ကာႏမဂွုဏ်ႏအွဉ်ႏကုဲင်
"ကာမသုတ် (ကာႏမဂွုဏ်ႏအွဉ်ႏကုဲင် ထင်ႏဗုဲင်ရဟန်ꩻ)" ရဟန်ꩻသီးဖုံႏဟွေး- လိုꩻတဲ့နဝ်ꩻ၊ သတ္တဝါႏ (တိရစ္ဆာန်ႏ)ဖုံႏတဲ့နဝ်ꩻ ကဲဉ်းအာအာနဝ်ꩻ ပျောႏလွဉ်ꩻအာႏရွုံႏ၊ ဖဉ်းကာႏမဂွုဏ်ႏဖုံႏနောဝ်ꩻသွူ။ ရဲ့မီꩻထမ်ႏစာ၊ ခိုဗင်ႏသꩻဗွာ တဖြာꩻနဝ်ꩻ ဝေါင်းထိုꩻမွေးမွေးစွဉ်ႏ 'အတဖွူႏထမ်ႏ-အစန်'၊ တွူႏတရန်ကာႏမဂွုဏ်ႏ၊ အာႏရွုံႏငတ်ꩻတုဲင်၊ ထင်ႏဗုဲင်ရဟန်ꩻတဲင် ဝွေꩻယိုနဝ်ꩻ ရိုꩻဗာႏ'သဒ္ဓါပဗ္ဗဇိတ-နေးတွမ်ႏသဒ္ဓါႏ ဗုဲင်ဒျာႏရဟန်ꩻ'နောဝ်ꩻသွူ။
ကွပ်ပွိုးထမုဲင်ꩻ ဒေါ့ꩻနွောင်ꩻတွိုႏနုဲင်းနဝ်ꩻနဲတဲင်- လိုꩻအရန်းလသား ကခံႏစာꩻဒါႏ ကာႏမဂွုဏ်ႏ အညမ်းစားတဲ့နဝ်ꩻ၊ လိုꩻအရန်းထဝသား ကခံႏစာꩻဒါႏ ကာႏမဂွုဏ်ႏ တောႏတောႏတန်ႏတန်ႏစားတဲ့နဝ်ꩻ၊ လိုꩻအရန်းထို ခွန်ကွန်သီးဖုံႏ၊ လိုꩻခြွေရွဉ်သား လိုꩻကျွားသဌေꩻသီးဖုံႏ ကခံႏစာꩻဒါႏ ကာႏမဂွုဏ်ႏ အယံစားတဲ့နဝ်ꩻ ဟဲ့ꩻဗာႏငတ်ꩻပါꩻအာႏရွုံႏ-ကာႏမဂွုဏ်ႏလွဉ်းလွဉ်း၊ လိုꩻခိုဗင်ႏနုဲင်းဝွေꩻနောဝ်ꩻ မီႏမဉ်ခံႏစာꩻ ဆဲင်ႏရာꩻကာႏမဂွုဏ်ႏနဝ်ꩻ ခံႏစာꩻနွောင်ꩻဒျာႏ၊ အဝ်ႏခံႏစာꩻနွောင်ꩻဒျာႏသွူတဲ့ ကာႏမဂွုဏ်ႏအွဉ်ႏကုဲင် ကွပ်ပွိုးထင်ႏဗုဲင် ရဟန်ꩻတွော့ꩻ ဒေါ့ꩻနွောင်ꩻစွဉ်ႏဒျာႏ 'သဒ္ဓါႏပဗ္ဗဇိတ'နုဲင်းနဝ်ꩻသွူ။
ရဟန်ꩻသီးဖုံႏဟွေး- ပါꩻပေႏတဖြာꩻနဝ်ꩻ စဗေင်ႏတခို့ တအာဒါႏထာꩻလွုမ်ꩻ၊ ကနေးလိုꩻပေႏသားနဝ်ꩻ အုံဖွီထာꩻတဲင် ပါꩻပေႏနဝ်ꩻ မျောႏမာႏသေင်ႏစျꩻ တရိုꩻတဝ်း၊ ဖွိုင်ꩻခေါဝ်တရိုꩻတဝ်း အဝ်ႏခံအကထောင်ꩻတွော့ꩻ ငွိုးစွော့ꩻစွဉ်ႏထာꩻ။ ကနေးလိုꩻပေႏသားနဝ်ꩻ သဲစ်ကေသတဲ့ လောႏအွာထန်ႏ၊ အွာထန်ႏရိုꩻရိုꩻ၊ အွာထန်ႏယိုꩻယိုꩻ မဉ်ႏတလꩻတဝ်းနဝ်ꩻ တွမ်ႏစူပင်စေႏ-တေက်ꩻခါꩻအကတူႏ တွမ်ႏစူနုံပင်ထွေ စောင်ႏငါ-အွာထန်ႏဗာႏ။ ကအွာထန်ႏနုဲင်းနဝ်ꩻနဝ်ꩻ မာꩻဆာလိုꩻပေႏကထောင်ꩻ မွေးဒျာႏ၊ မွေးတဝ်း ခွေတရိုꩻတဝ်း၊ ကွဲႏတွော့ꩻ မာꩻထွိုက်မာꩻသင်ꩻ သညင်ꩻလိုꩻပေႏတဲင် (ငမ်းအဆာတဝ်၊ ငမ်းအသီထိုꩻတဲင်) မာꩻဗာႏနုဲင်းနဝ်ꩻဒျာႏရင်ꩻ။ ပါꩻပေႏနဝ်ꩻမဉ်ႏတန် မဉ်ႏသူႏသေသွူထာꩻနဝ်ꩻ နေးခရာႏလိုႏဒွုမ်၊ အဗွေႏနမ်းနမ်း ထိန်ꩻကမ်းချာဒါႏဒျာႏ၊ အမျိုꩻမျောႏဒွုမ် သေင်ႏစျꩻ-ဖွိုင်ꩻခေါဝ်မွေးတောဝ်း။ အနုဲင်းနောဝ်ꩻနေနေ ရဟန်ꩻနဝ်ꩻ ထာꩻယွုမ်းအံႏ-သဒ္ဓါႏ၊ ထာꩻဝင်ꩻသꩻ-ဟိရီ၊ ထာꩻငမ်း-ဩတ္တပ္ပ၊ ထာꩻကျိုꩻစာꩻ-ဝီရိယ၊ ထာꩻသေ-ပညာႏ၊ နေးတွမ်ႏတရာꩻဖုံႏနဝ်ꩻ မဉ်ႏတသေထိုမ်ႏတဝ်းဒွိုန်းတရာꩻ၊ မဉ်ႏတသေမာꩻတဝ်းဒွိုန်းကုသိုလ်ႏနဝ်ꩻ ခွေအဝ်ႏထွားဗာႏ၊ နုဲင်းပါꩻကနေး လိုꩻပေႏနောဝ်ꩻသွူ။
ရဟန်ꩻနဝ်ꩻ နေးတွမ်ႏ'သဒ္ဓါႏ၊ ဟိရီ၊ ဩတ္တပ္ပ၊ ဝီရိယ၊ ပညာႏ'မဉ်ႏသေအားထွုတ်ဒါႏသွူတရာꩻ၊ မဉ်ႏသေမာꩻသွူကုသိုလ်ႏ (မဉ်ႏထွာလꩻသွူ သောႏတာႏပန်ႏပုဂ္ဂိုလ်ႏ)နဝ်ꩻ ခွေထွားခရာႏ တလိုႏတောဝ်းဒွုမ်၊ အထိန်ꩻအနမ်း-အကမ်းအသꩻ ဒါႏလဲဉ်း၊ အမျိုꩻအုံဖွီထာꩻ မွေးတောဝ်းဒွုမ်နောဝ်ꩻသွူ။[၁][၂]