ကုသိုလ်ႏလဲဉ်းကီ
"မဟာနာမသုတ် (ကုသိုလ်ႏလဲဉ်းကီ၊ သီမုဲင်ꩻခါတဲ့ယဝ်း နန်းတဝ်း)"
အွိုးခꩻတလဲင်ႏ နီဗွေႏဘုရာꩻအဝ်ႏအုံ ကပိလဝတ်ခမ်း၊ ကျောင်ꩻ"နိဂြောဓါရုံ"အတွင်ꩻ သာႏကီႏဝင်ႏမျိုꩻ "ခွန်မဟာႏနာမ်ႏ"နဝ်ꩻ ဖျော်ထင်ႏနီဗွေႏဘုရာꩻထျꩻ၊ ဝုဲင်ႏဘုရာꩻထွူခါ လောဝ်းပါနီဗွေႏဘုရာꩻနုဲင်းယို- "ဩဗွေႏ- ဝေင်ꩻကပိလဝတ်ယိုနဝ်ꩻ ဗွေစွုမ်ႏချမ်ꩻသာႏ၊ လွိုင်ႏကွုန်ꩻငါႏ၊ လိုꩻအာငါႏ၊ လိုꩻမျိုꩻပေါင်ꩻစွုမ်ႏ အဝ်ႏအုံညီꩻလို့ဝင်ꩻ၊ တဖူꩻပေႏ တဖူꩻတန်၊ တဖူꩻဗော့ꩻ တဖူꩻညာꩻ တဖူꩻအဝ်ႏအာလီးတန်။ မွူးခွယ်တန်ပသာႏ ခိန်ႏခါႏနဝ်ꩻရာꩻ ခွန်သွဉ်းတဖြာꩻ အဝ်ႏလမ်းထင်ႏ၊ အီႏထင်ႏဝုဲင်ႏဘုရာꩻ၊ အီႏထင်ႏဝုဲင်ႏသံဃာႏ၊ တဖူꩻလောင်းနဝ်ꩻ သေဖုံႏတဲ့ ခွဲဒျာႏ၊ သေလောရထာꩻတဲ့ ခွဲဒျာႏ၊ လိုꩻဖုံႏတဲ့ ခွဲဒျာႏ။ ဩဗွေႏ- ကခွဲသေ၊ ကခွဲလော၊ ကခွဲလိုꩻဖုံႏ အတွင်ꩻနဝ်ꩻနဝ်ꩻ "သတိꩻလွစ်ထိုꩻဒျာႏ"၊ ယူႏလꩻတဝ်းဘုရာꩻ၊ ယူႏလꩻတဝ်းတရာꩻ၊ ယူႏလꩻတဝ်းသံဃာႏ၊ တယူႏတဝ်းဘုရာꩻ တရာꩻသံဃာႏ ရတနာႏသွံပါꩻတွင်ꩻ ခွေမဉ်ႏသီလွင်ꩻစိန်ႏစွော့ꩻထာꩻနဝ်ꩻ "ခွေအီႏတွိုႏလွေꩻဒါႏ ဘဝမုဲင်ꩻမကောင်း"ခွေသွဉ်းယူႏဆောင်းစွဉ်ႏနုဲင်းနဝ်ꩻ ဗွေႏဩ" "တကာႏမဟာႏနာမ်ႏဟွေး- နာꩻငမ်းမွေးစွဉ်ႏနဲ့၊ ငမ်းမွုန်းတကာႏ၊ နာꩻမဉ်ႏသီစိန်ႏစွော့ꩻခန်းတဲ့ နန်းခရာႏတလိုႏတဝ်း၊ တတွိုႏနွောင်ꩻတဝ်း ဘွုံႏဘဝကုဲင်၊ ကွပ်ထမုဲင်ꩻနဲတဲင် တကာႏသꩻ ကအွဉ်ႏစဲခါꩻ ရတနာႏသွံပါꩻလောင်းနဝ်ꩻ ညလဲဉ်း၊ ကယွုမ်းအံႏဒါႏ ဘုရာꩻတရာꩻသံဃာႏ ကံႏ ကံႏအကျိုꩻ သဒ္ဓါႏမျိုꩻနဝ်ꩻတဲ့ ခြေင်းခြဲ့တဉ်ႏတွော့ꩻတန်ဒျာႏ။ ဒါႏနကုသိုလ်ႏတဲ့ အဝ်ႏဒျာႏ၊ သီႏလကုသိုလ်ႏတဲ့ အဝ်ႏဒျာႏ၊ ဘာႏဝနာႏကုသိုလ်ႏတဲ့ အဝ်ႏဒျာႏ၊ နမ်းခန္ဓာႏယိုနဝ်ꩻ ရုပ်နာမ်ႏတန်ဒျာႏ၊ ပထဝီ-ဟံႏဓါတ်၊ အာပေါ-ထီဓါတ်၊ တေဇော-ခွꩻလျားဓါတ်၊ ဝါယော-တလီꩻဓါတ်၊ ဓါတ်တန်လစ်ꩻပါꩻတန်ဒျာႏ၊ အနိစ္စတန်ဒျာႏ၊ ဒုက္ခတန်ဒျာႏ၊ အနတ္တတန်ဒျာႏ၊ အသုဘတန်ဒျာႏ။ ခွေခန္ဓာႏယို ဝိညာဏ်ႏသꩻကင်ꩻ ဝင်ꩻမဉ်ႏလွေꩻအွဉ်ႏပြာႏ ရပ်ရာသင်ႏခဲင်ꩻသူꩻနဝ်ꩻ စောက်အာႏလင်းတ လေ့ဟအံႏအွီႏ၊ ထွီႏလမ်း ထွီႏတခြာ၊ လုံႏအာဖီးထူꩻ၊ ဟိုမ်စူꩻဒီးအံႏ၊ ထွို့ꩻငင်ႏစုဲင်တာ၊ ယာႏခါလို့သွတ်ꩻ၊ အဝ်ႏကုဲင်ဆွတ်ꩻ တခြင်းခြင်း၊ မဉ်ႏဖြင်းတနီꩻခါ၊ ထွာစွဉ်ႏကတူႏကြောက်ꩻ၊ တအင်ဆွတ်ꩻ၊ စူဗောင်ဆွတ်ꩻ၊ စူလောင်ꩻဆွတ်ꩻ၊ စူနုံဆွတ်ꩻ၊ ကီႏဆွတ်ꩻ၊ ခင်ႏလောင်ꩻဆွတ်ꩻ၊ ခင်ႏနုံဆွတ်ꩻ "နမ်းတဗာႏလိုမ်းလိုမ်း-ထွာအသုဘ၊ ထွာထာꩻပသို့ꩻလွဉ်းလွဉ်း"စတဲင် သမထ ဝိပဿနာႏ တကာႏအဝ်ႏကျိုꩻစာꩻသေႏသေႏ၊ အဝ်ႏလꩻသေႏသေႏကုသိုလ်ႏ။ တကာႏမဟာႏနာမ်ႏဟွေး- ယူႏစွေးစံꩻဟုဲင်း၊ နားမန်ꩻဖွိုင်ꩻ၊ ထောပတ်ဖွိုင်ꩻ၊ ပꩻသော့ꩻထီကိုနဝ်ꩻ ဖွိုင်ꩻခေါဝ်လဲဉ်းလတဲ့ နားမန်ꩻ ထောပတ်နဝ်ꩻ အဝ်ႏခြပ်ထီတခိုႏ၊ တကာႏကုသိုလ်ႏတဲ့ ဗွန်ပီနဝ်ꩻ၊ အီႏလဲဉ်းကီဒျာႏတကာႏ" ဟော်ꩻဖေႏယံငါႏ စတဲင်နုဲင်းနောဝ်ꩻသွူ။ (သုတ္တန်ႏပိဋကတ်၊ မဟာဝဂ္ဂသံယုတ်ပါဠိ၊ မဟာနာမသုတ်)[၁][၂]