ဟောဝ်သေထွိုက်ငါႏပကီႏ

"ဟောဝ်သေထွိုက်ငါႏ ပကီႏခရာႏအမုဲင်(၂)" ပကီႏယို မဉ်ႏအွဉ်ႏသꩻတဲမ်း အခရာႏနောဝ်ꩻ လို့ဒါႏတဝ်း ဗွိုန်နုဲင်း တဲမ်းပညာႏလောင်ႏလင်ဖုံႏခရာႏ၊ သေထွꩻရာꩻကိုယဟန်ႏ တဲမ်းထန်ႏဗာႏကားနဝ်ꩻလွုမ်ꩻ။ အရောင်ႏယို လိုꩻတွိုင်ꩻသꩻဝင်ႏစာꩻအာငါႏတဲင် "ဟဝ်သေထွိုက်ငါႏပကီႏခရာႏအမုဲင်(၂)"ယိုတဲ့ တဲမ်းယင်း အရောင်ႏခရာႏကဲဉ်းအာ။ ခါးလားကသေနာႏ အရောင်ႏခရာႏ ကဲဉ်းအာလိုꩻ(လိုꩻပေႏ)ဖုံႏနဝ်ꩻ ထွို့ꩻအရွုတ်မျိုꩻမုဲင်ꩻတယဝ်း ဗော့ꩻတဲ့နဝ်ꩻ၊ ညာꩻတဲ့နဝ်ꩻ၊ ခေ့ꩻတဲ့နဝ်ꩻ၊ လေတဲ့နဝ်ꩻ သော့ꩻလွအရောင်ႏစဲစ်ကဲဉ်းအာ၊ နဝ်ꩻနဝ်ꩻ ဝါႏသနာႏစ၊ အာႏရွုံႏတွိုႏစ ပကီႏသား၊ သေနာႏဒွိုန်း အရောင်ႏပရိယာယ်ႏသား သဘာဝဒျာႏ။ ဥပမာႏ- လိုꩻပေႏနဝ်ꩻ သေနာႏဒွိုန်း ငဝ်းပရိယာယ်ႏတဲင် ဆော့ꩻဝင်ꩻနား၊ ဗာႏချာဒါႏနီ၊ ဖေႏဒါႏနီအန္တရာယ်ႏစတဲင် အီႏထွာလွဉ်နုဲင်းနဝ်ꩻနဝ်ꩻ သေယူႏတဝ်းတွော့ꩻ အမဲဉ်ႏအမဲဉ်ႏအတွိုင်ꩻ ဒေါ့ꩻစွဉ်ႏတရွဉ်းဒါႏထာꩻ ဗွိုန်နုဲင်းနဝ်ꩻ။ ခင်ႏလမ်းတွိုင်ꩻ မဉ်ႏသွုံꩻအရောင်ႏစဲစ်နဝ်ꩻ ဆော့ꩻဒါႏထွာသားမဲ့၊ ရော့ꩻတဝ်းထွားသားသꩻ၊ သွုံꩻလꩻတောဝ်းနဲ့ လꩻဒျာႏ၊ သွုံꩻဗာႏတွမ်ႏအခင်ႏလမ်း၊ ခင်ႏလမ်းတနꩻမꩻ အငိုꩻဆꩻ။ ပကီႏသားတွမ်ႏ ဝါႏသနာႏပကီႏသား ကလိုႏတောင်ꩻသေႏသေႏသꩻကိုငဝ်းနဝ်ꩻ "စဲင်း၊ စဲစ်၊ သျုတ်၊ အာ၊ ဒွိုန်၊ ဆွော့ꩻ၊ သွုံꩻအဗော့ꩻ။ တဖြောဝ်း၊ ရော်ꩻ၊ သျင်ꩻ၊ ဆေ့ꩻ၊ ဗွိုန်၊ ပနဲဉ်ႏ၊ သွုံꩻအညာꩻ"။ မဉ်ႏဒေါ့ꩻဗာႏအချွုတ်နဝ်ꩻ နီကထွို့ꩻဒါႏအရွုတ်ယို အဓိကခင်ႏလမ်းနဝ်ꩻတွမ်ႏ ဇာတ်ရဲဉ်ႏကိုကပါဒါႏ အဓိကလိုꩻ(မင်ꩻသာꩻ)နဝ်ꩻ ဗွိုန်ဝင်ꩻတဲင် အွဉ်ႏဗာႏအရေꩻ၊ အရောင်ႏဖေႏကစဲင်းလွို၊ ကဆꩻလွို၊ ဖေႏကစဲစ်လွို၊ ဖေႏကယံလွို၊ ဖေႏကတရေꩻလွိုဗာႏဝင်ꩻ၊ မဉ်ႏစူꩻမဲ့ကထီႏတဲးတဲ့ မဉ်ႏတဲမ်းလိုꩻရွုတ် ကလူꩻလိုႏတွက်နေးအလီး၊ မဉ်ႏတဲမ်းသေင်ႏမွူးရွုတ် သေင်ႏလာႏလိုႏတွက်နေးအဗီႏ၊ မဉ်ႏတွက်နေးနဝ်ꩻ နန်ꩻထွူ၊ အချိန်ႏလို့၊ ထာꩻမာꩻအာ၊ အကျိုꩻဆေ့ꩻ၊ အရွုတ်ညံးပိုႏထဲင်း။ ဥပမာႏ- ဆရာႏတဲမ်းလိတ်တဖြာꩻ အရေꩻတန်တဝ်း၊ ထာꩻရေႏရွယ်ႏချက် စဲင်း'ထင်ႏသျာꩻ'ပေါ်အီတဝ်း၊ အရသာႏပိုႏအီတဝ်း ငဝ်းယာႏ'လိတ်ယာႏဖုံႏနဝ်ꩻ တွမ်ႏလောဘဆေ့ꩻဆေ့ꩻ၊ ထာꩻလောႏကာႏကင်ꩻကင်ꩻ မဉ်ႏအွဉ်ႏကုဲင်နွောင်ꩻနဝ်ꩻမꩻ စူခြောင်ꩻယံ လိတ်တပုဒ်ထွာနွောင်ꩻ၊ မဉ်ႏပဲႏနွောင်ꩻလောဘနဝ်ꩻ မာꩻစွဉ်ႏထာꩻမာꩻအမျိုꩻမုဲင်ꩻတယဝ်း အောင်ႏမျင်ႏယိုꩻ၊ ယံနွောင်ꩻ။ ဗွိုန်နဝ်ꩻနေနေ အရေꩻတန်တဝ်း၊ အဓိကမွေးတဝ်းခင်ႏလမ်းနဝ်ꩻ မာꩻပေႏထိုꩻဗာႏအအာႏ၊ မာꩻတမို့ပသာႏထို့ꩻ(ရော်ꩻထိုꩻ)ဗာႏအရောင်ႏအာႏ၊ အွဉ်ႏကုဲင်ထိုꩻဗာႏယင်ဟန်ႏ၊ မာꩻနုဲင်းနဝ်ꩻမꩻ အရေꩻတန်ခင်ႏလမ်း နီထာꩻရေႏရွယ်ႏချက်နဝ်ꩻ ယိန်းစဲင်းယိန်းပေါ်၊ အာႏယိန်းဟဝ်။ အရောင်ႏသဘော်ꩻနဝ်ꩻ ကွဲညာꩻညာꩻ ကွဲရော်ꩻရော်ꩻ၊ ဥပမာႏ- ပါꩻနဝ်ꩻတဖြာꩻပိုနဝ်ꩻ ဝွေꩻယာႏစဲစ်စဲစ်၊ ဝွေꩻလီꩻနဝ်ꩻ ပါꩻသွီႏရော်ꩻလဲဉ်း၊ ဝွေꩻလင်ꩻနဝ်ꩻ ယိန်းရော်ꩻရော်ꩻ၊ ကွဲရော်ꩻရော်ꩻ ကွဲညာꩻညာꩻတဲင် ဝွေꩻသွီႏယာႏဟဲ့ꩻနုဲင်းနဝ်ꩻလꩻဒွုမ်၊ ဟဲ့ꩻဗာႏဒျာႏ ဝွေꩻခွိုꩻနုဲင်းနဝ်ꩻလွုမ်ꩻ၊ ယိုတဲ့ ဗွိုန်နဝ်ꩻနေနေ၊ အဗော့ꩻနဝ်ꩻ ထွာခန်းဒျာႏတသီးရော်ꩻ၊ တသီးတမို့၊ တသီးယ(yellowgray)-ယဲလိုးဂရေး)။ မဉ်ႏထွာတနျာႏတဲ့ တနျာႏတမို့၊ မဉ်ႏထွာသွမ်ႏ(မို့ꩻအေႏ)တဲ့ သွမ်ႏတမို့၊ မဉ်ႏထွာမောက်ꩻစောက်ꩻတဲ့ မောက်ꩻစောက်ꩻတမို့ စတဲင်နုဲင်းနဝ်ꩻသွူ။ ကရော်ꩻနုဲင်းနဝ်ꩻနဝ်ꩻ ရော်ꩻဗာႏတွမ်ႏအရောင်ႏဆန်(အရောင်ႏခတ်ꩻ)(ဆန့်ကျင်ဘက်အရောင်)။ အရောင်ႏကရော်ꩻဗာႏအကျောင်ꩻနဝ်ꩻ တွမ်ႏပကတိမဲ့ တထီႏတဝ်းဒါႏ ထာꩻအီႏပေႏပေႏပါႏပါႏဖုံႏ၊ အလူးအတအွိုမျိုꩻဖုံႏ ကွပ်အဝ်ႏရဲးခါꩻတဲင် ကွဲးညာꩻညာꩻ ကွဲတဖြောဝ်းဖြောဝ်းထိုꩻဗာႏ၊ မဉ်ႏဒေါ့ꩻဗာႏတွမ်ႏ လိုꩻတွိုင်ꩻဝင်ꩻငဝ်းသွုံꩻနဝ်ꩻ ကွဲးညာꩻညာꩻ မဲ့သုဲင်ꩻတာကွဲးတွိုက်တွိုက်တဲင် ကွဲးထီႏတဖြောဝ်းဖြောဝ်း ဗꩻစွဉ်ႏကထိုꩻမားထံ။ ညာꩻမꩻ အရောင်ႏရော်ꩻမွေးတဝ်း၊ ဗော့ꩻတဲ့ အရောင်ႏရော်ꩻကဲဉ်းအာ၊ သဘာဝနဝ်ꩻ အရောင်ႏစဲစ်ဆေ့ꩻလွုမ်ꩻ၊ ပကီႏဆရာႏယင်ဟန်ႏရိုꩻထဲင်း သဘာဝနဝ်ꩻ အရောင်ႏစဲစ် တအဲဉ်ထဝ်းတဲ့၊ မဉ်ႏမဉ်သေစဲင်းနဝ်ꩻ ပကီႏဆရာႏဗွေႏသီး အဝ်ႏလိုႏထောင်ထွားတဲးတဲးဝါးဝါးငါႏ။ အရောင်ႏစဲစ်မွေးတဲ့နဝ်ꩻ၊ မွေးတဝ်းတဲ့နဝ်ꩻ(အညာꩻကို)အဟေ့ꩻကို၊ အခေ့ꩻကိုဖုံႏနဝ်ꩻ အရောင်ႏယကဲꩻ၊ တမို့ကဲꩻ၊ ခွꩻကဲꩻအလေကို၊ အလေကို အဗော့ꩻနဝ်ꩻ လျားကဲꩻ၊ စဲင်းကဲꩻ၊ စဲစ်ကဲꩻ အခေ့ꩻ၊ အဟေ့ꩻ အညာꩻကိုဖုံႏ။ အလေကို မဉ်ႏထွာတသီႏတမို့တဲ့ အဟေ့ꩻကို အခေ့ꩻကို အညာꩻကိုနဝ်ꩻ ရော်ꩻသော့ꩻတသီႏတမို့၊ အရောင်ႏခတ်ꩻ ခုံꩻကဝ်ႏရောင်ႏတမို့၊ အလေကို မဉ်ႏထွာခုံꩻကဝ်ႏရောင်ႏတမို့နဝ်ꩻ ခေ့ꩻဟေ့ꩻခွꩻကို ရော်ꩻဗာႏလုဲင်ႏဒျာႏ သွမ်ႏတမို့။ အလေကို မဉ်ႏထွာတနျာႏမွတဲ့ ခေ့ꩻဟေ့ꩻခွꩻညာꩻကို ရော်ꩻဗာႏ တနျာႏတမို့ရောင်ႏခတ်ꩻချို(သွမ်ႏငလာႏ)(သွမ်ႏဗာႏလာႏ)တမို့ရောင်ႏ၊ အလေကို မဉ်ႏထွာသွမ်ႏငလာႏတမို့တဲ့ ခေ့ꩻဟေ့ꩻခွꩻညာꩻကို ချို(သွမ်ႏငလာႏ)တမို့ ရောင်ႏခတ်ꩻတနျာႏစတဲင် ရော်ꩻဗာႏအရောင်ႏတမို့၊ အရောင်ႏခတ်ꩻနုဲင်းနဝ်ꩻ။