အောဝ်ႏလိုႏထိန်ꩻငါႏ နီလိုꩻမျိုꩻဂုဏ်ႏသက္ခာႏ

"အောဝ်ႏလိုႏထိန်ꩻငါႏ နီလိုꩻမျိုꩻဂွုဏ်ႏသိက္ခာႏ" နီပအိုဝ်ႏလိုꩻမျိုꩻယိုနောဝ်ꩻ တယ်ႏစစွဉ်ႏ သုဝဏ္ဏခမ်းတန် ကပြုဲင်ပြင်ꩻထိုꩻနောဝ်ꩻကာႏ မဲ့ခေ့ꩻနားအွိုင် သေဒွုမ်မုဲင်ꩻမုဲင်ꩻ၊ ခံႏဗာႏဝင်ꩻမျောႏ မော့ꩻဗာႏဒုက္ခ၊ ထိုꩻထန်ႏလီလာ ကထွာလိုꩻတန်ပညာႏဒါႏ ယဟန်ႏသားဖုံႏနောဝ်ꩻ ခံႏဗာႏဝင်ꩻဆွမ်ꩻ၊ ဝင်ꩻမာꩻသီနောဝ်ꩻ နီအောဝ်ႏလိုႏယူႏလꩻ၊ နီခမ်းတန်နီလိုꩻမျိုꩻ ဝင်ꩻကထူႏထိုꩻနောတ်ꩻလဲ့ နီအောဝ်ႏလိုႏလꩻသွဉ်ခန်ꩻ၊ မတ်တန်ꩻကို သမဲင်ꩻစောင်ႏ မဉ်ႏထွားချာ အောဝ်ႏထီႏယောင်ႏနေဒွိုန်းနောဝ်ꩻသွူ။ "ခမ်းအဲဉ်ထောဝ်း ဝင်ꩻထီႏဖွီ၊ ထီအဲဉ်ထောဝ်း ဝင်ꩻထီႏပေႏ၊ နီလိုꩻမျိုꩻအခေႏနေႏ နုဲင်းစွဉ်ႏအီႏထိုꩻမားမား"အီႏတဲဝါးချာဗာႏနောဝ်ꩻ တယိုꩻတောဝ်း ယပ်ꩻငါႏတဲင် နေင်ႏပေါင်ꩻ(၉၆၀)ရပ်အကို နီပအိုတ်ႏလိုꩻမျိုꩻယိုနောဝ်ꩻ ဟဲ့ꩻမွိုးဖါခရာႏငါတဲ့ အောဝ်ႏတောဝ်း၊ အီႏအုံညီꩻဗာႏပါꩻမုဲင်ꩻလဲ့ သေတောဝ်း၊ ထွာဗာႏဖိုလဲဉ်း ခွန်စောဝ်းအဲဉ်ထောဝ်းလိုꩻမျိုꩻ၊ အမဉ်ꩻထိုꩻမားလိုꩻမျိုꩻနောဝ်ꩻသွူ။

နီလိုꩻမျိုꩻဂွုဏ်ႏသိက္ခာႏ၊ နီလိုꩻမျိုꩻအဆင်ႏရန်း ဖေႏကထင်ႏထို ကထွိုက်တန်ႏတွမ်ႏ နီလိုꩻမျိုꩻ ဖေႏကလꩻနွောင်ꩻအီအတာႏ ပညာႏတဲ့အောဝ်ႏ၊ လိုꩻသꩻရက်စွိုးခွိုꩻလဲ့ ကအောဝ်ႏဒါႏ အွဉ်ငါခေါင်းဆောင်တန် အဆက်ဆက်ဖုံႏနောဝ်ꩻ တယ်ႏစနေင်ႏ ၁၉၂၃-ဗာႏရပ် စွဉ်ꩻသွီႏစွဉ်ꩻသက် တွိုက်နက်တောႏလန်ႏလွေꩻဗာႏ စွိုးခွိုꩻအခွင်ꩻအရေꩻဖုံႏနောဝ်ꩻ ဗꩻတွိုႏလွေꩻစွဉ်ႏ ၁၉၉၁-ဗာႏနောဝ်ꩻသွူ။ နီလိုꩻမျိုꩻအုံအောဝ်ႏမုꩻ ဖေႏကထင်ႏထို၊ နီဒေႏသယို ဖေႏကလွိုင်ႏကွိုန်ꩻ၊ ဖေႏကငိမ်ꩻချံꩻ၊ ဖေႏကလုပ်ꩻခွုမ်မာꩻဗာႏဟောဝ်နောဝ်ꩻ စွိုးခွိုꩻအွဉ်ငါ ခေါင်းဆောင်တန်ဖုံႏ တယ်ႏစွဉ်ႏထူႏငိမ်ꩻချံꩻရေꩻ အဆုဲင်ꩻသွတ်ꩻတလဲင်ႏထွူ လွိုင်ႏကွိုန်ꩻရေꩻထာꩻမာꩻဖုံႏယို လွစ်အွဉ်ႏဆွိုး အောဝ်ႏခွုမ်မာꩻလွေꩻဖေႏ နီလိုꩻမျိုꩻအကျိုꩻစီꩻပွာꩻ ဗꩻလွဉ်စွဉ်ႏယိုခါ နဲင်ႏငံႏတောႏလဲ့ နဲင်ႏငံႏတောႏအရန်း၊ ဝေင်ꩻနယ်ႏလဲ့ ဝေင်ꩻနယ်ႏအနရန်း၊ အွိုင်ႏလဲ့အွိုင်ႏအရန်း အောဝ်ႏခွုမ်မာꩻလွေꩻဖေႏ နီစွိုးခွိုꩻအကျိုꩻစီꩻပွာꩻ ဗꩻလွဉ်စွဉ်ႏ ဟန်ႏသနီꩻနောဝ်ꩻသွူ။ စွိုးခွိုꩻအွဉ်ငါ ခေါင်းဆောင်တန် အဆက်ဆက်ဖုံႏ စွဉ်ꩻသွီႏသက် ကထူႏသေꩻခါꩻဖေႏ နီလိုꩻမျိုꩻ အခွင်ꩻအရေꩻနောဝ်ꩻ ယိုခါ အင်းတူႏအင်းတန်ႏ လꩻလွဉ်အခွင်ꩻအရေꩻ အုံအောဝ်ႏမုꩻဘဝ စအီႏဗွိုန်ပီလွဉ် ဝင်ꩻလိုꩻမျိုꩻလင်လဲ့ ယိုခါ နီလိုꩻမျိုꩻချင်ꩻချင်ꩻ ထီႏဖွီဝင်ꩻ၊ တဒုံတွမ်ႏတဒုံ ထင်းပေႏဝင်ꩻ၊ ပညာႏတွမ်ႏရွဉ် အောဝ်ႏလွဉ်တောႏတောႏတန်ႏတန်ႏ အံႏသွင်ꩻဒွုမ်မွိုးဖါ၊ ထီႏဖွီချာလိုꩻမျိုꩻ သေနာႏတောဝ်း ခေါင်းဆောင်တန်သီး ဂွုဏ်ႏကေꩻဇူꩻနောဝ်ꩻသွူ။

ထွားလိတ်သားခွန်နင်ꩻသီး ဖတ်ထွားစံꩻ ဝင်ꩻလိုꩻမျိုꩻလင် လိတ်စောင်ႏအမျိုꩻမျိုꩻကိုတရိုꩻတောဝ်း၊ လဲင်းလောင်းဖုံႏ ဖေ့စ်ဘုတ်လောင်းဖုံႏတရိုꩻတောဝ်း ဝင်ꩻလိုꩻမျိုꩻဂွုဏ်ႏသိက္ခာႏ ကအီႏထဲ့အီဒါႏ၊ ဝင်ꩻကအီႏထင်းပေႏအီဒါႏ လိတ်မျိုꩻယို ဝင်ꩻတတဲမ်းတောဝ်း၊ မဉ်ႏမဲဉ်ထောက်ပျꩻနယ် အမာႏအတရွို့ꩻဖုံႏနောဝ်ꩻ ဝင်ꩻဖေႏတောႏနေးလိတ်လဲ့သင်၊ လွေꩻထ့တွိုင်ႏပင်ႏနေးလဲ့သင် ဝင်ꩻထီႏချာဝင်ꩻစွိုးခွိုꩻထာꩻမာꩻရဲဉ်ႏဆꩻငါနောဝ်ꩻသွူ။ တွိုႏနီလိုꩻမျိုꩻ ယင်ဟန်ႏနောဝ်ꩻ ထီႏချာငါတောဝ်းထာꩻ မဲဉ်ထွာတမုဲင်ꩻထွာ သေထျꩻသေနာႏတောဝ်းတဲင် ကွပ်ဒင်ႏချာငါဝင်ꩻအပဲစ်၊ စဲစ်ချာငါဝင်ꩻအမာႏ၊ ဝင်ꩻသေထွꩻ နီလိုꩻမျိုꩻအကိုရေꩻတဲင် ဝင်ꩻတိတ်ꩻနျꩻအီချာ နီလိုꩻမျိုꩻနောဝ်ꩻ နီဟောဝ်ယူႏလꩻငါႏဝင်ꩻသွူ။ လိုꩻယိုနောဝ်ꩻ တလွစ်ကင်ꩻတောဝ်းတွမ်ႏအမာႏ၊ အုံတောဝ်းတဖြာꩻ၊ အုံတောဝ်းတဒုံ ကားကအောဝ်ႏ အုံညီꩻဒျာႏဝင်ꩻတဲင် ခေတ်ပညာႏယိုခါ ဝင်ꩻအခွင်ꩻအရေꩻ လꩻနုဲင်းမုဲင်ꩻ သေနာႏဝင်ꩻတွော့ꩻ ကထွိုက်တန်ႏတွမ်ႏ နီလိုꩻမျိုꩻအကျိုꩻတရာꩻဖုံႏယို ဖေႏကလꩻခန်းနောဝ်ꩻလဲ့သင်၊ ဖေႏကပင်ႏတသွောင်းထိုနွောင်ꩻစွူစွူ နီပအိုဝ်ႏဂွုဏ်ႏသိက္ခာႏလဲ့သင် အခိန်ႏယိုခါနောဝ်ꩻ အခိန်ႏပꩻဝင်ꩻ၊ အခိန်ႏဖဝင်ꩻ၊ အခိန်ႏကွယ်ꩻဝင်ꩻ၊ အခိန်ႏထီႏပေႏဝင်ꩻ၊ အခိန်ႏဝွေႏဖန်ႏဝင်ꩻ မွေးတောဝ်း၊ အခိန်ႏလွောင်ႏဗူႏဝင်ꩻ၊ အခိန်ႏဆွန်ꩻဝင်ꩻစူဒျာႏတဲင် နီအွဉ်ဝင်ꩻလွူးခန်းသွိုန်ႏတသာ သꩻတသာ၊ သꩻရက်စွိုးခွိုꩻအွဉ်ငါတွော့ꩻ နီအွဉ်ဝင်ꩻထိန်ꩻသိမ်ꩻချာခန်းသွော့ နီဂွုဏ်ႏသိက္ခာႏကရိုꩻနောဝ်ꩻ တဲမ်းနယ်ဗာႏ လိတ်ထွားသားခွန်နင်ꩻသီးဖုံႏသွူ။