ခန္တီႏပါႏရမီႏ

၁။ "ခန္တီႏပါႏရမီႏကရိုꩻနောဝ်ꩻ" မဟာကရုဏာႏတောႏ တွမ်ႏဥပါယ ကောသလ္လဉာဏ်ႏယို မာꩻခင်ႏကန်တဲင် သတ္တဝါႏသင်္ခါႏရသီး အပဲစ်ဖုံႏယို ကယွုန်းယော သယ်ꩻကီꩻသယ်ꩻခံႏနောဝ်ꩻ ဟဲ့ꩻဗာႏ"ခန္တီႏပါႏရမိႏ"သွူ။ ၂။ "ခန္တီႏပါႏရမီႏအကျိုꩻကဗျာ" - ဝင်ꩻမာꩻနိက်စက် - နက်ချာတောဝ်းဗာႏ လောင်ꩻဆားထွာတွင်ꩻ - သယ်ꩻခံႏလင်ꩻဗာႏ ဘုရာꩻလဲ့ထွာ - ချွစ်ပါသတ္တဝါႏ နိဗ္ဗာန်ႏခမ်း - ကျွꩻသမ်း ဖျော်တွိုႏငါ။ ၃။ "ခန္တီႏပါႏရမီႏ ပဋိပက္ခတရာꩻနောဝ်ꩻ" တကျွိုက် တနိက်သက်တောဝ်း အနိဋ္ဌာႏရုံႏ၊ အနိဋ္ဌာႏရုံႏအလောင်း ကထွာဒါႏ လောဘဒေါသနောဝ်ꩻသွူ။ ၄။ "ခန္တီႏပါႏရမီႏယို" (က) ခန္တီႏပါႏရမီႏ (ခ) ခန္တီႏဥပပါႏရမီႏ (ဂ) ခန္တီႏပရမတ္ထပါႏရမီႏ ပွါꩻယင်း(၃)ပါꩻသွူ။ ၅။ "ခန္တီႏပါႏရမီႏ ၃-ပါꩻ အထူꩻ" (၁) နီပိုမာ နီပစ္စေꩻဥစ္စာႏ အန္တရာယ်ႏကထွာဒါႏ လောကဓံႏ တရာꩻဖုံႏယို ကယွုန်းယေားသယ်ꩻခံႏနောဝ်ꩻ ဟဲ့ꩻဗာႏ "ခန္တီႏပါႏရမီႏ"သွူ။ (၂) နီစူခင်ႏ အင်္ဂါႏပေႏတန် အန္တရာယ်ႏကထွာအီဒါႏ လောကဓံႏတရာꩻဖုံႏယို ကယွုန်းယောသယ်ꩻခံႏနောဝ်ꩻ ဟဲ့ꩻဗာႏ "ခန္တီႏဥပပါႏရမီႏ"သွူ။ (၃) နီအသက် အန္တရာယ်ႏကထွာအီဒါႏ လောကဓံႏတရာꩻဖုံႏယို ကယွုန်းယောသယ်ꩻခံႏနောဝ်ꩻ ဟဲ့ꩻဗာႏ "ခန္တီပရမတ္ထပါႏရမီႏ"သွူ။ ၆။ "သံႏဝွေႏဂ ၃-ပါꩻ" (၁) စတ္တုတြာသသံဝေဂ - ငမ်းသꩻ ဆင်၊ ငမ်းသꩻ ကေ၊ ငမ်းသꩻ နꩻဗင်။ (၂) ဩတ္တပ္ပသံဝေဂ - ငမ်းသꩻ ထာꩻမာꩻတဟဝ်တဝ်း။ (၃) ဉာဏသံဝေဂ - သေအကျောင်ꩻ၊ သေအကျိုꩻတဲင် ငမ်းသꩻ။ ၇။ "အာဃာတ ဝတ္ထု (၉)ပါꩻ (သꩻလျားထာꩻ ၉-မျိုꩻ)" (၁) "ပါꩻသူꩻနောဝ်ꩻ ကရီးခါ ယားခွေ၊ မာꩻခွေ"ယူႏထွူနုဲင်းနောဝ်ꩻတဲင် သꩻလျားထာꩻတမျိုꩻ။ (၂) "ပါꩻသူꩻနောဝ်ꩻ ယိုခါ ယားခွေ၊ မာꩻခွေ"ယူႏထွူနုဲင်းနောဝ်ꩻတဲင် သꩻလျားထာꩻတမျိုꩻ။ (၃) "ပါꩻသူꩻနောဝ်ꩻ မဲ့ꩻအီႏယားခွေ၊ မာꩻခွေ"ယူႏထွူနုဲင်းနောဝ်ꩻတဲင် သꩻလျားထာꩻတမျိုꩻ။ (၄) "ပါꩻသူꩻနောဝ်ꩻ ကရီးခါ ယားခွေသွꩻ၊ မာꩻခွေသွꩻ"ယူႏထွူနုဲင်းနောဝ်ꩻတဲင် သꩻလျားထာꩻတမျိုꩻ။ (၅) "ပါꩻသူꩻနောဝ်ꩻ ယိုခါ ယားခွေသွꩻ၊ မာꩻခွေသွꩻ"ယူႏထွူနုဲင်းနောဝ်ꩻတဲင် သꩻလျားထာꩻတမျိုꩻ။ (၆) "ပါꩻသူꩻနောဝ်ꩻ မဲ့ꩻအယားခွေသွꩻ၊ မာꩻခွေသွꩻ"ယူႏထွူနုဲင်းနောဝ်ꩻတဲင် သꩻလျားထာꩻတမျိုꩻ။ (၇) "ပါꩻသူꩻနောဝ်ꩻ ကရီးခါ ရွို့ꩻရန်ႏခွေ"ယူႏထွူနုဲင်းနောဝ်ꩻတဲင် သꩻလျားထာꩻတမျိုꩻ။ (၈) "ပါꩻသူꩻနောဝ်ꩻ ယိုခါ ရွို့ꩻရန်ႏခွေ"ယူႏထွူနုဲင်းနောဝ်ꩻတဲင် သꩻလျားထာꩻတမျိုꩻ။ (၉) "ပါꩻသူꩻနောဝ်ꩻ မဲ့ꩻအီႏရွို့ꩻရန်ႏခွေ"ယူႏထွူနုဲင်းနောဝ်ꩻတဲင် သꩻလျားထာꩻတမျိုꩻ။ ၈။ "ခန္တီႏပါႏရမီႏတွမ်ႏ ဝိဓူရဇာတ်တောႏ" ကုရုတိုင်း ဣန္ဒပတ္ထနဂိုရ်ႏခမ်း ဓနဉ္စယကောရဗျ အောဝ်ႏထွာခွန် အယံတွင်ꩻနောဝ်ꩻခါ- ခွန်လိုꩻ၊ ခွန်လူꩻ၊ ခွန်နဂါꩻ၊ ခွန်ဂဠုန်ႏသီး ဆောက်တယ်ႏညီꩻလို့ဝင်ꩻသီႏလ လိုꩻခမ်းသွူ၊ ဝိဓူရအမတ်တန်နောဝ်ꩻ ထွာဓမ္မကထိက ဟော်ꩻဖေႏတရာꩻ၊ ခွန်သီးဖုံႏလဲ့ ကျိုꩻစာꩻသောင်ႏသာ မာꩻလွကုသိုလ်ႏဖုံႏ ပငါပရာꩻနောဝ်ꩻသွူ။ ထင်ႏတွိုႏတလဲင်ႏနောဝ်ꩻ ခွန်နဂါꩻနင်ꩻမိဖုရာꩻနောဝ်ꩻ "မဲဉ်အံႏငါႏ အမတ်တန် ဝိဓူရသꩻရာႏ သွုန်ႏထီ"ဒေါ့ꩻခန်း ငေါဝ်းပရိယာယ်ႏနုဲင်းနောဝ်ꩻသွူ။ အမဲဉ်ႏတဗာႏနောဝ်ꩻ မဲဉ်နာႏ မဲဉ်ဟွုန်ဒျာႏ အမတ်တန် ဝိဓူရတရာꩻဒျာႏနောဝ်ꩻသွူ။ နောဝ်ꩻမꩻ အဝါꩻခို ခွန်နဂါꩻ ထွဉ်ႏအပိုမူႏ ဣရန္ဓတီ နေးတွမ်ႏပရိယာယ်ႏတဲင် ဖေႏကလꩻသဲင်ꩻ ဝိဓူရအမတ်တန် သꩻရာႏသွုန်ႏထီနောဝ်ꩻသွူ၊ နဂါꩻပိုမူႏလဲ့ တရန်းထွဉ်ႏခန်း ပုဏ္ဏကဖီလူꩻ၊ နဝ်ꩻမꩻ ပုဏ္ဏကဖီလူꩻလဲ့ ထုမ်းတွမ်ႏသေတွော့ꩻ ဟဲ့ꩻလွေꩻခန်း အမတ်တန်ဝိဓူရ၊ အမတ်တန်ဝိဓူရနောဝ်ꩻ အွဉ်ႏဆွန်ꩻသေမေး၊ ပုဏ္ဏကဖီလူꩻ နိက်စက်စွဉ်ႏ အမျိုꩻမျိုꩻလဲ့ သꩻတကုဲင်တောဝ်း၊ အောဝ်ႏယွုန်းယော သယ်ꩻခံႏဒျာႏ၊ တမာꩻချာတောဝ်းနုဲင်းမုဲင်ꩻမုဲင်ꩻနောဝ်ꩻမꩻ တွိုႏလင်ꩻခန်းနဂါꩻခမ်း၊ လင်ꩻဟော်ꩻဖေႏခန်း ခွန်နဂါꩻ မိဖုရာꩻတရာꩻနောဝ်ꩻသွူ။ နဂါꩻသီးဖုံႏ ကုသိုလ်ႏတရာꩻ တိုꩻပွာꩻလွဉ်စွဉ်ႏသွူ။