သျင်ႏသာနုကျံႏထွက်ထာꩻ
"သာနုသုတ် (သျင်ႏသာနု ကျံႏထွက်ထာꩻ အတကာႏမမွိုးရဲခါꩻ)"
အွိုးခꩻတလဲင်ႏ နီဗွေႏဘုရာꩻအောဝ်ႏအုံ သာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ သျင်ႏပေႏ "လိန်ႏမာႏမွေးစွဉ်ႏထာꩻ"အဝ်ႏတပါꩻ၊ အမဉ်ꩻ "သျင်ႏသာနု"တဲ့။ သျင်ႏသာနုနဝ်ꩻ သီႏလတဲ့အဝ်ႏ၊ ဝတ္တရာꩻတဲ့ကေႏ၊ ဉာဏ်ႏတဲ့ဟောဝ်တဲင် အဆရာႏတဲ့နဝ်ꩻ၊ ဗွေႏစင်ꩻလင်ဖုံႏတဲ့နဝ်ꩻ ရက်မွေးစွဉ်ႏဝွေꩻဗွေႏ၊ ငေါဝ်းထီတဲ့အွီႏ၊ ပြန်ႏလိတ်တဲ့တလေ့၊ ဟော်ꩻတရာꩻတဲ့ ဖုဲင်ႏနာႏမွေးစွဉ်ႏထာꩻနောဝ်ꩻသွူ။ လာဗွေလာမား လာသွစ်ꩻနီꩻ ပေါႏဗွေႏသျင်ႏသာနု ဟော်ꩻသွူတရာꩻနဝ်ꩻ လိုꩻလွုမ်ꩻတကာႏတဝ်း ဘီလူꩻဖုံႏတဲ့ လွဉ်နာႏ၊ ဘီလူꩻမူႏတဖြာꩻနဝ်ꩻ ဇာတ်ကရီးခါ ထွာဖိုသျင်ႏသာနုသီးမွိုး၊ အပိုဟော်ꩻတရာꩻ ယံငါႏနဝ်ꩻတဲင် ဘီလူꩻဖုံႏရိုꩻ- "သျင်ႏမွိုး-သျင်ႏမွိုး"တွော့ꩻ အစစအရာႏရာႏ ဘီလူꩻဖုံႏခြာ အမွိုးဘီလူꩻမူႏ မဲ့ငါမေတ္တာႏ တန်မွေးစွဉ်ႏဒျာႏနောဝ်ꩻသွူ။ ဗွေႏသျင်ႏသာနုနဝ်ꩻ သက်လꩻနီဆီလဲဉ်း၊ ထွိုင်ႏကွဲတန်တန်တွော့ꩻ သꩻခိုဗင်ႏပေါႏ၊ အုံထာꩻပျောႏဒွုမ်တဲင် သွမ်ꩻရောဝ်ꩻထွူကျွꩻသဲင်ꩻ အတကာႏမမွိုးလမ်း၊ ပွိုင်းလဲင်ႏနဝ်ꩻ အသွꩻပေႏ ပါသဲင်ꩻသေႏသေႏ၊ ယိုတလဲင်ႏနဝ်ꩻ အသွꩻပေႏပါတဝ်း၊ အလွိုးတဲ့ တရေꩻတဝ်း၊ အတကာႏမမွိုးရီ- "ဗွေႏသျင်ႏ သွꩻမပါတဝ်း၊ လွိုးတဲ့တရေꩻတဝ်း၊ ထွာထမုဲင်ꩻ ဗွေႏသျင်ႏ" "ဗွေႏသျင်ႏ အုံထာꩻပျောႏဒွုမ်၊ အီႏထွက်သွူထာꩻ" "ပွိုးထမုဲင်ꩻ အုံထာꩻမပျောႏတဝ်းတွိုးပိုခို၊ ထွက်မွုန်း ထွက်မွုန်း ပိုခို" လိုꩻလမ်းဘဝ ဒုက္ခခရာႏ၊ ခိုးလျားခရာႏဖုံႏနောဝ်ꩻ အတကာႏမမွိုး ဒေါ့ꩻဖေႏအစားစား၊ ချꩻနားဖေႏအမျိုꩻမျိုꩻတဲ့ အပိုသျင်ႏအဝ်ႏရိုꩻဒျာႏ "တောဝ်း-တောဝ်း'တိတ်ꩻတိတ်ꩻ။ "ယိုပိုခို- အဆုဲင်ꩻသွတ်ꩻ သညင်ꩻဗဲင်းမွိုးယို၊ မွိုးဒွိုႏကသွတ်ꩻယာ မွိုးကပ်ကသွမ်ꩻယာꩻ အဆုဲင်ꩻသွတ်ꩻ ကပ်ကပိုသွမ်ꩻ၊ နာႏကပိုဗွေႏသျင်ႏတရာꩻ၊ ခါးလားသွမ်ꩻယာ ကထွူပေႏယိုနဝ်ꩻ ယွုန်းဖေႏဆောင်ႏမွိုးပိုခိုနော" အတကာႏမွိုး တောင်ꩻပြန်ႏနုဲင်းနဝ်ꩻထွူတဲင် လွေꩻပသေဟူ လွေꩻဒွိုႏလွေꩻသွတ်ꩻတွင်ꩻ အမွိုးဘီလူꩻမူႏနဝ်ꩻရိုꩻ"ဟန်ႏရောဝ်ꩻယို ထီႏတဝ်း ခွေပိုသာနု တွုံꩻသွမ်ꩻနဲ၊ အလွေꩻမုဲင်ꩻနဲ၊ ယိုခါ အဝ်ႏမုဲင်ꩻကိုနဲ" ထွိုင်ႏထိုမ်ႏနဝ်ꩻ သေခန်း အဝ်ႏအမွိုး(လိုꩻ)လမ်း၊ အီႏထွက်ထာꩻတဲင် "ဘီလူꩻမူႏ နွို့ပူꩻစွဉ်ႏထာꩻဒျာႏ၊ ဗွေႏသျင်ႏအဝ်ႏပြာႏ၊ ယုဲင်ꩻလဲ့" အမွိုး(လိုꩻ)နဝ်ꩻတဲ့ သꩻဝꩻ၊ ခြောဝ်တအꩻအငေါဝ်း ဟဲ့ꩻလွဉ်ခန်းဝင်ꩻ။ ဘီလူꩻမူႏ ပူꩻတော ပါꩻမူႏတဖြာꩻ၊ ဒေါ့ꩻထာꩻနုဲင်းယို- "သျင်ႏသာနု မဉ်ႏသေနမ်းမဲ့ꩻ ဒေါ့ꩻပါနော၊ ထွက်ထာꩻလꩻတဝ်း၊ ပေါႏထွက်ထာꩻနဝ်ꩻ အုံခန်းမို့ꩻလောင်းတဲ့ လွစ်တဝ်း၊ အီႏနွို့ပူꩻ အီႏမာꩻဒုက္ခ၊ ကယ်ꩻလဲဉ်းကယိုကွေး"မဲ့လောဝ်းပါ ဗွေႏသျင်ႏနုဲင်းနဝ်ꩻနော။ ဗွေႏသျင်ႏတဲ့စွုန်း၊ ပါꩻမူႏနဝ်ꩻတဲ့စွုန်း၊ ဝင်ꩻလောဝ်းနယ် လူꩻကဒေါ့ꩻငေါဝ်းနဝ်ꩻယင်၊ တကာႏအမျာꩻ တောင်ꩻပြန်ႏပငါပရာꩻယင်တဲင် သျင်ႏသာနုရိုꩻ "ထွက်တဝ်းဒွုမ်-တဲ့"၊ "သာႏဓု"ပငါပရာꩻ။ ဗွေႏသျင်ႏသာနုနဝ်ꩻ ဗုဲင်စင်ꩻ၊ ထွာမဟာဓမ္မကထိက သက်တောႏထိုဆွာꩻ အုံဗာႏစွဉ်ႏ တရျာꩻနီဆီနောဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ အဋ္ဌကာထာ၊ သာနုသုတ်)[၁][၂]