သꩻရေꩻဗာႏနဲ့
"သꩻရေꩻဗာႏနဲ့-သꩻပေႏဗာႏနဲ့" ခမ်းသားငဝ်းဂျာနယ် အမုဲင်(၂)အစဲဉ်ႏ (၂) လိတ်မဲ့ငါ (၄) ခွန်စိန်ဝင်း (တရာꩻခြေႏသား) ရွမ်ဖြုဲင်ꩻအလꩻ ပအမဖပါတီတသာ ပေါႏလွဉ်ယင်းအကျောင်ꩻယို သေထွꩻဗာႏသွူ။ ခွန်စိန်ဝင်းရွမ်ဖြုဲင်ꩻနဝ်ꩻ ပအမဖပါတီလီꩻသမဲင်ꩻတွမ်ႏ ပအမဖပါတီတသာအကျောင်ꩻယို တဲမ်းနယ်ဒင်ႏပျꩻလွေꩻထွူတဲင် တဲမ်းလွေꩻပါတွမ်ႏ ငဝ်းဆုတောင်ꩻမောင်ꩻကော့ꩻ နုဲင်းဆလယိုအတွိုင်ꩻသွူ။ "ပွိုးနဝ်ꩻမꩻ ပအမဖယို ဖေႏကထွာစွူစွူဒျာႏ ပအိုဝ်ႏမွိုးဖါ၊ ဖေႏကထွာစွူစွူဒျာႏ ပအိုဝ်ႏမွိုးဖါငါသွူ။ သမဲင်ꩻပွုံႏတာႏ ပအမဖ ကတဲမ်းတထွူတဝ်းဒွုန်းယို ယံကထွူလꩻတဲင် ယံကထင်းထံႏ၊ ယံကခံႏထူႏသွော့အမွီႏ ၁၀၀/နဝ်ꩻ ဆုတောင်ꩻမောင်ꩻကော့ꩻဒျာႏသွူ။ ခွေသွဉ်းတဲမ်းလိတ်သားအနေႏ ထွိုင်ႏသေဗာႏပအိုဝ်ႏနဲင်ႏငန်ႏရေꩻပါတီတသာ ပေါႏလွဉ်ဖျင်နုဲင်းယိုနဝ်ꩻ "သꩻရေꩻဗာႏနဲ့-သꩻပေႏဗာႏနဲ့"စင်းဒေါ့ꩻတဝ်းဒွုမ်သွူ။ ပွိုးထမုဲင်ꩻ သꩻရေꩻဗာႏနဲးကရိုꩻနဝ်ꩻ ဟန်ႏနီꩻမာꩻချာနဝ်ꩻ ကအဝ်ႏမာꩻဖေႏဒါႏ နီသွဉ်းသီး ပအိုဝ်ႏစွိုးခွိုꩻ၊ ပအိုဝ်ႏလိုꩻမျိုꩻအကျိုꩻနဝ်ꩻ အဝ်ႏပီအဲန်အိုပါတီ တပါလွုမ်ꩻတဲင် ပီအဲန်အိုပါတီသားနဝ်ꩻ တဒါႏတဝ်းလဲ့ မာꩻအဒါႏ၊ တနွောင်ꩻတဝ်းလဲ့ မာꩻအနွောင်ꩻတွော့ꩻ ကထေင်းထံႏလွေꩻဖေႏဒါႏ ပအိုဝ်ႏတစွိုးခွိုꩻလွုမ်းတာႏဝွန်ႏယိုနဝ်ꩻ ကထွာပအိုဝ်ႏမွိုးဖါခမ်းသားသီး ကအုံကွူႏဒါႏ ပီအဲန်အိုပါတီအဟေ့ꩻ၊ ကအာႏကွိုꩻသꩻဆွော့ꩻဒါႏ ပီအဲန်အိုပါတီယိုနဝ်ꩻ မဲဉ်ႏသꩻတဝ်းတခါႏ ထွာထိုꩻနုဲင်းနဝ်ꩻသွူ။ ယိုခါ ပါတီတသာ ပေါႏလွဉ်ဖျင်တဲင် ကအီႏမာꩻလွေꩻဖေႏဒါႏ နီပအိုဝ်ႏအကျိုꩻယို အဝ်ႏလဲဉ်းနီစွိုꩻ နီပါတီတွော့ꩻ ပအိုဝ်ႏလိုꩻမျိုꩻအာႏကွိုꩻသꩻဆွော့ꩻခရာႏ အဝ်ႏလဲဉ်းနီဗာႏရိုꩻဗာႏနုဲင်းနဝ်ꩻသွူ။ ကွပ်နဝ်ꩻမꩻ ပါတသီတသာပေါႏဖျင်နဝ်ꩻ သꩻရေꩻခရာႏရိုꩻဗာႏနုဲင်းနဝ်ꩻသွူ။ တနယ်ꩻ မီႏဒေါ့ꩻဗာႏ ထာꩻမာꩻသီးယို မာꩻထာꩻမုဲင်ꩻတယဝ်း အပြဲင်ႏအဆဲင်ႏမီႏအဝ်ႏမꩻ ကျိုꩻစာꩻမုဝီရိယတရာꩻယို အီႏအဝ်ႏပိုႏလွဉ်သွူ။ နီပအိုဝ်ႏလိုꩻမျိုꩻယို နဲင်ႏငန်ႏရေꩻပါတီ ထွိုင်ႏအဝ်ႏနီပါတီနဝ်ꩻ တပါတီတွမ်ႏတပါတီ အီႏကျိုꩻစာꩻ မာꩻပြဲင်ႏလွေꩻဗာႏလို့ဝင်ꩻ ခမ်းသားအကျိုꩻနဝ်ꩻသွူ။ မဉ်ႏကျိုꩻစာꩻမာꩻပြဲင်ႏလွေꩻတဝင်ꩻနဝ်ꩻ နီပအိုဝ်ႏလိုꩻမျိုꩻယို ယိန်းတိုꩻတက်ထင်ႏထိုယိုꩻယိုꩻသွူ။ ကွပ်နဝ်ꩻမꩻ ပါတီတသာပေါႏလွဉ်ထဲင်းနဝ်ꩻ သꩻရေꩻခရာႏရိုꩻဗာႏနုဲင်းနဝ်ꩻသွူ။ ပွိုးထမုဲင်ꩻ သꩻပေႏဗာႏနဲးကရိုꩻနဝ်ꩻ နီပအိုဝ်ႏလိုꩻမျိုꩻယိုနဝ်ꩻ အဝ်ႏသေငါႏ လိုꩻကဆေ့ꩻ၊ အဝ်ႏသေငါႏ ဒါႏပညာႏသားကဆေ့ꩻလဲ့ သံးတလွောင်ႏဗူႏတဝ်း၊ သံးတဖြွမ်းတဝ်း၊ ခွေတမျိုꩻနာꩻတမျိုꩻ သံးလီလာထိုꩻထဲင်းနုဲင်းယိုနဝ်ꩻ ထွာထိုꩻအနုတ်လက္ခဏာႏတဲင် သꩻပေႏခရာႏရိုꩻဗာႏနုဲင်းနဝ်ꩻသွူ။ ပအိုဝ်ႏလိုꩻမျိုꩻယိုနဝ်ꩻ အဝ်ႏသေလိုꩻကဆေ့ꩻလဲ့ လိတ်အဝ်ႏတဝ်း တမျိုꩻချင်ႏ လိတ်ခမ်းကောင်၊ လိတ်ခမ်းဒွမ် အဝ်ႏကနီမျိုꩻ၊ ခမ်းကောင်သားချင်ꩻချင်ꩻလဲ့ တစွုမ်ႏတမဲဉ်ႏလို့တဝ်းလိတ်ယို "မဲဉ်ထဲမ်၊ မဲဉ်ဖျင်သား"တွမ်ႏ "မဲဉ်ထဲမ်မဲဉ်ဖျင်တဝ်းသား" သံးအဝ်ႏဖျင်နီစွိုꩻ၊ ယိုခါနဝ်ꩻ နဲင်ႏငန်ႏရေꩻပါတီလဲ့ သံးအဝ်ႏဖျင်လဲဉ်း နီပါတီတွော့ꩻ လွောင်ႏဗူႏဖြွမ်းဗူႏတဝ်းတဝင်ꩻ ရိုꩻဗာႏနုဲင်းနဝ်ꩻသွူ။ လိုႏလွောင်ႏဗူႏ၊ လိုꩻဖြွမ်းဗူႏတဝင်ꩻယိုနဝ်ꩻ မာꩻထမုဲင်ꩻမုဲင်ꩻလဲ့ အာႏအဝ်ႏ၊ ဝင်ꩻယားလဲ့ တယိုꩻတဝ်း၊ ထွိုင်ႏလွောင်ႏဗူႏတဝ်းဝင်ꩻနဝ်ꩻ မာꩻထမုဲင်ꩻမုဲင်ꩻလဲ့ အာႏအဲန်ထဝ်း၊ ဝင်ꩻယားလဲ့ ယိုꩻသွူ။ ကွပ်နဝ်ꩻမꩻ သꩻပေႏခရာႏ ရိုꩻဗာႏနုဲင်းနဝ်ꩻသွူ။ ပအိုဝ်ႏနဲင်ႏငန်ႏရေꩻပါတီ ထွိုင်ႏအဝ်ႏနီပါတီ နုဲင်းယိုခါနဝ်ꩻ မီႏတွိုႏ ၂၀၁၅-လွိုက်ရွေꩻမဲးပွယ်ꩻယို ပအိုဝ်ႏနမ်းပဲင်ႏအုပ်ချုတ်ခွင်ꩻလꩻ သွံဝေင်ꩻနယ်ႏအကိုယိုနဝ်ꩻ အဝ်ႏပအိုဝ်ႏနဲင်ႏငန်ႏရေꩻပါတီလွုမ်ꩻတကာႏတဝ်း ပါတီတန်ကထွာဒါႏ ကြံ့ခိုင်ရေးပါတီ၊ အဲန်အဲလ်ဒီပါတီတွမ်ႏ ဖြဝ်ꩻဒီမိုကရေသီပါတီဖုံႏလဲ့ အီႏနွို့ပြဲင်ႏလွဉ်တဲင် နီပအိုဝ်ႏလိုꩻမျိုꩻ မဲးအီႏလီထိုꩻတခွုင်းမုဲင်ꩻကရိုꩻနဝ်ꩻ ယူႏထွားအဝ်ႏဖြောင်ဒျာႏသွူ။ ဝေင်ꩻနယ်ႏလင်နဝ်ꩻရိုꩻတဝ်းဒွုမ် ပအိုဝ်ႏနမ်းပဲင်ႏအုပ်ချုတ်ခွင်ꩻလꩻ သွံဝေင်ꩻနယ်ႏကိုယို ပီအဲန်အိုပါတီ မဲးနွောင်ꩻတဝ်း၊ မဉ်ႏသုမ်ꩻထိုꩻဝင်ꩻနဝ်ꩻ နီပအိုဝ်ႏလိုꩻမျိုꩻယို အီႏအွဉ်ႏဒွုမ်မဲ့ငါအွိုးမုဲင်ꩻ၊ အဝ်ႏလိုႏစွဉ်ႏမဲ့ငါကော့ꩻလွုမ်ꩻသွူ။ ကွပ်နဝ်ꩻမꩻ ပအိုဝ်ႏတွက်တာႏ သꩻပေႏခရာႏ ရိုꩻဗာႏနုဲင်းနဝ်ꩻသွူ။ လိုꩻသီးယို အဝ်ႏလိုႏပေါင်ꩻစပ် မာꩻညီလွဝင်ꩻထာꩻမာꩻလဲ့ ပေါင်ꩻစပ်ကာတလꩻတဝ်း၊ ကလဲဉ်းဗာႏ ဖြာꩻထွောင်းထွောင်းနဝ်ꩻ ကွပ်စွဉ်ႏဒျာႏ ထာꩻယူႏဝါႏဒ ခံႏထူႏချက်အမဲဉ်ႏတရာꩻယို တဗွိုန်တဝ်းလွဝင်ꩻနဝ်ꩻမꩻ လဲဉ်းဗာႏဖြာꩻထွောင်းထွောင်းသွူ။ ထာꩻယူႏ ခံႏထူႏချက် ကတဗွိုန်တဝ်းလွဝင်ꩻအချက်ယို တဖြာꩻတဝ်းလဲ့ တဖြာꩻ၊ တစွိုꩻတဝ်းလဲ့ တစွိုꩻ မဉ်ႏပယ်ႏထိုꩻနဝ်ꩻမꩻ ပေါင်ꩻစပ်လွဝင်ꩻ အီႏလꩻသွူ။ တနယ်ꩻ မဉ်ႏဒေါ့ꩻဗာႏထဲင်းနဝ်ꩻ အာႏဏာႏအဝ်ႏသားတဖြာꩻ တစွိုꩻယို အာႏဏာႏထွိုင်ႏအဝ်ႏကျင်ꩻ၊ ထွိုင်ႏနွောင်ꩻကျင်ꩻဝင်ꩻနဝ်ꩻ "ခွေမꩻခွေ၊ နီမꩻနီ"ကရိုꩻဒါႏ အတ္တ မာႏနတရာꩻယို ပေါႏထွာလွောန်၊ တန်တလာလွောန်တဲင် လိုꩻလင်အီႏအုံညီꩻ၊ အီႏမာꩻညီꩻထာꩻမာꩻနဝ်ꩻ တယိုꩻတဝ်း၊ သဟဇာတ တထွာလꩻတဝ်းသွူ။ အတ္တမာႏနတရာꩻ ကတန်လဲဉ်းဒါႏလိုꩻနဝ်ꩻ ဝွေꩻထာꩻမွေး၊ ဝွေꩻထာꩻယူႏယို ဝင်ꩻတကျွိုက်ရုမ်းတဝ်းလဲ့ ဖေႏသတိꩻ၊ ဖေႏကျံႏဉာဏ်ႏ တယိုꩻတဝ်း၊ တလꩻတဝ်း၊ ထီႏဝင်ꩻလင်နဝ်ꩻ ယူႏဒျာႏအရန်း တဗွိုန်တဝ်းဝွေꩻ၊ တလွိုတဝ်းဝွေꩻနုဲင်းနဝ်ꩻတဲင် ထွာဒျာႏ ထာꩻယပ်ꩻတူႏတန်သွူ။ အခေႏနေႏ မီႏအဝ်ႏနုဲင်းယိုနဝ်ꩻ ဝင်ꩻတပေါင်ꩻစပ်နွိုင်ႏတဝ်း၊ ဝင်ꩻတမာꩻညီꩻနွိုင်ႏတဝ်း ထာꩻမာꩻတွော့ꩻ ဝင်ꩻတဲႏခေါ် မာꩻခေါ်ဒါႏ ထာꩻမာꩻသွူ။ အရန်းမီႏတွိုႏသွူ မဉ်ႏထွာသွူနုဲင်းယိုနဝ်ꩻ လွောင်ႏဗူႏဖြွမ်းဗူႏရေꩻကုဲင်တဲင် လိုꩻမျိုꩻတာႏ အဟဝ်လက္ခဏာႏ တထွာတဝ်း၊ ထွာဒျာႏအနုတ်လက္ခဏာႏတွော့ꩻ တဟဝ်တဝ်း၊ ထွာထွိုက်ထွာသင်ꩻတဝ်း၊ ဟဝ်ထွာတဝ်းသွူ၊ ကွပ်နဝ်ꩻမꩻ ပါတီတသာ ကပေါႏလွဉ်ဗာႏနဝ်ꩻ သꩻပေႏခရာႏ ရိုꩻဗာႏနုဲင်းနဝ်ꩻသွူ။ နီပအိုဝ်ႏလိုꩻမျိုꩻ နဲင်ႏငန်ႏရေꩻပါတီ ကအဝ်ႏထိုꩻနီပါတီယို တပါတီတီ တစွိုꩻစွိုꩻ ယူႏလꩻချာ နမ်းအမာႏ၊ သေနာႏချာ နမ်းချို့ꩻယွင်ꩻချက်တွော့ꩻ မီႏသျော့ꩻထိုꩻ အတ္တမာႏနတရာꩻ၊ မီႏပေါင်ꩻစပ်နွောင်ꩻချာလွဝင်ꩻနဝ်ꩻ ခွေသွဉ်းအနေႏ လိုꩻမျိုꩻအတာႏ သꩻရေꩻငါႏ မရေႏမရာႏသွူ။ အတွင်ꩻယိုခါခါ ပါတီတသာ ကထွိုင်ႏအီႏအဝ်ႏ ပေါႏလွောန်နုဲင်းယိုနဝ်ꩻ ခွေသွဉ်းအနေႏ သꩻရေꩻခရာႏနဲ့-သꩻပေႏခရာႏနဲ့ကရိုꩻနဝ်ꩻ စင်းဒေါ့ꩻတဝ်းသွူ။ ကွယ်တွော့ꩻ မီႏတွိုႏမဲးပွယ်ꩻနဝ်ꩻ သော့ꩻသင်ꩻပါꩻမုဲင်ꩻမဲးကရိုꩻယို ခွေသွဉ်းဆွုံꩻဖျတ်နွိုင်ႏနွိုင်ႏဗာႏဒျာႏသွူ။ "သတင်ꩻမီဒီယာသား ခံႏထူႏချက်" ယိုခါနဝ်ꩻ သတင်ꩻမီဒီယာ လွစ်တခြင်လဲဉ်းတဲင် - နာꩻမီႏဟဝ်လဲ့ နီတဲမ်းအဟဝ် နာꩻမီႏကုဲင်လဲ့ နီတဲမ်းအကုဲင်။ - နာꩻမီႏမဲဉ်ႏလဲ့ နီတဲမ်းအမဲဉ်ႏ နာꩻမီႏမာႏလဲ့ နီတဲမ်းအမာႏ။ - နာꩻမီႏစွို့ꩻလဲ့ နီတဲမ်းအစွို့ꩻ နာꩻမီႏတရွို့ꩻလဲ့ နီတဲမ်းအတရွို့ꩻ။ - နာꩻမီႏစွဉ်ႏလဲ့ နီတဲမ်းအစွဉ်ႏ နာꩻမီႏတကဲင်ႏလဲ့ နီတဲမ်းအတကဲင်ႏ။ - နာꩻလွေꩻကွဉ်ႏနဝ်ꩻ နီတတဲမ်းတဝ်း နာꩻလွေꩻတွို့ꩻ။ - နာꩻလွေꩻတွို့ꩻနဝ်ꩻ နီတတဲမ်းတဝ်း နာꩻလွေꩻကွဉ်ႏ။ - အဝ်ႏထီႏအဗွာနဝ်ꩻ နီတတဲမ်းတဝ်း ထွာအဖြေင်း။ - အဝ်ႏထီႏအဖြေင်းနဝ်ꩻ နီတတဲမ်းတဝ်း မာꩻအဗွာ။ - နာꩻကဒေါ့ꩻ နာꩻကမာꩻအတွိုင်ꩻ နီတဲမ်းမဲဉ်ႏမဲဉ်ႏဒျာႏ။ - နာꩻသမဲင်ꩻယို နီတခံႏတဝ်း အတဲမ်းမာႏ။[၁][၂]