အနစ်သက်သွတ်ꩻ

"အနစ်သက်သွတ်ꩻ ငေါဝ်းသချာင်ꩻတပုဒ်" စံꩻဖိန်ꩻတမူဖုံႏယို အအောဝ်ႏအုံကွူႏမီႏခိုႏ နိစ်သက်လွဒျာႏ ကောဝ်ႏတုဲင်ကောဝ်ႏထီဖုံႏနောဝ်ꩻသွူ၊ ပွိုးနောဝ်ꩻမꩻ ကောဝ်ႏတုဲင်ယို အအောဝ်ႏထွာလွေꩻဖေႏဗာႏဒျာႏ စံႏဖိန်ꩻတမူသီးထာꩻနစ်သက်ခရာႏ ရိုꩻဗာႏနုဲင်းနောဝ်ꩻသွူ။ ကထွာဒျာႏစံႏဖိန်ꩻကရိုꩻလဲ့ ကထာင်ႏသွုံꩻဆောင်ႏအွꩻအံႏလွဗာႏ ကောဝ်ႏထီကောဝ်ႏအရသာႏ ကရိုꩻနောဝ်ꩻ ပွိုးစွဉ်ႏ အအွီႏဟောဝ်ငါႏ၊ ချမ်ꩻသာႏဟောဝ်ငါႏနောဝ်ꩻမꩻ ပျောႏပျောႏသွင်ႏသွာင်ႏ အုံအောဝ်ႏနွောင်ꩻလွဝါင်ꩻနောဝ်ꩻသွူ။

ငေါဝ်းသချင်ꩻကရိုꩻယိုလဲ့ အအောဝ်ႏထွာလွေꩻဖေႏ လိုꩻပေႏလိုꩻယွဲးသီးအတာႏ သွꩻပေႏတဖြာꩻရိုꩻဗာႏနုဲင်းနောဝ်ꩻသွူ။ အုံနာႏလွထွူဝါင်ꩻ ငေါဝ်းသချင်ꩻတဲင် ပျောႏသွင်ႏမွန်းသွိုꩻအောဝ်ႏခံႏစာꩻလွဒျာႏဝါင်ꩻငေါဝ်းသချင်ꩻ အရသာႏနောဝ်ꩻသွူ။ ခွေသွဉ်းလဲ့ ပွိုးစွဉ်ႏသဒ္ဒါႏရုံႏကရိုꩻဒါႏ အငေါဝ်းကထင်ႏဟွိုန်လွဉ်ယို သꩻအောင်ကို အအောဝ်ႏခံႏစာꩻတသေႏသေႏဗာႏနောဝ်ꩻမꩻ ခွေသွဉ်းအွဉ်ႏမွေးငါႏတန်ႏဖိုꩻနောဝ်ꩻသွူ၊ ခွေသွဉ်းမီႏဒေါ့ꩻခြုဲင်းနယ်လွေꩻဗာႏ ဖူးဝေးအမျာꩻသီးဖုံႏနောဝ်ꩻ အအောဝ်ႏနုဲင်းယိုသနဲ့ဩ။ နီပအိုဝ်ႏငေါဝ်းသချင်ꩻလောကကို ကအွဉ်နယ်လွေꩻဖေႏ တဖူꩻအမိဉ်ꩻတန် ငေါဝ်းသချင်ꩻရွစ်သား ခွန်သာဒွန်းယို ဖူးဝွေးမွိုးဖါသီးဖုံႏ အောဝ်ႏထီႏဖို၊ အောဝ်ႏဟွိုန်ဖိုလွလဲဉ်းဒျာႏဝါင်ꩻကရိုꩻနောဝ်ꩻ ခွေသွဉ်းအယွုမ်းအံႏဒျာႏနောဝ်ꩻသနဲ့ꩻ၊ ခွန်သာဒွန်းယို ပွိုးစွဉ်ႏအထီႏရက်ချာငါႏ အမျိုꩻသာꩻနောဝ်ꩻမꩻ ခံႏယပ်ꩻပင်ႏပန်ꩻသွူ အနမ်းတဲင် ကျိုꩻစာꩻဆောင်ႏရွက်လွေꩻဖေႏ နီပအိုဝ်ႏအာႏဇာႏနီႏဗွေႏတဖြာꩻ ရိုꩻဗာႏနုဲင်းနောဝ်ꩻသွူ။ ခွန်သာဒွန်း ကတဲမ်းရွစ်ခါꩻဒါႏ ငေါဝ်းသချင်ꩻယို ပွိုးစွဉ်ႏအဓိပ္ပါယ်ႏလဲ့ ဟောဝ်ငါႏ၊ လိုꩻတွိုင်ꩻစွုမ်ႏဖြာꩻ သꩻဝါင်ႏစာꩻခရာႏတဲ့ ထွာနောဝ်ꩻမꩻ အနာႏဂတ်နီပအိုဝ်ႏအတာႏ အကျိုꩻအောဝ်ႏမွေးငါႏ မရေႏမရာႏ ခွေသွဉ်းယူႏခံႏလွေꩻနုဲင်းနောဝ်ꩻသွူ၊ ခွန်သာဒွန်းယို ပွိုးစွဉ်ႏမဲဉ်အွဉ်ႏတိုꩻတက်ငါႏ နီအမျိုꩻသာꩻ၊ မဲဉ်အွဉ်ႏထာင်ႏသျာꩻငါႏ နီလိုꩻမျိုꩻနောဝ်ꩻမꩻ အရွစ်ခါꩻဖေတွမ်ႏငေါဝ်းသချင်ꩻ၊ ဖေႏသတိꩻလင်ꩻတွမ်ႏ ငေါဝ်းမေတ္တာႏသꩻ သꩻဝါင်ႏစာꩻခရာႏအောဝ်ႏမွေးငါႏနောဝ်ꩻသွူ။

ခွန်သာဒွန်း ငေါဝ်းသချင်ꩻ ပထမပိုဒ်နောဝ်ꩻ (ပအိုဝ်ႏပေႏဖုံႏ (ဖြောဝ်ႏ)သွော့ ငေါဝ်းပအိုဝ်ႏနောဝ်ꩻ ကွပ်စွဉ်ႏငေါဝ်းပအိုဝ်ႏနောဝ်ꩻ နီငေါဝ်းငွါရင်ꩻ)၂ တဲမ်းရွစ်ခါꩻဖေႏနုဲင်းယိုသွူ။ လိုꩻမျိုꩻတွိုင်ꩻ လိုꩻမျိုꩻတွိုင်ꩻ ဝါင်ꩻထွုံꩻစံႏတွမ်ႏဝါင်ꩻယဉ်ႏငဲရေꩻ အကွဉ်အကꩻ ငေါဝ်းငွါဖုံႏယို အအောဝ်ႏလွဒျာႏဝါင်ꩻ ပငါပရာꩻနောဝ်ꩻသွူ၊ နီပအိုဝ်ႏငေါဝ်းငွါကရိုꩻလဲ့ တယ်ႏစွဉ်ႏအွိုးမော့ꩻလဲင်ႏခါ အအောဝ်ႏလွဉ်ဒျာႏ ထင်ႏထင်ႏသျာꩻသျာꩻ၊ အအောဝ်ႏထင်ႏသျာꩻလဲဉ်းကရိုꩻလဲ့ နီပအိုဝ်ႏငေါဝ်းငွါ နီမီႏတဒေါ့ꩻချာတောဝ်းကရိုꩻနောဝ်ꩻ နီပအိုဝ်ႏစွိုးခွိုꩻ နီပအိုဝ်ႏလိုꩻမျိုꩻယို အထိုꩻမားကွယ်ႏနွောင်ꩻအီနောဝ်ꩻမꩻ ကထွာဒါႏလိုꩻဖြားလိုꩻတန် မွိုးဖါဖုံႏဘို တာႏဝွန်ႏဝတ္တရာꩻအောဝ်ႏအတွိုင်ꩻ နီပိုနီလီꩻ ယံသေချာ စွိုးခွိုꩻငေါဝ်းငွါ၊ စွိုးခွိုꩻသွီႏထီ ယံကအောဝ်ႏနောဝ်ꩻ တယ်ႏစွဉ်ႏပိုလီꩻကအောဝ်ႏပေႏခါ အောဝ်ႏလိုႏသွဉ်သင်ဖေႏငါႏနောဝ်ꩻသွူ၊ ပတ်သက်သက်ဆွိုင်ႏတွမ်ႏ နီပအိုဝ်ႏထွုံꩻစံႏ ယဉ်ႏငဲရေꩻအဟောဝ်ဖုံႏယိုလဲ့ အောဝ်ႏလိုႏဒေါ့ꩻခြုဲင်းနယ်ခွိုꩻခွိုꩻဖေႏနောဝ်ꩻသွူ။

ခွန်သာဒွန်းယို ပွိုးစွဉ်ႏထီႏချာငါႏ နီပအိုဝ်ႏအမျိုꩻသာꩻတဲင် ပအိုဝ်ႏပေႏမူႏခိုဖုံႏဟွေး ဒေါ့ꩻဖြောဝ်ႏလွသွော့ဝါင်ꩻ ငေါဝ်းပအိုဝ်ႏ၊ ပစိုႏလွသွော့ နီငေါဝ်းငွါ၊ အွဉ်ႏလွသွော့ဝါင်ꩻတန်ႏဖိုꩻအကျောင်ꩻ တဲမ်းရွစ်ခါꩻဖေႏ ပအိုဝ်ႏပေႏအတာႏ ပေါႏဟွုန်ဗာႏကရိုꩻလဲ့ သꩻဝါင်ႏစာꩻခရာႏအောဝ်ႏမွေးငါႏနောဝ်ꩻသွူ။ လိုꩻမျိုꩻတမျိုꩻအတာႏ အောဝ်ႏဒျာႏငေါဝ်းငွါတမျိုꩻလွုမ်ꩻတဲ့ ခလပြဲ့ꩻစွုမ်ႏတောဝ်းဒွိုန်းနေနေ၊ စပ်ဆွိုင်ꩻတွမ်ႏလိုꩻမျိုꩻ ယကထာင်ႏသျာꩻ ယဉ်ႏငဲရေꩻကရိုꩻဒါႏ ခွမ်လာꩻအကွဉ်အကꩻယိုလဲ့ အရေꩻတန်မွေးငါႏ မရေႏမရာႏနောဝ်ꩻမꩻ- ခွန်သာဒွန်းနောဝ်ꩻ (ကွဉ်ကꩻနီပအိုဝ်ႏခွမ်ꩻလာꩻ၊ ယိုနောဝ်ꩻနောဝ်ꩻမꩻမွေး၊ ဝါင်ꩻသꩻမွိုန်း ပအိုဝ်ႏမျိုꩻယို ခွန်နင်ꩻစွုမ်ႏဖြာꩻ ပအိုဝ်ႏခွိုꩻ)တဲမ်းရွစ်ခါꩻဖေႏယင်းနုဲင်းယိုသွူ၊ နီပအိုဝ်ႏလိုꩻမျိုꩻယို ခွမ်ꩻလာꩻထာင်ႏသျာꩻဟောဝ်ငါႏလိုꩻမျိုꩻတမျိုꩻ ရိုꩻဗာႏနုဲင်းနောဝ်ꩻသွူ၊ ထာင်ႏသျာꩻဒျာႏကရိုꩻလဲ့ နီမီႏတနိစ်သက်ချာလွတောဝ်း၊ နီမီႏတကွဉ်ကꩻချာတောဝ်းကရိုꩻနောဝ်ꩻ- နီလိုꩻမျိုꩻထွုံꩻစံႏယဉ်ႏငဲရေꩻ ခွမ်ꩻလာꩻယိုလဲ့ အထိုꩻမားထိုꩻဒါႏနောဝ်ꩻမꩻ နီပအိုဝ်ႏပေႏဖုံႏလဲ့ ကွဉ်ကꩻချာလွသွော့ဝါင်ꩻ နီခွမ်ꩻလာꩻ၊ ထိန်ꩻသေꩻခါꩻလွသွော့ဝါင်ꩻ နီယိုꩻယာႏ၊ နိစ်သက်ဒျာႏသွော့ဝါင်ꩻစွုမ်ႏဖြာꩻဖြာꩻကရိုꩻနောဝ်ꩻ ခွန်သာဒွန်း ဖေႏသတိခါꩻထဲင်းယင်းနုဲင်းယိုနောဝ်ꩻသွူ။

လိုꩻမျိုꩻတမျိုꩻ ယံတိဉ်ႏခွေါင်တသေႏသေႏအတာႏ ဘာႏသာႏလိတ်လုဲင်ꩻယို မီႏအောဝ်ႏနောဝ်ꩻမꩻ လိုꩻမျိုꩻတိဉ်ႏခွေါင်လꩻနောဝ်ꩻသွူ၊ ပေါႏလိတ်လုဲင်ꩻတအောဝ်ႏတောဝ်းကရိုꩻနောဝ်ꩻ လိုꩻမျိုꩻလဲ့ တတိဉ်ႏခွေါင်နွောင်ꩻတောဝ်း၊ ပွိုးတမုဲင်ꩻကရိုꩻနောဝ်ꩻ လိုꩻမျိုꩻယံဖေႏကတိဉ်ႏခွေါင်အီအတာႏ ပွိုးစွဉ်ႏလိတ်လုဲင်ꩻယို ထွာအထျꩻအထောင်ꩻ၊ အရွီးအခိုႏတန်နောဝ်ꩻမꩻ လိုꩻမျိုꩻတမျိုꩻအတွက် လိတ်လုဲင်ꩻယို အရေꩻတန်လွိုထဲင်းဝါင်ꩻကရိုꩻနောဝ်ꩻ မျက်မောက်ယိုခါ အအောဝ်ႏထင်ႏသျာꩻလဲဉ်းဒျာႏရင်ꩻ၊ ပွိုးစွဉ်ႏလိတ်လုဲင်ꩻယို အရေꩻတန်ငါႏနောဝ်ꩻမꩻ ခွန်သာဒွန်းနောဝ်ꩻ (ပအိုဝ်ႏပေႏဖုံႏ ဖတ်/တဲမ်းသွော့ လိတ်ပအိုဝ်ႏနောဝ်ꩻ ကွပ်စွဉ်ႏလိတ်ပအိုဝ်ႏနောဝ်ꩻ နီလိတ်လုဲင်ꩻရင်ꩻ-၂)၊ (သွဉ်ခန်းနီပအိုဝ်ႏလိတ်လုဲင်ꩻ ယိုနောဝ်ꩻနောဝ်ꩻမꩻမွေး ဝါင်ꩻသꩻမွိုန်း ပအိုဝ်ႏမျိုꩻယို- ခွန်နာင်ꩻစွုမ်ႏဖြာꩻ ပအိုဝ်ႏခွိုꩻ)အရွစ်သမ်းထဲင်းယင်းနုဲင်းယိုနောဝ်ꩻသွူ။ ပအိုဝ်ႏလိတ်လုဲင်ꩻယို ရိုꩻစွဉ်ႏဒေႏသသွုံꩻနီလိုꩻမျိုꩻသွုံꩻကရိုꩻလဲ့ နီလိုꩻမျိုꩻလိတ်လုဲင်ꩻအောဝ်ႏခေါ်ခေါ်ဒျာႏ၊ နောဝ်ꩻမꩻ နီလိုꩻမျိုꩻအတွက် တန်ႏဖိုꩻအောဝ်ႏမွေးငါႏ-ဂွုဏ်ႏသရေႏအောဝ်ႏမွေးငါႏတဲင် အောဝ်ႏလိုႏသွဉ်ထူႏလွဝါင်ꩻ စွုမ်ႏရပ်စွုမ်ႏရာႏ၊ အောဝ်ႏလိုႏဒါႏလဲဉ်းဝါင်ꩻ စွုမ်ႏဖြာꩻဖြာꩻ၊ အောဝ်ႏလိုႏထိန်ꩻသေꩻခါꩻလွဝါင်ꩻ နီလိတ်လုဲင်ꩻနောဝ်ꩻသွူ။

ပွိုးနောဝ်ꩻမꩻ နီလိတ်ပအိုဝ်ႏယို တယ်ႏနိန်ႏ ၁၃၄၄-ဗာႏ ဗꩻလွေꩻနိန်ႏ ၁၃၄၅-ဗာႏနောဝ်ꩻ သွဉ်ထူႏဒါႏလွေꩻလဲဉ်းသွူ အဖြာꩻပေါင်ꩻ(၈၅၃)ဖြာꩻနောဝ်ꩻသွူ၊ တယ်ႏယင်းနိန်ႏ ၁၃၄၅-ဗာႏ ဗꩻလွေꩻနိန်ႏ ၁၃၄၆-ဗာႏ တာင်ꩻကျွစ်လာနောဝ်ꩻ တောင်ႏကီꩻဝိန်ꩻနယ်ႏအကို သွဉ်ထူႏဒါႏလွေꩻယင်း အဖြာꩻပေါင်ꩻ(၁၃၀၀၀)တသောင်ꩻသွံရိန်လွိုလွို၊ ဆရာႏအဖြာꩻပေါင်ꩻ (၃၇၃)ဖြာꩻ သေထွꩻလွေꩻဗာႏနုဲင်းနောဝ်ꩻသွူ။ ကသွဉ်ထူႏလွေꩻလွဝါင်ꩻ လိတ်ပအိုဝ်ႏနုဲင်းယိုနောဝ်ꩻ ဟွိုန်ဟောဝ်အာႏလꩻမွေးငါႏ မရေႏမရာႏ၊ နီပအိုဝ်ႏအမျိုꩻသာꩻတွက်တာႏ အကျိုꩻလဲ့ထွာ၊ တွမ်ႏကထီႏချာနီအမျိုꩻသာꩻလဲ့မွေးမွေး၊ တွမ်ႏနီကပါင်ႏထိုချာ နီလိုꩻမျိုꩻလဲ့ဗွိုန်ပီပီ၊ ကွပ်နောဝ်ꩻမꩻ နီလိတ်လုဲင်ꩻယို ယံဖေႏကစွစ်ꩻတိုးလီထဲင်းထဲင်းနောဝ်ꩻ အောဝ်ႏလိုႏသွဉ်ထူႏလွလဲဉ်းသွူဝါင်ꩻ စွုမ်ႏရပ်ရပ်၊ အောဝ်ႏလိုႏဒါႏလွလဲဉ်းသွူဝါင်ꩻ စွုမ်ႏဖြာꩻဖြာꩻနောဝ်ꩻသွူ။ ခွန်သာဒွန်းယို ပွိုးစွဉ်ႏထီႏငါႏ နီပအိုဝ်ႏသီးအနာႏဂတ်ဆꩻငါတဲင် နီပအိုဝ်ႏမူႏခိုသီး ယံဖေႏကထင်ႏထို တိုꩻတက်တသွောင်းကီအတာႏ နီပအိုဝ်ႏမူႏခိုဖုံႏ သꩻယံဖေႏကဝါင်ႏစာꩻ လိုꩻအမျာꩻနိစ်သက်မုꩻ ယံကထွာ ဒေါ့ꩻခြုဲင်းချာဖေႏတွမ်ႏ ငေါဝ်းငွါသာႏယာႏ-အံႏဖြာႏချာမွေးစွဉ်ႏနီထွုံꩻစံႏ-ဝွန်ႏခံႏဟွိုန်သွိုꩻချာမွေးစွဉ်ႏ နီလိတ်လုဲင်ꩻနောဝ်ꩻသွူ။

ပွိုးနောဝ်ꩻမꩻ အတဲမ်းရွစ်အံႏဖြာႏသမ်းယင်း (ခွိုꩻပအိုဝ်ႏ ငေါဝ်းနွိုးသာႏယာႏ-နီပအိုဝ်ႏခွမ်ꩻလာꩻယဉ်ႏငါႏ-၂) (ပအိုဝ်ႏခွိုꩻ လိတ်လုဲင်ꩻ မျတ်ငါႏနော် ဖူးဝေးယို-၂)နုဲင်းယိုနောဝ်ꩻသွူ။ ခွန်သာဒွန်း ကတဲမ်းရွစ်ခါꩻဒါႏ ငေါဝ်းသချင်ꩻအမိဉ်ꩻ "ပအိုဝ်ႏခွိုꩻ---"ယိုနောဝ်ꩻ ပွိုးစွဉ်ႏအကျောင်ꩻခရာႏ အင်္ဂါႏလက္ခဏာႏ ပြဲ့ꩻစွုမ်ႏဟောဝ်မွေးငါႏနောဝ်ꩻမꩻ ခွေသွဉ်းသတ်မတ်ခါꩻ အနိစ်သက်သွတ်ꩻ ငေါဝ်းသချင်ꩻတပုဒ်ရိုꩻဗာႏနုဲင်းနောဝ်ꩻသွူ။ နီလိတ်လုဲင်ꩻ နီငေါဝ်းငွါ နီခွမ်ꩻလာꩻ အကွဉ်အကꩻဖုံႏယို မူႏမူႏခိုခို မီႏအောဝ်ႏနိစ်သက်ချာလွဒျာႏဝါင်ꩻကရိုꩻနောဝ်ꩻ တွမ်ႏနီကထီႏရက်ချာနီလိုꩻမျိုꩻနောဝ်ꩻ ဗွိုန်ပီဝါင်ꩻနောဝ်ꩻသွူ။ ပွိုးနုဲင်းနောဝ်ꩻမꩻ လိုꩻတန်ခမ်းလင်တရိုꩻတောဝ်း၊ လိုꩻတန်မန်းခမ်းအကိုယိုတရိုꩻတောဝ်း ပေါႏလွေꩻသွူခမ်းလောင်ႏလင်နောဝ်ꩻ နမ်းလောင်းကြိုကီ အကွဉ်အကꩻ အခြွိုင်းအခြိုꩻယို ကွဉ်ကꩻလွေꩻချာဒျာႏ ဝါင်ꩻလိုꩻမျိုꩻထွုံꩻစံႏ ခြွိုင်းခြိုꩻအကွဉ်အကꩻနောဝ်ꩻသွူ။ "ပွိုးထာꩻမုဲင်ꩻ မကွဉ်ကꩻလွေꩻဗာႏတွိုႏနုဲင်းယို"ရီခရာႏအောဝ်ႏတဲင် ရေႏရွယ်ႏဒျာႏ လိုꩻမျိုꩻယံဖေႏကထင်ႏသျာꩻ၊ လိုꩻမျိုꩻလောင်ႏလင် ယံဖေႏကထီႏသေ လိုꩻမျိုꩻဓလေ့ထွုံꩻစံႏယဉ်ႏငဲရေꩻယို ကမ္ဘာႏအလောင်း ယံဖေႏကထင်ႏသျာꩻ၊ ပွိုးနောဝ်ꩻမꩻ ဝါင်ꩻကွဉ်ကꩻလွေꩻချာဝါင်ꩻလိုꩻမျိုꩻ စွိုးခွိုꩻခွမ်ꩻလာꩻဖုံႏနောဝ်ꩻသွူ။

နီပအိုဝ်ႏလိုꩻမျိုꩻကရိုꩻလဲ့ အောဝ်ႏလိုႏကွဉ်ကꩻချာလွဝါင်ꩻ နီစွိုးခွိုꩻခွမ်ꩻလာꩻ၊ နီမီႏကွဉ်ကꩻလွဒျာႏ နီစွိုးခွိုꩻခွမ်ꩻလာꩻကရိုꩻနောဝ်ꩻ လိုꩻမျိုꩻလောင်ႏလင် မီႏထီႏယို ဝါင်ꩻတထင်းဖွီ သဲ့ꩻသွမ်ꩻဗာႏတောဝ်းနောဝ်ꩻသွူ။ နီလိုꩻမျိုꩻထွုံꩻစံႏ အောဝ်ႏအတွိုင်ꩻ မီႏကွဉ်ကꩻလွဝါင်ꩻကရိုꩻနောဝ်ꩻ နီပါင်ႏထိုချာနီလိုꩻမျိုꩻအကျောင်ꩻ လိုꩻမျိုꩻလင်အီႏသေလွဉ်နောဝ်ꩻသွူ။ နီထွုံꩻစံႏယဉ်ႏငဲရေꩻ အကွဉ်အကꩻဖုံႏယို အောဝ်ႏယီးမိုးနယ်လွေꩻဖေႏ နီလိုꩻမျိုꩻဂုဏ်ႏသရေႏတွမ်ႏ နီလိုꩻမျိုꩻယဉ်ႏငဲရေꩻ အဆင်းအရန်းနောဝ်ꩻမꩻ နီပအိုဝ်ႏခွန်နင်ꩻသီးဖုံႏလဲ့ ကမ္ဘာႏဆꩻကီ ယံဖေႏကထေပျꩻနယ်လွေꩻနွောင်ꩻ နီပအိုဝ်ႏစွိုးခွိုꩻလိုꩻမျိုꩻ ယဉ်ႏငဲကရိုꩻနောဝ်ꩻ ခွန်နင်ꩻစွုမ်ႏဖြာꩻ အောဝ်ႏလိုႏသေလွဝါင်ꩻနောဝ်ꩻသွူ။ ပအိုဝ်ႏစွိုးခွိုꩻ နီလိုꩻမျိုꩻယို ယံဖေႏကထင်ႏထို တိုꩻတက်ထဲင်းမပ်မပ် နုဲင်းမွူးနုဲင်းလာကရိုꩻနောဝ်ꩻ ခွေသွဉ်းအောဝ်ႏဆုတောင်ꩻ ကော့ꩻမောင်ꩻတသေႏသေႏဒျာႏသွူဩ။ ထိန်ꩻသေꩻခါꩻ နီလိတ်လုဲင်ꩻ၊ ထိန်ꩻသေꩻခါꩻ နီငေါဝ်းငွါ၊ ထိန်ꩻသေꩻခါꩻ နီပအိုဝ်ႏမျိုꩻခွန်ခွိုꩻ-