တေမိယဇာတ်
“ဩဗွေႏ နီဗွေႏသီးဖုံႏဩ နီဗွေႏမျတ်ဘုရာꩻသူꩻနဝ်ꩻ အွဉ်ႏကုဲင်လမ်းပါႏ ပယ်ႏခွါႏလို့ ဥစ္စာႏပစ္စေꩻဖုံႏတွော့ꩻ တောႏထွက်ထိုꩻစွဉ်ႏထာꩻ။ လွေꩻအုံအားထုတ်ကံကျင်ꩻတရာꩻ ဖွာꩻဖက်တောႏ ညောင်ႏဗုဒ္ဓဟေႏအမွူးဆꩻလတဲင် အောင်ႏလꩻစွဉ်ႏဒျာႏ မာရ်ႏနတ်ခွန်စဲ့ꩻပွယ်ꩻ။ လွဉ်ယားသွေꩻထိုꩻကုဲင်တွမ်ႏ အပိုမူႏဖုံႏတဲ့ နီဗွေႏမျတ်ဘုရာꩻ အောင်ႏလꩻပါစွဉ်ႏဒျာႏ။ နီဗွေႏမျတ်ဘုရာꩻ ဘွုံꩻတောႏ၊ ဉာဏ်ႏတောႏ၊ ကံႏတောႏဖုံႏနဝ်ꩻ အံႏဖြာႏခရာႏ လို့ဒါႏဒွုမ်သနယ်။”
စတဲင် ချီꩻယော်ꩻအံႏဖြာႏ အိုပ်ꩻရောင်ခန်းဒျာႏ တပါꩻတမျိုꩻ တပါꩻတစွိုးဖုံႏသွူ။ အဝ်ႏနဝ်ꩻတဲင် နီဗွေႏမျတ်ဘုရာꩻ အဝ်ႏဂန္ဓဋီႏကို ထွိုင်ႏကျွꩻချီႏလွဉ် တရာꩻသဘင်ႏကိုတဲင် ရီခန်းနုဲင်းယို -
“တပဲ့ꩻတပန်ꩻ ရဟန်ꩻသံႏဃာႏသီးဖုံႏဟွေး ခွေဘုရာꩻ ခါးလားကကျွꩻလွဉ်အခိန်ႏခါႏ သီဒေါ့ꩻရောင်လွငါႏ အကျောင်ꩻခရာႏတမုဲင်ꩻဖုံႏဟောင်း။”
“ဩဗွေႏ နီသွဉ်းသီးတဒေါ့ꩻတဝ်းအလောင်ႏတင် အလင်တာႏ နီသွဉ်းသီးဒေါ့ꩻလွဒျာႏ နီဗွေႏဘုရာꩻ ကဖြဲ့ꩻလွဉ်ဒါႏ နိက္ခပါႏရမီႏအကျောင်ꩻဒျာႏသွူ ဗွေႏဩ။”
“တပဲ့ꩻတပန်ꩻ ရဟန်ꩻသံႏဃာႏသီးဖုံႏဟွေး ခွေဘုရာꩻနဝ်ꩻ ထီႏသေဟွုန်သꩻဝꩻ နိမိတ်လစ်ꩻပါꩻတွော့ꩻ ဖြဲ့ꩻလွဉ်ဗာႏပါႏရမီႏ ယိုဘဝလွုမ်ꩻတမွေးတဝ်း၊ စိုးဘဝကရီးခါ ပါႏရမီႏဆားခါကာႏ ဖြဲ့ꩻလွဉ်ဗာႏလဲဉ်းဒျာႏ နိက္ခပါႏရမီႏဖုံႏသနယ်။”
စတဲင် ဟော်ꩻကျာꩻနယ်ဖေႏ "တေမိယဇာတ်တောႏ" ယိုထွိုင်ႏထွူတဲင် ဝင်ႏစာꩻ အရဟတ္တဖိုလ်ႏတွော့ꩻ ဉာဏ်ႏတခါꩻလဲ့ပေ့ꩻ အုံယေန်တေ့ꩻထိုꩻခန်းဒျာႏထာꩻသွူ။ အဝ်ႏနဝ်ꩻတဲင် ရဟန်ꩻသင်္ဃာႏသီးဖုံႏနဝ်ꩻ -
“ဩဗွေႏ ဘုရာꩻမျတ်ဗွေႏဩ နီဗွေႏဘုရာꩻ ကဖြဲ့ꩻပွါꩻလွဉ်ဒါႏ ပါႏရမီႏနုဲင်း ဘဝငခါယိုနဝ်ꩻ နီသွဉ်းသီး ဟွုန်ဟဝ်အာႏရ နိက်သက်သꩻရေႏ ကေႏညိုႏငါႏ။ တလောကလွုမ်းလဲ့ ဟွုန်ဟဝ်အာႏရ နိက်သက်ဗာႏ သေႏချာႏဒျာႏရင်ꩻ။ ကွပ်ပွိုးနဝ်ꩻမ့ꩻ နီဗွေႏဘုရာꩻ ကဟော်ꩻကျာꩻဖေႏဒါႏ တရာꩻယာႏအအဲဉ်ႏယိုနဝ်ꩻ နီသွဉ်းသီး အကျိုꩻစီꩻပွာꩻဖေႏကထွာ ယံကတိုꩻတက် ထင်ႏထိုအီတဲင် ဟော်ꩻဖေႏသွော့အလုဲင်း ခြုဲင်းဖေႏသွော့ အဆွာꩻဗွေႏဩ။”
ထွိုင်ႏလျောက်လဝ်းတောင်ꩻပြန်ႏ ကွီနာႏခံႏတရာꩻ နုဲင်းယိုဖုံႏတဲင် နီဗွေႏမျတ်ဘုရာꩻလဲ့ အဝ်ႏကောင်လောင်း ကထွတ်ꩻရွယ်ႏလင်ꩻဒါႏ ထီခြောင်ပေႏပမာႏ ဟော်ꩻဖေႏစွဉ်ႏဒျာႏ တေမိယဇာတ်တောႏယိုသွူ။
အွိုးခ့ꩻတလဲင်ႏ - ကာသိကရာဇ်ခမ်းကိုနဝ်ꩻ ကာသိကရာဇ်ခွန်ဟော်ခံꩻ အဝ်ႏအိုပ်စိုꩻတဲင် ကာသိကရာဇ်ခွန်ဟော်ခံꩻနဝ်ꩻ မင်ꩻကျင်ꩻတရာꩻဆီပါꩻလဲ့စွို့ꩻ၊ သင်္ဂတတရာꩻ လစ်ꩻပါꩻလဲ့မဲဉ်ႏ၊ နာယကဂုဏ်ႏတောႏသူꩻပါꩻလဲ့ ပြဲ့ꩻစွုံႏမွေးငါႏသွူ။ ကာသိကရာဇ်ခွန်ဟော်ခံꩻနဝ်ꩻ အမိဘုရာꩻဖုံႏ အဝ်ႏတသောင်ႏသူရေင်တဲင် အမိဖုရာꩻနင်ꩻတန်နဝ်ꩻ အမဉ်ꩻ "စန္ဒာဒေဝီ"နဝ်ꩻသွူ။
ကာသိကရာဇ်ခွန်ဟော်ꩻခံꩻနဝ်ꩻ အုံငီꩻပေါင်ꩻဖောႏတွမ်ႏ နန်ꩻတောႏကိုကအဝ်ႏဒါႏ မိဖုရာꩻတသောင်ႏသူရေင်သွူမဉ်းတဲ့ ပိုခိုပိုမူႏဖုံႏ တထွန်ꩻကာꩻလꩻတဝ်း တဖြာꩻဖြာꩻသွူ။
ကွပ်ပွိုး ကအီႏစိုꩻစံႏ ကအီႏအံႏဒါႏခမ်း ပိုတဖြာꩻဖြာꩻငါလဲ့ တထွန်ꩻကာꩻတဝ်းတဲင်တွော့ꩻ ကောကထွာဒါႏ ပေႏသူꩻပေႏသာꩻ အမျာꩻတင်ꩻလုဲင်သီးဖုံႏနဝ်ꩻ ဖြွမ်းဗူႏညီညွှတ်တဝင်ꩻဖုံႏတဲင် အွဉ်တဝင်ꩻတွော့ꩻ ခြီခြောဝ်ဒေါ့ꩻရောင် ထွဉ်ႏခန်းခွန်ဟော်ꩻခံꩻ ကွီပိုဆုꩻနဝ်ꩻသွူ။ ခမ်းသားအမျာꩻသီးအလောင်း မင်ꩻကျင်ꩻတရာꩻဆီပါꩻ စွို့ꩻစွို့ꩻစွဉ်ႏစွဉ်ႏတဲင် ကအဝ်ႏအိုပ်ချုပ် ပွိုင်ႏစိုꩻဒါႏ ခွန်ဟော်ခံꩻနဝ်ꩻလဲ့ -
“ခမ်းသားအမျာꩻသီးဖုံႏဟွေး သီကမဲဉ်လꩻ ကကွီလွဉ်ဒါႏအတွိုင်ꩻ မဲ့ꩻခွေထွဉ်ႏဒျာႏ "စန္ဒာႏဒေႏဝီ"မိဖုရာꩻ ကွီဆုꩻတဲင်တွော့ꩻ သီတွမ်ႏနန်းငါးမွော့ဒွုမ်။ တညငါႏဒွုမ်အခိန်ႏခါႏ သီကကော့ꩻမောင်ꩻလွဒါႏ ပိုခိုရတနာႏတဖြာꩻ မဲ့ꩻလွူးဖွာꩻလင်ꩻလွဉ်ဒျာႏသနယ်” စတဲင် ဒေါ့ꩻရိုꩻဖေႏသꩻဆွော့ꩻဖေႏခန်း ခမ်းသားအမျာꩻသီးဖုံႏသွူ။
စန္ဒာႏဒေႏဝီႏမိဖုရာꩻနဝ်ꩻ ဆောက်တဲႏထိန်ꩻစောင်ꩻ သီႏလထွူတွော့ꩻ ကထွိုင်ႏကွီပိုရတနာႏဆုꩻနုဲင်းယိုနဝ်ꩻ ကောကထွာဒါႏ တာႏဝတိံသာႏခမ်း ခွန်သိကျာꩻနဝ်ꩻ ကဏ္ဍုကမ္ပလာႏ လျားလွဉ်ငါႏတဲင် နေးတွမ်ႏဉာဏ်ႏမဲ့ တိန်ႏထွားလင်ꩻလွဉ်လိုꩻအခမ်းနဝ်ꩻ သေလꩻစွဉ်ႏဒျာႏ စန္ဒာႏဒေႏဝီႏမိဖုရာꩻ အဆန္ဒနဝ်ꩻသွူ။ ထွိုင်ႏသေထွꩻဗာႏ စန္ဒာႏဒေႏဝီႏမိဖုရာꩻဆန္ဒနုဲင်းယိုနဝ်ꩻတဲင် ဝွေꩻကကွီဒါႏ ပိုရတနာႏဆုꩻယိုလဲ့ ခွန်တန်သိကျာꩻ အီႏဖေႏလင်ꩻဗာႏသွူတဲင် ထွံႏလွိုက်ခန်း နတ်ꩻသာꩻတဖြာꩻ အီႏလင်ꩻကွိုတ်ဖေႏ စန္ဒာႏဒေႏဝီႏမိဖုရာꩻ အပိုနဝ်ꩻသွူ။
မတော်မကာ အခိန်ႏတွင်ꩻနဝ်ꩻကာႏလ နီဗွေႏဖရာꩻအလောင်ꩻနတ်သာꩻနဝ်ꩻ လူꩻကံႏသံးအီႏလို့သွူတဲင်တွော့ꩻ သိကျာꩻခွန်ဟဲ့ꩻလွဉ် နိုꩻဆောႏတဲက်တွန်ꩻ ထွဉ်ႏလင်ꩻကွိုတ်ဖေႏခန်းဒျာႏ စန္ဒာႏဒေႏဝီႏမိဖုရာꩻ အပိုရတနာႏနဝ်ꩻသွူ။ ဘုရာꩻလောင်ꩻနတ်သာꩻလဲ့ ဝွန်ႏခံႏဖေႏထွူတဲင် လူꩻကံႏကအီႏလို့ဒါႏ နတ်သာꩻငတ်ꩻရျာꩻဖုံႏနဝ်ꩻလဲ့ ခွန်သိကျာꩻထွဉ်ႏလင်ကွိုတ်ဖေႏ အမူꩻအမတ် အဆွေႏရံႏငတ်ꩻရျာꩻတဲင် နတ်သာꩻငတ်ꩻရျာꩻလဲ့ ဝွန်ႏခံႏဖေႏခန်းသွူ။[၁]အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]
- ↑ နန္ဒာမိုးကြယ် ရေးသားပြုစုသည့် (ဇာတ်တော်ကြီးဆယ်ဘွဲ့)