သောဏဒဏ္ဍပုဏ္ဏာꩻ
"သောဏဒဏ္ဍပုဏ္ဏာꩻ-လွေꩻဆယ်ꩻကပ်ဘုရာꩻ၊ ထွာလွဉ်ဗုဒ္ဓဘာႏသာႏအကျောင်ꩻ"
အွိုးခꩻတလဲင်ႏ နီဗွေႏဘုရာꩻတွမ်ႏ တပဲ့ꩻသံဃာႏကျွꩻလွဉ် "ဝေင်ꩻစမ်ႏပါႏ"တဲင် အုံချꩻဝေင်ꩻသောင် ထီနောင်"ဂဂ္ဂရာႏ"ထျꩻနောဝ်ꩻသွူ။ သောဏဒဏ္ဍပုဏ္ဏာꩻနဝ်ꩻ ခွန်ဗိမ္ဗိသာရ ဒင်ႏဖေႏအရာႏ၊ အဝ်ႏအုပ်ချွုတ်ဗာႏ ဝေင်ꩻစမ်ႏပါႏနောဝ်ꩻသွူ၊ ဝေင်ꩻစမ်ႏပါႏနဝ်ꩻ ထွာဝေင်ꩻတန်တဝေင်ꩻ၊ လိုꩻကွုန်ꩻ၊ ဖိုးပနားအာ၊ ထီရော့ꩻ၊ သိုႏဗော့ꩻ၊ ဗွူဟူလွိုင်ႏအာ၊ ဖြေꩻစာသားအာ၊ လိုꩻခြွေအာနောဝ်ꩻသွူ။ သဲစ်ကဟွုန် ဗွေႏဘုရာꩻတွမ်ႏသံဃာႏ ကျွꩻလွဉ်ဝေင်ꩻစမ်ႏပါႏတဲင် အခိုပဉ်ဗူႏဗူႏ အမူႏပဉ်စွိုꩻစွိုꩻ သꩻသွိုꩻပျောႏသွင်ႏ ဆယ်ꩻကပ်တရေ့ လွေꩻထေ့ဗွေႏဘုရာꩻ၊ လွေꩻဝုဲင်ႏလွဗွေႏဘုရာꩻဖုံႏနောဝ်ꩻသွူ။ သောဏဒဏ္ဍပုဏ္ဏာꩻ အီႏလွေꩻဝုဲင်ႏနုဲင်းနုဲင်း ဘုရာꩻတဲင် အလိုꩻဖုံႏ ဖေႏလွေꩻတဝ်း၊ ခွေရဲနာꩻရဲ တောင်ꩻပြန်ႏအမျိုꩻမျိုꩻ၊ ဒေါ့ꩻရိုꩻအစားစား၊ ချꩻနားဖေႏ ကားမုဲင်ꩻဖြာꩻဖြာꩻလꩻတဝ်း၊ သောဏပုဏ္ဏာꩻ အီႏလွေꩻထေ့နွိုင်ႏနွိုင်ႏဒျာႏ ဗွေႏဘုရာꩻတဲင် အလိုꩻဖုံႏ မာꩻရာꩻဒါႏဒွုမ်။ သောဏပုဏ္ဏာꩻရိုꩻ- "သီရဲမွုန်းခွေ၊ ဗွေႏဘုရာꩻသူꩻနဝ်ꩻ သာႏကီႏဝင်ႏခွန်ခွိုꩻ၊ အမျိုꩻမျတ်ဒျာႏ၊ အွဉ်ႏကုဲင်ဟော်၊ အွဉ်ႏကုဲင်သွဉ်းသယ်ႏ၊ ပယ်ႏထိုꩻရွဉ်ခံꩻ၊ ထန်ႏတခြာ၊ လွေꩻထိုမ်ႏဒျာႏတရာꩻ၊ ယိုခါ ထွာလဲဉ်းဘုရာꩻ၊ ခွန်ဗိမ္ဗိသာရ-စတဲင် ခွန်တန်အဖြာꩻဖြာꩻ၊ အနာႏထပိဏ်ႏသဌေꩻ-စတဲင် သဌေꩻအဖြာꩻဖြာꩻ၊ ခွေနာꩻလွေꩻထေ့၊ တရေ့ဆယ်ꩻကပ် နာႏဗာႏတရာꩻမျတ်တွော့ꩻ သီမဉ်ဒေါ့ꩻနုဲင်းမုဲင်ꩻဒေါ့ꩻတဲ့ယဝ်း ခွေတနာႏတဝ်း၊ ခွေအီႏလွေꩻထွာထွာ၊ အီႏလွေꩻသွူယိုခါခါ"ဒေါ့ꩻပျတ်စွဉ်ႏနုဲင်းနောဝ်ꩻသွူ။ သောဏပုဏ္ဏာꩻ ကထွိုင်ႏလွေꩻမွေးမွေးတဲင် အလိုꩻဖုံႏတဲ့ လွေꩻစွဉ်ႏနုဲင်းနုဲင်း၊ ပါလွေꩻအာတန်ဒျာႏ၊ ထီႏဗာႏဘုရာꩻ၊ ဝုဲင်ႏဗာႏဘုရာꩻ၊ ဒေါ့ꩻရီဗာႏဘုရာꩻတဲင် သောဏပုဏ္ဏာꩻ သꩻရေꩻမွေးမုဲင်းစွဉ်ႏထာꩻ၊ ဗွေႏဘုရာꩻရီ- "တကာႏသောဏဒဏ္ဍ- သီကပညတ်-သီကသတ်မတ်'ဗြာဟ္မဏ-ပုဏ္ဏာꩻ'နဝ်ꩻ အချက်အဝ်ႏကားမုဲင်ꩻချက်၊ ဒေါ့ꩻနယ်စံꩻမွိုင်" "ဩဗွေႏ ဘုရာꩻဗွေႏဩ- အဝ်ႏငတ်ꩻချက်ဗွေႏဩ၊ ငတ်ꩻချက်ကရိုꩻနဝ်ꩻ- 'မွိုးဖါနီဖြာꩻ ထွာဗာႏပုဏ္ဏာꩻ၊ ဒါႏဗာႏပေႏတင်ႏ၊ ယောင်ꩻရေꩻဗာႏ၊ သီႏလအဝ်ႏဗာႏ၊ ပညာႏအဝ်ႏဗာႏ' ငတ်ꩻချက်နုဲင်းနောဝ်ꩻဗွေႏဩ" နီဗွေႏဘုရာꩻ သျင်ꩻပျꩻနယ် ငတ်ꩻချက်အကိုနဝ်ꩻ အရေꩻတန်ဒျာႏ 'သီႏလတွမ်ႏပညာႏ'၊ သောဏဒဏ္ဍပုဏ္ဏာꩻတဲ့ ယွုမ်းအံႏခြေင်းခြဲ့ဒျာႏ တရာꩻနဝ်ꩻနီပါꩻနေနေတဲင် "ခွေသွဉ်းယိုနဝ်ꩻ မတ်သွော့ ဥပါႏသကာႏ၊ ဗုဒ္ဓဘာႏသာႏတဖြာꩻ" လောဝ်းနီဗွေႏဘုရာꩻနုဲင်းနဝ်ꩻတွော့ꩻ အလိုꩻဖုံႏတဲ့ ထွာစွဉ်ႏဗုဒ္ဓဘာႏသာႏဖုံႏသွူ။ (သုတ္တန်ႏပိဋကတ်၊ သီလက္ခန္ဓပါဠိတောႏ၊ သောဏဒဏ္ဍသုတ်)[၁][၂]