သွမ်ꩻစာႏဂ
"သွမ်ꩻစာႏဂ" နီထင်ႏကျောင်ꩻ နာႏတရာꩻထွူလဲဉ်း၊ မွိုးဖြားဖါဖြား တွမ်ႏကဝါႏသနာႏတရာꩻသားဖုံႏနောဝ်ꩻ နေးထူႏသဉ်သီႏလသွစ်ꩻပါꩻ၊ ဆောက်တယ်ႏဗိန်ႏကျောင်ꩻ၊ ပိုဖါယွဲး ပိုမွိုးယွဲး၊ ခိုဗင်ႏယွဲး တွမ်ႏမူႏနံꩻစွိုꩻဖုံႏနောဝ်ꩻ သဲင်ꩻစီႏရင်ႏချာ သွမ်ꩻစာႏဂတာႏ။ ဖန်းနေးလို့ဝင်ꩻတာႏဝွန်ႏ၊ ယင်ဟန်ႏသားနောဝ်ꩻ ပင်ꩻသေꩻသင်္ဃာႏ၊ ယင်ဟန်ႏသားနောဝ်ꩻ လွေꩻဖစ်သေꩻ သီႏလသား၊ ယင်ဟန်ႏသားနောဝ်ꩻ စီႏရင်ႏဟန်ႏအို၊ ယင်ဟန်ႏသားနောဝ်ꩻ ပသေဟူ၊ ယင်ဟန်ႏသားနောဝ်ꩻ လင်ꩻဒင်ႏထီ၊ ခွေတာႏဝွန်ႏ ခွေသေမာꩻ၊ နာႏတာႏဝွန်ႏ နာꩻသေခွုမ်ဒျာႏဝင်ꩻတဲင် လွစ်ဒေါ့ꩻဗာႏစွဉ်ႏလို့ဝင်ꩻ။ ထာꩻကထင်ႏခေ့ꩻပသာႏတဲင် မောင်းငေါဝ်းတဲ့ဖုံ၊ ထုံငေါဝ်းတဲ့သင်ႏ၊ ခိုဗင်ႏဖုံႏနောဝ်ꩻ ကျူႏထာꩻ လမ်းခိုႏပငါပရာꩻ၊ မူႏနံꩻဗွာဖုံႏနောဝ်ꩻ အောဝ်ႏအုံလင်ꩻပြုံႏပြင်ႏဒျာႏက လမ်းကီ၊ လꩻထွိုင်ႏကျူႏတောဝ်းဒွိုန်းကထာꩻ၊ ကွပ်နောဝ်ꩻမꩻ ခိုဗင်ႏဖုံႏတဲ့ ထွိုင်ႏခန်းနုဲင်းယို-
(ခို) ထွိုင်ႏထွိုင်ႏခန်းလုဲင်း ခံꩻယာႏဗွာဟွေး----
ကာကာခန်းလုဲင်း ခံꩻယာႏဆꩻဟွေး----။
ခိုဗင်ႏဖုံႏ ကထင်ႏရိုꩻနုဲင်းနောဝ်ꩻတဲင် မူႏနံꩻဗွာဖုံႏလဲ့ သꩻသွိုꩻသꩻသွင်ႏ တလဲင်ႏချင်ႏ ထွိုင်ႏကျူႏစွဉ်ႏထာꩻ၊ မူႏနံꩻစွဉ်ႏခိုဗင်ႏစွိုꩻ ကဲးထင်ႏစွဉ်ႏလို့ဝင်ꩻနုဲင်းယို-
(ခို) လွဉ်ဗော့ꩻဗော့ꩻ တခါꩻငွါဟွေး----၊
လွဉ်ငါငါ တခါꩻထျꩻဟွေး-----။
(မူႏ) မီႏလွဉ်ဗော့ꩻဗော့ꩻ ငမ်းသꩻသျင်ႏသီ ဆွတ်ꩻထိုꩻချာဟွေး----
မီႏလွဉ်ငါငါ ငမ်းသꩻသျင်ႏသီ ဆွတ်ꩻထိုꩻညာꩻဟွေး----။
(ခို) မီႏလွဉ်ဗော့ꩻဗော့ꩻနီထျꩻ ဖေႏထဲင်းကောဝ်ႏတုဲင်ဗွာဟွေး-----၊
မီႏလွဉ်ငါငါနီထျꩻ ဖေႏထဲင်းကောဝ်ႏတုဲင်မွံꩻဟွေး-----။
(မူႏ) သျင်ႏသီကောဝ်ႏတုဲင်မွံꩻနဝ်ꩻ ငမ်းသꩻ အဆူႏပါဟွေး----၊
သျင်ႏသီကောဝ်ႏတုဲင်ဗွာနဝ်ꩻ ငမ်းသꩻ အဆူႏရော်ꩻဟွေး----- ။
(ခို) ကောဝ်ႏတုဲင်မွံꩻနောဝ်ꩻ ဒေါ့ꩻလွဉ်ဒျာႏ သျင်ႏနီသꩻရာႏခြာဟွေး----၊
ကောဝ်ႏတုဲင်ဗွာနောဝ်ꩻ တုဲင်လွဉ်ဒျာႏ သျင်ႏနီသꩻရာႏခါႏဟွေး-----။
မူႏနံꩻဖုံႏတွမ်ႏခိုဗင်ႏစွိုꩻ ကဲးထေားလို့ဝင်ꩻနုဲင်းနောဝ်ꩻတဲင် နာႏတလေ့မွေးစွဉ်ႏထာꩻ။ ပိုဖါယွဲး၊ ပိုမွိုးယွဲးဖုံႏနောဝ်ꩻ ဒွိုႏသွတ်ꩻဒဲဉ်ဗွာ ဟန်ႏသွမ်ꩻတဲင် နာႏပါမူနံꩻခိုဗင်ႏ ကဲးလို့ဝင်ꩻ၊ ကဆောက်တယ်ႏဒါႏကျောင်ꩻ သီႏလသားဖုံႏနောဝ်ꩻ နာႏတရာꩻ နာႏမော်တဲင် စိတ်ပတီꩻသားတဲ့ အောဝ်ႏ၊ အုံလင်ꩻမတ်တရာꩻသားတဲ့ အောဝ်ႏနောဝ်ꩻသွူ။ ထာꩻထင်ႏအီႏလေတဲင် မောင်းငေါဝ်းတဲ့အွဉ်ႏအုံ၊ ထုံငေါဝ်းတဲ့အွဉ်ႏသောဝ်ꩻ၊ မူႏနံꩻတွမ်ႏခိုဗင်ႏဖုံႏနောဝ်ꩻတဲ့ ကဲးလို့ဝင်ꩻအွဉ်ႏထွူ၊ ထင်ႏလောင်ꩻတောသွမ်ꩻတောႏ အွိုးကျောင်ꩻ၊ ယင်ဟန်ႏသားနောဝ်ꩻ ကပ်ဒဲဉ်သွမ်ꩻ၊ ယင်ဟန်သားနောဝ်ꩻ လွူးလိုꩻဖြား သီႏလသားဒဲဉ်၊ ယင်ဟန်ႏသားနောဝ်ꩻ အွဉ်ႏတံꩻနေင်းထီ၊ ယင်ဟန်ႏသားနောဝ်ꩻ ပသေဝန်ႏ။ ကပ်သွမ်ꩻ လွူးဒဲဉ်ဟန်ႏထွူတဲင် ထင်ႏနာႏတရာꩻကျောင်ꩻကီ၊ ဆျာꩻထီဖန်းအကျိုꩻ၊ လူꩻတွမ်ႏလိုꩻသာႏဓုရောဝ်းညီꩻဗာႏ၊ ချမ်ꩻသာႏခမ်းနိဗ္ဗာန်ႏ၊ မန်ႏမန်ႏယံကလꩻ၊ နီအွဉ်ႏသꩻကွီဆုꩻနုဲင်းနောဝ်ꩻသွူ။[၁][၂]