သꩻလျားမွုန်း-အွဉ်ႏမွုန်းအပွေႏ

"ဒုတိယ အာဃာတပဋိဝိနယသုတ် (သꩻလျားမွုန်း၊ အွဉ်ႏမွုန်းအပွေႏ)" ဗွေႏသာရိပုတ္တရာႏ ဆွုံꩻမꩻရဟန်ꩻသီးဖုံႏနုဲင်းယို- ဗွေႏပေႏသီးဖုံႏဟွေး- ၁။ ဝင်ꩻဝေါင်းထိုꩻတွော့ꩻ မော့ꩻပိတ်ခေါဝ်ထူႏမာꩻ ပံသကူႏသင်္ကန်ꩻ၊ ရဟန်ꩻနဝ်ꩻနဝ်ꩻ လွေꩻမော့ꩻပိတ်ခေါဝ်၊ ထူႏအယာႏဟောဝ်ဟောဝ်လွုမ်ꩻ၊ အသဲ့ꩻသနဝ်ꩻ အဲ့ꩻထိုꩻ၊ ထူႏတဝ်း။ အနုဲင်းနဝ်ꩻနေနေ၊ လောကကိုယို ပုဂ္ဂိုလ်ႏယင်ဟန်ႏနဝ်ꩻ နမ်းကျင်ꩻဟောဝ်တဝ်း၊ ဖြောင်းကျင်ꩻဟောဝ်၊ ယူႏငါဖြောင်းကျင်ꩻဟောဝ်နဝ်ꩻငါ၊ နမ်းကျင်ꩻကုဲင်နဝ်ꩻ ယူႏပါမွုန်း၊ သꩻလျားမွုန်း၊ အွဉ်ႏမွုန်းအပွေႏနော။ ၂။ ပါꩻတဖြာꩻနဝ်ꩻ 'ပက်ထိုꩻမောဝ်ထွူ၊ အွꩻထီစွူလွုမ်ꩻ'၊ အနုဲင်းနဝ်ꩻနေနေ လောကကိုယို ပုဂ္ဂိုလ်ႏယင်ဟန်ႏနဝ်ꩻ နမ်းကျင်ꩻဟောဝ်ဒျာႏ၊ ဖြောင်းကျင်ꩻဟောဝ်တဝ်း (နုဲင်းမောဝ်)နဝ်ꩻ ပက်ထိုꩻ၊ ယူႏငါနမ်းကျင်ꩻဟောဝ် (နုဲင်းထီစွူ)နဝ်ꩻငါ၊ သꩻလျားမွုန်း၊ အွဉ်ႏမွုန်းအပွေႏနော။ ၃။ ပါꩻတဖြာꩻနဝ်ꩻ လွေꩻတဖူꩻညာꩻ၊ ဟို့ꩻခိုးမွေးစွဉ်ႏထီ၊ ထီနောင်အဲဉ်ထဝ်း၊ ထီခြောင်အဲဉ်ထဝ်း၊ ဝွေꩻလွေꩻထီႏခန်း ထီတနဲင်း ဖိုးခင်ႏအောင်ကို၊ မဉ်ႏဗွူန်ႏအွꩻနေးတွမ်ႏစူတဲ့ ထီအီႏတဒူ၊ မာꩻတသွိုးလꩻတောဝ်း၊ ကွပ်နဝ်ꩻမꩻ စူထောက်၊ ခင်ႏလေင်းထောက်၊ မဲ့ငါငို့တွမ်ႏဖြောင်း စုတ်ꩻဗာႏဗွီႏဗွီႏ၊ နုဲင်းဖိုးအွꩻထီနဝ်ꩻ။ အနုဲင်းနဝ်ꩻနေနေ လောကကိုယို ပုဂ္ဂိုလ်ႏယင်ဟန်ႏနဝ်ꩻ နမ်းကျင်ꩻဟောဝ်တဝ်း၊ ဖြောင်းကျင်ꩻဟဝ်တဝ်း၊ ကွဲႏတွော့ꩻ ညညတလဲင်ႏနဝ်ꩻ အအားထွုတ်သမထ၊ ဝိပဿနာႏ၊ ယူႏငါအအားထွုတ်တရာꩻနဝ်ꩻငါ၊ သꩻလျားမွုန်း၊ အွဉ်ႏမွုန်းအပွေႏနော။ ၄။ ပါꩻတဖြာꩻနဝ်ꩻ ထာꩻဆော့ထန်ႏတဖူꩻလောင်း၊ လွေꩻငါတဲ့ ဒုံအဝ်ႏညာꩻ၊ သဲင်ꩻချာတဲ့ ဒုံအောဝ်ႏညာꩻ၊ ပါꩻခꩻတဖြာꩻလွေꩻထီႏ၊ ပါꩻလိုꩻဆာနဝ်ꩻ အသွꩻပါတဝ်း၊ မဲ့ꩻအသီထိုꩻ၊ ဝွေꩻထီႏ ဝွေꩻသညင်ꩻတဲင် ဝွေꩻလွမ်ꩻလာꩻ၊ ဝွေꩻပွေါးဖေႏ။ အနုဲင်းနဝ်ꩻနေနေ၊ လောကကိုယို ပုဂ္ဂိုလ်ႏယင်ဟန်ႏနဝ်ꩻ နမ်းကျင်ꩻဟောဝ်တဝ်း၊ ဖြောင်းကျင်ꩻဟဝ်တဝ်း၊ တရာꩻတဲ့ အားထွုတ်တဝ်းတဲင် ငမ်းငါႏဝွေꩻထဲ့ငါးရုဲင်ꩻတွော့ꩻ ချꩻနားဖေႏသွော့ဝွေꩻ၊ ထွဉ်ႏမာꩻသွော့ ကာယသုစရဲက်၊ ဝစီသုစရဲက်၊ မနော်ꩻသုစရဲက်၊ သညင်ꩻသွော့ဝွေꩻ၊ သꩻလျားမွုန်း၊ အွဉ်ႏမွုန်းအပွေႏနော။ ၅။ ထီနောင်တနောင် ထီစွူဖြွိုးငါႏ၊ အဝ်ႏဒျာႏသေင်ႏခြာ၊ အုံနဝ်ꩻကိုနဝ်ꩻ သꩻခွꩻငါႏ၊ လူႏဗာႏဟောဝ်ထီ၊ အွꩻဗာႏဟောဝ်ထီ။ အဗွန်ပီနုဲင်းနဝ်ꩻနေနေ၊ လောကကိုယို ပုဂ္ဂိုလ်ႏယင်ဟန်ႏနဝ်ꩻ နမ်းကျင်ꩻဟောဝ်၊ ဖြောင်းကျင်ꩻဟောဝ်၊ အားထွုတ်သမထ၊ ဝိပဿနာႏ၊ အုံထေ့ဗာႏပုဂ္ဂိုလ်ႏနဝ်ꩻနဝ်ꩻ ပျောႏငါႏ၊ သꩻစွုမ်းသွိုꩻဟောဝ်ငါႏ၊ ယူႏဒျာႏသွော့နုဲင်းနဝ်ꩻ၊ နုဲင်းမုဲင်ꩻမုဲင်ꩻတဲ့ယတ်း သꩻလျားမွုန်း၊ အွဉ်ႏမွုန်းအပွေႏနော။ (သုတ္တန်ႏပိဋကတ်၊ အင်္ဂုတ္တရပါဠိ၊ ပဉ္စကနိပါတ်၊ ဒုတိယ အာဃာတပဋိဝိနယသုတ်)