အောဝ်ႏပေႏခိန်ႏတွင်ꩻ

"အောဝ်ႏပေႏခိန်ႏတွင်ꩻ လိုႏထုမ်ႏဝင်ꩻပညာႏ" ပညာႏသျင်ႏကဒေါ့ꩻခါꩻဒါႏငေါဝ်းအလꩻ ပထမအရွယ်ႏ လိုႏထွုမ်ႏပညာႏ၊ ဒုတိယအရွယ်ႏ လိုႏထုမ်ႏဥစ္စာႏ၊ တတိယအရွယ်ႏ လိုႏထုမ်ႏဘာႏဝနာႏကရိုꩻဒါႏ ငေါဝ်းအောဝ်ႏအတွိုင်ꩻ အောဝ်ႏပေႏခိန်ႏတွင်ꩻ လိုꩻပေႏဖုံႏယို အောဝ်ႏလိုႏသွဉ်ထူႏထုမ်ႏငါႏပညာႏ၊ ပထမအရွယ်ႏ မဉ်ႏဒါသေꩻခါꩻပညာႏမꩻ မဉ်ႏတွိုႏလွဉ် ဒုတိယအရွယ်ႏခိန်ႏနောဝ်ꩻ ထုမ်ႏဥစ္စာႏအီႏဒါႏသွူ။ ဒုတိယအရွယ်ႏခိန်ႏ၊ ရွဉ်တောင်ꩻဥစ္စာႏမဉ်ႏလွိုင်ႏအာမꩻ မဉ်ႏတွိုႏလွဉ် တတိယအရွယ်ႏခိန်ႏနောဝ်ꩻ မဉ်မာꩻဘာႏဝနာႏလဲ့ အဆင်ႏအီႏပြေႏနောဝ်ꩻသွူ။ အောဝ်ႏပေႏခိန်ႏတွင်ꩻ မဉ်ႏဒါႏသေꩻခါꩻ ပညာႏတစွိုးတမျိုꩻမꩻ တနီꩻခါ မဉ်ႏတန်လွဉ်နောဝ်ꩻ ထွာအီအာႏကွိုꩻခရာႏစူစွုမ်၊ လွူးနမ်းကမ်းကြိုတဲ့ အီႏဒါႏ၊ နီနမ်းတွမ်ႏနီသꩻလဲ့ အီႏပြောင်ꩻလုဲင်ႏလွဉ်နောဝ်ꩻမꩻ လိုꩻတွိုင်ꩻစွုမ်ႏဖြာꩻ အောဝ်ႏပေႏခိန်ႏတွင်ꩻ အောဝ်ႏလိုႏသွဉ်ထူႏငါႏပညာႏ ပငါပရာꩻနောဝ်ꩻသွူ။ ကွပ်နောဝ်ꩻမꩻ တယ်ႏစ သက်(၆)နေင်ႏ ဗꩻ(၉)နေင်ႏနောဝ်ꩻ သွဉ်ထူႏဗာႏ မူလတန်ꩻအရန်းပညာႏ၊ သက်(၁၀)နေင်ႏ ဗꩻတွိုႏ(၁၆)နေင်ႏနောဝ်ꩻ သွဉ်ထူႏဗာႏအရန်းထာႏဝပညာႏ၊ (၁၀)တန်ꩻမဉ်ႏအောင်ႏထွူမꩻ သွုပ်သွဉ်ထူႏလွေꩻ တက္ကသိုလ်ႏပညာႏအရန်းနောဝ်ꩻသွူ။ ယိုခါ နေင်းထီနွိုးဆဲင်ႏတရိုꩻတောဝ်း၊ အံႏအွꩻဆဲင်ႏတရိုꩻတောဝ်း၊ ဆဲင်ꩻအမျိုꩻမုဲင်ꩻတယောဝ်း ဝင်ꩻကအောဝ်ႏကျောႏညာႏဟဲ့ꩻဒါႏ ဝွန်ႏထံꩻထာꩻမာꩻသားနောဝ်ꩻ အဖွိုႏသွဝ်ꩻ ပညာႏအထီအသွီႏ (၁၀)တန်ꩻဖေႏကအောင်ႏဗာႏ၊ မဉ်ႏထွာလꩻဘွဲ့သားနောဝ်ꩻ ဝင်ꩻယိန်းကျွိုက်၊ ဝင်ꩻယိန်းမဉ်လꩻ၊ ကမဲဉ်လꩻဒါႏ ဘွဲသားနောဝ်ꩻ အလင်မွေးတောဝ်း ဘွဲ့သားယို သွဉ်ဗာႏအာလိတ်၊ ထာꩻသေထာꩻဒါႏ ဉာဏ်ႏပညာႏဗဟုသုတ လွိုင်ႏအာတဖဲ့ꩻ၊ ထာꩻယူႏထာꩻတွေꩻတွမ်ႏ လိုꩻမုꩻသွုပ်သံႏရေꩻ ပညာႏအောဝ်ႏလဲဉ်းထဲင်းက လိုꩻတလꩻတောဝ်းဘွဲ့သားနောဝ်ꩻသွူ။ ခင်ႏလမ်းတွိုင်ꩻ တဲက်တွိုင်ꩻအီ လꩻဘွဲ့သားကွေႏကွေႏမွေးတောဝ်းနောဝ်ꩻသွူ။ လိုꩻ(၁၀)တန်ꩻ တအောင်ႏတောဝ်းသား ယင်ဟန်ႏနောဝ်ꩻ ထာꩻယူႏထာꩻတွေꩻ ပညာႏ ဗဟုသုတ အထီအသွီႏ ကယံကျလဲဉ်း လꩻဘွဲသားလဲ့ အောဝ်ႏအာတန်နောဝ်ꩻသွူ။ လိုꩻလꩻဘွဲ့သား ယင်ဟန်ႏ ပညာႏအထီအသွီႏ ဗဟုသုတ ကဖွိုႏလဲဉ်း (၁၀)တန်ꩻတအောင်ႏတောဝ်းသားလဲ့ အောဝ်ႏအာတန်နောဝ်ꩻသွူ။ လꩻဘွဲ့သားကဲဉ်းအာအာနောဝ်ꩻ ထာꩻသေထာꩻဒါႏ ဉာဏ်ႏပညာႏ အထီအသွီႏလဲ့အောဝ်ႏ၊ လိုꩻမုꩻသွုပ်သံႏရေꩻလဲ့ဟောဝ်တဲင် နောဝ်ꩻမꩻ လꩻဘွဲ့သားယို ဝင်ꩻသတ်မတ်သေꩻခါꩻ အထီအသွီႏအောဝ်ႏ လိုꩻပုဂ္ဂိုလ်ႏနောဝ်ꩻသွူ။ တသီႏပညာႏ၊ အင်ဂျင်နီယာပညာႏ၊ ဗိသုကာပညာႏ၊ တငါဖဲ့ꩻဆဲင်ႏရာꩻပညာႏတွမ်ႏ လုမ်ꩻလာꩻတိရစ္ဆာန်ႏပညာႏ၊ အနယ်ꩻပညာႏကသွဉ်ထူႏဒါႏ လိုꩻပေႏဖုံႏနောဝ်ꩻ သက်မဉ်ႏလꩻ (၂၄)တွမ်ႏ (၂၅)နေင်ႏနောဝ်ꩻမꩻ ကဲဉ်းအာအာလꩻဘွဲ့နောဝ်ꩻသွူ။ လိုꩻကသွဉ်ထူႏဒါႏ လွူးအီနမ်းပညာႏနောဝ်ꩻ တနေင်ႏနီနေင်ႏ ကုဲင်းထဲ့ဆုဲင်ꩻဒါႏနောဝ်ꩻသွူ။ သက်(၁၅)နေင်ႏမာꩻကီ အရွယ်ႏယို ဘဝတသက်တာႏ လွူးနမ်းဖေႏကဒါႏနောဝ်ꩻ ဆွုံꩻဖျတ်သꩻ အောဝ်ႏလိုႏထုမ်ႏငါႏ ပညာႏလွူးအီနမ်းနောဝ်ꩻသွူ။ ပညာႏလွူးအီနမ်းယို ဖေႏကကဲက်ညီႏတွမ်ႏ နီနမ်းထာꩻဝါႏသနာႏနောဝ်ꩻ နမ်းတွမ်ႏနမ်း အဟောဝ်သွတ်ꩻ မဉ်ႏလွိုက်ချာဒျာႏနောဝ်ꩻ ဟောဝ်ငါႏသွူ။ ပွိုင်းလဲင်ႏစခါ လွူးနမ်းဖေႏကဒါႏ မဉ်ႏမဲဉ်လꩻထာꩻဒါႏပညာႏ တဗာႏဗာႏနောဝ်ꩻ လွေꩻသွဉ်ထေ့ဗာႏ ဒိသာပါမောက္ခရာႏထျꩻ အနေင်ႏ(၁၀)ရပ်၊ ခံႏဗာႏပါဒွိုန်းက ဒိသာပါမောက္ခဆရာႏ ထာꩻထွဉ်ႏအံႏမꩻ ဒါႏလွဉ်ဗာႏပညာႏနောဝ်ꩻသွူ။ ခေတ်ယိုခါနောဝ်ꩻ နုဲင်းနောဝ်ꩻမွေးတောဝ်းဒွုမ်၊ နီဖေႏကဒါႏပညာႏနောဝ်ꩻ နီနမ်းကိုယ်ႏတဲင်ႏ မဉ်ႏလွေꩻဆယ်ꩻကပ် နီကကျွိုက်ဒါႏ ဆရာႏယံ၊ ဆရာႏကျထျꩻနောဝ်ꩻ ဟောဝ်ငါႏသွူ။ လိုꩻယို မဲဉ်မာꩻတမုဲင်ꩻမာꩻ သꩻမဲဉ်မာꩻထာꩻမာꩻမဉ်ႏအောဝ်ႏမꩻ၊ သꩻလွꩻမဉ်ႏအဲဉ်ထောဝ်းမꩻ အီႏလꩻနွောင်ꩻ အောင်ႏမျင်ႏမုꩻသွူ။ လိုꩻခိုတဲ့နောဝ်ꩻ လိုꩻမူႏတဲ့နောဝ်ꩻ အောဝ်ႏလိုႏဒါႏငါႏပညာႏ ပငါပရာꩻ၊ အထူꩻမဉ်ႏဒေါ့ꩻဗာႏနောဝ်ꩻ လိုꩻခိုယို ယိန်းခဲဉ်ꩻအောဝ်ႏလိုႏဒါႏငါႏပညာႏနောဝ်ꩻသွူ။ လိုꩻခိုယိုနောဝ်ꩻ သမ်းကုံꩻဗာႏလမ်းပါႏတဲင် မဉ်ႏဒါႏတောဝ်းလိတ်လုဲင်ꩻနောဝ်ꩻ ကအီႏကုံꩻဗာႏလမ်းပါႏတဲ့နောဝ်ꩻ၊ အီႏထုမ်ႏဗာႏစီꩻပွာꩻရေꩻတဲ့နောဝ်ꩻ ယိုꩻတောဝ်းသွူ။ ခေတ်ယိုနောဝ်ꩻ ပညာႏခေတ်တဲင် လိုꩻတွိုင်ꩻစွုမ်ႏဖြာꩻ အောဝ်ႏလိုႏဒါႏပညာႏပညာႏ၊ ဖေႏကဒါႏပညာႏ ဖေႏကလꩻဘွဲ့နောဝ်ꩻ အောဝ်ႏလိုႏကျိုꩻစာꩻငါႏဝင်ꩻ ပငါပရာꩻ၊ ပညာႏကရိုꩻနောဝ်ꩻ သွဉ်ထူႏနေးလိတ်သွဉ်ကျောင်ꩻကိုပညာႏလွုမ်ꩻတကာႏတောဝ်း စွုမ်ႏနီꩻစွုမ်ႏဟာ နီကခွဲးတလူႏဗာႏ အခွဲးအကျုံႏယိုလဲ့ ထွာဒျာႏပညာႏနေနေ၊ လိုꩻပုဂ္ဂိုလ်ႏယင်ဟန်ႏနောဝ်ꩻ (၁၀)တန်ꩻအောင်ႏထွူလဲ့ ကွပ်စွဉ်ႏရွဉ်ရေꩻတောင်ꩻရေꩻ အယပ်ꩻအခုဲင်ႏအောဝ်ႏတဲင် ထင်ႏနွောင်ꩻတောဝ်း တက္ကသိုလ်ႏလဲ့ အောဝ်ႏ၊ ထင်ႏထွူတက္ကသိုလ်ႏလဲ့ သွဉ်သွတ်ꩻနွောင်ꩻတောဝ်းပညာႏ၊ ထန်ႏတခြို ထန်ႏတရတ်ထိုꩻကျောင်ꩻသားဖုံႏလဲ့ အောဝ်ႏအာတန်သွူ။ နုဲင်းမုဲင်ꩻမုဲင်ꩻတယောဝ်း လိုꩻယို သက်(၁၈)မဉ်ႏလွိုလဲဉ်းနောဝ်ꩻ အဟောဝ်သွတ်ꩻ အာႏကွိုꩻချာနမ်းတွော့ꩻ လိုႏကျိုꩻစာꩻလွေꩻနောဝ်ꩻသွူ။ ရွဉ်တောင်ꩻဥစ္စာႏတဲ့ ဖေႏကလꩻ၊ မာꩻထာꩻမာꩻတဖဲ့ꩻ သွဉ်ပါလိတ်ဖေႏကလꩻတဖဲ့ꩻနောဝ်ꩻ မြန်မာခမ်းယို ထာꩻမာꩻအောဝ်ႏခြေားနေကတဲင် အနာႏဂတ်လိုꩻပေႏဖုံႏအတာႏ ထွာငါႏသꩻထွူႏခရာႏသွူ။ နောဝ်ꩻမꩻ လိုꩻတွိုင်ꩻစွုမ်ႏဖြာꩻ လွူးနမ်းဖေႏကဒါႏ၊ ဖေႏကဒဲ့ꩻထူႏနွောင်ꩻ ဘွဲ့တဗာႏဗာႏနောဝ်ꩻ နေးတွမ်ႏစေႏတနာႏ ဟောဝ်ဟောဝ်တဲင် တဲမ်းလွေꩻဗာႏတွမ်ႏရွမ်ဖြုဲင်ꩻယိုနောဝ်ꩻသွူ။