ဟော်ꩻတရာꩻသားစီꩻကန်ꩻ
ဟော်ꩻတရာꩻသားစီꩻကန်ꩻ ၁။ ကတဲမ်းဖေႏ တရာꩻ(၄)ပုဒ်ယိုဖုံႏနဝ်ꩻ ခေတ်ယိုခါ လိုႏအပ်ချက်အလꩻ နေးတွမ်ႏရေႏမိုးချက်အာအာ၊ ခဉ်ꩻခါꩻထွူအခိန်ႏတဲင် ဟော်ꩻဖေႏသွော့ယိုအတွိုင်ꩻ၊ (မွေးတဝ်းတဲ့ ရေႏမိုးချက် အဓိပ္ပါယ်ႏတွမ်ႏအခိန်ႏ ဖေႏကဗွန်သွော့ယိုအတွိုင်။)
၂။ ဖောႏအစွိုꩻတစွိုꩻစွိုꩻမဉ်ꩻ၊ ပုဂ္ဂိုလ်ႏတဖြာꩻဖြာꩻမဉ်ꩻ၊ ကျောင်ꩻတကျောင်ꩻကျောင်ꩻမဉ်ꩻ၊ ဒုံတဒုံဒုံမဉ်ꩻတဲင် သွမ်ꩻသဲ့ꩻကဲ့ꩻရဲ့ꩻဝင်ꩻ၊ ဒေါ့ꩻခတ်ꩻဝင်ꩻ-စတဲင် အချင်ꩻချင်ꩻ လွောင်ႏဗူႏရေꩻ ကကုဲင်အီဒါႏ အမျိုꩻနဝ်ꩻ ဟော်ꩻလꩻတဝ်း။
၃။ ငဝ်းသွမ်ꩻချာနမ်း၊ ငဝ်းမိတ်ဆက်ချာနမ်း၊ ငဝ်းပစော့ꩻပနျꩻ၊ ငဝ်းတဆဲင်ႏတဝ်းတရာꩻ၊ ငဝ်းကထီႏဖွီအီသံႏဃာႏ-စတဲင်နုဲင်းနဝ်ꩻဖုံႏနဝ်ꩻ (အခိန်ႏလို့ခြေင်) ဟော်ꩻပါလꩻတဝ်း။
၄။ နီယိုနဝ်ꩻ (ခွေယိုနဝ်ꩻ) လွေꩻဟော်ꩻဖေႏဝင်ꩻတရာꩻ၊ လွေꩻဗွောင်ဖေႏဝင်ꩻမဲ့နား၊ အွိုင်ႏနမ်းခြောင်ꩻတင်၊ ဝေင်ꩻနယ်ႏနမ်းခြောင်ꩻတင် ဗဟိုႏသံႏဃာႏ (ဗဟိုႏသံႏဃာႏ နမ်းခြောင်ꩻတင်)ကရိုꩻနဝ်ꩻ ယူႏလꩻသေႏသေႏထွူတဲင် အုံဖွီထာꩻ၊ ဒေါ့ꩻဖွီထာꩻ လꩻတဝ်း။
၅။ ဒေါ့ꩻရီဒေႏသခံႏသံႏဃာႏတဲ့ ဒေါ့ꩻရီရိုႏရိုႏသေႏသေႏဗာႏ၊ ဒေါ့ꩻရီတကာႏဖုံႏတဲ့ ဒေါ့ꩻရီထွူႏထွူႏတွုမ်တွုမ်ဗာႏ၊ အစွိုꩻသားချင်ꩻချင်ꩻတဲ့ တပါꩻတွမ်ႏတပါꩻ ရိုႏသေႏသွော့လို့ဝင်ꩻ၊ နာႏဗာႏလို့ဝင်ꩻငဝ်း။
၆။ ဟော်ꩻတရာꩻတွင်ꩻနဝ်ꩻ ဗုဲင်တရုတ်ꩻသင်္ကန်ꩻ၊ ကꩻဆဲင်ꩻစူဆွာꩻ (ဆဲင်ꩻလိုမ်ꩻ) ပိုႏနေးစူ၊ အွံပါပြူးဖုံႏနဝ်ꩻ ထွားဖုဲင်ႏမဲ့တဝ်း၊ မဉ်ႏရုံႏနေးသင်္ကန်ꩻနဝ်ꩻ ယိန်းဟဝ်။
၇။ တပါꩻတပါꩻယို အညသွတ်ꩻ ဟော်ꩻငါမိနစ်(၂၀)ငါ၊ (ဟော်ꩻတရာꩻကိစ္စ တနားရီႏ၊ ကန်းတော့ꩻသံႏဃာႏ၊ ထူႏသီႏလငတ်ꩻပါꩻ၊ ရွစ်ပရိတ်၊ နာႏတရာꩻဆျာꩻထီ တနားရီႏ၊ တကာႏထင်ႏအုံပွေါး တနားရီႏ၊ စုစုခြွဉ်း အီႏည (၃)နားရီႏ၊ လွိုသွံနားရီႏနဝ်ꩻ နာႏတရာꩻသား သꩻတပါတဝ်းဒွုမ်။)
၈။ မဉ်ႏအုံဟဝ်တဝ်းစိန်ႏစွော့ꩻနဝ်ꩻ ဟဲ့ꩻဖေႏမွိုင်မွိုင်သွော့ဆရာႏ၊ မွေးတဝ်းတဲ့ ပသာမွိုင်မွိုင်သွော့ ဆေးခန်း၊ ဆေးရုံ၊ ထူႏရေꩻသွော့လို့ဝင်ꩻ၊ ပေါႏအုံဟဝ်တဝ်းတဲ့ ကျွꩻလွေꩻနွိုင်ႏမွုန်း။
၉။ ကေညိုႏခရာႏ ဖေႏနေးကယိန်းထွာ ကလူꩻဒွေါင်ႏဆွာꩻ ဖေႏနေးကဗွန်လို့ဝင်ꩻတဲင် ၁၃၇၄-ဗာႏ၊ ဒဲဉ်ကံဆန်ꩻ(၈)နီꩻနဝ်ꩻ ချꩻသွော့ကလူꩻ၊ ထိုမ်းလွေꩻမွုန်း ခင်ႏဖါႏဖြွီꩻသီႏ၊ ထိုမ်းဒျာႏသွော့ ခင်ႏဖါႏလိုꩻကျောင်ꩻ၊ သင်္ကန်ꩻဖြေင်း တနျာႏလွဉ်ꩻ၊ အွူႏလွဉ်ꩻ၊ တသီးလွဉ်ꩻ(နုဲင်းသင်္ကန်ꩻထုဲင်ႏ)ဖုံႏနဝ်ꩻ ဗုဲင်လွေꩻမွုန်း၊ တကာႏငါနဝ်ꩻ တွက်မွုန်းဆဲး၊ ဒေါ့ꩻမွုန်းဆဲးခရာႏ၊ ဒေါ့ꩻမွုန်းအဖြေꩻအစာခရာႏ၊ အလုပ်ꩻအခွုမ်ခရာႏ၊ ဒေါ့ꩻဒျာႏသွော့ ငဝ်းအကျိုꩻအာအာ၊ အစစအရာႏရာႏ ဖေႏကထွာဒျာႏ ကေညိုႏခရာႏလွဉ်းလွဉ်းနဝ်ꩻသွူ။
ဥက္ကဋ္ဌ ( ကောဝိဒ ) ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏစွိုꩻ[၁][၂]