အီႏပင်ႏထိုလွေꩻထဲင်း

"အီႏပင်ႏထိုလွေꩻထဲင်းဗာႏ လိတ်ပအိုဝ်ႏ ဗဟိုႏသွဉ်တန်ꩻနုဲင်းမုဲင်ꩻ" အခိန်ႏခမ်းသဲင်လာယို ပအိုဝ်ႏစွိုးခွိုꩻ ပအိုဝ်ႏလိုꩻမျိုꩻ ခွန်နင်ꩻခိုမူႏ လိုꩻယွဲးသီး သွဉ်ထူႏလိတ်ပအိုဝ်ႏလာနဝ်ꩻသွူ၊ အခေႏခံႏလွေꩻ အွိုင်ႏအရန်းတဲင် စွုမ်ႏဒုံဒုံစွုမ်ႏရပ်ရပ်နဝ်ꩻ သွဉ်လွေꩻလိတ်ပအိုဝ်ႏထွူ နွို့စေဖြေႏလွေꩻ အွိုင်ႏလိတ်ရီပွယ်ꩻအရန်းနဝ်ꩻသွူ၊ နဝ်ꩻမိဉ်ႏထွူ ဒဲဉ်ရုတ်ꩻလာကိုနဝ်ꩻ ပအိုဝ်ႏစွိုးခွိုꩻအရန်း ထွာနွောင်ꩻဆရာႏ လိတ်ပအိုဝ်ႏဗဟိုႏသွဉ်တန်ꩻ လိတ်ရီပွယ်ꩻယိုလဲ့ အဝ်ႏအွဉ်ႏလွေꩻနဝ်ꩻသွူ။ ကွပ်အကျောင်ꩻအစွိုးစွိုးတဲင် ကမာꩻလွေꩻသွဉ်ထူႏ လိတ်ပအိုဝ်ꩻရေꩻ ခမ်းသဲင်လာကိုယို အခိန်ႏယံအခါႏရော့ꩻဟဝ်မွေးငါႏနဝ်ꩻသွူ၊ ကျောင်ꩻသားလိုꩻယွဲးသီးဖုံႏနဝ်ꩻ သွဉ်ထူႏအစိုႏရသွဉ်လိတ်အတန်ꩻကျောင်ꩻယို ထွာကွတ်ꩻလာ အလာတဆီဗော့ꩻဗော့ꩻနဝ်ꩻသွူ၊ ထင်ႏအစိုႏရ သွဉ်လိတ်ကျောင်ꩻထွူ ထွာကျောင်ꩻပေ့ꩻခိန်ႏတဲင် သွဉ်ထူႏဗာႏသွုပ်နွောင်ꩻ လိတ်ပအိုဝ်ႏနဝ်ꩻသွူ၊ မိဉ်ႏထွားယင်းနုဲင်း လိုပ်ꩻမာꩻသွို့ꩻခြံသားအနေႏလဲ့ ခမ်းသဲင်လာနဝ်ꩻ ထွာထာꩻမာꩻသာႏလာတဲင် သွဉ်ထူႏဗာႏဟဝ်ဟဝ်နွောင်ꩻ လိတ်ပအိုဝ်ႏနဝ်ꩻသွူ။ ဗဟိုႏသံႏဃာႏအွဉ်ငါတဲင် ကမာꩻလွဉ်ဒါႏ လိတ်ပအိုဝ်ႏစွစ်ꩻလီရေꩻ၊ သွဉ်ထူႏလိတ်ပအိုဝ်ႏရေꩻယိုနဝ်ꩻ နေင်ႏပေါင်ꩻ အဆီတန်ꩻလဲဉ်းနဝ်ꩻသွူ၊ မိဉ်ႏထွားနုဲင်း ထွာနွောင်ꩻဆရာႏ လိတ်ပအိုဝ်ႏဗဟိုႏသွဉ်တန်ꩻနဝ်ꩻ အမုဲင်တွိုႏဗꩻ (၃၂)လဲင်ႏလဲဉ်းနဝ်ꩻသွူ၊ အမုဲင်(၃၂)နဝ်ꩻ မာꩻလွေꩻဝင်ꩻပင်ႏလုံကို၊ နေင်ႏဟာ ၂၀၁၆-ဗာႏ၊ မေလာတွင်ꩻနဝ်ꩻသွူ၊ ဟန်ႏနေင်ႏ ၂၀၁၇-ဗာႏ လိတ်ပအိုဝ်ႏ ဗဟိုႏသွဉ်တန်ꩻအမုဲင်(၃၃)ယို အီႏမာꩻလွေꩻယင်း ကျောက်တလုံꩻတန်ဝေင်ꩻနယ်ႏကို သေထွꩻဗာႏသွူ။ ကောပ်စွဉ်ႏ အွဉ်ငါမာꩻလွေꩻလိတ်ပအိုဝ်ႏသွဉ်တန်ꩻယို စွုမ်ႏနေင်ႏနေင်ႏတဲင် ဟန်ႏသနီꩻ ပအိုဝ်ႏကို ပအိုဝ်ႏလိတ်စောင်ႏဖုံႏ အဝ်ႏအာထန်ႏအာလွဉ်နွောင်ꩻအီနဝ်ꩻသွူ။ သံႏဃာႏသီးလဲ့ ခွုင်းကသေကဒါႏနဝ်ꩻ တရာꩻဟောꩻလိတ်စောင်ႏဖုံႏ၊ ဟောꩻလွူးတာႏမဂ္ဂဇင်းဖုံႏ ထေထန်ႏလွေꩻနဝ်ꩻသွူ၊ လိုꩻလမ်းသီးလဲ့ ကမာꩻနွောင်ꩻရာꩻ လိတ်အုပ်လိတ်စောင်ႏယို ခုမ်မာထေထန်ႏလွေꩻနဝ်ꩻသွူ၊ ယိုနဝ်ꩻ စွုမ်ႏရပ်စွုမ်ႏဒုံ သွဉ်လိတ်ပအိုဝ်ႏ၊ အဝ်ႏလိတ်ပအိုဝ်ႏဗဟိုႏသွဉ်တန်ꩻ လꩻလွဉ်အကျိုꩻတရာꩻနဝ်ꩻသွူ။ ခမ်းသဲင်လာ ဝေင်ꩻနယ်ႏအလွောက်ꩻ အခေႏခံႏလွေꩻ အွိုင်ႏအရန်းလိတ်ရီပွယ်ꩻကို ယံနွို့ဖြေႏနွောင်ꩻတာႏ စွုမ်ႏရပ်စွုမ်ႏဒုံနဝ်ꩻ သွဉ်ထူႏလွေꩻလွ လိတ်ပအိုဝ်ႏနဝ်ꩻသွူ၊ စွုမ်ႏရပ်စွုမ်ႏဒုံ သွဉ်ဖေႏလိတ်ပအိုဝ်ႏတာႏ လိတ်ပအိုဝ်ႏဆရာႏနဝ်ꩻ အဝ်ႏလိုႏနဝ်ꩻသွူ၊ နဝ်ꩻမꩻ လိတ်ပအိုဝ်ႏဆရာႏ ယံပေါႏထန်ႏလွဉ်နဝ်ꩻ အွဉ်ႏလွေꩻဖေႏနေး ထွာနွောင်ꩻဆရာႏ လိတ်ပအိုဝ်ႏဗဟိုႏသွဉ်တန်ꩻဖုံႏ၊ အွိုင်ႏအရန်း ထွာဆရာႏလိတ်ပအိုဝ်ႏသွဉ်တန်ꩻဖုံႏနဝ်ꩻသွူ။ နဝ်ꩻမꩻတဲင် သွဉ်တန်ꩻအရန်းရန်းကိုယို ကကျိုꩻစာꩻမွေးသားနဝ်ꩻ သွဉ်ဒါႏအောင်ႏမျင်ႏလꩻနဝ်ꩻ ထီႏဗာႏနဝ်ꩻသွူ၊ ကွဲးတွော့ꩻ အွိုင်ႏအရန်းဆရာႏသွဉ်တန်ꩻတဲ့နဝ်ꩻ၊ ဗဟိုႏအရန်းသွဉ်တန်ꩻတဲ့နဝ်ꩻ ယဟန်ႏသားနဝ်ꩻ ထင်ႏခွင်ꩻအဝ်ႏလꩻလဲဉ်းသွူလဲ့ သွဉ်ထူႏပရီႏပရာႏ၊ လွေꩻပျာႏရာႏဒျာႏထာꩻသားလဲ့ အဝ်ႏနဝ်ꩻသွူ၊ ယရပ်ရပ်နဝ်ꩻ လွေꩻထင်ႏဗဟိုႏသွဉ်တန်ꩻတာႏ ဒုံရပ်အမျာꩻ စွဲးကမ်းဖေႏနေးတဲ့ အဝ်ႏနဝ်ꩻသွူ။ ယဟန်ႏသားနဝ်ꩻ ကထင်ႏသွဉ်တန်ꩻယို တွိုႏဖိုတဝ်းအရပ်ယို မိဉ်တွိုႏတဲင် ထင်ႏသွဉ်တန်ꩻနုဲင်းနဝ်ꩻသားတဲ့အဝ်ႏ၊ ယဟန်ႏသားနဝ်ꩻ မိဉ်ဒါႏမိဉ်သေ မိဉ်သဲင်ꩻကျိုꩻဆောင်ႏချာ ရပ်ရာႏတာႏတွော့ꩻထင်ႏနဝ်ꩻ ကဲဉ်းဆေ့ꩻဆေ့ꩻ၊ မိဉ်လွေꩻပျောႏရာႏသားနဝ်ꩻ ကဲဉ်းအာအာနဝ်ꩻသွူ။ ထွာမုဲင်ꩻနဲးတဲင် နုဲင်းယရပ်ရပ် ယဒုံဒုံနဝ်ꩻ အီႏလွေꩻထင်ႏ အွိုႏအရန်း ထွာဆရာႏသွဉ်တန်ꩻတာႏယို ပါꩻမုဲင်ꩻမိဉ်လွေꩻထင်ႏနဝ်ꩻ ဖေႏစင်းနေးရွဉ် တနီꩻနွတ်ꩻရေင်ဗီႏ၊ သောစ်ꩻရေင်ဗီႏနဝ်ꩻသွူ၊ ကလွေꩻထင်ႏသားလဲ့ လꩻမွူးနီꩻခꩻတဲင် လွေꩻထင်ႏခန်းဒျာႏနဝ်ꩻသွူ၊ အဝ်ႏအွိုင်ႏအရန်းသွဉ်တန်ꩻသဲင်ꩻ ထွိုင်ႏအီႏသဲင်ꩻသွဉ်ဖေႏချာဒုံကို ကွပ်အကျောင်ꩻအမျိုꩻမျိုꩻတဲင် သဲင်ꩻသွဉ်ဖေႏချာနွောင်ꩻတဝ်းသားတဲ့ အဝ်ႏနဝ်ꩻသွူ၊ တွိုႏနဝ်ꩻတဲင် ဟဲ့ꩻသော့ꩻထင်းဗားတေားယင်း လိုꩻလင်သွဉ်နဝ်ꩻသွူ။ နုဲင်းထွာနွောင်ꩻဆရာႏ လိတ်ပအိုဝ်ႏ ဗဟိုႏသွဉ်တန်ꩻနဝ်ꩻ ကထင်ႏလွဉ်သွဉ်တန်ꩻသားယို အခေႏခံႏလွေꩻတွမ်ႏ ဝေင်ꩻနယ်ႏနမ်းခြောင်ꩻတင်၊ အွိုင်ႏနမ်းခြောင်ꩻတင်၊ ရပ်ဒုံနမ်းခြောင်ꩻတင်-စတဲင် အဝ်ႏအစွိုးစွိုးနဝ်ꩻသွူ၊ ပအိုဝ်ႏကို ကဗွောင်လွေꩻ သွဉ်တန်ꩻတွမ်ႏသွဉ်လိတ်ထုံꩻစဲဉ်ႏယို ညနေင်ႏပေါင်ꩻသိုမ်ဆီလွိုလဲဉ်းလဲ့ အဝ်ႏလွေꩻစွူစွူဒျာႏ အနယ်ꩻတွိုင်ꩻတွိုင်ꩻနဝ်ꩻ အဝ်ႏထီႏဗာႏနဝ်ꩻသွူ။ တနေင်ႏလဲ့ အဝ်ႏလိတ်မွူးဘာႏသာႏတွမ်ႏ ထန်ႏတသာလိတ်ဘာႏသာႏ၊ နီနေင်ႏလဲ့ လိတ်မွူးဘာႏသာႏတွမ်ႏ ထန်ႏတသာယင်း လိတ်ဘာႏသာႏနဝ်ꩻသွူ၊ သွဉ်တန်ꩻမွူးနီꩻသမ်းဒွေါင်ႏတဖဲ့ꩻတဲင် ကထွာသွဉ်တန်ꩻသားနဝ်ꩻ သွဉ်ဗာႏအဒါႏမွေးတဝ်းဒွုမ်၊ ထွာဒျာႏ သွဉ်ဗာႏအသေလုမ်ꩻနဝ်ꩻသွူ၊ ထွိုင်ႏထွာထာꩻဒါႏနေးမွေးတဝ်း၊ ထွာထာꩻသေနေးလုမ်ꩻတဲင် ထွိုင်ႏအီႏသဲင်ꩻသွဉ်ချာဝင်ꩻနဝ်ꩻ ထန်ႏတမီးတမဝ်းထိုꩻလို့ထာꩻနဝ်ꩻသွူ၊ ယဟန်ႏသားနဝ်ꩻ သွဉ်တန်ꩻယို ထင်ႏဗာႏစွဉ်ႏနွတ်ꩻသောဝ်ꩻနေင်ႏ အနေင်ႏတဆီသားတဲ့ အဝ်ႏနဝ်ꩻသွူ။ လိတ်လုဲင်ꩻတသွောင်းထိုရေꩻ အခန်ꩻကဏ္ဍယို လိုꩻလမ်း(လိတ်လုဲင်ꩻတွမ်ႏယေန်ႏငဲးရေꩻ)မိဉ်ႏခုမ်မာꩻနဝ်ꩻ ယိန်းတခြင်ခြင်နဝ်ꩻသွူ၊ ဗွေႏသံႏဃာႏသီး ထွိုင်ႏခုမ်မာꩻနဝ်ꩻ သမ်းထွာဗွေႏသံႏဃာႏတဲင် ထိန်ꩻချင်းဗာႏ သိက္ခာႏပုဒ်ဖုံႏတဲ့ အဝ်ႏနဝ်ꩻမꩻ ခုမ်မာꩻဗာႏတခြင်လို့တဝ်း၊ မိဉ်ႏနုဲင်းယိုခါ ပအိုဝ်ႏလိတ်လုဲင်ꩻတွမ်ႏယေန်ႏငဲးရေꩻအစွိုꩻနဝ်ꩻ ပအိုဝ်ႏလိတ်လုဲင်ꩻအခန်ꩻကဏ္ဍတသွောင်းထိုရေꩻယို အဓိက ထွာတာႏဝွန်ႏတဗာႏနဝ်ꩻသွူ။ ကဗွောင်လိတ်ပအိုဝ်ႏသွဉ်တန်ꩻယို အကျိုꩻတရာꩻနဝ်ꩻ ဆေ့ꩻတွမ်ႏအာတဲ့ အဝ်ႏလꩻ၊ အဆꩻတွမ်ႏအသိုႏနဝ်ꩻတဲ့ အဝ်ႏရော်ꩻဒျာႏရင်ꩻနဝ်ꩻသွူ၊ ကွဲးတွော့ꩻ အဝ်ႏသွဉ်တန်ꩻမိဉ်ႏလင်ꩻယို ဖေႏကထွာစွဉ်ႏလိုꩻဆꩻ၊ အွိုင်ႏရပ်ဒုံကို ဖေႏကအာႏကွိုꩻချာလꩻစွဉ်ႏ အမွေးအမဲဉ်ႏနဝ်ꩻ အဝ်ႏလိုႏလွေꩻလဲဉ်း စနစ်ဟဝ်ဟဝ်၊ အီႏလꩻဗာႏထင်ႏသွဉ်တန်ꩻခွင်ꩻယို အဝ်ႏလိုႏထွိုက်ပင်ႏလွေꩻလဲဉ်း တွမ်ႏနယ်ꩻစနစ်တစွိုးစွိုး ထီႏနုဲင်းနဝ်ꩻသွူ။ လိုꩻကထင်ႏဗဟိုႏသွဉ်တန်ꩻယို အွိုင်ႏအရန်း လိတ်စေဖြေႏပွယ်ꩻကို အောင်ႏလꩻခါꩻဗာႏအရန်းတစွိုးစွိုးတဲ့ တရိုꩻတဝ်း၊ ခါးလားကထင်ႏ ထွာနွောင်ꩻဆရာႏ လိတ်ပအိုဝ်ႏဗဟိုႏသွဉ်တန်ꩻကိုယို မာꩻလွေꩻရီး ထင်ႏဗဟိုႏသွဉ်တန်ꩻတာႏ လိတ်စေဖြေႏပွယ်ꩻအကျိုႏတဲင် အကျိုႏလိတ်စေဖေႏပွယ်ꩻယို မိဉ်ႏအောင်ႏမꩻ ထင်ႏခွင်ꩻလꩻ ဗဟိုႏသွဉ်တန်ꩻနုဲင်းနဝ်ꩻတရိုꩻတဝ်း၊ တွမ်ႏစနစ်အမျိုꩻမုဲင်ꩻတရိုꩻတဝ်း အဝ်ႏလိုႏပင်ႏထိုထဲင်းငါႏ လိတ်ပအိုဝ်ႏဗဟိုႏသွဉ်တန်ꩻအရန်းနဝ်ꩻသွူ။ အဝ်ႏနဝ်ꩻမꩻ ဗဟိုႏသွဉ်တန်ꩻယို လိုꩻဆေ့ꩻဆေ့ꩻတွော့ꩻ မွူးနီꩻဟမ်းဆွာꩻဆွာꩻလုဲင်ႏတရိုꩻတဝ်း၊ သွဉ်ထောင်ထွားနေး အကျင်ႏလဲပ်ꩻ ထွဉ်ႏထိုမ်ႏသွဉ်ထောင်ချာ လိတ်ပအိုဝ်ႏတွမ်ႏ ပအိုဝ်ႏယေန်ႏငဲးရေꩻ အခန်ꩻကဏ္ဍဖုံႏထွူ မာꩻလွေꩻနေး အရန်းထိုလိတ်စေပွယ်ꩻတဲင် မိဉ်ႏအွဉ်ႏထွော့ ထူႏဂုဏ်ႏဖေႏအပ်လွေꩻနေး ဘွဲ့နဝ်ꩻ လိတ်ပအိုဝ်ႏ အခန်ꩻကဏ္ဍယို ယိန်းထင်ႏထိုထိုနဝ်ꩻသွူ။ နုဲင်းယိုခါ ပအိုဝ်ႏကို လိုꩻဒါႏလျင်ႏဒါႏလဲပ်ဒါႏပဲင်ႏ ပအိုဝ်ႏသားတရိုꩻတဝ်း၊ ဗဟိုႏလိတ်ပအိုဝ်ႏဆရာႏစွိုꩻတရိုꩻတဝ်း၊ ပအိုဝ်ႏလိတ်လုဲင်ꩻသုတေသနစွိုꩻတရိုꩻတဝ်း၊ လိတ်ပအိုဝ်ႏဖဲ့ꩻဆဲင်ႏရာꩻ ပညာႏသျင်ႏတရိုꩻတဝ်း အီႏအွဉ်ႏထွော့ထူႏဂုဏ်ႏတွမ်ႏ လိတ်ပအိုဝ်ႏဘွဲ့နုဲင်းမုဲင်ꩻဟောင်း။ ဝင်ꩻမိဉ်ႏရီလွဉ် လိတ်ပအိုဝ်ႏသုတေသနဖုံႏ၊ လိတ်ပအိုဝ်ႏပညာႏသျင်ႏဖုံႏနဝ်ꩻ ယီးနယ်ဗော့ꩻစွဉ်ႏ ဗွေႏသံႏဃာႏလုမ်ꩻဟောင်း၊ လိုꩻလမ်းတကာႏနဝ်ꩻ မာꩻနွောင်ꩻတဝ်းဟောင်း၊ လိတ်ပအိုဝ်ႏနဝ်ꩻ အဝ်ႏခူလိမ်ꩻ သံႏသရာႏအဝ်ႏခူပြန်ႏဗော့ꩻ အွိုင်ႏအရန်းလိတ်စေပွယ်ꩻ၊ ဗဟိုႏသွဉ်တန်ꩻယိုလုမ်ꩻဟောင်း။ သွဉ်လိတ်ပအိုဝ်ႏထွူသွတ်ꩻလွေꩻလဲဉ်းကရိုꩻဒါႏ ဘွဲ့တဗာႏဗာႏယို လိတ်ပအိုဝ်ႏလောကကို အွဉ်ႏထွော့တဝ်းဒွုမ်ဟောင်း၊ အဝ်ႏလိုႏအွဉ်းထွော့တဝ်းဟောင်း၊ အွဉ်ႏထွော့သင်ꩻငါႏအကျောင်ꩻ ခမ်းသားငေါဝ်း အယ်ဒီတာစွိုꩻအနေႏ တဲက်တွန်ꩻဖေႏသေလွေꩻဗာႏနဝ်ꩻသွူ။