ခွေသွီႏခွေနꩻယို

"ခွေသွီႏခွေနꩻယို ခွေလိုꩻမျိုꩻတာႏ" "ဝေးခမ်းကျောႏကရိုꩻဒါႏ အဘိဓမ္မာႏသဘော်ꩻတရာꩻယိုဟွဉ်ႏနောဝ်ꩻ လိုꩻအစွိုꩻအဗူႏ တဖြုံႏလွုမ်းတွက်တာႏ ဗွေခူꩻလဲဉ်း ဒေါ့ꩻထဲင်းခရာႏ၊ ထဲမ်းသော့ꩻခရာႏ လိုႏတောဝ်းဒွုမ်နဲ့ ဝေးခမ်းကျောႏ"။ "နုဲင်းနောဝ်ꩻ မွေးဒျာႏ ဖူးမူႏခံꩻအောင်ႏ၊ သဘော်ꩻလောင်ႏလင်ဖုံႏနောဝ်ꩻ နီဝေးကရိုꩻဒါႏ အဘိဓမ္မာႏအဟေ့ꩻရောင်းလွဉ်းလွဉ်းဒျာႏ၊ အတ္တဝါႏဒယို ဟောဝ်ငါႏတောဝ်း၊ မွေးငါႏတောဝ်း ရိုꩻကီလဲ့ လိုꩻကဉ်းအာအာယို အောဝ်ႏနေးထူႏလွဒျာႏနောဝ်ꩻသနယ်ဖူးမူႏ၊ Mortimer Adler ကတဲမ်းဒါႏ Great Ideas From Great BOOK လိတ်ကို "နီနာꩻယို လိုꩻပေါင်ꩻတောဝ်း လိုꩻခြေားလိုꩻကေန်ꩻ၊ လိုႏပေါင်ꩻဒျာႏ လိုꩻခြွေလိုꩻခြာႏ၊ မဉ်ႏပေါင်ꩻလိုꩻခြောလိုꩻကေန်ꩻနောဝ်ꩻ နီနာꩻယိုလဲ့ ကေန်ꩻခြောဒါႏသနယ်ဖူးမူႏ----" "ဝေးခမ်းကျောႏ အယူႏအတွေꩻနောဝ်ꩻ နုဲင်းစွဉ်ႏလဲဉ်းသော့ꩻထိုꩻလဲဉ်း အမော့တဖဲ့ꩻ တဖူꩻသူꩻခွေႏ၊ နဝ်ꩻတဝ်းလဲ့ ထွာထိုꩻလဲဉ်း တရာꩻသီးဝါႏဒသဖော်ꩻဒျာႏ၊ လိုꩻမျိုꩻတမျိုꩻတဝ်းလဲ့ လိုꩻအစွိုꩻအဗူႏတဖြုံႏကို ယေန်ႏငဲရေꩻတွမ်ႏ ဓလေ့ꩻထွုံꩻစံႏဖုံႏယို အီႏထွာလယ်ႏကွို့ꩻ အရံႏသဖော်ꩻလွုမ်ꩻနဝ်ꩻ ဖူးမူႏနေးထူႏဗွိုန်ႏတဝ်းဗာႏ၊ နဝ်ꩻထွူတကာႏတဝ်း ပအိုဝ်ႏလိုꩻမျိုꩻ၊ ပအိုဝ်ႏယေန်ႏငဲရေꩻတွမ်ႏ ဓလေ့ꩻထွုံꩻစံႏဖုံႏယို နေးထူႏဗာႏရင်ꩻရင်ꩻသနယ်၊ မဉ်ႏပယ်ႏခွါႏထိုꩻနောဝ်ꩻ ဗွိုန်ပီစွဉ်ႏ ခွိုꩻယားသားတဖြာꩻမတောဝ် ဝေးခမ်းကျောႏ"။ "ဖူးမူႏခံꩻအောင်ႏ လိုႏသေနာႏဖြောင်တစိꩻပေႏသနယ်ဖူးမူႏ၊ အခေါဝ်တွို့ꩻသား ယေန်ႏငဲရေꩻတွမ်ႏ ဓလေ့ꩻထွုံꩻစံႏဖုံႏတရိုꩻတဝ်း၊ အခေါဝ်ကွဉ်ႏသား ဓလေ့ꩻထွုံꩻစံႏဖုံႏတရိုꩻတဝ်း၊ ဘာႏသာႏရေꩻဆဲင်ႏရာꩻ ယေန်ႏငဲရေꩻတွမ်ႏ ဓလေ့ꩻထွုံꩻစံႏဖုံႏတရိုꩻတဝ်း စားနဝ်ꩻဖုံႏယို သာႏမညသဖော်ꩻလွုမ်ꩻဒျာႏသွူ ဖူးမူႏ၊ ဘုရာꩻဂေါတမစိုးကို ကပေါႏထန်ႏလွဉ်ဒါႏ "ပကုဓကစ္စာယန"ပုဂ္ဂိုလ်ႏတန်တဖြာꩻ မိန့်သေꩻခါꩻနဝ်ꩻ "ချင်္သေ့ꩻတဗာႏ ကအဲင်ႏအမ်ႏဒါႏ ခီယီꩻဖုံႏယို အပဲစ်အဲဉ်ထဝ်း၊ ပွိုးထာꩻမုဲင်ꩻတွော့ꩻ ဝွေꩻအာႏဟာႏရအနေႏ ဝွေꩻအမ်ႏဒျာႏနဝ်ꩻက အပဲစ်အဲဉ်ထဝ်း၊ တရာꩻသဖော်ꩻဒျာႏ"ဝွေꩻဗွေႏငေါဝ်းယို မဲဉ်ႏသꩻငါႏခွေမွော့ဖူးမူႏ" နင်ႏခံꩻအောင်ႏ အွဉ်ႏတဗေႏပသာႏလွိုးတဲင် ဒေါ့ꩻဖေႏချာ- "ဝေးခမ်းကျောႏ အယူႏအတွေꩻယို ဗွိုန်ပီထိုꩻလဲဉ်း အခေါဝ်တွို့ꩻသား နမ်းကျင်ꩻအဘိဓမ္မာႏ သမုတိဝါႏဒ (Rilativism)မတဝ်၊ အမာႏအမဲဉ်ႏ၊ အဟောဝ်အကုဲင်ဖုံႏယို ပွုံႏမဲဉ်ႏအဲဉ်ထောဝ်းတွော့ꩻ ခိန်ႏခါႏအလွောက်ꩻ ပြောင်ꩻလုဲင်ႏအီဒါႏဝါႏဒကရိုꩻနဝ်ꩻ ဖူးမူႏသေလဲဉ်း၊ ဟဝ်ငါႏ ဝေးခိုခမ်းကျောႏ၊ နမ်းတာႏငါတယဝ်း၊ လိုꩻလင်နောဝ်ꩻ မဉ်ထွာနုဲင်းမုဲင်ꩻထွာနုဲင်းနောဝ်ꩻနဲ့၊ နီခွိုꩻပအိုဝ်ႏသီး ကကိုꩻကွယ်ႏဒါႏ ဗုဒ္ဓဘုရာꩻတွမ်ႏ ယေန်ႏငဲရေꩻ ဓလေ့ꩻထွုံꩻစံႏဖုံႏယို အခိန်ႏတရွေꩻတဝ်း ဝေးခိုခမ်းကျောႏ အွဉ်ႏကုဲင်နွောင်ꩻဒျာႏ သဖော်ꩻနုဲင်းနောဝ်ꩻနဲ့ရိုႏ" ခမ်းကျောႏ ငေါက်ꩻပသာႏသွူ ကတူႏတွော့ꩻ ထွားစွူလွေꩻနင်ႏခံꩻအောင်ႏတဲင် ဒေါ့ꩻယွယွဖေႏယင်း-"ဖူးမူႏခံꩻအောင်ႏလဲ့ နေႏရာႏသဖော်ꩻပနဲဗွောင်လဲဉ်းမတဝ်၊ နီဝေးတွမ်ႏဖူးမူႏ ဝင်ꩻနီတပွိုင် ကရေႏတဲႏဆို့ꩻလွေꩻ ဘဝတသာ တဲႏဆို့ꩻရေꩻကိုလွူးနမ်းတာႏ အကျိုꩻတရာꩻနောဝ်ꩻ စွိုးခွိုꩻရေꩻတာႏ ယေန်ႏငဲးရေꩻဖုံႏယို ငမ်းထွာအီဒါႏ အခွို့အခံႏနေးနောဝ်ꩻဒျာႏ၊ အခေါဝ်တွို့ꩻသား ကနေးထူႏသေꩻခါꩻဒါႏ နမ်းတာႏအကျိုꩻ၊ ကထိန်ꩻတီဒါႏဝါႏဒယို ဟန်ႏနီꩻကမ္ဘာႏလောင်းကို အောဝ်ႏနေးထူႏကျင်ꩻသွုံꩻလွလဲဉ်းဒျာႏ ပငါပရာꩻမွော့ဖူးမူႏ၊ နန်းခီဗာႏတောဝ်းကွေး" "နုဲင်းနောဝ်ꩻနဲ့ ဝေးခမ်းကျောႏ၊ နောဝ်ꩻမꩻလဲ့ ဝေးခမ်းကျောႏသီးလမ်းကို လဲင်ꩻတဒေါ့ꩻတောဝ်းဒွုမ်ငဝ်းပအိုဝ်ႏ၊ လဲင်ꩻတကွဉ်ကꩻတောဝ်းဒွုမ် ခွမ်ꩻလာꩻပအိုဝ်ႏ၊ လဲင်ꩻနေးထူႏတောဝ်းဒွုမ် ခွိုꩻပအိုဝ်ႏယေန်ႏငဲရေꩻ ထွုံꩻဓလေ့ꩻဖုံႏနောဝ်ꩻ ကွပ်စွဉ်ႏဒျာႏ အခေါဝ်တွို့ꩻသားဖုံႏ နမ်းကျင်ꩻအဘိဓမ္မာႏ အယူႏအတွေꩻဖုံႏတဲင်တွော့ꩻ ထီဖွီချာ နီပအိုဝ်ႏစွိုးခွိုꩻနောဝ်ꩻ ဖူးမူႏစရိတ်ခေႏလꩻ ဟန်ႏနီꩻယိုသနယ် ဝေးခမ်းကျောႏ၊ ဖူးမူႏဖေႏကရပ်ဆွုမ်ႏအီ နီဝေးအယူႏအတွေꩻနောဝ်ꩻ ညာꩻယော့တန်ဒျာႏ၊ ပသို့ꩻထဲင်း၊ ယို- ဝေးခမ်းကျောႏ လိုꩻအစွိုꩻအဗူႏတဗာႏယို မဉ်ႏဒေါ့ꩻစွဉ်ႏစွဉ်ႏနောဝ်ꩻ ဖူးမူႏသီး ပအိုဝ်ႏလိုꩻအစွိုꩻအဗူႏကို ကအဝ်ႏဒါႏ ယေန်ႏငဲရေꩻယို အငိုꩻတန်ထိုအီ အွတ်ꩻရွီးခင်ႏမွဉ်ဒျာႏ၊ ခွိုꩻပအိုဝ်ႏသီး ယေန်ႏငဲရေꩻယို မဉ်ႏကုဲင်ပြင်ꩻထိုꩻနောဝ်ꩻ ပအိုဝ်ႏလိုꩻမျိုꩻတွမ်ႏ ပအိုဝ်ႏအစွိုꩻအဗူႏလဲ့ ကုဲင်ပြင်ꩻထိုꩻမား ဟုဲင်လုဲင်အီဒါႏ၊ ကွပ်နဝ်ꩻမꩻ ခွိုꩻပအိုဝ်ႏယေန်ႏငဲရေꩻ ဓလေ့ꩻဖုံႏယို ဖူးမူႏတဖြာꩻအနေႏ အွဉ်ႏကုဲင်နွောင်ꩻတဝ်း၊ လိုႏထိန်ꩻသိမ်ꩻငါႏ၊ ဟဝ်ဆွန်ꩻတဉ်ႏသေꩻခါꩻဒျာႏသနယ် ဝေးခမ်းကျောႏ၊ နီဝေးခမ်းကျောႏ မဉ်ႏနေးထူႏတဝ်း ခွိုꩻပအိုဝ်ႏယေန်ႏငဲရေꩻတွမ်ႏ ဓလေ့ꩻထွုံꩻစံႏဖုံႏရိုꩻလဲ့ နီဝေးတွမ်ႏဖူးမူႏသီး ကအီႏတဲႏဆို့ꩻညီꩻဝင်ꩻ ဖဝတသာတဗာႏယို ထွာနွောင်ꩻတောဝ်းဒွုမ် ဝေးခမ်းကျောႏ၊ ဖစောဝ်းစောဝ်းခန်းလို့ဝင်ꩻမꩻ ဆုဲင်ꩻဝုဲင်ꩻယို ယပ်ꩻသꩻဗာႏတဝ်းနုဲင်းနုဲင်းဝင်ꩻ၊ ခွင်ꩻလွစ်ဗဲင်း ဖူးမူႏနေား ဝေးခမ်းကျောႏ၊ ဖူးမူႏလွေꩻသွူ ဝေးခမ်းကျောႏ" "ယိုနောဝ်ꩻ နီလမ်းဒျာႏမွော့၊ နီလမ်းကို နီမဉ်ဒေါ့ꩻငေါဝ်းထာꩻမုဲင်ꩻလဲ့ နီဒေါ့ꩻခွင်ꩻအောဝ်ႏဒျာႏမတောဝ်၊ နင်ႏခံꩻအောင်ႏယို ခလꩻထွာတဝ်းဒွိုန်း နီပနံနဝ်ꩻ ဝွေꩻမွော့လဲင်ꩻဒေါ့ꩻရုဲင်းငါႏထာꩻအီ၊ ဟွူး-မွေးတဝ်းနဲ့ စင်ꩻဖါဆန်ꩻ" ခွန်ခမ်းကျောႏသီးမွိုး စင်ꩻမွိုးလာႏနောဝ်ꩻ အောဝ်ႏထွမ်ထေ့ခန်းအဝါꩻဖြား စင်ꩻဖါဆန်ꩻထျꩻနုဲင်းနောဝ်ꩻသွူ။ "ကွပ်နောဝ်ꩻမꩻ နီအုံသော့ꩻဝေင်ꩻကိုမꩻ နီဒါႏလယ်ႏကြွို့ꩻဝင်ꩻငေါဝ်းဝင်ꩻငွါနဝ်ꩻ ဝွေꩻသီးသံးတကေးပါထာꩻယို ခွေယူႏဖြောင်တဝ်းဗာႏ၊ ဒါႏဝင်ꩻငေါဝ်းငွါမꩻ နီထုမ်ႏကျံႏအီ စီꩻပွါꩻဟံးဟဝ်ကရို၊ နီပိုခမ်းကျောႏတွမ်ႏ နင်ႏခံꩻအောင်ႏသီးလဲ့ လꩻနုဲင်းနုဲင်း တက္ကသိုလ်ႏပညာႏတွော့ꩻ တနီꩻခါ ဝွေꩻသီးအုံအဝ်ႏမု အဆင်ႏဖေႏကရော့ꩻယို ခွေကောစီႏစဲဉ်ႏဖေႏဒျာႏကရို စင်ꩻမွိုးလာႏ" စင်ꩻဖါဆန်ꩻငေါဝ်းသွတ်ꩻလဲ့ စင်ꩻမွိုးလာႏအွဉ်ႏတဗေႏနေး အဖြောင်းထွူတွော့ꩻ ဒေါ့ꩻချာအဝါꩻဖြား- "မွေးနဝ်ꩻမွေးဒျာႏ စင်ꩻဖါဆန်ꩻ၊ နီဒေါ့ꩻတဝ်းလယ်ႏကွို့ꩻ ငေါဝ်းပအိုဝ်ႏယို ဝွေꩻသီးသဖော်ꩻတလꩻတဝ်းနဝ်ꩻ ပွိုးထမုဲင်ꩻ၊ ငေါဝ်းစွဉ်ႏစွဉ်ႏ ငေါဝ်းပအိုဝ်ႏယို နွို့တွိုင်ꩻလဲ့တွမ်ႏတဝ်းခြာ၊ ဝင်ꩻလဲ့ထီႏဖွီပါထဲင်းနီ၊ မဉ်ႏနုဲင်းခွေနဝ်ꩻ ခွေမဉ်ကွိုတ်မွန်ပါနေး ဝင်ꩻလိုꩻမျိုꩻသနယ်၊ လꩻတဝ်းနင်ႏခံꩻအောင်ႏလဲ့ ထွာကဲတမုဲင်ꩻ၊ လိုꩻမျိုꩻလောင်ႏလင် လိုꩻမူႏဖုံႏ အဝ်ႏဗွေဗောႏထာꩻနဝ်ꩻ ဟံႏလဲင်ꩻယန်ꩻနေးစွဉ်ႏ၊ နင်ႏခံꩻအောင်ႏလဲ့ ခွေသဖော်ꩻတလꩻတဝ်းဒွုမ်၊ မွေးတဝ်းနဲ့ စင်ꩻဖါဆန်ꩻ" စင်ꩻဖါဆန်ꩻ စဉ်ꩻစာꩻပသာႏထွူတွော့ꩻ ထွားလွေꩻအမာစင်ꩻမွိုးလာႏ ကွဉ်ကꩻသေꩻခွမ်ꩻလာꩻ၊ ထွားဖျင်ဝွေꩻကကွဉ်ကꩻသေꩻခွမ်ꩻလာꩻ၊ ကွယ်ႏတွော့ꩻ ခွမ်ꩻလာꩻပအိုဝ်ႏမွေးတောဝ်းတဖြာꩻဖြာꩻ၊ အောဝ်ႏနောဝ်ꩻမꩻ ဒေါ့ꩻလွေꩻယင်း အမာစင်ꩻမွိုးလာႏ- "အွူ- မဉ်ႏကွဉ်ကꩻဗာႏ ခွမ်ꩻလာꩻပအိုဝ်ႏ၊ မဉ်ႏဒေါ့ꩻဖြောဝ်ႏဗာႏ ပအိုဝ်ႏငေါဝ်း၊ မဉ်ႏနေးထူႏ ပအိုဝ်ႏထွုံꩻစံႏယေန်ႏငဲရေꩻမꩻ နီပိုခိုခမ်းကျောႏနောဝ်ꩻ အီႏဖေႏတောႏလမ်းတွမ်ႏ ဝွေꩻသီးပိုမူႏနဲ့ရိုႏ စင်ꩻမွိုးလောႏ၊ နာꩻဟွိုန်လွဉ်ပါꩻမုဲင်ꩻထျꩻကောင်း" စင်ꩻမွိုးလာႏဒေါ့ꩻချာ- "ခွေဟွိုန်ဒျာႏကွို့ꩻ မိကွိုတ်(ဦးကြီးခမ်း)သီးထျꩻ၊ ဝွေꩻသီးသဲင်ꩻကောင်တွော့ꩻ အဟွိုန်သဲင်ꩻခံꩻအောင်ႏမွိုးဖါ စင်ꩻဖါဗွော-စင်ꩻမွိုးမိသီးထျꩻတဲ့ရိုႏ" စင်ꩻဖါဆန်ꩻ တဒက်ꩻသန်ထာꩻတဆင်ႏထွူတွော့ꩻ ဒေါ့ꩻဖေႏချာ အလမ်းသား စင်ꩻမွိုးလာႏ- "ဒျက်- အွိုးနယ်၊ ဝွေꩻသီးအုံဗာႏလယ်ႏကြွို့ꩻဒျာႏ ကောင်ခြာဆောင်ႏခြာ မွော့လဲင်ꩻထီႏဖွီငါႏနီနောဝ်ꩻ၊ ဝွေꩻသီးတွမ်ႏနီယို ထာꩻသေထာꩻဒါႏဖဲ့ꩻလဲ့နဝ်ꩻ၊ ရွဉ်ရေꩻတောင်ꩻရေꩻဖဲ့ꩻလဲ့နဝ်ꩻ ဆေ့ꩻခြောလဲဉ်းနီမွော့ ဝွေꩻသီးလဲင်ꩻဒေါ့ꩻဗွိုန်ႏစွဉ်ႏငေါဝ်းနုဲင်းယိုနဝ်ꩻ လွဉ်ꩻချိုꩻငါႏမတဝ်" စင်ꩻမွိုးလာႏ ထွားစဲင်းထွူ အဝါꩻဖြားတွော့ꩻ နဲစ်ဒေါ့ꩻသော့ꩻယင်း- "ခွေတဲလဲ့ အွဉ်ႏထွူလဲဉ်း၊ နီယို အခိုဖဲ့ꩻဒျာႏက အဆာဖဲ့ꩻအဲဉ်ထောဝ်း၊ မွေးတောဝ်းနဲ့ စင်ꩻဖါဆန်ꩻ" စင်ꩻမွိုးလာႏ ဒေါ့ꩻလဲ့ဒေါ့ꩻပါ၊ ရီလဲ့ရီပါအဝါဖြားထွူနောဝ်ꩻ စင်ꩻဖါဆန်ꩻ ဒေါ့ꩻဖေႏယင်း စင်ꩻမွိုးလာႏ- "ဖေႏကယားကုဲင် ငေါဝ်းဖြောင်သေꩻ မင်္ဂလာႏနောဝ်ꩻ နꩻသဲင်ꩻဆောင်းကောင်ထွူတွော့ꩻ ဒေါ့ꩻနယ်တွိုႏတွိုႏ စင်ꩻဖါဗွောတွမ်ႏ စင်ꩻမွိုးမိသူꩻလုဲင်း စင်ꩻမွိုးလာႏ၊ ခွေနောဝ်ꩻ သဲင်ꩻတောဝ်းဒွုမ်ကွေး" စင်ꩻဖါဆန်ꩻနောဝ်ꩻ ဝွေꩻငေါဝ်းသဲစ်သွတ်ꩻထွူနဝ်ꩻ အောဝ်ႏကလာထဲင်လောင်းထွိုင်ႏစွော့ꩻ လွေꩻထူႏစက်ꩻသွူးစွဉ်ႏ ဒေါဝ်ရမ်ပလဲင်ꩻနောဝ်ꩻသွူ။ ဒုံလုံးဟီႏ (မုဲင်းကောင်-စင်ꩻဖါဗွောလမ်း) စင်ꩻဖါဗွောအုံလင်ꩻမေႏဖါႏထျꩻခိုႏ၊ စင်ꩻမွိုးမိနဝ်ꩻ အဝ်ႏအုံမေႏဖါႏထျꩻထင်ꩻ၊ အပိုမူႏနင်ႏခံꩻအောင်ႏနဝ်ꩻ အဝ်ႏမေႏဖါႏထျꩻဒွမ် အုံကွမ်လွဝင်ꩻတွော့ꩻ စင်ꩻဖါဗွောကူအွꩻသွူ နေင်းထီတဲင် ဒေါ့ꩻခြုဲင်းနယ်ခန်း ခွန်ခမ်းကျောႏသီး မွိုးဖါအခရာႏ- "အွူ- စင်ꩻဖါဆန်ꩻတွမ်ႏ စင်ꩻမွိုးလာႏသီးယို အုံသော့ꩻဗာႏဝေင်ꩻ စလယ်ႏကွို့ꩻ နေင်ႏဆီလွိုလွုမ်ꩻလယ်ႏမွော့ ဝွေꩻသီးယို သꩻပအိုဝ်ႏလဲင်ꩻထိုꩻမားပါစွဉ်ႏကနော၊ အထွာဒါႏမန်း ရိုꩻခန်းနုဲင်းနောဝ်ꩻတဲ့ လꩻဒျာႏ။ ကွယ်ႏကား ဝွေꩻသီးပို ခွန်ခမ်းကျောႏနဝ်ꩻ ဒါႏလိတ်ဒါႏလုဲင်ꩻ ထွူတကာႏတဝ်း တက္ကသိုလ်ႏပညာႏတဲ့ သမ်းသွဉ်ထူႏ လꩻပါဒွိုန်းကမွော့ နေႏရာႏသꩻရက်ခွိုꩻပေႏယို အောဝ်ႏဗွို့ꩻဗာႏနေနေအီး" စင်ꩻဖါဗွော ဒေါ့ꩻထွူနောဝ်ꩻ စင်ꩻမွိုးမိ ထွားတမွာႏလွေꩻ အဝါꩻဖြားထွူတွော့ꩻ ရိုꩻဖေႏချာ- "ဒါႏလိတ်နောဝ်ꩻခေါ်ခေါ်ဒျာႏ၊ သꩻရက်ခွိုꩻနောဝ်ꩻခေါ်ခေါ်ဒျာႏ၊ ဝွေꩻသီးယို ထွားဗော့ꩻနမ်းတာႏ စီꩻပွာꩻရေꩻလွုမ်ꩻတွော့ꩻ နီပအိုဝ်ႏအရေꩻ လိုꩻမျိုꩻရေꩻနောဝ်ꩻ ဝင်ꩻအွဉ်ႏဒျာႏ ငင်းဗꩻချာကိုနုဲင်းနောဝ်ꩻဒျာႏ စင်ꩻဖါဗွော" စင်ꩻမွိုးမိငေါဝ်းသွတ်ꩻစွဉ်ႏလဲ့ စင်ꩻဖါဗွောဒေါ့ꩻချာတောဝ်းထမုဲင်ꩻမုဲင်ꩻတွော့ꩻ ထွားလွေꩻထေ့ခန်းအပိုမူႏ ခံꩻအောင်ႏထျꩻ ငေါက်ပသာႏပါကတူႏတဲင် ဒေါ့ꩻဖေႏအပိုမူႏတွမ်ႏအမွိုးထျꩻ- ကားကားနဲ့ꩻ နီပိုမူႏခံꩻအောင်ႏယို သꩻရက်ခွိုꩻပေႏအောဝ်ႏဗွို့ꩻသေꩻနောဝ်ꩻမꩻ ပြွန်သော့ꩻထေ့တဝ်း ပါꩻစားနဝ်ꩻထျꩻ၊ ကံႏဟောဝ်ငါႏ မရေႏမရာႏ၊ ကွယ်ႏကားတွော့ꩻ ခွန်ခမ်းကျောႏသီးဖါဖြား ဖြားဒွန်းနောဝ်ꩻ ပွိုင်းလဲင်ႏကို ပဒေႏသရာဇ် တွူႏတရန်ရေꩻသားတဖြာꩻဒျာႏ၊ ထွူတကာႏတဝ်း တွိုက်ꩻပွယ်ꩻကိုလဲ့ မဉ်ꩻကျောႏငါႏ မရေႏမရာႏမွော့ တွိုႏအပို စင်ꩻဖါဆန်ꩻနဝ်ꩻ ထွာခေါ်ထိုꩻဒျာႏတစားနဝ်ꩻမꩻ ခွေယူႏတဖြောင်တဝ်းဗာႏ၊ ဖြားဒွန်းတွမ်ႏနီဖါဖြားတိလွန်ꩻယို ပဒေႏသရာဇ် တွူႏတရန်ရေꩻကာႏလကို မဉ်ꩻတန်နုဲင်းနုဲင်းဝင်ꩻသွူနဲ့၊ ဝွေꩻသီးဝင်ꩻနီယို သꩻရက်ခွိုꩻတွမ်ႏ ရုဲင်းဟန်သတ္တိကိုလဲ့ ဗွိုန်ပီဒျာႏလို့ဝင်ꩻသနယ် စင်ꩻမွိုးမိ" စင်ꩻဖါဗွော ငေါဝ်းသဲစ်သွတ်ꩻလဲ့ အပိုမူႏနင်ႏခံꩻအောင်ႏ ထွားစဲင်းလွေꩻအဖါထွူတွော့ꩻ- "ဟွူး- ဝေးခမ်းကျောႏသီးဖါဖြားတွမ်ႏ နီဖါဖြားနဝ်ꩻ ပဒေႏသရာဇ် တွူႏတရန်ရေꩻသားနုဲင်းနုဲင်းဝင်ꩻနဲ့ဖါ၊ မဉ်ႏတွိုႏနေင်ႏမဲ့တန် လာမဲ့တန် နီဖါအွဉ်နီ မဉ်ႏလွေꩻကွဉ်းတော့ꩻနဝ်ꩻ ကောသားတွော့ꩻ အောဝ်ႏဒေါ့ꩻခြုဲင်းနယ်သေႏသေႏ သꩻရက်ခွိုꩻခရာႏ၊ စွိုးခွိုꩻယေန်ႏငဲရေꩻခရာႏတွမ်ႏ သꩻဓာတ်တဉ်ႏခွေါင်ရေꩻခရာႏနောဝ်ꩻကနော" အပိုမူႏနင်ႏခံꩻအောင်ႏ ဒေါ့ꩻထွူနောဝ်ꩻ စင်ꩻဖါဗွော ဖြွꩻပသာႏအကာႏဆွဉ်ႏထွူတွော့ꩻ ထွားလွေꩻအပိုမူႏ နင်ႏခံꩻအောင်ႏတဲင်- "နီဖါဖြားတိလွန်ꩻတွမ်ႏ ခွန်ခမ်းကျောႏသီးဖါဖြား ဖြားဒွန်းနောဝ်ꩻ သွꩻပေႏဝင်ꩻနုဲင်းတဖူးဝေးယာႏယာႏသနဲ့ ပိုမူႏ၊ တလဲင်ႏနောဝ်ꩻ စောက်ꩻဖါးတွမ်ႏအစဲ့ꩻဖုံႏ ဖျော်လွဉ်နီရပ်ကိုတွော့ꩻ ထီႏလိုꩻမူႏတရေꩻတဲင် စောက်ꩻဖါးကျမ်ႏနေးထူႏ နုဲင်းမာပေႏတွော့ꩻ ဖြားဒွန်းတွမ်ႏသီဖါဖြားတိလွန်ꩻ ကျမ်ႏလွေꩻကယ်ႏ မူႏနံꩻပေႏဝင်ꩻနီ---" ယံတွင်ꩻကို ထဉ်ႏခမ်းနောဝ် လိုꩻပင်အွဉ်းဖျော်လွဉ်တဲင် စင်ꩻဖါဗွော အွဉ်ႏသွတ်ꩻတရတ်ထိုꩻငေါဝ်း စွော့ꩻတက်လွေꩻလုဲင်ႏ ထဉ်ႏဖုံႏ- "ဪ- လွဉ်ဟုဲင်း၊ လွဉ်ဟုဲင်းဩ၊ တနꩻစွဉ်ႏ ကျောင်ꩻအာရိန္တတွမ်ႏ ကျောင်ꩻကမ္မာႏသီးကနော အုံလင်ꩻပငါပရာꩻဟုဲင်း" နေးတွမ်ႏလောကဝတ်သဖော်ꩻအလꩻ စင်ꩻဖါဗွောရပ်ဆွုမ်ႏ စွော့ꩻတက်လွေꩻခန်း ထဉ်ႏဖုံႏနောဝ်ꩻသွူ၊ တသွုပ်ချင်ႏကို ဒေါ့ꩻလွေꩻပါခန်း အပိုမူႏနင်ႏခံꩻအောင်ႏ- "ပိုမူႏခံꩻအောင်ႏ လွေꩻဒွိုႏလွဉ်ထဲင်း နေင်းထီဟုဲင်း၊ မဉ်ႏထွူနဝ်ꩻ ဒွိုႏဖေႏပါ သီဖါနင်သီးဒဲဉ်ယာလုဲင်း ပိုမူႏ" ကာꩻဗွာပေႏဘဲန်တလံꩻနောဝ်ꩻ ဒင်ႏနေးလိုꩻယွဲနီဖြာꩻတွော့ꩻ ဖင်းလောႏထင်ႏ သာစည်+ယင်းမာပင် တဖူꩻလောင်းကို အလွိုး-ရေႏသဲင်ꩻကောင်ရွေꩻလောင်းနဝ်ꩻသွူ၊ ကာꩻလောင်း လိုꩻယွဲဝင်ꩻနီကိုတဖြာꩻနဝ်ꩻ ဒေါ့ꩻဖေႏအသွꩻ- "ခမ်းကျောႏ နာꩻကရေႏဗွောင်ဒါႏ သေင်ႏလာႏပွယ်ꩻယွုံႏ မန္တလေꩻကိုလဲ့ အဆင်ႏပြေႏပြေႏ မာꩻထူႏအောင်ႏမျင်ႏထွူလဲဉ်းဒျာႏ၊ ကွယ်ႏတွော့ꩻ နာꩻတွမ်ႏနင်ႏခံꩻအောင်ႏ အခရာႏပေႏနောဝ်ꩻ ခွေမဲဉ်သေရွုမ်းငါႏ၊ ကဉ်းခြုဲင်းနယ်ဗဲင်းခွေမွို ပါꩻယို" ခမ်းကျောႏ အောဝ်ႏဝါးကာꩻတွင်ꩻ ထွားတခေင်ႏထေ့သွူအသွꩻ ခွန်ကျောႏလေတဲင် ဒေါ့ꩻယွယွဖေႏခန်း- "ယပ်ꩻယဲ့ꩻပသာႏပေႏဒျာႏ ပါꩻနောဝ်ꩻ" "ယပ်ꩻယဲ့ꩻကဲထမုဲင်ꩻ ပါꩻနောဝ်ꩻ" "နုဲင်းယိုဒျာႏ၊ နင်ႏခံꩻအောင်ႏ အယူႏအတွေꩻကို စွိုးခွိုꩻယေန်ႏငဲရေꩻတွမ်ႏ ထွုံꩻဓလေ့ꩻဖုံႏယို ဆွန်ꩻတဉ်ႏထွူမꩻ မာꩻဗာႏနမ်းရေꩻနမ်းတာႏတဲ့၊ ခွေထာꩻယူႏနဝ်ꩻ ယေန်ႏငဲရေꩻ ထွုံꩻဓလေ့ꩻဖုံႏယို အွဉ်ႏနေးအရံႏသဖော်ꩻဒျာႏ၊ နမ်းတာႏနမ်းရေꩻယို အွဉ်ႏဗာႏအထျꩻနုဲင်းနဝ်ꩻဒျာႏ ပါꩻယို" ခမ်းကျောႏဒေါ့ꩻထွူနဝ်ꩻ ထွားထေ့လွေꩻ ကျောႏလေတဲင် ကျောႏလေရိုꩻဖေႏချာ- "မဉ်ႏနုဲင်းခွေကနာႏ နာꩻငေါဝ်းအလꩻနောဝ်ꩻ နင်ႏခံꩻအောင်ႏငေါဝ်းပေႏယို အရွီးအခိုႏဟမ်းအဝ်ႏမတဝ်း ပါꩻယို၊ မဉ်ႏထွားချာ လိုꩻသမဲင်ꩻ တဖြုံႏလွုမ်းနောဝ်ꩻ အွဉ်ႏဗာႏစွိုးခွိုꩻရေꩻမွော့ ခမ်းကျောႏ" ခမ်းကျောႏ တမွာႏထေ့သွူ ခမ်းလေတဲင်- "မွေးဒျာႏ၊ ကွယ်ႏကားတွော့ꩻ ကားလ်မာ(က်စ်)တွမ်ႏ အေင်ဂယ်လ်-သီးနဝ်ꩻ ခင်ႏမွဉ်အွဉ်ႏတဝ်း စွိုးခွိုꩻရေꩻ အွဉ်ႏဒျာႏလိုꩻအဆင်ႏရန်းကရို ပါꩻယို၊ နဝ်ꩻထွူတကာႏတဝ်း ဟန်ႏနီꩻ ကမ္ဘာႏလောင်းကိုလဲ့ 'နမ်းအကျိုꩻစီꩻပွါꩻဝါႏဒ'ယိုလဲ့ အဝ်ႏနေးထူႏလွဒျာႏလဲဉ်း ပငါပရာꩻကရို" "နာꩻထာꩻထီႏနဝ်ꩻ မွေးတဝ်းဒွိုန်းခမ်းကျောႏ၊ လဲဉ်းသော့ꩻထိုꩻလဲဉ်း အမော့တဖဲ့ꩻကိုကွေး၊ ကွယ်ႏတွော့ꩻ ခွေတွမ်ႏနာꩻ ထေင်ညင်ꩻလို့ဝင်ꩻယို ထွူထွာတဝ်း၊ ခွေယင် နာꩻယင် နင်ႏခံꩻအောင်ႏယင် နီသဲင်ꩻလယ်ႏထေ့ သီဖါဖြား-ဖြားဒွန်းထျꩻနဝ်ꩻမ နာꩻခံႏထူႏသေꩻခါꩻဒါႏ ဒဿန အယူႏအတွေꩻဖုံႏယို ကုဲင်းထွာချာ ပွုံႏမန်ႏသနယ် ပါꩻယို" ကျောႏလေ ဒေါ့ꩻတထွူးပသာႏတဲင် ကျောႏခမ်းအောဝ်ႏဝါးကာꩻအယံတွင်ꩻ တရွူꩻယွယွနေး အကတူႏတွော့ꩻ- "နီဖါဖြား ဖြားဒွန်းနောဝ်ꩻ လိုꩻဖြားပွိုင်းလဲင်ႏ စခါတန်ဒျာႏ၊ တွမ်ႏနီခေတ်ထာꩻထီႏနောဝ်ꩻ ငမ်းသꩻဝွေꩻတထီႏထွꩻလွဉ်ꩻတောဝ်းဒျာႏ၊ နောဝ်ꩻထွူတကာႏတဝ်း နီဖါဖြားယို ခေတ်ပညာႏလိတ်လဲ့ တဒါႏတောဝ်းတွော့ꩻ မဉ်ႏသဲင်ꩻထေ့လဲ့ အလွိုးတထူꩻချာꩻတောဝ်းထမုဲင်ꩻမုဲင်ꩻဗာႏ ကျောႏလေ" ကျောႏလေ ထွားစဲင်းလွေꩻ ကျောႏခမ်းထွူနောဝ်ꩻ ထွားငါလွေꩻယင်း ဝေင်ꩻယင်းမာပင်တွော့ꩻ ဒေါ့ꩻဖေႏခန်းခမ်းကျောႏ- "ခမ်းကျောႏ ငါသူꩻတွိုႏသွူ 'ဝေင်ꩻယင်းမာပင် နီနွို့အံႏပသာႏဒွိုန်းက ဒဲဉ်ဟန်ႏနယ်ႏ၊ ဟို့ꩻခိုးငါႏလဲဉ်းခွေႏ၊ တွိုႏကောင်မꩻ ခွေတွမ်ႏနာꩻ အုံကွံသွုပ်ယင်းဝင်ꩻပါꩻယို" ခမ်းကျောႏလဲ့ ငေါက်ꩻပသာႏထွူ ကတူႏတွော့ꩻ- "အောဝ်ႏမွေးဒျာႏ ကျောႏလေ" ခမ်းကျောႏ ဝါးလွေꩻသွူကာꩻ ဒဲဉ်ဆဲင်ႏဆꩻငါ လွေꩻအုံလင်ꩻခန်းတထွောင်းထွူတွော့ꩻ အံႏအွꩻခန်းဒဲဉ် ဒေါ့ꩻရီချာငါယင်းလို့ဝင်ꩻ- "ခမ်းကျောႏ- နာꩻကရိုꩻဒါႏ သီဖါဖြား-ဖြားဒွန်းနဝ်ꩻ လိုꩻစခါဒျာႏ၊ ခေတ်ပညာႏလဲ့ ဒါႏတောဝ်း၊ သေတဝ်းထမုဲင်ꩻမုဲင်ꩻ နာꩻကရိုꩻဒါႏ ကာꩻလောင်းယိုဟွဉ်ႏနောဝ်ꩻ ခွေမဲဉ်ရီစံꩻ နာꩻတစိꩻ၊ နာꩻတွမ်ႏသီဖါဖြား အုံကွံဗာႏ တဲတဲဝါးဝါးလဲဉ်းဝင်ꩻနဲ့?" ခမ်းကျောႏ တရွူꩻယွယွကတူႏထွူနောဝ်ꩻ- "ခွေအုံကွံဗာႏတောဝ်း ကျောႏလေ၊ ကွယ်ႏတွော့ꩻ လိုꩻပွိုင်းလဲင်ႏနောဝ်ꩻ နာꩻအောဝ်ႏသေဒျာႏအတွိုင်ꩻ ဗဟုသုတဆေ့ꩻခြော၊ ထာꩻသေတရာꩻလဲ့ အဲဉ်ထဝ်းတွော့ꩻ ခွေချင်းဒေါ့ꩻလယ်ႏကွို့ꩻနုဲင်းနောဝ်ꩻဒျာႏ ကျောႏလေ" ကျောႏလေ တဗꩻပသာႏသာႏသွူ ခမ်းကျောႏပြေင်တွော့ꩻ ဒေါ့ꩻဖေႏ- "နာꩻထာꩻထီႏယို ထဲ့ဆုဲင်ꩻထိုꩻလဲဉ်း ခမ်းကျောႏ၊ သီဖါဖြားဒွန်းနောဝ်ꩻ ခွေအုံကွံဗာႏလဲဉ်း ခွိုင်းမုဲင်ꩻလဲင်ႏလဲင်ႏ၊ ဖြားဒွန်းခံႏထူႏချက်တွမ်ႏ ထာꩻထီႏနဝ်ꩻ ယံလဲဉ်းနီအာတန်၊ လိတ်လုဲင်ꩻဖဲ့ꩻ ခင်ႏမွဉ်အာႏဆေ့ꩻရိုꩻလဲ့ ဝွေꩻဖြား ကကာဗꩻလွဉ်ဒါႏ ပဒေႏသရာဇ်စနစ် လွိုဆန်ရေꩻတွမ်ႏ တွူႏတရန်ရေꩻကိုလဲ့နဝ်ꩻ၊ ဘဝအုံတဲင်ရေꩻအတာႏ တွမ်ႏမွိုးဖြားဒုတ် ဆွန်ꩻဝင်ꩻစူ ကမာꩻထူႏလွဉ်ဒါႏ နမ်းရေꩻနမ်းတာႏ တွူႏတရန်ရေꩻကိုလဲ့နဝ်ꩻ၊ ကပြောင်ꩻလုဲင်ႏလွဉ်ဒါႏ ခေတ်အဆက်ဆက်ကိုလဲ့နဝ်ꩻ ဖါဖြားဒွန်းကလꩻသေꩻခါꩻဒါႏ အခွဲအကျုံႏနဝ်ꩻ နီနာꩻဖုံႏ ဟဝ်နေးထူႏငါႏသနဲ့ပါꩻယို" ကျောႏလေ ငေါဝ်းသဲစ်သွတ်ꩻလဲ့ ခမ်းကျောႏရိုꩻဖေႏချာ- "နာꩻမဉ်ႏရိုꩻငါႏနုဲင်းနောဝ်ꩻလဲ့ နာꩻတွိုင်ႏပင်ႏစံꩻပါ နင်ႏခံꩻအောင်ႏလုဲင်း ပါꩻနောဝ်ꩻ၊ အဆင်ႏမဉ်ႏရော့ꩻနဝ်ꩻ ခွေတွမ်ႏနာꩻ သဲင်ꩻထင်ႏကောင် နီဖါဖြားထျꩻနယ်ႏ၊ ခွေတဲလဲ့ ခွေကခံႏထူႏသေꩻခါꩻ ဒဿနနောဝ်ꩻ ခွေသဲဉ်ꩻတဉ်ႏသေꩻခါꩻသေႏသေႏကွေး" ကျောႏလေ ရိုꩻဖေႏချာယင်း- "အောဝ်ႏမွေးဒျာႏ ခမ်းကျောႏ၊ အဆင်ႏဖေႏကရော့ꩻနောဝ်ꩻ မဲ့ꩻခွေစီႏစဲဉ်ႏဖေႏဒျာႏ၊ ဟို့ꩻတဲ့ကွို့ꩻလဲဉ်း သဲင်ꩻထင်ႏတွမ်ႏတောင်ႏကီꩻနယ်ႏ" အောဝ်ႏမန္တလေꩻကို ဖျော်သဲင်ꩻချာတောင်ႏကီꩻဝုဲင်ꩻနီသွံနီꩻ ကျောႏလေ သဲင်ꩻထင်ႏကောင်၊ မော့ꩻခွဲးခြိꩻတွမ်ႏ နင်ႏခံꩻအောင်ႏထွူတဲင် ကျောႏလေ ခမ်းကျောႏသီး သဲင်ꩻထင်ႏယင်းကောင်တလဲင်ႏတွော့ꩻ ဟဲ့ꩻမဝ်ꩻပါ နင်ႏခံꩻအောင်ႏ လွေꩻထေ့ယင်း ခမ်းကျောႏသီးဖါဖြား ဖြားဒွန်းထျꩻနဝ်ꩻသွူ၊ ဖြားဒွန်းတွမ်ႏမွိုးဖြားဒုတ် ဖါဖြားတိလွန်ꩻမွိုးဖြားခံꩻသီး အဝ်ႏအုံကွံအွꩻနေင်းအယံတွင်ꩻ ထဉ်ႏမွေဖုံႏဖျော်တဲင် ဖါဖြားဒွန်း ထွားစဲင်းလွေꩻ အပိုလီꩻဖုံႏတွော့ꩻ စွော့ꩻတက်လွေꩻ- "လွဉ်လွလုဲင်း၊ လွဉ်လွလုဲင်း ပိုလီꩻဖုံႏ၊ သီလွဉ်လယ်ႏထေ့ သီဖါဖြား+မွိုးဖြားသီးနဲ့ရိုꩻ၊ ဟောဝ်ငါႏဟောဝ်ငါႏ၊ ဖါဖြားသꩻရေꩻငါႏ၊ အုံလင်ꩻလွ ပငါပရာꩻလုဲင်း" လောကဝတ်အလꩻ စွော့ꩻတက်ပငါပရာꩻထွူနဝ်ꩻ ကျောႏလေ ခမ်းကျောႏ နင်ႏခံꩻအောင်ႏသီးလဲ့ ထေထန်ႏလွ တခြိုꩻလူႏဖုံႏတဲင် လူႏလွခန်း မွိုးဖြားဖါဖြားသီးနောဝ်ꩻသွူ။ ခမ်းကျောႏ လောဝ်းနယ်ခန်း အဖါဖြား- "ဖါဖြား နီဖါဖြားသီးစိုးပွိုင်းလဲင်ႏ ကတွူႏတရန်ဒါႏ ပဒေႏသရာဇ်စနစ်ယို ပွိုးနုဲင်းမုဲင်ꩻတွော့ꩻ တွူႏတရန်ဗာႏမားမေကာင်း ပိုလီꩻဖုံႏ မဲဉ်သေငါႏဩ" ဖြားဒွန်း အွꩻနေင်းထီတဝန်ႏထွူ ထွားလွေꩻထေ့ခန်း အသွꩻဖြားတိလွန်ꩻ၊ ဖြားတိလွန်ꩻ ဒေါ့ꩻဖေႏချာ- "ပိုလီꩻဖုံႏ မဲဉ်သေလွငါႏတဲင် ခြုဲင်းနယ်ခန်းနောဝ်ꩻမွိုင် ဖြားဒွန်း" ဖြားဒွန်းတဲ့ အွꩻလို့ခန်း အနေင်းထီကင်တွော့ꩻ ခြုဲင်းနယ်ယွယွသာႏသာႏခန်း- "အွို - မဉ်ႏဒေါ့ꩻဗာႏနောဝ်ꩻ အဆွာꩻပသာႏတန်က၊ နာႏခိꩻခိꩻလွဒျာႏလုဲင်း ပိုလီꩻဖုံႏနော----" "မွေးဩ-မွေးဩ ပွိုးစွဉ်ႏပဒေႏသရာဇ်စနစ် တွူႏတရန်ရေꩻယို ဟောဝ်သေထွိုက်ငါႏတွော့ꩻ နီဖါဖြားသီးတဲ့ ခြုဲင်းနယ်ဗဲင်း ပိုလီꩻသီးဖုံႏယိုဩ" ကျောႏလေ တောင်ꩻပြန်ႏယင်းတဲင် ဖါဖြားဒွန်းလဲ့ တဟေဖြောင်ပသာႏထာꩻထွူတွော့ꩻ ခြုဲင်းလွေꩻဖေႏခန်း- "အဟမ်း-အဟမ်း ပိုလီꩻသီးစိုးနဝ်ꩻ ပဒေႏသရာဇ်ယို ထမုဲင်ꩻ၊ ပဒေႏသရာဇ်ဖုံႏယို နီပအိုဝ်ႏလိုꩻမျိုꩻတွမ်ႏ ခမ်းရင်ꩻသားအလောင်း နိက်စက်တေက်ꩻနျꩻလွဉ်နုဲင်းမုဲင်ꩻကရိုꩻနဝ်ꩻ ပိုလီꩻသီးအီႏထွꩻပဲနဲ့၊ ပဲင်ႏဟံႏ၊ ပဲင်ႏနꩻ၊ ပဲင်ႏလိုꩻ စားနဝ်ꩻဖုံႏနဝ်ꩻ ဟဲ့ꩻဗာႏ"ပဒေႏသရာဇ်"သနဲ့၊ ဝွေꩻသီးဖြောင်းကို ကဒေါ့ꩻထန်ႏဒါႏငေါဝ်းမန်ႏသမျယို ထွာဥပဒေႏသနဲ့၊ မဉ်ႏဒေါ့ꩻဗာႏယင်း တနယ်ꩻနောဝ်ꩻ ဝွေꩻသီးဖုံႏယို ဟော်ခံꩻအပေႏစားဖုံႏလဲ့မွေးမွေးသနဲ့ ပိုလီꩻသီးဖုံႏဟွေး" သဲစ်ဖါဖြားဒွန်းငေါဝ်းကသွတ်ꩻတဲ့ အလီꩻပေႏ နဲစ်ရီသော့ꩻလွေꩻ အဖါဖြား- "နုဲင်းနောဝ်ꩻဟ မဉ်ႏမာꩻအမာႏဖုံႏ၊ အတမွေးတဝ်းဖုံႏနောဝ်ꩻ အီႏမာꩻနုဲင်းမုဲင်ꩻ ဖါဖြား?" ဖြားဒွန်း ထွားလွေꩻအလီꩻပေႏထွူတွော့ꩻ- "စောက်ꩻဖါးဖုံႏငေါဝ်းယို အမာႏခန်းလဲ့ မတ်ဗာႏအမဲဉ်ႏ၊ အမဲဉ်ႏခန်းတဲ့ မတ်ဗာႏအမဲဉ်ႏ၊ နီနာꩻလိုꩻထံꩻသာꩻဖုံႏ ဒေါ့ꩻဖြေႏသျင်ꩻခွင်ꩻ အဲဉ်ထောဝ်းထမုဲင်ꩻမုဲင်ꩻ" "အမာႏကရိုꩻနဝ်ꩻ နုဲင်းမုဲင်ꩻ? အမဲဉ်ႏကရိုꩻနဝ်ꩻလဲ့ နုဲင်းမုဲင်ꩻဟောင်း ဖါဖြားထီႏနုဲင်းမုဲင်ꩻဩ?" ဖါဖြားဒွန်း ထွားစဲင်းလွေꩻသွူ အလီꩻပေႏတွော့ꩻ- "ပိုလီꩻကရိုꩻဒါႏငေါဝ်းနောဝ်ꩻ ဟမ်းဆုံးယော့ပသာႏတန်ဒျာႏ၊ လိုꩻလောကကို အမာႏတရာꩻ အမဲဉ်ႏတရာꩻ အဝ်ႏနီမျိုꩻလွုမ်ꩻကရိုꩻနဝ်ꩻ ပိုလီꩻသီး အဝ်ႏသေထွꩻလို့ဒျာႏ စွုမ်ႏဖြာꩻဖြာꩻ၊ နီမဉ်ႏထီႏ အရောင်ႏဗွာနဝ်ꩻ ဒေါ့ꩻအရောင်ႏဗွာ၊ မဉ်ႏထီႏအရောင်ႏတနျာႏရိုꩻလဲ့ ဒေါ့ꩻအရောင်ႏတနျာႏ၊ မဉ်ႏထီႏအရောင်ႏဖြေင်းလဲ့ ရိုꩻအရောင်ႏဖြေင်းစားနောဝ်ꩻဖုံႏနောဝ်ꩻ ဟဲ့ꩻအမဲဉ်ႏတရာꩻဖုံႏသွူနဲ့ ပိုလီꩻ" "နီဖါဖြားသီးထာꩻထီႏနောဝ်ꩻ ပိုလီꩻသီးသꩻဝင်ႏစာꩻငါႏ ထွူတကာႏတောဝ်း ထွာအီစွဉ်ႏဘဝသွဉ်ခန်ꩻတွော့ꩻ ဒေါ့ꩻခြုဲင်းသွုပ်ဖေႏယင်း ပိုလီꩻသီးယိုဩ" ခွန်ကျောႏလေ တောင်ꩻပြန်ႏထဲင်းနုဲင်းနောဝ်ꩻတဲင် ဖါဖြားဒွန်းတဲ့ အွꩻယင်းနေင်းထီတဝန်ႏထွူနောဝ်ꩻ ဒေါ့ꩻသွုပ်လွေꩻဖေႏယင်း- "ဟောဝ်သွူ ပိုလီꩻသီးဖုံႏ၊ မဉ်ႏဒေါ့ꩻဗာႏတနယ်ꩻနောဝ်ꩻ အမန်ႏတရာꩻယို နဲင်ႏငံႏရေꩻ၊ ဟံႏတန်ပထဝီႏ၊ လိုꩻပုဂ္ဂိုလ်ႏကစဒါႏ အကူအနားအဲဉ်ထောဝ်း-ပါတောဝ်း၊ လွိုပိုႏထဲင်း ယွမ်ꩻလင်ꩻဆေ့ꩻထိုꩻ၊ အလဲဉ်းတရွို့ꩻထိုꩻ၊ အကဲင်အဆာအောဝ်ႏထိုꩻ၊ တဗော့ꩻလဲ့ꩻထိုꩻကစဒါႏဖုံႏလဲ့ အဲဉ်ထဝ်း၊ နေးထူႏဂုဏ်ႏပကာႏသနတွော့ꩻ တဲမ်းနေးအလုဲင်ꩻတရေꩻရေꩻနုဲင်းနောဝ်ꩻလဲ့ ပါတောဝ်းသနဲ့ ပိုလီꩻ၊ ဗုဒ္ဓဒဿနအယူႏအတွေꩻနောဝ်ꩻ သစ္စာႏဉာဏ်ႏ ကဗွောင်အီဒါႏ အမန်ႏတရာꩻဖုံႏလွဉ်းလွဉ်းသနဲ့ ပိုလီꩻသီးဖုံႏ" "အူးလူလူ နီဖါဖြားထာꩻထီႏနောဝ်ꩻ ဆုံးယော့ထဲင်းဒွိုန်းက ခေတ်ပညာႏသားဖုံႏ အယူႏအတွေꩻကနော၊ ခွေသွဉ်းလဲ့ နာႏဟွိုန်ဗာႏ နီဖါဖြားဩဝါဒတွော့ꩻ ထာꩻထီႏပနဲးသျင်ꩻလွဉ်လဲဉ်းဩ" ခမ်းကျောႏ အံႏဖြာႏအဖါဖြားအယံတွင်ꩻ ကျောႏလေထွားလွေꩻ ခမ်းကျောႏတွော့ꩻ ဝွေါက်ꩻနယ်နေးအကာႏတဲင် သဘော်ꩻနောဝ်ꩻ နာꩻသေလဲဉ်းနဲ့ နုဲင်းနောဝ်ꩻသွူ။ အယံတွင်ꩻကို အဖါဖြား ဒေါ့ꩻသွုပ်လွေꩻယင်း- "လိုꩻသီးယို အုံတဖြာꩻလွုမ်ꩻ တလꩻတောဝ်း၊ တဒါႏတောဝ်း၊ အုံနေးအစွိုꩻအဗူႏ ကရိုꩻလဲ့ အုံဗာႏနေး နီစွိုးခွိုꩻချင်ꩻချင်ꩻ အုံညီꩻလို့ဝင်ꩻမꩻ ဘဝအာႏမခံႏချက်အောဝ်ႏ၊ သဘော်ꩻနောဝ်ꩻ ဖဗာႏတောဝ်းအဖုံႏ၊ မဉ်ႏဖအဖုံႏနောဝ်ꩻ ကေအဲင်ႏဒါႏသနဲ့၊ နီလိုꩻနောဝ်ꩻ နီရက်ချာဗာႏ၊ နီစွိုးခွိုꩻယေန်ႏငဲထွုံꩻစံႏဓလေ့ꩻယို နီနေးထူႏထိန်ꩻသိမ်ꩻဗာႏ စွုမ်ႏဖြာꩻဖြာꩻ၊ မဉ်ႏနေးထူႏတောဝ်းနောဝ်ꩻ လိုꩻမျိုꩻထိုꩻမားဒါႏ၊ နီနမ်းယိုလဲ့ နီအာႏမခံႏချက်အဲဉ်ထဝ်း၊ ဖေႏကထွားထိန်ꩻချာ နီလိုꩻမျိုꩻ နီစွိုးခွိုꩻနောဝ်ꩻ ပိုလီꩻသီးတာႏဝွန်ႏအဝ်ႏလွဝင်ꩻ ပငါပရာꩻသွူနဲ့ ပိုလီꩻသီးဖုံႏဟွေး" ကျောႏလေ ရီလွေꩻယင်း- "အမဲဉ်ႏတွမ်ႏအမာႏလဲ့သင် ဖေႏကထွာချာ နီစွိုးခွိုꩻနုဲင်းနောဝ်ꩻလဲ့သင် ပိုလီꩻသီး ဖြောင်ဒေါင်လဲဉ်း၊ ခြုဲင်းနယ်ဖေႏယင်း တွူႏတရန်အီ ပဒေႏသရာဇ်ခရာႏမွိုင် ဖါဖြား" ယံတွင်ꩻကာႏလ ခမ်းကျောႏသီးမွိုးဖါ စင်ꩻဖါဆန်ꩻ+စင်ꩻမွိုးလာႏ နင်ႏခံꩻအောင်ႏသီးမွိုးဖါ စင်ꩻဖါဗွော+စင်ꩻမွိုးမိသီးလဲ့ ဖျော်လွဉ်ယင်းတဲင် လိုꩻကွိုန်ꩻပသာႏတန်ဒျာႏ၊ စင်ꩻဖါဗွောသီးတမာဝါꩻတွမ်ႏ စင်ꩻဖါဆန်ꩻသီးတမာဝါꩻလဲ့ ဟွိုန်လျုꩻလွလဲဉ်း ဖြားဒွန်းဩဝါဒတွော့ꩻ ဝွေꩻသီးမဲ့ငါလောင်ႏလွိုး ဒေါႏသမာႏနဖုံႏ ပနဲစင်လွလဲဉ်းကရိုꩻနဝ်ꩻ ခွန်ကျောႏလေ အဝ်ႏရိက္ခေႏလꩻလဲဉ်း ဝွေꩻသꩻရေꩻတေ့ꩻလဲဉ်းဒျာႏရင်ꩻရင်ꩻနဝ်ꩻသွူ။ ခွန်ကျောႏလေ တောင်ꩻပြန်ႏသမ်းယင်းနောဝ်ꩻမꩻ ဖြားဒွန်းလဲ့ ခြုဲင်းနယ်ဖေႏယင်း ပဒေႏသရာဇ် တွူႏတရန်ရေꩻခရာႏနောဝ်ꩻသွူ။ အခိန်ႏနောဝ်ꩻ ပဒေႏသရာဇ်ဖုံႏ အာႏတလာတွင်ꩻ ဖြောဝ်ꩻခမ်းအခေါဝ်နဝ်ကို ကအောဝ်ႏဒါႏ ပအိုဝ်ႏခမ်းရင်ꩻသားဖုံႏ အပါႏအဝင်ႏ ဖူးဝေးဖြောဝ်ꩻ၊ ဓနု၊ တောင်ႏရွိုꩻ၊ ပလောင်းလိုꩻမျိုꩻဖုံႏနဝ်ꩻ အဝ်ႏခမ်ႏစာꩻဗာႏ ပဒေႏသရာဇ်စောက်ꩻဖါးသီး နိက်စက်တေက်ꩻနျꩻမုꩻဖုံႏနောဝ်ꩻသွူ။ မုဲင်းကောင်ခြောင်ႏ၊ ဒုံလုံးဒွီႏကို ကအဝ်ႏအုံဒါႏ ခွန်ဒွန်းတွမ်ႏ ခွန်တိလွန်ꩻသီးနဝ်ꩻလဲ့ အဝ်ႏခမ်ႏစာꩻဗာႏနုဲင်းနုဲင်း ပဒေႏသရာဇ်စောက်ꩻဖါးဖုံႏ တေက်ꩻနျꩻမုꩻနဝ်ꩻသွူ။ တနေင်ႏတလဲင်ႏ သေင်ႏလာႏတဆုံꩻနဝ်ꩻ ဖေႏဗာႏခွဉ်ႏတောႏ(၂)ပဲက်၊ မောက်ကြင်ꩻမွူးတမွူးနဝ်ꩻ (၁)ပဲက်၊ ထော့ꩻတဗာႏနဝ်ꩻ ဖေႏဗာႏ(၁)မတ်၊ ဖိုးတဗာႏနဝ်ꩻ (၃)ပယ်ꩻ၊ သေတဗာႏနဝ်ꩻ (၃)ပယ်ꩻထွူတကာႏတဝ်း သဿမေဓ-ကရိုꩻဒါႏ လိုꩻခွဉ်ႏနဝ်ꩻလဲ့ ဖေႏဗာႏခေါ်ခေါ်ဒွိုန်းကနဝ်ꩻသွူ။ အွဉ်ႏနယ်နေး အကျောင်ꩻခရာႏအမျိုꩻမျိုꩻတဲင် မာꩻဖေႏဘုရာꩻပွယ်ꩻတွော့ꩻ ဗွောင်ပါထာꩻတောႏကုတ်ကိတ် ထာꩻသား(၃၆)ဗာႏတွမ်ႏ ဖုဲင်းအမျိုꩻမျိုꩻဖုံႏ၊ တဖဲ့ꩻကို ဆို့ꩻယာလံတွမ်ႏ ဖြေꩻစာကူꩻကားဖုံႏနဝ်ꩻလဲ့သင်၊ ဒွိုႏဒေါဝ်ဖြေꩻစာကူꩻကားနဝ်ꩻလဲ့သင်၊ ဖေႏဒါႏငါ အခွဉ်ႏတောႏငါ ပါꩻမုဲင်ꩻတရိုꩻတဝ်း ကမ်းသꩻဒွိုႏစာဆို့ꩻရုဲင်ꩻ ဖြေꩻစာနွောင်ꩻဒျာႏရိုꩻနုဲင်းနဝ်ꩻတဲင် ပအိုဝ်ႏခမ်းရင်ꩻသားဖုံႏနဝ်ꩻ ထွာသေႏသေႏစွဉ်ႏဒျာႏ ပဒေႏသရာဇ်သွဉ်းသယ်ႏဘဝနဝ်ꩻသွူ။ တနီꩻနောဝ်ꩻ- "နာႏနာႏလွလုဲင်း လိုꩻဒုံလိုꩻဆောင်ႏသီးဖုံႏဟွေး- မွူးရဝ်ꩻနီꩻယို နီဗွေႏစောက်ꩻဖါး နမ်းကိုယ်ႏတောႏတွမ်ႏ စဲ့ꩻရေꩻတောႏတန်၊ ကိုယ်ႏရံႏတောႏတန်၊ ဟေင်ဖုံႏတဲင် အီႏကျွꩻဖျော်တွိုႏလွဉ် နီသွဉ်းသီးရပ်ကိုတဲ့ဩ၊ လိုꩻမူႏယွဲ ခိုဗင်ႏယွဲ လွိုက်ရွေꩻနေးဖုံႏနဝ်ꩻလဲ့ ယံကမာꩻဖေႏဗာႏ ဗွေႏစောက်ꩻဖါးဝွတ်ပတ်ဖုံႏတဲ့ဩ၊ အဆုဲင်ꩻသွတ်ꩻ တချက်နဝ်ꩻ လိုꩻဖြားအမူႏတရိုꩻတဝ်း၊ အခိုတရိုꩻတဝ်း ဖေႏကထမ်ႏဗာႏ လိုꩻဖြားခွဉ်ႏ တဖြာꩻ ၂ိ-၈ဲ၊ လိုꩻရွယ်ႏမဲဉ်ႏ လွုပ်ꩻမာꩻဒါႏသားဖုံႏနဝ်ꩻလဲ့ ဖေႏကထမ်ႏဗာႏ အခွဉ်ႏတောႏ တဖြာꩻ ၂ိ-၈ဲဖုံႏနောဝ်ꩻ ဖေႏကလွဉ်ဆောင်ႏဗာႏ စာႏရေꩻတန်ထျꩻတဲ့ ဗွေႏသီးဩ၊ ဟေင်-ဖြားသူရိန္တအမိန်းတောႏ" နုဲင်းမွူးရောဝ်ꩻ- "ဟွူး- အီႏမာꩻဗာႏနုဲင်းမုဲင်ꩻ တိလွန်ꩻ၊ နီလမ်းနဝ်ꩻ ထုမ်ႏတနီꩻ အံႏတနီꩻ၊ အီႏဖေႏထွူဗာႏ ခိုဗင်ႏခွဉ်ႏ ၂ိ-၈ဲနောဝ်ꩻ မာꩻနုဲင်းမုဲင်ꩻ၊ ခွေတဲလဲ့ ယူႏတဖြောင်တဝ်းခွေႏ၊ ယပ်ꩻသꩻမွေးစွဉ်ႏ ပါꩻယို" "ခွေတဲ့ နုဲင်းနောဝ်ꩻနေနေ ခွန်ဒွန်း၊ ခွေတွမ်ႏနာꩻယို တပုဲင်းပွိုင်းကွာႏတဝ်း မွေးတဝ်းနဲ့၊ နာꩻဝင်ꩻမူႏ နင်ꩻမုတ်ထျꩻနဝ်ꩻ ကုဲင်းအဝ်ႏဒါႏ၊ ဝွေꩻသီးမွိုးဖါနဝ်ꩻ ခြံတဲ့အဝ်ႏ၊ လုဲင်းတဲ့အဝ်ႏ၊ ဖိုးဒင်ႏလဲ့အဝ်ႏ၊ နေႏရာႏ ရွဉ်စွဲရွဉ်ခန်ပေႏနဝ်ꩻ အီႏအဝ်ႏဒါႏနေနေ" "မွိုးတွိုႏနာꩻကား ကွီနေးနင်ႏရွဉ်နဲ့ တိလွန်ꩻ" "အွူ- ခွေရေႏသေꩻနုဲင်းနောဝ်ꩻ" ခွန်ဒွန်းတွမ်ႏ ခွန်တိလွန်ꩻ အောဝ်ႏဒေါ့ꩻရီလို့တင်ꩻအယံတွင်ꩻ ခိုဗင်ႏတန် ခွန်ကျောႏတွမ်ႏ အသွꩻတိမောင်ဖျော်လွဉ်တွော့ꩻ နဲစ်ဒေါ့ꩻဖေႏ ဝွေꩻသီး- "တိလွန်ꩻ တိလွန်ꩻ တိလွန်ꩻအဝ်ႏနေဟောင်း?" တိလွန်ꩻလဲ့ ထွားငါလွေꩻ ထီႏတောတကျောႏတဲင် လင်ꩻနေးတစန်ꩻလောင်းတွော့ꩻ ခြောဝ်လွေꩻ- "ထာꩻမုဲင်ꩻဟောင်း တကျောႏ၊ ခွေအောဝ်ႏဒျာႏယို၊ ထင်ႏလွဉ်ယိုဟုဲင်း၊ ခွန်ဒွန်းလဲ့ အောဝ်ႏနီလမ်းကို" တကျောႏသီး ထင်ႏလွဉ်လမ်းကီတဲင် နဲစ်ခြုဲင်းနယ်ခန်း- "ယို-ယို ခွန်ဒွန်း၊ တိလွန်ꩻ နင်ႏမုတ်တွမ်ႏနင်ႏရွဉ်နဝ်ꩻ စောက်ꩻဖါးထွားရော့ꩻမဲ့ငါႏတွော့ꩻ မဲဉ်ခီႏမျောက်ငါႏ မိဖုရာꩻပေႏအရန်းနဝ်ꩻမꩻ အဝ်ႏဟေင်ဖြား သူရိန္တိတွီးတရန်း ဖေႏကကွီလွေꩻဖေႏဗာႏ နင်ႏမုတ်သီး နင်ႏရွဉ်သီး မွိုးဖါထျꩻတဲ့ ခွေဟွိုန်ထွꩻနုဲင်းနဝ်ꩻတွော့ꩻ ခွေလွဉ်ဒေါ့ꩻနယ်သီ နုဲင်းယိုသွူနယ်" "တိလွန်ꩻ အီႏမာꩻဗာႏနုဲင်းမုဲင်ꩻဟောင်း?၊ စောက်ꩻဖါးမွယို လွဉ်ကွီထူႏတညီႏတငါ လိုꩻမူႏနီဒုံနဝ်ꩻ နာꩻမွိုး" တိလွန်ꩻ ယူႏယူႏကဉ်ꩻစာꩻထွူတွော့ꩻ ရီလွေꩻတကျောႏ- "ကျောႏ- နင်ႏမုတ်သီး နင်ႏရွဉ်သီး ယိုခါ အောဝ်ႏအွိုးမုဲင်ꩻကိုဟောင်း? ဒေါ့ꩻမွိုင်မွိုင် ပါꩻနောဝ်ꩻ" "နင်ႏမုတ်တွမ်ႏနင်ႏရွဉ်သီးနဝ်ꩻ ယိုခါခါ အဝ်ႏအွိုးမဏ္ဍပ်ကို ဒုံကဲန်သူꩻ၊ အဝ်ႏဝွတ်ပတ်ဖေႏ စောက်ꩻဖါးတဲ့၊ ဝွေꩻသီးတဲ့ အဝ်ႏဟွိုန်ထွꩻပါ အခရာႏနဝ်ꩻမꩻ အောဝ်ႏငွိုးလွဒျာႏ ပငါပရာꩻသူꩻ၊ စောက်ꩻဖါးရိုꩻဖေႏ ဟေင်ဖြား-ဖေႏကဒေါ့ꩻဖြောင်ပါ ပါꩻမူႏမွိုးဖါဖုံႏနဝ်ꩻ 'မဲဉ်လꩻရွဉ်ခံꩻနဲ့ မဲဉ်လꩻနꩻနဲ့'တဲ့ရိုꩻ" ခွန်ဒွန်းတသွေႏလွေꩻထေ့ တိလွန်ꩻ၊ ဒေါ့ꩻတေ့ꩻတေ့ꩻဖေႏ အနာႏထျꩻ ပနဲညထွူမꩻ တိလွန်ꩻငေါက်ꩻကတူႏ ခွယ်ႏထေ့ချာ တကျောႏတွော့ꩻ ဒေါ့ꩻဖေႏပါ- "ကျောႏ- နာꩻတွမ်ႏတိမောင်ႏ သဲင်ꩻထေ့ချာမွိုင်မွိုင် နင်ႏမုတ်တွမ်ႏနင်ႏရွဉ်သီးထျꩻ ဒေါ့ꩻတေ့ꩻတေ့ꩻဖေႏပါဝွေꩻသီး နုဲင်းယို-----နေား" ခွန်ကျောႏသီးလဲ့ နဲစ်လောႏသဲင်ꩻထေ့ခန်း နင်ႏမုတ်တွမ်ႏနင်ႏရွဉ်သီးထျꩻ ဒေါ့ꩻတေ့ꩻနယ်ခန်း---နုဲင်းနဝ်ꩻသွူ။ ခွန်ဒွန်းတွမ်ႏ တိလွန်ꩻသီးဝင်ꩻနီနဝ်ꩻ ဟဲ့ꩻသဲင်ꩻတူႏတူႏတေ့ꩻတေ့ꩻနေး နင်ႏမုတ်တွမ်ႏနင်ႏရွဉ်သီးတဲင် အွဉ်ႏလွေꩻအုံဒုံကောင်ဟေ့ꩻ တခြာတန်ကိုသွူ။ နင်ႏမုတ်တွမ်ႏနင်ႏရွဉ်သီး လွင်းသဲင်ꩻထိုꩻတဲင် စောက်ꩻဖါးဟဲ့ꩻတွမ်ႏလိုꩻဒုံလိုꩻဆောင်ႏဖုံႏ လယ်ႏထုမ်ႏသောက်ထွားဆောင်ႏခြာ၊ ထုမ်ႏသောက်ပါဗော့ꩻရာꩻဒုံဆောင်ႏဖုံႏလဲ့ မော့ꩻတဝ်းဒျာႏ၊ ကွပ်နောဝ်ꩻမꩻ ဒုံလုံးဒွီႏကိုကအောဝ်ႏဒါႏ ခိုဗင်ႏယွဲမူႏနံꩻယွဲ အဖြာꩻပေါင်ꩻလစ်ꩻဆီလွိုယို လွေꩻဖျိုးသုတ်သင်ႏဖေႏဗာႏ စောက်ꩻဖါးဟော်လောင်းတွမ်ႏ ရေႏအိန်ႏဖုံႏ၊ ပဆျူႏဖေႏဗာႏ စောက်ꩻဖါးမိဖုရာꩻတွမ်ႏ အပိုအလီꩻခွမ်ꩻလာꩻဖုံႏနဝ်ꩻသွူ။ "ခွန်ဒွန်းတွမ်ႏ တိလွန်ꩻနဝ်ꩻလဲ့ မော့ꩻမုဲင်ꩻကို ခꩻသီမုဲင်ꩻကိုအကျောင်ꩻ"စောက်ꩻဖါးကေႏညာႏသေꩻနုဲင်းနောဝ်ꩻသွူ။ ခွန်ဒွန်းတွမ်ႏနင်ႏမုတ်၊ တိလွန်ꩻတွမ်ႏနင်ႏရွဉ်သီးကရိုꩻလဲ့ ထွာဝင်ꩻမူႏဝင်ꩻခိုဖုံႏဒျာႏနောဝ်ꩻမꩻ ဝွေꩻသီးဖုံႏယို ရေႏတဲႏဆို့ꩻဘဝတသာ နုဲင်းနဝ်ꩻဖုံႏဒျာႏသွူ၊ စောက်ꩻဖါးတွမ်ႏဒုံလုံးဒွီႏ ထွာထွူပျဿနာႏ နွတ်ꩻသွစ်ꩻလာရပ် ခိုဗင်ႏတန် ခွန်ကျောႏတွမ်ႏ အသွꩻတိမောင်ႏသီး ဖျော်လွဉ်ထေ့ တိလွန်ꩻ-ခွန်ဒွန်းသီးထျꩻတဲင် ခွန်ကျောႏရိုꩻဖေႏဝွေꩻသီး- "သီဟွိုန်လဲဉ်းသတင်ꩻနဲ့ ပါꩻစားနောဝ်ꩻ" ခွန်ဒွန်းရီချာ- "သတင်ꩻတမုဲင်ꩻ ခွန်ကျောႏ၊ ကဉ်းဒေါ့ꩻစံꩻမွိုင်" "အောဝ်ႏလွယ်ပွတ်ꩻဆꩻကွဉ်ႏ ထီတကောင်ဒုံကို ပအိုဝ်ႏလိုꩻတန်ဖုံႏ အုံကွံလို့ဝင်ꩻထွူတွော့ꩻ အဝ်ႏတွူႏတရန်ချာလဲဉ်း စောက်ꩻဖါးဖုံႏတဲ့ရိုႏ" ခွန်ဒွန်းရိုꩻချာ- "နုဲင်းနောဝ်ꩻနဲ့ တကျောႏ၊ ပေါႏနောဝ်ꩻတဲ့ နီလွေꩻနွို့နုဲင်းနုဲင်းတွမ် တွူႏတရန်ရေꩻအစွိုꩻကိုနယ်ႏ တိလွန်ꩻ၊ ခွေမဲဉ်နက်သန်ငါႏလဲဉ်း---" တိလွန်ꩻတခုဲင်ႏဒေါ့ꩻချာတဝ်း ထမုဲင်ꩻမုဲင်ꩻအယံတွင်ꩻ ခွန်ကျောႏတွမ်ႏတိမောင်ႏသီး နဲစ်ဒေါ့ꩻလွေꩻ- "ခွေယင်ကယ်ႏ အီႏလွေꩻ၊ ခွေလဲ့အီႏလွေꩻ၊ မဉ်နက်ငါႏလဲဉ်း စောက်ꩻဖါးဖုံႏကွေး---" နောဝ်ꩻမꩻ ခွန်ဒွန်း'တိလွန်ꩻ'တကျောႏ'တမောင်ႏသီး ထန်ႏလွေꩻခန်း တဖူꩻလွတ်ပွတ်ꩻဖဲ့ꩻနောဝ်ꩻသွူ၊ ပဒေႏသရာဇ် တွူႏတရန်ရေꩻယို ရုဲင်ꩻတသွိုးကွဲသန်သန်လွဉ် စောက်ꩻဖါးသီးလဲ့ နေးတွမ်ႏဝွေꩻသီးစဲ့ꩻလဲဗီးဖုံႏတဲင် လယ်ႏထုမ်ႏတခြာသားဖုံႏနောဝ်ꩻသွူ၊ ကွပ်တွူႏတရန်ရေꩻသားဖုံႏ ရုဲင်ꩻတသွိုးသန်လွဉ်နောဝ်ꩻမꩻ စောက်ꩻဖါးတွမ်ႏပိုမာဖုံႏ၊ ဖူးဝေးစွိုးခွိုꩻ အပိုအလီꩻဖုံႏ ကားကအောဝ်ႏနောဝ်ꩻ လွင်းအုံသော့ꩻဗာႏ ဝေင်ꩻတန်ကိုဖုံႏနောဝ်ꩻသွူ။ ကတွူႏတရန် ပဒေႏသရာဇ်ယို ဗွေႏရဟန်ꩻသံႏဃာႏသီးလဲ့ ပါသော့ꩻလွဉ်နောဝ်ꩻသွူ။ ဝေင်ꩻနယ်ႏတောင်ႏကီꩻကို ကျောင်ꩻတန်နောင်ကာꩻ၊ နောင်ပစ်ꩻ၊ ထမ်းဘုရာꩻ၊ လွယ်ကောင်ꩻ၊ ဖုဲင်မွန်း၊ ကျောက်လွုံꩻ၊ နောင်ဟဲင်းတန်ကစဒါႏ ဆရာႏတောႏတန်ဖုံႏ ပါလွဉ်လွဒျာႏနောဝ်ꩻသွူ။ နယ်ႏဟိုပုံꩻကိုလဲ့ ဆရာႏတောႏကျောက်တန်ꩻ၊ ကျောင်ꩻလွယ်၊ နယ်ႏသီႏသဲင်ႏကိုလဲ့ ဆရာႏတောႏလွယ်ပွတ်ꩻ၊ မုဲင်းကောင်ဖဲ့ꩻသူꩻလဲ့ ဆရာႏတောႏဒုံလီꩻကောင်၊ စငေါဝ်ꩻ၊ ဒုံလီꩻတန်တွမ်ႏ လွယ်လဲမ်ဖဲ့ꩻသူꩻလဲ့ ဆရာႏတောႏဟွေးဟွမ်းသီးဖုံႏယို ပါသော့ꩻလွဉ် ပဒေႏသရာဇ်စနစ် လွိုဆန်ရေꩻတွိုက်ꩻပွယ်ꩻကိုနောဝ်ꩻသွူ။ "နာꩻကဟွိုန်သတင်ꩻနဝ်ꩻ မွေးနေဟောင်း တိလွန်ꩻ?" "မွေးဒျာႏ ခွန်ဒွန်း၊ ဆရာႏကျောႏတွမ်ႏ တိမောင်ႏသီးနဝ်ꩻ စဲ့ꩻလဲဗီးဖုံႏဆွမ်ꩻလꩻတွော့ꩻ တဒွေါ့ꩻကတူႏ အွဉ်ႏဟွဲးနေး ဆေꩻနမ်းခုတ်ကိုတဲ့ရိုႏ၊ ပါꩻလင်ꩻဆေꩻ မဟာနီꩻ သဲင်ꩻဒေါ့ꩻလွ ပငါပရာꩻ၊ တိမောင်ႏတွမ်ႏ ဆရာႏကျောႏသီးမွိုးဖါဖုံႏ၊ ဖူးဝေးစွိုးခွိုꩻဖုံႏလဲ့ ဆွမ်ꩻသော့ꩻလို့လဲဉ်းထောင်ႏကို၊ ယိုခါအဝ်ႏထောင်ႏဟိုပုံꩻကို ခွေလꩻလဲဉ်းသတင်ꩻပါꩻယို" "တက်"ခွန်ဒွန်း တဒက်သန်နေး၊ အဲင်ႏကာႏခြွုတ်ပါတငါတွော့ꩻ- "မွူးရောဝ်ꩻနီယိုမꩻ သီအီႏသေတခြာသားဖုံႏ ရွယ်ꩻမွူးကွေး"ပိုလ်ႏတန်ခွန်ဒွန်း သꩻလျားမရေႏမရာႏထာꩻတွော့ꩻ ဒိုႏလွေꩻပါစောက်ꩻဖါးသီးနုဲင်းနောဝ်ꩻသွူ။ နုဲင်းမွူးရောဝ်ꩻယာ- "အွိုင်ႏ - ဒင်ႏ - ဒင်ႏ - ဒျက် - အွိုင်း - ဒျက်-ဒျက် ထင်ႏငါလုဲင်း လိုꩻခိုပေႏ၊ ငမ်းမွိုးထာꩻမုဲင်ꩻမုဲင်ꩻ ဒွိုင်း - ဒျင်း - ဒျင်း - ဒက် - ဒက် ဆရာႏအောင်ႏတပ်စွိုꩻ၊ ထင်ႏငါငါ ပွေါဆွုမ်ႏစဲ့ꩻစောက်ꩻဖါး အကူႏအညီႏလုဲင်း၊ ဒင်း - ဒင်း - အွိုင်း - ဒျက် - ဒျက် ဆရာႏလွန်းပေႏ ထင်ႏညီႏငါမွိုန်းလုဲင်း၊ ပွေါဒွိုန်းဆꩻချာသားလုဲင်း၊ အယံတွင်ꩻ ဖေႏကကယ်ႏလꩻအီ ဆရာႏလွန်းပေႏတွဗာ့ꩻ ပိုလ်ႏတန်ခွန်ဒွန်း လောႏထင်ႏငါလွေꩻ ဒင်း - ဒင်း - ဒျက် - ဒျက် - အား။ ပိုလ်ႏတန်တိလွန်း ဟဲ့ꩻထူႏဆရာႏအောင်ႏတပ်စွိုꩻ တွမ်ႏဆရာႏတွန်ခွန်မတ်တပ်စွိုꩻတဲင် ဒေါ့ꩻဖေႏ- "ဆရာႏအောင်ႏ- တပ်စွိုꩻလွေꩻကယ်ႏထူႏလွဉ် ပိုလ်ႏတန်ခွန်ဒွန်းတွမ်ႏ ဆရာႏလွန်းပေႏလုဲင်း၊ ဆရာႏတန် ခွန်မတ်စွိုꩻနောဝ်ꩻ လွေꩻထူႏသိမ်ꩻပါꩻကာꩻ၊ ကာꩻကိုကအဝ်ႏဒါႏ စဲ့ꩻရွိုးဖုံႏကားကအောဝ်ႏ ဆွမ်ꩻထူႏလွဉ်ထေ့ဗာႏခွေထျꩻ၊ မာꩻဆာဗာႏတဝ်းတစိꩻစိꩻနော၊ လိုႏဒေါ့ꩻထဲင်းအဝ်ႏနေ" ဆရာႏတန် ခွန်မတ်တွမ်ႏ ဆရာႏအောင်ႏသီး လောဝ်းချာ- "အဲဉ်ထောဝ်း" ပိုလ်ႏတိလွန်ꩻရိုꩻချာဖေႏ- "ပေါႏနောဝ်ꩻတဲ့ အမိန့်အတွိုင်ꩻ ဖေႏကမာꩻထူႏတလဲင်ႏချင်ႏ" "မွေးဩ" တွိုက်ꩻပွယ်ꩻထွာ ဟိုပုံꩻဆꩻနောဝ် ဟုဲင်းလုံရပ်ကိုနောဝ်ꩻ လဲင်ꩻညစွဉ်ႏ တနားရီႏခွယ်ꩻရပ်ထွူနောဝ်ꩻမꩻ ဆရာႏတန်ခွန်မတ်တွမ်ႏ ဆရာႏအောင်ႏသီးဖျော်ချာ၊ ဆရာႏတန်ခွန်မတ် ပသာရီးသတင်ꩻ- "ပိုလ်ႏတန်ဩ- ကာꩻနောဝ်ꩻ စောက်ꩻဖါးဟိုပုံꩻကာꩻဒျာႏ၊ စောက်ꩻဖါးတွမ်ႏကာꩻနောဝ်ꩻ မေႏခိုးထိုꩻလဲဉ်း၊ ဆွမ်ꩻလꩻစဲ့ꩻရွိုးငတ်ꩻဖြာꩻ၊ ရန်ႏသူႏဖဲ့ꩻ ထဲ့သီလစ်ꩻဖြာꩻဩ"ဆရာႏတန် ခွန်မတ်ထွူနောဝ်ꩻ ဆရာႏအောင်ႏ သွုပ်ပသာလွေꩻယင်းသတင်ꩻ- "နီသွဉ်းသီးဖဲ့ꩻ ဆရာႏလွန်းပေႏနောဝ်ꩻ ခမ်းထီတွမ်ႏ လိုꩻမျိုꩻတွက်တာႏ ထဲ့သွုမ်ꩻထိုꩻလဲဉ်း---၊ ပိုလ်ႏတန်ခွန်ဒွန်းနောဝ်ꩻ ခင်ႏအပင်စေႏထို့ထိုꩻ--နောဝ်ꩻလွုမ်ꩻ"ပိုလ်ႏတိလွန်ꩻဖေႏအမိန့်- "လိုꩻဆာနောဝ်ꩻ ပသာလွေꩻတသီႏယုံႏ လဲင်ႏဆလသူꩻ၊ ထွူနောဝ်ꩻ ပသာသတင်ꩻဗဟိုႏကို၊ ဆရာႏလွန်းပေႏနောဝ်ꩻ သဲင်ꩻသင်္ဂျိုဟ်ႏဗာႏ ကောင်လောင်းကီကွဉ်ႏတဲင် ကအောဝ်ႏကုဲင်ဒါႏတပ်စွိုꩻနောဝ်ꩻ သဲင်ꩻလွဉ်ꩻခွေ၊ ငေါဝ်းထာꩻခေ့ꩻ "အောင်ႏပွယ်ꩻ"လိုႏဒေါ့ꩻထဲင်းအောဝ်ႏနေ" တပ်စွိုꩻသားရိုꩻ- "အဲဉ်ထောဝ်း" ကွပ်ပွိုးပဒေႏသရာဇ် တွူႏတရန်ရေꩻသားဖုံႏ နွို့လွဉ်တွိုက်ꩻပွယ်ꩻတဲင် ဖြောဝ်ꩻခမ်းအခေါဝ်နောဝ် လွယ်လဲမ်ခရဲင်ႏတွမ်ႏ တောင်ႏကီꩻခရဲင်ႏကို ကအောဝ်ႏဒါႏ စောက်ꩻဖါးဖုံႏ ခင်ႏလမ်းအုံထိုꩻမားပါ၊ ဟော်ဖုံႏလဲ့ မေႏခိုးပါတွော့ꩻ လဲင်ꩻတထွူးထမ်စွဉ်ႏနောဝ်ꩻသွူ၊ ဖြောဝ်ꩻခမ်းအခေါဝ်ထင်ꩻဖဲ့ꩻသူꩻလဲ့ စောက်ꩻဖါးဖုံႏ လယ်ႏအုံထုမ်ႏတောဗာႏ လွုမ်းဗဉ်ႏရာꩻအရပ်ကိုဖုံႏသွူ။ ဟိုပုံꩻ၊ စံကာꩻ၊ ရွီႏ၊ မွိုင်ꩻပွဉ်၊ ပွေးလ၊ ရွာႏငံႏ၊ သာမွိုင်ꩻခမ်း(ယိုခါပင်လောင်ꩻ)၊ ဘော်ဆိုင်း၊ လုဲင်ခါး၊ နမ်းစင်-ကစဒါႏ စောက်ꩻဖါးဟော်ဖုံႏလဲ့ ယဟန်ႏမေႏခိုး၊ ယဟန်ႏနဝ်ꩻ အုပ်ချုတ်ရေꩻယန္တရာႏဖုံႏ ယွိုတ်လို့ကြောင်းပါစွဉ်ႏနဝ်ꩻသွူ၊ နမ်းခုတ်၊ ဘန်းယေန်ႏ၊ စံကာꩻဖုံႏနဝ်ꩻ လုံးဝရုဲင်ꩻတသွိုးလꩻဒွုမ်၊ တောင်ႏကီꩻဆꩻနဝ်ကို ကအဝ်ႏဒါႏ ဝေင်ꩻနောင်ပါလံနဝ်ꩻက တဲႏစတွူႏတရန်ရေꩻကာႏလကိုကာႏ မေႏခိုးထမ်စွဉ်ႏ တဝေင်ꩻလွုမ်းနဝ်ꩻသွူ။ "နီဖါဖြား ခင်ႏတပွတ်ꩻထိုꩻယိုနောဝ်ꩻ တဲႏစနောဝ်ꩻကိုကာႏနဲ့ ဖါဖြား" ခွန်ကျောႏရီတဲင် အဖါဖြားဒေါ့ꩻဖေႏ- "တဲႏနောဝ်ꩻကိုကာႏသွူ၊ သော့ꩻဗာႏနေးခင်ႏတုꩻမꩻ ခွေနွို့လꩻယင်းတွိုက်ꩻပွယ်ꩻမတောဝ်" "ဟွူး- နီဖါဖြား ကျယံငါႏထာꩻနော်ႏ" အပိုလီꩻဖုံႏ အမ်ႏဖြာႏရောင်လွထွူ ခမ်းကျောႏထွားစွူလွေꩻ အဖါဖြားခင်ႏတပွတ်ꩻထွူ ရီဖျင်ယင်း- "ပိုလီꩻမဉ်ႏရီယင်းတမျိုꩻပေႏဩ၊ တွူႏတရန်ရေꩻကာာႏလကို နီဖါဖြားသီးဝင်ꩻမူႏ နင်ꩻမုတ်တွမ်ႏနင်ႏရွဉ်နောဝ်ꩻ အလဲဉ်းလွေꩻအွိုးမုဲင်ꩻ ဖါဖြား----" "ဟား - ဟား - ဟား" ဖါဖြားဒွန်းတွမ်ႏ ဖြားတိလွန်ꩻသီး ငရောင်ခန်းဝင်ꩻတဲင် အပိုလီꩻဖုံႏ ထွားကလီးကလွော်ထာꩻယံတွင်ꩻ ဖြားတိလွန်ꩻ ငပယွုမ်းပါထာꩻတွော့ꩻ ခြုဲင်းနယ်ယွယွဖေႏယင်း- "နင်ႏမုတ်တွမ်ႏနင်ႏရွဉ်နောဝ်ꩻ ကွပ်ပွိုးငမ်းဗာႏ စောက်ꩻဖါးအန္တရာယ်ႏတဲင်တွော့ꩻ နီဟဲ့ꩻဖန်ပြောင်ꩻလုဲင်ႏဖေႏယင်း အမဉ်ꩻတသာ၊ အောဝ်ႏဟဲ့ꩻတွင်ႏ တွိုႏဟန်ႏသနီꩻယိုသနယ် ပိုလီꩻသီးဖုံႏဟွေး- နင်ႏမုတ်နောဝ်ꩻ ယိုခါ ခမ်းကျောႏသီးမွိုးဖြားဒုတ်၊ နင်ႏရွဉ်နောဝ်ꩻ ယိုခါ နင်ႏခံꩻအောင်ႏသီးမွိုးဖြား မွိုးဖြားခံꩻသနယ်ဟွေး" အပိုလီꩻဖုံႏ လောႏတဖေါ့ရောင်ခန်း အမွိုးဖြားဖုံႏ ပငါပရာꩻတွော့ꩻ ငရောင်လွခန်းထာꩻ ခုတ်-ခုတ်-ခိတ်ꩻ-ခိတ်ꩻဖုံႏနောဝ်ꩻသွူ။ ခွန်ကျောႏလေနောဝ်ꩻ ထွားစဲင်းလွေꩻ ဖါဖြားဒွန်း ခင်ႏတပွတ်ꩻတဲင်တွော့ꩻ ရီလွေꩻယင်း- "ဖါဖြားဩ- နီဖါဖြားခင်ႏနဝ်ꩻ သွုမ်ꩻတေင်လဲဉ်း ပဒေႏသရာဇ် တွူႏတရန်ရေꩻကိုတဲင် နီဖါဖြား ခမ်ႏစာꩻဗာႏနုဲင်းမုဲင်ꩻဩ" ဖြားဒွန်းဆျာꩻရျူႏသေꩻခန်း နေင်းတဝန်ႏတွော့ꩻ ငေါက်ꩻယွယွပသာႏထွူ ကတူႏနောဝ်ꩻ- "ပိုလီꩻကရီဖါဖြားနောဝ်ꩻ ကွပ်တွူႏတရန်ပဒေႏသရာဇ်မꩻ ခွေခင်ႏသွုမ်ꩻတေင်ထိုꩻ တပင်ယို သꩻပေႏတဝ်းနဲ့၊ လောက်ꩻကာႏတဝ်းနဲ့ သဘော်ꩻနုဲင်းနဝ်ꩻဒျာႏ၊ ပိုလီꩻဖုံႏ ဖေႏကသေလွ ပငါပရာꩻတွော့ꩻ ဖါဖြားအီႏဒေါ့ꩻနယ်ဖေႏသီနော၊ နာႏစဲင်းစဲင်းလုဲင်း" ဖြားဒွန်း အွꩻယင်းအနေင်းထီ တကြွစ်တာႏထွူနောဝ်ꩻမꩻ တွမ်ႏစူတွမ်ႏခင်ႏ နေးတွမ်ႏရက်ခွိုꩻဇာႏတိမာန်ႏ ဟိတ်ဟန်ပွုံႏတဲင် ကွဲဒေါ့ꩻသွုပ်ငါလွေꩻယင်း- "ပိုလီꩻသီးဖုံႏဟွေး- ပဒေႏသရာဇ်စောက်ꩻဖါးဖုံႏ ကွပ်နိစ္စက် အံႏနွောင်ꩻ တေက်ꩻနျꩻငါႏ နီစွိုးခွိုꩻလိုꩻမျိုꩻနဝ်ꩻမꩻ နီတခမ်ႏနွောင်ꩻတဝ်း၊ နီခွုမ်နꩻထွိုင်ႏတောႏလန်ႏချာဗာႏ၊ ကွပ်နီခွုမ်နꩻ ထွိုင်ႏတောႏလန်ႏချာနောဝ်ꩻမꩻ ပဒေႏသရာဇ် စောက်ꩻဖါးဖုံႏတဲ့ စွဉ်ꩻထိုꩻဗာႏအာႏဏာႏ၊ ဖေႏနေးဝွေꩻသီး ကစွဉ်ꩻထိုꩻအာႏဏာႏနဝ်ꩻ ဖါဖြားသီး ခမ်ႏစွဉ်ꩻသွီႏသက်တဲင် ဖါဖြားခင်ႏတပင်ယို ရေႏသေꩻခါꩻဖေႏ စွိုးခွိုꩻလိုꩻမျိုꩻတွမ်ႏ ခမ်းထီတာႏဒျာႏ၊ ဖါဖြားလောက်ꩻကာႏတဝ်း" "ဖူးမူႏခံꩻအောင်ႏ" "လိုႏဒေါ့ꩻငါႏထာꩻမုဲင်ꩻ ဝေး-ခမ်းကျောႏ" "ခွင်ꩻလွစ်ဗဲင်းနီဝေးနော ဖူးမူႏ" မာꩻနုဲင်းသေတဝ်းတွော့ꩻ နင်ႏခံꩻအောင်ႏရီချာ- "ခွင်ꩻလွစ်ဗာႏအမျိုꩻမုဲင်ꩻ ဝေးခမ်းကျောႏ" "အော်- ကထွိုင်ႏနာႏခံႏလွေꩻဗာႏ ဖါဖြားသီးဩဝါဒတွော့ꩻ ကလဲဉ်းခိုႏချာ နီဝေးကယွုမ်းအံႏ ခံႏထူႏသေꩻခါꩻဒါႏ "ဖီလိုဆိုဖီ"အယူႏဝါႏဒဖုံႏနဝ်ꩻ အမာႏလဲဉ်းအကျောင်ꩻ သေထွꩻလဲဉ်းတဲင် ခွင်ꩻလွစ်ဗဲင်းနုဲင်းနောဝ်ꩻဒျာႏ" နင်ႏခံꩻအောင်ႏ ငပယွုမ်းသွူတွော့ꩻ ရိုꩻဖေႏချာ- "နီဝေးခမ်းကျောႏ ကရိုꩻဒါႏ (Gread Ideas Fom the Grwat Books)လိတ်အုပ်နောဝ်ꩻ နီဝေးယွုမ်းအံႏတောဝ်းဒွုမ်နဲ့ရိုႏ" "မွေး ဖူးမူႏခံꩻအောင်ႏ၊ ကွပ်ပွိုးစွဉ်ႏ ဖါဖြားသီးတွမ်ႏ ပအိုဝ်ႏလိုꩻမျိုꩻဖုံႏ နေးအာႏတွူႏတရန်လွဉ် စနစ်ကုဲင် ပဒေႏသရာဇ်နောဝ်ꩻမꩻ ဟန်ႏနီꩻ နီနာꩻပအိုဝ်ႏစီꩻပွါꩻရေꩻ၊ ခြွိုင်ႏသန်ꩻရေꩻ၊ လိုꩻမုꩻရေꩻတွမ်ႏ ယေန်ႏငဲရေꩻဖုံႏ ပြွူႏထန်ႏလွဉ်ဗာႏ၊ ထင်ႏတသွောင်းလွဉ်ဗာႏနဝ်ꩻ နီဝေးဝွန်ႏခံႏဒျာႏ" "မွေးငါႏ ဝေးခမ်းကျောႏ၊ ယေန်ႏငဲရေꩻ ကရိုꩻနဝ်ꩻ အဝ်ႏအိတ်ꩻ ဗꩻတွိုႏပစ္စုပ္ပန်ႏ၊ အဝ်ႏပစ္စုပ္ပန်ႏ ရေႏလွေꩻအနာႏဂတ်သူꩻနုဲင်းနဝ်ꩻမꩻ ရုဲင်ꩻတသွိုးသေႏသေႏနုဲင်းနဝ်ꩻဒျာႏနောဝ်ꩻမꩻ အလီꩻဖုံႏယို ကုဲင်ပြင်ꩻထိုꩻမား၊ အတသာဖုံႏယို နွို့သော့ꩻလွဉ်၊ ထွာသော့ꩻလွဉ်နုဲင်းနဝ်ꩻဒျာႏနော်" "မွေး ဖူးမူႏခံꩻအောင်ႏ၊ အတသာမဉ်ႏထွာလွဉ်နဝ်ꩻ အလီꩻအယဖုံႏယိုလဲ့ လိုႏအွဉ်ႏဖေင်ꩻတဝ်း၊ မဉ်ႏအွဉ်ႏဖေင်ꩻနောဝ်ꩻ ကုဲင်းထွာဒါႏ အဲမ်နီစီးယား (Amnisia)ရောႏဂါႏသွူနဲ့ ဖူးမူႏ" "အဲမ်နီစီးယား (Amnisia)ကရိုꩻဒါႏ 'အွဉ်ႏဖေင်ꩻအတိတ်ကာႏလရောႏဂါႏ'မဉ်ႏအဝ်ႏနောဝ်ꩻ ထွာဒါႏနုဲင်းမုဲင်ꩻဟောင်း ဝေး-ခမ်းကျောႏ" "အဲမ်နီစီးယား (Amnisia)ကရိုꩻဒါႏ ရောႏဂါႏယို မဉ်ႏထွာလွဉ်နဝ်ꩻ ဝွေꩻကမာꩻသေꩻခါꩻဒါႏ ထာꩻမာꩻ မဟာနီꩻ မစာႏနီꩻဖုံႏယို ဝွေꩻယူႏလꩻတဝ်းဒွုမ်၊ သေချာတဝ်းဒွုမ်တွော့ꩻ ဝွေꩻသေပစ္စုပ္ပန်ႏယိုမာꩻငါလွုမ်ꩻ၊ ထွာထိုꩻလိုꩻအွဉ်ႏဖေင်ꩻအတိက်၊ ကထွူထိုꩻလဲဉ်းကလဲဉ်းခိုႏချာ ဝွေꩻမာꩻဗာႏထာꩻမုဲင်ꩻတဲ့ သေတဝ်းဒွုမ်တဲင် အတိက်အဲဉ်ထဝ်း၊ အတိက်ထိုꩻမားနုဲင်းနဝ်ꩻသွူနဲ့ ဖူးမူႏ၊ အတိက်သမဲင်ꩻယို ပုဂ္ဂိုလ်ႏရေꩻအလꩻလဲ့ အဝ်ႏဗာႏ၊ အစွိုꩻအဗူႏအလꩻလဲ့ အဝ်ႏဗာႏ၊ တစွိုးခွိုꩻလွုမ်းအနေႏလဲ့ အဝ်ႏဗာႏနုဲင်းနဝ်ꩻသွူနဲ့ ဖူးမူႏ" "ဟွိုန်ဗာႏသေဗာႏနုဲင်းနဝ်ꩻ တန်ႏဖိုꩻအဝ်ႏငါႏ ဝေးခမ်းကျောႏ" "ကလဲဉ်း ၁၉၉၉-ဗာႏ၊ လာဒီဇင်ဘာ(၁၁)နီꩻယို နီဖါဖြားသီးတွမ်ႏ ပအိုဝ်ႏလိုꩻမျိုꩻဖုံႏ ကတွူႏတရန်လွဉ်ဒါႏ ပဒေႏသရာဇ်စနစ်ယို နေင်ႏ(၅၀)ဗွေ ထွာခံꩻရတုနော် ဖူးမူႏ" "နေင်ႏ(၅၀)ဗွေသွူနောဝ်ꩻ အီႏမာꩻအီကထမုဲင်ꩻ ဝေးခမ်းကျောႏ" "နီဖါဖြားသီးစိုး လိုꩻအရီးရီးဖုံႏနောဝ်ꩻ ပဒေႏသရာဇ်စနစ် ယံကကုဲင်ပြင်ꩻ စွဉ်ꩻသွီႏစွဉ်ꩻသက် ထွိုင်ႏနက်တွူႏတရန်ချာတဲင် အောင်ႏမျင်ႏလꩻ၊ ဝွေꩻသီးဖုံႏ တာႏဝွန်ႏကေႏလွလဲဉ်းဒျာႏ၊ အဝ်ႏကုဲင် နီဖါဖြားသီးပိုလီꩻ အမွီႏစံႏအမွီႏခံႏကထွာဒါႏ နီနာꩻဖုံႏနဝ်ꩻ တထွူသွတ်ꩻတောဝ်းဒွိုန်း ထာꩻမာꩻဖုံႏယို အောဝ်ႏလိုႏမာꩻသွုပ်လွေꩻ၊ နီစွိုးခွိုꩻလိုꩻမျိုꩻ ဘာႏသာႏ သာႏသနာႏ လိတ်လုဲင်ꩻပညာႏ ယံကတိုꩻတက်၊ ယံကထင်ႏထို လေလင်းနုဲင်းမွူးနုဲင်းလာနောဝ်ꩻ ဖြွမ်းဖြွမ်းညီႏညီႏ လွောင်ႏလွောင်ႏဗူႏဗူႏ ရက်ရက်ပဲင်ꩻပဲင်ꩻလို့ဝင်ꩻတဲင် အဝ်ႏလိုႏခွုမ်ထူႏမာꩻသွုပ်လွေꩻနုဲင်းနဝ်ꩻသွူနဲ့ ဖူးမူႏ" "နောဝ်ꩻထွူ အီႏမာꩻသွုပ်ထဲင်းဗာႏထဲင်းနုဲင်းမုဲင်ꩻ ဝေး-ခမ်းကျောႏ" "စွိုးခွိုꩻရေꩻနဝ်ꩻမဉ်ႏထွူ နီကအဝ်ႏကော့ꩻမောင်ꩻဒါႏ နီဝင်ꩻနီဘဝရက်ပဲင်ꩻနောဝ်ꩻလွုမ်ꩻ မတောဝ်နဲ" "အိုး- ဆရာႏ နောဝ်ꩻနောဝ်ꩻ ယွယွကတဆင်ႏဟုဲင်း၊ အောဝ်ႏမွိုင်နေက မဲ့ꩻဝင်ꩻငလိုꩻ" "ဝင်ꩻငနီ နီငဝင်ꩻ၊ ထွာလယ်ႏကယ်းထမုဲင်ꩻဟောင်း၊ ဖြောင်းအဝ်ႏနုဲင်းနုဲင်းဝင်ꩻ မွေးတဝ်းနဲ့၊ ကဉ်းထွားလွဉ်ယိုမွိုင်ႏ------?" "အွူ- ဝေးခမ်းကျောႏသီးနဝ်ꩻ ယိန်းဒေါ့ꩻယိန်းဟုဲင်း၊ ရုဲင်းတန်ႏတန်ႏငါဟုဲင်း ဝင်ꩻသꩻငါႏဝင်ꩻ" "ဝင်ꩻသꩻတဲ့ ဝင်ꩻသꩻဒျာႏ၊ နီသꩻတဲ့ နီသꩻဒျာႏမတဝ်၊ မꩻမꩻခန်း ဝင်ꩻသꩻဝင်ꩻတန်နောဝ်----ယို" "-----တောဝ်းခွေ၊ ခိစ်ꩻ - ခိစ်- ခိစ်" "ဝင်ꩻထွဉ်ႏထွားလွေꩻသူꩻဒျာႏ၊ ထွားတွို့ꩻလွေꩻသူꩻမွိုင်ႏ နီခမ်းနီထီ နီရပ်နီရာႏ သာႏယာႏမွေးလဲဉ်းနော်" "မွေးတန်နောႏ ဝေး-ခမ်းကျောႏ၊ စဝ်းစဝ်းခါ သေအွဉ်ႏသတိꩻတောဝ်း၊ ထွားစဝ်းစဝ်းတဝ်းတန်နော၊ ထာꩻသာႏယာႏနောဝ်ꩻ ထွားမဉ်ႏဒါႏ၊ ထူႏမဉ်ႏဒါႏနောဝ်ꩻ တပ်တောဝ်းလွေꩻတွိုႏ အမေႏရိကန်ႏ "ဟာဝဲင်ယီ"နီခမ်းကိုတဲ့ အောဝ်ႏဗွေဗောႏဒျာႏ ဝေး-ခမ်းကျောႏနောႏ" "နုဲင်းနောဝ်ꩻသွူနဲ့ ဖူးမူႏခံꩻအောင်ႏ၊ အာႏရꩻဗော့ꩻ ဝင်ꩻခမ်း၊ ထင်းတန်ဗော့ꩻဝင်ꩻထီ၊ တွိုႏနီခမ်းကအောဝ်ႏလိုႏမွဉ်းဖဖျင်၊ အဝ်ႏလိုႏမာꩻယံနဝ်ꩻ ပေါႏနီတမာꩻချာတဝ်းက ထာꩻသာႏယာႏကရိုꩻနဝ်ꩻ အမျိုꩻအီႏအောဝ်ႏနဲ့၊ နောဝ်ꩻမꩻ "ခွေနꩻ ခွေသွီႏယို ခွေလိုꩻမျိုꩻတာႏ"နီဖါဖြားကရိုꩻဒါႏငေါဝ်းယို အောဝ်ႏလိုႏအွဉ်ႏသော့ꩻသေႏသေႏ နီသꩻရာႏဖူꩻနဝ်ꩻသွူနဲ့ ဖူးမူႏ၊ ယိုခါခါ နီဝေးသꩻရာႏကိုတဲ့----" ခမ်းကျောႏငေါဝ်းသဲစ်ကသွတ်ꩻတဲ့ ဝွေꩻစူတပင်နောဝ်ꩻ လောႏထူႏယꩻထွူစွဉ်ႏ နင်ႏခံꩻအောင်ႏစူခိုႏတွင်ꩻ----။