အာႏဇာႏနည်ႏပုဂ္ဂိုလ်ႏ
"အာႏဇာႏနည်ႏပုဂ္ဂိုလ်ႏ၊ အာႏဇာႏနည်ႏမွူးနီꩻကရိုꩻနဝ်ꩻ ဟဲ့ꩻအွဉ်ႏထွော့နုဲင်းမုဲင်ꩻဟောင်း" မြန်မာခမ်းထီကိုယို လိုꩻမျိုꩻအဝ်ႏ ၁၃၅-မျိုꩻကရိုꩻနဝ်ꩻ သေထွꩻဗာႏနဝ်ꩻသွူ၊ လိုꩻမျိုꩻကအာအကို လိုꩻမျိုꩻယင်ဟန်ႏသီးနဝ်ꩻ ကထွာဒါႏ ဝွေꩻသီးအလိုꩻမျိုꩻ မွူးနီꩻထူꩻ မွူးနီꩻမျတ်နဝ်ꩻ အဝ်ႏပငါပရာꩻနဝ်ꩻသွူ၊ လိုꩻမျိုꩻစွိုးခွိုꩻမွူးနီꩻ၊ လိုꩻမျိုꩻတောႏလန်ႏရေꩻမွူးနီꩻ၊ လိုꩻမျိုꩻအာႏဇာႏနည်ႏမွူးနီꩻ၊ ခမ်းထီခမ်းနယ်ႏမွူးနိꩻတောမ်ႏ ဘာႏသာႏသာႏသနာႏအထူꩻအမျတ်မွူးနီꩻ စတဲင်မွူးနီꩻဖုံႏနဝ်ꩻသွူ။ မြန်မာခမ်းထီ အာႏဇာႏနည်ႏမွူးနီꩻနဝ်ꩻ ထွာအွဉ်ႏထွော့လွေꩻ နေင်ႏ ၁၉၄၇-ဗာႏ၊ ဇူလိုင်လာ ၁၉-နီꩻနဝ်ꩻသွူ၊ အနီꩻနဝ်ꩻနဝ်ꩻ ဗိုလ်ချုပ်အောင်ဆန်း တောမ်ႏအွဉ်ငါလင်(၈)ဖြာꩻသီးနဝ်ꩻ ခံႏဗာႏဝင်ꩻကျမ်ႏသီတဲင် ကထွာဒါႏ ခမ်းထီအွဉ်ငါ အိုပ်ချုပ်သားတောမ်ႏ ခမ်းသားအမျာꩻသီးနဝ်ꩻ ဟဲ့ꩻအွဉ်ႏထွော့ထွာလွေꩻ မြန်မာခမ်းအာႏဇာႏနည်ႏမွူးနီꩻနဝ်ꩻသွူ၊ ကဟဲ့ꩻအွဉ်ႏထွာဗာႏ အာႏဇာႏနည်ႏမွူးနီꩻအတွိုင်ꩻ ကထွာခမ်းသားထီသားသီးလဲ့ လက်ခံႏတဲင် မိဉ်ႏတွိုႏတွိုႏ ဇူလိုင်လာ ၁၉-နီꩻ အာႏဇာႏနည်ႏမွူးနီꩻနဝ်ꩻ တခမ်းလုမ်းတယ်ႏခမ်းထီ သမ္မတအစ ဗꩻခမ်းသားလို့စွုမ်ႏဖြီးစွုမ်ႏဖြာꩻ တွိုႏရာꩻအရပ် အွဉ်ႏအရေꩻ ခမ်ႏနောမ်ꩻအုံယေန်ဝင်ꩻနဝ်ꩻသွူ။ နဝ်ꩻမꩻ နုဲင်းယိုခါ ကထွာဒါႏ အာႏဇာႏနည်ႏဗိမာန်ႏတောမ်ႏ အာႏဇာႏနည်ႏသင်ႏခဲင်ꩻ(အာႏဇာႏနည်ႏကုန်ꩻ)ကိုနဝ်ꩻ ပေါႏလွိုသွူ အာႏဇာႏနည်ႏပုဂ္ဂိုလ်ႏ(၉)ဖြာꩻယို ပါꩻမုဲင်ꩻမုဲင်ꩻတဲ့ တအွဉ်ႏတဝ်း၊ တပလို့ꩻသော့ꩻတဝ်းနဝ်ꩻသွူ၊ ၁၉၄၇-ဗာႏ၊ ဇူလိုင်လာ ၁၉-နီꩻကို ကောပ်ရန်ႏသူႏ ကျမ်ႏသီတဲင် ကသီထိုꩻဒါႏ(၉)ဖြာꩻကိုတမွေးတဝ်း၊ ကအဝ်ႏလွစ်ကအဝ်ႏကုဲင်ဒါႏ ဝွန်ႏတန်ဦးဘဂျမ်း၊ ဦးအောင်ဇံဝေတောမ်ႏ ပျော်ဘွယ်ဦးမြသီး(၃)ဖြာꩻနဝ်ꩻလဲ့ အာႏဇာႏနည်ႏပုဂ္ဂိုလ်ႏ ဝင်ꩻတဟဲ့ꩻအွဉ်ႏထွော့တဝ်းနဝ်ꩻသွူ၊ ဝွေꩻသီး(၃)ဖြာꩻနဝ်ꩻ အာႏဇာႏနည်ႏဗိမာန်ႏကိုလဲ့ တအွဉ်ႏသော့ꩻတဝ်းနဝ်ꩻသွူ၊ အာႏဇာႏသင်ႏခဲင်ꩻကိုလဲ့ တအွဉ်ႏလို့ꩻသော့ꩻတဝ်းနဝ်ꩻသွူ။ မိဉ်ႏထွားချာနုဲင်းယိုနဝ်ꩻ ဝွေꩻသီးဝင်ꩻသိုမ်ယို ခမ်းထီအတာႏ ကအဝ်ႏမာꩻ ခမ်းရေꩻထီရေꩻအခိန်ႏကို မိဉ်ႏထဲ့သုမ်ꩻပါလွေꩻသွိုအနီꩻနဝ်ꩻနဝ်ꩻ အာႏဇာႏနည်ႏပုဂ္ဂိုလ်ႏစာႏရင်ꩻကို အီႏပါသော့ꩻနေဟောင်း၊ ဇူလိုင်လာ ၁၉-နီꩻကို ကောပ်တသီတဝ်း အဝ်ႏကုဲင်လꩻနဝ်ꩻ အာႏဇာႏနည်ႏပုဂ္ဂိုလ်ႏလဲ့ ဝင်ꩻတဟဲ့ꩻအွဉ်ႏထွော့တဝ်း၊ ကထွိုင်ႏသီလဲ့ အာႏဇာႏနည်ႏဗိမာန်ႏတောမ်ႏ အာႏဇာႏနည်ႏသင်ႏခဲင်ꩻကို တပါတသော့ꩻတဝ်းနဝ်ꩻသွူ။ မိဉ်ႏထွားချာယင်း ပအိုဝ်ႏလိုꩻမျိုꩻ ပအိုဝ်ႏစွိုးခွိုꩻသီးယို ကထွာဒါႏ လိုꩻမျိုꩻမွူးနီꩻထူꩻ မွူးနီꩻမျတ်နဝ်ꩻ အဝ်ႏနဝ်ꩻသွူ။ ပအိုဝ်ႏလိုꩻမျိုꩻစွိုးခွိုꩻမွူးနီꩻ၊ ပအိုဝ်ႏတောႏလန်ႏရေꩻမွူးနီꩻ၊ ပအိုဝ်ႏအာႏဇာႏနည်ႏမွူးနီꩻစတဲင်ဖုံႏ အဝ်ႏဒျာႏနုဲင်းနုဲင်းနဝ်ꩻ သေထွꩻဗာႏနဝ်ꩻသွူ၊ ပအိုဝ်ႏခမ်းသားသီးတဲ့ အဝ်ႏသေထွꩻဒျာႏဝင်ꩻနဝ်ꩻသွူ။ ကွဲးတွော့ꩻ ပအိုဝ်ႏလိုꩻမျိုꩻအတာႏ ကထွာဒါႏ ပအိုဝ်ႏစွိုးခွိုꩻမွူးနီꩻ၊ ပအိုဝ်ႏတောႏလန်ႏရေꩻမွူးနီꩻ၊ ပအိုဝ်ႏအာႏဇာႏလည်ႏမွူးနီꩻယိုဖုံႏ အထွာလွဉ်နုဲင်းမုဲင်ꩻ၊ ကောပ်တမုဲင်ꩻ ထွာလွဉ်ဗာႏနဝ်ꩻ ကရိုꩻဒါႏ ကထွာလွဉ်ဗာႏအကျောင်ꩻတရာꩻယို ကဲဉ်းအာအာနဝ်ꩻ တသေထွꩻလွတဝ်းနဝ်ꩻသွူ။ အွိုးမွူးနီꩻယင်ဟန်ႏဖုံႏနဝ်ꩻ အမွူးနီꩻတောမ်ႏအခရာႏယို သေနာႏဗာႏနဝ်ꩻ ယိုꩻဒျာႏတဲင် သေထွꩻဗာႏယိုꩻယိုꩻတဲ့ အဝ်ႏနဝ်ꩻသွူ။ နဝ်ꩻမꩻ ပအိုဝ်ႏလိုꩻမျိုꩻယို အာႏဇာႏနည်ႏမွူးနီꩻ အဝ်ႏဒျာႏနုဲင်းနုဲင်းနဝ်ꩻသွူ၊ ပအိုဝ်ႏအာႏဇာႏနည်ႏမွူးနီꩻနဝ်ꩻ နေင်ႏ ၁၃၃၇-ဗာႏ၊ တောႏလင်ꩻလာလောင်း (၅)နီꩻ (၁၉၇၅-ဗာႏ၊ စက်တင်ဘာလာ ၂၄-နီꩻ)၊ မွူးနီꩻ-ဗုဒ္ဓဟူꩻ အဝ်ႏနုဲင်းနဝ်ꩻတဲင် သေထွꩻဗာႏနဝ်ꩻသွူ၊ မွူးနီꩻနဝ်ꩻနဝ်ꩻ ထွာပအိုဝ်ႏအွဉ်ငါ ဖြားဗွာဦးလှဖေ ဖဝကုဲင်ထိုꩻမွူးနီꩻနဝ်ꩻသွူ၊ ဖြားဗွာလှဖေနဝ်ꩻ ကုဲင်ထိုꩻဒျာႏတောမ်ႏရောႏဂါႏ ၉၆-ပါꩻနဝ်ꩻ သေထွꩻဗာႏနဝ်ꩻသွူ။ ဖြားဗွာလှဖေယို ပအိုဝ်ႏလိုꩻမျိုꩻအတာႏ အွဉ်ငါယံတဖြာꩻကရိုꩻနဝ်ꩻတဲ့ ကထွာပအိုဝ်ႏလိုꩻမျိုꩻတောမ်ႏ ပအိုဝ်ႏခမ်းသားသီး အွဉ်ႏဖေင်ꩻတလꩻတဝ်းနဝ်ꩻသွူ၊ ပအိုဝ်ႏလိုꩻမျိုꩻ တောႏလန်ႏရေꩻအသွုပ်သွုပ်ကိုယို ဖြားတန်ကောင်ခယ်ႏ၊ ဖြားဗွာလှဖေ၊ ဗိုလ်ချုပ်စံသိန်း-စတဲင် အွဉ်ငါယံအသွုပ်သွုပ်သီးတဲ့ အဝ်ႏလွဉ်ꩻနုဲင်းနုဲင်းနဝ်ꩻသွူ။ ကောပ်ပွိုးနဝ်ꩻမꩻ ပအိုဝ်ႏလိုꩻမျိုꩻကိုယို အွဉ်ငါယံအသွုပ်သွုပ် အဝ်ႏလွဉ်ဒျာႏအကို ကောပ်ပွိုးအကျောင်ꩻနုဲင်းမုဲင်ꩻ အွဉ်ႏထွော့ထွာဗာႏ ဖြားဗွာလှဖေ ကုဲင်ထိုꩻမွူးနီꩻကိုဟောင်း၊ ဖြားဗွာလှဖေနဝ်ꩻ တောမ်ႏအာႏဇာႏနည်ႏ ဂုဏ်ႏဝိသေသ လက္ခဏာႏ ဗွေပြဲ့ꩻစုံႏတွော့ꩻဟောင်း၊ ကထွာဒါႏ အွဉ်ငါယံအလင်နဝ်ꩻ ဗွေပြဲ့ꩻစုံႏတဝ်းတောမ်ႏ အာႏဇာႏနည်ႏဂုဏ်ႏဝိသေသလက္ခဏာႏတွော့ꩻဟောင်း။ နဝ်ꩻမꩻ အာႏဇာႏနည်ႏမွူးနီꩻ ကအဝ်ႏလွဉ်ဗာႏနဝ်ꩻ အာႏဇာႏနည်ႏ လိုꩻပုဂ္ဂိုလ်ႏအဝ်ႏတွော့ꩻနဝ်ꩻသွူ၊ အာႏဇာႏနည်ႏပုဂ္ဂိုလ်ႏ မိဉ်ႏတအဲဉ်ထဝ်းနဝ်ꩻ အာႏဇာႏနည်ႏမွူးနီꩻတဲ့ တအဝ်ႏတဝ်းနဝ်ꩻသွူ၊ ကောပ်နဝ်ꩻမꩻ အာႏဇာႏနည်ႏလိုꩻပုဂ္ဂိုလ်ႏယို ထွာအထျꩻအရေꩻတန်နဝ်ꩻသွူ၊ အာႏဇာႏနည်ႏပုဂ္ဂိုလ်ႏကရိုꩻနဝ်ꩻ လိုꩻနုဲင်းမုဲင်ꩻစားဟောင်း၊ လိုꩻနုဲင်းမုဲင်ꩻစားနဝ်ꩻ ဟဲ့ꩻအွဉ်ႏထွော့ အွဉ်ႏထွာလꩻ အာႏဇာႏနည်ႏပုဂ္ဂိုလ်ႏဟောင်းနဝ်ꩻ အရေꩻတန်မွေးငါႏ မရေႏမရာႏနဝ်ꩻသွူ။ မိဉ်ႏတမွေးတဝ်းနဝ်ꩻ ထေင်းထမ်ႏဗာႏဖိုငါစဲ့ꩻသား၊ ထွာဗာႏဖိုငါ အခရႏဆေ့ꩻဗိုလ်မှူး၊ ခမ်းသားတမုဲင်ꩻမုဲင်ꩻ တသေရိုမ်းတဝ်း၊ အစွိုꩻတောမ်ႏအစွိုꩻဒျာႏ အွဉ်ႏထွာဒင်ႏချာအရာႏတန်ဖုံႏ၊ မာꩻဗာႏဖိုငါ လွတ်တောႏအမတ်ဖုံႏ-စတဲင်ယိုစားငါလဲ့ မိဉ်ႏထွာထိုꩻလို့ဒါႏ ပအိုဝ်ႏအာႏဇာႏနည်ႏ လိုꩻပုဂ္ဂိုလ်ႏနဝ်ꩻ မာꩻထဲ့အီဒါႏ အာႏဇာႏနည်ႏသီး ဂုဏ်ႏသိက္ခာႏနဝ်ꩻသွူ။ ကောပ်တမုဲင်ꩻနဲးတဲင် ပအိုဝ်ႏလိုꩻမျိုꩻသီး ကအဝ်ႏထွာယိုခါနဝ်ꩻ အာႏဇာႏနည်ႏကုန်ꩻ(အာႏဇာႏနည်ႏသင်ႏခဲင်ꩻ)ကိုယို အာႏဇာႏနည်ႏလိုꩻပုဂ္ဂိုလ်ႏနုဲင်းမုဲင်ꩻမꩻ လွေꩻအွဉ်ႏသော့ꩻလꩻနဝ်ꩻ အွဉ်ႏရေꩻထွူႏထွူႏတွုမ်တွုမ် တအဝ်ႏတဝ်း၊ အာႏဇာႏနည်ႏပုဂ္ဂိုလ်ႏ တမွေးတဝ်းလိုꩻဖုံႏလဲ့ အဝ်ႏလွေꩻအွဉ်ႏဒျာႏတဲင် အခရာႏထန်ႏဖွီထိုꩻဒါႏနဝ်ꩻသွူ၊ ခမ်းသားအမျာꩻ အွဉ်ႏထွော့အာႏဇာႏနည်ႏ တမွေးတဝ်း၊ လိုꩻတစွိုꩻ ကအွဉ်ႏထွော့ဒါႏ အာႏဇာႏနည်ႏနဝ်ꩻ ခမ်းသားအမျာꩻသီးတဲ့ အီႏအွဉ်ႏရေꩻထွူႏတွုမ် တမွေးတဝ်းနဝ်ꩻသွူ။ ဇူလိုင်လာ ၁၉-နီꩻ ဗိုလ်ချုပ်အောင်ဆန်းတောမ်ႏ အွဉ်ငါတန်သီး တစွိုꩻချင်ႏ တစုပ်ချင်ႏကို တသီတဝ်း ကအဝ်ႏကုဲင်ဒါႏ အွဉ်ငါတန်သိုမ်ဖြာꩻနဝ်ꩻ ကထွိုင်ႏသီဆုဲင်ꩻယို ဝင်ꩻတဟဲ့ꩻအွဉ်ႏထွော့တဝ်း အာႏဇာႏနည်ႏပုဂ္ဂိုလ်ႏနဝ်ꩻ တမုဲင်ꩻတစွိုးငါ အွဉ်ငါမာꩻဖေႏတအဝ်ႏတဝ်းဒါႏလိုꩻ ကထွာဒါႏ အာႏဇာႏနည်ႏပုဂ္ဂိုလ်ႏ၊ လွေꩻအွဉ်ႏသော့ꩻအာႏဇာႏနည်ႏ သင်ႏခဲင်ꩻကိုယို လိုꩻနုဲင်းမုဲင်ꩻစားနဝ်ꩻ ဟဲ့ꩻပအိုဝ်ႏအာႏဇာႏနည်ႏဟောင်း။[၁][၂]