အဝ်ႏလိုႏသွဉ်မာꩻကျင်ꩻ
အဝ်ႏလိုႏသွဉ်မာꩻကျင်ꩻ-ကရိုꩻနဝ်ꩻ အလင်မွေးတဝ်း၊ ဝင်ꩻခမ်းတန်ထီတန်သား သေငါꩻထွူတဲ့နဝ်ꩻ၊ သေငါꩻတဝ်း ကထွာဒါႏလိုꩻတသဉ်ဖုံႏတဲ့နဝ်ꩻ ဝွေꩻသီးအဝ်ႏလွေꩻတဖူꩻတွင်ꩻ မဉ်ႏမဉ်ရီငဝ်းတစွိုးတမျိုꩻလဲ့ ဝင်ꩻသုံꩻရီးနေးဒျာႏ "မင်္ဂလာႏဒျာႏ"၊ "ဖေႏဗဲင်းရီခွင်ꩻတစိꩻပေႏမွိုင်"၊ ဝင်ꩻကွီရီးအခွင်ꩻနုဲင်းနဝ်ꩻထွူမꩻ ဝင်ꩻကမဉ်ဒါႏ အကျောင်ꩻခရာႏယို ဝင်ꩻကွဲးရီလွေꩻ၊ ယေန်ႏကေႏမုꩻနုဲင်းယိုနဝ်ꩻ ဘုရာꩻသာႏသနာႏကိုတဲး အဝ်ႏဗာႏဖို၊ အလင်မွေးတဝ်း ဗွေႏသံဃာႏသီး ကသုံꩻဒါႏ "တရေႏအိန်ႏ-ကုဋီ"ခိန်ႏနဝ်ꩻ အဝ်ႏသုံꩻနေနေ၊ ကသုံꩻဗာႏနဝ်ꩻတဲ့ အလင်မွေးတဝ်း အွိုးအကိုသူꩻ အဝ်ႏ/တအဝ်ႏတဝ်း ဖေႏနေးကသေ၊ လွေꩻဗွောင်စွော့ꩻစꩻတဝ်းနုဲင်းနဝ်ꩻ၊ တခါꩻသဲးမဉ်ႏဟဝ်နဝ်ꩻ ဗာႏခုဲင်ႏတဝ်းလဲ့၊ တခါꩻသဲးမဉ်ႏတအဝ်ႏတဝ်း၊ အဝ်ႏဒျာႏလဲ့ တခါꩻသဲးမဉ်ႏတဟဝ်တဝ်းနဝ်ꩻ အကိုသားသူꩻ ကိစ္စတရတ်ထိုꩻဒါႏတဲင် ဗွေႏဘုရာꩻအွဉ်ႏသေꩻခါꩻဗာႏ စီꩻကန်ꩻဥပဒေႏနဝ်ꩻသွူ။ မဉ်ႏနုဲင်းမန်းလိုꩻမျိုꩻဖုံႏလဲ့ အဝ်ႏသုံꩻဒျာႏ၊ အဝ်ႏဝင်ꩻလမ်းထန်ႏ မဉ်ႏမဉ်နွို့သော့ꩻလွဉ်လဲ့ ဝင်ꩻအွဉ်ႏဟွုန်ရီးငဝ်း၊ ဝင်ꩻကွီရီးငဝ်းအခွင်ꩻထွူမꩻ ဝင်ꩻနွို့လွဉ်၊ ယေန်ႏငဲးယိုတဗာႏလဲ့ အဝ်ႏလိုႏသွဉ်ကျင်ꩻကျင်ꩻ၊ မဉ်ႏတကျင်ꩻတဝ်းဒွိုန်းလဲ့ အဝ်ႏလိုႏသွဉ်၊ မဉ်ႏသွဉ်တဝ်းဒွိုန်းလဲ့ အဝ်ႏလိုႏသေသေꩻခါꩻငါႏ၊ ဝင်ꩻကသုံꩻကျင်ꩻသားဖုံႏသူꩻနဝ်ꩻ မဲ့ꩻဝင်ꩻယူႏဒါႏနီရွိုင်ꩻ၊ ဝင်ꩻယူႏဒါႏနီလိုꩻတော်ꩻ၊ ဝင်ꩻထင်းဖွီအီဒါႏ နီလိုꩻမျိုꩻ၊ ကွပ်ပွိုးနဝ်ꩻမꩻ ထင်ꩻသေကရိုꩻနဝ်ꩻ အလွိုအလွန်း တအဝ်ႏဖိုတဝ်း၊ ထွာစွဉ်ႏအဝ်ႏလိုႏသေလွဉ်းလွဉ်းလွုမ်ꩻသွူ။ ကထီႏဗာႏအာငါႏနဝ်ꩻ နီလိုꩻမျိုꩻအလောင်း၊ တသေကွီကျင်ꩻတဝ်းအခွင်ꩻတဲင် နွို့ဒုင်းဒင်းထမ်၊ ယိုနဝ်ꩻ ဟဝ်တဝ်းအကျောင်ꩻ ထွားဗော့ꩻ သံႏဃာႏကိစ္စကီနဝ်ꩻဟွဉ်ႏငါလဲ့ သေနာႏနွောင်ꩻဒျာႏ၊ ယင်းတထွောင်းနဝ်ꩻ ခွန်ဒင်ႏအဘိသေက်ထွူလမ်း မဉ်ႏတဖစ်ခါꩻရီးတဝ်းနဝ်ꩻ ကာႏလွေꩻတခါꩻပေါင်လꩻတဝ်း-စီꩻကန်ꩻနုဲင်းနဝ်ꩻလဲ့ အဝ်ႏနေကဒွိုန်း၊ နီမဉ်သေတွော့ꩻ မဉ်ႏမဉ်ရီဝင်ꩻတဲ့နဝ်ꩻ၊ နီမဉ်လꩻဝင်ꩻအကူႏအညီႏလဲ့နဝ်ꩻ နေးတွမ်ႏငဝ်းအွီႏငွါသာႏ စွော့ꩻတက်ရီးဗာႏ၊ ကွီခွင်ꩻရီးဗာႏကရိုꩻနဝ်ꩻ ထွာဒျာႏအထုံꩻယေန်ႏတမျိုꩻတဲင် ဟဝ်သေခါꩻ၊ လိုႏသွဉ်ကျင်ꩻငါႏဝင်ꩻနဝ်ꩻသွူ။ ကမ္ဘာႏလောင်းကီ ကထွားထွားနုဲင်း ခမ်းအခဝ်တွို့ꩻဖုံႏ၊ ယေန်ႏငဲးမုꩻ ကထွန်ꩻကာꩻထွူဒါႏ အာသျခမ်းအကိုဖုံႏလဲ့ အထုံꩻယေန်ႏကေႏမုꩻနုဲင်းနဝ်ꩻဖုံႏ အဝ်ႏလွဒျာႏပငါပရာꩻ၊ ကွဲႏတွော့ꩻ လိုꩻမျိုꩻပေႏကထွာဒါႏ ခမ်းရင်ꩻသားနုဲင်းမန်းခမ်းကိုယိုနဝ်ꩻ ကထိန်ꩻသိမ်ꩻအမျိုꩻလဲ့အဝ်ႏထိန်ꩻသိမ်ꩻလွဒျာႏ၊ ကလိုႏထွားနုဲင်း ဝင်ꩻအထုံꩻ' ကလိုႏသေနာႏဝင်ꩻကသုံꩻနဝ်ꩻလဲ့ အဝ်ႏလိုႏလွူꩻထွားလွေꩻပါ၊ နဝ်ꩻမꩻ တနီꩻခါ ပြေင်တူႏတသွုန် ခွုမ်မာꩻငီꩻလွေꩻတွမ်ႏခမ်းတန် ထီတန်သားနဝ်ꩻ အောင်ႏမျင်ႏမုꩻလꩻယိုꩻ မဉ်ရိုꩻနုဲင်းနဝ်ꩻသွူ။ ပြေင်တူႏတသွုန် ကာႏသွိုထောင်ငီꩻဗာႏတွမ်ႏ ဝင်ꩻခမ်းတန်သားတဲင် အဝ်ႏလိုႏသေနာႏခါꩻပါ ဝင်ꩻထုံꩻဝင်ꩻယေန်ႏငဲး၊ မဉ်ႏသေခါꩻဝင်ꩻယေန်ႏငဲးနဝ်ꩻမꩻ ပေါင်ꩻကွိုက်ꩻမုꩻထွာ၊ ပေါင်ꩻကွိုက်ꩻမုꩻမဉ်ႏထွာမꩻ ဖဉ်းမွိုတ်မုꩻထွာ၊ ဖဉ်းမွိုတ်မုꩻမဉ်ႏထွာမꩻ လꩻချာငါလို့ဝင်ꩻ အစွဲးအကမ်း၊ မဉ်ႏလꩻချာငါလို့ဝင်ꩻ အစွဲးအကမ်းနဝ်ꩻမꩻ နီကမဉ်လꩻဒါႏ ထာꩻမာꩻမျိုꩻယို မာꩻထွူယိုꩻအီ၊ အောင်ႏမျင်ႏယိုꩻအီ၊ ပေါႏထွူယိုꩻ အောင်ႏမျင်ႏနဝ်ꩻမꩻ နီကလိုႏဒါႏကဝ်ႏထွန်ႏထျꩻသူꩻလဲ့ တွိုႏယို၊ တွိုႏယိုꩻနဝ်ꩻမꩻ လိုꩻမျိုꩻဘာႏသာႏ၊ သာႏသနာႏ၊ စွိုးခွိုꩻတွမ်ႏထာꩻမာꩻလောင်ႏလင်ဖုံႏလဲ့ ထင်ႏထိုတသွောင်းလွဉ်အီပါတဲင် စွိုးခွိုꩻဂုဏ်ႏအင်္ဂါႏလဲ့ မွန်ဗန်အီအမန်ႏနဝ်ꩻသွူ။ ပအိုဝ်ႏငဝ်းအဝ်ႏတငွါ "သုဲင်ꩻတတွတ်ꩻ-အွတ်ꩻတခြုံး"နုဲင်းနဝ်ꩻ၊ အာႏရဲင်ꩻအဟဝ်ဖုံႏနဝ်ꩻ သွဉ်ထူႏမာꩻကျင်ꩻကျင်ꩻဗာႏ၊ အွိုးကထွာအီအကုဲင်ဖဲ့ꩻနဝ်ꩻ တသွဉ်ထူႏကျင်ꩻဗာႏနေးငါႏတဝ်းလဲ့ အဝ်ႏဒါႏလွဒျာႏ၊ ဥပမာႏ- ဟန်ႏသနီꩻ ၂၁-ရျာꩻဗူႏအတွင်ꩻကို ကရိုꩻဒါႏ သိုဆျယ်-မီဒီယာခေတ်တဲင် ဖြောင်ဒေါင်မုꩻ-ထွိုင်ႏအဝ်ႏလွဉ်မွေးနဝ်ꩻ တဖြာꩻတွမ်ႏတဖြာꩻ၊ တစွိုꩻတွမ်ႏတစွိုꩻ ပေါႏကေႏနပ်တဝ်းလို့ဝင်ꩻတဲ့ ထင်ႏခွန်းလို့ဝင်ꩻ အွိုးလဲင်းလောင်း၊ တွိုႏနမ်းနဝ်ꩻ ရိုꩻလွဒျာႏအဟဝ်၊ တွိုႏဝင်ꩻနဝ်ꩻ ရိုꩻနုဲင်းယိုနုဲင်းနဝ်ꩻ၊ ဝွေႏဖန်ႏတောက်ꩻလို့ဝင်ꩻ၊ လိုꩻလမ်းချင်ꩻချင်ꩻရိုꩻဒွုမ် လိုꩻကျောင်ꩻသီးလဲ့ အွဉ်ႏနေးတွမ်ႏအစွိုꩻ ရိုꩻယိုရိုꩻနဝ်ꩻ ခွန်းထွမ်လို့ဝင်ꩻနဝ်ꩻ ထွားလိတ်သားဖုံႏ အဝ်ႏထီႏလဲဉ်းဒျာႏအတွိုင်ꩻနဝ်ꩻ သွူ။ ကွဲႏတွော့ꩻ ယေန်ႏကေႏမုꩻ-ကိုတပါတဝ်းကရိုꩻနဝ်ꩻ အဗွေႏနမ်းနမ်း သေချာလွတဝ်းဒျာႏမကောင်၊ သေဒျာႏလဲ့ အသတိလိုမ်းနမ်းတဝ်းဒျာႏမကောင်၊ အပေႏနဝ်ꩻ ရိုꩻသွော့"သူႏသေတဝ်းထာꩻ"၊ လဲင်ꩻဖြားကော့ဖြားကလဲဉ်းသွူတဲ့ ကထင်ႏခွန်းလို့ဝင်ꩻ အဝ်ႏအာတန်၊ ခွန်းထွမ်လို့ဝင်ꩻ-ယိုနဝ်ꩻ ထွာဒျာႏ "အမင်္ဂလာႏ"၊ ထွာဒျာႏ "ဒုစရဲက်" နီဗွေႏဘုရာꩻဟော်ꩻနုဲင်းနဝ်ꩻ၊ နီဗွေႏဘုရာꩻကဟော်ꩻဖေႏယိုနဝ်ꩻ ထွာဒျာႏနီနာꩻလိုꩻသီးအတာႏ ဖေႏကချမ်ꩻသာႏ၊ ဖေႏကထင်ႏထို၊ ဖေႏကလꩻအကျိုꩻဟဝ်၊ ရေႏဒျာႏနုဲင်းနဝ်ꩻ၊ မဉ်ႏထွားတဝ်း နီနာꩻသတ္တဝါႏသီးအတာႏနဝ်ꩻ ဗွေႏဘုရာꩻတဟော်ꩻတဝ်းလဲ့ အဝ်ႏလꩻလဲဉ်းဒျာႏ၊ အုံချမ်ꩻချမ်ꩻသာႏသာႏ၊ ဝင်ႏစာꩻဗော့ꩻ ဖလသမာပတ်၊ ရုပ်နာမ်ႏခန္ဓာႏအွဉ်ႏ ချမ်ꩻသာႏဖေႏဗော့ꩻနုဲင်းနဝ်ꩻငါလဲ့ အဝ်ႏလꩻဒျာႏနဝ်ꩻသွူ။ ကခံႏယပ်ꩻ-ခံႏပင်ႏပန်ꩻ လစ်ꩻဆီငတ်ꩻနေင်ႏကိုတွင်ꩻ တဝေင်ꩻလွေꩻတဝေင်ꩻအုံ၊ တဒုံနွို့တဒုံထန်ႏ ကဖောႏထန်ႏဖေႏဒါႏ ဓမ္မအရောင်ႏအာႏယို ကထွာဒါႏ ခွေသီနီနာꩻ သမ်းတလွောက်ꩻနာႏတဝ်း၊ မာꩻတဖြဝ်းထိုꩻတေားဒျာႏ အရောင်ႏနဝ်ꩻက နီနာꩻကထိုမ်ႏဒါႏ ထာꩻချမ်ꩻသာႏယို အီႏလွေꩻထူႏအွိုးမုဲင်ꩻ၊ အသေသွတ်ꩻ-အဒါႏသွတ်ꩻ-အမျတ်သွတ်ꩻ ဗွေႏဘုရာꩻငဝ်းနဝ်ꩻ မဉ်ခေတ်မုဲင်ꩻခေတ် အတမာႏနွောင်ꩻတဝ်း၊ ပွိုးတမုဲင်ꩻနဲးတဲင် ဝွေꩻဗွေႏကဖောႏထန်ႏနယ်ဒါႏ ဓမ္မယိုနဝ်ꩻ လောဘငိမ်ꩻလဲဉ်း၊ ဒေါသဖေ့လဲဉ်း၊ မောဟပြေ့ꩻထိုꩻလဲဉ်းတွော့ꩻ ဟဲ့ꩻဗာႏစွဉ်ႏ "တရာꩻထီခွꩻ"၊ "တရာꩻထီနွိုး"၊ 'တရာꩻထီနွိုး မဉ်ႏအွဉ်လို့ဝင်ꩻအွꩻ၊ တရာꩻထီခွꩻ မဉ်ႏအွဉ်လို့ဝင်ꩻဒွူႏတွောင်နဝ်ꩻမꩻ လောဘအီႏငိမ်ꩻနုဲင်းနုဲင်း၊ ဒေါသအီႏဖေ့နုဲင်းနုဲင်း၊ မောဟအီႏဝုဲင်ꩻ'နုဲင်းနုဲင်းကရိုꩻနဝ်ꩻ ကောကထွာဒါႏ ဟော်ꩻထွားလိတ်သား သဖော်ꩻယံကဗွောင် တဲမ်းဖွေါင်နယ်ဗာႏ တရာꩻဗွေႏကထွာ နီဗွေႏဘုရာꩻအခရာႏတစိꩻနဝ်ꩻသွူ။[၁][၂]