သွမ်ꩻဘုရာꩻထွာထာꩻမာႏ

"သရဏာနိသက္ကသုတ် (သွမ်ꩻသဲ့ꩻဗွေႏဘုရာꩻ ထွာထာꩻအမာႏယော့)"

အတွင်ꩻနဝ်ꩻခါ အမဉ်ꩻကဟဲ့ꩻဒါႏ "သရဏာနိ"သာႏကီႏဝင်ႏခွန်မျိုꩻတဖြာꩻ သီထိုꩻ၊ ဗွေႏဘုရာꩻရိုꩻ တကာႏသရဏာနိနဝ်ꩻ လꩻတမဂ်တဖိုလ်ႏ ထွာသောတာႏပန်ႏပုဂ္ဂိုလ်ႏ အတွိုႏထင်ႏဒျာႏလူꩻခမ်း၊ တတွိုႏလွေꩻတဝ်း (ငါးရုဲင်ꩻ၊ တိရစ္ဆာန်ႏ၊ ပိတ္တာႏ၊ အသူႏရကာယ်ႏ) အပါယ်ႏခမ်း ရိုꩻနုဲင်းနောဝ်ꩻသွူ။ လိုꩻယင်ဟန်ႏဖုံႏနဝ်ꩻရိုꩻ- "ဗွေႏဘုရာꩻငေါဝ်းနဝ်ꩻ ခွေယွုမ်းတဝ်း၊ သရဏာနိနဝ်ꩻ ထီႏကဲဆောက်တဲႏထာꩻ မုဲင်ꩻခါ၊ ထီႏကဲ အလူႏတန်ꩻထာꩻမုဲင်ꩻခါ၊ ထီႏကဲ အားထွုတ်ရာꩻမုဲင်ꩻခါ၊ လိုꩻနုဲင်းသရဏာနိ မဉ်ႏထွာသောတာႏပန်ႏနဝ်ꩻ လိုꩻကယံလဲဉ်းဝွေꩻ အဝ်ႏဗောႏထာꩻ၊ ဝွေꩻသီးဖုံꩻနဝ်ꩻထဲင်းဟ ယိန်းထွာသောတာႏပန်ႏမတောဝ်၊ ယိန်းတွိုႏလူꩻခမ်းမတောဝ်၊ နီဗွေႏဘုရာꩻ ဟော်ꩻတမွိုꩻကွို့ꩻထာꩻ၊ အုံလယ်ႏကွို့ꩻ သရဏာနိရေꩻ"ဝွေꩻသဲ့ꩻခွေသွမ်ꩻ ဗွေႏဘုရာꩻနုဲင်းနဝ်ꩻဖုံႏသွူ။ မဟာႏနာမ်ႏဥပါသကာႏနဝ်ꩻ ဟွုန်ငေါဝ်းနဝ်ꩻတဲင် ထင်ႏလောဝ်းနီဗွေႏဘုရာꩻ၊ နီဗွေႏဘုရာꩻရိုꩻ- "တကာႏမဟာႏနာမ်ႏဟွေး- လိုꩻသီးယို ထီႏလို့ဝင်ꩻနမ်းတဲ့ ထီႏလွဉ်ꩻလို့တဝ်း ဝင်ꩻကုသိုလ်ႏ၊ ခေ့ꩻလေနီꩻနာꩻ ဆယ်ꩻကပ်ဘုရာꩻ၊ "ယွုမ်းအံႏမွေးမုဲင်း ဘုရာꩻနဝ်ꩻ-ပါꩻမုဲင်ꩻနဲး"မီႏမဉ်သေနဝ်ꩻ အွဉ်ႏနယ်ဗာႏ-သရဏာနိနဝ်ꩻ၊ "ယွုမ်းအံႏခြေင်းခြဲ့ တရာꩻနဝ်ꩻ ပါꩻမုဲင်ꩻနဲ" မီႏမဉ်သေနဝ်ꩻ ယီးနယ်ဗာႏ သရဏာနိနဝ်ꩻ၊ "ယွုမ်းအံႏတဉ်ႏတွော့ꩻ သံဃာႏနဝ်ꩻ ပါꩻမုဲင်ꩻနဲ" မီႏမဉ်သေနဝ်ꩻ အွဉ်ထေ့လွေꩻဗာႏ သရဏာနိထျꩻနဝ်ꩻ။ တကာႏမဟာႏနာမ်ႏဟွေး- သရဏာနိနဝ်ꩻ ယွုမ်းအံႏမွေးမုဲင်း ဘုရာꩻနဝ်ꩻ နေင်ႏပေါင်ꩻညလဲဉ်းသွူ၊ ယွုမ်းအံႏခြေင်းခြဲ့ တရာꩻတဲ့ နေင်ႏပေါင်ꩻညဆွာꩻလဲဉ်းသွူ၊ ယွုမ်းအံႏတဉ်ႏတွော့ꩻ သံဃာႏတဲ့ နေင်ႏပေါင်ꩻညငါႏလဲဉ်းသွူ၊ လိုꩻယွုမ်းအံႏမွေးမုဲင်းဘုရာꩻ၊ လိုꩻယွုမ်းအံႏခြေင်းခြဲ့တရာꩻ၊ လိုꩻယွုမ်းအံႏတဉ်ႏတွော့ꩻသံႏဃာႏ (နုဲင်းသရဏာနိ)နဝ်ꩻ ငါးရုဲင်ꩻ၊ တိရစ္ဆာန်ႏ၊ ပိတ္တာႏ၊ အသူႏရကာယ်ႏ အပါယ်ႏလစ်ꩻပါꩻ တထဲ့နွောင်ꩻတောဝ်း၊ တွိုႏလွေꩻဗာႏဗာႏ ဘွုံႏဟောဝ်ဘွုံႏဒါႏ သုဂတိဘဝသူꩻသွူ။ တကာႏမဟာႏနာမ်ႏဟွေး- အားထွုတ်မွေး ဝိပဿနာႏတရာꩻ မာꩻမွေးကုသိုလ်ႏတဲင် လꩻတမဂ်တဖိုလ်ႏ ထွာသောႏတာႏပန်ႏပုဂ္ဂိုလ်ႏနဝ်ꩻတဲ့ တထဲ့နွောင်ꩻတဝ်း အပါယ်ႏလစ်ꩻပါꩻ၊ ကွုတ်ထဲင်းဗာႏ နွုတ်ꩻဘဝလွုမ်ꩻ လꩻသွူနိဗ္ဗာန်ႏ၊ လꩻနီမဂ်နီဖိုလ်ႏ သကဒါႏဂါမ်ႏပုဂ္ဂိုလ်ႏနဝ်ꩻတဲ့ တထဲ့နွောင်ꩻတဝ်း အပါယ်ႏလစ်ꩻပါꩻ၊ ဝွေꩻဗွေႏသီး မဉ်ႏသီနဝ်ꩻ သဲင်ꩻကွုတ်ဒွုမ် ကာမဘွုံႏယို၊ လဲဉ်းထိုကီလွေꩻ "သုဒ္ဓါဝါသဗျဟ္မာႏခမ်း"သူꩻသွူ၊ လꩻလစ်ꩻမဂ်လစ်ꩻဖိုလ်ႏ ရဟန္တာႏပုဂ္ဂိုလ်ႏနဝ်ꩻ ဘဝထွူသဝ်ꩻလဲဉ်း၊ ခန္ဓာႏဖေ့လဲဉ်း၊ ဒုက္ခဖေ့လဲဉ်း၊ လꩻလဲဉ်းနိဗ္ဗာန်ႏ၊ ထန်ႏနွောင်ꩻလဲဉ်းဝဋ်ဒုက္ခ၊ အဝ်ႏသန္တိသုခ-ထာႏဝရချမ်ꩻသာႏနောဝ်ꩻလွုမ်ꩻသွူ။၀ ဗွေႏဘုရာꩻ ကထွိုင်ႏဟော်ꩻပဲစ်ꩻပဲစ်ဖေႏ အခရာႏတဲင် လိုꩻကသဲ့ꩻသွမ်ꩻဒါႏ ဗွေႏဘုရာꩻဖုံႏနဝ်ꩻ ထွာထိုꩻစွဉ်ႏ လိုꩻအပဲစ်တန်၊ လိုꩻမာႏယော့ထာꩻဖုံႏသွူ။ (သုတ္တန်ႏပိဋကတ်၊ မဟာဝဂ္ဂပါဠိ၊ သရဏာနိသုတ်)