သꩻဝီဝွို့မွုန်း ပိုမာလောင်း
"နကုလပိတုသုတ် (သꩻဝီဝွို့မွုန်း ပိုမာလောင်း၊ သꩻဝီဝွို့ထာꩻနဝ်ꩻ ဒုက္ခငါႏ)" အွိုးခꩻတလဲင်ႏ- နီဗွေႏဘုရာꩻအောဝ်ႏအုံ 'ဘဂ္ဂခမ်း'၊ ဝေင်ꩻ'သုသုမာရဂိရ'၊ 'ဘေသကဠ'တခြာကိုအတွင်ꩻ လိုꩻခြွေ 'နကုလပိတာ'နဝ်ꩻ အုံဟောဝ်တဝ်းတဲင် အမာဒေါ့ꩻဖေႏနုဲင်းယို- ၁။ မောင်ႏဖါသဌေꩻဟွေး- သီသꩻဝီဝွို့မွုန်းထာꩻလုဲင်း၊ သီသꩻဝီဝွို့ထာꩻနဝ်ꩻ ဗွေႏဘုရာꩻသဲ့ꩻသွမ်ꩻကွေး၊ 'ခွေမဉ်ႏသီထိုꩻနဝ်ꩻ ခွေမာယို မဲ့ꩻလွူး ပိုမူႏပိုခိုဗွာတဝ်း' မဲ့ꩻနာꩻယူႏဒါႏနုဲင်းနဝ်ꩻ၊ ယူႏမွုန်းနုဲင်းနဝ်ꩻ၊ ခွေနောဝ်ꩻ လေင်းလူႏဒါႏဒျာႏ၊ ထꩻထာꩻဒေါ့ꩻဒျာႏ၊ လွူးပိုဖုံႏဗွာဒျာႏ။ ၂။ 'ခွေမဉ်ႏသီထိုꩻနဝ်ꩻ ခွေမာယို မဲ့ꩻအတောႏလမ်းတောဖျင်'ယူႏဒါႏနုဲင်းနဝ်ꩻ၊ ယူႏမွုန်းနုဲင်းနဝ်ꩻ၊ ခွေဆောက်တယ်ႏ 'ဂဟဋ္ဌဗြဟ္မစရိယသီႏလ'ပဉ်တသီနေင်ႏနဝ်ꩻ။ ၃။ 'ခွေမဉ်ႏသီထိုꩻနဝ်ꩻ ခွေမာယို မဲ့ꩻဝုဲင်ႏတဝ်းဘုရာꩻ၊ မဲ့ꩻဝုဲင်ႏတဝ်းသံဃာႏ'ယူႏဒါႏနုဲင်းနဝ်ꩻ၊ ယူႏမွုန်းနုဲင်းနဝ်ꩻ၊ ခွေဆယ်ꩻကပ်ရိုႏသေႏ ဝုဲင်ႏစွူစွူဒျာႏ ဘုရာꩻ တရာꩻ သံဃာႏ ရတနာႏသွံပါꩻ။ ၄။ 'ခွေမဉ်ႏသီထိုꩻနဝ်ꩻ ခွေမာယို အမျိုꩻဆောက်တယ်ႏဒွုမ် သီႏလမွေးတဝ်း'ယူႏဒါႏနုဲင်းနဝ်ꩻ၊ ယူႏမွုန်းနုဲင်းနဝ်ꩻ၊ ကွဉ်ကꩻခွမ်ꩻလာꩻဗွာ၊ လိုꩻသီႏလအဝ်ႏ 'ဥပါႏသိကာႏမူႏ'ကိုနဝ်ꩻ ခွေတဲ့ပါသော့ꩻတဖြာꩻနေနေ၊ မဉ်ႏယွုမ်းတဝ်းနဝ်ꩻ ရီလောဝ်းဗွေႏဘုရာꩻသူꩻလꩻဒျာႏ။ ၅။ 'ခွေမာ နကုလမာတာယိုနဝ်ꩻ အသꩻကိုသူꩻ အလွိုးတခွꩻတဝ်း၊ အလွိုးသꩻတစွူတဝ်း၊ အလွိုးတလꩻတဝ်း (သမာႏဓိ)ကမ္မဋ္ဌာန်ꩻ'ယူႏဒါႏနုဲင်းနဝ်ꩻ၊ ယူႏမွုန်းနုဲင်းနဝ်ꩻ၊ ကွဉ်ကꩻခွမ်ꩻလာꩻဗွာ၊ လိုꩻမူႏသꩻခွꩻ၊ လိုꩻမူႏသꩻစွူ၊ လိုꩻမူႏလꩻ (သမာႏဓိ)ကမ္မဋ္ဌာန်ꩻ 'ဥပါႏသိကာႏမူႏ'ကိုနဝ်ꩻ ခွေတဲ့ပါသော့ꩻတဖြာꩻနေနေ၊ မဉ်ႏယွုမ်းတဝ်းနဝ်ꩻ ရီလောဝ်းဗွေႏဘုရာꩻသူꩻလꩻဒျာႏ။ ၆။ 'ခွေမာ နကုလမာတာယိုနဝ်ꩻ သံသယရတနာႏသွံပါꩻလောင်း အဝ်ႏနေက၊ ဝိစိကိစ္ဆာႏကိလေႏသာႏ အဝ်ႏနေက'ယူႏဒါႏနုဲင်းနဝ်ꩻ၊ ယူႏမွုန်းနုဲင်းနဝ်ꩻ၊ ခွေယွုမ်းခြေင်းခြဲ့ဒျာႏ ရတနာႏသွံပါꩻ၊ ဝိစိကိစ္ဆာႏတရာꩻအဲဉ်ထဝ်း၊ မဉ်ႏယွုမ်းတဝ်းနဝ်ꩻ ရီလောဝ်းဗွေႏဘုရာꩻသူꩻ လꩻဒျာႏ။ ကွပ်နဝ်ꩻမꩻ သꩻဝီဝွို့မွုန်း ပိုလောင်း၊ မာလောင်း၊ သီဝီဝွို့ထာꩻနဝ်ꩻ ဒုက္ခငါႏ၊ ဘုရာꩻတအံႏဖြာႏတဝ်း၊ နကုလသီးဖါ ထွိုင်ႏဟွူန်အမာငေါဝ်းနဝ်ꩻတဲင် သꩻချမ်ꩻသာႏ၊ ကွပ်သꩻချမ်ꩻသာႏတွော့ꩻ ရောႏဂါႏတဲ့ သက်သာႏဟောဝ်ချာစွဉ်ႏနောဝ်ꩻသွူ။ တွိုႏတနီꩻ- ထောက်တွမ်ႏခွဉ်းထောက် ပယွို့ꩻပယွို့ꩻ ထင်ႏထေ့နီဗွေႏဘုရာꩻ၊ ဝုဲင်ႏဗွေႏဘုရာꩻထွူခါ လောဝ်းပါ အမာကဒေါ့ꩻဖေႏဝွေꩻ အခရာႏဖုံႏနောဝ်ꩻသွူ။ တကာႏသဌေꩻဟွေး- တကာႏလမ်းသားမူႏ နကုလမာႏတာႏနဝ်ꩻ လိန်ႏမာႏငါႏနဝ်ꩻမꩻ၊ ရက်ငါႏနာꩻနဝ်ꩻမꩻ ဒေါ့ꩻဖေႏနာꩻငေါဝ်းအငိုꩻတန်ႏဖုံႏ၊ နာꩻသꩻဝီဝွို့ ဖေႏကထိုꩻမား ချꩻနားသွဉ်သင်ဖေႏနာꩻ နုဲင်းနဝ်ꩻနဝ်ꩻ နာꩻကံႏဟောဝ်မွေးစွဉ်ႏထာꩻ တကာႏ၊ နာꩻမာကဒေါ့ꩻနဝ်ꩻ အမွေးဒျာႏလွဉ်လွဉ်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ နကုလပိတုသုတ်)[၁][၂]