အဒိန္နာဒါနာ

အဝ်ႏ ဝီခီပီးဒီးယား ကို
(အဝ်ႏ အဒိန္နာဒါနာ ဝေရမဏိ ယီးနယ်ချာခါꩻဒျာႏသွူ)

ဗွောင်နယ် အဒိန္နာဒါနာ ဝေရမဏိ ခရာႏ[မွဉ်းဖျင် | မွဉ်းဖျင်အရွီးခိုႏ]

  • အဒိန္န + အာဒါန + ဝေရမဏိ - ဖပွုဒ်နုဲင်းနောဝ်ꩻ။
  • အဒိန္န - ဝင်ꩻဗွေႏတဖေႏတောဝ်း ဝင်ꩻတခြိုꩻ၊
  • အာဒါန - ထူႏတခွန်ꩻ၊
  • ဝေရမဏိ - သျောင်ႏထိုꩻ (ထူႏတခွန်ꩻတောဝ်း)။

ကွပ်နောဝ်ꩻမꩻ "အဒိန္နာဒါနာ ဝေရမဏိ"ကရိုꩻနောဝ်ꩻ- "တခွန်ꩻတောဝ်း ဝင်ꩻတခြိုꩻ"အဓိပ္ပါယ်ႏလꩻနုဲင်းနဝ်ꩻသွူ။ "အဒိန္န-ဝင်ꩻဗွေႏတဖေႏတဝ်း ဝင်ꩻတခြိုꩻ"ကရိုꩻနဝ်ꩻ- ဝင်ꩻဗွေႏနမ်း ထူႏတွမ်ႏစူဖေႏတဲ့ တမွေးတဝ်း၊ "ထူႏဟုဲင်း"စတဲင်နုဲင်းနဝ်ꩻတဲ့ ဝင်ꩻဗွေႏတရိုꩻတဝ်း၊ အဗွေႏထွဉ်ႏ ဝင်ꩻဖေႏပါနုဲင်းနဝ်ꩻတဲ့ တမွေးတဝ်း၊ အွဉ်ႏဒေါ့ꩻဝင်ꩻ ထွဉ်ႏလွဉ်ထူႏစတဲင်နုဲင်းနဝ်ꩻတဲ့ တမွေးတဝ်း၊ မဉ်ႏဒေါ့ꩻယိုꩻယိုꩻ မဉ်ႏရိုꩻဒွေါင်ႏဒွေါင်ႏနဝ်ꩻ "တွမ်ႏစူမယောင်း၊ တွမ်ႏဖြောင်းမရိုꩻ ဝင်ꩻဗွေႏတဖေႏတဝ်း ဝင်ꩻတခြိုꩻ"နောဝ်ꩻသွူ။

အဒိန္န-ထူႏတခွန်ꩻ"ကရိုꩻနောဝ်ꩻ-[မွဉ်းဖျင် | မွဉ်းဖျင်အရွီးခိုႏ]

စွယ်ꩻတရာꩻတဲင် အံႏနွောင်ꩻ ထူႏသိမ်ꩻနွိုင်ႏနေးတဲ့နဝ်ꩻ၊ ဝင်ꩻကထွဉ်ႏလွဉ်ꩻတခြိုꩻနဝ်ꩻ အံႏသိပ်ꩻထိုꩻ၊ အွဉ်ႏသေꩻသူႏထိုꩻတဲ့နဝ်ꩻ၊ ဝင်ꩻကထွဉ်ႏ အွဉ်ႏသိမ်ꩻဟဝ်ပါဒါႏ တခြိုꩻဖုံႏနဝ်ꩻ ဖေႏချာတဝ်း ဝင်ꩻဗွေႏတဲ့နောဝ်ꩻ၊ နမ်း(ကိုႏတဲင်ႏ) ထူႏတခွန်ꩻတဲ့နဝ်ꩻ၊ ထွဉ်ႏဝင်ꩻထူႏတခွန်ꩻတဲ့နဝ်ꩻ၊ တခွန်ꩻယာꩻစူꩻ၊ တခွန်ꩻမဲ၊ တခွန်ꩻအယာႏခဉ်ႏ၊ တခွန်ꩻစာႏရင်ꩻဖုံႏတဲ့နောဝ်ꩻ၊ မာꩻရွဉ်တုꩻ၊ မာꩻခံꩻတုꩻဖုံႏတဲ့နဝ်ꩻ၊ ခွိုင်းကားတဲင် ထာꩻအံꩻပွေႏ၊ ထာꩻအံႏသျပ်၊ ထာꩻအံႏနွောင်ꩻ၊ ထာꩻထူႏနွိုင်ႏ၊ ထာꩻထူႏတခွန်ꩻစတဲင်နုဲင်းနဝ်ꩻဖုံႏနဝ်ꩻ ထွာအဒိန္နာဒါန-ထွာထာꩻတခွန်ꩻလွဉ်းလွဉ်း၊ ထွာ အဒိန္နာဒါန-အကုသိုလ်ႏကံႏလွဉ်းလွဉ်းနောဝ်ꩻသွူ။

ဝေရမဏိ-သျောင်ႏထိုꩻ"(တခွန်ꩻတဝ်း)ကရိုꩻနဝ်ꩻ-[မွဉ်းဖျင် | မွဉ်းဖျင်အရွီးခိုႏ]

နမ်းကိုႏတဲင်ႏတဲ့ သျောင်ႏထိုꩻ၊ တခွန်ꩻတဝ်း၊ မဉ်ႏထီႏမဉ်ႏသေ ဝင်ꩻတခွန်ꩻထာꩻတဲ့ ဆီꩻပါꩻ ရဲခါꩻ ဖေႏတခွန်ꩻတဝ်း၊ ထူႏတခွန်ꩻဝင်ꩻထာꩻနုဲင်းနဝ်ꩻနဝ်ꩻ သꩻရေꩻတဝ်း၊ သဖော်ꩻတူႏတောဝ်း၊ နစ်သက်တဝ်း၊ တခွန်ꩻတဝ်းဝင်ꩻထာꩻ၊ စိုန်တဝ်းထာꩻနဝ်ꩻ ဟောဝ်၊ ထွာအဒိန္နာဒါနာ ဝေရမဏိ-သုစရဲက်၊ ထွာအကျင်ꩻဟဝ်နဝ်ꩻသွူ။ "ဟောဝ်တောဝ်းနုဲင်းမုဲင်ꩻ၊ ဟောဝ်နုဲင်းမုဲင်ꩻ"နဲတဲင်- လိုꩻယဟန်ႏနဝ်ꩻ လွꩻလုပ်ꩻလွꩻခွုမ်ထာꩻ တရိုꩻတဝ်း၊ တောႏလောင်ꩻထာꩻတွော့ꩻ သွုမ်ꩻတန်ထိုꩻ တရိုꩻတောဝ်း၊ မဉ်ခြွေမွိုင်ကြွိုင်ထာꩻ တရိုꩻတဝ်း၊ အံႏမအံႏအောဝ်လဲဉ်းထာꩻ၊ ယူႏထာꩻသူႏသေဒွုမ်တရိုꩻတောဝ်း လွꩻထီႏဝင်ꩻ၊ နာႏလိုႏတောဝ်းဝင်ꩻ၊ တကေးဝင်ꩻတရိုꩻတဝ်း စတဲင်နုဲင်းနဝ်ꩻတဲင် ထူႏတခွန်ꩻဒါႏဝင်ꩻထာꩻ၊ လွေꩻစိုန်ဒါႏထာꩻ။

"ထူႏတခွန်ꩻဝင်ꩻထာꩻ၊ စိုန်ထာꩻ"ကရိုꩻနောဝ်ꩻ-[မွဉ်းဖျင် | မွဉ်းဖျင်အရွီးခိုႏ]

ထွာအကုသိုလ်ႏမꩻ၊ ထွာထာꩻတဟောဝ်ဖြီႏဖြီႏတဲင် တခွန်ꩻထွူစိုန်ထွူတဲ့ သꩻတချမ်ꩻသာႏတဝ်း၊ အံႏအွꩻ ကွဉ်ကꩻဗာႏကီတဲ့ တစင်ႏကြယ်ႏတဝ်း (တကြောင်းစင်တဝ်း) တွမ်ႏကထူႏငါးဝင်ꩻတွော့ꩻ အံႏအွꩻကွဉ်ကꩻအီနဝ်ꩻ ပီလို့ဝင်ꩻ။ "ပါꩻနောဝ်ꩻ စူဟောဝ်တဝ်း၊ ထူႏတခွန်ꩻဒါႏထာꩻ၊ စိုန်ဒါႏထာꩻ လိုꩻတဟောဝ်တဝ်း"ဝင်ꩻဒေါ့ꩻတေ့ꩻ အမဉ်ꩻ အပွုံႏနုဲင်းနဝ်ꩻတဲင် လွေꩻလယ်ႏဝင်ꩻလမ်းဝင်ꩻပါႏ၊ ဝင်ꩻရပ်ရာႏ ဝင်ꩻဒုံကိုတဲ့ ဝင်ꩻတကျွိုက်တဝ်း၊ မဉ်ꩻအွီႏတဝ်း၊ ဂုဏ်ႏသရေႏအဲဉ်ထဝ်း၊ မော့ꩻပဲစ်မော့ꩻတံႏ၊ ခံႏဗာႏဝင်ꩻအစွိုင်အကျꩻ၊ အောဝ်ႏခံꩻအချွုတ်၊ ထဲ့ထောင်ႏ၊ တွိုႏဒါႏထာꩻသီ စတဲင်နုဲင်းနောဝ်ꩻသွူ။ တခွန်ꩻဝင်ꩻထာꩻ၊ စိုန်ထာꩻစတဲင် ထာꩻမာꩻနုဲင်းနောဝ်ꩻဖုံႏနဝ်ꩻ ခြွေခြာႏအီ၊ ချမ်ꩻသာႏအီ၊ မဉ်ꩻအွီႏအီ မွေးတဝ်း၊ ကေန်ꩻခြောအီ၊ ဒုက္ခအီ၊ မဉ်ꩻတကုဲင်အီဖုံႏဒျာႏ၊ တွိုႏဘဝငါတဲ့ လင်ꩻထဲ့ဗာႏငါးရုဲင်ꩻ၊ ကွပ်နဝ်ꩻမꩻ တခွန်ꩻဝင်ꩻထာꩻ (စိုန်ထာꩻ)နဝ်ꩻ ဟဝ်တဝ်းနဝ်ꩻသွူ။

အွꩻမွိုန်းတောဝ်းဒေါဝ်၊ တောႏမွိုန်းတဝ်းဖုဲင်း၊ နေးဒျာႏတွမ်ႏနီအာႏ နီရဲင်ꩻ နီထာꩻကျိုꩻစာꩻမုꩻ နီထာꩻဝွေႏဖန်ႏမုꩻတဲင် လုပ်ꩻမာꩻခွုမ်စံႏကုဲင်းကုဲင်း၊ ဖြေꩻစာကူꩻကား ဟောဝ်ဟောဝ်ဒါႏဒါႏနဝ်ꩻ မဲ့ꩻခြွေခြာႏလွဉ်ဒျာႏ၊ ပိတ်စွဉ်ႏတခြွေခြာႏတဝ်းတဲ့ တအံႏမနွောင်ꩻတဝ်း၊ ကွပ်တစွိုးစွိုး ပွိုးတမျိုꩻမျိုꩻတဲင် လုပ်ꩻမာꩻဗာႏဟောဝ်တောဝ်းတွော့ꩻ မဉ်ႏအံႏမစိန်ႏစွော့ꩻတဲ့ အပဲစ်အဲဉ်ထဝ်း။ တွိုႏဘဝငါသူꩻနဝ်ꩻ ထဲ့ဗာႏတောဝ်းငါးရုဲင်ꩻ၊ သဲင်ꩻထွာဗာႏတဝ်း ဝင်ꩻဖိုး ဝင်ꩻပနား၊ ဝင်ꩻသွဉ်း ဝင်ꩻသယ်ႏ၊ အဗာႏဖေႏ အဗာႏဖြော်တဝ်း ဝင်ꩻတခြိုꩻဥစ္စာႏ၊ သွုမ်ꩻတေင်စွော့ꩻစꩻဒါႏတဝ်းဝင်ꩻထာꩻ၊ တခွန်ꩻဗာႏတဝ်း ဝင်ꩻတခြိုꩻတဲင် ကခံႏစာꩻထွိုက်ဒါႏ အကျိုꩻဖုံႏနဝ်ꩻတဲ့ ခံႏစာꩻဗာႏ၊ လꩻဗာႏနောဝ်ꩻသွူ။

တခွန်ꩻတဝ်း ဝင်ꩻတခြိုꩻတဲင် ကခံႏစာꩻဗာႏအကျိုꩻဖုံႏနဝ်ꩻ-[မွဉ်းဖျင် | မွဉ်းဖျင်အရွီးခိုႏ]

  1. လꩻဗာႏ (သွုံꩻဆောင်ႏဗာႏ) တခြိုꩻအငိုꩻတန်။
  2. တခြိုꩻဥစ္စာႏ ရတနာႏအမျိုꩻမျိုꩻ လွိုင်ႏအာ။
  3. တလꩻဖိုတောဝ်း တခြိုꩻဥစ္စာႏတဲ့ လꩻလွဉ်။
  4. ကအောဝ်ႏထွူလဲဉ်း တခြိုꩻဥစ္စာႏနောဝ်ꩻတဲ့ သွုမ်ꩻပျင်ႏခြေင်တောဝ်း၊ အောဝ်ႏစွူစွူဒျာႏ။
  5. ရန်ႏသူႏငတ်ꩻမျိုꩻ လွဉ်ယားထိုꩻ လꩻတောဝ်း။
  6. ကမဉ်လꩻဒါႏ တခြိုꩻဥစ္စာႏနောဝ်ꩻ လꩻယိုꩻမာꩻပေႏ။
  7. လိုꩻအလောင်ႏလင်ဖုံႏ ကျံႏယား၊ ကျံႏမာꩻတရေင်တဲ့ လꩻတောဝ်း။
  8. ထွာဗာႏ လိုꩻအရန်းထို။
  9. "ထာꩻအဲဉ်ထောဝ်း"ကရိုꩻနောဝ်ꩻ ဟွိုန်ဗာႏဖိုတောဝ်း၊ သေဗာႏဖိုတောဝ်း (ဒေါ့ꩻဗာႏဖိုတောဝ်း။)
  10. အုံအဝ်ႏဗာႏ ချမ်ꩻချမ်ꩻသာႏသာႏ စတဲင်နုဲင်းနဝ်ꩻဖုံႏသွူ။

ကွပ်နောဝ်ꩻမꩻ တခွန်ꩻတောဝ်းဝင်ꩻထာꩻ (စွန်တောဝ်းထာꩻ)နဝ်ꩻ ဟောဝ်ငါႏ မရေႏမရာႏနောဝ်ꩻသွူ။

အဒိန္နာဒါန အင်္ဂါႏ ၅-ပါꩻ[မွဉ်းဖျင် | မွဉ်းဖျင်အရွီးခိုႏ]

(ထူႏတခွန်ꩻဝင်ꩻထာꩻ အချက် ၅-ချက်)

  1. ဝင်ꩻတခြိုꩻဥစ္စာႏတဲ့ မွေးမꩻ။
  2. ဝင်ꩻတခြိုꩻဥစ္စာႏကျောင်ꩻတဲ့ သေမꩻ။
  3. သꩻမဉ်တခွန်ꩻတဲ့ အောဝ်ႏမꩻ။
  4. ဖေႏကလꩻတဲ့ ကျိုꩻစာꩻမꩻ။
  5. ထူႏတခွန်ꩻမွေးမꩻ။

အင်္ဂါႏယို ၅-ပါꩻ မဉ်ႏပြဲ့ꩻစွုံႏလို့မꩻ (အချက်ယို ၅-ချက်မဉ်ႏမဲဉ်ႏတနꩻသော့ꩻလို့မꩻ) ထွာအဒိန္နာဒါန အကုသိုလ်ႏကံႏနဝ်ꩻသွူ။

ကဗျာလင်္ကာႏ[မွဉ်းဖျင် | မွဉ်းဖျင်အရွီးခိုႏ]

တခွန်ꩻဝင်ꩻထာꩻ - စိုန်ပါꩻလွဉ်ꩻမာႏ နုဲင်းနဝ်ꩻမာꩻမွိုန်း - မဉ်ႏယွိုန်းနောဝ်ꩻရာꩻ အကျင်ꩻဟဝ်မျတ် - စွုမ်ႏဇာတ်ချမ်ꩻသာႏ ခြွေပေႏဒျာႏ - သေႏချာႏ ယံငါငါ။

ကဗျာယို မဉ်ႏပြန်ႏငေါဝ်းရိုꩻရိုꩻနောဝ်ꩻ- တခွန်ꩻဝင်ꩻထာꩻ စိုန်ပါꩻလွဉ်ꩻမာႏနုဲင်းနဝ်ꩻနဝ်ꩻ တွမ်ႏမာꩻမွိုန်း၊ မဉ်ႏယွိုန်းထိုꩻနောဝ်ꩻ ထွာအကျင်ꩻဟောဝ်၊ ထွာအကျင်ꩻမျတ်၊ ကွပ်အကျင်ꩻဟောဝ် အကျင်ꩻမျတ်တဲင် ချမ်ꩻသာႏဗာႏ စွုမ်ႏဇာတ်ဇာတ်၊ စွုမ်ႏပန်ပန်၊ ခြွေခြာႏပေႏဒျာႏ၊ သေႏချာႏယံလွေꩻတငါငါစွဉ်ႏနောဝ်ꩻသွူ။[၁]

ဗွောင်နယ်သမ်း[မွဉ်းဖျင် | မွဉ်းဖျင်အရွီးခိုႏ]

"ပါꩻထူႏတခွန်ꩻ ခွေသွဉ်းရွဉ် ဗော့ꩻနဝ်ꩻဟွဉ်ႏ ဗွေႏအော်" "နာꩻရွဉ်လောင်းနဝ်ꩻ တဲမ်းခါꩻနေ နာꩻမဉ်ꩻဟောင်း" "တဲမ်းခါꩻဗာႏတဝ်းအော်၊ အဗီႏတဲး အဝ်ႏတောင်ꩻဒျာႏ၊ ခန်ဗီနီဗီႏ၊ ငတ်ꩻဗီႏတဗီႏ ဗွေႏအော်" လိုꩻဖုံႏတဲ့ ဖျော်စွုမ်ႏလဲဉ်းသွူ၊ ဗွေႏစင်ꩻရီစဲစ် တဖြာꩻထွူတဖြာꩻတဲ့ ရိုꩻဒျာႏ "ထူႏဗာႏတဝ်းလွဉ်းလွဉ်း"၊ ကွပ်နဝ်ꩻမꩻ ဗွေႏစင်ꩻလွေꩻထူႏလွဉ်လိတ်ခြုံ (စာအိတ်)ထွူတဲင် ဖေႏတဖြာꩻ တဗာႏဗာႏထွူတွော့ꩻ ဗွေႏစင်ꩻဒေါ့ꩻနုဲင်းယို- "ယိုနဝ်ꩻ အွဉ်ႏအုံပဆားသီ တဆီငတ်ꩻမိနစ်တာႏ၊ မဲဉ်လွေꩻမုဲင်ꩻကိုတဲ့ လွေꩻဟုဲင်း၊ မဉ်ႏလꩻတဆီငတ်ꩻမိနစ်နဝ်ꩻ အီႏဒုံႏထာꩻဒိန်ႏဒိန်ႏ၊ တွိုႏနဝ်ꩻမဲ့ꩻ လွဉ်ချာပငါပရာꩻဟုဲင်း၊ ကထူႏဗာႏ အပွယ်ꩻရွဉ်သားနဝ်ꩻ စာႏနာႏချာဗဲင်းနမ်း၊ နီရွဉ်မဉ်ႏထိုꩻမားတဲ့ နီလောႏကာႏဟ၊ ဝင်ꩻရွဉ်ထိုꩻမားတဲ့ ဝင်ꩻလောႏကာႏသနယ်၊ ကွပ်နဝ်ꩻမꩻ အပွယ်ꩻရွဉ်နဝ်ꩻ သော့ꩻလိတ်ခြုံကိုနဝ်ꩻဟုဲင်း၊ လိတ်ခြုံလောင်းနဝ်ꩻ တဲမ်းမွုန်းထမုဲင်ꩻမုဲင်ꩻ၊ ကသော့ꩻရွဉ်တဲ့နဝ်ꩻ၊ ကသော့ꩻစေးခဝ်တဲ့နောဝ်ꩻ သော့ꩻဗဉ်ႏဗဉ်ႏဗာႏ၊ 'ခွေလိတ်ခြုံကိုနဝ်ꩻ သော့ꩻစေးနဲ့၊ သော့ꩻရွဉ်နဲ့'ကရိုꩻနဝ်ꩻ ဖေႏနေးကသေဗာႏမွုန်း၊ အဝ်ႏနုဲင်းနဝ်ꩻလွုမ်ꩻ၊ လင်ꩻလွဟုဲင်း" ဗွေႏစင်ꩻအီႏမာꩻနုဲင်းမုဲင်ꩻမကောင်း၊ အဓိပ္ပါယ်ႏတဲ့ နီတသေတဝ်း၊ ခွေသွဉ်းလိတ်ခြုံကိုနဝ်ꩻ ခွေသွဉ်းအဲ့ꩻသော့ꩻလယ်ႏကွို့ꩻ လိတ်သတင်ꩻယတဲင် ခွေသွဉ်း မဲဉ်ငတေ့ꩻမွေးစွဉ်ႏထာꩻ။

"ဒိန်ႏ ဒိန်ႏ ဒိန်ႏ ဒိန်ႏ" ကထင်ႏဟွုန် ထာꩻဒိန်ႏဒိန်ႏငေါဝ်းတဲင် အခိုတဲ့လွဉ်ဗူႏ၊ အမူႏတဲ့လွဉ်စုစွဉ်ႏ တလဲင်ႏချင်ꩻ၊ ဗွေႏစင်ꩻရိုꩻနုဲင်းယို- "အွိုးအခန်ꩻကိုသူꩻ ဗွုံꩻအဝ်ႏတဖြုံႏ၊ လွေꩻတလဲင်ႏတဖြာꩻဖြာꩻထွူတဲင် သီလိတ်ခြုံနဝ်ꩻ လွေꩻလွဉ်းသော့ꩻ ဗွုံꩻကိုသူꩻဟုဲင်း" ကားကအဝ်ႏ လွေꩻလွဉ်းသော့ꩻလို့ထွူတဲင် ဗွေႏစင်ꩻလွေꩻထူႏလွဉ်ဗွုံꩻ၊ ဗွောင်ထွားလိတ်ခြုံ တဗာႏထွူတဗာႏ၊ ထွာစွဉ်ႏလိတ်ယဖုံႏလွဉ်းလွဉ်း၊ ထီႏဗွေႏစင်ꩻနဝ်ꩻ သမ်းသညင်ꩻ၊ ထီႏဒျာႏစေးယဖုံႏနဝ်ꩻ သမ်းတယွို့။ ဗွေႏစင်ꩻ ကထူႏထန်ႏဒါႏ လိတ်ခြုံဗွုံꩻကိုနဝ်ꩻတဲ့ လို့လဲဉ်းသွူ၊ ကွပ်နောဝ်ꩻမꩻ ဗွေႏစင်ꩻဒေါ့ꩻနုဲင်းယို- "လိတ်ခြုံဖုံႏယိုနောဝ်ꩻ ရွဉ်တဲ့တပါလွဉ်တဝ်း တဗာႏဗာႏ၊ ထွာစွဉ်ႏဒျာႏ စေးယလွဉ်းလွဉ်း၊ ကွဲႏတွော့ꩻ တယောဝ်း လွဉ်ယိုမောင်ႏပွယ်ꩻ- ထူႏလုဲင်ႏခွေရွဉ် တစစ်ယိုဟုဲင်း" "နီဗွေႏတခွန်ꩻ မဉ်ႏတမွေးတဝ်းဟ၊ နီဗွေႏဖေႏခွေသွဉ်းနုဲင်းယိုနဝ်ꩻ ခွေသွဉ်းထူႏဗွုန်ႏတောဝ်း ဗွေႏအော်" "ခွေမော့ꩻပါꩻရွဉ် ဟန်ႏရဝ်ꩻ တစစ်၊ ခန်ဗီႏနီဗီႏ၊ ငတ်ꩻဗီႏတဗီႏ၊ အလွိုးနာꩻရွဉ်ဒျာႏရင်ꩻ" ဗွေႏစင်ꩻ ကထင်ႏဒေါ့ꩻနုဲင်းနဝ်ꩻတဲင် မောင်ႏပွယ်ꩻတဲ့ ထူႏခန်းဒျာႏ ရွဉ်တစစ်နဝ်ꩻတဲင် မောင်ႏပွယ်ꩻရွဉ်ထိုꩻမား ပျဿနာႏနဝ်ꩻတဲ့ ထွူခန်းဒျာႏနုဲင်းနဝ်ꩻ၊ ပါꩻမုဲင်ꩻတခွန်ꩻနဝ်ꩻ သေတဝ်း၊ ပေါႏတမော့ꩻတဝ်းအဖြာꩻနဝ်ꩻ ဆုဲင်ꩻချာမဲ့ꩻ အတခွန်ꩻယင်းဒါႏ ခွေသွဉ်းယူႏနုဲင်းနဝ်ꩻ။ ခွေသွဉ်းကယူႏတေ့ꩻနဝ်ꩻ မဲဉ်ႏလဲဉ်းသွူ၊ ကွပ်ထမုဲင်ꩻနဲတဲင် ကတိန်ႏထင်ႏကျောင်ꩻ နုဲင်းမွူးရဝ်ꩻနဝ်ꩻ မောင်ႏပွယ်ꩻလဝ်းဖျင် ဗွေႏစင်ꩻနုဲင်းယို- "ဗွေႏစင်ꩻ နီဗွေႏကဖေႏခွေသွဉ်း ရွဉ်မဟာနီꩻနဝ်ꩻ ထိုꩻမားဖျင်လဲဉ်း၊ ပါꩻတခွန်ꩻထိုꩻမဟာ ဗွေႏအော်" "ပါꩻတခွန်ꩻထိုꩻ ကရိုꩻနဝ်ꩻ နာꩻမာꩻနုဲင်းမုဲင်ꩻသေ" "ရွဉ်နဝ်ꩻ ခွေသွဉ်းသဲင်ꩻသော့ꩻထွူစွဉ်ႏတွိုက်ကို၊ ခွေသွဉ်းတွိုက်တဲ့ ပါꩻခတ်ꩻကုဲင်၊ ရွဉ်တဲ့ထီႏဒွုမ် ဗွေႏအော်" မောင်ႏပွယ်ꩻ ကထင်ႏလဝ်းနုဲင်းနဝ်ꩻတဲင် ဗွေႏစင်ꩻငပယွုမ်းစွဉ်ႏဒျာႏထာꩻ၊ "ဗွေႏစင်ꩻအီႏမာꩻယင်းနုဲင်းမုဲင်ꩻဟောင်း"ခွေသွဉ်းအဝ်ႏယူႏနုဲင်းနဝ်ꩻတွင်ꩻ ဗွေႏစင်ꩻဒေါ့ꩻခန်းနုဲင်းယို- "တပဲ့ꩻသီးဖုံႏ- မွူးရဝ်ꩻယိုနဝ်ꩻ အီလွဉ်ဗာႏရွဉ် တဖြာꩻတစစ်စစ်၊ ဆရာႏအီႏမာꩻအီထမုဲင်ꩻ၊ အီႏဖြေꩻအီထမုဲင်ꩻ ကရိုꩻနဝ်ꩻ မွူးရဝ်ꩻမဲ့ꩻ ဆရာႏခြုဲင်းနယ်ဒျာႏ၊ ရွဉ်မဉ်ႏအဝ်ႏဒျာႏတဲ့ ကွီမွုန်းမွိုးဖါ၊ အီလွဉ်ဒျာႏ သီရွဉ်နောဝ်ꩻဟုဲင်း၊ အီလွဉ်ဗာႏစွုမ်ႏဖြာꩻဖြာꩻ တောင်ꩻနေဟောင်း" "တောင်ꩻဒျာႏ ဗွေႏအော်"

ဟန်ႏနီꩻယို ဆရာႏကထွဉ်ႏအတွိုင်ꩻ အီလွဉ်ရွဉ် တဖြာꩻတစစ်စစ် စွုမ်ႏဖြာꩻဖြာꩻသွူ။ "သီအီထင်ႏနေ ရွဉ်ဖုံႏဟောင်း" "အီထင်ႏ ဗွေႏအော်" "အွို- ပေါႏနဝ်ꩻတဲ့ ရွဉ်လောင်းနဝ်ꩻ တဲမ်းသီမဉ်ꩻ ပငါပရာꩻဟုဲင်း၊ ပေါႏတဲမ်းထွူတဲ့ လွဉ်သော့ꩻအွုပ်ꩻခံꩻကိုယိုဟုဲင်း" နီရွဉ်လောင်းနဝ်ꩻ နီတဲမ်းမဉ်ꩻ ပငါပရာꩻထင်ႏထွူတဲင် လွေꩻသော့ꩻအွုပ်ꩻခံꩻကို တဖြာꩻထွူတဖြာꩻ၊ ကားကအဝ်ႏ ကထင်ႏသော့ꩻလို့ထွူတဲင် ဗွေႏစင်ꩻဒို့ꩻခါꩻခန်းဒျာႏ (ဗွေႏစင်ꩻအီႏမာꩻနုဲင်းမုဲင်ꩻတန်မကောင်း)။ "တပဲ့ꩻသီးဖုံႏဟွေး- တပဲ့ꩻသီး ကလွဉ်သော့ꩻဒါႏရွဉ် အွုပ်ꩻခံꩻကိုယိုနဝ်ꩻ ခွေလꩻထွားဗာႏတောဝ်းဒွိုန်း တဗီႏဗီႏ၊ ခွေကဖေႏမောင်ႏပွယ်ꩻရွဉ် မဟာနီꩻနဝ်ꩻ ခွေတဲမ်းမုဲင်သေꩻ အနံပါတ်၊ ရွဉ်နံပါတ်နဝ်ꩻ ခွေတဲမ်းနယ်သီယို" အောဝ်ႏနဝ်ꩻထွူတွော့ꩻ ဗွေႏစင်ꩻတဲမ်းနယ် သင်ꩻပွန်ꩻတန်လောင်း- ပထမ ရွဉ်ခန်ဗီႏ နံပါတ် - ES 3328202 ဒုတိယ ရွဉ်ခန်ဗီႏ နံပါတ် - ES 32000559 တတိယ ရွဉ်ငတ်ꩻဗီႏ နံပါတ် - ES 2377560 ရွဉ်အွုပ်ꩻခံꩻကိုယိုနဝ်ꩻ အနံပါတ် (အမုဲင်)နုဲင်းမုဲင်ꩻကရိုꩻနဝ်ꩻ ခွေလꩻထိႏဗာႏဒွိုန်း၊ ရွဉ်အွုပ်ꩻခံꩻကိုယို အနံပါတ် (အမုဲင်) မဉ်ႏဗွိုန် ခွေကတဲမ်းယိုတဲ့ ရွဉ်နဝ်ꩻ ထွာရွဉ်တခွန်ꩻ၊ ရွဉ်လောင်းနဝ်ꩻ သီတဲမ်းခါꩻ သီမဉ်ꩻဖုံႏတဲင် ပါꩻမုဲင်ꩻမဉ်ꩻ အဝ်ႏပြောက်ရွဉ်လောင်းနဝ်ꩻတဲ့ ပါꩻနဝ်ꩻနဝ်ꩻ ထွာတခွန်ꩻနဝ်ꩻသနယ်" ဗွေႏစင်ꩻဒေါ့ꩻနုဲင်းနဝ်ꩻထွူတွော့ꩻ ဗွေႏစင်ꩻခတ်ကယ်ꩻတေ့ꩻပါခန်း နီလောင်ႏလွိုး တဖြာꩻထွူတဖြာꩻ၊ ဗွေႏစင်ꩻ ငပယွုမ်းလဲန်းသွူထာꩻ၊ အလွိုးခတ်ကယ်ꩻလꩻလဲန်း ပါꩻတဖြာꩻဖြာꩻနဲ့ꩻ။

ဗွေႏစင်ꩻဗွောင်သွူအွုပ်ꩻခံꩻ- ထူႏထန်ႏ ခန်ဗီႏတဗီႏ ထွားနံပါတ် (မွေးတောဝ်း)၊ ထူႏထန်ႏငတ်ꩻဗီႏ တဗီႏ (မွေးတောဝ်း)၊ ထူႏထန်ႏဖျင်ခန်ဗီႏ တဗီႏ ထွားနံပါတ်၊ ယိုတလဲင်ႏနောဝ်ꩻ ဗွေႏစင်ꩻ ငပယွုမ်းမွေးလဲန်းသွူထာꩻ၊ အလွိုးမော့ꩻလဲန်း တခွန်ꩻဒျာႏရင်ꩻ။ "အဟမ်း - အဟမ်း၊ မော့ꩻလဲန်းတခွန်ꩻ၊ မော့ꩻလဲဉ်းသွူ တခွန်ꩻ" "ပါꩻမုဲင်ꩻတခွန်ꩻနဝ်ꩻ ကေႏညာႏနယ်စွဉ်ႏ အမျာꩻငါဟုဲင်း ဗွေႏစင်ꩻ"ခွေသွဉ်းသွꩻပေႏ မောင်ႏပွယ်ꩻ ထွဉ်ႏစွဉ်ႏဒျာႏနုဲင်းနဝ်ꩻ။ "လိုꩻတဖြာꩻ တရေႏတဲးတဲ့ တဟဝ်ယားတဝ်း၊ ကွဲႏတွော့ꩻ တရေႏဖေႏနေး ကတွမ်ႏကုဲင်မွုန်းတဲင် မဟာနီꩻနဝ်ꩻ ဖေႏတွမ်ႏလိတ်ခြုံ ထွဉ်ႏသော့ꩻလွဉ်တေ့ꩻတေ့ꩻနေးတဲ့ သမ်းတသော့ꩻလွဉ်တဝ်း၊ အဗွေႏကျံႏဒို့ꩻခါꩻဒျာႏ။ ပေါႏထာꩻတဟဝ်တဝ်း ဒုစရဲက်မျိုꩻနဝ်ꩻ ဒို့ꩻခါꩻတလꩻတဝ်း၊ နီတဲ့ မဉ်ႏအဝ်ႏဒို့ꩻခါꩻ ပေါႏတကေႏညာႏတဝ်း အမျာꩻငါတဲ့ မဲ့ꩻအပြန်းတဝ်း၊ မဲ့ꩻအငမ်းတဝ်း၊ ဆုဲင်ꩻမဲ့ꩻ အတခွန်ꩻဖျင်၊ ကွပ်နဝ်ꩻမꩻ တမဲဉ်ကေႏညာႏတဝ်းတဲ့ ကေႏညာႏနယ်ဗာႏသွူ အမျာꩻ" "ထွန်ꩻဗယ်" "ထွန်ꩻဗယ် တခွန်ꩻ၊ ထွန်ꩻဗယ်တခွန်ꩻ၊ ထွားရိုမ်ဟုဲင်း၊ ထွားရိုမ်ဟုဲင်း" မောင်ႏပွယ်ꩻရိုꩻနုဲင်းနဝ်ꩻတဲင် နီကားကအဝ်ႏတဲ့ အဲ့ꩻတင်ႏမဲ့ꩻ ထွားရိုမ်လွေꩻစွဉ်ႏ 'ထွန်ꩻဗယ်'ပငါပရာꩻဖုံႏသွူ၊ ထွန်ꩻဗယ် အွော့ꩻအကတူႏဗွုန်ႏဒွုမ်။ အမဲ့ထီလင်ꩻစွဉ်ႏရောက်ရောက်ရက်ရက်၊ အမဲ့ငါပေႏ အတရေႏကုဲင်မွေးစွဉ်ႏထာꩻ၊ အွဉ်ႏအလွိုးသူႏသေဒွုမ်၊ ငွိုးအွီႏဗာႏမွေးစွဉ်ႏထာꩻ။ ပေါႏတခွန်ꩻဝင်ꩻထာꩻနဝ်ꩻ မဲ့ငါပေႏ တရေႏကုဲင်၊ ပေႏသꩻတလွိုး ငွိုးဗာႏထာꩻနုဲင်းယို ကရိုꩻနဝ်ꩻ ထွန်ꩻဗယ် လꩻနာႏလဲဉ်းသွဉ်ခန်ꩻ (သံႏဝွေႏ)မတောဝ်း။ "တပဲ့ꩻသီးဖုံႏဟွေး- ဒုစရဲက်ပါꩻဆီကိုနဝ်ꩻ အမုဲင်တဗာႏ "ပါဏာတိပါတာ-မာꩻသီဝင်ꩻသက်"ခရာႏနဝ်ꩻ သွဉ်ဖေႏထွူလဲဉ်းတဲင် အဝ်ႏကုဲင် အမုဲင်နီ၊ အဒိန္နာဒါနာ-ထူႏတခွန်ꩻဝင်ꩻထာꩻခရာႏ။

အဒိန္နာဒါနာ-အဓိပ္ပါယ်ႏနဝ်ꩻ[မွဉ်းဖျင် | မွဉ်းဖျင်အရွီးခိုႏ]

အဒိန္န-ဝင်ꩻဗွေႏတဖေႏတဝ်း ဝင်ꩻတခြိုꩻယို၊ အာဒါန- ထူႏတခွန်ꩻ၊ အဒိန္နာဒါနာ- ဝင်ꩻဗွေႏတဖေႏတဝ်း ဝင်ꩻတခြိုꩻယို ထူႏတခွန်ꩻ နုဲင်းနဝ်ꩻသွူ။ 'ဝင်ꩻတခြိုꩻ ဝင်ꩻဥစ္စာႏ'ကရိုꩻနဝ်ꩻ အဝ်ႏလွိုႏလွိုႏကာႏကာႏ ဝင်ꩻလꩻလွဉ် မွေးတဝ်း၊ ဝင်ꩻထိုမ်ႏကျံႏကယပ်ꩻ၊ ဖေႏနေးကလꩻလွဉ်နဝ်ꩻ ထေအာႏရဲင်ꩻ လွေꩻသဲင်ꩻခွုမ်မာꩻဗာႏ၊ အုံတင်းဗာႏယာခိုး၊ လိုꩻလီးသိုꩻလူး၊ ကရွိုးကလွား ကဒုက္ခ။ သီတခြိုꩻနဝ်ꩻ ဝင်ꩻမဉ်ႏထူႏတခွန်ꩻ၊ ဝင်ꩻမဉ်ႏစိုန်ထိုꩻနဝ်ꩻ သီလောႏကာႏနဲ့၊ လောႏကာႏတောဝ်းနဲ့?" "လောႏကာႏ ဗွေႏအော်" "ဝင်ꩻမဉ်ႏတခွန်ꩻ သီတခြိုꩻ၊ ဝင်ꩻမဉ်ႏစိုန်ထိုꩻ သီဥစ္စာႏနဝ်ꩻ သီကျွိုက်နဲ့၊ ကျွိုက်တောဝ်းနဲ့?" "ကျွိုက်တောဝ်း ဗွေႏအော်" "အွို- ကွပ်ပွိုးနဝ်ꩻမꩻ အဝ်ႏလိုႏစာႏနာႏချာဒျာႏနမ်း၊ (စာႏနာႏဗာႏနုဲင်းမုဲင်ꩻနဲတဲင် ဝင်ꩻမဉ်ႏတခွန်ꩻ နီတခြိုꩻ၊ ဝင်ꩻမဉ်ႏစိုန်ထိုꩻ နီဥစ္စာႏနဝ်ꩻ နီကျွိုက်တဝ်း၊ နီသꩻလျားဝင်ꩻ၊ နီသꩻဆာဝင်ꩻ၊ နီမဲဉ်ထူႏချာဝင်ꩻတခြိုꩻ၊ နီခွန်းထွမ်ချာဝင်ꩻ၊ နီဆုꩻတောင်ꩻတကုဲင်ဝင်ꩻ၊ နီလွꩻထီႏဝင်ꩻ။) (နုဲင်းနဝ်ꩻနေနေ ပေါႏနီတခွန်ꩻတဝင်ꩻတခြိုꩻ၊ ပေါႏနီစိုန်ထိုꩻဝင်ꩻဥစ္စာႏတဲ့ ဝင်ꩻကျွိုက်တဝ်း၊ ဝင်ꩻသꩻလျားနီ၊ ဝင်ꩻသꩻဆာနီ၊ ဝင်ꩻမဲဉ်ထူႏချာနီတခြိုꩻ၊ ဝင်ꩻခွန်းထွမ်နီ၊ ဝင်ꩻဆုꩻတောင်ꩻတကုဲင်နီ၊ ဝင်ꩻလွꩻထီႏနီနုဲင်းနောဝ်ꩻ။) တပဲ့ꩻသီးဖုံႏဟွေး- လိုꩻတခွန်ꩻဒါႏ ဝင်ꩻတခြိုꩻ၊ လိုꩻစိုန်ထိုꩻဒါႏ ဝင်ꩻဥစ္စာႏနဝ်ꩻ ဘဝယိုတဲ့ ဝင်ꩻဆွမ်ꩻဝင်ꩻကျꩻ၊ ဝင်ꩻထျꩻဝင်ꩻနက်၊ ဝင်ꩻနိစ္စက်၊ ဝင်ꩻသော့ꩻထောင်ႏ၊ ခံႏဗာႏဒုက္ခ၊ အံႏအွꩻဗာႏဒုက္ခ၊ ဖဗာႏမွိုး ဖဗာႏဖါ၊ ဖဗာႏပိုမာ၊ ဖဗာႏသွꩻပေႏ၊ တရေႏလင်ꩻမဉ်ꩻကုဲင်၊ တယံတဝ်းတစိꩻစိꩻ၊ မွေးနေဟောင်း?" "မွေး ဗွေႏအော်" "ခန္ဓာႏကုဲင်လီ မဉ်ႏသီသူꩻတဲ့ လင်ꩻထဲ့ငါးရုဲင်ꩻ၊ တွိုႏဆုဲင်ꩻကာႏလ ဘဝလိုꩻဒုံ မဉ်ႏသဲင်ꩻအုံဗာႏယင်း ကရိုꩻနဝ်ꩻလဲ့ ထွာလိုꩻကေန်ꩻလိုꩻမွ၊ ထွာလိုꩻဒုက္ခ၊ ထွာလိုꩻဆင်ꩻရယ်ꩻ၊ လꩻတပယ်ꩻလို့တဗီႏ၊ ခွေလွꩻထီႏ ဝင်ꩻလွꩻထွား၊ မဲ့ငါလျားတရေႏလင်ꩻ၊ ရန်ႏသူႏစင်ꩻငါႏ၊ ဥစ္စာႏသွုမ်ꩻတိန်၊ လို့ခြေင်ထိုꩻမား၊ ခိုးလျားဝဋ်တံႏ၊ ဝင်ꩻအံႏနုဲင်းမုဲင်ꩻတဲ့ အံႏဗာႏတဝ်း၊ ဝင်ꩻကွဉ်ကꩻနုဲင်းမုဲင်ꩻတဲ့ ကွဉ်ကꩻဗာႏတဝ်း၊ ဖွေါင်အထီ ထိုမ်ႏအနမ်း၊ လမ်းတဗျုက်ꩻတယောက်ယဲ့၊ ဆဲင်ꩻသဲ့ကွဉ်ꩻပြဝ်ႏ၊ အုံအဝ်ႏဒုက္ခ၊ လိုꩻဘဝအညံးသွတ်ꩻ ထွာဗာႏနုဲင်းနဝ်ꩻနဝ်ꩻ ဟဝ်နဲ့၊ ဟဝ်တဝ်းနဲ့?" "ဟောဝ်တောဝ်း ဗွေႏအော်" "တခွန်ꩻဝင်ꩻထာꩻ ဒါႏတောဝ်း"ကရိုꩻနဝ်ꩻ စွုမ်ႏဖြာꩻတန်ပေႏ ယံဖေႏကတောင်ꩻတဲင် နီဗွေႏစင်ꩻ တဲမ်းဖေႏကဗျာ နုဲင်းယို- - တခွန်ꩻဝင်ꩻထာꩻ စိုန်ပါꩻလွဉ်ꩻမာႏ ငါးရုဲင်ꩻထဲ့ဗာႏ ချမ်ꩻသာႏကင်ꩻညာꩻ သဲင်ꩻကွုတ်လိုꩻပို - ဝွေꩻယိုကေန်ꩻဗာႏ တခွန်ꩻမွုန်း - မဉ်ႏယွုန်း ကျင်ꩻဟဝ်ထွာ။

ကဗျာယိုတပွုဒ် ငေါဝ်းရိုꩻရိုꩻနဝ်ꩻ ဆရာႏပြန်ႏဖေႏနီနုဲင်းယို-[မွဉ်းဖျင် | မွဉ်းဖျင်အရွီးခိုႏ]

(မဉ်ႏတခွန်ꩻဝင်ꩻထာꩻ၊ မဉ်ႏစိုန်ပါꩻ၊ စူလွဉ်ꩻခင်ႏလွဉ်ꩻနဝ်ꩻ လင်ꩻထဲ့ဗာႏငါးရုဲင်ꩻ၊ မဉ်ႏလင်ꩻခံႏစာꩻဗာႏ ငါးရုဲင်ꩻသူꩻနဝ်ꩻ ထာꩻချမ်ꩻသာႏ အဲဉ်ထဝ်းတစိꩻစိꩻ၊ မဉ်သဲင်ꩻကွုတ်ယင်း လိုꩻပိုတဲ့ ဝွေꩻယို သဲင်ꩻကေန်ꩻခြေားဗာႏ (ခံႏဗာႏ အံႏမ အံႏအဝ်ထာꩻ)၊ ကွပ်နဝ်ꩻမꩻ တခွန်ꩻမွုန်းဝင်ꩻတခြိုꩻ၊ စိုန်ထိုꩻမွုန်း ဝင်ꩻဥစ္စာႏ၊ မဉ်ႏယွုန်းထိုꩻနဝ်ꩻ ထွာာလိုꩻ အကျင်ꩻဟောဝ်။) ပြန်ႏဗာႏနုဲင်းနဝ်ꩻ။ ပြန်ႏငေါဝ်းရိုꩻရိုꩻနုဲင်းယို ဖေႏကဒါႏနဝ်ꩻတဲ့ လွူꩻသေꩻခါꩻသွော့နော" "မွေးသွူ ဗွေႏအော်" "လိုꩻတခွန်ꩻဒါႏဝင်ꩻထာꩻတွမ်ႏ လိုꩻတခွန်ꩻဒါႏတဝ်းဝင်ꩻထာꩻနဝ်ꩻ အဖြာꩻမုဲင်ꩻ အကျင်ꩻဟဝ်၊ အဖြာꩻမုဲင်ꩻ အကျင်ꩻဟဝ်တဝ်း" "လိုꩻကတခွန်ꩻဒါႏ ဝင်ꩻထာꩻနဝ်ꩻ အကျင်ꩻဟဝ်တဝ်း၊ လိုꩻတခွန်ꩻဒါႏတဝ်း ဝင်ꩻထာꩻနဝ်ꩻ အကျင်ꩻဟဝ် ဗွေႏအော်" "လိုꩻဟဝ်တွမ်ႏ လိုꩻတဟဝ်တဝ်းနဝ်ꩻ အဖြာꩻမုဲင်ꩻ ထွာလိုꩻယံ၊ အဖြာꩻမုဲင်ꩻထွာလိုꩻညံး?" "လိုꩻအကျင်ꩻဟဝ်နဝ်ꩻ ထွာလိုꩻယံ၊ လိုꩻအကျင်ꩻဟဝ်တဝ်းနဝ်ꩻ ထွာလိုꩻညံး ဗွေႏအော်" "သီနဝ်ꩻ မဲဉ်ထွာလိုꩻယံနဲ့၊ မဲဉ်ထွာလိုꩻညံးနဲ့?" "မဲဉ်ထွာလိုꩻယံ ဗွေႏအော်" "မဉ်ႏမဲဉ်ထွာလိုꩻယံနဝ်ꩻ တခွန်ꩻဗာႏဝင်ꩻထာꩻနဲ့၊ တခွန်ꩻဗာႏမွုန်းဝင်ꩻထာꩻနဲ့?" "တခွန်ꩻဗာႏမွုန်း ဝင်ꩻထာꩻဗွေႏအော်" "အွို- မွေးသွူ၊ တပဲ့ꩻသီး ဖေႏကထွာ လိုꩻယံပငါပရာꩻနဝ်ꩻ ထူႏတခွန်ꩻမွုန်းဝင်ꩻတခြိုꩻ၊ စိုန်ထိုꩻမွုန်း ဝင်ꩻဥစ္စာႏနော" "မွေးဒျာႏ ဗွေႏအော်" "ယိုတလဲင်ႏတဲ့ အခိန်ႏလꩻလဲဉ်း၊ အုံပဆားဒွိုန်းက၊ မင်္ဂလာႏဒျာႏ တပဲ့ꩻဖုံႏ" "မင်္ဂလာႏဒျာႏ ဆရာႏဗွေႏအော်"[၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. သုစရဲက်ပါꩻဆီလိတ်စောင်ႏ၊ ပအိုဝ်ႏလိတ်လုဲင်ꩻစွစ်ꩻလီတာႏ
  2. ဒုစရဲက်ပါꩻဆီလိတ်စောင်ႏ၊ ပအိုဝ်ႏလိတ်လုဲင်ꩻစွစ်ꩻလီတာႏ