၊ ပဏ္ဍိသာရ၊ ဟဲ့ꩻစလိုꩻမော်၊ ဟော်ထာလောင်းကီ၊ ညီညာဖြွမ်းဝင်ꩻ၊ တွိုင်ႏပင်ႏကွဲမာꩻ၊ ပျသာဒ်ထာꩻခံꩻ၊ တံꩻခွဉ်ႏတွမ်ႏထီꩻ၊ ဆီမီးတန်ဆောင်၊ ကဝ်ႏတောင်ꩻကဝ်ႏရွဉ်၊ ကဝ်ႏခံꩻကဝ်ႏထာ၊ တသီးတနျာႏ၊ ကဝ်ႏဗွာကဝ်ႏသွမ်ႏ၊ ကဝ်ႏတွမ်ႏဗွူဖေါင်း၊ သင်္ကန်ꩻသပိတ်၊ ပရိက္ခရာႏ၊ ဖဝါႏတံꩻပူႏ၊ တစွိုးတရေင်စီႏ၊ နွတ်ꩻနီꩻနွုတ်ꩻနာꩻ၊ သေႏချာႏထွူမꩻ၊ ငဝ်းငွါဓိဋ္ဌာန်ႏ၊ အွဉ်ႏစွꩻဗွူဖေါင်း၊ ကတူႏလောင်းကီ၊ စူတဆီရွမ်းဗူႏ၊ ကတူႏကီအွဉ်ႏဒင်ႏ၊ စွိုးဆင်ႏရွှေကျာ၊ ပဒုမ္မာဗိုဟွမ်၊ ယံဖေႏဗွူဖေါင်း၊ မို့ꩻလောင်းကင်ဟဝ်၊ ယံဖေႏကျောင်ႏထင်ႏ၊ ဘုရာꩻသျင်ႏဗွေႏ၊ ယံဖေႏကျွꩻလွဉ်၊ နီခမ်းနီထီ၊ နီဝေင်ꩻနီဒုံ၊ စူနုံတဆီ၊ ကတူႏကီအွဉ်ႏဒင်ႏ၊ ခေါက်ဝုဲႏထင်ႏလွဉ်ꩻ၊ ဓိဋ္ဌာန်ႏငဝ်းငွါ၊ သစ္စာပန္နက်၊ ကျက်သာႏဗွူဖေါင်း၊ ကျောင်ႏထင်ႏမို့ꩻကီ၊ ပီနုဲးတမူ၊ ဝူꩻဝယ်ꩻငဝ်းသင်ႏ၊ စွိုးဆင်ႏခံꩻခြွိုင်း၊ လိုꩻဝေင်ꩻစွော့ꩻရောင်၊ ကျောင်ႏသဲင်ꩻထေ့စူꩻ၊ လိုꩻလူꩻအဗွေႏ၊ ဝေနေယျအဖါ၊ ရာဇဂြိုဟ်ႏခမ်း၊ ဇေတဝန်ႏကျောင်ꩻ၊ ဖြောင်းခံꩻဖြေꩻထာ၊ အငါအသောင်၊ ဗွူဖေါင်းတွမ်ႏကဝ်ႏ၊ ဖျော်လွဉ်ဖြရွစ်၊ နီဗွေႏဘုရာꩻ၊ အငါအသောင်၊ ဇေတဝန်ႏကျောင်ꩻကီ၊ နီဗွေႏဘုရာꩻ၊ မဲ့သဲင်နားခံꩻ၊ ကြည့်ရှုဉာဏ်ႏတောႏ၊ ပါမုဲꩻနောဝွေꩻ၊ ဝေနေယျသတ္တဝါႏ၊ ဗြဟ္မာႏလိုꩻလူꩻ၊ မူႏခိုကိုꩻကွယ်ႏ၊ မဉ်ခေါက်ဝုဲႏခွေ၊ ဗွေႏစဝ်းဘုရာꩻ၊ ထွားရှုဉာဏ်ႏတောႏ၊ နဝ်ꩻမꩻကွဲထီႏ၊ ထီကျိုꩻပြက်ꩻကွဉ်ႏ၊ သုဝဏ္ဏဘူမိ၊ သူရိ(ယ)စန္တာႏ၊ မဟာႏမင်ꩻကြီꩻ၊ နောင်ႏတမဉ်ထီႏ၊ ပန်ꩻကီꩻမဉ်မော့ꩻ၊ ညီနောင်တဖူးဝေး၊ မဉ်လꩻမဉ်ထီႏ၊ ခမ်းဟဝ်နိဗ္ဗာန်ႏ၊ ဝေင်ꩻခံꩻဝေင်ꩻထာ၊ ချမ်ꩻသာႏသုခ၊ အီႏလꩻအီႏတွိုႏ၊ မဂ်ဖိုလ်ႏနိဗ္ဗာန်ႏ၊ ဟန်ႏသနီꩻယို၊ ထီကျိုပြက်ꩻကွဉ်ႏ၊ ဗွန်ထိုဘုံႏကြီꩻ၊ နဝ်ꩻမꩻထီႏဖြို၊ ခွန်ပိုမင်ꩻသာꩻ၊ ရာဇာဟော်ခံꩻ၊ သူရိ(ယ)စန္တာႏ၊ မဟာႏမင်ꩻကြီꩻ၊ နောင်ႏတမဉ်ထီႏ၊ ပန်ꩻကီꩻမဉ်မော်၊ အဝ်ႏကော့ꩻအဝ်ႏမောင်ꩻ၊ နောင်ႏတခွေဘုရာꩻ၊ သဒ္ဓါႏမဉ်ဝုဲႏ၊ မဉ်ကိုꩻကွယ်ႏလူႏ၊ အဝ်ႏမောင်ꩻဆွုမ်ႏခွေ၊ ညထွူခိင်ႏမꩻ၊ အဝ်ႏထွားဆွုမ်ႏခွေ၊ မဉ်နေးမဉ်နာႏ၊ ခွေဗွေႏဘုရာꩻ၊ တရာꩻစာႏပေႏ၊ လဲင်ꩻလꩻစွဉ်ႏထွူ၊ လစ်ꩻဆီငတ်ꩻနီꩻ၊ ထာꩻမီလဲင်ꩻရံꩻ၊ ထာꩻအံႏလဲင်ꩻကုဲ၊ ခင်မှာဖေႏဝင်ꩻ၊ ခွန်ပိုဝွေꩻဆူꩻ၊ ခွေမီႏတကျွꩻတဝ်း၊ နောင်ႏရာႏခင်မာႏ၊ ခန္ဓာႏအီႏပြောင်ꩻ၊ မွူးထန်ႏဟော်ခံꩻ၊ ဝင်ꩻနီဖူးဝေး၊ စဝ်းခွန်အဝ်ႏမောင်ꩻ၊ အုံအဝ်ႏနောင်ႏတ၊ ခွေမီႏကျွꩻမꩻ၊ ရာဇဟော်ထာ၊ သူရိ(ယ)စန္တာ၊ ခန္ဓာႏအီႏမွန်၊ ထွားထီႏစဲင်းစဲ့၊ မဲ့သဲင်ဉာဏ်ႏခံꩻ၊ သယမ္ဘူတာ၊ သစ္စာဉေယျ၊ လꩻလို့သေဖြောင်၊ ဘုရာꩻပဉ္စဝ်း၊ ငဝ်းငွါမိန်းတောႏ၊ ဟော်ꩻဖေႏရဟန္တာႏ၊ သာရိပုတ္တရာႏ၊ အာနန္တာႏသျင်ႏ၊ ဖြောင်းခံꩻဖြေꩻထာ၊ သေႏချာႏထွူတဲင်၊ ဟန်ႏလဲင်ႏခါယို၊ အီႏကာအီႏကျွꩻ၊ ဟဲ့ꩻစပါတွမ်ႏ၊ ဖူးမောင်ႏအာနန်၊ ဟန်ႏလဲင်ႏခါယို၊ ထီကျိုဖဲ့ꩻကွဉ်ႏ၊ အီႏကျွꩻလွေꩻစူꩻ၊ သုဝဏ္ဏဘူမိ၊ သူရိ(ယ)စန္တာႏ၊ မဟာႏမင်ꩻကြီꩻ၊ ထီကျိုပြက်ꩻကွဉ်ႏ၊ သူရိ(ယ)စန္တာႏ၊ ရာဇာဟော်ခံꩻ၊ ပွိုးကကီညိုႏ၊ မဉ်မီခိုႏခွဗ၊ ဝွေꩻဆူꩻထစ်အွိုး၊ မွိုးနန်းစခါ၊ မေတ္တာႏအဝ်ႏဖူꩻ၊ ဝွေꩻဆူꩻတွမ်ႏခွေ၊ ကေꩻဇူꩻဝါႏသနာႏ၊ အယေန်ႏပါမꩻ၊ ကာလငခါ၊ သဒ္ဓါကီညိုႏ၊ ရိုႏသေႏကိုႏယံ၊ မဉ်လူႏတန်ꩻခွေ၊ ဝွေꩻဆူꩻခင်ႏလမ်း၊ စထစ်မွိုးနန်း၊ ပီယဒဿီ၊ ဘုံႏကီꩻဘုရာꩻ၊ ဗျာဒိပ်ဟာငသေꩻ၊ ဖေႏဝင်ꩻနဝ်ꩻမꩻ၊ သဲင်ꩻလꩻသဲင်ꩻထွာ၊ ဌာနရပ်ဆူꩻ၊ ထွာခူꩻထွာဝေင်ꩻ၊ ခွေမီႏလွေꩻတွိုႏ၊ ဌာနရပ်(ဆူꩻ)၊ အီႏသွင်ꩻသေꩻဗာႏ၊ ဌာပနာဓာတ်တောႏ၊ တစွိုးစွိုးမꩻ၊ မီႏတွိုႏဆုဲꩻချာ၊ သာသနာႏအီႏတယ်ႏ၊ စယ်ႏပင်ႏကွိုတဝ်း၊ ပွိုးပီးနဝ်ꩻမꩻ၊ အီႏကျွꩻကာဗာႏ၊ နဝ်ꩻခါကာလ၊ လောကမန်ႏကင်ꩻ၊ တရာꩻမင်ꩻမျတ်၊ ပရိသတ်တင်ꩻလုဲ၊ ကထင်ႏဟွုန်တဲင်၊ နေးတွမ်ႏစူနုံ၊ လုံးစုံတဆီ၊ ကတူႏကီအွဉ်ႏဒင်ႏ၊ ဝုဲႏထင်ႏလျောက်လဝ်း၊ ဩစဝ်းနီဗွေႏ၊ ဝေနေယျအဖါ၊ ငဝ်းငွါတောင်ꩻပြန်ႏ၊ နီဗွေႏဘုရာꩻ၊ မီႏထွာကျွꩻလွေꩻ၊ ကျိုꩻတန်ပြက်ꩻကွဉ်ႏ၊ သုဝဏ္ဏဘူမိ၊ မွူးထန်ႏဟော်ခံꩻ၊ သူရိ(ယ)စန္တာႏ၊ နဝ်ꩻရာꩻနီဗွေႏ၊ အီႏအွဉ်ႏကုဲသေꩻ၊ ဖေႏဗာႏဓာတ်တောႏ၊ ကရိုꩻနဝ်ꩻကောင်း၊ အလောင်းမဉ်သေ၊ လဝ်းရီဗွေႏဩ၊ နဝ်ꩻမꩻဗွေႏဘုရာꩻ၊ အွိုးနောတကာႏ၊ ရာဇာဟော်ခံꩻ၊ အွဉ်ႏကုဲထွိုက်နေႏ၊ ဖေႏဝင်ꩻကွိုတဝ်း၊ ငဝ်းငွါမိန်းတောႏ၊ ဟော်ဖေႏဟော်ခံꩻ၊ ဗိမ္ဗိသာရမင်ꩻ၊ ထင်ႏဟွုန်ထင်ႏသေ၊ သꩻရေꩻဟွုန်ဟဝ်၊ ငဝ်းငွါသာႏဓု၊ နုမောဒနာႏ၊ နဝ်ꩻခါထင်ႏဟွုန်၊ ခွန်ဖီသိကျာꩻ၊ ဗြဟ္မာႏတနံ၊ အာႏရꩻဝံꩻသာႏ၊ နဂါဂဠုန်ႏ၊ ကုမ္ဘန်ႏယက္ခ၊ တရတပါꩻ၊ စဝ်းသီကျာꩻမင်ꩻ၊ ထင်ႏဟွုန်ထင်ႏသေ၊ နီဗွေႏဘုရာꩻ၊ မီႏထွာကျွꩻလွေꩻ၊ အွဉ်ႏကုဲသေꩻဗာႏ၊ ကိုႏစာꩻဓာတ်တောႏ၊ တစွိုးစွိုးနဝ်ꩻ၊ နီသွဉ်းသီးလဲ့၊ မဲ့မဲ့စွုမ်ႏစွုမ်ႏ၊ ယံဖေႏဝုဲႏဗာႏ၊ ဘုရာꩻသျင်ႏဗွေႏဩ၊ မွေးတောႏဓာတ်တောႏ၊ ရော့ꩻဟဝ်ငါႏနော၊ လောင်ꩻစဝ်းသီးယာ၊ ငဝ်းငွါတွိုင်ႏပင်ႏ၊ လွဝင်ꩻကွိုတဝ်း၊ လျောက်လဝ်းဘုရာꩻ၊ သာႏသနာႏတောႏ၊ ကျောႏဟိုးဟိုင်ဟင်၊ သင်္သရာႏနမ်းငါ၊ မီႏထွာကတယ်ႏ၊ အွဉ်ႏကုဲသာႏသနာႏ၊ နမ်းငါပိုလီꩻ၊ ဝွေꩻသီးလက်ထက်၊ သွုပ်ဆက်တောတော၊ လွေꩻလွနောတကာႏ၊ အခွင်ꩻညာတ၊ အွဉ်ႏစွꩻကွိုတဝ်း၊ ဗွေႏစဝ်းဘုရာꩻ၊ တွမ်ႏသင်္ဃာႏဖုံႏ၊ ကွဉ်ရုံႏသင်္ကန်ꩻ၊ လစ်ꩻသဲဉ်ဗွေဗွေ၊ တနံသိကျာꩻ၊ ဗြဟ္မာႏလိုꩻလူꩻ၊ မူႏခိုဖြားဆား၊ ယောက်ျားမိမ္မ၊ ဗွေလꩻသွစ်ꩻသဲဉ်၊ ထွေရဲဉ်ႏကျွꩻကာ၊ သာႏသာႏယွယွ၊ ကောဇာဒီဃ၊ မူလသက္ကရာဇ်၊ လꩻမန်ႏတရျာꩻ၊ သာလွိုတဆီ၊ လွိုတကီတဗာႏ၊ လာနဝ်ꩻသတင်ꩻကျွစ်၊ လောင်းလꩻတနီꩻ၊ နားရီႏခိန်ႏခါႏ၊ မွူးနီꩻကျာႏသပတေꩻ၊ ထာꩻလဲ့လေစဝ်း၊ ဆꩻကွဉ်ႏပြုဗ္ဗာႏ၊ အာႏရုံႏထန်ႏလွဉ်၊ ဆꩻကွဉ်ႏလေဗွာ၊ ယူးဝါးဖြေင်ꩻဦႏ၊ သူႏသူႏသာႏသာႏ၊ နီဗွေႏဘုရာꩻ၊ ခါလဲ့အီႏကျွꩻ၊ ကာလနဝ်ꩻခါ၊ အနာထပိဏ်ႏ၊ အဝ်ႏဆဝေင်ꩻဖူꩻ၊ ရဲဉ်ꩻစူꩻသွမ်ꩻပန်ꩻ၊ အွꩻအံႏဘုဉ်ꩻပေႏ၊ သေႏချာႏထွူယဝ်း၊ ဗွေႏစဝ်းဘုရာꩻ၊ ကျွꩻကာလင်ꩻကျောင်ꩻ၊ ရောင်ႏတောႏသူသွယ်၊ အံႏခွယ်ꩻအံႏဖြာႏ၊ တလို့ဒါႏတဝ်း၊ ပဉ္စဝ်းဘုရာꩻ၊ ဥပမာႏစွိုးနုဲး၊ ထုဲႏပီမွူးလာ၊ ဆချာသင်္ဃာႏ၊ ရဟန္တာႏရံႏလွဉ်ꩻ၊ လိုꩻဒုံကစ၊ ဖြွမ်းလွညီႏညာႏ၊ ဆချာရံႏလွဉ်ꩻ၊ ဘုရာꩻတံꩻခိုꩻ၊ လူꩻလိုꩻဗြဟ္မာႏ၊ ဆချာထွေလွဉ်ꩻ၊ ကအီႏသောင်ခြင်ꩻ၊ ပင်ႏပန်ꩻရွိုးလွား၊ ခိုးလျားထီဒဲဉ်၊ အဲဉ်ထဝ်းဖြီႏဖြီႏ၊ ပကတိသာႏယာႏ၊ ထွားလွေꩻတဖူꩻ၊ ပီနုဲးပါꩻသဲ့ꩻ၊ ကြေင်းကြဲ့စင်ကြောင်း၊ ထောင်လွေꩻသာႏယာႏ၊ ပီနုဲးပါꩻဒါသုဲꩻ၊ ကြုဲဟဝ်ကြေင်းကြဲ့၊ တမဲ့သꩻဖြေ၊ သေင်ႏဗေသေင်ႏဆျာႏ၊ တလာတယံꩻ၊ စံႏဖြီတဒွီ၊ တသီတအပ်၊ မက်လွစ်မက်မွန်ႏ၊ ပူႏသွင်ꩻစံႏဖြီ၊ တဝီးရင်ႏရာႏ၊ ခါလဲ့ပြန်ꩻပြော်ꩻ၊ လွိုင်ႏပေါ်ကူစွိုး၊ အွီႏနွိုးဆျာႏခါႏ၊ စခန်ꩻသာႏဟဝ်၊ အုံအဝ်ႏပဆား၊ လွားရွိုးစူခင်ႏ၊ တခြင်ꩻဗာႏတဝ်း၊ ဗွေႏစဝ်းဘုရာꩻ၊ အဗွန်တံꩻခိုꩻ၊ လိုꩻကောလွေꩻလွဉ်ꩻ၊ တနံသိကျာꩻ၊ ရဟန္တာႏကစ၊ သုဝဏ္ဏခမ်း၊ လစ်ꩻဆီငတ်ꩻနီꩻ၊ နားရီႏခိန်ႏခါႏ၊ ကောဇာသက္ကရာဇ်၊ လꩻမန်ႏတရျာꩻ၊ သာလွိုတဆီ၊ လွိုတကီတဗာႏ၊ နတ်တောႏလမမျတ်၊ ဆန်ꩻစတနီꩻ၊ မွူးနီစနေႏကူ၊ သူရိယာမွူးထန်ႏ၊ ဆꩻကွဉ်ႏကောင်နာ၊ ဖျောဝ်တွိုႏရွစ်ဖြ၊ သုဝဏ္ဏဘုမ္မိ၊ ရွှေထုံခမ်းတန်၊ ဟဲ့ꩻဖန်နာမ၊ ကာလနဝ်ꩻခါ၊ ဆငါသုဝဏ္ဏ၊ မြို့မလိုꩻဝေင်ꩻ၊ နီဗွေႏဘုရာꩻ၊ ကျွꩻကာဖျော်လွဉ်၊ ဝံꩻမျောက်ဝံꩻသာႏ၊ ပငါပရင်ꩻ၊ နင်ꩻနင်ꩻမောင်ႏမောင်ႏ၊ လဝ်းရောင်ချာငါ၊ ဖါဖါမွိုးမွိုး၊ သွိုꩻသွိုꩻသွင်ႏသွင်ႏ၊ လောႏထင်ꩻလောႏနဝ်၊ လွေꩻထွားရပ်ဆွုမ်ႏ၊ ကြုဲလောင်းတဖူꩻ၊ မူႏမူႏခိုခို၊ ကိုစီကိုငှ၊ သꩻရေꩻဟွုန်ဟဝ်၊ ငဝ်းငွါဟဲ့ꩻဟောင်၊ မူႏမောင်ႏပိုလီꩻ၊ ဖူဖီမွိုးဖါ၊ ဘုရာꩻကျွꩻလွဉ်၊ ထိုမ်ႏခြဝ်ထူႏထီ၊ ကီကီခိုႏခိုႏ၊ လိုꩻတဝေင်ꩻလိုမ်း၊ လွဉ်ရောင်အုံးအုံး၊ ပီထွိုင်းဖီးအွာ၊ ပငါပရင်ꩻ၊ မောင်ႏနင်ꩻခိုမူႏ၊ ရဲဉ်ꩻလူႏရဲဉ်ꩻတန်ꩻ၊ နမ်းမန်ꩻဆီမီး၊ ထီꩻတွမ်ႏတံꩻခွဉ်ႏ၊ ကဝ်ႏသွမ်ႏကဝ်ႏဗွာ၊ ကဝ်ႏတနျာႏကဝ်ႏတသီး၊ အီလွဉ်ရပ်ဆွုမ်ႏ၊ နီဗွေႏဘုရာꩻ၊ ရာဇဟော်ခံꩻ၊ သူရိ(ယ)စန္တာႏ၊ မဟာမင်ꩻကြီꩻ၊ ဝင်ꩻနီတဖူးဝေး၊ အာႏရꩻဝံꩻသာႏ၊ စေတနာစွုမ်းကတ်၊ ပီတိသောမနဿ၊ အာႏရꩻဟွုန်ဟဝ်၊ ငဝ်းငွါခီႏမွမ်ꩻ၊ အံႏအော်ꩻအံႏဖြာႏ၊ ဘုရာꩻပဉ္စဝ်း၊ သတင်ꩻငဝ်းငွါ၊ လဲင်ꩻကျောႏလဲင်ꩻကျာꩻ၊ တိုးတစွစ်ꩻစဲစ်ꩻ၊ ဟွုန်ရွစ်ဖေႏဝင်ꩻ၊ အရောင်ႏတင်ႏနုဲး၊ ထုဲႏပီမေႏရောင်ႏ၊ ယုဂန်ႏကောင်နာ၊ မွူးလာနီဗာႏ၊ တကာႏတဝ်းနော၊ ဟော်ခံꩻထီႏဆွုမ်ႏ၊ နီဗွေႏဘုရာꩻ၊ ကိုႏဝါကိုႏရောင်ႏ၊ လေတောင်ႏတဆဝ်၊ ကဝ်ႏတွမ်ႏဗွူဖေါင်း၊ ကတောင်ကတူႏ၊ အွဉ်ႏဒင်ႏလူႏတန်ꩻ၊ ကန္တော့ꩻပူႏဇောႏ၊ ဟော်ခံꩻပိုခို၊ ငွိုးတဖေါ့လင်ꩻ၊ နီဗွေႏဘုရာꩻ၊ ခင်ႏယာꩻခင်ႏခိုႏ၊ ဟောင်ရိုꩻနာမ၊ သုဓမ္မရာဇာ၊ ခါလဲနေးတွမ်ႏ၊ ထီဟွမ်နံႏသာႏ၊ အွဉ်ႏဟွာႏဆူဖေႏ၊ နီဗွေႏဘုရာꩻ၊ ခင်ႏယာꩻနီ၌င်၊ ခင်ႏသဲင်ခင်ႏခံꩻ၊ ခွန်တန်ပိုခို၊ ငွိုးတဖေါ့လင်ꩻ၊ နီဗွေႏဘုရာꩻ၊ ခင်ႏယာꩻနီပင်၊ တအင်လဲင်ꩻစဝ်ႏ၊ ဗွေႏစဝ်းခင်ႏခိုႏ၊ ငွိုးမဲ့ထူးမဲ့ထီ၊ သီပေႏလင်ꩻခန်း၊ တစိုးတန်တန်၊ သေနမ်းဒွုမ်တဝ်း၊ ဗွေႏစဝ်းဘုရာꩻ၊ ခင်ႏယာꩻခင်ႏခိုႏ၊ ခွန်ပိုရာဇာႏ၊ သုဓမ္မာႏဟော်ခံꩻ၊ တဖေင်ꩻနမ်းကဝ်ႏ၊ နဝ်ꩻမꩻသိကျာꩻ၊ သုဓမ္မာယို၊ ပွိုးစွဉ်ႏနစ်သက်၊ စုံမက်လွဉ်ꩻငါႏ၊ သဒ္ဓါႏစွုမ်ႏကတ်၊ ပီတိသောမနဿ၊ သꩻဝꩻသီပေႏ၊ ဒေဝါႏသိကျာꩻ၊ ထင်ႏထွားထင်ႏထီႏ၊ နေးတွမ်ႏထီဟွမ်၊ သော့ꩻတွမ်ႏဝန်ႏခံꩻ၊ စန္ဒကူꩻနံႏသာႏ၊ ဆူယွာဖေႏမꩻ၊ သုဓမ္မရာဇာ၊ သေယားအနမ်း၊ စံႏလယ်ႏချာငါ၊ ဗွေႏစဝ်းဘုရာꩻ၊ အဝ်ႏဒွါနေမကောင်း၊ ကျွꩻတောလဲဉ်းမကောင်း၊ စံႏထွားထိုမ်ႏလတ်၊ ခေါက်ဝုဲႏရိုႏသေႏ၊ ထင်ႏသေထင်ႏထီႏ၊ နီဗွေႏဘုရာꩻ၊ အဝ်ႏနေနဝ်ꩻမꩻ၊ ဗွေႏစဝ်းဘုရာꩻ၊ ငဝ်းငွါမိန်းတောႏ၊ ဟော်ꩻဖေႏတရာꩻ၊ သုဓမ္မာရာဇာ၊ တကာႏဟော်ခံꩻ၊ ယံမာꩻသတိတိ၊ မိမိနမ်းကဝ်ႏ၊ ယိုယွင်ꩻတဝ်းနော၊ ဟော်ခံꩻပိုခို၊ ရိုႏသေႏအုံအဝ်ႏ၊ ဗွောင်ႏခန်းပန်ꩻကုံꩻ၊ ကတူႏလောင်းကီ၊ လူႏတန်ꩻနီဗွေႏ၊ အစိန္တေယျ၊ ခါလဲ့ရပ်ဆွုမ်ႏ၊ သုဓမ္မရာဇာ၊ တကာဟော်ခံꩻ၊ ယံဖေႏသွင်ꩻသꩻ၊ ဆုမ္မသွဉ်နယ်၊ တင်ꩻလုဲတကာႏ၊ သတ္တဝါႏအမျိုꩻ၊ ကရိုꩻနဝ်ꩻရာꩻ၊ ဖြားဆားပေႏတန်၊ နန်ꩻကတ်နောနီ၊ မူႏခိုပေႏတန်၊ အီႏတော်အီႏညာႏ၊ သာႏသနာႏလဲ့၊ မဲ့နားနန်ꩻဟွုန်၊ နန်ꩻထီႏနန်ꩻသေ၊ နန်ꩻလေနန်ꩻစဲင်း၊ အီႏထွာသဲင်ꩻလိုꩻ၊ ရိုꩻလဲ့နန်ꩻကတ်၊ ကံႏထွာငကီလိုꩻ၊ အီႏထီႏအီႏမော့ꩻ၊ ခွေဘုရာꩻသာႏသနာႏ၊ ခါလဲ့နန်ꩻအဝ်ႏ၊ ယိုနဝ်ꩻငခါ၊ သဲင်ꩻညာထွာလိုꩻ၊ ဗွန်ုကုသိုလ်ႏကံႏ၊ ခြွီလီꩻသန်မꩻ၊ သဲင်ꩻမော့ꩻထီႏဗာႏ၊ ဘုရာꩻအနမ်း၊ ဒီဟဝ်သွဉ်သင်၊ ဆုမ္မနမ်းကဝ်ႏ၊ ဗွေႏစဝ်းဘုရာꩻ၊ ငဝ်းငွါမိန်းတောႏ၊ ဟော်ဖေႏခွန်ပို၊ သုဓမ္မရာဇာ၊ ငဝ်းငွါအွီႏနွိုး၊ စွိုးနုဲးခွန်သင်၊ ကရဝိက်ဟင်္သာႏ၊ သာႏယာႏလိလံ၊ နွုမ်ꩻဟွမ်နွုမ်ꩻနွိုး၊ ဖြောင်းထာဖြေꩻခံꩻ၊ ဟော်ꩻထန်ႏငသေꩻ၊ ပေႏလာႏအလောင်း၊ တောင်ႏမာꩻငဝ်းငွါ၊ လွဉ်ဗာႏပီးနဝ်ꩻ၊ ဟဝ်မတ်ဒီတောင်ꩻ၊ လွဝင်ꩻကွိုနဲး၊ ကျောင်ꩻတကာႏသီးယာ၊ တဖုံႏတဉ်ဟွေး။

ပွိုးပီးနဝ်ꩻမꩻ၊ ဗွေႏစဝ်းဘုရာꩻ၊ ကျွꩻကာသဲင်ꩻစူꩻ၊ သုဝဏ္ဏခမ်း၊ ခွန်တန်မင်ꩻကီꩻ၊ ထင်ႏထီႏထင်ႏသေ၊ နီဗွေႏဘုရာꩻ၊ စေတနာႏသꩻ၊ အာႏရꩻနစ်သက်၊ မဉ်ဖဒွုမ်တဝ်း၊ ဗွေႏစဝ်းဘုရာꩻ၊ ခြေတော်ခင်ႏထျꩻ၊ ဦးချရိုႏသေႏ၊ နီဗွေႏဘုရာꩻ၊ ငဝ်းငွါတောင်ꩻပြန်ႏ၊ ကျွꩻတောမွုန်းတဝ်း၊ ဩစဝ်းဩဗွေႏ၊ ဇေႏတဝွန်ႏကျောင်ꩻ၊ ခွေသွဉ်းစီႏမံႏ၊ တိတ်ꩻခံꩻသူႏသီ၊ လူႏတန်ꩻနီဗွေႏ၊ ပစ္စေꩻလစ်ꩻပါꩻ၊ ခါလဲ့ခွေသွဉ်း၊ ထောက်ပံ့လူႏတန်ꩻ၊ ခွေသွဉ်းခံႏတကာႏ၊ စွုမ်ႏဟာစွုမ်ႏဟရဝ်ꩻ၊ ဗွေႏစဝ်းဘုရာꩻ၊ သညင်ꩻခွေသွဉ်း၊ နေးခံႏသုံꩻဆောင်ႏ၊ ကျောင်ꩻထာကျောင်ꩻခံꩻ၊ ဆောက်တယ်ႏသော့ꩻဗာႏ၊ တဆီငတ်ꩻဗွေႏဩ၊ ကျွꩻတောမွုန်းတဝ်း၊ အုံရဝ်းအဝ်ႏညီꩻ၊ ခွေသွဉ်းသီးခမ်း၊ ယံဖေႏပသာ၊ မေတ္တာႏထီဟွံ၊ အွꩻအံႏဘုဉ်ꩻပေႏ၊ ခွေသွဉ်းဒဲဉ်သွမ်ꩻ၊ ခွေသွဉ်းလုပ်ကျွေး၊ ရိုႏသေႏလျောက်လဝ်း၊ နဝ်ꩻမꩻဘုရာꩻ၊ ဖြောင်းထာဖြေꩻခံꩻ၊ သမ်းမိန်းတောႏမူႏ၊ သူရိ(ယ)စန္တာႏ၊ တကာႏခွန်ဟွေး၊ ဇေတဝွန်ႏကျောင်ꩻ၊ ကျံႏပေါင်ရဲဉ်ꩻဆို့ꩻ၊ လူႏတန်ꩻပုဲထ၊ မီႏထွာသအဝ်ႏ၊ နဝ်ꩻရာꩻဟော်ခံꩻ၊ မဉ်ကိုꩻကွယ်ႏခွေ၊ ဆို့ꩻဖေႏသွော့ကောင်း၊ ကျောင်ꩻဝါႏပေႏနဝ်ꩻ၊ ခွုင်းကားခမ်းသဲင်၊ နီသိုမ်လစ်ꩻလာ၊ နဝ်ꩻရာꩻခွေအုံ၊ သတင်ꩻသုံꩻသော့ꩻ၊ ဆို့ꩻလူႏအာတ၊ ဌာနရပ်ယို၊ ပွိုးစွဉ်ႏဘုရာꩻ၊ စခါမွိုးနန်း၊ ကထွာခွေဝေး၊ ဆောက်တယ်ႏဖူꩻတဝ်း၊ ဝါႏဆိုႏနဝ်ꩻမꩻ၊ ခွေခါရိုꩻလဲ့၊ တဆိုႏဗာႏတဝ်း၊ တကာႏဟော်ခံꩻ၊ ခွန်တန်လဲ့ခါ၊ ထင်ႏသေထင်ႏဟွုန်၊ ဝံꩻမျောက်ဝံꩻသာႏ၊ ဟွုန်ဟဝ်အာႏရꩻ၊ ဟဲ့ꩻစမူꩻမတ်၊ စာႏဖတ်စာႏရေꩻ၊ ပေႏတန်ဖြားဆား၊ ယံဖေႏအီလွဉ်၊ မီꩻတွမ်ႏသေင်ႏဝါႏ၊ ကျိုꩻစာꩻဖြွမ်းလွ၊ ကိုငကိုစီ၊ မီꩻတွမ်ႏဝါႏသာ၊ ငါကျံႏဆို့ꩻကျောင်ꩻ၊ ဖြောင်းခံꩻဖြေꩻထာ၊ ဘုရာꩻပဉ္စဝ်း၊ ငဝ်းငွါသမ်းရီ၊ မင်ꩻကြီꩻဟော်ခံꩻ၊ သူရိ(ယ)စန္တာႏ၊ တကာႏတန်ဟွေး၊ ဌာနခင်ႏလမ်း၊ ကျောင်ꩻခင်ဟံႏဟဝ်၊ အဝ်ႏထာꩻဆမုဲꩻ၊ အီႏရဲဉ်ꩻအီႏဆို့ꩻ၊ ဇေတဝွန်ႏကျောင်ꩻ၊ ဖြောင်းခံꩻဖြေꩻထာ၊ ငဝ်းငွါထင်ႏရီ၊ စူတဆီရွမ်းဗူႏ၊ ကတူႏကီအွဉ်ႏဒင်ႏ၊ ဝုဲႏထင်ႏလျောက်လဝ်း၊ ဩစဝ်းဩဗွေႏ၊ ခွေသွဉ်းခင်ႏလမ်း၊ ဟော်ခံဆနဝ်၊ ဟံႏဟဝ်ဟံႏသန်၊ ခွေသွဉ်းငကျံႏ၊ ဆို့ꩻရဲဉ်ꩻအွိုးနဝ်၊ လျောက်လဝ်းရိုႏသေႏ၊ နီဗွေႏဘုရာꩻ၊ ဖြောင်းထာꩻဖြေꩻခံꩻ၊ သမ်းမိန်းတောႏမူႏ၊ ဟဝ်နဲတကာႏ၊ ဌာနရပ်ယို၊ ဆို့ꩻအာသွော့ကောင်း၊ ကျောင်ꩻတကာႏသီးယာ၊ သꩻသီးလျာတွာ၊ တကာႏဟော်ခံꩻ၊ သူရိ(ယ)စန္တာႏ၊ အီႏငရဲဉ်ꩻဆို့ꩻ၊ စတုလောကပါလာ၊ သိကျာꩻတနံ၊ ဝတိံသာႏခမ်းကီ၊ လွဉ်းလင်ꩻလိုꩻခမ်း၊ မာꩻနမ်းလက်သမာꩻ၊ ကျောင်ꩻထာကျောင်ꩻခံꩻ၊ တနံသိကျာꩻ၊ ဖန်ဆင်ꩻမာꩻဖေႏ၊ ဇေတဝွန်ႏကျောင်ꩻထာ၊ အနာတင်ႏထီꩻ၊ စီႏသဲင်ကင်းဆေင်ႏ၊ အလုဲꩻတခြယ်၊ ပတ်လယ်အသောင်၊ ကဝ်ႏတောင်ꩻကဝ်ႏတင်ႏ၊ အင်းချင်းတလာ၊ ယင်မာကံႏကောႏ၊ စွယ်ႏတောႏကဝ်ႏဟာ၊ စံပါပန်းချီ၊ တလီꩻထိုꩻအီ၊ လွီးဟွမ်ဟွိုင်းဟွိုင်း၊ အွိုင်းအွိုင်းမွန်းပျောႏ၊ ကျောင်ꩻတောႏလောင်းကီ၊ သိကျာꩻတနံ၊ ဟွုန်ဟဝ်ဝံꩻသာႏ၊ မရဖင်ꩻထုတ်လျောက်၊ တဲမ်းတောက်လုဲꩻထန်ႏ၊ မန်ႏကင်ꩻစီႏသဲင်၊ ကဝ်ႏထဲင်ꩻကဝ်ႏလာႏ၊ ပတ္တမျာꩻသဲင်လဝ်၊ တဆဝ်လေတောင်ႏ၊ အရောင်ႏတန်နုဲး၊ ထုဲႏပီမွူးလာ၊ ကျောင်ꩻထာကျောင်ꩻခံꩻ၊ မွိုးနန်းစခါ၊ ရာဇာခွန်လောင်ꩻ၊ ဟောင်ရိုꩻဟဲ့ꩻဗာႏ၊ သူရိ(ယ)စန္တာႏ၊ မဟာႏမင်ꩻကြီꩻ၊ အစိုးအပန်၊ တနံသိကျာꩻ၊ ဗြဟ္မာႏခွန်သင်၊ ခီႏမွမ်ꩻအံႏဖြာႏ၊ တလို့ဒါႏတဝ်း၊ ဟော်ခံꩻလက်ထက်၊ နတ်တနံသိကျာꩻ၊ အံႏဖြာႏအံႏဪ၊ ကျောင်ꩻတောႏထာခံꩻ၊ အရံႏအထောင်၊ ကျောင်ꩻတောႏလောင်းကီ၊ သူႏသီသူႏရန်ꩻ၊ တိတ်ꩻခံꩻတိတ်ꩻထာ၊ အလျှာအကင်း၊ သင်ႏဝင်ႏအယ်ခံꩻ၊ ကမ္ဗလာမန်ႏအိမ်ႏ၊ တန်ထိန်ဖါကင်း၊ သင်ဖြူးလမ်းဒါ၊ ကူႏထာကူႏခံꩻ၊ နမ်းသုပ်ထွေအင်ႏ၊ သင်္ကန်ꩻသပိတ်၊ ပရိက္ခရာႏ၊ ဖဝါႏတံꩻပူႏ၊ ပြဲ့ꩻစုံႏထွူမꩻ၊ လူႏကပ်နီဗွေႏ၊ ဝေနေယျအဖါ၊ ကျောင်ꩻထာကျောင်ꩻခံꩻ၊ သူရံꩻသူႏသီ၊ စီႏသဲင်စီႏမန်ႏ၊ တိတ်ꩻခံꩻတိတ်ꩻထာ၊ အနာထင်ႏထီႏ၊ ဖြီꩻစီꩻထွူမꩻ၊ လူႏကပ်နီဗွေႏ၊ ဝေနေယျအဖါ၊ ဖြောင်းထာဖြေꩻခံꩻ၊ ဟော်ꩻထန်ႏဖေႏဗာႏ၊ ရာႏဇာႏဟော်ခံꩻ၊ သူရိ(ယ)စန္တာႏ၊ မဟာႏမင်ꩻကြီꩻ၊ တနံသိကျာꩻ၊ နဂါꩻဂဠုန်ႏ၊ ကုမ္ဘာန်ႏယက္ခ၊ တရတပါꩻ၊ ဗြဟ္မာႏလိုꩻလူꩻ၊ မူႏခိုပေႏတန်၊ မူꩻမတ်စာႏရေꩻ၊ သဌေꩻသူႏကျွယ်ႏ၊ ဟဝ်ကုဲယုတ်လတ်၊ သတ္တဝါႏလိုꩻလူꩻ၊ မူႏခိုဖြားဆား၊ ညီညာႏထွူမꩻ၊ ဟဲ့ꩻစလွဝင်ꩻ၊ ရဲဉ်ꩻထင်ႏအလူႏ၊ ဗွူဖေါင်းကျက်သာႏ၊ သေႏချာႏထွူမꩻ၊ သူရိစန္တာႏ၊ ရာဇာဟော်ခံꩻ၊ ခွမ်ꩻလာꩻကွဉ်ကꩻ၊ သဒꩻပန်ꩻကုံꩻ၊ ချုံထယ်သက္ကလတ်၊ ပိတ်လျပ်ဖြယ်ကာ၊ သန္တာပတ္တီ၊ နမ်းကီနမ်းလောင်း၊ သုံꩻဆောင်ႏရင်းခြွိုင်း၊ ကွန်ဗုဲထွူမꩻ၊ ထွိုင်ႏကာလင်ꩻစူꩻ၊ လိုꩻလူꩻအဗွေႏ၊ ဝေနေယျအဖါ၊ ငဝ်းငွါလျောက်လဝ်း၊ ဩစဝ်းဩဗွေႏ၊ ယံဖေႏရပ်ထူႏ၊ ခွေသွဉ်းလူႏတန်ꩻ၊ ကျောင်ꩻခံꩻကျောင်ꩻထာ၊ ယံဖေႏသတင်ꩻသုံꩻ၊ တွမ်ႏတပဲ့ꩻတပန်ꩻ၊ ရဟန်ꩻသင်္ဃာႏ၊ သဒ္ဓါႏလူႏကပ်၊ ဗွေႏမျတ်သိခဲင်၊ သျင်ႏတောႏဘုရာꩻ၊ ငဝ်းငွါမိန်းတောႏ၊ ဟဝ်ထွူနောတကာႏ၊ ယံကတွိုႏသꩻ၊ ကျောင်ꩻကျမွုန်းတဝ်း၊ နဝ်ꩻမꩻနီဗွေႏ၊ စတွမ်ႏရဟန္တာႏ၊ လစ်ꩻသဲဉ်ဗွေဗွေ၊ သတင်ꩻသုံꩻသော့ꩻ၊ ခေါခဲ့လူႏတန်ꩻ၊ ကျောင်ꩻခံꩻကျောင်ꩻထာ၊ သေႏချာႏထွူမꩻ၊ ရာဇဟော်ခံꩻ၊ သံတော်ဦးတင်၊ ဝုဲႏထင်ႏသိုမ်ပေါက်၊ ဩဗွေႏဩစဝ်း၊ လျောက်လဝ်းရီဗာႏ၊ ယံသညင်ꩻဒွိုန်း၊ ခွေသွဉ်းတကာႏ၊ ဖြားလဲ့ဖြားထွူ၊ နင်းဟွူကိုꩻကွယ်ႏ၊ ခေါက်ဝုဲႏဗာႏဗဲင်း၊ နီဗွေႏကိုႏစာꩻ၊ ဘုရာꩻဗွေႏဩ၊ ရာဇာဟော်ခံꩻ၊ ယံဖေႏထီႏဗာႏ၊ ခါလားဖြားသီ၊ နီဗွေႏကိုႏစာꩻ၊ ရာဇာဟော်ခံꩻ၊ တောင်ꩻပြန်ႏလျောက်လဝ်း၊ ဗွေႏစဝ်းဘုရာꩻ၊ ဖြောင်းထာဖြေꩻခံꩻ၊ သမ်းမိန်းဟော်ꩻဖေႏ၊ အွိုးနောတကာႏ၊ ရာဇာမင်ꩻကြီꩻ၊ သူရိစန္တာႏ၊ မာꩻတမုဲꩻကောင်း၊ အုံအဝ်ႏနောင်ႏတ၊ ကြောင်းကြမွုန်းတဝ်း၊ ဗွေႏစဝ်းဘုရာꩻ၊ တကာႏတန်ဟွေး၊ မွိုးနန်းစခါ၊ ဌာနရပ်ယို၊ ခွေဗွေႏဘုရာꩻ၊ အပန်စခါ၊ ခွေကထွာဝါးတောင်ꩻ၊ ကောင်တန်အနာ၊ ဌာနရပ်ယို၊ တဇာတ်ကွိုတဝ်း၊ မတ်နောတကာႏ၊ နေးနာႏခြာက၊ ဌာနရပ်ယို၊ ဟောင်ရိုꩻဆင်လဲ့၊ ထွာဗာႏတဇာတ်၊ အရပ်ယိုနေ၊ ထင်ႏတွိုႏဆုဲꩻချာ၊ သမ်ႏသဲင်ꩻထွာဗာႏ၊ ရဟန်ꩻရသေ့ꩻ၊ အလေ့ꩻသူႏတောႏ၊ မွေးလျောႏကမ္မဋ္ဌာန်ꩻ၊ စီꩻဖျန်ꩻဘာႏဝနာႏ၊ ဌာနခင်ႏလမ်း၊ တောႏတွင်ꩻထာꩻခြာတန်၊ ကောင်ခံꩻကောင်ရွဉ်၊ ဟံႏဟဝ်ဟံႏမျတ်၊ ဌာနရပ်ယို၊ အွိုးနဲခွန်ပို၊ သူရိစန္တာႏ၊ တကာႏဟော်ခံꩻ၊ ယံနောင်ႏတမွုန်း၊ ခွေအီႏအွဉ်ႏကုဲ၊ အပ်သေꩻဖေႏဒွါႏ၊ အာအာတန်တန်၊ ယံကြောင်းကြမွုန်း၊ ဟော်ခံꩻတကာႏ၊ ခွုင်းကားကျွန်ꩻနဝ်၊ တရျာꩻတွမ်ႏတဗီႏ၊ အီႏပီနုဲးနာꩻ၊ တဖြာꩻငထဝ်း၊ နဝ်ꩻမꩻနီဗွေႏ၊ ဝေနေယျအဖါ၊ ဘုရာꩻပဉ္စဝ်း၊ မောꩻနဝ်ꩻစခါ၊ ကထွာခွေဝေး၊ ကကုသန်ႏ၊ ကောဏဂုံႏ၊ ကဿပ၊ စခါဝွေꩻဗွေႏ၊ ကပွင်ꩻလဲဉ်းထွူ၊ မွိုးနန်းစခါ၊ ဘုရာꩻသိုမ်ဆူႏ၊ ဌာပနာႏငသေꩻ၊ ဓာတ်တောႏထာꩻမုဲꩻ၊ တင်ꩻလုဲအဗွေႏ၊ ဝေနေယျအဖါ၊ ထွားရှုဉာဏ်ႏတောႏ၊ နဝ်ꩻမꩻကွဲးထီႏ၊ ဩဗွေႏဝွေꩻသီး၊ ဌာပနာႏငသေꩻ၊ ကေသာဆံတောႏ၊ တောင်ဝေꩻသပိတ်၊ ပရိက္ခရာႏ၊ ဌာနရပ်ယို၊ ဧရာဝတီ၊ ထီကျိုပြက်ꩻကွဉ်ႏ၊ သုနာဓမ္မရ၊ ရာဇဌာနီ၊ သုဝဏ္ဏဘူမိ၊ သူရိစန္တာႏ၊ ရာဇာႏဟော်ခံꩻ၊ ခင်ႏလမ်းနေႏရာႏ၊ ရွှေထုံဝေင်ꩻဖူꩻ၊ နဝ်ꩻထွူကွိုနဲး၊ မူႏခိုသီးယာ၊ တဖုံႏတဉ်ဟွေး။

ပွိုးပီးနဝ်ꩻမꩻ၊ ကျောင်ꩻတကာႏသီးယာ၊ သူရိစန္တာႏ၊ ရာႏဇာႏမင်ꩻကြီꩻ၊ ခွန်တန်အစိုး၊ မွိုးနန်းစခါ၊ ထွာဝင်ꩻအကယ်ႏ၊ တယ်ႏထောင်ႏငသေꩻ၊ ထေထန်ႏထွူမꩻ၊ ကာလငခါ၊ ထေခြာဖေႏထဲင်း၊ မတ်စဲင်းစဲင်းနော၊ သူႏတောႏသီးယာ၊ စခါမွိုးနန်း၊ ခင်ႏလမ်းပအိုဝ်ႏ၊ သုဝဏ္ဏဘုမ္မိ၊ ပြည်ကြီးကသ၊ ရွှေထုံဘုရာꩻတန်၊ ဖန်ဖေႏအမဉ်ꩻ၊ ရွှေစာရံထွူနော၊ သူႏတောႏသီးယာ၊ မျသိန်းတန်လဲ့တဆူႏ၊ သူႏတောႏတကာႏ၊ စခါမော့ꩻနဝ်ꩻ၊ ကကုသန်ႏတုံ၊ ကောဏဂုံႏတွမ်ႏ၊ ကဿပ၊ ဂေါတမလဲ့တတွန်၊ ဗွန်တန်လိတ်ꩻဆူႏ၊ ပွင်ꩻတောႏမူႏရီးငါ၊ ဘုရာꩻကကုသန်၊ ဗွန်တန်နီဗွေႏ၊ ဝါႏတောႏထင်ႏလꩻ၊ လစ်ꩻဆီမꩻလဲ့၊ တွမ်ႏတပဲ့ꩻတပန်ꩻ၊ ရဟန်ꩻသင်္ဃာႏ၊ လက်ဝဲလက်ယာ၊ သင်္ဃာႏတောႏပေါင်ꩻ၊ ဟောင်ရိုꩻဆေ့ꩻအာ၊ သင်္ဃာႏငတ်ꩻသဲဉ်၊ စဲဉ်ႏလွဉ်ꩻအချာ၊ သိကျာꩻတနံ၊ ခွန်တန်နဝ်ꩻရာꩻ၊ ဆေ့ꩻအာကွတ်ꩻသဲဉ်၊ ဗွန်တန်ပါဒ၊ ကျွꩻကာသဲင်ꩻစူꩻ၊ သုဝဏ္ဏဘူမိ၊ ရာဇဌာနီ၊ ပြည်ကြီးရွှေထုံ၊ အုံအဝ်ႏရပ်တယ်ႏ၊ ထွားလယ်ႏချာငါ၊ မျက်နာႏလစ်ꩻရပ်၊ လျောက်ပတ်သာႏယာႏ၊ သေႏချာႏဟဝ်မွေး၊ ဗွေႏစဝ်းဘုရာꩻ၊ ငဝ်းငွါမိန်းတောႏ၊ အံႏအော်ꩻအံႏဖြာႏ၊ သိကျာꩻထင်ႏဟွုန်၊ မိန်းတောႏငဝ်းငွါ၊ အံႏဖြာႏအရပ်၊ နတ်တနံသိကျာꩻ၊ ငဝ်းငွါတောင်ꩻပြန်ႏ၊ ယံဖေႏနီဗွေႏ၊ ဝေနေယျအရင်ꩻ၊ သညင်ꩻမေတ္တာႏ၊ ဌာပနာဖေႏဖန်း၊ သွဉ်းသီးတင်ꩻလုဲ၊ အဝ်ႏကုဲဆချာ၊ ကေသာဆံတော်၊ ယံပူႏဇောႏဗာႏ၊ သိကျာꩻတောင်ꩻပြန်ႏ၊ ဗွန်တန်ဘုရာꩻ၊ ခါလဲ့ဖြွꩻထင်ႏ၊ မုနိကတူႏ၊ ကလူႏကေသာႏ၊ ပါလွေꩻစူလောင်း၊ သွစ်ꩻဗောင်ကလူꩻခံꩻ၊ အရောင်ႏတင်ႏနုဲး၊ ထုဲႏပီဆီမီး၊ စွိုးနုဲးမေႏတင်ႏ၊ လေလင်းစွူဖြွိုး၊ ရွစ်တွိုႏငခါ၊ နီနာꩻဝုဲႏဗာႏ၊ ဆုဲꩻချာဝွေꩻဗွေႏ၊ ကောဏဂုံႏဘုရာꩻ၊ သမ်းထွာသမ်းပွင်ꩻ၊ ကျွန်ꩻကင်တီႏပါႏ၊ ဝါႏတောႏထင်ႏလꩻ၊ သွစ်ꩻဆီမꩻလဲ့၊ တွမ်ႏတပဲ့ꩻတပန်ꩻ၊ ရံႏလွဉ်ꩻဆချာ၊ လက်ဝဲလက်ယာ၊ သင်္ဃာႏနီသဲဉ်၊ ထွေရဲဉ်ႏကျွꩻကာ၊ သိကျာꩻတနံပေါင်ꩻ၊ အားလုံးထွာစွဉ်ႏ၊ တရေင်ဗွေဗွေ၊ ခွုန်ꩻသဲင်ꩻရွှေထုံ၊ သုဝဏ္ဏဘူမိ၊ သဲင်ꩻထေ့ရပ်တယ်ႏ၊ ရာဇဌာနီ၊ သိကျာꩻတောင်ꩻပြန်ႏ၊ ဗွန်တန်နီဗွေႏ၊ ကောဏဂုံႏလဲ့၊ မဲ့စွုမ်ႏဟွုန်ဟဝ်၊ ဗွေႏစဝ်းသဲင်ꩻသွဉ်ꩻ၊ ဌာပနာႏငသေꩻ၊ ပေႏတန်အရင်ꩻ၊ သွင်ꩻသော့ꩻတောင်ꩻဝေꩻ၊ တလီးကွိုတဝ်း၊ ဗွေႏစဝ်းဘုရာꩻ၊ မြတ်စွာဗုဒ္ဓ၊ ကဿပဘုရာꩻ၊ ဝါႏတောႏထင်ႏလꩻ၊ တရျာꩻနီဆီ၊ လွိုတကီငတ်ꩻဝါႏ၊ လက်ျာႏလက်ဝဲ၊ ဗွေႏစဝ်းဘုရာꩻ၊ တွမ်ႏသင်္ဃာႏဖုံႏ၊ ကွဉ်ရုံႏသင်္ကန်ꩻ၊ ခီႏဆန်ꩻကျွꩻကာ၊ ဆေ့ꩻအာသင်္ဃာႏ၊ မီႏထွာရေႏတွက်၊ ဟောင်ရိုꩻတရေင်၊ ကျွꩻသဲင်ꩻဝေင်ꩻခံꩻ၊ ရာဇဌာနီ၊ ခွန်ဖီသိကျာꩻ၊ ဘုရာꩻအချာ၊ ထွိုင်ႏကာသဲင်ꩻလွဉ်ꩻ၊ တနံခွန်လူꩻ၊ တမွုန်ႏပုဲသူရေင်၊ ကျွꩻသဲင်ꩻရွှေထုံ၊ သုဝဏ္ဏဘူမိ၊ ထီကျိုပြက်ꩻကွဉ်ႏ၊ နီဗွေႏဘုရာꩻ၊ ကျွꩻသဲင်ꩻဌာပနာႏ၊ သပိတ်မျနော၊ သူႏတောႏသီးယာ၊ ဆုဲင်ꩻချာကဿပ၊ ဂေါတမနီဗွေႏ၊ ဝေနေယျအဖါ၊ ဘုရာꩻနီဗွေႏ၊ ဝါႏတောႏထင်ႏလꩻ၊ ဒသတဆီ၊ လွိုတကီတဝါႏ၊ နဝ်ꩻမꩻနီဗွေႏ၊ ကျွꩻကာသဲင်ꩻစူꩻ၊ သုဝဏ္ဏဘူမိ၊ သူရိစန္တာႏ၊ ပြည်ကြီးရွှေထုံ၊ အုံအဝ်ႏရံႏခူ၊ စူစေႏစူထွေ၊ လက်ဝဲလက်ျာ၊ သင်္ဃာႏတောႏပေါင်ꩻ၊ နဝ်ꩻကောင်းလစ်ꩻသဲဉ်၊ ထွေရဲဉ်ႏကျွꩻကာ၊ သိကျာꩻတနံ၊ ရံႏလွဉ်ꩻနီဗွေႏ၊ လွေꩻလွဉ်ꩻနဝ်ꩻလဲ့၊ သွစ်ꩻသဲဉ်ကွိုတဝ်း၊ ဗွေႏစဝ်းဘုရာꩻ၊ အဝ်ႏဆရာဇဂြိုဟ်ႏ၊ ဗွန်ုထိုသိခဲင်၊ ဒဲင်ခင်ႏသာႏသာႏ၊ ကျွကာယွယွ၊ လို့လမွူးနီꩻ၊ လစ်ꩻဆီငတ်ꩻနီꩻ၊ နဝ်ꩻမꩻလဲ့တွိုႏ၊ ဖျော်သဲင်ꩻရွှေထုံ၊ သဲင်ꩻအုံပဆား၊ ထာꩻလွားထင်ႏပြေႏ၊ သေငါꩻထီႏဖျော်၊ မော့ꩻနဝ်ꩻစခါ၊ ကထွာခွေဝေး၊ ကကုသန်ႏတုံ၊ ကောဏဂုံက၊ ကဿပရဝ်း၊ ဗွေႏစဝ်းဘုရာꩻ၊ သိုမ်ပါꩻသိုမ်ဆူႏ၊ ပွင်ꩻတောႏမူႏရီးငါ၊ ကထွာဝေးတန်၊ ဝေꩻသီးဗွေႏစဝ်း၊ မော့ꩻနဝ်ꩻဌာပနာႏ၊ တပါꩻတစွိုးစွိုး၊ မီႏတွိုႏခွေခါ၊ အီႏဌာပနာႏဗာႏနုဲး၊ ထုဲႏပီဝွေꩻသီး၊ စဝ်းပီးသိုမ်ပါꩻ၊ နဝ်ꩻမꩻအီႏမွေး၊ ဗွေႏစဝ်းဘုရာꩻ၊ ပညာစက္ခု၊ ထွားရှုငချာ၊ နဝ်ꩻမꩻကွဲထီႏ၊ သူꩻရီးစခါ၊ ဘုရာꩻကကုသန်ႏ၊ မွိုးနမ်းဌာပနာႏ၊ ကေသာႏဆံတော၊ ကောဏဂုံနဝ်ꩻ၊ ဌာနရပ်ယို၊ ဌာပနာထာꩻမုဲꩻ၊ ဟုဲဩဗွေႏစဝ်း၊ သာရိပုတ္တရာႏ၊ ရဟန္တာႏမောဂ္ဂလာန်ႏ၊ စဝ်းရဟန္တာႏဖုံႏ၊ အုံခူꩻအဝ်ႏရံႏ၊ ဗွန်ထိုဗွေႏဘုရာꩻ၊ ပညာစက္ခု၊ ကထင်ႏရှုထွား၊ နဝ်ꩻမꩻထီႏသေ၊ ယံဖေႏလူꩻလိုꩻ၊ မူႏခိုကိုꩻကွယ်ႏ၊ ခေါက်ဝုဲႏလူႏတန်ꩻ၊ ဗွေႏစဝ်းခွေခါ၊ ဒန္တာတငါခံꩻ၊ အီႏသွင်ꩻဌပနာႏ၊ သွင်ꩻဗာႏတငါ၊ လစ်ꩻလီးမꩻကွို၊ ရိုꩻထွူနဝ်ꩻမꩻ၊ နီဗွေႏဟဲ့ꩻဟောင်၊ ဖူးမောင်ႏခွန်ခံꩻ၊ စဝ်းရဟန်ꩻအာနန်၊ ခွန်ခံꩻဖူးပေႏ၊ ယံဖေႏအီလွဉ်၊ ရပ်ခံႏဆကလ၊ အုပ်ထာꩻနဝ်ꩻနော၊ နဝ်ꩻမꩻနီဗွေႏ၊ နေးတွမ်ႏဉာဏ်ႏတောႏ၊ အော့ꩻထင်ႏတငါ၊ ဒန္တာစွယ်ႏတောႏ၊ ဟောင်ရိုꩻလစ်ꩻလီး၊ တသီးသွစွိုးနုဲး၊ ထုဲႏပီခံꩻထာ၊ ဆချာခင်ႏလမ်း၊ တယွမ်ꩻတဝ်းလာꩻလာꩻ၊ အဝ်ႏဒွါႏလီꩻလီꩻ၊ ပီနုဲးတအော့ꩻတဝ်း၊ ဗွေႏစဝ်တငါ၊ အုပ်ထာအဖူꩻ၊ ထူႏခွုမ်ဓိဋ္ဌာန်ႏ၊ ယံဖေႏကထွာ၊ နဝ်ꩻငါသင်္သရာႏ၊ သာႏသနာႏစဲဉ်ႏ၊ ယံအဝ်ႏရဲဉ်ႏတောတော၊ ကောထွာပိုလီꩻ၊ ဝွေꩻသီးဆုဲꩻချာ၊ ခွေတငါခံꩻယို၊ ရိုꩻထွူနဝ်ꩻမꩻ၊ ဗုဒ္ဓသျင်ႏတောႏ၊ ဖေႏအပ်သိကျာꩻ၊ ဘုရာꩻထွန်ႏငသေꩻ၊ နေးတွမ်ႏထီစင်၊ နဝသီတာႏ၊ သွဉ်ꩻယွာꩻပသေ၊ စင်ပြေထွူမꩻ၊ သွင်ႏသော့ꩻဌာပနာႏ၊ ရာဇာဟော်ခံꩻ၊ သူရိစန္တာႏ၊ အဗွန်နုဲးဗောႏ၊ ကျောႏစော်ꩻဟုံဟင်၊ သိကျာꩻမင်ꩻမျတ်၊ နတ်တနံဗြဟ္မာႏ၊ ရာဇာထွာခွန်၊ သူရိစန္တာႏ၊ မင်ꩻလောင်ꩻဌာႏန၊ ရာဇဌာနီ၊ ပြည်ကြီးရွှေထုံ၊ ဘုံႏတံꩻခိုꩻလဲ့တန်၊ ဗွန်ကံႏလဲ့ထို၊ တံꩻခိုꩻအာႏဏာႏ၊ သိကျာꩻမင်ꩻမျတ်၊ သာႏဓုဟွုန်သွိုꩻ၊ မူႏခိုပေႏတန်၊ အံႏအော်ꩻအံႏဖြာႏ၊ ရာဇာဥက္ကဋ္ဌ၊ သူရိစန္တာႏ၊ ပွိုင်ႏလင်ꩻခမ်းထီ၊ ဟွုန်ဟီးဟွုန်ဟဝ်၊ နဝ်ꩻခါကာလ၊ သက္ကရာဇာ၊ သိကျာꩻခွန်လူꩻ၊ အီႏခူႏထာꩻအောင်၊ ပေါင်ထင်ႏစီႏရင်ႏ၊ မင်ꩻကြီꩻဟော်ထာ၊ နဝ်ꩻခါတနံ၊ အီႏဌာပနာႏ၊ ဘုရာꩻကဖေႏ၊ ပေႏတန်လူꩻလိုꩻ၊ မူႏခိုအရင်ꩻ၊ သညင်ꩻမေတ္တာႏ၊ ဘုရာꩻတငါ၊ ဒန္တာလစ်ꩻလီး၊ အီႏသွင်ꩻဌာပနာႏ၊ ကောဇာသက္ကရာဇ်၊ တစ်နစ်နဝ်ꩻရာꩻ၊ ဟောင်ရိုꩻတရျာꩻ၊ သာလွိုတဆီ၊ လွိုတကီတဗာႏ၊ လွိုန်သီႏလာဗွေ၊ မွူးနီꩻဗုဒ္ဓဟူꩻ၊ ခွန်လူꩻနတ်သာꩻ၊ သိကျာꩻခွန်ဖီ၊ ထာꩻအဝ်ႏယော့ဖူꩻ၊ အီႏခူꩻဆမုဲꩻ၊ လွိုက်ရွေꩻထိုမ်ႏလယ်ႏ၊ နေရာႏခင်ႏလမ်း၊ ဟံႏညီႏဟံႏထွာ၊ နဝ်ꩻခါဝွေꩻဗွေႏ၊ ဝေနေယျအဖါ၊ ဘုရာꩻပဉ္စဝ်း၊ အုံအဝ်ႏကြည့်ရှု၊ ဆကဒို့ꩻတွို့ꩻနဝ်၊ ဟဝ်လဲဉ်းအလင်၊ သျင်ႏတောႏဘုရာꩻ၊ ဌာနရပ်ယို၊ ဗွန်ထိုဘုရာꩻ၊ ငဝ်းငွါဟော်ꩻမိန်း၊ အစိန္တေယျနယ်ဖေႏ၊ ယေးစူအွဉ်ႏနယ်၊ ဌာနရပ်ယို၊ ပွိုခူꩻသွော့နော၊ ဗွေႏစဝ်းဘုရာꩻ၊ သိကျာꩻတနံ၊ ခွန်ဖီခါလဲ့၊ မဲ့စွုမ်ႏဝံꩻသာႏ၊ အာႏရꩻဟွုန်ဟဝ်၊ ထူႏဖျော်နမ်ႏနꩻ၊ ဝင်ꩻခြွꩻသဲ့ꩻစင်၊ သေင်ႏဆုံꩻမီꩻခိုႏ၊ ဟူႏခန်းကြေင်းကြေင်း၊ လစ်ꩻထောင်းသီနား၊ သေႏချာႏထွူမꩻ၊ ထာဝတဲ့ꩻတဲ့ꩻ၊ ဆဲ့ꩻတွမ်ႏခွဉ်းနာ၊ ဆေင်ႏခါꩻရာဇမတ်၊ နွုတ်ꩻထပ်ဖြီႏဖြီႏ၊ လစ်ꩻဆီနွုတ်ꩻသောင်ꩻ၊ ထာအောင်အဲဉ်ႏလုဲး၊ တင်ꩻလုဲပွိုခူႏ၊ ခွန်လူꩻတနံ၊ ပန်နေးတွမ်ႏစက်၊ ထွတ်ထန်ႏဟံႏအေႏ၊ ထေထန်ႏဟံႏလီး၊ ခွန်ဖီသိကျာꩻ၊ ယွားနေးတွမ်ႏဒေါင်၊ ထာအောင်ယော့ဖွိုꩻ၊ ဟောင်ရိုꩻလစ်ꩻဆီ၊ လွိုတကီနွုတ်ꩻသောင်၊ ထာꩻအောင်အဲဉ်ႏလုဲး၊ နုဲးဝင်ꩻဗိုန်ပီ၊ လစ်ꩻဆီနွုတ်ꩻသောင်ꩻ၊ ဖြောင်တရေꩻလဲင်ႏချင်ꩻ၊ သျင်ႏတောႏဘုရာꩻ၊ စခါမွိုးနန်း၊ သိုမ်ပါꩻသိုမ်ဆူႏ၊ ခွန်လူꩻတနံ၊ ဌာပနာငသေꩻ၊ ဗွေႏစဝ်းဓာတ်တောႏ၊ မော့ꩻနဝ်ꩻစခါ၊ ဘုရာꩻကကုသန်ႏ၊ ကောဏဂုံႏ ကဿပ၊ စခါဌာပနာႏ၊ ကေသာဆံတောႏ၊ တောင်ꩻဝေꩻသပိတ်မျ၊ စခါဌာပနာႏ၊ သိကျာꩻခွန်ဖီ၊ ထင်ႏထီႏဝံꩻသာႏ၊ အာႏရꩻဟွုန်ဟဝ္၊ ငဝ်းငွါသာႏဓု၊ နုမောဒနာႏ၊ အံႏဖြာႏအံႏအော်ꩻ၊ ဓာတ်တောႏဘုရာꩻ၊ ရတနာႏမေႏတေန်ꩻ၊ ပေႏတန်သွမ်ꩻတာႏ၊ ဒွေါင်ႏဆွာꩻနဝ်ꩻကောင်း၊ တသောင်ꩻထာမန်ႏ၊ ထာꩻအောင်အကို၊ ဟောင်ရိုꩻအဝ်ႏတင်ႏ၊ လေလင်းစွူဖြွိုး၊ ထဲစ်အွိုးစခါ၊ ဌာပနာႏငသေꩻ၊ စေတီႏဘုရာꩻ၊ ရာဇာခွန်လောင်ꩻ၊ သူရိစန္တာႏ၊ ရာဇာႏခမ်းဖူꩻ၊ မူႏခိုပေႏတန်၊ ခြွေဖြန်ဖြားဆား၊ ပုဏ္ဏာꩻပုဏ္ဏေ၊ သဌေꩻသူႏကျွဲႏ၊ ကုန်ႏသယ်ႏဖူးကား၊ ဆင်ꩻရဲꩻသားကစ၊ တရတပါꩻ၊ တရျာꩻတစွိုး၊ တမွိုးတဖါ၊ ဗြဟ္မာႏလိုꩻလူꩻ၊ မူႏခိုဖြားဆား၊ သတ္တဝါႏတင်ꩻလုဲ၊ ဟဝ်ကုဲပေႏတန်၊ လွဉ်ခြွဉ်းလွဉ်စု၊ ဇမ္ဗူဟံႏတကီ၊ မီꩻခိုႏကိုꩻကွယ်ႏ၊ ခေါက်ဝုဲႏလူႏတန်ꩻ၊ သွမ်ꩻပန်ꩻဒဲဉ်ဗွာ၊ ငဝ်းငွါကွီဆုꩻ၊ အာယုဝဏ္ဏ၊ သုခဗလ၊ ပဋိဘာန၊ ဘဝဆက်ဆက်၊ သက်ဆွာꩻအာႏတန်၊ ချမ်ꩻသာႏယံအဝ်ႏ၊ ဟဝ်တွမ်ႏယောင်ꩻဆင်ꩻ၊ ထင်တွမ်ႏပညာႏ၊ ပငါပရင်ꩻ၊ ခွန်နင်ꩻမူႏခို၊ နီပအိုဝ်ႏဘဝ၊ ငဝ်းငွါကွီဆုꩻ၊ နုမောဒနာႏ၊ အာႏရꩻဟွုန်ဟဝ်၊ ငဝ်းငွါသာႏဓု၊ စတုလောကပါလာ၊ သိကျာꩻခွန်ဖီ၊ ခမ်းကီဝတိံႏသာႏ၊ အီလင်ꩻပါတွမ်ႏ၊ ရတနာႏခံꩻထာ၊ မာအီကျောက်ဖျာ၊ ခံꩻထာသူဗီႏ၊ သိကျာꩻသုစံႏ၊ ထူႏလင်ꩻအီပါ၊ ဒါခါꩻဆလ၊ ကျောက်ဖျာတဗီႏ၊ သီနားလစ်ꩻဖဲ့ꩻ၊ ခါလဲ့ဆေင်ႏကင်း၊ ခံꩻထာကျောက်ဖျ၊ ခါလဲ့လစ်ꩻဗီႏ၊ ဆကီလဲ့ꩻဒို့ꩻ၊ တဗေ့ꩻခံꩻထာ၊ သိကျာꩻမင်ꩻမျတ်၊ ရတနာႏခံꩻထာ၊ တွိုင်ထွားပေႏတန်၊ အဲဉ်လုဲးအဗာႏ၊ ကျောက်ဖျာခံꩻထာ၊ နဝ်ꩻကောင်းဟောင်ရိုꩻ၊ ပေႏတန်ဒွေါင်ႏဆွာꩻ၊ နားနွဲးနဝ်ꩻရာꩻ၊ တသောင်ꩻထာမန်ႏ၊ နားထိုနဝ်ꩻရာꩻ၊ ငတ်ꩻထာကွိုတဝ်း၊ ဒွုန်ဗွိုနဝ်ꩻရာꩻ၊ အဝ်ႏမန်ႏတသောင်ꩻ၊ သူႏတောႏကောင်ꩻသီယာ၊ သိကျာꩻမင်ꩻမျတ်၊ ရတနာႏကျောက်ဖျာ၊ ခံꩻထာသူဗီႏ၊ ထုဲႏပီလွဝင်ꩻ၊ သွင်ꩻသော့ꩻတွိုက်တာ၊ မွူးဟာမွူးခေ့ꩻ၊ ဒို့ꩻပေ့ꩻငသေꩻ၊ မွူးလေမွူးယာ၊ ဘုရာꩻမွေႏတောႏ၊ ပူႏဇောႏလင်ꩻသော့ꩻ၊ သွင်ꩻသော့ꩻတွိုက်ဖူꩻ၊ ထူႏတွမ်ႏရတနာႏ၊ ကဝ်ႏထာကဝ်ႏခံꩻ၊ သွင်ꩻသော့ꩻဌာပနာႏ၊ ကဝ်ႏထာငတ်ꩻဗောင်၊ အသောင်လစ်ꩻဖဲ့ꩻ၊ ခါလဲ့လစ်ꩻဆူႏ၊ ခွန်လူꩻတနံ၊ ကဝ်ႏထာတဗောင်၊ နဝ်ꩻကောင်းသွင်ꩻဆ၊ ကသကွိုတဝ်း၊ ကဝ်ႏခံꩻတသီး၊ သိကျာꩻနေးတွမ်ႏ၊ မဏိဇောတရပ်၊ ပတ္တမျာꩻသမ်းဒို့ꩻ၊ သတ္တရတနာႏ၊ ကဝ်ႏထာကဝ်ႏခံꩻ၊ ဌာပနာႏသွင်ꩻဗဉ်ႏ၊ တွိုႏလင်ꩻခင်ႏလေင်း၊ ဣန္ဒနီလာ၊ နဂါꩻအသွယ်ႏ၊ ပလယ်ကောမုတ်၊ ဥဿဖယား၊ ပတ္တမျာꩻရွဉ်ထာ၊ သိကျာꩻသွင်ꩻညီꩻ၊ နီဗွေႏဘုရာꩻ၊ တငါဓာတ်တောႏ၊ လစ်ꩻဆီနွုတ်ꩻသောင်ꩻ၊ ထာꩻအောင်အဖူꩻ၊ လစ်ꩻဆူႏတငါခံꩻ၊ ဌာပနာအီႏသွင်ꩻ၊ သော့ꩻထင်ႏတွမ်ႏစိတ်၊ အုပ်ခံအုပ်ထာ၊ သိကျာꩻဌာပနာႏ၊ သေႏချာႏထွူမꩻ၊ ဆကီပီတွမ်ႏ၊ လုံးတန်ကျောက်ဖျာ၊ ရတနာမဏိ၊ အိဆေ့ꩻတဲပ်တဲ့၊ လျပ်လဲ့သေႏချာႏ၊ ပတ္တမျာꩻမဏိ၊ သိကျာꩻနေးတွမ်ႏ၊ စက်ယန္တရာႏ၊ ဒို့ꩻပေ့ꩻအီလဲ့၊ တထပ်နောလောင်ꩻ၊ စက်ယန္တရား၊ ရတနာႏဆကီ၊ ခွန်ဖီသိကျာꩻ၊ နေးတွမ်ႏခံꩻထာ၊ တခြို့ဒို့ꩻပေ့ꩻ၊ ခါလဲ့တရဝ်း၊ ဗွေႏစဝ်းဘုရာꩻ၊ သီနားလစ်ꩻဖဲ့ꩻ၊ နဝ်ꩻလဲ့ခွန်ဖီ၊ အွဉ်ႏသော့ꩻအီဒါႏ၊ ဘုရာꩻဓာတ်တောႏ၊ သင်္ဘောꩻအရုတ်၊ အုပ်သဲင်အုပ်ထာ၊ သိကျာꩻနေးတွမ်ႏ၊ ပတ္တမျာꩻနီလာ၊ ကဝ်ႏထာကဝ်ႏခံꩻ၊ တနံသွဉ်ꩻလောႏ၊ သင်္ဘောꩻလောင်းကီ၊ ဖြီကိုဖြီဖူꩻ၊ ထူႏသွဉ်ꩻခွုမ်ထင်ႏ၊ သိကျာꩻမင်ꩻရုပ်၊ သူရိစန္တာႏ၊ ရာဇာဟော်ခံꩻ၊ နဝ်ꩻလဲ့နေးတွမ်ႏ၊ ထာခံꩻသွဉ်ႏလောႏ၊ သင်္ဘောꩻဖြီဖူꩻ၊ ထူႏသဲင်ဌပနာႏ၊ နဝ်ꩻခါကာလ၊ မာဃသိကျာꩻ၊ ဘုရာꩻတငါ၊ ဓာတ်တောႏလစ်ꩻဗီႏ၊ အီသဲင်ဌာပနာႏ၊ နဝ်ꩻမꩻလွေꩻစူꩻ၊ ခွန်တန်သူရိယာႏ၊ မင်ꩻလောင်ꩻဖူးပေႏ၊ အမေႏနာမ၊ စရော်ထကွိုတဝ်း၊ နဝ်ꩻခါဝွေꩻသီး၊ ညီနောင်ဝင်ꩻနီ၊ သိကျာꩻထွဉ်ႏလင်ꩻ၊ ဝင်ꩻနီဖူးဝေး၊ ထံႏနေးပြေင်လောင်း၊ အီႏလေပ်သိုမ်ပတ်၊ နတ်တနံသိကျာꩻ၊ ငဝ်းငွါမိန်းတောႏ၊ ဟော်ခံꩻရာႏဇာႏ၊ သိကျာꩻတနံ၊ ခွန်ဖီအရုတ်၊ အားထုတ်သွဉ်ꩻလောႏ၊ ပေါက်ဖေါ်ႏဖူးဝေး၊ ဆွေတော်မျိုးစပ်၊ နတ်တနံခွန်ဖီ၊ သိကျာꩻနေးတွမ်ႏ၊ ရတနာႏခံꩻထာ၊ သွဉ်ꩻလောႏအရုတ်၊ သာရိပုတ္တရာႏ၊ မဟာမောဂ္ဂလာန်ႏ၊ တွမ်ႏသျင်ႏအာနန္တာႏ၊ မဟာကဿပ၊ ပစ္စေကဗုဒ္ဓါႏ၊ ဘုရာꩻသျင်ႏဗွေႏ၊ အစိန္တေယျ၊ ဂေါတမကိုႏစာꩻ၊ သိကျာꩻနေးတွမ်ႏ၊ ရတနာႏနွုတ်ꩻစွိုး၊ ပတ္တမျာꩻကောမုတ်၊ ဥဿဖယား၊ သန္တာႏမျစိန်ႏ၊ ပတ္တမျာꩻစိန်ႏကျောင်ႏ၊ အလောင်းလေဗွာ၊ စဝ်းသိကျာꩻမင်ꩻ၊ သွဉ်ꩻလောႏသွင်ꩻသော့ꩻ၊ ထာꩻအဝ်ႏအဖူꩻ၊ ခွန်လူꩻတနံ၊ နေးတွမ်ႏထီဟွမ်၊ နဝတတ်သီႏတာႏ၊ ခွꩻဒဲ့ꩻစွူဖြွိုး၊ စဝ်းခွန်သိကျာꩻ၊ သွဉ်ꩻယွာꩻဆူအီ၊ နံႏသာနီဖြူ၊ ခွန်လူꩻမူထင်ႏ၊ ကုံႏကင်ႏကမ္ပလူႏ၊ လိုပ်သူႏပသေ၊ ယံဖေႏအလွီး၊ နွုမ်ႏအွီႏနွိုးဟွမ်၊ လွမ်တွမ်ႏခတ္တီႏပါႏ၊ ကာသာႏပိတ်ဖြယ်၊ နဝ်ꩻလဲ့ဘုရာꩻ၊ ငဝ်းငွါမိန်းတောႏ၊ တဟော်ꩻဖေႏတဝ်း၊ ငထဝ်းအကျိုꩻ၊ ရိုꩻဖေႏသိကျာꩻ၊ မီႏထွာပသေ၊ စင်ပြေအီဒွါႏ၊ ခွေဘုရာꩻဓာတ်တောႏ၊ အဝ်ႏဗော့ꩻလင်ꩻဒွါႏ၊ ဓာတ်တောႏအထျꩻ၊ ဆအဒို့ꩻကွဉ်ႏထင်ꩻ၊ ပသေစင်အီဓာတ်၊ ထီမြတ်သီႏတာႏ၊ စဝ်းသိကျာꩻမင်ꩻ၊ ထူႏလင်ꩻမို့ꩻလောင်း၊ ကောင်ႏကင်ꩻမို့ꩻကီ၊ ပသေအီဓာတ်၊ နတ်တနံခမ်းကီ၊ ထီနဝ်ꩻလဲ့ခါ၊ တစင်ခြာတဝ်း၊ ငထဝ်းအကျိုꩻ၊ ရိုꩻဖေႏငဝ်းငွါ၊ နဝ်ꩻခါသိကျာꩻ၊ ဒေဝါခွန်လူꩻ၊ စူꩻစံႏရီထဲင်း၊ ဖြောင်းသဲင်ဖြေꩻခံꩻ၊ ပြန်ႏလဝ်းရီဗာႏ၊ အဝ်ႏထာꩻအွိုးမုဲꩻ၊ ဩဗွေႏဩစဝ်း၊ ငဝ်းငွါထင်ႏရီ၊ နီဗွေႏဘုရာꩻ၊ ငဝ်းငွါဟော်ꩻဖေႏ၊ ဒေဝါခွန်လူꩻ၊ ခူႏထင်ႏသွော့နဝ်ꩻ၊ ဗွေႏစဝ်းဟော်ꩻဖေႏ၊ ဣန္ဒသိကျာꩻ၊ ငဝ်းငွါထင်ႏဟွုန်၊ နဝ်ꩻမꩻတွိုင်ႏပင်ႏ၊ မင်ꩻကြီꩻခွန်တန်၊ ဟော်ခံꩻဝင်ꩻနီ၊ ညီနောင်တဖူးဝေး၊ ခါလဲ့ညီႏညာႏ၊ တွမ်ႏသိကျာꩻမင်ꩻ၊ နဝ်ꩻမꩻစူꩻလွဉ်ꩻ၊ ထီအုံႏထီကန်ႏ၊ မယန်မညာꩻ၊ အဝ်ႏတနꩻစွဉ်ႏတွမ်ႏ၊ ဓာတ်တောႏဆကွဉ်ႏထင်ꩻ၊ ဌာနအရပ်၊ လျောက်ပတ်သာႏယာႏ၊ ထာꩻပူႏလောင်းကီ၊ ထီအောဝ်ႏယော့ဖွိုꩻ၊ ဟောင်ရိုꩻအဝ်ႏစွဉ်ႏ၊ အသောင်ꩻလစ်ꩻဆီ၊ ဗွေဗွေကွိုတဝ်း၊ အငွါနဝ်ꩻရာꩻ၊ တမျက်နာႏနီမျက်နာႏ၊ နဝ်ꩻရာꩻရိုꩻကောင်း၊ ဟောင်ရိုꩻတရျာꩻ၊ သာလွိုသွစ်ꩻသောင်ꩻ၊ ထာꩻအောင်အဖူꩻ၊ ခွန်လူꩻထင်ႏထီႏ၊ ထီႏဖွိုင်ꩻအဝ်ႏတွိုင်၊ သဲင်ဟုံပတ္တမျာꩻ၊ ဆေ့ꩻအာနဝ်ꩻကောင်း၊ ကျောင်ꩻတကာႏသီးယာ၊ အဖြုံႏလစ်ꩻဆီ၊ လွိုငကီနွုတ်ꩻဖြုံႏ၊ ဒို့ꩻတွမ်ႏဝန်ႏထာ၊ ထီလဲ့အဝ်ႏဗွေ၊ ထီဖွိုင်ꩻအဖူꩻ၊ ခွန်လူꩻတနံ၊ လစ်ꩻဆီနွုတ်ꩻဖြာꩻ၊ ပတ္တမျာꩻထီဖွိုင်ꩻ၊ ထူႏခွုမ်ဖင်ꩻထင်ႏ၊ တဖြာꩻတဖြုံႏ၊ သဲင်ဟုံပတ္တမျာꩻ၊ သိကျာꩻမင်ꩻတွမ်ႏ၊ သူရိစန္တ၊ မဟာမင်ꩻကြီꩻ၊ ညီနောင်တဖူးဝေး၊ ထေင်းထင်ႏကတူႏ၊ ပူႏဇောႏဝုဲႏခေါက်၊ သိုမ်ပေါက်သိုမ်ခြင်ႏ၊ ငေါက်လင်ꩻကတူႏ၊ ထူႏခွုမ်ထေင်းထင်ႏ၊ စိတ်ခံꩻစိတ်ထာ၊ ကျံႏငါဗွောင်အွော့ꩻ၊ ဗွေႏစဝ်းဘုရာꩻ၊ ဓာတ်တောႏတငါ၊ ဖြားဆားပေႏတန်၊ ဗြဟ္မာႏလိုꩻလူꩻ၊ မူႏခိုယံသေ၊ ယံဖေႏထီႏဗာႏ၊ ဖူးတွေ့ဗာႏရဝ်း၊ ဗွေႏစဝ်းဘုရာꩻ၊ တငါဓာတ်တောႏ၊ ဘုံꩻတွမ်ႏတံꩻခိုꩻ၊ ကျောင်ႏထိုငကီ၊ အာကာကင်ဟဝ်၊ ပါဋိဟာပျꩻ၊ တနျာႏတသီး၊ ပီနုဲးခံꩻထာ၊ ရောင်ဝါသူသွယ်၊ ဗွေႏစဝ်းဘုရာꩻ၊ အွဉ်ႏနယ်ပါဋိ၊ ဖန်ဆင်ꩻနိဗ္ဗာန်ႏ၊ ဝေင်ꩻခံꩻအဗွေႏ၊ ဝေနေယျအဖါ၊ ဘုရာꩻလစ်ꩻဆူႏ၊ လူꩻလိုꩻကတူႏကီ၊ ပီနုဲးမွူးလာ၊ အာကာမို့ꩻလောင်း၊ ကျောင်ႏထင်ႏအုံအဝ်ႏ၊ လေဖျော်စွစ်ꩻလို့၊ ဇမ္ဗူဟံႏဆကီ၊ ထီႏလို့သေစဲင်း၊ နဝ်ထင်ꩻတွို့ꩻကွဉ်ႏ၊ လေလွဉ်တွိုးတ၊ ဆကလလဲ့ခါ၊ ဖျော်တွိုႏဝီစိ၊ ဆကီလဲ့ခါ၊ လေတွိုႏဘဝဂ်၊ အောက်ထက်ကီလ၊ အနန္တစကျာႏဝဠာႏ၊ ခွုင်းကားတမွုန်ႏ၊ လေလွဉ်ꩻစွစ်ꩻလို့၊ လစ်ꩻဒို့ꩻသီနား၊ လေပါရွစ်တွိုႏ၊ ဟိမ္မဝန္တာႏ၊ ထာꩻခြာတန်ဖူꩻ၊ ဖီလူꩻဖီဖုဲꩻ၊ ကေကုဲထံကျံꩻ၊ တအဝ်ႏကုဲဒွုမ်တဝ်း၊ ဗွေႏစဝ်းဘုရာꩻ၊ သွားတော်တငါ၊ ဓာတ်တောႏအရောင်ႏ၊ တောက်တောင်ႏလေစွစ်ꩻ၊ ရွစ်လင်ꩻငါးရုဲꩻ၊ ဖွိုင်ဖုဲꩻအကင်၊ အုံထင်ႏအဝ်ႏခမ်၊ လွစ်ထန်ႏလꩻဖျော်၊ ကျွန်ꩻနဝ်တီႏပါႏ၊ ဘုရာꩻတံꩻခိုꩻ၊ ကျောႏဟိုးဟုံဟင်၊ လေလင်းဖျော်တွိုႏ၊ ပြိတ္တူႏပြိတ္တာႏ၊ သတ္တဝါႏကောင်ကီ၊ သတ္တဝါႏထီဖူꩻ၊ မူႏခိုမွူးထီး၊ သိုမ်ဆီတဘုံႏ၊ အုံအဝ်ႏညီꩻရဝ်း၊ သဖျော်လွဝင်ꩻ၊ ထီꩻသင်ꩻအုံညီꩻ၊ ပီနုဲးဖူးဝေး၊ လွေꩻညီꩻသဲင်ꩻရဝ်း၊ စဝ်းသိကျာꩻမင်ꩻ၊ ခွန်သင်ဗြဟ္မာႏ၊ ခါလဲ့စွိုးနုဲး၊ ထုဲႏပီဝင်ꩻပေႏ၊ ဒေႏပေႏတွမ်ႏရူး၊ ယူးယို့တွမ်ႏညောဝ်ႏ၊ ဆျာနဝ်ꩻတွမ်ႏထွꩻ၊ မာꩻသွꩻအုံညီꩻ၊ ခီယီꩻမင်ꩻရျꩻ၊ တခိုႏလတခြာတန်၊ ဟိမဝန္တာႏ၊ ယို့ချာႏကစ၊ ပီလွဆွေႏမျိုꩻ၊ မီꩻခိုႏလွဝင်ꩻ၊ တစင်ꩻခေါ်တဝ်း၊ ဟွုန်ဟဝ်ဝံꩻသာႏ၊ မိစ္ဆာႏမိစ္ဆေႏ၊ တလွေးတနာ၊ ခါလဲ့နစ်သက်၊ ဝင်ꩻသက်ဝင်ꩻသွီႏ၊ ထူႏယဒွုမ်တဝ်း၊ အုံရဝ်းအဝ်ႏညီꩻ၊ ပီနုဲးသွီႏယာႏ၊ သꩻရာႏတဖြုံႏ၊ စုံမက်ဟွုန်ဟဝ်၊ ဗွေႏစဝ်းဘုရာꩻ၊ တငါဓာတ်တောႏ၊ အနုဖေါႏဗွန်၊ အဟုံႏကေꩻဇူꩻ၊ လူꩻလိုꩻဗြဟ္မာႏ၊ သတ္တဝါႏပေႏတန်၊ ချမ်ꩻသာႏလွဉ်ꩻရဝ်း၊ ဗွေႏစဝ်းဓာတ်တောႏ၊ တေဇောတံꩻခိုꩻ၊ လူꩻလိုꩻထီႏစဲင်း၊ ကင်ဟဝ်အာကာ၊ ရောင်ဝါတသီး၊ ပီနုဲးထာခ့ꩻ၊ အဗွာအအွူႏ၊ ပီနုဲးမွူးလာ၊ လေဗွာတင်ႏလင်း၊ စွိုးနုဲးဆီမီး၊ ပီနုဲးတေန်ꩻရောင်ႏ၊ တောက်တောင်ႏမို့ꩻကီ၊ နီဗွေႏပျꩻနယ်၊ သူသွယ်ရောင်ႏတောႏ၊ ကောသားနီလိုꩻ၊ မူႏခိုဖြားဆား၊ တအာႏတအွိုင်၊ သွုင်းသင်းဝီႏဝါး၊ ဗားယောင်ႏသီးမူꩻ၊ သွီႏရူꩻမဲ့ဝေ့ꩻ၊ မဲ့ခေ့ꩻမဲ့သိုႏ၊ ရိုꩻလဲ့ထီႏစဲင်း၊ နားဖဲင်ဗုဲႏတူႏ၊ ရီႏရူႏတဝေ့ꩻ၊ ခါလဲ့ဗွေယာႏ၊ ဆားယားတနု၊ ကလူꩻကဗွာ၊ ခါလဲ့သဉ်ယား၊ ပွိုးစွဉ်ႏဘုရာꩻ၊ ဓာတ်တောႏကေꩻဇူꩻ၊ ပျꩻနယ်တံꩻခိုꩻ၊ အနုဘောႏဗွန်၊ စင်ခွန်စင်နင်ꩻ၊ ဆင်ꩻရဲꩻခြွေဖြန်၊ ဒဲဉ်ဟန်ႏဩဇာႏ၊ တနန်းဗာႏတဝ်း၊ အံႏမအံႏဗုဲ၊ ခါလဲ့ငထဝ်း၊ အုံအဝ်ႏပျောႏသွင်ႏ၊ ခိုဗင်ႏမူႏနံꩻ၊ ထူႏဝင်ꩻခြွိုင်းခြိုꩻ၊ ဟွမ်ခိုႏဆဲင်ꩻကꩻ၊ သဒꩻစူခဲဉ်း၊ သန္တာႏပတ္တီ၊ ခတ္တီပါမင်လုံ၊ ချုံထယ်သက္ကလပ်၊ ပိတ်လျပ်ဖြယ်ကာ၊ ပငါပရင်ꩻ၊ ဆင်ထင်ႏခြွိုင်းခြိုꩻ၊ ဟွမ်ဟဝ်ဆဲင်ꩻဒါႏ၊ စွုမ်ႏဖြာꩻကိုႏစီႏ၊ ခူးထီꩻခူးကုံႏ၊ ရွှေထုံဌာန၊ ဆွထင်ႏနားဒေါင်း၊ ငွဉ်ꩻလောင်းပြွယ်စီႏ၊ ထိရယောင်ꩻရေꩻ၊ မူႏခိုပေႏတန်၊ နန်းစရာႏငထဝ်း၊ ဗွေႏစဝ်းအဗွန်၊ သေရွုမ်ꩻမွန်းပျောႏ၊ နိုꩻဆောႏလွဝင်ꩻ၊ ကံကျင်ꩻသီလ၊ အဋ္ဌဥပုသ်၊ အားထုတ်လွမ်ꩻလာꩻ၊ ဘုရာꩻဓာတ်တောႏ၊ ပူႏဇောႏလူႏတန်ꩻ၊ သွမ်ꩻပန်ꩻဩဇာႏ၊ ဖြားဆားမူႏခို၊ လိုꩻမျိုꩻကစ၊ တရတပါꩻ၊ သာဓုဟွုန်ရောင်၊ ကောင်ဆောင်ႏလဲင်ꩻဝေါက်၊ ထာစောက်ထာꩻခုံႏ၊ ထာꩻအုံႏမုဲꩻရာꩻ၊ တွာညီႏစွိုးနုဲး၊ ထုဲႏပီထုံမျက်နာႏ၊ သာယာႏမွန်းပျောႏ၊ ဩဇာႏလဲ့လွိုင်ႏ၊ ခွုင်းကားလိုꩻခမ်း၊ ဇမ္ဗူႏတီႏပါႏ၊ မျက်နာႏကျွန်ꩻနဝ်၊ အီႏဟဝ်စွိုးနုဲး၊ ထုဲႏပီရွှေထုံ၊ သုဝဏ္ဏဘူမိ၊ ဖြီႏဖြီႏငထဝ်း၊ ဟဝ်လဲဉ်းခမ်းလင်၊ တင်ꩻလုဲတကာႏ၊ သမုဒ္ဒရာႏထီ၊ ထွတ်ငကီဆန်ထင်ႏ၊ ဗွုင်းဗင်းဝဲဉ်ထိုꩻ၊ သီဟိုဗောက်ꩻဗဝ်ႏ၊ သောမွိုင်ပုဲႏခွန်၊ ကောင်ရံႏပို့ဖတ်၊ အုတ်အတ်ငဝ်းသင်ႏ၊ ဟံႏတန်သီႏသွိုး၊ ထီတန်ငွိုးခြင်ꩻ၊ ပင်ႏလယ်ႏဗောက်ꩻဗဝ်ႏ၊ တွို့ꩻကွဉ်ႏနဝ်ထင်ꩻ၊ ထွတ်လင်ꩻပဉ်ဖုံႏ၊ ရောင်လွဉ်ပဉ်စွိုꩻ၊ ငွိုးဒေါ့ꩻသီချင်ꩻ၊ ပတ်ဆဲင်ထုံမောင်း၊ သင်ႏရောင်ဝူဝူ၊ ရဲဉ်ꩻလူႏရဲဉ်ꩻတန်ꩻ၊ ခမ်းကီပဇ္ဇုန်၊ ဒုံႏထုံဒုံႏမောင်း၊ ဟဲ့ꩻဟောင်လွဝင်ꩻ၊ တဖုံႏတဘင်ႏ၊ နဝ်ထင်ꩻတွို့ꩻကွဉ်ႏ၊ ထွက်လွဉ်ရူးရား၊ ပငါပရင်ꩻ၊ တျာႏဆေႏခမ်းခြွိုင်ꩻ၊ ပီနုဲးမေႏတင်ႏ၊ သတင်ꩻဟုံကျောႏ၊ မွန်းပျောႏသာႏယာႏ၊ နေရာဌာန၊ သုဝဏ္ဏဘူမိ၊ ပြည်ကြီးရွှေထုံ၊ ခွန်သင်ဗြဟ္မာႏ၊ သိကျာꩻကစ၊ တရတပါꩻ၊ ဖြားဆားပေႏတန်၊ အွန်အန်သာႏဓု၊ နုမောဒနာႏ၊ ဘုရာꩻဓာတ်တောႏ၊ အနုဖေါႏတံꩻခိုꩻ၊ မီꩻရိုꩻခွန်တန်၊ သူရိစန္တာႏ၊ ရာဇာဟော်ခံꩻ၊ မင်ꩻလောင်ꩻနေႏရာႏ၊ ခမ်းထာခမ်းရွဉ်၊ ခါလဲ့လော့ဆူ၊ ထူꩻထူꩻဆန်ꩻဆန်ꩻ၊ တခြာတန်ကို၊ ယိုလဲ့သေင်ႏဝါႏ၊ ခိန်ႏခါႏထင်ႏတွိုႏ၊ လွိုန်သံလွိုန်သီႏ၊ တောကြီꩻတခြာတန်ကို၊ ရိုꩻလဲ့သေင်ႏဝါႏ၊ ကဝ်ႏလွဉ်မွန်းဖျောင်၊ ဓာတ်တောႏအသောင်၊ ဟောင်ရိုꩻယူးဝါး၊ မာꩻအငဝ်းဖြေင်ꩻဦႏ၊ ကူႏဟွုန်းဆားဆား၊ သာႏဓုဟွုန်ဟဝ်၊ ဗွေႏစဝ်းဓာတ်တောႏ၊ ပူႏဇောႏဝုဲႏခေါက်၊ ငေါက်လင်ꩻကတူႏ၊ ဦးချဘုရာꩻ၊ သဒ္ဓါဓာတ်တောႏ၊ ပူႏဇောႏစွိုးနုဲး၊ ထုဲႏပီနီလိုꩻ၊ မူႏခိုဖြားဆား၊ ယူးဝါးအငဝ်း၊ အုံအဝ်ႏကိုꩻကွယ်ႏ၊ ခေါက်ဝုဲႏဘုရာꩻ၊ နုဲးနာꩻနုဲးနီ၊ ဝွေꩻသီးယူးဝါး၊ ထာꩻသားတိရစ္ဆာန်ႏ၊ လူႏတန်ꩻစွိုးနုဲး၊ ထုဲႏပီနီလိုꩻ၊ မူႏခိုဖြားဆား၊ ကွဲကားရိုꩻဗာႏ၊ သတ္တဝါႏနဝ်ꩻရွုမ်ꩻ၊ ထိုမ်ႏရွမ်ကုသိုလ်ႏ၊ အကျိုꩻစွိုးနုဲး၊ ခွေသီနီနာꩻ၊ သေင်ႏဝါႏလဲ့ခါ၊ တခြာကိုဖူꩻ၊ ထူꩻထူꩻဆန်ꩻဆန်ꩻ၊ တလာꩻတယံꩻ၊ ကောင်ခါႏကောင်ဒေင်၊ သေင်ႏဆျာႏသေင်ႏဗေ၊ တဖြေကံꩻကောႏ၊ မောက်ကောက်တောင်းတီ၊ တဝီးတွမ်ႏရင်ႏ၊ ကဝ်ႏတင်ႏကဝ်ႏတောင်ꩻဝုဲႏ၊ ကဝ်ႏကောင်ကဝ်ႏထီ၊ တသီးတနျာႏ၊ ဗွာသွမ်ႏနွုမ်ꩻဟွမ်၊ နွုမ်ꩻနွိုးဝုဲႏခေါက်၊ စွိုးနုဲးထုဲႏပီ၊ နီလိုꩻမူႏခို၊ ကကောင်တုဲကိုႏစီ၊ မွူးကီပင်လောင်း၊ ကောင်ႏလင်ꩻထေ့စူꩻ၊ နီဗွေႏဘုရာꩻ၊ တငါဓာတ်တောႏ၊ ပူႏဇောႏလူႏတန်ꩻ၊ ကိုႏယံရိုႏသေႏ၊ အစိန္တေယျတံꩻခိုꩻ၊ နိုꩻဆောႏသွုန်ႏသꩻ၊ တခိုႏလတခြာတန်၊ ဘုရာꩻအရောင်ႏ၊ လေတောင်ႏအွဉ်ႏနယ်၊ အံႏခွဲꩻအံႏဖြာႏ၊ သူပါသူသွယ်၊ အွဉ်ႏနယ်ပါဋိ၊ နိမိတ်ထီခမ်း၊ ယံဖေႏကသေ၊ ကနဝ်ꩻတွမ်ႏထွီႏ၊ ဒေႏပေႏတွမ်ႏရူး၊ ယူးနဝ်ꩻတွမ်ႏညဝ်ႏ၊ ယဝ်ꩻတွမ်ႏဖီးထူꩻ၊ ထွꩻနဝ်ꩻတွမ်ႏဆျာ၊ စောက်ꩻအာႏတွမ်ႏဝါးဗူႏ၊ ရန်ႏသူႏငထဝ်း၊ အုံရဝ်းလွဝင်ꩻ၊ စွိုးဆင်တဖူးဝေး၊ စွိုးနုဲးသေသောက်၊ ပီနုဲးပေါက်ဖေါႏ၊ သူႏတောႏထုံꩻနယ်ꩻ၊ တကျင်ꩻကတဝ်း၊ ဟွုန်ဟဝ်ရက်ပဲင်ꩻ၊ အတွင်ꩻဘုရာꩻ၊ ကဌပနာႏသွင်ꩻ၊ ပင်ꩻသော့ꩻဓာတ်တောႏ၊ တွိုက်ဖူꩻတွိုက်ကို၊ တံꩻခိုꩻအဗွန်၊ တန်စွဉ်ႏထန်းနဝ်ꩻ၊ ဒီဟဝ်အံႏဖြာႏ၊ ကျောင်ꩻတကာႏသီးယာ၊ ဘုရာꩻပဉ္စဝ်း၊ မော့ꩻနဝ်ꩻစခါ၊ တငါဓာတ်တောႏ၊ အံႏအော်ꩻအံႏဖြာႏ၊ တလို့ဒါႏတဝ်းကွိုနဲ ထဝ်းကဲသီးယာ၊ တဖုံႏတဉ်ဟွေး။

ပွိုးပီးနဝ်ꩻမꩻ၊ ကျောင်ꩻတကာႏသီးယာ၊ ဗြဟ္မာႏလူꩻလိုꩻ၊ မူႏခိုပေႏတန်၊ အံႏဖြာႏအံႏအော်ꩻ၊ ယော်ꩻခွဲꩻခီႏမွမ်ꩻ၊ တယွမ်ꩻနွိုင်ꩻတဝ်း၊ ဗွေႏစဝ်းဘုရာꩻ၊ ဓာတ်တောႏတငါ၊ ပျꩻနယ်အရောင်ႏ၊ မို့ꩻလောင်းကင်ဟဝ်၊ တဆဝ်ရောင်ႏတင်ႏ၊ စွိုးဆင်ႏဘုရာꩻ၊ လစ်ꩻပါꩻလစ်ꩻတွန်၊ ဗိုန်ပီလွဝင်ꩻ၊ တယိုꩻယွင်ꩻတဝ်း၊ အုံအဝ်ႏမို့ꩻကီ၊ ပီနုဲးထီခိုႏ၊ လူꩻလိုꩻခေါက်ဝုဲႏ၊ ကိုꩻကွယ်ႏထေင်းတင်ႏ၊ အွဉ်ႏဒင်ႏကတူႏ၊ ပူႏဇောႏလူႏတန်ꩻ၊ ကဝ်ႏခံꩻကဝ်ႏထာ၊ ကျက်သာႏဗွူဖေါင်း၊ ကောင်ကီထီကို၊ လွဉ်ရိုꩻကပီ၊ မွူးနီꩻနေင်ႏလာ၊ ခိန်ႏခါႏမရွေꩻ၊ လွေꩻဒွါႏပငါပရင်ꩻ၊ ခိန်ႏခါႏမအဝ်ႏ၊ ပေႏတန်ဖြားဆား၊ အံႏဖြာႏအံႏအော်ꩻ၊ ယော်ꩻခွဲꩻခီႏမွမ်ꩻ၊ သုဝဏ္ဏဘုမ္မိ၊ ပြည်ကြီးခမ်းတန်၊ သွမ်ꩻပန်ꩻဩဇာႏ၊ ဝေင်ꩻတန်ကသ၊ မွိုးနန်းစခါ၊ ဘုရာꩻပဉ္စဝ်း၊ နဝ်ꩻရာꩻမီႏထွာ၊ သဒ္ဓါလူႏတန်ꩻ၊ သွမ်ꩻပန်ꩻဩဇာႏ၊ ခိန်ႏခါႏမုဲꩻခါ၊ တရိုꩻဗာႏတဝ်း၊ မော့ꩻနဝ်ꩻစခါ၊ ကထွာသဲင်ꩻလိုꩻ၊ မီႏရိုꩻသဒ္ဓါႏ၊ စာႏဂလူႏတန်ꩻ၊ ပိတ်ကံႏဆင်ꩻရဲꩻ၊ ပစ္စေꩻဥစ္စာႏ၊ ပိုမာအပွန်း၊ တနန်းဒွုမ်တဝ်း၊ ငထဝ်းမအဝ်ႏ၊ လူႏဖူꩻနဝ်ꩻမꩻ၊ ကာလငခါ၊ ဖြားဆားမူႏခို၊ နီလိုꩻစေတနာႏ၊ သဒ္ဓါႏလွိုင်ႏပေါ်ꩻ၊ ရေႏရောႏလူႏတန်ꩻ၊ ပြန်ပြော်ꩻလွိုင်ႏအာ၊ တဇာတ်ခါလဲ့၊ လူႏဖူꩻမဲ့ဖြုံႏ၊ ပုဏ္ဏာꩻလူႏခံႏ၊ ခွန်ဖီသိဝရာဇ်၊ အဖြစ်ကထွာ၊ စခါဟော်ခံꩻ၊ လူႏတန်ꩻဖူꩻဗာႏ၊ ဒါနမဲ့ဖြုံႏ၊ အုံအဝ်ႏလိုꩻခမ်း၊ ပေႏတန်ဖြားဆား၊ ကောသားမဲ့ပꩻ၊ ခါလဲ့သဒ္ဓါႏ၊ တအာႏတအွိုင်၊ ခါလဲ့ဗိုန်နုဲး၊ ဉာဏ်ႏတွမ်ႏပညာႏ၊ ခါလဲ့သွဉ်ဖေႏ၊ စာပေႏတရာꩻ၊ သေနာႏနုဲးဝင်ꩻ၊ တင်ꩻလုဲတကာႏ၊ သေနာႏဟဝ်ကုဲ၊ တင်ꩻလုဲနီလိုꩻ၊ နိုꩻဆောႏဆုမ္မꩻ၊ စခါမွိုးနန်း၊ သွဉ်သင်ဖူꩻဗာႏ၊ အဝင်ꩻမꩻလဲ့၊ ငခါမဲ့စွဉ်ႏ၊ ဉာဏ်ႏတွမ်ႏပညာႏ၊ ဒါႏသေကွိုတဝ်း၊ ဗွေႏစဝ်းဘုရာꩻ၊ ပညာႏလွိုင်ႏအာ၊ သေငါꩻဟဝ်ကုဲ၊ တင်ꩻလုဲနီလိုꩻ၊ မူႏခိုအဉာဏ်ႏ၊ ဗွန်တန်သေလို့၊ ဇမ္ဗူဟံႏတကီ၊ နိဗွေႏဘုရာꩻ၊ ပါꩻငထဝ်းတဲက်ပီ၊ လစ်ꩻလီးတငါ၊ ဒန္တာအရောင်ႏ၊ လေတောင်ႏစွိုးနုဲး၊ ထုဲႏပီဆီမီး၊ နမ်းမန်ꩻဝန်ႏဖူꩻ၊ သိကျာꩻထူႏသွင်ꩻ၊ ဌာပနာတွိုက်ကို၊ အဝ်ႏတွိုႏငခါ၊ နီနာꩻကိုꩻကွယ်ႏ၊ ခေါက်ဝုဲႏလူႏဗာႏ၊ ကျောင်ꩻတကာႏသီးယာ၊ နဝ်ꩻခါကာလ၊ သက္ကရာဇာ၊ စဝ်းသိကျာꩻမင်ꩻ၊ အမာဝင်ꩻလစ်ꩻ၊ နစ်သက်ဗာႏသꩻ၊ အာႏရꩻဟွုန်ဟဝ်၊ ဗွေႏစဝ်းဘုရာꩻ၊ သုဓမ္မာနဝ်ꩻ၊ ဟဝ်ရာꩻလွိုက်ဆွတ်ꩻ၊ ရေႏမတ်နမ်းငါ၊ သဒ္ဓါႏလူႏတန်ꩻ၊ ခွမ်ꩻလာꩻကွိုꩻတဝ်း၊ သုဇာတာနဝ်ꩻ၊ သွုန်ႏသꩻဟဝ်မျတ်၊ လူႏကပ်ရတနာႏ၊ ပတ္တမျာꩻနာဒေါင်း၊ သုံꩻဆောင်ႏစွုမ်ႏနီꩻ၊ ဆျာꩻထီရေစက္ချ၊ နစ်သက်အာႏရꩻ၊ ဒါနသဒ္ဓါႏ၊ သုနန္တာႏနဝ်ꩻ၊ ကအဝ်ႏဆွထင်ႏ၊ စွုမ်ႏနီꩻစွုမ်ႏဟာ၊ နမ်းကီတံႏဆာႏ၊ သဒ္ဓါႏလူႏကပ်၊ ရေႏမတ်လူႏတန်ꩻ၊ သွင်ꩻသော့ꩻတွိုက်တာ၊ ပူႏဇောႏသဒ္ဓါႏ၊ သုစိတ္တာႏနဝ်ꩻ၊ ကအဝ်ႏဆွထင်ႏ၊ စွုမ်ႏဟာစွုမ်ႏနီꩻ၊ မဏိဇောတရပ်၊ ပတ္တမျာꩻစူသွို့ꩻ၊ အဝ်ႏဗွို့ꩻစူလောင်း၊ ကောင်းမုလူႏတန်ꩻ၊ သွင်ꩻသော့ꩻတွိုက်ဖူꩻ၊ ထွိုက်မꩻလူႏဗာႏ၊ ဒါနဇောမဏိ၊ သိကျာꩻလမ်းသား၊ နစ်သက်စေတနာႏ၊ သဒ္ဓါႏရဲဉ်ꩻလူႏ၊ ပူႏဇောႏငသေꩻ၊ ရေႏမတ်လူႏတန်ꩻ၊ နီဗွေႏဘုရာꩻ၊ တဖြာꩻတစွိုးစွိုး၊ မီႏတွိုႏဆုဲꩻချာ၊ ယံထွာဦꩻတန်ꩻ၊ သွင်ꩻသော့ꩻတွိုက်တာႏ၊ သုဝဏ္ဏဘုမ္မိ၊ ပြည်ကြီးရွှေထုံ၊ သူရိစန္တာႏ၊ ရာဇာခမ်းကို၊ မူႏခိုကိုꩻကွယ်ႏ၊ ခေါက်ဝုဲႏလူႏတန်ꩻ၊ ရွစ်တွိုးငခါ၊ ယိုထွူကွိုနဲ၊ တင်လုဲသီးယာ၊ နဝ်ꩻခါကာလ၊ ရာဇခွန်လောင်ꩻ၊ သူရိစန္တာႏ၊ မဟာမင်ꩻကြီꩻ၊ ဝင်ꩻနီတဖူးဝေး၊ ကွီဆုဘုရာꩻ၊ သဒ္ဓါႏရေႏရောႏ၊ ပူႏဇောႏသွင်ꩻဗာႏ၊ ဘုရာꩻတငါ၊ ဌာပနာႏတွိုက်ကို၊ ဗြဟ္မာႏလူꩻလိုꩻ၊ ကိုꩻကွယ်ႏပူႏဇောႏ၊ ဓာတ်တောႏနဝ်ꩻရွုမ်ꩻ၊ အုံအဝ်ႏမီႏခိုꩻ၊ နွိုနဝ်ꩻငထဝ်း၊ ဗွေႏစဝ်းဓာတ်တောႏ၊ သွားတော်တငါ၊ ပါꩻငထဝ်းတွိုက်ꩻနွိုင်ꩻ၊ တွိုင်ꩻနုဲးမပီ၊ နီဗွေႏဘုရာꩻ၊ တငါတောႏဟုံႏ၊ ဘုံႏတံꩻခိုꩻလဲ့တန်၊ အံႏအော်ꩻခီႏမွမ်ꩻ၊ တယွမ်ꩻနွောင်ꩻတဝ်း၊ နဝ်ꩻမꩻဓာတ်တောႏ၊ အွူႏဗွာတနျာႏသီး၊ ပီနုဲးဘုရာꩻ၊ ပါတိတ်ꩻသာခံꩻ၊ ရောင်ႏထင်ႏလေလင်း၊ အောင်ႏဆကင်ဟဝ်၊ အာကာမို့ꩻလောင်း၊ ကျောင်ႏသဲင်ꩻထေ့စူꩻ၊ ဖူးဝေးဝင်ꩻနီ၊ ကတူႏကီနုဲး၊ ထုဲႏပီပန်ꩻကုံꩻ၊ ပါကဆိုပ်ꩻထင်ႏ၊ စွိုးဆင်ရတနာႏ၊ စက္ကျာႏကဝိ၊ ကျောင်ႏထေ့လင်ꩻစူꩻ၊ ခွန်ဖြူဝင်ꩻနီ၊ ပီနုဲးထီꩻခူး၊ ဖူးဝေးဝင်ꩻနီ၊ ကတူႏကီအွဉ်ႏဒင်ႏ၊ နဝ်ꩻမꩻပင်ဆွုမ်ႏ၊ အုံအဝ်ႏခွုမ်ထွား၊ ဒွေါင်ႏဆွာꩻတငါ၊ ဖွိုႏထိုဟောင်ရိုꩻ တစူလစ်ꩻ၊ ဓာတ်တောႏဘုရာꩻ၊ ဒွေါင်ႏဆွာꩻတငါ၊ နဝ်ꩻခါကာလ၊ ရာဇဟော်ခံꩻ၊ ဝင်ꩻနီတဖူးဝေး၊ ထင်ႏထီႏထင်ႏသေ၊ ရိုꩻဖေႏလွဝင်ꩻ၊ ထာꩻလင်တမွေးတဝ်း၊ ဗွေႏစဝ်းဘုရာꩻ၊ ဓာတ်တောႏတငါ၊ နီနာꩻပူႏဇောႏဗာႏ၊ ငခါယိုရွုမ်ꩻ၊ နေးတွမ်ႏစူနုံ၊ လုံးစုံတဆီ၊ ကတူႏကီခေါက်ဝုဲႏ၊ ကိုꩻကွယ်ႏထေင်းထင်ႏ၊ အွဉ်ႏဒင်ႏကတူႏ၊ ဖူးဝေးဝင်ꩻနီ၊ အီႏတထီႏဒွုမ်တဝ်း၊ ဗွေႏစဝ်းဘုရာꩻ၊ ဓာတ်တောႏတငါ၊ နဝ်ꩻမꩻနောင်ႏတ၊ တဗꩻထင်ႏတအင်၊ အုံလင်ꩻတငိုဒွါႏ၊ ပငါပရင်ꩻ၊ နန်ꩻတွင်ꩻဟော်ကီ၊ မဲ့ထီမဲ့နောင်၊ ကြောင်းကြစိုꩻရိန်ႏ၊ ဗေင်ႏကုဲအံႏရံꩻ၊ ထာꩻနန်းတန်အာ၊ နဝ်ꩻခါနီဗွေႏ၊ ဓာတ်တောႏတငါ၊ ငခါယိုဟန်ႏလဲင်ႏ၊ အီႏသွင်ꩻဌာပနာႏ၊ ပင်ꩻသော့ꩻတွိုက်ဖူꩻ၊ ဗုဒ္ဓဟူꩻနီꩻ၊ လွိုန်သီႏလာဗွေ၊ မွူးထန်ႏနီꩻခါ၊ သိကျာꩻတနံ၊ နေးတွမ်ႏပတ္တမျာꩻ၊ အွပ်ခံꩻစိတ်ထာ၊ ပါတွမ်ႏစိတ်ရွဉ်၊ အွဉ်ႏသော့ꩻဓာတ်တောႏ၊ ဟော်ခံꩻဝင်ꩻနီ၊ သိကျာꩻကစ၊ ဖြွမ်းလွညီႏဝင်ꩻ၊ သွင်ꩻသော့ꩻဌာပနာႏ၊ သေႏချာႏထွူမꩻ၊ ထူႏယꩻအွတ်ꩻဗီႏ၊ အွဉ်ႏစီႏအွဉ်ႏခြပ်၊ ထပ်ထပ်ထွေထွေ၊ ဗွေႏစဝ်းဘုရာꩻ၊ စေႏတီႏတောႏမျတ်၊ ခေႏဖနတ်ခါလဲ့၊ သမ်းတယ်ႏတထပ်၊ ပတ်ပတ်လယ်လယ်၊ တယ်ႏအွတ်ꩻခွုမ်အင်ꩻ၊ အဆင်းအဆင်းအရန်းရန်း၊ ပျုပျင်ႏတယ်ႏမံႏ၊ သဘင်ႏပွယ်ꩻလမ်ꩻ၊ ဘိသိက်မင်္ဂလာႏ၊ သာႏဓုနုမော၊ ပွယ်ꩻတောႏချꩻပုံ၊ ဒုံႏထုံဝင်မောင်း၊ ထာꩻပူႏလောင်းကီ၊ နွုတ်ꩻနီꩻနွုတ်ꩻသာ၊ ဖျော်ပတာဟဝ်မွေး၊ လွေꩻလွေꩻသဲင်ꩻသဲင်ꩻ၊ ငလဲင်ꩻချာငါ၊ ဖြားဆားပေႏတန်၊ အွန်အန်ပျောႏဒွါႏ၊ ပငါပရင်ꩻ၊ သွိုꩻသွင်ႏဟွုန်ဟဝ်၊ ဗွေႏစဝ်းဘုရာꩻ၊ အငါအသောင်၊ ကောင်မုစေႏတီႏ၊ နီပအိုဝ်ႏအခမ်း၊ ဇမ္ဗူႏတီႏပါႏ၊ မျက်နာႏကျွန်ꩻနဝ်၊ အဲဉ်ထဝ်းအတု၊ ကောင်းမုနုဲးနုဲး၊ ထုဲႏပီလွဝင်ꩻ၊ တလွိုနွောင်ꩻတဝ်း၊ ကရိုꩻနဝ်ꩻရာꩻ၊ စူဠာမုနိ၊ ဝိဂန်ႏကောင်နာ၊ ကိုꩻကွယ်ႏဗာႏရွုမ်ꩻ၊ တနံသိကျာꩻ၊ ဗြဟ္မာႏရွုမ်ꩻနော၊ ဘုံႏထိုအွိုးကီ၊ နီလိုꩻပေႏတန်၊ ရဟန်ꩻသျင်ႏလူ၊ မူႏခိုဖြားဆား၊ ကိုꩻကွယ်ႏဗာႏတဝ်း၊ ဗွေႏစဝ်းဘုရာꩻ၊ ဌာပနာႏငသေꩻ၊ ဘုရာꩻသထုံႏ၊ ပိတ်ကံႏအုံဖွိုႏ၊ မူႏခိုဖြားဆား၊ နီနာꩻငခါ၊ ထီႏဗာႏတွမ်ႏမဲ့၊ စူလဲ့ဝုဲႏဗာႏ၊ ဘုရာꩻသထုံႏ၊ သုဝဏ္ဏဘုမ္မိ၊ ပတိရူပ၊ ဌာနထာꩻပူႏ၊ လစ်ꩻဆူꩻဘုရာꩻ၊ ဌာပနာႏသဲင်ꩻသွင်ꩻ၊ မီႏဆင်ႏချင်ꩻနုဲး၊ ထုဲႏပီရွှေထုံ၊ ဘုံႏတံꩻခိုꩻကတန်၊ မျတ်လဲဉ်းဘုရာꩻ၊ စူဠာမုနိ၊ ခမ်းကီဝတိံႏသာႏ၊ စဝ်းသိကျာꩻမင်ꩻ၊ သွင်ꩻသော့ꩻဌာပနာႏ၊ ဘုရာꩻပဉ္စဝ်း၊ ငဝ်းငွါမိန်းတောႏ၊ ဟော်ꩻနယ်ငသေꩻ၊ ပေႏတန်ဖြားဆား၊ ဝီႏဝါးပန်ကင်ꩻ၊ ခိုဗင်ႏမူႏနံꩻ၊ ယံသေရဝ်းဗာႏ၊ ဘုရာꩻရွှေထုံ၊ သမဲင်ꩻစာႏကို၊ ရိုꩻထာꩻပီးနဝ်ꩻ၊ ဒီဟဝ်ထွားဖတ်၊ နေးနာႏမတ်တောင်ꩻ၊ ဘုရာꩻလောင်ꩻနုဲးနုဲး၊ ပွိုးတယ်ႏရီးဗာႏ၊ ဘုရာꩻပဉ္စဝ်း၊ နဝ်ꩻခါကာလ၊ ပထမဖေႏဝင်ꩻ၊ ပြဲင်ႏသေꩻနဝ်ꩻရာꩻ၊ စေႏတီႏအလင်၊ သွစ်ꩻမွုန်ႏလစ်ꩻရေင်၊ ဥဒ္ဒိဿဓာတ်၊ ပျုပျင်ႏကိုꩻကွယ်ႏ၊ ခေါက်ဝုဲႏလူႏတန်ꩻ၊ သွမ်ꩻပန်ꩻဒဲဉ်ဗွာ၊ ဆုဲꩻချာတဲႏထောင်ႏ၊ ကောင်းမူꩻစေႏတီႏ၊ သူႏသီတိတ်ꩻခံꩻ၊ လူႏတန်ꩻသဒ္ဓါႏ၊ ဓမ္မာသောက၊ ရာဇခွန်လောင်ꩻ၊ တယ်ႏထောင်ႏပျုစု၊ ကောင်းမုဟံႏတကီ၊ စွုမ်ႏထီစွုမ်ႏခမ်း၊ ပေႏတန်ကိုꩻကွယ်ႏ၊ ခေါက်ဝုဲႏလူႏတန်ꩻ၊ ကိုႏယံရိုႏသေႏ၊ နေးတွမ်ႏစေတနာႏ၊ သဒ္ဓါႏပျုစု၊ ဥဒ္ဒိဿစေႏတီႏ၊ နီဗွေႏဘုရာꩻ၊ ဆေ့ꩻအာသွစ်ꩻမွုန်ႏ၊ ပုဲဒွိုန်းလစ်ꩻရေင်၊ မိန်းတောႏဘုရာꩻ၊ ဗျာဒိပ်ဟော်ꩻဖေႏ၊ ပေႏတန်သီးယာ၊ ကွဲကားဘုရာꩻ၊ သုဝဏ္ဏရွှေထုံ၊ ဘုံႏတံꩻခိုꩻယို၊ ပအိုဝ်ႏခမ်းထီ၊ မီႏလွေꩻဝုဲႏဗာႏ၊ တပေါက်ငါနဝ်ꩻ၊ လူꩻဟဝ်လိုꩻဒါႏ၊ စံႏစာႏတွိုႏရွစ်၊ ခမ်းမျတ်နိဗ္ဗာန်ႏ၊ ကျံႏဂန်ႏအကို၊ ရိုꩻထာꩻပီးနဝ်ꩻ၊ ဗွေႏစဝ်းဘုရာꩻ၊ စေႏတီႏအလင်၊ ဇမ္ဗူဟံႏကီ၊ တီႏပါႏကျွန်ꩻနဝ်၊ အဝ်ႏဗွေစွဉ်ႏထာꩻ၊ ဘုရာꩻရွှေထုံ၊ အုံအဝ်ႏခမ်းကီ၊ စဝ်းသိကျာꩻမင်ꩻ၊ လင်ꩻခေါက်လင်ꩻဝုဲႏ၊ မီႏတွိုႏဆုဲꩻချာ၊ ငဝ်းငွါဓိဋ္ဌာန်ႏ၊ ပေႏတန်ဖြားဆား၊ တရတပါꩻ၊ တရျာꩻတစွိုး၊ မီႏတွိုႏနမ်းငါ၊ မီႏထွာလိုꩻတန်၊ ခွန်ကွဉ်ဟော်ခံꩻ၊ ပွိုင်ႏခမ်းပွိုင်ႏထီ၊ စေႏတီႏဘုရာꩻ၊ မီႏထွာပျုပျင်ႏ၊ သုတ်သင်ႏလွမ်ꩻလာꩻ၊ မီႏထွာတယ်ႏမံႏ၊ ခွုမ်အင်ꩻသူႏသီ၊ မြေနီရန်ႏလဲင်၊ တိတ်ꩻသဲင်တိတ်ꩻခံꩻ၊ သုတ်သင်ႏထွာတီ၊ ထီꩻတွမ်ႏတံꩻခွဉ်ႏ၊ သွမ်ꩻပန်ꩻဩဇာႏ၊ သဒ္ဓါႏရေႏရောႏ၊ ပူႏဇောႏလူႏတန်ꩻ၊ သင်ꩻပွတ်သင်ꩻကယ်၊ ပစ္စေꩻဒဲဉ်ဟန်ႏ၊ ကဝ်ႏခံꩻကဝ်ႏထာ၊ ကျက်သာႏဗွူဖေါင်း၊ ကဝ်ႏရွဉ်ကဝ်ႏတောင်ꩻ၊ ကဝ်ႏကောင်ကဝ်ႏထီ၊ သီးတနျာႏဗွာသွမ်ႏ၊ ပူႏဇောႏလူႏတန်ꩻ၊ ထီပွိုင်ꩻမော်နမ်း၊ သုတ်သင်ꩻလုဲႏဖျင်၊ ဝင်ခန်းတလင်ꩻ၊ သုတ်သင်ႏကြေင်းကြေင်း၊ သေင်ႏမွူးဝါႏဆုံꩻ၊ မီꩻလုံꩻမီႏဒွုန်၊ ပွိုခူႏခွထိုꩻ၊ အတနုတ်လဲ့ခါ၊ ဖြုံခန်းကြောင်းကြောင်း၊ ဘုရာꩻသောင်ငါ၊ ယံတွာညီႏညီႏ၊ ယံမီႏစွိုးနုဲး၊ ထုံတန်မျက်နာႏ၊ ဘုရꩻတလင်ꩻ၊ သုတ်သင်ႏလွမ်ꩻလာꩻ၊ ဒါထင်ႏတွမ်ႏသုဲꩻ၊ မာꩻကုဲးကုဲးလွ၊ သူႏတောႏသီးယာ၊ ကျောင်ꩻတကာႏပေႏတန်၊ အုံခြေင်ဗေင်ႏအွီႏ၊ မာꩻမွုန်းစွိုးနဝ်ꩻ၊ မွူးရဝ်ꩻတမျိုꩻ၊ မွူးဟာတစွိုး၊ နိုꩻဆောႏလွဝင်ꩻ၊ သုတ်သင်ႏလွမ်ꩻလာꩻ၊ တဖြာꩻတစူ၊ ခူႏပွိုသေင်ႏရွီး၊ ကွီးအွော့ꩻသေင်ႏကနို့၊ ဖို့ꩻဖြုံခန်းမေႏ၊ ယံဖေႏကထွာ၊ နမ်းငါကုသိုလ်ႏ၊ အကျိုꩻသင်္သရာႏ၊ ပတ္ထနာႏကွီလွဉ်ꩻ၊ ဆုဟဝ်ဆုဒါႏ၊ သင်္သရာႏနမ်းငါ၊ ယံနွို့တွမ်ႏဗာႏ၊ စက္ကျာႏဖေါင်ႏဖြီ၊ ထီꩻထာထီꩻခံꩻ၊ အောင်ႏလံႏဖြေင်းဗွာ၊ တနျာႏတသီး၊ ပွိုင်ႏဗာႏထီခမ်း၊ ရာဇာဥက္ကဋ္ဌ၊ စက္ကျဝတေ၊ လေးကျွန်ꩻအဗွေႏ၊ ယံဖေႏထွာဗာႏ၊ မင်ꩻတရာꩻခွန်တန်၊ နမ်းလောင်းနမ်းကီ၊ ထွားတီစောင်ꩻစယ်ꩻ၊ တရာꩻဆီပါꩻ၊ သိကျာꩻတနံ၊ ခွန်ဖီဓိဋ္ဌာန်ႏ၊ တွိုင်ႏတယ်ႏထွူမꩻ၊ သက္ကရာဇာ၊ ခွန်သိကျာꩻမင်ꩻ၊ ဗွောင်ထင်ႏတံꩻဆာႏ၊ ရတနာႏပန်ꩻကုံꩻ၊ သွင်ꩻသော့ꩻတွိုက်ဖူꩻ၊ လူႏတန်ꩻပူႏဇောႏ၊ မွေႏတောႏကွိုတဝ်း၊ နဝ်ꩻခါသမ်းရိုꩻ၊ ခွေတံဆာယို၊ မီႏတွိုႏနမ်းငါ၊ တီႏပါလိုꩻခမ်း၊ ယံဖေႏကထွာ၊ တနံလူꩻပို၊ ဖီနွိုဒေဝါ၊ အဝ်ႏဒွါႏဘုရာꩻသောင်၊ ထီအောင်ဓာတ်ထျꩻ၊ ဒေဝလူꩻပို၊ လူꩻလိုꩻဟဲ့ꩻဟောင်၊ ထာꩻပူႏလောင်းကီ၊ ခွန်ဖီတနံ၊ ပန်ꩻကုံꩻတံꩻဆာႏ၊ အမေနာမ၊ ဒေဝကွိုတဝ်း၊ အုံအဝ်ႏထိန်ꩻတီ၊ စေတီႏကောင်းမု၊ သဗ္ဗညုဘုရာꩻ၊ ကိုႏစာꩻဓာတ်တောႏ၊ သုဝဏ္ဏဘုမ္မိ၊ စေတီဘုရာꩻ၊ လစ်ꩻပါꩻဌာပနာႏ၊ နဝ်ꩻခါခွင်သင်၊ ဒုံႏလင်ꩻတွမ်ႏထုံတန်၊ ကဝ်ႏခံꩻကဝ်ႏထာ၊ နတ်သာꩻလူꩻပို၊ လွဉ်ရိုꩻခေါက်ဝုဲႏ၊ ကိုꩻကွယ်ႏလူႏတန်ꩻ၊ အထုံတန်နဝ်ꩻ၊ ငဝ်းငွါဓိဋ္ဌာန်ႏ၊ ယံဖေႏနမ်းငါ၊ ကသဲင်ꩻထွာလူꩻ၊ အမေနာမ၊ သုဒေဝလူꩻ၊ ဟဲ့ꩻစူꩻဖန်ဗာႏ၊ သူတကာႏဟဲ့ꩻဟောင်၊ စောင်ꩻစယ်ꩻထွားတီ၊ စွုမ်ႏနီꩻစွုမ်ႏဟာ၊ သုဒေဝလူꩻ၊ မူꩻခိုဟဲ့ꩻဟောင်၊ ဝေဿဝဏ္ဏ၊ ဒေဝနတ်သာꩻ၊ ထူႏလင်ꩻပါတွမ်ႏ၊ ရတနာႏပိတ်မံႏ၊ လွဉ်တန်ꩻလွဉ်လူႏ၊ ပူႏဇောႏခေါက်ဝုဲႏ၊ ကိုꩻကွယ်ႏလူႏတန်ꩻ၊ ပိတ်မံႏထာခံꩻ၊ လူႏတန်ꩻထွူမꩻ၊ ဝေဿဝဏ္ဏ၊ ဒေဝလူꩻပို၊ ရိုꩻလဲ့ဓိဋ္ဌာန်ႏ၊ ခွေပိတ်မံႏယို၊ မီႏတွိုႏနမ်းငါ၊ ယံထွာလူꩻပို၊ ထာꩻပူႏထိုလောင်း၊ နဝ်ꩻကောင်းရိုꩻလဲ့၊ ထွာဖျော်မွေးစွဉ်ႏ၊ ဒေဝတနံ၊ သမုတ်ဖန်ဖေႏ၊ အမေနာမ၊ ဗောရိသတ္တလူꩻ၊ မူႏခိုဟဲ့ꩻဟောင်၊ ထွားတီစောင်ꩻစယ်ꩻ၊ ဘုရာꩻရွှေထုံ၊ ဝိသုကြုံႏနတ်သာꩻ၊ ဒေဝလူꩻပို၊ ရိုꩻလဲ့လင်ꩻဝုဲႏ၊ ကိုꩻကွယ်ႏလွဉ်လူႏ၊ ထူႏလင်ꩻပါတွ၎်ႏ၊ ပန်ꩻကုံꩻရတနာႏ၊ သေႏချာႏထွူမꩻ၊ ခွေပန်ꩻကုံꩻယို၊ မီႏတွိုႏနမ်းငါ၊ ယံထွာလူꩻပို၊ ထာꩻပူႏထိုလောင်း၊ ကုံးပေါ်တကီ၊ ထွားတီစောင်ꩻစယ်ꩻ၊ ရဲခါꩻရန်ႏသူႏ၊ ဝိသုကြုံႏနတ်သာꩻ၊ ရတနာႏပန်ꩻကုံꩻ၊ ခါလဲ့ထွာမွေး၊ ဒေဝလူꩻပို၊ လူꩻလိုꩻဖန်ဖေႏ၊ အမေနာမ၊ ဦနိန်သာရလူꩻ၊ မူꩻခိုဟဲ့ꩻဟောင်၊ ထွားတီကောင်ႏမူꩻ၊ သဗ္ဗညုတာ၊ ကိုႏစာꩻဓာတ်တောႏ၊ လစ်ꩻကဒို့ꩻသံနား၊ လစ်ꩻဖြာꩻခွန်လူꩻ၊ လစ်ꩻဆူႏတနံ၊ တစွိုးနဝ်ꩻရာꩻ၊ စဝ်းသိကျာꩻမင်ꩻ၊ သမုတ်ဖန်ဖေႏ၊ အမေနာမ၊ စတုဝိသုက၊ မဟာဒေဝလူꩻ၊ သိကျာꩻရိုꩻနော၊ သူႏတောႏသီးယာ၊ နီဗွေႏဘုရာꩻ၊ သုဝဏ္ဏဘုမ္မိ၊ ပြည်ကြီးရွှေထုံ၊ အုံထိန်ꩻထွားတီ၊ စဝ်းသိကျာꩻမင်ꩻ၊ ဖန်ဆင်ꩻငသေꩻ၊ လစ်ꩻပါꩻခွန်လူꩻ၊ သီစဲင်ႏလစ်ꩻနား၊ လစ်ꩻဖြာꩻတနံ၊ ထွားတီလွမ်ꩻလာꩻ၊ နာꩻနာꩻနီꩻနီꩻ၊ ဝိန်တန်ရွှေထုံ၊ အုံထိန်ꩻအဝ်ႏပွိုး၊ ရွစ်တွိုႏငခါ၊ ယံထွားတီဗာႏနော၊ မိန်းတောႏငဝ်းငွါ၊ သမာႏဓိလူꩻ၊ လစ်ꩻဆူႏလစ်ꩻဖြာꩻ၊ ယံထွားတီဗာႏနော၊ သိကျာꩻရိုꩻဖေႏ၊ သေႏချာႏထွူမꩻ၊ နဝ်ꩻခါကာလ၊ သက္ကရာဇာ၊ စဝ်းသိကျာꩻမင်ꩻ၊ မင်္ဂလာႏခံꩻပွယ်ꩻ၊ တွဲႏထုံဒုံႏမောင်း၊ ဟဲ့ꩻဟောင်လွဝင်ꩻ၊ နဝ်ထင်ꩻတွို့ꩻကွဉ်ႏ၊ လွဉ်ခြွဉ်းလွဉ်ဗူႏ၊ ထာꩻပူႏလောင်းကီ၊ နွုတ်ꩻနီꩻနွုတ်ꩻနာꩻ၊ ဗြဟ္မာႏလူꩻလိုꩻ၊ မူႏခိုဖြားဆား၊ နဂါꩻဂဠုန်ႏ၊ ကုမ္ဘန်ႏယက္ခ၊ ဟိမဝန္တာႏ၊ ထာꩻခြာတန်ဖူꩻ၊ မူႏခိုမွူးထီး၊ ကောင်ကီထီဖူꩻ၊ မူႏမူႏခိုခို၊ သွိုꩻသွင်ႏမွန်းပျောႏ၊ သာဓုခေါ်ရောင်၊ ကောင်ဆောင်ႏလဲင်ꩻဝေါက်၊ ထာꩻစောက်ထာꩻနုံꩻ၊ ထာꩻအုံႏမုဲꩻရာꩻ၊ ထွာလိုꩻငစင်စင်၊ နဝ်ထင်ꩻတွို့ꩻကွဉ်ႏ၊ လွဉ်ရောင်အုံႏအုံႏ၊ တဖုံႏတဖင်ႏ၊ ရဲဉ်ꩻလွဉ်အလူႏ၊ စင်ဖြူႏဒါန၊ သဗ္ဗတ္ထသဲဉ်အန်၊ လူႏတန်ꩻပူႏဇောႏ၊ မွေႏတောႏဘုရာꩻ၊ ရတနာႏခံꩻထာ၊ ကားကပါလွေꩻ၊ ပတ္တမျာꩻဥစ္စာႏ၊ ရတနာႏရွဉ်ခံꩻ၊ သော့ꩻထင်ꩻအွပ်ꩻထာ၊ တလင်ႏခံꩻဖူꩻ၊ ကျူႏလောင်ꩻရွဉ်ထာ၊ နဝ်ꩻခါဆုဲꩻချာ၊ ခွုင်းကားကအဝ်ႏကုဲ၊ ရွဉ်ထာနဝ်ꩻရာꩻ၊ သိကျာꩻခွန်လူꩻ၊ ထူႏတွမ်စာႏရင်ꩻ၊ အွဉ်ႏလို့ꩻငသေꩻ၊ မြေထဲဟံႏဖူꩻ၊ ကောင်ႏမူꩻတလင်ꩻ၊ အစဲင်ႏကွဉ်ႏနဝ်၊ စဝ်းသိကျာꩻမင်ꩻမျတ်၊ အရပ်ယိုနဝ်ꩻ၊ ဗွေႏစဝ်းဘုရာꩻ၊ တကာႏလူႏတန်ꩻ၊ ရွဉ်ခံꩻရတနာႏ၊ ယံထွာကုသိုလ်ႏ၊ အကျိုꩻနဝ်ꩻငါ၊ ရွဉ်ထာဘုရာꩻ၊ ဥစ္စာသံဃိက၊ တကာႏမတကာႏခို၊ လူꩻလိုꩻဗြဟ္မာႏ၊ တထူႏဒါႏတဝ်း၊ ဗွေႏစဝ်းဘုရာꩻ၊ သိကျာꩻခွန်လူꩻ၊ ခူႏနေးထာꩻအောင်၊ အွဉ်ႏသေꩻသွင်ႏသော့ꩻ၊ အယော့အဖွိုꩻ၊ သိုမ်ဆီသူသောင်ꩻ၊ ကောင်လောင်းထာꩻပူႏနာ၊ သိကျာꩻမင်ꩻရိုꩻ၊ အရပ်ယိုနဝ်ꩻ၊ ဗွေႏစဝ်းဘုရာꩻ၊ ငဝ်းငွါဟော်ꩻသေꩻ၊ အမေနာမ၊ သုဝဏ္ဏဘုမ္မိ၊ ဝန္တာမိကောင်၊ ဟဲ့ꩻဟောင်သိုမ်ပါꩻ၊ သမုဒ္ဒရာႏတီ၊ ဝွေꩻသီးသိုမ်စွိုး၊ ပွိုးစွဉ်ႏအစော့ꩻ၊ ကျုံႏမော့ꩻဆွုမ်ႏလွ၊ နဝ်ꩻမꩻဖန်ဖေႏ၊ အမေနာမ၊ သုဏ္ဏဘုမ္မိ၊ ပတိရူပ၊ ဌာနခွင်ႏလောင်း၊ သူရိစန္တာႏ၊ ရာဇာခွန်တန်၊ မွိုးနန်းစခါ၊ ထွာဝင်ꩻအတန်၊ ပွိုင်ႏခမ်းပွိုင်ႏထီ၊ နီဘုရာꩻဗျာဒိပ်၊ လိတ်လုဲꩻစာႏပေႏ၊ အွဉ်ႏသေꩻသမဲင်ꩻ၊ လိတ်သဲင်လုဲꩻထာ၊ ကျောက်ဖျာလောင်းကီ၊ စင်နီစင်ပါꩻ၊ သေငါဒွုမ်တဝ်း၊ တဖြဝ်းလို့ငါႏ၊ ကျောက်ဖျာႏလုံးလောင်း၊ တကြောင်းတဝ်းနုဲး၊ ထုဲႏပီဖုဲလာႏ၊ တောင်ႏမာႏငဝ်းငွါ၊ ငခါယိုခွေ၊ ထေထန်ႏစီႏစပ်၊ အရပ်အရာႏ၊ ဌာပနာႏငသေꩻ၊ ဘုရာꩻရွှေထုံ၊ သုဝဏ္ဏဘုမ္မိ၊ ပတိရူပ၊ ဌာနနေႏရာႏ၊ ဘုရာꩻမွေႏတောႏ၊ ခွုင်းကားရွှေထုံ၊ ရင်းခြွိုင်းတံꩻဆာႏ၊ ဘုရာꩻစေႏတီႏ၊ ခွေသွဉ်းစီႏစပ်၊ လိတ်ဖတ်လင်္ကာႏ၊ အလာႏအစော့ꩻ၊ သော့ꩻထဲင်းစပ်စီႏ၊ ထွတ်ထဲင်းထေထန်ႏ၊ ပြန်ႏနယ်ပအိုဝ်ႏ၊ မူႏခိုဖြားဆား၊ ယံဖေႏထွားဖတ်၊ မတ်နာႏတောင်ꩻတောင်ꩻ၊ ကျောင်ꩻတကာႏသီးယာ၊ နဝ်ꩻခါသာႏသနာႏ၊ အနေင်ႏငတ်ꩻရေင်၊ ခါးလားဖေ့ငတ်၊ ခါးလားမွတ်သာ၊ ကျိုꩻစာꩻလွေꩻလွ၊ ရွှေထုံႏဘုရာꩻ၊ အခွိုတ်ထွာလိုꩻ၊ ပျိုအိုဖြားဆား၊ ဝီႏဝါးပန်ကင်၊ ခိုဗင်ႏမူႏနံꩻ၊ အာႏသန်အတွင်ꩻ၊ ခွန်နင်ꩻသီးယာ၊ ဘုရာꩻလက်ဆောင်ႏ၊ စီႏရင်ႏပေါင်ဖန်၊ သင်္ကန်ꩻသပိတ်၊ ပရိက္ခရာႏ၊ သဒ္ဓါႏသမျ၊ ပိဏ္ဍပါတံ၊ သွမ်ꩻပန်ꩻဩဇာႏ၊ ကျက်သာႏဗွူဖေါင်း၊ ထီရောင်းထီခွꩻ၊ ထီအွꩻထီလူး၊ တံႏပူႏဘဝါႏ၊ ထီတခြာမဲ့ဖြား၊ သိုမ်ပါꩻစေႏတနာႏ၊ သဒ္ဓါႏသမျ၊ ကားကလꩻဒါႏ၊ ခွမ်ꩻလာꩻလူႏဖုဲ၊ တောင်းလုဲဆျာထီႏ၊ ဆီမီးတံꩻခွဉ်ႏ၊ မော်နမ်းထီဖွိုင်ꩻ၊ ခွုင်းကတတ်နွိုင်ႏနော၊ သူႏတောႏသီးယာ၊ မီႏထွာဥစ္စာႏ၊ ရတနာႏရွဉ်ထာ၊ မီႏတလꩻဒါႏတဝ်း၊ စွိုးနဝ်ꩻရိုꩻလဲ့၊ မဲ့စွုမ်ႏလွေꩻတွိုႏ၊ ဝုဲႏထင်ႏတွမ်ႏစူ၊ ဗိုဖူႏမတ်ပီ၊ ကတူႏကီအွဉ်ႏဒင်ႏ၊ ဝုဲႏထင်ႏကွီဆုꩻ၊ ကောင်းမုဝုဲႏဗာႏ၊ ဘုရာꩻရွှေထုံ၊ သုဝဏ္ဏဘုမ္မိ၊ နီဗွေႏဘုရာꩻ၊ ကိုႏစာꩻဓာတ်တောႏ၊ ပူႏဇောႏလွေꩻခေါက်၊ ငေါက်လင်ꩻကတူႏ၊ မူႏမူႏခိုခို၊ ကိုငကိုစီ၊ လွိုန်သီႏလာဗွေ၊ ထွေဝင်ꩻလွေꩻလူꩻ၊ မူႏခိုဖြားဆား၊ သီးယာတဖုံႏ၊ အုံအဝ်ႏမတ်နုဲး၊ ထုဲႏပီလူႏဗာႏ၊ ဥစ္စာႏရွဉ်ထာ၊ စခါထာꩻပူႏ၊ လစ်ꩻဆူႏဌာပနာႏ၊ ကျိုꩻစာꩻလွေꩻစူꩻ၊ လူႏတန်ꩻနောလောင်ꩻ၊ မောင်ႏမူႏသီးယာ၊ ဖြားဆားပေႏတန်၊ မူႏနံꩻခိုဗင်ႏ၊ သင်္ဃာႏရဟန်ꩻ၊ ယံဖေႏလွေꩻလွ၊ ပဌမစေႏတီႏ၊ နီဗွေႏဘုရာꩻ၊ စခါကာလ၊ လက်ထက်ခွန်လောင်ꩻ၊ သူရိစန္တာႏ၊ မဟာမင်ꩻကြီꩻ၊ ဝင်ꩻနီတဖူးဝေး၊ ဘုရာꩻဖေႏအပ်၊ ဓာတ်တောႏတငါ၊ ပျောႏရာꩻကိန်ꩻဝတ်၊ ဓာတ်တောႏခင်ႏလမ်း၊ ဌာပနာႏလွေꩻသွင်ꩻ၊ တယ်ႏထင်ႏစေႏတီႏ၊ တင်ႏထီꩻဟွဲဟိန်ႏ၊ ကိန်ꩻဝတ်အရပ်၊ လျောက်ပတ်တောႏလျောႏ၊ အံႏအော်ꩻခီႏမွမ်ꩻ၊ တယွမ်ꩻနွိုင်ꩻတဝ်း၊ ဗွေႏစဝ်းဘုရာꩻ၊ စင်ပါစင်နီ၊ ဒီဟဝ်လွေꩻဝုဲႏ၊ ကိုꩻကွယ်ႏလူႏတန်ꩻ၊ ပန်ꩻတကာႏသီးယာ၊ ငခါယိုနီ၊ သီခွေကစ၊ သဲင်ꩻလꩻထွာလိုꩻ၊ ဗွန်ကုသိုလ်ႏကံႏ၊ သန်ဟဝ်နဝ်ꩻမꩻ၊ သဲင်ꩻလꩻထွာဗာႏ၊ မနုဿာႏနီလိုꩻ၊ ငခါယိုနီ၊ သီခွေနဝ်ꩻရာꩻ၊ သံးသဲင်ꩻညာႏတောႏ၊ လောကမန်ႏကင်ꩻ၊ တရာꩻမင်ꩻမျတ်၊ ဓာတ်တောႏလစ်ꩻဆူႏ၊ နီဖူးတွေ့ဗာႏ၊ ကျောင်ꩻတကာသီးယာ၊ တရာꩻသံဝွေ၊ သွင်ꩻသꩻသွင်ꩻဟို့ꩻ၊ ဆုမ္မꩻနမ်းကဝ်ႏ၊ ပီနဝ်ꩻကွိုနဲ၊ တင်ꩻလုဲသီးယာ တဖုံႏတဉ်ဟွေး။

ပွိုးပီးနဝ်ꩻမꩻ၊ သုဝဏ္ဏဘုမ္မိ၊ ပြည်ကြီးရပ်မ၊ ရာဇခွန်လောင်ꩻ၊ သူရိစန္တာႏ၊ ရာဇမင်ꩻကြီꩻ၊ ဝင်ꩻနီဖူးဝေး၊ မော့ꩻနဝ်ꩻစခါ၊ ဝွေꩻသီးမော့ꩻဗာႏ၊ ဘုရာꩻကောဏ္ဍည၊ သမ္ဗုဒ္ဓအစိုး၊ ဖူးဝေးဝင်ꩻနီ၊ ဝွေꩻသီးလူႏတန်ꩻ၊ ဗန်ႏဗွာဖဝါႏ၊ မဲ့ငါဒွုတ်ꩻသွတ်ꩻ၊ စတွမ်ႏတံꩻပူႏ၊ လူႏတန်ꩻဖူꩻဗာႏ၊ နဝ်ꩻမꩻဝွေꩻသီး၊ ညီနောင်တဖူးဝေး၊ သန္ဓေႏသဲင်ꩻတယ်ႏ၊ ဝက်တဲ့ဟို့ꩻကို၊ ဝွေꩻယိုတဖူးဝေး၊ သဲင်ꩻကွုတ်ထွာဗာႏ၊ ရာဇာဟော်ခံꩻ၊ ခွန်တန်သုဝဏ္ဏ၊ ဌာနဘုမ္မိ၊ ရွှေထုံခမ်းကီ၊ ခွန်ဖီသိကျာꩻ၊ အံႏဖြာႏခီႏမွမ်ꩻ၊ နာဟုဲးဖေႏဝင်ꩻ၊ ဟော်ꩻခံꩻသူရိစန္တာႏ၊ သူရိယာႏနေမင်ꩻ၊ ဖူးတွေ့မော့ꩻဗာႏ၊ ဘုရာꩻဂေါတမ၊ တေဇတံꩻခိုꩻ၊ ဗွန်ကံထိုတဲး၊ စယ်ႏပင်ႏခမ်းထီ၊ ညီႏဟဝ်သာႏယာႏ၊ ရပ်ရွာႏဝေင်ꩻတန်၊ သန်တဲဗွန်ကံႏ၊ အံႏဖြာႏခီႏမွမ်ꩻစူꩻ၊ လူꩻတနံဒေဝါႏ၊ စဝ်းသိကျာꩻမင်ꩻ၊ ထင်ႏဟွုန်ထင်ႏသေ၊ ဒေဝါတနံ၊ စဝ်းသိကျာꩻမင်ꩻ၊ ဗြဟ္မာႏလိုꩻလူꩻ၊ အီႏခူႏထာꩻအောင်၊ ဌာပနာႏသွင်ꩻအီ၊ ထီဖွိုင်ꩻသဲင်မျ၊ အီႏဌပနာႏဆမုဲꩻ၊ ခေါက်ဝုဲႏလျောက်လဝ်း၊ စဝ်းသိကျာꩻမင်ꩻ၊ နမ်ႏလင်ꩻနမ်ႏထိုး၊ ကိုစီကိုင၊ ထူႏယꩻခွုမ်ထင်ႏ၊ သွိုဝင်ꩻကိုႏစီ၊ စွုမ်ႏဖြီးစွုမ်ႏဖြာꩻ၊ ညီႏညာဟွုန်ဟဝ်၊ နဝ်ꩻခါသိကျာꩻ၊ ထွားလယ်ႏချာငါ၊ မျက်နာႏဆကွဉ်ႏ၊ ကြောင်းကြဲ့ညီႏညာႏ၊ ဌာနရပ်ယို၊ ပီနုဲးဗွူတလင်ꩻ၊ သာႏလဲဉ်းတင်ꩻလုဲ၊ နုဲးခွေမဲ့စပ်၊ အရပ်ယိုနဝ်ꩻ၊ ဟဝ်ထွူပွိုခူႏ၊ တနံလူꩻပို၊ ဖွိုႏထိုစူသောင်ꩻ၊ နဝ်ꩻကောင်းဖြီႏဖြီႏ၊ လစ်ꩻဆီလစ်ꩻသောင်ꩻ၊ ထာꩻအောင်ဆုံးယော့၊ နဝ်ꩻမꩻမော့ꩻစွဉ်ႏ၊ မွိုးနန်းစခါ၊ ဘုရာꩻသိုမ်ဆူႏ၊ ခွန်လူꩻတနံ၊ ဌာပနာႏငသေꩻ၊ ယေအိုးထီဖွိုင်ꩻ၊ အဝ်ႏဒို့ꩻထွိုင်ꩻခါꩻ၊ ဘုရာꩻကကုသန်ႏ၊ ကောဏဂုံႏက၊ တွမ်ႏကဿပ၊ စခါဝွေꩻဗွေႏ၊ ပသအီဒါႏ၊ စခါဓာတ်တောႏ၊ ဟော်ခံꩻရာဇာႏ၊ ခွန်တန်တဖူးဝေး၊ ဝင်ꩻနီကစ၊ တရတပါꩻ၊ တရျာꩻတစွိုး၊ လူꩻပိုဗြဟ္မာႏ၊ သတ္တဝါႏတင်ꩻလုဲ၊ ဟွုန်ဟဝ်သာႏဓု၊ နုမောဒနာႏ၊ သိကျာꩻမင်ꩻမျတ်၊ နတ်တနံလူꩻ၊ ထူႏထန်ႏထီဖွိုင်ꩻ၊ ကဝ်ႏခံꩻကဝ်ႏရွဉ်၊ ပတ္တမျာꩻသဲင်စီႏ၊ ထီဖွိုင်ꩻအကို၊ လူꩻပိုထင်ႏထီႏ၊ ရောင်ႏတောႏကူစွိုး၊ တံꩻခိုꩻနုဖေါႏ၊ တောႏတောႏမွေးတဝ်း၊ ဗွေႏစဝ်းဘုရာꩻ၊ မြူတာထီဖွိုင်ꩻ၊ ဘုံꩻတွမ်ႏတံꩻခိုꩻ၊ ကျောင်ႏထိုငကီ၊ ပီနုဲးမွူးလာ၊ ဥပမာႏစွိုးနုဲး၊ ထုဲႏပီဆာႏထန်ႏ၊ ကင်ဟဝ်အာကာႏ၊ တနျာႏတသီး၊ မို့ꩻကီမို့ꩻလောင်း၊ ရောင်ႏတင်ႏတဆဝ်၊ နဝ်ထင်ꩻတွို့ꩻကွဉ်ႏ၊ အွဉ်ႏနယ်တံꩻခိုꩻ၊ လူꩻလိုꩻကတူႏကီ၊ ခွန်ဖီသိကျာꩻ၊ ထူႏလင်ꩻရတနာႏ၊ ကျောက်ဖျာလုံးတန်၊ ပတ္တမျာꩻသူဗီႏ၊ ခွန်လူꩻအီလင်ꩻ၊ ထင်ႏဖျော်ကာလ၊ ပတ္တမျာꩻကျောက်ဖျာ၊ သုဲꩻထာꩻသုဲꩻခံꩻ၊ ဒါခံꩻဆကလ၊ ကျောက်ဖျာဆကီ၊ သီနားလစ်ꩻဖဲ့ꩻ၊ ခါလဲ့ဆေင်ႏကင်း၊ ခံꩻထာပတ္တမျာꩻ၊ ကျောက်ဖျာလစ်ꩻဗီႏ၊ သိကျာꩻဒို့ꩻထင်ႏ၊ ရောင်ႏတင်ႏကျောက်ဖျာ၊ နဝ်ꩻခါရိုꩻကောင်း၊ လစ်ꩻဆောင်စီႏနော၊ အဲဉ်လုဲးဒွုန်ဗွို၊ ရိုꩻလဲ့နမ်းနုဲး၊ ထုဲႏပီလွဝင်ꩻ၊ သိကျာꩻမင်ꩻမျတ်၊ ပူႏဇောႏဌာပနာႏ၊ တွိုက်တာအဖူꩻ၊ ထူႏတွမ်ႏရတနာႏ၊ ပတ္တမျာꩻကဝ်ႏခံꩻ၊ ငတ်ꩻတုဲငတ်ꩻဗောင်၊ အသောင်လစ်ꩻဖဲ့ꩻ၊ ခါလဲ့လစ်ꩻဆူႏ၊ ခွန်လူꩻတနံ၊ ကဝ်ႏခံꩻကဝ်ႏထာ၊ ဣန္ဒနီလာ၊ ပတ္တမျာꩻကောမုတ်၊ ဥဿဖယား၊ သန္တာပလယ်ꩻ၊ နဝ်ꩻရာꩻသွင်ꩻဆ၊ ထာဝကွိုတဝ်း၊ နဝ်ꩻမꩻနေးတွမ်ႏ၊ ပတ္တမျာꩻထီဖွိုင်ꩻ၊ လစ်ꩻဆီလစ်ꩻဖြုံႏ၊ ကွဲသော့ꩻကွဲသွင်ꩻ၊ သိကျာꩻမင်ꩻမျတ်၊ သမ်းနေးသမ်းထူႏ၊ လုံးတန်ကျောက်ဖျာ၊ ဒို့ꩻခါဆကီ၊ ဣန္ဒနီလာ၊ နဂါꩻအသွဲႏ၊ ပလယ်ႏကောမုဒ်၊ ဥဿဖယား၊ ပတ္တမျာꩻရွဉ်ထာ၊ ပေ့ꩻခါꩻတထပ်၊ နတ်တနံဒေဝါႏ၊ သိကျာꩻခွန်ဖီ၊ ဌာပနာႏငသေꩻ၊ ရေအိုးထီဖွိုင်ꩻ၊ လစ်ꩻဖြုံႏလစ်ꩻဆူႏ၊ ခွန်လူꩻဌာပနာႏ၊ သေႏချာႏဖြီႏစီႏ၊ ဆကီနဝ်ꩻရာꩻ၊ သိကျာꩻနေးတွမ်ႏ၊ သဲင်ဟုံပတ္တမျာꩻ၊ တခါꩻရဲပေ့ꩻ၊ ဒို့ꩻခါꩻဆကီ၊ သီနားလစ်ꩻဖဲ့ꩻ၊ နဝ်ꩻမꩻလဲ့ခါ၊ ဌပနာႏသွင်ꩻ၊ တွိုက်ကိုတွိုက်ဖူꩻ၊ နဝ်ꩻမꩻထူႏတွမ်ႏ လုံးကျောက်ဖျာ၊ ပေ့ꩻခါꩻဆကီ၊ နွုတ်ꩻဗီႏနွုတ်ꩻထပ်၊ နဝ်ꩻမꩻတယ်ႏမံႏ၊ အွတ်ꩻခံꩻအွတ်ꩻထာ၊ သေႏချာႏဖြီႏစိႏ၊ သိကျာꩻနေးတွမ်ႏ၊ ရွဉ်ခံꩻရတနာႏ၊ တောင်ꩻတနျာႏတောင်ꩻခံꩻ၊ တယ်ႏမံႏကွိုတဝ်း၊ နဝ်ꩻမꩻဆကီ၊ သိကျာꩻသမ်းထူႏ၊ လုံးသူႏအွတ်ꩻပသီႏ၊ ခိုႏကီတယ်ႏမံႏ၊ အတန်တန်အထပ်ထပ်၊ နတ်တနံသိကျာꩻ၊ ပတ္တမျာꩻဓာတ်တောႏ၊ ကောဇာဒီဃ၊ မူလသက္ကရာဇ်၊ တစ်နှစ်နဝ်ꩻရာꩻ၊ ဟောင်ရိုꩻတရျာꩻ၊ သာလွိုတဆီ၊ လွိုတကီတဗာႏ၊ လွိုန်သီႏလာလောင်း၊ ဟောင်ရိုꩻသိုမ်နီꩻ၊ မွူးနီꩻစနေႏ၊ ပသေအီဒါႏ၊ မြူတာႏထီဖွိုင်ꩻ၊ သွင်ꩻသော့ꩻဌာပနာႏ၊ ဘုရာꩻဓာတ်တောႏ၊ ပူႏဇောႏလူႏတန်ꩻ၊ ထပ်မံႏထွူမꩻ၊ စဝ်းသိကျာꩻမင်ꩻ၊ သမုတ်ဖန်ဖေႏ၊ အမေနာမ၊ မျသိန်းတန်ဘုရာꩻ၊ သိကျာꩻဘုရာꩻ၊ ခါလဲ့ရိုꩻနော၊ အဝ်ႏဗော့ꩻလွဝင်ꩻ၊ စာမူတောင်ႏမာႏ၊ ဘုရာꩻသမဲင်ꩻ၊ လိတ်သဲင်လုဲꩻခံꩻ၊ ယံဟွုန်ရဝ်းဗာႏ၊ ကျံႏတန်ကျံꩻကြီꩻ၊ နီဗွေႏဘုရာꩻ၊ စခါအွဉ်ႏကုဲ၊ လိတ်လုဲꩻလုံးလောင်း၊ သိကျာꩻခွန်ဖီ၊ နေးတွမ်ႏတစို၊ တောက်ꩻဒိုငသေꩻ၊ စာပေကမ္ပယ်ႏ၊ ယံဖေႏခွေသီ၊ နီနာꩻထီႏဗာႏ၊ စွုမ်ႏဖြာꩻမူႏခို၊ ပအိုဝ်ႏဘာႏသာႏ၊ ဘုရာꩻသမဲင်ꩻ၊ လိတ်သဲင်ကမ္ပယ်ႏစာ၊ ယံဟွုန်ဗာႏရဝ်း၊ အုံအဝ်ႏကျောင်ꩻကီ၊ ဘုန်ႏကြီꩻနောင်ကလာꩻ၊ မေတ္တာရေႏမတ်၊ စပ်စီႏပက်ဗွောင်၊ ခွုင်းကားကသေ၊ ကလေကစဲင်း၊ လိတ်သဲင်ကျံꩻကြီꩻ၊ အုံမီနန်းယူႏ၊ မီႏထူႏထေထန်ႏ၊ လိတ်မန်ႏတောင်ႏမာႏ၊ ယံထွာပအိုဝ်ႏ၊ မူႏခိုအေငါဝ်း၊ လꩻတဝ်းမကောင်း၊ ကျံႏစယ်ႏနောင်ႏတ၊ သွုန်ႏသꩻနန်းဟာ၊ ဝိဟာကျောင်ꩻကီ၊ ကမီမွူးဟာ၊ နန်းဒွါသꩻဖူꩻ၊ ယူႏဒွါႏသꩻကို၊ ပအိုဝ်ႏငဝ်းငွါ၊ အီႏလဲင်ꩻထွာနေ၊ ပေႏပေႏနဝ်ꩻမꩻ၊ စိတ်ချထေထန်ႏ၊ ကံတသေလို့တဝ်း၊ ငဝ်းငွါတောင်ႏမာႏ၊ ဖါႏဘာႏပအိုဝ်ႏ၊ မွိုးငဝ်းဖါငွါ၊ သေနာႏထာႏဝ၊ သေကနဝ်ꩻမꩻ၊ ဘာႏသာႏလိတ်မန်ႏ၊ ထေထန်ႏဗွောင်နယ်၊ ပေႏတတန်အငါ၊ မွေးဒါႏနမကောင်း၊ ကျောင်ꩻတကာႏသီးယာ၊ မီႏထွာမွေးတဝ်း၊ ဗွေႏစဝ်းဘုရာꩻ၊ ဌာပနာႏစေခါꩻ၊ ဓာတ်တောႏသမဲင်ꩻ၊ လိတ်သဲင်ကမ္ပယ်ႏ၊ သုဝဏ္ဏဘုမ္မိ၊ သူရိစန္တာႏ၊ ဘုရာꩻလောင်ꩻဟော်ခံꩻ၊ တယ်ႏမံႏငသေꩻ၊ စေႏတီႏဘုရာꩻ၊ မီႏထွာတမွေးတဝ်း၊ စွိုးနဝ်ꩻရိုꩻလဲ့၊ ကဲ့ꩻရဲ့ꩻမွုန်းပုဲႏ၊ စဝ်းဗွန်နောင်ကလာꩻ၊ ပွိုးဝါႏသနာႏ၊ ဘုရာꩻပဉ္စဝ်း၊ ငဝ်းငွါကျံꩻဂန်ႏ၊ သမဲင်ꩻရွှေထုံ၊ အုံအဝ်ႏပျꩻနယ်၊ ဖဖြယ်ထေထန်ႏ၊ ဝိဟာကျောင်ꩻကီ၊ တနီꩻတစက်စက်၊ သက်သက်သာႏသာႏ၊ ကျိုꩻစာꩻထေထန်ႏ၊ ကျံꩻဂန်ႏဗွောင်ဖေႏ၊ ပေႏတန်မူႏခို၊ နီပအိုဝ်ႏဘာႏသာႏ၊ ကျိုꩻစာꩻထေထန်ႏ၊ ယံသေနာႏရဝ်း၊ ခွေထွားစဝ်းဆရာႏ၊ ဘုရာꩻသမဲင်ꩻ၊ သုဝဏ္ဏဘုမ္မိ၊ မီႏထီႏမီႏဟွုန်၊ ယံသေလွဉ်ဗာႏ၊ ယံလꩻသံဝွေႏ၊ မီႏမွေးနဝ်ꩻလဲ့၊ မတ်တောင်ꩻယံနာႏ၊ မီႏမာႏဖျင်နော၊ သူႏတောႏကဝိ၊ ပညာရှိသီးယာ၊ ယံထွားလွိုပုဲႏ၊ မီႏနုဲးယိုယွင်ꩻ၊ ဖျင်ပါသော့ꩻထဲင်း၊ မီႏလဲင်ꩻပိုမို၊ ယိုလဲ့ယံနုတ်၊ မုခပါဌ်မိန်းငွါ၊ ကျောင်ꩻတကာႏသီး၊ ကြီးငယ်လိုꩻကိုန်၊ မီႏဟွုန်ယံနွို့နား၊ ပညာႏသယ်ꩻမီႏဟွုန်၊ ယံဝံꩻမျောက်ဗာႏ၊ ဘုရာꩻရွှေထုံ၊ သမဲင်ꩻကွိုနဲ၊ ထဝ်းကဲးသီးယာ၊ တဖုံႏတဉ်ဟွေး။

ဟန်ႏသလဲင်ႏခါယို၊ ဗွန်ထိုဗွေႏမျတ်၊ ကလျာႏအီဒါႏ၊ တငါသွားတော်၊ ပဲဉ်ခံꩻပဲဉ်ထာ၊ စဝ်းသိကျာꩻမင်ꩻ၊ သဲင်ꩻသွင်ႏဌာပနာႏ၊ ကောဇာသက္ကရာဇ်၊ တစ်နှစ်နဝ်ꩻရာꩻ၊ ဟောင်ရိုꩻတရျာꩻ၊ သာလွိုတဆီ၊ လွိုတကီတဗာႏ၊ လွိုန်သီႏလာလောင်း၊ ဟောင်ရိုꩻသွစ်ꩻနီꩻ၊ မွူးနီꩻကျာႏသပတေꩻ၊ သေႏချောင်းသေႏချာႏ၊ ဌာပနာႏသွင်ꩻ၊ မျသိန်းတန်ဘုရာꩻ၊ မျက်နာႏဆꩻကွဉ်ႏ၊ တယ်ႏမံႏနဝ်ꩻနေ၊ ပေႏတန်ခိုမူႏ၊ ယော့ဖွိုꩻထာꩻအောင်၊ ဟောင်ရိုꩻလစ်ꩻဆီ၊ လွိုတကီလစ်ꩻသောင်ꩻ၊ ထာꩻအောင်ကိုဖူꩻ၊ သိကျာꩻထူႏတွမ်၊ အုပ်ခံꩻအုပ်ထာ၊ ခါလဲ့နုဲးနုဲး၊ စဝ်းသိကျာꩻမင်ꩻ၊ ကိုႏစာꩻရုတ္ထု၊ မျုပ်သွင်ꩻဌာပနာႏ၊ ပဲဉ်ထာပဲဉ်ခံꩻ၊ ဌာပနာႏငသေꩻ၊ စေႏတီႏဘုရာꩻ၊ ကိုႏစာꩻရုတ္ထု၊ သဗ္ဗညုဘုရာꩻ၊ စဝ်းသိကျာꩻမင်ꩻ၊ သွင်ꩻငသေꩻဌာပနာႏ၊ သေႏချာႏထွူမꩻ၊ သမုတ်ဖန်ဖေႏ၊ ရွှေစက္ခုံဘုရာꩻ၊ မျက်နာႏဆꩻကွဉ်ႏ၊ မွိုးနန်းစခါ၊ စဝ်းဘုရာꩻလဲ့ရိုꩻ၊ မူႏခိုခေါက်ဝုဲႏ၊ ကိုꩻကွယ်ႏလူႏတန်ꩻ၊ ဓာတ်တောႏခင်ႏလမ်း၊ ဌာပနာႏသွင်ꩻသော့ꩻ၊ ရွှေစက်တော်ဘုရာꩻ၊ စင်ပါꩻစင်နီ၊ ဒီဟဝ်ကိုꩻကွယ်ႏ၊ ဒီဟဝ်ဝုဲႏခေါက်၊ ခီႏမျောက်လွမ်ꩻလာꩻ၊ ဘုရာꩻစေႏတီႏ၊ တင်ႏထီꩻဟွဲးဟိန်ႏ၊ သေင်ႏမွူးဝါႏဆုံꩻ၊ မီꩻလုံꩻမီꩻဒေါ့ꩻ၊ ဒီဟဝ်အော့ꩻခန်း၊ ဝန်ႏထိုꩻညာꩻညာꩻ၊ ယံထွာကုသိုလ်ႏ၊ မူႏခိုသီးတာႏ၊ ရွှေစည်းခုံဘုရာꩻ၊ စခါခွန်လောင်ꩻ၊ သူရိစန္တာႏ၊ ရာဇာႏမင်ꩻကြီꩻ၊ စဝ်းသိကျာꩻမင်ꩻ၊ သွင်ꩻသော့ꩻဌာပနာႏ၊ ငခါယိုနီ၊ သီခွေကစ၊ သဲင်ꩻလꩻထွာလိုꩻ၊ စခါကုသိုလ်ႏကံႏ၊ သန်ဟဝ်နဝ်ꩻမꩻ၊ လောကမန်ႏကင်ꩻ၊ တရာꩻမင်ꩻမျတ်၊ ဓာတ်တောႏမွေႏတောႏ၊ ပူႏဇောႏဝုဲႏဗာႏ၊ သာမညကောင်းနီ၊ တမွေးတဝ်းနော၊ ဓာတ်တောႏဘုရာꩻ၊ မီႏဖျင်တယ်ႏမံႏ၊ ကောခံႏဒါႏယကာ၊ ပညာႏတံꩻခိုꩻ၊ အုပ်စိုꩻပွိုင်ႏဗာႏ၊ မဟာဥပ္ပလ၊ သုဝဏ္ဏခမ်း၊ ဘုရာꩻနမ်းဒါယကာႏ၊ ခံႏဗာႏထွာလꩻ၊ စခါဗျာဒိပ်၊ ရွှေစည်းခုံဘုရာꩻ၊ ဒါယကာဆုဲꩻချာ၊ မီႏပြုဲပီႏပြင်ꩻ၊ သုတ်သင်ႏပျုစု၊ ပအိုဝ်ႏလဲ့ခါ၊ ဖြောဝ်ꩻမန်ႏယာတ၊ စခါပန်ရီး၊ ဝွေꩻသီးစောက်ꩻလဲ့တရဝ်း၊ နဝ်ꩻရွုမ်ꩻလစ်ꩻစွိုး၊ ပွိုးထွာမူလ၊ အထျꩻသာႏသနာႏ၊ တကာႏသီးနော၊ ဒေဝေါသိကျာꩻ၊ ခါလဲ့ဓိဋ္ဌာန်ႏ၊ မီႏသုတ်သင်ႏလွမ်ꩻလာꩻ၊ ထွာဗာႏလꩻမွေႏ၊ ကောရွေꩻပြဲင်ႏထျꩻ၊ သုဝဏ္ဏနဲင်ႏငန်ႏ၊ ဟော်ခံꩻထွာလꩻ၊ နာမမိန့်ပုံ၊ ယံအုံခြေင်တဝ်းနာꩻ၊ သူႏတောႏသီးယာ၊ စခါမွိုးနန်း၊ သက္ကရာဇာ၊ စဝ်းသိကျာꩻမင်ꩻ၊ သွင်ꩻငသေꩻဌာပနာႏ၊ သေႏချာႏထွူမꩻ၊ ဆချာꩻအဝ်ႏကုဲ၊ ခြဝ်ႏထာခြဝ်ႏခံꩻ၊ ပိတ်တန်ကစ၊ သက္ကဒေဝါ၊ ရာဇာခွန်ဖီ၊ လစ်ꩻဆီနွုတ်ꩻဖြာꩻ၊ ခူႏဒွါႏထာꩻအောင်၊ အသောင်ကွဉ်ႏနဝ်၊ ထွာဟဝ်သာႏယာႏ၊ သေႏချာႏမွေးတဲ၊ ယိုလဲ့အီႏသွင်ꩻ၊ ဖြွမ်းဝင်ꩻညီႏညာႏ၊ ခူႏဒွါႏထာꩻအောင်၊ အသောင်ကွဉ်ႏနဝ်၊ အုံအဝ်ႏခူလင်ꩻ၊ ထွတ်ꩻထန်ႏဟံႏအေႏ၊ ထေထန်ႏဟံႏလီး၊ သိုမ်ဆီနွုတ်ꩻသောင်ꩻ၊ လေးထောင့်သီ၊ ခါလဲ့နုဲးနုဲး၊ ထုဲႏပီလွဝင်ꩻ၊ တယိုꩻယွင်ꩻတဝ်း၊ သိကျာꩻမင်ꩻမျတ်၊ သွင်ꩻငသေꩻဓာတ်တောႏ၊ ကောႏငသေꩻစေႏတီႏ၊ ထုဲႏပီလွဝင်ꩻ၊ တဆူႏချင်ꩻနုဲးနုဲး၊ နီဗွေႏဘုရာꩻ၊ ကိုႏစာꩻဓာတ်တောႏ၊ ပူႏဇောႏလူႏတန်ꩻ၊ တယ်ႏမံꩻထွူမꩻ၊ ဗုဒ္ဓစိန္တေ၊ နီဗွေႏဘုရာꩻ၊ ငဝ်းငွါဟဲ့ꩻဟောင်၊ ဖူးမောင်ႏရဟန္တာႏ၊ အင်္ဂုလိမာလ၊ သောဏမထေရ်ႏ၊ ဥပါလိရဟန္တာႏ၊ မဟာမောဂ္ဂလိက၊ တိဿမထေရ်ႏ၊ သျင်ႏမဟာယသ၊ ဥတ္တရမထေရ်ႏ၊ ရဟန္တာႏနွုတ်ꩻပါꩻ၊ အင်္ဂုလိမာလ၊ နဝ်ꩻမꩻနီဗွေႏဘုရာꩻ၊ ဖြောင်းထာဖြေꩻခံꩻ၊ ယံဖေႏပူႏဇောႏ၊ သရေႏနုတ်တဖွူꩻ၊ သောဏမထေရ်ႏ၊ နဝ်ꩻရာꩻအပ်ဖေႏ၊ ကေသာဆံတောႏ၊ တဆိသိုမ်လီး၊ ဥပါလိနဝ်ꩻ၊ ဗွေႏစဝ်းဘုရာꩻ၊ ဖေႏအပ်ခါꩻပန်ꩻကျိုꩻ၊ မဟာမောဂ္ဂလိ၊ နဝ်ꩻရာꩻနီဗွေႏ၊ ဖေႏအပ်စီႏဝရာႏ၊ သင်္ကန်ꩻဒုကုဋ်၊ ဥတ္တရမထေရ်ႏ၊ နဝ်ꩻရာꩻနီဗွေႏ၊ ဝေနေယျအဖါ၊ မေတ္တာႏသညင်ꩻ၊ တောင်ဝေဓာတ်တောႏ၊ ယံပူႏဇောႏပါ၊ တပါꩻတစွိုးစွိုး၊ ပွိုးထွာထေရ်ႏတန်၊ ယံဖေႏသွင်ꩻဗာႏ၊ စွုမ်ႏပါꩻစွုမ်ႏဆူႏ၊ သုဝဏ္ဏအခမ်း၊ သူရိစန္တာႏ၊ သဲင်ꩻထွာဖူꩻဗာႏ၊ တမွိုးဖါချင်ꩻ၊ ဝင်ꩻနီဖူးဝေး၊ လူႏတန်ꩻညီꩻဗာႏ၊ မဟာမင်ꩻကြီꩻ၊ စတွမ်ႏနီဗွေႏ၊ ဝေနေယျအဖါ၊ စခါမွိုးနန်း၊ ဗွန်တန်မျတ်လ၊ မထုရခမ်း၊ ဗွေႏနမ်းဘုရာꩻ၊ တွမ်ႏသူရိစန္တာႏ၊ သဲင်ꩻထွာဖူꩻဗာႏ၊ တမွိုးဖါချင်ꩻ၊ ဝင်ꩻနီဖူးဝေး၊ လူႏတန်ꩻညီꩻဗာႏ၊ သုဗြဟ္မာဘုရာꩻ၊ ယာဂုတနေထီ၊ လူႏတန်ꩻညီꩻဝင်ꩻ၊ သင်္သရာႏနမ်းငါ၊ ယံထွင်ႏယံလꩻ၊ ရာဇမဟာ၊ ကွီညီꩻဗာႏဖူꩻ၊ ဆုဟဝ်နဝ်ꩻမꩻ၊ တဖလွေꩻတဝ်း၊ ဗွေႏစဝ်းဘုရာꩻ၊ ဖြောင်းထာဖြေꩻခံꩻ၊ ဟော်ꩻထန်ႏနယ်ဖေႏ၊ သူရိစန္တာႏ၊ မဟာမင်ꩻကြီꩻ၊ စတွမ်ႏရဟန္တာႏ၊ နွုတ်ꩻပါꩻကွိုနဲ၊ တင်ꩻလုဲသီးယာ၊ ဆုဲꩻချာနဝ်ꩻမꩻ၊ ရာဇခွန်လောင်ꩻ၊ ဟော်ခံꩻပိုမူႏ၊ ရိုႏသေႏလျောက်လဝ်း၊ ဩစဝ်းဩဗွေႏ၊ ယံဖေႏသညင်ꩻ၊ ခွေသွဉ်းနင်ꩻမူႏ၊ ယံဖေႏပူႏဇောႏ၊ ကန္တော့ꩻဝုဲႏဗာႏ၊ ကိုႏစာꩻဓာတ်တောႏ၊ တစွိုးငါဩ၊ ထံꩻတောႏလျောက်လဝ်း၊ ဗွေႏစဝ်းဘုရာꩻ၊ ဖြောင်းထာဖြေꩻခံꩻ၊ နင်မူႏစံသီး၊ မီႏထွိုက်ကိုꩻကွယ်ႏ၊ ခေါက်ဝုဲႏလူႏတန်ꩻ၊ ခွေဆံတောႏယို၊ ယံဖေႏကလူꩻ၊ ဟူႏလင်ꩻပါဒွါႏ၊ သာႏသာႏယွယွ၊ နဝ်ꩻမꩻနီဗွေႏ၊ ဝေနေယျအဖါ၊ ဟတ္ထာစူနုံ၊ စံႏထင်ႏမုနိ၊ ကေသာကလူꩻ၊ သွစ်ꩻဆူႏသွစ်ꩻလီး၊ ပီနုဲးထာꩻစင်၊ ဟူႏလင်ꩻယိုꩻယိုꩻ၊ ဖွိုႏထိုတစူလစ်ꩻ၊ နဝ်ꩻမꩻအပ်ဖေႏ၊ ကေသာဆံတော်၊ ဟော်ခံꩻပိုမူႏ၊ စူနုံတဆီ၊ ကတူႏကီအွဉ်ႏဒင်ႏ၊ စွိုးဆင်ရွှေကျာ၊ ဥပမာႏဗိုကဝ်ႏ၊ ဟွုန်ဟဝ်အာႏရꩻ၊ ဗာႏသꩻနစ်သက်၊ ရက်ပဲင်ꩻနမ်းကဝ်ႏ၊ အုံအဝ်ႏရိုႏသေႏ၊ ခံႏဆွုမ်ႏနေးတွမ်၊ အွပ်ခံꩻစိတ်ထာ၊ ပတ္တမျာꩻအုပ်၊ အွဉ်ႏသေꩻသော့ꩻထင်ႏ၊ နင်ႏမူႏစံသီ၊ နီနော်တွိုင်ႏပင်ႏ၊ ဝင်ꩻနီမွိုးဖါ၊ ခါလဲ့ဝံꩻသာႏ၊ ရာဇခွန်လောင်ꩻ၊ သူရိစန္တာႏ၊ မဟာမင်ꩻကြီꩻ၊ ညီႏညာဖြွမ်ႏလွ၊ စတွမ်ႏရဟန္တာႏ၊ မဟာတိဿ၊ ဝွေဗွေႏထွာအတန်၊ နွုတ်ꩻရျာꩻဗွေဗွေ၊ ပျုစုတယ်ႏထောင်ႏ၊ ဘုရာꩻတန်ဆောင်၊ ကောင်ႏမူꩻစေႏတီႏ၊ တင်ႏထီꩻဟွဲဟိန်ႏ၊ သဲင်လဝ်မန်ႏကင်ꩻ၊ ခံႏပွယ်ꩻမင်္ဂလာႏ၊ နွုတ်ꩻနာꩻနွုတ်ꩻနီꩻ၊ ဖြီꩻစီꩻထွူမꩻ၊ တိဿမထေရ်ႏ၊ သမုတ်ဖန်ဖေႏ၊ အမေနာမံ၊ တန်ဆောင်စေႏတီႏ၊ ဝေင်ꩻတန်အဖူꩻ၊ သူႏတောႏသီးယာ၊ မီႏထွာရေတွက်၊ မီႏနပ်အတာႏ၊ ဘုရာꩻတန်ဆထင်ꩻ၊ အီႏအဝ်ႏငကွို၊ အတာနီရျာꩻ၊ သာႏသာႏလွိုလွို၊ ပွိုးနေးနုဲနော၊ တွမ်ႏနန်ꩻတောႏနဝ်ꩻ၊ အဝ်ႏတနꩻတွို့ꩻကွဉ်ႏ၊ ကွဉ်ႏထင်ꩻဘာႏသာႏ၊ မီႏနပ်တာႏနဝ်ꩻ၊ ဟောင်ရိုꩻတရျာꩻ၊ သာလွိုနီဆီ၊ ဒီဟဝ်မတ်တောင်ꩻ၊ ရွှေထုံဝေင်ꩻဖူꩻ၊ ခွန်လူꩻတနံ၊ တယ်ႏမံႏငသေꩻ၊ သေႏချောင်းသေႏချာႏ၊ နဝ်ꩻခါကာလ၊ ရာဇဟော်ခံꩻ၊ ခွန်တန်ပိုခို၊ ဟောင်ရိုꩻနာမ၊ စံကောလနဝ်ꩻ၊ ပျုစုတယ်ႏထောင်ႏ၊ ကောင်းမုꩻသိမ်ႏတန်၊ လူႏတန်ꩻပူႏဇောႏ၊ ကောဇာသက္ကရာဇ်၊ တစ်နှစ်နဝ်ꩻရာꩻ၊ ဟောင်ရိုꩻတရျာꩻ၊ သာလွိုတဆီ၊ လွိုတကီတဗာႏ၊ လွိုန်ဟားလာဆန်ꩻ၊ လꩻမန်ႏတနီꩻ၊ လူႏတန်ꩻပူႏဇောႏ၊ ကျောင်ꩻတောႏလဲ့ဆို့ꩻ၊ ပျုစုလွမ်ꩻလာꩻ၊ မာꩻတွမ်ႏကဒေါင်၊ ခေါင်လောင်ꩻလဲ့သွဉ်ꩻ၊ အွဉ်ႏသေꩻအွဉ်ႏဟွဲ၊ ယံဖေႏမူႏခို၊ လူꩻလိုꩻထောင်းဒုံႏ၊ ခေါင်ꩻလောင်ꩻနားရိႏ၊ မီႏထွာနပ်ပေါင်ꩻ၊ ခေါင်ꩻလောင်ꩻအယာႏ၊ ဆေ့ꩻအာအစွဲ၊ တရေင်ပုဲငတ်ꩻရျာꩻ၊ သာလွိုနွုတ်ꩻဆီ၊ လွိုတကီနွုတ်ꩻစွဲ၊ ပိုႏဒွိုန်းနွုတ်ꩻခန်၊ ပုဲတွမ်ႏနွုတ်ꩻကျပ်၊ မတ်တွမ်ႏစာႏရင်ꩻ၊ ကမ္ပယ်ႏလိတ်လုဲꩻ၊ ဟိန်ႏတန်အလောင်း၊ တောင်ꩻငသေꩻကမ္ပယ်ႏ၊ နမ်းငါပိုလီꩻ၊ မီႏထီႏမီႏထွား၊ ယံဖေႏကသေ၊ ခွန်နဝ်ꩻအစိုး၊ မင်ꩻနဝ်ꩻအပန်၊ ပေႏတန်တန်ဆေ့ꩻအာ၊ ယံထွာကုသိုလ်ႏ၊ ကိုꩻကွယ်ႏလူႏတန်ꩻ၊ ဘုရာꩻတန်အသောင်၊ ခေါင်ꩻလောင်ꩻထာခံꩻ၊ သွဉ်ꩻငသေꩻထွူမꩻ၊ ဥပါလိမထေရ်ႏ၊ ဘုရာꩻဖေႏအပ်၊ ခပန်ꩻကျိုꩻဖြွီꩻ၊ ဝွေꩻဗွေႏတွမ်ႏရဟန္တာႏ၊ ငတ်ꩻရျာꩻဗွေဗွေ၊ ပျုစုတယ်ႏထောင်ႏ၊ သုဝဏ္ဏကောင်၊ အထောင့်ဆထင်ꩻ၊ ဟဲ့ꩻဟောင်နာမ၊ ဥပါလိကောင်နာ၊ ဌာပနာႏငသေꩻ၊ ခပန်ꩻကျိုꩻဖြွီꩻ၊ စေႏတီႏဘုရာꩻ၊ ကောဇာသက္ကရာဇ်၊ တစ်နှစ်နဝ်ꩻရာꩻ၊ ဟောင်ရိုꩻတရျာꩻ၊ သာလွိုတဆီ၊ လွိုတကီတဗာႏ၊ လွိုန်ဟားလာဆန်ꩻ၊ လꩻမန်ႏလစ်ꩻနီꩻ၊ မွူးနီꩻတနင်္လာႏ၊ ဘုရာꩻကဖေႏ၊ ရေစစ်ထီခြိုင်ႏ၊ သွင်ꩻသော့ꩻဌာပနာႏ၊ လွိုန်ဟားလာဆန်ꩻ၊ လꩻမန်ႏသွစ်ꩻနီꩻ၊ မွူးနီꩻသောကျာႏ၊ သေႏချာႏထွူမꩻ၊ အရှင်မဟာယသ၊ ဝွေꩻဗွေႏသွင်ꩻငသေꩻ၊ ဘုရာꩻကဖေႏ၊ သင်္ကန်ꩻဒုကုဋ်၊ ဝေင်ꩻသောင်တွို့ꩻနဝ်၊ ဗွေႏစဝ်းဘုရာꩻ၊ ဌာပနာႏငသေꩻ၊ သင်္ကန်ꩻဒုကုဋ်၊ လွိုန်ဟားလာဆန်ꩻ၊ ထန်ႏလꩻတဆီ၊ မွူးနီꩻတနင်ꩻနွေႏ၊ ဌာနရပ်နဝ်ꩻ၊ ကောင်တန်အလောင်း၊ ဆအသောင်တွို့ꩻနဝ်၊ အုံအဝ်ႏဌာပနာႏ၊ ဘုရာꩻစေႏတီႏ၊ ဖြီꩻစီꩻထွူမꩻ၊ ဥတ္တရမထေရ်ႏ၊ နီဗွေႏအပ်ဖေႏ၊ တောင်ꩻဝေဓာတ်တောႏ၊ ယံဖေႏဌာပနာႏ၊ ဘုရာꩻတန်ဆကွဉ်ႏ၊ ကောင်တန်ထာဝ၊ သမုတ်ဖန်ဖေႏ၊ အမေနာမ၊ ရွှေမျင်ထင်ဘုရာꩻ၊ ငဝ်းငွါရိုꩻနော၊ သူႏတောႏသီးယာ၊ လွိုန်ဟားလာဆန်ꩻ၊ လမန်ႏတဆီ၊ လွိုတကီငတ်ꩻနီꩻ၊ မွူးနီꩻသောကျာႏ၊ ဘုရာꩻရွှေမျင်ထင်၊ တယ်ႏမံႏစေႏတီႏ၊ ဖြီꩻစီꩻထွူမꩻ၊ နဝ်ꩻခါကာလ၊ သောဏမထေရ်ႏ၊ ဝွေꩻဗွေႏထွာအတန်၊ စတွမ်ႏရဟန္တာႏ၊ နီရေင်ဗွေဗွေ၊ ပျုစုတယ်ႏထောင်ႏ၊ သုဝဏ္ဏကောင်နာ၊ ကောဇာသက္ကရာဇ်၊ တစ်နှစ်နဝ်ꩻရာꩻ၊ ဟောင်ရိုꩻတရျာꩻ၊ သာလွိုတဆီ၊ လွိုတကီနီဗာႏ၊ လွိုန်ရုတ်ꩻလာဆန်ꩻ၊ လမန်ႏသွစ်ꩻနီꩻ၊ သူရိယာနက္ခတ်၊ ထန်ႏလꩻသွံဖြုံႏ၊ မွူးနီꩻစနေႏ၊ ထာလေစင်ဖြွိုး၊ ပျုစုတယ်ႏထောင်ႏ၊ သုဝဏ္ဏကောင်နာ၊ ဘုရာꩻစေႏတီႏ၊ တင်ႏထီꩻဟွဲဟိန်ႏ၊ စီႏသဲင်တိတ်ꩻခံꩻ၊ ခံႏပွယ်ꩻမင်္ဂလာႏ၊ နွုတ်ꩻနာꩻနွုတ်ꩻနီꩻ၊ စေႏတီႏဘုရာꩻ၊ သေႏချာႏထွူမꩻ၊ သောဏမေထရ်ႏ၊ သမုတ်ဖန်ဖေႏ၊ သိန်ကနှစ်ဘုရာꩻ၊ သုဝဏ္ဏဘုရာꩻ၊ ခါလဲ့ရိုꩻရိုꩻ၊ ဒီဟဝ်ကိုꩻကွယ်ႏ၊ ခေါက်ဝုဲႏလူႏတန်ꩻ၊ ဆံတော်စေႏတီႏ၊ စထစ်နီဗွေႏ၊ ဘုရာꩻဂေါတမ၊ နမ်းကဝ်ႏကာလ၊ သောဏမထေရ်ႏ၊ တယ်ꩻငသေꩻထွူနော၊ သိန်ကနှစ်ကောင်နာ၊ သာႏယာႏဟဝ်ကတ်၊ မတ်တွမ်ႏစာႏရင်ꩻ၊ ကမ္ပယ်ႏကျောက်စာ၊ စခါအဝ်ႏနော၊ ကောင်နာလောင်းကီ၊ သောဏမထေရ်ႏ၊ ရဟန္တာႏဗွေႏ၊ တယ်ႏထောင်ႏငသေꩻ၊ ပေႏတန်ခွေသီ၊ ယံဖေႏနီနာꩻ၊ သဒ္ဓါႏရဲဉ်ꩻလူႏ၊ ပူႏဇောႏကိုꩻကွယ်ႏ၊ ခေါက်ဝုဲႏလွနောလောင်ꩻ၊ သူရိစန္တာႏ၊ နီဖြာꩻတဖူးဝေး၊ ဖြွမ်းဝင်ꩻညီႏညာႏ၊ ရာဇာအိမ်ရှေ့၊ ပိုခိုပိုမူႏ၊ သောဏမထေရ်ႏ၊ ရဟန္တာႏဗွေႏ၊ စူထွေအရပ်၊ ရဟန္တာႏမထေရ်ႏ၊ တယ်ႏထောင်ႏငသေꩻ၊ ကောင်းမုကောင်းရာ၊ ဌာပနာႏငသေꩻ၊ ကေသာဆံတောႏ၊ မီႏပူႏဇောႏလူႏ၊ မူႏခိုပေႏတန်၊ နမ်းငါမိတေꩻ၊ အီႏဖူးတွေ့မော့ꩻဗာႏ၊ ဘုရာꩻပဉ္စဝ်း၊ ခမ်းဟဝ်နိဗ္ဗာန်ႏ၊ ခါးလားစံႏစာꩻ၊ ဝေင်ꩻထာဝေင်ꩻခံꩻ၊ ဟော်ထန်ႏငသေꩻ၊ အွဉ်ႏကုဲဖေႏတွမ်ႏ၊ သာႏသနာႏငတ်ꩻရေင်၊ ခါးလာဖေ့ဝတ်၊ ခါးလားတမွတ်သာ၊ ယံထွာကုသိုလ်ႏ၊ မူႏခိုအရင်ꩻ၊ ခွန်ချင်ꩻအပွန်း၊ နန်းထောက်သညင်ꩻ၊ သတ္တဝါႏတင်ꩻလုဲ၊ ငမ်းကုဲငမ်းရွိုင်ꩻ၊ ငမ်းမွိုက်ငမ်းဟယ်၊ အွဉ်ႏနယ်ဖေႏတွမ်ႏ၊ သက်သေႏသက်ကန်ႏ၊ ပေႏတန်ဖြားဆား၊ ငမ်းယူႏမာႏကွင်၊ ငမ်းတသူႏသေတဝ်း၊ တဖူꩻဟဝ်သာႏ၊ ငမ်းလွေꩻပရာႏကြီႏကြွို့ꩻ၊ ငမ်းနွို့ဒွါႏထာꩻလုံꩻ၊ ကောင်တန်ကောင်ထို၊ ငမ်းသꩻရွိုးလွား၊ ငမ်းတညာႏတောႏတဝ်း၊ နိဗ္ဗာန်ႏတွူးငွါ၊ ငမ်းတပါလွဉ်ꩻတဝ်း၊ ဗွေႏစဝ်းမိတေ၊ ဗွူးပေႏအချာ၊ နမ်းငါမီႏပွင်ꩻ၊ ကံႏကောႏပင်ထျꩻ၊ မျပလ္လင်ႏလောင်းကီ၊ တရာꩻထီအွီႏ၊ ဓမ္မစကျာႏ၊ မီႏဟောꩻကာလ၊ ဗုဒ္ဓရာဇာ၊ နမ်းငါမီႏပွင်ꩻ၊ မီႏကာႏသင်္ဘောꩻ၊ ဖေါင်ႏတောႏဖြီထာ၊ ငမ်းတပါလွဉ်ꩻတဝ်း၊ ဗွေႏစဝ်းဘုရာꩻ၊ သာႏသနာႏအွဉ်ႏကုဲ၊ လိတ်လုဲꩻပုဲႏပေႏ၊ ယံဖေႏထွားဖတ်၊ နေးနာႏမတ်တောင်ꩻကွိုနဲ၊ ထဝ်းကဲသီးယာ၊ တဖုံႏတဉ်ဟွေး။

ပွိုးပီးနဝ်ꩻမꩻ၊ ကျောင်ꩻတကာႏသီးယာ၊ သောဏမထေရ်ႏ၊ တယ်ႏထောင်ႏငသေꩻ၊ စေႏတီႏဘုရာꩻ၊ ကောင်နာလောင်းကီ၊ စေႏတီႏတောႏမျတ်၊ ကေသာဆံတောႏ၊ ကောႏငသေꩻစေႏတီႏ၊ တဆီသိုမ်ဆူႏ၊ ကလူꩻကေသာ၊ ဌာပနာသွင်ꩻတွိုက်၊ လစ်ꩻဆီလစ်ꩻသောင်ꩻ၊ သွစ်ꩻအောင်အဖူꩻ၊ ခွန်လူꩻတနံ၊ ပန်ႏနေးတွမ်ႏစက်၊ ထွတ်ထန်ႏဟံႏအေႏ၊ ထေထန်ႏဟံႏလီး၊ ဖြီꩻစီꩻထွူမꩻ၊ ထာꩻအောင်အဖူꩻ၊ ခွန်လူꩻတနံ၊ သမ်းထူႏနေးဟံႏ၊ ရတနာႏခံꩻထာ၊ မာꩻနုဲင်းသင်္ဘောꩻ၊ အွဉ်ႏသော့ꩻထင်ႏအီ၊ ဓာတ်ထာဓာတ်ခံꩻ၊ ကေသာဆံတောႏ၊ သင်္ဘောꩻအရုတ်၊ သွင်ꩻသော့ꩻထွူမꩻ၊ ဆကီပေ့ꩻတွမ်ႏ၊ အွတ်ꩻခံꩻအွတ်ꩻထာ၊ ရတနာႏနွုတ်ꩻစွိုး၊ ဗဉ်တွိုႏခင်ႏလေင်း၊ သဲင်ခံꩻရွဉ်ထာ၊ ခါလဲ့နုဲးနဝ်ꩻ၊ အုံအဝ်ႏပျုစု၊ ကောင်းမုစေႏတီႏ၊ ဆကီတယ်ႏမံႏ၊ အွတ်ꩻဟံႏအွတ်ꩻလုံး၊ စွုန်ꩻတောင်ꩻပသီႏ၊ ဆကီတယ်ႏမံႏ၊ တန်တန်မပ်မပ်၊ ထယ်ႏခြပ်အွဉ်ႏစီႏ၊ စေႏတီႏတောႏမျတ်၊ လစ်ꩻဆီလစ်ꩻသောင်ꩻ၊ စေႏတီႏဒွေါင်ႏထို၊ မူႏခိုပေႏတန်၊ ယံသေယံထီႏ၊ စေႏတီႏဘုရာꩻ၊ ကွိုနဲလိုꩻအမျာꩻ၊ ကျောင်ꩻတကာႏတင်ꩻလုဲ၊ ဘုရာꩻသမဲင်ꩻ၊ လိတ်သဲင်လုဲခံꩻ၊ ကျံႏဂန်ႏတရာꩻ၊ ဒီဟဝ်ထွားဖတ်၊ မတ်လွတောင်ꩻတောင်ꩻ၊ အလောင်ꩻအလျာႏ၊ ရဟန္တာႏဗွေႏ၊ တယ်ႏငသေꩻထွူမꩻ၊ စေႏတီႏတောႏမျတ်၊ လိတ်ဖတ်လင်္ကာႏ၊ လွဉ်ဗာႏပီးနဝ်ꩻ၊ ထဝ်းကဲသီးယာ၊ သိန်ကနစ်ဘုရာꩻ၊ မျက်နာႏဆꩻကွဉ်ႏထင်ꩻ၊ ကေလာသကောင်၊ ဟဲ့ꩻဟောင်ရိုꩻနော၊ မွိုးနန်းစခါ၊ ရဟန္တာႏဗွေႏ၊ ကာဠုဒါယီ၊ နီဗွေႏဘုရာꩻ၊ မေတ္တာႏသညင်ꩻ၊ ပတ္တီထာခံꩻ၊ တရျာꩻသွစ်ꩻဖြုံႏ၊ အုံအဝ်ႏဖေႏယောင်း၊ ဖူးမောင်ႏရဟန်ꩻ၊ ပတ္တီꩻခံꩻထာ၊ သွင်ꩻငသေꩻဌာႏပနာႏ၊ ဘုရာꩻစေႏတီႏ၊ ကေလာသကောင်နာ၊ စေႏတီႏတောႏမျတ်၊ တစွိုးနဝ်ꩻရာꩻ၊ စဝ်းသိကျာꩻမင်ꩻ၊ သမုတ်ဖန်ဖေႏ၊ အမေနာမ၊ ရတနာသင်္ဃကောင်၊ ဟဲ့ꩻဟောင်ရိုꩻနော၊ သူႏတောႏသီးယာ၊ ဘုရာꩻစေႏတီႏ၊ ဖြီꩻစီꩻထွူမꩻ၊ နဝ်ꩻခါကာလ၊ အနုရုဒ္ဓါႏ၊ သာႏကီႏဝင်ႏခွန်ပို၊ တောင်ꩻပြန်ႏငသေꩻ၊ နီဗွေႏဘုရာꩻ၊ မေတ္တာႏသညင်ꩻ၊ ရက်ပဲင်ꩻနမ်းကဝ်ႏ၊ ဖဝါႏဗန်ႏဗွာ၊ မဲ့ငါဖဝါႏသုတ်ꩻ၊ အရှင်မဟာကစ္စည်ꩻ၊ နီဗွေႏဖေႏအပ်၊ ရတနာႏတံꩻပူႏ၊ နီဗွေႏသုံꩻဆောင်ႏ၊ စောင်ႏအီတငါ၊ တလီးကွိုတဝ်း၊ အရှင်ဘဂု၊ အဝ်လူသညင်ꩻ၊ ဆန်ကျင်ꩻပတ္တမျာꩻ၊ တစွိုးနဝ်ꩻဗွေဆႏ၊ စဝ်းရဟန္တာႏ၊ အင်္ဂုလိမာလ၊ နဝ်ꩻမꩻနီဗွေႏ၊ မေတ္တာႏသညင်ꩻ၊ သင်ႏပွိုင်ႏသရေꩻနုတ်၊ ယံဖေႏဌာပနာႏ၊ သျင်ႏမဟာႏကိမိလ၊ နဝ်ꩻရာꩻနီဗွေႏ၊ အစ်လူသညင်ꩻ၊ ရက်ပဲင်ꩻဖေႏဖန်း၊ သရေနုတ်ဓာတ်တောႏ၊ မဟာဘဒ္ဒိယ၊ နဝ်ꩻရာꩻဝီꩻခံꩻ၊ ယံဖေႏဌာပနာႏ၊ ရဟန္တာႏဗွေႏ၊ ဓမ္မနာႏညီꩻလွ၊ ဆုတောင်ꩻပြဲ့ꩻကောင်၊ အလောင်းအနာ၊ သိုမ်ဆီနွုတ်ꩻသောင်ꩻ၊ ထာꩻအောင်အဖူꩻ၊ ခွန်လူꩻတနံ၊ စတွမ်ႏရဟန္တာႏ၊ တရေင်ဗွေဗွေ၊ ခူႏအောင်ဌာပနာႏ၊ ကောဇာဒီဃ၊ မူလသက္ကရာဇ်၊ တစ်နစ်ဂဏန်ꩻ၊ လꩻမန်ႏတရျာꩻ၊ သာလွိုတဆီ၊ လွိုတကီနီဗာႏ၊ လွိုန်ရုတ်ꩻလာဗွေ၊ မွူးနီꩻစနေႏ၊ သူနားရိႏတပတ်၊ တဆီငတ်ꩻဗီဇနာႏ၊ သိုမ်ခြာသူပြန်ႏ၊ နက္ခတ်တဆီနွုတ်ꩻဖြုံႏ၊ မွူးထန်ႏနီꩻခါ၊ သိကျာꩻခွန်ဖီ၊ သိုမ်ဆီသူဖြာꩻ၊ ခူႏအောင်ဌာပနာႏ၊ ဆုတောင်ꩻပြဲ့ꩻကောင်၊ အလောင်ꩻအလျာႏ၊ ရဟန္တာႏဗွေႏ၊ ဌာပနာႏငသေꩻ၊ ထာꩻအောင်အဖူꩻ၊ ခွန်လူꩻဌာပနာႏ၊ သေႏချာႏထွူမꩻ၊ စဝ်းသိကျာꩻမင်ꩻ၊ နေးတွမ်ႏရတနာႏ၊ ကျောက်ဖျာႏလုံးတန်၊ ပေ့ꩻခါဆကီ၊ ဖြီꩻစီꩻထွူမꩻ၊ စဝ်းသိကျာꩻမင်ꩻ၊ ထူႏနေးယားတွမ်ႏ၊ အွတ်ꩻထာအွတ်ꩻခံꩻ၊ တောင်ꩻဗွာတောင်ꩻခြိုမ်ႏ၊ လုံးသူပသီႏ၊ ဆကီတယ်ႏမံႏ၊ တဆီသွစ်ꩻသောင်ꩻ၊ စေႏတီႏဒွေါင်ႏထို၊ ဗွန်ထိုဘုရာꩻ၊ ကိုႏစာꩻဓာတ်တောႏ၊ ပူႏဇောႏလူႏတန်ꩻ၊ ချꩻခံꩻတိတ်ꩻထာ၊ စခါပန်းချီ၊ သူႏသီသူႏရန်၊ ချꩻခံꩻတိတ်ꩻထာ၊ အနာတင်ႏထီꩻ၊ စီႏသဲင်ဟွဲဟိန်ႏ၊ သိမ်မွေ့သာႏယာႏ၊ ကောင်နာလောင်းကီ၊ စေႏတီႏဘုရာꩻ၊ ဆျာꩻထီရေစက္ချ၊ တွိုင်ႏကျာꩻသက်သေႏ၊ ဝသုန္ဓရေႏဟံႏ၊ နီသဲဉ်လစ်ꩻမွုန်ႏ၊ ဟွုန်ဟဝ်သာႏဓု၊ ကောင်းမုဌာပနာႏ၊ ဓာတ်တောႏအကျိုꩻ၊ လူꩻလိုꩻတနံ၊ ဟွုန်ဟဝ်ဝံသာႏ၊ နစ်သက်အာႏရꩻ၊ ဗာႏသꩻလွဉ်ရဝ်း၊ ဓာတ်တောႏအကျိုꩻ၊ မူႏခိုဖြားဆား၊ သဒ္ဓါႏလူႏတန်ꩻ၊ ထင်ႏသေထင်ႏထီႏ၊ ရွဉ်ခံꩻရတနာႏ၊ ကားကအဝ်ႏကုဲ၊ ခူႏသွင်ꩻဌာပနာႏ၊ ရတနာႏသင်္ဃ၊ နာမဟဲ့ꩻဟောင်၊ ကောင်ဖုဲးဆနဝ်၊ ရတနာႏကျောက်ကူ၊ ဦꩻမင်ႏထံးအို၊ အကိုအဖူꩻ၊ ထူႏတွမ်ႏလုံးတန်၊ သိုမ်ဆီသူပထပ်၊ သမ်းပေ့ꩻသမ်းတာ၊ ဓိဋ္ဌာန်ႏငသေꩻ၊ ဒေဝါလူꩻပို၊ သိုမ်ဆီသူဖြာꩻ၊ အုံပွိုးထွားတီ၊ သိုမ်ဆီသူထပ်၊ ဓိဋ္ဌာန်ႏငသေꩻ၊ စေႏတီႏတောႏယို၊ မူႏခိုပေႏတန်၊ နမ်းငါကာလ၊ စေႏတီႏဘုရာꩻ၊ ရတနာႏသင်္ဃ၊ ဆုတောင်ꩻပြဲ့ꩻကောင်၊ အလောင်းအနာ၊ ပါမုဲꩻလဲ့ခါ၊ တယားဗာႏတဝ်း၊ မီႏထွာကိုꩻကွယ်ႏ၊ မီႏခေါက်ဝုဲႏဗာႏ၊ စေႏတီႏယိုနဝ်ꩻ၊ ထွာလုပ်ꩻထာꩻခွုမ်၊ သွို့ꩻကောင်တွမ်ႏလုဲး၊ ကားခုဲဖြေꩻစာꩻ၊ ငနာငဆေꩻ၊ ချွေႏရံႏပိုလီꩻ၊ စီꩻပွာꩻချမ်ꩻသာႏ၊ ဝွေဒနာႏလဲ့ကင်ꩻ၊ ဆင်ꩻရဲꩻလဲ့ယန်၊ ထာꩻဖြန်လဲ့ထိုꩻ၊ တံႏမျိုꩻကစ၊ တရွဗွုန်ႏတဝ်း၊ အုံဟဝ်အဝ်ႏသန်ꩻ၊ စေꩻစိန်ႏချမ်ꩻသာႏ၊ သိကျာꩻဓိဋ္ဌာန်ႏ၊ ယံဖေႏလိုꩻလူꩻ၊ မူႏခိုꩻကိုꩻကွယ်ႏ၊ ခေါက်ဝုဲႏလူႏတန်ꩻ၊ မီႏထွာခွန်ကွဉ်၊ ပွိုင်ႏခမ်းပွိုင်ႏထီ၊ မီႏထွာကိုꩻကွယ်ႏ၊ ပျုစုလွမ်ꩻလာꩻ၊ မီႏဝုဲႏဗာႏနဝ်ꩻ၊ အာႏဏာႏလြ့ထို၊ တံꩻခိုꩻလဲ့တန်၊ ဗွန်ကံႏလဲ့အဝ်ႏ၊ ယောင်ꩻဟဝ်ငဝ်းအွီႏ၊ ဝေဒနာႏလဲ့ကင်ꩻ၊ အာႏဏာႏပြင်ꩻကတ်၊ ပီနုဲးရဟန္တာႏ၊ အင်္ဂုလိမာလ၊ ဘဝနမ်းငါ၊ ငခါယိုကစ၊ အီႏလꩻစွိုးနုဲး၊ ထုဲႏပီရဟန္တာႏ၊ အရှင်ဗာကု၊ ရူပရင်းဖင်ꩻ၊ ယောင်ꩻဆင်ꩻတရေꩻ၊ ပီးနုဲးရဟန္တာႏ၊ အရှင်မဟာကစ္စည်ꩻ၊ ထာꩻရာꩻရာꩻနဝ်ꩻ၊ အဝ်ႏတအဝ်ႏတဝ်းလဲ့၊ ယံဖေႏလꩻနုဲး၊ အရှင်နုရုဒ္ဓါႏ၊ သာႏကီႏဝင်ႏခွန်ပို၊ လိုꩻခိုစင်ႏစဲစ်၊ ရဟန်ꩻခေတ်ယံထွာ၊ ယံဖေႏလꩻနုဲး၊ ထုဲႏပီခွန်ဖီ၊ သိကျာꩻဣန္ဒာ၊ ဒေဝါတနံ၊ ဓိဋ္ဌာန်ႏငသေꩻ၊ စေႏတီႏဘုရာꩻ၊ ရတနာသင်္ဃ၊ ဆုတောင်ꩻပြဲ့ꩻကောင်၊ အလောင်းအနာ၊ မီႏထွာကိုꩻကွယ်ႏ၊ မီႏခေါက်ဝုဲႏဗာႏ၊ ဘုရာꩻနဝ်ꩻမꩻ၊ အီꩻလꩻစွိုးနုဲး၊ ထုဲႏပီသိကျာꩻ၊ ငဝ်းငွါဓိဋ္ဌာန်ႏ၊ ပန်ယိုနမ်းငါ၊ ငခါယိုကစ၊ ဒုက္ခဆင်ꩻရဲꩻ၊ အပါယ်ႏလစ်ꩻပါꩻ၊ တသေငါꩻတဝ်း၊ လူꩻဟဝ်လိုꩻဒါႏ၊ စံႏစာꩻထွူမꩻ၊ ဘဝနမ်းငါ၊ ဗုဒ္ဓရာဇာ၊ ဘုရာꩻမိတေ၊ ဖူးတွေ့မော့ꩻဗာႏ၊ ဘုရာꩻတပဲ့ꩻ၊ ဧဟိဟဲ့ꩻဟောင်၊ ဖူးမောင်ႏဖူးမူႏ၊ ထူႏထွာရဟန်ꩻ၊ သင်္ကန်ꩻကွဉ်ဗုဲ၊ ကြုဲꩻရဟန္တာႏ၊ လꩻဗာႏနိဗ္ဗာန်ႏ၊ ကျံႏဂန်ႏတရာꩻ၊ လိတ်တောင်ႏမာႏကို၊ ရိုꩻလွဉ်ပီးနဝ်ꩻ၊ ဒီဟဝ်ထွားဖတ်၊ နေးနာႏမတ်တောင်ꩻ၊ ကောင်နာလောင်းကီ၊ စင်နီစင်ပါꩻ၊ ကျိုꩻစာꩻလွေꩻဝုဲႏ၊ ကိုꩻကွယ်ႏလူႏတန်ꩻ၊ တာတက်မီႏလဲဉ်း၊ သဲင်ꩻကျန်ႏသဲင်ꩻအချာ၊ ကျိုꩻစာꩻလွေꩻလွ၊ တကာႏမတကာႏခို၊ ကျိုꩻစာꩻလွေꩻနော၊ သူႏတောႏသီးယာ၊ ကားကပါလွေꩻ၊ မော်နမ်းထီဖွိုင်ꩻ၊ တတ်နွိုင်ႏသမျ၊ ကားကလꩻဒါႏ၊ သေင်ႏရာႏပေႏတန်၊ နမ်းမန်ꩻဆီမီး၊ ထီꩻတွမ်ႏတံꩻခွဉ်ႏ၊ ခဝ်းမွဉ်ꩻတခိုး၊ ကျိုꩻစာꩻလွေꩻနော၊ သူႏတောႏသီးယာ၊ တတ်နွိုင်ႏသမျ၊ ဩဇာႏတခိုး၊ အငိုးအလွမ်၊ သွမ်ꩻပန်ꩻဩဇာႏ၊ ကဝ်ႏထာကဝ်ႏရွဉ်၊ သွမ်ႏဗွာချိုတနျာႏ၊ တသီးကစ၊ ဆီမီးတန်ဆောင်၊ ဗွူဖေါင်းကျက်သာႏ၊ ဆျာထီႏတောင်းလုဲ၊ နွိုးယုဲရသာႏ၊ သဒ္ဓါႏလူႏတန်ꩻ၊ သင်္ကန်ꩻနေင်းယာ၊ ဗန်ႏဗွာဖဝါႏ၊ သဒ္ဓါႏသမျ၊ ပိဏ္ဍပါတံ၊ ဒဲဉ်ဟန်ႏကစ၊ ဒါနဆီမီး၊ မီႏပြင်ꩻမီႏပြုဲ၊ မီႏကုဲမီႏထို့၊ ပျုစုတယ်ႏဖျင်၊ သူႏအင်ꩻသူႏသီ၊ တင်ꩻထီႏဟွဲဟိန်ႏ၊ သဲင်လဝ်မန်ႏကင်ꩻ၊ သင်္သရာႏနမ်းငါ၊ ယံထွာကုသိုလ်ႏ၊ ဒီဟဝ်ကျိုꩻစာꩻ၊ တကာႏသီးယာ၊ ဖြားဆားပေႏတန်၊ ခွန်ကွဉ်ကစ၊ ယံဖေႏလꩻနုဲး၊ ထုဲႏပီရဟန္တာႏ၊ အနုရုဒ္ဓါႏသျင်ႏ၊ သာႏကီႏဝင်ႏပို၊ လိုꩻဝင်ꩻတသူ၊ မူႏခိုသီးယာ၊ စခါရဟန္တာႏ၊ အနုရုဒ္ဓါ၊ ကိမိလ၊ ဘဒ္ဒိယအရှင်ႏ၊ မဟာကစ္စည်ꩻ၊ ဘုရာꩻတပဲ့ꩻ၊ တောင်ꩻပြန်ႏငသေꩻ၊ သရေꩻနုတ်တံꩻပူႏ၊ သရေႏနုဲႏမဲ့ငါသွတ်ꩻ၊ ဖဝါႏဗန်ႏဗွာ၊ ဝီꩻထာဝီꩻခံꩻ၊ ဌာပနာႏညီꩻဝင်ꩻ၊ တဆူႏချင်ꩻထွူနော၊ ဂေါတမတပဲ့ꩻတောႏ၊ ဟဲ့ꩻဟောင်နာမ၊ အင်္ဂုလိမာလ၊ စတွမ်ႏရဟန္တာႏ၊ အနုရုဒ္ဓါႏသျင်ႏ၊ သာႏကီႏဝင်ႏမင်ꩻမျိုꩻ၊ ဝွေꩻသီးဗွေႏသူပါꩻ၊ ထွာဗာႏဝင်ꩻအတန်၊ စတွမ်ႏရဟန္တာႏ၊ တရေင်ဗွေဗွေ၊ သွင်ꩻငသေꩻဌာပနာႏ၊ ဘုရာꩻစေႏတီႏ၊ ပွိုးပီးနဝ်ꩻမꩻ၊ မျတ်လဲဉ်းအလင်၊ စေႏတီႏလင်ကွိုနဲ၊ ထဝ်းကဲသီးယာ၊ ကောင်နာအထွတ်၊ ရဟန္တာႏဗွေႏ၊ ဒေဝါႏခွန်ဖီ၊ သိကျာꩻကစ၊ ဖြွမ်းလွညီႏညာႏ၊ ဌာပနာႏငသေꩻ၊ ဘုရာꩻစေႏတီႏ၊ စဝ်းသိကျာꩻမင်ꩻ၊ သွင်ꩻငသေꩻထွူနော၊ စေႏတီႏတောႏမျတ်၊ ရတနာသိင်္ဃ၊ ဆုတောင်ꩻပြဲ့ꩻကောင်၊ ဒီဟဝ်ကိုꩻကွယ်ႏ၊ ခေါက်ဝုဲႏလွနောလောင်ꩻ၊ ကောင်နာလောင်းကီ၊ တဆီနီရာႏသီႏ၊ တလီꩻကမာꩻ၊ တလာမဲ့ပေါင်ꩻ၊ ဝꩻနဝ်ဖဝ်ႏထင်ꩻ၊ ပန်ꩻတင်ႏမောက်ꩻသွဉ်၊ ကဝ်ႏရွဉ်ကဝ်ႏတောင်ꩻ၊ ကောင်နာလောင်းကီ၊ တလီꩻထွာႏဖတ်၊ ကောင်မျတ်ရွှေတကူႏ၊ ဆုတောင်ꩻပြဲ့ꩻအနာ၊ စံကာꩻမူꩻလေꩻ၊ ပန်သေꩻကဝ်ႏချင်း၊ သာယာႏဟဝ်ကတ်၊ အရပ်ဆတွို့ꩻ၊ မွူးနွို့အရပ်၊ မွိုးနန်းစခါ၊ စဝ်းသိကျာꩻမင်ꩻ၊ ဓိဋ္ဌာန်ႏငသေꩻ၊ မြစ်ဝဲꩻထီခြောင်၊ လစ်ꩻဗောင်လစ်ꩻလီး၊ ထီခြောင်သာႏယာႏ၊ သိကျာꩻဖန်ဖေႏ၊ ပေႏတန်သီးယာ၊ စွုမ်ႏဖြာꩻအွꩻလူး၊ မူႏခိုပေႏတန်၊ မီႏတွိုႏခမ်းခါ၊ လစ်ꩻလာမွူးတွင်ꩻ၊ ထွတ်ꩻလင်ꩻစွူဖြွိုး၊ စွိုးဆင်နဝတတ်၊ ခွꩻကတ်စုံဟဝ်၊ အဝ်ႏဆကောင်ထျꩻ၊ ထွတ်ꩻလင်ꩻတွို့ꩻထင်ꩻ၊ လင်ꩻခြွဉ်းလင်ꩻခွဲ၊ ပွိုးပီးနဝ်ꩻမꩻ၊ မွိုးနန်းစခါ၊ စဝ်းသိကျာꩻမင်ꩻ၊ သမုတ်ဖန်ဖေႏ၊ အမေနာမ၊ ပစ္စေထီခြောင်၊ ဟဲ့ꩻဟောင်နဝ်ꩻနေ၊ ဘုရာꩻဆထင်ꩻ၊ ထွတ်ꩻလင်ꩻတွို့ꩻနဝ်၊ စဝ်းသိကျာꩻမင်ꩻ၊ သမုတ်ဖန်ဖေႏ၊ အမေနာမ၊ အဿစန္တနဒီ၊ ထီခြောင်နောလောင်ꩻ၊ ဆုတောင်ꩻပြဲ့ꩻကောင်၊ ဟောင်ရိုꩻဘုရာꩻ၊ မျက်နာႏဆကွဉ်ႏ၊ ထွတ်လွဉ်နဝ်ꩻနေ၊ ထီခြောင်နဝ်ꩻရာꩻ၊ စဝ်းသိကျာꩻမင်ꩻ၊ သမုတ်ဖန်ဖေႏ၊ အမေနာမ၊ ပဉ္စဝတ္တ၊ မဏိသာရ၊ မဟာနဒီ၊ ထီခြောင်ကွိုတဝ်း၊ ဆုတောင်ꩻပြဲ့ꩻဘုရာꩻ၊ မျက်နာႏဆကွဉ်ႏနဝ်၊ ဝေင်ꩻတန်နဝ်ꩻရာꩻ၊ စဝ်းသိကျာꩻမင်ꩻ၊ သမုတ်ဖန်ဖေႏ၊ အမေနာမ၊ ထိန်ညဝတီႏ၊ နီဒုံနီဝေင်ꩻကွိုနဲ၊ တင်ꩻလုဲသီးယာ၊ ဆုတောင်ꩻပြဲ့ꩻဘုရာꩻ၊ မျက်နာႏဆတွို့ꩻ၊ စွို့ꩻစွို့ꩻအရပ်၊ မွိုးနန်းစခါ၊ တထီႏတဝ်းထာꩻလေ၊ တသေတဝ်းထာꩻလုဲး၊ ပီနုဲးထီကုံꩻ၊ တုံပေါ်ဝေ့ꩻဝွိုင်ꩻ၊ ထွိုင်ႏထွိုင်ႏခြို့ꩻခြို့ꩻ၊ တငို့ꩻချာငါ၊ ငမ်းတလဲဉ်းလꩻတဝ်း၊ ဗွေႏစဝ်းဘုရာꩻ၊ သက်တောႏသွစ်ꩻဆီ၊ စွုမ်ႏနီꩻထွားဆွုမ်ႏ၊ ရှည်ဒါႏမကောင်း၊ ထီခြောင်တပြက်ꩻ၊ သက်သာႏညိမ်ꩻချမ်ꩻ၊ ခမ်းတန်နိဗ္ဗာန်ႏ၊ ဝေင်ꩻခံꩻဝေင်ꩻထာ၊ မဉ်ပသာဖေႏ၊ ပေႏတန်ခွေသီ၊ ထီခြောင်တဖဲ့ꩻ၊ ဟဲ့ꩻတွမ်ႏငဝ်းသာႏ၊ ဘုရာꩻစေႏတီႏ၊ ထီႏဗာႏငခါ၊ နီနာꩻဝုဲႏဗာႏ၊ ကိုႏစာꩻနောစဝ်း၊ နဝ်ꩻငါယံလꩻ၊ သုခချမ်ꩻသာႏ၊ နဝ်ꩻထွူကွိုနဲ၊ ကျောင်ꩻတကာႏသီးယာ၊ တဖုံႏတဉ်ဟွေး။

ပွိုးပီးနဝ်ꩻမꩻ၊ ကျောင်ꩻတကာႏသီးယာ၊ ဘုရာꩻရွှေထုံ၊ ဟဲ့ꩻဟောင်နာမ၊ ရွှေစာယန်ဘုရာꩻ၊ မျက်နာႏဆကွဉ်ႏထင်ꩻ၊ နဝ်ꩻရာꩻမွိုးနန်း၊ ဗွန်တန်မျတ်လ၊ ဂေါတမဘုရာꩻ၊ မြတ်စွာလက်ထက်၊ သူရိစန္တာႏ၊ သန်စက်ခရဲင်ႏ၊ ဌာနရပ်နဝ်ꩻ၊ ဟော်ခံꩻဝေးတန်၊ တယ်ႏမံꩻငသေꩻ၊ စေႏတီႏဘုရာꩻ၊ သေႏချာႏထွူမꩻ၊ ဟော်ခံꩻဝေးတန်၊ သမုတ်ဖန်ဖေႏ၊ အမေနာမ၊ နောင်တော်ဘုရာꩻ၊ ရွှေထုံလက်ထက်၊ ရွှေလျက်လဘုရာꩻ၊ ခါလဲ့ရိုꩻနော၊ ဘုရာꩻတန်သောင်၊ ဟောင်ရိုꩻဆကွဉ်ႏနဝ်၊ အဝ်ႏတွမ်ႏလူꩻတန်၊ တနံဒေဝါ၊ ထွားတီဝေင်ꩻဒုံ၊ ရွှေထုံအရင်ꩻ၊ နတ်တနံသိကျာꩻ၊ ဓိဋ္ဌာန်ႏငသေꩻ၊ စထစ်မွိုးနန်း၊ ခွန်တန်လက်ထက်၊ ဆက်ဆက်ပန်ပန်၊ စထစ်ကမ္ဘာႏ၊ မဟာႏဘဒ္ဒကပ်၊ ဘုရာꩻငတ်ꩻဆူႏ၊ ဇမ္ဗူႏလိုꩻခမ်း၊ ဟမ်ႏတန်ဆကီ၊ ကားတဲင်ကမ္ဘာႏ၊ နမ်းငါမီႏကုဲ၊ တပြုဲပြင်ꩻတဝ်း၊ နဝ်ꩻရာꩻဝွေꩻသီး၊ ညီနောင်သိုမ်ပါꩻ၊ ထွားစောင်ꩻတီဗာႏ၊ ဌာနရွှေထုံ၊ ခွန်စဝ်းသိကျာꩻ၊ ဓိဋ္ဌာန်ꩻငသေꩻ၊ ဗွူဖေါင်းကွိုတဝ်း၊ ထဝ်းကဲသီးယာ၊ တနံဆတွိုꩻထင်ꩻ၊ အရှင်မဟာကဿပ၊ စခါဝွေꩻဗွေႏ၊ တယ်ႏမံꩻငသေꩻ၊ ရွှေသာလျောင်ႏဘုရာꩻ၊ ဒွေါင်ႏဆွာꩻဖွိုႏထို၊ သိုမ်ဆီငတ်ꩻသောင်ꩻ၊ မုနိချာႏထင်ꩻ၊ ခင်ႏယောင်းငနဝ်၊ မဲ့ငါချာႏကွဉ်ႏ၊ မန်းငဝ်းဘာႏသာႏ၊ နဝ်ꩻရာꩻဟဲ့ꩻဟောင်၊ ရွှေသာလျောင်းထွူနော၊ မီႏထွာပအိုဝ်ႏ၊ ကရိုꩻနဝ်ꩻရာꩻ၊ အမေနာမ၊ ကဿပဘုရာꩻ၊ ငဝ်းငွါရိုꩻငသေꩻ၊ သူႏတောႏသီးယာ၊ ဆုဲင်ꩻချာနဝ်ꩻမꩻ၊ ဂေါတမီႏပိုခို၊ ဟောင်ရိုꩻနာမ၊ သျင်ႏအာနန္တာႏ၊ ငဝ်းငွါလျောက်လဝ်း၊ ဩစဝ်းဩဗွေႏ၊ ဝေနေယျအဖါ၊ ကောထွာထေရ်ႏတန်၊ ရဟန်ꩻနွုတ်ꩻပါꩻ၊ နဝ်ꩻရာꩻနီဗွေႏ၊ မေတ္တာႏသညင်ꩻ၊ ရက်ပဲင်ꩻထွူနေ၊ သေႏချာႏထွူဩ၊ တပဲ့ꩻတောႏဖူးခို၊ ညီတောအရှင်၊ သညင်ꩻဖန်းဩ၊ လျောက်လဝ်းတောင်ꩻပြန်ႏ၊ ဗွန်တန်ဘုရာꩻ၊ လွိုန်ဟားလာဆနꩻ၊ ထန်ႏလꩻသူနီꩻ၊ ညီတော်တောင်ꩻပြန်ႏ၊ ခွန်တနံလူꩻ၊ ဗေင်ႏယေန်သူႏသူႏ၊ မွူးကွို့ꩻနာꩻတိန်ႏတိန်ႏ၊ လိုꩻဝေင်ꩻဗေင်ႏယေန်၊ ကျောင်ꩻတောႏလောင်းကီ၊ နီပါꩻဖူးဝေး၊ တနာꩻလေမွူး၊ နဝ်ꩻမꩻနီဗွေႏ၊ အာနန္တာႏဟွေး၊ ဌာနရပ်ယို၊ စထစ်စွဉ်ႏအွိုး၊ မွုးနန်းစခါ၊ ကကုသန်ႏဘုရာꩻ၊ မြတ်စွာအစိုး၊ သူရိနာဂ၊ ရာဇမင်ꩻကြီꩻ၊ ပွိုးပီႏမုဲꩻမကောင်း၊ ငဝ်းငွါဟဲ့ꩻဟောင်၊ သူရိနာဂ၊ နဝ်ꩻရာꩻဝွေꩻသီး၊ မွုးနန်းစခါ၊ အဖါနဝ်ꩻရာꩻ၊ ပွိုးထွာခွန်မွူး၊ ဝေꩻသီးအမွိုး၊ ပွိုးထွာနဂါꩻ၊ ပွိုးပီးနဝ်ꩻမꩻ၊ သမုတ်ဖန်ဖေႏ၊ အမွိုးတွမ်ႏအဖါ၊ နီဖြာꩻနဝ်ꩻမꩻ၊ သူရိနာဂ၊ နာမရိုꩻနော၊ သူရိနာဂ၊ ရာဇဟော်ခံꩻ၊ ခွန်တန်လမ်းသား၊ မိဖြာꩻနဝ်ꩻကောင်း၊ ဟောင်ရိုꩻနာမ၊ နာဂဝိဇ္ဇာ၊ မိဖြာꩻရိုꩻနော၊ ပွိုးပီးမုဲꩻခါ၊ နာဂါဝိဇ္ဇာ၊ နဝ်ꩻရာꩻရိုꩻကောင်း၊ နင်ꩻမိဖြာꩻ၊ အဖါနဝ်ꩻရာꩻ၊ ပွိုးထွာဝိဇ္ဇာႏ၊ အမွိုးနဂါꩻ၊ ဝွေꩻသီးသဲင်ꩻအုံ၊ တယ်ႏဒုံတယ်ႏဝေင်ꩻ၊ သဲင်ꩻထွာပအိုဝ်ႏ၊ ပွိုးထွာပဌမ၊ အသက်လဲ့ဆွာꩻ၊ တရျာꩻနွုတ်ꩻဆီ၊ လွိုတကီနွုတ်ꩻနေင်ႏ၊ မီႏထွာရေႏတွက်၊ မင်ꩻဆက်ဆေ့ꩻအာ၊ သိုမ်ရျာꩻသွစ်ꩻဆီ၊ လွိုတကီလစ်ꩻဆက်၊ နဝ်ꩻမꩻတွိုႏချာ၊ အာနန္တာဟွေး၊ ကောဏဂုံႏဘုရာꩻ၊ သံးထွာသမ်းပွင်ꩻ၊ မင်ꩻဆက်သိုမ်ရျာꩻ၊ မာꩻငကီကွတ်ꩻဆက်၊ ရွှေဦးလမင်ꩻကြီꩻ၊ တယ်ႏရီးအထျꩻ၊ အသက်တရျာꩻ၊ ငတ်ꩻဆီသူနေင်ႏ၊ ပွိုင်ႏဝေင်ꩻနန်းဟော်၊ မိဖြာꩻနဝ်ꩻကောင်း၊ ဟဲ့ꩻဟောင်မိလ၊ အသက်တရျာꩻ၊ ငတ်ꩻဆီနဝ်ꩻနေ၊ ဝွေꩻသီးမာꩻဝါꩻ၊ ပဲင်ꩻချာႏအသက်၊ နပ်(တွက်)တွာဝင်ꩻ၊ တနားရီႏချင်ꩻနော၊ ဆုဲꩻချာနဝ်ꩻမꩻ၊ ဘုရာꩻကဿပ၊ သမ်းထွာသမ်းပွင်ꩻ၊ မဟာသာရ၊ ရာဇမင်ꩻကြီꩻ၊ ဝွေꩻနဝ်ꩻမော့ꩻဗာႏ၊ အရှင်ကဿပ၊ မဟာသာရ၊ မင်ꩻကြီꩻလက်ထက်၊ သုဝဏ္ဏဘုမ္မိ၊ နီဝင်ꩻပအိုဝ်ႏ၊ အမျိုꩻအနွယ်ႏ၊ အစဲဉ်ႏစဲဉ်ႏအဆက်ဆက်၊ တပျတ်တဝ်းနော၊ ဖေါႏထန်ႏထေဖေႏ၊ မင်ꩻစဲဉ်ႏခွန်ဆက်၊ မီႏရေႏတွက်နဝ်ꩻ၊ ငတ်ꩻရျာꩻနွုတ်ꩻဆီ၊ လွိုတကီကနွုတ်ꩻဆက်၊ မဟာသာရမင်ꩻ၊ သက်တောႏနဝ်ꩻရာꩻ၊ တရျာꩻကွတ်ꩻဆီ၊ လွိုတကီကွတ်ꩻနေင်ႏ၊ ပွိုင်ႏဝေင်ꩻနင်းဟော်၊ မွန်းပျောႏစံႏစာꩻ၊ ဟော်ထာလောင်းကီ၊ မီဖြာꩻနဝ်ꩻကောင်း၊ ဟောင်ရိုꩻမိဥု၊ မင်ꩻဆက်ငတ်ꩻရျာꩻ၊ နွုတ်ꩻဆီနွုတ်ꩻဆက်၊ စပ်လွဝင်ꩻတွမ်ႏ၊ ခွန်တန်သီဟရာဇာႏ၊ နဝ်ꩻရာꩻသွစ်ꩻဆက်၊ အဝ်ႏစပ်လွေꩻရဲဉ်ႏ၊ အဝ်ႏစဲဉ်ႏစဲဉ်ႏလင်ꩻ၊ တွမ်ႏခွန်သူရိစန္တာႏ၊ မဟာႏမင်ꩻကြီꩻ၊ နဝ်ꩻထွူကွိုနဲ၊ အာနန္တာႏသျင်ႏဟွေး၊ နီဗွေႏဘုရာꩻ၊ ငဝ်းငွါမိန်းတောႏ၊ ဟော်ꩻထန်ႏနယ်ဖေႏ၊ ဖူးပေႏအာနန်၊ ဖြောင်းခံꩻဖြေꩻထာ၊ သေႏချာႏထွူမꩻ၊ ထာꩻလဲ့လေစင်၊ အာႏရုံႏထန်ႏလွဉ်၊ ဆကွဉ်ႏလေဗွာ၊ သူရိစန္တာ၊ သဒ္ဓါႏလူႏတန်ꩻ၊ သွမ်ꩻပန်ꩻပိဏ္ဍပါတ်၊ ရပ်ဆွုမ်ႏဘုဉ်ꩻပေႏ၊ သေႏချာႏထွူမꩻ၊ ဝွေꩻဗွေႏသပိတ်၊ ခွန်သင်ဗြဟ္မာႏ၊ ကလူႏခါꩻနဝ်ꩻ၊ ဖေႏအပ်အာနန္တာႏ၊ ယံဖေႏဌာပနာႏ၊ ကျောင်ꩻထာကျောင်ꩻခံꩻ၊ မျက်နာႏဆတွို့ꩻ၊ မဗော့ꩻမညာꩻ၊ အတာငတ်ꩻဆီ၊ စေႏတီႏဘုရာꩻတန်၊ ဒန္တစွယ်ႏတောႏ၊ ဆꩻတွို့ꩻအရပ်၊ သိကျာꩻတနံ၊ ဗြဟ္မာႏလူꩻလိုꩻ၊ ခူႏအောင်ဌာပနာႏ၊ စဝ်းသိကျာꩻမင်ꩻ၊ ခူႏလင်ꩻထာꩻအောင်၊ လစ်ꩻဆီလစ်ꩻသောင်ꩻ၊ အယော့အဖွိုꩻ၊ မီႏတွိုႏအငွါ၊ ခါလဲ့နုဲးနုဲး၊ ထုဲႏပီလွဝင်ꩻ၊ သွင်ꩻသော့ꩻဌာပနာႏ၊ သိကျာꩻခွန်ဖီ၊ ဆကီတယ်ႏမံႏ၊ အွတ်ꩻခံꩻအွတ်ꩻထာ၊ အနာတင်ႏထီꩻ၊ စီႏသဲင်ဟွဲဟိန်ႏ၊ သဲင်ꩻလဝ်မန်ႏကင်ꩻ၊ ဘိသိက်မင်္ဂလာႏ၊ နွုတ်ꩻနာꩻနွုတ်ꩻနီꩻ၊ ဖြီꩻစီꩻထွူမꩻ၊ နီဗွေႏဘုရာꩻ၊ ငဝ်းငွါမိန်းတောႏ၊ ဟော်ꩻထန်ႏငသေꩻ၊ အမေနာမ၊ အာနန္တာႏဘုရာꩻကွိုနဲ၊ ထဝ်းကဲသီးယာ၊ တဖုံႏတဉ်ဟွေး။

ပွိုးပီးနဝ်ꩻမꩻ၊ ထဝ်းကဲသီးယာ၊ လိုꩻအာခွန်နင်ꩻ၊ မတ်ဝင်ꩻတောင်ꩻတောင်ꩻ၊ ကျောင်ꩻတကာႏသီးယာ၊ ထီႏတောႏနမ်းငါ၊ ယံထွာကုသိုလ်ႏ၊ နီပအိုဝ်ႏစဲဉ်ႏဆက်၊ ရက်ပဲင်ꩻရတနာႏ၊ သိုမ်ပါꩻဂုဏ်ႏမျတ်၊ ပျဌာန်ꩻစပ်စီႏ၊ ပွိုးထီႏတဝ်းထာꩻလေ၊ တသေတဝ်းထာꩻလုဲး၊ ပီနုဲးထီကုံꩻ၊ တုံပေါ်ဝေ့ꩻဝွိုင်ꩻ၊ ထွိုင်ႏထွိုင်ႏခြို့ꩻခြို့ꩻ၊ တငို့ꩻချာငါ၊ ငမ်းလဲဉ်းလꩻတဝ်း၊ ဗွေႏစဝ်းဘုရာꩻ၊ သက်တောႏသွစ်ꩻဆီ၊ စွုမ်ႏနီထွားဆွုမ်ႏ၊ သေန်ႏဒါႏမကောင်း၊ ဝဲꩻနောင်တပြက်ꩻ၊ သက်သာႏငိမ်ꩻချမ်ꩻ၊ နိဗ္ဗာန်ႏနိရောဓ၊ ယံလꩻယံတွိုႏ၊ ကွိုꩻတောႏစွိုးယို၊ မူႏခိုဖြားဆား၊ သူႏတကာႏသီးနဝ်ꩻ၊ ငခါခေါမတ်တောင်ꩻ၊ ကြုဲခြောင်ꩻမူလ၊ သရိစန္တာႏ၊ မဟာမင်ꩻကြီꩻ၊ ထီꩻဗွာအဗွေႏ၊ ဧကရာဇ်ဟော်ခံꩻ၊ မွူးထန်ႏအရပ်၊ သုဝဏ္ဏဝေင်ꩻ၊ သိမ်မွေ့သာႏယာႏ၊ စဝ်းသိကျာꩻမင်ꩻ၊ သွင်ꩻငသေꩻဌာပနာႏ၊ သေႏချာႏထွူမꩻ၊ မူလသက္ကရာဇ်၊ တစ်နစ်ဂဏန်ꩻ၊ ဟောင်ရိုꩻတရျာꩻ၊ သာလွိုတဆီ၊ လွိုတကီနီဗာႏ၊ ပြိဿရာသီ၊ လွိုန်ရုတ်လာလောင်း၊ ဟောင်ရိုꩻနွုတ်ꩻနီꩻ၊ ရာႏသီႏနေင်ႏတန်၊ မွူးနီꩻစနေႏ၊ သူရိယာႏနက္ခတ်၊ ထန်ႏလꩻကွတ်ꩻဖြုံႏ၊ ပြဲ့ꩻစုံႏထွူမꩻ၊ စဝ်းသိကျာꩻမင်ꩻ၊ ဟဲ့ꩻတွမ်ႏပိုမာ၊ နင်ꩻသုစိတ္တာ၊ နင်ꩻသုဓမ္မာ၊ နင်ꩻသုဇာတာ၊ နင်ꩻသုနန္တာ၊ အမာဝင်ꩻလစ်ꩻ၊ ခွဲႏငါခွုန်ꩻသဲင်ꩻ၊ မျင်ꩻမိုရ်ႏကောင်နာ၊ ဝတိံႏသာႏခမ်းကီ၊ ကင်းတွမ်ႏဝီꩻဗွာ၊ ထီꩻထာထီꩻခံꩻ၊ ချွေႏရံႏသဲႏလာႏ၊ ရတနာႏလောလဲင်၊ စီႏသဲင်တိတ်ꩻခံꩻ၊ ဝေဇယန္တာ၊ ရတနာႏပျသာဒ်၊ သိုမ်ကုဋေႏဗွေဗွေ၊ ခွုန်ꩻသဲင်ꩻသာႏယာႏ၊ ကာသဲင်ꩻယွယွ၊ ဌာနနေႏရာႏ၊ ဝတိံႏသာႏခမ်းကွိုနဲ၊ တင်ꩻလုဲသီးယာ၊ ဆုဲꩻချာနဝ်ꩻမꩻ၊ ဂေါတမနီဗွေႏတွမ်ႏ၊ ခွန်သူရိစန္တာႏ၊ ဆꩻချာအဝ်ႏကုဲ၊ တင်ꩻလုဲအဗွေႏ၊ ဝေနေယျအဖါ၊ ဘုရာꩻပဉ္စဝ်း၊ ငဝ်းငွါမိန်းတောႏ၊ ဟော်ꩻဖေႏခွန်တန်၊ ဓမ္မတရာꩻ၊ ဝိနယ်ꩻငတ်ꩻကျမ်ꩻ၊ ဖြောင်းခံꩻဖြေꩻထာ၊ သေႏချာႏထွူမꩻ၊ မူလသက္ကရာဇ်၊ တစ်နှစ်နဝ်ꩻရာꩻ၊ တရျာꩻတဆီ၊ လွိုတကီနီဗာႏ၊ လွိုန်စေတ်ꩻလာဆန်ꩻ၊ ထန်ႏလꩻသူနီꩻ၊ မွူးနီꩻစနေႏ၊ သူရိယာႏနက္ခတ်၊ ထန်ႏလꩻတဆီနီꩻ၊ လက္ခဋီႏငတ်ꩻဖြုံႏ၊ အာႏရုံႏထန်ႏလွဉ်၊ ဆကွဉ်ႏကာလ၊ ရာဇဟော်ခံꩻ၊ ခွန်တန်သူရိစန္တာႏ၊ မဟာႏမင်ꩻကြီꩻ၊ အဝ်ႏဆနန်ꩻတောႏ၊ ဟော်ခံꩻလောင်းကီ၊ ရဲဉ်ꩻလူႏသွမ်ꩻပန်ꩻ၊ လစ်ꩻဆီကွတ်ꩻထိုမ်ꩻ၊ ရပ်ဆွုမ်ႏဘုဉ်ꩻပေႏ၊ တွမ်ႏတပဲ့ꩻတပန်ꩻ၊ ရဟန္တာႏဖုံႏ၊ သွစ်ꩻသဲဉ်ဗွေဗွေ၊လုတ်ကျွေးလွမ်ꩻလာꩻ၊ ဩဇာႏသွမ်ꩻပန်ꩻ၊ စွုမ်ႏပါꩻစွုမ်ႏဆူႏ၊ ဘုဉ်ꩻပေႏထွူမꩻ၊ ရာဇဟော်ခံꩻ၊ သူရိစန္တာႏ၊ ငဝ်းငွါလျောက်လဝ်း၊ ဩစဝ်းဩဗွေႏ၊ ခွေသွဉ်းပိုခို၊ သုဓမ္မရာဇာ၊ နဝ်ꩻရာꩻနီဗွေႏ၊ ယံဖေႏထူႏထွာ၊ ရဟန္တာႏဩစဝ်း၊ နဝ်ꩻမꩻနီဗွေႏ၊ ထင်ႏသေထင်ႏဟွုန်၊ ခွန်တန်ဟော်ခံꩻ၊ ငဝ်းငွါလျောက်လဝ်း၊ နဝ်ꩻမꩻဟဲ့ꩻဟောင်၊ ဖူးမောင်ႏအာနန္တာႏ၊ ဖြောင်းခံꩻဖြေꩻထာ၊ အာနန္တာဟွေး၊ ဟော်ခံꩻပိုခို၊ သုဓမ္မာရာဇာ၊ ယံဖေႏအွဉ်ႏခံႏ၊ ထူႏထွာရဟန္တာႏ၊ သာရိပုတ္တရာႏ၊ မဟာမောဂ္ဂလာန်ႏ၊ ရှင်ႏမဟာကဿပ၊ နဝ်ꩻမꩻဟဲ့ꩻဟောင်၊ ဟော်ခံꩻပိုခို၊ သုဓမ္မရာဇာ၊ ထူႏထွာရဟန်ꩻ၊ သင်္ကန်ꩻကွဉ်ဗုဲ၊ နီဗွေႏဘုရာꩻ၊ ဖြောင်းထာဖြေꩻခံꩻ၊ ဟဲ့ꩻဟောင်ဖန်ဖေႏ၊ အမေနာမ၊ သုဓမ္မထေရ်ႏ၊ ခါလဲ့တစွိုးကွိုနဲ၊ တင်ꩻလုဲသီးယာ၊ ဟော်ခံꩻပိုခို၊ သုဓမ္မရာဇာ၊ ထူႏထွာရဟန်ꩻ၊ သေႏချာႏထွူမꩻ၊ ဟဲ့ꩻတွမ်ႏတပဲ့ꩻတပန်ꩻ၊ ရဟန္တာႏဖုံႏ၊ ကွဉ်ရုံႏသင်္ကန်ꩻ၊ သွစ်ꩻသဲဉ်ဗွေဗွေ၊ ကျွꩻကာသဲင်ꩻစူꩻ၊ တောင်ငူရသေ့ꩻ၊ ဖူးဝေးဝင်ꩻနွုတ်ꩻ၊ အုံအဝ်ႏခမ်းတခြာ၊ ဟတ္ထိဒွါရ၊ ထီခြောင်ထျကွဉ်ႏ၊ ရသေ့ꩻညီနောင်၊ တောင်ꩻပြန်ႏငသေꩻ၊ ကေသာဆံတော်၊ တဖြာꩻတလီးလီး၊ ဖေႏအပ်ထွူမꩻ၊ ကျွꩻကာသဲင်ꩻစူꩻ၊ စူလာနီဖဲ့ꩻ၊ သာရိခေတ္တရာ၊ ဌာပနာႏငသေꩻ၊ ကေသာဆံတော်၊ တလီးနဝ်ꩻနေ၊ သမုတ်ဖန်ဖေႏ၊ အမေနာမ၊ သီမော်တော်ကွိုတဝ်း၊ ရသေ့ꩻစဝ်းရဟန်ꩻ၊ တောင်ꩻပြန်ႏဆံတော်၊ သီမော်ဓောထွူနဝ်ꩻ၊ သူႏတောႏသီးယာ၊ နဝ်ꩻခါနီဗွေႏ၊ ကျွꩻကာသဲင်ꩻဗာႏ၊ ရာဇဂြိုဟ်ႏခမ်း၊ ခွန်တန်ဟော်ခံꩻ၊ ဖူးဝေးဝင်ꩻနီ၊ ပသာသဲင်ꩻထွန်ႏ၊ တွိုႏစွဉ်ႏထီကျို၊ အဒွိုအသောင်၊ ခြောင်တန်သာႏယာႏ၊ ဧရာႏဝတီႏ၊ မကွေ့အဝေင်ꩻ၊ သိမ်မွေ့သာႏယာႏ၊ ဌာနအရပ်၊ ခွန်တန်ထင်ႏထီႏ၊ နီဗွေႏဘုရာꩻ၊ ကျွꩻကာႏခွုန်ꩻသဲင်ꩻ၊ တနဲင်းပေႏသꩻ၊ ရာဇဟော်ခံꩻ၊ ဖူးဝေးဝင်ꩻနီ၊ သီကတူႏငွိုးလင်ꩻ၊ သုဲꩻဗွာလောင်းကီ၊ ထီခြောင်အထျꩻ၊ နဝ်ꩻမꩻနီဗွေႏ၊ ထင်ႏသေထင်ႏထီႏ၊ ဝင်ꩻနီဟော်ခံꩻ၊ တနဲင်းသꩻငွိုးဒွါႏ၊ ဗွန်တန်နီဗွေႏ၊ ကျွꩻသဲင်ꩻငချာ၊ ဟော်ꩻခံꩻသောင်ဒွို၊ သိုမ်ပြန်ႏသိုမ်ပေါက်၊ သိုမ်ခေါက်သိုမ်လဲင်ႏ၊ သညင်ꩻဟော်ခံꩻ၊ တကာႏတန်ဟွေး၊ ခွေယိုတွမ်ႏနာꩻ၊ စခါမွိုးနန်း၊ ဖူးဝေးရင်ꩻဒွါႏ၊ ပါꩻလင်မွေးတဝ်း၊ နီအုံအဝ်ႏညီꩻ၊ ဗာရာဏသီႏခမ်း၊ လမ်းတန်အဗွေႏ၊ သဌေꩻပိုခို၊ ခွေကထွာဖူးပေႏ၊ နာꩻထွာဝေးတန်၊ နီမွိုးအွဉ်ႏကုဲ၊ လုပ်ꩻလုဲးအချာ၊ နီမွိုးထွန်ႏငသေꩻ၊ ယံဖေႏထွားပါ၊ နာꩻဖူးပေႏနော၊ ထွန်ႏငသေꩻယူႏယက်၊ ကတွက်သေတဝ်း၊ ငထဝ်းထာꩻလိမ္မာႏ၊ တဟာမွူး၊ နာꩻထိုꩻနꩻခွေ၊ ကငွိုးလွဉ်ꩻနာꩻ၊ လာလာဖြေႏသꩻ၊ နာꩻတထွားတဝ်း၊ အဝ်ႏနုဲးတသေတဝ်း၊ လိုꩻပေႏဘာႏသာႏ၊ ပျောႏငါႏထာꩻလွိုး၊ တနီꩻဟာမွူး၊ နာꩻထိုꩻနꩻခွေ၊ ဟို့ꩻခိုးထီဒဲဉ်၊ ခွေမဉ်အွꩻထီ၊ နီမွိုးထင်ꩻသဲင်ꩻ၊ နေးတွမ်ႏခွဉ်းနာႏ၊ တွဲႏဖေႏနာꩻငင်း၊ တဆင်ႏကွိုတဝ်း၊ ပွိုးပီးနဝ်ꩻမꩻ၊ ခွေတွမ်ႏနာꩻယို၊ အုံအဝ်ႏလိုꩻခမ်း၊ ဖယန်ဗာႏဝင်ꩻကွိုနဲး၊ တကာႏမင်ꩻကြီꩻ၊ သူရိစန္တာႏ၊ တကာႏတန်ဟွေး၊ နီဗွေႏဘုရာꩻ၊ ဖြောင်းထာဖြေꩻခံꩻ၊ ဟော်ꩻထန်ႏနယ်ဖေႏ၊ ဇာတ်လီꩻစခါ၊ သေႏချာႏထွူမꩻ၊ ခွန်တန်ခါလဲ့၊ မဲ့ထီရီႏလင်ꩻ၊ သညင်ꩻမေတ္တာႏ၊ ခွုန်ꩻငချာသဲင်ꩻနဝ်၊ ဌာနခမ်းလီꩻ၊ ထီကျိုပြက်ꩻကွဉ်ႏ၊ နီဗွေႏဘုရာꩻ၊ ခါလဲ့ကျွꩻသဲင်ꩻကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။ ပဌမသမဲင်ꩻ၊ နိဋ္ဌိတံ၊ ထွူထွူကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။ (ဗꩻလိတ်မဲ့ငါ- ၄၂)

ပွိုးပီးနဝ်ꩻမꩻ၊ ကျောင်ꩻတကာႏသီးယာ၊ ဘုရာꩻသျင်ႏဗွေႏ၊ သုဝဏ္ဏခမ်း၊ လဲဉ်းနဝ်ꩻအချာ၊ နီဗွေႏဘုရာꩻ၊ ဝါႏတောႏထင်ႏလꩻ၊ တနီနွုတ်ꩻဝါႏ၊ သက်တောႏငတ်ꩻဆီ၊ လွိုတကီနီနေင်ႏ၊ သူရိစန္တာႏ၊ ရာဇာဟော်ခံꩻ၊ ခွန်တန်ပိုခို၊ သုဓမ္မရဟန္တာႏ၊ နေးတွမ်ႏစူနုံ၊ လုံးစုံတဆီ၊ ယွော့ကီထေင်းထင်ႏ၊ အွဉ်ႏဒင်ႏကတူႏ၊ ပူႏဇောႏလျောက်လဝ်း၊ ဩစဝ်းဩဗွေႏ၊ ခွေသွဉ်းတကာႏ၊ ရာဇာဟော်ခံꩻ၊ သူရိစန္တာႏ၊ ခါလဲ့ဖြားထွူ၊ နင်းဟွူထီႏဗာႏ၊ နီဖါနီမွိုး၊ ရိုꩻလဲ့သေနန်း၊ ခွေသွဉ်းထွူဩ၊ ရဟန္တာႏဗွေႏ၊ ခေါက်ဝုဲႏလျောက်လဝ်း၊ ဗွေႏစဝ်းဘုရာꩻ၊ ဖြောင်းထာဖြေꩻခံꩻ၊ ရဟန္တာႏဟွေး၊ နာꩻရွုမ်ꩻသေနန်း၊ တမွေးတဝ်းဗာႏ၊ ခွေခါရိုꩻလဲ့၊ သေနန်းနုဲးနုဲး၊ ထုဲႏပီဖူးခို၊ ငခါရိုꩻနေ၊ ဝွေꩻဆူꩻတွမ်ႏခွေ၊ ကေꩻဇူꩻဝါႏသနာႏ၊ အယေန်ႏပါမꩻ၊ မဉ်ဖလွတဝ်း၊ အဝ်ႏသေနန်းဖြန်၊ ခွန်တန်ဝွေꩻဆူꩻ၊ ဖူးခိုမီႏကျွꩻ၊ ခွေခါရိုꩻလဲ့၊ ကအုံအဝ်းနော၊ အီႏကျွꩻနုဲးနုဲး၊ ထုဲႏပီဖူးခို၊ သꩻကိုသꩻဖူꩻ၊ အဝ်ႏယူႏအဝ်ႏကျံႏ၊ သေနန်းနေနေ၊ ထုဲႏပီဖူးခို၊ ကရိုꩻကဖြဝ်ႏ၊ ဗွေႏစဝ်းဘုရာꩻ၊ ကောဇာဒီဃ၊ မူလသက္ကရာဇ်၊ တစ်နှစ်နဝ်ꩻရာꩻ၊ ဟောင်ရိုꩻတရျာꩻ၊ သာလွိုတဆီ၊ လွိုတကီသွစ်ꩻဗာႏ၊ သတင်ꩻကျွစ်လာလောင်း၊ ဟောင်ရိုꩻတနီꩻ၊ မွူးနီစနေႏ၊ လာꩻလဲ့လေစင်၊ တနံပိုမူႏ၊ သိကျာꩻလမ်းသား၊ သုစိတ္တာႏနင်ꩻ၊ လင်ꩻလူႏသွမ်ꩻပန်ꩻ၊ စွုမ်ႏပါꩻစွုမ်ႏဆူႏ၊ နင်ꩻမူႏလူႏတန်ꩻ၊ သွမ်ꩻပန်ꩻဩဇာႏ၊ သေႏချာႏထွူမꩻ၊ ခွန်လူꩻတနံ၊ ဘုံႏထူꩻဘုရာꩻ၊ ရပ်ခံႏဘုဉ်ꩻပေႏ၊ တွမ်ႏရဟန္တာႏဖုံႏ၊ လစ်ꩻသဲဉ်ဗွေဗွေ၊ ထွေရဲဉ်ႏကျွꩻကာ၊ မာꩻထင်ႏပျသာဒ်၊ ဝေဇယန္တာႏ၊ ရထာꩻလောင်းကီ၊ ကျောင်ႏငကီထင်ႏ၊ ကင်ဟဝ်မို့ꩻလောင်း၊ လဲဉ်းတသွောင်းအာကာႏ၊ သာႏသာႏယွယွ၊ သမ္ဗုဒ္ဓဘုရာꩻ၊ အာကာမို့ꩻလောင်း၊ ကျောင်ႏထင်ႏစွိုးနုဲး၊ ထုဲႏပီခွန်မွူး၊ စွိုးနုဲးခွန်လာ၊ တွမ်ႏရဟန္တာႏဖုံႏ၊ သတင်ꩻသုံꩻသော့ꩻပျသာဒ်အဖူꩻ၊ လစ်ႏသဲဉ်ဗွေဗွေ၊ ကျွꩻကာသဲင်ꩻစူꩻ၊ သုဝဏ္ဏတိုင်း၊ မမွိုင်မယွ၊ ကျွꩻသဲင်ꩻသာႏသာႏ၊ ဝဿန္တဥတု၊ အဿဝနီꩻ၊ ခတ္တီနက္ခတ်၊ တဖြုံႏနဝ်ꩻနေ၊ သဲင်ꩻတွိုႏရွစ်ဖြ၊ သုဝဏ္ဏတိုင်း၊ ကျွꩻကာသဲင်ꩻစူꩻ၊ သုဝဏ္ဏခမ်း၊ ပေႏတန်မူႏခို၊ လူꩻလိုꩻဗြဟ္မာႏ၊ ပုဏ္ဏာꩻပုဏ္ဏေ၊ သဌေꩻသူႏကျွဲႏ၊ ကုန်ႏသဲႏဖူးကား၊ ဆင်ꩻရဲꩻသားပေႏ၊ စာႏရေꩻမူꩻမတ်၊ ပရိသတ်တင်ꩻလုဲ၊ ဟဝ်ကုဲပေႏတန်၊ အုံလင်ꩻခေါက်ဝုဲႏ၊ ထွားထင်ႏကင်ဟဝ်၊ ဘုရာꩻဖျောဝ်လွဉ်၊ ထိုမ်းတွမ်ႏပျသာဒ်၊ လစ်ꩻသဲဉ်ဗွေဗွေ၊ ကွဲကာလင်ꩻဖွိုႏဖွိုႏ၊ မို့ꩻသဉ်အဝ်ႏလွမ်၊ ခံႏအွုမ်ႏအခြာ၊ ဖါထဲ့မို့ꩻလီး၊ ပီနုဲးထာꩻစင်၊ ပေႏတန်စွော့ꩻရောင်၊ ဟဲ့ꩻဟောင်မူႏမောင်ႏ၊ အွိုးဆူꩻနဲးပို၊ အွိုးယိုနဲးမွိုး၊ ထွားဆူꩻနဲဖါ၊ ပီနုဲးဝါးမင်း၊ ကျောင်ႏလင်ꩻယွယွ၊ ပီနုဲးရွမို့ꩻ၊ သဗ္ဗညုဘုရာꩻ၊ ကျွꩻကာသဲင်ꩻစူꩻ၊ သုဝဏ္ဏတိုင်း၊ ဌာနနီခမ်း၊ နေးတွမ်ႏစူနုံ၊ အုံအဝ်ႏယေးနယ်၊ ခေါက်ဝုဲႏထွားဆွုမ်ႏ၊ ခွန်တန်ဟော်ခံꩻ၊ သူရိစန္တာႏ၊ ရာဇာမင်ꩻကြီꩻ၊ ထီဆွုမ်ႏဘုရာꩻ၊ အာႏရꩻနစ်သက်၊ ခွေပိုရဟန္တာႏ၊ ပါငကွိုမန်ႏမန်ႏ၊ အံႏအော်ꩻအံႏဖြာႏ၊ ရာဇာဟော်ခံꩻ၊ သွုန်ႏဟန်သꩻရုဲး၊ ပီနုဲးဖုဲဆား၊ ပါကစိုပ်ꩻဆီ၊ ထီဗွမ်ႏနမ်းမန်ꩻ၊ ဝန်ႏကိုဝန်ႏဖူꩻ၊ ဖုဲထူကပွစ်၊ သွုန်ႏမျတ်သꩻဗွော၊ ကွိုင်ႏတဲထွာဗာႏ၊ ဘုရာꩻတပဲ့ꩻမန်ႏ၊ နိဗ္ဗာန်ႏအဗွေႏ၊ တနံအွဉ်စူꩻ၊ သုဝဏ္ဏတိုင်း၊ သူရိနေနတ်၊ သူဆီနွတ်ꩻမျိုꩻ၊ ပအိုဝ်ႏစင်ႏစဲစ်၊ နီဗွေႏဘုရာꩻ၊ ကျွꩻကာသဲင်ꩻစူꩻ၊ တဖူꩻညာꩻယန်၊ ဖျော်လွဉ်ရွစ်တွိုႏ၊ ထုဲႏပီဥပမာႏ၊ သီတာႏနဝတတ်၊ နီနာꩻအကံႏ၊ သန်ဟဝ်မွေးတဲ၊ မီႏနန်းနုဲးယို၊ မွိုးဖါဖူဖီ၊ ဝွေꩻသီးအစွိုး၊ တလဲင်ႏမဉ်ႏလဲ့၊ တထီႏဖိုတဝ်း၊ စထစ်မော့ꩻနဝ်ꩻ၊ ပါꩻမုဲꩻအဝ်ႏထီႏ၊ နီယိုဗွန်ကံႏ၊ သန်ဟဝ်နဝ်ꩻမꩻ၊ နီသဲင်ꩻတောႏအီ၊ ထီႏဗာႏတွမ်ႏမဲ့၊ စူလဲ့ဝုဲႏဗာႏ၊ ဘုရာꩻပဉ္စဝ်း၊ မေတ္တာႏသညင်ꩻ၊ ရက်ပဲင်ꩻသီခွေ၊ ကျွꩻကာသဲင်ꩻစူꩻ၊ သုဝဏ္ဏခမ်း၊ ပေႏတန်မူႏခို၊ ဝံꩻမျောက်ဝံꩻသာႏ၊ သဒ္ဓါႏကေႏညိုႏ၊ ရိုႏသေႏကိုႏယံ၊ နေးတွမ်ႏစူနုံ၊ ကတူႏကီအွဉ်ႏဒင်ႏ၊ ကဝ်ႏတွမ်ႏဗွူဖေါင်း၊ ဝုဲႏရောင်ကိုႏစီႏ၊ ထီတွမ်ႏသွမ်ꩻပန်ꩻ၊ ခင်ႏလမ်းလျာဒါ၊ ငဝ်းငွါနုတ်ဆက်၊ တက်ရီကိုꩻကွယ်ႏ၊ ခေါက်ဝုဲႏလူႏတန်ꩻ၊ ကဝ်ႏသွမ်ႏကဝ်ႏဗွာ၊ ကဝ်ႏတနျာႏကဝ်ႏတသီး၊ ဆီမီးတန်ဆောင်၊ တံꩻခွဉ်ႏစေးတာ(ကျက်သာႏ)၊ ကိုစီကိုင၊ အာႏရꩻမဲ့စွုမ်၊ ဒွိုႏသွမ်ꩻလောင်ꩻပန်ꩻ၊ ရဲဉ်ꩻတန်ꩻရဲဉ်ꩻလူႏ၊ ဗွုတ်ꩻကတူႏလမ်းပꩻ၊ အွဉ်ႏချꩻကတူႏပေါက်၊ ခေါက်ပုဲႏပငါပရင်ꩻ၊ ရဟန်ꩻသျင်ႏလူꩻ၊ မူႏခိုပေႏတန်၊ သုဝဏ္ဏတိုင်း၊ ရွှေထုံအခမ်း၊ ခွန်ကွဉ်ကစ၊ ဟွုန်ဟဝ်သꩻရေꩻ၊ ဗွေႏဘုရာꩻထင်ႏဖျော်၊ နဝ်ꩻခါကာလ၊ ကပ်လွသွမ်ꩻတောႏ၊ ရေႏရောႏလူႏတန်ꩻ၊ သင်္ကန်ꩻနေင်းယာ၊ ကျက်သာႏဗွူဖေါင်း၊ လောင်ꩻသွမ်ꩻလောင်ꩻပန်ꩻ၊ တံꩻခွဉ်ႏတွမ်ႏထီꩻ၊ ဘုံꩻကြီꩻဗွန်ထို၊ ဟော်ꩻဖေႏလိုꩻလူꩻ၊ မူႏခိုတရာꩻ၊ ချမ်ꩻသာႏသုခ၊ လꩻထွူနဝ်ꩻမꩻ၊ ဗုဒ္ဓဘုရာꩻ၊ ထွားလယ်ႏချာငါ၊ နဝ်ꩻခါထီႏလင်ꩻ၊ ကောင်တန်သာႏယာႏ၊ ဌာနကောင်ထို၊ တအိုခမ်းလူး၊ အဝ်ႏဗူꩻဗွို့ꩻလွမ်၊ ဆောင်ႏတန်အနာ၊ ဘုရာꩻနီဗွေႏ၊ ကျွꩻလယ်ႏစင်ꩻကျန်ႏ၊ ဝေင်ꩻတန်ဆꩻနဝ်၊ ထွားလယ်ႏအရပ်၊ လျောက်ပတ်သာႏယာႏ၊ နဝ်ꩻမꩻထီႏလင်ꩻ၊ စင်ႏစဲစ်ကောင်နာ၊ နဝ်ꩻခါကွီလွေꩻ၊ ဗွေႏစဝ်းဘုရာꩻ၊ ဌာပနာႏငသေꩻ၊ ကေသာဆံတောႏ၊ တလီးနေနေ၊ သမုတ်ဖန်ဖေႏ၊ အမေနာမ၊ စူလာမုနိဘုရာꩻ၊ ငဝ်းငွါရိုꩻငသေꩻ၊ တလဲင်ꩻဘာႏသာႏ၊ နဝ်ꩻရာꩻစဲင်ႏကျိုက်၊ ဟဲ့ꩻဟောင်ရိုꩻနော၊ သူႏတောႏသီးယာ၊ နဝ်ꩻခါကာလ၊ ဗုဒ္ဓဘုရာꩻ၊ သမ်းကျွꩻလင်ꩻတော၊ လဝယ်ဝေင်ꩻတန်၊ တထိန်ႏလာမျတ်၊ လောင်းလင်ꩻလစ်ꩻနီꩻ၊ ဌာပနာႏငသေꩻ၊ ကေသာဆံတော်၊ တလီးနေနေ၊ သမုတ်ဖန်ဖေႏ၊ အမေနာမ၊ လဝယ်ဆံတော်၊ ဟဲ့ꩻဟောင်လွဉ်ꩻဘုရာꩻ၊ ပီနဝ်ꩻထွူနော၊ သူႏတောႏသီးယာ၊ သေႏချာႏထွူမꩻ၊ ကျွꩻသဲင်ꩻကျက်သမီႏ၊ လဝယ်ရသေ့ꩻ၊ သဲင်ꩻလွဉ်ꩻဘုရာꩻ၊ အချာဖြေႏသꩻ၊ တထွꩻတဝ်းမꩻ၊ နီဗွေႏဘုရာꩻ၊ ထွားရှုဉာဏ်ႏတောႏ၊ ဩယိုခွေဩ၊ ရသေ့ꩻဝွေꩻဆူꩻ၊ သဲင်ꩻလွဉ်ꩻခွေချာ၊ မဉ်လꩻကိုꩻကွယ်ႏ၊ ခွေဘုရာꩻဆံတော်၊ အွဉ်ႏကုဲငသေꩻဖေႏ၊ ကေသာဆံတော်၊ တလီးနေနေ၊ ကျောက်ဖျာလုံးလောင်း၊ သေႏချောင်းသေႏချာႏ၊ နဝ်ꩻခါကာလ၊ သမုတ်ဖန်ဖေႏ၊ အမေနာမ၊ ရွှေလွန်ဘုရာꩻ၊ သိမ်ႏဘုရာꩻလဲ့ရိုꩻ၊ သူႏတောႏသီးယာ၊ တလဲင်ꩻဘာႏသာႏ၊ နဝ်ꩻရာꩻကျက်သမီ၊ ထီဖူꩻထီကို၊ ငဝ်းငွါရိုꩻနော၊ ဂေါတမဘုရာꩻ၊ သေႏချာႏထွူမꩻ၊ ကျွꩻကာသဲင်ꩻစူꩻ၊ မုဒုံကန်ကြီး၊ ဝီꩻထာဝီꩻခံꩻ၊ ဌာပနာႏငသေꩻ၊ စတုတလီး၊ လစ်ꩻဆီလစ်ꩻသောင်ꩻ၊ ထာꩻအောင်အဖူꩻ၊ ခွန်လူꩻတနံ၊ ခူႏအောင်ႏဌာပနာႏ၊ သေႏချာႏထွူမꩻ၊ ခွန်လူꩻတနံ၊ တယ်ႏမံႏငသေꩻ၊ ချေဘနတ်တော်၊ နပ်ပေါင်ဆေ့ꩻအာ၊ စတုဝီသ၊ နီဆီလစ်ꩻသောင်ꩻ၊ လေးထောင်သီနား၊ သွစ်ꩻမျက်နာႏနဝ်၊ တွက်ပေါင်ꩻဆေ့ꩻအာ၊ တရျာꩻကွတ်ꩻနီꩻ၊ လွိုတကီနီသောင်ꩻ၊ ထီꩻတောႏအဲဉ်ႏလုဲး၊ မီႏခြုဲးဒေါ့ꩻထောင်၊ ဟောင်ရိုꩻသူသောင်ꩻ၊ ထီꩻစော့ꩻဒွေါင်ႏထို၊ လွိုတကီနီသောင်ꩻ၊ ဘုရာꩻကောင်ႏမူꩻ၊ သူႏသီသူႏရန်၊ ခံႏပွယ်ꩻမင်္ဂလာႏ၊ နွုတ်ꩻနာꩻနွုတ်ꩻနီꩻ၊ ဆျာꩻထီရေစက္ချ၊ တွိုင်ႏကျာꩻသက်သေႏ၊ ဝသုန္ဓရေႏဟံႏ၊ နီသဲဉ်လစ်ꩻမွုန်ႏ၊ ဟွုန်ဟဝ်သာႏဓု၊ ကောင်းမုဘုရာꩻ၊ ဝီꩻထာဝီꩻခံꩻ၊ ဌာပနာႏအကို၊ တထိန်ႏလာလောင်း၊ ဟောင်ရိုꩻသွစ်ꩻနီꩻ၊ မွူးနီꩻတနင်ꩻနွေႏ၊ သေႏချာႏထွူမꩻ၊ သမုတ်ဖန်ဖေႏ၊ အမေနာမ၊ ဗောဓိသတ္တဘုရာꩻ၊ ရွှေလင်းလဘုရာꩻ၊ ခါလဲ့ရိုꩻနော၊ သူႏတောႏသီးယာ၊ ပအိုဝ်ႏဘာႏသာႏ၊ နဝ်ꩻရာꩻရိုꩻကောင်း၊ မုဒုံဘုရာꩻ၊ ခါလဲ့ရိုꩻနော၊ ထင်ႏသျာꩻအဝ်ႏနေ၊ နီဗွေႏဘုရာꩻ၊ ကျွꩻကာသဲင်ꩻစူꩻ၊ ဆောင်ႏစျူလုံးထွိုင်ႏ၊ စွဲတဗင်ကောင်ထို၊ လူꩻလိုꩻအဗွေႏ၊ ဝေနေယျအဖါ၊ ပါတွမ်ႏရဟန္တာႏ၊ ငတ်ꩻရျာꩻဗွေဗွေ၊ ဘုဉ်ꩻပေႏသွမ်ꩻပန်ꩻ၊ ကောင်တန်အနာ၊ သိကျာꩻတနံ၊ အီလွဉ်ကပ်ဖေႏ၊ သီတာႏထီဟွမ်၊ တနံခမ်းကီ၊ လင်ꩻကပ်နီဗွေႏ၊ ဝေနေယျအဖါ၊ ရပ်ဆွုမ်ႏဘုဉ်ꩻပေႏ၊ တဖြူလင်ꩻဖြောင်း၊ ကောင်တန်အနာ၊ နဝ်ꩻခါနီဗွေႏ၊ ဒဲဉ်မင်ꩻဖြောင်းဖူး၊ ဟူႏပါလင်ꩻငတ်ꩻဖြုံႏ၊ အရောင်ႏတင်ႏနုဲး၊ ထုဲႏပီဆီမီး၊ သိကျာꩻတနံ၊ ထင်ႏသေထင်ႏထီႏ၊ သော့ꩻတွမ်ႏကောက်ꩻခံꩻ၊ နေးတွမ်ႏထီဟွမ်၊ တနံခမ်းကီ၊ ပသေထွူမꩻ၊ စတွမ်ႏကောက်ခံꩻ၊ တဗီႏအွဉ်ႏအာ၊ တဗီႏအွဉ်ႏခို့၊ အွဉ်ႏဒို့ꩻလွဝင်ꩻ၊ ကောက်ခံꩻကောက်ꩻထာ၊ သေႏချာႏထွူမꩻ၊ သိကျာꩻတနံ၊ စတွမ်ႏရဟန္တာႏ၊ ငတ်ꩻရျာꩻဗွေဗွေ၊ ခူႏအောင်ဌာပနာႏ၊ သေႏချာႏထွူမꩻ၊ သမုတ်ဖန်ဖေႏ၊ အမေနာမ၊ ရွှေယယ်မျောဘုရာꩻ၊ လဝဘာႏသာႏ၊ နဝ်ꩻရာꩻရိုꩻကောင်း၊ လုံးထွိုင်ႏဘုရာꩻ၊ ငဝ်းငွါရိုꩻနော၊ ပွိုးပီးနဝ်ꩻမꩻ၊ ကောင်ထိုစွဲႏလꩻဗင်၊ စထစ်စခါ၊ ပအိုဝ်ႏဖြားအစွိုး၊ သမုတ်ဒွါႏနော၊ ပွိုးပီးနဝ်ꩻမꩻ၊ ငဝ်းငွါမရိုꩻ၊ စွဲတဗင်ကောင်ထို၊ ကရိုꩻနဝ်ꩻရာꩻ၊ စခါမွိုးနန်း၊ ပါꩻနဝ်ꩻတဖြာꩻ၊ လဝလိုꩻမျိုꩻ၊ အမေနာမ၊ ဟဲ့ꩻဟောင်လစွဲ၊ ထံႏတွမ်ႏခြီႏပြာႏ၊ တခြာကိုဖူꩻ၊ တပ်လယ်ႏထာꩻမီꩻ၊ ခီယီꩻမင်းရျꩻ၊ ထိုမ်ႏခꩻလဲမ်ꩻချောင်ꩻ၊ ကောင်နဝ်ꩻအလောင်း၊ ထောင်လွဉ်ꩻစွုမ်ႏနီꩻ၊ ထာꩻမီꩻထင်ႏတန်၊ နေးတွမ်ႏအဗင်၊ တပ်လွဉ်ꩻခြေင်းဟျာႏ၊ တဗာႏတဝ်းမလဲ့၊ အဗင်လင်ꩻထဲ့၊ ထိုမ်ႏလွဉ်ꩻထောင်လွေꩻ၊ ဝွေꩻတမော့ꩻဒွုမ်တဝ်း၊ ပွိုးပီးနဝ်ꩻမꩻ၊ လဝပအိုႏ၊ လိုꩻကွန်ႏဒိုင်ႏဒုံ၊ သမုတ်ရိုꩻဒွါႏ၊ ပါꩻနဝ်ꩻအဗင်၊ လင်ꩻထဲ့ထိုꩻမား၊ လဝသမုတ်၊ အဝင်ꩻမီႏရီ၊ ကောင်နဝ်ꩻနာမ၊ လစွဲဗင်လင်ꩻထဲ့၊ ဟဲ့ꩻဟောင်ရိုꩻနော၊ သူႏတောႏသီးယာ၊ ရွှေထုံသမဲင်ꩻ၊ တောင်ꩻမာႏလိတ်မန်း၊ ထန်ႏလွဉ်ပီးနဝ်ꩻ၊ ဒီဟဝ်ထွားဖတ်၊ နေးနာႏမတ်တောင်ꩻ၊ မူႏမောင်ႏသီးယာ၊ နဝ်ꩻခါကာလ၊ သမ္ဗုဒ္ဓဘုရာꩻ၊ သမ်းကျွꩻထင်ႏတော၊ အမျမဟီႏ၊ ထီခြောင်အထျꩻ၊ ဌာပနာႏငသေꩻ၊ ကေသာဆံတော်၊ လစ်ꩻဆူႏလစ်ꩻလီး၊ ထီခြောင်အထျꩻ၊ မျမတီႏဝေင်ꩻ၊ သူရိစန္တာႏ၊ ရာဇာဟော်ခံꩻ၊ အိမ်ရှေ့မင်ꩻသာꩻ၊ ရာဇာဖူးခို၊ အုပ်စိုꩻပွိုင်ႏဝေင်ꩻ၊ အမျမတီႏ၊ ဝေးတန်အပ်ဖေႏ၊ ယံထင်ႏအုံအဝ်ႏ၊ နဝ်ꩻလဲ့ဖြီႏဖြီႏ၊ လစ်ꩻဆီလစ်ꩻသောင်ꩻ၊ လေးထောင့်သီနား၊ ခါလဲ့နုဲးနုဲး၊ ထုဲႏပီလွဝင်ꩻ၊ တယ်ႏထင်ႏစေႏတီႏ၊ ဖြီꩻစီꩻထွူမꩻ၊ သမုတ်ဖန်ဖေႏ၊ အမေနာမ၊ ရွှေမင်းဝုန်ဘုရာꩻကွိုနဲ၊ ထဝ်းကဲသီးယာ၊ ခွန်သျင်ႏရသေ့ꩻ၊ အလေ့ꩻသူႏတောႏ၊ ဖူးဝေးသိုမ်ဖြာꩻ၊ သမ်းလွဉ်တောင်ꩻပြန်ႏ၊ ကွီဖန်းဆံတော်၊ တသီႏတအွꩻ၊ လဝတောင်ညို၊ ရိုႏသေႏလျောက်လဝ်း၊ ငဝ်းငွါတောင်ꩻပြန်ႏ၊ ကေသာဆံတော်၊ ဂေါတမနီဗွေႏ၊ မေတ္တာႏသညင်ꩻ၊ ရက်ပဲင်ꩻရသေ့ꩻ၊ ဖေႏအပ်ဆံတော်၊ တဖြာꩻတလီးစီႏ၊ ဝွေꩻသီးသိုမ်ပါꩻ၊ ခါလဲ့ရပ်ထူႏ၊ တောင်ညိုတောင်ဝဲင်ꩻ၊ တောင်ချွန်တောင်မ၊ တသီႏတအွꩻ၊ စတွမ်ႏတောင်ညို၊ ရသေ့ꩻကိုꩻကွယ်ႏ၊ ခေက်ဝုဲႏလူႏတန်ꩻ၊ အဝ်ႏတွိုႏငခါ၊ အမဉ်ꩻကြာꩻတော၊ မွူးလအိတ်မွူးလအ၊ လဝသျင်ႏရသေ့ꩻ၊ နေႏရာႏခင်ႏလမ်း၊ ကောင်တန်အနာ၊ စခါအဝ်ႏနော၊ သူႏတောႏသီးယာ၊ စခါဌာပနာႏ၊ လွိုန်စေင်လာဆန်ꩻ၊ ထန်ႏလꩻအနီꩻ၊ တဆီငတ်ꩻသာ၊ လာဗွေရက်ထွန်ꩻ၊ မွူးနီꩻတနင်ꩻလာႏ၊ သေႏချာႏထွူမꩻ၊ ဗုဒ္ဓဘုရာꩻ၊ ကျွꩻကာသဲင်ꩻယား၊ လဝနဲင်ႏငံႏ၊ သောင်တန်အထျꩻ၊ ချꩻမဝ်ꩻဌာႏပနာႏ၊ ဘုရာꩻစေႏတီႏ၊ နီလဲင်ꩻရောင်ႏတသီး၊ စေႏတီႏလွဉ်ယ၊ လဖျောဝ်အရောင်ႏ၊ ဟဲ့ꩻဟောင်ရိုꩻနော၊ ဂေါတမဘုရာꩻ၊ ကျွꩻကာသဲင်ꩻယား၊ ရာဇဌာနိ၊ ရွှေထုံဝေင်ꩻဖူꩻကွိုနဲ၊ တင်ꩻလုဲသီးယာ၊ ဆုဲꩻချာနဝ်ꩻမꩻ၊ ဗုဒ္ဓအစိန္တေ၊ နီဗွေႏဘုရာꩻ၊ လွိုန်ကံလာဆန်ꩻ၊ ထန်ႏလꩻသိုမ်နီꩻ၊ မွူးနီꩻကျာႏသပတေꩻ၊ ထွားလယ်ႏအရပ်၊ စင်သင်ဝိကောင်၊ ဟောင်ရိုꩻဌာပနာႏငသေꩻ၊ ကေသာဆံတော်၊ တလီးနဝ်ꩻနေ၊ သေႏချာႏထွူမꩻ၊ သမုတ်ဖန်ဖေႏ၊ အမေနာမ၊ စင်သင်ဘုရာꩻ၊ ငဝ်းငွါရိုꩻနော၊ မန်းငဝ်းဘာႏသာႏ၊ ကမ္မသိင်ကောင်၊ ဟဲ့ꩻဟောင်ကွိုတဝ်း၊ ကောင်နဝ်ꩻအလောင်း၊ ကဟဲ့ꩻဟောင်ငသေꩻ၊ နီဗွေႏဘုရာꩻ၊ သမ်းကျွꩻသဲင်တော၊ ရွှေကူကောင်နာ၊ ဌာပနာႏငသေꩻ၊ ဆံတော်နဝ်ꩻနေ၊ သမုတ်ဖန်ဖေႏ၊ ရွှေရောင်ပျဘုရာꩻ၊ ဖါလဲင်ꩻခမ်းဖူꩻ၊ ရွှေကူကောင်နာ၊ စခါအဝ်ႏနော၊ ဗုဒ္ဓဘုရာꩻ၊ သမ်းကျွꩻသဲင်ꩻတော၊ လုံးဒင်ႏကောင်ထွူ၊ သွင်ꩻငသေꩻဆံတော်၊ ဌာနသွစ်ꩻရပ်၊ လုံးတန်အဖူꩻ၊ သွစ်ꩻဆူႏသွစ်ꩻရပ်၊ ကောင်ထျꩻကောင်နာ၊ သမုတ်လွဉ်ꩻဒွါႏ၊ ကောင်နဝ်ꩻနာမ၊ လုံးဒင်ႏဘုရာꩻ၊ ငဝ်းငွါရိုꩻနော၊ သူႏတောႏသီးယာ၊ မီႏထွာပအိုဝ်ႏ၊ ဟောင်ရိုꩻလုံးဒင်ႏ၊ ဘုရာꩻထွူနော၊ တလဲင်ꩻဘာႏသာႏ၊ နဝ်ꩻရာꩻဟဲ့ꩻဟောင်၊ ကျက်ထီးရိုးဘုရာꩻ၊ ငဝ်းငွါရိုꩻနော၊ သူႏတောႏသီးယာ၊ မီႏထွာပအိုဝ်ႏ၊ ဟောင်ရိုꩻလုံးဒင်ႏ၊ မန်းငဝ်းဘာႏသာႏ၊ နဝ်ꩻရာꩻရိုꩻကောင်း၊ ကျောက်ဆင်းတောင်ဘုရား၊ ငဝ်းငွါရိုꩻပီးနဝ်ꩻ၊ ဟဝ်မတ်ဒီတောင်ꩻ၊ ကျောင်ꩻတကာႏသီးယာ၊ စခါမွိုးနန်း၊ ကကုသန်ႏတုံ၊ ကောဏဂုံ၊ ကဿပ၊ ကထွာခွေဝေး၊ ယမ်းငသေꩻပါဒ၊ ချေယာခင်ႏခြောင်ꩻ၊ မူႏမောင်ႏခွန်နင်ꩻ၊ အတွင်ꩻလက်ထက်၊ ဌာနရပ်မုဲꩻ၊ သုဝဏ္ဏတိုင်း၊ ရွှေထုံခမ်းဖူꩻ၊ ရှုဉာဏ်ႏကွဲထွား၊ ကောင်နာအုံအဝ်ႏ၊ ထွားငနဝ်ထီႏသဲင်ꩻ၊ မဲ့သဲင်ဉာဏ်ႏခံꩻ၊ တထီႏစွဉ်ႏတဝ်း၊ ဗွေႏစဝ်းဘုရာꩻ၊ ချေရာခင်ႏခြောင်ꩻ၊ ကယမ်းထွိုင်လွဝင်ꩻ၊ ဘုရာꩻသျင်ႏဗွေႏ၊ ဝေနေယျအဖါ၊ သိုမ်ပါꩻသိုမ်ဆူႏ၊ ဘုံꩻထူꩻဂေါတမ၊ နေးတွမ်ႏဉာဏ်ႏတောႏ၊ ရှုမျော်ထင်ႏထွား၊ ကောင်နာလောင်းကီ၊ ပုဗ္ဗာဒိသာ၊ မျက်နာႏဆကွဉ်ႏ၊ အဝ်ႏခန်းထီကျို၊ အသကန္နဒီ၊ ထီခြောင်ဘာသာ၊ နဝ်ꩻရာꩻရိုꩻကောင်း၊ သန်လွန်မြစ်နော၊ ပအိုဝ်ႏနဝ်ꩻခြုံꩻ၊ ဟဲ့ꩻဟောင်ရိုꩻနော၊ နီဗွေႏဘုရာꩻ၊ သိကျာꩻတနံ၊ ဗြဟ္မာႏခွန်လူꩻ၊ ဝွေꩻသီးဗွေႏနဝ်ꩻ၊ ပွိုးထီႏတွိုႏစွဉ်ႏ၊ ကျိုꩻတန်ကတူႏ၊ အသကန်ကောင်ထျꩻ၊ ထန်ႏလွဉ်ဆနဝ်၊ ဗွေႏစဝ်းဘုရာꩻ၊ ရှုဉာဏ်ႏထွားငကွဉ်ႏ၊ နဝ်ꩻမꩻကွဲထီႏ၊ ဩဩဝွေꩻသီးဗွေႏ၊ ကထွာခွေဝေး၊ ဝွေꩻသီးသိုမ်ပါꩻ၊ ချေယာခင်ႏခြောင်ꩻ၊ လိုꩻရွိုင်ꩻအခြာ၊ ဟဲ့ꩻလွဉ်ꩻဘာႏသာႏ၊ ဖြဝ်ꩻယိုန်ꩻအငဝ်း၊ ဘာဗတ်ကောင်လောင်း၊ တထွောင်းချင်ႏနော၊ ဌာနရပ်ဆူꩻ၊ ထီႏသေထွူမꩻ၊ ဟဲ့ꩻစရဟန္တာႏ၊ နီသဲဉ်ဗွေဗွေ၊ အုံကုဲထာဝ၊ ခီႏဆန်ꩻကျွꩻကာ၊ မျက်နာႏဆꩻကွဉ်ႏ၊ လိုꩻရွိုင်ꩻအခြာ၊ ကိန်ꩻမုဲႏခမ်းဖူꩻ၊ ထင်ႏတွိုႏချꩻပုံ၊ ရွှေလဖုံအထျꩻ၊ ဘုဉ်ꩻပေႏသွမ်ꩻပန်ꩻ၊ လွိုန်ကံလာဆန်ꩻ၊ ထန်ႏလꩻငတ်ꩻနီꩻ၊ မွူးနီꩻစနေႏ၊ သူဖဝါႏဗွေဗွေ၊ ဘုဉ်ꩻပေႏသွမ်ꩻတောႏ၊ လစ်ꩻဆီကွတ်ꩻထိုမ်ꩻ၊ အွမ်ပွမ်ꩻထွူမꩻ၊ အွꩻထီတဖြူဖြောင်း၊ နေးတွမ်ႏတံꩻပူႏ၊ ခွန်လူꩻတနံ၊ ခူꩻအောင်ဌာပနာႏ၊ သမုတ်ဖန်ဖေႏ၊ ရွှေလဗုံဘုရာꩻ၊ ငဝ်းငွါရိုꩻနော၊ ဟဲ့ꩻလွဉ်ꩻဖြဝ်ꩻယိုန်ꩻ၊ ဝွေꩻသီးဘာႏသာႏ၊ သေႏချာႏထွူမꩻ၊ ကျွꩻကာသဲင်ꩻစူꩻ၊ သိုမ်ဆူႏချေရာ၊ သိုမ်ပါꩻခင်ႏခြောင်ꩻ၊ လုံးလောင်းကျောက်ဖျာ၊ အရပ်ယိုထွူ၊ ခွေခါရိုꩻလဲ့၊ အီႏအွဉ်ႏကုဲနုဲးဗာႏ၊ ချေရာခင်ႏခြောင်ꩻ၊ လုံးလောင်းယိုနေ၊ သိုမ်ပါꩻသိုမ်ဆင်ႏ၊ ဦꩻတင်ႏထွူမꩻ၊ ဗွေႏဘုရာꩻထင်ႏယမ်း၊ ပီနုဲးတရꩻ၊ အဝ်ႏထျယာခိုး၊ အဝ်ႏလိုယာဗာႏ၊ ချေရာခင်ႏခြောင်ꩻ၊ အရောင်ႏထန်ႏနုဲး၊ ထုဲႏပီမွူးလာ၊ ဒွေါင်ႏဆွာꩻဖွိုႏထို၊ လိုꩻပေႏလိုꩻတန်၊ တဆီငတ်ꩻရွယ်ႏ၊ စတွမ်ႏခိုဗင်ႏ၊ လိုꩻဖြားကစ၊ ဘဝသိုမ်ပန်၊ မီႏထွာသောင်ꩻထွား၊ နဝ်ꩻရာꩻရိုꩻကောင်း၊ သိုမ်သောင်ꩻလွိုသာ၊ တစူလစ်ꩻငါနော၊ သူႏတောႏသီးယာ၊ လစ်ꩻပါခင်ႏခြောင်ꩻ၊ လုံးလောင်းကျောက်ဖျာ၊ အဝ်ႏတွိုႏငခါ၊ ထိုꩻမားဒါႏတဝ်းနော၊ ဆွေဗော်လုံးလောင်း၊ ခင်ႏခြောင်ꩻချေရာ၊ သေႏချာႏထွူမꩻ၊ ကျွꩻကာသဲင်ꩻယား၊ တွိုႏသဲင်ꩻကြုဲလောင်း၊ ကိန်ꩻမုဲႏဒုံထျꩻ၊ အုံချꩻသေင်ႏဟေ့ꩻ၊ ကိန်ꩻမီလဲ့လျောင်း၊ အုံဒေါင်လင်ꩻမွဉ်၊ အာနန္တာႏသျင်ႏ၊ စင်ဖေႏခင်ႏစူ၊ ဟွီညောင်ꩻရွိုးလွား၊ ဌာနရပ်နဝ်ꩻ၊ ဖြဝ်ꩻယိုန်ꩻဘာႏသာႏ၊ ဒုံထျကွိုတဝ်း၊ ဗွေႏစဝ်းဘုရာꩻ၊ ညောင်ꩻညာꩻထင်ႏဖြေႏ၊ အစိန္တေယျ၊ ကျွꩻကာကိန်ꩻမုဲႏဒုံဝေင်ꩻ၊ သဲင်ꩻအုံဌာပနာႏ၊ အွဉ်ႏကုဲငသေꩻ၊ သပိတ်မျနော၊ နီဗွေႏဘုရာꩻ၊ နဝ်ꩻခါကာလ၊ ကျွꩻထင်ႏယိုꩻဒရာꩻ၊ ဌာပနာႏငသေꩻ၊ ကေသာဆံတော်၊ သွစ်ꩻဆီသွစ်ꩻလီး၊ ဖြီꩻစီꩻထွူမꩻ၊ စတွမ်ႏရဟန်ꩻ၊ ကျွꩻသဲင်ꩻတောယား၊ ရာဇဌာနီ၊ ပြည်ကြီးခမ်းတန်၊ လွိုန်သံလာဆန်ꩻ၊ ထန်ႏလꩻတနီꩻ၊ မွူးနီꩻကျာႏသပတေꩻ၊ အစိန္တေယျ၊ ရွစ်ဖြဖျော်လွဉ်၊ ဌာနရွှေထုံ၊ ဘုဉ်ꩻပေႏထွꩻယား၊ ဒဲဉ်ယာသွမ်ꩻမွူးထွူႏ၊ လူꩻလိုꩻအဗွေႏ၊ ဝေနေယျအဖါ၊ ဘုရာꩻပဉ္စဝ်း၊ အုံအဝ်ႏဒင်ႏထင်ႏ၊ ဝေဇယန္တာ၊ ရတနာပျသာဒ်၊ ဟော်ခံꩻလောင်းကီ၊ အွဉ်ႏဒေါ့ꩻလွတွမ်ႏ၊ ခွန်တန်ဟော်ခံꩻ၊ နမ်းကျင်ꩻတရာꩻ၊ ဆီပါꩻစောင်ꩻစယ်ꩻ၊ ဆောက်တယ်ႏနေကောင်း၊ ဟော်ခံꩻတကာႏ၊ နမ်းလောင်းနမ်းကီ၊ ကွတ်ꩻဆီသူပါꩻ၊ ဗာႏခုဲႏတဝ်းကောင်း၊ ဟော်ခံꩻခမ်းထီ၊ စီꩻပွာꩻချမ်ꩻသာႏ၊ ဗာႏခုဲႏတဝ်းကောင်း၊ သွို့ꩻကောင်တွမ်ႏလုဲး၊ ကားခုဲဖြေꩻစာ၊ ငနာငဆေꩻ၊ ချွေႏရံႏပိုလီꩻ၊ စီꩻပွါꩻလွိုင်ႏအာ၊ မူꩻမတ်စာႏရေꩻ၊ ပေႏတန်ဖြားဆား၊ ချမ်ꩻသာႏနေဩ၊ ဩဇာႏဒဲဉ်ဟန်ႏ၊ ခါလဲ့ပြန်ꩻပြော်ꩻ၊ ဟော်ထာဟော်ခံꩻ၊ ချွေႏရံႏပိုလီꩻ၊ သီလသတင်ꩻ၊ ကံကျင်ꩻစောင်ꩻစယ်ꩻ၊ ဆောက်တယ်ႏသဉ်ထံꩻ၊ ကမ္မဋ္ဌာန်ꩻဘာႏဝနာႏ၊ လွိုင်ႏအာနေဩ၊ ဟော်ခံꩻရာႏဇာႏ၊ မဟာႏမင်ꩻကြီꩻ၊ အွဉ်ႏဒေါ့ꩻရီဖြဝ်ႏတောႏ၊ တွမ်ႏဘုရာꩻဂေါတမ၊ လွိုန်သံလာဆန်ꩻ၊ ဟောင်ရိုꩻတဆီ၊ လွိုတကီငတ်ꩻနီꩻ၊ မွူးနီꩻကျာႏသပတေꩻ၊ လာဗွေရက်ထွန်ꩻ၊ ခွန်တန်ဟော်ခံꩻ၊ လိုꩻတဝေင်ꩻလိုမ်း၊ ရဲဉ်ꩻလူႏယာဂု၊ သဗ္ဗညုဘုရာꩻ၊ သင်္ဃာႏလစ်ꩻသဲဉ်၊ အွꩻအံႏဘုဉ်ꩻပေႏ၊ သေႏချာႏထွူမꩻ၊ ကျွꩻကာထင်ႏလယ်ႏ၊ ဝေင်ꩻစိန်ကောင်လောင်း၊ သင်္ဃာႏလစ်ꩻသဲဉ်၊ စဲဉ်ႏလွဉ်ꩻအချာ၊ ကောင်နာလောင်းကီ၊ ငဝ်းငွါရိုꩻဖေႏ၊ ရဟန္တာႏဟွဗး၊ ကောင်ယိုတဖြုံႏ၊ ဟုံဟင်သာႏယာႏ၊ ရပ်ရာႏဝေင်ꩻစိန်၊ ကြေင်းကြဲ့ဟဝ်ငါႏ၊ သာမညတမွေးတဝ်း၊ မီꩻရိုꩻကောင်ယို၊ ဝံꩻမျောက်ဝံꩻသာႏ၊ ရဟန္တာႏထင်ႏဟွုန်၊ နီဗွေႏဘုရာꩻ၊ အံႏဖြာႏအံႏအော်ꩻ၊ ရဟန္တာႏလျောက်လဝ်း၊ ဩစဝ်းနီဗွေႏ၊ ပွိုးပီးမုဲꩻကောင်း၊ နီ(ဗွေႏ)ဘုရာꩻ၊ ကအံႏဖြာႏယို၊ ဗွန်ထိုဘုရာꩻ၊ ဖြောင်းထာဖြေꩻခံꩻ၊ မိန်းထန်ႏအွဉ်ႏဒေါ့ꩻ၊ နဝ်ꩻကောင်းရဟန္တာႏ၊ မွိုးနန်းစခါ၊ ခွေကထွာဝါးတောင်ꩻ၊ ကောင်ယိုအနာ၊ နီမွိုးဒီႏငသေꩻ၊ အွဉ်ႏကုဲလွေꩻနꩻ၊ နဝ်ꩻမꩻပꩻဆုဲꩻ၊ ပီနုဲးခံꩻရောင်ႏ၊ ကောင်နာယိုထွူ၊ ဝါးတောင်ꩻငတ်ꩻရျာꩻ၊ ဌာနခင်ႏလမ်း၊ ကောင်ယိုအနာ၊ နဝ်ꩻမꩻခွေနဝ်ꩻ၊ ထင်ႏတန်လိမ္မာႏ၊ ငမ်းသေꩻဘေꩻရန်ႏ၊ တအုံဗွုန်ႏတဝ်း၊ နဝ်ꩻမꩻလဲ့ခွေ၊ ကျောင်ႏသဲင်ꩻအုံဒွါႏ၊ တဗာႏစွို့ꩻစွို့ꩻ၊ သုဝဏ္ဏကောင်လောင်း၊ ကောင်ခံꩻအနာ၊ ငဝ်းငွါဖြဝ်ႏဖေႏ၊ နီဗွေႏဘုရာꩻ၊ ငဝ်းငွါမိန်းတောႏ၊ ဟော်ꩻနယ်ဇာတ်လီꩻ၊ ထီႏသေချာငါ၊ ဘုရာꩻဉာဏ်ႏတောႏ၊ အံႏအော်ꩻခီႏမွမ်ꩻ၊ တယွမ်ꩻနွောင်ꩻတဝ်း၊ နဝ်ꩻခါကာလ၊ ကောင်တန်အနာ၊ ဌာပနာႏငသေꩻ၊ ကေသာဆံတော်၊ တလီးနေနေ၊ လွိုန်သမ်လာဗွေ၊ မွူးနီꩻကျာႏသပတေꩻ၊ နီဗွေႏဘုရာꩻ၊ ငဝ်းငွါဟော်ꩻဖေႏ၊ ပီးနဝ်ꩻကွိုနဲ၊ ထဝ်းကဲသီးယာ၊ ကောင်နဝ်ꩻနာမ၊ ရွှေတန်ထစ်ဘုရာꩻ၊ ငဝ်းငွါရိုꩻနော၊ မီႏထွာပအိုဝ်ႏ၊ မွိုးနန်းစခါ၊ ဟဲ့ꩻဒွါႏနုဲးယို၊ ဟောင်ရိုꩻငဝ်းပအိုဝ်ႏ၊ ဘုရာꩻဗွူအဲဉ်၊ စထစ်နဝ်ꩻကာႏ၊ ငဝ်းငွါဖန်ဖေႏ၊ ပီးနဝ်ꩻကွိုနဲး၊ ထဝ်းကဲသီးယာ၊ တလဲင်ꩻဘာႏသာႏ၊ နဝ်ꩻရာꩻကျိုက်ကသွဲ၊ ငဝ်းငွါရိုꩻနော၊ ခြုံႏဗွာကောင်လောင်း၊ ဟောင်ရိုꩻဘုရာꩻ၊ ဌာပနာႏငသေꩻ၊ သေႏချာႏထွူမꩻ၊ ကျွꩻကာလွေꩻတော၊ ကောင်နဝ်ꩻဆနဝ်၊ တနီꩻချင်ꩻနေနေ၊ ဟော်ꩻထန်ႏနယ်ဖေႏ၊ ဝါးတောင်ꩻမွူးခင်ႏလမ်း၊ ကောင်တန်အနာ၊ ဌာပနာႏငသေꩻ၊ ကေသာဆံတော်၊ တလီးနေနေ၊ သမုတ်ဖန်ဖေႏ၊ အမေနာမ၊ သုဝဏ္ဏဒက္ခိဏာ၊ ဘုရာꩻကွိုတဝ်း၊ တလဲင်ꩻဘာႏသာႏ၊ နဝ်ꩻရာꩻကျိုက္ခဒေ၊ ပအိုဝ်ႏဘာႏသာႏ၊ လဝလိုꩻမျိုꩻ၊ ကရိုꩻနဝ်ꩻရာꩻ၊ အမေနာမ၊ ဒဲဉ်ခံꩻဘုရာꩻ၊ ငဝ်းငွါခိုမူႏ၊ ဟဲ့ꩻဟောင်ကွိုနဲ၊ ကျောင်ꩻတကာႏသီးယာ၊ နဝ်ꩻခါဘုရာꩻ၊ ကျွꩻကာသဲင်ꩻယား၊ ရွှေထုံဝေင်ꩻဖူꩻ၊ မွူးလဲ့ဟာလင်ꩻ၊ နေမင်ႏရောင်ႏတအွူႏ၊ ဖွိုႏထင်ꩻဖီညို၊ ဗွန်ထိုဘုရာꩻတွမ်ႏ၊ တကာႏဟော်ခံꩻ၊ အုံကွမ်မွန်းလွ၊ တမဉ်ဖတဝ်း၊ ငဝ်းငွါမေတ္တာႏ၊ ပသာလွဝင်ꩻ၊ မင်ꩻကြီꩻကစ၊ သူရိစန္တာ၊ ရာဇာဟော်ခံꩻ၊ ခွန်တန်ကစ၊ ပို့သမေတ္တာႏ၊ သေႏချာႏထွူမꩻ၊ နီဗွေႏဘုရာꩻ၊ ခါးလားကျွꩻသဲင်ꩻ၊ ထွန်ႏငသေꩻဖေႏ၊ ဖူးပေႏရဟန္တာႏ၊ သုဓမ္မရဟန်ꩻဟွေး၊ မီႏတွိုႏဆုဲꩻချာ၊ ညီတောႏတကာႏ၊ ခါလဲ့ဖြားထွူ၊ ကွတ်ꩻဆီသူပါꩻ၊ အန္တရာယ်ႏဘယ၊ ကိုပကိုတွင်ꩻ၊ တပွိုင်ရန်ႏသား၊ ပေ့ꩻမဲ့ယောင်းခင်ႏ၊ မီႏတကင်ꩻတောဝ်း၊ နဝ်ꩻရာꩻဖူးခို၊ အွဉ်ႏဒေါ့ꩻကွိုနော၊ ကဝ်ႏတွမ်ႏဗွူဖေါင်း၊ တလင်ႏလောင်းကီ၊ ဖူးခိုဓိဋ္ဌာန်ႏ၊ ယံကျောင်ႏလွေꩻဖျောဝ်၊ ခွေဒွိုခွေထျꩻ၊ ယံဖြယံရွစ်၊ အွဉ်ႏစွꩻနောဖူး၊ ယံစူꩻမွုန်းသꩻ၊ ယတတရေꩻတဝ်း၊ ငဝ်းယိုတငွါ၊ ဖူးခိုတောင်ꩻမတ်၊ ယတဲင်မေ့လျော့၊ အွဉ်ႏတဖေင်ꩻပုဲႏတဝ်း၊ ယခါဖူးခို၊ တဖေင်ꩻဒါႏယ၊ ရာဇပိုခို၊ သုဓမ္မရဟန်ꩻ၊ ဘုရာꩻတပဲ့ꩻ၊ ဟော်ခံꩻပိုခို၊ နီဗွေႏဘုရာꩻ၊ ဖြောင်းထာဖြေꩻခံꩻ၊ ထွန်ႏသေꩻငဝ်းငွါ၊ သေႏချာႏထွူမꩻ၊ ရာဇပိုခို၊ နီဗွေႏအပ်သေꩻ၊ နေႏရာႏခင်ႏလမ်း၊ မွိုးဖါအစိုး၊ ယံဖေႏအုံဆုဲꩻ၊ အွဉ်ႏကုဲငသေꩻ၊ ဖူးပေႏညီတောႏ၊ ဟော်ခံပိုခို၊ သုဓမ္မရဟန္တာႏ၊ မွိုးဖါအသောင်၊ ကျောင်ꩻတောႏလောင်းကီ၊ ယံသတင်ꩻသုံꩻ၊ အုံအဝ်ႏကဲဆုဲꩻ၊ ဟော်ꩻဖေႏမွိုးဖါ၊ တရာꩻနောဖူး၊ ညီတော်ချစ်သား၊ ဘုရာꩻထွန်ႏသေꩻ၊ ဟော်ခံꩻပိုခို၊ သုဓမ္မာရဟန္တာႏ၊ ဖြောင်းထာဖြေꩻခံꩻ၊ ရဟန္တာႏအငါ၊ သေႏချာႏထွူမꩻ၊ ပဌမဝါႏဆိုႏ၊ ဆန်ꩻထင်ꩻတဆီ၊ လွိုတကီငတ်ꩻနီꩻ၊ ရာႏသီႏနေင်ႏတန်၊ နီꩻလာရက်စုံ၊ မွူးနီꩻကျာႏသပတေꩻ၊ အာႏရုံႏထန်ႏလွဉ်၊ ဆကွဉ်ႏကာလ၊ သူရိစန္တာႏ၊ ရာဇာဟော်ခံꩻ၊ လူႏတန်ꩻသွမ်ꩻတောႏ၊ လစ်ꩻဆီကွတ်ꩻကွတ်ꩻထိုမ်ꩻ၊ အွꩻအံႏဘုဉ်ꩻပေႏ၊ သေႏချာႏထွူမꩻ၊ စတွမ်ႏသင်္ဃာႏ၊ ပသာငသေꩻ၊ ဖေႏထွူဟော်ခံꩻ၊ မေတ္တာႏထီဟွမ်၊ ဗွန်တန်ဘုန်ႏကြီꩻ၊ နီဗွေႏဘုရာꩻ၊ နဝ်ꩻခါကာလ၊ ကျွꩻထင်ႏပျသာဒ်၊ လစ်ꩻသဲဉ်သင်္ဃာႏ၊ ဆချာရံႏလွဉ်ꩻ၊ ဆန်တက်ကျောင်ႏထင်ႏ၊ ကင်ဟဝ်မို့ꩻလောင်း၊ ပီနုဲးဟင်္သာႏ၊ ဝါးမင်းနွန်ႏကဝ်၊ ကင်ဟဝ်အာကာ၊ တနျာႏတသီး၊ ပီနုဲးမွူးလာ၊ ကျောင်ႏထင်ႏဝုဲးထို၊ မူႏခိုစွော့ꩻရောင်၊ ပီနုဲင်းကောင်ပြုဲ၊ စွိုးနုဲးဟံႏပြင်ꩻ၊ ကျောင်ႏထင်ႏသာႏသာႏ၊ အာကာမို့ꩻလောင်း၊ ဘုံႏခေါင်ꩻစက္ကျ၊ ဂေါတမဘုရာꩻ၊ အာႏဏာႏတံꩻခိုꩻ၊ မူႏခိုကထီႏ၊ ပီနုဲးမွူးလာ၊ ဆာဖုံႏရံႏခူ၊ မူႏခိုထွားရောင်၊ ခေါက်ဝုဲႏထင်ႏလွဉ်ꩻ၊ ငွဉ်ꩻအော့ꩻလဲင်ꩻဆာ၊ မို့ꩻသဉ်အဝ်ႏလွမ်၊ ခမ်းအွုမ်ႏအခြာ၊ တရွာခေါင်းလောင်ꩻ၊ သင်ႏရောင်ꩻဆားဆား၊ သင်းဟန်ႏသားနဝ်ꩻ၊ ငဝ်းငွါရိုꩻဒွါႏ၊ နီနာꩻဗွန်ကံႏ၊ သန်ဟဝ်မွေးတဲ၊ မီႏနန်းနုဲးယို၊ လိုꩻဖြားအစွိုး၊ မွိုးဖါဖူဖီ၊ ဝွေꩻသီးစိုးပန်၊ မွိုးနန်းစခါ၊ ပန်ပန်ဆက်ဆက်၊ တထီႏဖိုတဝ်းနော၊ ဟော်ခံꩻအပန်ပန်၊ ခွန်တန်အဆက်ဆက်၊ ထီႏဖိုတဝ်းအွီႏ၊ နီခွန်ဟော်ခံꩻ၊ ဗွန်ကံႏတန်တဲ၊ ဝွေꩻဗွေႏစိုးပန်၊ ရိုꩻဗာႏဖြားငါႏ၊ ရာဇာႏမင်ꩻကြီꩻ၊ ကွိုင်ႏတဲထွာဗာႏ၊ ထီꩻဗွာအဗွေႏ၊ နီလဲင်ႏတွမ်ႏယို၊ ဝွေꩻဗွေႏစိုးပန်၊ ဟော်ခံꩻလက်ထက်၊ သက်ထိုစိုးဆွာꩻ၊ မဟာမင်ꩻကြီꩻ၊ နီဝင်ꩻပအိုဝ်ႏ၊ ဇာတိမျိုꩻနွယ်ႏ၊ အံႏခွယ်ꩻအံႏဖြာႏ၊ ပငါပရင်ꩻကွိုနဲ၊ ထဝ်းကဲသီးယာ၊ ဝါႏဆိုလာဗွေ၊ ကျွꩻလွေꩻခွုန်ꩻသဲင်ꩻ၊ ရာဇဂြိုဟ်ႏခမ်း၊ ထိုမ်းတွမ်ႏပျသာဒ်၊ ဗွေႏမျတ်ဘုရာꩻ၊ ရဟန္တာႏရံႏလွဉ်ꩻ၊ ဗွေစွဉ်ႏလစ်ꩻသဲဉ်၊ စဲဉ်ႏလွဉ်ꩻနီဗွေႏ၊ ရွှေထုံသမဲင်ꩻ၊ လိတ်သဲင်လုဲꩻခံꩻ၊ ထန်ႏလွဉ်ပီးနဝ်ꩻ၊ ကျောင်ꩻတကာႏရဝ်းသီးယာ၊ တဖုံႏတဉ်ဟွေး။ ((( ဒုတိယခန်ꩻ နိဋ္ဌိတံ ))) (မဲ့ငါ- ၅၀))))

ပွိုးပီးနဝ်ꩻမꩻ၊ ဘုရာꩻတကာႏသီးယာ၊ တတိယသမဲင်ꩻ၊ ထေထဲင်းဖေႏခြာ၊ မတ်နာႏစဲင်းစဲင်း၊ မတ်ထဲင်းတောင်ꩻထူႏ၊ သူႏတောႏသီးယာ၊ ဗွေႏဘုရာꩻသျင်ႏ၊ အတွင်ꩻကာယ၊ သုဝဏ္ဏခမ်း၊ ခွန်တန်ဟော်ခံꩻ၊ သူရိစန္တာႏ၊ ရာဇာမင်ꩻကဂြီꩻ၊ နမ်းကီဝေဒနာႏ၊ တသက်သာႏတဝ်း၊ ဖြားလဲ့ဖြားထွူ၊ သက်တောႏလဲ့ခါ၊ ဟောင်ရိုꩻတရျာꩻ၊ သာလွိုနီဆီ၊ လွိုတကီသွစ်ꩻနေင်ႏ၊ အခိန်ႏလဲ့တွိုႏ၊ ပိုခိုသားတော်၊ ကထွာရဟန္တာႏ၊ ထွားဒွါႏထကျွ၊ ခမဲတောႏမဲ့ငါ၊ တဒါႏဒွုမ်တဝ်း၊ မွိုးရဝ်ꩻဟန်ႏနီꩻ၊ တသေရီးတဝ်း၊ နဝ်ꩻမꩻရဲဉ်ꩻတွမ်ႏ၊ ကဝ်ႏတွမ်ႏဗွူဖေါင်း၊ ယံဖေႏကျောင်ႏလွေꩻ၊ ခြေတော်ခင်ႏထျꩻ၊ ယံဖြယံဖျော်၊ နီဗွေႏဘုရာꩻ၊ အဝ်ႏရာꩻအရပ်၊ ယံဖေႏကျောင်ႏသဲင်ꩻ၊ မာꩻလွေꩻထေ့စူꩻ၊ ဓိဋ္ဌာန်ႏထွူမꩻ၊ အွဉ်ႏစွꩻကဝ်ႏဟွမ်၊ ကျောင်ႏထင်ႏငကီ၊ ပီနုဲးတမူ၊ ကျောင်ႏသဲင်ꩻထေ့စူꩻ၊ နီဗွေႏဘုရာꩻ၊ ပါဒခင်ႏထျꩻ၊ ကဝ်ႏခံႏဖြလွဉ်၊ နီဗွေႏဘုရာꩻ၊ ထင်ႏထီႏကဝ်ခံꩻ၊ သေနန်းငချာ၊ မဟာမစာႏ၊ ရဟန္တာႏဆူꩻ၊ ကနာႏဝွေꩻဗွေႏ၊ အလိုႏအီႏအဝ်ႏ၊ ယိုနဝ်ꩻမွေးမန်ႏ၊ ရှုဉာဏ်ႏထင်ႏထွား၊ သုဝဏ္ဏဟော်ခံꩻ၊ နမ်းကီဝေဒနာႏ၊ တသက်သာႏတဝ်း၊ သေထွူနဝ်ꩻမꩻ၊ စတွမ်ႏသင်္ဃာႏ၊ လစ်ꩻသဲဉ်ဗွေဗွေ၊ ထွေစဲဉ်ႏသဲင်ꩻစူꩻ၊ သုဝဏ္ဏခမ်း၊ ထိုမ်းတွမ်ႏပျသာဒ်၊ လစ်ꩻသဲဉ်နဝ်ꩻနေ၊ သဲင်ꩻတွိုႏရွစ်ဖြ၊ သုဝဏ္ဏတိုင်း၊ ဇာတရူပ၊ ဌာနနေရာႏ၊ တွမ်ႏသင်္ဃာႏဖုံႏ၊ ကွဉ်ရုံႏသင်္ကန်ꩻ၊ လစ်ꩻသဲဉ်ပျသာဒ်၊ ပီနုဲးမွူးလာ၊ အာကာကင်ဟဝ်၊ တဆဝ်လေတောင်ႏ၊ အရောင်ႏအဝါ၊ တနျာႏတသီး၊ မို့ꩻကီမို့ꩻလောင်း၊ ရောင်ႏတောႏသူသွယ်၊ သုဝဏ္ဏတိုင်း၊ သဲင်ꩻတွိုႏရွစ်ဖြ၊ သုဝဏ္ဏတိုင်း၊ လွိုန်ကံလာဆန်ꩻ၊ ထန်ႏလꩻသွစ်ꩻနီꩻ၊ မွူးနီꩻဗုဒ္ဓဟူꩻ၊ သူရိစန္တာႏ၊ ရာဇာႏဟော်ခံꩻ၊ ထီဆွုမ်ႏနီဗွေႏ၊ ဝေနေယျအဖါ၊ ထွာစွဉ်ႏစဲင်းစဲင်း၊ တနဲင်းပေႏသꩻ၊ ရာဇဟော်ခံꩻ၊ နေးတွမ်ႏစူနုံ၊ လုံးစုံတဆီ၊ ကတူႏကီအွဉ်ႏဒင်ႏ၊ အွဉ်ႏလင်ꩻမဲ့ထီ၊ ပီနုဲးသီတာႏ၊ တကာႏတန်ဟွေး၊ ငထဝ်းအမယ်ꩻ၊ အစယ်ꩻငထဝ်း၊ ကင်ꩻနွောင်ꩻတဝ်းနော၊ ဟော်ခံꩻတကာႏ၊ ကွဲကားသေနန်း၊ ယံမေ့လျော့တဝ်း၊ ခွေစဝ်းဘုရာꩻ၊ တရာꩻသင်္ဃာႏ၊ ဘာႏဝနာႏကမ္မဋ္ဌာန်ꩻ၊ သဉ်ထံꩻသီလ၊ လွိုသေရတနာႏ၊ သိုမ်ပါꩻယိုနဝ်ꩻ၊ ငထဝ်းထာꩻလင်၊ ကားတခုဲႏလꩻတဝ်းတဲင်၊ ဝေင်ꩻသဲင်နိဗ္ဗာန်ႏ၊ အမန်ႏလွေꩻဗာႏ၊ တဖူꩻယိုတလီး၊ အွဉ်ႏကုဲအီႏလꩻကောင်း၊ ကျောင်ꩻတကာႏတန်ဟွေး၊ ခွေနမ်းလဲ့ခါ၊ နာꩻနမ်းယာတ၊ တကင်ꩻလꩻတဝ်းနော၊ ဟော်ခံꩻတကာႏ၊ ဘုရာꩻသျင်ႏဗွေႏ၊ ဆုမ္မꩻနယ်ဖေႏ၊ ခွန်တန်ဟော်ခံꩻ၊ သူရိစန္တာႏ၊ ရာဇာမင်ꩻကြီꩻ၊ လွိုန်သီႏလာဆန်ꩻ၊ တဆီငတ်ꩻနီꩻ၊ သူရိစန္တာႏ၊ မဟာမင်ꩻကြီꩻ၊ အွဉ်ႏကုဲထီခမ်း၊ လမ်းပါႏဝေင်ꩻဟော်၊ အနိစ္စခန္ဓာ၊ ခါလဲ့ပြောင်ꩻခန်း၊ နီဗွေႏဘုရာꩻ၊ သင်္ဃာႏလစ်ꩻသဲဉ်၊ လက်ဝဲလက်ယာ၊ ရှုလွကမ္မဋ္ဌာန်ꩻ၊ ဟော်ခံꩻဟော်လောင်း၊ အနိစ္စာ ဝတ၊ သင်္ခါရတရာꩻ၊ သေႏချာႏထွူမꩻ၊ ဘိသက်စဖေႏ၊ ဟော်ခံꩻခင်ႏလမ်း၊ ခွန်တန်ပိုခို၊ ဒေဝိန်သော်မ၊ ရာဇဟော်ခံꩻ၊ အပ်ဖေႏဝေင်ꩻဟော်၊ ယံကစံႏစာꩻ၊ အဖါခင်ႏလမ်း၊ ဟော်နန်ꩻတောႏလောင်း၊ သေႏချောင်းသေႏချာႏ၊ နဝ်ꩻမꩻဖုံꩻလွမ်ꩻ၊ သူရိစန္တာႏ၊ မဟာမင်ꩻကြီꩻကွိုနဲ၊ တင်ꩻလုဲသီးယာ၊ နဝ်ꩻခါနီဗွေႏ၊ အစိန္တေယျ၊ ဗုဒ္ဓဘုရာꩻ၊ လွိုန်သီႏလာလောင်း၊ ဟောင်ရိုꩻနွုတ်ꩻနီꩻ၊ မွူးနီꩻစနေႏ၊ စတွမ်ႏသင်္ဃာႏ၊ လစ်ꩻသဲဉ်ဗွေဗွေ၊ ကျွꩻကာသဲင်ꩻယား၊ ဌာနခင်ႏလမ်း၊ ထိုမ်းတွမ်ႏပျသာဒ်၊ လစ်ꩻသဲဉ်သင်္ဃာႏ၊ အာကာမို့ꩻလောင်း၊ ကျောင်ꩻသဲင်ꩻသာႏသာႏ၊ မာꩻသဲင်ꩻယွယွ၊ မို့ꩻသဉ်အဝ်ႏလွမ်၊ ခမ်းအွုမ်ႏအခြာ၊ သူပါꩻရောင်ႏတောႏ၊ အံႏအော်ꩻခီႏမွမ်ꩻ၊ တယွမ်ꩻနွောင်ꩻတဝ်းကွိုနဲ၊ ကျောင်ꩻတကာႏသီးယာ၊ ဗွေႏစဝ်းဘုရာꩻ၊ ကကျွꩻကာသဲင်ꩻစူꩻ၊ သုဝဏ္ဏခမ်း၊ မွိုးနန်းစခါ၊ အံႏဖြာႏခီႏမွမ်ꩻ၊ တယွမ်ꩻနွောင်ꩻတဝ်း၊ ဗွေႏစဝ်းဘုရာꩻ၊ ဝါႏတောႏထင်ႏလꩻ၊ ပဉ္စစာလီ၊ လစ်ꩻဆီငတ်ꩻဝါႏ၊ မလ္လာႏမင်ꩻခမ်း၊ ကျွꩻနွို့စံႏစာꩻ၊ ဝေင်ꩻထာဝေင်ꩻခံꩻ၊ နိဗ္ဗာန်ႏအခါႏ၊ ကောဇာႏဒီဃ၊ မူလသက္ကရာဇ်၊ တစ်နစ်ဂဏန်ꩻ၊ ထေထန်ႏနေင်ႏပေါင်ꩻ၊ ဟော်ရိုꩻတရျာꩻ၊ သာလွိုလစ်ꩻဆီ၊ လွိုတကီသွစ်ꩻဗာႏ၊ ပြိဿရာသီႏ၊ လွိုန်ရုတ်ꩻလာဗွေ၊ မွူးနီꩻအင်္ဂါႏ၊ သောကျဘရနီနက္ခတ်၊ လမန်ႏလစ်ꩻဖြုံႏ၊ လွိုန်ရုတ်ꩻဝိသာႏခါႏ၊ စတုရပတ်၊ နက္ခတ်မူလ၊ တဆီငတ်ꩻဗာႏ၊ ရဿအတို၊ သူဗာႏရိုꩻနော၊ ဂိမှန္တရတု၊ တခါꩻငွါနဝ်၊ ရွှေသလွန်ညောင်စောင်း၊ ကူႏခံꩻလောင်းကီ၊ မုနိမဲ့ငါ၊ အွဉ်ႏချာႏငထင်ꩻ၊ ဘုရာꩻသျင်ႏဗွေႏ၊ စံႏစာꩻနေးထူႏ၊ ခမ်းသူꩻဝေင်ꩻယေန်၊ နိဗ္ဗာန်ရွှေပြည်၊ ခေမာႏဝေင်ꩻခံꩻ၊ ကျွꩻနွို့စံႏစာꩻ၊ ဘုရာꩻပဉ္စဝ်း၊ သညင်ꩻခွေသီ၊ အစ်လူနီနာꩻ၊ နဝ်ꩻမꩻအွဉ်ႏကုဲ၊ သာႏသနာႏတောႏနဝ်ꩻ၊ လစ်ꩻလာထင်ႏလꩻ၊ ပဌမသံဂါ၊ ယနာႏအီႏတင်ႏ၊ အတွင်ꩻကာလ၊ ခွန်တန်ဟော်ခံꩻ၊ သက်တောႏစက်လꩻ၊ သောဠသဆီသူ၊ ဦးချတောင်ꩻပြန်ႏ၊ ရဟန္တာႏဗွေႏ၊ အရှင်မဟာကဿပ၊ ထေရ်ရအတန်၊ ရဟန်ꩻငတ်ꩻရျာꩻ၊ အဇာတသတ်၊ မင်ꩻမျတ်ဟော်ခံꩻ၊ နေးတွမ်ႏစူနုံ၊ လုံးစုံတဆီ၊ မတ်ပီဗိုကဝ်ႏ၊ လျောက်လဝ်းတောင်ꩻပြန်ႏ၊ ကဿပမထေရ်ႏ၊ ဩစဝ်းဩဗွေႏ၊ ဟန်ႏသလဲင်ႏနဝ်ꩻ၊ ဗွေႏစဝ်းဘုရာꩻ၊ အဲဉ်ဒွုမ်နမ်းတောႏ၊ မီႏထွာမဉ်ႏသေ၊ နီဗွေႏဘုံꩻကြီꩻ၊ မဉ်ထီႏဘုရာꩻ၊ အီႏမာꩻပီးမုဲꩻ၊ ဟဲ့ꩻဗွေႏရဟန္တာႏ၊ မဟာကဿပ၊ ခါလဲ့ပြန်ႏဖေႏ၊ နဝ်ꩻကောင်းတကာႏ၊ ရာဇာဟော်ခံꩻ၊ တကာႏတန်ဟွေး၊ မီႏထွာသေနန်း၊ မဉ်မော့ꩻမဉ်ထီႏ၊ နီဗွေႏဘုရာꩻ၊ သဒ္ဓါႏမီႏအဝ်ႏ၊ နဝ်ꩻရာꩻယံဖေႏ၊ နေးတွမ်ႏစေတနာႏ၊ သဒ္ဓါႏလူႏတန်ꩻ၊ ဘုရာꩻရွှေထုံ၊ သုဝဏ္ဏဘုမ္မိ၊ စေႏတီႏဆူꩻနော၊ ရဟန္တာႏဗွေႏ၊ မိန်းဖေႏနဝ်ꩻမꩻ၊ ရာဇဂြိုဟ်ႏခမ်း၊ ခွန်တန်ဟော်ခံꩻ၊ အဇာတသတ်၊ ထင်ႏဟွုန်ထင်ႏသေ၊ စေတနာႏစွုမ်ႏကတ်၊ ဝံꩻမျောက်ဝံꩻသာႏ၊ အာႏရꩻနစ်သက်၊ ရက်ပဲင်ꩻနမ်းကဝ်ႏ၊ အုံအဝ်ႏသေနန်း၊ ပီနုဲးဖုဲဆား၊ ပါꩻကစိုပ်ဆီ၊ ထီဗွမ်ႏနမ်းမန်ꩻ၊ ဝန်ႏထာအဖူꩻ၊ ဖုဲထူကပွစ်၊ သွုန်ꩻမျတ်သꩻဗွာ၊ ရာဇာဟော်ခံꩻ၊ ဟဲ့ꩻစဟောင်တွမ်ႏ၊ သဲႏလာႏပိုလီꩻ၊ ညီႏညီႏညာႏညာႏ၊ ပင်ꩻလွေꩻပါတွမ်ႏ၊ ဗွေႏစဝ်းရဟန္တာႏ၊ ရှင်ႏမဟာကဿပ၊ စတွမ်ႏရဟန္တာႏ၊ ငတ်ꩻရျာꩻဗွေဗွေ၊ ထိုမ်းတွမ်ႏသင်္ဘောꩻ၊ ဖေါင်ႏတောႏဖြီမွန်၊ ဆန်လွေꩻသာႏသာႏ၊ ကာႏလွေꩻထီတန်၊ ဒုံႏမောင်းဝင်ထုံ၊ ပတ်ပုံပီႏနယ်ꩻ၊ အဲအဲအတ်အတ်၊ ဒုတိယဝါႏဆိုႏ၊ လာဆန်ꩻသိုမ်နီꩻ၊ ရာႏသီႏနေင်ႏတန်၊ လစ်ꩻလာရက်စွုမ်ႏ၊ မွူးနီꩻစနေႏ၊ ဖျော်သဲင်ꩻရွှေထုံ၊ သုဝဏ္ဏဘုမ္မိ၊ စေတီႏဆတွို့ꩻထင်ꩻ၊ ဆင်ဗွာဖွေါင်ꩻထျꩻ၊ အုံချꩻစခန်ꩻ၊ တွမ်ႏဝေင်ꩻရွှေထုံ၊ သုဝဏ္ဏဘုမ္မိ၊ မီႏတဲက်အတာ၊ အီႏအဝ်ႏနေကွို့ꩻ၊ အတာတရေင်၊ သူႏတောႏသီးယာ၊ ဌာနရပ်နဝ်ꩻ၊ သေင်ႏဟေ့ꩻလဲ့သာႏ၊ စခန်ꩻလဲ့ဟဝ်၊ အုံအဝ်ႏချꩻလင်ꩻ၊ ဟော်ခံꩻမင်ꩻကြီꩻ၊ ဖြီꩻဖြီꩻအုံအဝ်ႏ၊ နဝ်ꩻခါကာလ၊ ရွှေထုံဟော်ခံꩻ၊ ဒေဝိန်သောမ၊ ထင်ႏဟွုန်ထင်ႏသေ၊ ဟဲ့ꩻဟောင်ပိုလီꩻ၊ ထီကောင်ႏလမ်းဒါ၊ ရပ်ဆွုမ်ႏတဖူꩻ၊ ဖြွူးယာထီမေႏ၊ နယ်ဖေႏခင်ႏလမ်း၊ တယ်ꩻတံꩻလျှာဒါ၊ ရဟန္တာႏဖျော်လွဉ်၊ ဆရာႏတကာႏ၊ အွဉ်ႏဒေါ့ꩻရီဖြဝ်ႏတောႏ၊ ဟော်ခံꩻကစ၊ တက်ရီလွဝင်ꩻ၊ ဗာႏခုဲႏတဝ်းနော၊ နီဗွေႏဟော်ခံꩻ၊ ဗွန်ကံႏတံꩻခိုꩻ၊ တန်ထိုဒွါႏနေ၊ ကောထွာပိုလီꩻ၊ စီꩻပွာꩻချမ်ꩻသာႏ၊ လွိုင်အာနေနော၊ အွဉ်ႏဒေါ့ꩻတောႏဖြဝ်ႏရီ၊ မင်ꩻကြီꩻရာဇာႏ၊ သေႏချာႏထွူမꩻ၊ နီဗွေႏဘုရာꩻ၊ ဌာပနာႏငသေꩻ၊ တငါစွယ်ႏတောႏ၊ ပျꩻနယ်တံꩻခိုꩻ၊ ဆန်ဝုဲးကျောင်ႏထင်ႏ၊ ကင်ꩻဟဝ်မို့ꩻလောင်း၊ ရောင်ႏတင်ႏသူသွယ်၊ ပီနုဲးဘုရာꩻမွန်၊ အွဉ်ႏနယ်တံꩻခိုꩻ၊ လစ်ꩻပါꩻလစ်ꩻဆူႏ၊ သူသွယ်သူစွိုး၊ လေဟွိုးရောင်ႏတင်ႏ၊ စက္ကျဝဠာႏအနန္တ၊ မို့ဆလဟံႏတကီ၊ ပီစွဉ်ႏမွူးလာ၊ ရာဇာဂြိုဟ်ႏဟော်ခံꩻ၊ လူႏတန်ꩻပူႏဇောႏ၊ ဓာတ်တောႏအငါ၊ နဝ်ꩻမꩻခွန်တန်၊ ဟော်ခံꩻရာဇဂြိုဟ်ႏ၊ အဇာတသတ်မင်ꩻကြီꩻ၊ ကိုꩻကွယ်ႏထေင်းထင်ႏ၊ အွဉ်ႏဒင်ႏကတူႏ၊ နေးတွမ်ႏစူနုံ၊ ပဒုမ္မာမတ်ပီ၊ ကတူႏကီသိုမ်ပေါက်၊ ခေါက်ဝုဲႏထွူမꩻ၊ ရာဇဟော်ခံꩻ၊ ရဲဉ်ꩻတွမ်ႏအလူႏ၊ တံꩻခွဉ်ႏစေးတာ၊ ကျက်သာႏဗွူဖေါင်း၊ တရောင်းတရေꩻ၊ သေႏချောင်းသေႏချာႏ၊ သီးတနျာႏသွမ်ႏချို၊ မိုးမားဗွာစီ၊ ဆီမီးတံꩻခွဉ်ႏ၊ ထီဖွိုင်ꩻမော်နမ်း၊ သဲင်ခံꩻပတ္တမျာꩻ၊ ရွဉ်ထာငစင်စင်၊ သင်ပွတ်သင်ကယ်ꩻ၊ ပလယ်ꩻကောမုတ်၊ ဥဿဖယား၊ ဘုရာꩻပတ်လယ်၊ သယ်ႏလာႏမူꩻမတ်၊ စာႏဖတ်စာႏရေꩻ၊ စူထွေသိုမ်ပတ်၊ ခေါက်ဝုဲင်ႏလေပ်ခူ၊ လူႏတန်ꩻပူႏဇောႏ၊ ပွယ်ꩻတောႏချꩻပုံႏ၊ ဒုံႏထုံဒုံႏမောင်း၊ သာႏယောင်းသာႏယာႏ၊ ဘုရာꩻအထျꩻ၊ နွုတ်ꩻနီꩻနွုတ်ꩻနာꩻ၊ ပျသာဒ်ထာခံꩻ၊ တန်ဆောင်ႏစရွပ်၊ လူႏကပ်ငသေꩻ၊ စေႏတီႏလောင်းကီ၊ တလီꩻမာႏယာခိုး၊ ယံဖေႏတိုးမွုန်း၊ လူႏတန်ꩻငသေꩻ၊ စေႏတီႏဆကီ၊ ဖြီꩻစီꩻထွူမꩻ၊ အဇာတသတ်၊ မင်ꩻမျတ်ဟော်ခံꩻ၊ ဟဲ့ꩻတွမ်ႏသယ်ႏလာႏ၊ စာႏရေꩻစာႏဖတ်၊ မူꩻမတ်ကစ၊ ကန္တော့ꩻငသေꩻ၊ ဒေဝိန်သောမ၊ ရာဇဟော်ခံꩻ၊ ပို့သမေတ္တာႏ၊ ပသာလွဝင်ꩻ၊ မင်ꩻကြီꩻနီပါꩻ၊ နဝ်ꩻမꩻခွုန်ꩻသဲင်ꩻ၊ ပင်ꩻသဲင်ꩻပါတွမ်ႏ၊ ဗွေႏစဝ်းရဟန္တာႏ၊ သျင်ႏမဟာကဿပ၊ ငတ်ꩻရျာꩻဗွေဗွေ၊ ထိုမ်ႏတွမ်ႏသင်္ဘောꩻ၊ ဖေါင်ႏတောႏဖြီခံꩻ၊ ခင်ႏလမ်းဆချာ၊ သယ်ႏလာႏမူꩻမတ်၊ စာႏဖတ်စာႏာရေꩻ၊ ချွေႏရံႏပိုလီꩻ၊ ခွုန်ꩻသဲင်ꩻသာႏသာႏ၊ ကာႏသဲင်ꩻယွယွ၊ ကွိုနဲတင်ꩻလုဲသီးယာ၊ ရာဇဂြိုဟ်ႏဟော်ခံꩻ၊ လူႏတန်ꩻကိုꩻကွယ်ႏ၊ ခေါက်ဝုဲႏကွီဆုꩻ၊ သုဝဏ္ဏဘုမ္မိ၊ စေႏတီႏတောႏမျတ်၊ မတ်နုဲးထီႏဗာႏ၊ ဘုရာꩻအနမ်း၊ ဟော်ခံꩻစခါ၊ သမဲင်ꩻစာကို၊ ရိုꩻထာꩻပီးနတ်ꩻ၊ ဟဝ်မတ်ဒီတောင်ꩻ၊ ကျောင်ꩻတကာႏသီးယာ၊ ဆုဲꩻချာနဝ်ꩻမꩻ၊ နီဗွေႏဘုရာꩻ၊ စံႏစာꩻနေးထူႏ၊ ခမ်းသူႏဝေင်ꩻယေန်၊ ရွှေပြည်နိဗ္ဗာန်ႏ၊ ဝေင်ꩻခံꩻအချာ၊ တဆီငတ်ꩻနေင်ႏ၊ အခိန်ႏထင်ႏလꩻ၊ သောဏမထေရ်ႏတွမ်ႏ မဟိန္ဒမထေရ်ႏ၊ ဝွေꩻဗွေႏနီပါꩻ၊ ထွာဗာႏဝင်ꩻအတန်၊ စတွမ်ႏရဟန္တာႏ၊ ငတ်ꩻရျာꩻဗွေဗွေ၊ ထိုမ်းတွမ်ႏပျသာဒ်၊ ငတ်ꩻရျာꩻရဟန္တာႏ၊ ကျွꩻကာသဲင်ꩻစူꩻ၊ သာဝတ္ထိခမ်း၊ သုဝဏ္ဏဘုမ္မိ၊ ပင်ꩻသဲင်ꩻပါတွမ်ႏ၊ ဗွေႏစဝ်းဘုရာꩻ၊ ကလူꩻထာခံꩻ၊ ကေသာဆံတော၊ နီဆူႏနီလီး၊ အီလွဉ်ပင်ꩻသဲင်ꩻ၊ လွဉ်ခေါက်လွဉ်ဝုဲႏ၊ ကိုꩻကွယ်ႏလူႏတန်ꩻ၊ ရဟန္တာႏဗွေႏ၊ ဘုရာꩻရွှေထုံ၊ အုံအဝ်ႏပူႏဇောႏ၊ ရေႏရောႏကွီဆု၊ သဗ္ဗညုဘုရာꩻ၊ တငါစွယ်ႏတောႏ၊ သုဝဏ္ဏဘုမ္မိ၊ စေႏတီႏဘုရာꩻ၊ နွုတ်ꩻနာꩻနွုတ်ꩻနီꩻ၊ ဖြီꩻစီꩻထွူမꩻ၊ မဟိန္ဒမထေရ်ႏ၊ ခေါက်ဝုဲႏလျောက်လဝ်း၊ ဗွေႏစဝ်းရဟန္တာႏ၊ မဟာသောဏ၊ ထေရ်ရဟန်ꩻတန်၊ ဩစဝ်းဩဗွေႏ၊ နီဗွေႏဘုရာꩻ၊ ဆံတော်ထာခံꩻ၊ မွိုးနန်းစခါ၊ ခါလားနေးထူႏ၊ ခမ်းသူႏဝေင်ꩻယေန်၊ အပ်ငသေꩻဆံတော်၊ နီဗွေႏအဒွို၊ ဗျာဒိပ်ငသေꩻ၊ ယံဖေႏဌာပနာႏ၊ ဌာနရပ်မုဲꩻ၊ ဟဲ့ꩻနုဲးဗွေႏစဝ်း၊ ထွန်ႏငသေꩻတဝ်းကောင်း၊ စဝ်းနောင်းထေရ်ႏတန်၊ နဝ်ꩻကောင်းညီတော်၊ ချစ်သားဖူးခို၊ နီဗွေႏဘုရာꩻ၊ ခလားနေးထူႏ၊ ရွှေပြည်ဝေင်ꩻခံꩻ၊ နိဗ္ဗာန်ႏဝေင်ꩻယေန်၊ ပညပ်ငသေꩻ၊ ခွေသွဉ်းဟွုန်ဗာႏ၊ သာဝတ္ထိခမ်း၊ ပုဗ္ဗာရုံႏကျောင်ꩻ၊ သတင်ꩻသုံꩻကာလ၊ အပ်ငသေꩻဆံတော၊ ပညပ်နဝ်ꩻရာꩻ၊ ခွေကေသာယို၊ နီဆူႏနီလီး၊ သာရိပုတ္တရာ၊ အာနန္တာႏမောဂ္ဂလာန်ႏ၊ အရှင်ႏမဟာကဿပ၊ ခွေကေသာယို၊ ထေရ်ႏရသီးဟွေး၊ မီႏတွိုႏဆုဲꩻချာ၊ ခွေမီႏနေးထူႏ၊ ရွှေပြည်နိဗ္ဗာန်ႏ၊ ဝေင်ꩻခံꩻအချာ၊ နီဆီငတ်ꩻနေင်ႏ၊ ယံဖေႏမဟိန္ဒ၊ တွမ်ႏသောဏမထေရ်ႏ၊ ဖူးဝေးနီပါꩻ၊ ကိုꩻကွယ်ႏဗာႏနော၊ ယံဖေႏဌာပနာႏ၊ ဘုရာꩻရွှေထုံ၊ သုဝဏ္ဏဘုမ္မိ၊ ဝေင်ꩻတန်ဆထင်ꩻ၊ တဆီနီစဲင်ႏ၊ အာလဲင်ခြောင်လောင်း၊ သော်ကခြောင်ကတူႏ၊ နီဆူႏနီပါꩻ၊ ဌာပနာႏညီꩻလွ၊ ကောင်ထျꩻကောင်နာ၊ ငဝ်းငွါမိန်းတောႏ၊ ပညပ်ငသေꩻ၊ ဝွေꩻသီးထေရ်ႏတန်၊ ဟွုန်ဗာႏသေရဝ်း၊ ဗွေႏစဝ်းရဟန္တာႏ၊ စတွမ်ႏဟော်ခံꩻ၊ ဒေဝိန်သောမ၊ ကျွꩻကာသဲင်ꩻစူꩻ၊ မူႏခိုပေႏတန်၊ ဟော်ခံꩻကစ၊ ဟဲ့ꩻစပိုလီꩻ၊ ညီညာထွူမꩻ၊ လွိုန်သီလာဆန်ꩻ၊ ထန်ႏလꩻနွုတ်ꩻနီꩻ၊ မွူးနီꩻဗုဒ္ဓဟူꩻ၊ ခွန်လူꩻတနံ၊ လင်ꩻလွဉ်လိုꩻခမ်း၊ ခူႏအောင်ဌာပနာႏ၊ ကောင်ထျꩻကောင်နာ၊ တနားရီႏချင်ꩻ၊ သွင်ꩻသော့ꩻဌာပနာႏ၊ ရာဇာဟော်ခံꩻ၊ ဒေဝိန်သောမ၊ ဟဲ့ꩻစပိုလီꩻ၊ ညီႏညာႏတွိုင်ႏပင်ႏ၊ အီထင်ႏအလူႏ၊ ဗွူဖေါင်းကျက်သာႏ၊ သဒ္ဓါႏလူႏတန်ꩻ၊ ဓာတ်တောႏအကျိုꩻ၊ လူꩻလိုꩻတနံ၊ ဗြဟ္မာသိကျာꩻ၊ ညီညာသာႏဓု၊ လူႏတန်ꩻထွူမꩻ၊ သောဏမထေရ်ႏ၊ ဝွေꩻဗွေႏနီပါꩻ၊ စွုမ်ႏဟာစွုမ်ႏနီꩻ၊ ဆီမီးသွမ်ꩻပန်ꩻ၊ လူႏတန်ꩻပူႏဇောႏ၊ ဆံတော်ထာခံꩻ၊ မတ်နုဲးဘုရာꩻမွန်၊ ဖါလဲင်ကောင်လောင်း၊ သောကကောင်နာ၊ စခါအဝ်ႏနော၊ သူႏတောႏသီးယာ၊ ဆုဲꩻချာနီဗွေႏ၊ ရွှေပြည်နိဗ္ဗာန်ႏ၊ စံႏစာꩻအချာ၊ နဝ်ꩻရာꩻနေင်ႏပေါင်ꩻ၊ သိုမ်ဆီဗွေဗွေ၊ သောဏမထေရ်ႏ၊ စံႏစာꩻနေးထူႏ၊ ရွှေပြည်ဝေင်ꩻယေန်၊ မဟိန္ဒမထေရ်ႏ၊ ခွန်တန်ကစ၊ ဒေဝိန်သောမ၊ ရာဇဟော်ခံꩻ၊ ဖြွမ်းဝင်ꩻသင်္ဂြိုဟ်ႏကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။

ပွိုးပီးနဝ်ꩻမꩻ၊ ကျောင်ꩻတကာႏသီးယာ၊ မတ်ခြာလုဲးဗွေႏ၊ တွိုႏနဝ်ꩻခါမꩻ၊ မဟိန္ဒမထေရ်ႏ၊ နေးတွမ်ႏခံꩻဖွိုင်ꩻ၊ တွမ်သောꩻဓာတ်တောႏ၊ အွဉ်ႏလို့ꩻငသေꩻ၊ နီဗွေႏဘုရာꩻ၊ ဆံတော်ထာခံꩻ၊ မျက်နာႏဆကွဉ်ႏကွိုနဲ၊ ထဝ်းကဲသီးယာ၊ ဆုဲꩻချာနီဗွေႏ၊ နေးထူႏစံႏစာꩻ၊ ခမ်းသူႏဝေင်ꩻယေန်၊ ရွှေပြည်နိဗ္ဗာန်ႏ၊ ဝေင်ꩻခံꩻခေႏမာႏ၊ အနေင်ႏငတ်ꩻဆီ၊ လွိုန်ရုတ်ꩻလာဆန်ꩻ၊ ထန်ႏလꩻကွတ်ꩻနီꩻ၊ မွူးနီꩻအင်္ဂါႏ၊ ရဟန္တာႏဗွေႏ၊ မဟိန္ဒမထေရ်ႏ၊ စံႏစာꩻနေးထူႏ၊ ခမ်းသူႏဝေင်ꩻယေန်၊ နိဗ္ဗာန်ႏရွှေပြည်၊ ခေမာဝေင်ꩻခံꩻ၊ ဖါလဲင်ခြောင်ထျꩻ၊ အဖုဲးကွဉ်ႏနဝ်၊ ခွန်တန်ဟော်ခံꩻ၊ ဒေဝိန်သောမ၊ ဖုံꩻလွမ်ꩻသင်္ဂြိုဟ်ႏ၊ မဟိန္ဒရဟန္တာႏ၊ နဝ်ꩻခါကာလ၊ ဒေဝိန်သောမ၊ ရာဇဟော်ခံꩻ၊ ခွန်တန်နေးတွမ်ႏ၊ ဖွိုင်ꩻခံꩻဖွိုင်ꩻထာ၊ တွမ်သော့ꩻဓာတ်တောႏ၊ ခူႏအောင်ဌာပနာႏ၊ နီဗွေႏဘုရာꩻ၊ ကေသာဆံတော်၊ မျက်နာႏဆတွို့ꩻ၊ အဝ်ႏတွိုႏငခါ၊ ခွေနာꩻဝုဲႏဗာႏ၊ ကေသာဆံတော်၊ မဟိန္ဒသောဏ၊ ထေရ်ရဟန္တာႏ၊ ကုသိနာရုံႏ၊ ဖါလဲင်ကောင်လောင်း၊ လိတ်မန်းတောင်ꩻမာႏ၊ လွဉ်ဗာႏပီးနဝ်ꩻ၊ ဟဝ်မတ်ဒီတောင်ꩻ၊ ကျောင်ꩻတကာႏသီးယာ၊ ဆုဲꩻချာနီဗွေႏ၊ ရွှေပြည်နိဗ္ဗာန်ႏ၊ စံႏစာꩻအချာ၊ အနေင်ႏတရျာꩻ၊ သုဝဏ္ဏဘုမ္မိ၊ သူရိစန္တာႏ၊ ရာဇဟော်ခံꩻ၊ ခွန်တန်ခွိုꩻနွယ်ႏ၊ ဟနုဝဏ္ဏ၊ သာရမင်ꩻကြီꩻ၊ သက်တောသိုမ်ဆီ၊ လွိုတကီငတ်ꩻနေင်ႏ၊ ပွိုင်ႏဝေင်ꩻနင်းဟော်၊ ဝွေꩻဗွေႏခွန်တန်၊ မင်ꩻကြီꩻလက်ထက်၊ ဝွေသာလီႏခမ်း၊ ဟော်ခံꩻရာဇာ၊ ကလာသောက၊ ကာလလက်ထက်၊ ဒုတိယသံဂါ၊ ယတနာႏလဲ့တင်ႏ၊ သျင်ႏမဟာရသ၊ ဝေဠုကရကျောင်ꩻ၊ သွစ်ꩻလာဗွေဗွေ၊ ထွူတဲင်နဝ်ꩻမꩻ၊ ကာလာသောက၊ ရာဇာဟော်ခံꩻ၊ သက်တောႏနီဆီ၊ လွိုတကီကွတ်ꩻနေင်ႏ၊ ပွိုင်ႏဝေင်ꩻနင်းဟော်၊ မွန်းပျောႏစံႏစာꩻ၊ ဟော်ထာလောင်းကီ၊ နီဆီကွတ်ꩻနေင်ႏ၊ မဉ်မော့ꩻမဉ်ထီႏ၊ ဘုံꩻကြီꩻဘုရာꩻ၊ ရှင်ႏမဟာယသငါ၊ နွုတ်ꩻရျာꩻရဟန္တာႏ၊ အငါအသောင်၊ တောင်ꩻပြန်ႏလျောက်လဝ်း၊ ဗွေႏစဝ်းရဟန္တာႏ၊ အရှင်ႏမဟာယသ၊ ဩစဝ်းဩဗွေႏ၊ ခွေသွဉ်းဟွုန်ဗာႏ၊ ဘုရာꩻပဉ္စဝ်း၊ ငဝ်းငွါမိန်းတောႏ၊ ကဟော်ꩻငသေꩻ၊ စာပေပိဋကတ်၊ သွစ်ꩻမွုန်ႏလစ်ꩻရေင်၊ ပညပ်ငသေꩻ၊ နဝ်ꩻရာꩻခွေသွဉ်း၊ ဟော်ခံꩻတကာႏ၊ ဟွိုန်ဗာႏထွူနုဲး၊ ထုဲႏပီဝင်ꩻရိုꩻ၊ လိုꩻတချွစ်ထွိုက်တဝ်း၊ ငဝ်းငွါဝင်ꩻရိုꩻ၊ ခွေသွဉ်းယိုထွူ၊ နင်းဟွူထွာဗာႏ၊ သတ္တဝါႏချွစ်ထွိုက်၊ မာꩻဗာႏပီးမုဲꩻ၊ ခေါက်ဝုဲႏလျောက်လဝ်း၊ ဗွေႏစဝ်းရဟန္တာႏ၊ ရှင်ႏမဟာယသ၊ ခါလဲ့ပြန်ႏဖေႏ၊ တကာႏတန်ဟွေး၊ မွိုးနန်းစခါ၊ နီဗွေႏဘုရာꩻ၊ ခါးလားစံႏစာꩻ၊ ဝေင်ꩻထာဝေင်ꩻခံꩻ၊ တဆီတွမ်ႏတဝါႏ၊ ဇာတရူပတိုင်း၊ သုဝဏ္ဏခမ်း၊ သူရိစန္တာႏ၊ သိကျာꩻတနံ၊ တောင်ꩻပြန်ႏငသေꩻ၊ စထစ်နီဗွေႏ၊ အနမ်းအဝ်ႏကာလ၊ တငါဓာတ်တောႏ၊ သုဝဏ္ဏဝေင်ꩻ၊ သွင်ꩻသေꩻဌာပနာႏ၊ ဇာတရူပတိုင်း၊ ဘုရာꩻစေႏတီႏ၊ မွိုးနန်းစခါ၊ ဘုရာꩻလစ်ꩻဆူႏ၊ သုဝဏ္ဏဝေင်ꩻ၊ လစ်ꩻတွန်လစ်ꩻဆူႏ၊ ကကုသန်တုံ၊ ကောဏဂုံ ကဿပ ဂေါတမ၊ ဘုရာꩻလစ်ꩻဆူႏ၊ ကလူꩻတောင်ဝွေꩻ၊ မျသပိတ်တငါ၊ ဘုရာꩻလစ်ꩻဆူႏ၊ စေႏတီႏဘုရာꩻ၊ မီႏထွာကိုꩻကွယ်ႏ၊ ခေါက်ဝုဲႏလူႏဗာႏ၊ ဘုရာꩻဆူꩻနဝ်ꩻ၊ ဥပမာႏစွိုးနုဲး၊ ထုဲႏပီမော့ꩻဗာႏ၊ ဘုရာꩻပဉ္စဝ်း၊ အနမ်းနဝ်ꩻနေ၊ သျင်ႏမဟာယသ၊ ဟော်ꩻပျꩻနယ်ဖေႏ၊ ကာလာသောက၊ ရာဇဟော်ခံꩻ၊ ထင်ႏသေထင်ႏဟွုန်၊ အာႏရꩻမဲ့စွုမ်ႏ၊ ဝံꩻမျောက်ဝံꩻသာႏ၊ အာႏရꩻနစ်သက်၊ ဆတက်စေတနာႏ၊ သဒ္ဓါႏစွုမ်းကတ်၊ အဝ်ႏရင်းထွိုင်ႏစူꩻ၊ သွုန်ႏဖူꩻသꩻကို၊ ဟွုန်သွိုꩻဟွုန်သွင်ႏ၊ ရင်းခြွိုင်းတံဆာႏ၊ ကလာသောက၊ ရာဇဟော်ခံꩻ၊ ပင်ꩻလွေꩻပါတွမ်ႏ၊ ဗွေႏစဝ်းရဟန္တာႏ၊ သျင်ႏမဟာယသ၊ ထေရ်ရနွုတ်ꩻရျာꩻ၊ ဟဲ့ꩻစဟောင်လွဉ်၊ သွဉ်းသယ်ႏပိုလီꩻ၊ မူꩻမတ်စာႏရေꩻ၊ ပေႏတန်ဖြားဆား၊ ထံꩻသကားကစ၊ ကောသားသꩻအဝ်ႏ၊ ယံလွဉ်ယံလွေꩻ၊ သꩻမီႏငထဝ်း၊ နဝ်လဲ့ကမ်းသꩻ၊ တစလွေꩻတဝ်း၊ မဉ်ႏထွေရဝ်းခွေ၊ ခါလဲ့လွေꩻက၊ အွဉ်ႏစွꩻအခွင်ꩻ၊ တွမ်ႏနင်ꩻတွမ်ႏစွိုင်ႏ၊ လမ်းပါႏဝေင်ꩻဟော်၊ ထီခမ်းကစ၊ အွဉ်ႏစွꩻအခွင်ꩻ၊ သေဆင်ရွဉ်ထာ၊ ကားကအဝ်ႏကုဲ၊ အဝ်ႏငသေꩻမူꩻမတ်၊ စာႏဖတ်စာႏရေꩻ၊ သေႏချာႏထွူမꩻ၊ ရဟန္တာႏနွုတ်ꩻရျာꩻ၊ ကလာသောက၊ ယွယွသာႏသာႏ၊ လွိုသီလာဆန်ꩻ၊ ထန်ႏလꩻတနီꩻ၊ မွူးနီꩻဗုဒ္ဓဟူꩻ၊ ကျွꩻကာလင်ꩻဟော်၊ သင်္ဘောꩻလောင်းကီ၊ အီပါပတ်ဆဲင်၊ ကေႏဝင်မောင်းထုံ၊ ပတ်ပုံပီနယ်ꩻ၊ အဲအဲအတ်အတ်၊ မူꩻမတ်စာႏရေꩻ၊ ဖေႏဖေႏသာႏသာႏ၊ ယာလဲ့မခိုး၊ အီႏရွိုးအီႏလွား၊ ဆာငင်းဆာငွဉ်ꩻ၊ ဟွီစူဟွီခင်ႏ၊ တခြင်ꩻဗာႏတဝ်း၊ နဝ်ꩻမꩻရွစ်ဖြ၊ သုဝဏ္ဏခမ်း၊ ရဟန်ꩻနွုတ်ꩻရျာꩻ၊ ကလာသောက၊ ရာဇဟော်ခံꩻ၊ ခွန်တန်ရွှေထုံ၊ ဟနုဝဏ္ဏ၊ ဟဲ့ꩻဟောင်ပိုလီꩻ၊ မူꩻမတ်စာႏရေꩻ၊ ပေႏပေႏတန်တန်၊ ရပ်ဆွုမ်ႏတဖူꩻ၊ သင်ဖြူလမ်းဒါ၊ ပြူးယာထီမေႏ၊ နယ်ဖေႏခင်ႏလမ်း၊ ခွန်တန်ချင်ꩻချင်ꩻ၊ ပသာဝင်ꩻမေတ္တာႏ၊ ဗာႏခုဲႏတဝ်းနော၊ ဟော်ခံꩻဟော်ထာ၊ အာဏာႏတံꩻခိုꩻ၊ တန်ထိုဒွါႏနော၊ ဟော်ခံꩻထီခမ်း၊ ချွေႏရံႏပိုလီꩻ၊ စီꩻပွာꩻချမ်ꩻသာႏ၊ လွိုင်ႏအာနေနော၊ ဩဇာႏဒဲဉ်ဟန်ႏ၊ ခါလဲ့ပြန်ꩻပြော်ꩻ၊ လိုꩻအာနေကောင်း၊ ဟော်ခံꩻဟော်ထာ၊ ကလာသောက၊ ဟနုဟမင်ꩻကြီꩻ၊ တက်ရီငဝ်းငွါ၊ သာသာယွယွ၊ ဖြဝ်ႏငအွဉ်ႏဒေါ့ꩻရီ၊ ဖြီꩻစီꩻထွူမꩻ၊ ဗွေႏစဝ်းရဟန္တာႏ၊ ကလာသောက၊ ကျွꩻကာလွေꩻစူꩻ၊ မွေႏတောႏဘုရာꩻ၊ အငါအသောင်၊ လူႏတန်ꩻပူႏဇောႏ၊ ကန္တော့ꩻခေါက်ဝုဲႏ၊ စူထွေသိုမ်ပြန်ႏ၊ ခေါက်ဝုဲႏလေပ်ခူ၊ ကိုꩻကွယ်ႏလူႏတန်ꩻ၊ သွမ်ꩻပန်ꩻဩဇာႏ၊ ဘုရာꩻပတ်လယ်ႏ၊ သယ်ႏလာႏမူꩻမတ်၊ စာႏဖတ်စာႏရေꩻ၊ ပေႏတန်ဖြားဆား၊ ဟော်ထာကစ၊ စူထွေသိုမ်ပတ်၊ ခေါက်ဝုဲႏထွူမꩻ၊ ရာဇဟော်ခံꩻ၊ ပို့သမေတ္တာ၊ ကလာသောက၊ နုတ်ဆက်တက်ရီ၊ ဇာတရူပ၊ ရာဇဟော်ခံꩻ၊ နယ်ဖေႏတဖူꩻ၊ သဲင်ꩻစူꩻထီခမ်း၊ ပူရိန်နဂရ၊ စတွမ်ႏရဟန္တာႏ၊ နွုတ်ꩻရျာꩻဗွေဗွေ၊ ခွယ်ငါခွုန်ꩻသဲင်ꩻ၊ ခံꩻလဲင်မင်ꩻသာꩻ၊ ကလာသောက၊ ရာဇဟော်ခံꩻ၊ ထိုမ်းတွမ်ႏဆင်တန်၊ ထန်ႏသဲင်ꩻသာႏသာႏ၊ တွမ်ႏသယ်ႏလာႏမူꩻမတ်၊ စာႏဖတ်စာႏရေꩻ၊ ပေႏတန်ဖြားဆား၊ ရဟန္တာႏဗွေႏ၊ ထိုမ်းသဲင်ꩻသင်္ဘောꩻ၊ ပူရဇ်နဂတိုင်း၊ ဝွေသာလီခမ်းကို၊ ဖျော်တွိုႏကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။

ဆုဲꩻချာနီဗွေႏ၊ ရွှေပြည်နိဗ္ဗာန်ႏ၊ နေးလဲဉ်းအချာ၊ နဝ်ꩻရာꩻရိုꩻကောင်း၊ နေင်ႏပေါင်ꩻတရျာꩻ၊ သာလွိုသူဆီ၊ သုဝဏ္ဏဘုမ္မိ၊ တုံမမင်ꩻကြီꩻ၊ ထီꩻဗွာအဗွေႏ၊ ဧကရာဇ်ဟော်ခံꩻ၊ နီဝင်ꩻပအိုဝ်ႏ၊ အမျိုꩻအနွယ်ႏ၊ ခွန်တန်တုံမ၊ မင်ꩻကြီꩻလက်ထက်၊ ယိုꩻတရာꩻခွန်၊ လွဉ်ခေါက်လွဉ်ဝုဲႏ၊ ကိုꩻကွယ်ႏလူႏတန်ꩻ၊ သွမ်ꩻပန်ꩻဩဇာႏ၊ ဘုရာꩻရွှေထုံ၊ သုဝဏ္ဏဘုမ္မိ၊ စေႏတီႏတောႏမျတ်၊ လူႏကပ်ရတနာႏ၊ ဩဇာႏဆီမီး၊ နွုတ်ꩻနီနဝ်ꩻနေ၊ ယိုဒရာꩻခွန်၊ နွုတ်ꩻနီꩻကာလ၊ နဝ်ꩻမꩻခွုန်ꩻသဲင်ꩻ၊ သက်သက်သာႏသာႏ၊ ဌာနခမ်းလီꩻကွိုနဲ၊ တင်ꩻလုဲသီးယာ၊ တဖုံႏတဉ်နော။ ဆုဲꩻချာနီဗွေႏ၊ ရွှေပြည်နိဗ္ဗာန်ႏ၊ နေးထူႏစံႏစာꩻ၊ ဝေင်ꩻထာဝေင်ꩻခံꩻ၊ နေးလဲဉ်းအချာ၊ နဝ်ꩻရာꩻနေင်ႏပေါင်ꩻ၊ ဟောင်ရိုꩻနီရျာꩻ၊ သာလွိုနီဆီ၊ လွိုတကီသွစ်နေင်ႏ၊ ဇာတရူပ၊ သုဝဏ္ဏဝေင်ꩻ၊ ခွန်တန်ဟော်ခံꩻ၊ မောင်လမင်ꩻကြီꩻ၊ စံႏစာꩻပွိုင်ႏဝေင်ꩻ၊ တတိယသံဂါႏ၊ ယနာႏအီႏတင်ႏ၊ အတွင်ꩻကာလ၊ ပါဋလိပုတ်ခမ်း၊ ဓမ္မာသောက၊ အုံအဝ်ႏစံႏစာꩻ၊ ရဟန္တာႏဗွေႏ၊ အရှင်မောဂ္ဂလိ၊ တိဿမထေရ်ႏ၊ အသောကာရာမကျောင်ꩻ၊ သတင်ꩻသုံꩻကာလ၊ စတွမ်ႏရဟန္တာႏ၊ ငတ်ꩻရျာꩻနီလဲင်ႏ၊ ရှင်ႏမဟာမောဂ္ဂလိ၊ ပုတ္တတိဿမေထရ်ႏ၊ ဝွေꩻဗွေႏနီပါꩻ၊ ထွာဝင်ꩻအတန်၊ ဓမ္မာသောက၊ ဦးချလျောက်လဝ်း၊ ဗွေႏစဝ်းဘုရာꩻ၊ ငဝ်းငွါမိန်းတောႏ၊ အွဉ်ႏကုဲငသေꩻ၊ စာႏပေႏလိတ်လုဲꩻ၊ စာႏပေပိဋကတ်၊ သွစ်ꩻမွုန်ႏလစ်ꩻရေင်၊ ပညပ်ငသေꩻ၊ နဝ်ꩻရာꩻခွေသွဉ်း၊ ဟော်ခံꩻတကာႏ၊ ဓမ္မာသောက၊ ဟွုန်ဗာႏထွူမꩻ၊ ဗွေႏစဝ်းဘုရာꩻ၊ ကိုႏတောႏအနမ်း၊ နဝ်ꩻရာꩻခွေသွဉ်း၊ ဟော်ခံꩻတကာႏ၊ ဓမ္မာသောက၊ တထီႏထွꩻတဝ်း၊ ဗွေႏစဝ်းဘုရာꩻ၊ ကိုႏတောႏအနမ်း၊ နဝ်ꩻရာꩻခွေသွဉ်း၊ ဟော်ခံꩻတကာႏ၊ ဓမ္မာသောက၊ တမော့ꩻဗာႏတဝ်း၊ ဗွေႏစဝ်းဘုရာꩻ၊ ကိုႏတောႏအနမ်း၊ မီႏတမော့ꩻဗာႏတဝ်း၊ နဝ်ꩻရာꩻစွိုးနုဲး၊ ထုဲႏပီမွူးလာ၊ ဆာႏဖုံႏရံႏခူ၊ ခမ်းအွုမ်ႏဒို့ꩻပေ့ꩻ၊ မွူးလာအရောင်ႏ၊ တတောင်ႏနွိုင်ꩻတဝ်း၊ ငထဝ်းတံꩻခိုꩻ၊ စွိုးနုဲးထုဲႏပီ၊ စာပေအကို၊ ကရိုꩻနဝ်ꩻရာꩻ၊ ခွေသွဉ်းဟွုန်ဗာႏ၊ နီဗွေႏဘုရာꩻ၊ ငဝ်းငွါမိန်းတောႏ၊ ကဟော်ꩻငသေꩻ၊ စာပေပိဋကတ်၊ လိုꩻတချွစ်ထွိုက်တဝ်း၊ ငဝ်းငွါကရိုꩻ၊ ခွေသွဉ်းယိုထွူဩ၊ နင်းဟွူထွာဗာႏ၊ သတ္တဝါႏချွစ်ထွိုက်၊ ပညပ်ပီးမုဲꩻ၊ ဟဲ့ꩻဗွေႏရဟန္တာႏ၊ နေးတွမ်ႏစူနုံ၊ လုံးစုံတဆီ၊ ယွော့ငကီဝုဲႏခေါက်၊ ငေါက်လင်ꩻကတူႏ၊ ဦးချလျောက်လဝ်း၊ ဗွေႏစဝ်းရဟန္တာႏ၊ မဟာမောဂ္ဂလိ၊ တိဿမထေရ်ႏ၊ နဝ်ꩻကောင်းတကာႏ၊ ဓမ္မာသောက၊ တကာႏတန်ဟွေး၊ မွိုးနန်းစခခါ၊ ဘုရာꩻပဉ္စဝ်း၊ အောင်ႏထွူမာနတ်၊ စထစ်တောႏထွက်၊ တဆီတွမ်ႏတဝါႏ၊ ရာဇဂြိုဟ်ႏခမ်း၊ သတင်ꩻသုံꩻကာလ၊ သုဝဏ္ဏခမ်း၊ ဒဲဉ်ဟန်ႏဝပြော်ꩻ၊ နင်းဟော်ပွိုင်ႏဝေင်ꩻ၊ သူရိယာနေလ၊ ခွန်မွူးခွိုꩻနွယ်ႏ၊ ပအိုဝ်ႏဟော်ခံꩻ၊ သူရိစန္တာႏ၊ မဟာမင်ꩻကြီꩻ၊ မဉ်ထီႏမဉ်မော့ꩻ၊ အဝ်ႏကော့ꩻအုံမောင်ꩻ၊ ကဝ်ႏတွမ်ႏဗွူဖေါင်း၊ အွဉ်ꩻစွꩻကျောင်ႏလွေꩻ၊ နီဗွေႏဘုရာꩻ၊ ခြေတော်ခင်ႏထျꩻ၊ ယံဖေႏကျွꩻကာ၊ သင်္ဃာႏလစ်ꩻသဲဉ်၊ တနံသိကျာꩻ၊ ကျွꩻကာလွေꩻစူꩻ၊ သုဝဏ္ဏခမ်း၊ လစ်ꩻဆီငတ်ꩻနီꩻ၊ နီဗွေႏဘုရာꩻ၊ သဲင်ꩻတွိုႏရွစ်ဖြ၊ သုဝဏ္ဏခမ်း၊ သူရိစန္တာႏ၊ လျောက်လဝ်းတောင်ꩻပြန်ႏ၊ တငါခံꩻလစ်ꩻလီး၊ တယ်ႏသွင်ꩻဌာပနာႏ၊ ဘုရာꩻစေႏတီႏ၊ လစ်ꩻဆီနွုတ်ꩻသောင်ꩻ၊ ထာꩻအောင်အဖူꩻ၊ ခွန်လူꩻတနံ၊ ဌာပနာႏငသေꩻ၊ စေႏတီႏတောႏမျတ်၊ ဝေင်ꩻတန်အဖူꩻ၊ လစ်ꩻဆူႏဘုရာꩻ၊ ဌပနာႏသွင်ꩻ၊ တယ်ႏမံႏငသေꩻ၊ ဘုရာꩻစေႏတီႏ၊ ဝွေꩻသီးသမုတ်၊ အားထုတ်ငသေꩻ၊ ဌာနရပ်ဆူꩻ၊ ဆံတော်တောင်ꩻဝွေꩻ၊ သပိတ်မျတငါ၊ ဘုရာꩻလစ်ꩻဆူႏ၊ စေႏတီႏဆူꩻနဝ်ꩻ၊ မျတ်လဲဉ်းအလင်၊ မြေပြင်ဟံႏတကီ၊ အီႏပီဘုရာꩻ၊ စေႏတီႏဆူꩻနဝ်ꩻ၊ ဟောင်ရိုꩻငထဝ်း၊ ကျွန်ꩻနဝ်တီႏပါႏ၊ ဌာပနာႏငသေꩻ၊ ခါလဲ့အဝ်ႏမွေး၊ ဗိုန်တံꩻခိုꩻတောႏ၊ သွင်ꩻသော့ꩻဌာပနာႏ၊ သိကျာꩻခွန်လူꩻ၊ အဝ်ႏဌာပနာႏ၊ ဘုရာꩻစေႏတီႏ၊ နီဗွေႏဘုရာꩻ၊ တထီႏလွဉ်ꩻတဝ်း၊ ဝွေꩻသီးသွင်ꩻဒါႏ၊ ဘုရာꩻအနမ်း၊ တပါတဝ်းနော၊ ဇာတရူပ၊ သုဝဏ္ဏတိုင်း၊ စေႏတီႏဆူꩻနဝ်ꩻ၊ စထစ်စခါ၊ လစ်ꩻပါꩻလစ်ꩻဆူႏ၊ ကိုႏတောႏအနမ်း၊ ပါစွဉ်ႏစွုမ်ႏလဲင်ႏ၊ သဲင်ꩻသွင်ꩻဌာပနာႏ၊ စွုမ်ႏပါꩻစွုမ်ႏဆူႏ၊ စေႏတီႏဆူꩻနဝ်ꩻ၊ မီႏထွာကိုꩻကွယ်ႏ၊ မီႏထွာဝုဲႏဗာႏ၊ ဘုရာꩻဆူꩻနဝ်ꩻ၊ ဥပမာႏစွိုးနုဲး၊ ထုဲႏပီမော့ꩻဗာႏ၊ ဘုရာꩻပဉ္စဝ်း၊ အနမ်းနဝ်ꩻနေ၊ ကွဲကားရိုꩻဗာႏ၊ တအွဉ်ႏဒေါ့ꩻဒါႏတဝ်း၊ ငဝ်းငွါနဝ်ꩻရွုမ်ꩻ၊ ဟော်ခံꩻတကာႏ၊ ဓမ္မာသောက၊ စခါဘုရာꩻ၊ ဖြောင်းထာဖြေꩻခံꩻ၊ ဟော်ꩻထန်ႏငသေꩻ၊ အနမ်းအဝ်ႏအတွင်ꩻ၊ ဘုရာꩻသျင်ႏဗွေႏ၊ ထွန်ႏငသေꩻနဝ်ꩻရာꩻ၊ ခွေမီႏနေးထူႏ၊ ခမ်းသူႏဝေင်ꩻယေန်၊ နိဗ္ဗာန်ႏအချာ၊ အွဉ်ႏကုဲသာႏသနာႏ၊ သွစ်ꩻပါꩻဓာတ်တောႏ၊ ဟော်ခံꩻတကာႏ၊ ဓမ္မာသောက၊ သွုန်ႏသꩻသဒ္ဓါႏ၊ တကာႏတောႏမျတ်၊ ဓာတ်တောႏဆေ့ꩻအာ၊ သွစ်ꩻမွုန်ႏလစ်ꩻရေင်၊ ဝေင်ꩻပေႏဝေင်ꩻတန်၊ ဝွေႏအီႏဖန်းခွေ၊ မွေႏတောႏဓာတ်တောႏ၊ အီႏကောႏစေႏတီႏ၊ နီဗွေႏဘုရာꩻ၊ ဖြောင်းထာဖြေꩻခံꩻ၊ ငဝ်းငွါမိန်းတောႏ၊ ဟော်ꩻနယ်ငသေꩻ၊ ဗွေႏစဝ်းရဟန္တာႏ၊ သျင်ႏမဟာမောဂ္ဂလိ တိဿမထေရ်ႏ ဝွေꩻဗွေႏနီပါꩻ ငဝ်းငွါမိန်းတောႏ ဓမ္မာသောက ခွန်တန်သဒ္ဓါႏ ထင်ႏသေထင်ႏဟွုန်၊ ဗွောင်ႏထင်ႏပန်ꩻကုံꩻ၊ ဝွေꩻဗွေႏကသုံꩻဆောင်ႏ၊ စွုမ်ႏဟာစွုမ်ႏရဝ်ꩻ၊ သဲင်ဟဝ်ရတနာႏ၊ တံꩻဆာႏငိုꩻထွိုက်၊ တန်ႏစွဉ်ႏတသဲဉ်၊ လူႏတန်ꩻပူႏဇောႏ၊ သျင်ႏမဟာမောဂ္ဂလိ တိဿမထေရ်ႏ ဗွေႏစဝ်းရဟန္တာႏ၊ နီပါꩻကွိုတဝ်း၊ နဝ်ꩻမꩻဟော်ခ့ꩻ၊ ထင်ႏသေထင်ႏဟွုန်၊ ဗွေႏစဝ်းရဟန္တာႏ၊ ဓမ္မာသောက၊ ရာဇဟော်ခံꩻ၊ ဟဲ့ꩻဟောင်ပိုလီꩻ၊ ဆေ့ꩻအာလိုꩻဝေင်ꩻ၊ မိန်းတောႏရိုꩻဖေႏ၊ စာႏရေꩻစာႏဖတ်၊ မူꩻမတ်ကစ၊ ဆင်တပ်စုလိုꩻ၊ ပိုပါစဲ့ꩻမ၊ နꩻဗင်တနတ်၊ အွꩻအံႏရိက္ခာႏ၊ တသာႏငခဲဉ်ႏ၊ ဒဲဉ်ဖွိုင်ꩻဟူဗုံꩻ၊ မောင်းဒေါင်ဖွိုင်ꩻဝန်ႏ၊ စုံႏလင်ႏရဲဉ်ꩻလွေꩻ၊ ခွန်တန်ဟော်ခံꩻ၊ ဓမ္မာသောက၊ ရင်းခြွိုင်းတံဆာ၊ ကာသာကာမံ၊ မဲ့ခံꩻထီထူး၊ သင်ဖြူးလမ်းါ၊ ဆင်ဗွာသေကွဉ်၊ အဆွဉ်ဗွာစီႏ၊ ထီꩻထာထီꩻခံꩻ၊ နံႏသာႏနမ်းမန်ꩻ၊ ပြဲ့ꩻစုံႏထွူမꩻ၊ ဗွေႏစဝ်းဟော်ခံꩻ၊ ပင်ꩻလွေꩻပါတွ၎်ႏ၊ ဗွေႏစဝ်းရဟန္တာႏ၊ သင်္ဃာႏတရေင်၊ ယံကာယံကျွꩻ၊ မောဂ္ဂလိကတွမ်ႏ၊ တိဿမထေရ်ႏ၊ ဝွေꩻဗွေႏတပဲ့ꩻ၊ ခါလဲ့ရဲဉ်ꩻတွမ်ႏ၊ သင်္ကန်ꩻသပိတ်၊ ပရိက္ခရာႏ၊ ရဟန္တာႏဗွေႏ၊ ထိုမ်းတွမ်ႏသင်္ဘောꩻ၊ ဓမ္မာသောက၊ ဖြွမ်းဝင်ꩻညီႏညာႏ၊ ဆရာႏတကာႏ၊ ခီႏကာကျွꩻလွေꩻ၊ ရွှေထုံခမ်းတန်၊ မွူးထန်ႏအရပ်၊ ကျွꩻလွေꩻသာႏသာႏ၊ ယာလဲ့မခိုး၊ ထာꩻရွိုးထာꩻလွား၊ ခါလဲ့မအဝ်ႏ၊ တဖူꩻနဝ်ꩻလဲ့၊ ပီနုဲးသဲ့ꩻကြောင်း၊ ထောင်လွေꩻသာႏသာႏ၊ ထာꩻခိုးထာꩻလျား၊ ခါလဲ့ငထဝ်း၊ တဖူꩻထျꩻသောင်၊ သေင်ႏပင်သေင်ႏမွူး၊ ကဝ်ႏမွꩻရာႏဖျောင်၊ သေင်ႏမွူးလောင်းကီ၊ တသီးတနျာႏ၊ နာလဲဉ်းပွိုင်းလဲင်ႏ၊ ခြောင်သဲင်ခြောင်ဆုံး၊ လုံးတွမ်ႏထာꩻဆူႏ၊ နဝ်ꩻလဲ့ငထဝ်း၊ တဖူꩻဟဝ်သာႏယာႏ၊ သတ္တဝါႏအမျိုꩻ၊ ရိုꩻလဲ့ငဲယေန်ႏ၊ ဘေꩻရန်ႏငထဝ်း၊ ယူးငဝ်းဝါးငွါ၊ ခါလဲ့ဖြေင်ꩻဦႏ၊ သူႏလွိုးယေန်ညော်၊ နဝ်ꩻခါဟော်ခံꩻ၊ ထင်ႏဟွုန်ထင်ႏထီႏ၊ နိမိတ်ပျꩻနယ်၊ ကောင်းတယ်ထူးဆန်း၊ ယူးတွမ်ႏဝါးငဝ်း၊ ဖြေင်ꩻလဝ်းလွဝင်ꩻ၊ ညာꩻရင်ꩻညာꩻရေင်၊ သေင်ႏမွူးလောင်းကီ၊ စွုမ်ႏစီႏကူစွိုး၊ တလွိုးပေႏသꩻ၊ ဓမ္မာသောက၊ ခွန်တန်ထင်ႏဟွုန်၊ အွုန်စွဉ်ႏထာꩻငွိုး၊ ပွိုးကညာꩻရေင်၊ ဖြေင်ꩻရောင်ငဝ်းသင်ႏ၊ ထင်ႏထီႏထင်ႏသေ၊ နေးတွမ်ႏစူနုံ၊ လုံးစုံတဆီ၊ ကတူႏကီအွဉ်ႏဒင်ႏ၊ ဝုဲႏထင်ႏလျောက်လဝ်း၊ ဗွေႏစဝ်းရဟန္တာႏ၊ သျင်ႏမဟာမောဂ္ဂလိ၊ တိဿမထေရ်ႏ၊ ထွာမုဲꩻကောင်းဗွေႏ၊ ခွေသွဉ်းတကာႏ၊ ဟွုန်ဗာႏထူꩻဆန်ꩻ၊ ယူးတွမ်ႏဝါးငဝ်း၊ ဖြေင်ꩻလဝ်းကူဟွိုး၊ ဟဲ့ꩻမွိုးဟဲ့ꩻဖါ၊ သင်းဟန်ႏခါလဲ့၊ ပီနုဲးလိုꩻငဝ်း၊ တဟွုန်ဖိုတဝ်းဗွေႏ၊ ခွေသွဉ်းတကာႏ၊ နဝ်ꩻခါကာလ၊ နဝ်ꩻမꩻရဟန္တာႏ၊ တကာႏတန်ဟွေး၊ မီႏနေးလွဉ်ꩻနုဲး၊ ထုဲႏပီနိမိတ်၊ အတိတ်နဝ်ꩻကောင်း၊ ကျောင်ꩻတကာႏတန်ဟွေး၊ မွိုးနန်းစခါ၊ မာနတ်ခွန်သုံ၊ ကပုံကန်ဒါႏ၊ ဘုရာꩻပဉ္စဝ်း၊ ကရိုꩻနဝ်ꩻရာꩻ၊ ဒါနကေꩻဇူꩻ၊ တင်ႏလူႏအဗွန်၊ သိုမ်ဆီနီဖြာꩻ၊ ဘုရာꩻကအောင်ႏ၊ နဝ်ꩻကောင်းပွိုးစွဉ်ႏ၊ ဒါနအဟုံႏ၊ တကာဘုံꩻတောႏ၊ မွန်းပျောႏကူစွိုး၊ သွိုꩻသွင်ႏစွုမ်ႏဖြာꩻ၊ သေင်ႏဝါႏယူးဝါး၊ သက်သာႏအာႏရꩻ၊ သꩻရေꩻဟွုန်ဟဝ်၊ ကွိုတဝ်းတကာႏ၊ ရာဇဟော်ခံꩻ၊ ဓမ္မာသောက၊ တိဿမထေရ်ႏ၊ မဟာမောဂ္ဂလိ၊ မိန်းဖေႏနဝ်ꩻမꩻ၊ အာႏရꩻဟွုန်ဟဝ်၊ အဝ်ႏရဝ်းထွိုင်ႏစူꩻ၊ သွုန်ႏဖူꩻသꩻကို၊ ဟွုန်သွိုꩻဟွုန်သွင်ႏ၊ မင်ꩻကြီꩻအဗွန်၊ ဟံႏတန်ကသာႏ၊ ခါလဲ့တရွတ်ꩻ၊ လွေꩻကျပ်ဗာႏတဝ်း၊ စဝ်းခွန်ဟော်ခံꩻ၊ ဓမ္မာသောက၊ သင်္ဃမေတ္တာႏ၊ မာဝါꩻဝင်ꩻနီ၊ ပိုလီꩻချွေႏရံႏ၊ စတွမ်ႏရဟန္တာႏ၊ သျင်ႏမဟာမောဂ္ဂလီ၊ တိဿမထေရ်ႏ၊ အုံချꩻစခန်ꩻ၊ ဘုရာꩻတန်ဆတွို့ꩻနဝ်၊ တောင်ꩻစွဉ်ႏကောင်လောင်း၊ ရောင်းသွုန်ႏရောင်းသꩻ၊ ခွစုံညိမ်ꩻချမ်ꩻ၊ တလီꩻထင်ႏမာꩻ၊ သာႏယာႏရျူႏဟဝ်၊ ဖျော်တွိုႏသွုန်ႏသꩻ၊ အွꩻထီအုံပဆား၊ ထင်ႏလွားထင်ႏဖြေႏ၊ နေးတွမ်ႏစူနုံ၊ အုံလင်ꩻခေါက်ဝုဲႏ၊ နီဗွေႏဘုရာꩻ၊ ဌာပနာႏဓာတ်တောႏ၊ ဓမ္မာသောက၊ ရွစ်ဖြဖျော်လွဉ်၊ ရောင်ႏတောႏသူပါꩻ၊ တနျာႏတသီး၊ ကျောင်ႏငကီနယ်ထင်ႏ၊ ကင်ဟဝ်မို့ꩻလောင်း၊ ဟော်ခံꩻတကာႏ၊ ယံသေယံထီႏ၊ နီဗွေႏဘုရာꩻ၊ ပျꩻနယ်ဗျာဒိပ်၊ ကျောင်ႏငကီထင်ႏ၊ ကင်ဟဝ်မို့ꩻလောင်း၊ ရောင်ႏတောႏသူပါꩻ၊ တနျာႏတသီး၊ ပီနုဲးမွူးလာ၊ ပါဋိဟာနယ်၊ သူသွယ်သူစွိုး၊ လူꩻလိုꩻဗြဟ္မာႏ၊ စက္ကျာႏဝဠာႏအနန္တ၊ ရွစ်ဖြဖျော်လွဉ်၊ လူႏတန်ꩻပူႏဇောႏ၊ ဓမ္မာသောက၊ ခွန်တန်လဲ့ဝုဲႏ၊ ကိုꩻကွယ်ႏလူႏတန်ꩻ၊ နေးတွမ်ႏစူနုံ၊ လုံးစုံတဆီ၊ မတ်ပီဗိုကဝ်ႏ၊ အုံအဝ်ႏဝုဲႏထင်ႏ၊ အွဉ်ႏဒင်ႏကတူႏ၊ နဝ်ꩻမꩻထူႏတွမ်ႏ၊ ကဝ်ႏဟွမ်ဗွူဖေါင်း၊ ကဝ်ႏတောင်ꩻကဝ်ႏရွဉ်၊ ကဝ်ႏခံꩻကဝ်ႏထာ၊ ဘုရာꩻပတ်လယ်ႏ၊ သယ်ႏလာႏမူꩻမတ်၊ စာႏဖတ်စာႏရေꩻ၊ စူထွေသိုမ်ပြန်ႏ၊ ဘုရာꩻတန်အသောင်၊ ခေါက်ဝုဲႏလေပ်ခူ၊ လူႏတန်ꩻနံႏသာႏ၊ နမ်းမန်ꩻဆီမီး၊ ထီဖွိုင်ꩻမော်နမ်း၊ ထာခံထာစင်ႏ၊ သင်ꩻပွတ်သင်ꩻကယ်ꩻ၊ ပလယ်ꩻကောမုတ်၊ ဥဿဖယား၊ သဒ္ဓါႏပူႏဇောႏ၊ ဓမ္မာသောက၊ စတွမ်ႏမူꩻမတ်၊ စာႏဖတ်စာႏရေꩻ၊ ပေႏတန်ဖြားဆား၊ နွုတ်ꩻနီꩻနွုတ်ꩻနာꩻ၊ ပျသာဒ်ထာခံꩻ၊ တန်ဆောင်စရွပ်၊ ယံဖေႏယာခိုး၊ တွမ်ႏတွိုႏလꩻမွုန်း၊ စေႏတီႏဆကီ၊ နွုတ်ꩻနီꩻထင်ꩻလꩻ၊ နဝ်ꩻမꩻဟော်ခံꩻ၊ ဓမ္မာသောက၊ စတွမ်ႏမူꩻမတ်၊ စာႏဖတ်စာႏရေꩻ၊ ဗွေႏစဝ်းရဟန္တာႏ၊ ညီႏညာႏတွိုင်ႏပင်ႏ၊ သျင်ႏမဟာမောဂ္ဂလိ၊ ထွားလယ်ႏအရပ်၊ လျောက်ပတ်သာႏယာႏ၊ သေႏချာႏဟဝ်ကတ်၊ အရပ်ဆကွဉ်ႏနဝ်၊ တွာဟဝ်သာႏယာႏ၊ အီႏအဝ်ႏငကွို၊ အရပ်ဆဆူꩻ၊ လူꩻဝုဲႏလိုꩻခေါက်၊ မြေပေါက်ဘုရာꩻ၊ ကလျာအီဓာတ်တောႏ၊ တကော်ႏပါတဝ်း၊ ခြဝ်ႏခံꩻခြဝ်ႏထာ၊ ဘုရာꩻတန်ဆကွဉ်ႏနဝ်၊ မီႏထွာနပ်တာ၊ တွမ်ႏဘုရာꩻတန်၊ ဆေ့ꩻအာအတာ၊ နီဆီငါနော၊ ဓမ္မာသောက၊ ဖြွမ်းလွညီႏညာႏ၊ တွမ်ႏရဟန္တာႏဗွေႏ၊ ဝွေꩻသီးနီပါꩻ၊ သင်္ဃာႏတရေင်၊ တယ်ႏငသေꩻစေႏတီႏ၊ တင်ႏထီꩻဟွဲဟိန်ႏ၊ သဲင်လဝ်မန်ႏကင်ꩻ၊ ဘိသိက်မင်္ဂလာႏ၊ နွုတ်ꩻနာꩻနွုတ်ꩻနီꩻ၊ ဖြီꩻစီꩻထွူမꩻ၊ အရှင်မောဂ္ဂလိ၊ တိဿမထေရ်ႏ၊ ငဝ်းငွါရိုꩻဖေႏ၊ အမေနာမ၊ ဓမ္မာသောက၊ စေႏတီႏကွိုတဝ်း၊ ရန်ႏအောင်ႏဘုရာꩻ၊ ခါလဲ့ရိုꩻနော၊ ဟဲ့ꩻဟောင်လစ်ꩻစွိုး၊ မောဂ္ဂလိစေႏတီႏ၊ ခါလဲ့ရိုꩻရိုꩻ၊ ဥတ္တရာစေႏတီႏ၊ ခါလဲ့ဟဲ့ꩻဟောင်၊ ပွိုးစွဉ်ႏဝွေꩻသီး၊ ပျုစုညီꩻဝင်ꩻ၊ တင်ႏတယ်လျောက်ပတ်၊ ဖုဲႏထွားဖုဲႏထီႏ၊ ဖြီꩻစီꩻထွူမꩻ၊ ဓမ္မာသောက၊ ရာဇဟော်ခံꩻ၊ တွမ်ႏရဟန္တာႏ၊ မဟာတိဿ၊ မောဂ္ဂလိမထေရ်ႏ၊ ဦးချငသေꩻ၊ စေႏတီႏဘုရာꩻ၊ စာႏရေꩻစာႏဖတ်၊ မူꩻမတ်ကစ၊ သက်သက်သာႏသာႏ၊ ခွယ်ငါခွုန်ꩻသဲင်ꩻကွိုနဲ၊ ကျောင်ꩻတကာႏသီးယာ၊ နဝ်ꩻခါကာလ၊ သာသနာႏသမ်းလꩻ၊ လစ်ꩻရျာꩻလစ်ꩻဆီ၊ သီဟဠခမ်း၊ ခွန်တန်ဟော်ခံꩻ၊ အမေနာမ၊ ဒုဋ္ဌဂါမဏိ၊ တွမ်ႏမဟိန္ဒမထေရ်ႏ၊ ဗွေႏစဝ်းရဟန္တာႏ၊ ငတ်ꩻရျာꩻဗွေဗွေ၊ တွမ်ႏချွေႏတွမ်ႏရံႏ၊ မူꩻမတ်ကစ၊ လွဉ်ဝုဲႏလွဉ်ခေါက်၊ ခါလဲ့တခြင်ႏ၊ သာႏသနာႏထင်ႏလꩻ၊ ငတ်ꩻရျာꩻငတ်ꩻဆီ၊ လွိုတကီငတ်ꩻနီꩻ၊ သိင်္ဃနဂိုႏခမ်း၊ အမေနာမ၊ မဟာနမင်ꩻကြီꩻ၊ တွမ်ႏပိုတွမ်ႏမာ၊ သယ်ႏလာႏသွဉ်းထွေ၊ ချွေႏရံႏပိုလီꩻ၊ ညီႏညာႏဖြွမ်းလွ၊ နꩻဗင်တနတ်၊ တင်တပ်စုလိုꩻ၊ ပိုႏပါꩻမွုန်ႏသဲဉ်၊ ဟံႏတန်လဲင်ꩻယန်ꩻ၊ ထိုမ်းတွမ်ႏသင်္ဘောꩻ၊ ကာႏလွေꩻဩဃ၊ ယွယွသာႏသာႏ၊ ကဝ်ႏထာကဝ်ႏခံꩻ၊ ကဝ်ႏရွဉ်ကဝ်ႏတောင်ꩻ၊ ဗွူဖေါင်းကျက်သာႏ၊ ရတနာႏရွဉ်ထာ၊ လွဉ်ဝုဲႏလွဉ်ခေါက်၊ ကိုꩻကွယ်ႏလူႏတန်ꩻ၊ နမ်းမန်ႏဆီမီး၊ ထီꩻတွမ်ႏတံꩻခွဉ်ႏ၊ ကဝ်ႏသွမ်ႏကဝ်ႏဗွာ၊ တနျာႏတသီး၊ ထီဖွိုင်ꩻမော်နမ်း၊ ထီꩻခံꩻထီꩻထာ၊ ထီꩻဗွာထီꩻသွမ်ႏ၊ ခံႏပွယ်ꩻမင်္ဂလာႏ၊ နွုတ်ꩻနာꩻနွုတ်ꩻနီꩻ၊ ဖြီꩻစီꩻထွူမꩻ၊ ဟဲ့ꩻစပိုလီꩻ၊ ညီႏညာႏတွိုင်ႏပင်ႏ၊ တယ်ႏမံႏစေႏတီႏ၊ ဘုရာꩻဆထင်ꩻ၊ လစ်ꩻဆီလစ်ꩻသောင်ꩻ၊ ကောင်ႏမူꩻဖွိုႏထို၊ လိုꩻမော်လိုꩻဒါႏ၊ ကဲꩻသာႏတယ်ႏမံႏ၊ ခွုမ်အင်ꩻသူႏသီ၊ မြေနီရန်လဲင်၊ စီႏသဲင်တိတ်ꩻခ့ꩻ၊ နဝ်ꩻမꩻတင်ႏထီꩻ၊ ဆီမီးတံꩻခွဉ်ႏ၊ ကဝ်ႏသွမ်ႏကဝ်ႏဗွာ၊ တနျာႏတသီး၊ ထီဖွိုင်ꩻမော်နမ်း၊ သွမ်ꩻပန်ꩻဩဇာႏ၊ ခံႏပွယ်ꩻလူႏတန်ꩻ၊ ကန်းတော့ꩻပူႏဇောႏ၊ နုမောဒနာႏ၊ သဒ္ဓါႏလူႏတန်ꩻ၊ သင်ꩻပွတ်သင်ꩻကယ်ႏ၊ တွယ်ႏထုံဒုံႏမောင်း၊ သာႏယောင်းသာႏယာႏ၊ နွုတ်ꩻနာꩻနွုတ်ꩻနီꩻ၊ ဖြီꩻစီꩻထွူမꩻ၊ ဖန်ဖေႏအမဉ်ꩻ၊ ဓမ္မစေႏတီကွိုတဝ်း၊ ထဝ်းကဲသီးယာ၊ သာႏသနာႏသမ်းလꩻ၊ ငတ်ꩻရျာꩻငတ်ꩻဆီ၊ လွိုတကီငတ်ꩻနေင်ႏ၊ ရခဲင်ႏခမ်းတန်၊ လစ်ꩻဒုံလစ်ꩻဝေင်ꩻ၊ စေꩻစိန်ႏချမ်ꩻသာႏ၊ မဟာႏမင်ꩻကြီꩻ၊ ထီꩻဗွာအဗွေႏ၊ ဧကရာဇ်ဟော်ခံꩻ၊ အမေနာမ၊ စေတိယမင်ꩻ၊ နာꩻနမ်းလိုꩻတန်၊ ပွိုင်ႏခမ်းပွိုင်ႏထီ၊ တရာꩻဆီဆူႏ၊ နေးထူႏကံကျင်ꩻ၊ ဝင်ꩻရင်ꩻနီပွန်း၊ ခါလဲ့ညီႏမျ၊ သွုန်ႏသꩻလဲ့ဟဝ်၊ အုံအဝ်ႏလိုꩻခမ်း၊ မွိုးနန်းစခါ၊ ရခဲင်ႏဟော်ခံꩻ၊ ရဟန်ꩻသျင်ႏလူ၊ မူႏခိုဖြားဆား၊ ခါလဲ့ချမ်ꩻသာႏ၊ ဩဇာႏဒဲဉ်ဟန်ႏ၊ ခါလဲ့ပြန်ꩻပြော်ꩻ၊ သူႏတောႏသူႏကောင်၊ အလောင်ꩻအလျာႏ၊ ရာဇာဟော်ခံꩻ၊ ပိုလီꩻသယ်ႏလာႏ၊ ခါလဲ့ကျွဲႏဝ၊ လꩻထာလꩻရွဉ်၊ ကောထွာထံꩻသား၊ သယ်ႏလာႏပိုလီꩻ၊ ခါလဲ့လွိုင်ႏအာ၊ စီꩻပွာꩻချမ်ꩻသာႏ၊ ကွုန်ꩻအာပြန်ꩻပြော်ꩻ၊ ဟော်ခံꩻဟော်ထာ၊ တရာꩻကျမ်ꩻဂန်ႏ၊ ဂဏန်ꩻပေႏတင်ႏ၊ ခါလဲ့ဒါႏမော်၊ လောဘလဲ့ဆေ့ꩻ၊ မွူးခေ့ꩻမွူးလေ၊ အရေꩻအရာႏ၊ နမ်းတာႏဝင်ꩻရင်ꩻ၊ သင်္သရာႏပစ္စုပ္ပန်ႏ၊ မွိုးနန်းစခါ၊ ရာဇဟော်ခံꩻ၊ စေတီယမင်ꩻ၊ ရခဲင်ႏခမ်းတန်၊ လစ်ꩻဝေင်ꩻဗွေဗွေ၊ ခီႏလွေꩻကျွꩻကာ၊ သဒ္ဓါလူႏတန်ꩻ၊ ဘုရာꩻရွှေထုံ၊ သုဝဏ္ဏဘုမ္မိ၊ စေတီႏဘုရာꩻ၊ လွမ်ꩻလာꩻပျုစု၊ သာဓုနုမော၊ ကန်းတော့ꩻကိုꩻကွယ်ႏ၊ ပွယ်ꩻမင်္ဂလာႏ၊ နွုတ်ꩻနာꩻနွုတ်ꩻနီꩻ၊ ဦပီႏဦနယ်ꩻ၊ တွယ်ႏထုံဒုံႏမောင်း၊ ထာꩻပူႏလောင်းကီ၊ လေပ်ခူꩻကောင်ႏမူꩻ၊ ပျုစုလွမ်ꩻလာꩻ၊ ဘုရာꩻရွှေထုံ၊ ဘုံꩻတောႏသူပါꩻ၊ ရောင်ႏတောႏသူသွယ်၊ ပျꩻနယ်တင်ႏလင်း၊ ရဟန်ꩻသျင်ႏလူ၊ မူႏခိုဖြားဆား၊ ထင်ႏထီႏထင်ႏသေ၊ သꩻရေꩻဟွုန်ဟဝ်၊ ငဝ်းငွါသာႏဓု၊ ကောင်ႏမူႏစေႏတီႏ၊ တဆီနီလာ၊ မီႏရိုꩻထာꩻလူႏ၊ တထဲ့တဝ်းနော၊ သူႏတောႏတကာႏ၊ ဖြားဆားသီးယာ၊ ဟဝ်ကုဲယုတ်လတ်၊ ပရိသတ်မူႏခို၊ လိုꩻခမ်းလိုꩻထီ၊ စင်နီစင်ပါꩻ၊ ပငါပရင်ꩻ၊ ခွန်ကွဉ်ကစ၊ ကိုငကိုစီ၊ ညီညာဖြွမ်းလွ၊ ပျုပျင်ႏလွမ်ꩻလာꩻ၊ သဒ္ဓါႏလူႏတန်ꩻ၊ တံꩻခွဉ်ႏတွမ်ႏထီꩻ၊ ဆီမီးတန်ဆောင်၊ ဗွူဖေါင်းကျက်သာႏ၊ ကဝ်ႏထာကဝ်ႏရွဉ်၊ အသွမ်ႏအဗွာ၊ တနျာႏတသီး၊ ထီကဝ်ႏသွမ်ꩻပန်ꩻ၊ လူႏတန်ꩻခံႏပွယ်ꩻ၊ တွယ်ႏထုံဒုံႏမောင်း၊ ထာꩻပူႏလောင်းကီ၊ ပီနုဲးတနံ၊ လူꩻခမ်းကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။

ငါယိုလဲ့ခါ၊ အဝ်ႏကုဲခြာက၊ သာႏသနာႏသမ်းလꩻ၊ နွုတ်ꩻရျာꩻနွုတ်ꩻဆီ၊ လွိုတကီသူနေင်ႏ၊ သီရိခေတ္တရာ၊ ရာဇာဟော်ခံꩻ၊ သမ်းလွဉ်ခေါက်ဝုဲႏ၊ ဟဲ့ꩻတွမ်ႏအမာ၊ အမေနာမ၊ ကလျာဏီမိဖြာꩻ၊ ခွန်တန်နဝ်ꩻရာꩻ၊ အမေနာမ၊ ယမ္မထွတ်ပေါင်ႏ၊ ဟဲ့ꩻဟောင်ပိုလီꩻ၊ ပြည်သူပြည်သား၊ ညီႏညာႏတွိုင်ႏပင်ႏ၊ စဝင်ꩻလွေꩻဝုဲႏ၊ ဂေါတမဘုရာꩻ၊ သုဝဏ္ဏဘုမ္မိ၊ နီဗွေႏဘုရာꩻ၊ စဝ်းသိကျာꩻခွန်ဖီ၊ ဝွေꩻသီးဌာပနာႏ၊ တငါစွယ်ႏတောႏ၊ ဂေါတမဘုရာꩻ၊ နမ်းအဝ်ႏကာလ၊ ဌာနရပ်နဝ်ꩻ၊ နီလွေꩻဝုဲႏလွ၊ နဝ်ꩻမꩻခီႏလွေꩻ၊ ဖေꩻဖေꩻသာႏသာႏ၊ ဌာနဆထင်ꩻ၊ အုံလင်ꩻပဆား၊ ထာꩻပူႏအလောင်း၊ ရောင်ႏတောႏသူသွယ်၊ အွဉ်ႏနယ်ဗျာဒိပ်၊ နဝ်ꩻမꩻခွန်တန်၊ ထင်ႏသေထင်ႏထီႏ၊ ပီနုဲးတရꩻ၊ အဝ်ႏထျယာခိုး၊ အဝ်ႏလိုယာဗာႏ၊ သဒ္ဓါႏစွုမ်းကတ်၊ နစ်သက်အာႏရꩻ၊ နဝ်ꩻမꩻလွေꩻဝုဲႏ၊ ကိုႏကွယ်ႏလူႏတန်ꩻ၊ သွဉ်ꩻငသေꩻတွမ်ႏ၊ ခေါင်ꩻလောင်ꩻဟိန်ႏတန်၊ အငွါအဲဉ်ႏလုဲး၊ နဝ်ꩻရာꩻရိုꩻကောင်း၊ ငတ်ꩻသောင်ꩻတမွိုက်၊ လွိုဒွိုန်းစူလစ်ꩻ၊ ကီလဖွိုႏထို၊ လစ်ꩻသောင်ꩻနီမွိုက်၊ ပုဲကစူလစ်ꩻ၊ အွဉ်ႏသေꩻအွဉ်ႏဟါဲ၊ စွယ်ႏတောႏဘုရာꩻ၊ မျက်နာႏဆကွဉ်ႏထင်ꩻ၊ ယံဖေႏမူႏခို၊ လူꩻလိုꩻယံဒုံႏ၊ ခေါင်ꩻလောင်ꩻကွိုနဲ၊ တင်ꩻလုဲသီးယာ၊ နဝ်ꩻမꩻခွန်တန်၊ ကွဲခွုန်ꩻသဲင်ꩻယား၊ ဌာနခင်ႏလမ်း၊ ခမ်းထီဆချာ၊ သရိခေတ္တရာ၊ ရာဇာဟော်ခံꩻ၊ ယမ္မထွတ်တပေါင်ႏ၊ ဝေင်ꩻလီဆချာကွိုနဲ၊ ထဝ်းကဲသီးယာ၊ သရိခေတ္တရာ၊ ရာဇာဟော်ခံꩻ၊ ယမ္မထွတ်တပေါင်ႏ၊ ခွဉ်ခေါက်လွဉ်ဝုဲႏ၊ ကိုꩻကွယ်ႏအခန်ꩻ၊ ထေထန်ႏဖေႏထွူ၊ နင်းဟွူသေနာႏ၊ ကျောင်ꩻတကာႏသီးယာ၊ ယံဖေႏသွင်ꩻသꩻ၊ ယံလꩻသံဝွေ၊ ဗွေႏစဝ်းဘုရာꩻ၊ နမ်းကိုႏတဲင်ႏတောႏ၊ ဌာပနာႏငသေꩻ၊ ယံဖေႏလိုꩻလူꩻ၊ မူႏခိုကိုꩻကွယ်ႏ၊ ခေါက်ဝုဲႏလူႏတန်ꩻ၊ နီသီငခါ၊ ယံဖေႏထွာနုဲး၊ ထုဲႏပီစခါ၊ ဘုရာꩻရွှေထုံ၊ သုဝဏ္ဏဘုမ္မိ၊ သူရိစန္တာႏ၊ ရာဇာဟော်ခံꩻ၊ ဌာပနာႏငသေꩻ၊ စေႏတီႏဘုရာꩻ၊ သာႏသနာႏသမ်းလꩻ၊ ကွတ်ꩻရျာꩻကွတ်ꩻဆီ၊ လွိုတကီသိုမ်နေင်ႏ၊ အခိန်ႏထင်ႏလꩻ၊ သုဝဏ္ဏဟော်ခံꩻ၊ စံႏစာꩻပွိုင်ႏဝေင်ꩻ၊ ရွှေအိမ်ဟော်ထာ၊ အနာတင်ႏထီꩻ၊ စီႏသဲင်ဟွဲဟိန်ႏ၊ ကေင်းဆေင်ႏရံႏခူ၊ ဟော်ဖူꩻဟော်ကီ၊ ပိုလီꩻသယ်ႏလာႏ၊ ရတနာႏသေဆင်၊ လုတ်လင်သွဉ်းထွေ၊ ခစာꩻခင်ႏထျꩻ၊ ရာဇဟော်ခံꩻ၊ စေꩻစိန်ႏချမ်ꩻသာႏ၊ သယ်ႏလာႏပိုလီꩻ၊ စီꩻပွာꩻကွုန်ꩻအာ၊ ကောထွာသွဉ်းထွေ၊ လွေသဲင်ꩻလုပ်ꩻဆောင်၊ အောင်ႏမျင်ႏကူစွိုး၊ ယံဖေႏလွစ်ကင်ꩻ၊ သောင်ခြင်နောင်နယ်ꩻ၊ ဆင်ꩻရဲꩻငထဝ်း၊ ကောထွာစဝ်းခွန်၊ ခွုန်ꩻဝန်ꩻနီꩻနာꩻ၊ ဆီပါꩻကိုႏကျင်ꩻ၊ အဝ်ႏဒင်ႏနမ်းကီ၊ ခေ့ꩻလေစောင်ꩻစယ်ꩻ၊ မြယ်ꩻတသေႏနမ်းလောင်း၊ ကောထွာကျောင်ꩻကာႏ၊ ဘုရာꩻတကာႏခါလဲ့၊ ဟွုန်ဟဝ်နစ်သက်၊ ဖူးလတ်တခွန်ꩻ၊ စိုန်အံႏဖျက်ယား၊ ခါလဲ့ငထဝ်း၊ စဝ်းခွန်ဟော်ခံꩻ၊ ဘုံꩻဗွန်လဲ့ထို၊ တံꩻခိုꩻလဲ့တန်၊ လမ်းခိုႏလဲ့ကွုန်ꩻ၊ ဒုံဆောင်ႏလဲ့ဗွေ၊ မီႏထွာရေႏတွက်၊ နပ်တွမ်ႏစာႏရင်ꩻ၊ အရပ်မွေထုံ၊ ဒုံဝေင်ꩻလမ်းပါႏ၊ စာႏရင်ꩻအိမ်ႏခေႏ၊ သိုမ်ကုဋေႏပုဲသူလန်း၊ လမ်းတန်လမ်းပေႏ၊ မီႏထွာရေႏတွက်၊ လꩻစွဉ်ႏခွုင်းနဝ်ꩻ၊ စဝ်းခွန်ဟော်ခံꩻ၊ တံꩻခိုꩻအဗွန်၊ လိုꩻအာကွုန်ꩻကတ်၊ ရပ်ရာႏလဲ့ထွန်ꩻ၊ လိုꩻကွုန်ꩻလိုꩻဗွေ၊ ခြွေခြာႏကျွဲႏဝ၊ နဝ်ꩻမꩻဟော်ခံꩻ၊ တွိုက်တန်အဖူꩻ၊ ထင်ႏဗွောင်ထင်ႏထွား၊ နဝ်ꩻမꩻကွဲထီႏ၊ နီဖါနီမွိုး၊ ထွာလိုꩻတောႏလမ်း၊ စတွမ်ႏဖူဖီ၊ ဝွေꩻသီးထွာမုဲꩻ၊ အွဉ်ႏကုဲငစွဉ်ႏ၊ ရွဉ်ထာနုဲးယို၊ ပိုလီꩻအရင်ꩻ၊ မသညင်ꩻငစွဉ်ႏ၊ ခွေတာႏခွေပွန်း၊ နန်းထောက်ငသေꩻ၊ ဖေႏခွေအတာႏ၊ ဥစ္စာႏရွဉ်ထာ၊ ပန်ကီꩻငစွဉ်ႏ၊ ရွဉ်ခံꩻနုဲးယို၊ မီႏထွူဘုရာꩻ၊ စထစ်စခါ၊ ကနာဝွေꩻသီး၊ တထီႏတဝ်းလာꩻလာꩻ၊ တထွားအျာတဝ်း၊ ပါငထဝ်းပျုပျင်ႏ၊ သုတ်သင်ႏလွမ်လာꩻ၊ မစေꩻနေꩻငစွဉ်ႏ၊ ထန်းနဝ်ꩻဝွေꩻသီး၊ မာꩻအီထာꩻမုဲꩻ၊ အွꩻအံႏကွဉ်ကꩻ၊ ခါလဲ့မလို့၊ အွဉ်ႏစုအွဉ်ႏဗူႏ၊ ဥစ္စာႏရွဉ်ယို၊ အွဉ်ႏကုဲလိုꩻခမ်း၊ ဟော်တန်လောင်းကီ၊ အဝ်ႏလီဗွေဗုဲ၊ မာꩻအီထာꩻမုဲꩻ၊ ထာꩻနုဲးရွဉ်ယို၊ အဝ်ႏတအိုႏသာႏသစ်၊ ဗွေတွိုက်ဗွေတာႏ၊ အဝ်ႏတေင်အဝ်ႏဒင်ႏ၊ စွိုးဆင်အွတ်ꩻတူႏ၊ အဝ်ႏဗူႏအဝ်ႏဗွေ၊ အီႏလွေꩻလူꩻခမ်း၊ ခါလဲ့မဒါႏ၊ ခြာလဲ့မလꩻ၊ နဝ်ꩻမꩻဟော်ခံꩻ၊ ခွန်တန်သုဝဏ္ဏ၊ ဟဲ့ꩻစမူꩻမတ်၊ စာႏဖတ်စာႏရေꩻ၊ စေဝွေႏဟော်ကီ၊ အမတ်သီးယာ၊ ကျိုꩻစာꩻထေထန်ႏ၊ တွိုက်တန်အဖူꩻ၊ တသူးတသီး၊ ဗွာစီဗွာလွစ်ꩻ၊ စိုးဆင်မီဒီ၊ တသီးဝီးတသီးသွ၊ နဝ်ꩻမꩻဟော်ခံꩻ၊ ဟန်ႏလဲင်ႏခါယို၊ လိုꩻမော်လိုꩻဒါႏ၊ လက်သမာꩻအဝ်ႏမုဲꩻ၊ ထိုမ်ႏလယ်ႏဟဲ့ꩻဟောင်၊ ဖေါင်မွိုင်ꩻသီးယာ၊ ခါလဲ့ထိုမ်ႏဟဲ့ꩻ၊ လက်သမာꩻလဲ့လွဉ်၊ လꩻစွဉ်ႏတရျာꩻ၊ သာလွိုနီဆီ၊ လွိုတကီဝင်ꩻသွစ်ꩻ၊ လိုꩻတတ်လိုꩻဒါႏ၊ လက်သမာꩻပရံ၊ ခက်စင်းမာꩻသာꩻ၊ သေင်ႏဝါႏကစ၊ စုလွပေါင်ꩻဝင်ꩻ၊ နဝ်ထင်ꩻတွို့ꩻကွဉ်ႏ၊ လွဉ်ခြွဉ်းလွဉ်စု၊ စတုဒိသာ၊ ရာႏဆောႏပေါဖြား၊ လွဉ်လင်ꩻကိုစီႏ၊ စွုမ်ႏဖြီးစွုမ်ႏဖြာꩻ၊ ဗွူႏဝါႏဖꩻရေး၊ မုဲးသေးကစ၊ ဖြွမ်းလွညီႏညာႏ၊ ခတ်ꩻသာꩻတယ်ႏဖျင်၊ ခွုမ်အင်ꩻသူႏသီ၊ မြေနီရန်ႏလဲင်၊ စီႏသဲင်တေတ်ꩻခံꩻ၊ လူႏတန်ꩻရေစက္ချ၊ တွိုင်ႏကျာꩻသက်သေႏ၊ ဝသုန္ဓရေႏဟံႏ၊ နီသဲဉ်လစ်ꩻမွုန်ႏ၊ ဟွုန်ဟဝ်သာႏဓု၊ စတုလောကပါလာ၊ နတ်သာꩻဝင်ꩻလစ်ꩻ၊ နစ်သက်အာႏရꩻ၊ နဝ်ꩻမꩻဟော်ခ့ꩻ၊ သမ်းတန်ꩻသမ်းလူႏ၊ ယံဖေႏမူႏခို၊ လူႏလိုꩻကိုꩻကွယ်ႏ၊ ခေါက်ဝုဲႏလူႏတန်ꩻ၊ ရဟန်ꩻသင်္ဃာႏ၊ ဖြားဆားကထီႏ၊ ညီႏညာႏသာႏဓု၊ ကောင်ႏမူꩻဗိုခံꩻ၊ ဘုရာꩻအလောင်း၊ ခေါင်ꩻလောင်ꩻလဲ့သွဉ်ꩻ၊ လူႏတန်ꩻသဒ္ဓါႏ၊ ဘုရာꩻရွှေထုံ၊ လစ်ꩻဖြုံႏကွိုတဝ်း၊ နင်းကားခေါင်ꩻလောင်ꩻ၊ တဖြုံႏဖြုံႏနဝ်ꩻ၊ အငွါအဲဉ်ႏလုဲး၊ မီႏခြုဲးနဝ်ꩻကောင်း၊ ဟောင်ရိုꩻငတ်ꩻသောင်ꩻ၊ တထိုမ်ꩻလွိုသာ၊ ဒွေါင်ႏဆွာꩻကီလ၊ ငတ်ꩻသောင်ꩻနီမွိုက်၊ ယံဖေႏမူႏခို၊ လူႏလိုꩻထောင်းဒုံႏ၊ လစ်ꩻဖြုံႏလစ်ꩻထွောင်း၊ ဘုရာꩻရွှေထုံ၊ မျက်နာႏဆတွို့ꩻထင်ꩻ၊ မီꩻထွာနပ်တာ၊ စခါအစိုး၊ ဟောင်ရိုꩻပဉ္စ၊ လꩻရွုမ်ꩻငတ်ꩻတာ၊ ခံယာႏ ၂၅-ါး၊ ကွဲကားခေါင်ꩻလောင်ꩻ၊ တွက်ပေါင်ꩻဆေ့ꩻအာ၊ ဘုရာꩻတန်အသောင်၊ ဟောင်ရိုꩻငတ်ꩻဆီ ၅၀၊ လူႏတန်ꩻသဒ္ဓါႏ၊ ဘုရာꩻရွှေထုံ၊ လုံးဟဝ်သဲင်ဒါႏ၊ ရတနာႏရွဉ်ဟဝ်၊ ဆေ့ꩻအာရေႏတွက်၊ တနပ်နွောင်ꩻတဝ်း၊ မာꩻကဝ်ႏဗွူဖေါင်း၊ ဘုရာꩻကောင်ႏမူꩻ၊ ပျုစုလူႏတန်ꩻ၊ ဟော်ခံꩻရာဇာႏ၊ သုဝဏ္ဏမင်ꩻ၊ လက်ထက်ကာလ၊ ဒါနအလူႏ၊ ဆယ်ꩻဖူꩻနမ်းကျင်ꩻ၊ သတင်ꩻသီလ၊ ဘာႏဝနာႏကမ္မဋ္ဌာန်ꩻ၊ သေနန်းအုံအဝ်ႏ၊ နဝ်ꩻမꩻလူꩻပို၊ ရုက္ခစိုꩻဘုမ္မစိုꩻ၊ အာကာသစိုꩻ၊ ပွိုးခမ်းပွိုးထီ၊ ညီႏညာႏဟွုန်ဟဝ်၊ ငဝ်းငွါသာႏဓု၊ နုမောဒနာ၊ သာႏဓုငဝ်းငွါ၊ ဆင်ဗွာအဝ်ႏဆ၊ ဆဒ္ဒန်ထီတွိုင်ꩻ၊ ထွိုင်ႏသဲင်ꩻစူꩻလွဉ်၊ ဟော်ခံꩻထိုမ်းဗာႏ၊ ဝေလာကဟ၊ အဿသေကွဉ်၊ အဆွဉ်ႏဗွာစီ၊ ပီနုဲးဖုဲဆား၊ ငတ်ꩻဆီလစ်ꩻဗာႏ၊ အဿတိုရ၊ ခါလဲ့ဖြလွဉ်၊ သေကွဉ်သိန္ဓော်ꩻ၊ ဥပေါသထ၊ ဆင်ဗွာကစ၊ ဆင်ဗွာကွတ်ꩻထိုမ်း၊ လွဉ်ဖျောဝ်လွဉ်စူꩻ၊ လူꩻတနံဒေဝါႏ၊ ပသာလွဉ်ဖေႏ၊ ပဒေသာႏခွမ်ꩻလာꩻ၊ အယာႏချော်ꩻနဲး၊ ထုဲႏပီလောဆာႏ၊ ပွိုးစွဉ်ႏစောင်ꩻစယ်ꩻ၊ တရာꩻဆီပါꩻ၊ ရဟန္တာႏဗွေႏ၊ ဗုဒ္ဓဃောသာ၊ ဝွေꩻဗွေႏထွာအတန်၊ နီရေင်ဗွေဗွေ၊ လွမ်ꩻလာꩻသုတ်သင်ႏ၊ ဘုရာꩻရွှေထုံ၊ သတင်ꩻသုံꩻသော့ꩻ၊ ဟော်ခံꩻရာႏဇာႏ၊ သုဝဏ္ဏမင်ꩻ၊ လက်ထက်ကာလ၊ ဒါနဆီပါꩻ၊ တရာꩻဆီဆူႏ၊ လူꩻတနံကစ၊ ဗုဒ္ဓဃောသာ၊ ရဟန္တာႏဗွေႏ၊ ပျုစုတယ်ႏထောင်ႏ၊ ထာꩻပူႏလောင်းကီ၊ စေႏတီႏတွမ်ႏသိမ်ႏ၊ သမုတ်ငသေꩻ၊ သိမ်ႏတန်ဘုရာꩻ၊ ထာꩻပူႏနာလောင်း၊ ဝေင်ꩻတန်သောင်ထင်ꩻ၊ တလင်ꩻသာႏယာႏ၊ မဟာရံႏတံꩻတွိုင်ꩻ၊ ထီအုံႏရေကန်၊ တန်ဆောင်စရွပ်၊ လူႏကပ်သဒ္ဓါႏ၊ စခါအဝ်ႏနော၊ ဟောင်ရိုꩻရဟန္တာႏကျောင်ꩻ၊ သင်္ဃာႏပေါင်ꩻနီရေင်၊ ဝေင်ꩻတန်ဆထင်ꩻ၊ ဟော်ခံꩻလက်ထက်၊ ရက်ပဲင်ꩻနမ်းကဝ်ႏ၊ လုံးတန်ရတနာႏ၊ မဟာႏသိမ်ႏမျတ်၊ ဝေပုလတောင်၊ ရောင်ႏတင်ႏပတ္တမျာꩻ၊ ခါလဲ့သဲင်ꩻစူꩻ၊ မိဖြာꩻရတနာႏ၊ ခါလဲ့လွဉ်ဆက်၊ လက္ခဏာႏရင်ꩻအင်ꩻ၊ ယောင်ꩻဆင်ꩻတရေꩻ၊ မိဖြာꩻဒေဝီ၊ သီဟိုဠ်ႏအခမ်း၊ ဟော်ခံꩻလမ်းသား၊ ပါတွမ်ႏချွေႏရံႏ၊ ငတ်ꩻရျာꩻဗွေဗွေ၊ လွဉ်ဆက်လွဉ်သွင်ꩻ၊ ပလ္လင်ႏလောင်းကီ၊ တွမ်ႏမိဖြာꩻ၊ မာဝါꩻဝင်ꩻနီ၊ ခူးတွမ်ႏထီꩻဗွာ၊ ဟော်ထာလောင်းကီ၊ အုံအဝ်ႏညီꩻဝင်ꩻ၊ ပွိုင်ႏဝေင်ꩻနင်းဟော်၊ မွန်းပျောႏစံႏစာꩻ၊ ဟော်ထာဟော်ခံꩻ၊ မွိုးနန်းကာလ၊ သုဝဏ္ဏဟော်ခံꩻ၊ ခွန်တန်အစိုး၊ မီꩻရိုꩻလိုꩻခမ်း၊ ဇမ္ဗူႏကျွန်ꩻနဝ်၊ အီႏပျောႏစွိုးနုဲး၊ ထုႏပီရွှေထုံ၊ သုဝဏ္ဏဘုမ္မိ၊ နီပအိုဝ်ႏအခမ်း၊ အွိုးမုဲꩻလဲ့ခါ၊ ပီမားငထဝ်း၊ ဟဝ်(ဟဝ်)သာႏယာႏ၊ ဌာနရွှေထုံ၊ ခွန်ဟုံဟော်ခံꩻ၊ မွိုးနန်းအစိုး၊ မူႏခိုပေႏတန်၊ ပေါင်ရွုမ်ꩻအလူႏ၊ စင်မူႏစင်ခို၊ ကျိုꩻစာꩻလူႏတန်ꩻ၊ သာႏသနာႏလဲ့ထွန်ꩻ၊ လိုꩻလဲ့ကွုန်ꩻကတ်၊ ဓမ္မသတ်လဲ့ညီႏ၊ ဆီပါꩻစောင်ꩻစယ်ꩻ၊ အဝ်ႏမယ်ꩻနမ်းလောင်းကွိုနဲ၊ ကျောင်ꩻတကာႏသီးယာ၊ နဝ်ꩻခါကာလ၊ နီဗွေႏဘုရာꩻ၊ စံႏစာꩻနေးထူႏ၊ ခမ်းသူႏဝေင်ꩻယေန်၊ အွဉ်ႏကုဲငသေꩻ၊ အသာႏသနာႏ၊ ကွတ်ꩻရျာꩻကွတ်ꩻဆီ၊ လွိုတကီလစ်ꩻနေင်ႏ၊ အခိန်ႏထင်ႏလꩻ၊ ရာဇဟော်ခံꩻ၊ ပေါက်ကံႏမင်ꩻဇော်ꩻ၊ နော်ရထာႏခွန်၊ နေးတွမ်ႏစဲ့ꩻမ၊ နꩻဗင်တနတ်၊ တင်ႏတပ်စုလိုꩻ၊ ပိုႏပါႏပရိသတ်၊ မူꩻမတ်စာႏရေꩻ၊ ထိုမ်းတွမ်ႏသေဆင်၊ ဒင်ႏတွမ်ႏစရိပ်၊ နေးတွမ်ႏစော်ꩻခွါ၊ နမ်ႏနꩻတစို၊ တောက်ꩻဒိုမာꩻအီ၊ အီႏလင်ꩻပွိုခူႏ၊ ထူႏထန်ႏဌာႏပနာႏ၊ အီႏလင်ꩻယားကုဲ၊ ဘုရာꩻတန်ရွှေထုံ၊ အီႏလင်ꩻပုံကန်၊ ဟော်ခံꩻရာဇ၊ သုဝဏ္ဏမင်ꩻ၊ သေဆင်စဲ့ꩻမ၊ လင်ꩻချꩻလင်ꩻအုံ၊ စစ်တောင်းအရပ်၊ ချꩻတပ်မာꩻပင်၊ အနော်ရထာ၊ ပေါက်ကံႏမင်ꩻဇော်ꩻ၊ စက်ငါဗေင်ႏလင်ꩻ၊ ထင်ႏတွိုႏမွူးဟာ၊ တျာႏလင်ꩻတျာႏဆေႏ၊ ပီနုဲးမေႏရောင်ႏ၊ ကောင်ဆောင်ႏငွိုးပြဲ၊ အွဉ်ႏနယ်နိမိတ်၊ တိရစ္ဆာန်ႏယူးဝါး၊ ခါလဲ့တပ်ꩻအဲင်ႏ၊ ကွတ်ကဲင်ႏလွဝင်ꩻ၊ မျင်ꩻမိုရ်ႏကောင်နာ၊ ခါလဲ့သꩻဝꩻ၊ မီႏထွာဖျက်ယား၊ ဘုရာꩻရွှေထုံ၊ ပွိုင်ပုံႏရော့ꩻတဝ်း၊ ထိတ်လန်းသꩻဝꩻ၊ နော်ရထာရာဇ၊ လောႏယꩻဟွမ်ဗုဲ၊ လꩻလုဲႏအမာဗန်ႏ၊ ဟော်ခံꩻနော်ရထာႏ၊ ပွိုးကျံႏမာႏအတွက်၊ အရပ်နဝ်ꩻဝင်ꩻဟဲ့ꩻ၊ လုဲးထမီꩻနောလောင်ꩻ၊ ဟဲ့ꩻဟဝ်ကူꩻကော၊ တောင်ꩻနောဖြားဆား၊ အနော်ရထာ၊ ငါယားဘုရာꩻ၊ မွိုက်မာႏအတွက်၊ လက်လုဲႏထူꩻဆန်ꩻ၊ ငမ်းခန်းမရဏ၊ စိတ္တဇလဲင်ꩻထွာ၊ ယူႏဟာအကျောင်ꩻ၊ ခွေထာꩻပေါင်မာႏလဲဉ်း၊ အဲဉ်ထဝ်းဒွုမ်မီꩻခိုႏ၊ ကိုꩻကွယ်ႏဦးချ၊ ကန်းတော့ꩻဗာႏယား၊ ဘုရာꩻမꩻအီႏမွေး၊ ယူႏတွေꩻသꩻကို၊ ယိုမꩻနဲစ်ရဲဉ်ꩻ၊ အလူႏသွမ်ꩻဝတ်၊ ပိဏ္ဍပါတ်ဘောဇဉ်၊ ချိုချဉ်ရသာႏ၊ ထီထာထီခံꩻ၊ တံꩻခွဉ်ႏကူꩻကာႏ၊ ကဝ်ႏတနျာႏကဝ်ႏဗွာ၊ ကျက်သာႏဗွူဖေါင်း၊ တထွောင်းတရေင်စိႏ၊ အီလွေꩻလူႏကပ်၊ ဓာတ်မျတ်လစ်ꩻပါꩻ၊ ဘုရာꩻစေႏတီႏ၊ ကန်းတော့ꩻကွီခွင်ꩻ၊ ထင်ႏယဝ်းတဲင်ခါ၊ နင်းကားသꩻယောင်ႏ၊ ခြောင်ꩻလီစွို့ꩻဖျင်၊ တကွင်ကွယ်ဒွုမ်၊ ခွန်နော်ရထာႏ၊ ရွယ်ꩻငါႏကျမ်ႏယား၊ သထုံဘုရာꩻတန်၊ ထူႏဆန်ꩻတိတ်ꩻပျꩻ၊ ယားတလꩻတဝ်း၊ နဝ်ꩻမꩻဆွတ်ꩻချာ၊ နဝ်ꩻခါသာႏသနာႏ၊ ကွတ်ꩻရျာꩻကွတ်ꩻဆီ၊ လွိုတကီငတ်ꩻနေင်ႏ၊ သုဝဏ္ဏမင်ꩻကြီꩻ၊ ဝုဲႏရီတောင်ꩻပြန်ႏ၊ ပုဏ္ဏာꩻတန်ပို၊ ဟောင်ရိုꩻမဉ်ꩻဗာႏ၊ ဓမ္မာသောက၊ ကျွꩻလွေꩻသီဟိုဠ်ႏ၊ ထူႏလွဉ်ပိဋကတ်၊ ရပ်သထုံႏနယ်ႏ၊ တယ်ႏစတရာꩻပွယ်ꩻ၊ ဟော်ꩻနယ်လိုꩻတကာႏ၊ မာဂဓငဝ်းငွါ၊ ဟွုန်ဗာႏရွုမ်ꩻငဝ်း၊ သေတဝ်းဓိပ္ပါယ်ႏ၊ ကံပီးနဝ်ꩻလဲ့၊ ဘုရာꩻငဝ်းရိုꩻတဲင်၊ ခွေလဲ့ဝံꩻသာႏ၊ ပါꩻလဲ့ဟွုန်ဟဝ်၊ အဝ်ႏသေကသာႏဓု၊ သာႏဓုနဝ်ꩻရွုမ်ꩻ၊ ဆွုမ်ႏနမ်ႏမသေနာႏ၊ ခရာႏမခဝ်းဟို့ꩻ၊ သာႏသနာႏထင်ႏလꩻ၊ ကွတ်ꩻရျာꩻကွတ်ꩻဆီ၊ လွိုတကီနွုတ်ꩻနေင်ႏ၊ အခိန်ႏနဝ်ꩻမꩻ၊ သုဝဏ္ဏမင်ꩻ၊ အဖူးရင်ꩻဒွါႏ၊ အမေနာမ၊ ဓမ္မမာလာ၊ ရာဇာအိမ်ရှေ့၊ လွေꩻထေ့တောင်ꩻပြန်ႏ၊ ဗွေႏစဝ်းဆရာႏ၊ ဃောသာအငါ၊ ယံထေထန်ႏခန်း၊ အအက်အဖေါႏ၊ မူႏခိုဖြားဆား၊ ယံသေနာႏရဝ်း၊ နဝ်ꩻမပြန်ႏထုတ်၊ အနက်ငဝ်းငွါ၊ ပွိုးနဝ်ꩻခါမꩻ၊ ဌာနရပ်ဆူꩻ၊ ပြန်ႏထုတ်မြို့တဲ့၊ ဟဲ့ꩻဟောင်လွဉ်ꩻဗာႏ၊ တွိုႏငခါတဲင်၊ သမ်းဟဲ့ꩻသဲင်ꩻတော၊ ရွှေထုံဝေင်ꩻတန်၊ ကွပ်စွဉ်ႏနေင်ႏည၊ ငဝ်းထျꩻထိုꩻမား၊ အမဉ်ꩻလီꩻစခါ၊ လိုꩻအာဟဲ့ꩻဒွါႏ၊ သုဓမ္မပူရ၊ သထုံတန်နော၊ ပွိုးစောပီးနဝ်ꩻ၊ စထစ်သူရိစန္တာလက်ထက်၊ သွုပ်ဆက်တငါငါ၊ သာႏသနာႏကဗꩻဒါႏ၊ ကွတ်ꩻရျာꩻကွတ်ꩻဆီ၊ လွိုတကီငတ်ꩻကို၊ ဟောင်ရိုꩻကထိန်ႏဗွေ၊ စနေႏအနီꩻ၊ ဝွေꩻသီးဒက္ခိဏ၊ ရပ်မဆနဝ်၊ အဝ်ႏဘီလူꩻကျွန်ꩻ၊ ဟောင်ရိုꩻဆေ့ꩻအာ၊ ငတ်ꩻသဲဉ်သူမွုန်ႏ၊ ထိုမ်းလွဉ်သင်္ဘောꩻ၊ လွဉ်ပူႏဇောႏဘုရာꩻ၊ ရွှေစာရံစေႏတီႏ၊ ဘီလူꩻအာဖုံႏ၊ အဝ်ႏပြုံႏအဝ်ႏပြင်ႏ၊ ဘုရာꩻတလင်ꩻထျꩻ၊ လွဉ်ဦးချဝုဲႏ၊ မွေႏတောႏဓာတ်မျတ်၊ လစ်ꩻဆူႏစေႏတီႏ၊ ဖြီꩻစီꩻထွူတဲင်၊ ပြန်ႏခွုန်ꩻသဲင်ꩻယား၊ သာႏသနာႏထင်ႏလꩻ၊ ကွတ်ꩻရျာꩻကွတ်ꩻဆီ၊ လွိုတကီနွုတ်ꩻနေင်ႏ၊ အခိန်ႏနဝ်ꩻ(ရာꩻ)၊ လွိုန်သီႏလာဗွေ၊ မွူးနီꩻသောကျာႏ၊ ခွန်နဂါꩻမင်ꩻ၊ ဖန်ဆင်ꩻနမ်းလိုꩻ၊ ဟောင်ရိုꩻဆေ့ꩻအာ၊ ငတ်ꩻရျာꩻနောလောင်ꩻ၊ လွဉ်တွိုႏဖြဖျောဝ်၊ မံႏဟဝ်ဘုရာꩻ၊ သေႏချာႏထွူတဲင်၊ ဝုဲႏသဲင်ဦးချ၊ သမ္ဗုဒ္ဓစေႏတီႏ၊ ယံဖေႏနီလိုꩻ၊ ကေသညီႏရဝ်း၊ ပျꩻနယ်ကိုႏရောင်ႏ၊ ဘုရာꩻသောင်ထျꩻ၊ သေႏချာႏထွူမꩻ၊ ကွဲထိုꩻမားလင်ꩻ၊ သာႏသနာႏထင်ႏလꩻ၊ ကွတ်ꩻရျာꩻကွတ်ꩻဆီ၊ လွိုတကီသွစ်ꩻနေင်ႏ၊ အခိန်ႏနဝ်ꩻကို၊ မျက်နာႏဆကွဉ်ႏ၊ မွူးမအတောင်ထျꩻ၊ ဆင်ဗွာရတနာႏ၊ ငတ်ꩻရျာꩻအရံႏ၊ ခါလဲ့လွဉ်ဝုဲႏ၊ ဘုရာꩻစေႏတီႏ၊ မွူးကွို့ꩻနာꩻတွင်ꩻ၊ ဝုဲႏထွူတဲင်ခါ၊ ပြန်ႏငချာယား၊ သာႏသနာႏထင်ႏလꩻ၊ ကွတ်ꩻရျာꩻကွတ်ꩻဆီ၊ လွိုတကီကွတ်ꩻနေင်ႏ၊ ဝေင်သထုံႏဆထင်ꩻ၊ ကဟဲ့ꩻထင်ႏဒါႏ၊ ရတနာႏသိင်္ဃ၊ ဆုတောင်ꩻပြဲ့ꩻကောင်နာ၊ ဘုမ္မစိုꩻ ရုက္ခစိုꩻ၊ အာကာသစိုꩻ၊ လူꩻမျိုꩻလွဉ်ဝုဲႏ၊ ကိုꩻကွယ်ႏစေႏတီႏ၊ ချꩻတသီးတွမ်ႏခံꩻ၊ ထင်ႏထွူပြန်ႏငချာ၊ ကောင်နာဆုတောင်ꩻပြဲ့ꩻ၊ နဝ်ꩻတဲင်သာႏသနာႏ၊ နေင်ႏတရေင်ထင်ႏလꩻ၊ မာဃသိကျာꩻ၊ ပါတွမ်ႏအမာ၊ သုစိတ္တာ၊ သုဓမ္မာ၊ သုဇာတာ၊ သုနန္ဒာ၊ ပါတွမ်ႏချွေႏရံႏ၊ တနံစတုလောက၊ ဒေဝနတ်သာꩻ၊ တသောင်းချောက်ထောင်၊ ထိုမ်းလွဉ်တွမ်ႏဆင်၊ ဧရာဝဏ်နတ်သာꩻ၊ မာꩻလွဉ်စေႏတီႏထျꩻ၊ ငမ်းသꩻတိန်ꩻယိန်ꩻ၊ ယံခွေါင်ယံခံႏ၊ လွဉ်ခွုမ်စံႏပျုပျင်ႏ၊ ဖျင်ဆင်လွမ်ꩻလာꩻ၊ သေႏချာႏထွူတဲင်၊ ဒေါ့ꩻသဲင်ꩻငဝ်းငွါ၊ သတ္တဝါႏလူꩻလိုꩻ၊ ယံဖေႏကသေ၊ ရိုႏသေႏကိုꩻကွယ်ႏ၊ ယံကဝုဲႏခေါက်၊ ယံပူႏဇောႏလူႏတန်ꩻ၊ သိကျာꩻတန်နိုꩻဆောႏ၊ ကျောႏကျာꩻမာꩻငဝ်း၊ သင်ႏလဝ်းလစ်ꩻဖဲ့ꩻ၊ မဲ့ဟဝ်ထွားယဲင်ꩻ၊ ခီꩻမွမ်ꩻထွူခါ၊ ဆကွဉ်ႏမျက်နာႏရပ်၊ ဗော့ꩻညာꩻတတဲင်ႏ၊ တနံသိကျာꩻ၊ ဟဲ့ꩻဝန္ဒာမိကောင်၊ ဝန္ဒာဆထင်ꩻ၊ သိလာပဗ္ဗတ၊ မာဃသိကျာꩻဟဲ့ꩻ၊ တဲ့ဘုရာꩻဆကွဉ်ႏ၊ ကောင်နဝ်ꩻသမ်းဖန်၊ သူရိယစန္တာ၊ သီလာကောင်တဲ့၊ သိကျာꩻတန်ဟဲ့ꩻဖေႏ၊ သထုံဆကွဉ်ႏ၊ သမ်းဟဲ့ꩻသိင်္ဃနိတ်ကောင်၊ သုဝဏ္ဏတောင်လဲ့မွေး၊ သိင်္ဂနိတ်ကောင်ဆထင်ꩻ၊ ဥပလိကောင်၊ ဝေင်ꩻသထုံဆကွဉ်ႏထင်ႏ၊ ကွာႏလင်ꩻနီတဲင်ႏ၊ သမ်းဖန်သဲင်ကောင်၊ ရတနာသိင်္ဃ၊ ဆုတောင်ꩻပြဲ့ꩻကောင်တဲ့၊ ဟဲ့ꩻလွအမဉ်ꩻတွင်ႏ၊ ခွန်နင်ꩻမူႏမောင်ႏ၊ ရပ်ခြောင်ႏသာႏယာႏ၊ ရဖပါမွန်း၊ အံႏအွိုလွေꩻလွ၊ ကိုငကိုစီ၊ ကျောင်ꩻတကာႏသီးယာ၊ ဘုရာꩻတကာႏလိုꩻကွုန်ꩻ၊ ဟွုန်တဲင်တောင်ꩻနော၊ မီꩻရိုꩻစောသထုံႏ၊ ဝေင်ꩻလုံသုဝဏ္ဏ၊ ဒေသကောင်ဆောင်ႏ၊ ထာꩻပူႏလောင်းကီ၊ ခွန်ဖီနစ်သက်၊ ခွန်လိုꩻရက်စိုမ်ꩻ၊ ဟွုန်သွိုꩻပျောႏသွင်ႏ၊ ဘုရာꩻသျင်ႏဓာတ်ဗွန်၊ ခွန်ဟဝ်မင်ꩻလောင်ꩻ၊ ပူႏပေါင်ꩻတွိုင်ႏပင်ႏ၊ နတ်သျင်ႏတနံ၊ ခမ်းကီသိကျာꩻ၊ လွမ်ꩻလာꩻပျုပျင်ႏ၊ ဖြွမ်းဝင်ꩻတယ်ႏခြပ်၊ မင်ꩻမျတ်ခွန်ပအိုဝ်ႏ၊ ခွိုꩻနွယ်ႏလက်ထက်၊ ရက်တဲရတနာႏ၊ သိုမ်ပါꩻဂုဏ်ႏထူꩻ၊ ဦးချရိုႏသေႏ၊ ပေႏတန်မူႏခို၊ ပိုလီꩻသွဉ်းသယ်ႏ၊ တဝံနယ်ဗာႏတဝ်း၊ ထဝ်းကဲသီးယာ၊ ဘုရာꩻတရာꩻသင်္ဃာႏ၊ ရတနာႏမျတ်သိုမ်ဆူႏ၊ ဒင်ႏကတူႏယွော့ထို၊ ကိုꩻကွယ်ႏဝုဲႏခေါက်၊ အောက်မေ့ဟာရဝ်ꩻ၊ ငထဝ်းလွစ်ရံꩻ၊ ကံကျင်ꩻဆောက်တယ်ႏ၊ ဆယ်ꩻကပ်ကိုꩻကွယ်ႏ၊ ဝုဲႏခေါက်လူႏတန်ꩻ၊ တနံဒေဝါ၊ သိကျာꩻမာဃ၊ အုံလဲင်ꩻတလꩻတဝ်း၊ စွဲရဝ်းကူႏညီႏ၊ ထီႏတောႏရက်ပဲင်ꩻ၊ လဲင်ꩻလင်ꩻစီႏရင်ႏကို၊ ခွန်ပအိုဝ်ႏမင်ꩻမျတ်၊ နပ်တောမအဝ်ႏ၊ ကျွန်ꩻနဝ်ဇမ္ဗူႏ၊ လစ်ꩻဆူႏဘုရာꩻဗွန်၊ လစ်ꩻတွန်မေတ္တာႏတောႏ၊ ဆေ့ꩻတဝ်းနောဗွေႏ၊ ပေႏတဝ်းနောဖါ၊ တန်အာဘုံꩻတံꩻခိုꩻ၊ နီယိုတွမ်ႏနာꩻ၊ ဟဝ်ကျိုꩻစာꩻလွေꩻ၊ ဗွေႏစဝ်းဘုရာꩻ၊ သာႏသနာႏလေတွင်ꩻ၊ ခွန်နင်ꩻမူႏမောင်ႏ၊ ဆောင်ႏလွေꩻတွမ်ႏရိက္ခာႏ၊ မီႏဝုဲႏဗာႏတဲင်၊ သဲင်ꩻလိုꩻဆင်ႏရော့ꩻ၊ ဗိုန်ကမော့ꩻဘုရာꩻ၊ ဗျာဒိပ်ဟာပွိုးအဝ်ႏ၊ ဒီဟဝ်ယုံကြည်၊ တန်ပေႏနီသီ၊ ခြွီလီꩻဆင်ႏရော့ꩻ၊ ကျုံႏသော့ꩻသာႏသနာႏ၊ ဘုရာꩻမွေႏဓာတ်၊ ဆယ်ꩻကပ်ဟဝ်လူႏ၊ ပူႏဇောႏဝုဲႏခေါက်၊ ထောက်တငါနောင်ႏရေꩻ၊ နိဗ္ဗာန်ႏဆေꩻတဖူꩻ၊ ယံထောင်စူꩻဗာႏ၊ သာႏသာႏယုံယုံ၊ လိုꩻဒုံခွိုက်အဝ်ႏ၊ ယံလွစ်တဝ်းနော၊ တောငါခြွိုင်ႏသန်ꩻ၊ ပေါင်ꩻဝင်ꩻလွေꩻလူႏ၊ လွေꩻပူႏဇောႏလွ၊ သထုံခမ်းမွေႏတောႏ၊ အမဉ်ꩻကျောႏဟုံ၊ သိုမ်ဆီတဘုံႏလဲင်ꩻစွစ်ꩻ၊ ယံလွစ်မွုန်းနောဖါ၊ လိုꩻအာဗွေရဝ်း၊ ယိုနဝ်ꩻစခါ၊ ယိုꩻယာႏပအိုဝ်ႏ၊ ခွန်ခွိုꩻပန်ဆက်၊ ဝင်ꩻရက်ရတနာႏ၊ သိုမ်ပါꩻဂုဏ်ႏမျတ်၊ ဓာတ်တောႏကောင်ႏမူꩻ၊ သထုံဆကွဉ်ႏထင်ꩻ၊ ကွာႏဝင်ꩻနီတဲင်ႏ၊ ကရိုꩻနဝ်ꩻရာꩻ၊ ခွန်သိကျာꩻမင်ꩻ၊ ဟောင်ရိုꩻဖန်ဖေႏ၊ အမေနာမ၊ ရတနာသိင်္ဃ၊ ဆုတောင်ꩻပြဲ့ꩻကောင်၊ ဝေင်ꩻတန်ဆထင်ꩻ၊ သိကျာꩻမင်ꩻဖန်ဖေႏ၊ အမေနာမ၊ သာရကလျာဏီ၊ သိမ်ကုန်းကွိုတဝ်း၊ ဘုရာꩻဆတွို့ꩻထင်ꩻ၊ ဆင်ဗွာဖွေါင်ꩻနဝ်ꩻရာꩻ၊ သိကျာꩻဟဲ့ꩻဖန်ဖေႏ၊ အမေနာမ၊ ဓမ္မာသောကကောင်၊ ဟဲ့ꩻဟောင်စွိုးနဝ်ꩻ၊ မူႏမောင်ႏနာနီ၊ မီႏတွိုႏငခါ၊ အမဉ်ꩻကြာꩻတော၊ ဟဲ့ꩻဟောင်လင်ꩻဒွါႏ၊ တောင်စွန်းကွိုတဝ်း၊ ကွဲကားထီခြောင်၊ ကထွတ်ꩻလင်ꩻဒါႏ၊ ဘုရာꩻဆကွဉ်ႏ၊ ဖျော်လွဉ်ဆနဝ်၊ နဝ်ꩻရာꩻရိုꩻကောင်း၊ သုဝဏ္ဏပုဗ္ဗာ၊ စူလာနဒီ၊ ထီခြောင်နာမ၊ ပွိုးထန်ႏဆကောင်၊ အလောင်းအဖဲင်ႏ၊ ပွိုးပီးနဝ်ꩻမꩻ၊ သုဝဏ္ဏပုဗ္ဗာ၊ ဟဲ့ꩻဗာႏကွိုတဝ်း၊ ဝေင်ꩻတန်ဆနဝ်၊ တလီးနဝ်ꩻရာꩻ၊ စဝ်းသိကျာꩻမင်ꩻ၊ ဟဲ့ꩻဟောင်ဖန်ဖေႏ၊ သုဝဏ္ဏစန္ဒသိလာ၊ ပါပပတ္တိ၊ နီလီးထီခြောင်၊ ဟဲ့ꩻဟောင်နာမ၊ ဝွေꩻသီးထီခြောင်နဝ်ꩻ၊ အဝ်ႏရံႏဝေင်ꩻတန်၊ သိကျာꩻဖန်ဖေႏ၊ ဘုရာꩻတန်ဆထင်ꩻ၊ ထွတ်လင်ꩻဝေင်ꩻဖူꩻ၊ ခွန်လူꩻသိကျာꩻ၊ ငဝ်းငွါဟဲ့ꩻဟောင်၊ သုဝဏ္ဏနဒီ၊ ထီခြောင်ကွိုတဝ်း၊ ဝေင်ꩻတန်ဆထင်ꩻ၊ ထွတ်လင်ꩻထီခြောင်၊ ဟဲ့ꩻဟောင်နာမ၊ သုဝဏ္ဏဥတ္တရာ၊ မာနတ်ခြောင်လဲ့ရိုꩻ၊ တစွိုးနဝ်ꩻရာꩻ၊ ငဝ်းငွါဟဲ့ꩻဟောင်၊ ထီခြောင်ဝတ်တောႏ၊ ကွဲကားငခါ၊ အမဉ်ꩻကြာꩻတော၊ ဟဲ့ꩻခေါ်လင်ꩻဒွါႏ၊ မာနတ်ကြွန်ကွိုတဝ်း၊ မော့ꩻနဝ်ꩻစခါ၊ ရဟန္တာႏဗွေႏ၊ ဗုဒ္ဓဃောသာ၊ ရဟန္တာႏဖူးခို၊ ဟောင်ရိုꩻနာမ၊ သာရခေါ်သာ၊ ရဟန်ꩻဆေ့ꩻအာ၊ ငတ်ꩻရျာꩻဗွေဗွေ၊ ပရိဝါသ် မာနတ်၊ ခြောင်နဝ်ꩻကတူႏ၊ ဆောက်တယ်ႏဆူꩻအရပ်၊ အဝ်ႏတွိုႏငခါ၊ ဌာနခင်ႏလမ်း၊ ခွန်စဝ်းသိကျာꩻ၊ ငဝ်းငွါဖန်ဖေႏ၊ အမေနာမ၊ ဝါသ်တောႏထီခြောင်၊ အသောင်တယ်ႏထွိုင်ꩻ၊ တံꩻတွိုင်ꩻမဟာႏရံႏ၊ စင်ႏကျန်ႏကစ၊ ဌာနနေရာ၊ စခါအဝ်ႏနော၊ ကွဲကားဆတွို့ꩻ၊ မွူးနွို့အရပ်၊ ထီခြောင်နဝ်ꩻရာꩻ၊ စဝ်းသိကျာꩻမင်ꩻ၊ ဟဲ့ꩻဟောင်ဖန်ဖေႏ၊ အမေနာမ၊ စန္ဒနဒီ၊ ထီခြောင်ကွိုတဝ်း၊ ဒီဟဝ်မတ်တောင်ꩻ၊ ကျောင်ꩻတကာႏသီးယာ၊ သိကျာꩻဖန်ဖေႏ၊ သေႏချာႏထွူမꩻ၊ စတွမ်ႏဟော်ခ့ꩻ၊ ခွန်သုဝဏ္ဏ၊ ဓမ္မမာလာ၊ သိကျာꩻကစ၊ ဖြွမ်းလွညီႏညာႏ၊ ဘုရာꩻဆကွဉ်ႏထင်ꩻ၊ သုဝဏ္ဏမင်ꩻ၊ ဟော်တန်ဆနဝ်၊ တွမ်ႏစဝ်းရဟန္တာႏ၊ သင်္ဃာႏနီရေင်၊ တယ်ႏထောင်ႏငသေꩻ၊ ဘုရာꩻငတ်ꩻဆူႏ၊ ခွုမ်အင်ꩻသူႏသီ၊ မြေနီရန်ႏလဲင်၊ စီႏသဲင်တိတ်ꩻခံꩻ၊ ဟွဲထင်ႏတွမ်ႏဟိန်ႏ၊ ဘိသိက်မင်္ဂလာႏ၊ နွုတ်ꩻနာꩻနွုတ်ꩻနီꩻ၊ ဖြီꩻစီꩻထွူမꩻ၊ ဆုမ္မꩻငသေꩻ၊ ဖေႏတွမ်ႏဟော်ခံꩻ၊ နမ်းကျင်ꩻတရာꩻ၊ ဆီပါꩻကစ၊ သီလသဉ်ထံꩻ၊ နမ်းကျင်ꩻဆောက်တယ်ႏ၊ စောင်ꩻစယ်ꩻစီꩻဖျန်ꩻ၊ ကမ္မဋ္ဌာန်ꩻဘာဝနာႏ၊ မမာႏမယွင်ꩻ၊ ဖျင်သွုန်ႏဖျင်သꩻ၊ ဆုမ္မꩻနမ်းကဝ်ႏ၊ သွဉ်ဆဝ်ႏပိုလီꩻ၊ အတ္တဟိတ၊ ပရဟိတံ၊ နမ်းရင်ꩻဝင်ꩻပွန်း၊ ယံဖေႏညီႏတွာ၊ စဝ်းသိကျာꩻမင်ꩻ၊ သွဉ်သင်ငသေꩻ၊ ဖေႏထွူနဝ်ꩻမꩻ၊ ဌာနခမ်းကီ၊ ခွန်ဖီꩻခွုန်ꩻထင်ႏ၊ မျင်ꩻမိုရ်ႏကောင်နာ၊ သိကျာꩻအဝေင်ꩻ၊ အနေင်ႏတရေင်၊ မီႏဗွေမꩻလဲ့၊ ခွန်စဝ်းသိကျာꩻ၊ ထွားလင်ꩻတလဲင်ႏ၊ ဝေင်ꩻရွှေထုံ(--)၊ သုဝဏ္ဏဘုမ္မိ၊ မီႏရေႏတွက်တွမ်ႏ၊ ခွန်တန်ရာဇာႏ၊ မဟာႏမင်ꩻကြီꩻ၊ သူရိစန္တာႏ၊ ရာဇာႏဟော်ခံꩻ၊ မင်ꩻစဲဉ်ႏခွန်ဆက်၊ နဝ်ꩻရာꩻခွေသွဉ်း၊ တသေဒွုမ်တဝ်း၊ ပွိုးစွဉ်ႏအာငါႏ၊ တရျာꩻငတ်ꩻဆီ၊ လွိုတကီဝင်ꩻသွစ်ꩻ၊ ရေႏတွက်နပ်ဗျာႏ၊ တွမ်ႏအခရာႏကအာ၊ တောင်ႏမာႏလိတ်မန်း၊ ခွေသွဉ်းစာႏရေꩻ၊ ထေထန်ႏထွတ်ထူႏ၊ စာႏမူႏတောင်ႏမာႏ၊ ပေႏလာႏအလောင်း၊ တောင်ႏမာႏလိတ်မန်း၊ ပြန်ဖေႏပအိုဝ်ႏ၊ ရိုႏရိုꩻသာꩻသာꩻကွိုနဲ၊ ကျောင်ꩻတကာႏသီးယာ၊ ဖြားဆားလူꩻလိုꩻ၊ မူႏခိုသီးယာ၊ တဖုံႏတဉ်ဟွေး။

ဟန်ႏသလဲင်ႏခါယို၊ မူႏခိုဖြားဆား၊ ငါယိုအဝ်ႏက၊ သက္ကရာဇာ၊ သိကျာꩻခွန်ဖီ၊ ခွုန်ꩻသဲင်ꩻအချာ၊ သာႏသနာႏတယ်ႏထွန်ꩻ၊ ခွန်တန်ရာဇာ၊ သုဝဏ္ဏမင်ꩻ၊ ပွိုင်ႏခမ်းပွိုင်ႏထီ၊ ဖူးထိုနဝ်ꩻရာꩻ၊ ဟောင်ရိုꩻနာမ၊ ဓမ္မမာလာ၊ ရာဇာခွန်လောင်၊ ညီနောင်တဖူးဝေး၊ ဒေဝီမိဖြာꩻ၊ နဝ်ꩻရာနာမ၊ သိင်္ဃမိတ္တာ၊ မိဖြာꩻကွိုတဝ်း၊ ပိုခိုနဝ်ꩻရာꩻ၊ ဟောင်ရိုꩻနာမ၊ ဓမ္မသာရမင်ꩻသာꩻ၊ မွိုးဖါဖန်ဖေႏ၊ အမေနာမ၊ သုဓမ္မလဲ့တဖြာꩻ၊ မင်ꩻသာꩻပုတ္တာ၊ မင်ꩻသာꩻတဖူးဝေး၊ ဟော်ထာလောင်းကီ၊ စွုမ်ႏနီꩻစံႏစာꩻ၊ ထီꩻဗွာကာလ၊ ရာဇမင်ꩻသာꩻ၊ ပအိုဝ်ႏဟော်ခံꩻ၊ ခွန်တန်အစွိုး၊ မီꩻရိုꩻရွှေထုံ၊ ဟုံလဲဉ်းအဝင်ꩻ၊ တင်ꩻလုဲတကာႏ၊ သာႏလဲဉ်းခမ်းလင်၊ သိကျာꩻလဲင်ꩻအံႏဖြာႏ၊ သာမညတမွေးတဝ်း၊ ခွန်စဝ်းသိကျာꩻ၊ အချာသဲင်ꩻလဲဉ်း၊ လစ်ꩻလာထင်ႏလꩻ၊ ဗုဒ္ဓဃောသာ၊ ရဟန္တာႏဗွေႏ၊ ထူႏနေးနိဗ္ဗာန်ႏ၊ လွိုန်သီႏလာဗွေ၊ မွူးနီꩻတနင်ꩻလာႏ၊ သူရိယာႏနေမင်ꩻ၊ မွူးထန်ႏနီꩻခါ၊ စံႏစာꩻနေးထူႏ၊ ခမ်းသူႏဝေင်ꩻယေန်၊ ဆချာဖူးခို၊ ဟောင်ရိုꩻနာမ၊ ရသဃောသာႏ၊ ရဟန္တာႏကွိုတဝ်း၊ လျောက်လဝ်းတွိုင်ႏပင်ႏ၊ သုဝဏ္ဏမင်ꩻကြီꩻ၊ ညီညာထွူမꩻ၊ ဟဲ့ꩻစလိုꩻခါ၊ လက်သမာꩻပရံ၊ လူꩻတနံကစ၊ ဖြွမ်းလွညီႏညာႏ၊ မာꩻတွမ်ႏခြုံခံꩻ၊ ပျသာဒ်ရတနာႏ၊ နံသာႏသေင်ႏခြုံး၊ ဖုံꩻလွမ်ꩻသင်္ဂြိုဟ်ႏ၊ ဝေင်ꩻတန်ဆထင်ꩻ၊ ရွှေဆံတော်ဘုရာꩻ၊ မျက်နာႏဆတွို့ꩻနဝ်၊ ဗွေႏစဝ်းရဟန္တာႏ၊ စခါလောင်ꩻတောႏ၊ သင်္ဂြိုဟ်ႏအရပ်နဝ်ꩻ၊ ဒီဟဝ်မတ်တောင်ꩻ၊ ကျောင်ꩻတကာႏသီးယာ၊ ရဟန္တာႏဗွေႏ၊ သင်ႏခဲင်ꩻနေႏရာႏ၊ ရာဇာႏခွန်တန်၊ တယ်ႏမံႏငသေꩻ၊ ဝွေꩻဗွေႏကွိုနဲ၊ ကုသိနာႏရု့ႏ၊ မုနိချာႏကွဉ်ႏ၊ မဲ့ငါထွားထင်ꩻ၊ ခင်ယောင်းငတွို့ꩻ၊ မွူးနွို့အရပ်၊ ဖွိုႏထိုရပ်တောႏ၊ နဝ်ꩻရာꩻကွတ်ꩻသောင်ꩻ၊ အလောင်ꩻကောင်ခင်ႏလမ်း၊ ဟော်ခံꩻသုဝဏ္ဏ၊ ဆကီသꩻတွမ်ႏ၊ ကျောင်ꩻခံꩻကျောင်ꩻထာ၊ စခါပန်းချီ၊ သူႏသီသူႏရန်၊ ကျောင်ꩻခံꩻအဖူꩻ၊ ကူႏထာကူႏခံꩻ၊ နမ်းယားဆေးစုံ၊ ပွတ်လုံဆေင်ႏကင်း၊ တင်ꩻတယ်ႏလျောက်ပတ်၊ ဗိမာန်ႏထာခ့ꩻ၊ အွဉ်ႏဆေင်ႏအွဉ်ႏကင်း၊ ဗွေႏစဝ်းရဟန္တာႏ၊ ကိုႏစာꩻဆကီ၊ မီꩻတွမ်ႏဝါႏသာ၊ နဝ်ꩻခါဖြေ့ꩻသꩻ၊ တရွဒွုမ်တဝ်း၊ စဝ်းခွန်ဟော်ခံꩻ၊ သုဝဏ္ဏမင်ꩻကြီꩻ၊ ဆို့ꩻငသေꩻဖေႏတွမ်ႏ၊ ကျောင်ꩻခံꩻကျောင်ꩻထာ၊ အနာတင်ႏထီꩻ၊ စီႏသဲင်စီႏမန်ႏ၊ တိတ်ꩻခံꩻတိတ်ꩻထာ၊ ချာငါပတ်လယ်ႏ၊ တင်ႏတယ်ႏလျောက်ပတ်၊ တံꩻတွိုင်ꩻမဟာရံႏ၊ စာမရီႏကတိုꩻ၊ ဒိုတောက်ꩻအရုပ်၊ ပဉ်လုပ်ꩻပဉ်ခန်ꩻ၊ ချိုပန်းချိုသေး၊ ကျေးကွေးတုရင်၊ သမင်ပေါင်ဆပ်သွား၊ ကဝ်ႏလာႏကဝ်ႏထဲင်ꩻ၊ အစဲင်ႏအထောင်ꩻ၊ ကဒေါင်ထင်ႏလင်ꩻ၊ သင်ႏဝင်ႏအယ်ခံႏ၊ ပန်းသွဲပန်းဆွိုင်ꩻ၊ ထီဖွိုင်ꩻမော်နမ်း၊ တံꩻခွဉ်ႏတွမ်ႏထီꩻ၊ ဆီမီးတန်ဆောင်၊ အသောင်အဒွိုႏ၊ လဲင်ꩻတလွိုးပေႏသꩻ၊ ရာဇဟော်ခံꩻ၊ တယ်ႏထောင်ႏငသေꩻ၊ လူꩻတနံသိကျာꩻ၊ ခါလဲ့စွဲကို၊ ဖူးနီရသ၊ လွမ်ꩻလာꩻထွားတီ၊ ထာꩻအီႏထာꩻစျꩻ၊ ခြွꩻခန်းစင်စင်၊ စွိုးဆင်ဘုရာꩻ၊ ရဟန္တာႏဗွေႏ၊ ကုသိနာႏရုံႏ၊ ရွှေထုံခမ်းတန်၊ သုဝဏ္ဏမင်ꩻ၊ လက်ထက်ကာလ၊ ဂေါတမတပဲ့ꩻတောႏ၊ ထေရ်ႏကျောႏရဟန္တာႏ၊ မဟာဃောသ၊ စခါဝွေꩻဗွေႏ၊ စံႏစာꩻနေးထူႏ၊ ခမ်းသူႏဝေင်ꩻယေန်၊ နိဗ္ဗာန်ႏရွှေပြည်၊ ခေမာႏဝေင်ꩻခံꩻ၊ လူꩻတနံသိကျာꩻ၊ နဂါꩻဂဠုန်ႏ၊ ကုမ္ဘန်ႏယက္ခ၊ ဂန္ဓဗ္ဗသူရာႏ၊ အာကာသစိုꩻ၊ ဘုမ္မစိုꩻကစ၊ ရုက္ခဒေဝါ၊ ရတပါꩻလိုꩻမျိုꩻ၊ လွမ်ꩻလာꩻသင်္ဂြိုဟ်ႏ၊ ကိုႏတောႏလောင်ꩻကောင်၊ ထာꩻပူႏလောင်းကီ၊ မီႏထွာလွေꩻတွိုႏ၊ အွိုးအရပ်နဝ်ꩻ၊ ဒီဟဝ်သေနန်း၊ ရဟန္တာႏဗွေႏ၊ ဗုဒ္ဓဃောသာႏ၊ စခါမွိုးနန်း၊ စံႏစာꩻနေးထူႏ၊ နိဗ္ဗူႏတာႏဝေင်ꩻခံꩻ၊ ဌာနရပ်နဝ်ꩻ၊ ကိန်ꩻဝပ်ပျောႏရာꩻ၊ ထာꩻပူႏထိုလောင်း၊ လိတ်မန်းတောင်ႏမာႏ၊ လွဉ်ဗာႏပီးနဝ်ꩻ၊ ဒီဟဝ်ထွားဖတ်၊ နေးနာႏမတ်တောင်ꩻ၊ အကျောင်ꩻအလံꩻ၊ ယံဖေႏကသေ၊ ပေႏတန်ဖြားဆား၊ ဝီႏဝါးပန်ကင်ꩻ၊ ခိုဗင်ႏမူႏနံꩻ၊ ပိုမွိုးပိုဖါ၊ သျင်ႏလူရဟန်ꩻ၊ မတ်တောင်ꩻနေးနာႏ၊ ရဟန္တာႏမျတ်၊ ရွှေပြည်ဝင်ႏခန်ꩻ၊ ထန်ႏလွဉ်ပီးနဝ်ꩻ၊ ထဝ်းကဲသီးယာ၊ ဗုဒ္ဓဃောသာ၊ ရဟန္တာႏဗွေႏ၊ စံႏစာꩻနေးထူႏ၊ ခမ်းသူႏဝေင်ꩻယေန်၊ ခွန်စဝ်းဟော်ခံꩻ၊ တနံဗြဟ္မာႏ၊ နဂါꩻဂဠုန်ႏ၊ ကုမ္ဘန်ႏယက္ခ၊ ဂန္ဓဗ္ဗသူႏရာႏ၊ သိကျာꩻခွန်သင်၊ ဖြွမ်းဝင်ꩻညီႏညာႏ၊ ကျောင်ꩻထာကျောင်ꩻခံꩻ၊ သူႏရန်ꩻသူႏသီ၊ တင်ꩻထီꩻဟွဲဟိန်ႏ၊ သဲင်လဝ်မန်ႏကင်ꩻ၊ တုရင်သမင်ꩻပေါင်၊ အထောင်ꩻအစဲင်ႏ၊ ကဝ်ႏထဲင်ꩻကဝ်ႏလာႏ၊ ကိုꩻစာꩻဆကီ၊ ထီꩻထာထီꩻခံꩻ၊ ဗိမာန်ႏမျက်နာႏကျက်၊ ညောင်ရွက်ပန်းဆွဲ၊ ဟွဲခူအသောင်၊ ခေါင်ꩻလောင်ꩻလဲ့သွဉ်ꩻ၊ လူႏတန်ꩻငသေꩻ၊ ယံဖေႏလူꩻလိုꩻ၊ မူႏခိုဒုံႏရောင်၊ သာႏယောင်းသာႏယာႏ၊ သေႏချာႏထွူမꩻ၊ ဟဲ့ꩻစမူꩻမတ်၊ စာႏဖတ်စာႏရေꩻ၊ စေဝွေႏပွယ်ꩻလံꩻ၊ တွယ်ႏထုံဒုံႏမောင်း၊ ထာꩻပူႏလောင်းကီ၊ နွုတ်ꩻနီꩻနွုတ်ꩻနာꩻ၊ သဒ္ဓါႏလူႏတန်ꩻ၊ သွမ်ꩻပန်ꩻဩဇာႏ၊ ဆျာꩻထီရေစက္ချ၊ တွိုင်ႏကျာꩻသက်သေႏ၊ ဝသုန္ဓရေႏဟံႏ၊ နီသဲဉ်လစ်ꩻမွုန်ႏ၊ ဟံႏတန်သာႏဓု၊ ကောင်းမုလူႏတန်ꩻ၊ တယ်ႏမံႏဖူꩻဗာႏ၊ ရဟန္တာႏဗွေႏ၊ ဗုဒ္ဓဃောသာ၊ ဓာတ်တောႏအကျိုꩻ၊ လူꩻလိုꩻဗြဟ္မာႏ၊ သိကျာꩻတနံ၊ ဟွုန်ဟဝ်သာႏဓု၊ စုတလောကပါလာ၊ သာႏဓုနုမော၊ ခီႏယော်ꩻအံႏဖြာႏ၊ ရာဇာဟော်ခံꩻ၊ ခွန်တန်သုဝဏ္ဏ၊ ဒါနကုသိုလ်ႏ၊ ကျိုꩻစာꩻလူႏတန်ꩻ၊ သွုန်ႏဟန်သꩻရုဲင်း၊ သလုဲးလောက်ꩻကာႏ၊ လာꩻလာꩻငထဝ်း၊ သွုန်ႏသꩻဟဝ်မွေး၊ ဟော်ခံꩻဝွေꩻယို၊ ခွုင်းကားကျွန်ꩻနဝ်၊ တရျာꩻတွမ်ႏတဗီႏ၊ ခူႏထီပွိုင်ႏခမ်း၊ အီပီစွိုးနုဲး၊ ထုဲႏပီသုဝဏ္ဏ၊ ရာဇာဟော်ခံꩻ၊ ခွန်တန်ငထဝ်း၊ ယဝ်းဟဝ်ငဝ်းအွီႏ၊ အလွီးလဲ့ဟွမ်၊ ပီနုဲးနံႏသာႏ၊ သိကျာꩻအံႏအော်ꩻ၊ ဟော်ခံꩻသုဝဏ္ဏ၊ ရာဇမင်ꩻကြီꩻ၊ ရွှေထီးဟော်ခံꩻ၊ ခွန်တန်အစိုး၊ လိုꩻအာကွုန်ꩻကတ်၊ အရပ်ဟဝ်သာႏယာႏ၊ သုဝဏ္ဏမင်ꩻ၊ တယ်ႏထောင်ႏပျုစု၊ ဖနပ်တောႏအပေါင်ꩻ၊ ဟောင်ရိုꩻဆေ့ꩻအာ၊ အားလုံးပန်မွန်ꩻ၊ လစ်ꩻရျာꩻသွစ်ꩻဆီ၊ လွိုတကီသွစ်ꩻသောင်ꩻ၊ ကီလဖွိုႏထို၊ နဝ်ꩻရာꩻရိုꩻကောင်း၊ တရျာꩻနွုတ်ꩻဆီ၊ လွိုတကီနွုတ်ꩻသောင်ꩻ၊ ထီꩻဖုံႏအဲဉ်ႏလုဲး၊ နဝ်ꩻရာꩻရိုꩻကောင်း၊ ကွတ်ꩻသောင်ꩻပုဲ(တ)မွိုက်၊ နွုတ်ꩻဘုံႏနွုတ်ꩻရန်း၊ ထီꩻခံꩻထီꩻထာ၊ အနာအစော့ꩻ၊ နပ်ဒေါ့ꩻဆေ့ꩻအာ၊ နီဆီပုဲနွုတ်ꩻသောင်ꩻ၊ ထီꩻစော့ꩻဒွေါင်ႏထို၊ မန်ႏကင်ꩻအယာႏ၊ နဝ်ꩻရာꩻဆေ့ꩻအာ၊ ခံꩻဟဝ်ဇမ္ဗူရာဇ်၊ နွုတ်ꩻစွဲပုဲစေစ်ꩻခန်၊ ပုဲကစေစ်ꩻကျပ်၊ ထာခံꩻငစင်စင်၊ ထီꩻဖုံႏအလောင်း၊ ဟိန်ကောင်းဆေ့ꩻအာ၊ တရျာꩻပုဲနွုတ်ꩻဆီ၊ လွိုတကီနွုတ်ꩻဖြုံႏ၊ ထီꩻလောင်းအွဉ်ႏဟွဲ၊ နွုတ်ꩻဆင်းနွုတ်ꩻရန်း၊ ပေႏတန်နဝ်ꩻရာꩻ၊ တွာခြောင်းငတ်ꩻစလယ်ႏ၊ တွမ်ႏတပြယ်ႏလွိုလွို၊ ဘုရာꩻတန်အလောင်း၊ စေႏတီႏရမ်ႏပေါင်ꩻ၊ အသောင်ပတ်လယ်ႏ၊ တရျာꩻနွုတ်ꩻဆီ၊ လွိုတကီနွုတ်ꩻဆူႏ၊ မူႏခိုပေႏတန်၊ ယံဖေႏမတ်တောင်ꩻ၊ ထီအုံႏပေါင်ꩻနဝ်ꩻ၊ သိုမ်ရေင်နွုတ်ꩻရျာꩻ၊ သာလွိုနွတ်ꩻဆီ၊ လွိုတကီနွုတ်ꩻအုံႏ၊ ထီကန်ႏပေါင်ꩻလဲ့၊ နွုတ်ꩻဆီနွုတ်ꩻကန်၊ ခဏ္ဍသိမ်ႏပေါင်ꩻ၊ ဟောင်ရိုꩻနီဆီ၊ လွိုတကီနွုတ်ꩻဖြုံႏ၊ ဘုရာꩻတန်ဆကွဉ်ႏနဝ်၊ သိမ်ႏတန်နဝ်ꩻရာꩻ၊ တအွဉ်ႏဒေါ့ꩻပါတဝ်း၊ ပွိုးငါရီးဒွါႏ၊ စခါမွိုးနန်း၊ ခွန်တန်ပိုခို၊ ပျုစုငသေꩻ၊ စထစ်နီဗွေႏ၊ ဘုရာꩻနမ်းကအဝ်ႏ၊ အတွင်ꩻနဝ်ꩻကာလ၊ ပဌမသိမ်ႏဟောင်ꩻဝင်ꩻဟဲ့ꩻ၊ ပေႏတန်အဲဉ်ႏလုဲး၊ နဝ်ꩻရာꩻရိုꩻကောင်း၊ ကျောင်ꩻတကာႏသီးယာ၊ သိုမ်ဆီတသောင်ꩻ၊ ပုဲတွမ်ႏတမွိုက်၊ သိမ်ႏတန်မဟာႏ၊ လစ်ꩻမျက်နာႏနဝ်ꩻ၊ ဟောင်ရိုꩻတရျာꩻ၊ သာလွိုနီဆီ၊ လွိုတကီငတ်ꩻသောင်ꩻ၊ ပိုႏကတမွိုက်၊ သိမန္တရိက်ဟံႏ၊ ငပတန်အဲဉ်ႏလုဲး၊ တနားနားနဝ်ꩻ၊ သူဆီသူသောင်ꩻ၊ ပိုႏကတထာ၊ သာလွိုတစူလစ်ꩻ၊ လေးလက်သစ်နော၊ လစ်မျက်နာႏနဝ်ꩻ၊ သမ်းထူႏပေါင်ꩻဝင်ꩻ၊ ဟောင်ရိုꩻနီရျာꩻ၊ သာလွိုငတ်ꩻဆီ၊ လွိုတကီနွုတ်ꩻသောင်ꩻ၊ ဝိသုဂါမ၊ ဆအတန်နဝ်ꩻ၊ ဟောင်ရိုꩻအသောင်၊ တရျာꩻဗွေဗွေ၊ လစ်ꩻမျက်နာႏနဝ်ꩻ၊ အဝ်ႏတွမ်ႏအသောင်ꩻ၊ လစ်ꩻရျာꩻမန်ႏမန်ႏ၊ ယံဖေႏမတ်တောင်ꩻ၊ မွိုးနန်းစခါ၊ ရာဇာမင်ꩻကြီꩻ၊ လူႏတန်ꩻငသေꩻ၊ မြေကြီးသိမ်ႏတန်၊ ယံဖေႏကထွာ၊ အစဲဉ်ႏထာဝရ၊ နမ်းငါပိုလီꩻ၊ ဝွေꩻသီးအစိုး၊ မီႏတွိုႏကျောက်စာ၊ နဝ်ꩻရာꩻအပေါင်ꩻ၊ ဟောင်ရိုꩻသိုမ်ရျာꩻ၊ သာလွိုသိုမ်ဆီ၊ လွိုတကီနွုတ်ꩻပီ၊ ကွဲကားသိမ်ႏတန်၊ ဟောင်ရိုꩻအသောင်ꩻ၊ ကျောက်တိုင်ပေါင်ꩻနဝ်ꩻ၊ လစ်ꩻဆီဗွေဗွေ၊ သီမန္တရိက်၊ သိမ်ႏတဲင်ႏနဝ်ꩻရာꩻ၊ နီဆီလစ်ꩻလီး၊ မင်ꩻကြီꩻဟော်ခံꩻ၊ လူႏတန်ꩻသဒ္ဓါႏ၊ ကွဲကားကျောင်ꩻပေါင်ꩻ၊ ဟောင်ရိုꩻဆေ့ꩻအာ၊ ဝေင်ꩻတန်ဖဲ့ꩻထင်ꩻ၊ တရေင်ပုဲနွုတ်ꩻရျာꩻ၊ သာလွိုသိုမ်ဆီ၊ လွိုတကီတကျောင်ꩻ၊ ဝေင်ꩻတန်ရွှေထုံ သုဝဏ္ဏဘုမ္မိ၊ ဆတွို့ꩻနဝ်ꩻရာꩻ၊ ကောင်တန်အလောင်း၊ ရဟန္တာႏမူႏ၊ ဘိက္ခူနီမ၊ ကျောင်ꩻပေါင်ꩻဆေ့ꩻအာ၊ တရေင်ကွတ်ꩻရျာꩻ၊ သာလွိုသွစ်ꩻဆီ၊ လွိုတကီသွစ်ꩻကျောင်ꩻ၊ စရွပ်ပေါင်ꩻနဝ်ꩻကောင်း၊ ဟောင်ရိုꩻတရေင်၊ လွိုဒွိုန်းသူရေင်၊ သွစ်ꩻရျာꩻနွုတ်ꩻဆီ၊ လွိုတကီကွတ်ꩻဖြုံႏ၊ ရဟန်ꩻသာႏမဏေႏ၊ သျင်ႏပေႏအပေါင်ꩻ၊ ဟောင်ရိုꩻဆေ့ꩻအာ၊ နဝ်ꩻရာꩻရိုꩻကောင်း၊ ငတ်ꩻသန်းငတ်ꩻသဲဉ်၊ သူရေင်နွုတ်ꩻရေင်၊ သွစ်ꩻရျာꩻငတ်ꩻဆီ၊ လွိုတကီငတ်ꩻပါꩻကွိုနဲ၊ ကျောင်ꩻတကာႏသီးယာ၊ တင်ꩻလုဲင်ခွုင်းကား၊ မာꩻနမ်းလိုꩻတန်ပေါဖြား၊ ကထွားဒုံဝေင်ꩻ၊ သူသန်းသူသဲဉ်၊ တမွုန်ႏနွုတ်ꩻရေင်၊ သူရျာꩻသွစ်ꩻဆီ၊ လွိုတကီသွစ်ꩻဖြာꩻ၊ ဟောင်ရိုꩻမြေတွိုင်ႏ၊ ဆေ့ꩻအာနဝ်ꩻကောင်း၊ အဝ်ႏဒါႏခွုင်းမုဲꩻ၊ တင်ꩻလုဲသီးယာ၊ ကရိုꩻနဝ်ꩻကောင်း၊ သူႏတောႏတကာႏ၊ ကလျာဏခွိုꩻထဲ၊ တင်ꩻလုဲဖြားဆား၊ ဝီးဝါးတလောင်ꩻ၊ ဟောင်ရိုꩻငတ်ꩻရျာꩻ၊ သာလွိုသူဆီ၊ စာႏရင်ꩻအိမ်ခေႏ၊ ရေႏတွက်ဆေ့ꩻအာ၊ သိုမ်ကုဋေႏပုဲသူသန်း၊ လမ်းတန်လမ်းပေႏ၊ ရေႏတွက်စွဉ်ႏရွဉ်း၊ အိမ်ထောင်စုံကွိုနဲ၊ မဲမုဲးမဲရင်း၊ ခိုဗင်ႏဖြားဆား၊ မူႏနံꩻပေႏတန်၊ ပေါရင်းပေါမုဲး၊ ယပ်ꩻခုဲႏဒုက္ခိတ၊ မဲ့ပꩻစူထို့၊ မဲ့မို့နားအွိုင်၊ နဝ်ꩻရာꩻအွဉ်ႏကဒဲချာ၊ တထွက်ပါအပ်တဝ်း၊ ခွန်စဝ်းဟော်ခံꩻ၊ ခွန်တန်လက်ထက်၊ နပ်ဒေါ့ꩻနဝ်ꩻရွုမ်ꩻ၊ မီႏတွိုႏခွဉ်ႏတောႏ၊ သဿမေဓ၊ တနေင်ႏမꩻတမတ်၊ သက်သာႏညိမ်ꩻချမ်ꩻ၊ ယော်ꩻအံႏထောမနာႏ၊ ရာဇဟော်ခ့ꩻ၊ ခွန်တန်လက်ထက်၊ ရက်ကတ်ပိုလီꩻ၊ အီႏထူႏမာꩻပွိုင်ႏ၊ ပိုလီꩻထံꩻသာꩻ၊ လာꩻလာꩻငထဝ်း၊ ခွန်တန်မင်ꩻပဲစ်၊ ခါလဲ့ငထဝ်း၊ တမာꩻတဝ်းဖိုဖို၊ ပအိုဝ်ႏဟော်ခံꩻ၊ ခွန်တန်လက်ထက်၊ မီႏရေႏတွက်မီႏလို့၊ ခွုင်းယိုကနာꩻ၊ တကာႏတဝ်းနော၊ ဟော်ခံꩻသုဝဏ္ဏ၊ စခါအစိုး၊ နီပအိုဝ်ႏအခမ်း၊ ခင်ႏလမ်းနေႏရာႏ၊ မွိုးဖါဖူဖီ၊ ဝွေꩻသီးစိုးပန်၊ အီႏနမ်းအီႏခီ၊ အီႏဆော့အီႏဆာ၊ ဝေဒနာအမျိုꩻ၊ ရိုꩻလဲ့ငထဝ်း၊ ပွိုးစွဉ်ႏစဝ်းခွန်၊ တရာꩻဆီပါꩻ၊ ထွားတီစောင်ꩻစယ်ꩻ၊ မယ်ꩻတသေႏနမ်းလောင်း၊ လိတ်မန်းတောင်ႏမာႏ၊ လွဉ်ဗာႏပီးနဝ်ꩻ၊ ဒီဟဝ်မတ်တောင်ꩻ၊ ကျောင်ꩻတကာႏသီးယာ၊ ရာဇာဟော်ခံꩻ၊ ခွန်တန်သုဝဏ္ဏ၊ ဓမ္မမာလာ၊ မဟာမင်ꩻကြီꩻ၊ ပွိုင်ႏထီပွိုင်ႏခမ်း၊ လမ်းသားပိုမာ၊ မိဖြာꩻကစ၊ သိင်္ဃမိတ္တာ၊ ဟော်ထာဟော်ခံꩻ၊ စေꩻစိန်ႏချမ်ꩻသာႏ၊ ပုတ္တာပိုခို၊ မွန်းပျောႏစံႏစာꩻ၊ သွီႏယာႏပိုမူႏ၊ ဝင်ꩻသူကစ၊ စံႏစာꩻညီႏတူႏ၊ ဟော်ဖူဟော်ကီ၊ ဝင်ꩻနီမွိုးဖါ၊ ရာဇာဟော်ခံꩻ၊ စံႏစာꩻပွိုင်ႏဝေင်ꩻ၊ သိမ်မွေ့သာႏယာႏ၊ ဌာနရွှေထုံ၊ ခွန်တန်အစိုး၊ တံꩻခိုꩻအာႏဏာႏ၊ သာႏလဲဉ်းခမ်းလင်၊ သတင်ꩻဟုံကတ်၊ ခွန်မျတ်ရာဇာ၊ မဟာမင်ꩻကြီꩻ၊ ထီꩻဗွာအဗွေႏ၊ ဧကရာဇ်ဟော်ခံꩻ၊ စံႏစာꩻပွိုင်ႏဝေင်ꩻ၊ စေꩻစိန်ႏချမ်ꩻသာႏ၊ သယ်ႏလာႏရံႏခူ၊ ဟော်ဖူꩻဟော်ကီ၊ ထီꩻဗွာအဗွေႏ၊ ပီနုဲးလူꩻခမ်း၊ တနံအဒုံ၊ သူဘုံႏသူဖြာꩻ၊ ဝတိံႏသားခမ်းကီ၊ သိကျာꩻအခမ်း၊ တနံစွဉ်ႏလာꩻလာꩻကွိုနဲ၊ တင်ꩻလုဲသီးယာ၊ စခါအစိုး၊ ပအိုဝ်ႏဟော်ခံꩻ၊ လိတ်မန်းတောင်ႏမာႏ၊ လွဉ်ဗာႏပီးနဝ်ꩻ၊ ဟဝ်မတ်ဒီတောင်ꩻ၊ ကျောင်ꩻတကာႏသီးယာ၊ မင်ꩻလောင်ꩻရာဇာ၊ ဟော်ထာဟော်ခံꩻ၊ မွိုးနန်းစခါ၊ နဗွေႏဘုရာꩻ၊ ဗျာဒိပ်ငသေꩻ၊ စထစ်ဝွေꩻဗွေႏ၊ ကျွꩻသဲင်ꩻရွှေထုံ၊ သုဝဏ္ဏဘုမ္မိ၊ သူရိစန္တာႏ၊ စခါအစိုး၊ ပအိုဝ်ႏဟော်ခံꩻ၊ ဝေင်ꩻတန်သုဝဏ္ဏ၊ ရာဇမင်ꩻကြီꩻ၊ ဝင်ꩻနီဖူးဝေးကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။

ဗုဒ္ဓဃောသာ၊ ရဟန္တာႏဗွေႏ၊ စံႏစာꩻနေးထူႏ၊ နိဗ္ဗူတာႏဝေင်ꩻ၊ စံႏစာꩻအချာꩻ၊ လစ်ꩻလင်ထင်ႏလꩻ၊ ရာဇာဟော်ခံꩻ၊ နမ်းကီရောႏဂါႏ၊ ဝေဒနာႏသမ်းတွိုႏ၊ ကွတ်ꩻဆီသူပါꩻ၊ ဟမ်းသက်သာႏတဝ်း၊ ငထဝ်းချမ်ꩻသာႏ၊ ခန္ဓာႏသမ်းပြောင်ꩻ၊ မင်ꩻလောင်ꩻသုဝဏ္ဏ၊ ရာဇအချာ၊ နဝ်ꩻရာꩻဖူးဝေး၊ ဓမ္မမာလာ၊ ထာꩻလိမ္မာႏဆေ့ꩻ၊ သတ္တိငထဝ်း၊ တလဲင်ꩻဖြားပိုမူႏ၊ ညီႏတူႏစံႏစာꩻ၊ ခွပ်လာခွပ်နေင်ႏ၊ စေꩻစိန်ႏချမ်ꩻသာႏ၊ ဟော်ထာလောင်းကီ၊ စွုမ်ႏနေင်ႏစွုမ်ႏလာ၊ ဝေးတန်ခင်ႏလမ်း၊ စံႏစာꩻအုံသော့ꩻ၊ မီႏနပ်ဒေါ့ꩻနေင်ႏ၊ နီဆီဗွေဗွေ၊ လꩻညီꩻရွုမ်ꩻဝင်ꩻ၊ ပိုခိုတဖြာꩻ၊ ပိုမူႏဝင်ꩻလစ်ꩻ၊ ပိုခိုနဝ်ꩻရာꩻ၊ မွိုးဖါဖန်ဖေႏ၊ အမေနာမ၊ မောင်လလဲင်၊ မင်ꩻသာꩻပိုခို၊ ဟောင်ရိုꩻနာမ၊ တလဲင်ꩻဘာႏသာႏ၊ ဖါစဝ်းခင်ႏလမ်း၊ တရာꩻဆီပါꩻ၊ စောင်ꩻစယ်ꩻတဝ်းဒွုမ်၊ စွန်တခွန်ꩻခိုႏ၊ လိုꩻလဲ့ကျမ်ꩻထံꩻ၊ ရိုꩻရန်ႏအာငဝ်း၊ ငထဝ်းကေႏညိုႏ၊ မူႏခိုဖြားဆား၊ ဝေဒနလဲ့အာ၊ ရောဂါႏလဲ့လွိုင်ႏ၊ ပွိုးစွဉ်ႏစဝ်းခွန်၊ တရာꩻဆီပါꩻ၊ တစောင်ꩻနွောင်ꩻတဝ်းမꩻ၊ ဒုဗ္ဘိက္ခန္တရကပ်၊ စပ်ဖျောဝ်တွိုႏရွစ်၊ ငထဝ်းသက်သာႏ၊ ထာꩻအွိုထာꩻဆာ၊ ရောႏဂါႏဉာဉ်ꩻဆယ်ꩻ၊ ဆင်ꩻရယ်ꩻဒုက္ခ၊ အံႏမဆျာꩻပါꩻ၊ ရောဂါႏနိစ္စက်၊ လိုꩻသက်လဲ့ဒွေါင်ႏ၊ ပွိုးစွဉ်ႏအထျꩻ၊ မူလထွာလွဉ်၊ ကေထံရူးဗင်၊ တောႏတွင်ꩻထာꩻခြာ၊ သတ္တဝါႏစွူႏသား၊ ခါလဲ့လွိုင်ႏကွုန်ꩻ၊ လုပ်ꩻခွုမ်သွို့ꩻလုဲး၊ ဗွူဖုဲခွဉ်ႏဆေ့ꩻ၊ သေ့ꩻအံႏခေင်းယား၊ ထန်ႏဗွာထန်ႏသိုႏ၊ လိုꩻလဲ့ဒုက္ခ၊ အံႏမဒဲဉ်ဟန်ႏ၊ ခမ်းလဲ့ငဝ်ꩻခေါင်ႏ၊ ပွယ်ꩻလံꩻလဲ့ဝတ်၊ ငထဝ်းဆေꩻနာ၊ ဖြေꩻစာဆိတ်ဝတ်၊ စွစ်ꩻဖြန်ဆင်ꩻရယ်ꩻ၊ သယ်ႏလာႏပိုလီꩻ၊ ထီခမ်းလဲ့ဗွို၊ လိုꩻဖုံႏအံႏမ၊ ရာဇဟော်ခံꩻ၊ အဗွန်တံꩻခိုꩻ၊ ခါလဲ့ဖွိုႏညမ်း၊ ပိုခိုနဝ်ꩻရာꩻ၊ လာꩻလာꩻဖြေႏသꩻ၊ တလꩻဒွုမ်တဝ်း၊ ပွိုးငထဝ်းနမ်းကျင်ꩻ၊ နေင်ႏပေါင်ꩻနီဆီ၊ သီခမ်းနဝ်ꩻနေ၊ ဆုဲꩻချာနဝ်ꩻမꩻ၊ သမ်းထူႏသမ်းနေး၊ အဝေးပိုမူႏ၊ ဟောင်ရိုꩻနာမ၊ အသန္တုလမင်ꩻသာꩻ၊ စံႏစာꩻဝေင်ꩻဟော်၊ ဘိုးတော်ခင်ႏလမ်း၊ ဆီပါꩻနမ်းကျင်ꩻ၊ တဆင်ႏချင်ႏတဝ်း၊ ငထဝ်းမေတ္တာႏ၊ သတ္တဝါဝေနေႏ၊ ဆေႏကုဲဖျက်ယား၊ ထာꩻသားထာꩻသောင်း၊ ကောင်ကီထီဖူꩻ၊ ယူးဝါးဒေႏထ၊ ထူႏယꩻကားကထွာ၊ ဝင်ꩻမာဝင်ꩻပို၊ တရိုꩻဒွုမ်တဝ်း၊ ကားကထွာမာꩻကြွို့ꩻ၊ ထွိုꩻဆွဉ်ႏပဲစ်မာႏ၊ စခါကာလ၊ အသန္တုလမင်ꩻ၊ လက်ထက်ကာလ၊ နီဆီငတ်ꩻနေင်ႏ၊ ပွိုင်ႏဝေင်ꩻနင်းဟော်၊ ဘိုးတော်ခင်ႏလမ်း၊ ပွိုင်ႏခမ်းပွိုင်ႏထီ၊ ဆီပါꩻနမ်းကျင်ꩻ၊ ယိုယွင်ꩻထဲ့ဟူႏ၊ နီဆီငတ်ꩻနေင်ႏ၊ အခိန်ႏထင်ႏလꩻ၊ အနိစ္စခန္ဓာႏ၊ ပြောင်ꩻဗာႏနဝ်ꩻနေ၊ လဲဉ်းနဝ်ꩻအချာ၊ အသန္တုလပိုခို၊ ဟောင်ရိုꩻနာမ၊ အသာရမင်ꩻသာꩻ၊ စံႏစာꩻသော့ꩻထဲင်း၊ တလဲင်ꩻမျိုꩻနွယ်ႏ၊ ဝေးတန်ခင်ႏလမ်း၊ ငါကျမ်ႏဖျက်ယား၊ ဘုရာꩻရွှေထုံ၊ လုံးဟဝ်သဲင်ဒါႏ၊ ကျမ်ႏယားကျမ်ႏထူႏ၊ လူꩻတနံသိကျာꩻ၊ တနေႏသာႏတဝ်း၊ စဝ်းသိကျာꩻမင်ꩻ၊ မာꩻလင်ꩻလိုꩻခမ်း၊ ဟံႏတန်သီႏသွိုး၊ ထီတန်ငွိုးခြင်ꩻ၊ အဝ်ႏရင်းချာႏဗန်ႏ၊ အိမ်ဆန်တသွိုး၊ ကောင်ဆောင်ႏငွိုးပြုဲ၊ မျင်ꩻမိုႏဝုဲႏခွုန်ꩻ၊ တွို့ꩻကွဉ်ႏနဝ်ထင်ꩻ၊ သင်ႏစွဉ်ႏအတ်အတ်၊ နတ်တနံသိကျာꩻ၊ မာꩻလင်ꩻအွဉ်ႏစွꩻ၊ အွဉ်ႏဝꩻတွမ်ႏခွါ၊ သီဝါလို့ခန်း၊ မွိုးနန်းစခါ၊ သမဲင်ꩻစာကို၊ ရိုꩻထာပီးနဝ်ꩻ၊ ဟဝ်မတ်ဒီတောင်ꩻ၊ အကျောင်ꩻအလံꩻ၊ ပန်ꩻတကာႏသီးယာ၊ ဆုဲꩻချာနဝ်ꩻမꩻ၊ အသာရမင်ꩻသာꩻ၊ ရာဇာပိုခို၊ ဟောင်ရိုꩻနာမ၊ ဟတ္ထိရာဇာ၊ ပွိုင်ႏဝေင်ꩻနင်းဟော်၊ မွန်းပျောႏစံႏစာꩻ၊ ဖါစဝ်းခင်ႏလမ်း၊ တွမ်ႏမိဖြာꩻ၊ အမဉ်ꩻနဝ်ꩻကောင်း၊ ဟောင်ရိုꩻမိအိမ်၊ နဝ်ꩻတဲင်ခါမꩻ၊ ကထင်ႏဟွုန်ဗာႏ၊ မွိုးနန်းစခါ၊ ဘုရာꩻရွှေထုံ၊ စခါမွိုးနန်း၊ ဌာပနာႏငသေꩻ၊ ထာꩻယိုထာꩻနဝ်ꩻ၊ လုံးဟဝ်သဲင်ꩻမျတ်၊ ရတနာႏထာခံꩻ၊ တနံသိကျာꩻ၊ ကိုးပါးနဝရတ်၊ နတ်တနံသိကျာꩻ၊ ဌာပနာႏငသေꩻ၊ စေႏတီႏထာခံꩻ၊ အဝင်ꩻဒေါ့ꩻဖြဝ်ႏ၊ ဝွေꩻနဝ်ꩻထင်ႏဟွုန်၊ ပအိုဝ်ႏလက်ထက်၊ ဆက်ဆက်ပန်ပန်၊ ဟော်ခံꩻထင်ႏသေ၊ ငါလင်ꩻထေထန်ႏ၊ ရွဉ်ခံꩻအွိုးဆူꩻ၊ မူႏခိုသီးယာ၊ သီကျွိုက်နေကောင်း၊ ဟဲ့ꩻလောင်းမူꩻမတ်၊ ဖတ်ထွားကမ္ပယ်ႏ၊ ထင်ႏသေထင်ႏထီႏ၊ ညီႏညာႏထွူမꩻ၊ နမ်ႏနꩻစော်ꩻခွါ၊ တစိုးတွီးတင်း၊ ရေင်ရျာꩻမွုန်ႏသဲဉ်၊ တွမ်ႏမူꩻမတ်ပိုခို၊ ပအိုဝ်ႏဖြဝ်ꩻမန်း၊ တရော်ꩻလꩻတဝ်း၊ ထွာစွဉ်ႏတလဲင်ꩻ၊ မဲင်ꩻမျိုꩻစင်စင်၊ အီႏလင်ꩻထေထန်ႏ၊ တနံသိကျာꩻ၊ တနေႏသာႏတဝ်း၊ တလီꩻကမ္ဘာႏ၊ နွန်ႏထွာႏဖတ်ဖုံ၊ လုံးခြဲက်ဖွိုင်ꩻခဝ်၊ ကင်ဟဝ်မို့ꩻလောင်း၊ ကျောင်ႏငကီထင်ႏ၊ စွိုးဆင်ခမ်းဆူꩻ၊ ဟူႏလူးထဲ့လင်ꩻ၊ ခွန်သင်ဗြဟ္မာႏ၊ ခါလဲ့ဟဲ့ꩻခြဝ်၊ အငဝ်းကသင်ႏ၊ စွိုးဆင်ꩻမို့ꩻပြုဲ၊ ပီနုဲးဟံႏပြင်ꩻ၊ ချင်္သေ့ꩻကေထမ်၊ စတွမ်ႏဘီလူꩻ၊ ရူးတွမ်ႏတဗင်၊ ဆင်မီꩻကစ၊ တပ်ꩻအဲင်ႏလွဝင်ꩻ၊ ကင်ဟဝ်မို့ꩻလောင်း၊ မွူးရောင်ႏလဲင်ꩻခေ့ꩻ၊ မွူးပြေ့ꩻလာနွို့၊ တွိုꩻကွဉ်ႏနဝ်ထင်ꩻ၊ တလီꩻထင်ႏဖတ်၊ မူꩻမတ်စာႏရေႏ၊ ချွေရံႏပိုလီꩻ၊ လွေꩻညီꩻသဲင်ꩻရဝ်း၊ စဝ်းခွန်ဟော်ခံꩻ၊ ခွန်တန်အချာ၊ ခါလဲ့ဟံႏတန်၊ အိုန်ခန်းမျောႏလင်ꩻ၊ မင်ꩻမက်ကစ၊ တျာႏခꩻတျာႏဆေႏ၊ ဆချာဟော်တန်၊ တနံပြာႏလောင်း၊ ပြုဲကြောင်းတဗျ၊ ရာဇဟော်ခံꩻ၊ ကျံႏဖျက်ကျံႏယား၊ ဘုရာꩻရွှေထုံ၊ ဝေင်ꩻဒုံလဲ့ကုဲ၊ ခုဲႏတဲသယ်ႏလာႏ၊ ခါလဲ့အံႏမ၊ ဒုက္ခကေန်ꩻမျောင်ꩻ၊ ခြင်ꩻသောင်ဝေဒနာႏ၊ တသက်သာႏတဝ်း၊ လဲဉ်းနဝ်ꩻအချာ၊ သုဟတ္ထိရာဇာ၊ အပိုခိုနဝ်ꩻ၊ ဟောင်ရိုꩻနာမ၊ သူရသေနာ၊ ရာဇာအဝေး၊ ပွိုင်ႏသော့ꩻခမ်းထီ၊ တရာꩻဆီပါꩻ၊ ငထဝ်းနမ်းလောင်း၊ တစောင်ꩻစယ်ꩻတဝ်း၊ ငထဝ်းသီလ၊ သူရသေနာ၊ ရာဇာသံဝေ၊ ခွန်တန်လက်ထက်၊ ဒုဗ္ဘိက္ခန္တရကကပ်၊ သမ်းဆွိုက်သမ်းတွိုႏ၊ မူႏခိုပေႏတန်၊ ရဟန်ꩻသျင်ႏလူꩻ၊ ပူႏဆာႏသွုန်ႏသꩻ၊ ဒုက္ခဆင်ꩻရယ်ꩻ၊ ပစ္စေꩻဒဲဉ်ဟန်ႏ၊ ခွမ်ꩻလာꩻကွဉ်ကꩻ၊ အံႏမဆျာꩻပါꩻ၊ ရောႏဂါႏလဲ့ဒွုန်၊ တခွန်စိုန်ꩻလဲ့ခိုႏ၊ မင်ꩻမုရိုꩻလဲ့စွဉ်ႏစွုမ်ႏလာ၊ ဆင်ꩻရယ်ꩻသားပေႏ၊ တဖေႏနွိုင်ꩻဒွုမ်တဝ်း၊ နဝ်ꩻခါကာလ၊ ရွစ်ဖြမွူးဟာ၊ ငဝ်းငွါဟဲ့ꩻဟောင်၊ အလောင်ꩻအလျာႏ၊ စခါမွိုးနန်း၊ ဟော်ခံꩻထွာဗွေႏ၊ ထင်ႏဟွုန်ထင်ႏသေ၊ ရိုꩻဖေႏမူꩻမတ်၊ ပရိသတ်တင်ꩻလုဲ၊ သယ်ႏလာႏပိုလီꩻ၊ လိုꩻထီလိုꩻခမ်း၊ ပေႏတန်သီးယာ၊ ရတနာႏသိုမ်ပါꩻ၊ ကောသားကိုꩻကွယ်ႏ၊ အန္တရာယ်ႏတွမ်ႏဘေꩻ၊ ဝွေꩻသီးနဝ်ꩻလွစ်၊ နဝ်ꩻခါထင်ႏသေ၊ နေးတွမ်ႏစေႏတနာ၊ ဘုရာꩻတရာꩻသင်္ဃာႏ၊ ရတနာႏသိုမ်ဆူႏ၊ ကေꩻဇူꩻဂုဏ်ႏတောႏ၊ ပူႏဇောႏယားမ၊၊ လꩻယားချမ်ꩻသာႏ၊ ဩဇာႏဒဲဉ်ဟန်ႏ၊ ခါလဲ့ပြန်ꩻပြော်ꩻ၊ ရောႏဂါႏလဲ့ကင်ꩻ၊ မင်ꩻမုလဲ့ညီႏ၊ ထီခမ်းလဲ့ဟဝ်၊ လꩻဖျောဝ်ချမ်ꩻသာႏ၊ သုရာသေန၊ ရာဇသံဝေ၊ ခွန်တန်အစိုး၊ ယိုလဲ့ရံးကွုန်ꩻ၊ ဒဲဉ်ဟန်ႏဝပြော်ꩻ၊ ဟော်ခံꩻနဝ်ꩻလက်ထက်၊ ပွိုးကံကျင်ꩻတရာꩻ၊ ဆီပါꩻနဝ်ꩻမꩻ၊ အာႏဏာႏလဲ့ထို၊ တံꩻခိုꩻလဲ့တန်၊ ဗွန်ကံႏလဲ့အဝ်ႏ၊ တပွိုင်ရန်ႏသူႏ၊ စဲ့ꩻမမီႏလွဉ်၊ ဗွူဖေါင်းတွမ်ႏကဝ်ႏ၊ နေးတွမ်ႏငဝ်းငွါ၊ ဂါထာႏမန္တံႏ၊ ဓိဋ္ဌာန်ႏနေးတွမ်ႏ၊ ကဝ်ႏတွမ်ႏဗွူဖေါင်း၊ ကျောင်ႏထင်ႏမို့ꩻကီ၊ ပီနုဲးတမူ၊ ဘလျက်ဒေငခေါင်ႏ၊ ကျောင်ႏဝုဲးအဲင်ႏဟိုမ်၊ တပွိုင်ရန်ႏသူႏ၊ ထိုꩻမားပꩻပြုဲ၊ ဟုဲလုဲယားဒွါႏ၊ လာꩻလာꩻဖြေႏသꩻ၊ တလꩻစွဉ်ႏတဝ်း၊ ပွိုးစွဉ်ႏဘုရာꩻ၊ တရာꩻသင်္ဃာႏ၊ သိုမ်ပါꩻကေꩻဇူꩻ၊ အလူႏဆီပါꩻ၊ တရာꩻဆီဆူႏ၊ နေးထူႏကံကျင်ꩻ၊ သတင်ꩻသီႏလ၊ နဝ်ꩻမꩻဟော်ခံꩻ၊ သမ်းမဉ်လꩻသောက်သား၊ ဘုရာꩻရွှေထုံ၊ မုနိသဲင်လဝ်၊ ဟဲ့ꩻတွမ်ႏမူꩻမတ်၊ စာႏဖတ်စာႏရေꩻ၊ ပေႏတန်သီးယာ၊ သီလွေꩻချꩻလင်ꩻ၊ ဘုရာꩻရွှေထုံ၊ ထီꩻတောႏဆူꩻတ၊ ခွေမဉ်လꩻငါႏ၊ မဏိသဲင်လဝ်၊ ငဝ်းငွါထင်ႏရိုꩻ၊ အမတ်ခါလဲ့၊ ထိုမ်ႏဟဲ့ꩻထိုမ်ႏဟောင်၊ လိုꩻကောထင်ႏဒါႏ၊ ဘုရာꩻရွှေထုံ၊ ဖေႏတွမ်ႏလက္ခ၊ ဆုꩻလာဘ်သပ္ပကာႏ၊ အာအာတန်တန်၊ ရွဉ်ခံꩻကစ၊ ကားသꩻကအဝ်ႏ၊ အီႏအပ်အီႏဖေႏ၊ တောငါလွေꩻထူႏ၊ မီႏလꩻဒါႏငါ၊ တထိန်ꩻတဝ်းကွေး၊ ခွုင်းနဝ်ꩻခွုင်းယို၊ အငိုꩻအီႏဖေႏ၊ တောငါလွေꩻထူႏ၊ မဉ်လꩻသေဆင်၊ စွိုင်ႏနင်ꩻပိုမာ၊ ခါလဲ့နေးတ၊ ယံကျောင်ꩻကျမွုန်း၊ ခွန်တန်ဟော်ခံꩻ၊ ငဝ်းငွါရိုꩻဖေႏ၊ ပေႏတန်လိုꩻဝေင်ꩻ၊ ဖြေင်းဗွာကစ၊ တရတပါꩻ၊ တရျာꩻတစွိုး၊ မူႏခိုပေႏတန်၊ ဟော်ခံꩻထွာဗွေႏ၊ ပွိုးစွဉ်ႏမဉ်လꩻ၊ သꩻဖူꩻသꩻကို၊ အွဉ်ႏဒေါ့ꩻရိုꩻဖြဝ်ႏ၊ ခွုင်းနဝ်ꩻခွုင်းယို၊ လိုꩻကောထင်ႏတာႏ၊ မီႏထွာကလꩻ၊ နန်းဗာႏတဝ်းနော၊ ဟော်ခံꩻရာဇ၊ စွိုက်ငါစွိုက်ကျံႏ၊ ထင်ႏတွိုးမွူးဟာ၊ တလီꩻတန်ထွာႏဖတ်၊ ဟော်တန်လောင်းကီ၊ သီႏသွိုးဝေ့ꩻပန်ႏ၊ ငဗန်ႏချာငါ၊ ဟော်ထာဟော်ခံꩻ၊ ထင်ႏစံႏဖြေႏသꩻ၊ တလꩻဒွုမ်တဝ်း၊ ပီနုဲးမေႏတင်ႏ၊ တျာႏလင်ꩻခမ်းလော့၊ တမို့ဖြေင်းယိန်၊ မီႏဗေင်ႏအွꩻအံႏ၊ လဲင်ꩻရံꩻလဲင်ꩻကုဲ၊ ဝုဲဝင်းချာငါ၊ ဆာအွူနမ်းတဗာႏ၊ တသက်သာႏတဝ်း၊ ပွိုးငထဝ်းနမ်းကျင်ꩻ၊ နဝ်ꩻမꩻဖျင်နော၊ ဟော်ခံꩻစခါ၊ အမေနာမ၊ သူရာသေန၊ ရာဇသံဝေ၊ လစ်ꩻဆီလစ်ꩻနေင်ႏ၊ ပွိုင်ႏဝေင်ꩻနင်းဟော်၊ ပွိုးစွဉ်ႏလောဘ၊ အာႏတရꩻနွောင်ꩻတဝ်း၊ အုံအဝ်ႏလိုꩻခမ်း၊ မွန်းပျောႏစံႏစာꩻ၊ ဟော်ထာဟော်ခံꩻ၊ ချွေႏရံႏပိုလီꩻ၊ စီꩻပွါꩻချမ်ꩻသာႏ၊ ရာဇာဟော်ခံꩻ၊ ပွိုးစွဉ်ႏမဉ်လꩻ၊ သူရသေနာ၊ ဘုရာꩻရွှေထုံ၊ မဏိသဲင်လဝ်၊ ထွာစဝ်းထွာခွန်၊ ဗွန်တွမ်ႏတံꩻခိုꩻ၊ တန်ထိုယုယက်၊ အကုသိုလ်ႏကံႏ၊ နမ်းကဝ်ႏယားဒွါႏ၊ ရာဇာဟော်ခံꩻ၊ မွိုးနန်းစခါ၊ ဗာႏဖူꩻအပဲစ်၊ ရွစ်ဖူꩻထꩻတကုဲ၊ တင်ꩻလုဲမူႏခို၊ တန်ထိုယုယက်၊ တရက်တဝ်းနမ်း၊ ခံႏဗာႏနဝ်ꩻထွူ၊ နင်းဟွူသေနာႏ၊ ရွစ်ဖူႏထာꩻတကုဲ၊ တင်ꩻလုဲမူꩻမတ်၊ စာႏဖတ်စာႏရေꩻ၊ ခံႏဗာႏဘေꩻတံႏ၊ ပွိုးစွဉ်ႏဟော်ခံꩻ၊ လိုꩻတန်ထွာဗွေႏ၊ ဝွေꩻနမ်းနဝ်ꩻခါ၊ တရာꩻဆီပါꩻ၊ ငထဝ်းနမ်းလောင်း၊ တစောင်ꩻတဝ်းမꩻ၊ မူꩻမတ်ပေႏတန်၊ ခံႏလွဉ်ꩻဗာႏအီ၊ နမ်းကီဝေဒနာႏ၊ ရာဇာကေꩻဇူꩻ၊ မူႏခိုပေႏတန်၊ ယံဖေႏသွင်ꩻသꩻ၊ သံဝေဂတရာꩻ၊ ရွှေထုံသမဲင်ꩻ၊ လိတ်သဲင်လုဲꩻခံꩻ၊ ထန်ႏလွဉ်ပီးနဝ်ꩻ၊ ဒီဟဝ်ထွားဖတ်၊ နေးနာႏမတ်တောင်ꩻ၊ သူႏတောႏကောင်ꩻသီးယာ၊ သူရသေနာ၊ ရာဇာဟော်ခံꩻ၊ ခွန်တန်စခါ၊ ဗာႏဖူꩻအပဲစ်၊ တွိုႏဖူꩻထာꩻတကုဲ၊ တင်ꩻလုဲသမုတ်၊ စက်ဆုတ်ပသံ၊ အင်းကျံႏဖျက်ယား၊ ဘုရာꩻကေꩻဇူꩻ၊ မူႏခိုပေႏတန်၊ သမုတ်သွမ်ꩻတွေ၊ ဝေဒနာႏလဲ့စပ်၊ နမ်းလောင်းနမ်းကီ၊ ပီနုဲးတဖြို့ꩻ၊ လွမ်ဒို့ꩻနမ်းတဗာႏ၊ ဝေဒနာႏဒွေါင်ႏတန်၊ တွတ်ꩻတန်မင်ꩻဠက်၊ ပွေꩻကွက်မဉ်ဗေင်ႏ၊ ယွိုင်ႏသဲင်ꩻဝုဲဝင်း၊ ရင်းစားပသံ၊ ပီနုဲးထွီႏလုံ၊ နွုမ်ꩻဖုံးနွုမ်ꩻသေင်၊ သို့အေႏသို့ဆီႏ၊ နွုမ်ꩻတရီနွုမ်ꩻကုဲ၊ ဝုဲဝင်းယွိုင်ႏသဲင်ꩻ၊ လာꩻလာꩻတဲင်နဝ်ꩻ၊ အဝင်ꩻတင်ꩻလုဲ၊ ကဲ့ꩻရဲ့ꩻသမုတ်၊ သုက္ချသွမ်ꩻတွေ၊ ပေႏတန်ဖြားဆား၊ လွꩻထွားလွꩻထီႏ၊ ပီနုဲးရာႏအိင်ႏ၊ နွုမ်ꩻသေင်နွုမ်ꩻလီး၊ ပီနုဲးနုက်ခက်ꩻ၊ စက်ဆုပ်ပသံ၊ ပေႏတန်ဖြားဆား၊ ဝွေꩻသီးစာႏဖတ်၊ မူꩻမတ်ပေႏတန်၊ ပသာထင်ႏခန်း၊ ဝေင်ꩻတန်အသောင်၊ ထီခြောင်အထျꩻ၊ ဝေင်ꩻဆတွို့ꩻနဝ်၊ စန္ဒနဒီ၊ ထီခြောင်ပြက်ꩻကွဉ်ႏ၊ မွိုးနန်းစခါ၊ သူရသေနာ၊ ရာဇာဟော်ခံꩻ၊ ခင်ႏလမ်းနေႏရာႏ၊ အဝ်ႏတွိုႏငခါ၊ ငဝ်းငွါဦꩻတန်ꩻ၊ ထိုꩻမားနွောင်ꩻတဝ်း၊ ပွိုးပီးနဝ်ꩻမꩻ၊ တကာႏသီးယာ၊ ဘုရာꩻပဉ္စဝ်း၊ မော့ꩻနဝ်ꩻဥစ္စာႏ၊ သင်္ဃာႏပစ္စေꩻ၊ ပေႏတန်ဆေ့ꩻအာ၊ တရိုꩻဗာႏတဝ်း၊ အပဲစ်တန်ကတ်၊ ထူႏကြွို့ꩻမွုန်းနော၊ အုံအဝ်ႏလောက၊ သူရသေနာ၊ အုံအဝ်ႏဝေင်ꩻသောင်၊ တောင်စွဉ်ႏတယ်ႏဝေင်ꩻ၊ သေင်ႏတန်မုဲအော၊ ကလောမွူးဟေ့ꩻ၊ စီႏစပ်နိုꩻဆောႏ၊ သူႏတောႏတကာႏ၊ ဘာႏဝနာႏအုံကံ၊ သဉ်ထံဆောက်တယ်ႏ၊ သွဉ်းသယ်ႏပိုလီꩻ၊ ဆီပါꩻဗွို့ꩻနမ်း၊ ကမ္မဋ္ဌာန်ꩻနေးလွ၊ ပဉ္စသီလ၊ နေးခံႏစောင်ꩻချုပ်၊ ကိုနုတ်ဣန္ဒြေႏ၊ စေႏတီႏဘုရာꩻ၊ တယ်ႏယားကိုꩻကွယ်ႏ၊ ခေါက်ဝုဲႏခွုန်ꩻယား၊ ဘုရာꩻရွှေထုံ၊ မျစိန်ႏရွေစာရံ၊ မျသိန်းတန်ကျောင်ꩻတောႏ၊ ဂေါတမကိုႏစာꩻ၊ ရာဇာဟော်ခ့ꩻ၊ ခွန်တန်သေနာ၊ ဝေင်ꩻဆတွို့ꩻနဝ်၊ ကောင်နဝ်ꩻအလောင်း၊ ဆောင်ႏနဝ်ꩻအနာ၊ ညီႏညာတွိုင်ႏပင်ႏ၊ တယ်ႏထင်ႏဘုရာꩻ၊ ကောင်ဖုဲးစေႏတီႏ၊ ထာꩻပူႏကောင်လောင်း၊ ကောင်ႏမူꩻသူရာ၊ စခါရာဇာ၊ ဌာနဝေင်ꩻခူꩻ၊ ခွန်တွက်ခင်ႏလမ်းအုံ၊ မာꩻဒုံတယ်ႏဝေင်ꩻ၊ စန္ဒနဒီ၊ ထီခြောင်ပြက်ꩻကွဉ်ႏ၊ ဟော်ခံꩻခါလဲ့၊ ဝေဒနာႏနမ်းလောင်း၊ စင်ကြောင်းရေꩻယား၊ ဝေဒနာနမ်းကီ၊ ကလောမွူးဟေ့ꩻ၊ ခွꩻဟဝ်ရျူႏယား၊ အံႏအွꩻဗာႏအထီ၊ ဆီပါꩻတရာꩻ၊ ခါလဲ့နေးထူႏ၊ သူႏတောႏထုံꩻကန်၊ ခံႏယားနဝ်ꩻမꩻ၊ ကာယကွဲဟဝ်၊ နဝ်ꩻထွူကွိုနဲ၊ တင်ꩻလုဲသီးယာ၊ ငခါလောက၊ တကာႏမတကာႏခို၊ လိုꩻလမ်းလိုꩻကျောင်ꩻ၊ ဒီဟဝ်တောင်ꩻမတ်၊ လိတ်ဖတ်လင်္ကာႏ၊ သာရခွေသွဉ်း၊ နောင်းအွဉ်းစာႏရေꩻ၊ ထေထန်ႏတဲမ်းကူꩻ၊ စာမူပေႏလာႏ၊ ထဲ့ဒါႏမကောင်း၊ ပကျောင်ꩻဖါနင်၊ ပေါစင်ꩻရောက္ကာ၊ မီႏမော့ꩻဒါႏကွင်ꩻထဲ့၊ ကဲ့ꩻရဲ့ꩻမွုန်းခွေ၊ ထူႏအရေꩻဖျင်သော့ꩻ၊ လျော်ရော့ꩻတွမ်ႏကျမ်ꩻ၊ သညင်ꩻမေတ္တာႏ၊ မာꩻလွိုမာꩻအယွမ်ꩻ၊ ထိုမ်ႏထွားလွိုပုဲႏ၊ သုဲခြောင်ရော့ꩻရာꩻ၊ ခွင်ꩻသာႏနောလောင်ꩻ၊ ခွေသွဉ်းအွဉ်ႏစွꩻ၊ တံဆာရင်းခြွိုင်း၊ ရွှေထုံသမဲင်ꩻ၊ လိတ်သဲင်လုဲꩻခံꩻ၊ ထန်ႏလွဉ်ပီးနဝ်ꩻကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။

ပွိုးပီးနဝ်ꩻမꩻ၊ မတ်နာႏစဲင်းစဲင်း၊ ထေထဲင်းဖေႏခြာ၊ ဆုဲꩻချာသူရ၊ ရာဇသေနာ၊ စံႏစာꩻပွိုင်ႏဝေင်ꩻ၊ တလဲင်ꩻမျိုꩻနွယ်ႏ၊ ခွန်တန်ပိုခို၊ ဟောင်ရိုꩻနာမ၊ ရာဇဇော်နီ၊ စံႏစာꩻပွိုင်ႏသော့ꩻ၊ ပါစဝ်းခင်ႏလမ်း၊ ဟော်တန်လောင်းကီ၊ ဟဲ့ꩻဟောင်မူꩻမတ်၊ စေꩻစိန်ႏဟော်ကီ၊ အမတ်သီးယာ၊ ဗွောင်ထွားတွိုက်တောႏ၊ မင်ꩻစဲဉ်ႏခွန်ဆက်၊ တွိုက်တောႏအဖူꩻ၊ ထူႏထန်ႏထေဖတ်၊ လိတ်လုဲင်ꩻကမ္ပယ်ႏ၊ ထင်ႏသေထင်ႏထီႏ၊ တအုံဗွုန်ႏတဝ်း၊ ဖါစဝ်းခင်ႏလမ်း၊ ဟော်ခံꩻနေရာႏ၊ မွိုးဖါကဗေင်ႏ၊ တသာနဝ်ꩻရာꩻ၊ ပီနုဲးတနေင်ႏ၊ မုဲꩻခါထာꩻလေ၊ မဉ်ထိုꩻမဉ်ထန်ႏ၊ ကွဲနန်းငချာ၊ သီကုဲအာငါႏ၊ နီဖါနီမွိုး၊ ခံႏသော့ꩻဝေဒနာႏ၊ ဝေင်ꩻဖြုံႏယိုနေ၊ ရောႏဂါႏတွတ်ꩻတန်၊ ထိုꩻထန်ႏဗာႏဝေင်ꩻ၊ သေင်ႏတန်အခြာ၊ သီတငါလယ်ႏဒွါႏ၊ နီဖူနီဖီ၊ ဝွေꩻသီးလဲ့ခါ၊ တနံပြာႏလင်ꩻ၊ လမ်းပါႏဟော်ပြုဲ၊ သီကုဲနေနေ၊ ဝွေꩻသီးမူꩻမတ်၊ တလီꩻဖတ်ခြို့ꩻ၊ ဟံႏတန်အွုန်မျောႏ၊ သီကုဲနဝ်ꩻနေ၊ ထင်ႏသေထင်ႏထီႏ၊ ကမ္ပယ်ႏလိတ်လုဲꩻ၊ တအုံဗွုန်ႏတဝ်း၊ ဝေင်ꩻဖြုံယို၊ မီႏရိုꩻအုံလဲ့၊ ရမာႏဘေꩻတံႏ၊ တလွစ်တဝ်းဗာႏ၊ ငမ်းငါႏတရွိုင်ႏ၊ ထွိုင်ႏဆွုမ်ႏရျူယာႏ၊ ထင်ႏတွိုႏမွူးလေ၊ အွဉ်(ထန်ႏ)ခန်းဝေင်ꩻ၊ ထိုꩻထင်ႏသဲင်ꩻတော၊ ဆေ့ꩻကျန်ကြွန်ဖူꩻ၊ အိမ်ခေႏစာႏရင်ꩻ၊ ခွုင်းကားတလဲင်ꩻ၊ ပါသဲင်ꩻဆေ့ꩻအာ၊ သူရေင်နွုတ်ꩻရျာꩻ၊ သာလွိုသူဆီ၊ လွိုတကီသူလမ်း၊ ထိုꩻထန်ႏသဲင်ꩻအုံ၊ တယ်ႏဒုံတယ်ႏဝေင်ꩻ၊ မာꩻလမ်းဆို့ꩻဟော်၊ သိုမ်နေင်ႏထင်ႏလꩻ၊ နဝ်ꩻမꩻဖြွမ်းဝင်ꩻ၊ တယ်ႏထင်ႏစေႏတီႏ၊ ဆိတ်ကျွန်ꩻဒုံဖူꩻ၊ တထွူတန်ꩻတဝ်း၊ အဝ်ႏရန်းဝီႏဝွး၊ ဒုဗ္ဘိက္ခန္တရကပ်၊ သမ်းဆွိုက်သမ်းတွိုႏ၊ ခွန်တန်သမ်းသီ၊ ဆချာပိုခို၊ ဟောင်ရိုꩻနာမ၊ ရာဇဇောဝေ၊ စံႏစာꩻပွိုင်ႏသော့ꩻ၊ ဖါစဝ်းခင်ႏလမ်း၊ ပျုစုတဝ်းဒွုမ်၊ ငမ်းသꩻနဝ်ꩻနေ၊ တအုံဗွုန်ႏတဝ်း၊ ထိုꩻထန်ႏသဲင်ꩻတော၊ တိတ်ကလာကောင်ထျꩻ၊ ဆအဖဲ့ꩻကွဉ်ႏ၊ တယ်ႏဒုံတယ်ႏဝေင်ꩻ၊ တလဲင်ꩻအမျိုꩻ၊ ဟောင်ရိုꩻဆေ့ꩻအာ၊ သူရေင်ဗွေမန်ႏ၊ ဆို့ꩻတွမ်ႏဟော်ဝါ၊ ဘုရာꩻလဲ့တယ်ႏ၊ ဆောင်ႏခယ်ႏကောင်လောင်း၊ ဝွေꩻသီးဖန်ဖေႏ၊ အမေနာမ၊ ကျက်တယ်ရိုꩻနော၊ သဲဖြူခြောင်လောင်း၊ လိတ်မန်းတောင်ႏမာႏ၊ လွဉ်ဗာႏပီနဝ်ꩻ၊ ဒီဟဝ်မတ်တောင်ꩻ၊ ရာဇာဇောဝေ၊ တယ်ႏဒုံအုံဝေင်ꩻ၊ တဆီနီနေင်ႏ၊ သဲင်ꩻအဝ်ႏသဲင်ꩻအုံ၊ တပျောႏသꩻတဝ်း၊ နဝ်ꩻမꩻထိုꩻထန်ႏ၊ မာꩻသဲင်ꩻအုံတော၊ ပနားဗွာဖွေါင်ꩻ၊ ရွှေလပိုထျꩻ၊ တယ်ႏဒုံတယ်ႏဝေင်ꩻ၊ မာꩻလမ်းဆို့ꩻဟော်၊ နိုꩻဆောႏပိုလီꩻ၊ ဖြွမ်းလွညီႏဝင်ꩻ၊ တယ်ႏထင်ႏစေႏတီႏ၊ တင်ꩻထီꩻဟွဲဟိန်ႏ၊ ဘိသိက်မင်္ဂလာႏ၊ သေႏချာႏထွူမꩻ၊ တလဲင်ꩻဘာႏသာႏ၊ သမုတ်ဖန်ဖေႏ၊ ကျက်ကသာရိုꩻနော၊ သူႏတောႏသီးယာ၊ ရာဇဇော်ဝေ၊ ခွန်တန်လက်ထက်၊ တယ်ႏထောင်ꩻငသေꩻ၊ ကျိုက်ကသာဝေင်ꩻဖူꩻ၊ မူႏခိုပေႏတန်၊ ယံသေရဝ်းဗာႏ၊ ဝေင်ꩻနဝ်ꩻနာမ၊ မီႏထွာပအိုဝ်ႏ၊ ပနားဗွာဖွေါင်ꩻ၊ တောင်ႏမာႏဘာႏသာႏ၊ နဝ်ꩻရာꩻသမုတ်၊ ကွဲဖြူကျွန်းနော၊ ရာဇဇောဝေ၊ သက်တောႏထင်ႏလꩻ၊ နွုတ်ꩻဆီနီနေင်ႏ၊ ခန္ဓာႏသမ်းပြောင်ꩻ၊ ဆုဲꩻချာပိုခို၊ ဟောင်ရိုꩻနာမ၊ ရာဇပဇောတ၊ စံႏစာꩻပွိုင်ႏဝေင်ꩻ၊ ဖါစဝ်းခင်ႏလမ်း၊ လစ်ꩻဆီနီနေင်ႏ၊ ထိုꩻထန်ႏသဲင်ꩻတော၊ တလပသိင်း၊ တယ်ႏဒုံတယ်ႏဝေင်ꩻ၊ တလပသိမ်း၊ ဝေင်ꩻခင်သာႏယာႏ၊ ဟံသာဝတီ၊ ပီပီလွဝင်ꩻ၊ စယ်ꩻပင်ႏသာႏယာႏ၊ ဩဇာႏဒဲဉ်ဟန်ႏ၊ ခါလဲ့ပြန်ꩻပြော်ꩻ၊ ဟော်ခံꩻလက်ထက်၊ ပိုခိုနဝ်ꩻရာꩻ၊ အမေနာမ၊ ရာဇပမော၊ သက်တောႏထင်ႏလꩻ၊ တဆီလစ်ꩻနေင်ႏ၊ ဖါစဝ်းသမ်းသီ၊ ဆချာပိုခို၊ ဟောင်ရိုꩻနာမ၊ ရာဇပမော၊ စံႏစာꩻပွိုင်ႏဝေင်ꩻ၊ တလပသိမ်း၊ နေင်ႏပေါင်ꩻထင်ႏလꩻ၊ ဟောင်ရိုꩻသူဆီ၊ လွိုတကီငတ်ꩻနေင်ႏ၊ အွဉ်ႏကုဲဝေင်ꩻဟော်၊ ခန္ဓာႏသမ်းပြောင်ꩻ၊ ဆချာပိုခို၊ ဟောင်ရိုꩻနာမ၊ ရာဇဥပါ၊ မာꩻနမ်းထိုတန်၊ ပွိုင်ႏခမ်းပွိုင်ႏထီ၊ ဆရာꩻဆီပါꩻ၊ ထွားတီစောင်ꩻစယ်ꩻ၊ ဆောက်တယ်ႏကံကျင်ꩻ၊ သိုမ်ဆီနီနေင်ႏ၊ ခန္ဓာႏသမ်းပြောင်ꩻ၊ ဆုဲꩻချာပိုခို၊ သုတ္တဥပါ၊ စံႏစာꩻပွိုင်ႏဝေင်ꩻ၊ ဖါစဝ်းခင်ႏလမ်း၊ တလပသိမ်း၊ ထင်ႏညဟွုန်ဗွိုႏ၊ ထိုꩻထန်ႏသဲင်ꩻအုံ၊ ဟံသာဝတီ၊ ထီကျိုပြက်ကွဉ်ႏ၊ ရွှေမော်ဓောဒွို၊ မာꩻလမ်းဆို့ꩻဟော်၊ ပုဂ္ဂိုလ်ႏဝေင်ꩻဖူꩻ၊ နီဆီသွစ်ꩻနေင်ႏ၊ ခန္ဓာႏသမ်းပြောင်ꩻ၊ ဆုဲꩻချာပိုခို၊ ဟောင်ရိုꩻနာမ၊ စေတိယမင်ꩻသာꩻ၊ မာꩻနမ်းလိုꩻတန်၊ ပွိုင်ႏခမ်းပွိုင်ႏထီ၊ ပုဂ္ဂိုလ်ႏဝေင်ꩻဖူꩻ၊ တရာꩻဆီပါꩻ၊ တစောင်ꩻတဝ်းဒွုမ်၊ ဒဲဉ်ဟန်ႏလဲ့ကား၊ ဝေဒနာႏလဲ့ဒွုန်၊ တခွန်စိုန်လဲ့ခိုႏ၊ လိုꩻလဲ့ကျမ်ꩻထမ်ꩻ၊ ဒုဗ္ဘိက္ခန္တရကပ်၊ သမ်းရွစ်သမ်းတွိုႏ၊ မူႏခိုပေႏတန်၊ ခါလဲ့အံႏမ၊ သွစ်ꩻနေင်ႏသွစ်ꩻလာ၊ သီခန်းနဝ်ꩻနေ၊ ဆုဲꩻချာဖူးပေႏ၊ စံႏစာꩻပွိုင်ႏဝေင်ꩻ၊ သုဒ္ဓိရာဇာ၊ မာꩻနမ်းလိုꩻတန်၊ ပွိုင်ႏခမ်းပွိုင်ႏထီ၊ တရာꩻဆီပါꩻ၊ ထွားတီစောင်ꩻစယ်ꩻ၊ ဆောက်တယ်ႏကံကျင်ꩻ၊ ဟံသာဝတီ၊ ရာဇာဟော်ခံꩻ၊ မွိုးနန်းစခါ၊ တရာꩻကျမ်ꩻဂန်ႏ၊ ထန်ႏလွဉ်ပီးနဝ်ꩻကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။

ပွိုးပီးနဝ်ꩻတဲင်၊ ယလဲင်ႏနော၊ ဆုဲꩻချာနဝ်ꩻမꩻ၊ ရာဇဟော်ခံꩻ၊ အမေနာမ၊ ဥပလမင်ꩻသာꩻ၊ ဖါစဝ်းအပ်ဖေႏ၊ နေရာႏထီခမ်း၊ စံႏစာꩻပွိုင်ႏဝေင်ꩻ၊ သိုမ်နေင်ႏသိုမ်လာ၊ ခန္ဓာႏသမ်းပြောင်ꩻ၊ ဖါစဝ်းခင်ႏလမ်း၊ တထွိုက်စံႏတဝ်း၊ လဲဉ်းနဝ်ꩻအချာ၊ ဖါစဝ်းဟော်ခံꩻ၊ သံးအင်းတောယား၊ ရာဇာအိမ်ရှေ့၊ အမေနာမ၊ မညလမင်ꩻ၊ မာꩻနမ်းဟော်ခံꩻ၊ သိုမ်နေင်ႏသိုမ်လာ၊ ဖါစဝ်းဟော်ခံꩻ၊ သုဒ္ဓိရာဇာ၊ ခန္ဓာႏသမ်းပြောင်ꩻ၊ ဆချာပိုခို၊ စံႏစာꩻပွိုင်ႏဝေင်ꩻ၊ နီဆီနွုတ်ꩻနေင်ႏ၊ သီခန်းနဝ်ꩻနေ၊ ဆုဲꩻချာနဝ်ꩻမꩻ၊ ဟော်ခံꩻဖူးခို၊ ဟောင်ရိုꩻနာမ၊ ဒွါဒသရာဇာ၊ ရာဇာဟော်ခံꩻ၊ ခွန်တန်ပိုခို၊ အုပ်စိုꩻပွိုင်ႏဝေင်ꩻ၊ ထိန်ꩻထွားခမ်းထီ၊ မိဖြာꩻလမ်းသား၊ မာနင်ꩻနဝ်ꩻကောင်း၊ သထုံပအိုဝ်ႏ၊ ပိုမူႏကွိုတဝ်း၊ ဝေင်ꩻတန်ပုဂ္ဂိုလ်ႏ၊ တလဲင်ꩻမျိုꩻနွယ်ႏ၊ ဟံသာဝတီ၊ ထီကျိုဖဲ့ꩻကွဉ်ႏ၊ သမ်းလွဉ်ဝုဲႏယား၊ ဘုရာꩻရွှေထုံ၊ လွမ်ꩻလာꩻပျုစု၊ ကောင်းမုစေႏတီႏ၊ ထီꩻတောႏကစ၊ ချꩻခံꩻတိတ်ꩻထာ၊ တနျာႏတသီး၊ ဆီမီးသွမ်ꩻပန်ꩻ၊ လူႏတန်ꩻပူႏဇောႏ၊ ရေႏရောႏထွူမꩻ၊ ခွယ်ချာခွုန်ꩻသဲင်ꩻ၊ ဟံသာဝတီ၊ ဝေင်ꩻလီဟော်ထာ၊ ဌာနနေရာ၊ ပုဂ္ဂိုလ်ႏအဝေင်ꩻ၊ သဲင်ꩻအုံယားဒွါႏ၊ နေရာခင်ႏလမ်းကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။ နဝ်ꩻခါကာလ၊ ဒွါဒသရာဇာ၊ ရာဇာဟော်ခံꩻ၊ ခွန်တန်ပိုခို၊ မွိုးဖါဖန်ဖေႏ၊ အမေနာမ၊ အရံမညမင်ꩻ၊ အိမ်ရှေ့မင်ꩻရာဇာ၊ မွိုးဖါအွဉ်ႏသေꩻ၊ အသက်ထင်ႏလꩻ၊ နီဆီသွစ်ꩻနေင်ႏ၊ ဖါစဝ်းဟော်ခံꩻ၊ ဒွါဒသရာဇာ၊ ခန္ဓာႏသမ်းပြောင်ꩻ၊ ဆုဲꩻချာပိုခို၊ စံႏစာꩻပွိုင်ႏဝေင်ꩻ၊ ဟံသာဝတီ၊ ထီꩻခံꩻအဗွေႏ၊ လွိုင်ႏလဲ့ခြွေခြာႏ၊ ဩဇာႏဒဲဉ်ဟန်ႏ၊ ပြန်ꩻပြော်ꩻလွိုင်ႏအာ၊ ငနာငဆေꩻ၊ ပေါင်ကျံႏဖြေꩻစာ၊ ကားခုဲလုပ်ꩻဆောင်၊ သွို့ꩻကောင်တွမ်ႏလုဲး၊ ခါလဲ့ခွဉ်ႏအဝ်ႏ၊ တံႏဘေꩻလဲ့ကင်ꩻ၊ ဆင်ꩻရဲꩻငထဝ်း၊ အုံဟဝ်အဝ်ႏသန်ꩻ၊ ထီခမ်းလဲ့ကွုန်ꩻ၊ လုပ်ꩻခွုမ်သွို့ꩻလုဲး၊ ရန်ႏသူႏရန်ႏဖက်၊ အီႏဖျက်အီႏယား၊ ထန်ႏဗွာထန်ႏသိုႏ၊ သေ့ꩻအဲင်ႏခေင်းယား၊ ခါလဲ့ငထဝ်း၊ အလာႏအမွူး၊ သဉ်ထွူးပင်ဖုံꩻ၊ အဆုံꩻလဲ့တန်၊ လာႏဗန်စော့ꩻဆွာꩻ၊ အရာႏလဲ့ဆꩻ၊ ခါလဲ့အခွဉ်ႏအဝ်ႏ၊ ခမ်းဟဝ်ထီသာႏ၊ ပွိုးစွဉ်ႏအထျꩻ၊ မူလထွာလွဉ်၊ ခွန်ကျင်ꩻတ၇ာꩻ၊ ဆီပါꩻစောင်ꩻစဲꩻ၊ ဆောက်တယ်ႏကံကျင်ꩻ၊ မင်ꩻမုꩻလဲ့ပေ့ꩻ၊ ကောဖေႏကောကွီ၊ ခါလဲ့ဟွုန်ပျောႏ၊ ရာမညမင်ꩻ၊ ခွန်တန်လက်ထက်၊ လိုꩻလဲ့သက်ဆွာꩻ၊ သိုမ်ပါꩻကပ်ကုဲ၊ အီႏလွဉ်အီႏတွိုႏ၊ တဟွုန်ဖိုတဝ်း၊ ပုဂ္ဂိုလ်ႏဝေင်ꩻကုံ၊ ကျိုက္ကပွန်ဘု၇ာꩻ၊ သိုမ်ပါꩻသိုမ်ဆူႏ၊ လွမ်ꩻလာꩻပျုစု၊ ကောင်မုꩻတယ်ႏဖျင်၊ ခွုမ်အင်ꩻသူႏသီ၊ ထီꩻတောႏကစ၊ ချꩻခံꩻတသီးတွိုး၊ ထွားတဗွိုႏဒါႏတဝ်း၊ ခွန်နဝ်ꩻလက်ထက်၊ သက်တောႏလဲ့ဆွာꩻ၊ မိဖြာꩻလမ်းသား၊ ခါလဲ့ရိုႏသေႏ၊ ထာꩻသေလဲ့အဝ်ႏ၊ ပွိုးစွဉ်ႏဟော်ခံꩻ၊ ဗွန်ကံႏတံꩻခိုꩻ၊ တန်ထိုဆွာꩻရွဲႏ၊ အရမညမင်ꩻ၊ တလဲင်ꩻခွိုꩻနွယ်ႏ၊ ကထီႏသတ္တဝါႏ၊ ခါလဲ့နစ်သက်၊ တနက်သီတဝ်း၊ လိုꩻနက်သီ မီႏထီႏမီႏမော့ꩻ၊ ဆွမ်ꩻသဲင်ꩻသော့ꩻထင်ႏ၊ ဖေႏပဲစ်ဖေႏတံႏ၊ အွဉ်ႏထမ်ႏထီသုဲꩻ၊ ကွတ်ꩻဆီကွတ်ꩻထမ်ႏ၊ ထွဉ်ႏလွေꩻထောက်ꩻသော့ꩻ၊ ဘုရာꩻတလင်ꩻ၊ အွဉ်ႏသုတ်သင်ႏတဖူꩻ၊ ထွဉ်ႏခူꩻဖူꩻမျောင်၊ ဝေင်ꩻသောင်ဝေင်ꩻဒွို၊ ပုဂ္ဂိုလ်ႏအရပ်၊ ခန်ꩻလိုꩻထွားတီ၊ စွုမ်ႏနီꩻစွုမ်ႏဟာ၊ ထွားချောင်ꩻထွားလဲမ်ꩻ၊ ပုဂ္ဂိုလ်ႏဝေင်ꩻသောင်၊ ခြောင်ဗေခြောင်တန်၊ ခွန်ကျင်ꩻတရာꩻ၊ ဆီပါꩻစောင်ꩻစယ်ꩻ၊ သက်ထိုးစိုးဆွာꩻ၊ သွစ်ꩻဆီနီနေင်ႏ၊ ပွိုင်ႏဝေင်ꩻနင်းဟော်၊ မွန်းပျောႏစံႏစာꩻ၊ ဟံသာဝတီ၊ ထီကျိုဖဲ့ꩻကွဉ်ႏ၊ တလဒုံဝေင်ꩻ၊ ရန်ကုံပုဂ္ဂိုလ်ႏ၊ ပွိုင်ႏလꩻသိုမ်ရပ်၊ သိုမ်ဒုံသိုမ်ဝေင်ꩻ၊ တလဲင်ꩻငစင်စင်၊ ပုဂ္ဂိုလ်ႏရန်ကုံ၊ တလဒုံဝေင်ꩻ၊ တလဲင်ꩻမျိုꩻနွယ်ႏ၊ ဟတ္ထိဒွါရ၊ နဒီထီခြောင်၊ ဟောင်ရိုꩻပြက်ꩻတွို့ꩻ၊ ပွိုင်ႏသဲင်ꩻလို့စင်၊ အရမညမင်ꩻ၊ ရာဇာဟော်ခံꩻ၊ လꩻထင်ႏရာဇဝင်ႏ၊ ပေႏလာႏအလောင်း၊ တောင်ႏမာႏလိတ်မန်း၊ ထန်ႏလွဉ်ပီးနဝ်ꩻ၊ ဒီဟဝ်မတ်တောင်ꩻ၊ ကျောင်ꩻတကာႏသီးယာ၊ ပွိုးပီးနဝ်ꩻမꩻ၊ တလဲင်ꩻသမုတ်၊ ရမညတိုင်း၊ တလဲင်ꩻသိုမ်ရပ်၊ ကခွပ်မꩻကွိုင်ႏ၊ ဝေင်ꩻတန်ပုဂ္ဂိုလ်ႏ၊ ဟောင်ရိုꩻရန်ႏကုံ၊ တလပသိမ်း၊ သိုမ်ဝေင်ꩻသိုမ်ဒုံ၊ မွန်းပျောႏသိုမ်စု၊ နုငပျိုသာႏယာႏကွိုနဲ၊ တင်ꩻလုဲသီးယာ၊ တဖုံႏလွမ်းတဉ်ဟွေး။ အရမညမင်ꩻ၊ ပွိုးစွဉ်ႏရိုꩻသေꩻ၊ လေမျတ်ဘုရာꩻ၊ တရာꩻသင်္ဃာႏ၊ တရာꩻဆီဆူႏ၊ နေးထူႏကံကျင်ꩻ၊ သုတ်သင်ႏလွမ်ꩻလာꩻ၊ ဘုရာꩻမွေႏတောႏ၊ ရေႏရောႏနဝ်ꩻမꩻ၊ ပွိုင်ႏမာꩻသိုမ်ဝေင်ꩻ၊ စေꩻစိန်ႏချမ်ꩻသာႏ၊ အရမညမင်ꩻ၊ မွိုးနန်းစခါ၊ တကာႏသီးနော်၊ မီႏထွာပဲစ်မာႏ၊ ဘုရာꩻတရာꩻသင်္ဃာႏ၊ ရတနာႏမျတ်သိုမ်ဆူႏ၊ မီႏထွာထူႏယား၊ နဝ်ꩻရာꩻစွိုးနုဲး၊ ထုဲႏပီစခါ၊ သူရသေနာ၊ ခံႏဗာႏအပဲစ်၊ ဒုက္ခဝေဒနာ၊ ရောႏဂါႏတွတ်ꩻတန်၊ ဟဝ်ငံးဒီသျောင်ႏ၊ မူႏမောင်ႏသီးယာ၊ ငခါယိုနီ၊ သီခွေကစ၊ သဲင်ꩻတနꩻတွူးငွါ၊ ဘုရာꩻငတ်ꩻဆူႏ၊ ဇမ္ဗူႏကျွန်ꩻနဝ်၊ ဗွေႏစဝ်းအနမ်း၊ ကံႏနေရွှေပြည်ႏနိဗ္ဗာန်ႏ၊ သညင်ꩻခွေသီ၊ နီနာꩻဗွန်ကံႏ၊ သန်ဟဝ်မွေးတဲ၊ သဲင်ꩻမော့ꩻသာႏသနာႏ၊ သဲင်ꩻညာႏစက်မျတ်၊ ဘဒ္ဒကပ်ကမ္ဘာႏ၊ စခါမွိုးနန်း၊ သဉ်ထံꩻအဝ်ႏမꩻ၊ သဲင်ꩻတနꩻဘုရာꩻ၊ တငါစွယ်ႏတောႏ၊ ပူဇောႏကွီဆုꩻ၊ ကောင်းမုစေႏတီႏ၊ ဒီဟဝ်လွေꩻဝုဲႏ၊ ကိုꩻကွယ်ႏလွနော၊ သူႏတောႏသီးယာ၊ လင်္ကာႏလိတ်ဖတ်၊ ရွှေထုံသမဲင်ꩻ၊ လိတ်သဲင်လုဲꩻခံꩻ၊ ထေထန်ႏထွက်ထူႏ၊ စာမူပအိုဝ်ႏ၊ ရိုꩻရိုꩻသာꩻသာꩻ၊ ဆရာႏကျမ်ꩻတတ်၊ ထွတ်ထန်ႏငသေꩻ၊ ပေႏလာႏအလောင်း၊ လိတ်မန်းတောင်ႏမာႏ၊ လွဉ်ဗာႏပီးနဝ်ꩻ၊ ဒီဟဝ်ထွားဖတ်၊ နေးနာႏမတ်တောင်ꩻ၊ နောင်ကလာꩻဆရာႏ၊ မေတ္တာႏပို့သ၊ သမဲင်ꩻစာႏမူႏ၊ ထွတ်ထူႏထေထန်ႏ၊ ပြန်ႏဖေႏပအိုဝ်ႏ၊ မူႏခိုပေႏတန်၊ ယံသေနာႏလွဉ်ꩻ၊ မန်းငဝ်းတောင်ႏမာႏ၊ ပါဠိဓိပ္ပါယ်ႏ၊ ယံနားလယ်ႏရဝ်း၊ မွိုးငဝ်းဖါငွါ၊ ဘာႏသာႏပအိုဝ်ႏ၊ ရိုꩻရိုꩻသာꩻသာꩻ၊ လင်္ကာႏလိတ်ဖတ်၊ အခွိုက်အုံအဝ်ႏ၊ သတင်သုံꩻကျောင်ꩻ၊ နောင်ကလာꩻရပ်၊ လျောက်ပတ်သာႏယာႏ၊ သေင်ႏရာႏဝါႏကဝ်ႏ၊ ယင်းမာꩻမောက်စံ၊ ကဝ်ႏတောင်ꩻကဝ်ႏတင်ႏ၊ အင်းချင်းမြေစူ၊ ထူꩻထူꩻဆန်ꩻဆန်ꩻ၊ တုဲထင်ႏကူစွိုး၊ မီႏတွိုႏလွိုန်ရုတ်ꩻ၊ တောအုပ်ခမ်းတခြာ၊ ဝိဟာကျောင်ꩻသောင်၊ မောင်းကြဲင်ႏတခေါ့ꩻ၊ ခဲမောက်တောင်းတီ၊ စံႏဖြီယို့ကတူႏ၊ မဉ်ဖူးတသီး၊ မွူးကီပင်လောင်း၊ အပေႏမဉ်အံႏ၊ ခါလဲ့လွေꩻထူႏ၊ အမူႏမဉ်အံႏ၊ ခါလဲ့လွဉ်ရိုꩻ၊ အခိုလွဉ်ဒဲ့ꩻ၊ ဆဲ့နှစ်ရာသီ၊ မီႏရိုꩻသေင်ႏရာႏ၊ တပျတ်ဒါႏတဝ်း၊ နဝ်ꩻမꩻဟောင်ရိုꩻ၊ မီႏတွိုႏလွိုန်စေစ်ꩻ၊ နုတ်အိမ်းဝါးကီႏ၊ ဆျာထီးဝါးတောင်ꩻ၊ ဖြေင်ꩻရောင်ဦꩻဟိုန်း၊ မွန်းမွန်းပျောႏပျောႏ၊ ကျောင်ႏထင်ꩻဝုဲးနဝ်၊ အုံအဝ်ႏအဲင်ႏအံႏ၊ စ့ႏပြင်ꩻသေင်ႏဆျာႏ၊ စတွမ်ႏတဖြေ၊ ပေႏပေႏတန်တန်၊ မူႏနံꩻခိုဗင်ႏ၊ ပရင်ꩻပရာꩻ၊ မာꩻလွေꩻထူႏအံႏ၊ ကျောင်ꩻကန်ႏအသောင်၊ ထီခြောင်အထျꩻ၊ နဝ်ꩻမꩻထင်ႏတွိုႏ၊ ဝါႏဆိုႏဝါႏခေါင်ႏ၊ ကျောင်ꩻသောင်ကျောင်ꩻထျꩻ၊ ယꩻထူႏတွမ်လွ၊ ကိုငကိုစီႏ၊ တဝီးရင်ႏရာႏ၊ ဟူႏဒွါႏဟံႏလောင်း၊ တရောင်းတရေꩻ၊ သေႏချောင်းသေႏချာႏ၊ စတွမ်ႏမောင်းကြဲင်ႏ၊ ကရိုꩻလဲ့ခါ၊ ရာႏဒွါႏတချာꩻ၊ အောင်ႏလျာရိုꩻလဲ့၊ ရာႏဒွါႏအခေါ်၊ ပြန်ႏပြော်ꩻကူစွိုး၊ နုပျိုသာႏယာႏ၊ စောက်အာႏတဒွီ၊ စောက်သွီႏမောက်ꩻစောက်ꩻ၊ မောက်ꩻလွစ်ꩻတောင်းလုဲ၊ ထူႏဒဲ့ꩻအံႏဒွါႏ၊ မောက်ကီကာႏရာႏကစ၊ ဒဲ့ꩻယꩻထူႏအံႏ၊ သင်္ခန်ꩻကျောင်ꩻသောင်၊ သာႏယောင်းသာႏယာႏ၊ စဝ်းဆရာႏဘုန်ႏကြီꩻ၊ တီပါလိုꩻခမ်း၊ အခွိုက်အုံအဝ်ႏ၊ သတင်ꩻသုံꩻကျောင်ꩻ၊ နောင်ကလာꩻအရပ်၊ ဌာနဒူရ၊ ထာပူႏအလောင်း၊ လိတ်စောင်ႏပအိုဝ်ႏ၊ ထေထန်ႏစပ်စီႏ၊ နေးတွမ်ႏကံကူႏ၊ သွꩻစျူအနာ၊ လျာဒါႏပရပဲက်၊ သတင်ꩻသုံꩻကျောင်ꩻ၊ နောင်ကလာꩻဆထင်ꩻ၊ သတင်ꩻသုံꩻကာလ၊ အွဉ်ႏသꩻစေတနာႏ၊ ဝီရိယပန်ꩻကျီꩻ၊ တနီꩻတစက်စက်၊ သက်သက်သာႏသာႏ၊ မဲ့ထွားစူမူ၊ စူꩻထွေသဲဉ်ꩻခွုမ်၊ ကံကူႏဖဝါႏ၊ စူစေႏလျာပပ်၊ ရေႏမတ်သင်္သရာႏ၊ နမ်းငါအရင်ꩻ၊ ထေထန်ႏငသေꩻ၊ ယံဖေႏသေနာႏ၊ တကာႏမတကာႏခို၊ ပအိုဝ်ႏကောင်ဖူꩻ၊ မူႏခိုပေႏတန်၊ ယံသေနားလယ်ႏ၊ ဓိပ္ပါယ်ႏဟဝ်ကုဲ၊ တင်ꩻလုဲတကာႏ၊ ဘုရာꩻရွှေထုံ၊ ဘုံꩻတံꩻခိုꩻတန်၊ မီႏထွာကိုꩻကွယ်ႏ၊ မီႏခေါက်ဝုဲႏဗာႏ၊ ဘုရာꩻမိတေ၊ ဖူးတွေ့ကျုံႏခွဲ၊ လွယ်ꩻတဝ်းမော့ꩻဗာႏ၊ ဘုရာꩻပဉ္စဝ်း၊ ခမ်းဟဝ်ခေမာႏ၊ တွိုႏဗာႏကွိုနဲ၊ တင်ꩻလုဲသီးယာ၊ ဆရာနာမ၊ ဦးဝိလာသဘုံႏကြီꩻ၊ ထီႏတောႏသညင်ꩻ၊ ခွန်နင်ꩻတကာႏ၊ ကျိုꩻစာꩻထေထန်ႏ၊ ပန်ꩻတကာႏသီးယာ၊ စခါဘုရာꩻ၊ ခါးလားစံႏစာꩻ၊ ဝေင်ꩻထာဝေင်ꩻခံꩻ၊ ဟော်ꩻထန်ႏငသေꩻ၊ အွဉ်ႏကုဲဖေႏတွမ်ႏ၊ သာႏသနာႏငတ်ꩻရေင်၊ ခါးလားဖေ့ဝတ်၊ ခါလားတမွတ်သာꩻ၊ ယံထွာကုသိုလ်ႏ၊ မူႏခိုအရင်ꩻ၊ ခွန်နင်ꩻအပွန်း၊ နန်းထောက်သညင်ꩻ၊ သတ္တဝါႏတင်ꩻလုဲ၊ ငမ်းကုဲငမ်းရွိုင်ꩻ၊ ငမ်းမွိုက်ငမ်းဟယ်၊ အွဉ်ႏနယ်ဖေႏတွမ်ႏ၊ သက်သေႏသက်ကန်ႏ၊ ပေႏတန်ဖြားဆား၊ ငမ်းအယူႏမာႏယွင်ꩻ၊ ငမ်းကွင်တဖူꩻ၊ ငမ်းတသူႏသေတဝ်း၊ တဖူꩻဟဝ်သာႏ၊ ငမ်းထောင်ပရာႏကြီႏကြွို့ꩻ၊ ငမ်းနွို့မာꩻထာꩻလုံꩻ၊ ကောင်တန်ကောင်ထို၊ ငမ်းသꩻရွိုးလွား၊ ငမ်းတတော်တဝ်း၊ နိဗ္ဗာန်ႏတွူးငွါ၊ ငမ်းတပါလွဉ်ꩻတဝ်း၊ ဗွေႏစဝ်းမိတေ၊ ဖူးပေႏအချာ၊ နမ်းငါမီႏပွင်ꩻ၊ ကံႏကောႏပင်ထျꩻ၊ မျပလ္လင်ႏဆကီ၊ တရာꩻထီအွီႏ၊ ဓမ္မစကျာႏ၊ မီႏဟော်ꩻကာလ၊ ဗုဒ္ဓရာဇာ၊ နမ်းငါမီႏပွင်ꩻ၊ မီႏကာႏသင်္ဘောꩻ၊ ငမ်းတပါရော်ꩻတဝ်း၊ ဗွေႏစဝ်းဘုရာꩻ၊ သာႏသနာႏအွဉ်ႏကုဲ၊ လိတ်(လုဲꩻ)စာႏပေႏ၊ ယံဖေႏထွားဖတ်၊ နေႏနာႏမတ်တောင်ꩻ၊ နောင်ကလာꩻဆရာႏ၊ ဦးဝိလာသဗွေႏဗွန်၊ စပ်စီႏထေထန်ႏ၊ လိတ်မန်းတောင်ႏမာႏ၊ ယံထွာပအိုဝ်ႏ၊ မူႏခိုမီႏဟွုန်၊ ပန်ဖေႏသေနာႏ၊ လင်္ကာႏလိတ်ဖတ်၊ သမဲင်ꩻစာမော်ကွန်း၊ ရင်းခြွိုင်းတံဆာႏ၊ သာႏယာႏလျောက်ပတ်၊ အံႏဖြာႏအံႏအော်ꩻ၊ ယော်ꩻခွယ်ꩻခီႏမွမ်ꩻ၊ တယွမ်ꩻနွောင်ꩻတဝ်း၊ ဗွေႏစဝ်းဘုရာꩻ၊ စခါမွိုးနန်း၊ ကကုသန်တုံ၊ ကောဏဂုံ ကဿပ၊ ဂေါတမဘုရာꩻ၊ လစ်ꩻပါꩻလစ်ꩻဆူႏ၊ ပွင်ꩻတောႏမူႏလဲဉ်း၊ သညင်ꩻခွေသီ၊ အစ်လူနီနာꩻ၊ ယံပါလွဉ်ꩻရဝ်း၊ ဗွေႏစဝ်းမိတေ၊ ဖူးပေႏအချာ၊ နမ်းငါကာလ၊ နဝ်ꩻမꩻနီဗွေႏ၊ အွဉ်ႏကုဲသေꩻဖေႏ၊ ဓာတ်မျတ်မွေႏတောႏ၊ မီႏပူႏဇောႏလူႏ၊ ဖူးတွေ့ဝုဲႏဗာႏ၊ ပေႏလာႏအလောင်း၊ လိတ်မန်းတောင်ႏမာႏ၊ လွဉ်ဗာႏပီးနဝ်ꩻ၊ ဒီဟဝ်ထွားဖတ်၊ နေးနာႏမတ်တောင်ꩻ၊ ရွှေထုံသမဲင်ꩻ၊ လိတ်သဲင်လုဲꩻခံꩻ၊ ထန်ႏလွဉ်ပီးနဝ်ꩻကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။

ပွိုက်ပွိုးတဲမ်းကူꩻ၊ စာမူလိတ်ယို၊ ဟောင်ရိုꩻပေႏတင်ႏ၊ ထွက်ထင်ႏတရေင်းတရ၊ မူလသက္ကရာဇ်၊ တစ်နစ်ဂဏန်ꩻ၊ ထေထန်ႏအနေင်ႏ၊ တရေင်နီရျာꩻ၊ သာလွိုသိုမ်ဆီ၊ လွိုတကီနွုတ်ꩻဗာႏ၊ လာနဝ်ꩻဟောင်ရိုꩻ၊ လွိုန်ရုတ်ꩻကွိုတဝ်း၊ မီႏထွာသာႏသနာႏ၊ နဝ်ꩻရာꩻရိုꩻကောင်း၊ နီရေင်သိုမ်ရျာꩻ၊ တဆီကွတ်ꩻဗာႏ၊ သမဲင်ꩻစာႏရွှေထုံ၊ သုဝဏ္ဏဘုမ္မိ၊ ရွှေထုံသမဲင်ꩻ၊ လိတ်သဲင်လုဲꩻခံꩻ၊ ထေထန်ႏတဲမ်းကူꩻ၊ စူခွုမ်ကံတာ၊ အနာသွꩻစျူ၊ စေးဖျူလောင်းကီ၊ တနီꩻတစက်စက်၊ သက်သက်သာႏသာႏ၊ ဆရာႏထေထန်ႏ၊ စာမူတောင်ႏမာႏ၊ မာꩻထွာပအိုဝ်ႏ၊ မွိုးဖါအငဝ်း၊ နဝ်ꩻမꩻခွေသွဉ်း၊ ထွားနုဲးဆရာႏ၊ စာမူလိတ်ကို၊ ခွေသွဉ်းတဲမ်းကူꩻ၊ ကုသိုလ်ႏနမ်းတာႏ၊ ဘုရꩻအခြွီ၊ ကွီအီအဆုꩻ၊ ပျုစတဲမ်းဗာႏ၊ တရာꩻလိတ်ယို၊ အကျိုꩻနဲဗွေႏဩ၊ သာႏဓု----သာႏဓု----။

ဟန်ႏသလဲင်ႏခါယို၊ ပွိုက်ပွိုးတဲမ်းဗာႏ၊ ဘုရာꩻရွှေထုံ၊ သမဲင်ꩻစာႏယို၊ မီႏတွိုႏနမ်းငါ၊ ချမ်ꩻသာႏနိဗ္ဗာန်ႏ၊ မန်ႏမန်ႏယံလꩻ၊ ခါလားလꩻတန်ꩻ၊ နိဗ္ဗာန်ႏအခါႏ၊ ယံသဲင်ꩻမော့ꩻဒွါႏ၊ မွိုးဒါႏဖါမျတ်၊ လျင်ႏတတ်ဉာဏ်ႏပညာႏ၊ အဋ္ဌာရသ၊ ပြဲ့ꩻဝꩻယံစုံႏလင်ႏ၊ ယောင်ꩻသမ္ပတ္တိ၊ ယံရမဲ့တင်ႏတယ်ႏ၊ ပစ္စေꩻဥစ္စာႏ၊ လိုႏရာꩻမတ၊ အံႏမမခြင်ꩻ၊ ဆင်ꩻရယ်ꩻမသေ၊ ဖေႏလူႏမယွမ်ꩻ၊ အွꩻအံႏမလို့၊ သုခချမ်ꩻသာႏ၊ စုတိမီႏတွိုႏ၊ မဂ်ဖိုလ်ႏနိဗ္ဗာန်ႏ၊ အမန်ႏနိရောဓ၊ ယံလꩻမွိုင်ယိုꩻယိုꩻကွိုနဲဗွေႏဩ၊ သာႏဓု----သာႏဓု------။

ခွေသွဉ်းကူꩻထန်ႏ၊ ကောဇာတွိုႏထွူ၊ တရေင်နီရျာꩻ သိုမ်ဆီနွုတ်ꩻဗာႏ၊ တထိန်ႏဆန်ꩻသိုမ်နီꩻ၊ မွူးနီꩻ တနင်ꩻနွေႏ၊ အခိန်ႏမွူးထွူႏ၊ ဖြီꩻစီꩻယဝ်းလꩻ၊ ကွိုနဲဗွေႏဩ၊ ဘုံႏထူꩻဘုရာꩻ၊ စခါမွိုးနန်း၊ သုဝဏ္ဏဘုမ္မိ၊ သူရိစန္တာႏ၊ မဟာႏမင်ꩻကြီꩻ၊ ထီꩻဗွာအဗွေႏ၊ ဧကရာဇ်ဟော်ခံꩻ၊ စံႏစာꩻပွိုင်ႏဝေင်ꩻ၊ ဟော်ခံꩻပအိုဝ်ႏ၊ မွိုးနန်းစခါ၊ တောင်ꩻပြန်ႏငသေꩻ၊ နီဗွေႏဘုရာꩻ၊ သာႏသနာႏအွဉ်ႏကုဲ၊ လိတ်လုဲꩻအကို၊ ညဆွာꩻငတ်ꩻနေင်ႏ၊ ယံဖေႏစယ်ႏပင်ႏ၊ သျင်ႏတောႏဘုရာꩻ၊ နဝ်ꩻခါရဟန္တာႏ၊ သာရိပုတ္တရာႏတွမ်ႏ၊ မဟာႏမောဂ္ဂလာန်ႏ၊ တောင်ꩻပြန်ႏလျောက်လဝ်း၊ ဩစဝ်းဩဗွေႏ၊ ယံဖေႏတယ်ႏသေꩻ၊ မွေးနေဩစဝ်း၊ ငဝ်းငွါပညပ်၊ ယံဖေႏနီဗွေႏ၊ အွဉ်ႏကုဲငသေꩻ၊ အသာႏသနာႏ၊ ညဆွာꩻတာႏသေႏ၊ ပညပ်နဝ်ꩻရာꩻ၊ ပိတ်ဝါးပိညပ်၊ တသေနွောင်ꩻတဝ်း၊ ဗွေႏစဝ်းဘုရာꩻ၊ သာႏသနာႏကရိုꩻနဝ်ꩻ၊ တော်ရာꩻသင်္သရာႏ၊ ဌာနအရပ်၊ ပညပ်မꩻဩ၊ ရဟန္တာႏဗွေႏ၊ သာရိပုတ္တရာႏ၊ မဟာမောဂ္ဂလာန်ႏ၊ တောင်ꩻပြန်ႏနဝ်ꩻမꩻ၊ ဂေါတမနီဗွေႏ၊ အွဉ်ႏကုဲငသေꩻ၊ ဖေႏတွမ်ႏသာႏသနာႏ၊ အနေင်ႏငတ်ꩻရျာꩻ၊ သမုတ်ရိုꩻနော၊ ယံဖေႏစယ်ႏပင်ႏ၊ ဘုရာꩻသျင်ႏဗွေႏ၊ ဝေနေယျအဖါ၊ မေတ္တာႏသညင်ꩻ၊ တင်ꩻလုဲစာတာႏ၊ ခွေနာနီသီ၊ ယံဖေႏသေနာႏ၊ ဆုဲꩻချာတလဲင်ႏ၊ ခွန်ဖီသိကျာꩻ၊ ဗြဟ္မာႏတနံ၊ တောင်ꩻပြန်ႏလျောက်လဝ်း၊ ဩစဝ်းဩဗွေႏ၊ ဝေနေယျအဖါ၊ သွဉ်းသီးတကာႏ၊ ဒေဝါႏခွန်လူꩻ၊ ဗြဟ္မာႏတနံ၊ အရင်ꩻအတာႏ၊ ဝေနေယျအတာႏ၊ သွဉ်းသီးအတာႏ၊ မေတ္တာႏသညင်ꩻ၊ ရက်ပဲင်ꩻဗဲင်းဩ၊ တံတော်ဦးတင်၊ ဘုရာꩻသျင်ႏဗွေႏ၊ ခွန်လူꩻတောင်ꩻပြန်ႏ၊ သာႏသနာႏအွဉ်ႏကုဲ၊ ရွှေထုံဝေင်ꩻဖူꩻ၊ ခွန်လူꩻတနံ၊ တောင်ꩻပြန်ႏငသေꩻ၊ နဝ်ꩻမꩻနီဗွေႏ၊ ပညပ်နွုတ်ꩻရျာꩻ၊ သာႏသနာႏအွဉ်ႏကုဲ၊ နဝ်ꩻမꩻစယ်ꩻပင်ႏ၊ ဝေင်ꩻခင်သာႏယာႏ၊ ဆုဲꩻချာတလဲင်ႏ၊ ရဟန္တာႏဗွေႏ၊ သမ်းလျောက်သမ်းလဝ်း၊ ဩစဝ်းဩဗွေႏ၊ သာႏသနာႏအွဉ်ႏကုဲ၊ ရွှေထုံခမ်းတန်၊ သုဝဏ္ဏဘုမ္မိ၊ တရေင်နီရျာꩻ၊ သေႏချာႏထွူမꩻ၊ ထံတော်လျောက်လဝ်း၊ ဗွေႏစဝ်းဘုရာꩻ၊ စတွမ်ႏရဟန္ဝတာႏ၊ နွုတ်ꩻရျာꩻဗွေဗွေ၊ အရှင်မဟာကဿပ၊ ထေရအတန်၊ တောင်ꩻပြန်ႏနဝ်ꩻမꩻ၊ ဂေါတမနီဗွေႏ၊ သမ်းမိန်းတောႏမူႏ၊ သုဝဏ္ဏဘုမ္မိ၊ သူရိစန္တာႏ၊ ရာဇာဟော်ခံꩻ၊ အာႏဏာႏလဲ့ထို၊ တံꩻခိုꩻလဲ့တန်၊ ဗွန်ကံႏလဲ့အဝ်ႏ၊ ပွိုးပီးနဝ်ꩻမꩻ၊ ညဆွာꩻတသေႏ၊ စယ်ႏပင်ႏနွောင်ꩻနော၊ နုတ်ဖွက်ဟော်ꩻမိန်း၊ တတိယမျောက်၊ ပညပ်သိုမ်ရျာꩻ၊ သာႏသနာႏတယ်ႏ၊ နဝ်ꩻလဲ့စယ်ႏပင်ႏ၊ ဝေင်ꩻတန်အဖူꩻ၊ သုဝဏ္ဏဘုမ္မိ၊ မီႏထွာရေႏတွက်၊ သာႏသနာႏအနေင်ႏ၊ တရေင်ငတ်ꩻ၇ျာꩻ၊ သာႏသနာႏအွဉ်ႏကုဲ၊ နီဗွေႏဘုရာꩻ၊ မိန်းတောႏငဝ်းငွါ၊ ဘုရာꩻဂေါတမ၊ ဝစနဟော်ꩻမိန်း၊ ပညပ်ငသေꩻ၊ သာႏသနာႏအခန်ꩻ၊ ဟော်ꩻထန်ႏငသေꩻ၊ ပေႏလာႏအလောင်း၊ တောင်ႏမာႏလိတ်မန်း၊ ထန်ႏလွဉ်ပီးနဝ်ꩻ၊ ဒီဟဝ်ထွားဖတ်၊ နေးနာႏမတ်တောင်ꩻ၊ ကျောင်ꩻတကာႏသီးယာ၊ သာႏသနာႏသဲင်ꩻတယ်ႏ၊ ခွုင်းနဝ်ꩻခွုင်းယို၊ မူႏခိုပေႏတန်၊ ယံဖေႏသေနုဲး၊ ထုဲႏပီသမဲင်ꩻ၊ ပအိုဝ်ႏအပို၊ ယံသေရဝ်းဗာႏ၊ တောင်ႏမာႏလိတ်မန်း၊ ကျမ်ꩻဂန်ႏအကို၊ ဘုရာꩻဟော်ꩻငသေꩻ၊ စာပေသမဲင်ꩻ၊ လိတ်သဲင်လုဲꩻခံꩻ၊ ယံဖေႏထွားဖတ်၊ နေးနာႏမတ်တောင်ꩻ၊ လိတ်လောင်းလုဲꩻကို၊ မူႏခိုသီးယာ၊ ဘုရာꩻသမဲင်ꩻ၊ ထေထန်ႏဖေႏယို၊ မူႏခိုဖြားဆား၊ ကောတသေနာႏတဝ်း၊ ငဝ်းငွါတောင်ႏမာႏ၊ ဖတ်ထွားကုဲးကုဲး၊ ယံဖေႏသေနာႏ၊ ရွှေထုံသမဲင်ꩻ၊ လိတ်သဲင်လုဲꩻခံꩻ၊ နီဗွေႏဘုရာꩻ၊ ဗျာဒိပ်ငသေꩻ၊ ဖေႏတွမ်ႏသာႏသနာႏ၊ ပဌမသံဂါ၊ ယနာႏတင်ႏနဝ်ꩻ၊ ငတ်ꩻရျာꩻတဲ့နော၊ ဒုတိယသံဂါယနာႏ နွုတ်ꩻရျာꩻဗွေဗွေ၊ တတိယသံဂါယနာႏ သိုမ်ရျာꩻတယ်ႏထင်ႏ၊ ဝေင်ꩻခံꩻသာႏယာႏ၊ သာႏသနာႏအွဉ်ႏကုဲ၊ ညဆွာꩻတာရှည်၊ ခါလဲ့နေးထူႏ၊ ခမ်းသူဝေင်ꩻယေန်၊ နိဗ္ဗာန်ရွှေပြည်၊ ခေမာဝေင်ꩻခံꩻ၊ ခါးလားစံႏစာꩻ၊ အခါကာလ၊ ဘဝဆက်ဆက်၊ ယံဖေႏကထွာ၊ အစဲဉ်ႏထာဝရ၊ နီဗွေႏဘုရာꩻ၊ သာႏသနာႏအထျꩻ၊ ပဌမဖေႏဝင်ꩻ၊ ကျိုတန်ပြက်ꩻကွဉ်ႏ၊ အွဉ်ႏကုဲသာႏသနာႏ၊ ဘုရာꩻသျင်ႏဗွေႏ၊ ခါးလားကျွꩻသဲင်ꩻ၊ ကျိုတန်ပြက်ꩻတွို့ꩻ၊ မွူးနွို့ဟော်ခံꩻ၊ ရာဇဂြိုဟ်ႏဝေင်ꩻ၊ ပညပ်ငသေꩻ၊ တရေင်ငတ်ꩻရျာꩻ၊ ဗျာႏဒိပ်ငသေꩻ၊ ပေႏလောႏအလောင်း၊ တောင်ႏမာႏလိတ်မန်း၊ ထန်ႏလွဉ်ပီးနဝ်ꩻ၊ ထဝ်းကဲသီးယာ၊ တစွိုးနဝ်ꩻရာꩻ၊ ငဝ်းငွါသမ်းရိုꩻ၊ သိုမ်ရျာꩻနဝ်ꩻရာꩻ၊ ရဟန္တာႏတောင်ꩻပြန်ႏ၊ အွဉ်ႏကုဲသိုမ်ရျာꩻ၊ ရဟန္တာႏသာႏသနာႏ၊ ဟဲ့ꩻဟောင်သိုမ်ရျာꩻ၊ ဗျာဒိပ်နဝ်ꩻနေ၊ ယံဖေႏသာႏသနာႏ၊ သမဲင်ꩻစာႏကို၊ ကရိုꩻနဝ်ꩻရာꩻ၊ သာႏသနာႏအထျꩻ၊ တယ်ႏစသီဟိုဠ်ႏ၊ သံးရိုꩻသောက်သား၊ နဝ်ꩻလဲ့လိတ်မန်း၊ ထန်ႏလွဉ်ရိုꩻနော၊ တစွိုးကရိုꩻ၊ သီဟိုဠ်ႏနဝ်ꩻရာꩻ၊ ထီတဖဲ့ꩻဒွါႏ၊ နေႏရာႏနုဲးနဝ်ꩻ၊ အဝ်ႏဆဖဲ့ꩻယို၊ ရိုꩻလဲ့မမွေး၊ တမွေးတဝ်းဗာႏ၊ အသီအချာ၊ အဝ်ႏဒျာႏထီခြောင်၊ တဖဲ့ꩻမတဝ်း၊ နဝ်ꩻလဲ့အဝ်ႏဒွါႏ၊ လိတ်မန်းထန်ႏနော၊ သာႏသနာႏအထျꩻ၊ မူလအရင်ꩻ၊ ရွှေထုံတယ်ႏဒွါႏ၊ မူႏခိုသီးယာ၊ ငဝ်းငွါနီစွိုး၊ မန်ႏမာႏဆမုဲꩻ၊ ခွေသွဉ်းစာႏရေꩻ၊ ထေထန်ႏငကီ၊ တဖြောင်သꩻတဝ်း၊ ဗွေႏစဝ်းဘုရာꩻ၊ ပညပ်ငသေꩻ၊ ပေႏလာႏအလောင်း၊ တောင်ႏမာႏလိတ်မန်း၊ ထန်ႏလွဉ်နဝ်ꩻရာꩻ၊ ငဝ်းငွါမွေးသွူ၊ သီဟိုဠ်အထျꩻ၊ ကရိုꩻနဝ်ꩻရာꩻ၊ ဒုဋ္ဌဂါမဏိ၊ နာဂဂုတ္တိခွန်၊ လောမွန်ဖြီဖေါင်ႏ၊ ဖြုဲꩻဆောင်းတရန်၊ ဖြီတန်တဟျာႏ၊ စကျာႏငဝ်းဝေါင်၊ ဖောင်ႏတောႏလန်ႏခြွိုင်ꩻ၊ ဝုဲဝွိုင်ꩻလေပ်ခူ၊ ကျွန်ꩻဦꩻလယ်ႏပတ်၊ ဓာတ်မျတ်ဘုရာꩻ၊ နာဂရပတိခွန်၊ စတွမ်ႏရဟန္တာႏ၊ ငတ်ꩻရျာꩻဗွေဗွေ၊ ထွေရဲဉ်ႏကျွꩻကာ၊ သျင်ႏမဟာယသ၊ ဗုဒ္ဓဃောသာ၊ စတွမ်ႏရဟန္တာႏ၊ ပါတွမ်ႏ(ဝွေꩻ)ဗွေႏ၊ အီႏလွေꩻအွဉ်ႏဒင်ႏ၊ သင်္ဘောꩻဖြီကို၊ ဟောင်ရိုꩻဖေါင်ႏမွန်၊ ခွန်တန်အီလယ်ႏ၊ မထေရ်ႏစဝ်းရဟန်ꩻ၊ ကျွꩻဆန်ꩻဖျော်တွိုႏ၊ ကျိုလောင်းပေါက္ကံႏ၊ ထန်ႏသဲင်ꩻအင်းလေးရွာ၊ ဟာယားခမ်းနောင်၊ ခူႏအောင်ဌာပနာႏ၊ ရဟန္တာႏမထီႏ၊ ဟဲ့ꩻအီနာမ၊ စခါမော့ꩻနဝ်ꩻ၊ ထီႏတောႏဘုရာꩻ၊ သေႏချာႏထွူမꩻ၊ ကျွꩻကာလွေꩻတော၊ ခြောင်ပလွီ၊ ထီတန်အထျꩻ၊ ကျွꩻထင်ႏကောင်လောင်း၊ ခူႏအောင်ဌာပနာႏ၊ ပတ္တီထာခံꩻ၊ တယ်ႏမံႏထွူမꩻ၊ သံးကျွꩻလင်ꩻတော၊ ထွားလယ်ႏနေႏရာႏ၊ ကျွꩻထင်ႏဒွါႏကိုးကိန်ꩻ၊ ဖြီတန်အလောင်း၊ ကောင်နဝ်ꩻအနာ၊ ထာꩻပူႏအလောင်း၊ ဆောင်ႏနဝ်ꩻအနာ၊ ခူႏအောင်ဌာပနာႏ၊ ဝီꩻခံꩻကွိုတဝ်း၊ ယဝ်းထွူသေႏချာႏ၊ အံႏဖြာႏအံႏအော်ꩻ၊ ယော်ꩻခွယ်ꩻထောပနာႏ၊ ဌာနရပ်ယို၊ ရိုꩻလဲ့ဟဝ်ကတ်၊ နꩻဗင်သန်လျက်၊ စံႏဖက်ထွက်ခူႏ၊ ဝက်ကူလောင်းကီ၊ ဝီꩻခံꩻစေႏတီႏ၊ နီဗွေႏဌာပနာႏ၊ သေႏချာႏထွူမꩻ၊ ကျွꩻငနဝ်လင်ꩻတော၊ ခြောင်နဝ်ꩻနေနေ၊ နီဗွေႏရဟန်ꩻ၊ တွိုႏမန်ႏရွစ်ဖြ၊ ဌာနထာꩻထို၊ အရပ်ယိုနဝ်ꩻ၊ ထွားဟဝ်သာႏယာႏ၊ ဌာနထာꩻပူႏလောင်း၊ ခူႏအောင်ဌာပနာႏ၊ ရဟန္တာႏထီစဲစ်၊ လဲပ်လဲ့သေႏချာႏ၊ ဌာပနာႏထွူလဲင်ႏ၊ နမ်းစဲစ်ရိုꩻမန်ႏ၊ ထန်ႏကာကျွꩻလင်ꩻ၊ ဗန်းနောင်ဌာပနာႏ၊ သရေနုတ်တဖြို့ꩻ၊ လို့ꩻသေꩻအွဉ်ႏကုဲ၊ ဗွေႏစဝ်းရဟန္တာႏ၊ ကျွꩻကာသဲင်ꩻယား၊ ဆချာခြောင်ꩻလီꩻ၊ ထီတန်မြစ်ချောင်း၊ နောင်ထျꩻလီဆကွဉ်ႏ၊ ကောင်နဝ်ꩻအနာ၊ ခါလဲ့ဌာပနာႏ၊ သန်နီတချောင်း၊ တဗောင်ကန်ငှက်၊ စစ်ဟဝ်ထာꩻဒါ၊ ဌာပနာႏသွင်ꩻငသေꩻ၊ ကောင်ပေႏအလောင်း၊ ဟဲ့ꩻဟောင်လွဉ်ꩻဗာႏ၊ ကန်ငှက်စေႏတီႏ၊ မောက်ꩻပီဘုရာꩻ၊ သေႏချာႏထွူမꩻ၊ ကျွꩻကာသဲင်ꩻတွိုႏ၊ ဖေါင်ႏဆိတ်ဖြီꩻကတူႏ၊ အဦꩻသဲင်ꩻလို့၊ ဖေါင်ႏဆိတ်ကွိုတဝ်း၊ နဝ်ꩻမꩻလဲ့ခါ၊ ဖျောဝ်ယားပဂံႏဝေင်ꩻဖူꩻ၊ ဖျောဝ်စူꩻကျိုထျꩻ၊ မြစ်မထီသောင်၊ ဖေါင်ႏခံꩻနေရာ၊ ရဟန္တာႏဖုံႏ၊ တွမ်ႏနဂရပတိခွန်၊ ဝွေꩻသီးအစိုး၊ သီဟိုဠ်ႏသာႏသနာႏ၊ အနေင်ႏနီရျာꩻ၊ ငဝ်းငွါမွေးထွူ၊ ကကုသန်တုံ၊ ကောဏဂုံ ကဿပ၊ ဂေါတမဘုရာꩻ၊ လစ်ꩻပါꩻလစ်ꩻဆူႏ၊ ပညပ်နဝ်ꩻနေ၊ လင်္ကာဒီပ၊ ဌာနနေရာ၊ စခါမွိုးနန်း၊ နီဗွေႏဘုရာꩻ၊ ကထွာရသေ့ꩻ၊ နဝ်ꩻရာꩻသီဟိုဠ်ႏ၊ ပွိုးပီးနဝ်ꩻမꩻ၊ အထျꩻသီဟိုဠ်ႏ၊ ငဝ်းငွါရိုꩻနော၊ သူတောႏသီးယာ၊ နီဗွေႏဘုရာꩻ၊ ဖြောင်းထာဖြေꩻခံꩻ၊ ဟော်ထန်ႏနယ်ဖေႏ၊ ခွန်တန်အငါ၊ သေႏချာႏထွူမꩻ၊ မူလသက္ကရာဇ်၊ တရျာꩻတဆီ၊ လွိုတကီနီဗာႏ၊ နီဗွေႏဘုရာꩻ၊ စံႏစာꩻနေးထူႏ၊ ခမ်းသူႏဝေင်ꩻယေန်၊ နိဗ္ဗာန်ႏရွှေပြည်၊ ခေႏမာႏဝေင်ꩻခံꩻ၊ စံႏစာꩻအချာ၊ သာႏသနာႏအွဉ်ႏကုဲ၊ ညဆွာꩻအနေင်ႏ၊ တရေင်သိုမ်ရျာꩻ၊ သာလွိုငတ်ꩻဆီ၊ သုဝဏ္ဏဘုမ္မိ၊ သူရိစန္တာႏ၊ ထီꩻဗွာအဗွေႏ၊ ပျုစုတယ်ႏထောင်ႏ၊ ကောင်ႏမူႏစေႏတီႏ၊ သာရိရဓာတ်တောႏ၊ ရွှေစာရံဘုရာꩻတန်၊ အပန်ပန်အဆက်ဆက်၊ စထစ်ဟော်ခံꩻ၊ ခွန်တန်အစိုး၊ မွိုးနန်းစခါ၊ ထွားတီလွမ်ꩻလာꩻ၊ တငါတောႏလစ်ꩻလီး၊ စဝ်းခွန်ဟော်ခံꩻ၊ ရာဇာမင်ꩻကြီꩻ၊ သိကျာꩻတနံ၊ တယ်ႏမံႏငသေꩻ၊ စေႏတီႏတောႏမျတ်၊ မွိုးနန်းစခါ၊ ညဆွာꩻတာႏသေႏ၊ နဝ်ꩻမꩻထွူလင်ꩻ၊ ဟော်ခံꩻရာႏဇာႏ၊ သုဝဏ္ဏမင်ꩻကြီꩻ၊ ပွိုင်ႏထီပွိုင်ႏခမ်း၊ ဟော်ခံꩻပအိုႏ၊ အွဉ်ႏကုဲအချာ၊ ညဆွာꩻလွဉ်ꩻငါႏ၊ လိုꩻကောလွမ်ꩻလာꩻ၊ ငဝ်းထဝ်းဒွုမ်ဖြေႏသꩻ၊ နဝ်ꩻမꩻစေႏတီႏ၊ ထီꩻတောႏခါလဲ့၊ ငထဲ့ရီႏလင်ꩻ၊ အင်ꩻလဲ့အဝ်ႏဟူႏ၊ သာရဘူဒုဗ္ဘိကာ၊ ရွစ်တွိုႏခေါင်ꩻလောင်ꩻ၊ သပိတ်မောက်ကျာခံꩻ၊ အဝ်ႏထံဟူႏလို့၊ လာလာꩻထုပြုဲ၊ ကုဲပြင်ꩻငထဲ့၊ ပန်ꩻလယ်ꩻတဲင်ႏကစ၊ လာꩻလာꩻဖြင်းဖြူႏ၊ ဟူႏလို့ထဲ့လင်ꩻ၊ ဟံႏလောင်းဟံႏခိုႏ၊ လိုꩻကောလွမ်ꩻလာꩻ၊ ပွိုးမားငထဝ်း၊ နဝ်ꩻမꩻတွိုႏထင်ႏ၊ သာႏသနာႏနီရေင်၊ သိုမ်ရျာꩻနွုတ်ꩻဆီ၊ သုဝဏ္ဏဝေင်ꩻ၊ ရွှေထုံႏဘုရာꩻတန်၊ ကုံꩻဝန်မင်ꩻကြီꩻ၊ ထင်ႏသေထင်ႏထီႏ၊ စေႏတီႏတောႏယို၊ ထွိုက်ဒွါႏတွမ်ႏခွေ၊ ရွှေထုံဘုရာꩻတန်၊ တယ်ႏမံႏပျုစု၊ ကောင်းမုစေႏတီႏ၊ ထီꩻတောႏကစ၊ ချꩻခံꩻတိတ်ꩻထာ၊ မဟာရံႏတန်ꩻတွိုင်ꩻ၊ တယ်ႏဖျင်ကသာ၊ ပါတွမ်ႏကျောင်ꩻဝတ်၊ သီနားလစ်ꩻစဲင်ႏ၊ ဟဲ့ꩻတွမ်ႏလက်သမာꩻ၊ လိုꩻဒါႏလိုꩻမော်၊ ထွဉ်ႏထူႏထွဉ်ႏမာꩻ၊ ကဝ်ႏလာႏကဝ်ႏထဲင်ꩻ၊ တိတ်ꩻထာတိတ်ꩻခံꩻ၊ သူႏရန်ꩻသူႏသီ၊ တင်ꩻထီꩻဟွဲဟိန်ႏ၊ ကင်းဆေင်ႏတခြယ်၊ ပယ်တွမ်ႏထုတ်လျောက်၊ ကွေးကောက်ကဝ်ႏလာႏ၊ ဝါးကီႏဝါးတောင်ꩻ၊ အထောင်ꩻအစဲင်ႏ၊ နုတ်အိင်းသာလိကာ၊ ဟင်္သာႏကတိုꩻ၊ ဒိုတောက်အရုတ်၊ ထုတ်မုတ်ကဝ်ႏလာႏ၊ ကိန္နရာႏကိန္နရီႏ၊ စွုမ်ႏစီႏကူစွိုး၊ မီႏထင်ႏတွိုႏတဲင်၊ လဲင်ꩻပေႏသꩻတလွိုး၊ ရာဇမင်ꩻကြီꩻ၊ ကုံꩻဝန်အစိုး၊ ကွဲကားရိုꩻဗာႏ၊ သက်ရွယ်ႏဖြားထွူ၊ သွစ်ꩻဆီသာႏယာႏ၊ နဝ်ꩻမꩻတွိုႏထင်ႏ၊ သာသနာႏနီရေင်၊ လွိုတကီလစ်ꩻရျာꩻ၊ ထင်ႏလꩻကာလ၊ နဝ်ꩻမꩻအပ်တော၊ ဝွေꩻဗွေႏပိုခို၊ ဟောင်ရိုꩻထွန်ႏကျောႏ၊ ကပေါႏဗွန်မျောက်၊ နင်းဟော်ပွိုင်ႏဝေင်ꩻ၊ စေꩻစိန်ႏချမ်ꩻသာႏ၊ ထွားတီသိမ်ꩻဆယ်ꩻ၊ သွဉ်းသယ်ႏပိုလီꩻ၊ တီခမ်းဒုံဝေင်ꩻ၊ ထိန်ꩻသိမ်ꩻထွားတီ၊ တဆီနီရာႏသီႏ၊ ထွားတီသိမ်ꩻဆယ်ꩻ၊ ဖါစဝ်းအပ်ဖေႏ၊ သေႏချာႏထွူမꩻ၊ မူလသက္ကရာဇ်၊ တရေင်နီရျာꩻ၊ သာလွိုသိုမ်ဆီ၊ လွိုတကီနွုတ်ꩻဗာႏ၊ သာႏသနာႏတောႏနဝ်ꩻ၊ နီရေင်လစ်ꩻရျာꩻ၊ သာလွိုတဆီ၊ လွိုတကီကွတ်ꩻဗာႏ၊ သာႏသနာႏထင်ႏလꩻ၊ သုဝဏ္ဏဘုမ္မိ၊ ဇာတိပအိုဝ်ႏ၊ အခွိုꩻအနွယ်ႏ၊ ကုံꩻဝန်ꩻပိုခို၊ ဟောင်ရိုꩻထွန်ႏကျော်၊ ကံႏပေါႏဗွန်မျောက်၊ ကွိုင်ႏတဲထွာဗာႏ၊ ရာဇာမင်ꩻမျိုꩻ၊ အုပ်စိုꩻထီခမ်း၊ စံႏစာꩻပွိုင်ႏဒုံ၊ သထုံခမ်းတန်၊ လိုꩻကွုန်ꩻလိုꩻဗွေ၊ ပွယ်ꩻလံꩻလဲ့အာ၊ ကောထွာပိုလီꩻ၊ ခါလဲ့နစ်သက်၊ ရက်ဒါႏသညင်ꩻ၊ ခွန်ပိုထွန်ကျောႏ၊ လက်ထက်ကွိုနဲ၊ တင်ꩻလုဲသီးယာ၊ မူလသက္ကရာဇ်၊ တစ်နှစ်အနေင်ႏ၊ တရေင်နီရျာꩻ၊ သာလွိုတဆီ၊ လွိုတကီနွုတ်ꩻဗာႏ၊ သုဝဏ္ဏဘုမ္မိ၊ ဇာတိပအိုဝ်ႏ၊ အမျိုꩻအနွယ်ႏ၊ ခွန်ပိုထွန်းကျော်၊ စံႏစာꩻပွိုင်ႏဝေင်ꩻ၊ သက်တောႏဖြီႏဖြီႏ၊ သိုမ်ဆီသူနေင်ႏ၊ စေꩻစိန်ႏချမ်ꩻသာႏ၊ သယ်ႏလာႏပိုလီꩻ၊ တီခမ်းလဲ့ဗွေႏ၊ ဝေင်ꩻတန်အဖူꩻ၊ ဆို့ꩻလူႏကျောင်ꩻတောႏ၊ ဟော်ခံꩻခင်ႏလမ်း၊ နန်းဟော်ရာလောင်း၊ ကျောင်ꩻလုံဝိဟာႏ၊ အနာတင်ႏထီꩻ၊ သူႏသီတိတ်ꩻခံꩻ၊ လူႏတန်ꩻပူႏဇောႏ၊ ကန်းတော့ꩻရိုႏသေႏ၊ ကွဲကားဝွေꩻဗွေႏ၊ ကတိုꩻကွယ်ႏဒါႏ၊ ဆရာႏတောႏနဝ်ꩻ၊ သက်တောႏဖြီႏဖြီႏ၊ နွုတ်ꩻဆီသိုမ်နေင်ႏ၊ ဝါႏတောႏဖြီႏဖြီႏ၊ ငတ်ꩻဆီသိုမ်ဝါႏ၊ ထင်ႏဗွေကာလ၊ လွိုန်ဟားလာမျတ်၊ ဆန်ꩻထင်ႏတဆီနီ၊ ဗုဒ္ဓဟူꩻနီꩻ၊ သုဝဏ္ဏဝေင်ꩻ၊ ရွှေစာရံဘုရာꩻတန်၊ တိတ်ꩻခံꩻသူႏသီ၊ ထီꩻတောႏကစ၊ ချꩻဖျင်ခံꩻကသာ၊ သပိတ်မောက်ခေါင်ꩻလောင်ꩻ၊ သရဒုကုမ္ဘကာ၊ ရွစ်ဖြဖျော်ထင်ႏ၊ မန်ႏကင်ꩻသဲင်လဝ်၊ နဝ်ꩻမꩻဟဲ့ꩻထင်ႏ၊ စင်းခံꩻလိုꩻဒါႏ၊ သက်သမာꩻပရံ၊ ခတ်ꩻစင်းမာꩻသာꩻ၊ သေႏချာႏထွူမꩻ၊ စိန်ႏဖူꩻမန်ႏကင်ꩻ၊ တင်ႏဖျင်ကသာ၊ ခံꩻထာꩻလဲ့ချꩻ၊ ရမဲ့တင်ႏတယ်ႏ၊ သပ္ပါယ်ႏလျောက်ပတ်၊ ဖုဲႏထွားဖုဲႏထီႏ၊ ဒီဟဝ်အံႏအော်ꩻ၊ ခီႏယော်ꩻထောမနာႏ၊ တလို့ဒါႏတဝ်း၊ ထဝ်းကဲသီးယာ၊ နီဗွေႏဘုရာꩻ၊ စံႏစာꩻနေးထူႏ၊ ခမ်းသူႏဝေင်ꩻယေန်၊ နိဗ္ဗာန်ႏရွှေပြည်၊ ခေမာဝေင်ꩻခံꩻ၊ စံႏစာꩻအချာ၊ သာႏသနာႏထင်ႏလꩻ၊ နီရေင်လစ်ꩻရျာꩻ၊ သာလွိုတဆီ၊ လွိုတကီကွတ်ꩻဗာႏ၊ ထင်ႏဗွေကာလ၊ သုဝဏ္ဏဝေင်ꩻ၊ ရွှေထုံဝေင်ꩻတန်၊ ဝေင်ꩻဆကွဉ်ႏထင်ꩻ၊ ရတနာသိင်္ဃ၊ ဌာနသာႏယာႏ၊ ကောင်နာလောင်းကီ၊ နီဗွေႏဘုရာꩻ၊ စေႏတီႏတောႏမျတ်၊ ဓိဋ္ဌာန်ႏငသေꩻ၊ ဖြောင်းထာဖြေꩻခံꩻ၊ ဆုတောင်ꩻပြဲ့ꩻဘုရာꩻ၊ ငဝ်းငွါရိုꩻနော၊ သူႏတောႏသီးယာ၊ နီဗွေႏဘုရာꩻ၊ စထစ်အနမ်းအဝ်ႏ၊ မော့ꩻနဝ်ꩻကာလ၊ ပွိုးစွဉ်ႏညငါႏ၊ စေႏတီႏတောႏလဲ့၊ ငထဲ့ပြုဲင်လင်ꩻ၊ အင်ꩻအောင်အင်ꩻဟူႏ၊ ပါကောသူႏဖျင်၊ ပွိုးမားငထဝ်း၊ နဝ်ꩻမꩻထွန်းကျော်၊ ထင်ႏသေထင်ႏထီႏ၊ စေႏတီႏတောႏယို၊ ထွက်ဒွါႏတွမ်ႏခွေ၊ ဆုတောင်ꩻပြဲ့ꩻကောင်နာ၊ ဘုရာꩻစေႏတီႏ၊ ခွန်ပိုထွန်ကျော်၊ ကံႏပေါ်ဗွန်မျောက်၊ ထွန်းကျော်အစိုး၊ သေႏချာႏထွူမꩻ၊ ဟဲ့ꩻစပိုလီꩻ၊ မူႏခိုပေႏတန်၊ ဖြွမ်းဝင်ꩻညီႏညာႏ၊ ကဲႏသာႏတယ်ႏဖျင်၊ ခွုမ်အင်ꩻသူႏသီ၊ မြေနီရန်ႏလဲင်၊ စီႏသဲင်တိတ်ꩻခံꩻ၊ နန်းတော်ကုန်းဆရာႏ၊ ညီႏညာႏစွဲကို၊ အုံပွိုးထွားလွဉ်ꩻ၊ ယံဖေႏကအောင်ႏ၊ ဟဲ့ꩻဟောင်လက်သမာꩻ၊ လိုꩻဒါႏလိုꩻမော်၊ ထွဉ်ႏခွုမ်ထွဉ်ႏမာꩻ၊ ခတ်ꩻသာꩻခတ်ꩻစင်၊ တယ်ႏဖျင်ပျုစု၊ အားထုတ်ကျိုꩻစာꩻ၊ ကောင်နာလောင်းကီ၊ စေႏတီႏဘုရာꩻ၊ နီပါꩻနီဆူႏ၊ သူႏသီတိတ်ꩻခံꩻ၊ စထစ်တထိန်ႏ၊ လွိုန်စေင်လာတွင်ꩻ၊ ဖျော်တွိုႏမိုးဦꩻ၊ မူႏခိုပေႏတန်၊ လွေꩻသဲင်ꩻချာငါ၊ လိုꩻအာလိုꩻကွုန်ꩻ၊ တွို့ꩻကွဉ်ႏနဝ်ထင်ꩻ၊ ထင်ႏစွဉ်ႏစွုမ်ႏဖဲ့ꩻ၊ တထဲ့ဒွုမ်တဝ်း၊ အဝ်ႏထွာတသေႏ၊ ပွယ်ꩻလံꩻသဘင်ႏ၊ တကာႏမူႏခို၊ တတွိုႏဖိုတဝ်း၊ ကောင်နာနဝ်ꩻလဲ့၊ တွိုႏလွဉ်ရွစ်ဖြ၊ ပေႏသꩻပေႏသွုန်ႏ၊ ဟွုန်ဟဝ်မွန်းပျောႏ၊ မော်ကွံသီချင်ꩻ၊ သင်းဟန်းနဝ်ꩻငွိုး၊ တလွိုးပေႏသꩻ၊ နန်းလꩻငချာ၊ ထွာနောနီ၊ သီခွေပေႏတန်၊ မထီႏထွꩻလွဉ်ꩻတဝ်း၊ ဗွေႏစဝ်းဘုရာꩻ၊ ကိုႏစာꩻအနမ်း၊ ထီႏရွုမ်ꩻကိုႏစာꩻ၊ စခါနီဗွေႏ၊ ချွစ်လူꩻချွစ်လိုꩻ၊ မူႏခိုပေႏတန်၊ နီဆီလစ်ꩻသင်္ခေႏ၊ ကုဋေႏသူဆီ၊ ဗိုလ်ချေႏတသဲဉ်၊ ပသာလဲဉ်းခန်း၊ ခမ်းတန်နိဗ္ဗာန်ႏ၊ ခွေတွမ်ႏနာꩻခါ၊ ထွာမုဲꩻနဲလောင်ꩻ၊ မတထွꩻလွဉ်ꩻတဝ်း၊ ဗွေႏစဝ်းဘုရာꩻ၊ အချာနုဲးဝင်ꩻ၊ ဖျင်တဲးနောနီ၊ ပွိုးပီးနဝ်ꩻမꩻ၊ ပေႏသꩻငွိုးဒွါႏ၊ တကာႏပေႏတန်၊ ယင်းဟန်ႏမွန်းပျောႏ၊ မဉ်ငလဲ့အဝ်ႏ၊ ကရိုꩻနဝ်ꩻရာꩻ၊ ခွေနာꩻနီသီ၊ ဗွန်ကံႏဟဝ်တဲ၊ ထီႏဗာႏဘုရာꩻ၊ ကိုႏစာꩻရုတ္ထု၊ ဓာတ်စုစေႏတီႏ၊ ထီႏဗာႏတွမ်ႏမဲ့၊ စူလဲ့ဝုဲႏဗာႏ၊ သာမညသီခွေ၊ တမွေးတဝ်းနော၊ သဲင်ꩻတောႏသဲင်ꩻညာႏ၊ သာႏသနာႏပရိယတ္တိ၊ စက်မျတ်လစ်ꩻပါꩻ၊ ခွေတွမ်ႏနာꩻယို၊ ဗွန်ကံႏဟဝ်ကတ်၊ ကောင်မျတ်အလောင်း၊ သာႏယောင်းသာႏယာႏ၊ ပီနုဲးတနံ၊ ခမ်းကီဝတိံႏသာႏ၊ စူဠာမုနိ၊ စေႏတီႏတောႏစွဉ်ႏလာꩻလာꩻ၊ တကာႏပေႏတန်၊ ရဟန်ꩻသျင်ႏလူꩻ၊ မူႏခိုဖြားဆား၊ သဒ္ဓါႏရေႏရောႏ၊ ပူႏဇောႏလွဉ်ဝုဲႏ၊ ကိုꩻကွယ်ႏလူႏတန်ꩻ၊ ထီꩻတွမ်ႏတံꩻခွဉ်ႏ၊ ကဝ်ႏသွမ်ႏကဝ်ႏဗွာ၊ ကဝ်ႏတနျာႏတသီး၊ ထီဖွိုင်ꩻမော်နမ်း၊ သွမ်ꩻပန်ꩻဩဇာႏ၊ သဒ္ဓါႏလူႏတန်ꩻ၊ နမ်းမန်ꩻဆီမီး၊ တဆီနီလာ၊ ရာႏသီႏအတွင်ꩻ၊ မီႏရိုꩻစောလိုꩻ၊ အဝ်ႏလွေꩻသေႏသေႏ၊ ပေႏတန်ဖြားဆား၊ သိုမ်ပါꩻဥတု၊ နုပျိုသဘွယ်၊ အံႏခွယ်အံႏဖြာႏ၊ တလို့ဒါႏတဝ်းနော၊ သူႏတောႏသီးယာ၊ ကောင်နာအတွက်၊ ဆုတောင်ꩻပြဲ့ꩻကောင်မျတ်၊ လိတ်ဖတ်လင်္ကာႏ၊ တံဆာႏရင်းခြွိုင်းကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။

ကောဇာဒီဃ၊ မူလသက္ကရာဇ်၊ တစ်နစ်ဂဏန်ꩻ၊ ထေထန်ႏအနေင်ႏ၊ တရေင်နီရျာꩻ၊ သာလွိုသိုမ်ဆီ၊ လွိုတကီသွစ်ꩻဗာႏ၊ သာႏသနာႏတောႏနဝ်ꩻ၊ နီရေင်လစ်ꩻရျာꩻ၊ သာလွိုတကီ၊ နီဆီဗွေမန်ႏ၊ လွိုန်ရုတ်ꩻလာဆန်ꩻ၊ ထန်ႏလꩻနွုတ်ꩻနီꩻ၊ မွူးနီꩻစနေႏ၊ သူရယာႏမွူးထင်ႏ၊ သိုမ်ဆင်ႏသာႏယာႏ၊ ငတ်ꩻဖဝါႏဗွေမန်ႏ၊ ဆုတောင်ꩻပြဲ့ꩻစေႏတီႏမျတ်၊ ကုံဝန်ပိုခို၊ ဟောင်ရိုꩻထွန်းကျော်၊ ကံႏပေါ်ဗွန်မျောက်၊ ထောင်ငသေꩻသာႏသနာႏ၊ နမ်းငါအရင်ꩻ၊ လီꩻလင်ꩻအစိုး၊ နဝ်ꩻမꩻတင်ႏထီꩻ၊ စီႏသဲင်ဟွဲဟိန်ႏ၊ သဲင်လဝ်မန်ႏကင်ꩻ၊ မင်္ဂလာႏခံႏပွယ်ꩻ၊ တွယ်ႏထုံဒုံႏမောင်း၊ ကောင်နာလောင်းကီ၊ ထီꩻတွမ်ႏတံꩻခွဉ်ႏ၊ လူႏတန်ꩻပူႏဇောႏ၊ သာႏဓုမုမောဒနာႏ၊ ဆျာꩻထီရေစက္ချ၊ တွိုင်ႏကျာꩻသက်သေႏ၊ ဝသုန္ဓရေႏဟံႏ၊ နီသဲဉ်လစ်ꩻမွုန်ႏ၊ ဒွုန်ဗွိုသင်္ချာႏ၊ သီလာဟံႏတန်၊ ဟွုန်ဟဝ်သာႏဓု၊ နုမောဒနာႏ၊ အံႏဖြာႏအံႏအော်ꩻ၊ စေႏတီႏတောႏမျတ်၊ လိတ်ဖတ်လင်္ကာႏ၊ တံဆာရင်းခြွိုင်း၊ ရွှေထုံသမဲင်ꩻ၊ လိတ်သဲင်လုဲꩻခံꩻ၊ ထေထန်ႏစီႏစပ်၊ နီပအိုဝ်ႏအငဝ်း၊ စဝ်းဗွန်နောင်ကလာာꩻ၊ ဦးဝိလာသ၊ မေတ္တာႏသညင်ꩻ၊ တကာႏမတကာႏခို၊ ပအိုႏဝင်ꩻချင်ꩻ၊ နားယံသျင်ႏသေနာႏ၊ စော့ꩻလာႏစပ်စီႏကွိုနဲ၊ တင်ꩻလုဲသီးယာ၊ တဖုံႏတဉ်ဟွေး။

ပွိုးပီးနဝ်ꩻမꩻ၊ ကျောင်ꩻတကာႏသီးယာ၊ အဝ်ႏကုဲနေက၊ ဆုဲꩻချာတဆူႏ၊ ရွှေမြင်တင်ကောင်နာ၊ ရဟန္တာႏဗွေႏ၊ ဥတ္တရမထေရ်ႏ၊ ဌာပနာႏငသေꩻ၊ နီဗွေႏဘုရာꩻ၊ မေတ္တာႏသညင်ꩻ၊ တောင်ꩻဝွေꩻဓာတ်တောႏ၊ ကောႏငသေꩻစေႏတီႏ၊ ဟံႏဆကီမြေပြင်၊ သညင်ꩻခွေသီ၊ အစ်လူနီနာꩻ၊ ငမ်းသꩻပါလွဉ်ꩻတဝ်း၊ ဗွေႏစဝ်းမိတေ၊ ကေတုမတီႏ၊ ပြည်ကြီးခမ်းတန်၊ နမ်းငါမီႏပွင်ꩻ၊ ကံꩻကောႏပင်ထျꩻ၊ မပလ္လင်ႏလောင်းကီ၊ တရာꩻထီအွီႏ၊ မီႏဟော်ꩻကာလ၊ ငမ်းတထွꩻလွဉ်ꩻတဝ်း၊ ဗွေႏစဝ်းဘုရာꩻ၊ မေတ္တာႏသညင်ꩻ၊ သက်တောႏသွစ်ꩻဆီ၊ လစ်ꩻဆီငတ်ꩻဝါႏ၊ ကာလအတွင်ꩻ၊ သင်္ဘောꩻလောင်းကီ၊ တရာꩻထီအွီႏ၊ စွုမ်ႏနီꩻထွားဆွုမ်ႏ၊ လွဉ်ဒွါႏမကောင်း၊ သေယူႏနောင်ႏတ၊ ဂေါတမဘုရာꩻ၊ ခါးလားနေးထူႏ၊ ခမ်းသူႏဝေင်ꩻယေန်၊ နိဗ္ဗာန်ႏရွှေပြည်၊ ခေမာႏဝေင်ꩻခံꩻ၊ ခါးလားစံႏစာꩻ၊ ကန်းတော့ꩻရိုႏသေႏ၊ ပေႏတန်ဖြားဆား၊ စခါနီဗွေႏ၊ စံႏစာꩻနေးထူး၊ ဝေင်ꩻဦꩻဖိုလ်ႏမဂ်၊ နိဗ္ဗာန်ႏအချာ၊ ဘုရာꩻစေႏတီႏ၊ ရွုမ်ꩻကျောင်ꩻတကာႏ၊ ညီႏညာႏနိုꩻဆောႏ၊ တကာႏပေႏတန်၊ တယ်ႏမံႏပျုစု၊ ကောင်းမုစေႏတီႏ၊ တင်ႏထီꩻဟွဲဟိန်ႏ၊ သဲင်လဝ်မန်ႏကင်ꩻ၊ တင်ႏတယ်ႏလျောက်ပတ်၊ ကောင်မျတ်အလောင်း၊ သာႏယောင်းသာႏယာႏ၊ ဖုဲႏထွားဖုဲႏထီႏ၊ စေႏတီႏတောႏမျတ်၊ အံႏဪꩻအံႏဖြာႏ၊ တလို့ဒါႏတဝ်း၊ စဝ်းဗွန်ရွုမ်ꩻကျောင်ꩻ၊ ဘုံꩻကြီꩻပဏ္ဍိ၊ ကဝိလိုꩻဒါႏ၊ ဘုရာꩻစေႏတီႏ၊ ဒီဟဝ်လွေꩻဝုဲႏ၊ ကိုꩻကွယ်ႏလွနော၊ ရွှေမြင်ထင်ကောင်နာ၊ ဘုရာꩻတန်ဆကွဉ်ႏနဝ်၊ ကောင်ဖုဲႏအလောင်း၊ ကျောင်ꩻတကာႏသီးယာ၊ ဘုရာꩻရွှေမြင်ထင်၊ အထျꩻအသောင်၊ ဆို့ꩻတွမ်ႏကျောင်ꩻတန်၊ ခင်ႏလမ်းသာႏယာႏ၊ အနာတင်ႏထီꩻ၊ သူႏသီသူႏရန်ꩻ၊ တိတ်ꩻခံꩻတိတ်ꩻထာ၊ တရွာႏတွမ်ႏတရိန်ႏ၊ ဟိန်ႏတွမ်ႏခေါင်းလောင်ꩻ၊ သင်ႏရောင်ဆားဆား၊ ရွှေမြင်ထင်ဘုရာꩻသောင်၊ ကျောင်ꩻလုံဝိဟာႏ၊ သာႏယာႏလျောက်ပတ်၊ ဖြေႏသꩻအံႏအော်ꩻ၊ ခီႏယော်ꩻအံႏဖြာႏ၊ တလို့ဒါႏတဝ်း၊ နွိုကာကျောင်ꩻသောင်၊ မက်မူးမက်ꩻအွန်၊ မရန်းစံႏဖြီ၊ စွုမ်ႏစီႏကူစွိုး၊ အွီႏနွိုးခွꩻစုံ၊ ကျောင်ꩻသောင်ထျꩻကွဉ်ႏ၊ ဝေင်ꩻလီꩻအသောင်၊ ထီခြောင်သာႏယာႏ၊ ရာႏသီႏတဆီနီ၊ ခမ်းဆေ့ꩻခမ်းသဲင်၊ ထွတ်လွဉ်စွူဖြွိုး၊ မူႏခိုပေႏတန်၊ သုံꩻဆောင်ႏအွꩻလူး၊ သုဝဏ္ဏဝေင်ꩻ၊ အစဲင်ႏကွဉ်ႏနဝ်၊ သာႏယာႏဟဝ်ကတ်၊ နဝတတ်စွဉ်ႏလာꩻလာꩻကွိုနဲ၊ ထဝ်းကဲသီးယာ၊ နဝ်ꩻခါကာလ၊ သုဝဏ္ဏဘုမ္မိ၊ သူရိစန္တာႏ၊ ရာႏဇာႏမင်ꩻကြီꩻ၊ ထီꩻဗွာအဗွေႏ၊ ဧကရာဇ်ဟော်ခံꩻ၊ မွိုးနန်းစခါ၊ ဆဝေင်ꩻဆကွဉ်ႏ၊ သိန်ကနစ်ကောင်ထျꩻ၊ ဝတနဒူရ၊ ထာꩻပူႏအလောင်း၊ ကောင်နာအထျꩻ၊ ဆအဖဲ့ꩻတွို့ꩻ၊ ရဟန္တာႏဗွေႏ၊ အနုရုဒ္ဓါႏမထေရ်ႏ၊ စတွမ်ႏရဟန္တာႏ၊ ငတ်ꩻရျာꩻဗွေဗွေ၊ ထိုမ်းတွမ်ႏပျသာဒ်၊ ငတ်ꩻရျာꩻကျောင်ႏထင်ႏ၊ ကင်ဟဝ်မို့ꩻလောင်း၊ အရောင်ႏအဝါ၊ တနျာႏတသီး၊ ပီနုဲးမွူးလာ၊ ကျွꩻကာသဲင်ꩻစူꩻ၊ သုဝဏ္ဏဝေင်ꩻ၊ ပင်ꩻသဲင်ꩻပါတွမ်ႏ၊ နီဗွေႏဘုရာꩻ၊ ကေသာဆံတောႏ၊ နီဆီသွစ်ꩻဆူႏ၊ လွဉ်ခေါက်လွဉ်ဝုဲႏ၊ ရွှေစာရံဘုရာꩻတန်၊ ခေါက်ဝုဲႏလေပ်ခူ၊ စူထွေသိုမ်ပတ်၊ သေႏချာႏထွူမꩻ၊ ကျွꩻကာထင်ႏစူꩻ၊ သိန်ကနစ်ကောင်ထျꩻ၊ မူလသက္ကရာဇ်၊ တစ်နှစ်နဝ်ꩻရာꩻ၊ တရျာꩻတဆီ၊ လွိုတကီလစ်ꩻဗာႏ၊ လွိုန်သီႏလာမျတ်၊ ဆန်ꩻထင်ႏသွစ်ꩻသာ၊ ဖဝါနာႏရီႏ၊ ဃဋီႏမိဿ၊ ဗုဒ္ဓဟူꩻနီꩻ၊ အနုရုဒ္ဓါႏမထေရ်ႏ၊ ပျုစုတယ်ႏထောင်ႏ၊ ကောင်ႏမူꩻစေႏတီႏ၊ အဋ္ဌဝီသ၊ နီဆီသွစ်ꩻဆူႏ၊ ခူႏအောင်ဌာပနာႏ၊ ကေသာဆံတော်၊ ပူႏဇောႏလူႏတန်ꩻ၊ ကောင်ခံꩻအထျꩻ၊ ဆဝေင်ꩻဆကွဉ်ႏ၊ နီဆီသွစ်ꩻဆူႏ၊ သမုတ်ဟဲ့ꩻဟောင်၊ မိုးကောင်းဘုရာꩻ၊ သမုတ်ရိုꩻနော၊ သူႏတောႏသီးယာ၊ အဋ္ဌဝီသ၊ ပေႏတန်သီးယာ၊ မတ်နာႏစဲင်းစဲင်း၊ လိတ်သဲင်လုဲꩻခံꩻ၊ လိတ်မန်းတောင်ႏမာႏ၊ ပေႏလာႏအလောင်း၊ ထန်ႏလွဉ်ပီးနဝ်ꩻ၊ ဗွေႏစဝ်းဘုရာꩻ၊ စေႏတီႏတောႏမျတ်၊ ပညပ်အွဉ်ႏကုဲ၊ တင်ꩻလုဲအတာႏ၊ ခွေနာꩻအရင်ꩻ၊ ငမ်းကွင်တဖူꩻ၊ ငမ်းအယူႏမာႏ၊ ငမ်းတသေငါꩻတဝ်း၊ ဗွေႏစဝ်းဘုရာꩻ၊ အွဉ်ႏကုဲငသေꩻ၊ သက်သေႏသက်ကန်ႏ၊ မွိုးနန်းစခါ၊ ဘုရာꩻကောဏဂုံႏ၊ ဘုံႏထူꩻမျတ်လ၊ တွက်ဆနပ်ရေႏ၊ သင်္ခေႏနီဆီ၊ ပုဲတွမ်ႏတသဲဉ်၊ ခမ်းတန်သာႏယာႏ၊ ပဉ္စာလရာဇ်၊ ပြည်ကြီးခမ်းတန်၊ ဟော်ခံꩻရာႏဇာႏ၊ မဟာႏမင်ꩻကြီꩻ၊ အမေနာမ၊ မဟာစူရဋ္ဌ၊ ရာဇဟော်ခံꩻ၊ စံႏစာꩻအုံအဝ်ႏ၊ နဝ်ꩻခါတနီꩻ၊ ဟဲ့ꩻတွမ်ႏမူꩻမတ်၊ စာႏဖတ်စာႏရေꩻ၊ ထန်ႏလယ်ႏဝေင်ꩻသောင်၊ လွေꩻထီႏတွိုႏစွဉ်ႏ၊ ကောဏဂုံႏဘုရာꩻ၊ ကိုႏစာꩻအွဉ်ႏကုဲ၊ လူꩻဝုဲႏလိုꩻခေါက်၊ မြေပေါက်နေရာ၊ ဟော်ခံꩻထင်ႏထီႏ၊ ရီႏစွဉ်ႏအမတ်၊ စာႏဖတ်သီးယာ၊ ထာꩻမုဲꩻနဲနဝ်ꩻ၊ ငဝ်းငွါထင်ႏရီ၊ စူတဆီရွမ်းဗူႏ၊ ကတူႏကီအွဉ်ႏဒင်ႏ၊ ဝုဲႏထင်ႏလျောက်လဝ်း၊ ဩစဝ်းဩဗွေႏ၊ ကောဏဂုံႏဘုရာꩻ၊ စေႏတီႏနဲဩ၊ လျောက်လဝ်းဟော်ခံꩻ၊ ခွန်တန်ထင်ႏသေ၊ ရိုꩻဖေႏအမတ်၊ စာႏဖတ်သီးယာ၊ ထာꩻမုဲꩻကမွေး၊ အဝ်ႏသေအဝ်ႏထီႏ၊ ဟံႏပူႏအွတ်ꩻပြုံႏ၊ ဝေင်ꩻသောင်ဝေင်ꩻဒွို၊ ဝန်ꩻထိုꩻသက်ခန်း၊ လူႏတန်ꩻကုသိုလ်ႏ၊ အကျိုꩻငထဝ်း၊ ငဝ်းငွါဝါႏစာႏ၊ သမုတ်သွမ်ꩻတွေ၊ ရိုꩻမာႏကေꩻဇူꩻ၊ အယူႏဝါႏသနာႏ၊ ခန္ဓာႏအာယု၊ ထင်ႏလို့ထင်ႏဝုဲꩻ၊ လုဲႏဇာတ်ပြွတ်ပန်၊ ဟောင်ရိုꩻသဲင်ꩻထွာ၊ ပြိတ္တာဖြားတန်၊ ဂိဇ္ဈကုဋ်ကောင်ထျꩻ၊ တောဝမြိုင်အို၊ အနမ်းတကုတ်တန်၊ သွုန်စွဉ်ႏထန်ꩻမွူး၊ ကတူႏပွန်တန်ဆွာꩻ၊ ယာႏဖြေင်းဗေင်ႏလန်၊ ပွုံႏပန်ဆွတ်ꩻတူႏ၊ ကိုမ်ႏစျူဟို့ꩻတဒွီႏ၊ ပီနုဲးမေႏကျောင်ႏ၊ ဗွူတရွောင်ယ၊ အံႏမဒဲဉ်ဟန်ႏ၊ အံႏလဲ့မဒါႏ၊ ဖြောင်းခါသမ်းအဲဉ်ႏ၊ တွာရွုမ်ꩻထꩻမီး၊ ကတောင်သမ်းလေ၊ တာရှည်ညဆွာꩻ၊ ဥပမာႏရေအိမ်၊ နွုမ်ꩻသေင်နွုမ်ꩻလီး၊ နွုမ်ꩻတရီနွုမ်ꩻဟတ်ꩻ၊ ပသံစက်ဆုတ်၊ တပြွတ်နွောင်ꩻတဝ်း၊ အဝ်ႏတွိုႏငခါ၊ (လိုꩻ)တထွာတဝ်း၊ လူꩻဟဝ်လိုꩻဒါႏ၊ ဘုရာꩻပညပ်၊ ငဝ်းငွါမိန်းတောႏ၊ ဟော်ꩻထန်ႏနယ်ဖေႏ၊ သူရိစန္တာႏ၊ ရာဇာႏမင်ꩻကြီꩻ၊ နီဗွေႏဘုရာꩻ၊ ဖြောင်းထာဖြေꩻခံꩻ၊ ကျမ်ꩻဂန်ႏတရာꩻ၊ ပေႏလောႏအလောင်း၊ တောင်ႏမာႏလိတ်မန်း၊ ထန်ႏလွဉ်ပီးနဝ်ꩻ၊ ထဝ်းကဲသီးယာ၊ မီႏထွာကထီႏ၊ စေႏတီႏဘုရာꩻ၊ ကိုꩻစာꩻရုတ္ထု၊ ကောင်းမုစေႏတီႏ၊ ဒီဟဝ်ကိုꩻကွယ်ႏ၊ ဒီဟဝ်ဝုဲႏခေါက်၊ ဒီဟဝ်သုတ်သင်ႏ၊ ဖျင်ဆင်လွမ်ꩻလာꩻ၊ ကျိုꩻစာꩻတဲတဲ၊ ထွားနုဲင်းမွုန်းတဝ်း၊ ဟော်ခံꩻစခါ၊ သမုတ်မွုန်းနော၊ အပဲစ်ယော့ငါႏ၊ မတ်ဖွီမွုန်းနော၊ တွေꩻတော်ꩻမီႏယူႏ၊ ထုဲႏပီဟော်ခံꩻ၊ မွိုးနန်းစခါ၊ ပဉ္စာလရာဇ်၊ ခမ်းညစ်ခမ်းဖြန်၊ သဲင်ꩻထွာဖူꩻဗာႏ၊ ပိတ္တာႏပိတ္တူႏ၊ မဲ့တဗူးတူႏပွံ၊ နားလာတခြွတ်ꩻ၊ အဆွတ်ꩻငထဝ်း၊ ငအဝ်ႏအံႏမ၊ ဒုက္ခဆင်ꩻရယ်ꩻ၊ နယ်ꩻဒွါႏအနမ်း၊ ကံႏလီꩻစခါ၊ မီထွာဟို့ꩻခိုး၊ ငွိုးရုဲꩻတဝျာႏ၊ သောင်ဒွါႏဟွူးဟွူး၊ မွိုးဟွေးကော့ꩻဖါ၊ စူမီႏဆွာꩻထန်ႏ၊ စန်သိုဗိုန်ပီ၊ အွꩻအံႏအတာႏ၊ ခြဝ်ငဝ်းဆဲမ်ႏခင်ႏ၊ အင်စွဉ်ႏအလားလား၊ ဖါဖါမွိုးမွိုး၊ ငွိုးကော့နောင်ႏတ၊ ဂိဇ္ဈကုဋ်ကောင်ထျꩻ၊ တဗေႏတဗျဖြေင်းယိန်၊ တန်ထိုပွုမ်ႏပံႏ၊ ဆွုမ်ႏနမ်ႏမသူႏသေ၊ ပွိုးစွဉ်ႏသမုတ်၊ သုက္ချဖူꩻဗာႏ၊ ဘုရာꩻစေႏတီႏ၊ ဒီဟဝ်ငမ်းသꩻ၊ ရွိုင်ꩻရျꩻငါႏတဲ၊ ရဲလဲ့မဒါႏ၊ တကာႏသီးယာ၊ မီႏထွာကထီႏ၊ စေႏတီႏလဲ့ခါ၊ ကိုႏစာꩻယာတ၊ ယံကမတ်နုဲး၊ ထုဲႏပီဘုရာꩻမွန်၊ လꩻအီကုသိုလ်ႏ၊ အကျိုꩻတန်ကတ်၊ မတ်နောတကာႏ၊ ဘုရာꩻစေႏတီႏ၊ နီသီငခါ၊ သဲင်ꩻကျုံႏသဲင်ꩻညာႏ၊ သာႏသနာႏအတွင်ꩻ၊ သာညမသီခွေ၊ တမွေးတဝ်းနော၊ သဲင်ꩻတောႏသဲင်ꩻညာႏ၊ သာႏသနာႏသမ္ပတ္တိ၊ စက်မျတ်စေႏတီႏ၊ ဘုရာꩻပဉ္စဝ်း၊ ကျွန်ꩻနဝ်တီႏပါႏ၊ ရာဇာဟော်ခံꩻ၊ ခမ်းတန်ရွှေထုံ၊ သုဝဏ္ဏဘုမ္မိ၊ သူရိစန္တာႏ၊ မဟာႏမင်ꩻကြီꩻ၊ ထီꩻဗွာအဗွေႏ၊ ဧကရာဇ်ဟော်ခံꩻ၊ မွိုးနန်းပအိုႏ၊ တံꩻခိုꩻလဲ့တန်၊ အံႏခမ်းပွိုင်ႏထီ၊ နီဗွေႏဘုရာꩻ၊ ငဝ်းငွါထံꩻတောႏ၊ ဟော်ꩻဖေႏထွူမꩻ၊ ကျွꩻနွို့နိဗ္ဗာန်ႏ၊ အနမ်းကံနေး၊ ရွှေပြည်နိဗ္ဗာန်ႏ၊ အွဉ်ႏကုဲကိုႏစာꩻ၊ စင်ပါစင်နီ၊ ဒီဟဝ်ကိုꩻကွယ်ႏ၊ ခေါက်ဝုဲႏလူႏတန်ꩻ၊ ကိုႏယံရိုႏသေႏ၊ ယံဖေႏအပဲစ်၊ ကင်ꩻလွစ်နမ်းကီ၊ ဒီဟဝ်ရိုႏသေႏ၊ လေႏမြတ်လွမ်ꩻလာꩻ၊ မွူးဟာလူႏကဝ်ႏ၊ မွူးရဝ်ꩻသွမ်ꩻတောႏ၊ ဩဇာႏသွမ်ꩻပန်ꩻ၊ နမ်းမန်ꩻဆီမီး၊ ဒီဟဝ်ရိုႏသေႏ၊ လေမြတ်ပူႏဇောႏ၊ ဆျာထီတောင်းလုဲ၊ နွိုးယုဲအွီႏသာႏ၊ ကားကလꩻဒါႏ၊ ဟန်ႏလာႏဟန်ႏသဉ်၊ မဉ်မိုသေင်ႏရာႏ၊ တခြာကိုဖူꩻ၊ ထီကိုကစ၊ ဒါနငစင်စင်၊ အရင်းကားသꩻ၊ စဉ်ႏထမမွေး၊ ဝင်ꩻရိုꩻတဝ်းနော၊ ထော့ꩻယာႏဟင်းလေꩻ၊ အကျိုꩻတန်အာ၊ ယံရိုꩻပုဲႏမွုန်း၊ အရင်းကားစေႏတနာႏ၊ သဒ္ဓါႏမီႏစုမ်း၊ အွဉ်ႏသꩻမီႏဟဝ်၊ ဟန်ႏသဉ်လဲ့ဒါႏ၊ ဟန်ႏလာႏယတ၊ အကျိုꩻလꩻခြေင်ခြေင်၊ ဗေသေင်ငချင်ꩻ၊ နမ်းမန်ꩻတသာႏ၊ အကျိုꩻလꩻနုဲးနုဲး၊ ထုဲႏပီလွဝင်ꩻ၊ အရင်းကားဝီရိယ၊ တကာႏမတကာႏခို၊ ပအိုႏခိုမူႏ၊ ယံယူႏသေနာႏ၊ လင်္ကာႏလိတ်ဖတ်၊ စပ်စီႏထေထန်ႏ၊ ရွှေထုံသမဲင်ꩻ၊ လိတ်သဲင်လုဲꩻခံꩻ၊ မစဝ်းဗွေႏဗွန်၊ ကျမ်ꩻတန်သေနာႏ၊ ဒါႏလိတ်ဒါႏလုဲꩻ၊ သꩻအွဉ်ႏနုဲးနဝ်ꩻ၊ တမွေးတဝ်းနော၊ လိတ်တန်လုဲꩻကြီꩻ၊ သန္ဒိသဒ္ဒါႏ၊ တသွဉ်ဗာႏတဝ်း၊ သွဉ်ဗာႏလယ်ႏရွုမ်ꩻ၊ ရဟန်ꩻကျင်ꩻဝတ်၊ ပါတိမောက်တွမ်ႏ မူလိသိက္ခာႏ၊ မာတိကာနီစောင်ႏ ခုဒ္ဒသိက္ခာႏ တကာႏသီးယာ၊ အုံရဝ်းညီꩻဗာႏ ဆရာႏခင်ႏထျꩻ၊ တညလုံတဝ်း၊ တပါꩻဒွါႏရွုမ်ꩻ၊ ဆရာႏအွဉ်ႏခေါ်၊ တော်ꩻကျောင်ꩻတော်ꩻကန်ႏ၊ အွဉ်လော်လယ်ႏပါဒွါႏ၊ ဝါႏသနာႏကျောင်ꩻရင်ꩻ၊ မွိုးနန်းစခါ၊ ပညာႏပါရမီႏ၊ တဗွေညီႏတဝ်း၊ နဝ်ꩻလဲ့တစိꩻ၊ သတ္တိတွမ်ႏဉာဏ်ႏ၊ ရမ်းဆေ့ꩻဒွါႏရင်ꩻ၊ ကံပီးနဝ်ꩻလဲ့၊ ခွေနာနီသီ၊ ပီပီလွဝင်ꩻ၊ သင်္သရာႏနမ်းငါ၊ တထီႏလွတဝ်း၊ ပါမုဲꩻနဝ်ꩻမျတ်၊ ပါꩻမုဲꩻကတ်လွို၊ တသေလွဉ်ꩻတဝ်း၊ မစဝ်းဝါးခွေ၊ ယံဖေႏအဝင်ꩻ၊ တင်ꩻလုဲအံႏဖြာႏ၊ တမွေးတဝ်းနော၊ ထီႏတောႏကတ်ငါႏ၊ သင်္သရာႏနမ်းငါ၊ ယံပါလွဉ်ꩻရဝ်း၊ ဗွေႏစဝ်းဘုရာꩻ၊ ယံလꩻထွာဗာႏ၊ ပညာဓိက၊ ယံလꩻအမန်ႏ၊ အွဉ်ႏသကွီဆုꩻ၊ ကောင်းမုယံထွာ၊ တစောင်ႏသားလဲ့၊ မစင်ꩻဖါသီရိ၊ မဉ်လꩻတောင်ꩻပြန်ႏ၊ မဉ်လူႏတန်ꩻကိုꩻကွယ်ႏ၊ မဉ်ဝုဲႏခေါက်ပူႏဇောႏ၊ မဉ်ကံမဉ်ကျင်ꩻ၊ မဉ်နာႏမဉ်ဟွုန်၊ ရွှေထုံသမဲင်ꩻ၊ လိတ်သဲင်လုဲꩻခံꩻ၊ မစင်ꩻဖါသီရိ၊ မဉ်လꩻတောင်ꩻပြန်ႏ၊ စဝ်းဗွန်ထင်ႏဟွုန်၊ ငဝ်းနွိုးငွါအွီႏ၊ ထုဲႏပီကတိုꩻ၊ ဇာတိဖိုႏလေညင်ꩻ၊ လုံꩻကင်ꩻနံႏသာႏ၊ အွီႏငါနွိုးစုံ၊ ဝံꩻမျောက်ဝံꩻသာႏ၊ အာႏရꩻနစ်သက်၊ ရက်ပွိုင်ႏဟွုန်ဟဝ်၊ ကျိုꩻလိုႏသင်္သရာႏ၊ နမ်းငါအရင်ꩻ၊ နန်းထောက်ငသေꩻ၊ မိတေလက်ဆောင်ႏ၊ ဖေါင်ႏတောႏလက္ခ၊ ရမွော့အီႏထွာ၊ တမွာမွာစွဉ်ႏ၊ ဝေင်ꩻထာဝေင်ꩻခံꩻ၊ နိဗ္ဗာန်ႏဟန်ႏဟာ၊ ဥပမာႏမွူးရဝ်ꩻ၊ ဟွုန်ဟဝ်ကတ်ငါႏ၊ မစင်ꩻဖါသီရိ၊ နှစ်သက်အာႏရꩻ၊ ဌာနင်ခင်ႏလမ်းအုံ၊ ဒုံတန်ဝေင်ꩻဖူꩻ၊ ထာꩻပူႏလောင်းကီ၊ စေႏတီႏဘုရာꩻပေါက်၊ တလျောက်နဝ်ထင်ꩻ၊ ရွှေချောင်းထွက်ရံႏ၊ ခြောင်ခံꩻဆကီကွဉ်ႏ၊ သိင်္ကနှစ်ဘုရာꩻ၊ ရွှေမြင်ထင်ဥပါလိ၊ ဝန္ဒာမိကောင်၊ အလောင်းဆထင်ꩻ၊ ဟဲ့ꩻလင်ꩻဆုတောင်ꩻပြဲ့ꩻ၊ နဝ်ꩻထွူကွိုနဲ၊ ထဝ်းကဲသီးယာ၊ တဖုံႏတဉ်ဟွေး။

ဟန်ႏလဲင်ႏယိုနဝ်ꩻ၊ အဝ်ႏကုဲနေက၊ ညညတဲင်ခါ၊ ၆၇-ခု၊ သုဝဏ္ဏဘုမ္မိ၊ ပတိရူပ၊ ဌာနရွှေထုံ၊ ခွန်တန်တပါꩻ၊ အဝ်ႏဒွါႏခြုံꩻဆကွဉ်ႏ၊ မာꩻလွဉ်တယ်ႏထောင်ႏ၊ ရွှေမောင်ထွာခွန်၊ တတွန်ရာဇ၊ အုံဒွါဝေင်ꩻသထုံႏ၊ သုဝဏ္ဏဘုမ္မိ၊ ဇာတိပအိုႏ၊ ကိုꩻကွယ်ႏပျုစု၊ ရုတ္ထုစေႏတီႏ၊ ပိုလီꩻဟဲ့ꩻခန်း၊ စန်ထန်ႏမဟာရံႏ၊ တယ်ႏမံႏပျုစု၊ နုပျိုသာႏယာႏ၊ ရာဇာႏမင်ꩻကြီꩻ၊ ပိုလီꩻဟဲ့ꩻဟောင်၊ ပေါင်ဝင်ꩻတွိုင်ႏပင်ႏ၊ မဟာရံႏတံꩻတွိုင်ꩻ၊ တယ်ႏဝွိုင်ꩻလေပ်ခူ၊ ကောင်ႏမူꩻဘုရာꩻ၊ မျက်နာႏတလင်ꩻ၊ ဆထင်ꩻဆကွဉ်ႏ၊ အွဉ်ႏခူတယ်ꩻခန်း၊ လုံႏတရန်ကျောက်တဲင်ႏ၊ သီစဲင်ႏလစ်ꩻနား၊ ညီႏတွာလစ်ꩻဖဲ့ꩻ၊ အင်ꩻလဲ့ခွုမ်သူႏ၊ ထွန်ဗွာသမ်းသူႏဒင်ႏ၊ ကျောက်သလင်ႏဗိုန်ပီ၊ မင်ꩻကြီꩻရွှေမောင်၊ တယ်ႏထောင်ႏပျုစု၊ ရုတ္ထုစေႏတီႏ၊ နီနာꩻဗွန်ကံႏ၊ သန်ဟဝ်မွေးတဲ၊ နဝ်ꩻမꩻလဲ့ဝုဲႏဗာႏ၊ ဘုရာꩻရွှေထုံ၊ ဇမ္ဗူႏကျွန်ꩻနဝ်၊ ငထဝ်းအတု၊ သဗ္ဗညုဘုရာꩻ၊ အနမ်းအဝ်ႏကာလ၊ ပဌမတယ်ႏထောင်ႏ၊ ဟံႏလောင်းဟံႏကီ၊ စေႏတီႏဘုရာꩻ၊ ရွှေစာရံရွုမ်ꩻနော၊ မီႏရိုꩻအလင်၊ ပျင်သေꩻနဝ်ꩻရာꩻ၊ သိကျာꩻခွန်လူꩻ၊ လွဉ်စူꩻဌာပနာႏ၊ နီဗွေႏဘုရာꩻ၊ နဝ်ꩻရာꩻအနမ်း၊ တပါလွဉ်ꩻတဝ်း၊ နဝ်ꩻမꩻရိုꩻဗာႏ၊ ဘုရာꩻရွှေထုံ၊ သုဝဏ္ဏဘုမ္မိ၊ စေႏတီႏဘုရာꩻတန်၊ ရွှေစာရံရွုမ်ꩻနော၊ လိုꩻဝုဲင်ႏလူꩻခေါက်၊ စွုမ်ႏစောက်စွုမ်ႏစဲင်ႏ၊ ခွန်ဖီသိကျာꩻ၊ တအုံဗာႏတဝ်း၊ အဝ်ႏထွားအဝ်ႏတီ၊ စွုမ်ႏနီꩻစွုမ်ႏဟာ၊ စွုမ်ႏလာစွုမ်ႏနေင်ႏ၊ ဒုံဝေင်ꩻသုဝဏ္ဏ၊ သက္ကရာဇာ၊ ဌာပနာႏငသေꩻ၊ ပန်ꩻကုံꩻသဲင်ခံꩻ၊ ဓိဋ္ဌာန်ႏပန္နက်၊ ဆက်ဆက်စဲဉ်ႏစဲဉ်ႏ၊ ထိန်ꩻသေင်ႏပွိုးဝါႏ၊ မဟာႏလူႏတန်ꩻ၊ လစ်ꩻဖြာꩻလစ်ꩻဆူႏ၊ လူꩻတန်အဝ်ႏထွား၊ ရွစ်တွိုႏဟန်ႏနီꩻ၊ နီနာꩻအစိုး၊ ရွှေမောင်အပန်၊ ခွန်တန်မဟာႏ၊ ရာဇာမင်ꩻကြီꩻ၊ အံႏထီပွိုင်ႏခမ်း၊ မာꩻနမ်းရာဇာ၊ မဟာႏမင်ꩻကြီꩻ၊ နီဝင်ꩻပအိုႏ၊ မူႏခိုကွိုတဝ်း၊ ကံႏဗွန်ပေါႏအခွိုက်၊ ထွိုက်ငါႏကျကျ၊ သမ္ဘာရခွိုꩻနွယ်ႏ၊ တလွယ်ꩻတဝ်းစွုမ်ႏပန်၊ တယန်တဝ်းစွုမ်ႏဇာတ်၊ ခွန်မျတ်ရာဇာ၊ ထံꩻသာꩻပိုလီꩻ၊ မီꩻခိုꩻစဝ်းပွိုင်ႏ၊ လွိုင်ႏအာကွုန်ꩻကတ်၊ အရပ်လစ်ꩻမျက်နာႏ၊ သာႏယာႏနုပျို၊ ခွန်ပအိုႏအခမ်း၊ နမ်းတန်ကြိုဆွာꩻ၊ အာႏဏာႏလဲ့ထို၊ တံꩻခိုꩻလဲ့အဝ်ႏ၊ စဝ်းခွန်ထွာဗွေႏ၊ မီႏသေဘုရာꩻ၊ တရာꩻသင်္ဃာႏ၊ ရတနာႏမျတ်သိုမ်ဆူႏ၊ လိုꩻလူꩻအဗွေႏ၊ ဝေနေယျအဖါ၊ စခါသူꩻရီး၊ ခါးလားနေးထူႏ၊ ခမ်းသူႏဝေင်ꩻယေန်၊ နိဗ္ဗာန်ႏအခါႏ၊ ကိုႏစာꩻအွဉ်ႏကုဲ၊ တင်ꩻလုဲအတာႏ၊ သတ္တဝါႏအပွန်း၊ ယံမွန်းပျောႏဗာႏ၊ ကိုႏစာꩻရုတ္ထု၊ ကောင်းမုစေႏတီႏ၊ မီႏထွာသုတ်သင်ႏ၊ စီႏရင်ႏပေါင်မာꩻ၊ ရာဇာခွန်မွိုင်၊ တံꩻခိုꩻယွိုင်း(ယိန်း)ထင်ႏ၊ အာႏဏာႏယွိုင်းသန်၊ ထီခမ်းနုပျို၊ လိုꩻလဲ့အီႏကွုန်ꩻ၊ သထုံခမ်းနေရာႏ၊ ဌာနဝေင်ꩻခူꩻ၊ ထာꩻပူႏလောင်းကီ၊ စေႏတီႏဘုရာꩻပေါက်၊ တလျောက်နဝ်ထင်ꩻ၊ နာꩻရင်ꩻခွေပွန်း၊ နင်းဟွူကပျောႏ၊ ခမ်းကျောႏဝေင်ꩻဟုံ၊ အီႏအုံစံႏစာꩻ၊ တကာႏသီးနော၊ ကူꩻကောမတ်နာႏ၊ ဘုရာꩻတကာႏသီးယာ၊ စဝ်းဗွန်နောင်ကလာꩻ၊ ကျိုꩻစာꩻထေထန်ႏ၊ လိတ်မန်းအဖူꩻ၊ ကျံꩻဦꩻလောင်းကီ၊ တနီꩻတစက်စက်၊ သက်သက်သာႏသာႏ၊ နာꩻဟာယူႏတွေꩻ၊ ဖြီႏတဖြီႏတဝ်း၊ နဝ်ꩻလဲ့စဝ်းသီး၊ ဝံꩻနယ်ꩻမွုန်းတဝ်း၊ စဝ်းဗွန်နောင်ကလာꩻ၊ မီႏထွာကထီႏ၊ မတ်ပီစဝ်းသီး၊ ကစီႏရင်ႏဒွါႏ၊ အလာႏအစော့ꩻ၊ သော့ꩻထဲင်းဒွါႏနော၊ သူႏတောႏသီးယာ၊ ခွေကထွာမော်၊ ဖေါႏထန်ႏငကီ၊ သေနာႏလို့တဝ်း၊ တောင်ႏမာႏငဝ်းငွါ၊ သေနာႏရွုမ်ꩻထာဝ၊ လꩻရွုမ်ꩻသင်းဟန်ႏ၊ အဝ်ႏကျန်ႏကဲဉ်းအာ၊ တသာတတွိုႏတဝ်း၊ ငဝ်းငွါခုဲႏခွေါ့၊ ဆွို့မားဖြေꩻထျꩻ၊ အွဉ်ႏဒေါ့ꩻတလꩻတဝ်း၊ စဝ်းသီးတင်ꩻလုဲ၊ မီႏထွာကထီႏ၊ ကဲ့ꩻရဲ့ꩻမွုန်းဗွေႏ၊ စဝ်းဗွန်နောင်ကလာꩻ၊ ဦးဝိလာသ၊ ကိင်းအံႏဖြာႏကြွို့ꩻ၊ တရွို့ꩻတွမ်ႏဝင်ꩻ၊ တင်ꩻလုဲကရိုꩻ၊ စွိုးယိုစွိုးနဝ်ꩻ၊ ယံဖြဝ်ႏမွုန်းနော၊ မီႏတယွုမ်းတဝ်း၊ နဝ်ꩻလဲ့ကမ်းသꩻ၊ ခွေသွဉ်းစွꩻခွင်ꩻ၊ နီဝင်ꩻပအိုႏ၊ ကံႏရိုꩻငကီ၊ ပညာႏရှိနုဲးနုဲး၊ အီႏထီႏအီႏထွတ်၊ တဗိုန်ကြွို့ꩻတဝ်း၊ ခွေခါရိုꩻလဲ့ကံႏ၊ ထကံႏထွတ်၊ ငမ်းသꩻအဝင်ꩻ၊ တင်ꩻလုဲကဲ့ꩻရဲ့ꩻ၊ ထွားမဲ့မွုန်းတဝ်း၊ စဝ်းဗွန်နောင်ကလာꩻ၊ စာပေသမဲင်ꩻ၊ လိတ်သဲင်လုဲꩻခံꩻ၊ ထေထန်ႏဖေႏယို၊ ပအိုႏအငဝ်း၊ ထဝ်းကဲသီးယာ၊ တောင်ႏမာႏလိတ်မန်း၊ ပြန်ႏဖေႏပအိုႏ၊ ရိုꩻရိုꩻသာꩻသာꩻ၊ လင်္ကာႏလိတ်ဖတ်၊ ဘုရာꩻရွှေထုံသမဲင်ꩻ၊ လိတ်သဲင်လုဲꩻခံꩻ၊ ကိုႏယံရိုႏသေႏ၊ လေမြတ်ကိုꩻကွယ်ႏ၊ မီႏထွားမီႏဖတ်၊ ယံကအွဉ်ႏဒင်ႏ၊ တလင်ႏခံꩻလောင်းကီ၊ မတ်ပီဘုရာꩻ၊ နမ်းကဝ်ကာယ၊ စာပေႏလိတ်ယို၊ ရိုႏသေႏတုပ်ကွ၊ ဒါနယံထွာ၊ ပညာႏရှိလိုꩻမော်၊ ထွဉ်ႏဟော်ꩻထွဉ်ႏဖတ်၊ နေးနာႏမတ်ဆွုမ်ႏ၊ အပုံႏအဇာတ်၊ ဖတ်ထွားကုဲးကုဲး၊ မွူးဟာတစိုး၊ လိုꩻဖြားလိုꩻကယ်ႏ၊ ယံနားလယ်ႏအဇာတ်၊ ယံမတ်လွအပွုမ်ႏ၊ ထုံꩻစံႏမွိုးနန်း၊ ဗွန်တန်ဘုရာꩻ၊ မိန်ꩻထာငသေꩻ၊ ပေႏလာႏအလောင်း၊ တောင်ႏမာႏလိတ်မန်း၊ ထန်ႏလွဉ်ပီးနဝ်ꩻ၊ ထွူသဝ်ꩻသွတ်ꩻမန်ႏ၊ နိဋ္ဌိတံႏအခန်ꩻ၊ လို့မန်ႏထွူကွိုနဲ ဗွေႏဩ၊ သာႏဓု--သာႏဓု----သာႏဓု------။

ခွေသွဉ်းစာႏရေꩻ၊ တဲမ်းကူꩻအနေင်ႏ၊ တရေင်နီရျာꩻ၊ သာလွိုနွုတ်ꩻဆီ၊ လွိုတကီတဗာႏ၊ လာနဝ်ꩻတထိန်ႏ၊ ဆန်ꩻထင်ꩻလစ်ꩻနီꩻ၊ မွူးနီꩻစနေႏ၊ သေႏချာႏထွူကြောင်း၊ စေးလောင်းတကီ၊ နီဗွေႏဘုရာꩻအဇာတ်၊ တဲမ်းမတ်ငသေꩻ၊ နောင်ႏရေꩻနဝ်ꩻတငါ၊ ယံထွာကုသိုလ်ႏ၊ အကျိုꩻကွီလွဉ်ꩻ၊ ချမ်ꩻသာႏနိဗ္ဗာန်ႏ၊ ဘုရာꩻတန်အဆုꩻ၊ သဗ္ဗညုအခြွီ၊ ကွီအီတွမ်ႏတရာꩻ၊ တဲမ်းဗာႏကူꩻတော၊ စဝ်းဗွန်နောင်ကလာꩻ၊ ဦးဝိလာသစာမူ၊ ကူႏထန်ႏဖေႏဗာႏ၊ တရာꩻလိတ်ယို၊ အကျိုꩻယံလꩻ၊ ဘဝနမ်းငါ၊ ယံထွာတသေႏ၊ လိုꩻထိုလိုꩻမျတ်၊ စွုမ်ႏဇာတ်စွုမ်ႏလီ၊ မီႏရိုꩻခွေသွဉ်း၊ နောင်းအွဉ်းစာႏရေꩻ၊ ဌာနေရပ်မ၊ ဌာနရပ်သာႏ၊ ဝါႏခြာခြောင်ခံꩻ၊ ရဟန်ꩻကျောင်ꩻသောင်၊ ထီခြောင်အထျꩻ၊ အထန်ႏကူꩻတော၊ ခေါခဲ့သာႏယာႏ၊ ရပ်ရာႏကောင်ဖဲင်၊ တလဲင်ပန်းဖုဲ၊ ကောင်ဖုဲးဆတွို့ꩻ၊ စွို့ꩻတွမ်ႏသိင်္ကနှစ်၊ စေႏတီႏဘုရာꩻပေါက်၊ ဝေင်ꩻစောက်တောစခန်ꩻ၊ ဂိမှန်ႏဥတု၊ နုပျိုသာႏယာႏ၊ ဌာနခင်ႏလမ်းအုံ၊ ထီစုံနမ်းဟောင်း၊ ခြောင်ခံꩻအထျꩻ၊ ကွိုနဲဗွေႏဩ၊ သာႏဓု----သာႏဓု--သာႏဓု--။ တတိယအခန်ꩻ နိဋ္ဌိတံ။

၁၃၁၇-ခု၊ လွိုန်စေင်ဆန်ꩻထင်ႏ၊ ၅-နီꩻမန်ႏမန်ႏ၊ မွူးနီꩻတနင်ꩻလာႏ၊ သမဲင်ꩻရွှေထုံ၊ အုံအဝ်ႏတဲမ်းကူꩻ၊ ထွူမန်ႏသွတ်ꩻလို့၊ နုမောဒနာႏ၊ ရပ်ရွာႏခွေသွဉ်း၊ ပန်အွဉ်ထွို့ꩻစွီႏ၊ တဆီနီကောင်း၊ ဟောင်ရိုꩻလွယ်လုံ၊ အုံအဝ်ႏဒေသ၊ သမထ ဝိပဿနာ၊ တရာꩻအားထုတ်၊ နုက္ခပါဌ်ထွေထောင်၊ ကောင်ပူႏသေင်ႏဟေ့ꩻ၊ မျတ်မုနိဘုရာꩻ၊ သတင်ꩻသုံꩻကိန်ꩻလျောင်ꩻ၊ ကောင်ထျꩻဌာန၊ ဒေသထွူဩ၊ ဆုခေါမဉ်လꩻ၊ နိရောဓခေမာႏ၊ ချမ်ꩻသာႏနိဗ္ဗာန်ႏ၊ မန်ႏမန်ႏယံလꩻ၊ ကွိုနဲဗွေႏဩ၊ မွိုးဖါဆရာႏ၊ ဉာတိအားလုံး၊ သိုမ်ဆီတဖုံႏလို့လို့၊ ပံသုဝသုံ၊ သက်သေႏဟံႏတန်၊ နီသဲဉ်လစ်ꩻမွုန်ႏ၊ တွိုင်ႏဟွုန်သက်သေႏ၊ ယံဖေႏတောင်ꩻမတ်၊ ဟဝ်မျတ်ကုသိုလ်ႏ၊ ဝွေႏမျဗဲင်းတွာ၊ တဲမ်းကူꩻဗာႏလိတ်၊ သမဲင်ꩻစာႏယို၊ ကုသိုလ်ႏမျမျ၊ နမ်းသꩻနီပါꩻ၊ ယံချမ်ꩻသာႏညီꩻဝင်ꩻ၊ ကွိုနဲးဗွေႏဩ၊ ----သာႏဓု----သာႏဓု----သာႏဓု--- ။ လိတ်မဲ့ငါ == ဗꩻလို့လို့စင်စင် မဲ့ငါ--၈၈

((( စီႏခြပ်ကွန်ပျူလိတ်ဖြုံႏ = ၁၃၈၆-ဗာႏ၊ ဝါႏခေါင်ႏလောင်း (၃/၄)တွင်ꩻ ဗꩻလင်ꩻ လာလောင်း(၆)နီꩻ၊ မွူးနီꩻ--တနင်ꩻနွေႏ (၂၅-၈-၂၀၂၄)။)))))) သာႏသနာႏနေင်ႏ-- ၂၅၆၇-ဗာႏ၊ စီႏခြပ်ခင်ႏလမ်း == ဖြဝ်ꩻခမ်းအခဝ်နဝ်၊ ဝေင်ꩻသထုံႏပေႏသီႏသဲင်ႏ၊ တဝေင်ꩻနယ်ႏလိုမ်းဆဲင်ႏရာꩻ၊ ဇဝနာရာမလိတ်သွဉ်တွိုက်၊ စီႏခြပ်သား = ဗွေႏမဟိန္ဒ၊ ချꩻလိတ်ကထိက။

ဇေယျတု သဗ္ဗမင်္ဂလံ ((((( တွဲႏနျꩻစီႏခြပ်ကွန်ပျူတာ - ၁၃၈၆-ဗာႏ၊ ဝါႏခေါင်ႏလောင်း ၆-နီꩻ၊ မွူးနီꩻ-တနင်ꩻနွေႏ၊ (၂၅-၈-၂၀၂၄) )))))) နမော တဿ ဘဂဝတော အရဟတော သမ္မာသမ္ဗုဒ္ဓဿ တိသရဏံ အဟံ ဝန္ဒာမိ

ငါယိုတတွယ်ꩻ ရန်ႏကုန်ႏသမဲင်ꩻ

နမော တဿ ဘဂဝတော အရဟတော သမ္မာသမ္ဗုဒ္ဓဿ တိသရဏံ အဟံ ဝန္ဒာမိ - ရှိခိုးပါ၏ဘုရား ရတနတ္တယံ၊ သိုမ်ပွိုင်သိုမ်ပါꩻ၊ ဘုရာꩻတရာꩻသင်္ဃာႏ၊ ရတနာႏသိုမ်ဆူႏ၊ အွဉ်ႏဒင်ႏကတူႏကီ၊ ကဝီးအလောင်း၊ သိုမ်ဗောင်ဒွါရ၊ ကာယဝန္ဒနာႏ၊ ဟတ္ထာဗိုဗောင်း၊ ယွော့ယောင်းဦꩻတင်၊ ကွီကင်ꩻကွီလွစ်၊ အပဲစ်ဒုက္ခ၊ ကာယနမ်းကီ၊ ဖြီꩻစီꩻထွူမꩻ၊ ဩောင်းသူရဿတီ၊ နင်ꩻဖီဒေဝါႏ၊ ယံထွားစွဲမ၊ ဝစနငဝ်းငွါ၊ တရာꩻဓမ္မ၊ မွိုးနန်းစခါ၊ တရာꩻကျမ်ꩻဂန်ႏ၊ ဗွန်တန်ဘုံႏကြီꩻ၊ နီဗွေႏဘုရာꩻ၊ လစ်ꩻပါꩻလစ်ꩻတွန်၊ အွဉ်ႏကုဲမွေႏတောႏ၊ ကုန်းပေါ်လောင်းကီ၊ ထီကျိုအထျꩻ၊ ရောင်ႏခလေဗွာ၊ ဘုရာꩻရွှေတကုံႏ၊ ထုံꩻစံႏနယ်ꩻနာႏ၊ ဓမ္မာနိဿယ၊ ဓမ္မရွှေတကုန်ႏ၊ ထုံꩻစံႏနည်းနာ၊ ပညာတွမ်ႏဉာဏ်ႏ၊ သွဉ်သင်ဖေႏခွေ၊ ရွှေဉာဏ်တရာꩻ၊ ယံဒါႏယံသေ၊ ယံကမန်ႏနုဲး၊ ထုဲႏပီဘုရာꩻ၊ ငဝ်းငွါပညပ်၊ စပ်ကိုယံကမန်ႏ၊ ကျမ်ꩻဂန်ႏတရာꩻ၊ ပါဠိပါဌ်တောႏ၊ ဟော်ꩻဖောႏစံꩻမွိုင်၊ ရန်ႏကုန်ႏဘုရာꩻ၊ ယံဒါႏခြုံးခြုံး၊ ပွိုင်ႏခမ်းမီႏအဝ်ႏ၊ ထုဲႏပီထာꩻအီႏ၊ ထီႏတဲင်သေယိုꩻ၊ နင်ꩻမွိုင်ဒေဝ၊ မစဖန်းခွေ၊ လေလေလုဲးလုဲး၊ စွိုးနုဲးနီဗွေႏ၊ ရွှေဉာဏ်တရာꩻကွိုနဲး၊ နင်ꩻဟဝ်ဿတီႏ၊ နင်ꩻဖီမူႏဟွေး၊ ဟန်ႏလဲင်ႏခါယို၊ မူႏခိုသူႏတကာႏ၊ မတ်နာႏစံꩻမွိုင်၊ ခွုင်းကားမွေႏတောႏ၊ တယ်ႏကောႏအစ၊ သိန်ကုန်းတရကုံꩻ၊ ရန်ႏတကုန်ႏဘုရာꩻ၊ တီႏပါႏကျွန်ꩻနဝ်၊ ဗွေႏစဝ်းဘုရာꩻ၊ ငတ်ꩻပါꩻပွင်ꩻထပ်၊ အရပ်ကျွန်ꩻနဝ်၊ ကပ်ဟဝ်သာႏယာႏ၊ ကမ္ဘာႏဘဒ္ဒကပ်၊ ဗွေႏမျတ်ငတ်ꩻဆူႏ၊ ငတ်ꩻထူသင်္ကန်ꩻ၊ ပွင်ꩻလွဉ်အထပ်ထပ်၊ ဘဒ္ဒကပ်မဟာႏ၊ နာလဲဉ်းအလင်၊ ဟုံဟင်ကျောႏဟိုꩻ၊ ဝင်ꩻရိုꩻအသုညတ၊ နာမမဉ်ꩻဗာႏ၊ စခါမွိုးနန်း၊ ကမ္ဘာႏအလောင်း၊ မွူးရောင်ႏခိုးလျမ်ႏ၊ ထန်ႏလွဉ်နွယ်ဗာႏ၊ နဝ်ꩻမꩻဟံႏတန်၊ ကမ္ဘာႏမေႏခိုး၊ ရွစ်တွိုႏထင်ႏလူꩻ၊ သူဘုံႏသူထပ်၊ ရွစ်ဖြဗြဟ္မာႏ၊ သုဒ္ဓါႏဝါသ၊ ပဉ္စငတ်ꩻဘုံႏ၊ သင်ဒုံဗြဟ္မာႏ၊ နဝ်ꩻခါတလဲင်ႏ၊ ဖေ့သဲင်ဝုဲꩻဝတ်၊ တဆီသူဘုံႏ၊ မေႏအုံထွူမꩻ၊ ဥဒကထီလောင်ꩻ၊ မေႏခြောင်ꩻခင်ႏလမ်း၊ ထီသမ်းလောႏသော့ꩻ၊ တဗော့ꩻလဲ့ꩻအွန်အန်၊ ထီတန်လောင်ꩻယဝ်း၊ နဝ်ꩻမꩻသေ့ꩻလင်ꩻ၊ ယွမ်ꩻယင်းယွယွ၊ စခါမွိုးနန်း၊ ဟံႏတန်မေႏခိုး၊ ဟောင်ရိုꩻဖြီႏဖြီႏ၊ အနေင်ႏတသဲဉ်၊ ထီတန်လော့သော့ꩻ၊ ခါလဲ့ပီပီ၊ အနေင်ႏတသဲဉ်၊ လဲဉ်းတဲင်နဝ်ꩻမꩻ၊ ဗြဟ္မာႏခွန်သင်၊ ကွဲလင်ꩻတယ်ႏယား၊ တီႏပါႏကျွန်ꩻနဝ်၊ အုံရဝ်းအဝ်ႏညီꩻ၊ ဝွေꩻသီးဝင်ꩻကွတ်ꩻ၊ ကရွစ်လင်ꩻစ၊ ကာလခိန်ႏခါႏ၊ နွုမ်ꩻဗာႏစွဉ်ႏရွုမ်ꩻ၊ ဟံႏတန်အလွီး၊ နွုမ်ꩻအွီႏနွုမ်ꩻငဝ်၊ နဝ်ꩻရာꩻဖြီႏဖြီႏ၊ တဆီအနေင်ႏ၊ နွုမ်ꩻဗာႏထင်ႏသေ၊ နဝ်ꩻခါတဲင်အံႏ၊ ဟံႏတန်ရသာႏ၊ သမ်းထိုꩻမားတလဲင်ႏ၊ နဝ်ꩻတဲင်အံႏတော၊ ဩဇာႏဟံႏတန်၊ ဒေါ့ꩻထန်ႏနုဲးသွန်ꩻ၊ ပဉ်ဆုံꩻမဉ်မုတ်၊ ဝင်ꩻကွတ်ခွန်သင်၊ ထင်ႏအံႏဗာႏဖြီႏဖြီႏ၊ နေင်ႏတဆီကွိုတဝ်း၊ နဝ်ꩻတဲင်ဟံႏသွန်ꩻ၊ ဝုဲꩻခန်းထိုꩻမား၊ ပေါ်ယားတလဲင်ႏ၊ နဝ်ꩻတဲင်သွီႏအွီႏ၊ ထီႏသေအွꩻအံႏ၊ တနံခွန်သင်၊ ဝင်ꩻကွတ်ꩻဗြဟ္မာႏ၊ အံႏဗာႏနွယ်ချို၊ ယိုလဲ့နေင်ႏတဆီ၊ ပီပီနုဲးနုဲး၊ နွယ်ချိုဝုဲꩻတော၊ ယိုလဲ့ခွန်ဖီ၊ တသီတဝ်းနေနေ၊ သာလေꩻဒဲဉ်ဗွာ၊ သမ်းထွာသမ်းပေါႏ၊ ဗြဟ္မာႏခွန်သင်၊ ညီꩻဝင်ꩻအံႏအွꩻ၊ နဝ်ꩻမꩻဗြဟ္မာႏ၊ တဏှာလောဘ၊ ဒေါသ မောဟ ရာဂတဏှာႏ၊ ကာယနမ်းကီ၊ ကိလေႏသာႏလဲ့ထန်ႏ၊ နမ်းလောင်းနမ်းကီ၊ တသီးတနျာႏ၊ ကိုဝါကိုရောင်၊ ထိုꩻမားကြောင်းလို့၊ တမို့ဖြေင်းယိန်၊ လပ်ဆိန်းခေ့ꩻနာꩻ၊ သေငါꩻတဝ်းဒွုမ်၊ နီပါꩻမို့ꩻဟံႏ၊ နမ်းလောင်းနမ်းကီ၊ ကိလေႏသာႏလဲ့ထန်ႏ၊ ဟွုန်ဖြန်အနမ်း၊ မို့ꩻဟံႏလဲ့မထီႏ၊ ပီနုဲးထန်းဖူꩻ၊ ထာꩻယူႏလဲ့တန်၊ ထာꩻနန်းလဲ့အာ၊ ပူဆာသွုန်ႏသꩻ၊ နောင်ႏတထာꩻလေ၊ ဝွေꩻသီးဗြဟ္မာႏ၊ နဝ်ꩻခါကာလ၊ စခါအလူႏကံႏ၊ ဖန်ထွာစီႏရင်ႏ၊ ရောင်ႏတင်ႏလေဗွာ၊ မွူးလာနီဗာႏ၊ ဓမ္မတာႏထွာလွဉ်၊ ကမ္ဘာႏအခြွိုင်း၊ မို့ꩻလောင်းကဝ်ဟဝ်၊ တဆဝ်လေတင်ႏ၊ ကင်ဟဝ်အာကာ၊ ဆာႏတရာနက္ခတ်၊ ဂြိုဟ်ႏတာရနက္ခတ်၊ ခါလဲ့ပေါႏထန်ႏ၊ ကုံးကျော်ဇမ္ဗူႏ၊ စင်ဖြူႏလေကြောင်း၊ မို့ꩻလောင်းဆကီ၊ ခွန်ဖီဗြဟ္မာႏ၊ သာႏယာႏသွုန်ႏသꩻ၊ ကာလနဝ်ꩻခါ၊ ကောသားထွာလိုꩻ၊ အကုသိုလ်ႏကအာ၊ ထွာဗာႏအမူႏ၊ အလူႏကံႏဖန်ထွာ၊ ကောသားသင်းဟန်ႏ၊ ကုသိုလ်ႏကံႏတန်၊ မွိုးနန်းအခြွီ၊ ကံႏလီꩻစီႏရင်ႏ၊ ထွာထင်ႏအခို၊ ထွာလိုꩻဓမ္မတာႏ၊ တဏှာႏရာဂ၊ သꩻအဝ်ႏလွဝင်ꩻ၊ အချင်ꩻချင်ꩻဝွေꩻသီး၊ မွူးထီးမူႏခို၊ ရုပ်ကြိုအဝ်ႏထန်ႏ၊ ခွမ်ꩻလာꩻငထဝ်း၊ အဝ်ႏကြွဉ်အုံလီꩻ၊ တပီတဝ်းအင်္ဂါႏ၊ လက္ခဏာႏလုဲစွိုး၊ သꩻသွိုꩻဝင်ꩻသꩻ၊ အာႏနာႏလွဝင်ꩻ၊ အင်္ဂါႏမူႏခို၊ လုဲစွိုးလဲသွယ်၊ ပူꩻတွယ်ႏထွာလွဉ်၊ မဉ်ကွဉ်မဉ်ကꩻ၊ နောင်ႏတခွမ်ꩻလာꩻ၊ တံဆာဘယက်၊ ရက်ပဲင်ꩻထူႏဒဲ့ꩻ၊ နဝ်ꩻမꩻလဲ့ကွဉ်ကꩻ၊ လꩻယားခွမ်ꩻလာꩻ၊ နဝ်ꩻခါကာလ၊ ထင်ႏညထင်ႏဆွာꩻ၊ ပဒေသာပင်၊ ရာႏထင်ႏခွမ်ꩻလာꩻ၊ သမ်းထိုꩻမားခန်း၊ နန်းယားတလဲင်ႏ၊ ဟွမ်ဆဲင်ꩻခွမ်ꩻလာꩻ၊ နဝ်ꩻခါဗွူဖုဲ၊ ဆို့ꩻရုဲမသွော့၊ ယေန်ယွော့ထောက်လုဲ၊ ဗွူဖုဲဗိုရာႏ၊ ဓမ္မတာႏထွာလဉ်၊ ပေါႏစွဉ်ႏကူစွိုး၊ အရာမျိုꩻပြဲ့ꩻစုံႏ၊ လိုꩻဒုံလိုꩻခမ်း၊ အွꩻအံႏအမျိုꩻ၊ အွီႏနွိုးဆျာႏခါႏ၊ ဗြဟ္မာႏခွန်သင်၊ လီလင်ꩻရာႏကဝ်ႏ၊ ကွဲအဝ်ႏကွဲအာ၊ စီꩻပွါꩻထဲင်းထဲင်း၊ လဲင်ꩻတန်တိုꩻပွါꩻ၊ ကွဲအာယွယွ၊ တရတပါꩻ၊ တရျာꩻတစွိုး၊ ထွာလိုꩻတယ်ႏခမ်း၊ သံဝဋ္ဋဋ္ဌာယီ၊ ရာႏသီႏကမ္ဘာႏ၊ ခင်ႏအာခင်ႏဆေ့ꩻ၊ ဒေ့ꩻအဝ်ႏဒေ့ꩻငထဝ်း၊ နမ်းကဝ်ႏတန်ပေႏ၊ ဖြိုသေꩻဖွိုႏထို၊ နီလိုꩻကစ၊ ဒေႏထယူးဝါး၊ ဖိုးပနားသေဆင်၊ အကျင်ꩻတရာꩻ၊ ကမ္ဘာႏတံဆာ၊ ထန်ႏဒွါႏငစင်စင်၊ အဆင်ထာꩻသား၊ သတ္တဝါႏတိရစ္ဆာန်ႏ၊ တကံကျင်ꩻသေတဝ်း၊ အဝ်ႏမာꩻပါဏာတိ၊ သက်ဆေ့ꩻသက်ဒွေါင်ႏ၊ နဝ်ꩻတဲင်ကာလ၊ မနုဿနီလိုꩻ၊ မူႏခိုအသက်၊ တိုꩻတက်ထိုဆွာꩻ၊ ကွဲအာထင်ႏသွိုက်သွိုက်၊ လွိုက်လွဉ်ꩻအကျင်ꩻ၊ ထိုထင်ႏယွယွ၊ ညညတဲင်ထွူ၊ တွိုႏထင်ႏတရျာꩻ၊ ထဲင်းခြာတရေင်၊ အနေင်ႏကွဲအာ၊ ဆုဲꩻချာတမွုန်ႏ၊ ရွစ်စွဉ်ႏတသဲဉ်၊ ထိုꩻတလဲဉ်းတောတော၊ ဖျောဝ်တွိုႏလန်ႏလက်၊ အသက်ကုဋေႏ၊ သင်္ချေႏသင်္ချာႏ၊ သေငါꩻတဝ်းထာꩻသီ၊ ခွုင်းကားနီလိုꩻ၊ မူႏခိုအသက်၊ တွက်ထင်ႏတွက်လင်ꩻ၊ အသက်ဒွေါင်ႏနဝ်ꩻရာꩻ၊ အဝ်ႏရွုမ်ꩻနေင်ႏဆီ၊ မီႏတွိုႏသက်ထို၊ ဟောင်ရိုꩻတသင်္ချေႏ၊ နီလိုꩻအသက်၊ တွက်ထင်ႏတွက်လင်ꩻ၊ သိုမ်ခြင်ႏမီႏယဝ်း၊ ဗွေႏစဝ်းဘုရာꩻ၊ အီႏထွာအီႏလင်ꩻ၊ အီႏပွင်ꩻအီႏတယ်ႏ၊ အုဲဟွမ်နွုမ်ꩻနွိုး၊ နီလိုꩻအခမ်း၊ ဇမ္ဗူႏကျွန်ꩻနဝ်၊ အီႏဟဝ်အီႏပျောႏ၊ သင်္ဘောꩻဖြီဆိတ်၊ နိဗ္ဗာန်ႏတခါꩻ၊ လေသာဖက်တူႏ၊ တဆူႏအီႏဗွောင်၊ ဗော့ꩻတဲင်ခိန်ႏခါႏ၊ သတ္တဝါႏလိုꩻလူꩻ၊ မူႏခိုဖြားဆား၊ သားရောင်ကျော်ဟိုး၊ လိုꩻဒုံတိုင်းရွာ၊ ဗွေႏဘုရာꩻကတယ်ႏစ၊ အထျꩻနဝ်ꩻရာꩻ၊ နာမသာႏယာႏ၊ ဘုရာꩻကကုသန်ႏ၊ ပွင်ꩻလွဉ်ရီးငါ၊ စံႏစာꩻစေꩻစိန်ႏ၊ အခိန်ႏထင်ႏလꩻ၊ သုခချမ်ꩻသာႏ၊ သေႏချာႏထွူမꩻ၊ အာရညကင်ႏ၊ ထိုꩻထန်ႏတောႏထွက်၊ ကျင်ꩻယပ်ꩻနွုတ်ꩻနီꩻ၊ ဃဋိကာရ၊ နဝ်ꩻမꩻလင်ꩻကပ်၊ ကျာႏပတ်ဝတ်ဆံ၊ သင်္ကန်ꩻစီႏဝရာႏ၊ ကမ္ဘာႏကဝ်ႏဗို၊ ဗွန်ထိုဘုံႏကြီꩻ၊ နီဗွေႏသုံꩻဆောင်ႏ၊ နမ်းလောင်းနမ်းကီ၊ နွုတ်ꩻနီꩻနွုတ်ꩻသာ၊ စရိယာႏဒုက္က၊ လꩻတွမ်ႏအမဉ်ꩻ၊ ဘုရာꩻကကုသန်ႏ၊ ပေႏတန်သတ္တဝါႏ၊ ဗြဟ္မာႏလူꩻလိုꩻ၊ ဗွန်ထိုချွစ်ထူႏ၊ နိဗ္ဗူတာခမ်း၊ နိဗ္ဗာန်ႏဝေင်ꩻဟုံ၊ ဗွန်သုံကကုသန်ႏ၊ အသက်ခန္ဓာႏ၊ အုံဗာႏသွစ်ꩻသဲဉ်၊ နဝ်ꩻမꩻလဲဉ်းခန်း၊ ခမ်းတန်နိဗ္ဗာန်ႏ၊ ဘေꩻရန်ႏယေန်ညိမ်ꩻ၊ သျင်ꩻထွယ်ꩻရုတ်နာမ်ႏ၊ ကကုသန်ႏဘုရာꩻ၊ ကထွာအစ၊ ကာလအတွင်ꩻ၊ ထင်ႏလင်ꩻချွစ်ထူႏ၊ မူႏခိုဖြားဆား၊ သတ္တဝါႏတင်ꩻလုဲ၊ ဟဝ်ကုဲနာꩻနီ၊ ဘီလူꩻမောပီ၊ ထင်ႏထီႏဘု၇ာꩻ၊ ကျွꩻကာလွေꩻလယ်ႏ၊ ထောထဲထာꩻခြာ၊ ဟောင်မားထာꩻအံႏ၊ ခန်းမားအီႏလꩻ၊ ကျွꩻနေးသဲက်သဲက်၊ တနေးတဝ်းအာႏ၊ ဘုရာꩻပဉ္စဝ်း၊ ခန်ဗဝ်ဖွီသဲက်၊ ယက္ခကုမ္ဘန်ႏ၊ ကွိုꩻမားအီႏအံႏဗာႏ၊ လောကာႏထပ်လွဉ်ꩻ၊ မာꩻစွဉ်ႏဘဲဘဲ၊ မနဲကျိုꩻစာꩻ၊ ဘုရာꩻပဉ္စဝ်း၊ နဝ်ꩻခါဘုရာꩻ၊ ကာရွုမ်ꩻပေႏပေႏ၊ ဣန္ဒြေႏသမ္ပတ္တိ၊ ကျွꩻရွုမ်ꩻသာႏသာႏ၊ ဘီလူꩻမွိုက်တွုမ်၊ လူးစွဉ်ႏငသိုꩻ၊ ကျိုꩻစာꩻဝဲ့လောႏ၊ ဟောဟောဟားဟား၊ သာထိုသာဟွိုက်၊ မဉ်ထွိုက်မဉ်တွယ်ႏ၊ အဝ်ႏရွယ်ႏအုံငါ၊ လာလာဖြီသꩻ၊ တထွꩻနွောင်ꩻတဝ်း၊ အဝ်ႏရင်းသꩻလဲ့၊ မဲ့ငါလဲင်ꩻလီ၊ ကီႏရင်ꩻတရွော့ꩻ၊ ပီကဗော့ꩻသွိုက်သွိုက်၊ လွိုက်ꩻလွဉ်ꩻလောဘ၊ ပီအီႏလꩻလိုႏလိုႏ၊ သမ်းထိုꩻလဲဉ်းညာꩻ၊ လောခြာနေးအာႏ၊ ထာꩻသာလဲင်ꩻဒွေါင်ႏ၊ ပွိုင်ႏပွိုင်ႏဖြီသꩻ၊ တလꩻခြာတဝ်း၊ ဗွေႏစဝ်းဘုရာꩻ၊ ဟွိုက်ꩻငချာဖီလူꩻ၊ အာႏဏာႏစွူႏဟိတ်၊ ဖီလူꩻဘဝ၊ တမဲစ်ꩻခထန်ႏ၊ ပြုဲဖြဟူႏလင်ꩻ၊ ဖီလူꩻမာꩻတိန်ႏရှောင်ႏ၊ ကောင်းကောင်ႏလွင်းခန်း၊ ဟိတ်တန်အာႏဏာႏ၊ ထိုꩻတဒါႏဒွုမ်တဝ်း၊ အဝ်ႏရင်းအေႏလ၊ သꩻဝꩻထိတ်လန်း၊ ဖီလူꩻမော်ဗီ၊ နီဗွေႏဘုရာꩻ၊ ငဝ်းငွါဟွိုက်ꩻဟက်ꩻ၊ ကဒက်ꩻရိုꩻဖေႏ၊ အဲဟယ်နာꩻယို၊ နာꩻရိုꩻခွေငမ်း၊ အားလားဖီလူꩻ၊ ရူꩻရာꩻဗားယောင်ႏ၊ နာꩻကတောင်လုမ်းနဝ်ꩻ၊ ထင်ႏဟွုန်ငဝ်းငွါ၊ ဘုရာꩻရိုꩻဖေႏ၊ ဒေဝါယက္ခ၊ မော်ဗီဖီလူꩻ၊ စူနုံတဆီ၊ ကတူႏကီအွဉ်ႏဒင်ႏ၊ ဝုဲႏထင်ႏလျောက်လဝ်း၊ တမာတဝ်းဒွုမ်ဗွေႏ၊ ခွေသွဉ်းငမ်းရှောင်ႏ၊ ကန်တော့ꩻဝုဲႏဗာႏ၊ နာꩻအီႏခံႏဗာႏ၊ ခွေဘုရာꩻအတံႏ၊ သဉ်တန်ငတ်ꩻပါꩻ၊ နာꩻကခံႏဗာႏ၊ ဒေဝါယက္ခ၊ ခံႏတဝ်းလာꩻလာꩻ၊ ဗွေႏဘုရာꩻသမ်းထွဉ်ႏ၊ နွုတ်ꩻနေင်ႏတွင်ꩻဖူꩻ၊ နာꩻယံထိန်းဒင်ႏ၊ နာꩻကတူႏလောင်းကီ၊ တကာႏဖီလူꩻ၊ ပီရိုꩻခွေတံႏ၊ နာꩻမီႏခံႏနဝ်ꩻ၊ အသက်အဝ်ႏသမျ၊ ဒေႏထယူးဝါး၊ ခွုင်းကားသတ္တဝါႏ၊ တအံႏဗာႏတဝ်း၊ ဝင်ꩻယာႏဝင်ꩻသွီႏ၊ မွီႏအီနာꩻသက်၊ ယံဖေႏရက်ပဲင်ꩻ၊ ယံသညင်ꩻကရုဏာႏ၊ နဝ်ꩻခါဖီလူꩻ၊ သမ်းရိုꩻချာဖေႏ၊ နီဗွေႏဘုရာꩻ၊ ခွေသွဉ်းယိုနဝ်ꩻ၊ တတ်နွိုင်ႏတဝ်းဩ၊ မီႏရိုꩻစောထာꩻအံႏ၊ သယ်ꩻခံႏလꩻတဝ်း၊ ဗွေႏစဝ်းဘုရာꩻ၊ ခန်ယားသူလာ၊ တကာႏဖီလူꩻ၊ နေးထူႏခံႏနော၊ ခွေဘုရာꩻဩဝါဒ၊ ယခါနာꩻခံႏဗာႏ၊ ထာꩻပူႏဆာႏဒုက္ခ၊ နိရယငရုဲꩻ၊ တအုဲႏတဝ်းနေနေ၊ အန္တရာယ်ႏဘုရာꩻ၊ ငဝ်းငွါမိန်းဟ၊ ပို့သဖေႏဆေꩻ၊ နေးနာႏနောငခါ၊ ခန်ယားတလာဒွါႏ၊ နဝ်ꩻခါဖီလူꩻ၊ မထူႏမနေး၊ ကံဖေႏငကီ၊ ဖီလူꩻမော်ဗီ၊ ဖြီသလာꩻလာꩻ၊ အာမဘန္တေ၊ တနေးခံႏတဝ်း၊ နဝ်ꩻခါနီဗွေႏ၊ ရွှေပြည်ဦသကီꩻ၊ နွုတ်ꩻနီꩻနွုတ်ꩻသာ၊ ခန်ယားဖေႏဝွေꩻ၊ ဒေဝါယက္ခ၊ သꩻသားသတ္တဝါႏ၊ နာꩻတအံႏဗာႏတဝ်း၊ မီႏငထဝ်းအသꩻ၊ နဝ်ꩻမꩻထူႏအံႏ၊ လွူးနမ်းမွီးသက်၊ ရက်ပဲင်ꩻဝင်ꩻနော၊ နိုꩻဆောႏသွဉ်သင်၊ အင်ဖြောင်းမိန်းဟ၊ ယက္ခဖီလူꩻ၊ မဲ့ခူꩻတနျာႏ၊ နဝ်ꩻခါထင်ႏခံႏ၊ ဗွေႏထံသဉ်ဟား၊ နစ်သက်အာႏရꩻ၊ ယက္ခကုမ္ဘန်ႏ၊ ပီနုဲးကအံႏဗာႏ၊ ဩဇာႏအွီႏနွိုး၊ နွယ်ချိုချိုဝန်၊ ဖီလူꩻတန်တမဲစ်ꩻ၊ ဖြဲစ်ꩻထန်ႏဟူႏလို့၊ ဆို့ꩻသသံဝေ၊ လွိုက်ရွေꩻလꩻခန်း၊ သွုန်ႏတန်သꩻယွ၊ မော်ဗီဖီလူꩻ၊ စိတ်ဖြူသꩻဗွာ၊ ဗွေႏဘုရာꩻဖေႏတံႏ၊ ခံႏဗာႏသဉ်ဟား၊ ဗွေႏဘုရာꩻလဲ့ထီႏ၊ စေႏတီႏအရပ်၊ ဘဒ္ဒကပ်ဟံႏတန်၊ သန်ꩻပြန်ꩻစင်ဗွာ၊ ထာꩻပူႏနာကီ၊ ထီကျိုထျကွဉ်ႏ၊ ယံဖေႏကထွာ၊ ကမ္ဘာႏတံꩻဆိတ်၊ ဗျာဒိပ်ရွှေတကုန်ႏ၊ အထုံꩻသိင်္ဂုတ္တရ၊ သတ္တဝါႏလူꩻလိုꩻ၊ ယံဖေႏကိုꩻကွယ်ႏ၊ ခေါက်ဝုဲႏလူႏတန်ꩻ၊ ဗွေႏနမ်းလဲ့ယို၊ ရိုꩻထွူနဝ်ꩻမꩻ၊ ဗွေႏဘုရာꩻကွဲဖေႏ၊ သုဝဏ္ဏခမ်း၊ တောင်ႏဝွေꩻခမ်ꩻထာ၊ ဒေဝါဖီလူꩻ၊ နေးထူႏရပ်ဖျောဝ်၊ နဝ်ꩻမꩻနီဗွေႏ၊ နယ်ဖေႏခန္ဓာႏ၊ ဌာပနာႏအခြောင်ꩻ၊ ထာꩻပူႏလောင်းကီ၊ သိင်္ဂုတ္တရ၊ ကောင်နာဆူꩻနော၊ ဩစဝ်းဩဗွေႏ၊ အီႏလွေꩻဌာပနာႏ၊ ခံႏဗာႏဗွေႏစဝ်း၊ နဝ်ꩻငါသာႏသနာႏ၊ ဒါယကာႏခံႏထွာ၊ တကာႏဖီလူꩻ၊ ထာꩻပူႏလောင်းကီ၊ သိင်္ဂုတ္တရ၊ ဌာနရပ်ရာႏ၊ နာꩻထွားနာꩻတီ၊ လစ်ꩻစဲင်ꩻသွစ်ꩻနား၊ ခံႏတကာႏနော၊ ခွေမွေႏတောႏယို၊ ရိုꩻဖေႏဖီလူꩻ၊ မဲ့ခူꩻတနွာႏ၊ လွေꩻဌာပနာႏ၊ ခွေတောင်ႏဝွေꩻခံꩻထာ၊ ထာꩻပူႏနာကီ၊ သိင်္ဂုတ္တရ၊ ယက္ခမော်ပီ၊ ရွစ်တွိုႏဟန်ႏနီꩻယို ကွိုနောလောင်ꩻ၊ ကျောင်ꩻတကာႏသီးယာ၊ ခွုင်းကားကကုသန်ႏ၊ လꩻမန်ႏအနေင်ႏ၊ သွစ်ꩻသဲဉ်ဗွေဗွေ၊ ချွစ်ထူႏဝွေႏနေႏ၊ သဗ္ဗေသတ္တာႏ၊ သတ္တဝါႏတင်ꩻလုဲ၊ ဟဝ်ကုဲယုတ်လတ်၊ အမျတ်သိုမ်ပါꩻ၊ သေႏချာႏထွူမꩻ၊ ကျွꩻလွေꩻထူႏနေး၊ ရွှေပြည်နိဗ္ဗာန်ႏ၊ ဝေင်ꩻခံꩻဝေင်ꩻထာ၊ ကာဗꩻလဲဉ်းခန်း၊ ဝဲꩻတန်ဩဃ၊ အမတပူရံ၊ ညိမ်ꩻချမ်ꩻသာႏယာ၊ ကွိုနဲးခွန်နင်ꩻသီးယာ၊ တဖုံႏတဉ်ဟွေး။

ကကုသန်ႏဘုရာꩻ၊ ကျွꩻကာထူႏနေး၊ ရွှေပြည်နိဗ္ဗာန်ႏ၊ ဝေင်ꩻခံꩻအချာ၊ ထင်ႏဆွာထင်ႏည၊ သတ္တနွုတ်ꩻသင်္ချေႏ၊ ရေႏတွက်အနေင်ႏ၊ ဗွေႏတဲင်ခွုင်းနဝ်ꩻ၊ ဗွေႏစဝ်းဘုရာꩻ၊ ကောဏဂုံႏက၊ ပေါႏဖြပွင်ꩻထင်ႏ၊ တခြာတန်အရပ်၊ ဗွေႏမျတ်ချွစ်ထူႏ၊ လူꩻလိုꩻသတ္တဝါႏ၊ အဝ်ႏထာꩻခြာကို၊ သဲင်ꩻတဲင်ရွာနိဂုံး၊ လုံးစုံလိုꩻရပ်၊ တခြာတန်ရပ်ရာႏ၊ မညာꩻမဗော့ꩻ၊ အဝ်ႏသော့ꩻတွမ်ႏဖီလူꩻ၊ ပသုတဲ့နော၊ ဟဲ့ꩻဟောင်နာမ၊ ယက္ခကုမ္ဘန်ႏ၊ အွꩻအံႏလယ်ႏဝင်ꩻ၊ တင်ꩻလုဲသွီႏယာႏ၊ ဖိုးပနားသေဆင်၊ မင်ꩻရျꩻခီယီꩻ၊ ထာꩻမီꩻထာꩻမင်း၊ တုံးတင်းရပ်ရွာ၊ နဝ်ꩻခါဖီလူꩻ၊ ပသုနေယက္ခ၊ ထကျွꩻလွေꩻသဲင်ꩻ၊ ငလဲင်ꩻချာငါ၊ ခြေင်းလယ်ႏခါႏကို၊ တခြာတန်မော့၊ အဝ်ႏသော့ꩻသေႏသေႏ၊ လယ်ႏဒွါႏရင်ꩻနဝ်ꩻ၊ ထင်ႏထီႏဘုရာꩻ၊ ယောင်မားထာꩻအံႏ၊ ကျံႏငသျောဝ်းထူႏ၊ ဖီလူꩻပသုနေ၊ တသေတဝ်းကျောင်ꩻလမ်ꩻ၊ ခန်ꩻမာႏအီႏအံႏဗာႏ၊ ထွိုင်ႏကာထပ်စွဉ်ႏ၊ ဗွေႏစဝ်းဘုရာꩻ၊ သမ္မာသမ္ဗုဒ္ဓ၊ ကျွꩻလွေꩻသွိုက်သွိုက်၊ လွိုက်ꩻလွဉ်ꩻဆန္ဒ၊ ယက္ခမွိုက်ရွိုင်ꩻ၊ လောႏမွိုင်ကာနဲစ်၊ မဉ်တဝဲစ်ꩻအွꩻအံႏ ဗွန်တန်ဘုံႏကြီꩻ၊ နီဗွေႏအယာႏ၊ လာꩻလာꩻဖြီႏသꩻ၊ တထွꩻလွဉ်ꩻတဝ်း၊ ဗွေႏစဝ်းဟွိုက်ꩻငချာ၊ နဝ်ꩻခါဖီလူꩻ၊ မဲ့ထူးမဲ့ထီ၊ သꩻဝီးသꩻဝꩻ၊ တထꩻချာငါ၊ ထွိုင်ႏကာမလꩻ၊ နဝ်ꩻမꩻဗွေႏစဝ်း၊ ငဝ်းငွါရိုꩻဖေႏ၊ မွိုက်တဲနာꩻယို၊ နာꩻကွိုꩻထာꩻမုဲꩻ၊ ငရုဲꩻအဆာႏ၊ အင်းကားခွေဘုရာꩻ၊ နာꩻခန်ꩻဗဝ်ဗင်၊ ဟွိုက်သင်ႏရွုမ်ꩻတငွါ၊ နဝ်ꩻခါဖီလူꩻ၊ ဖြောင်းဖူꩻတမဲစ်ꩻ၊ ဖြဲစ်ꩻထန်ႏဟူႏလင်ꩻ၊ ထဲ့ဖျင်တလီး၊ ဆာအီးဆာအွူ၊ အဖြွူအဝ်ႏရင်း၊ အီႏပြင်ꩻအီႏသွူꩻ၊ ဖီလူꩻပသုနေ၊ မဲ့ထီမဲ့နောင်၊ ငမ်းရှောင်ႏဖေႏဝင်ꩻ၊ အုံလင်ꩻကောင်ႏကောင်ႏ၊ ဘုံႏခေါင်ꩻသကျ၊ သမ္ဗုဒ္ဓအငါ၊ နဝ်ꩻမꩻရိုꩻဖေႏ၊ နာꩻယိုခံႏဗာႏ၊ ခွေဘုရာꩻအတံႏ၊ နာꩻခံႏဗာႏကျကျ၊ နဝ်ꩻမꩻဖီလူꩻ၊ မဲ့ခူꩻတနဲဉ်၊ တမဲဉ်ခံႏတဝ်း၊ ငဝ်းငွါထိန်စာ၊ လာꩻလာꩻဖြီႏသꩻ၊ ငတ်ꩻဌာနငတ်ꩻရန်း၊ တံႏတန်ထွူငါ၊ ခံႏတလꩻတဝ်းဗွေႏ၊ ဖီလူꩻတန်ဟွေး၊ ခွေနုတ်တောႏတရာꩻ၊ ထွိုင်းယိုမာꩻတငါ၊ ယံနာꩻကခံႏ၊ ခွေထံနဝ်ꩻ၇ာꩻ၊ နေးငါတနေင်ႏ၊ သဉ်သဲင်ငတ်ꩻပါꩻ၊ ခွုင်းကားသတ္တဝါႏ၊ သꩻအဝ်ႏဒါႏသမျ၊ ယံအံႏအွꩻမွုန်း၊ နိုꩻဆောႏဖေႏတံႏ၊ တခံႏတဝ်းနေနေ၊ ပသုနေဖီလူꩻ၊ ဘုံꩻထူꩻဗွေႏဘုရာꩻ၊ ချော့ꩻလင်ꩻယားသူလာ၊ ရာသီႏထာဝ၊ ယံအံႏအွꩻမွုန်းတဝ်း၊ သꩻအဝ်ႏသတ္တဝါႏ၊ မီႏထွာအသီ၊ ကောင်ကီထီဖူꩻ၊ နဝ်ꩻမꩻထူႏအံႏ၊ လွူးနမ်းမွီးသက်၊ အတွက်သူလာ၊ နာႏခံႏနောဖီလူꩻ၊ ပသုနေယက္ခ၊ သဉ်ဟားတန်ယို၊ ရိုꩻဖေႏငဝ်းငွါ၊ နဝ်ꩻခါပသုနေ၊ တနေးတဝ်းနေနေ၊ ဘန္တေဘဂဝါ၊ ဘုရာꩻကောဏဂုံ၊ အုံအဝ်ႏချော့ꩻယား၊ တလာဖြီႏဖြီႏ၊ အနီꩻသွံဆီ၊ နီဗွေႏဘုရာꩻချော့ꩻယား၊ တလာလဲ့ခါ၊ ဒေဝါယက္ခ၊ ဖြီꩻသꩻလာꩻလာꩻ၊ မဲ့ငါအွဉ်ႏတကွို့ꩻ၊ တနွို့တဝ်းအနား၊ လာꩻလာꩻမခံႏ၊ ဗွန်တန်ကောဏဂုံႏ၊ မဟာတံႏတန်၊ သမ်းခန်ဖေႏယား၊ သူလာနွုတ်ꩻနီꩻ၊ ပသုနေယက္ခ၊ ယံအံႏအွꩻတဝ်း၊ သꩻအဝ်ႏသတ္တဝါႏ၊ နဝ်ꩻခါဖီလူꩻ၊ နွုတ်ꩻနီꩻဖူꩻကို၊ ထင်ႏရိုꩻနဝ်ꩻမꩻ၊ အာမဝန္တံႏ၊ ခံႏလဲ့ခံႏဗွေႏ၊ ခွေသွဉ်းထူႏနေး၊ သꩻရေꩻသꩻဟဝ်၊ နဝ်ꩻမꩻဗွေႏဘုရာꩻ၊ ဖြောင်းထာဖြေꩻခံꩻ၊ သဉ်ထံꩻသီလ၊ ပဉ္စငတ်ꩻပါꩻ၊ နဝ်ꩻမꩻကွဲဖေႏ၊ ဝွေꩻလဲ့နေးခံႏ၊ တမဲစ်ꩻထန်ႏဟူႏလို့၊ ဟွုန်ဟီးဟွုန်ဟဝ်၊ ဗော့ꩻနဝ်ꩻတဆင်ႏပေႏ၊ သီလေသဉ်ဟား၊ ကံဒါႏကျင်ꩻဟဝ်၊ ဗွေႏစဝ်းသေငါꩻ၊ နောင်ႏလာႏနမ်းငါ၊ အီႏထွာသာႏသနာႏ၊ ဒါယကာႏနဝ်ꩻ၊ ပွိုးကအဝ်ႏထီႏ၊ ဖီလူꩻယက္ခ၊ အာမဘန္တေ၊ အဝ်ႏသေအီႏခံႏ၊ ယံဖေႏဌာပနာႏ၊ သိင်္ဂုတ္တရကောင်မျတ်၊ ကကုသန်ဗွေႏ၊ တောင်ႏဝွေꩻနဝ်ꩻရာꩻ၊ အဝ်ႏမဗွေႏစဝ်း၊ ဟွုန်ဟဝ်ဝံꩻသာႏ၊ ဘုရာꩻကောဏဂုံႏ၊ အထုံꩻဌာပနာႏ၊ နဝ်မꩻဗွေႏစဝ်း၊ ဖေႏဗာႏထီခရဲင်ႏ၊ မန်ႏတဲင်ႏသိင်္ဂုတ္တရ၊ ယက္ခဖီလူꩻ၊ ထူႏလွေꩻဌာပနာႏ၊ စခါဝွေꩻဗွေႏ၊ ကောထွာအတန်၊ ကကုသန်ဘုရာꩻ၊ ဥစ္စာႏမွေႏတောႏ၊ ကုန်းပေါ်လောင်းကီ၊ သိင်္ဂုတ္တရ၊ ချꩻထေ့ညီꩻရဝ်း၊ အွိုးနဝ်ꩻထွူနော၊ ခွုင်းကားကောဏဂုံႏ၊ အသက်ဆုံးနွုတ်ꩻသဲဉ်၊ ရဲဉ်ႏတွမ်ႏသင်္ဘောꩻ၊ ဖေါင်ႏတောႏဖြီထာ၊ ပသာလူꩻလိုꩻ၊ မဂ်ဖိုလ်ႏနိဗ္ဗာန်ႏ၊ ချမ်ꩻသာႏသုခ၊ လꩻလွဉ်ꩻရဝ်းဗာႏ၊ ဘုရာꩻပဉ္စဝ်း၊ ခမ်းဟဝ်ဝေင်ꩻထာ၊ ကွဲကားခွေသီ၊ နီနာꩻကစ၊ ကာလတွင်ꩻနဝ်ꩻ၊ ငထဝ်းကိုႏကျင်ꩻ၊ ဒါနတင်ꩻလူႏ၊ အွဉ်ႏကုဲသူႏယေန်၊ ရွစ်စွဉ်ႏငခါယို၊ ထွာလိုꩻနုဲးဝင်ꩻ၊ သိုႏဖျင်ꩻတဲနောလောင်ꩻ၊ ကျောင်ꩻတကာႏသီးယာ၊ ဘုရာꩻပဉ္စဝ်း၊ ယိုနဝ်ꩻငခါ၊ မေတ္တာႏရက်ပဲင်ꩻ၊ အွဉ်ႏကုဲသေꩻဖေႏ၊ ဝေနေယျအရင်ꩻ၊ ရုတ်ဆင်းတုတော်၊ ကုန်းပေါ်လောင်းကီ၊ ထီကျိုအထျꩻ၊ ချငသေꩻမွေႏတောႏ၊ ကောႏငသေꩻစေႏတီႏ၊ ယံဖေႏချွစ်ဆုဲꩻ၊ ဝုဲႏလင်ꩻဘုရာꩻ၊ ဖြောင်းထာဖြေꩻခံꩻ၊ ဟော်ꩻ(ထန်ႏ)ပီးနဝ်ꩻ၊ ဒီဟဝ်ကျိုꩻစာꩻ၊ တသက်မꩻတလဲင်ႏ၊ နီကသဲင်ꩻလိုꩻ၊ ဘုရာꩻရန်ႏကုန်ႏ၊ ပုံႏတွမ်ႏဟူအံႏ၊ ရွဉ်ခံꩻကစ၊ ကျွꩻလွေꩻနောဗွေႏ၊ လွေꩻလွနောစဝ်း၊ နဝ်ꩻခါဖြီငိုꩻ၊ ငမ်းသွော့လင်ꩻလင်ꩻ၊ ဖျင်သွုန်ႏဖျင်သꩻ၊ သံဝေဂတရာꩻ၊ ကျောင်ꩻတကာႏသီးယာ၊ ဖြားဆားတဖုံႏ၊ တင်ꩻလုံတင်ꩻလုဲ၊ ဟဝ်ကုဲယုတ်လတ်၊ ယံမတ်သွင်ꩻသꩻ၊ ကာလနဝ်ꩻခါ၊ ထင်ႏဝုဲႏကောဏဂုံႏ၊ အုံအဝ်ႏငခြေင်၊ ညနေင်ႏညလာ။ ချိန်ႏခါႏကိန်ꩻကပ်၊ ထင်ႏဝင်ꩻသိုမ်ခြွိုက်၊ နဝ်ꩻမꩻထွိုက်လင်ꩻ၊ ထင်ႏလꩻနွုတ်ꩻသင်္ချေႏ၊ ရေႏတွက်တခွုင်းနဝ်ꩻ၊ ဗွေႏစဝ်းကဿပ၊ ဗုဒ္ဓရာဇာႏ၊ နဝ်ꩻခါတောႏတွင်ꩻ၊ ကျင်ꩻယပ်ꩻနွုတ်ꩻလာ၊ ဗြဟ္မာႏခွန်သင်၊ လင်ꩻကပ်လင်ꩻလူႏ၊ ဗိုဖူႏသင်္ကန်ꩻ၊ ကွဉ်ဗုဲင်ဝတ်ရုံႏ၊ ကျင်ꩻသုံꩻဒုက္က၊ စရိယနွုတ်ꩻလာ၊ ဘုရာꩻကဿပ၊ ဒေသစာႏရီႏ၊ ခြေတော်ကျွꩻကာ၊ နဝ်ꩻခါဖီလူꩻ၊ တဗူꩻဗဲ့တန်၊ ဖန်ဖေႏနာမ၊ ယက္ခပသွဲႏ၊ အစွယ်ႏတကိမ်ꩻ၊ အဝ်ႏလိမ်ꩻကာႏပေါင်၊ ပီနုဲးကောင်ပေႏ၊ ရွုင်ꩻဟယ်သွတ်ꩻခရာႏ၊ ထီႏထာꩻမုဲꩻလဲ့တပ်ꩻအံႏ၊ ဖီလူꩻတန်ပသွဲႏ၊ လွေꩻထီႏဘုရာꩻ၊ ဟောင်မာႏတင်ကဉ်၊ ရျာႏထူႏတပ်ꩻလွဉ်ꩻ၊ ခြေင်းလောႏဝဲ့ဆွမ်ꩻ၊ ဟောင်ရိုꩻအီႏအံႏဗာႏ၊ ယန်ခင်ႏတပ်လွဉ်ꩻ၊ နေးစွဉ်ႏအအာႏ၊ တထွꩻခြာတဝ်း၊ ဗွေႏစဝ်းဘုရာꩻ၊ ကာရွုမ်ꩻသွိုက်သွိုက်၊ ဖီလူꩻမွိုက်တွုမ်၊ ကွိုꩻရွုမ်ꩻအာႏတန်၊ တရန်တပ်လွဉ်ꩻ၊ တထွꩻစွဉ်ႏတဝ်း၊ ဗွေႏစဝ်းဟွိုက်ꩻငချာ၊ အာႏဏာႏပြင်ꩻကတ်၊ တမဲစ်ꩻဖြဲစ်ꩻထန်ႏ၊ ထဲ့ဟူႏခန်းတလီး၊ အသွီႏရီႏပြုဲ၊ လူꩻကုဲမိစ္ဆာႏ၊ တဝျာႏအုံလင်ꩻ၊ ငွိုးထင်ႏဟွိုက်ဟွိုက်၊ ယက္ခကုမ္ဘန်ႏ၊ တနွို့ခန်းရိုႏရိုႏ၊ ထိုꩻလဲ့မလꩻ၊ နဝ်ꩻမꩻဖီလူꩻ၊ စူနုံတဆီ၊ ကတူႏကီအွဉ်ႏဒင်ႏ၊ ဝုဲႏထင်ႏဘုရာꩻ၊ နဝ်ꩻမꩻကွဲရိုꩻ၊ အွိုးနောဖီလူꩻ၊ နာꩻယိုမွိုက်တဲ၊ နာꩻအီႏခံႏဗာႏ၊ ခွေဘုရာꩻအတံႏ၊ သဉ်ထံငတ်ꩻပြောင်း၊ ငတ်ꩻဗောင်းခွဉ်းနာႏ၊ နဝ်ꩻခါဖီလူꩻ၊ အုံတသူႏသေတဝ်း၊ ငမ်းငါႏဘုရာꩻ၊ လာꩻလာꩻခံႏတဝ်း၊ ဗွေႏစဝ်းဖေႏနွိုင်ႏ၊ ပွိုင်ႏပွိုင်ႏဖြီႏသꩻ၊ တလꩻတဝ်းနေနေ၊ အစိန္တေယျ၊ ချꩻဖေႏတနေင်ႏ၊ အွဉ်ႏထိန်ꩻအွဉ်ႏထံႏ၊ မဟာႏတံႏငတ်ꩻပါꩻ၊ ခွုင်းကားသꩻအဝ်ႏ၊ နဝ်ꩻငါနာꩻယို၊ မီႏရိုꩻမွီးသက်၊ သိုꩻအီနꩻသꩻ၊ တလꩻတဝ်းနော၊ ပေါသွဲဖီလူꩻ၊ တခံႏထူႏတဝ်း၊ အဝ်ႏထိန်နေနေ၊ ချꩻဖေႏသူလာ၊ တထာဝနေင်ႏ၊ ထိန်ꩻဆွုမ်ႏတြိက်၊ ပိတ်ခန်းငဝ်းငွါ၊ ဘုရာꩻနုတ်တောႏ၊ သမ်းဟော်ꩻဖေႏခြာ၊ တလာပေႏရွုမ်ꩻ၊ ယံဖေႏဝွန်ႏခံႏ၊ ခွေဘုရာꩻတံႏယို၊ ရိုꩻဖေႏပေါသွဲ၊ တအုဲႏတဝ်းနေနေ၊ ဖေႏရွုမ်ꩻနွုတ်ꩻနီꩻ၊ ဖြီႏဖြီႏနွုတ်ꩻသာ၊ နဝ်ꩻမꩻကွဲခံႏ၊ အာမဘန္တေ၊ ဗွေႏဘုရာꩻဖေႏတံႏ၊ အွဉ်ႏခံꩻသဉ်ဟား၊ ဗွေႏဘုရာꩻဖေႏတံႏ၊ ငတ်ꩻရန်းပဉ္စသီ၊ ဖီလူꩻပေါသွဲ၊ ကွဲနေးသွင်ꩻသꩻ၊ သံဝေဂတရာꩻ၊ ခွုင်းကားသက်အဝ်ႏ၊ တအံႏတဝ်းဒွုမ်၊ ယွုန်းယောသယ်ꩻကြီꩻ၊ မီႏသီထွူမꩻ၊ အွꩻအံႏဘုဉ်ꩻပေႏ၊ ထူႏနေးသုံꩻဆောင်ႏ၊ ကျိုꩻကျောင်ꩻမတ်နာႏ၊ ဗွေႏဘုရာꩻကထီႏ၊ အီႏထွာသာႏသနာႏ၊ ဒါယကာႏနမ်းငါ၊ ခွေဘုရာꩻအမွေႏ၊ ဝွေꩻအီႏထွားတီ၊ နဝ်ꩻမꩻနီဗွေႏ၊ ထူပေႏသရေꩻနုတ်၊ သိင်္ဂုတ္တရကုန်း၊ ထာꩻပူႏလောင်းကီ၊ ဘုရာꩻနီဆူႏ၊ ဌပနာႏဖူꩻစခါ၊ ဘုရာꩻကကုသန်တွမ်ႏ၊ ကောဏဂုံနီတွန်၊ လွေꩻအွဉ်ႏညီꩻရဝ်း၊ အွိုးနဝ်ꩻသွူနော၊ မိန်းတောႏဟော်ꩻဖေႏ၊ သရနုတ်ထာခံꩻ၊ ခင်ႏလမ်းနေႏရာႏ၊ လွေꩻဌာပနာႏညီꩻ၊ ဘုရာꩻနီဆူႏ၊ ထာꩻပူႏနာကီ၊ သိင်္ဂုတ္တရ၊ ဌာနထက်မျတ်၊ ကဿပဘုရာꩻ၊ ခွုင်းကားဝွေꩻဗွေႏ၊ မွေးမွေးလျောႏလျောႏ၊ အသက်တောႏသူသဲဉ်၊ မွန်မန်ႏပျောႏရာꩻ၊ နဝ်ꩻမꩻနေးထူႏ၊ ခမ်းသူႏဝေင်ꩻယေန်၊ ညိမ်ꩻချမ်ꩻသာႏယာႏ၊ နဝ်ꩻမꩻနွို့ထင်ႏ၊ ဝေင်ꩻခွင်ႏသာႏယာႏ၊ ကွိုနဲတင်ꩻလုဲသီးယာ၊ တဖုံႏတဉ်ဟွေး။

ကဿပဘုရာꩻ၊ ကျွꩻကာထူႏနေး၊ ရွှေပြည်နိဗ္ဗာန်ႏ၊ ဝေင်ꩻခံꩻအချာ၊ မဆွာꩻမည၊ လꩻနွုတ်ꩻသင်္ချေႏ၊ ရေႏတွက်အနေင်ႏ၊ အခိန်ႏအခါႏ၊ နေင်ႏလာသက္ကရာဇ်၊ တစ်နှစ်ထင်ႏဗွေ၊ မွေးလျောႏသာႏယာႏ၊ ဘုရာꩻဂေါတမ၊ စထစ်ကထွာ၊ ဝေဿန္တရာႏမင်ꩻ၊ ထင်ႏအုံစံႏစာꩻ၊ တုသီတာႏခမ်း၊ တနံအဝေင်ꩻ၊ စေꩻစိန်ႏချမ်ꩻသာႏ၊ စံႏစာꩻထွူမꩻ၊ သမ်းကျွꩻလင်ယား၊ တီႏပါႏကျွန်ꩻနဝ်၊ ခမ်းဟဝ်သာႏယာႏ၊ ကပိလဝတ်၊ ခမ်းမျတ်ဟုံဟင်၊ မင်ꩻသာꩻသီႏဓတ်၊ မင်ꩻမျတ်ရာဇာႏ၊ နဝ်ꩻခါအသက်၊ နပ်တွက်ဖြီႏဖြီႏ၊ တ(နီ)ဆီကွတ်ꩻနေင်ႏ၊ အခိန်ႏကာလ၊ နဝ်ꩻမꩻတောႏထွက်၊ ဒုက္ကစရိယာႏ၊ ကျင်ꩻဗာႏသူနေင်ႏ၊ အခိန်ႏထင်ႏဗွေ၊ လွေꩻအုံပွိုင်းမီ၊ ဗုဒ္ဓဟေမွူးထျꩻ၊ ရုက္ခညောင်ပင်၊ ပလ္လင်ႏရတနာႏ၊ တဟျာႏပေါက်ထန်ႏ၊ အောင်ႏခန်းခွန်သုံ၊ စဲ့ꩻဖုံပြဲင်ႏဝင်ꩻ၊ ခမ်းလော့ထီလိုမ်ႏ၊ ခြွဉ်းခန်းလို့စင်၊ အောင်ႏမျင်ႏသစ္စာႏ၊ လေးပါးထင်ႏလꩻ၊ ဂေါတမမထေရ်ႏ၊ လောကမန်ႏကင်ꩻ၊ တရာꩻမင်ꩻမျတ်၊ ချွစ်ခန်းဝွေꩻသီး၊ ပဉ္စဝဂ္ဂီႏဝင်ꩻငတ်ꩻ၊ ဗာရာဏသီႏခမ်းကို၊ နွုတ်ꩻနီꩻထင်ႏယဝ်း၊ ဗွေႏစဝ်းလွေꩻအုံ၊ သတင်ꩻသုံꩻသေင်ႏဟေ့ꩻ၊ လဲင်လွန်မွူးထျꩻ၊ ချꩻအုံထွူမꩻ၊ ဟန်ႏဆာယာႏမွူးထျꩻ၊ ချꩻအုံနင်းတယ်ꩻ၊ သရဇ္ဈာယ်ႏတွတ်တွတ်၊ ရွစ်ဖတ်စီꩻဖျန်ꩻ၊ ကမ္မဋ္ဌာန်ꩻဘာႏဝနာႏ၊ နဝ်ꩻခါကာလ၊ ဓညဝတီႏ၊ မင်ꩻကြီꩻခွန်တန်၊ ဟော်ꩻခံꩻဥက္ကလ၊ ရာဇသခင်၊ နမ်းကျင်ꩻတရာꩻ၊ ဆီပါꩻကျင်ꩻမျတ်၊ အရပ်အရာႏ၊ ခင်ႏလမ်းဌာန၊ ဓညဝတီႏ၊ ပြည်ကြီးခမ်းတန်၊ ဟော်ခံꩻထွာဗွေႏ၊ ရွှေနန်းသခင်၊ အတွင်ꩻနဝ်ꩻကာလ၊ နဂရခမ်း၊ ပါနဝ်ꩻတဖူးဝေး၊ အမေနာမ၊ တပုဿတွမ်ႏ ဘလ္လိကညီနောင်၊ ဖူးမောင်ႏဝေးခို၊ ဦသကီꩻကုန်ႏသယ်ႏ၊ လယ်ႏထီလော်ခမ်း၊ ဝွေꩻသီးတဖူးဝေး၊ မောင်ႏပေႏဖူးကား၊ ဖြေꩻစာကားခုဲ၊ လက်ꩻလုဲထွဉ်ႏသွဉ်၊ ခဉ်ႏရွဉ်ခွုမ်ယွယ်ꩻ၊ လွေꩻသဲင်ꩻချာငါ၊ နဝ်ꩻခါကာလ၊ ဆပါꩻတခမ်းနဝ်ꩻ၊ ခမ်းဟဝ်နာမ၊ သုဝဏ္ဏဘုမ္မိ၊ မဇ္ဈိမခ်းတန်၊ ရွဉ်ခံꩻလွိုင်ႏအာ၊ ရွဉ်ထာလဲ့ပေါ်ꩻ၊ ကျောႏဇော်ꩻသတင်ꩻ၊ ဟုံဟင်ရွစ်ဖြ၊ ဓညဝတီႏ၊ ပြည်ကြီးခမ်းတန်၊ ပါꩻခမ်းသုဝဏ္ဏ၊ ဆတပြက်ꩻဆူꩻ၊ ဗွူဟူငိုꩻကား၊ ရွဉ်ထာခါပေါ်ꩻ၊ ကျောႏဇော်ꩻသတင်ꩻ၊ ခမ်းဟဝ်ဓညဝတီႏ၊ မီႏရိုꩻရွဉ်ထာ၊ တွိုင်ခူနေးတွမ်ႏ၊ ဟူဖြော့တဲ့ရိုꩻ၊ အွိုးပါꩻတခမ်းဆူꩻ၊ ကေꩻဇူꩻခမ်ꩻပေါႏ၊ ဟူဖြော့နွောင်ꩻခံꩻ၊ မီႏလွေꩻအံႏကား၊ ပရူးအံႏဗာႏ၊ စင်ပါꩻစင်နီ၊ သီစဲင်ႏသွစ်ꩻနား၊ ဖူးကားကုန်ႏသယ်ႏ၊ လစ်ꩻမျက်နာꩻစု၊ ထုထလွိုင်ႏအာ၊ ကွန်ႏစာလဲ့စွမ်၊ အဝ်ႏစွဉ်ႏကူစွိုး၊ မီႏရိုꩻခမ်းဆူꩻ၊ သုဝဏ္ဏဘုမ္မိ၊ တပုဿဘလ္လိက၊ နဝ်ꩻမꩻဝွေꩻသီး၊ ဝင်ꩻနီတဖူးဝေး၊ မꩻလွေꩻဦသကီꩻ၊ ထွိုင်ႏကာခီႏလွေꩻ၊ စေꩻဝေꩻလွဝင်ꩻ၊ ပျောႏသွင်ႏမွန်းသွိုꩻ၊ ဦသကီꩻဖူးကား၊ ရွဉ်ထာထွတ်ထေ၊ ဖြေꩻလွေꩻဟူဖြော့၊ သော့ꩻလွေꩻလောလဲင်၊ နဝ်ꩻတဲင်ထွိုင်ႏကာ၊ သာႏသာႏယွယွ၊ မွူးဟာချꩻဗေင်ႏ၊ ကိန်ꩻမီစခန်ꩻ၊ အွꩻအံႏထွူမꩻ၊ ထွိုင်ႏကာထွိုင်ႏလွေꩻ၊ ဖေꩻဖေꩻသာႏသာႏ၊ နဝ်ꩻမꩻရွစ်ဖြ၊ သုဝဏ္ဏဘုမ္မိ၊ ဖျောဝ်ထေ့လွေꩻတွိုႏ၊ သွိုꩻသွင်ႏမွန်းပျောႏ၊ နိုꩻဆောႏလွဝင်ꩻ၊ ချꩻပင်တယ်ႏဝေင်ꩻ၊ တွိုႏတဲင်ပါꩻခမ်း၊ အွꩻအံႏပွိုင်းမီ၊ ကုန်ႏသယ်ႏဖူးကား၊ သမ်းလွေꩻညာႏတောႏ၊ လောကမန်ႏကင်ꩻ၊ တရာꩻမင်ꩻမျတ်၊ အထွတ်သရဘူ၊ လိုꩻလူꩻအစော့ꩻ၊ မော့ꩻဆွုမ်ႏခွဲရိုꩻ၊ ရုက္ခစိုꩻဒေဝါႏ၊ ခါလဲ့နိုꩻဆောႏ၊ ဝွေꩻသီးအသꩻ၊ တပုဿဘလ္လိက၊ သꩻမဉ်သဒ္ဓါႏ၊ ဘုံႏထူꩻဘုရာꩻ၊ ဒဲဉ်ဗွာဟန်ႏသွမ်ꩻ၊ ဖစ်စွဉ်ႏဘုရာꩻ၊ ငဝ်းငွါလျောက်လဝ်း၊ ဩစဝ်းဩဗွေႏ၊ ခွေသွဉ်းတကာႏ၊ သဒ္ဓါႏမဉ်လူႏ၊ သွမ်ꩻဦꩻဒဲဉ်ဗွာ၊ ပိဏ္ဍပါတံ၊ ဘန္တေနီဗွေႏ၊ ခွေသွဉ်းလျောက်လဝ်း၊ စဝ်းစဝ်းမွူးရဝ်ꩻ၊ ဗွေႏစဝ်းခြေတော်၊ ကျွꩻဖန်းဩဗွေႏ၊ အွီႏနွိုးသာႏယာႏ၊ ငဝ်းငွါဖစ်ပင်ꩻ၊ သခင်လူနတ်၊ ရပ်နေးတကာ၊ ငဝ်းငွါလျောက်လဝ်း၊ ဟဝ်ထွူတကာႏ၊ အာမဝန်ႏခံႏ၊ မိန့်ဖန်တန၊ နဝ်ꩻမꩻဝွေꩻသီး၊ ဖူးဝေးညီနောင်၊ တွိုင်ႏပင်ꩻပေါင်ꩻဝင်ꩻ၊ သွင်ႏသွင်ႏသွိုꩻသွိုꩻ၊ ပိုလီꩻလဲ့အာ၊ ခါလဲ့စိတ်တူႏ၊ နီအီႏလူႏဗာႏ၊ ဘုရာꩻသွမ်ꩻဦꩻ၊ မွူးရဝ်ꩻခိုႏစဝ်း၊ လောင်ꩻရဝ်းသီးယာ၊ ဖူးကားကုန်ႏသယ်ႏ၊ နည်းများဆေ့ꩻအာ၊ ငတ်ꩻရျာꩻဗွေဗွေ၊ စင်ခွေစင်ပါꩻ၊ သဒ္ဓါႏဗွေသꩻ၊ အာႏရꩻနစ်သက်၊ စုံမက်မဲ့စွုမ်ႏ၊ ထိုမ်ႏသိုႏတွောင်ထီ၊ ဖွိုင်ႏတန်ဖွိုင်ꩻပေႏ၊ ပသေခန်းကြောင်းကြောင်း၊ သေႏချောင်းသေႏချာႏ၊ ဟူဗွာဖြော့စင်၊ တလင်ꩻခြောင်းဝန်ႏ၊ သန်ꩻပြန်ꩻထွားငသေꩻ၊ စေꩻဝွေꩻငဝ်းငွါ၊ နဝ်ꩻခါနီဗွေႏ၊ အစိန္တေယျ၊ ပတ္တပတ္တံ၊ အီႏခံႏအီသွမ်ꩻ၊ သပိတ်ခံꩻထာ၊ ခါလဲ့ငထဝ်း၊ နဝ်ꩻခါနောင်ႏတ၊ သွုန်ႏဖူꩻသꩻကို၊ တံꩻခိုꩻနုဘောႏ၊ ကျောႏတွိုႏရွစ်ဖြ၊ စတုလောကပါလာ၊ ဒေဝါနတ်သာꩻ၊ ခါလဲ့သေဖျောဝ်၊ ဟွုန်ဟဝ်ဝံꩻသာႏ၊ နဝ်ꩻခါခွန်ဖီ၊ ဝွေꩻသီးလစ်ꩻဖြာꩻ၊ ဒေဝါတနံ၊ ခံꩻထာမျဖန်၊ အီလင်ꩻသပိတ်မျ၊ ယထူႏပငါပရာꩻ၊ တဖြာꩻတဖြုံႏဖြုံႏ၊ ခွန်ဟုံဒေဝ၊ ထွိုင်ႏကာနဲစ်လင်ꩻ၊ ခတ်ချင်ꩻရွစ်ဖြ၊ ပါဒခြေတော်၊ ဂေါတမဘုရာꩻ၊ အငါလဲင်ႏချင်ꩻ၊ ယွော့ဖင်ꩻကပ်ဖေႏ၊ ဒေဝါလစ်ꩻဖြာꩻ၊ ခါလဲ့ကပ်လွေꩻ၊ ခွေသွဉ်းကပ်ယောင်း၊ အုံကောင်ဝတ်တွာ၊ နဝ်ꩻမꩻနီဗွေႏ၊ ရွှေလက်စူခံꩻ၊ ထေထန်ႏရပ်ထူႏ၊ ခွန်လူꩻသပိတ်၊ လေးလုံးလစ်ꩻဖြုံႏ၊ စူအုံႏအကို၊ ဗွေႏရိုꩻဓိဋ္ဌာန်ႏ၊ ပတ္တံသပိတ်၊ လစ်ꩻဖြုံႏယိုသား၊ ယံထွာတဖြုံႏချင်ꩻ၊ ဂုဏ်ႏအင်ꩻနဝ၊ တေဇတံꩻခိုꩻ၊ ကုသိုလ်ႏအဟုံႏ၊ ထွာခန်းတဖြုံႏချင်ꩻ၊ ရောင်ႏတင်ႏရောင်ႏခ၊ မျဖန်သပိတ်၊ တကာႏဖစ်ပင်ꩻ၊ တင်ႏတယ်ႏလျောက်ပတ်၊ အီႏကပ်အီသွမ်ꩻ၊ တပုဿညီနောင်၊ ဖူးမောင်ႏဝေးခို၊ ထင်ႏတွိုႏမွူးရဝ်ꩻ၊ ထာꩻလေဖူꩻဖါꩻ၊ ရောင်ႏဝါရောင်နီ၊ အီႏလွဉ်လောင်ꩻသွမ်ꩻ၊ သွမ်ꩻဦꩻတနေထီ၊ နီဗွေႏရပ်ထူႏ၊ ဖြောင်ဖျူႏသွမ်ꩻဦꩻ၊ တကာႏလူႏတန်ꩻ၊ ဖလံသရဏဂုံႏ၊ လုံးစုံထွူယဝ်း၊ နဝ်ꩻမꩻဗွေႏဘုရာꩻ၊ ထွားရှုဉာဏ်ႏတောႏ၊ ဩဩဝွေꩻသီး၊ ဝင်ꩻနီဖူးဝေး၊ သေငါꩻအီႏထွာ၊ ခွေဘုရာꩻသာႏသနာႏ၊ ဒါယကာႏတောႏ၊ လောသားကုန်ႏသယ်ႏ၊ သေငါꩻထီႏစဲင်း၊ မဲ့သဲင်ဉာဏ်ႏခံꩻ၊ သယမ္ဘူတာ၊ ငါးထောင်အနေင်ႏ၊ ငတ်ꩻရေင်သာႏသနာႏ၊ ဗျာဒိပ်တောႏစခါ၊ ဘုရာꩻသိုမ်တွန်၊ ပီနုဲးကထွဉ်ႏဝင်ꩻ၊ ခွင်ꩻငသေꩻမွေႏတောႏ၊ ကုန်းပေါ်အလောင်း၊ ထီႏဖြောင်စဲင်းစဲ့၊ နဝ်ꩻမꩻလဲ့ဗွေႏ၊ အစိန္တေယျ၊ ဖြွꩻထင်ႏဆံတောႏ၊ ဟတ္ထာစူခါႏ၊ ပါလင်ꩻလစ်ꩻလီး၊ ဖေႏအပ်ဝေးခို၊ ယိုနောတကာႏ၊ နဝ်ꩻမꩻဗွေႏဘုရာꩻ၊ စူထာစူခံꩻ၊ သမ်းဖြွꩻထင်ႏခြာ၊ ကေသာသဉ်ဆျူႏ၊ ကလူꩻဆံတော်၊ ဟတ္ထာစူခါ၊ ပါလင်ꩻလစ်ꩻလီး၊ သမ်းဖေႏဖူးခို၊ ယွော့ꩻယိုစဝ်းနောင်း၊ ရောင်ႏတင်ႏကေသာ၊ ပီနုဲးထာခံꩻ၊ ဆံတော်ပတ္တမျာꩻ၊ နဝ်ꩻခါဝွေꩻသီး၊ ဝင်ꩻနီဖူးဝေး၊ ထူႏနေးရပ်ဆွုမ်ႏ၊ ဟွုန်စွုမ်ဟွုန်ညွတ်၊ တပုဿဘလ္လိက၊ အာႏရꩻဝံꩻသာႏ၊ ဗာႏသꩻနစ်သက်၊ စုံမက်ဟွုန်စိုမ်ꩻ၊ တဒိုမ်ႏလဲင်ꩻထူ၊ ဖူးဝေးနီဖြာꩻ၊ ခင်မာဖေႏဝင်ꩻ၊ လဲင်ꩻတဖေင်ꩻခန်း၊ ကာယနမ်းကဝ်ႏ၊ ခနတဆင်ႏ၊ ဘုရာꩻခင်ႏထျꩻ၊ နဝ်ꩻမꩻလျောက်လဝ်း၊ ဩစဝ်းဩဗွေႏ၊ အစိန္တေယျ၊ ခွꩻစုံညိမ်ꩻချမ်ꩻ၊ ထီနမ်းမေတ္တာႏ၊ သနားအစ်လူ၊ နီသွဉ်းတဖူးဝေး၊ သꩻရေꩻဟွုန်ဟဝ်၊ နီဗွေႏပို့သ၊ မေတ္တာႏမျဖေႏ၊ ကေသာဆံမျတ်၊ ဓာတ်တောႏကလူꩻ၊ နီသွဉ်းတဖူးဝဗး၊ သꩻရေꩻဟွုန်ဟဝ်၊ နဝ်ꩻမꩻဗွေႏဘုရာꩻ၊ ငဝ်းငွါမိန်းတောႏ၊ ကွဲဟော်ꩻနယ်ဖေႏ၊ ဝွေꩻသီးတဖူးဝေး၊ ခွေဘုရာꩻကေသာ၊ ရောင်ဝါသဉ်ဆျူႏ၊ ကလူꩻခံꩻယို၊ ဖူးခိုတကာႏပေႏ၊ ယံဖေႏဝွေꩻသီး၊ ဝင်ꩻနီဖူးဝေး၊ လွေꩻဌာပနာႏသွင်ꩻ၊ အတွင်ꩻစခါ၊ ဘုရာꩻကကုသန်ႏ၊ ကောဏဂုံႏက၊ ကဿပဘုရာꩻ၊ စခါမွေႏတောႏ၊ ကောင်မျတ်ထာꩻပူႏ၊ သိင်္ဂုတ္တရကုန်း၊ သွင်ꩻရဝ်းဌာပနာႏ၊ ဘုရာꩻကကုသန်ႏ၊ ဌာပနာႏတောင်ႏဝွေꩻ၊ ဝွေꩻဗွေႏကောဏဂုံႏ၊ ဌာပနာႏသွင်ꩻသော့ꩻ၊ ထီစဲစ်ခရဲင်ႏ၊ အစိန္တေယျ၊ ကဿပသွင်ꩻရဝ်း၊ နဝ်ꩻရာသရေꩻနုတ်၊ သိင်္ဂုတ္တရဆူꩻ၊ ထာꩻပူႏနာကီ၊ အဝ်ႏအရပ်သီခမ်း၊ ဓညဝတီႏ၊ ကွတ်ꩻဆီကွတ်ꩻထာꩻပူႏ၊ အွိုးဆူꩻထွူနဲမောင်ႏ၊ ဘုံႏခေါင်ꩻသကျ၊ မိန့်ဟငဝ်းငွါ၊ နဝ်ꩻခါဟွုန်တွိုႏ၊ မျင်ꩻမိုႏကောင်နာ၊ သိကျာꩻမာဃ၊ ဒေဝဗြဟ္မာႏ၊ ကမ္ဘာႏဟံႏတန်၊ နီသဲဉ်လစ်ꩻမွုန်ႏ၊ တုံလုတ်တသွိုး၊ မျင်ꩻမိုႏဝဲꩻကွုန်ꩻ၊ ထိတွိုင်ႏသမုဒ္ဒရာႏ၊ ဂင်္ဂါႏယမုံနာႏ၊ ခါလဲ့ဗောက်ꩻဗဝ်ႏ၊ ဟွုန်ဟဝ်သာႏဓု၊ မို့ꩻလောင်းကင်ဟဝ်၊ သင်ႏဖျောဝ်သောသော၊ သာႏဓုခေါ်အွန်၊ ဟွန်ဟဝ်ဝံꩻသာႏ၊ ဘုရာꩻဆံတော်၊ ပျောႏပျောႏပျꩻပျꩻ၊ ဒေဝသူဖြာꩻ၊ နဂါဂဠုန်ႏ၊ သူဘုံႏလူꩻခမ်း၊ အံႏအော်ꩻသားရောင်၊ ဒုံႏမောင်းတွဲႏထုံ၊ အုံႏအုံႏအင်ႏအင်ႏ၊ လင်ꩻလွဉ်ကိုစီႏ၊ သိကျာꩻနေးထူႏ၊ အုပ်ꩻခံꩻအုပ်ꩻထာ၊ ဟဲ့ꩻပါလင်ꩻတွမ်ႏ၊ တနံဝိသုကျုံႏ၊ ပဉ်ဖုံႏပဉ်စွိုꩻ၊ တွိုႏလင်ꩻဗွေႏသောင်၊ သုံးထောင်ထာꩻခြာ၊ ငတ်ꩻပါꩻတူရိယာႏ၊ ပတ်ဆဲင်ထုံမောင်း၊ သင်ႏရောင်ဆားဆား၊ နဝ်ꩻမꩻသိကျာꩻ၊ ဒေဝါမိန္ဒော၊ လောႏထူႏအုပ်ꩻခံꩻ၊ သွင်ꩻသော့ꩻဆံတော်၊ ယိုမꩻလျောက်ပတ်၊ ဌာနတင်ႏတယ်ႏ၊ ကွိုနဲဖူးမောင်ႏ၊ စဝ်းနောင်ႏတပုဿ၊ ဘလ္လိကဗွေႏဟွေး၊ ဗွေႏစဝ်းသိကျာꩻ၊ ဒေဝါခွန်လူꩻ၊ သွစ်ꩻဆူႏအဋ္ဌ၊ ကပျꩻအရောင်ႏ၊ တောသုံးထောင်အကို၊ ပျိုပျိုပျတ်ပျတ်၊ လုက်လက်လေတောင်ႏ၊ ကောင်ဆောင်ႏသေင်ႏဝါႏ၊ အာကာကင်ဟဝ်၊ တဆဝ်တင်ႏလင်း၊ နဝ်ထင်ꩻတွို့ꩻကွဉ်ႏ၊ ခစွဉ်ႏလိတ်လိတ်၊ ဗုတ်ဗိတ်အရောင်ႏ၊ တောင်ႏခဖျောဝ်ထင်ႏ၊ မို့ꩻလောင်းကင်ဟဝ်၊ နဝ်ꩻမသိကျာꩻ၊ မာꩻသဲင်ꩻဖန်ဆင်ꩻ၊ လောလဲင်ရထာꩻ၊ ဝေဇယန္တာပျသာဒ်၊ မပ်မိတ်ရောင်ႏတင်ႏ၊ ခင်ꩻစဲဉ်ႏနွုတ်ꩻဆူႏ၊ အဖူꩻသွင်ꩻသော့ꩻ၊ ဆံတော်ကလူꩻခံꩻ၊ တနံဝိသုကျုံႏ၊ လူꩻဖုံႏဖန်ဆင်ꩻ၊ မင်ꩻလမ်းလန်းမ၊ ကျနတရူးတန်၊ တကြန်ႏကြေင်းကြဲ့၊ တမဲ့ထဲင်းပေႏရွုမ်ꩻ၊ တဖူꩻမင်ꩻလမ်း၊ ပေႏတန်အဲဉ်ႏလုဲး၊ နားနုဲးခြဝ်ႏဆီ၊ ပီနုဲးဒါခြဝ်ႏ၊ ထွားဟဝ်သာႏယာႏ၊ ထာစျꩻထာꩻအီႏ၊ ဖြီႏသꩻငထဝ်း၊ စထစ်စဝ်းဘုရာꩻ၊ ပါဒခင်ႏထျꩻ၊ ရွစ်ဖြဖျောဝ်တွိုႏ၊ လွေꩻအွီုးထီတန်၊ သမုဒ္ဒရာႏ၊ တဖူꩻတွာတိုင်း၊ အီႏခွေါင်အီႏခံႏ၊ နွို့ထန်ႏထင်ႏလင်ꩻ၊ သေင်ႏပင်သေင်ႏတူႏ၊ တဖူꩻသꩻကို၊ ရိုꩻလဲ့ငထဝ်း၊ စွန်ꩻဟဝ်နုဲးပြာႏ၊ အံႏဖြာႏမလိုမ်း၊ ခီꩻမွမ်ꩻမလို့၊ ထုထသာႏယာႏ၊ သဗ္ဗတ္ထသဲဉ်ပွိုင်၊ တဖူꩻမင်ꩻလမ်း၊ အထျꩻအသောင်၊ တရောင်းတရေꩻ၊ ပန်ꩻသေꩻပန်ꩻတင်ႏ၊ ငကောင်ႏလင်ꩻစူꩻ၊ ထူꩻဆန်ꩻလက်ꩻလုဲꩻ၊ ပီနုဲးပါꩻဆို့ꩻ၊ နုနွယ်နုပျို၊ သေင်ႏမျိုꩻကစ၊ ကာလခိန်ႏခါႏ၊ တအံႏဒါႏဖိုတဝ်း၊ နဝ်ꩻလဲ့အံႏဒါႏ၊ သေင်ႏရာႏမဉ်မို၊ ကူစွိုးအရသာႏ၊ စဲဉ်ႏဒွါႏတဖူꩻသောင်၊ ဟံႏလောင်းဟူႏဒွါႏ၊ ဗြဟ္မာႏလူꩻလိုꩻ၊ မွန်းသွိုꩻပျောႏသွင်ႏ၊ တောႏတွင်ꩻထာꩻခြာ၊ ထွာလို့ပွယ်ꩻလမ်ꩻ၊ ရံႏလွဉ်ပျသာဒ်၊ ဆံမျတ်ကေသာ၊ ဘုရာꩻဆံတော်၊ ဝေါ်ꩻခံꩻအချာ၊ ငတ်ꩻရျာꩻကုန်ႏသယ်ႏ၊ ဦနယ်ꩻဒုံႏပတ်၊ ငဝ်းမျတ်ငွါမော်၊ တရော်ꩻထွေတိန်ႏ၊ ကျွꩻသဲင်ꩻယွယွ၊ စူꩻကမွန်းသွိုꩻ၊ လူꩻလိုꩻဗြဟ္မာႏ၊ ထာꩻခေ့ꩻထာꩻလေ၊ မသေအခိန်ႏ၊ ရုန်ႏရိန်ႏသွိုꩻသꩻ၊ အာႏရꩻပွယ်ꩻတန်၊ စန်ထွို့ꩻစွီႏသဲင်ꩻ၊ လောလဲင်ရထာꩻ၊ သွတ်ꩻခရာႏမွန်းပျောႏ၊ တောႏတောႏမွေးတဝ်း၊ အဝ်ႏအွိုးနီဗွေႏ၊ ဝေနေယျအဖါ၊ ဘုရာꩻခင်ႏထျꩻ၊ ရွစ်ဖြလွေꩻထေ့၊ နဒီသမုဒ်၊ ဖြီဆိတ်သင်္ဘောꩻ၊ သမုဒ္ဒရာႏ၊ အခါနဝ်ꩻရာꩻ၊ နွုတ်ꩻလာအဖူꩻ၊ လူꩻလိုꩻဗြဟ္မာႏ၊ ထိုမ်းတွမ်ႏရဟန်ꩻတန်၊ အွန်အန်ဗွိုင်းဗင်း၊ ပျောႏသွင်ႏမွန်းသွိုꩻ၊ တံꩻခိုꩻဆံတော်၊ ထွို့ꩻသဲင်ꩻလောလဲင်၊ လို့သဲင်ꩻနွုတ်ꩻနီꩻ၊ ဖျောဝ်တွိုႏထီတန်၊ သမုဒ္ဒရာႏ၊ နဝ်ꩻခါသိကျာꩻ၊ ဒေဝါခွန်လူꩻ၊ ဝိသုကမ္မ၊ စတွမ်ႏဝိသူကျုံႏ၊ အွဉ်ႏအုံရထာꩻ၊ နဝ်ꩻခါသိကျာꩻ၊ ဖန်ဆင်ꩻမာꩻတော၊ သင်္ဘော်ꩻဖြီတန်၊ လင်ꩻယန်နွုတ်ꩻဖြုံႏ၊ လုံးစုံဖြီꩻစီꩻ၊ ခွန်ဖီဒေဝါ၊ ရထာႏအွဉ်ႏဒင်ႏ၊ သင်္ဘောꩻလောင်းကီ၊ စီႏသဲင်တေတ်ꩻခံꩻ၊ အရောင်ႏထန်ႏနုဲး၊ ထုဲႏပီမွူးလာ၊ သမုဒ္ဒရာႏဆကီ၊ ထုဲႏပီမွူးထန်ႏ၊ တနံဒေဝါ၊ ဗြဟ္မာႏသိကျာꩻ၊ ငဝ်းငွါရိုꩻဖေႏ၊ ကုန်ႏသယ်ႏဦသကီꩻ၊ နီလဲ့အီႏသဲင်ꩻ၊ ဟန်ႏလဲင်ႏခါယို၊ မူႏခိုမောင်ႏသီး၊ အီသဲင်ꩻဒွါႏနော၊ ဆံတော်သဲင်ခံꩻ၊ တနံရိုႏသေႏ၊ ဖူးဝေးညီနောင်၊ ကျောင်ꩻလံꩻငဝ်းငွါ၊ သေႏချာႏထွူတဲင်၊ ထွိုင်ႏသဲင်ꩻခန်းဒွါႏ၊ ပငါပရင်ꩻ၊ အဝ်ႏကုဲဒွါႏရွုမ်ꩻ၊ ဝွေꩻသီးဖူးကား၊ ငတ်ꩻရျာꩻကုန်ႏသယ်ႏ၊ ငယ်သားဘဝ၊ ပီနုဲးသေကျောင်ႏ၊ ရောင်ႏတင်ႏတဆဝ်၊ အဝ်ႏသော့ꩻထီဖူꩻ၊ နွုတ်ꩻယူႏဇနာႏ၊ ညာꩻဗော့ꩻခွုင်းနဝ်ꩻ၊ ဒီဟဝ်အံႏဖြာႏ၊ သမုဒ္ဒရာႏထီကို၊ ဟောင်ရိုꩻလို့ရွုမ်ꩻ၊ နွုတ်ꩻနီꩻကွိုနဲ၊ ဖျောဝ်သဲင်ꩻသီသောင်၊ နောင်တန်အထျꩻ၊ ရွစ်ဖြဖျောဝ်သဲင်ꩻ၊ ဒုံဝေင်ꩻတိုင်းရွာ၊ စေထဟော်ခံꩻ၊ ပါꩻခမ်းပါꩻထီ၊ ပြည်ရွာနဂရ၊ အံႏဖြာႏစွော့ꩻရောင်၊ ဖေါင်ႏတန်သင်္ဘောꩻ၊ ဝေါ်ꩻခံꩻပျသာဒ်၊ ခတ်လွဉ်ꩻနွုတ်ꩻဆူႏ၊ တထီႏဖူꩻတဝ်း၊ ထွာနဝ်ꩻပါꩻအာ၊ ရောင်ႏဝါႏတသီးသွ၊ ခခန်းဗိတ်ဗိတ်၊ မပ်မိတ်တောက်ရောင်ႏ၊ ပီနုဲးကဝ်ႏခ့ꩻ၊ သမုဒ္ဒရာႏ၊ ဂင်္ဂါႏထီကို၊ မူႏခိုစွော့ꩻရောင်၊ ဖေါင်ႏဖြီသင်္ဘောꩻ၊ လောႏလွေꩻထွားရောင်၊ ထာꩻမုဲꩻကောင်းဟာ၊ သမုဒ္ဒရာႏထီဖူꩻ၊ ထူꩻဆန်ꩻတဲဟွေး၊ စင်ခွေစင်ပါꩻ၊ ဖြားဆားလိုꩻဝေင်ꩻ၊ ထေင်လွငဝ်းအာ၊ နဝ်ꩻခါရာဇာ၊ မင်ꩻတရာꩻဟော်ခံꩻ၊ ခွန်တန်လဲ့ထန်ႏ၊ အံႏဖြာႏအံႏအော်ꩻ၊ ဝေါ်ꩻခံꩻပျသာဒ်၊ မင်ꩻမျတ်လွေꩻထွား၊ ရီဗာႏကျောင်ꩻလံꩻ၊ ကုန်ႏထံဖူးကား၊ ငတ်ꩻရျာꩻကုန်ႏသယ်ႏ၊ ဦသကီꩻအတန်၊ အဝ်ႏဒါႏခမ်းမုဲꩻ၊ လက်ꩻလုဲꩻတဲလောင်ꩻ၊ ဖေါင်ႏတန်သင်္ဘောꩻ၊ ဒင်ႏတောကွန်ႏစာ၊ ထာꩻခြိုꩻလိတ်ထယ်ႏ၊ ထာꩻမုဲꩻနဲနော်၊ သင်္ဘောꩻတကီ၊ စီႏသဲင်တေတ်ꩻခံꩻ၊ ဒင်ႏတွမ်ႏပျသာဒ်၊ ခြပ်လွဉ်ꩻနွုတ်ꩻဖြုံႏ၊ အွိုးလောင်ꩻကုန်ႏသယ်ႏ၊ ထာꩻမုဲꩻနဲမောင်ႏ၊ ကျောင်ꩻလံꩻမဉ်သေ၊ ပဒေသရာဇ်မင်ꩻ၊ ကျောင်ꩻလံꩻငဝ်းငွါ၊ ရီဗာႏဝွေꩻသီး၊ ဦသကီꩻဖူးကား၊ လောသားကုန်ႏသယ်ႏ၊ နဝ်ꩻခါတပုဿ၊ ဘလ္လိကလဲ့လဝ်း၊ ဩစဝ်းဩဗွေႏ၊ ကေသာဆံတော်၊ ဟော်ခံꩻထင်ႏသေ၊ စေတနာႏစွိုးနုဲး၊ ထုဲႏပီတရꩻ၊ ပါꩻကထျမေႏ၊ ဖုဲပေႏကစိုပ်ꩻ၊ ထီဗွမ်ႏနမ်းမန်ꩻ၊ ခန်းစွဉ်ႏလာလာ၊ ရာဇာဟော်ခံꩻ၊ စူꩻစံႏသမ်းရီ၊ ဦသကီဖူးကား၊ သီလွေꩻလꩻအွိုးမုဲꩻ၊ အန်လောင်ꩻလဲ့နေး၊ ဖြေꩻတွမ်ႏရွဉ်ထာ၊ ကားဒါႏနေကောင်း၊ ဟဲဖူးမောင်ႏသီး၊ ပါꩻမုဲꩻထီႏဖို၊ ရိုꩻဖေႏကုန်ႏသယ်ႏ၊ လယ်ႏခမ်းလော်ထီ၊ ဘလ္လိကတပုဿ၊ နဝ်ꩻမꩻလျောက်လဝ်း၊ ဩစဝ်းဟော်ထာ၊ သွဉ်းသီးခါလဲ့၊ တဖဲ့ꩻတခဝ်၊ အဝ်ႏဒွါႏခမ်းညာꩻ၊ သမုဒ္ဒရာႏတပြက်ꩻ၊ လက်ꩻလုဲꩻထူꩻဆန်ꩻ၊ ခမ်းတန်ပြည်ကြီး၊ ဓညဝတီႏဝေင်ꩻ၊ ဆေင်ႏတွမ်ႏရွဉ်ထာ၊ ဒင်ႏတွမ်ႏဖိုးလော၊ သွꩻဖောႏငတ်ꩻရျာꩻ၊ ငလွေꩻပါꩻခမ်း၊ သုဝဏ္ဏဘုမ္မိ၊ နီသွဉ်းငခါ၊ ငတ်ꩻရျာꩻကုန်ႏသယ်ႏ၊ တခုဲႏတန်ꩻတွိုႏတဝ်း၊ နဝ်ꩻခါလွေꩻထိႏ၊ နီဗွေႏဘုရာꩻ၊ တပါꩻဒွါႏအုံ၊ သတင်ꩻသုံꩻတခြာ၊ ဟန်ႏဆျာယာႏမွူးထျꩻ၊ နဝ်ꩻမꩻသွဉ်းသီး၊ ညီꩻဝင်ꩻလူႏဗာႏ၊ ဒဲဉ်ဗွာဟန်ႏသွမ်ꩻ၊ ပျားရေတနေထီ၊ ဖြီꩻစီꩻထွူမꩻ၊ ပဉ္စသီလံ၊ နေးခံႏသရဏာႏ၊ နီပါဒေဝံ၊ ဗုဒ္ဓံ ဓမ္မံ၊ နေးခံႏထွူတဲင်၊ သခဲင်မြတ်လ၊ ဗုဒ္ဓရာဇာႏ၊ မေတ္တာႏသညင်ꩻ၊ ဖြွꩻထင်ႏမုနိ၊ ကေသာကလူꩻ၊ ပါလွဉ်ꩻစူခါႏ၊ လစ်ꩻပါꩻလစ်ꩻလီး၊ နီဗွေႏဘုရာꩻ၊ အပ်ဖေႏခွေသွဉ်း၊ သမ်းဖြွꩻထင်ႏဖျင်၊ ပါလင်ꩻလစ်ꩻလီး၊ အပ်လွေꩻဖူးခို၊ ဟောင်ရိုꩻပေါင်ꩻဝင်ꩻ၊ ထွာထင်ႏသွစ်ꩻဆူႏ၊ ဖူးဝေးဝင်ꩻနီ၊ လꩻညီꩻအွိုးနဝ်ꩻ၊ ဗွေႏစဝ်းဘုရာꩻ၊ ကေသာဆံတော်၊ နဝ်ꩻထွူဗွေႏဩ၊ ထွဉ်ႏသဲင်ꩻခွေသွဉ်း၊ အွဉ်ႏဒေါ့ꩻနီဗွေႏ၊ ဟော်ခံꩻဟော်ထာ၊ ကွန်ႏစာနိဗ္ဗာန်ႏ၊ ကျောင်ꩻလံꩻခရာႏ၊ သေနာႏထွူကောင်း၊ ခွန်လောင်ꩻဝွေꩻဗွေႏ၊ ဝွေꩻခါရိုꩻလဲ့၊ ငဝ်းငွါရီဗာႏ၊ အံႏဖြာႏအံႏအော်ꩻ၊ အွိုးနောသီယို၊ ကုသိုလ်ႏကံႏတန်၊ သန်တဲနောလောင်ꩻ၊ သွစ်ꩻဗောင်ဆံတော်၊ သီပူႏဇောႏဗာႏ၊ ခွေခါရိုꩻလဲ့၊ မဲ့စိုမ်ꩻမဉ်ထီႏ၊ အီႏပူႏဇောႏရဝ်း၊ စဝ်းနောင်းဦသကီꩻ၊ ထီꩻဗွာဟော်ခံꩻ၊ ကွီထွားစံꩻမွိုင်၊ ဗွောင်စွဉ်ႏအုပ်ꩻခံꩻ၊ ဆံတော်စိန်ႏဖူႏ၊ ထူႏဗွောင်ထူႏနယ်ဖေႏ၊ လေခရောင်ႏတင်ႏ၊ မင်ꩻတရာꩻဟော်ခံꩻ၊ လမ်းဟော်ဝေင်ꩻဒုံ၊ နိဂုံးဂါမ၊ နဂရပူရံ၊ တခမ်းလိုမ်းအရောင်ႏ၊ လေတောင်ႏစွစ်ꩻလို့၊ လစ်ꩻကဒို့သီနား၊ ရာဇာဟော်ခံꩻ၊ အွဉ်ႏဒင်ႏကတူႏကီ၊ စူတဆီဝုဲႏခေါက်၊ သိုမ်ပေါက်ထွူမꩻ၊ မဉ်လꩻကွီဖန်း၊ ဆံတော်ကလူꩻ၊ နီဆူႏနီလီး၊ ဦသကီꩻစဝ်းနောင်း၊ သꩻရောင်းသꩻရေꩻ၊ ဖေႏဖန်းကိုꩻကွယ်ႏ၊ ခေါက်ဝုဲႏရဝ်းသီ၊ ဦသကီꩻသမ်းလဝ်း၊ ဩစဝ်းဩထာ၊ အီႏလꩻဒါႏကောင်း၊ ရောင်ႏတင်ႏကေသာ၊ ဗွေႏဘုရာꩻမိန်းတောႏ၊ ဟော်ꩻဖေႏခွေသွဉ်း၊ ထွဉ်ႏလွေꩻဌာပနာႏ၊ ထာꩻပူႏလောင်းကီ၊ သိင်္ဂုတ္တရ၊ ပွိုးကဝွေꩻဗွေႏ၊ အစိန္တေယျဘုရာꩻ၊ ငဝ်းငွါမိန်းတောႏ၊ ဟော်ꩻဖေႏပီးနဝ်ꩻ၊ တဖေႏတဝ်းငကွို၊ ဟော်ထိုဗွေႏဟွေး၊ ကွီဖန်းဆေႏဆေႏ၊ ဖေႏဖန်းနီလီး၊ ကွီသီကွီမွန်၊ ခွန်တန်ရာဇာ၊ စေထဟော်ခံꩻ၊ ခွန်တန်အငါ၊ ငဝ်းငွါရိုꩻဖေႏ၊ ဟော်ခံꩻစေထ၊ နဝ်ꩻမꩻချင်းထူႏ၊ ကလူꩻဆံတော်၊ ဟော်ခံꩻထူႏယꩻ၊ လꩻခန်းနီလီး၊ ဝွေꩻသီးတဖူးဝေး၊ သꩻရေꩻဒွုမ်တဝ်း၊ နဝ်ꩻမꩻတပုဿ၊ ဘလ္လိကညီနောင်ႏ၊ ဆင်ႏရောင်းဆင်ꩻရဲꩻ၊ ငယ်သားကစ၊ အွဉ်ႏဝꩻထာꩻငွိုး၊ ကော့ꩻမွိုးကော့ꩻဖါ၊ ဘုရာꩻပဉ္စဝ်း၊ ငဝ်းလဲင်ꩻတအျာ၊ ခင်မာဖေႏဝင်ꩻ၊ ပငါပရင်ꩻ၊ နဝ်ꩻမꩻဟော်ခံꩻ၊ ခွန်တန်စေထ၊ ဘုရာꩻဆံတော်၊ ကော်ꩻရော်ꩻဦးချ၊ ထင်ႏလꩻအီသဲင်ꩻ၊ တွိုႏတဲင်ဟော်ကီ၊ (ထူႏ)ကင်းထီꩻဗွာ၊ မင်္ဂလာႏပွယ်ꩻလံꩻ၊ ခံႏနေးပွယ်ꩻတန်၊ ဟော်ခံꩻစေထ၊ နဝ်ꩻမꩻထွတ်ထေ၊ ပစ္စေꩻဥစ္စာႏ၊ ရွဉ်ထာသဲင်ခံꩻ၊ ခွမ်ꩻလာꩻကစ၊ အွꩻအံႏဩဇာႏ၊ အာဟာရမျိုꩻ၊ ရိုꩻလဲ့တဲင်းမသိ၊ ထုထိဟွုန်အာ၊ မာꩻလွေꩻအောင်ႏဆက်၊ လက်ဆောင်ႏပဏ္ဏာႏ၊ ဘုရာꩻတကာႏတပုဿ၊ ဘလ္လိကညီႏနောင်ႏ၊ အောင်ႏဆက်ငကီ၊ သꩻတရေꩻတဝ်း၊ နဝ်ꩻမꩻဝွေꩻသီး၊ ကုန်ႏသယ်ႏငတ်ꩻရျာꩻ၊ နွို့ယားသင်္ဘောꩻ၊ နိုꩻဆောႏပိုလီꩻ၊ ဝွေꩻသီးတင်ꩻလုဲ၊ သကုဲစိတ်ပျတ်၊ ဆတ်ယားလင်ꩻယန်၊ ဖြီတန်အထွန်ႏ၊ နွန်ႏသော့ꩻထီကို၊ ထီကျိုဂင်္ဂါ၊ သမုဒ္ဒရာႏလောင်းကီ၊ ပီနုဲးသေကျောင်ႏ၊ ဖေါင်ႏတောႏနဝါ၊ နဝ်ꩻခါသဲင်ꩻတွိုႏ၊ အွိုးနဝ်ꩻတကြွန်၊ ထီတန်ကသ၊ နဂရကျွန်ꩻဟဝ်၊ တွိုႏနဝ်ꩻတဟာ၊ ဝွေꩻသီးခါလဲ့အုံ၊ ချပုံမီဗေင်ႏ၊ ကိန်ꩻဗာႏတသာ၊ ဘုရာꩻဆံတော်၊ ပျꩻဖျော်အရောင်ႏ၊ လေတောင်ႏထီတကီ၊ ပီနုဲးမွူးလာ၊ စန္ဒသူရိန်ႏ၊ လေတထိန်ႏတောက်ပ၊ ကာလနဝ်ꩻခါ၊ နဂါခွန်ရူး၊ ဝွေꩻသီးသမ်းထီႏ၊ နီဗွေႏဆံတော်၊ တေဇောတံꩻခိုꩻ၊ လေဟွိုးရောင်ႏတောက်၊ ရောက်တွိုႏနဂါꩻခမ်း၊ ကျံႏတေ့ꩻထူႏခွန်ꩻ၊ ဗွန်တန်ဘုံꩻကြီꩻ၊ နီဗွေႏဘုရာꩻ၊ နီလီးဆံတော်၊ သင်္ဘောꩻဖြီကို၊ လိုꩻတဉ်ငတ်ꩻရျာꩻ၊ တဖြာꩻလဲ့မသေ၊ မွူးလေထွိုင်ႏထွား၊ ရတနာႏအုပ်ꩻခံꩻ၊ အဒို့ꩻအဝ်ႏဗွောင်၊ နဝ်ꩻတဲင်ဒေါ့ꩻထွား၊ ကေသာကလူꩻခံꩻ၊ ဆံတော်နဝ်ꩻရာꩻ၊ ကျန်ႏရွုမ်ꩻဖြီႏဖြီႏ၊ လစ်ꩻလီးကွိုတဝ်း၊ နဝ်ꩻမꩻဝွေꩻသီး၊ အီအီပါꩻအာ၊ မဟာဆံတော်၊ အရောင်ႏပေါႏပေါက်၊ ရောက်တွိုႏနဂါꩻ၊ ဟွဲလမ်းခွန်ရူး၊ ထူႏတခွန်ꩻနဲလောင်ꩻ၊ မဲ့နောင်မဲ့ထီ၊ ရီႏပြုဲရောက်ရောက်၊ ဆောက်တယ်ႏသွုန်ႏသꩻ၊ တလꩻဒွုမ်တဝ်း၊ နဝ်ꩻမꩻဝွေꩻသီး၊ နီꩻနော်ꩻတွိုင်ႏပင်ႏ၊ လွဝင်ꩻထွူမꩻ၊ ချꩻယားလင်ꩻယန်ႏ၊ ချင်ဗန်ႏထောင်ႏရွက်၊ တလီꩻဖတ်အီကျောင်ႏ၊ ပွုံႏဆောင်ႏသေဟဝ်၊ နဝ်ꩻခါရွစ်တွိုႏ၊ လွေꩻအွိုးတထွောင်း၊ ကျွန်ꩻပေႏနဂရာဇ်၊ ထီတဝစ်ꩻခူခါ၊ ဖုံးဖင်းတလီꩻတန်၊ ကျွန်ꩻပေႏအသောင်၊ ဖေါင်ႏတန်သင်္ဘောꩻ၊ ဝေါ်ꩻခံꩻပျသာဒ်၊ ချꩻရပ်တယ်ႏအုံ၊ ပုံႏသောင်အွဉ်ႏထွိုင်ႏ၊ လွိုးအုံဗော့ꩻနဝ်ꩻ၊ တရဝ်ꩻတဟာ၊ တသာကွိုတဝ်း၊ သူႏတောႏရဝ်းလောင်ꩻ၊ ကျောင်ꩻတကာႏသီးယာ၊ တဖုံႏတဉ်ဟွေး။

နဝ်ꩻခါကျွန်ꩻပေႏ၊ ပင်ႏလယ်ႏကသ၊ နဂရာဇ်နဝ်ꩻ၊ အဝ်ႏတွမ်ႏပါꩻတဖြာꩻ၊ လွေꩻကားသင်္ဘောꩻ၊ ဖေါင်ႏတောႏထင်ႏပꩻ၊ လွစ်လꩻထာꩻသီ၊ ဦသကီꩻသင်္ဘောꩻ၊ တဖြာꩻဒွါႏအုံအဝ်ႏ၊ သွꩻဖဝ်ႏလုတ်လင်၊ သီစင်လို့ကြောင်း၊ သညောင်းသညင်ꩻ၊ ခင်မာဖေႏပါꩻ၊ အဝ်ႏကုဲတဖြာꩻဒွါႏ၊ ခွမ်ꩻလာꩻငထဝ်း၊ အုံအဝ်ႏငလီꩻ၊ အံႏမထီဒဲဉ်၊ ယွောင်သဲင်ခြောင်ခြီႏ၊ အမဲ့ထင်ႏထီႏ၊ ဝွေꩻသီးသင်္ဘောꩻ၊ ဖေါင်ႏတောႏအွဉ်ႏဆွိုက်၊ ရွစ်တွိုႏဖျော်ကျွန်ꩻ၊ ဟွုန်ဟဝ်နစ်သက်၊ စိုမ်ꩻမက်မဲ့စွုမ်ꩻ၊ အီႏသီဒွုမ်တဝ်း၊ တွိုႏနဝ်ꩻထွိုင်ႏစူꩻ၊ ဖူးကားကုန်ႏသယ်ႏ၊ အကယ်ႏအတန်၊ သံတော်ဦးတင်ႏ၊ ဝုဲႏထင်ႏတပုဿ၊ ဘလ္လိကညီနောင်၊ တောက်ထံꩻရီဗာႏ၊ အဝ်ႏဒွါႏခမ်းမုဲꩻ၊ ဟဲ့လောင်ꩻဗွေႏသီး၊ ထင်ႏရီငဝ်းငွါ၊ နဝ်ꩻခါတပုဿ၊ ဘလ္လိကကွဲရိုꩻ၊ နီယိုနဝ်ꩻကောင်း၊ အွိုးလောင်ꩻဝေးခို၊ ဟောင်ရိုꩻဖြီႏဖြီႏ၊ ဓညဝတီႏခမ်း၊ ကားအံႏဖြေꩻစာ၊ မလွေꩻသုဝဏ္ဏ၊ ရပ်မပြည်ကြီး၊ နီးသမ်းလွေꩻမော့ꩻ၊ အဝ်ႏသော့ꩻခမ်းထာꩻခြာ၊ ဘုရာꩻပဉ္စဝ်း၊ အုံအဝ်ႏတပါꩻဒွါႏ၊ ဟန်ႏဆျာယာႏမွူးထျꩻ၊ ဗုဒ္ဓဘုရာꩻ၊ နီခါရိုꩻလဲ့၊ မဲ့စွုမ်ꩻလူႏဗာႏ၊ ဩဇာႏသွမ်ꩻဦꩻ၊ နေးထူႏဗာႏတွမ်ႏ၊ သဉ်ထံꩻသီႏလ၊ နဝ်ꩻမꩻဗွေႏဘုရာꩻ၊ သနားအစ်လူ၊ ထူႏဖေႏဆံတော်၊ သွစ်ꩻလီးကေသာ၊ သိကျာꩻလဲ့ခါ၊ မာꩻဖေႏခင်ႏလမ်း၊ ပျသာဒ်နွုတ်ꩻဆူႏ၊ ထူႏသော့ꩻဆံတော်၊ သင်္ဘောꩻကစ၊ နဝ်ꩻမꩻတွိုႏသဲင်ꩻ၊ မြို့တိုင်စေထ၊ ပါꩻသမ်းထူႏယꩻ၊ ရောင်ႏခဆံတော်၊ နီလီးနောလောင်ꩻ၊ နဝ်ꩻကောင်းသမ်းသဲင်ꩻ၊ တွိုႏတဲင်ကျွန်ꩻပေႏ၊ လဲင်ꩻတန်တဗို၊ ထီကိုဝဲꩻထန်ႏ၊ ထန်ႏသဲင်ꩻထျဉ်ခန်း၊ နဝ်ꩻတန်ထီယော့၊ နဝ်ꩻမꩻဖျောဝ်သဲင်ꩻ၊ ယိုကွိုနဲလောင်ꩻ၊ ဝေးမောင်ႏသီးအဲ၊ ခြုဲးနယ်ဒေါ့ꩻဖေႏ၊ ဝွေꩻနဝ်ꩻသေဗာႏ၊ အခရာႏကျောင်ꩻလံꩻ၊ အံႏအော်ꩻအံႏဖြာႏ၊ စေတနာႏနစ်သက်၊ စုံꩻမက်မဲ့စွုမ်ꩻ၊ ဝံꩻမျောက်ဝံꩻသာႏ၊ သဒ္ဓါႏဗွေသꩻ၊ အာႏရꩻဟွုန်ဟဝ်၊ နဝ်ꩻမꩻကွဲဝုဲႏ၊ အဝ်ႏမုဲꩻနဲဗွေႏ၊ ခွေသွဉ်းမဉ်ထီႏ၊ ထင်ႏရီငဝ်းငွါ၊ နဝ်ꩻမꩻဘလ္လိက၊ တပုဿလဲ့ဗွောင်၊ ဝွေꩻလဲ့ထင်ႏထီႏ၊ သီပေႏလင်ꩻစွဉ်ႏ၊ တစိုးတန်တန်၊ အံႏမဟို့ꩻခိုး၊ ရိုꩻလဲ့ထိုꩻမား၊ နဝ်ꩻခါပူႏဇောႏ၊ ဆံတော်ကလူꩻ၊ စူနုံတဆီ၊ မတ်ပီဗိုကဝ်ႏ၊ ဟွုန်ဟဝ်နစ်သက်၊ ပန္နက်ဆုတောင်ꩻ၊ စုံꩻမက်မဲ့စွုမ်ꩻ၊ နလုံꩻတရာꩻ၊ ငတ်ꩻပါꩻကတေ့ꩻ၊ ခွꩻဒဲ့ꩻစုံစီႏ၊ ပီနုဲးဥပမာႏ၊ ရွှေကျာကဝ်ႏဗို၊ ထီကိုထီဖူꩻ၊ ကံးကဆူလင်ꩻဗာႏ၊ အာႏရꩻနစ်သက်၊ ဖြောင်းလဲ့ဓိဋ္ဌာန်ႏ၊ ပစ္စုပ္ပန်ႏငခါ၊ ယံချမ်ꩻသာႏဖန်း၊ လိုꩻခမ်းလိုꩻဒုံ၊ ဟုံဟင်သာႏယာႏ၊ လိုႏရာꩻမတ၊ ယံလꩻယံဗွေ၊ ခြွေခြာႏကျွဲဝ၊ သမ္ဗုဒ္ဓဗွေႏဟွေး၊ ခွေသွဉ်းတန်ယို၊ ထွာလိုꩻတစိုး၊ ဖျတ်ပိုယန်မာ၊ ဂင်္ဂါႏထီဖူꩻ၊ ယူႏပက်သွုန်ႏသꩻ၊ သင်္ဘောꩻပꩻပြုဲ၊ အဝ်ႏကုဲတဖြာꩻဒွါႏ၊ ခွမ်ꩻလာꩻငထဝ်း၊ ဗွေႏစဝ်းဗွန်တန်၊ ဟိုမ်းဖန်းတခါႏ၊ ကရုဏာႏသညင်ꩻ၊ ဝုဲႏထင်ႏဘုရာꩻ၊ ပတ္ထနာႏဆုတောင်ꩻ၊ ကောင်းမုဝုဲႏဗာႏ၊ ဘုရာꩻဆံတော်၊ အနုဘောႏတံꩻခိုꩻ၊ လိုꩻခမ်းမျက်မောက်၊ တောက်ဖျော်လဲင်ႏချင်ꩻ၊ ကျွန်ꩻကင်နဂရာဇ်၊ ဝွေꩻကအုံဒွါႏ၊ တဖြာꩻရွုမ်ꩻနဝ်ꩻ၊ ဟဝ်ဟဝ်လမ်းဒါႏ၊ ဝေဇယန္တာႏ၊ ရတနာႏဟော်ခံꩻ၊ ပေါႏထန်ႏလဲင်ႏချင်ꩻ၊ ပဒေသာႏလဲ့ပေါက်၊ ရောင်ႏတောက်ရောင်ႏတင်ႏ၊ ဟိန်ႏငဝ်းသင်ႏရောင်၊ ဟော်ခံꩻလောင်းကီ၊ ထီꩻဗွာထောင်ကင်း၊ ပလ္လင်ႏကူႏသဲင်၊ အဝ်ႏတဲင်အဝ်ႏတံꩻ၊ အွꩻအံႏအမျိုꩻ၊ ရိုꩻလဲ့စွုမ်ႏစီႏ၊ ပီနုဲးသိကျာꩻ၊ ဟော်ထာရွှေနန်ႏ၊ ပစ္စုပ္ပန်ႏမျက်မောက်၊ ကုသိုလ်ႏထောက်ပံ့၊ ချမ်ꩻသာႏမျက်မြင်၊ ခွန်နင်ꩻသီးယာ၊ ဘုရာꩻဆံတော်၊ အနုဘောႏကတန်၊ မွိုးနန်းအစ၊ သင်္ဘောꩻပꩻပြုဲ၊ အဝ်ႏကုဲတဖြာꩻဒွါႏ၊ ဂင်္ဂါႏကသ၊ လꩻဖူꩻချမ်ꩻသာႏ၊ ထွာဖူꩻခွန်ကွဉ်၊ ရွဉ်ထာသဲင်ခံꩻ၊ စံႏစာꩻကားသꩻ၊ လꩻဖူꩻမွိုးနန်း၊ ပစ္စုပ္ပန်ႏလိုꩻဒုံ၊ ဟုံဟင်သာႏယာႏ၊ ကျောင်ꩻတကာႏသီးယာ၊ ဒီဟဝ်ထွားနုဲး၊ ထုဲႏပီစခါ၊ ဘုရာꩻမွေႏတောႏ၊ ကုန်းပေါ်လောင်းကီ၊ ထီကျိုအထျꩻ၊ သိင်္ဂုတ္တရကုန်း၊ ဗွေႏဘုရာꩻပုံႏချ၊ စတုတ္ထလစ်ꩻဆူႏ၊ လူꩻလိုꩻအရင်ꩻ၊ သညင်ꩻမေတ္တာႏ၊ နီနာꩻအပွန်း၊ ခွန်နင်ꩻသီးယာ၊ ကျိုꩻစာꩻလွေꩻလွ၊ ဦးချကိုꩻကွယ်ႏ၊ ခေါက်ဝုဲႏလူႏတန်ꩻ၊ ဘုရာꩻရွှေတကုန်ႏ၊ ဘုံꩻတောႏသူပါꩻ၊ အံႏဖြာႏခီꩻမွမ်ꩻ၊ တယွမ်ꩻနွောင်ꩻတဝ်း၊ ဗွေႏစဝ်းမွေႏတောႏ၊ လွေꩻလွနောလောင်ꩻ၊ သူႏတောႏကောင်ꩻသီးယာ၊ နဝ်ꩻခါကာလ၊ တပုဿဘလ္လိက၊ ဆွိုင်ႏယားလင်ꩻယန်၊ ချင်ဗန်ႏထောင်ကင်း၊ ငတ်ꩻတန်ကျောက်ဆူႏ၊ ညီနောင်တဖူးဝေး၊ သွꩻပေႏလိုꩻအာ၊ သဲင်ꩻယားယွယွ၊ ကျွꩻယားသာႏသာႏ၊ ဂင်္ဂါႏထီတကီ၊ သမ်းမော့ꩻ(သမ်း)ထီႏ၊ ဖဝင်ꩻနီလီး၊ ဖြီတန်သင်္ဘောꩻ၊ လောႏသွစ်ꩻသော့ꩻ၊ ရံးဖွိုႏရံးပေႏ၊ နဝ်ꩻတဲင်ဝွေꩻသီး၊ ထီႏတငါထီတတ်ꩻ၊ သတ်နွို့ကောင်ခါႏ၊ ထီပဆွာအုံးအုံး၊ အဆာႏဖုံႏထန်ႏ၊ အငဝ်းထန်ႏနုဲး၊ ထုဲႏပီခမ်းခြွိုင်ꩻ၊ အုံးအုံးဦးဦး၊ ဆူလင်ꩻဆုံးဆုံး၊ လိုꩻဖုံႏထင်ႏထီႏ၊ သꩻဝီးသꩻဝꩻ၊ သွုန်ႏသꩻထိတ်လန်း၊ ဝဲꩻတန်ထီတတ်ꩻ၊ သတ်နွို့ကောင်ခါႏ၊ ငတ်ꩻရျာꩻဝွေꩻသီး၊ မဲ့ထီမဲ့နောင်၊ ဟဲ့ꩻဟောင်ငဝ်းငွါ၊ ဘုရာꩻတရာꩻ၊ နဝ်ꩻမꩻသေနန်း၊ ဘုရာꩻဆံတော်၊ ပူႏဇောႏဝုဲႏခေါက်၊ ယံလွစ်လꩻဖန်း၊ ခန္ဓာႏထာꩻသီ၊ စွုမ်ႏဖြီးစွုမ်ႏဖြာꩻ၊ ငတ်ꩻရျာꩻကုန်ႏသယ်ႏ၊ တွိုင်ႏတယ်ႏစွုမ်ႏဖြာꩻ၊ နဝ်ꩻခါသင်္ဘောꩻ၊ ဝေါ်ꩻတန်ပျသာဒ်၊ ဆန်တက်ကျောင်ႏထင်ႏ၊ ကင်ဟဝ်အာကာ၊ ပါတွမ်ႏကုန်ႏသယ်ႏ၊ ဗွေႏဘုရာꩻတံꩻခိုꩻ၊ လဲဉ်းထိုကျောင်ႏဗꩻ၊ ခနတဆင်ႏပေႏ၊ တသေတန်ꩻတဝ်း၊ လင်ꩻအဝ်ႏသော့ꩻယား၊ သမုဒ္ဒရာႏထီ၊ နဒီတတ်ꩻတန်၊ အဆငါကွိုတဝ်း၊ နဝ်ꩻမꩻဝွေꩻသီး၊ ဟွုန်ဟီးဟွုန်ဟဝ်၊ ဗွေႏစဝ်းတံꩻခိုꩻ၊ လိုꩻလဲ့အံႏဖြာႏ၊ နာကြီးတာဗန်၊ သင်္ဘောꩻအကို၊ သွိုꩻသွိုꩻသွင်ႏသွင်ႏ၊ ဆတ်ꩻယားလင်ယန်၊ ချင်ဗန်ႏထောင်ႏရွက်၊ သက်သက်သာႏသာႏ၊ ဥပမာႏသေဟဝ်၊ တနီꩻချင်ꩻဖျောဝ်သဲင်ꩻ၊ တွိုႏတဲင်ခမ်းလီꩻ၊ ဓညဝတီႏ၊ ပြည်ကြီးခမ်းတန်၊ မွန်းသွိုꩻသွိုက်သွိုက်၊ သဲင်ꩻဆွိုက်သဲင်ꩻဖျော်၊ ဟွုန်ဟဝ်ဝံꩻသာႏ၊ ဘုရာꩻတကာႏ၊ တပုဿဘလ္လိက၊ တဖူးဝေးတွမ်ႏ၊ သွꩻပေႏငတ်ꩻရျာꩻ၊ နဝ်ꩻခါလိုꩻဝေင်ꩻ၊ ဓညဝတီႏခမ်း၊ ပေႏတန်မူႏခို၊ လွဉ်ရိုꩻအွိုင်းအွိုင်း၊ ဗွိုင်းဗွိုင်းဗင်းဗင်း၊ သင်္ချေႏသင်္ချာႏ၊ ကုဋာကုဋေႏ၊ တသေဒွုမ်တဝ်း၊ ဘုရာꩻဆံတော်၊ ဝေါ်ꩻခံꩻပျသာဒ်၊ မပ်မိတ်ရောင်ႏတင်ႏ၊ ရှင်းပရင်ႏကစ၊ မိမ္မယောက်ျား၊ မင်ꩻသာꩻမမေ၊ မတ်ပေႏမတ်တန်၊ ကျောင်ꩻလံꩻရီဖျောဝ်၊ စဝ်းဘုရာꩻတကာႏ၊ ဘလ္လိကတပုဿ၊ ငဝ်းထျꩻငွါနာ၊ နဝ်ꩻမꩻဝွေꩻသီး၊ ဝင်ꩻနီလျောက်လဝ်း၊ ဩစဝ်းဟော်ခံꩻ၊ ခွန်တန်ရာဇာ၊ သွဉ်းသီးလꩻလွဉ်၊ ရွဉ်ခံꩻဥစ္စာႏ၊ ရတနာႏရွဉ်ထာ၊ ခွမ်ꩻလာꩻကွဉ်ကꩻ၊ ဆတပြက်ꩻတခဝ်၊ မွေးတဝ်းဩဗွေႏ၊ သွဉ်းသီးလွေꩻထီႏ၊ ဘုံꩻကြီꩻမျတ်လ၊ ဂေါတမဘုရာꩻ၊ ဟန်ႏဆျာယာႏမွူးထျꩻ၊ တောႏရꩻထာꩻခြာ၊ လူႏဗာႏသွမ်ꩻပန်ꩻ၊ ခံႏဗာႏသဉ်ဟား၊ သရဏဂုံႏ၊ ထုံꩻစံႏထွူယဝ်း၊ နဝ်ꩻမꩻဗွေႏဘုရာꩻ၊ သနားအစ်လူ၊ ထူႏဖေႏသွဉ်းသီး၊ သွစ်ꩻလီးဆံတော၊ ယံဖေႏအွဉ်ႏကောင်း၊ ထာꩻပူႏလောင်းကီ၊ သိင်္ဂုတ္တရကောင်၊ ဟောင်ရိုꩻရပ်ရာႏ၊ အဝ်ႏတကာႏသီး၊ ခမ်းထီဖူꩻကို၊ ဗွန်ထိုဘုရာꩻ၊ သိုမ်ပါꩻမွေႏတောႏ၊ သဲင်ꩻအွဉ်ႏရော်ꩻညီꩻ၊ ဝွေꩻသီးဗွေႏစဝ်း၊ မော့ꩻနဝ်ꩻကအွဉ်ႏ၊ ထွဉ်ႏသဲင်ꩻသွဉ်းသီး၊ ပီးနဝ်ꩻဩဗွေႏ၊ ကွဲကားသွဉ်းသီး၊ သဲင်ꩻတွိုႏထီကို၊ ကျိုတန်ကသ၊ စေထဟော်ခံꩻ၊ လမ်းဟော်ဝေင်ꩻဒုံ၊ နီဂုံးနဂရ၊ ရာဇဟော်ခံꩻရီထွား၊ နီသွဉ်းသီးထင်ႏပျꩻ၊ ထူႏယꩻအရင်ꩻ၊ သျင်ႏပရင်ႏဟော်ခံꩻ၊ အံႏရင်ꩻပွိုင်ႏခန်း၊ အနိုင်အထက်၊ လုယက်ရိမ်ထူႏ၊ ကလူꩻနီလီး၊ သွဉ်းသီးသမ်းသဲင်ꩻ၊ နဝ်ꩻတဲင်ရွစ်ဖြ၊ နဂရကြွန်ပေႏ၊ ပင်ႏလယ်ႏထီဖူꩻ၊ ခွန်ရူးနဂါꩻ၊ မွူးဟာထာꩻခေ့ꩻ၊ လဲမ်ꩻတေ့ꩻထူႏတခွန်ꩻ၊ ဆံတော်နီလီး၊ ကေသာနီဆူႏ၊ ကွဲယူႏစဲင်းစဲင်း၊ တနဲင်းပေႏသꩻ၊ ရာဇနီဗွေႏ၊ တွမ်ႏခွေသွဉ်းယို၊ ကိုꩻကွယ်ႏညီꩻဝင်ꩻ၊ ဆံပဲင်လစ်ဗောင်၊ ဌာပနာႏကောင်နာ၊ ဌာနေဌာန၊ သိင်္ဂုတ္တရကောင်၊ ထာꩻပူႏလောင်းကီ၊ ညီꩻဝင်ꩻတွမ်ႏဗွေႏ၊ ဝွေꩻသီးဖူးကား၊ အခွင်ꩻညာတ၊ အွဉ်ႏစွꩻအပ်ဖေႏ၊ ရွှေပြည်သခင်၊ မင်ꩻကြီꩻဓညဝတီႏ၊ ဟွုန်ဟီးဟွုန်ဟဝ်၊ နဝ်ꩻမꩻဟော်ခံꩻ၊ ခွန်တန်ရာဇာ၊ လောက်ကာႏငါႏစွဉ်ႏ၊ ဟော်ခံꩻစေထ၊ နဂါꩻကထူႏ၊ ကလူꩻထာခံꩻ၊ ဆံတော်လစ်ꩻလီး၊ မင်ꩻကြီꩻဟော်တန်၊ ဟော်ခံꩻရာဇာ၊ နဝ်ꩻမꩻကွဲထူႏ၊ ဗွူဖေါင်းတွမ်ႏကဝ်ႏ၊ တလင်ႏလောင်းကီ၊ စူတဆီထေင်းထင်ႏ၊ အွဉ်ႏဒင်ႏကတူႏကီ၊ ပင်ꩻလွဉ်ဟဲ့ꩻယား၊ နဂါꩻကထူႏ၊ ထီဖူꩻကြွန်ခါႏ၊ ဟော်ခံꩻကရုဲး၊ စေႏတနာႏစွုမ်းကတ်၊ ဓာတ်တောႏဘုရာꩻ၊ နဝ်ꩻမꩻကျွꩻလွဉ်၊ ဖျော်စွဉ်ႏလဲင်ႏချင်ꩻ၊ ရှင်ႏပရင်ႏဟော်ခံꩻ၊ ခွန်တန်ဗွောင်ထွား၊ ဆံတော်သွစ်ꩻလီး၊ စွုမ်ႏစီႏအဝ်ႏလို့၊ စုဝင်ꩻသွစ်ꩻဆူႏ၊ အုပ်ꩻဖူꩻအုပ်ꩻကို၊ ဗွန်ထိုရာဇာ၊ အာႏရꩻနစ်သက်၊ စုံꩻမက်မဲ့ꩻစွုမ်ꩻ၊ ဝံꩻမျောက်ဝံꩻသာႏ၊ နဝ်ꩻမꩻဟော်ခံꩻ၊ အွဉ်ႏဒေါ့ꩻထန်ႏဖေႏ၊ ဝွေꩻသီးတဖူးဝေး၊ ထွိုက်တဲနောသီ၊ ဝင်ꩻနီတဖူးဝေး၊ ခွန်ပေႏညီႏနောင်၊ ဖူးမောင်ႏတပုဿ၊ သမ္ဗုဒ္ဓတကာႏ၊ သာမညတမွေးတဝ်း၊ စဝ်းခွန်ဟော်ခံꩻ၊ လမ်းဟဝ်ဝေင်ꩻဒုံ၊ ခွန်ဟုံအသꩻ၊ အာႏရꩻနွောင်ꩻတဝ်း၊ နဝ်ꩻမꩻခွန်တန်၊ ဟော်ခံꩻရာဇာ၊ ထူႏနꩻအီႏသွို့ꩻ၊ တခွေါ့ခန်းကတူႏ၊ အီႏလူႏဆံတော်၊ ဟော်ခံꩻအကျံႏ၊ ခွန်တန်စေႏတနာႏ၊ နဝ်ꩻခါခွန်လူꩻ၊ ကပွိုးထီꩻဗွာ၊ ပြည်ရွာတီခမ်း၊ ငမ်းသꩻလွစ်ရံꩻ၊ ဌာပနာႏဓာတ်တောႏ၊ လောႏယꩻရျင်ꩻခန်း၊ သန်လျက်နꩻဆင်၊ ဟော်ခံꩻစူလောင်း၊ လျောက်လဝ်းစဝ်းခွန်၊ လဝ်းဟွန်ုတောင်ꩻပြန်ႏ၊ ဩဩခွန်တန်၊ ဟော်ခံꩻမီႏလူႏ၊ ကတူႏနဝ်ꩻရာꩻ၊ သဒ္ဓါႏအီႏရံꩻ၊ ဌာပနာႏဆံတော်၊ မာꩻမွုန်းနီဗွေႏ၊ ဒေဝါခွန်လူꩻ၊ နင်ꩻမူႏထီꩻဗွာ၊ ငဝ်းငွါထင်ႏရိုꩻ၊ ဟော်ထိုရာဇာ၊ စဉ်ꩻစာꩻနာႏစဲင်း၊ လဲင်ꩻကိုလဲင်ꩻကာႏ၊ ယွိုင်းဟွုန်အာႏရꩻ၊ နဝ်ꩻမꩻကွဲထူႏ၊ ကတူႏလောင်းပန်ꩻကုံꩻ၊ သုံꩻဆောင်ႏခူးဒါႏ၊ ပုဲလာႏစလွယ်၊ ကဟွဲဒါႏငွဉ်ꩻလောင်း၊ အောင်ႏဆက်ပူႏဇောႏ၊ ဆံတော်ကလူꩻခံꩻ၊ ဒါနံအလူႏတောႏ၊ ဟော်ခံꩻနစ်သက်၊ ရက်လဲဉ်းမဲ့ဖြုံႏ၊ ခွန်ဟုံရာဇာ၊ နဝ်ꩻမꩻဟဲ့ꩻလွဉ်၊ ဝွန်ꩻဝန်ꩻမူꩻမတ်၊ ပရိသတ်ပိုႏပါႏ၊ ထွဉ်ꩻမာꩻတဲ့လော၊ နိုꩻဆောႏဝေင်ꩻကို၊ ခါလဲ့ကျိုꩻစာꩻ၊ မာꩻထွူထင်ႏယဝ်း၊ နဝ်ꩻမꩻကွဲပင်ꩻ၊ ဒင်ႏထင်ႏပျသာဒ်၊ ရတနာႏထာခံꩻ၊ အွဉ်ႏဒင်ႏဖြီလောင်း၊ ကောင်ထျꩻထာꩻပူႏ၊ စင်မူႏစင်ခို၊ လိုꩻဒုံလိုꩻဝေင်ꩻ၊ ရွဉ်သဲင်အလူႏစာႏ၊ ကဝ်ႏထာကဝ်ႏရွဉ်၊ တံꩻခွဉ်ႏကူꩻကား၊ ကျက်သာႏဗွူဖေါင်း၊ တန်ဆောင်ဆီမီး၊ ထီꩻဗွာထီꩻတနျာႏ၊ ဩဇာႏသွမ်ꩻပန်ꩻ၊ ဒဲဉ်ဟန်ႏကစ၊ သဗ္ဗတ္ထသဲဉ်ပွိုင်၊ လွိုင်ႏအာပြန်ꩻပြော်ꩻ၊ ဆုꩻလာဘ်ခွါႏတောႏ၊ ပူႏဇောႏလူႏတန်ꩻ၊ ပရင်ꩻပရာꩻ၊ အွဉ်ႏဒေါ့ꩻဒါႏဒွုမ်တဝ်း၊ သဲင်ဟဝ်ရတနာႏ၊ ကိုပါꩻနဝရတ်၊ ပတ္တမျာꩻသဲင်ဟုံ၊ အဝ်ႏပြုံႏဟွုန်ႏကောင်၊ အသောင်အငါ၊ မိဖြာꩻဒေဝီ၊ မဟေသီႏနင်ꩻတန်၊ ဟော်ခံꩻအမာ၊ ယိုလဲ့လူႏတန်ꩻ၊ ပတ္တီႏခံꩻထာ၊ ပုဲလာႏစလွယ်၊ ပြွယ်ꩻသဲင်ပတ္တီ၊ နွုတ်ꩻနီꩻနွုတ်ꩻနာꩻ၊ အဝ်ႏထွာပွယ်ꩻလံꩻ၊ ခမ်းတန်ပြည်ကြီး၊ ဓညဝတီႏဝေင်ꩻ၊ ပီနုဲးဝတိံႏသာႏ၊ ဒေဝါႏလူꩻခမ်း၊ ယံနဝ်ꩻကာလ၊ ရာဇဟော်ခံꩻ၊ ဝံꩻမျောက်ဝံꩻသာႏ၊ နဝ်ꩻခါခွန်တန်၊ ဟော်ခံꩻသမ်းဖေႏ၊ ဝွေꩻသီးတဖူးဝေး၊ ဖေႏဆုꩻဖေႏလာဘ်၊ ရပ်ခွဉ်မင်္ဂလာႏ၊ ရွဉ်ထာသဲင်ခံꩻ၊ ခမ်းထီလဲ့တခဝ်၊ သေဟဝ်ဆင်ဒါႏ၊ ရတနာႏလောလဲင်၊ စီႏသဲင်တိတ်ꩻခံꩻ၊ စွိုင်ႏနင်ꩻချွေႏရံႏ၊ မိဿံႏမောင်းမ၊ တပုဿဘလ္လိက၊ ခွုင်းကားလုတ်လင်၊ သွꩻချင်ꩻဝင်ꩻပေႏ၊ ဝွေꩻသီးငတ်ꩻရျာꩻ၊ ထွာလို့ခွန်ကွဉ်၊ မူꩻမတ်ဖေါင်ႏမွိုင်း၊ ခွုင်းသꩻစံႏစာꩻ၊ ဘုရာꩻဆံတော်၊ နုဘောႏအဗွန်၊ ပစ္စုပ္ပန်ႏမျက်မောက်၊ ထောက်ပံ့လꩻဖျောဝ်၊ နဝ်ꩻခါဖြီႏဖြီႏ၊ နွုတ်ꩻနီꩻထင်ႏလဲဉ်း၊ ပွယ်ꩻတန်သဘင်ႏ၊ အီႏသွင်ꩻဌပနာႏ၊ ရပ်ရာႏကောင်မျတ်၊ အရပ်နဝ်ꩻရာꩻ၊ အဝ်ႏထာꩻဆမုဲꩻ၊ ခါလဲ့မသေ၊ စထစ်စခါ၊ လိုꩻဖြားအစိုး၊ တဟွုန်ဖိုတဝ်း၊ စဝ်းခွန်ဟာ်ခံꩻ၊ ဝွန်ႏတန်ကစ၊ တပုဿဘလ္လိက၊ ခင်မာနောင်ႏတ၊ ကြောင်းကြစိုꩻရိန်ႏ၊ ဟော်ခံꩻရာဇာ၊ လဲင်ꩻနုဲးဒွါႏအထာꩻငွိုး၊ ဟွုန်တွိုႏခမ်းကီ၊ ခွန်ဖီသိကျာꩻ၊ ကမ္ဗလာႏထင်ႏလျား၊ ထွားလင်ꩻလိုꩻခမ်း၊ စုံစမ်းသိကျာꩻ၊ နဝ်ꩻမꩻကွဲထီႏ၊ ဓညဝတီႏမင်ꩻ၊ မဉ်သွင်ꩻဌာပနာႏ၊ နေႏရာႏခင်ႏလမ်း၊ ဗွန်တန်ဘုံꩻကြီꩻ၊ နီဗွေႏကလူꩻ၊ သဉ်ဆျူႏကေသာ၊ သိကျာꩻထင်ႏသေ၊ ထင်ႏလေထင်ႏစဲင်း၊ မဲ့သဲင်ဝိသုကျုံႏ၊ ပုံႏချမိန်းတောႏ၊ နာꩻလောႏလင်ꩻမွိုင်၊ လိုꩻဒုံတီႏပါႏ၊ ခါယိုခဏ၊ ဓညဝတီႏမင်ꩻ၊ လင်ꩻမာꩻဖေႏတဖူꩻ၊ ကလွေꩻစူꩻဒါႏ၊ သိင်္ဂုတ္တရဆူꩻ၊ စထစ်ခူꩻဝေင်ꩻ၊ ဓညဝတီႏ၊ ညီႏညီႏတွာတွာ၊ မာꩻဖေႏလုဲးလုဲး၊ ဆို့ꩻဝုဲးတံꩻခွဉ်ႏ၊ တဖူꩻသောင်နီဖဲ့ꩻ၊ ဝိသုကျုံႏလင်ꩻ၊ ဖန်ဆင်ꩻမာꩻဖေႏ၊ သေႏသေႏချာႏချာႏ၊ ပီနုဲးပါꩻကဒါခြဝ်ႏ၊ ဒီဟဝ်အံႏအော်ꩻ၊ ခီႏယော်ꩻအံႏဖြာႏ၊ သေင်ႏရာႏမဉ်မို၊ ရိုꩻလဲ့တဲင်းမသိ၊ တနပ်ခိꩻဒွုမ်တဝ်း၊ နဝ်ꩻခါထင်ႏထွူ၊ ခွန်လူꩻဒေဝါ၊ ထွိုင်ႏကာကျွꩻသဲင်ꩻ၊ နဝ်ꩻတဲင်မွူးလေ၊ မဲ့သေထင်ႏထွား၊ ဘုရာꩻကာႏတပုဿ၊ ရာဇဟော်ခံꩻ၊ ထီႏစွဉ်ႏတဖူꩻ၊ ခွန်လူꩻဖန်ဆင်ꩻ၊ မင်ꩻလံလမ်းစ၊ စထစ်ဝေင်ꩻဒွို၊ ရွစ်တွိုႏဖျော်ဖြ၊ သိင်္ဂုတ္တရကုန်း၊ တဖူꩻအဲဉ်ႏလုဲး၊ နားနွဲခြံဆီ၊ ပီနုဲးဒါခြဝ်ႏ၊ စဝ်းသိကျာꩻမာꩻဖေႏ၊ ထင်ႏသေဝံꩻသာႏ၊ အာႏရꩻနစ်သက်၊ ချက်ယိုတလဲင်ႏ၊ သဲင်ခံꩻဆံတော်၊ ဌာပနာႏနောနီ၊ ဝွေꩻသီးတင်ꩻလုဲ၊ ဟဝ်ကုဲဖြားဆား၊ ရာဇာဟော်ခံꩻ၊ ခွန်တန်မူꩻမတ်၊ ပရိသတ်လိုꩻဝေင်ꩻ၊ ဖြေင်းဗွာမူႏခို၊ ကျိုꩻစာꩻထွို့ꩻစွီႏ၊ ရတနာႏဖြွီꩻတန်၊ စန်လွေꩻယွယွ၊ ထုထလိုꩻအာ၊ မာꩻမွန်းမာꩻပျောႏ၊ တဆောႏယပ်ꩻတဝ်း၊ မာꩻလွေꩻသိချင်ꩻ၊ ပတ်ဆဲင်ထုံမောင်း၊ နောင်ႏနဲင်ႏပီႏနယ်ꩻ၊ ကကီꩻသယ်ႏနင်ꩻဝဲဉ်၊ ပဉ်စဲဉ်ႏပဉ်စွိုꩻ၊ သွိုꩻသွိုꩻသွင်ႏသွင်ႏ၊ ရင်းခြွိုင်းခွမ်ꩻလာꩻ၊ တံဆာဘယက်၊ လုက်လိက်ရောင်ႏတင်ႏ၊ ခိုဗင်ႏမူႏနံꩻ၊ ထွို့ꩻလောရထာꩻ၊ နဝ်ꩻခါတပုဿ၊ ဘလ္လိကညီနောင်၊ ထောင်းတွမ်ႏထီꩻခံꩻ၊ အောင်ႏလံႏဖြေင်းဗွာ၊ တနျာႏတသီး၊ ချာငါနီပြက်ꩻ၊ လက်ဝဲလက်ယာ၊ ပိုပါပရိသတ်၊ ပတ်လယ်ႏချာငါ၊ ကုဋာႏကုဋေႏ၊ တသေဒွုမ်တဝ်း၊ နဝ်ထင်ꩻတွို့ꩻကွဉ်ႏ၊ သင်ႏစွဉ်ႏအောအော၊ မွန်းပျောႏသာႏယာႏ၊ စင်ပါꩻစင်နီ၊ စင်သီစင်ခွေ၊ ပွယ်ꩻတောႏဓာတ်ခံꩻ၊ ဆံတော်ကေသာ၊ အီႏဌာပနာႏသွင်ꩻ၊ အတွင်ꩻကာလ၊ ပျောႏပတာမွန်းသွိုꩻ၊ ပျသာဒ်နွုတ်ꩻဆီ၊ ပီနုဲးသူရိယာႏ၊ စန္တာႏမွူးလာ၊ ရောင်ဝါတသီး၊ ခကီခလက်၊ လစ်ꩻပြက်ꩻသီနား၊ ရထာꩻလောလဲင်၊ သဲင်ခံꩻရတနာႏ၊ သာႏသာႏယွယွ၊ နဝ်ꩻမꩻကွဲရွစ်၊ ကွတ်ꩻဆီကွတ်ꩻကောင်း၊ ဖေါင်ႏဖြီရထာꩻ၊ သာႏသာႏယွယွ၊ ချꩻတယ်ႏလွိုးအုံ၊ ပုံချတယ်ႏပင်ႏ၊ ရပ်ခွင်ႏတယူႏဇနာႏ၊ မာꩻလွဉ်ပွယ်ꩻတန်၊ အွန်အန်ဗွိုင်းဗင်း၊ နဝ်ထင်ꩻတွို့ꩻကွဉ်ႏ၊ သင်ႏစွဉ်ႏအောအော၊ မာꩻပျောႏမာꩻမွန်း၊ ထုံမောင်ႏပတ်သာ၊ တူရိယာႏငတ်ꩻပါꩻ၊ နီꩻနာꩻခေ့ꩻလေ၊ တသေဒွုမ်တဝ်း၊ ခွန်စဝ်းဟော်ခံꩻ၊ အီႏသွင်ꩻမွေႏဓာတ်၊ ပတ်လယ်ႏတုံးတင်း၊ အတွင်ꩻနွုတ်ꩻနီꩻ၊ ဖြီႏဖြီႏနွုတ်ꩻသာ၊ နဝ်ꩻခါခွန်တန်၊ သမ်းတမတ်သေꩻတဝ်း၊ ကောင်နဝ်ꩻကောင်ယို၊ ပွိုးအဝ်ႏအာဖြုံႏ၊ အားလုံးအဝ်ႏညီꩻ၊ ကွတ်ꩻဆီကွတ်ꩻထာꩻပူႏ၊ တသူႏသေတဝ်း၊ မော့ꩻနဝ်ꩻအစ၊ သိင်္ဂုတ္တရကုန်း၊ အုံအဝ်ႏယပ်ꩻသꩻ၊ ရာဇဟော်ခံꩻ၊ စူꩻစံꩻရီလယ်ႏ၊ လိုꩻကယ်ႏလိုꩻဖြား၊ တသေငါꩻတဝ်းအဖြုံႏ၊ ရွှေတကုန်ႏမန်ႏတဲင်ႏ၊ တစဲင်းတဝ်းလာꩻလာꩻ၊ ခွုင်းကားပွယ်ꩻတန်၊ အွန်အန်ရီလယ်ႏ၊ ဖြားကယ်ႏတင်ꩻလုဲ၊ နဝ်ꩻခါရီလယ်ႏ၊ ပါမုဲꩻမီႏသေ၊ ရီလယ်ႏလဲင်ꩻစွစ်ꩻ၊ လွစ်ခန်းပွိုင်ႏပွိုင်ႏ၊ ခွုင်းကားခမ်းထီ၊ တစင်းရီဒွုမ်တဝ်း၊ နဝ်ꩻမꩻခွန်တန်၊ ဟော်ခံꩻရာဇာ၊ တပုဿ ဘလ္လိက၊ မဲ့ငါသွိုန်းခန်း၊ နန်းတန်နောင်ႏတ၊ ကျောင်ꩻကျစိုꩻရိန်ႏ၊ ဗေင်ႏလဲ့မပျောႏ၊ အံႏလဲ့မအွီႏ၊ သာဟွီနောင်ႏတ၊ နဝ်ꩻမꩻသိကျာꩻ၊ ကမ္ဗလာႏခိုးလျား၊ ထွားလင်ꩻလိုꩻခမ်း၊ ဇမ္ဗူႏကျွန်ꩻနဝ်၊ ထီႏလင်ꩻခွန်တန်၊ ဟော်ခံꩻဥက္ကလ၊ တပုဿညီနောင်၊ ကျောင်ꩻလံꩻမဉ်သေ၊ ဌာနေဌာန၊ သိင်္ဂုတ္တရကုန်း၊ မဉ်ဌပနာႏ၊ တသေငါꩻတဝ်း၊ နဝ်ꩻမꩻသိကျာꩻ၊ မာꩻလင်ꩻလိုꩻခမ်း၊ ဟဲ့ꩻတွမ်ႏဝိသုကျုံႏ၊ လူꩻဖုံႏသူထပ်၊ အရပ်အရာႏ၊ တကာႏတင်ꩻလုဲ၊ ဟဝ်ကုဲယုတ်လတ်၊ လင်ꩻထပ်မံႏကို၊ ကုသိုလ်ႏဒါႏန၊ ရာဇဟော်ခံꩻ၊ တနံဒေဝါ၊ သိကျာꩻဒေဝိန်၊ ဟဲ့ꩻတွမ်ႏဦးထိန်ခွန်လူꩻ၊ ထူꩻလွေꩻရင်းခြွိုင်း၊ ဧရဝဏ်ႏပေါင်ဝေါ်ꩻ၊ နိုꩻဆောႏနယ်ဖေႏ၊ ဒေဝါခွန်ဖီ၊ ဦးစီးဦးထိန်၊ ဟွုန်တလဲ့နီဖဲ့ꩻ၊ မဲ့ငါထိန်ꩻအုပ်၊ မုတ်ဝေါ်ꩻယွော့ဒဲင်၊ ရင်းခြွိုင်းတံꩻဆာႏ၊ သေငါထွူယဝ်း၊ စဝ်းသိကျာꩻထိုမ်းလင်ꩻ၊ ဆင်တန်ဧရဝဏ်ႏ၊ ပေႏတန်သိုမ်ယူႏဇနာႏ၊ ဟဲ့ꩻတွမ်ႏချွေႏရံႏ၊ မိဿံႏမောင်းမ၊ ကျွꩻလင်ꩻလိုꩻခမ်း၊ ဇမ္ဗူႏတီႏပါႏ၊ နဝ်ꩻခါထင်ႏတွိုႏ၊ နီလိုꩻသမ်းငမ်း၊ ဆင်တန်ဧရာဝဏ်ႏ၊ ထွိုင်ႏရောင်းအုံးအုံး၊ ဗုံးဗင်းချာငါ၊ နာꩻထွားသွော့အီႏယမ်းဝင်ꩻ၊ သဘင်ႏပွယ်ꩻတန်၊ အွန်အန်အွိုင်းအင်း၊ နီလိုꩻထင်ႏဟွုန်၊ ခွန်စဝ်းသိကျာꩻ၊ နဝ်ꩻမꩻထွဉ်ႏစွဉ်ႏ၊ ဦးထိန်သီးစွိုင်၊ သဝ်မွိုင်ꩻကောင်ထျꩻ၊ နဝ်ꩻမꩻနီလိုꩻ၊ မူႏခိုကွဲအုံ၊ ထုံငဝ်းလဲ့ရောင်၊ မောင်းငဝ်းလဲ့သင်ႏ၊ ပတ်ဆဲင်လဲ့ဖုံ၊ တွယ်ႏထုံထွုင်းထွုင်း၊ အွုင်းအွုင်းအင်းအင်း၊ သဘင်ႏပွယ်ꩻလံꩻ၊ တနံတွမ်ႏလိုꩻ၊ ရိုꩻလဲ့အုံညီꩻ၊ အွဉ်ႏဒေါ့ꩻရီလွ၊ ဖြဝ်ႏငအွန်အန်၊ ပွယ်ꩻတန်သိုမ်ယူႏဇနာႏ၊ ရာဇာဥက္ကလ၊ ဓညဝတီႏမင်ꩻ၊ ဝင်ꩻနီတပုဿ၊ ဘလ္လိကညီနောင်၊ ပေါင်ꩻဝင်ꩻလွေꩻရီ၊ ခွန်ဖီသိကျာꩻ၊ ဒေဝါနမိန္ဒော၊ ဂေါတမဘုရာꩻ၊ ကေသာကလူꩻခံꩻ၊ ယံဖေႏဌာပနာႏ၊ ဘုရာꩻထွဉ်ႏသဲင်ꩻ၊ သိင်္ဂုတ္တရ၊ စခါကကုသန်ႏ၊ ဗွန်တန်ကောဏဂုံႏ၊ ဘုံꩻတောႏကဿပ၊ ဌာနဌာပနာႏ၊ သေငါꩻနေကောင်းဗွေႏ၊ ဝွေꩻသီးထင်ႏလဝ်း၊ ငဝ်းငွါပျဿနာႏ၊ ဒေဝိသကျာꩻ၊ သမ်းတသေငါꩻတဝ်း၊ ဌာပနာႏဓာတ်ခြောင်ꩻ၊ ကောင်ႏမူꩻအဖူꩻ၊ ထာꩻပူႏမုဲꩻအလောင်း၊ တတောင်ꩻတဝ်းဖြီႏဖြီႏ၊ တထီႏတဝ်းလာꩻလာꩻ၊ ခွေသိကျာꩻအသက်၊ နပ်တွက်လꩻရွုမ်ꩻ၊ တရေင်အနေင်ႏ၊ ဒေဝါသိကျာꩻ၊ မီႏထွာလိုꩻခမ်း၊ အဝ်ႏရွုမ်ꩻအနေင်ႏ၊ တသဲဉ်ရွုမ်ꩻနော၊ တထီႏလွဉ်ꩻတဝ်း၊ ဗွေႏစဝ်းကဿပ၊ စခါဓာတ်တောႏ၊ မော့ꩻနဝ်ꩻအစ၊ တမတ်လꩻတဝ်း၊ ဗွေႏစဝ်းဟော်ခံꩻ၊ ခွန်တန်ဗွေႏဟွေး၊ ခွေလဲ့မသေငါꩻ၊ ပါꩻလဲ့မသေရဝ်း၊ နဝ်ꩻခါခွန်တန်၊ ဟော်ခံꩻရာဇာ၊ တပုဿဘလ္လိက၊ ပိုပါပရိသတ်၊ ထွားစွဉ်ႏနတ်တနံ၊ ခွန်တန်သိကျာꩻ၊ တသေငါꩻတဝ်း၊ ငဝ်းငွါထင်ႏရိုꩻ၊ သူႏလွိုးယေန်ညော်၊ အငဝ်းလဲ့မမာꩻ၊ တသက်သာႏတဝ်း၊ အဝ်ႏရင်းသီပေႏ၊ ထောက်ဗုဲႏဆိမ်ꩻဖြောင်း၊ မဲ့နောင်မဲ့ထီ၊ အီႏမာꩻဒွုမ်ပီးမုဲꩻ၊ မခုဲႏငါႏစွဉ်ႏ၊ ထန်းယိုနဲဗွေႏ၊ စင်ခွေစင်ပါꩻ၊ မဲ့ငါသွိုန်းလို့၊ ပဉ်စုပဉ်ဗူႏ၊ တွမ်ႏလူꩻတွမ်ႏလိုꩻ၊ ထာꩻငွိုးလဲင်ꩻထန်ႏ၊ ပန်ꩻကီမဉ်မော့ꩻ၊ သွင်ꩻသော့ꩻဌာပနာႏ၊ စခါတွိုက်တောႏကွိုနဲ၊ ထဝ်းကဲသီးယာ၊ တဖုံႏတဉ်ဟွေး။

နဝ်ꩻခါသိကျာꩻ၊ ဒေဝါခွန်ဖီ၊ ထင်ႏထီႏထင်ႏသေ၊ ပေႏတန်ပရိသတ်၊ မင်ꩻမျတ်ရာဇာ၊ နယ်ဒွါႏထာꩻငွိုး၊ တွိုက်သွုန်ႏတွိုက်သꩻ၊ နဝ်ꩻမꩻသိကျာꩻ၊ နဝ်ꩻမꩻကွဲရိုꩻ၊ ကွဲကွဲဒွိုန်းက၊ ဝစနငဝ်းငွါ၊ ရီဗာႏကဒွိုန်း၊ ကောသားသက်ထို၊ စိုးပန်ပေါင်ꩻည၊ နဝ်ꩻမသိကျာꩻ၊ ငဝ်းငွါဟဲ့ꩻဟောင်၊ ဖြားယငကောင်ႏတန်၊ တနံလူꩻဖြား၊ ကအဝ်ႏဒါႏအွိုး၊ ဖက်ꩻဒွိုႏမွူးထျꩻ၊ အသက်ညဆွာꩻ၊ ရီဗာႏဖီလူꩻ၊ ဖက်ꩻဒွိုႏမွူးဒွို၊ သက်ထိုသက်ည၊ ညလဲဉ်းခွေသိကျာꩻ၊ နဝ်ꩻမꩻခွန်တန်၊ ဟော်ခံꩻဥက္ကလ၊ သꩻဟဝ်သꩻရေꩻ၊ ဒေဝါသိကျာꩻ၊ နဝ်ꩻမꩻဟဲ့ဟောင်၊ လူꩻငကောင်ႏဖြား၊ မာꩻလွဉ်ကောက်ကောက်၊ တောင်ꩻပြန်ႏရီလဝ်း၊ နဝ်ꩻမꩻသိကျာꩻ၊ ရီဗာႏလူꩻဖြား၊ စခါမွိုးနန်း၊ ကကုသန်တုံ၊ ကောဏဂုံႏက၊ ကဿပဘုရာꩻ၊ စခါမွေႏတောႏ၊ ရပ်ရာႏဌာနေ၊ နာꩻသေနေကောင်း၊ ဟဲ့ꩻလောင်ꩻလူႏတန်ꩻ၊ တနံလဲ့လဝ်း၊ ဩစဝ်းခွေသွဉ်း၊ တသေလွဉ်ꩻတဝ်း၊ သက်ဇာတ်အဝ်ႏရွုမ်ꩻ၊ သိုမ်ကုဋေႏမန်ႏ၊ တသေလွဉ်ꩻတဝ်း၊ စဝ်းသိုမ်တွန်အမွေႏ၊ ကွဲကားလူꩻဖြား၊ အသက်အာလဲဉ်းခွေ၊ ကရိုꩻနဝ်ꩻရာꩻ၊ သေဒါႏမားမဉ်ႏ၊ ဝွေꩻသီးအုံအဝ်ႏ၊ ကောင်နဝ်ꩻနွုတ်ꩻထပ်၊ သတ္တန္တရဖန်၊ ကောင်တန်အခါႏ၊ ဒေဝါနီဖြာꩻ၊ သက်ဆွာꩻကျကျ၊ စထစ်ကမ္ဘာႏ၊ စခါတယ်ႏစ၊ ချꩻလွဉ်ရီဗာႏ၊ ငဝ်းငွါလျောက်လဝ်း၊ နဝ်ꩻမꩻသိကျာꩻ၊ ရာဇာဥက္ကလ၊ တပုဿဘလ္လိက၊ အာႏရꩻဟွုန်ဟဝ်၊ စဝ်းသိကျာꩻလဲ့၊ ဟဲ့ꩻဟောင်ငဝ်းငွါ၊ ဟွုန်ဗာႏဝွေꩻသီး၊ ဖီလူꩻအိမ်ႏစရ(ဣန္ဒရ)၊ ကောဝိန္ဒလဲ့တဖြာꩻ၊ ဝင်ꩻသနီထွိုင်ႏကာ၊ မာꩻလွေꩻကောက်ကောက်၊ ထော့ꩻတွမ်ႏဗင်ထိုး၊ ကတန်ထိုငါ၊ လိုꩻတကာထင်ႏထီႏ၊ ဖီလူꩻတခြာတန်၊ ငမ်းသꩻထွိုင်ႏယား၊ နဝ်ꩻမꩻသိကျာꩻ၊ ရီဗာႏငဝ်းငွါ၊ ဣန္ဒရတွမ်ႏ၊ ကောဝိန္ဒဖီလူꩻ၊ စဝ်းသီးထီႏဖူꩻဗာႏ၊ ဘုရာꩻကကုသန်ႏတုံ၊ ကောဏဂုံက၊ ကဿပဘုရာꩻ၊ စခါဌာပနာႏ၊ သိင်္ဂုတ္တရကောင်မုဲꩻ၊ ဟဲ့ꩻလောင်ꩻလူꩻဖြား၊ နဝ်ꩻမꩻကွဲလဝ်း၊ ဩစဝ်းဗွေႏဟွေး၊ ခွေသွဉ်းလဲ့ခါ၊ ကောဝိန္ဒယာတ၊ ဖြီႏသꩻသွဉ်းသီး၊ တထီႏသေတဝ်း၊ နီသွဉ်းသီးနဝ်ꩻရာꩻ၊ မီႏထွာရေႏတွက်၊ အသက်ပဲင်ႏချာꩻ၊ တထာႏဝကမ္ဘာႏရွုမ်ꩻ၊ ကွဲကားဧဝသီ၊ ဖီလူꩻတန်ငတ်ꩻဖြာꩻ၊ အာကျူႏအသက်၊ တတွက်လꩻတဝ်း၊ အာနေဒွိုန်းက၊ ရီပါစံꩻမွိုင်၊ ခွုင်းကားဝွေꩻသီး၊ ဖီလူꩻတန်နဝ်ꩻ၊ ငဝ်းငွါလျောက်လဝ်း၊ တဖြာꩻနဝ်ꩻမော်ပီ၊ ပေါသွဲလဲ့တရဝ်း၊ တဖြာꩻနဝ်ꩻရောဟိနီ၊ သံလျင်လဲ့တဖြာꩻ၊ ဒေဝါလူꩻတန်၊ စထစ်ကမ္ဘာ၊ စခါတယ်ႏစ၊ ကောဝိန္ဒလျောက်လဝ်း၊ စဝ်းသိကျာꩻထင်ႏဟွုန်၊ ဝံꩻမျောက်ဝံꩻသာႏ၊ အာႏရꩻနစ်သက်၊ နဝ်ꩻမꩻချꩻလွဉ်၊ လူꩻတန်ငတ်ꩻဖြာꩻ၊ သိကျာꩻအငဝ်း၊ တလွိုဗွုန်ႏတဝ်းလာꩻလာꩻ၊ နဝ်ꩻမꩻလူꩻတန်၊ တနံပသုနေ၊ ဒေဝါငတ်ꩻဖြာꩻ၊ ငါးယောက်ဝွေꩻသီး၊ ဖီလူꩻယက္ခ၊ ထကျွꩻလွေꩻစူꩻ၊ ခွန်လူꩻသိကျာꩻ၊ ကာလွေꩻကောက်ကောက်၊ ဗွာဖေါင်ကလူꩻ၊ ငနူႏငနဲစ်၊ တမဲစ်ꩻတန်ဖြိုထန်ႏ၊ လူꩻငတန်ငတ်ꩻဖြာꩻ၊ ထွိုင်ႏကာထွေဝင်ꩻ၊ ထင်ႏထီႏသိကျာꩻ၊ နာꩻထွားသွော့ဝါးမင်း၊ အငင်းလဲ့ကောင်ႏ၊ ခင်ႏလောင်ꩻတကဲင်ႏ၊ တောင်းတဲင်းလိင်ꩻလွိုင်၊ လွေꩻမွိုင်မဒါႏ၊ နားဒီယန်ꩻယဲ့၊ တလဲ့တယုဲး၊ ပီနုဲးဆင်ပျꩻ၊ ထေ့ꩻထချာငါ၊ ထွိုင်ႏကာလွေꩻနဲစ်၊ တမဲစ်ꩻတန်နဝ်ꩻ၊ အဝ်ႏထန်ႏတင်ကျမ်ꩻ၊ အဝ်ႏလျမ်ႏကာႏပေါင်၊ လိုꩻဖုံႏလဲင်ꩻတွုန်ႏ၊ သိကျာꩻထင်ႏထီႏ၊ ပေႏတန်ကထိုꩻ၊ လိုꩻတကာလဲင်ꩻငမ်း၊ ဆီꩻခါꩻယံယွုန်း၊ တွမ်ႏတွုန်ႏမွုန်းတဝ်း၊ နဝ်ꩻမꩻဖျော်လွဉ်၊ အငဝ်းသင်ႏဖီးဖီး၊ ဖီလူꩻယက္ခ၊ နဝ်ꩻမꩻခွန်ဖီ၊ သိကျာꩻရီဗာႏ၊ လူꩻဖြားပသုနေ၊ သေနေမွေႏဓာတ်၊ အဇာတ်တောႏစခါ၊ ဘုရာꩻသိုမ်တွန်၊ အွဉ်ႏသေꩻဌာပနာႏ၊ အဝ်ႏဒါႏဆမုဲꩻ၊ ဟဲ့လောင်ꩻလူꩻဖြား၊ ဖီလူꩻပသုနေ၊ သွတ်ꩻခန်းမဲ့အေႏ၊ မဲ့လီးမဲ့ဗီႏ၊ ကဝီးကတောင်၊ ဟောင်ရိုꩻအွဉ်ႏဒင်ႏ၊ ထင်ႏထီႏသိကျာꩻ၊ နဝ်ꩻမꩻလျောက်လဝ်း၊ အငဝ်းတအိုႏတန်၊ ပန်နဝ်ꩻစခါ၊ ဘုရာꩻကကုသန်ႏ၊ ပွင်ꩻလွဉ်လိုꩻခမ်း၊ ဇမ္ဗူႏတီႏပါႏ၊ သွဉ်းခါကမွိုက်၊ တလွိုက်သေတဝ်း၊ ထာꩻဟဝ်ထာꩻကုဲ၊ ပီနုဲးအဝင်ꩻ၊ အင်းကားဘုရာꩻ၊ ဟောင်းမားထာꩻအံႏ၊ တပ်ꩻစွဉ်ႏဘုံꩻကြီꩻ၊ တနီꩻဟာမွူး၊ လဲင်ꩻလူးငသိုꩻ၊ လဲင်ꩻရွိုးလဲင်ꩻတရွို့ꩻ၊ တဗော့ꩻစံꩻတဝ်း၊ ဗွေႏစဝ်းဘုရာꩻ၊ ကာရွုမ်ꩻသာႏသာႏ၊ မွိုက်ငါႏတဲ့ခွေယို၊ ဗွေႏစဝ်းဘု၇ာꩻ၊ ခွေခါကမွိုက်၊ ကျိုꩻစာꩻနေးအာႏ၊ တပ်ꩻတငါလဲင်ꩻရွိုး၊ ကွိုꩻမားအီႏအံႏဗာႏ၊ အယာႏအသွီႏ၊ နီဗွေႏဟွိုက်ꩻငချာ၊ တငွါပေႏရွုမ်ꩻ၊ ခွေသွဉ်းလဲင်ꩻဘာႏ၊ ဝꩻငချာပြဉ်းခြို့ꩻ၊ သဗ္ဗညုကွဲရိုꩻ၊ နာꩻယိုမွိုက်တဲ၊ အဲဟယ်ဖီလူꩻ၊ မဲ့ခူꩻတနွာႏ၊ အင်းကားခွေဘုရာꩻ၊ နာꩻအင်းအီႏအံႏ၊ တခံႏတဝ်းယိုꩻယိုꩻ၊ ဗွိုန်ထိုဘုံႏကြီꩻ၊ နွုတ်ꩻနီꩻနွုတ်ꩻသာ၊ နဝ်ꩻခါတွန်ခံꩻ၊ အာမဘန္တေ၊ သွဉ်းလဲ့နေးဗာႏ၊ နွုတ်ꩻသာနွုတ်ꩻနီꩻ၊ သီထွူမꩻအံႏ၊ ခွေသွဉ်းလဲ့ခါ၊ ခံႏစွဉ်ႏတင်းတင်း၊ ထင်ႏခံႏထင်ႏနေး၊ အစိန္တေယျ၊ ပဉ္စသဉ်ဟား၊ တငါတမဲစ်ꩻ၊ ဖြဲစ်ꩻထန်ႏထဲ့ဟူႏ၊ သူႏတောႏအထုံꩻ၊ အုံအဝ်ႏထွားနုဲး၊ ထုဲႏပီလိုꩻဟဝ်၊ နဝ်ꩻထွူဩဗွေႏ၊ ခွေသွဉ်းပသုနေ၊ ဗွေႏဘုရာꩻဖေႏတွမ်ႏ၊ ခွဉ်းနာႏတောင်ႏဝွေꩻ၊ ထွဉ်ႏလွေꩻဌာပနာႏ၊ သိင်္ဂုတ္တရကုန်း၊ ကောင်အဖြုံႏဆူꩻဩ၊ ယက္ခပသုနေ၊ အွဉ်ႏနယ်ဖေႏထွူတဲင်၊ ဖီနိုသိကျာꩻ၊ အာႏရꩻဟွုန်ဟဝ်၊ နဝ်ꩻခါသိကျာꩻ၊ သမ်းရီဗာႏလူꩻ၊ မော်ပီဖူဖြား၊ ခါလဲ့မဲ့ဗီႏ၊ ရီႏရူႏယန်ꩻထဲ့၊ တလဲ့ဖျော်လင်ꩻ၊ တအင်သꩻအောင်၊ တောင်ꩻပြန်ႏလျောက်လဝ်း၊ စဝ်းသိကျာꩻအငါ၊ သာစွဉ်ႏဖူးဖူး၊ အစူနီပင်၊ ပွိုက်ထင်ႏငကီ၊ နီဖဲ့ꩻမဲ့ဗီႏ၊ ထုဲထီယွဲယွဲ၊ ငဝ်းငွါကွဲရိုꩻ၊ အလိုႏဆန္ဒ၊ မဉ်လꩻမဉ်နေး၊ ထာꩻမုဲꩻနဲဗွေႏ၊ ခွေသွဉ်းခါလဲ့၊ နင်းရံးပေါင်းအွိုင်၊ ထွိုင်ႏခန်းဟွုန်ကွင်၊ သဘင်ႏလိုꩻအာ၊ နဝ်ꩻမꩻသိကျာꩻ၊ ရီဗာႏငဝ်းငွါ၊ စခါမွိုးနန်း၊ ဗွန်တန်ကောဏဂုံႏ၊ ဘုံꩻတောႏအမွေႏ၊ ဝင်ꩻလွေꩻဌာပနာႏ၊ အရပ်အွိုးမုဲꩻ၊ ဟဲ့ꩻလောင်ꩻဖူခေါ၊ အွဉ်ႏဒေါ့ꩻဖေႏမွိုင်၊ ကောင်မုဲꩻဆောင်ႏမုဲꩻ၊ ခေါက်ဝုဲႏလျောက်လဝ်း၊ ဩစဝ်းသိကျာꩻ၊ ကောဏဂုံႏမွေႏဓာတ်၊ ခွေသွဉ်းမတ်တောင်ꩻ၊ အခြောင်ꩻစခါ၊ ကောဏဂုံႏကပွင်ꩻ၊ အတွင်ꩻကာလ၊ ယက္ခခွေယို၊ ရိုꩻလဲ့ကမွိုက်၊ အခွိုက်အခါႏ၊ နဝ်ꩻခါတနီꩻ၊ လွေꩻထီႏဘုရာꩻ၊ ဟောင်မားထာꩻအံႏ၊ တပ်ꩻစွဉ်ႏဘုရာꩻ၊ တနီꩻဟာမွူး၊ လဲင်ꩻရွိုးလဲင်ꩻမျောင်ꩻ၊ ကထောင်ꩻလဲင်ꩻသဲင်၊ လဲင်ꩻစဲင်သꩻဖြုံႏ၊ ကောဏဂုံႏဘု၇ာꩻ၊ ကျွꩻကာရွုမ်ꩻဗွီႏဗွီႏ၊ ခွေသွဉ်းကလောႏ၊ ဟောဟီးဟောဟား၊ ထေအာႏထွတ်ရဲင်ꩻ၊ ကလူꩻလဲင်ꩻပြုဲ၊ ယုဲꩻထီလဲင်ꩻလဲ့၊ မဲ့အေႏလဲင်ꩻထန်ႏ၊ ယန်ထိုꩻစွဉ်ႏသွိုက်သွိုက်၊ နီဗွေႏဟွိုက်ꩻငချာ၊ သကထင်ႏဝꩻ၊ တခꩻထန်ႏတဖူꩻ၊ လဲင်ꩻသီးမူꩻတစိုး၊ ဗွန်ထိုကောဏဂုံႏ၊ အုံထွိုင်ႏဟွိုက်ဆွုမ်ႏ၊ ထွန်ႏနေးတွန်ခံꩻ၊ မဟာႏတံႏတန်၊ ယံခွေကနေး၊ ဆောက်တယ်ႏတနေင်ႏ၊ ထေထဲင်းဘုရာꩻ၊ လာꩻလာꩻမခံႏ၊ သမ်းဖေႏသူလာ၊ ခါလဲ့မနေး၊ သမ်းဖေႏနွုတ်ꩻနီꩻ၊ ဖီလူꩻခွေသွဉ်း၊ နဝ်ꩻတဲင်မလွိုဗွုန်ႏ၊ ဝံꩻခံႏထူႏနေး၊ အစိန္တေယျဟွိုက်ꩻဟက်ꩻ၊ တလွိုလꩻတဝ်း၊ နဝ်ꩻမꩻလဲ့ခံႏ၊ အာမဘန္တေ၊ ထင်ႏနေးထင်ႏခံႏ၊ နဝ်ꩻမꩻဝွေꩻဗွေႏ၊ ခွေသွဉ်းအစွယ်ႏ၊ အဝ်ႏဟွဲးခန်းပြို၊ ဟူႏထိုꩻတခါႏခန်း၊ သꩻဗွာစိတ်ဖြူႏ၊ ထွားနုဲးသူႏတောႏ၊ လျော်ႏညီႏတရာꩻ၊ နဝ်ꩻမꩻလဲ့ဗွေႏ၊ ဖေႏစွဉ်ႏခွေသွဉ်း၊ ထီစဲစ်ခရဲင်ႏ၊ အီသဲင်ꩻဌာပနာႏ၊ စခါကကုသန်ႏ၊ ဌပနာႏအခြောင်ꩻ၊ ကောင်မျတ်ရွှေႏတကုန်ႏ၊ အဖြုံႏယိုထွူ၊ ယေးစူအွဉ်ႏနယ်၊ ဗွေႏတဲမန်ႏကန်ႏ၊ လူꩻတန်မောပီ၊ နယ်ဖေႏကျန၊ နဝ်ꩻမꩻသိကျာꩻ၊ အာႏရꩻနစ်သက်၊ သမ်းတက်ရီးပါ၊ လူꩻဖြားပေါသွဲ၊ ကွဲလဝ်းထင်ႏဗွေႏ၊ ယံဖေႏကျန၊ ကဿပဘုရာꩻ၊ ဌာပနာႏခင်ႏလမ်း၊ မွိုးနန်းအခြောင်ꩻ၊ မီႏတောင်ꩻမီႏသေ၊ နယ်ဖေႏမွိုင်လောင်ꩻ၊ တောက်ထံရီဗာႏ၊ သိကျာꩻအငဝ်း၊ နဝ်ꩻခါပသွဲ၊ ကွဲလဝ်းထင်ႏဗွေႏ၊ ပွိုးစွဉ်ႏဝွေꩻနဝ်ꩻ၊ မဲ့ꩻဗီႏတခြို့၊ ဒို့ꩻထွူငွဉ်ꩻထျꩻ၊ နဝ်ꩻမꩻကွဲပွိုက်ꩻ၊ ဒွုတ်ꩻခန်းမဲ့အေႏ၊ သေႏသေႏချာႏချာႏ၊ တဟေထာꩻခုံးခုံး၊ အုံလင်ꩻသိကျာꩻငါ၊ စခါကဿပ၊ ကာလပွင်ꩻပေါႏ၊ လော်လယ်ႏထာꩻခြာ၊ ဟောင်းမားဟန်ႏအို၊ မတ်နုဲးဖိုးပနား၊ ထာꩻသားအဆင်၊ ဒဲင်ခင်ႏလောႏတပ်၊ သတ်စွဉ်ႏတဲတဲ၊ ဟောဟဲသာဟွိုက်၊ ကမွိုက်ထာꩻတွင်ꩻနဝ်ꩻ၊ ဗွေႏစဝ်းဟွိုက်ꩻငချာ၊ တငွါပေႏရွုမ်ꩻ၊ ကဒိုမ်ႏလဲင်ꩻထူ၊ ဖီလူꩻခွေယို၊ တရွတ်ꩻစွဉ်ႏစွိုးနုဲး၊ ထုဲႏပီတဝ၊ ချော့ꩻဗာႏယာႏစီꩻ၊ နီဗွေႏဘုရာꩻ၊ နဝ်ꩻမꩻဖေႏတံႏ၊ ခံႏဟုဲးနာꩻယို၊ ရိုꩻဖေႏခွေသွဉ်း၊ သမ်းတခံႏတဝ်း၊ ထေင်ဆွုမ်ႏငဝ်းငွါ၊ ဘုရာꩻမေတ္တာႏ၊ နဝ်ꩻခါသမ်းနွိုင်ႏ၊ ပွိုင်ႏပွိုင်ႏကာကာ၊ ခံႏဗာႏနွယ်နီ၊ ပဉ္စငတ်ꩻပါꩻ၊ ဘုရာꩻအတံႏ၊ ထင်ႏခံႏထင်ႏနေး၊ ခွေသွဉ်းအစွယ်ႏ၊ ကစုဲအံႏဒါႏ၊ ဟာရမံႏသံႏ၊ လွင်းထန်ႏဖြဲစ်ꩻဟူႏ၊ ထွားနုဲးသူႏတောႏ၊ ပျောႏသꩻဟွုန်ဟဝ်၊ ဗွေႏစဝ်းဘုရာꩻ၊ ဗုဒ္ဓကဿပ၊ ထီႏချာမေတ္တာႏ၊ သနားအစ်လူ၊ ထူႏဖေႏခွေသွဉ်း၊ သရေꩻနုဲးထာခံꩻ၊ ထွဉ်ႏလွေꩻဌာပနာႏ၊ စခါကကုသန်ႏ၊ ဗွန်ကောဏဂုံႏ၊ အဖြုံႏယိုထွူ၊ ရတနာႏမွေႏဓာတ်၊ လွေꩻဌာပနာႏသော့ꩻရဝ်း၊ အွိုးနဝ်ꩻထွူဩ၊ မွေႏတောႏစခါ၊ သိင်္ဂုတ္တရကုန်း၊ အဖြုံႏယိုထွူနဲ၊ လွေꩻအွဉ်ႏနယ်တွိုက်တွိုက်၊ တပုဿညီနောင်၊ မင်ꩻကောင်ꩻဥက္ကလ၊ အာႏရꩻဟွုန်ဟဝ်၊ မောင်းငဝ်းလဲ့သင်ႏ၊ ပတ်ဆဲင်ꩻတွယ်ႏဖုံ၊ ထုံခါလဲ့ဒုံႏ၊ လိုꩻဖုံႏလဲ့စူႏ(ကျူႏ)၊ ဦးနယ်ꩻဒုံႏပတ်၊ ပရိသတ်ပွယ်ꩻတန်၊ အွန်အန်သာႏဓု၊ ကပျောႏလို့ခရာႏ၊ ကွဲကားထာꩻဖြား၊ ဖီလူꩻတနွာႏတန်၊ ဟတ်ဟန်သွုန်ႏသꩻ၊ နာမရောဟနီ၊ ဖီလူꩻယိုနဝ်ꩻရာꩻ၊ ဝွေꩻအီႏဌာပနာႏဗာႏ၊ နောင်ႏလာနောင်ႏငါ၊ ဘုရာꩻမိတေ၊ ဝွေꩻဗွေႏအီႏဖေႏ၊ မဲ့ခူꩻဆွဉ်ႏတဲ့၊ နဝ်ꩻလဲ့အီႏဌာပနာႏရဝ်း၊ ဗွေႏစဝ်းလစ်ꩻတွန်၊ ယိုထွူနဲဩ၊ မတ်နောဗွေႏသိကျာꩻ၊ ဘုရာꩻတကာႏတပုဿ၊ ဥက္ကလဟော်ခံꩻ၊ လူꩻတန်ငတ်ꩻဖြာꩻ၊ ငဝ်းငွါလျောက်လဝ်း၊ အွဉ်ႏဒေါ့ꩻဖြဝ်ႏဖေႏ၊ သေႏချာႏထွူမꩻ၊ ညာတအခွင်ꩻ၊ ကွီထင်သိကျာꩻ၊ ဟန်ႏလဲင်ꩻအီႏသဲင်ꩻ၊ ယွော့ဒဲင်အခင်ႏ၊ ဝင်ꩻငတ်ꩻလူꩻဖြား၊ ထွိုင်ႏကာယွယွ၊ ထွားလဲမ်ꩻချာငါ၊ ကာႏဆွဉ်ႏသုတ်ꩻသဲ့၊ မဲ့ဗီႏတလဲ့တန်၊ ယန်ꩻယဉ်ꩻထောင်တွယ်ꩻ၊ မာꩻသဲင်ꩻပွယ်ꩻဖူꩻ၊ လိုꩻလူꩻလဲင်ꩻတွုန်ႏ၊ အုံဗော့ꩻဗွုန်ႏတဝ်း၊ လူꩻတန်မောပီ၊ ဝွေꩻသီးလဲ့သဲင်ꩻ၊ လဲဉ်းတဲင်အချာ၊ စဝ်းသိကျာꩻလဲ့ဆောႏ၊ ပွယ်ꩻတောႏပရိသတ်၊ မူꩻမတ်ခွန်ကွဉ်၊ ဟော်ခံꩻဥက္ကလ၊ တပုဿညီနောင်၊ ဩောင်းဇေယျတု၊ ပျုစုတယ်ႏထောင်ႏ၊ အီႏအောင်ႏမျင်ႏထွူ၊ ယိုနဝ်ꩻတခြွိုက်၊ ထွိုက်နီဌာပနာႏ၊ သာႏဓုညီꩻဝင်ꩻ၊ ခွန်နင်ꩻသီးယာ၊ နဝ်ꩻခါလိုꩻပွယ်ꩻ၊ တွယ်ႏထုံဒုံႏမောင်း၊ ဟွိုန်းရောင်ဆားဆား၊ မာꩻမွန်းမာꩻပျောႏ၊ ပွယ်ꩻတောႏတကာႏ၊ တူရိယာႏငတ်ꩻစွိုး၊ သွိုꩻသွင်ႏပျောႏကတ်၊ ပါꩻဆဲင်ထုံမောင်း၊ နောင်ဒွေါင်ႏပီႏနယ်ꩻ၊ ငဝ်းသယ်ꩻတေချင်ꩻ၊ ပီနုဲးဟင်္သာႏ၊ သာကာတလိလံ၊ ပွယ်ꩻတန်သဘင်ႏ၊ ငဝ်းသင်ႏတလွိုးလဲ့၊ လူꩻမဲ့လိုꩻစိုမ်ꩻ၊ ဝံꩻမျောက်ဝံꩻသာႏ၊ ခွမ်ꩻလာꩻရင်းခြွိုင်း၊ ကွဉ်ထွိုင်ကꩻထပ်၊ ပျꩻဇာတ်ရုပ်သေ၊ ပီႏနယ်ꩻငဝ်းငွိုး၊ လဲင်ꩻတလွီုးစိုမ်ႏစဝ်း၊ အံလဝ်လဲ့မွေႏတောႏ၊ အနုဘောႏတံꩻခိုꩻ၊ လိုꩻပျောႏလူꩻသွိုꩻ၊ အံႏအွိုပျောႏသွင်ႏ၊ သဘင်ႏပွယ်ꩻကြီꩻ၊ ထီသဲင်ထီꩻခံꩻ၊ ထီꩻဗောႏထီꩻကျူႏ၊ အလူႏဒါႏန၊ သဗ္ဗတ္ထသဲဉ်ပွိုင်၊ တော်လွဉ်ကျောင်ꩻတောႏ၊ မော်နမ်းထီဖွိုင်ꩻ၊ ခံꩻဆွိုင်ꩻပဒေႏသာႏ၊ စီဝရာႏသင်္ကန်ꩻ၊ တံꩻခွဉ်ႏကုက္ကာႏ၊ ဟွိုန်ကောင်ထုထ၊ စူကမွန်းသွိုꩻ၊ အံႏအွိုစူကွေ၊ လက်ပွေ့လက်ပံ၊ စွိုင်ခွဉ်းစွိုင်ခယ်ႏ၊ တယ်ႏပွယ်ꩻခင်ႏလမ်း၊ မေႏပန်ꩻမေႏယူး၊ လူးဖုဲꩻမေႏပေါက်၊ စွုမ်ႏစောက်စွုမ်ႏစဲင်ႏ၊ လွေꩻသဲင်ꩻနွို့ထန်ႏ၊ ပေႏတန်မူႏခို၊ လူꩻလိုꩻကစ၊ တရတပါꩻ၊ တရျာꩻတစွိုး၊ အွန်အီးအွန်အန်၊ ပွယ်ꩻတန်ဌာပနာႏ၊ ဘုရာꩻဓာတ်တောႏ၊ ဂေါတမကလူꩻခံꩻ၊ မွိုးနန်းတွင်ꩻနဝ်ꩻ၊ တသေတဝ်းဒွုမ်၊ ဆွုမ်ႏနမ်ႏနဝ်ထင်ꩻ၊ သင်ႏစွဉ်ႏအောႏအောႏ၊ ပွယ်ꩻတောႏသဘင်ႏ၊ အဝ်ႏရင်းဟံႏယန်ꩻ၊ တနံတွမ်ႏလိုꩻ၊ ရိုꩻလဲ့အုံညီꩻ၊ ဖီလူꩻကစ၊ ထီႏလွဗာႏဝင်ꩻ၊ အတွင်ꩻကာလ၊ ရုက္ခဒေဝါ၊ အာကာသစိုꩻ၊ ဘုမ္မစိုꩻလူꩻ၊ စတုမဟာရာဇ်၊ ဝင်ꩻလစ်ꩻခွန်ဖီ၊ အွဉ်ႏဒေါ့ꩻရီဗာႏဝင်ꩻ၊ နဝ်ꩻခါသိကျာꩻ၊ ဒေဝါလူꩻလိုꩻ၊ မူႏခိုဖြားဆား၊ ထွို့ꩻထင်ႏလောရထာꩻ၊ ပျသာဒ်နွုတ်ꩻဆူႏ၊ ရွစ်ထင်ႏထာꩻပူႏနာ၊ သိင်္ဂုတ္တရကောင်၊ ထာꩻပူႏလောင်းကီ၊ ဖြီꩻစီꩻအောင်ႏမျင်ႏ၊ အွဉ်ႏဒင်ႏထွူမꩻ၊ မာဃသိကျာꩻ၊ ခန်ꩻယားလုတ်လင်၊ ဗွောင်ႏဆဲင်ꩻပသိမ်းကီႏ၊ ခူႏငရီးအွတ်ꩻ၊ မွေႏတောႏဓာတ်ခံꩻ၊ မွိုးနန်းဌာပနာႏ၊ နဝ်ꩻခါဟော်ခံꩻ၊ ခွန်တန်ရာဇာ၊ ဥက္ကလာပ၊ တပုဿ ဘလ္လိက၊ ပငါပရင်ꩻ၊ ခူႏထင်ႏငါငါ၊ ထွတ်ꩻအာႏထွတ်ရဲင်ꩻ၊ ထေထန်ႏဟံႏလီး၊ နဝ်ꩻမꩻထီႏလင်ꩻ၊ ဟံႏကင်မွေႏမျတ်၊ ဓာတ်တောႏသိုမ်တွန်၊ အွဉ်ႏသေꩻဌာပနာႏ၊ နဝ်ꩻမꩻထေထန်ႏ၊ သန်ꩻပြန်ႏနေႏရာႏ၊ သိကျာꩻအွဉ်ႏပြုံႏ၊ စူဗူႏညီꩻတွမ်ႏ၊ ဆံတော်ကလူꩻခံꩻ၊ ထီခရဲင်ꩻသရေႏနုတ်၊ ဗုဒ္ဓတောင်ႏဝွေꩻ၊ ဗွေႏစဝ်းသိကျာꩻ၊ နေႏရာႏခင်ႏလမ်း၊ ထေထန်ႏထွူမꩻ၊ ဆချာဓာတ်တောႏ၊ ကြောင်းကြဲ့ဖန်ဆင်ꩻ၊ ခင်ႏလမ်းနေႏရာႏ၊ ခွုင်းကားယော့ဖွိုꩻ၊ ဟောင်ရိုꩻဖြီႏဖြီႏ၊ လစ်ꩻဆီလစ်ꩻသောင်ꩻ၊ ဓာတ်အောင်အဖူꩻ၊ သမ်းထူႏလုံးပဲဉ်၊ စီႏခင်ႏညီႏတွာ၊ နဝ်ꩻမꩻသမ်းထူႏ၊ ကွတ်ꩻဆူႏနဝရတ်၊ ပတ္တမျာꩻသဲင်မျိုꩻ၊ စင်လိုꩻစင်လူꩻ၊ ထူႏလွဉ်ပငါပရင်ꩻ၊ ကျောက်ဖျာလုံးဆကီ၊ သမ်းစီႏလွဉ်ꩻသဲင်၊ ထဲင်းလွဉ်ꩻပတ္တမျာꩻ၊ နဝ်ꩻခါဒွုန်ဗွို၊ ဟောင်ရိုꩻတသောင်ꩻ၊ အရောင်ႏဟင်လင်း၊ ပျင်သေꩻနေႏရာႏ၊ သေႏချာႏထွူယဝ်း၊ နဝ်ꩻမꩻသိကျာꩻ၊ အီႏငပသေဓာတ်၊ မွေႏတောႏဘုရာꩻ၊ အီႏထူႏဗာႏထီ၊ သီတာႏအွိုးမုဲꩻ၊ သမ်းနန်းခုဲႏတလဲင်ႏ၊ အီႏသဲင်ꩻတွောင်ထူႏ၊ နီလူꩻအခမ်း၊ ထီနမ်းသီႏတာႏ၊ နဝ်ꩻခါရိုꩻလဲ့၊ ငမ်းတဗွန်တဝ်း၊ ထီဟဝ်ထီဒါႏ၊ နဂါꩻအခမ်း၊ နဝ်ꩻလဲ့ငမ်းထီ၊ တသေႏချာႏတဝ်း၊ နဝ်ꩻခါမီႏတွောင်၊ ထီတန်သမုဒ္ဒရာႏ၊ ထူႏဗာႏအွိုးမုဲꩻနဝ်ꩻ၊ သက္ကောဒေဝါ၊ သိကျာꩻနောင်ႏတ၊ တလꩻတဝ်းလာꩻလာꩻ၊ နဝ်ꩻမꩻဓာတ်တောႏ၊ ဟော်ꩻဖေႏငဝ်းငွါ၊ တကာႏခွန်လူꩻ၊ ထူႏတွောင်သွော့ဒွါႏ၊ ပဗ္ဗတကောင်ဖူꩻ၊ သိင်္ဂုတ္တရကောင်၊ ဆကလယိုမꩻ၊ ယံဖေႏထွတ်ꩻထန်ႏ၊ ပန္နက်တွိုင်ႏကျာꩻ၊ အီႏထန်ႏဒါႏကွိုတဝ်း၊ ဗွေႏစဝ်းမွေႏဓာတ်၊ ငဝ်းငွါဟော်ꩻဖေႏ၊ ပေႏတန်ဖြားဆား၊ အဝ်ႏနာႏအဝ်ႏဟွုန်၊ တဗꩻစွဉ်ႏတအင်၊ သာမညမွေးတဝ်း၊ ဗွေႏစဝ်းမွေႏဓာတ်၊ ပြီပျတ်ငဝ်းငွါ၊ အွဉ်ႏဒေါ့ꩻဒါႏလိုꩻငဝ်း၊ ဟွုန်ဟဝ်ဝံꩻသာႏ၊ နာလဲဉ်းအလီꩻ၊ နဝ်ꩻမꩻသိကျာꩻ၊ ပတ္ထနာႏတောင်းတ၊ ဥဒကထီဟဝ်၊ ယံဖေႏဖျော်လွဉ်၊ အီႏသွဉ်ꩻဓာတ်တောႏ၊ ဂေါတမကလူꩻခံꩻ၊ ဓိဋ္ဌာန်ႏတွိုင်ႏကျာꩻ၊ နဝ်ꩻမꩻသီတာႏ၊ တဟျာႏထန်ႏဖျော်၊ နင်ꩻဟဝ်မိဖြာꩻ၊ သိကျာꩻအမာ၊ သုဓမ္မာ သုစိတ္တာ သုနန္ဒာ သုဇာတာ၊ ဝွေꩻသီးအီလွေꩻ၊ ပါတွမ်ႏသဲင်ခံꩻ၊ ထီနမ်းသီႏတာႏ၊ မာꩻလွေꩻတွောင်ဗွုန်ႏ၊ ဗွေႏသွိုန်ဖိုးနား၊ သေႏချာႏထွူယဝ်း၊ နဝ်ꩻမꩻသီတာႏ၊ ငုတ်လင်ꩻယားဒွါႏ၊ ဘုရာꩻဆကလ၊ နဝ်ꩻမꩻသိကျာꩻ၊ ထူႏထွားသွဉ်ꩻဗွꩻ၊ ရောင်ႏခဓာတ်တောႏ၊ ချော်ꩻမော်ꩻစင်ဖြွိုး၊ လူꩻလိုꩻကထွား၊ နီနာꩻကထီႏ၊ ပီနုဲးဘုရာꩻ၊ လစ်ꩻပါꩻလစ်ꩻဆူႏ၊ ဘုံႏထူꩻအနမ်း၊ အဝ်ႏတံꩻတသီးသီး၊ ထီခရဲင်ꩻသင်္ကန်ꩻ၊ တောင်ႏဝွေꩻဆံတော်၊ အနုဘောႏတံꩻခိုꩻ၊ လူꩻလိုꩻပူႏဇောႏ၊ သာႏဓုခေါ်အွိုင်းအွိုင်း၊ နဝ်ꩻတဲင်ဗွေႏဘုရာꩻ၊ လစ်ꩻပါꩻမွေႏဓာတ်၊ မပ်မိတ်ရောင်ႏတင်ႏ၊ ကျောင်ႏထင်ႏကဝ်ဟဝ်၊ အုံအဝ်ႏဝီႏဝါး၊ တေဇောတံꩻခိုꩻ၊ လူꩻလိုꩻစွော့ꩻရောင်၊ ကျောင်ႏနဝ်ကျောင်ႏထင်ꩻ၊ တဆင်ႏပေႏယဝ်း၊ လင်ꩻအဝ်ႏယားဒွါႏ၊ နေႏရာႏဆကီ၊ ပီနုဲးတင်ႏတယ်ႏ၊ သပ္ပါယ်ႏလျောက်ပတ်၊ မီႏဓာတ်ပကတိ၊ မုနိဆံခံꩻ၊ သင်္ကန်ꩻထီခရဲင်ႏ၊ တောင်ႏဝွေꩻသဲင်ခံꩻ၊ ဓာတ်တောႏနင်းကဝ်ႏ၊ နဝ်ꩻထွူကွိုနဲ၊ ထဝ်းကဲသီးယာ၊ တဖုံႏတဉ်ဟွေး။

နဝ်ꩻမꩻသိကျာꩻ၊ ဟွုန်ဟဝ်အာႏရꩻ၊ ရာဇဟော်ခံꩻ၊ ခွန်တန်ဥက္ကလ၊ တပုဿညီနောင်၊ ယွော့ယောင်းစူꩻယာꩻ၊ ဝန္ဒနာရှိခိုး၊ ဖြောင်းရိုꩻဓိဋ္ဌာန်ႏ၊ ပန္နက်ကွိအကျိုꩻ၊ မဂ်ဖိုလ်ႏနိဗ္ဗာန်ႏ၊ ချမ်ꩻသာႏသုခ၊ နဝ်ꩻမꩻသိကျာꩻ၊ ဒေဝါခွန်လူꩻ၊ လွိုက်ထူႏခံꩻစင်၊ နတ်ခွင်ႏဒေဝါႏ၊ မဟာရနိုꩻ၊ သွဉ်ꩻဒွါႏနမ်းရုတ်၊ တကုဋေႏခံꩻဟော်၊ သွဉ်ꩻဒါႏနမ်းကဝ်ႏ၊ သွင်ꩻရဝ်းဌာပနာႏ၊ ဘုရာꩻတွိုက်တောႏ၊ ဟော်ꩻခံꩻလဲ့ခါ၊ သွဉ်ꩻဒွါႏအနမ်း၊ ခံꩻဟော်တသဲဉ်၊ ရဲဉ်ꩻထွူသေႏချာႏ၊ ဌာပနာႏသွင်ꩻရဝ်း၊ နဝ်ꩻခါတပုဿ၊ ဘလ္လိကလဲ့သွဉ်ꩻ၊ ထွဉ်ႏဒွါႏလက်သမာꩻ၊ တဖြာꩻတသဲဉ်စီႏ၊ ဝင်ꩻနီတဖူးဝေး၊ ကာယေနမ်းရုပ်၊ မြုပ်သွင်ႏဌာပနာႏ၊ နဝ်ꩻခါနင်ꩻဖီ၊ ဝွေꩻသီးလစ်ꩻဖြာꩻ၊ သုဇာတာ၊ သုနန္ဒာ၊ သုစိတ္တာ သုဓမ္မာ၊ မိဖြာꩻနင်ꩻလူꩻ၊ တွမ်ႏ(င)ခံꩻစင်၊ သွဉ်ꩻဒွါႏအနမ်း၊ ခံꩻဟော်တသဲဉ်စီႏ၊ ဝွေꩻသီးလစ်ꩻဖြာꩻ၊ ထွာခံꩻလစ်ꩻသဲဉ်၊ တဲမ်းသော့ꩻနာမ၊ ကာယနမ်းမဉ်ꩻ၊ တသဲဉ်ခံꩻဟော်၊ နဝ်ꩻလဲ့သွင်ꩻသော့ꩻ၊ တွိုက်တောႏအကို၊ လူꩻလိုꩻသီးယာ၊ သိုမ်ပါꩻကကုသန်ႏ၊ ကောဏဂုံကဿပ၊ ဂေါတမဘုရာꩻ၊ ဓာတုဓာတ်ခံꩻ၊ သွဉ်ꩻစွဉ်ႏနီပလံ၊ ခံꩻဟော်စင်စင်၊ သွင်ꩻသော့ꩻတွိုက်ဖူꩻ၊ နိုနဝ်ꩻဆကီ၊ သာရိပုတ္တရာႏ၊ မဟာမောဂ္ဂလာန်ႏ၊ သိုမ်ပါꩻအာနန္ဒာႏ၊ မဟာကဿပ၊ ပစ္စေကဗုဒ္ဓါႏ၊ သွင်ꩻဗာႏလုံးစင်၊ သွင်ꩻသော့ꩻတွိုက်ဖူꩻ၊ နိုနဝ်ꩻတကီ၊ ထွာစွဉ်ႏဟော်ခံꩻ၊ ခံꩻကဝ်ႏခံꩻဒီႏ၊ နီပလံငစင်စင်၊ သွင်ꩻသော့ꩻဌာပနာႏ၊ သာႏကီႏဝင်ႏမျိုꩻတော်၊ သုဒ္ဓေါဒန၊ တကာႏမမာႏယာႏ၊ မိဖြာꩻဂေါတမီႏ၊ သာႏကီႏဝင်ႏမျိုꩻ၊ ပိုခိုရာဟုလာႏ၊ မိဖြာꩻယသောႏ၊ လောႏသွဉ်ꩻခံꩻယာႏ၊ မာꩻလွဉ်အရုပ်၊ မြုပ်သွင်ꩻဌာပနာႏ၊ ခွုင်းကားမျိုးတော်၊ သွင်ꩻရော်ꩻလို့စင်၊ တွိုက်တန်အဖူꩻ၊ အဝ်ႏဗူႏစုစ၊ ထုထဟွိုန်ႏကောင်၊ ထာꩻအောင်တွိုက်တောႏ၊ ထာꩻကပျောႏတွင်ꩻနဝ်ꩻ၊ ထဝ်းကဲသီးယာ၊ စင်ပါꩻစင်နီ၊ တသေဒွုမ်တဝ်း၊ မွူးရဝ်ꩻမွူးဟာ၊ ပျောႏပတာကျကျ၊ သမ္ဗုဒ္ဓမွေႏတောႏ၊ ဂေါတမကလူꩻ၊ လစ်ꩻဆူႏလစ်ꩻတွန်၊ ခွန်လိုꩻခွန်လူꩻ၊ ထူꩻဆန်ꩻပျသ၊ ကာလတံꩻခိုꩻ၊ လူꩻထိုနစ်သက်၊ အာႏတက်စေတနာႏ၊ ကမ္ဘာႏဟံႏတန်၊ နီသဲဉ်လစ်ꩻမွုန်ႏ၊ တုံလုတ်တသွိုး၊ ရွစ်တိုးသဝ်မွိုင်ꩻ၊ ကွိုင်ꩻကွယ်ထပ်လိန်၊ သိင်္ဂုတ္တရတောင်၊ နောင်တန်သမုဒ္ဒရာႏ၊ တဟျာႏထွတ်ꩻဆန်ꩻ၊ ငဝ်းသန်ငဝ်းသင်ႏ၊ ကောင်ႏကင်ႏဖေါင်ႏလန်၊ ဟိမဝန္တာႏ၊ ထာꩻခြာသိုမ်ရေင်၊ သီစဲင်ႏသွစ်ꩻနား၊ သားဓုခေါ်အွဉ်၊ ထုံတန်နားရီႏ၊ ပါꩻမုဲꩻအီႏဒုံႏ၊ အုံအဝ်ႏသင်ႏဒွါႏ၊ ဌာပနာႏမွေႏဓာတ်၊ ဆန်ꩻမျတ်အတွင်ꩻ၊ ဘုရာꩻသျင်ႏတံꩻခိုꩻ၊ လူꩻလိုꩻသွင်ꩻအနမ်း၊ နေးခံꩻထူႏရွဉ်၊ အွန်အန်ထွဉ်ႏဗွောင်၊ သွင်ꩻရဝ်းဌာပနာႏ၊ တတွက်ဒါႏဒွုမ်တဝ်း၊ ဓာတ်တောႏလောင်းကီ၊ နီပလံအာဟွိုန်ႏ၊ သွဉ်ꩻရုပ်သွင်ꩻရင်း၊ ဌပနာႏသွင်ꩻရဝ်း၊ ဓာတ်တောႏအလောင်း၊ ထာꩻအောင်အကို၊ နွိုနဝ်ꩻဆကီ၊ စင်နီစင်ပါꩻ၊ ဌပနာႏဒွိုန်းက၊ နဝရတ်ကိုးပါး၊ ရတနာႏသဲင်ဟဝ်၊ ကဝ်ႏရွဉ်ကဝ်ႏခံꩻ၊ ခါလဲ့လန်လက်၊ ပါꩻမုဲꩻတွက်လꩻ၊ ထုထသင်္ချေႏ၊ ကုဋေႏကုဋာႏ၊ အုပ်ꩻထာအုပ်ꩻခံꩻ၊ ဌာပနာႏတွိုက်ကို၊ စင်လိုꩻစင်လူꩻ၊ သူႏသေဒွုမ်တဝ်း၊ လဲင်ꩻသွုန်စွဉ်ႏဟံႏ၊ တွိုက်တန်ဖြီႏဖြီႏ၊ လစ်ꩻဆီလစ်ꩻသောင်ꩻ၊ တွိုက်အောင်တခွုင်းနဝ်ꩻ၊ ဗွေဟဝ်တရေꩻရေꩻ၊ နိုသေနဝ်ꩻတကီ၊ သွင်ꩻညီꩻဒွိုန်းက၊ ပြသာဒ်နွုတ်ꩻဆူႏ၊ လူꩻလိုꩻသိကျာꩻ၊ ဒေဝါတနံ၊ ဝိသုကျုံႏနတ်သာꩻ၊ စုမ်ႏပါꩻဌာပနာႏ၊ ဘုရာꩻရွှေတကုန်ႏ၊ လဲင်ꩻသွုန်ထင်ႏဟံႏ၊ ရွဉ်ခံꩻကျူႏရိတ်၊ စွိုင်တောင်ꩻပသီႏ၊ နီလာပတ္တမျာꩻ၊ ရတနာႏသဲင်ဟုံ၊ လုံးဟဝ်အမျိုꩻ၊ ရိုꩻလဲ့တဲင်းမသိ၊ တနပ်ခိꩻဒွုမ်တဝ်း၊ တွင်ꩻနဝ်ꩻဖြီႏဖြီႏ၊ မွူးနီꩻဗုဒ္ဓဟူꩻ၊ ဥတုဂိမှန်ႏ၊ လွိုန်သီႏလာဗွေ၊ ခွပ်လွေꩻယားစခါ၊ ကမ္ဘာႏတယ်ႏစ၊ ပဌမလဲ့ခါ၊ ညာတောႏဗုဒ္ဓဟူꩻ၊ မွူးနီꩻနက္ခတ်၊ ဂြိုဟ်ႏမျတ်တကာ၊ ခါလဲ့ဗုဒ္ဓဟူꩻ၊ လူꩻလိုꩻတကာႏ၊ နဝ်ꩻမꩻတယ်ႏထင်ႏ၊ အွတ်ꩻအင်ꩻစေႏတီႏ၊ မွူးနီꩻဗုဒ္ဓ၊ ငစင်စင်ကွိုတဝ်း၊ ဗွေႏစဝ်းဘုရာꩻ၊ စေႏတီႏကောင်ႏမူꩻ၊ ထင်ႏထွူထင်ႏယတ်း၊ နဝ်ꩻမꩻဓိဋ္ဌာန်ႏ၊ ခွုမ်အင်ꩻသူႏသီ၊ ပီနုဲးခံꩻခြုံး၊ အရောင်ႏဖုံႏတင်ႏ၊ အဆင်ႏမေႏပြဝ်ꩻ၊ တွင်ꩻနဝ်ꩻကတယ်ႏစ၊ ပဌမနဝ်ꩻရာꩻ၊ စေႏတီႏတရျော်ပေႏ၊ ရေႏတွက်နွုတ်ꩻသောင်ꩻ၊ ဆအလောင်းကီ၊ ထီꩻလဲ့နွုတ်ꩻဘုံႏ၊ လုံးစုံတယ်ႏယတ်း၊ အွတ်ꩻဟံႏဆကီ၊ သမ်းစီႏအွတ်ꩻတောင်ꩻ၊ သေႏချောင်းသေႏချာႏ၊ နဝ်ꩻမꩻအွတ်ꩻရိတ်၊ အွတ်ꩻစွုန်ꩻအွတ်ꩻခံꩻ၊ တယ်ႏမံႏလဲပ်လဲ့၊ တဲပ်တဲ့သေႏချာႏ၊ နဝ်ꩻမꩻသိကျာꩻ၊ ဒေဝါခွန်လူꩻ၊ ပြွတ်ထူႏကတောင်၊ ကတူႏလောင်းပန်ꩻကုံꩻ၊ ကသုံꩻဆောင်ႏဒါႏ၊ သဒ္ဓါႏလူႏတန်ꩻ၊ ပန်ဆုꩻကွီထွာ၊ ဘုရာꩻပဉ္စဝ်း၊ နောင်ႏငါဘဝ၊ ဥက္ကလရာဇာ၊ သမ္မာသမ္ဗုဒ္ဓ၊ အစိန္တေယျဘုရာꩻ၊ နဝ်ꩻခါဝွေꩻသီး၊ ဝင်ꩻနီတဖူးဝေး၊ တပုဿညီနောင်၊ ဆုတောင်ꩻကွီထွာ၊ ဘုရꩻဆုꩻငစင်စင်၊ ဝွေꩻသီးဝင်ꩻလစ်ꩻ၊ အခေတ်ကွီထွာ၊ ဘုရာꩻဆုꩻနုဲးနုဲး၊ ဟဝ်ကုဲမူႏခို၊ လိုꩻတကာႏတင်ꩻလုဲ၊ ပါꩻမုဲꩻယာတ၊ ပငါပရင်ꩻ၊ ပတ္ထနာႏကွီဆုꩻ၊ ကောင်းမုကုသိုလ်ႏ၊ အကျိုꩻသꩻကျွိုက်၊ လွိုက်ရွေꩻပတ္ထနာႏ၊ နဝ်ꩻခါသိကျာꩻ၊ စဉ်ꩻစာꩻနန်းထာ၊ မီႏဆွာꩻမီႏည၊ နဝ်ꩻခါလိုꩻမွိုက်၊ ကျွိုက်နုဲးဝွေꩻသီး၊ အီႏယားအီႏသူႏ၊ ခွန်လူꩻဓိဋ္ဌာန်ႏ၊ ခွေပန်ႏကုံꩻယို၊ မီႏတွိုႏနဝ်ꩻခါ၊ ယံထွာလုံးခြဲက်၊ လိုꩻမွိုက်မီႏယား၊ ယံထွားဖြေ့ꩻလူး၊ ရန်ႏသူႏဝွေꩻသီး၊ အွဉ်ႏထွားတီမွေႏတောႏ၊ ဒေဝေါသိကျာꩻ၊ ပတ္ထနာႏဓိဋ္ဌာန်ႏ၊ ခွေထုံတန်ယို၊ ယံအုံပွိုးထွားတီ၊ စေႏတီႏကောင်ႏမူꩻ၊ ကုရုလွမ်ꩻလာꩻ၊ ငါးထောင်အနေင်ႏ၊ ငတ်ꩻရေင်ဗွေဗွေ၊ ယံဖေႏထွားတီ၊ ယံထွာဖီလူꩻ၊ နီဒူနီဗာႏ၊ နားရီႏထုံတန်၊ ရန်ႏသူႏမီႏအဝ်ႏ၊ အငဝ်းယံသင်ႏ၊ ယံဟွုန်တိုးတ၊ ကွဲကားရွဉ်ထာ၊ ပါꩻလူႏနီတန်ꩻ၊ ဘဏ္ဍာႏတင်ႏကနန်ႏ၊ ငမ်းသꩻလိုꩻလူꩻ၊ မူႏခိုတင်ꩻလုဲ၊ တပီနုဲးတဝ်းဝင်ꩻ၊ လိုꩻဖျင်ꩻလိုꩻဗား၊ ကောထွာလိုꩻမွိုက်၊ တလွိုကတဝ်းဟဝ်ကုဲ၊ လိုꩻဟဲလိုꩻမွိုက်၊ အံႏစုတ်အံႏစုဲႏ၊ ယားကဲရွဉ်ထာ၊ ဘုရာꩻဥစ္စာႏ၊ ရေႏစက္ချလဲဉ်းထီ၊ သိကျာꩻပသု၊ စုအွဉ်ႏငသေꩻ၊ မြေထဲဟံႏဖူꩻ၊ ကောထွာလိုꩻဟဝ်၊ မီႏမဉ်ထီႏနဝ်ꩻ၊ အွဉ်ႏနယ်ပျꩻနော၊ ကောထွာလိုꩻမွိုက်၊ တလွိုက်တဝ်းဟဝ်ကုဲ၊ ပါꩻမုဲꩻယာတ၊ မီႏဖြမီႏလွဉ်၊ ရွဉ်ယိုကွယ်ꩻမန်ႏ၊ ဟံႏဖူꩻဗဉ်ႏဗဉ်ႏ၊ ကဉ်ꩻစာꩻဓိဋ္ဌာန်ႏ၊ အွဉ်ႏပွုမ်ႏထွူမꩻ၊ မာဃသိကျာꩻ၊ အံႏဖြာႏခီႏယော်ꩻ၊ အံႏအော်ꩻပါတွမ်ႏ၊ တီႏပါႏကျွန်ꩻနဝ်၊ လိုꩻဟဝ်သူႏတောႏ၊ ကျောႏစော်ꩻလဲဉ်းဝင်ꩻ၊ တင်ꩻလုဲသူႏတကာႏ၊ နဝ်ꩻမꩻတပုဿ ဘလ္လိကညီနောင်၊ သူႏတောႏကောင်ꩻဖေႏဝင်ꩻ၊ ယံဖေႏသွင်ꩻသိုႏ၊ ထွာဗာႏလိုꩻတန်၊ ဟော်ခံꩻရာႏဇာႏ၊ ပါꩻမုဲင်ꩻခါလဲ့၊ တရန်ႏဗွုန်ႏတဝ်း၊ ဟော်ခံꩻတပုဿ၊ ထင်ကရစံႏစာꩻ၊ ယံထွာဝင်ꩻဗွေႏ၊ ဝွေꩻသီးဝင်ꩻသိုမ်၊ တွမ်ႏခွန်ဥက္ကလ၊ ရာဇမျိုꩻစဲစ်၊ အနဲစ်မွေးမန်ႏ၊ ခွန်တန်ဧကရာဇ်၊ အဖစ်ထွာဗာႏ၊ တကာႏသီးနော၊ သိကျာꩻဆောႏငသေꩻ၊ အွဉ်ႏဒေါ့ꩻဖေႏလိုꩻတကာႏ၊ သေႏချာႏထွူမꩻ၊ ထွိုင်ႏကာကျွꩻသဲင်၊ ဒေဝိန်သိကျာꩻ၊ ဗြဟ္မာႏကစ၊ နဂါꩻခွန်ရူး၊ နီလိုꩻမူႏခို၊ မိုးတငါခွုန်ꩻသဲင်ꩻ၊ သီစဲင်ႏသွစ်ꩻနား၊ တူႏရိယာႏငဝ်းအုံ၊ ချꩻပုံသိမ်ꩻမောင်း၊ နောင်းနဲင်ꩻပီႏနယ်ꩻ၊ ကကီႏသယ်ꩻမူႏ၊ ရုပ်သေꩻခြေင်ႏဇာတ်၊ ပတ်ပုံပတ်ဆဲင်၊ သူႏသဲင်လို့စင်၊ ပရင်ꩻပရာꩻ၊ လေးပါးပရိသတ်၊ ဖြတ်ꩻဖြစ်ꩻလီလာ၊ စင်ပါꩻစင်နီ၊ သီခွေကစ၊ သိင်္ဂုတ္တရကုန်း၊ ကွတ်ꩻကောင်ကွတ်ꩻထာꩻပူႏ၊ စူးစူးဆကွဉ်ႏနဝ်၊ ဝေင်ꩻဟဝ်မနိဂုံး၊ သေင်ႏလုံတနွိုင်သဉ်၊ ဆကွဉ်ႏမျက်နာႏ၊ ကွဲကားဆနဝ်၊ ဝေင်ꩻဟဝ်ဓညဝတီႏ၊ မီႏတွိုႏဆထင်ꩻ၊ မင်ꩻကြီꩻဥက္ကလ၊ ရာဇဦꩻယဉ်ႏ၊ သဉ်တွိုးသဉ်ထီ၊ ဆထင်ꩻရပ်ရာႏ၊ ကွဲကားစေႏတီႏ၊ သီစဲင်ႏသွစ်ꩻနား၊ ကသေႏချာႏလဲဉ်းဝင်ꩻ၊ တင်ႏတယ်ႏလျောက်ပတ်၊ အရပ်အရာႏ၊ မျက်နာႏဆတွို့ꩻ၊ စွို့ꩻစွို့ꩻစွဉ်ႏစွဉ်ႏ၊ ရွဉ်သားသဌေꩻဒုံ၊ နိဂုံးရွာမ၊ ကျနဒုံတန်၊ လိုꩻဖြန်ငထဝ်းသော့ꩻ၊ မော့ꩻနဝ်ꩻအစ၊ နဂရဝေင်ꩻတန်၊ ဓညဝတီႏ၊ သီစဲင်ႏသွစ်ꩻနား၊ အဝ်ႏညာꩻအဝ်ႏဗော့ꩻ၊ ထီခါႏလစ်ꩻခြောင်၊ ထန်ႏလွဉ်စေႏတီႏ၊ ပွိုးပီးနဝ်ꩻမꩻ၊ ရပ်ရာႏတုံးနဝ်ꩻ၊ ဟဝ်အံႏဖြာႏနွုတ်ꩻစွိုး၊ နွိုကားနွုတ်ꩻပွိုင်၊ ခီꩻမွမ်ꩻနဝ်ꩻရာꩻ၊ စေႏတီႏဘုံꩻတကီ၊ တဆဲထိတွမ်ႏ၊ တအိုဖြီသꩻ၊ တဟွိုဖိုလꩻတဝ်း၊ တစွိုးနဝ်ꩻရာꩻ၊ နာမနိဂုံး၊ အုံအဝ်ႏညိမ်ꩻချမ်ꩻ၊ အွꩻအံႏမီႏဗေင်ႏ၊ လွေꩻသဲင်ꩻမွန်းပျောႏ၊ ကုန်းပေါ်လောင်းကီ၊ ထာꩻတရီထာꩻခွꩻ၊ ဝခါခိန်ႏတွိုႏ၊ ရိုꩻလဲ့ပီဝင်ꩻ၊ တခြင်ꩻဗာႏတဝ်း၊ နဝ်ꩻလဲ့တစွိုး၊ တမျိုꩻနဝ်ꩻရာꩻ၊ ပဗ္ဗတကောင်လောင်း၊ ဆောင်ႏပေႏဆောင်ႏတန်၊ အာရန်းအာပူႏ၊ မူႏခိုကထွား၊ နီနာꩻကထီႏ၊ သင်းဟန်ႏတနျာႏ၊ သင်းဟန်ႏခါတသီးဟန်ႏထီဖြေင်ꩻ၊ စင်သေင်ႏစင်ဝါႏ၊ တပီဗာႏတဝ်းဝင်ꩻ၊ ဆထင်ꩻတခဝ်၊ ဆနဝ်တသွယ်ႏ၊ ဆကွဉ်တစွိုး၊ ဆတွို့ꩻတဦꩻ၊ ထာꩻဖူꩻစွိုးနဝ်ꩻ၊ ကဝ်ႏသေင်ႏကဝ်ႏကုံး၊ တဖြုံႏတစွိုးစွိုး၊ ယိုနဝ်ꩻတစွိုး၊ နဝ်ꩻနဝ်ꩻတမျိုꩻ၊ တစွိုးနဝ်ꩻရာꩻ၊ သိုမ်ပါꩻဥတု၊ သိုမ်စုဦꩻတွင်ꩻ၊ လာထပ်လာလောင်း၊ ခြောင်ထျꩻထီဆကွဉ်ႏ၊ ဗေယွဉ်ꩻဗေသွီႏ၊ တဒွီဟန်ႏနွန်း၊ ထေင်နံငဗာႏ၊ ခုံꩻဆျာႏခုံꩻအွီႏ၊ တဒွီတဲင်လုဲꩻ၊ တဝုဲꩻဒါႏတဝ်း၊ အဝ်ႏရာႏသေႏမြယ်ꩻ၊ စယ်ꩻစယ်ꩻလွမ်ꩻလာꩻ၊ နဝ်ꩻမꩻဝင်ꩻရိုꩻ၊ ဓညဝတီႏ၊ စင်နီစင်ပါꩻ၊ အံႏဖြာႏတစွိုး၊ တမျိုꩻနဝ်ꩻရာꩻ၊ ခွုင်းကားထာꩻပူႏ၊ ကောင်ႏမူꩻစေႏတီႏ၊ ကွတ်ꩻဆီကွတ်ꩻရန်း၊ ကောင်တန်ကွတ်ꩻထပ်၊ ခြပ်ခူꩻရံႏလွဉ်ꩻ၊ အသောင်လစ်ꩻပြက်၊ ဆက်ဆက်ရန်းရန်း၊ အဆင်မွူးလာ၊ ဆတရနက္ခတ်၊ ရံႏပတ်ခူခါꩻ၊ နဝ်ꩻမꩻဟဲ့ꩻလွ၊ ခရတီကောင်၊ စေႏတီႏပေါက်ꩻနဝ်ꩻရာꩻ၊ ပါꩻဒေါ့ꩻတစွိုး၊ နီဒေါ့ꩻတဟိုႏ၊ မီႏတွိုႏဆေ့ꩻအာ၊ လာလာဖြီသꩻ၊ တပီလွတဝ်းဝင်ꩻ၊ ဒေါ့ꩻထင်ꩻတစွိုး၊ ဒေါ့ꩻလင်တသွယ်၊ နဝ်ꩻလဲ့အံႏခွယ်ꩻ၊ တပါꩻနေနေ၊ တစွိုးခါနီလိုꩻ၊ မီႏတွိုႏလွေꩻဗာႏ၊ ဘုရာꩻခင်ႏထျꩻ၊ သꩻစေတနာႏ၊ သဒ္ဓါႏပေါင်ထန်ႏ၊ မဉ်လူႏတန်ꩻပူႏဇောႏ၊ သရုဲးသွုန်ႏဟန်၊ သꩻထိုꩻတစွိုး၊ လုဲမျိုꩻလင်ꩻဒွါႏ၊ ခါလဲ့အံႏဖြာႏ၊ တပါꩻကွိုတဝ်း၊ ငဝ်းငွါရိုꩻလွ၊ သီဟကောင်ခံꩻ၊ အံႏဖြာႏတစွိုး၊ ကရိုꩻနဝ်ꩻရာꩻ၊ စင်ပါꩻစင်နီ၊ ဘေꩻရန်ႏတင်မွိုင်ꩻ၊ မွိုက်ရွိုင်ꩻမန်ႏတို၊ လိုꩻဒေါသတန်၊ မန်ႏတွမ်ႏမာန၊ အွဉ်ႏလွပဋိခတ်၊ ရွစ်တဲင်ဗွေႏဘုရာꩻ၊ ဌာနရပ်ရာႏ၊ ထိုꩻမားလို့စင်၊ ထီႏဝင်ꩻမတ်နုဲး၊ ထုဲႏပီဝင်ꩻပေႏ၊ ဖူးဝေးဆွေႏမျိုꩻ၊ ဘေꩻရန်ႏထိုꩻမား၊ ထာꩻသꩻခိုးလဲ့ဖြေႏ၊ ပွိုးပီးနဝ်ꩻမꩻ၊ ပန်ꩻတကာႏသီးယာ၊ ကျိုꩻစာꩻလွေꩻလွ၊ တသက်မꩻတလဲင်ႏ၊ ရန်ႏကုန်ႏဘုရာꩻတန်၊ ယံဖူးတွေ့ဗာႏ၊ နောင်ႏလာႏမိတေ၊ ကေတုမတီႏခမ်း၊ ကံꩻကောႏမွူးထျꩻ၊ မီႏလꩻမီႏထွာ၊ ဘုရာꩻပဉ္စဝ်း၊ နဝ်ꩻငါသင်္သရာႏ၊ စင်ပါꩻစင်ခွေ၊ လွေꩻလွဉ်ꩻရဝ်းဗာႏ၊ ဘုရာꩻအချာ၊ ကွိုနဲခွန်နင်ꩻ၊ တင်ꩻလုဲသီးယာ၊ တဖုံႏတဉ်ဟွေး။

ကွဲကားကရိုꩻဒါႏ၊ ပဗ္ဗတကောင်၊ ရွှေတကုံႏနဝ်ꩻရာꩻ၊ စခါမွိုးနန်း၊ တဗင်ခင်ႏလမ်း၊ ထာꩻပူႏတန်နဝ်ꩻ၊ အဝ်ႏတွမ်ႏတဗင်တန်၊ အံႏဆင်တနီꩻတဗာႏဗာႏ၊ ခွုင်းကားဆင်ဆွတ်ꩻ၊ ထွတ်ꩻလွဉ်အွဉ်ႏပြုံႏ၊ ခြုံးခြုံးခြင်းခြင်း၊ မာꩻအီခင်ႏလမ်း၊ ထာꩻပူႏတန်လောင်း၊ ကောင်ရွှေတကုန်ႏ၊ အုံအဝ်ႏမာꩻပွီ၊ မွီးအသက်တွမ်ႏဆင်၊ တဗင်ဧရာႏ၊ ခွုင်းကားဆင်စွယ်ႏ၊ အုံအဝ်ႏမာꩻအီ၊ အပွီနဝ်ꩻရာꩻ၊ ဆေ့ꩻအာအပွုမ်ႏ၊ သွုန်စွဉ်ႏထန်ꩻမွူး၊ ထီကိုသမုဒ္ဒရာႏ၊ နဝ်ꩻခါအဝ်ႏတွမ်ႏ၊ ဆွေႏတန်ကမ္ဘာႏ၊ ထွားသွော့ကောင်တန်၊ အာႏသန်တလာ၊ ဂင်္ဂါႏထီကို၊ တစွိုးနဝ်ꩻခေါင်ꩻ၊ အာႏရောင်းအာႏရꩻ၊ ကျနကျူႏကျော၊ ခေါင်ႏတန်ခြဝ်ခြဲ့၊ လဲ့လျာဧရာႏ၊ ထွားတဗွုန်ႏဒွုမ်တဝ်း၊ တစွိုးနဝ်ꩻကောင်ကီ၊ နီစွိုးနီဖူꩻ၊ အံႏအော်ꩻကွတ်ꩻပွိုင်၊ ရွှေတကုံႏအရပ်၊ အဇာတ်စခါ၊ ကွဲကားတဗန်ႏတန်၊ အပန်စခါ၊ ဘုရာꩻကကုသန်ႏ၊ ဗွန်တန်အစိုး၊ ထာꩻပူႏရွှေတကုန်ႏ၊ အတုံးနဝ်ꩻရာꩻ၊ ထာꩻခြာတန်တောရ၊ ဟိမဝန္တာႏ၊ ထာꩻခြာကိုနဝ်ꩻ၊ အဝ်ႏတွမ်ႏသျင်ႏရသေ့ꩻ၊ အလေ့ꩻသူႏတောႏ၊ မွန်းပျောႏတွမ်ႏတရာꩻ၊ အပါꩻတဆီ၊ ဝွေꩻသီးကျင်ꩻဟဝ်၊ မော့ꩻနဝ်ꩻကျင်ꩻမျတ်၊ အရပ်ထာꩻခြာ၊ ဆီပါꩻဆီဆူႏ၊ ဓုတင်ႏကျင်ꩻဟဝ်၊ နဝ်ꩻခါအကယ်ႏ၊ ထေရ်ႏမျတ်တပါꩻ၊ နာမအမဉ်ꩻ၊ ဣသိပတ္ထနာ၊ ဆရာႏထေရ်ႏကျောႏ၊ အုံခေါ်လွဒွါႏ၊ တပါꩻတထွောင်းထွောင်း၊ ခွေါင်ဗွန်ခွေါင်ကံႏ၊ စီꩻဖျန်ရွစ်ဖတ်၊ ဝိပဿနာႏ၊ ဂန္ထဓူရ၊ နေ့ညဟာရဝ်ꩻ၊ အုံအဝ်ႏစီꩻဖျန်ꩻ၊ ကမ္မဋ္ဌာန်ꩻဘာႏဝနာႏ၊ ဆရာႏတန်ရိုꩻဖေႏ၊ ယံသေအခရာႏ၊ မွူးဟာထာꩻခေ့ꩻ၊ လေမေႏတဲစ်ꩻလွ၊ မီႏယေန်မီႏဖေ့၊ ကွဲလွေꩻထေ့ဝင်ꩻ၊ နောင်သျင်ႏသီးယာ၊ ယံဖေႏထီႏဝင်ꩻ၊ နီဆရာႏတပဲ့ꩻ၊ မဲ့ꩻတဲင်ဝေဒနာႏ၊ ရောႏဂါႏနမ်းကီ၊ မီႏဗာႏမီႏတွိုႏ၊ မွူးခေ့ꩻလဲခါ၊ မွူးဟာယာတ၊ ယံကထီႏလွဝင်ꩻ၊ မေႏတင်ႏမေႏတေန်ꩻ၊ မီႏယေန်မီႏဖေ့၊ ကွဲလွေꩻထေ့ဝင်ꩻ၊ နောသျင်ႏသီးယာ၊ အုံတဖြာꩻကောင်ကောင်၊ ထာꩻပူႏလောင်းကီ၊ ပေႏတန်ရိုꩻဖေႏ၊ သေႏချာႏထွူမꩻ၊ မညမဆွာꩻ၊ ဆရာႏတန်နဝ်ꩻသား၊ ထာꩻဆာꩻလဲ့တွိုႏ၊ ထာꩻဟွိုထင်ႏဗာႏ၊ ခိုးလျားပူလောင်၊ ဆင်ꩻရောင်းဆင်ꩻရဲꩻ၊ သဲꩻခေꩻမနော်ꩻ၊ တေဇောဓာတ်ခြဲꩻ၊ ရုဲꩻတဝျာႏဖြုံႏဖြင်း၊ ခင်ႏလမ်းအုံသူႏလွိုး၊ ထင်ႏတွိုႏမွူးဟာ၊ ဝင်ꩻထွားလွေꩻဝွေꩻ၊ ဆရာႏဗွေႏအမေႏ၊ တထီႏဒွုမ်တဝ်း၊ နဝ်ꩻခါထင်ႏတွိုႏ၊ မွူးလေမွူးထန်ႏ၊ ရဟန်ꩻရသေ့ꩻ၊ ကျွꩻထေ့လွေꩻထွား၊ ဆရာႏတန်ထေရ်ႏကျောႏ၊ သောသောဖီးထူꩻ၊ ဟိုမ်ဗူႏဆားဆား၊ နဝ်ꩻမꩻဝွေꩻသီး၊ မဲ့ထီမဲ့နောင်၊ ငွိုးရောင်ဟွိုက်ဟွိုက်၊ တွိုက်မွိုက်သွုန်ႏသꩻ၊ တချုပ်ꩻလꩻတဝ်းယိုꩻယိုꩻ၊ ငွိုးခေါက်ငွိုးဝုဲႏ၊ ငွိုးရုဲထွူမꩻ၊ လꩻသꩻသံဝွေ၊ စင်ခွေစင်ပါꩻ၊ ဆရာႏတပဲ့ꩻ၊ နဝ်ꩻမꩻလဲ့စေဝွေꩻ၊ အီလွေꩻသင်ႏခဲင်ꩻ၊ ဝဲင်ꩻရံႏသင်္ဂြိုဟ်ႏ၊ ဝေးခိုဆရာႏ၊ သေႏချာႏထွူယဝ်း၊ နဝ်ꩻမꩻသဲင်ꩻအုံ၊ သတင်ꩻသုံꩻယား၊ နေႏရာႏနင်ကဝ်ႏ၊ ဆရာႏတန်နဝ်ꩻရာꩻ၊ ကအဝ်ႏနေးခံႏ၊ ထာꩻခြာတန်နဝ်ꩻ၊ သꩻဥပါဒါန်ႏ၊ ခန္ဓာႏကသီစ၊ မနုဿတိ၊ စိရှိသꩻအဝ်ႏ၊ နမ်းကဝ်ႏကိလေႏသာႏ၊ တဏှာႏရာဂ၊ မဉ်လꩻစံႏစာꩻ၊ ပိုမာစွိုင်းနင်ꩻ၊ ကအင်းရွယ်ႏငါႏ၊ ကိလေသာႏဟွေႏ၊ မီႏတမွေးတဝ်း၊ အီႏလွေꩻထင်ႏဗာႏ၊ ဗြဟ္မာႏခမ်းကီ၊ ညိမ်ꩻတရီသာႏယာႏ၊ နဝ်ꩻခါဝွေꩻဗွေႏ၊ လွေꩻလွဉ်ꩻလꩻဗာႏ၊ ဝါႏသနာႏအလိုႏ၊ သဲင်ꩻကွုတ်သဲင်ꩻထွာ၊ ဗာရာဏသီႏ၊ ရှင်ႏပရင်ႏပိုခို၊ စက်အီႏသွိုအီႏသွင်ႏ၊ ခိုဗင်ႏဝီႏဝါး၊ အနာဦꩻယဉ်ႏ၊ ခဲဉ်ခုဲႏသမ်းပေါႏ၊ ဟဲ့ꩻလယ်မော်ယာ၊ ကလꩻဒါႏတသီႏ၊ သမာႏကြီးအင်တန်၊ ခမ်းကိုလဲင်ꩻစွစ်ꩻ၊ တချွစ်တဝ်းလာꩻလာꩻ၊ အဝ်ႏဒွါႏပကတိ၊ စဝ်းအိမ်ရှေ့မင်ꩻ၊ သညင်ꩻဖေႏနေး၊ မာꩻဖေႏလဲ့မဒါႏ၊ နဝ်ꩻမꩻခွန်ပို၊ ထင်ႏတွိုႏမွူးဟာ၊ ငဝ်းငွါဓိဋ္ဌာန်ႏ၊ တွိုင်ႏထင်ႏထာꩻဗေင်ႏမင်း၊ နင်းဟွူချမ်ꩻသာႏ၊ ဒေဝါတနံ၊ ယံဖေႏဗျာႏဒိပ်၊ နိမိတ်အွဉ်ႏနယ်၊ တွိုင်ႏတယ်ႏထင်ႏယဝ်း၊ စဝ်းအိမ်ရှေ့မင်ꩻ၊ မေ့မေ့လျော့လျော့၊ တောတွင်ꩻထာꩻခြာ၊ ကွတ်ꩻပါꩻရသေ့ꩻ၊ အွဉ်ထေ့အွဉ်ႏနယ်၊ မီႏလွေꩻကုယာ၊ မင်ꩻသာꩻပိုခို၊ အွဉ်ႏနယ်ဗေင်ႏမင်း၊ အီႏထိုꩻမားကွိုမန်ႏမန်ႏ၊ ရဟန်ꩻကွတ်ꩻပါꩻ၊ ယာယားတသီႏ၊ လီငံဟဝ်နော၊ ဟော်ခံꩻပိုခို၊ လူꩻတန်ရိုꩻဖေႏ၊ နဝ်ꩻမꩻမင်ꩻသာꩻ၊ နဝ်ꩻတဲင်ထင်ႏသေ၊ မွူးလေမွူးထန်ႏ၊ တန်ခမ်းကထိုꩻမား၊ အာႏရꩻဟွုန်ဟဝ်၊ နဝ်ꩻမꩻမင်ꩻသာꩻ၊ ရာဇာခွန်ပို၊ ထွဉ်လိုꩻရဲဉ်ꩻဖြီ၊ အီလွေꩻသင်္ဘောꩻ၊ ဖေါင်ႏတောႏနွုတ်ꩻဖြုံႏ၊ ဟိုလုံနဝါ၊ မင်ꩻသာꩻငသား၊ ရဲဉ်ꩻသော့ꩻပါတွမ်ႏ၊ ဟွမ်ဟွေးနမ်ႏသာႏ၊ ကရမိက်အနစ်၊ နံသာႏစဲစ်အကဲဉ်၊ ရဲဉ်ꩻသော့ꩻသင်္ဘောꩻ၊ ဟော်ခံꩻအပို၊ ရဲဉ်ꩻခြိုꩻထင်ႏယဝ်း၊ နဝ်ꩻမꩻဟဲ့ꩻတွမ်ႏ၊ အွဉ်စုဲႏလုတ်လင်ႏ၊ ဖုံႏဖင်ႏလိုꩻအာ၊ ပိုပါပရိသတ်၊ အာကတ်နွုတ်ꩻရေင်၊ ထန်ႏဝေင်ꩻနွို့ထီ၊ ဖြီဆိတ်သင်္ဘောꩻ၊ ဖေါင်ႏတောႏဖြီတန်၊ တောရရသေ့ꩻ၊ အလေ့ꩻခွန်ရှင်ႏ၊ ကံကျင်ꩻအုံအဝ်ႏ၊ ရွှေတကုန်ႏအရပ်၊ နွုတ်ꩻဖြံႏသင်္ဘောꩻ၊ လွေꩻတောႏလွေꩻဆွိုက်၊ အွိုက်အွိုက်လိုꩻအာ၊ နဝ်ꩻမꩻချꩻအုံ၊ ပုံသဝ်ꩻရပ်ခိုႏ၊ ထီဒွိုထီထျꩻ၊ မောင်းမထေထန်ႏ၊ နံꩻသာႏကရမိက်၊ သက်သက်သာႏသာႏ၊ ပါတွမ်ꩻလူꩻဝတ်၊ ကပ်လူႏရသေ့ꩻ၊ လေမြတ်သူႏတောႏ၊ မွေးလျောႏတွမ်ႏတရာꩻ၊ ကွတ်ꩻပါꩻခွန်သျင်ႏ၊ အောင်ႏမျင်ႏထွူယဝ်း၊ ငဝ်းငွါနုတ်ဆက်၊ တက်ရီအုံအဝ်ႏ၊ နဝ်ꩻခါရသေ့ꩻ၊ စေ့ꩻစေ့ꩻထွားထီႏ၊ ပါရမီႏပန်အွဉ်၊ ခွန်ပေႏမင်ꩻသာꩻ၊ ကွတ်ꩻပါꩻရသေ့ꩻ၊ ရှုဉာဏ်ႏထင်ႏထွား၊ အတိတ် အနာႏဂတ်၊ ဇာတ်ရီးပန်ယို၊ ပွိုးစွဉ်ႏသေငါꩻ၊ နဝ်ꩻမꩻရသေ့ꩻ၊ အလေ့ꩻခွန်သျင်ႏ၊ ရိုꩻလင်ꩻဖေႏတကာႏ၊ မင်ꩻသာꩻခွန်ပို၊ နာꩻယိုစခါ၊ ထွာဖူꩻနီဆရာႏ၊ ဣသိပတနကွိုတဝ်း၊ အဝ်ႏဝင်ꩻအကသ၊ ထေရ်ရအတန်၊ ခင်ꩻလမ်းထာꩻပူႏ၊ အွိုးဆူꩻကွိုနဲတကာႏ၊ အတွင်ꩻကာလ၊ အွဉ်ႏသꩻသစ္စာႏ၊ မွူးဟာတေန်မေႏ၊ ရေꩻရာႏထောက်နန်း၊ ပစ္စုပ္ပန်ႏလောက၊ နဝ်ꩻမꩻတဟာ၊ နာꩻမေႏလဲ့ဖေ့၊ ယေန်ယေ့သူႏပေ့ꩻ၊ အိင်ဆေ့ꩻတငါ၊ နာꩻကသီစ၊ သꩻပဲစ်မနော်ꩻ၊ ကဇော်ꩻကပ်၊ ဟော်ခံꩻရာႏဇာႏ၊ နာမဉ်မွဉ်းပျောႏ၊ သွဉ်းသယ်ႏလောက၊ ကာမကိလေႏ၊ ပန်သေꩻငတ်ꩻဗောင်၊ သံယောထာင်ကာမဘုံႏ၊ သꩻဖြုံႏစွယ်ꩻစပ်၊ မအပ်မရာ၊ ငတ်ꩻပါꩻကာမဂုံႏ၊ မသုံꩻမယ၊ နာꩻသꩻမီႏငထဝ်း၊ ကဝ်ꩻဖျင်ꩻတဏှာႏ၊ တကာႏမင်ꩻသာꩻ၊ နာꩻစံႏစာꩻဗာႏ၊ ဗြဟ္မာႏခမ်းကီ၊ ဝွေꩻသီးဗွေႏစဝ်း၊ ငဝ်းငွါဟော်ꩻဖေႏ၊ အွဉ်ႏနယ်ဖေႏတကာႏ၊ ငဝ်းငွါထိရ၊ ကျနမန်ႏကင်ꩻ၊ ဟော်ခံꩻအပို၊ ရိုꩻလဲ့အဝ်ႏနာꩻ၊ သာႏဓုဟွုန်ဟဝ်၊ ဩစဝ်းဩဗွေႏ၊ မွေးမန်ႏတဲဩ၊ ဟော်ꩻဖေႏတရာꩻ၊ မေတ္တာႏပို့သ၊ ကွဲကားသွဉ်းတကာႏ၊ အနာဦꩻယဉ်ႏ၊ တဉ်ႏတွော့ꩻအဝ်ႏခံ၊ နမ်းလောင်းကတူႏ၊ ကုယာဖြီသꩻ၊ တဆို့ꩻမာႏလꩻတဝ်း၊ နဝ်ꩻမꩻဆရာႏ၊ ငဝ်းငွါဟော်ꩻပျꩻ၊ တကာႏမင်ꩻသာꩻ၊ နာꩻယိုဥပမာႏ၊ ပါꩻကအဝ်ႏဒင်ႏ၊ ဟံႏလောင်းဟံႏကီ၊ တထီႏတဝ်းဟံႏ၊ ဟော်ခံꩻတကာႏဟွေး၊ ခွေအွဉ်ႏနယ်ဖေႏနာꩻ၊ မီႏထွာဦꩻယဉ်ꩻ၊ ယံကသျဉ်ႏနဝ်ꩻ၊ နံႏသာႏနီဖြူ၊ နာꩻမူႏအွန်အွန်၊ နာꩻနွုမ်ꩻတရီ၊ အသေ့ꩻလွစ်ဖြွꩻ၊ သီသကတူႏ၊ ဦꩻယဉ်ꩻဝွေꩻဟဲ၊ ဟုဲလုဲထိုꩻမား၊ ဆရာႏတောႏရ၊ ပဗ္ဗတခွန်သျင်ႏ၊ ဟော်နယ်ရိုꩻဖေႏ၊ ခွန်ပေႏမင်ꩻသာꩻ၊ နဝ်ꩻမꩻကွဲသူႏ၊ စန္ဒကူႏသရက္ခံ၊ နံႏသာႏနီဖြူ၊ မူအွꩻတရေ့ꩻ၊ မဲ့ဝေ့ꩻလဲင်ꩻပွင်ꩻ၊ ငွဉ်ꩻထင်ႏလဲင်ꩻထိုꩻမား၊ အနာဦꩻယဉ်ꩻ၊ ရေꩻခန်းပပျောက်၊ မျက်မောက်မျက်မျင်၊ ခတ်ချင်ꩻစင်ပြေ၊ ပျော်ကလေးလဲင်ꩻချင်ꩻ၊ အဝ်ႏရင်းထွိုင်ႏစူꩻ၊ ခွန်ပိုမင်ꩻသာꩻ၊ နဝ်ꩻမꩻခေါက်ဝုဲႏ၊ ရသေ့ꩻခွန်သျင်ႏ၊ ခင်ႏယာꩻနီပင်၊ အွဉ်ႏဒင်ႏကတူႏ၊ ဦးချထွူယဝ်း၊ နဝ်ꩻမꩻအိမ်ရှေ့၊ ဟဲ့ꩻတွမ်ႏလုတ်လင်၊ နွို့ထင်ႏထာꩻခြာ၊ ရပ်ရာႏတနွိုင်တန်၊ ရန်ႏတကုန်ႏအသောင်၊ ထောင်လယ်ႏစွစ်ꩻစဲစ်ꩻ၊ မဉ်ရွစ်မဉ်ထီႏ၊ ကောင်ကီကောင်ထျꩻ၊ နဝ်ꩻမꩻဝွေꩻသီး၊ လွေꩻထီႏမော့ꩻစွဉ်ႏ၊ တဗင်တန်အပွီ၊ အဗွေႏလဲ့ငထဝ်း၊ အုံအဝ်ႏထိုမ်ႏအံႏ၊ စာရေအဆာႏ၊ ဆချာဟော်ခံꩻ၊ လွေꩻထီႏခင်ႏလမ်း၊ စီႏခြပ်အွဉ်ႏဆင်း၊ ဆင်ဆွတ်ꩻဆင်တငါ၊ မာꩻအီအပွီ၊ ဝွေꩻအခင်ႏလမ်း၊ ပြုံႏပြင်ႏဟွိုန်ႏကောင်၊ ပီနုဲးဆောင်ႏပေႏ၊ အွဉ်ႏခြပ်အွဉ်ႏပြုံႏ၊ သွုန်စွဉ်ႏထန်ꩻမွူး၊ ဝွေꩻသီးထင်ႏထီႏ၊ ဟွုန်ဟဝ်အာႏရꩻ၊ နဝ်ꩻမꩻဆောႏဝင်ꩻ၊ ပရင်ꩻပရာꩻ၊ ကျိုꩻစာꩻတောထံႏ၊ သွင်ꩻသော့ꩻသင်္ဘောꩻ၊ တောသော့ꩻဟိုလုံ၊ ဗွေခန်းနွုတ်ꩻဖြုံႏ၊ ကိုမ်ႏလိုမ်ႏထွူယဝ်း၊ နဝ်ꩻမꩻချꩻဖေါင်ႏ၊ ထောင်ႏရွက်လင်ယန်၊ နဲစ်ဆန်ဖြယ်ကာႏ၊ မာꩻစွဉ်ႏမွိုင်မွိုင်၊ ဆွိုင်ႏဟွမ်ချင်ဗန်ႏ၊ တထီႏတန်ꩻတဝ်း၊ ဥပမာႏသေဟဝ်၊ တဆင်ႏရွုမ်ဖျော်ခန်း၊ ထီတန်ကသ၊ တွက်ဆယူဇနာ၊ ငမ်းငါႏတဗင်၊ မိင်ဆလင်ꩻတန်၊ ဟော်ခံꩻပိုခို၊ ဆင်ႏတွိုႏသီကသ၊ တနꩻလွေꩻစွဉ်ႏ၊ ဆွေႏတန်ခင်ႏကိပ်ꩻ၊ နွုတ်ꩻဖြုံႏသင်္ဘောꩻ၊ တောႏတနꩻနုဲးနုဲး၊ ဖါႏလွေꩻတခြင်ခြွꩻ၊ ဖြီသꩻဆွေႏတန်၊ တသေနာႏစံꩻတဝ်း၊ ဟဝ်ဟဝ်သာႏသာႏ၊ ဖါႏလွေꩻလဲဉ်းခန်း၊ အင်းတန်လဲဉ်းညာꩻ၊ နဝ်ꩻခါတဗင်၊ မိင်ဆလင်တန်၊ ထိုမ်ႏအံႏလယ်ႏအဆာႏ၊ မွူးဟာထင်ႏသဲင်ꩻ၊ ဖျော်တဲင်ခင်ႏလမ်း၊ သမ်းတထီႏတဝ်းဒွုမ်၊ ခင်ႏလမ်းအပွီ၊ ခွေကအွဉ်ႏပြုံႏပြင်ႏ၊ ဆင်ႏတငါအွိုးယို၊ ထွားထာꩻရာꩻလဲ့ငထဝ်း၊ အဝ်ႏကုဲရွုမ်ꩻအခြောင်ꩻ၊ ထောင်လွဉ်ꩻစူꩻထီ၊ ပီနုဲးတဖူꩻတန်၊ သꩻထန်ႏလဲင်ႏချင်ꩻ၊ အင်းကားခွေပွီ၊ ဝွေꩻယိုနဝ်ꩻရာꩻ၊ ထွာလိုꩻအမန်ႏ၊ ထေဟန်တပ်ꩻသွဉ်၊ မꩻစွဉ်ႏဖီးဖီး၊ တပီးလွဉ်ꩻလဲင်ႏချင်ꩻ၊ သထန်ႏလောႏနဲစ်၊ ထစ်စွဉ်ႏဖျော်တွိုႏ၊ နောင်ဒွိထီတန်၊ သမုဒ္ဒရာႏ၊ နွုမ်ꩻထွားအခြောင်ꩻ၊ ထောင်လွဉ်ꩻစူꩻထေ့၊ နွို့လင်ꩻထီကို၊ အားလားဝွေꩻသီး၊ ထီတငါလွေꩻ၊ စွဲဝဲတမဝ်းမဝ်း၊ နဝ်ꩻမꩻနွို့ကာႏ၊ အာႏရꩻကမွိုင်၊ ဆွိုင်ႏစွဉ်ႏခင်ႏတန်၊ ပဉ်ဆင်ႏပဉ်ခြွိုက်၊ တွိုႏလွေꩻဆွေႏတန်၊ ခင်ႏကိပ်ꩻအွဉ်ႏထွိုင်ႏ၊ ခွိုင်းဝွို့လွေꩻဗာႏ၊ ရူꩻရာꩻတချ၊ ဝွို့ဝဗာႏဆွေႏ၊ ဝွေꩻခင်ႏကိပ်ꩻတန်၊ သꩻထန်ႏလဲင်ႏချင်ꩻ၊ ထာꩻမုဲꩻကဖင်းခွေ၊ ဆွေႏတန်ရိပ်ꩻထဲ့၊ တဗင်လဲ့သီ၊ ထဲ့ခန်းနဝ်ꩻတွန်၊ သီဗွန်ခန်းယွေးယွေး၊ အသွီႏတနျာႏလင်း၊ ဂင်္ဂါႏထီတခဝ်၊ နဝ်ꩻခါခေါင်ꩻတန်၊ ဟိတ်ဟန်အာႏကြီꩻ၊ ထင်ႏထီႏတဗင်၊ တနျာႏလင်းတန်၊ ပြဉ်းပြန်းသီတအာ၊ သီဟာမတွမ်ႏ၊ တဝဲဉ်အိုမ်အဲင်ႏ၊ လဲင်ႏချင်ꩻမျောႏချာ၊ ဖျင်ပသာႏရွုမ်ꩻဖြောင်း၊ ဆျာႏရွုမ်ꩻဖြောင်းစောက်၊ လောက်ကာႏကလို့ကုဲ၊ အုဲလုံခေါင်ꩻတန်၊ သမုဒ္ဒရာႏထီကို၊ မွိုးနန်းစခါ၊ သိင်္ဂုတ္တရကုန်း၊ ထုံꩻစံꩻလွဉ်ဗာႏ၊ လင်္ကာလိတ်ဖတ်၊ ကျမ်ꩻမျတ်ဒေႏသနာႏ၊ ဆရာႏစဝ်းဗွန်ပေႏ၊ စေတီဘုံꩻကျီꩻ၊ စပ်စီႏထွတ်ထေ၊ စေးဗွာလောင်းကီ၊ စဲဉ်ႏစီႏငသေꩻ၊ ပေႏတန်ဖြားဆား၊ ကောသားမဉ်နာႏ၊ ဘုရာꩻလစ်ꩻဆူႏ၊ အွဉ်ႏသေꩻမွေႏဓာတ်၊ သမဲင်ꩻမတ်စာႏ၊ ယံနာႏယံနေး၊ စေတနာႏယံထက်၊ နီရက်မေတ္တာႏ၊ နီမာꩻငသေꩻ၊ နီပအိုႏအငဝ်း၊ ဒီဟဝ်မတ်နာႏ၊ မီႏထွာတမတ်တဝ်း၊ နဝ်ꩻရာꩻယံဖေႏ၊ ကဲ့ꩻရဲ့ꩻပုဲႏမွုန်း၊ ဗွေႏဗွန်စေတီကွိုနဲ၊ ထဝ်းကဲသီးယာ၊ တဖုံႏတဉ်ဟွေး။

ယိုလဲ့တခန်ꩻ၊ စာႏတန်ꩻလင်္ကာႏ၊ သမဲင်ꩻစာႏလိတ်၊ တံဆိတ်ရွှေတကုန်ႏ၊ တခုဲႏအုံတဝ်း၊ အဝ်ႏအာကနေ၊ သေယေဖွယ်ဖွယ်၊ သွယ်သွယ်ဝဝ၊ ချပုံမခုဲႏဒါႏ၊ စပ်တငါတောတော၊ ဖေါႏထန်ႏခြာက၊ ဝစနငဝ်းငွါ၊ ကွဲပွါꩻကွဲလုဲး၊ ကွဲခြုဲးကွဲအာ၊ ဘုရာꩻရွှေတကုန်ႏ၊ အီႏဟုံအီႏကျောႏ၊ ကုန်းပေါ်လောင်းကီ၊ ပီနုဲးခွန်မွူး၊ စန္ဒသူရိယာ၊ သာႏသနာႏငတ်ꩻရေင်၊ တွက်ဝေင်ꩻတွက်ဒုံ၊ သာႏသနာႏအုံအဝ်ႏ၊ ခွုင်းနဝ်ꩻခွုင်းယို၊ ထင်ႏခိုလင်ꩻဒွမ်၊ အီႏဟုံတွိုႏက၊ အထျꩻအထောင်ꩻ၊ ကောင်မျတ်ရွှေတကုန်ႏ၊ ဟုံဟင်ကျောႏဟိုးဟိုး၊ ဗွန်ထိုသာႏသနာႏ၊ ရပ်ရာႏတယ်ႏစ၊ အထျꩻနဝ်ꩻကောင်း၊ ဟောင်ရိုꩻသီဟိုဠ်ႏ၊ အွိုးနဝ်ꩻလာꩻလာꩻ၊ မီႏတွိုႏခွန်ဆက်၊ နွုတ်ꩻဆီသိုမ်ပါꩻ၊ သာႏသနာႏတောႏ၊ လွဉ်ပေါႏနီကျွန်ꩻ၊ သရေခေတ္တရာ၊ သာႏသနာႏအုံဝေင်ꩻ၊ အနေင်ႏငတ်ꩻရျာꩻ၊ သာႏသနာႏဟုံဟင်၊ မင်ꩻဆက်ဖြီႏဖြီႏ၊ နီဆီနွုတ်ꩻပါꩻ၊ သာႏသနာႏကလေ၊ သာမဏေႏရဟန်ꩻ၊ ဝိကန်ꩻဝိနယ်ꩻ၊ အမျတ်ဆောင်ႏအိုမ်၊ စံႏခွုမ်ဆောက်တယ်ႏ၊ ငတ်ꩻရျာꩻအကို၊ လေဟွိုးရောင်ႏတင်ႏ၊ လဲဉ်းတဲင်နဝ်ꩻရာꩻ၊ သမ်းမာꩻလင်ꩻအုံ၊ သထုံပြည်ကြီး၊ နီရျာꩻအနေင်ႏ၊ လေကထိန်ႏတောင်ႏခ၊ ရာဇမင်ꩻဆက်၊ တွက်လꩻနီဆီ၊ ထွားတီသာႏသနာႏ၊ နဝ်ꩻမꩻသမ်းဆန်ꩻ၊ ကျိုတန်နဒီ၊ ထီကျိုအဒွို၊ တွိုႏထင်ႏပေါက်ကံႏ၊ ဝေင်ꩻတန်သာႏယာႏ၊ သာႏသနာႏအုံဝေင်ꩻ၊ အနေင်ႏတရေင်၊ လေကထိန်ႏစွိုးနုဲး၊ ထုဲႏပီမွူးလာ၊ ရာဇာမင်ꩻဆက်၊ တွက်လꩻငတ်ꩻဆီ၊ လွိုတကီငတ်ꩻပါꩻ၊ သာႏသနာႏဟုံဟင်၊ နဝ်ꩻမꩻထင်ႏငခိုႏ၊ တွိုႏထင်ႏအာဝါး၊ အမရပူရ၊ ရာဇဟော်ခံꩻ၊ အံႏခမ်းပွိုင်ႏထီ၊ နီဗွေႏဘုရာꩻ၊ သာႏသနာႏအုံဝေင်ꩻ၊ အနေင်ႏသိုမ်ရျာꩻ၊ တီပါလိုꩻခမ်း၊ မွန်းနန်းကျန၊ ရာဇမင်ꩻဆက်၊ တွက်လꩻဖြီႏဖြီႏ၊ သိုမ်ဆီဗွေဗွေ၊ ရွှေထီးသခင်၊ ပြွတ်ထင်ႏသိပ်ꩻဆက်၊ ရက်ပဲင်ꩻသာႏသနာႏ၊ သိုမ်ရျာꩻထင်ႏယဝ်း၊ လဲဉ်းနဝ်သာႏသနာႏ၊ သမ်းမာꩻထင်ႏအုံ၊ ဟုံဟင်သာႏယာႏ၊ ရတနာႏသိင်္ဃကုန်း၊ ထင်ႏအုံအနေင်ႏ၊ တရေင်ဗွေဗွေ၊ ဟွမ်ဟွေးသာႏသနာႏ၊ အနေင်ႏတရျာꩻဖူꩻ၊ လူꩻပျောႏလိုꩻမွန်း၊ ခွန်ဆက်နဝ်ꩻရာꩻ၊ ငတ်ꩻပါꩻဖြီႏဖြီႏ၊ လဲဉ်းတဲင်နဝ်ꩻရာꩻ၊ ဆချာနောက်ကျ၊ တာဝဏ္ဏကောင်၊ နပ်ပေါင်ꩻလꩻညီꩻ၊ သိုမ်ဆီရာဇဝင်ႏ၊ တင်ꩻလုံအနေင်ႏ၊ နီရျာꩻဗွေဗွေ၊ သမ်းလွေꩻသမ်းထန်ႏ၊ ဝေင်ꩻတန်မန္တလေꩻ၊ ဧကရာဇ်အနွယ်ႏ၊ ခွယ်ꩻချံꩻတွက်ထူႏ၊ သူဆီနီဆက်၊ နပ်တွက်သာႏသနာႏ၊ နွုတ်ꩻရျာꩻနေနဲ၊ လဲဉ်းတဲင်နဝ်ꩻရာꩻ၊ သာႏသနာႏတောႏ၊ ထင်ႏအုံတောဝေင်ꩻ၊ ဟောင်ရိုꩻတကောင်း၊ တယ်ႏထောင်ႏဒုံဝေင်ꩻ၊ အနေင်ႏသိုမ်ရျာꩻ၊ ရာဇာခွန်ဆက်၊ မီႏတွက်မင်ꩻနွယ်ႏ၊ ကွတ်ꩻဆီငတ်ꩻပါꩻ၊ နဝ်ꩻမꩻသာႏသနာႏ၊ သမ်းမာꩻထင်ႏအုံ၊ ဝေင်ꩻဟုံကောင်တုံ၊ သာႏသနာႏအုံတရျာꩻ၊ ထာꩻလဲ့ပူႏဆာႏ၊ နဝ်ꩻမꩻတယ်ႏတော၊ ခမ်းပျောႏကောင်စင်၊ ဟုံဟင်သာႏယာႏ၊ သာႏသနာႏအုံဝေင်ꩻ၊ အနေင်ႏနီရျာꩻ၊ ရာဇာမင်ꩻဆက်၊ တွက်ထူႏလꩻညီꩻ၊ နီဆီနေနေ၊ လဲဉ်းတဲင်နဝ်ꩻရာꩻ၊ သာႏသနာႏသမ်းအုံ၊ ဝေင်ꩻလုံသောင်းချမ်း၊ လိုꩻခမ်းသာႏယာႏ၊ အနေင်ႏတရျာꩻဗွေဗွေ၊ ခွန်ဆက်သိုမ်ဆီ၊ နီဗွေႏဘုရာꩻ၊ သာႏသနာႏအုံ၊ အားလုံးပေါင်ꩻထွား၊ ငါးထောင်ငတ်ꩻရေင်၊ အနေင်ႏတခွုင်းနဝ်ꩻ၊ ထဝ်းကဲသီးယာ၊ သမဲင်ꩻစာလိတ်၊ တံꩻဆိတ်သာႏသနာႏ၊ ချာငါလယ်ႏလော်၊ ဟော်ꩻထန်ႏပျꩻနယ်၊ ဖြယ်ထန်ႏထွူယဝ်း၊ ငဝ်းငွါပအိုႏ၊ ယိုငခါသမ်းထွတ်၊ လက်ထက်တယ်ႏစ၊ အမရပူရ၊ ရတနာဗွန်သုံ၊ ခွန်ဟုံမင်ꩻဖြား၊ ရာဇာႏအပန်၊ မွန်းခန်းသာႏယာႏ၊ ရတနာႏပူရိ၊ ရာဇဟော်ခံꩻ၊ စံႏစာꩻအစိုး၊ ထောက်တိုသာႏသနာႏ၊ စာပေႏလိတ်လုဲꩻ၊ ဝိနယ်ꩻဝိကန်ႏ၊ ခွန်လွဉ်လဲ့မိင်၊ စွုမ်ႏဝေင်ꩻစွုမ်ႏခွန်၊ အွန်အန်ဖျင်ဆင်၊ ပျုပျင်ႏဘုရာꩻ၊ စေႏတီႏကောင်ႏမူꩻ၊ ပျုစုတယ်ႏထောင်ႏ၊ ခမ်းကောင်တလွာႏ၊ တောင်ႏမာႏခမ်းတလျှောက်၊ တွိုႏတပေါက်နဝ်ꩻရာꩻ၊ မျက်နာဟိုမွိုင်ꩻ၊ ဆထင်ꩻခယ်ႏခမ်း၊ လင်ꩻယမ်းသောက်သား၊ တောင်ႏမာႏခွန်မန်း၊ စဲ့ꩻတန်အွိုက်အွိုက်၊ တွိုႏဖျောဝ်တွိုက်ꩻလင်ꩻ၊ တင်တပ်ခီႏစဲ့ꩻ၊ ဟဲ့ꩻခြဝ်အငဝ်း၊ နဝ်ꩻမꩻတောင်ႏမာႏ၊ မင်ꩻဖြားရာဇာ၊ ပိုပါဟွိုန်ႏဟန်၊ ခွန်တန်ထွဉ်ႏခီႏ၊ နီသိုမ်လစ်ꩻနီꩻငါ၊ တွိုက်ꩻဟျာခꩻဆွုမ်ႏ၊ ခွန်ခယ်ႏစဲ့ꩻမ၊ ပꩻဖျောဝ်လဲင်ႏချင်ꩻ၊ တံꩻခိုꩻဟော်ခံꩻ၊ ခွန်မန်းမင်ꩻဖြား၊ ဥပမာႏမေႏတင်ႏ၊ ဖင်းဆွုမ်ႏစဲ့ꩻခယ်ႏ၊ ယွုန်းခန်းခန၊ နဝ်ꩻမꩻတွုန်းတိုꩻ၊ အာယိုးအာယိုး၊ ကော့ꩻမွိုးကော့ꩻဖါ၊ တောင်ႏမာႏကတပ်၊ အုံရပ်ဒွုမ်တဝ်း၊ ဗွေႏစဝ်းဘုရာꩻ၊ သာႏသနာႏဒါယကာႏ၊ နာတဲးဖေႏဝင်ꩻ၊ မင်ꩻဖြားခွန်တန်၊ ကနွောင်ꩻလꩻခယ်ႏနဝ်ꩻ၊ သက္ကရာဇ်လꩻထွူ၊ တရေင်တရျာꩻ၊ တဆီနီဖြုံႏ၊ နဝ်ꩻခါတလဲင်ႏ၊ စဲ့ꩻမဲင်ꩻကွတ်ꩻမျိုꩻ၊ လိုꩻစွိုꩻကွတ်ꩻဝေင်ꩻ၊ သမ်းခြေင်းတောင်ႏမာႏ၊ နာꩻထွားသွော့ဖီး၊ ပီးအွာလာꩻလာꩻ၊ တောင်ႏမာႏတွိုက်ꩻဆွုမ်ႏ၊ တနွောင်ꩻဒွုမ်တဝ်း၊ နဝ်ꩻမꩻခꩻဝင်ꩻ၊ ခင်တပ်တွိုက်ꩻဗာႏ၊ တောင်ႏမာႏခံႏနွမ်ꩻ၊ ခွန်မဲင်ꩻကရန်ႏ၊ ဝေင်ꩻတန်အာဝါး၊ အမရပူရ၊ နွောင်ꩻလꩻခန်းတလဲင်ႏ၊ မဲင်ꩻကနွောင်ꩻအာဝါး၊ သက္ကရာဇ်လꩻထွူ၊ တရေင်တရျာꩻ၊ သာလွိုသိုမ်ဆီ၊ ဖြီႏဖြီႏနဝ်ꩻခါ၊ တောင်ႏမာႏအဗွေႏ၊ အဝ်ႏခွေသꩻကို၊ ထွိုင်ႏဖျင်တပေါက်၊ အောင်ႏဇေယျတုကျောႏခေါင်ႏ၊ ပိုတထောင်တဲ့၊ စဲ့ꩻမအာကတ်၊ လက်နက်သံးဟဝ်၊ နဝ်ꩻခါတလဲင်ႏ၊ သမ်းနွောင်ꩻလꩻယား၊ စဲ့ꩻမဲင်ꩻတခြွိုက်၊ ကွတ်ꩻဝေင်ꩻကွတ်ꩻမျိုꩻ၊ ထိုꩻဝတ်လို့စင်၊ ရှင်ႏပရင်ႏဟော်ခံꩻ၊ သမ်းအံဗာႏယား၊ ရွစ်တွိုႏငခါ၊ နဝ်ꩻမꩻမင်ꩻကောင်ꩻ၊ အောင်ဇေယျကျောႏခေါင်ႏ၊ တယ်ႏထောင်ႏဖျင်ဝေင်ꩻ၊ သိင်္ဃရတနာႏ၊ တယ်ႏကသာခေါခေါ၊ သွꩻဖဝ်ႏလဲ့အာ၊ ရာဇာဟော်ခံꩻ၊ ဗွန်တန်ဘုံꩻကြီꩻ၊ နာတဲ့ဖေႏဝင်ꩻ၊ ထောက်ထံꩻသာႏသနာႏ၊ စေႏတီႏကောင်ႏမူꩻ၊ ပျုစုဖျင်ဆင်၊ မင်ꩻတရာꩻခွန်တန်၊ ဟော်ခံꩻရာႏဇာႏ၊ ခွုင်းကားကိုးဝေင်ꩻ၊ ကိုးကိန်ꩻခမ်းကောင်၊ အောင်ႏဆက်ကွပ်ဝင်ꩻ၊ သခင်ခွန်မောင်ႏ၊ အောင်ဇေယျစင်စင်၊ ဖျောဝ်ထင်ႏယိုꩻတရာꩻ၊ လွိုးကားခွန်ယိုန်ꩻ၊ ခံႏနွမ်ꩻဆက်ဝင်ꩻ၊ ဦတင်ယော်ကွ၊ ခꩻစာꩻဗာႏဝွေꩻ၊ ထွာဗွေႏထွာစဝ်း၊ မွန်းဟဝ်သာႏယာႏ၊ တွင်ꩻနဝ်ꩻကာလ၊ စခါတပန်၊ ရဟန်ꩻသင်္ဃာႏ၊ ကားကထွာပွယ်ꩻကျောင်ꩻ၊ အပေါင်ꩻသင်္ဃာႏ၊ ဝင်ꩻဗာႏကိန်ꩻတုံ၊ အာရညဝါသီ၊ ဘုံꩻကီꩻငစင်စင်၊ ရဟန်ꩻမင်ꩻတရာꩻ၊ ထွာဗာႏထေရ်ရ၊ ရဟန်ꩻအွပ်ပွိုင်ႏ၊ တင်မွိုင်သွိုꩻပျောႏ၊ တောႏတောႏတမွေးတဝ်း၊ လဲဉ်းနဝ်ꩻဟော်ခံꩻ၊ စံႏစာꩻဗာႏရွုမ်ꩻ၊ သိုမ်နေင်ႏတရေꩻရေꩻ၊ နဝ်ꩻမꩻသီခန်း၊ ခင်ႏလမ်းဆꩻချာ၊ နဝ်ꩻမꩻခီႏမျောက်၊ အပ်လင်ꩻသော့ꩻတော၊ ပွိုင်းနင်းဟော်ခံꩻ၊ စံႏစာꩻအုပ်စိုꩻ၊ ပိုခိုအိမ်ရှေ့၊ မိမိပျောႏသꩻ၊ လꩻရွုမ်ꩻသိုမ်နေင်ႏ၊ အခိန်ႏထင်ႏလꩻ၊ မရဏထာꩻသီ၊ အီလွေꩻလꩻခန်း၊ စံႏစာꩻခမ်းထီ၊ ပီနုဲးအဖါ၊ ပိတာနေနေ၊ ပြည်ရွာခမ်းထီ၊ ရွှေထီးရွှေနန်း၊ ဆုဲꩻနဝ်ꩻသမ်းအပ်၊ မင်ꩻမျတ်ညီတောႏ၊ ပွိုင်ႏသော့ꩻဟော်ခံꩻ၊ စံႏစာꩻအုပ်ချုပ်၊ အရပ်ခမ်းတန်၊ မွန်းပျောႏသာႏယာႏ၊ တောင်ႏမာႏခွန်မန်း၊ ဗွန်တန်ကျောႏဟို၊ ပွိုင်းတွိုႏပွိုင်းမဝ်ꩻ၊ ဖျောဝ်တွိုႏမွိုင်ꩻစေစ်ꩻ၊ စွစ်ꩻစဲစ်ꩻခွန်ယွန်ꩻ၊ လပွန်ကူကွဉ်ႏ၊ တွိုႏစွဉ်ႏရွစ်ဖြ၊ စန္တပိုလီ၊ ကိန်ꩻမုဲႏကိန်ꩻသဲဉ်၊ ကိန်ꩻတုံကိန်ꩻတောင်ꩻ၊ မွိုင်ꩻယောင်ႏမွိုင်ꩻယုံ၊ မုတ္တမတောင်ႏအူ၊ ပအိုႏယင်ဖြဝ်ꩻ၊ လဝ်ယဝ်ချင်ꩻရွိုင်ႏ၊ ပွိုင်ႏလို့ပွိုင်ႏစင်၊ ထီကင်ထီကတူႏ၊ ဦးချဆက်ဝင်ꩻ၊ အတွင်ꩻညီႏတောႏ၊ ဟဝ်ပျောႏဒီမွန်း၊ ကေꩻဇူꩻခွန်တန်၊ ဟဝ်ခံꩻဗွန်ကံႏ၊ ထောက်ပံ့ဘုရာꩻ၊ သာႏသနာႏကွိုတဝ်း၊ စဝ်းခွန်ခံꩻထွူ၊ ကုသိုလ်ႏမျက်မောက်၊ ပေါက်နဝ်ꩻသက္ကရာဇ်၊ တစ်နှစ်အနေင်ႏ၊ တရေင်တရျာꩻ၊ သာလွိုသိုမ်ဆီ၊ လွိုတကီကွတ်ꩻဖြုံႏ၊ ဟုံဟင်သာႏယာႏ၊ ပြည်ရွာခမ်းထီ၊ ပီနုဲးလူꩻခမ်း၊ စံႏစာꩻမွန်းပျောႏ၊ တောႏတောႏတမွေးတဝ်း၊ တွိုႏနဝ်ꩻတလဲင်ႏ၊ ခယ်ႏဗွေႏခွန်ယွန်ꩻ၊ ကဆောက်ကတဲႏ၊ မာꩻအဲႏအနမ်း၊ သမ်းထꩻသမ်းထွိုင်ႏ၊ လဝ်ယွိုင်ႏလဝ်လီ၊ ခွန်ခယ်ႏရဲဉ်ꩻစဲ့ꩻ၊ ဟဲ့ꩻဟောင်စုလိုꩻ၊ ပိုႏပါႏစဲ့ꩻမ၊ ခꩻစွဉ်ႏစိန်ပျောင်ꩻ၊ လင်ꩻတွိုက်ꩻတောင်ႏမာႏ၊ ပါကတွမ်ႏငဗန်၊ စဲ့ꩻတန်ကအာ၊ ကုဋောႏကုဋေႏ၊ ခယ်ႏဖြောင်းဆွဉ်ႏတကိမ်ꩻ၊ အဝ်ႏလိမ်ꩻဖြောင်းစဲဉ်ႏ၊ နဝ်ꩻတဲင်ခီႏလင်ꩻ၊ တသွင်ꩻအံႏတဝ်း၊ စဝ်းကီႏသံꩻဖြေင်း၊ စိန်ႏပျောင်ႏအမျောက်၊ တောက်ꩻခꩻလန်ႏဖဝ်ꩻ၊ ပီအဝ်ႏတမွာမွာ၊ အာကျာကျန၊ နဝ်ꩻမꩻခွန်မန်း၊ ဟော်ခံꩻညီႏတောႏ၊ ဆောႏစွဉ်ႏစဲ့ꩻမ၊ နꩻဗင်လက်နက်၊ တွက်ထွားခိန်ႏခါႏ၊ နားရီႏကိန်ꩻခန်ꩻ၊ ခွန်မန်းတောင်ႏမာႏ၊ ဘုရာꩻဒါယကာႏ၊ သာႏသနာႏထွားတီ၊ နေးဗွန်ဘုရာꩻ၊ တရာꩻသင်္ဃာႏ၊ ရတနာႏသိုမ်ဆူႏ၊ ထန်ႏစူꩻစဲ့ꩻခယ်ႏ၊ အဲဟယ်ဝွေꩻသီး၊ အီႏယားနီခမ်း၊ အီႏရန်ႏနီဝေင်ꩻ၊ အီႏသိမ်ꩻနီဟော်၊ ဆောႏစဲ့ꩻဆောႏမ၊ နꩻဗင်လက်နက်၊ ခွက်ဖျောဝ်ဝေင်ꩻကွဉ်၊ လောႏတွမ်ႏမေႏပတုတ်၊ အုပ်ချုပ်ထွားတီ၊ သီစဲင်ႏသွစ်ꩻနား၊ သေႏချာႏထွူမꩻ၊ ဆပါတဖဲ့ꩻ၊ စဲ့ꩻခယ်ႏလဝ်ယဝ်၊ တသွင်ꩻတဝ်းနီ၊ ဝွေꩻသီးရွုမ်ꩻဟဲ့ꩻ၊ စဲ့ꩻခယ်ႏပိုပါ၊ မာꩻလွဉ်စီႏခြပ်၊ နီရေင်ငတ်ꩻရျာꩻ၊ နဝ်ꩻခါစဲ့ꩻခယ်ႏ၊ အဲဟယ်ဝွေꩻဟဲ၊ နဲငါတရဝ်ꩻပေႏ၊ ဖေႏကလို့ခန်း၊ မန်းမဲင်စားယို၊ တပေါႏရိုꩻတဝ်း၊ ဖြဝ်ꩻလဲ့မကိုဗွုန်ႏ၊ ယွန်ꩻလဲ့မကိုလꩻ၊ အာႏရꩻအာႏရောင်း၊ သိန်းသောင်းကုဋေႏ၊ တရေꩻတွက်လꩻတဝ်း၊ နဝ်ꩻမꩻတောင်ႏမာႏ၊ အရာႏပွိုးစွဉ်ႏ၊ သာႏသနာႏအဗွန်၊ အဝ်ႏဟိုမ်းဝွေꩻသီး၊ ကတူႏကီနုဲး၊ ထုဲႏပီပန်ꩻကုံꩻ၊ စွိုးနုဲးထီꩻဗွာ၊ နဝ်ꩻမꩻဟော်ခံꩻ၊ ရွီႏထန်ႏလိုꩻကပ်၊ ဟတ်ဟန်သွုန်ႏသꩻ၊ ခꩻလဲ့မဗာႏ၊ ဟျာႏလဲ့မနွို့၊ သွို့ꩻလဲ့မကဲင်၊ နွုတ်ꩻရေင်ဗွေဗွေ၊ ရွေꩻလွိုက်လိုꩻဟဝ်၊ နဝ်ꩻမꩻအွဉ်ႏသေ၊ အပ်နေးဖေႏတွမ်ႏ၊ အုပ်ချုပ်တဖြာꩻ၊ တောင်ႏမာႏစဲ့ꩻတန်၊ ဟိုဟန်တပ်ဦꩻ၊ လွေꩻစူꩻငါရီး၊ ခီႏနယ်တငါ၊ နဝ်ꩻခါနွောင်ꩻမွေး၊ ရွေꩻတွမ်ႏဗင်တန်၊ ကန်ခင်ႏတွိုက်ꩻခꩻ၊ ဟတ်ဟေ့ꩻဟိုဟန်၊ စဲ့ꩻတန်နီပြက်ꩻ၊ လက်နက်ဖေါင်ႏလန်ႏ၊ ယံလူးလဲင်ꩻခေ့ꩻ၊ စဲ့ꩻခယ်ႏကသီ၊ တဟဝ်ထီႏဒွုမ်တဝ်း၊ အဝ်ႏခွဲအဝ်ႏခွင်၊ ဖင်းတွုန်ႏထိုꩻသဲင်ꩻ၊ ဟံႏလူးလဲင်ꩻထန်ႏ၊ မန်းကီႏသံꩻတကယ်၊ အဲဟယ်တရွစ်ꩻ၊ ထာတနွိုင်ဖုံႏဟဲ၊ အဲဟယ်သွုမ်ꩻစူꩻ၊ ခြူခြာထိုမ်ႏအဲင်ႏ၊ နꩻဆဲင်နꩻလျော်ꩻ၊ သျောဝ်းလွဉ်ဖဲ့ဆဲ့ꩻ၊ ခယ်ႏလဲ့ကငွိုး၊ အာယိုးအာယိုး၊ ကော့ꩻမွိုးကော့ꩻဖါ၊ တွုန်ႏချာသဲင်ꩻအွိုက်အွိုက်၊ တတွိုက်ꩻဗွုန်ႏဒွုမ်တဝ်း၊ ထိတ်လန်းသꩻဝꩻ၊ ဖဖီလွဝင်ꩻ၊ ဖင်းဖိန်းခေါ်ဒွါႏ၊ စင်ပါꩻစင်နီ၊ သူလီတုပ်နာ၊ သူစာတုပ်လင်ꩻ၊ ဝင်ခန်းတနတ်၊ သတ်ခန်းမေႏပါ၊ ဟျာႏခန်းအဗင်၊ ဝန်ꩻခန်းနꩻဆဲင်၊ ကဲင်ပွာႏလောက်လန်ႏ၊ ဝန်ꩻခန်းဟူပုံႏ၊ ဝုံး(ဝေါင်း)ခန်းရွဉ်လွမ်၊ ဟွမ်ဗုဲကစ၊ ချꩻခန်းဒဲဉ်ဖွိုင်ꩻ၊ ထွိုင်ႏထိုꩻငခြေင်၊ လိုꩻသဲင်ꩻလီလီ၊ ဆီပွန်းတပွန်း၊ မွန်လꩻတခွုင်းနဝ်ꩻ၊ ခွန်ဟဝ်ရာဇာ၊ မင်ꩻဖြားညီႏတောႏ၊ အနုဘောႏကထို၊ တံꩻခိုꩻကတန်၊ ဗွန်ကံႏဟဝ်မွေး၊ အံႏလဝ်ဗွေႏဘုရာꩻ၊ သာႏသနာႏဟိုမ်းကို၊ အလိုꩻစဲ့ꩻမ၊ ခါလဲ့သီဆေ့ꩻ၊ ဘုရာꩻဗွန်ဟေ့ꩻကင်း၊ သျင်ꩻလꩻဝေဒနာႏ၊ စခါတွင်ꩻနဝ်ꩻ၊ ခွန်ဟဝ်ရာဇာ၊ မင်ꩻတရာꩻဗွန်အဝ်ႏ၊ နဝ်ꩻမꩻကမ္ဘာႏ၊ ဟံႏတန်လဲင်ꩻတသွိုး၊ ငွိုးစွဉ်ႏခြွိုက်ခြွိုက်၊ ပေါက်နဝ်ꩻတလဲင်ႏ၊ ရွှေတကုန်ႏဘုရာꩻ၊ စေႏတီႏကောင်ႏမူꩻ၊ ထို့အော့ꩻပလန်၊ ဟူႏလင်ꩻခန်းဟံႏလောင်း၊ ကောင်ႏမူꩻထီꩻဟိန်ႏ၊ ပꩻဝေင်ꩻအဝ်ႏဒါ၊ ထွားတဗွုန်ႏဒွုမ်တဝ်း၊ ဗွေႏစဝ်းစေႏတီႏ၊ ထွိုင်ႏတဲင်ဖေါင်ꩻရဲစ်ꩻ၊ ကွဝ်ꩻရန်းမာꩻကီ၊ လီလာပꩻဝေင်ႏ၊ ဟိန်ႏလဲ့ပꩻလီ၊ ထီလဲ့ဖြတ်ꩻဖြစ်ꩻ၊ သက္ကရာဇ်တွင်ꩻနဝ်ꩻ၊ တရေင်တရျာꩻ၊ သာလွိသိုမ်ဆီ၊ လွိုတကီနွုတ်ꩻဖြုံႏ၊ လာနဝ်ꩻလွိုန်သီ၊ နီꩻတဆီဆန်ꩻထင်ႏ၊ ပြည်သခင်အောင်ဇေယျ၊ ရာဇပိုခို၊ ဟောင်မိုဓမ္မရာဇ်၊ ပွိုင်ႏသော့ꩻအဖါမွီႏ၊ ပါတွမ်ႏဖူးပေႏ၊ ဖူးဝေးဝင်ꩻနီ၊ ဝွေꩻသီးထွာဗာႏ၊ မင်ꩻသာꩻဒေသရာဇ်၊ မျိုꩻစဲစ်မျိုꩻမန်ႏ၊ စံႏစာꩻမွန်းပျောႏ၊ ထောက်တောႏသာႏသနာႏ၊ သာႏယာႏဟုံဟင်၊ မင်ꩻစဲစ်ဟော်ခံꩻ၊ မံႏလယ်ႏကောင်ႏမူꩻ၊ ထုထပြင်ꩻပြို့ꩻ၊ ဆောႏလယ်ႏလိုꩻခမ်း၊ ဌာပနာႏတယ်ႏဖျင်၊ တင်ႏထီꩻပျုစု၊ ကောင်းမုစေႏတီႏ၊ ထီခမ်းကိုဖူꩻ၊ ဆောႏလွတ်ကွန်ႏခွန်၊ စွုမ်ႏခမ်းစွုမ်ႏထီ၊ ဖေႏလိတ်တုတ်ꩻလယ်ႏ၊ စဝ်းဖဲစဝ်းဖါး၊ နဝ်ꩻခါရန်ႏကုန်ႏ၊ အုံအဝ်ႏစံႏစာꩻ၊ မာꩻနမ်းလိုꩻတန်၊ မြို့ဝန်သကြီꩻ၊ သီရိဥထနာ၊ ထွာဗာႏခွန်တန်၊ ဟော်ခံꩻဖေႏလိတ်၊ တံꩻဆိတ်မိန်းတောႏ၊ နဝ်ꩻမꩻဆောႏလိုꩻ၊ စဲ့ꩻကယ်ႏပိုပါ၊ ဆောႏလိုꩻခမ်းကီ၊ ယံဖေႏကျိုꩻစာꩻ၊ ဘုရာꩻရွှေတကုန်ႏ၊ လုံးစုံယံယဝ်း၊ ဟဝ်မာꩻတယ်ႏမံႏ၊ ဟော်ခံꩻမိန်းတောႏ၊ နဝ်ꩻမꩻဆောႏလိုꩻ၊ ပိုႏပါႏပရိသတ်၊ နာႏခံႏတွင်ꩻဝွန်၊ ခွန်ကွဉ်မူꩻမတ်၊ စာႏဖတ်စာႏရေꩻ၊ မတ်ပေႏမတ်တန်၊ ဝေင်ꩻထန်ႏဝေင်ꩻကို၊ လိုꩻခမ်းလိုꩻထီ၊ ထွားတီဒုံဆောင်ႏ၊ ပေါဖေါင်ႏပေါဖြား၊ အွဉ်ႏဒေါ့ꩻလို့စင်၊ ပွိုင်ႏထင်ႏဝေင်ꩻဟော်၊ ကူꩻကောကူကွန်ႏ၊ ဟဲ့ꩻလွဉ်ကင်းကယ်ႏ၊ မေႏတွိုင်ꩻစမုံ၊ သွုန်ဟိန်ပေါဖေါင်ႏ၊ စဝ်းဒုံစဝ်းလမ်း၊ တခမ်းလိုမ်းဟွုန်စွစ်ꩻ၊ တလွစ်တဝ်းတင်ဒုံ၊ ဟွုန်စွဉ်ႏဟိုးဟိုး၊ လိုꩻမျိုꩻကစ၊ ကာလတွင်ꩻနဝ်ꩻ၊ သက္ကရာဇ်အနေင်ႏ၊ တရေင်တရျာꩻ၊ သိုမ်ဆီနွုတ်ꩻဖြုံႏ၊ ခွန်ဟုံသီရိကျော်ထင်၊ ဖျင်တယ်ႏတန်ꩻတွိုင်ꩻ၊ လွိုင်ꩻမွိုတ်နွုတ်ꩻထပ်၊ ကျပ်ကျပ်ဆောႏမာꩻ၊ မွေႏဓာတ်ကောင်ႏမူꩻ၊ ကုရုလွမ်ꩻလာꩻ၊ စေႏတနာႏလဲ့တန်၊ နွို့ထန်ႏချာငါ၊ လိုꩻလဲ့သစ္စာႏအဝ်ႏ၊ ပျောႏပျောႏသွိုꩻသွိုꩻ၊ တွမ်ႏလိုꩻကအာ၊ ကုဋာကုဋေႏ၊ တသေဒွုမ်တဝ်း၊ သင်းဟန်ႏနဝ်ꩻခူႏ၊ ထာꩻပူႏထာꩻအောင်၊ ယောင်းသေင်ႏဖေႏဝါႏ၊ သော့ꩻဒွါႏကွီးထွိုင်ႏ၊ စွိုင်ခတ်ꩻကုဲႏယွား၊ မာꩻသာꩻခတ်ꩻယန်၊ ထွို့ꩻရန်းစွိုင်ကျꩻ၊ ဗꩻထင်ႏငကီ၊ သီနားလစ်ꩻဖဲ့ꩻ၊ လဲပ်လဲ့တဉ်ႏတဲင်း၊ လိုꩻဖုံႏပရိသတ်၊ ကတ်တဲမော်ဒါႏ၊ လက်သမာꩻလဲ့ကတ်၊ ခတ်သာꩻကုဲႏထင်ႏ၊ ခတ်ꩻစင်ႏထွူယဝ်း၊ နဝ်ꩻမꩻဒင်ႏအလွာႏ၊ ငဝ်းငွါသဲင်လဝ်း၊ စဝ်းခွန်မင်ꩻတရာꩻ၊ ရာဇာႏထင်ႏဟွုန်၊ တံꩻမျောက်ဝံꩻသာႏ၊ စေတနာႏပေါက်ထန်ႏ၊ ထေထန်ႏခံꩻဟဝ်၊ သွဉ်ꩻလောႏအွတ်ꩻခံꩻ၊ နီပလံထာဟဝ်၊ ဆေ့ꩻအာနဝ်ꩻရာꩻ၊ သိုမ်ရေင်နွုတ်ꩻဆီ၊ သွစ်ꩻဗီႏအွတ်ꩻခံꩻ၊ နွိုနဝ်ꩻအွတ်ꩻရွဉ်၊ အွတ်ꩻဗောႏအွတ်ꩻကျူႏ၊ မီႏထူႏနပ်ပေါင်ꩻ၊ ဟောင်ရိုꩻလꩻတတရေင်၊ တရျာꩻသူဆီ၊ ဖြီႏဖြီႏခွုင်းနဝ်ꩻ၊ စဝ်းခွန်ကတယ်ႏ၊ စေႏတီႏအကို၊ နွိုနဝ်ꩻအွတ်ꩻတောင်ꩻ၊ အွတ်ꩻရိတ်အွတ်ꩻစွိုင်၊ မွိုင်ယဉ်လန်ႏလက်၊ တတွက်လꩻတဝ်း၊ စဝ်းခွန်ဝွန်ႏဝန်ႏ၊ မတ်တန်မတ်ပေႏ၊ စာႏရေႏကင်းကဲ၊ မုသယ်ႏမုꩻထံꩻ၊ လိုꩻခမ်းလိုꩻထီ၊ အီလွဉ်သော့ꩻရဝ်း၊ နဝ်ꩻလဲ့တဲင်းမသိ၊ တနပ်နွောင်ꩻတဝ်း၊ အွတ်ꩻဟဝ်အွတ်ꩻဒါႏ၊ တိတ်ꩻထာတိတ်ꩻခံꩻ၊ နံႏသာႏလွစ်သူႏ၊ စန္ဒကူႏသရက္ခံ၊ ဟွမ်စွဉ်ႏဟွိုင်းဟွိုင်း၊ တင်မွိုင်ꩻလိုꩻအာ၊ ဆင်ꩻရဲꩻသားခွန်ကွဉ်၊ မွန်းပျောႏသာႏယာႏ၊ စေႏတနာႏလဲ့ထယ်ꩻ၊ ရက်ပဲင်ꩻကုသိုလ်ႏ၊ မူႏခိုဖြားဆား၊ ပရာꩻပရင်ꩻ၊ နဝ်ထင်ꩻတွိုꩻ့ကွဉ်ႏ၊ လွဉ်စွဉ်းအုံးအုံး၊ ရွှေတကုန်ႏထာꩻပူႏ၊ ထီဖူꩻကစ၊ သေႏချာႏယဝ်းလို့၊ ပျုစုဖျင်မာꩻ၊ နဝ်ꩻခါသူႏအင်ꩻ၊ ထင်ႏသဲင်သူႏသီ၊ စွုမ်ႏနီꩻမပျတ်၊ လက်သမာꩻလဲ့အာ၊ တဖြာꩻတစူစူ၊ တဖြာꩻတစွိုးစွိုး၊ လက်သမာꩻလိုꩻဒါႏ၊ နဝ်ꩻမꩻခွန်တန်၊ ထူႏလွိုက်ခံꩻဟဝ်၊ တဆဝ်ရောင်ႏတင်ႏ၊ စွိုးဆင်ႏမေ့ဒီႏ၊ လစ်ꩻဆီလစ်ꩻအလေꩻ၊ ခွန်တန်ဧကရာဇ်၊ အီႏတိတ်ꩻဘုရာꩻ၊ ထွန်ႏပါꩻလင်ꩻဖေႏ၊ တသေတဝ်းဆေ့ꩻအာ၊ မင်ꩻသာꩻခွန်ပို၊ ယိုနဝ်ꩻအီႏချꩻ၊ ဗုဒ္ဓစေႏတီႏ၊ ခွန်နင်ꩻသီးယာ၊ ခွုင်းကားကောင်ႏမူꩻ၊ ဖွိုႏထိုနဝ်ꩻရာꩻ၊ မီႏထွာစူသောင်ꩻ၊ ဟောင်ရိုꩻတရျာꩻ၊ သာလွိုသွစ်ꩻဆီ၊ သူသောင်တထာ၊ နာစွယ်ႏအထီꩻ၊ စထစ်ပျောဖူး၊ မာꩻစူꩻလင်ꩻဟံႏ၊ ဖွိုႏထိုတခွုင်းနဝ်ꩻ၊ ဗွေႏစဝ်းစေႏတီႏ၊ မီႏထွားခြေဖိနပ်၊ သောင်ခူနဝ်ꩻကောန်း၊ အဝ်ႏအသောင်ꩻတရေင်၊ ပုဲကလစ်ꩻရျာꩻ၊ သာလွိုလစ်ꩻဆီ၊ အဝ်ႏညီꩻတခွုင်းနဝ်ꩻ၊ ဒီဟဝ်အံႏဖြာႏ၊ ခွုင်းကားထာꩻပူႏ၊ ရွှေႏတကုန်ႏအဖုဲး၊ ပီနုဲးစွဉ်ႏဗင်၊ တယ်ႏထင်ႏလစ်ꩻဖဲ့ꩻ၊ ရမဲ့ဖုဲႏထွား၊ သာႏယာႏယွယွ၊ စတွမ်ႏဦꩻမင်ႏ၊ ပန်ꩻတင်ႏဆင်ရုပ်၊ မုခ်ငွါကစ၊ ရေတွက်လꩻတဝ်း၊ အဝ်ႏအာလွဉ်ꩻငါႏ၊ မီႏထွာခြဲမ်နေး၊ စေႏတီႏပေႏတန်၊ ခြဲမ်ခူနဝ်ꩻရာꩻ၊ သိုမ်ရျာꩻသူဆီ၊ ပုဲတွမ်ႏတခြဲမ်၊ ကောင်ႏမူꩻအရန်းလ၊ ပဌမမအရံႏ၊ သံးထင်ႏဆတကီ၊ တတိယအရံႏ၊ အဝ်ႏတံဆာကလ၊ ပထမနဝ်ꩻ၊ အဝ်ႏအဆူႏသွစ်ꩻဆီ၊ ပုဲကငတ်ꩻဆူႏ၊ ကောင်ႏမူႏစေႏတီႏရံႏ၊ သံးအဝ်ႏသိုမ်ရန်း၊ အဝ်ႏမန်ႏတခွုင်းနဝ်ꩻ၊ ကားကအဝ်ႏသမျ၊ နပ်ဆပေါင်ꩻညီꩻ၊ စေႏတီႏရံႏဆေ့ꩻအာ၊ သိုမ်ရျာꩻပုဲနီဆူႏ၊ ကောင်ႏမူꩻတန်အပေါင်ꩻ၊ အရောင်ႏတင်ႏတဆဝ်၊ အဝ်ႏစဲဉ်ႏအဝ်ႏစီႏ၊ မဲ့ထီႏလဲင်ꩻလုဲး၊ ဒေါ့ꩻခြုဲးနန်းယပ်ꩻ၊ လုတ်လက်အရောင်ႏ၊ နဝ်ထင်ꩻတွို့ꩻကွဉ်ႏ၊ ပီစွဉ်ႏအရောင်ႏ၊ ကောင်ႏမူꩻကတပ်ဝဲင်ꩻ၊ သင်ႏစွဉ်းဆားဆား၊ နဝ်ꩻခါထီꩻတန်၊ ပဌမဘုံႏ၊ အဖူꩻအဲဉ်ႏလုဲး၊ ခွယ်ꩻခြုဲးနယ်ဖေႏ၊ အဝ်ႏနေကွတ်ꩻသောင်ꩻ၊ ထီꩻလဲ့နွုတ်ꩻဘုံႏ၊ အားလုံးဖွိုႏထို၊ တဆီသွစ်ꩻလွိုလွို၊ ထိုတရျော်ကီထင်ႏ၊ ရောင်ႏတင်ႏသီးသွ၊ နဝ်ꩻမꩻဟော်ခံꩻ၊ ခွန်တန်မင်ꩻကြီꩻ၊ အီႏချꩻတိတ်ꩻခံꩻ၊ ခဉ်ႏနွောင်ꩻအနမ်း၊ ခံꩻဟဝ်ရတနာႏ၊ နဝ်ꩻရာꩻဖြီႏဖြီႏ၊ လစ်ꩻဆီပုဲတပန်ꩻ၊ နီပလံခံꩻဟဝ်၊ နဝ်ꩻမꩻလဲင်းတိတ်ꩻ၊ စထစ်ထီꩻနာ၊ မာꩻလွေꩻဖျောဝ်လင်ꩻ၊ သပိတ်ခင်ႏတန်၊ ငှက်ပျောဖူးကွိုတဝ်း၊ မန်ႏကင်ꩻနဝ်ꩻရာꩻ၊ ဆေ့ꩻအာရတနာႏ၊ ထာခံꩻဇမ္ဗူရာဇ်၊ တဆီလစ်ꩻစွဲ၊ ကွဲကားဟွိုန်းနဝ်ꩻ၊ ပေႏတန်အဝ်ႏသိုမ်ထာ၊ ပါရဝ်းတဆီ၊ ဖြီသꩻအငဝ်း၊ တသင်ႏဒါႏတဝ်းဒွုမ်၊ ဟွုန်ရွုမ်ꩻနဝ်ꩻရာꩻ၊ ဆေ့ꩻအာခွိုင်းမုဲꩻ၊ တရေင်ပုဲငတ်ꩻရျာꩻ၊ တဆီနီဖြုံႏ၊ အားလုံးဟွဲလို့၊ ထုထဟွိုင်အာ၊ စေႏတီႏလောင်းကီ၊ လစ်ꩻငတ်ꩻသူရန်း၊ ဟိန်ႏခံꩻဟိန်ႏရွဉ်၊ ဟိန်ႏထာဟိန်ႏတောင်ꩻ၊ ညောင်ရွက်ကဝီ၊ တလီꩻကမာꩻ၊ သာႏယာႏတလွိုးလဲ့၊ တလီꩻတမာꩻတဝ်းတဲ့၊ အငဝ်းသင်ႏဒွါႏ၊ ပျသာဒ်နွုတ်ꩻဆောင်၊ ပီနုဲးကောင်ခံꩻ၊ ခွန်တန်မင်ꩻကြီꩻ၊ စီႏရင်ႏထင်ႏယဝ်း၊ ဗွေႏစဝ်းသျင်ႏပရင်ႏ၊ ဘိသိက်မင်္ဂလာႏ၊ ဘုရာꩻထီꩻတန်၊ ဟဲ့ꩻလွဉ်ဝွန်ႏဝန်ꩻ၊ မတ်တန်မတ်ပေႏ၊ စာႏရေꩻသီးယာ၊ လိုꩻအာပရိသတ်၊ မင်ꩻမျတ်မိန်းဖေႏ၊ နေးတွမ်ႏဖြီတန်၊ ဖြီခံꩻသိုမ်ဖြုံႏ၊ ခွန်ဟုံအီႏလင်ꩻ၊ ပင်ႏလယ်ႏထီကို၊ ရိုꩻဖေႏမူꩻမတ်၊ ပရိသတ်လိုꩻအာ၊ နဝ်ꩻမꩻထူႏထီꩻ၊ တိတ်ꩻတသီးတွမ်ႏခံꩻ၊ နွုတ်ꩻဆင်ႏနွုတ်ꩻဘုံႏ၊ လုံးစုံအွဉ်ႏဒင်ႏ၊ ဖြီတန်သိုမ်ဖြုံႏ၊ တွယ်ႏထုံဒုံႏမောင်း၊ နောင်ႏနေင်ပီႏနယ်ꩻ၊ ပဉ္စတူရိယာႏ၊ မာꩻပွယ်ꩻထီကို၊ ခြွိုင်းခြိုꩻခွမ်ꩻလာꩻ၊ တံဆာဘယက်၊ ဟွမ်ကွန်မွိုးနန်း၊ ထေထန်ႏရင်းခြွိုင်း၊ ခွန်မွိုင်းရာဇာ၊ မင်ꩻသာꩻခွန်ပို၊ ခိုႏခိုႏဒွမ်ဒွမ်၊ ထိုမ်းတွမ်ႏဖြီခံꩻ၊ ကိုႏရံႏအွဉ်ႏစဲ၊ လက်ဝဲလက်ယာ၊ ခါလဲ့ထိုမ်းဖြီ၊ မီဖြာꩻကစ၊ မောင်းမမိဿံ၊ ရွလွဉ်အွိုင်းအွိုင်း၊ သဘင်ႏပွယ်ꩻကို၊ ခိုႏခိုႏဒွမ်ဒွမ်၊ ဒင်ႏတွမ်ႏဘုရာꩻထီꩻ၊ ကောင်ကီခါလဲ့၊ ထွားမဲ့လဲင်ꩻကွင်၊ အဆင်ဖီးအွာ၊ စင်ပါꩻစင်နီ၊ ကောင်ကီထီဖူꩻ၊ မူႏမူႏခိုခို၊ မွန်းသွိုꩻပျောႏသွင်ႏ၊ မင်္ဂလာႏထီꩻခံꩻ၊ ပွယ်ꩻတန်နွုတ်ꩻနီꩻ၊ ပီနုဲးလူꩻခမ်း၊ တနံအဝေင်ꩻ၊ ဝတိံႏသာႏပွယ်ꩻ၊ ခွဲကျုံႏခိန်ႏခါႏ၊ လာနဝ်ꩻလွိုန်သီႏ၊ တဆီငတ်ꩻသာ၊ ညာႏတောႏဗုဒ္ဓဟူꩻ၊ လူꩻပျောႏလိုꩻမွန်း၊ ခွန်တန်ရာဇာ၊ မင်္ဂလာႏဘိသိက်၊ ထီꩻသဲင်ထီꩻခံꩻ၊ ပွယ်ꩻလံꩻသဘင်ႏ၊ ကတင်ႏထီꩻစခါ၊ ညာႏတောႏဗုဒ္ဓဟူꩻပြည့်၊ ဘုရာꩻရွှေႏတကုန်ႏ၊ လုံးစုံယတ်းလို့၊ အောင်ဇေယျတုအခန်ꩻ၊ နိဋ္ဌိတံထွူကွိုနဲ၊ ထဝ်းကဲသီးယာ၊ လိုꩻအာဗွေႏဩ၊ သာႏဓု----သာႏဓု----သာႏဓု----။

မတ်နာႏခြာက၊ ကောင်ထျꩻရန်ႏတကုန်ႏ၊ တန်ꩻတွိုင်ꩻသိုမ်ရန်း၊ အထန်ႏအကို၊ ကရိုꩻနဝ်ꩻရာꩻ၊ ထာꩻရုပ်စွုမ်ႏစီႏ၊ တယ်ႏသေꩻစခါ၊ ဒေဝါလူꩻရုတ်၊ တကုတ်ကုတ်အဝ်ႏအုံ၊ ခွုင်းကားဘုရာꩻ၊ မျက်နာႏလစ်ꩻစဲင်ႏ၊ အစဲင်ႏကွဉ်ႏထင်ꩻ၊ မာꩻလင်ꩻဆနဝ်၊ ခွန်ဟဝ်မင်ꩻသာꩻ၊ စခါတယ်ႏသေꩻ၊ ဖီလူꩻတချာꩻတန်၊ ယံဖေႏအုံပွိုး(ပွေါး)၊ ဓိဋ္ဌာန်ႏငသေꩻ၊ ဒေဝါလူꩻရုတ်၊ အုံပွိုးတွိုက်ဘုရာꩻ၊ ဆီꩻခါꩻအဝ်ႏရဲ၊ တယ်ႏငသေꩻတငေါင်းငေါင်း၊ စောင်ꩻတန်ꩻအမော့၊ ကွဉ်ႏထင်ꩻနဝ်ꩻရာꩻ၊ မာꩻတယ်ႏငသေꩻ၊ တပုဿဘလ္လိက၊ ပါတွမ်ႏခွန်ဖီ၊ ဝွေꩻသီးအရုတ်၊ တယ်ႏအွတ်ꩻသူႏအင်ꩻ၊ ကွဉ်ႏထင်ꩻကွိုတဝ်း၊ နဝ်ꩻခါစောင်ꩻတန်ꩻ၊ အရန်းဆကလ၊ မျက်နာႏဆကွဉ်ႏ၊ စောင်ꩻတန်ꩻအသောင်၊ ဖီလူꩻတကောင်ႏတန်၊ မာꩻတယ်ႏအရုတ်၊ အုံပွိုးဆကွဉ်ႏ၊ ကွဲကားစောင်ꩻတန်ꩻ၊ ဆထင်ꩻနဝ်ꩻရာꩻ၊ မာꩻငသေꩻလူꩻသထုံႏ၊ အုံပွိုးဘုရာꩻ၊ နဝ်ꩻခါဆတွို့ꩻ၊ လူꩻနွို့လိုꩻထန်ႏ၊ ကျောင်ꩻတန်မျက်နာႏ၊ ဆတွို့ꩻအရပ်၊ တယ်ႏခပ်(ခြပ်)ငသေꩻ၊ ဒေဝါလူꩻမင်ꩻ၊ ရိုင်ꩻရင်ꩻရင်းစား၊ အုံပွိုးဆတွို့ꩻ၊ လူꩻလိုꩻနွို့ထန်ႏ၊ ကျောင်ꩻတန်မျက်နာႏ၊ ကွဲကားဆနဝ်၊ ကရိုꩻနဝ်ꩻရာꩻ၊ မာꩻငသေꩻချင်္သေ့ꩻ၊ စတွမ်ႏဖီလူꩻမော်ပီကွိုတဝ်း၊ အဝ်ႏစီဝက္က၊ စခါဆေ့သမ္မာႏ၊ ကျောက်ဖျာႏပဲဉ်လုံး၊ အုံလင်ꩻခြွတ်ꩻတသီႏ၊ ဖြီꩻပျတ်သေႏချာႏ၊ တမျက်နာႏနဝ်ꩻရာꩻ၊ ခယ်ႏဖြားအရုတ်၊ တကုတ်ပီနုဲး၊ ထုဲႏပီအီႏငွိုး၊ စွိုးနုဲးအီႏထွိုင်ႏ၊ မွိုက်ရွိုင်ꩻစောကာꩻ၊ ကျံႏယားဓာတ်တောႏ၊ ကောတမကေသာ၊ သိကျာꩻဟွိုက်ꩻဆွုမ်ႏ၊ ထွာဗွန်ခန်းလုံး၊ ရန်ႏတကုန်ႏကောင်နာ၊ ဗွေႏဘုရာꩻတလင်ꩻ၊ လဝ်ယင်ခယ်ႏဖြား၊ အဝ်ႏတွိုႏငခါ၊ ယိုကွိုနဲလောင်ꩻ၊ ကောင်ႏမူꩻဘုရာꩻ၊ ကေသာဆံတောႏ၊ မွေးလျောႏခင်ႏလမ်း၊ အံႏဖြာႏကွတ်ꩻပွိုင်၊ တဲက်တွိုင်ꩻလꩻတဝ်း၊ ဗွေႏစဝ်းတံꩻခိုꩻ၊ ကရိုꩻနဝ်ꩻရာꩻ၊ ဘုရာꩻအယောင်ꩻ၊ တလဲဉ်းလꩻတဝ်း၊ ယိုလဲ့တပွိုင်၊ တထွိုင်း(ထွောင်း)နဝ်ꩻရာꩻ၊ စေႏတီႏအရံႏ၊ အဝ်ႏသဲပ်ꩻအာငါႏ၊ တရေꩻတွက်ဒါႏတဝ်း၊ နဝ်ꩻလဲ့တစွိုး၊ မီႏတွိုႏတပါꩻ၊ ဘုရာꩻစေႏတီႏ၊ ပွိုးစွဉ်ႏမဲ့ကွန်၊ ပီနုဲးဗင်ႏဖြော့၊ ဗာႏမုဲꩻဒေါ့ꩻလဲ့၊ တရေင်တရင်အာငါႏ၊ ခါလဲ့တစွိုး၊ မီႏတွိုႏတပါꩻ၊ ဘုရာꩻစေႏတီႏ၊ ခြေဖိနပ်တောႏ၊ ကောႏစအထျꩻ၊ ရွစ်ဖြအနာ၊ ဆေ့ꩻအာခြင်ꩻသောင်၊ တတောင်ꩻလꩻတဝ်း၊ ပါနဝ်ꩻထွာတစွိုး၊ ပါꩻယိုထွာတသွယ်၊ ကွဲလွယ်တဖေင်ꩻ၊ ခြင်သောင်လဲ့ခါ၊ အံႏဖြာႏတပါꩻ၊ ၃-စွိုးနဝ်ꩻခါ၊ မီႏထွာကရိုꩻ၊ ပုဂ္ဂိုလ်ႏစေႏတီႏ၊ မီႏရိုꩻယူးဝါး၊ တကျောင်ႏကာႏတဝ်း၊ ဗွေႏစဝ်းဆကီ၊ စေႏတီႏအနာ၊ ခါလဲ့မဗွို့ꩻ၊ တဖွို့ဗွုန်ႏတဝ်း၊ နဝ်ꩻလဲ့တပါꩻ၊ ၄-စွိုးခါရိုꩻ၊ လိုꩻမွိုက်လိုꩻရွိုင်ꩻ၊ နွောင်ꩻထက်အီႏသူႏ၊ ရွဲႏခူႏဌာပနာႏ၊ ယူႏကျံႏသꩻဖူꩻ၊ တထူႏဗွုန်ႏတဝ်း၊ နဝ်ꩻလဲ့တပွိုင်၊ ၅-တထွိုင်ꩻနဝ်ꩻရာꩻ၊ အငါအထျꩻ၊ သꩻစေတနာႏ၊ သဒ္ဓါႏမဉ်လူႏ၊ စိတ်ဖြူႏသꩻဗွာ၊ ထာꩻလောက်ꩻကာႏငထဝ်း၊ တလူႏဖိုတဝ်း၊ နဝ်ꩻလဲ့မဉ်လူႏ၊ ယိုလဲ့အံႏဖြာႏ၊ တပွိုင်နောစဝ်း၊ ၆- တစွိုးနဝ်ꩻရာꩻ၊ အုံညာꩻအဝ်ႏယန်၊ လယ်ႏခမ်းလော်ထီ၊ မီႏဟွုန်အဝင်ꩻ၊ တင်ꩻလုဲꩻမီႏဒေါ့ꩻ၊ ကော့ꩻနမ်းဖြားငါႏ၊ အာႏငထဝ်းဒွုမ်နော်၊ မွေႏတောႏဘုရာꩻ၊ တတွိုႏဗာႏတဝ်း၊ စွိုးနုဲးအဝင်ꩻ၊ မဉ်ꩻလွင်းမဉ်လွေꩻ၊ ဗွေႏဘုရာꩻအဒွို၊ ယိုလဲ့အံႏဖြာႏ၊ တပါꩻကွိုတဝ်း၊ ၇- တစွိုးနဝ်ꩻရာꩻ၊ စင်ပါꩻစင်နီ၊ ထီႏတွိုႏလွေꩻဗာႏ၊ တွိုႏချာတလဲင်ႏ၊ မဉ်ထီႏထဲင်းလင်လင်၊ နီခြင်ႏသိုမ်ပေါက်၊ ကွပ်တခေါက်ဒွါႏ၊ အာႏရꩻနွောင်ꩻတဝ်း၊ နဝ်ꩻလဲ့တစွိုး၊ ၈-မီႏတွိုႏတပွိုင်း၊ တထွိုင်း(ထွောင်း)နဝ်ꩻရာꩻ၊ စထစ်စွဉ်ႏကာႏ၊ ကမ္ဘာႏတယ်ႏစ၊ ရွစ်ဖြငခါ၊ ဘုရာꩻလစ်ꩻဆူႏ၊ မိန်းတောႏမူႏငသေꩻ၊ ဖေႏတွမ်ႏဗျာႏဒိပ်၊ တံꩻဆိတ်မုဲသေꩻ၊ ဒေဝါႏလူꩻတန်၊ ယံဖေႏထွားတီ၊ နီဗွေႏဘုရာꩻ၊ ဆံတောႏမွေႏဓာတ်၊ ယံထိုꩻမားမွုန်း၊ ငဝ်းငွါထွန်ႏသေꩻ၊ ယံဖေႏအုံဗာႏ၊ တကမ္ဘာႏနော၊ ဟော်ꩻငသေꩻငဝ်းငွါ၊ အုံဗာႏမွေးနုဲး၊ ထုဲႏပီဘုရာꩻ၊ ငဝ်းငွါပညပ်၊ မပျတ်စောင်ꩻစယ်ꩻ၊ အဝ်ႏမယ်ꩻရန်းစိုး၊ ယိုလဲ့အံႏဖြာႏ၊ တပါꩻကွိုနဲ၊ ထဝ်းကဲသီးယာ၊ တဖုံႏတဉ်ဟွေး။

ဟန်ႏလဲင်ႏခါယို၊ သမဲင်ꩻစာႏလိတ်၊ တံꩻဆိတ်ရွှေႏတကုန်ႏ၊ သွဉ်သင်နယ်ဖေႏ၊ ပေႏတန်ဖြားဆား၊ ကောထွာပအိုႏ၊ မူႏခိုအငဝ်း၊ စဝ်းဗွန်စေတီ၊ စီႏရင်ႏမာꩻထွာ၊ ငဝ်းငွါပအိုႏ၊ ကုသိုလ်ႏမဉ်လꩻ၊ ဘဝနောင်ႏလာႏ၊ နဝ်ꩻမꩻတဲမ်းစီႏ၊ ဒီဟဝ်မတ်နာႏ၊ ဘဝထွာလိုꩻ၊ ကုသိုလ်ႏထာꩻလီꩻ၊ နီꩻရင်ꩻအဝ်ႏမꩻ၊ ထွာလꩻသဲင်ꩻလိုꩻ၊ ငခါယိုသွင်ꩻသꩻ၊ ယံလꩻနုဲးဝင်ꩻ၊ သင်္သရာႏနမ်းငါ၊ မီႏထွာဖြားထွူ၊ စူခင်ꩻဖြီသꩻ၊ မီႏတလွေꩻလꩻတဝ်း၊ နဝ်ꩻရာꩻယံဖေႏ၊ သေနန်းကေꩻဇူꩻ၊ သိုမ်ဆူႏရတနာႏ၊ ဘုရာꩻရွှေႏတကုန်ႏ၊ အုံလမ်းကိုꩻကွယ်ႏ၊ ခေါက်ဝုဲႏညာꩻနေး၊ အကျိုꩻလꩻနေ၊ မီႏထွာသေနန်း၊ ဗွန်တန်မွေႏတောႏ၊ နဝ်ꩻနောကျောင်ꩻတကာႏ၊ သီးယာတင်ꩻလုဲ၊ ဟဝ်ကုဲဖြားဆား၊ မီႏထွာဟွုန်ဗာႏ၊ လိုꩻဒါႏလိုꩻမော်၊ မီႏဟော်မီႏဖတ်၊ ကျံꩻမျတ်ဒေႏသနာႏ၊ သမဲင်ꩻစာႏလိတ်ယို၊ ကျိုꩻစာꩻလူႏတန်ꩻ၊ ပန်ꩻတကာႏသီးယာ၊ ယံထွာကောင်းမု၊ ပျုစုတဲမ်းကူꩻ၊ လူႏတန်ꩻပူႏဇောႏ၊ တရာꩻတောႏလိတ်ယို၊ ကိုꩻစာꩻလူႏတန်ꩻ၊ ဓမ္မတရာꩻ၊ စာပေသမဲင်ꩻ၊ လိတ်သဲင်လုဲꩻခံꩻ၊ ဘုရာꩻရွှေႏတကုန်ႏ၊ ပီနုဲးအုံဗော့ꩻ၊ ကန်းတော့ꩻဝုဲႏဗာႏ၊ ဘုရာꩻနဝ်ꩻနေ၊ ကေတုမတီႏခမ်း၊ ကံႏကောႏမွူးထျꩻ၊ မီႏလꩻမီႏထွာ၊ ဘုရာꩻပဉ္စဝ်း၊ ခွေသွဉ်းထေထန်ႏ၊ ဘုရာꩻရန်ႏတကုန်ႏ၊ သမဲင်ꩻစာႏလိတ်၊ တံꩻဆိတ်ကမ္ပယ်ႏ၊ သေႏချာႏထွူမꩻ၊ အောင်ႏဆုမင်္ဂလာႏ၊ ထျꩻနာႏညီႏမျ၊ ဓမ္မတရာꩻ၊ ညီႏဝင်ꩻသာႏဓု၊ စဝ်းဗွန်စေတီ၊ ပါရမီႏဆုဗွေ၊ ခွေသွဉ်းကကွီ၊ ရဟန္တာႏဆုꩻ၊ ယံဖေႏအမန်ႏ၊ ရန်ႏတကုန်ႏသမဲင်ꩻ၊ လိတ်သဲင်လုဲꩻခံꩻ၊ နိဋ္ဌိတံအခန်ꩻ၊ ထွူမန်ႏလို့မွေး၊ ကွိုနဲဗွေႏဩ၊ သာႏဓု------ သာႏဓု------ သာႏဓု------ ။ စာႏရေꩻသာႏဓု၊ ဖထန်ႏကူꩻတော၊ တရာꩻတောႏလိတ်ယို၊ အကျိုꩻကွီထွာ၊ ဘုရာꩻတန်ဆုꩻ၊ ကောင်းမုအကျိုꩻ၊ ယိုꩻယိုꩻယံလꩻ၊ ကွိုနဲဗွေႏဩ။-------

တွဲႏနျꩻကွန်ပျူတာ၊ ၁၃၈၆-ဗာႏ၊ ဝါႏခေါင်ႏလောင်း (၈)နီꩻ၊ မွူးနီꩻ- အင်္ဂါႏ၊ (၂၇-၈- ၂၀၂၄) မွူးဟာခိုႏ - ၈- ၃၇ မိနေစ်အခိန်ႏတွင်ꩻ၊ ထွူလင်ꩻသာႏယာႏ၊ အောင်ႏမျင်ႏဗာႏတကားယိုသွူ။ ကေားတွဲႏနျꩻစီႏခြပ်သား - ဗွေႏမဟိန္ဒ၊ ဇဝနာရာမလိတ်သွဉ်တွိုက်၊ ဝေင်ꩻသီႏသဲင်ႏ၊ ဖြဝ်ꩻခမ်းအခဝ်နဝ်။ ခင်ႏလမ်း - ဝေင်ꩻသီႏသဲင်ႏ၊ ကျောင်ꩻဇဝနာရာမလိတ်သွဉ်တွိုက်ကို၊ ကျောင်ꩻတွိုက်တန်သိုမ်ထပ် အထပ်လသွတ်ꩻ၊ အစဲဉ်ႏကွဉ်ႏနဝ်။