ဟော်ꩻဖေႏအနုရုဒ္ဓါႏသီး
"နဠကပါနသုတ် (ဗွေႏဘုရာꩻဟော်ꩻဖေႏ ဗွေႏအနုရုဒ္ဓါႏသီးတရာꩻ)" အနုရုဒ္ဓါႏ၊ ဘဒ္ဒိယ၊ ကိမိလ၊ ဘဂု၊ ကောဏ္ဍည၊ ရေဝတ၊ အာႏနန္ဒာႏ-လိုꩻကျောင်ႏထင်ႏသျာꩻဖုံႏ လွဉ်ဗုဲင်ရဟန်ꩻ ဗွေႏဘုရာꩻထျꩻ၊ လွိုဝွေꩻဗွေႏသီး လိုꩻလင်ဖုံႏ ကထင်ႏဗုဲင်ရဟန်ꩻ ဗွေႏဘုရာꩻထျꩻနောဝ်ꩻတဲ့ အဝ်ႏအတန်သွူ။ နီဗွေႏဘုရာꩻရီ- "ကထင်ႏဗုဲင်ရဟန်ꩻ ခွေထျꩻဖုံႏနဝ်ꩻ ပျောႏလွဉ်ꩻ(လို့)ဒျာႏ အကျင်ꩻမျတ်ဖုံႏဟောင်းနဲး"နီဗွေႏဘုရာꩻရီနုဲင်းနဝ်ꩻ သွံလဲင်ႏတရေꩻရေꩻ၊ တပါꩻပါꩻပေႏငါတဲ့ လောဝ်းချာတဝ်း ထမုဲင်ꩻမုဲင်ꩻတဲင်တွော့ꩻ နီဗွေႏဘုရာꩻရီစွော့ꩻစွဉ်ႏ ပဉ်ပါꩻပါꩻ။ "အနုရုဒ္ဓါႏ- ထွာနုဲင်းမုဲင်ꩻ၊ သီဖုံႏနဝ်ꩻ ပျောႏလွဉ်ꩻနေဟောင်း အကျင်ꩻမျတ်ဖုံႏဟောင်း" "ဩဗွေႏ ဘုရာꩻမျတ်ဗွေႏဩ- နီသွဉ်းသီးနဝ်ꩻ ပျောႏလွဉ်ꩻမွေးဒျာႏ အကျင်ꩻမျတ် ဗွေႏဩ" "သာႏဓု၊ သာႏဓု အနုရုဒ္ဓါႏ- သီထင်ႏဗုဲင်ရဟန်ꩻ ပျောႏလွဉ်ꩻအကျင်ꩻမျတ်နဝ်ꩻ မွေးငါႏ၊ သီနဝ်ꩻအရယ်ႏ အဝ်ႏပေႏအဝ်ႏဆားနေ၊ မဉ်ႏတောႏလမ်းတောႏပါႏ၊ မီႏမဉ်ခံႏစာꩻဒျာႏ ကာႏမဂွုဏ်ႏအာႏရွုံႏငတ်ꩻပါꩻတဲ့ အောဝ်ႏလꩻဒျာႏသွူတဲ့ သီသမ်းထင်ႏဗုဲင်ဒျာႏ ရဟန်ꩻနုဲင်းယိုနဝ်ꩻ အံႏဖြာႏထွိုက်ငါႏသီ၊ သီဖုံႏနဝ်ꩻ ခွန်နိစ္စက် တခွန်ꩻနိစ္စက် ဘေꩻရန်ႏနိစ္စက်တဲင် ခံႏနွောင်ꩻတဝ်းတွော့ꩻ ထင်ႏဗုဲင်တဲ့-မွေးတဝ်း၊ နီးတန်(ထိုꩻလဲ့ꩻနီး)တဲင် ထင်ႏဗုဲင်ရဟန်ꩻ-မွေးတဝ်း၊ လွူးနမ်းဗွာတဝ်းတဲင်တွော့ꩻ ထင်ႏဗုဲင်ရဟန်ꩻ-မွေးတဝ်း၊ သီဖုံႏနဝ်ꩻ- အဝ်ႏခံ-အဝ်ႏဗီမ်သော့ꩻ 'ကွုတ်ဒုက္ခ၊ ဖြားဒုက္ခ၊ သီဒုက္ခ၊ နန်းခီဒုက္ခ၊ ငွိုးဒုက္ခ၊ (ရွိုးဒုက္ခ)နမ်းဒုက္ခ၊ သꩻဒုက္ခ၊ ရွိုးလွားဒုက္ခ-ကိုတဲင် နီမဉ်ႏဗုဲင်ရဟန်ꩻ နီမဉ်ႏအားထွုတ်ကမ္မဋ္ဌာန်ꩻနဝ်ꩻ အဝ်ႏအွိုးခန္ဓာႏဒုက္ခတူႏ၊ ခန္ဓာႏဒုက္ခခြုံးကိုယို ရလွစ်နွောင်ꩻမွော့နဲး'ယူႏနုဲင်းနဝ်ꩻတွော့ꩻ သိနွို့သော့ꩻသာႏသနာႏ၊ နေးတွမ်ႏသဒ္ဓါႏတရာꩻ ထင်ႏဗုဲင်ဒျာႏမွေးတဝ်းနဲ့" "မွေး-ဗွေႏဩ" အနုရုဒ္ဓါႏသီးဖုံႏဟွေး- ပယ်ႏနွောင်ꩻ ကာႏမဂွုဏ်ႏတဲင် နစ်သက်(ပီတိ)၊ ပက်ထိုꩻနွောင်ꩻ အကုသိုလ်ႏတွော့ꩻ ချမ်ꩻသာႏ(သုခ)၊ ပေါႏသီတလꩻတဝ်း'ပီတိ-သုခ'နဝ်ꩻနဝ်ꩻ- အဘိဇ္ဈာ(လောဘ)၊ ဗျာပါဒ(ဒေါသ)၊ ထိနမိဒ္ဓ(ထာꩻလွꩻထာꩻတခေင်ꩻ)၊ ဥဒ္ဓစ္စ ကုက္ကုစ္စ(သꩻလော်လယ်၊ သံသယ)၊ ဝိစိကိစ္ဆာႏ (မွေးနေဟောင်းနဲး) တရာꩻဖုံႏနောဝ်ꩻနွုတ်ꩻပါꩻ အောဝ်ႏရိုးပ်အပ်ခါꩻမွိုင်းဒျာႏ သီသꩻတဲင် 'ပီတိ-သုခ'တဲ့နဝ်ꩻ၊ လွိုကနဝ်ꩻ ထာꩻချမ်ꩻသာႏ အလင်တဲ့နဝ်ꩻ သီတလꩻနွောင်ꩻတဝ်း။ အနုရုဒ္ဓါႏသီးဖုံႏဟွေး- သီမဉ်ႏလꩻ 'ပီတိ-သုခ'နဝ်ꩻတဲ့နောဝ်ꩻ၊ ချမ်ꩻသာႏအလောင်ႏအလင်တဲ့နောဝ်ꩻ အဘိဇ္ဈာ(လောဘ)၊ ဗျာပါဒ(ဒေါသ)၊ ထိနမိဒ္ဓ(ထာꩻလွꩻထာꩻတခေင်ꩻ)စတဲင် တရာꩻနွုတ်ꩻပါꩻနဝ်ꩻ ရုပ်ခါꩻသီ တလꩻတောဝ်း၊ နစ်သက်-သုခ အုံခွꩻသာႏယာႏဗာႏထာꩻနောဝ်ꩻသွူ။ အနုရုဒ္ဓါႏ- သီထီႏခွေ သီထင်းနုဲင်းမုဲင်ꩻ၊ နီဗွေႏဘုရာꩻနဝ်ꩻ- "ကမာꩻထွာဒါႏ ဘဝတသာ၊ ကမာꩻခိုးလျားဒါႏလိုꩻ၊ ကမာꩻဒုက္ခဒါႏလိုꩻ၊ ကမာꩻကွုတ်၊ ကမာꩻဖြား၊ ကမာꩻသီဒါႏလိုꩻ၊ 'အာသဝတရာꩻ'ဖုံႏနဝ်ꩻ နီဗွေႏဘုရာꩻလꩻပယ်ႏဗာႏဒွိုန်း၊ ကွပ်နဝ်ꩻမꩻ နီဗွေႏဘုရာꩻနဝ်ꩻ- 'ယင်ဟန်ႏနဝ်ꩻ ဆင်ႏချင်ႏသွုံꩻ၊ ယင်ဟန်ႏနဝ်ꩻ ဆင်ႏချင်ႏသယ်ꩻခံႏ၊ ယင်ဟန်ႏနဝ်ꩻ ဆင်ႏချင်ႏလဲ့ꩻဖုဲင်းထိုꩻ၊ ယင်ဟန်ႏနဝ်ꩻ ဆင်ႏချင်ႏယားဖေ့ထိုꩻ'သီထင်းနုဲင်းနဝ်ꩻနဲ့" "နီသွဉ်းသီး ထင်းတဝ်းနုဲင်းနဝ်ꩻ ဗွေႏဩ" ဩဗွေႏ ဘုရာꩻမျတ်ဗွေႏဩ- 'ကမာꩻထွာဒါႏ ဘဝတသာ၊ ကမာꩻခိုးလျားဒါႏလိုꩻ၊ ကမာꩻဒုက္ခဒါႏလိုꩻ၊ ကမာꩻကွုတ်၊ ကမာꩻဖြား၊ ကမာꩻသီဒါႏလိုꩻ 'အာသဝတရာꩻ'ဖုံႏနဝ်ꩻ နီဗွေႏဘုရာꩻ ပယ်ႏထွူလို့လဲဉ်း၊ ကွပ်နဝ်ꩻမꩻ နီဗွေႏဘုရာꩻနဝ်ꩻ- 'ယင်ဟန်ႏနဝ်ꩻ ဆင်ႏချင်ႏသွုံꩻ၊ ယင်ဟန်ႏနဝ်ꩻ ဆင်ႏချင်ႏသယ်ꩻခံႏ၊ ယင်ဟန်ႏနဝ်ꩻ ဆင်ႏချင်ႏလဲ့ꩻဖုဲင်းထိုꩻ၊ ယင်ဟန်ႏနဝ်ꩻ ဆင်ႏချင်ႏယားဖေ့ထိုꩻ'နီသွဉ်းသီး ထင်းဒျာႏနုဲင်းနဝ်ꩻ ဗွေႏဩ"(လောဝ်းနုဲင်းနဝ်ꩻ)။ "အနုရုဒ္ဓါႏသီးဖုံႏဟွေး- သာဓု-သာဓု ဟောဝ်ငါႏ-မွေးငါႏ၊ အနုရုဒ္ဓါႏသီးဖုံႏဟွေး- 'အာသဝတရာꩻ'ဖုံႏနဝ်ꩻ ခွေပယ်ႏထွူလို့လဲဉ်း၊ ခွေခူႏထိုꩻလို့လဲဉ်းအရွီး၊ ခွေမာꩻသေင်ထိုꩻလို့လဲဉ်း နုဲင်းထန်ꩻရွီးသေင်နဝ်ꩻ၊ တွိုႏဆုဲင်ꩻတနီꩻခါ ဖေႏကဒေါ့ꩻချာမွူးန်နဝ်ꩻ ခွေမာꩻထွူလဲဉ်း၊ မာꩻခန်းနုဲင်းမုဲင်ꩻမုဲင်ꩻတဲ့ယဝ်း တဒေါ့ꩻချာနွောင်ꩻတဝ်းဒွုမ်၊ ကွပ်နဝ်ꩻမꩻ သီကထင်းနဝ်ꩻ မွေးငါႏ၊ ပွိုးနဝ်ꩻမꩻ ခွေဆင်ႏချင်ႏဒျာႏနုဲင်းနောဝ်ꩻသွူ။ အနုရုဒ္ဓါႏသီးဖုံႏဟွေး- "ကသီငါထိုꩻ ပါꩻကမဉ်ꩻနုဲင်းယိုနဝ်ꩻ 'လွေꩻထွာဘဝယို'၊ ပါꩻကမဉ်ꩻနုဲင်းနဝ်ꩻနဝ်ꩻ 'အလွေꩻကွုတ်ဘဝနဝ်ꩻ' ခွေကဟော်ꩻဗာႏ 'ထာꩻကွုတ်ခရာႏ'နဝ်ꩻ ခွေထီႏအကျိုꩻတရာꩻနုဲင်းမုဲင်ꩻ သီသေနေဟောင်း' "နီသွဉ်းသီး အမျိုꩻသေနဲ့ဗွေႏ- တရာꩻကားကအဝ်ႏနဝ်ꩻ အထျꩻမူလ အဝ်ႏနီဗွေႏဘုရာꩻထျꩻလွဉ်၊ နီဗွေႏဘုရာꩻအွဉ်မꩻသေ၊ နီဗွေႏဘုရာꩻသွဉ်မꩻ သေဗာႏ၊ နီဗွေႏဘုရာꩻသွဉ်မꩻ သေနာႏ၊ နီသွဉ်းသီး တောင်ꩻပြန်ႏဗာႏ ဗွေႏဆရာႏဩ၊ ဟော်ꩻဖေႏသွော့ နီသွဉ်းသီးတရာꩻ ဗွေႏဩ၊ ဗွေႏဘုရာꩻဟော်ꩻနယ်မꩻ နီသွဉ်းသီးသေဗာႏ အနက်အဓိပ္ပါယ်ႏ၊ နီသွဉ်းသီး အီႏသွဉ်အွံသနယ် ဗွေႏဩ"(လောဝ်းလွနုဲင်းနောဝ်ꩻသွူ)။ အနုရုဒ္ဓါႏသီးဖုံႏဟွေး- ခွေကဟော်ꩻဗာႏ ထာꩻကွုတ်ခရာႏနဝ်ꩻ ဝင်ꩻဖေႏနေး ကအံႏဖြာႏခွေမွေးတဝ်း၊ ဖေႏနေးခွေကကျောႏ၊ ဖေႏနေးခွေလာဘ်ကလွိုင်ႏမွေးတဝ်း၊ သဒ္ဓါႏတရာꩻကအဝ်ႏဒါႏ တကာႏမူႏခို မဉ်ႏဟွိုန်ဗာႏတရာꩻနုဲင်းယိုနဝ်ꩻ အသꩻယွုမ်းလွဉ်တရာꩻ၊ မာꩻလွဉ်အာကုသိုလ်ႏ၊ ပေါႏယွုမ်းတရာꩻ၊ ပေါႏမာꩻအာကုသိုလ်ႏနဝ်ꩻ ချိန်ႏခါႏညဆွာꩻ စီꩻပွါꩻချမ်ꩻသာႏ ထွာအာတန်နောဝ်ꩻသွူ။ အနုရုဒ္ဓါႏသီးဖုံႏဟွေး- 'ရဟန်ꩻကလွဉ်ႏထိုꩻ (နဝ်ꩻတပါꩻ)နဝ်ꩻ (လꩻလစ်ꩻမဂ်လစ်ꩻဖိုလ်ႏ) ထွာရဟန္တာႏ'ကထွိုင်ႏဟွိုန်နုဲင်းနဝ်ꩻတဲင် (ရဟန်ꩻသီးဖုံႏရိုꩻ) 'အမွေးဒျာႏရင်ꩻ' ဝွေꩻဗွေႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ ကိလေႏသာႏလို့၊ ထွာရဟန္တာႏဒျာႏရင်ꩻ၊ နမ်းထီႏကေႏညိုႏဗာႏတွော့ꩻ ယူႏလꩻရဟန်ꩻ(ကလွဉ်ႏထိုꩻ)နဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) ရဟန်ꩻပုဂ္ဂိုလ်ႏသီးအတာႏတဲ့ ထွာအီချမ်ꩻသာႏ၊ အုံဗာႏခွꩻခွꩻနောဝ်ꩻသွူ။ အနုရုဒ္ဓါႏသီးဖုံႏဟွေး- 'ရဟန်ꩻကလွဉ်ႏထိုꩻ (နဝ်ꩻတပါꩻ)နဝ်ꩻ (လꩻသွံမဂ်သိုမ်ဖိုလ်ႏ) ထွာအနာႏဂါမ်ႏပုဂ္ဂိုလ်ႏ၊ တွိုႏထင်ႏသုဒ္ဓါဝါသ ဗျဟ္မာႏခမ်း၊ ဝွေꩻနဝ်ꩻ သဲင်ꩻကွုတ်ချာတဝ်းဒွုမ် ကာမဘွုံႏယို၊ အီႏထွာဒျာႏရဟန္တာႏ ဗျဟ္မာႏခမ်းသူꩻ၊ အီႏကူꩻတငါဒျာႏနိဗ္ဗာန်ႏ ဗျဟ္မာႏခမ်း၊ ခင်ႏလမ်းစင်ဗွာ သုဒ္ဓါဝါသဘွုံႏကိုသူꩻသွူ။ ကထင်ႏဟော်ꩻနုဲင်းနဝ်ꩻတဲင် ရဟန်ꩻကဟွူန်သားတဲ့နဝ်ꩻ၊ ဟွူန်ဝင်ꩻဒေါ့ꩻတဲ့နဝ်ꩻ ဝွေꩻသီးရိုꩻ- 'အမွေးဒျာႏရင်ꩻ' ဝွေꩻဗွေႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ သံယော်ꩻဇဉ်ႏငတ်ꩻပါꩻလို့၊ ထွာအနာႏဂါမ်ႏပုဂ္ဂိုလ်ႏဒျာႏရင်ꩻ၊ နမ်းထီႏကေႏညိုႏဗာႏတွော့ꩻ ယူႏလꩻရဟန်ꩻ(ကလွဉ်ႏထိုꩻ)နဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) ရဟန်ꩻပုဂ္ဂိုလ်ႏသီးအတာႏတဲ့ ထွာအီချမ်ꩻသာႏ၊ အုံဗာႏရျူႏရျူႏနောဝ်ꩻသွူ။ အနုရုဒ္ဓါႏသီးဖုံႏဟွေး- 'ရဟန်ꩻကလွဉ်ႏထိုꩻ (နဝ်ꩻတပါꩻ)နဝ်ꩻ (လꩻနီမဂ်နီဖိုလ်ႏ) ထွာသကဒါႏဂါမ်ႏပုဂ္ဂိုလ်ႏ၊ အီႏသဲင်ꩻကွုတ်ချာ လိုꩻလောကကိုယို တလဲင်ႏလွုမ်ꩻ၊ (အီႏထွာတငါသွူ ရဟန္တာႏ၊ အီႏကူꩻသွူနိဗ္ဗာန်ႏ)နောဝ်ꩻသွူ။ ကထွိုင်ႏဟော်ꩻနုဲင်းနဝ်ꩻတဲင် ကဟွိုန်သားဖုံႏတဲ့နဝ်ꩻ၊ ဟွိုန်ဝင်ꩻဒေါ့ꩻတဲ့နဝ်ꩻ ဝွေꩻသီးရိုꩻ- 'အမွေးဒျာႏရင်ꩻ' ဝွေꩻဗွေႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ သံယော်ꩻဇဉ်ႏသွံပါꩻလို့၊ ထွာသကဒါႏဂါမ်ႏဒျာႏရင်ꩻ၊ နမ်းထီႏကေႏညိုႏဗာႏတွော့ꩻ ယူႏလꩻရဟန်ꩻ(ကလွဉ်ႏထိုꩻ)နဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) ရဟန်ꩻပုဂ္ဂိုလ်ႏသီးအတာႏတဲ့ ထွာအီချမ်ꩻသာႏ၊ အုံဗာႏရောင်းရောင်းနောဝ်ꩻသွူ။ အနုရုဒ္ဓါႏသီးဖုံႏဟွေး- 'ရဟန်ꩻကလွဉ်ႏထိုꩻ (နဝ်ꩻတပါꩻ)နဝ်ꩻ (လꩻတမဂ်တဖိုလ်ႏ) ထွာသောႏတာႏပန်ႏပုဂ္ဂိုလ်ႏ၊ တထဲ့နွောင်ꩻဒူမ် အပါယ်ႏလစ်ꩻခမ်း၊ အီႏလꩻကီထဲင်း သွံမဂ်သေႏချာႏ၊ အီႏထွာရဟန္တာႏ အီႏကူꩻတငါသွူ နိဗ္ဗာန်ႏနောဝ်ꩻသွူ။ ကထင်ႏဟော်ꩻနုဲင်းနောဝ်ꩻတဲင် 'အမွေးဒျာႏရင်ꩻ'ယူႏနုဲင်းနဝ်ꩻတွော့ꩻ သဒ္ဓါႏတရာꩻ ယိန်းထွာအာ၊ (သꩻယိးင်တလာ ကုသိုလ်ႏဖဲ့ꩻ) ရဟန်ꩻပုဂ္ဂိုလ်ႏသီးအတာႏတဲ့ ထွာအီချမ်ꩻသာႏ၊ အုံဗာႏကြောင်းကြောင်းနောဝ်ꩻသွူ။ အနုရုဒ္ဓါႏသီးဖုံႏဟွေး- 'ရဟန်ꩻမူႏကလွဉ်ႏထိုꩻနဝ်ꩻနဝ်ꩻ (လꩻလစ်ꩻမဂ်လစ်ꩻဖိုလ်ႏ) ထွာရဟန္တာႏ'ကထွိုင်ႏဟွိုန်နုဲင်းနောဝ်ꩻတဲင် (ရဟန်ꩻမူႏသီးရိုꩻ) 'အမွေးဒျာႏရင်ꩻ' ဗွေႏမူႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ ကိလေႏသာႏလို့၊ ထွာရဟန္တာႏဒျာႏရင်ꩻ၊ နမ်းထီႏတဲ့နဝ်ꩻ၊ ဟွိုန်ဝင်ꩻဒေါ့ꩻတဲ့နဝ်ꩻ ယူႏလꩻရဟန်ꩻမူႏနဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) ရဟန်ꩻမူႏသီးအတာႏတဲ့ ထွာအီချမ်ꩻသာႏ၊ အုံဗာႏခွꩻခွꩻနောဝ်ꩻသွူ။ အနုရုဒ္ဓါႏသီးဖုံႏဟွေး- 'ရဟန်ꩻမူႏကလွဉ်ႏထိုꩻနဝ်ꩻနဝ်ꩻ (လꩻသွံမဂ်သိုမ်ဖိုလ်ႏ) ထွာအနာႏဂါမ်ႏပုဂ္ဂိုလ်ႏ၊ တွိုႏထင်ႏသုဒ္ဓါဝါသ ဗျဟ္မာႏခမ်း၊ ဝွေꩻနဝ်ꩻ သဲင်ꩻကွုတ်ချာတဝ်းဒွုမ် ကာမဘွုံႏယို၊ အီႏထွာဒျာႏရဟန္တာႏ ဗျဟ္မာႏခမ်းသူꩻ၊ အီႏကူꩻတငါဒျာႏနိဗ္ဗာန်ႏ ဗျဟ္မာႏခမ်း၊ ခင်ႏလမ်းစင်ဗွာ သုဒ္ဓါဝါသဘွုံႏကိုသူꩻသွူ။ ကထင်ႏဟော်ꩻနုဲင်းနဝ်ꩻတဲင် ရဟန်ꩻကဟွိုန်သားတဲ့နဝ်ꩻ၊ ဟွူန်ဝင်ꩻဒေါ့ꩻသားတဲ့နဝ်ꩻ ဝွေꩻသီးရိုꩻ- 'အမွေးဒျာႏရင်ꩻ' ဗွေႏမူႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ သံယော်ꩻဇဉ်ႏငတ်ꩻပါꩻလို့၊ ထွာအနာႏဂါမ်ႏပုဂ္ဂိုလ်ႏဒျာႏရင်ꩻ၊ နမ်းထီႏတဲ့နဝ်ꩻ၊ ဟွူန်ဝင်ꩻဒေါ့ꩻတဲ့နဝ်ꩻ ယူႏလꩻ ရဟန်ꩻမူႏ(ကလွဉ်ႏထိုꩻ)နဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) ရဟန်ꩻမူႏသီးအတာႏတဲ့ ထွာအီချမ်ꩻသာႏ၊ အုံဗာႏရျူႏရျူႏနောဝ်ꩻသွူ။ အနုရုဒ္ဓါႏသီးဖုံႏဟွေး- 'ရဟန်ꩻမူႏကလွဉ်ႏထိုꩻနဝ်ꩻနဝ်ꩻ (လꩻနီမဂ်နီဖိုလ်ႏ) ထွာသကဒါႏဂါမ်ႏပုဂ္ဂိုလ်ႏ၊ အီႏသဲင်ꩻကွုတ်ချာ လိုꩻလောကကိုယို တလဲင်ႏလွုမ်ꩻ၊ (အီႏထွာတငါသွူ ရဟန္တာႏ၊ အီႏကူꩻသွူနိဗ္ဗာန်ႏ)နောဝ်ꩻသွူ။ ကထွိုင်ႏဟော်ꩻနုဲင်းနဝ်ꩻတဲင် ကဟွိုန်သားဖုံႏတဲ့နဝ်ꩻ၊ ဟွိုန်ဝင်ꩻဒေါ့ꩻတဲ့နဝ်ꩻ ဝွေꩻသီးရိုꩻ- 'အမွေးဒျာႏရင်ꩻ' ဗွေႏမူႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ သံယော်ꩻဇဉ်ႏသွံပါꩻလို့၊ ထွာသကဒါႏဂါမ်ႏဒျာႏရင်ꩻ၊ နမ်းထီႏကေႏညိုႏတွော့ꩻ ယူႏလꩻရဟန်ꩻမူႏ(ကလွဉ်ႏထိုꩻ)နဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) ရဟန်ꩻမူႏသီးအတာႏတဲ့ ထွာအီချမ်ꩻသာႏ၊ အုံဗာႏရောင်းရောင်းနောဝ်ꩻသွူ။ အနုရုဒ္ဓါႏသီးဖုံႏဟွေး- ဘိက္ခုနိ-ရဟန်ꩻမူႏကလွဉ်ႏထိုꩻနဝ်ꩻနဝ်ꩻ (လꩻတမဂ်တဖိုလ်ႏ) ထွာသောႏတာႏပန်ႏပုဂ္ဂိုလ်ႏ၊ တထဲ့နွောင်ꩻဒူမ် အပါယ်ႏလစ်ꩻခမ်း၊ အီႏလꩻကီထဲင်း သွံမဂ်သေႏချာႏ၊ အီႏထွာရဟန္တာႏ အီႏကူꩻတငါသွူ နိဗ္ဗာန်ႏနောဝ်ꩻသွူ။ ကထင်ႏဟော်ꩻနုဲင်းနောဝ်ꩻတဲင် 'အမွေးဒျာႏရင်ꩻ'ယူႏနုဲင်းနဝ်ꩻတွော့ꩻ သဒ္ဓါႏတရာꩻ ယိန်းထွာအာ၊ (သꩻယိးင်တလာ ကုသိုလ်ႏဖဲ့ꩻ) ရဟန်ꩻမူႏသီးအတာႏတဲ့ ထွာအီချမ်ꩻသာႏ၊ အုံဗာႏကြောင်းကြောင်းနောဝ်ꩻသွူ။ အနုရုဒ္ဓါႏသီးဖုံႏဟွေး- 'ဥပါသကာႏ ကကုဲင်ထိုꩻနဝ်ꩻနဝ်ꩻ (လꩻလစ်ꩻမဂ်လစ်ꩻဖိုလ်ႏ) ထွာရဟန္တာႏ'ကထွိုင်ႏဟွိုန်နုဲင်းနဝ်ꩻတဲင် (တကာႏခိုဖုံႏရိုꩻ) 'အမွေးဒျာႏရင်ꩻ' ဖါဗွေႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ ကိလေႏသာႏလို့၊ ထွာရဟန္တာႏဒျာႏရင်ꩻ၊ နမ်းထီႏကေႏညိုႏဗာႏတွော့ꩻ ယူႏလꩻတကာႏ ကကုဲင်ထိုꩻနဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) တကာႏခိုသီးအတာႏတဲ့ ထွာအီချမ်ꩻသာႏ၊ အုံဗာႏခွꩻခွꩻနောဝ်ꩻသွူ။ အနုရုဒ္ဓါႏသီးဖုံႏဟွေး- 'ကကုဲင်ထိုꩻ တကာႏနဝ်ꩻနဝ်ꩻ (လꩻသွံမဂ်သိုမ်ဖိုလ်ႏ) ထွာအနာႏဂါမ်ႏပုဂ္ဂိုလ်ႏ၊ တွိုႏထင်ႏသုဒ္ဓါဝါသ ဗျဟ္မာႏခမ်း၊ ဝွေꩻနဝ်ꩻ သဲင်ꩻကွုတ်ချာတဝ်းဒွုမ် ကာမဘွုံႏယို၊ အီႏထွာဒျာႏရဟန္တာႏ ဗျဟ္မာႏခမ်းသူꩻ၊ အီႏကူꩻတငါဒျာႏနိဗ္ဗာန်ႏ ဗျဟ္မာႏခမ်း၊ ခင်ႏလမ်းစင်ဗွာ သုဒ္ဓါဝါသဘွုံႏကိုသူꩻသွူ။ ကထင်ႏဟော်ꩻနုဲင်းနဝ်ꩻတဲင် တကာႏကဟွူန်သားတဲ့နဝ်ꩻ၊ ဟွူန်ဝင်ꩻဒေါ့ꩻတဲ့နဝ်ꩻ ဝွေꩻသီးရိုꩻ- 'အမွေးဒျာႏရင်ꩻ' ဖါဗွေႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ သံယော်ꩻဇဉ်ႏငတ်ꩻပါꩻလို့၊ ထွာအနာႏဂါမ်ႏပုဂ္ဂိုလ်ႏဒျာႏရင်ꩻ၊ နမ်းထီႏကေႏညိုႏဗာႏတွော့ꩻ ယူႏလꩻတကာႏ (ကကုဲင်ထိုꩻ)နဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) တကာႏသီးအတာႏတဲ့ ထွာအီချမ်ꩻသာႏ၊ အုံဗာႏရျူႏရျူႏနောဝ်ꩻသွူ။ အနုရုဒ္ဓါႏသီးဖုံႏဟွေး- 'တကာႏကကုဲင်ထိုꩻနဝ်ꩻနဝ်ꩻ (လꩻနီမဂ်နီဖိုလ်ႏ) ထွာသကဒါႏဂါမ်ႏပုဂ္ဂိုလ်ႏ၊ အီႏသဲင်ꩻကွုတ်ချာ လိုꩻလောကကိုယို တလဲင်ႏလွုမ်ꩻ၊ (အီႏထွာတငါသွူ ရဟန္တာႏ၊ အီႏကူꩻသွူနိဗ္ဗာန်ႏ)နောဝ်ꩻသွူ။ ကထွိုင်ႏဟော်ꩻနုဲင်းနဝ်ꩻတဲင် ကဟွိုန်သားဖုံႏတဲ့နဝ်ꩻ၊ ဟွိုန်ဝင်ꩻဒေါ့ꩻတဲ့နဝ်ꩻ ဝွေꩻသီးရိုꩻ- 'အမွေးဒျာႏရင်ꩻ' ဖါဗွေႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ သံယော်ꩻဇဉ်ႏသွံပါꩻလို့၊ ထွာသကဒါႏဂါမ်ႏဒျာႏရင်ꩻ၊ နမ်းထီႏကေႏညိုႏဗာႏတွော့ꩻ ယူႏလꩻတကာႏ(ကကုဲင်ထိုꩻ)နဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) တကာႏခိုသီးအတာႏတဲ့ ထွာအီချမ်ꩻသာႏ၊ အုံဗာႏရောင်းရောင်းနောဝ်ꩻသွူ။ အနုရုဒ္ဓါႏသီးဖုံႏဟွေး- 'တကာႏကကုဲင်ထိုꩻနဝ်ꩻနဝ်ꩻ (လꩻတမဂ်တဖိုလ်ႏ) ထွာသောႏတာႏပန်ႏပုဂ္ဂိုလ်ႏ၊ တထဲ့နွောင်ꩻဒူမ် အပါယ်ႏလစ်ꩻခမ်း၊ အီႏလꩻကီထဲင်း သွံမဂ်သေႏချာႏ၊ အီႏထွာရဟန္တာႏ အီႏကူꩻတငါသွူ နိဗ္ဗာန်ႏနောဝ်ꩻသွူ။ ကထင်ႏဟော်ꩻနုဲင်းနောဝ်ꩻတဲင် 'အမွေးဒျာႏရင်ꩻ'ယူႏနုဲင်းနဝ်ꩻတွော့ꩻ သဒ္ဓါႏတရာꩻ ယိန်းထွာအာ၊ (သꩻယီးင်တလာ ကုသိုလ်ႏဖဲ့ꩻ) တကာႏခိုသီးအတာႏတဲ့ ထွာအီချမ်ꩻသာႏ၊ အုံဗာႏကြောင်းကြောင်းနောဝ်ꩻသွူ။ အနုရုဒ္ဓါႏသီးဖုံႏဟွေး- 'ကကုဲင်ထိုꩻ တကာႏမမူႏနဝ်ꩻနဝ်ꩻ (လꩻလစ်ꩻမဂ်လစ်ꩻဖိုလ်ႏ) ထွာရဟန္တာႏ'ကထွိုင်ႏဟွိုန်နုဲင်းနောဝ်ꩻတဲင် (တကာႏမူႏသီးရိုꩻ) 'အမွေးဒျာႏရင်ꩻ' ဗွေႏမူႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ ကိလေႏသာႏလို့၊ ထွာရဟန္တာႏဒျာႏရင်ꩻ၊ နမ်းထီႏတဲ့နဝ်ꩻ၊ ဟွိုန်ဝင်ꩻဒေါ့ꩻတဲ့နဝ်ꩻ ယူႏလꩻတကာႏမူႏ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) တကာႏမူႏသီးအတာႏတဲ့ ထွာအီချမ်ꩻသာႏ၊ အုံဗာႏခွꩻခွꩻနောဝ်ꩻသွူ။ အနုရုဒ္ဓါႏသီးဖုံႏဟွေး- 'တကာႏမူႏ ကကုဲင်ထိုꩻနဝ်ꩻနဝ်ꩻ (လꩻသွံမဂ်သိုမ်ဖိုလ်ႏ) ထွာအနာႏဂါမ်ႏပုဂ္ဂိုလ်ႏ၊ တွိုႏထင်ႏသုဒ္ဓါဝါသ ဗျဟ္မာႏခမ်း၊ ဝွေꩻနဝ်ꩻ သဲင်ꩻကွုတ်ချာတဝ်းဒွုမ် ကာမဘွုံႏယို၊ အီႏထွာဒျာႏရဟန္တာႏ ဗျဟ္မာႏခမ်းသူꩻ၊ အီႏကူꩻတငါဒျာႏနိဗ္ဗာန်ႏ ဗျဟ္မာႏခမ်း၊ ခင်ႏလမ်းစင်ဗွာ သုဒ္ဓါဝါသဘွုံႏကိုသူꩻသွူ။ ကထင်ႏဟော်ꩻနုဲင်းနဝ်ꩻတဲင် ကဟွိုန်သားတဲ့နဝ်ꩻ၊ ဟွူန်ဝင်ꩻဒေါ့ꩻသားတဲ့နဝ်ꩻ ဝွေꩻသီးရိုꩻ- 'အမွေးဒျာႏရင်ꩻ' ဗွေႏမူႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ သံယော်ꩻဇဉ်ႏငတ်ꩻပါꩻလို့၊ ထွာအနာႏဂါမ်ႏပုဂ္ဂိုလ်ႏဒျာႏရင်ꩻ၊ နမ်းထီႏတဲ့နဝ်ꩻ၊ ဟွူန်ဝင်ꩻဒေါ့ꩻတဲ့နဝ်ꩻ ယူႏလꩻ တကာႏမူႏ(ကကုဲင်ထိုꩻ)နဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) တကာႏမူႏသီးအတာႏတဲ့ ထွာအီချမ်ꩻသာႏ၊ အုံဗာႏရျူႏရျူႏနောဝ်ꩻသွူ။ အနုရုဒ္ဓါႏသီးဖုံႏဟွေး- 'တကာႏမူႏ ကကုဲင်ထိုꩻနဝ်ꩻနဝ်ꩻ (လꩻနီမဂ်နီဖိုလ်ႏ) ထွာသကဒါႏဂါမ်ႏပုဂ္ဂိုလ်ႏ၊ အီႏသဲင်ꩻကွုတ်ချာ လိုꩻလောကကိုယို တလဲင်ႏလွုမ်ꩻ၊ (အီႏထွာတငါသွူ ရဟန္တာႏ၊ အီႏကူꩻသွူနိဗ္ဗာန်ႏ)နောဝ်ꩻသွူ။ ကထွိုင်ႏဟော်ꩻနုဲင်းနဝ်ꩻတဲင် ကဟွိုန်သားဖုံႏတဲ့နဝ်ꩻ၊ ဟွိုန်ဝင်ꩻဒေါ့ꩻတဲ့နဝ်ꩻ ဝွေꩻသီးရိုꩻ- 'အမွေးဒျာႏရင်ꩻ' ဗွေႏမူႏနဝ်ꩻ သီႏလအဝ်ႏ၊ အကျင်ꩻဟောဝ်တန်၊ ပညာႏအဝ်ႏတန်၊ အအုံမဲဉ်ႏထာꩻ၊ သံယော်ꩻဇဉ်ႏသွံပါꩻလို့၊ ထွာသကဒါႏဂါမ်ႏဒျာႏရင်ꩻ၊ နမ်းထီႏကေႏညိုႏဗာႏတွော့ꩻ ယူႏလꩻတကာႏမူႏ(ကကုဲင်ထိုꩻ)နဝ်ꩻ သဒ္ဓါႏ သီႏလ သုတ စာႏဂ ပညာႏတဲင်တွော့ꩻ သဒ္ဓါႏတရာꩻ ယိန်းထွာအာ၊ (သꩻယိင်းတလာ ကုသိုလ်ႏဖဲ့ꩻ) တကာႏမူႏသီးအတာႏတဲ့ ထွာအီချမ်ꩻသာႏ၊ အုံဗာႏရောင်းရောင်းနောဝ်ꩻသွူ။ အနုရုဒ္ဓါႏသီးဖုံႏဟွေး- 'တကာႏမမူႏ ကကုဲင်ထိုꩻနဝ်ꩻနဝ်ꩻ (လꩻတမဂ်တဖိုလ်ႏ) ထွာသောႏတာႏပန်ႏပုဂ္ဂိုလ်ႏ၊ တထဲ့နွောင်ꩻဒူမ် အပါယ်ႏလစ်ꩻခမ်း၊ အီႏလꩻကီထဲင်း သွံမဂ်သေႏချာႏ၊ အီႏထွာရဟန္တာႏ အီႏကူꩻတငါသွူ နိဗ္ဗာန်ႏနောဝ်ꩻသွူ။ ကထင်ႏဟော်ꩻနုဲင်းနောဝ်ꩻတဲင် 'အမွေးဒျာႏရင်ꩻ'ယူႏနုဲင်းနဝ်ꩻတွော့ꩻ သဒ္ဓါႏတရာꩻ ယိန်းထွာအာ၊ (သꩻယီးင်တလာ ကုသိုလ်ႏဖဲ့ꩻ) တကာႏမူႏသီးအတာႏတဲ့ ထွာအီချမ်ꩻသာႏ၊ အုံဗာႏကြောင်းကြောင်းနောဝ်ꩻသွူ။ (သုတ္တန်ႏပိဋကတ်၊ မဇ္ဈိမပဏ္ဏာသပါဠိတောႏ၊ နဠကပါနသုတ်)[၁][၂]