စဲ့ꩻအာႏဏာႏဗွေႏစူကို
"စဲ့ꩻအာႏဏာႏဗွေႏစူကိုယို ဥပဒေႏလိုမ်းဗိဉ်ႏရေꩻအဲန်ထဝ်းတဲင် ခမ်းသားသီး အာႏကွိုꩻချာဗာႏဒျာႏ ခမ်းသားသီးအာႏနဝ်ꩻမꩻ အဝ်ႏလိုႏလွောင်ႏဗူႏငါႏ" မြန်မာခမ်းထီ ကထောင်လွောန်ဒီမိုကရေသီတဖူꩻရဲဉ်ႏ တွိုႏလွောန်အနေင်ႏ ၁၀-ကို စဲ့ꩻတပ်မတောႏ ထူႏသိမ်ꩻချာအာႏဏာႏနဝ်ꩻ ထွာဒျာႏယားကုဲင်ထိုꩻ ဒီမိုကရေသီစော့ꩻသွဲႏနဝ်ꩻသွူ၊ မြန်မာခမ်းထီ လွိုက်ရွေꩻပွယ်ꩻယို မာꩻလွောန် ၂၀၁၀၊ ၂၀၁၅ တောမ်ႏ ၂၀၂၀ အဝ်ႏလဲန်းသိုမ်လဲင်ႏနဝ်ꩻသွူ။ ၂၀၂၀ လွိုက်ရွေꩻပွယ်ꩻထွူ လွိုက်ရွေꩻပွယ်ꩻ ကလꩻအဖြေႏအလꩻ ၂၀၂၁ ဖေဖော်ဝါရီ ၁-နီꩻယို ဟဲ့ꩻလွေꩻလွတ်တောႏတွော့ꩻ အဝ်ႏလွတ်တောႏကို အီႏထွို့ꩻဗူႏလွေꩻ တတိယအခြွိုက် အစိုႏရသက်တန်ꩻနဝ်ꩻသွူ၊ ကွဲးတွော့ꩻ မြန်မာခမ်းထီ တတိယအခြွိုက် အစိုႏရစွိုꩻ လꩻတန်ꩻထွို့ꩻဗူႏတဝ်းဒွုန်း၊ စငါအီႏဟဲ့ꩻစ တတိယအလဲင်ႏ ခမ်းသားလွတ်တောႏ ၂၀၂၁-ဖေဖော်ဝါရီလာ ၁-နီꩻကိုနဝ်ꩻလဲ့ အနီꩻနဝ်ꩻနဝ်ꩻ စဲ့ꩻတပ်မတောႏ ထူႏသိမ်ꩻချာ မြန်မာခမ်းထီအာႏဏာႏနဝ်ꩻသွူ။ ၂၀၂၁-ဗာႏ၊ ဖေဖော်ဝါရီလာ ၁-နီꩻ တယ်ႏစမွူးရဝ်ꩻခိုႏစဝ်းစဝ်း ၁-နားရီႏအခိန်ႏမာꩻငါနဝ်ꩻ ကထွာစဲ့ꩻတပ်မတောႏယို ဆောမ်ꩻချုက်လွေꩻ မြန်မာခမ်းထီသမ္မတဦးဝင်းမြင့်၊ ဒေါ်အောင်ဆန်းစုကြည်၊ ခမ်းထီအတန်အကဲႏသီးဖုံႏ၊ တွိုင်ႏဒေႏသတန်တောမ်ႏ ခမ်းနယ်ႏဝွန်ႏတန်သီးဖုံႏတောမ်ႏ အမျိုးသားဒီမိုကရေသီအမတ်ဖုံႏ၊ ဝေင်ꩻနယ်ႏပါတီအွောန်ငါဖုံႏနဝ်ꩻသွူ၊ အနီꩻနဝ်ꩻနဝ်ꩻ တယ်ႏစွောန်ႏ ၂၀၂၁-ဗာႏ၊ ဇန်နဝါရီလာ ၃၁-မွူးနာꩻခိန်ႏ ၁၁-နားရီႏမာꩻငါယို သွုပ်ဆွိုက်ရေꩻဖုန်းလဲင်းဖုံႏ၊ အင်တာနဲက်လဲင်းဖုံႏတဲ့ ပေ့ꩻခါꩻလို့နဝ်ꩻသွူ။ တတိယအလဲင်ႏ လွတ်တောႏသက်တန်ꩻ ကအီႏစဒါႏ ၂၀၂၁-ဗာႏ၊ ဖေဖော်ဝါရီလာ ၁-နီꩻယိုအတာႏ ကအီႏထင်ႏလွတ်တောႏသား ၂၀၂၀-လွိုက်ရွေꩻပွယ်ꩻအမတ်တသာသီးဖုံႏလဲ့ ဖျော်တွိုႏလို့လဲန်း နေပြည်တော်ဝေင်ꩻတန်ကို အွိုး ဇန်နဝါရီလာ ၂၇-၂၈နီꩻကိုကာႏဖုံႏနဝ်ꩻသွူ၊ အခိန်ႏခါႏကျာꩻယိုနဝ်ꩻ ကျုင်ႏတလူႏတောမ်ႏ ကိုဗစ်-၁၉ ကပ်ရောႏဂါႏကာႏလတဲင် ကထွာလွတ်တောႏနမ်းခြောင်ꩻတင်သီးဖုံႏလဲ့ ဆဲ့ꩻရဲးကမ်းကဝ်းရီးလဲန်း ရဲးကိုဗစ်တသီႏဖုံႏနဝ်ꩻသွူ။ အီႏထင်ႏလွတ်တောႏတာႏ ကအဝ်ႏဖျော်ပြိုင်ႏပြင်ႏလဲန်းဒါႏ ဝေင်ꩻတန်နေပြည်တော်၊ စည်ပင်ရိပ်သာကို တခမ်းလွုမ်းလွတ်တောႏအမတ်သီးဖုံႏယို ၂၀၂၁-ဗာႏ၊ ဖေဖော်ဝါရီလာ ၁-နီꩻ မွူးရဝ်ꩻခိုႏစဝ်းစဝ်းနဝ်ꩻ စဲ့ꩻသားဖုံႏယို အဝ်ႏရဲးဝဲင်ꩻလဲန်း စည်ပင်ရိပ်သာကိုထွူ ထန်ႏလွေꩻကောင်းထန်ႏဖဲ့ꩻခွင်ꩻလဲ့ တလꩻတဝ်းဒွုမ်နဝ်ꩻသွူ။ တယ်ႏစ ၂၀၂၁-ဗာႏ၊ ဖေဖော်ဝါရီလာ ၁-နီꩻယိုတဲင် ဒီမိုကရေသီစနစ်ကထွာဒါႏ ခမ်းသားလွိုက်ဒင်ႏ ခမ်းသားအစိုႏရစနစ်ယိုလဲ့ တအဝ်ႏတဝ်းဒွုမ်၊ လွတ်တောႏအမတ်သီး လွတ်တောႏထာꩻမာꩻ အစီꩻအဝွေꩻဖုံႏလဲ့ ကုဲင်ထိုꩻဗာႏနဝ်ꩻသွူ၊ ဖေဖော်ဝါရီလာ ၁-နီꩻကို ကအဝ်ႏကုဲင်ဒါႏ စဲ့ꩻသားလွိုက်ဒင်ႏကထွာဒါႏ ဒုတိယသမ္မတ ဦးမြင့်ဆွေနဝ်ꩻ ထွာထင်ႏယို့ꩻ ယာႏယီႏသမ္မတရိုꩻနဝ်ꩻတွော့ꩻ တောမ်ႏစဲ့ꩻတပ်မတောႏ ရဲးကမ်းကာႏကွယ်ႏရေꩻအွောန်ငါချုက် မင်းအောင်လှိုင်အပါ တောမ်ႏစဲ့ꩻတပ်မတောႏအွောန်ငါကတူႏစွိုꩻ ဝင်ꩻလစ်ꩻဝင်ꩻငတ်ꩻနဝ်ꩻ ဟဲ့ꩻမာꩻလွေꩻ အမျိုꩻသာꩻလိုမ်းဗိဉ်ႏရေꩻကောင်သီ အစီꩻအဝွေꩻထွူ အဝ်ႏအစီꩻအဝွေꩻနဝ်ꩻကို ယာႏယီႏသမ္မတဦးမြင့်ဆွေနဝ်ꩻ ကျေႏညာႏလွေꩻ မြန်မာခမ်းထီအရေꩻတန်အခေႏအနေႏတဲင် ခမ်းထီအာႏဏာႏကထွာဒါႏ အိုပ်ချုက်ရေꩻ၊ တဲမ်းထွို့ꩻဥပဒေႏရေꩻတောမ်ႏ စီႏရင်ႏတရာꩻရေꩻ အာႏဏာႏယိုသိုမ်ဗာႏယို လွဲꩻဖေႏတာႏဝွန်ႏလွေꩻ စဲ့ꩻတပ်မတောႏနဝ်ꩻသွူ။ ယိုကို မိဉ်းဒေါ့ꩻဗာႏနဝ်ꩻ ခမ်းထီအတာႏ အရေꩻတန်အခေႏအနေႏတွိုႏတွော့ꩻ လွဲꩻဖေႏအာႏဏာႏယို မာꩻပဲင်ႏခွင်ꩻအဝ်ႏဒျာႏ ခမ်းထီသမ္မတအတန်သွတ်ꩻ ဦးဝင်းမြင့်လုမ်ꩻသွူ၊ ဦးဝင်းမြင့်နဝ်ꩻ ထွာဒျာႏခမ်းသားသီးလွိုက်ဒင်ႏ ခမ်းသားအစိုႏရ၊ ခမ်းသားသမ္မတဒျာႏတဲင် စဲ့ꩻတပ်မတောႏအနေႏ လွောန်ꩻကာႏဥပဒေႏတွော့ꩻ မိဉ်းဆောမ်ꩻကြွို့ꩻကြꩻဒျာႏ ခမ်းသားအစိုႏရနုဲင်းယိုနဝ်ꩻ တောမ်ႏတအမ်ႏသွင်ꩻတဝ်း ခမ်းသားသီးနဝ်ꩻ ဗွိုန်ဝင်ꩻသွူ၊ ထွာဒျာႏ အွောန်ႏရေꩻတဝ်း ခမ်းသားသီးဆန္ဒနဝ်ꩻသွူ၊ စဲ့ꩻတပ်မတောႏကရိုꩻနဝ်ꩻ ထေင်းထမ်ႏခမ်းထီတာႏဝွန်ႏ၊ ထွာဒျာႏခမ်းထီဝွန်ႏထမ်ꩻတဲင် အဝ်ႏဗာႏဒျာႏ ခမ်းထီသမ္မတဆꩻလနဝ်ꩻသွူ။ ဖေဖော်ဝါရီလာ ၁-နီꩻနဝ်ꩻ စဲ့ꩻတပ်မတောႏ ထူႏသိမ်ꩻခမ်းထီအာႏဏာႏထွူ ထွို့ꩻဗူႏလွေꩻထွူခန်းဒျာႏ စဲ့ꩻအစိုႏရသီးအိုပ်ချုက်ရေꩻပုင်ႏပွိုင် (နိုင်ငံတော်စီမံအုပ်ချုပ်ရေး)ကောင်သီနဝ်ꩻသွူ၊ တယ်ႏစလွေꩻ ဖေဖော်ဝါရီလာ ၃-နီꩻနဝ်ꩻတဲင် မြန်မာခမ်းထီကို ကထွာဒါႏ ခြွိုင်ႏသန်ꩻရေꩻဌာႏနဆꩻလ မန်ꩻတလေꩻဝေင်ꩻ၊ ချမ်းမြသာစည်ဝေင်ꩻနယ်ႏကိုကအဝ်ႏ ကူႏ ၅၀၀ (အရိုးအထူးကု)တသီႏယုင်ႏတန် ဆရာႏဝွန်ႏမူႏခို(၈၀)လွိုနဝ်ꩻ မာꩻလွေꩻရီးရီးဝင်ꩻ လွိုဆန်စဲ့ꩻတပ်မတောႏ ထူႏသိမ်ꩻအာႏဏာႏနဝ်ꩻသွူ၊ ဖေဖော်ဝါရီလာ ၄-နီꩻနဝ်ꩻ ဝေင်ꩻရန်ႏကုန်ႏတောမ်ႏ ဝေင်ꩻတန်ယဟန်ႏကိုဖုံႏယို မာꩻလွေꩻအွောန်ႏနယ်ဆန္ဒပွယ်ꩻ လက်ခံႏတဝ်း စဲ့ꩻတပ်မတောႏ ထူႏသိမ်ꩻအာႏဏာႏ၊ ယံအွောန်ႏစွꩻချာဖေႏ ခမ်းသားသမ္မတဦးဝင်းမြင့်တောမ်ႏ အစိုႏရစွိုꩻဖုံႏနဝ်ꩻသွူ။ ဖေဖော်ဝါရီလာ ၅-နီꩻနဝ်ꩻ မြန်မာခမ်းသားသီး ကမာꩻလွေꩻအွောန်ႏနယ်ဆန္ဒပွယ်ꩻယို မာꩻလွေꩻလုဲင်းမွေးစွောန်ႏ တဝေင်ꩻတဝေင်ꩻကိုယို လိုꩻဖြာꩻပေါင်ꩻပါစွောန်ႏ အသန်ꩻအသိန်ႏနေးထွူ မာꩻလွေꩻစွောန်ႏတခမ်းလုမ်းအကို ဝေင်ꩻနယ်ႏစွောတ်ꩻစဲစ်ꩻနဝ်ꩻသွူ၊ တဖဲ့ꩻကထွာစဲ့ꩻကောင်သီအစိုႏရယိုလဲ့ လိုꩻကအွောန်ႏနယ်ဆန္ဒသားဖုံႏ၊ ဝွန်ႏထမ်ꩻကလွိုဆန်အစိုႏရ အုံယွုတ်ꩻထာꩻမာꩻသားဖုံႏယို လယ်ႏထိုမ်ႏဆောမ်ꩻလို့နဝ်ꩻသွူ။ မြန်မာခမ်းထီအနေႏ ကလꩻလွောန်လွောတ်တခြင်ခွင်ꩻ အနေင်ႏတဆီကို မဲ့ဗွောင်နားဗွောင်တဲင် ပွိုင်းဝွို့တောမ်ႏ နဲင်ႏငံႏရေꩻတဲ့ ပနဲးသေနာႏထွꩻလွောန်နဝ်ꩻသွူ၊ နဝ်ꩻမꩻတဲင် ကထွာခမ်းသားသီး သေနာႏထွꩻလွောန်လဲန်း နဲင်ႏငံႏရေꩻအခေႏအနေႏ၊ ဥပဒေႏအခေႏအနေႏဖုံႏ အာႏတလာနဝ်ꩻမꩻ စဲ့ꩻကထွိုင်ႏသိမ်ꩻအာႏဏာႏတွော့ꩻ လယ်ႏထိုမ်ႏဆောမ်ꩻတငီႏတငါ ခမ်းသားထီသား၊ နဲင်ႏငံႏရေꩻသားဖုံႏ၊ လွိုက်ရွေꩻပွယ်ꩻကော်မသျင်သားဖုံႏနဝ်ꩻ ကထွာခမ်းသားသီးဖုံႏ တလက်ခံႏတဝ်း၊ တစူꩻရောင်တဝ်းနဝ်ꩻ ထီႏဗာႏနဝ်ꩻသွူ၊ နဝ်ꩻမꩻတဲင် စဲ့ꩻယဲꩻသီး ကလယ်ႏဆောမ်ꩻဒါႏလိုꩻ ခင်ႏလမ်းကဲန်းအာအာကိုဖုံႏနဝ်ꩻ ခမ်းသားသီးလောႏရောင်ချာ၊ ဝဲင်ꩻရောင်ချာတဲင် ဆောမ်ꩻလွေꩻတွိုင်ꩻ တလꩻလို့တဝ်းနဝ်ꩻ ထီႏဗာႏနဝ်ꩻသွူ။ အဝ်ႏနဝ်ꩻ စဲ့ꩻအစိုႏရနဝ်ꩻ ဝွေꩻသီးအတာႏ အကျိုꩻကဆေ့ꩻအီဒါႏ ဥပဒေႏဖုံႏယို ဖုဲင်းထိုꩻထွူ ဝွေꩻသီးအတာႏ ကရသုင်ꩻအီလꩻဒါႏ ဥပဒေႏဖုံႏယို ထေပျဌာန်လွောန်နဝ်ꩻသွူ၊ နုဲင်းဒီမိုကရေသီအစိုႏရခိန်ႏ ကပျဌာန်းခါꩻဒါႏ လိုꩻပုဂ္ဂိုလ်ႏရေꩻဆဲင်ႏရာꩻ လွောတ်တခြင်ခွင်ꩻတောမ်ႏ လိုမ်းဗိဉ်ႏခွင်ꩻဥပဒေႏကို ခမ်းသားအလောင်းယို သောက်တွိုင်ꩻခွင်ꩻ၊ မွေႏတွိုင်ꩻခွင်ꩻ၊ ဆောမ်ꩻတွိုင်ꩻခွင်ꩻ တအဝ်ႏတဝ်း၊ အရဲးအကမ်းကထွာဒါႏ ပုဒ်မွူးဖုံႏယို စဲ့ꩻကောင်သီအစိုႏရစိုးနဝ်ꩻ အွောန်ႏဆွိုးထိုꩻခါꩻ ပုဒ်မွူးနဝ်ꩻဖုံႏနဝ်ꩻ ထီႏဗာႏနဝ်ꩻသွူ။ မိဉ်းအွောန်ႏဆွိုးခါꩻ ပုဒ်မွူးနဝ်ꩻဖုံႏနဝ်ꩻ ခမ်းသားသီးအလောင်းယို ဝွေꩻသီးမိဉ်စဲစ်တွိုင်ꩻ စဲစ်လꩻ၊ မိဉ်ဆောင်ꩻတွိုင်ꩻနုဲင်းမုဲင်ꩻ ဆောမ်ꩻလꩻနဝ်ꩻသွူ၊ နဝ်ꩻမꩻ ပအိုဝ်ႏခမ်းသားသီးစွုမ်ႏဖြာꩻအတာႏ စဲ့ꩻအာႏဏာႏဗွေႏအစိုႏရ၊ စဲ့ꩻကောင်သီအစိုႏရစူကိုယို ဥပဒေႏလိုမ်းဗဉ်ႏရေꩻ တအဝ်ႏတဝ်းတဲင် အဝ်ႏလိုႏအုံအဝ်ႏလွောင်ႏလွောင်ႏဗူႏဗူႏငါႏလွဝင်ꩻသွူ၊ နီခမ်းသားသီး မိဉ်းတအာႏကွိုꩻချာတဝ်း နီခမ်းသားသီးအချင်ꩻချင်ꩻနဝ်ꩻ အာႏကွိုꩻခရာႏပါꩻမုဲင်ꩻမုဲင်ꩻတဲ့ တလꩻတဝ်းနဝ်ꩻသွူ။[၁][၂]