ခီႏမျောက်ထောက်ကမ်း

ခီႏမျောက်ထောက်ကမ်း ပိုတွမ်ႏမာနဝ်ꩻ

လူꩻပိုတဖြာꩻ မွူးကွို့ꩻနာꩻတိန်ႏတိန်ႏအခိန်ႏ လွဉ်တောင်ꩻပြန်ႏတဲင် ဗွေႏဘုရာꩻ ကဟော်ꩻနယ်ဒါႏ လောကစီꩻပွာꩻချမ်ꩻသာႏအီ အကျောင်ꩻတရာꩻ (၃၈)ပါꩻ မင်္ဂလာႏတရာꩻနဝ်ꩻ ပါဠိဂါႏထာႏပေါင်ꩻ အဝ်ႏတဆီဂါႏထာႏသွူ။ တဆီဂါႏထာႏအကို စတုတ္ထဂါႏထာႏပါဠိနဝ်ꩻ နုဲင်းလယိုအတွိုင်ꩻသွူ။ - မာတာပိတု ဥပဋ္ဌာနံ၊ ပုတ္တဒါရဿ သင်္ဂဟော။ အနာကုလာ စ ကမ္မန္တာ၊ ဧတံ မင်္ဂလံ မုတ္တမံ။

စတုတ္ထဂါႏထာႏကို ကပါဒါႏ တရာꩻ(၃)ပါꩻ

၁။ လွူးမွီႏပျုစုဗာႏ မွိုးဖါ။ ၂။ ခီႏမျောက်ထောက်ကမ်းဗာႏ ပိုမာ။ ၃။ မာꩻဗာႏ အပဲစ်တအဲန်ထဝ်း ထာꩻမာꩻမျိုꩻ။

ဒသကနိပါတ် တက္ကလဇာတ်ဝွတ္ထု

ပွိုင်းလဲင်ႏစခါ ကာသကရာဇ်တုံး သဝိဋ္ဌကကမဉ်ꩻဒါႏ လုဲးသားနဝ်ꩻ အဝ်ႏတဖြာꩻသွူ။ လုဲးသားနဝ်ꩻနဝ်ꩻ တွမ်ႏအဖါ၊ တွမ်ႏအမာ၊ တွမ်ႏသက်လꩻ (၇)နေင်ႏ ပိုခိုပေႏတဖြာꩻ အဝ်ႏအုံညီꩻလွေꩻလွဝင်ꩻ တလံးချင်ႏ ဒဲန်ဟန်ႏတဖွိုင်ꩻချင်ႏသွူ။ သဝိဋ္ဌကလုဲင်းသားနဝ်ꩻ အဝ်ႏလွေꩻမွိုင်းဒျာႏလုဲင်းတုံး စွုမ်ႏနီꩻနီꩻတဲင် မွူးယာခိုႏနဝ်ꩻ တပေါ်ꩻအုံဗာႏတဝ်းလံး၊ လံးကိုနဝ်ꩻ အဝ်ႏကုဲင်ဒျာႏပိုတွမ်ႏမာ၊ တွမ်ႏအဖါလွုမ်ꩻသွူ။ လုဲင်းသားအမာနဝ်ꩻ ပျုစုသုတ်သင်ႏဗာႏ အဖူဖြားစွုမ်ႏနီꩻနီꩻတဲင် ထွိုင်ႏညနဝ်ꩻ ဗွိုႏအန်ꩻခန်း အဖူဖြားသွူ။ နဝ်ꩻတွော့ꩻ ဒေါ့ꩻဖေႏခန်း သဝိသဋ္ဌကလဲ့ အစနဝ်ꩻ တအုဲင်ႏမာꩻသီတဝ်း၊ တဟဝ်တဝ်း တမွေးတဝ်းအကျောင်ꩻ ခြုဲင်းနယ်အမာလဲ့ အမာတလက်ခံႏတဝ်း၊ ခွိုꩻခွိုꩻယွိုင်ꩻယွိုင်ꩻ အဝ်ႏအွဉ်ႏမာꩻသီစွဉ်ႏတွော့ꩻ ထွိုင်ႏညနဝ်ꩻ ဖါကေꩻဇူꩻတရာꩻယို တယူႏလꩻဒွုမ်၊ လက်ခံႏခန်း အမာငဝ်းတွော့ꩻ အဖါယို ဒင်ႏဖိုးလေားလောင်းတဲင် ရေႏလွေꩻမာꩻသီစွဉ်ႏ အွိုးသင်ႏခဲင်ꩻသွူ။

ပိုလိန်ႏမာႏ ပိုရတနာႏ

ထွိုင်ႏဒင်ႏအဖါလောင်းလောင်းနဝ်ꩻ ကအဝ်ႏထွာဒါႏ အပိုခိုပေႏနဝ်ꩻ "ထာꩻယို ပေါႏခွေတကယ်ႏတဝ်းနဝ်ꩻ အီႏမာႏလို့ဟွေး" ယူႏနုဲင်းနဝ်ꩻတွော့ꩻ ထင်ႏအုံဒင်ႏနုဲင်းနုဲင်းခန်း လေားလောင်းသွူ။ အဖါထွဉ်ႏလင်ꩻလဲ့ တအုဲႏလင်ꩻတဝ်း အုံဒင်ႏစွူစွူ လောင်းလောင်းသွူ။ နဝ်ꩻတွော့ꩻ သဝိဋ္ဌကနဝ်ꩻ ဖါတွမ်ႏပိုယို ဒင်ႏလွေꩻခန်းဒျာႏ သင်ႏခဲင်ꩻသွူ။ တွိုႏသင်ႏခဲင်ꩻနဝ်ꩻ အွဉ်ႏအုံယွုတ်ꩻသွူလေားတွော့ꩻ တွမ်ႏနမ်းခူႏခန်း ထာꩻအောင်တအောင်သွူ။ တွိုႏနဝ်ꩻတွော့ꩻ ပိုခိုပေႏနဝ်ꩻ လင်ꩻခန်းလေား လွေꩻထေ့သွူ အဖါတွော့ꩻ "ဖါဟွေး- သင်ႏခဲင်ꩻကိုယိုနဝ်ꩻ နွေႏဒီႏသူႏဒီႏတအဲဉ်ထဝ်းမွော့ နီဖါမာꩻထာꩻမုဲင်ꩻ မွော့အဝ်ႏခူႏ တွိုႏထာꩻယိုအီး"ရီခန်းနုဲင်းနဝ်ꩻ။ တွိုႏနဝ်ꩻတွော့ꩻ "ခူႏသူႏသူႏနွေႏ တမွေးတဝ်းမောင်ႏ၊ မောင်ႏသီးဖါဖြားယိုနဝ်ꩻ သက်တန်ငါႏလဲဉ်း၊ မာꩻထာꩻမုဲင်ꩻမုဲင်ꩻလဲ့ တဒါႏတဝ်းဒွုမ်၊ ကေားပျုစုလုံꩻပန်ꩻလဲ့ သံးအဲဉ်ထဝ်းတွော့ꩻ ကိစ္စဖေႏကညိမ်ꩻထိုꩻခန်းနဝ်ꩻ မာꩻသီခန်းမꩻသနဲ့မောင်ႏ၊ ခွေကခူႏထာꩻယိုနဝ်ꩻ ခူႏဖေႏဖါဖြားအောင်ဒျာႏ"ဒေါ့ꩻဖေႏခန်းအပိုနုဲင်းနဝ်ꩻသွူ။ အပိုနဝ်ꩻ နုဲင်းမုဲင်ꩻမုဲင်ꩻရိုꩻတဝ်း တရိမ်စွဉ်ႏနမ်ႏ အဖါစူကိုတွော့ꩻ လွေꩻခူႏခေါ်ခေါ်ဖျင်စွဉ်ႏ တအောင်သွူ။ "နဝ်ꩻက နာꩻမာꩻထာꩻမုဲင်ꩻမောင်ႏ"အဖါထွိုင်ႏရီနဝ်ꩻ "နီဖါလဲ့ ဖြားလဲန်းနေနေ၊ မာꩻသီနုဲင်းနုဲင်းနီဖါတွော့ꩻ လို့ꩻနုဲင်းနုဲင်းတယ်ꩻခန်းဟောင်း"ရိုꩻနဝ်ꩻ၊ တွိုႏနဝ်ꩻတွော့ꩻ အဖါနဝ်ꩻ သေနာႏချာစွဉ်ႏနမ်းသွူ။ "တမွေးတဝ်းမောင်ႏ"ရိုꩻဖေႏခန်းအပိုနုဲင်းနဝ်ꩻသွူ။ အပိုနဝ်ꩻ "နီဖါမꩻ ယိန်းမွေးမွေးတဝ်း၊ ထိုမ်ႏအံႏထိုမ်ႏအွꩻ တဒါႏဒွုမ် နီဖါဖြားယို အဝ်ႏလိုႏပျုစုဝွတ်ပတ်ဟဝ်ဟဝ်နဝ်ꩻ ကျမ်ႏမာꩻသီနဝ်ꩻအီး၊ ငမ်းတဝ်း ပဉ္စာနန္တရိယကံႏထွိုက်နဲ့အီး"ဒေါ့ꩻဖေႏခန်းအဖါနုဲင်းနဝ်ꩻသွူ။ တွိုႏနဝ်ꩻတွော့ꩻ အဖါနဝ်ꩻ လꩻခန်းသတိတဲင် လောႏယွော့တဖော့ထွူ အပိုခိုတွော့ꩻ ဝုဲင်ႏတောင်ꩻပြန်ႏချာခန်း အဖါနဝ်ꩻသွူ။ အဖါလဲ့ ခွင်ꩻလွစ်ဖေႏသွူတွော့ꩻ တဖါပိုဝင်ꩻသိုမ် ထိုမ်းလေား သဲင်ꩻချာခန်းဒျာႏလံးသွူ။

သေထွူနမ်းမာႏ ပျုပျင်ႏချာဒျာႏ

ထွိုင်ႏတွိုႏသဲင်ꩻချာလံးနဝ်ꩻ အမာခွန်းဆွုမ်ႏတဲင် သဝိဋ္ဌကနဝ်ꩻ သꩻလျားထာꩻတွော့ꩻ တွယ်ႏအမာ၊ အမာနဝ်ꩻ ထိုꩻလွေꩻအုံဗာႏ လိုꩻလင်လံးသွူ။ အမာအဲန်ထဝ်းလံးတွင်ꩻ အပိုခိုပေႏ ဖေႏကျံႏဉာဏ်ႏအလꩻ လွေꩻရီဖျင်ပါꩻမူႏတဖြာꩻ ရိုꩻနဝ်ꩻသွူ။ တဖါပို လွေꩻနုဲင်းနုဲင်းဝင်ꩻတဲင် တဖူꩻလောင်းနဝ်ꩻ ခွဲးအမာတွော့ꩻ အမာလောႏလွဉ် တောင်ꩻပြန်ႏယင်း အပိုခိုသွူ။ အပိုခိုနဝ်ꩻ ခွင်ꩻလွစ်ဖေႏသွူ အမွိုးတွော့ꩻ ဟဲ့ꩻသဲင်ꩻချာခန်းဒျာႏ အဖါ၊ အွဉ်ႏသဲင်ꩻကန်းတော့ꩻချာခန်းဒျာႏ အဖါဖြားသွူ။ တဲႏနဝ်ꩻမာꩻငါ တွမ်ႏပိုတွမ်ႏဖါ တွမ်ႏမာတွမ်ႏဝါꩻ ထီꩻထီꩻသင်ꩻသင်ꩻ ချမ်ꩻချမ်ꩻသာႏသာႏ အုံအဝ်ႏညီꩻလွေꩻခန်းဒျာႏလွဝင်ꩻသွူ။ သဝိဋ္ဌကနဝ်ꩻ ထာꩻတဟဝ်တဝ်းယို သျောင်ႏ၊ ထာꩻဟဝ်မျိုꩻယို ဆောင်ႏထွူတဲင် လွူးဟဝ်ဟဝ်လွေꩻဒျာႏအဖါ၊ ခီႏမျောက်ထောက်ကမ်းလွေꩻ ပိုမာတဲင် ကံႏထွိုင်ႏလို့နဝ်ꩻ ထင်ႏထွာခန်းဒျာႏ လူꩻပို အွိုးလူꩻခမ်းကီသူꩻသွူ။

ဥပဒေသ

လိုꩻသီးယို ရိုꩻရိုꩻသာꩻသာꩻ လွူးမွီႏသုတ်သင်ႏ ဖေႏအွꩻဖေႏအံႏဒျာႏ မွိုးဖါ၊ ရိုꩻရိုꩻသာꩻသာꩻ ခီႏမျောက်ထောက်ကမ်းလွဗꩻ ပိုတွမ်ႏမာနဝ်ꩻ ထွာမင်္ဂလာႏတရာꩻတဲင် လိုꩻချံꩻသာႏ၊ လူꩻချံꩻသာႏ ချံꩻသာႏနီမျိုꩻယို ခံႏစာꩻစံႏစာꩻထွူတွော့ꩻ အဆုဲင်ꩻသွတ်ꩻနဝ်ꩻ နိဗ္ဗာန်ႏချံꩻသာႏယို လꩻလွေꩻဗာႏဒျာႏသွူ။