ဒါႏနထွာအီအကျောင်ꩻ

အဝ်ႏ Wikipedia ကို
အ​ညွှန်း​သို့ ခုန်ကူးရန် ရှာဖွေရန် ခုန်ကူးမည်

ဒါနထွာအီအကျောင်ꩻ(၃)ပါꩻ[မွဉ်းဖျင် | မွဉ်းဖျင်အရွီးခိုႏ]

(၁) သဒ္ဓါႏတရာꩻ (၂) ထာꩻလူႏဝတ္ထု (၃) အလူႏခံႏပုဂ္ဂိုလ်ႏ ယိုသွံပါꩻပြဲ့ꩻစွုံႏမꩻ ဒါႏနထွာလꩻနဝ်ꩻသွူ။

ဒါႏနအကျိုꩻတန်/အကျိုꩻတန်တောဝ်း အကျောင်ꩻတရာꩻ[မွဉ်းဖျင် | မွဉ်းဖျင်အရွီးခိုႏ]

(၁) ကောကလူႏသားနောဝ်ꩻ သီႏလအောဝ်ႏ၊ (၂) အလူႏခံႏပုဂ္ဂိုလ်ႏနောဝ်ꩻ သီႏလအဲဉ်ထောဝ်း၊ (၃) ထာꩻလူႏဝတ္ထုတဲ့ စင်ႏကြယ်ႏဒျာႏ၊ (၄) သဒ္ဓါႏ စေႏတနာႏတဲ့ သန်ဒျာႏ။ အချက် ၄-ဗာႏ (အင်္ဂါႏ ၄-ပါꩻ)ကိုနဝ်ꩻ အလူႏခံႏပုဂ္ဂိုလ်ႏနဝ်ꩻ သီႏလအဲဉ်ထဝ်းစွဉ်ႏတဲ့ ကွပ်စွဉ်ႏကောလူႏသား သီႏလအဝ်ႏ၊ ဝတ္ထုစင်ႏကြယ်ႏ၊ သဒ္ဓါႏစေႏတနာႏသန်တဲင် အကျိုꩻတန်ဒျာႏနဝ်ꩻသွူ။

ဝတ္ထုသက်သေႏ[မွဉ်းဖျင် | မွဉ်းဖျင်အရွီးခိုႏ]

ဇူႏဇကာႏပုဏ္ဏာꩻ လူႏခံႏတဲင် ခွန်တန်ဝေဿန္တရာႏ ကလူႏထိုꩻဒါႏ အပိုခို ဇာႏလီႏ၊ အပိုမူႏ ကဏှာႏဇိန်ႏနဝ်ꩻသွူ။ (၁) ကောကလူႏသားနောဝ်ꩻ သီႏလအဲဉ်ထောဝ်း၊ (၂) အလူႏခံႏပုဂ္ဂိုလ်ႏနဝ်ꩻ သီႏလအောဝ်ႏ၊ (၃) ထာꩻလူႏဝတ္ထုတဲ့ စင်ႏကြယ်ႏတောဝ်း၊ (၄) သဒ္ဓါႏ စေႏတနာႏတဲ့ တသန်တောဝ်း။ ယိုနဝ်ꩻ ကောလူႏသား သီႏလအဲဉ်ထဝ်း၊ ဝတ္ထုစင်ႏကြယ်ႏတဝ်း၊ သဒ္ဓါႏစေႏတနာႏ သန်တဝ်းစွဉ်ႏတဲ့ ကွပ်စွဉ်ႏအလူႏခံႏပုဂ္ဂိုလ်ႏနဝ်ꩻ သီႏလအောဝ်ႏတဲင် အကျိုꩻတန်ဒျာႏ။

ဝတ္ထုသက်သေႏ[မွဉ်းဖျင် | မွဉ်းဖျင်အရွီးခိုႏ]

တကာႏစံႏငါးသားတဖြာꩻ ကလူႏဒါႏ ရဟန်ꩻ"ဒီဃာသောမ"သွမ်ꩻသိုမ်လဲင်ႏနဝ်ꩻသွူ။ (၁) ကောလူႏသားတဲ့ သီႏလအဲဉ်ထောဝ်း၊ (၂) အလူႏခံႏပုဂ္ဂိုလ်ႏတဲ့ သီႏလအဲဉ်ထောဝ်း၊ (၃) ဝတ္ထုတဲ့ စင်ႏကြယ်ႏတောဝ်း၊ (၄) သဒ္ဓါႏ စေႏတနာႏတဲ့ သန်တောဝ်း။ ယိုနဝ်ꩻ ကွပ်စွဉ်ႏကောလူႏသားယင်၊ အလူႏခံႏပုဂ္ဂိုလ်ႏယင် နီဖြာꩻလိုမ်း သီႏလအဲဉ်ထဝ်းတဲင် အကျိုꩻတန်တဝ်း။

ဝတ္ထုသက်သေႏ[မွဉ်းဖျင် | မွဉ်းဖျင်အရွီးခိုႏ]

ခွန်တန်ကောသလ ကလူႏဒါႏ အသဒိသ ထာꩻလူႏတန်နဝ်ꩻသွူ။ "တောင်ꩻခါꩻ" ဝတ္ထုသက်သေႏ ယို ၄-ပုဒ်နောဝ်ꩻ အဝ်ႏပါသော့ꩻ မဇ္ဈိမနိကာယ်ႏ ဥပရိပဏ္ဏာသ မဟာဒက္ခိဏ ဝိဘင်္ဂသုတ်အဖွင်ꩻ အဋ္ဌကထာႏကိုနဝ်ꩻသွူ။

(တနယ်ꩻ)ဒါႏနအကျိုꩻကတန်ငါႏ အကျောင်ꩻတရာꩻ အင်္ဂါႏ(၆)ပါꩻ[မွဉ်းဖျင် | မွဉ်းဖျင်အရွီးခိုႏ]

၁။ ခါးလားကလူႏတဲ့ သꩻရောင်းသꩻရေꩻ (ပုဗ္ဗစေႏတနာႏသန်) ၂။ ကအဝ်ႏလူႏတွင်ꩻတဲ့ သꩻရောင်းသꩻရေꩻ (မုဉ္စစေႏတနာႏသန်) ၃။ လူႏတန်ꩻထွူတဲ့ သꩻရောင်းသꩻရေꩻ (အပရစေႏတနာႏသန်) ၄။ အလူႏခံႏပုဂ္ဂိုလ်ႏနဝ်ꩻ ရာဂကင်ꩻ (ဝီတရာဂေါ) ၅။ အလူႏခံႏပုဂ္ဂိုလ်ႏနဝ်ꩻ ဒေါသကင်ꩻ (ဝီတဒေါသော) ၆။ အလူႏခံႏပုဂ္ဂိုလ်ႏနဝ်ꩻ မောဟကင်ꩻ (ဝီတမောဟော) အင်္ဂါႏယို ၆-ပါꩻ မဉ်ႏပြဲ့ꩻစွုံႏနဝ်ꩻ အကျိုꩻတန်ငါႏနဝ်ꩻသွူ။ "တောင်ꩻခါꩻ" "ရာဂ' ဒေါသ' မောဟကင်ꩻ"ကရိုꩻနဝ်ꩻ ရေႏရွယ်ႏအထိုသွတ်ꩻ (ရဟန္တာႏ)နဝ်ꩻသွူ။ ကွဲႏတွော့ꩻ အနာႏဂါမ်ႏ' သောတာႏပန်ႏ' ရဟန်ꩻပုထုဇဉ်ႏ မဉ်ႏဒေါ့ꩻဗာႏလို့လို့နဝ်ꩻ ကဗုဲင်စသျင်ႏ သျင်ႏပေႏတသာ ပုဂ္ဂိုလ်ႏဖုံႏနဝ်ꩻ ရာဂ' ဒေါသ' မောဟဖုံႏ ဖေႏနေးကကင်ꩻ ခံႏထိန်ꩻလွေꩻ သီႏလသိက္ခာႏ၊ ခံႏနာႏလွေꩻ ဘုရာꩻအဆွုံꩻအမꩻ ဩဝါဒတဲင် ဗုဲင်သျင်ႏဗုဲင်စင်ꩻ၊ ကွပ်စွဉ်ႏ အဝ်ႏကံကျင်ꩻလွေꩻတွော့ꩻ အင်္ဂါႏ(၆)ပါꩻ ပြဲ့ꩻစွုံႏဒျာႏအကျောင်ꩻ အင်္ဂုတ္တရ အဋ္ဌကထာႏဆရာႏ ထောက်ခံႏဗွောင်ဖွင်ꩻ သျင်ꩻနယ်နုဲင်းနဝ်ꩻသွူ။ ပေါႏရေႏမတ် လူႏသင်္ဃာႏ(လူႏသံဃိက)နဝ်ꩻတဲတဲ့ အင်္ဂါႏသော' ထမုဲင်ꩻထမီꩻသော လွိုက်ခရာႏ၊ ယူႏခရာႏ တလိုႏတဝ်းဒွုမ် (သံဃေ ဒိန္နံ မဟပ္ဖလံ) ပေါႏလူႏသင်္ဃာႏနဝ်ꩻတဲ့ အကျိုꩻတန်လဲဉ်းဒျာႏရင်ꩻနဝ်ꩻသွူ။

ထာꩻလူႏ(ဒါႏန)အကျိုꩻ မျက်မောက်ယိုခါ (၄)ပါꩻ[မွဉ်းဖျင် | မွဉ်းဖျင်အရွီးခိုႏ]

လိုꩻကလူႏတန်ꩻဒါႏထာꩻနဝ်ꩻ- ၁။ ကောရက်သားလွိုင်ႏအာ (မဲ့ငါမေတ္တာႏတန်) ၂။ ဝင်ꩻလွဉ်လယ်ႏ လွဉ်ထေ့သားအာ ၃။ ကျောႏစော်ꩻ ထင်ႏသျာꩻ မဉ်ꩻအွီႏလွီးဟွမ် ၄။ ပရိသတ်အမျာꩻခြာ မဲ့ငါတင်ႏ၊ မဲ့ငါဗန်။ လꩻထွူထာꩻလူႏ အကျိုꩻယိုခါ (၄)ပါꩻနောဝ်ꩻသွူ။ (စိုးငါ ပန်ငါတာႏနဝ်ꩻတဲ့ ဒေါ့ꩻနယ်မဒါႏ အာငါႏနောဝ်ꩻသွူ။)

ဒါႏနအကျိုꩻ အမျိုꩻမျိုꩻအချွုတ်[မွဉ်းဖျင် | မွဉ်းဖျင်အရွီးခိုႏ]

၁။ ဒါနံ သဂ္ဂဿ သောပါနံ - ဒါႏနနဝ်ꩻ ထွာသင်ႏဝင်ႏတဒေါင်၊ ထောင်ထင်ႏအီလူꩻခမ်း။ ၂။ ဒါနံ ပါထေယျ မုတ္တမံ - ဒါႏနနဝ်ꩻ ထွာရိက္ခာႏလွမ် အယံစား။ ၃။ ဒါနံ ဥဇုဂတံ မဂ္ဂံ - ဒါႏနနဝ်ꩻ ထွာတဖူꩻစွဉ်ႏကရွဉ်း။ ၄။ ဒါနံ မောက္ခပဒံ ဝရံ- ဒါႏနနဝ်ꩻ လꩻထွိုက်အီ မဂ်ဖိုလ်ႏနိဗ္ဗာန်ႏ။ ၅။ ဒါနံ ဣဿရ သမ္ဘူတံ- ဒါႏနနဝ်ꩻ မာꩻထွာဖေႏဒါႏ ဝင်ꩻအတန်အကယ်ႏ။ ၆။ ဒါနံ ဘောဂေ ဥပဋ္ဌိတံ- ဒါႏနနဝ်ꩻ မာꩻထွာဖေႏဒါႏ ဥစ္စာႏစေꩻစိန်ႏ။ ၇။ ဒါနံ အတ္တာနုရက္ခဉ္စ- ဒါႏနနဝ်ꩻ ရဲခါꩻချာဖေႏ အဗွေႏနမ်း။ ၈။ ဒါနံ သုခပဝဍ္ဎနံ- ဒါႏနနဝ်ꩻ မာꩻတိုꩻပွါꩻဖေႏဒါႏ ချမ်ꩻသာႏအမျိုꩻမျိုꩻ-စတဲင်နုဲင်းနောဝ်ꩻဖုံႏသွူ။ "ဒါနတော ဘောဂဝါ-ကွပ်လူႏတန်ꩻထာꩻတဲင် စေꩻစိန်ႏလွိုင်ႏအာ"ကရိုꩻနဝ်ꩻအတွိုင်ꩻ ဒါႏနကုသိုလ်ႏမဉ်ႏပါနဝ်ꩻ ထွာစွဉ်ႏဘဝမုဲင်ꩻတဲ့ယဝ်း အံႏအွꩻဗာႏဟဝ်၊ ကွဉ်ကꩻဗာႏဟဝ်၊ အုံဗာႏဟဝ်။ လိုꩻတွမ်ႏရိုꩻမွုန်း တိရစ္ဆာန်ႏ ဖိုးပနား-စတဲင်နုဲင်းနဝ်ꩻဖုံႏတဲ့ ဒါႏနကုသိုလ်ႏကံႏကွာႏ၊ ဒါႏနကုသိုလ်ႏကံႏ ကပါဒါႏ တိရစ္ဆာန်ႏနောဝ်ꩻ ယပ်ꩻတဲ့ တပေါႏယပ်ꩻဗာႏတဝ်း၊ အံႏတဲ့ အံႏဗာႏဟဝ်၊ ဒါႏနကုသိုလ်ႏကံႏ တပါတဝ်း တိရစ္ဆာန်ႏဖုံႏနဝ်ꩻ ယပ်ꩻတဲ့ကယပ်ꩻ၊ အံႏတဲ့ တအံႏဗာႏဟဝ်တဝ်း၊ အကွာႏနုဲင်းနဝ်ꩻသွူ။ ဖေႏနေးကထွာဘုရာꩻနောဝ်ꩻ ဖြဲ့ꩻဗာႏ (မာꩻဗွေဗာႏ)ပါႏရမီႏ အပါꩻတဆီ

ပါႏရမီႏ အပါꩻတဆီ[မွဉ်းဖျင် | မွဉ်းဖျင်အရွီးခိုႏ]

ကရိုꩻနောဝ်ꩻ- ၁။ ဒါနပါရမီ ၂။ သီလပါရမီ ၃။ နိက္ခမပါရမီ ၄။ ပညာပါရမီ ၅။ ဝီရိယပါရမီ ၆။ ခန္တီပါရမီ ၇။ သစ္စာပါရမီ ၈။ အဓိဋ္ဌာနပါရမီ ၉။ မေတ္တာပါရမီ ၁၀။ ဥပေက္ခာပါရမီ ထာꩻမာꩻကထွာအီဘုရာꩻ ပါရမီႏအပါꩻဆီကိုနဝ်ꩻ "ဒါႏန"နဝ်ꩻ ထွာစွဉ်ႏအဓိက အထျꩻသွတ်ꩻတပါꩻ၊ မာꩻဒါႏနမꩻ အီႏခြွေခြာႏချမ်ꩻသာႏ၊ မဉ်ႏခြွေခြာႏချမ်ꩻသာႏနဝ်ꩻမꩻ အံႏအွꩻတာႏ နန်းဗာႏတဝ်း၊ အံႏအွꩻတာႏ မဉ်ႏတနန်းဗာႏတဝ်းမꩻ မာꩻထာꩻမာꩻထွာယိုꩻ၊ အောင်ႏမျင်ႏယိုꩻ၊ ကွပ်နဝ်ꩻမꩻ ဒါႏနနဝ်ꩻ ထွာဗာႏအဓိက အထျꩻသွတ်ꩻနဝ်ꩻသွူ။ ဥပမာႏ- ပါꩻတဖြာꩻနဝ်ꩻ ထာꩻထမ်ႏတဲ့ ကသမ်းထွူႏ၊ ထာꩻတဲ့ ကမ်သးလျား၊ တဖူꩻတဲ့ ကသမ်းညာꩻ၊ လွေꩻတဖူꩻသား ပါꩻတဖြာꩻနဝ်ꩻ ထာꩻအံႏတွမ်ႏထီ မဉ်ႏတအီပါတဝ်းနောဝ်ꩻ တဖူꩻလောင်းဟ အီႏဒုက္ခတကားမုဲင်ꩻ၊ ဝွေꩻကရေႏလွေꩻဒါႏ အရပ်တဲ့ တောႏတောႏ တတွိုႏလွေꩻနွောင်ꩻတောဝ်း။ အပီဗွိုန်နဝ်ꩻနေနေ၊ မနုဿာႏ-လိုꩻပိုစတဲင် သꩻသားသတ္တဝါႏသီးဖုံႏယိုတဲ့ ကထမ်ႏဗာႏ ခန္ဓာႏတာႏဝွန်ႏနဝ်ꩻ ထွူႏမွေးစွဉ်ႏထာꩻ၊ လောဘ' ဒေါသ' မောဟ' မာႏန-စတဲင် မေႏတဆီပုဲင်တပြုံႏ ခိုးဒျားတဖဲ့ꩻတဲင် လျားမွေးစွဉ်ႏထာꩻ၊ ပုထုဇဉ်ႏသီး ကအဝ်ႏထောင်လွေꩻဒါႏ သံႏသရာႏတဖူꩻနဝ်ꩻတဲ့ ညာꩻမွေးစွဉ်ႏထာꩻ၊ ကအဝ်ႏထောင်လွေꩻဒါႏ သံႏသရာႏတဖူꩻသား ဖြားဆားတန်ပေႏ ကားကအဝ်ႏဖုံႏနဝ်ꩻ "ဒါႏန"ကရိုꩻဒါႏ စရိပ်ရိက္ခာႏ မဉ်ႏတပါလွေꩻတဝ်းနဝ်ꩻ သံႏသရာႏအကိုယို မော့ꩻဗာႏထာꩻဒုက္ခအစားစား၊ မော့ꩻဗာႏထာꩻခိုးလျားအမျိုꩻမျိုꩻ၊ ကအီႏတွိုႏလွေꩻဗာႏ ထာꩻချမ်ꩻသာႏစဲစ်မန်ႏ နိဗ္ဗာန်ႏသူꩻနဝ်ꩻတဲ့ အောဝ်ႏညာꩻတန်ဒျာႏနောဝ်ꩻသွူ။ ကွပ်ပွိုးနောဝ်ꩻမꩻ သံႏသရာႏအကို မူႏခိုတန်ပေႏ ယံဖေႏကသက်သာႏဖ ဒုက္ခအမျိုꩻမျိုꩻနဝ်ꩻ ကျိုꩻစာꩻမာꩻလွ ဒါႏနကုသိုလ်ႏနဝ်ꩻနော။ မဉ်ႏမာꩻကုသိုလ်ႏနောဝ်ꩻ အရေꩻတန် စေႏတနာႏ၊

စေႏတနာႏ အဝ်ႏ(၃)ပါꩻ[မွဉ်းဖျင် | မွဉ်းဖျင်အရွီးခိုႏ]

၁။ ပုဗ္ဗစေႏတနာႏ (စေႏတနာႏရီး) ၂။ မုဉ္စစေႏတနာႏ (စေႏတနာႏထဝ) ၃။ အပရစေႏတနာႏ (စေႏတနာႏဆုဲင်ꩻ) ယို(၃)ပါꩻသွူ။ ပေါႏမာꩻကုသိုလ်ႏအမျိုꩻမျိုꩻနဝ်ꩻ သꩻစေႏတနာႏ အွဉ်ႏဗာႏနုဲင်းလယို- ၁။ (ပုဗ္ဗေဝ သုမနော ဒါနာ)- ခါးလားကလူႏကတန်ꩻနဝ်ꩻတဲ့ (ခွေအီႏလူႏဗာႏသွူ၊ ခွေအီႏလူႏဗာႏသွူ)ယူႏယူႏကအီႏလူႏဗာႏနဝ်ꩻတဲင် သꩻရောင်းသꩻရေꩻရီးဗာႏ။ ၂။ (ဒဒံ စိတ္တံ ပသာဒယေ)- ကအဝ်ႏလူႏ၊ ကအဝ်ႏကပ်တွင်ꩻနဝ်ꩻတဲ့ (ခွေလူႏဗာႏသွူ၊ ခွေလူႏဗာႏသွူ) ယူႏယူႏကလူႏဗာႏနဝ်ꩻတဲင် စွုမ်းသွိုꩻအာႏတက် နစ်သက်အာႏရꩻ သꩻကီညိုႏမုꩻ ဖေႏနေးကထွာဗာႏ။ ၃။ (ဒတွာ အတ္တမနော ဟောတိ)- တိန်ႏလူႏတန်ꩻထွူနဝ်ꩻတဲ့ (ခွေလူႏဗာႏထွူလဲဉ်း၊ ခွေထာꩻလူႏ အောင်ႏမျင်ႏလဲဉ်း)ယူႏယူႏ ထာꩻလူႏအောင်ႏမျင်ႏထွူနဝ်ꩻတဲင် စွုမ်းသွိုꩻအာႏတက် နစ်သက်သꩻရေꩻဗာႏ။ စေႏတနာႏယို(၃)ချက် မဉ်ႏပြဲ့ꩻစွုံႏနဝ်ꩻမꩻ ထွာထာꩻလူႏထွန်း၊ ထွာထာꩻလူႏအကျိုꩻတန်၊ ထွာထာꩻလူႏ ဘုရာꩻကျွိုက်နဝ်ꩻသွူ။ ပေါႏမာꩻကုသိုလ်ႏ တမျိုꩻမျိုꩻနဝ်ꩻ အကုသိုလ်ႏ ဖေႏနေးကတွမ်ႏပါရော်ꩻမွုန်းနဝ်ꩻ အွဉ်ႏသတိꩻတိꩻဗာႏ။ ၁။ လိုꩻယင်ဟန်ႏနောဝ်ꩻ ပေါႏအီႏမာꩻသွူ မုꩻလူႏမုꩻတန်ꩻတဲင် "မာꩻဖေႏခွေ ထော့ꩻယာႏအာအာ၊ ဆျာယာႏလိုမ်းလိုမ်းနော"ထွဉ်ႏဒါႏနုဲင်းနဝ်ꩻ၊ မဉ်လꩻဒျာႏမဉ်ꩻ၊ မဉ်လꩻဒျာႏမဉ်ꩻ၊ မဉ်လꩻဒျာႏဂုဏ်ႏပကာႏသန-စတဲင်နုဲင်းနဝ်ꩻတဲ့အဝ်ႏ၊ ထာꩻမာꩻစတဲင်နုဲင်းနဝ်ꩻဖုံႏနဝ်ꩻ ခါးလားကလူႏကာႏ ပုဗ္ဗစေႏတနာႏကို အကုသိုလ်ႏ ပါရော်ꩻထိုꩻလဲဉ်း၊ ပုဗ္ဗစေႏတနာႏ စင်ႏကြယ်ႏတဝ်း (စေႏတနာႏရီး ကြောင်းစင်တဝ်း)။ ၂။ ယင်ဟန်ႏသားနဝ်ꩻ အဝ်ႏမာꩻမုꩻလူႏမုꩻတန်ꩻတွင်ꩻ နယ်ꩻချာနယ်ꩻငါလို့ဝင်ꩻ၊ သꩻခိုးသꩻလျားလို့ဝင်ꩻ-စတဲင် အဆင်ႏပြေႏမုꩻတအဲဉ်ထဝ်းဖုံႏ၊ ကုသိုလ်ႏဝင်ႏ မဉ်ႏလꩻအာတဲ့ လောဘထွာ၊ ကုသိုလ်ႏဝင်ႏ မဉ်ႏလꩻဆေ့ꩻတဲ့ သꩻကုဲင်တေ့ꩻ-စတဲင်နုဲင်းနဝ်ꩻဖုံႏနဝ်ꩻ ကလူႏကတန်ꩻတွင်ꩻ မုဉ္စစေႏတနာႏကို (လောဘ' ဒေါသ' မာန-စတဲင်) အကုသိုလ်ႏဖုံႏယို ပါရော်ꩻထိုꩻလဲဉ်း၊ မုဉ္စစေႏတနာႏ စင်ႏကြယ်ႏတဝ်း (စေႏတနာႏထဝ ကြောင်းစင်တဝ်း။) ၃။ ယင်ဟန်ႏသားနဝ်ꩻ မုꩻလူႏမုꩻတန်ꩻထင်ႏထွူတဲင် လိုႏဖြော်ဒျာႏနီတဖဲ့ꩻ၊ ရွဉ်ကုသိုလ်ႏဝင်ႏ လꩻဆေ့ꩻတဲင် သꩻကုဲင်တေ့ꩻဒျာႏတဖဲ့ꩻ၊ ရေႏဆေ့ꩻဆေ့ꩻတဲ့ လို့အာတမွိုꩻတမာꩻထိုꩻထာꩻတဖဲ့ꩻ စတဲင်နုဲင်းနဝ်ꩻတဲင် သꩻချမ်ꩻသာႏတဝ်း၊ ဟွုန်လောႏကာႏချာ ဥစ္စာႏရွဉ်တောင်ꩻ၊ မုꩻလူႏမုꩻတန်ꩻ ထွူအောင်ႏမျင်ႏသွူတဲ့ သꩻပျောႏသွင်ႏမုꩻ တအဲဉ်ထဝ်း-စတဲင်နုဲင်းနဝ်ꩻဖုံႏနဝ်ꩻ လူႏတန်ꩻထွူ အပရစေႏတနာႏကို အကုသိုလ်ႏဖုံႏယို ပါရော်ꩻထိုꩻလဲဉ်း၊ အပရစေႏတနာႏစင်ႏကြယ်ႏတဝ်း (စေႏတနာႏဆုဲင်ႏ ကြောင်းစင်တဝ်း)။ အကုသိုလ်ႏ မဉ်ႏပါရော်ꩻ၊ စေႏတနာႏ မဉ်ႏတကြောင်းစင်တဝ်းနောဝ်ꩻ အကျိုꩻတဲ့ တပေါႏတန်တဝ်း၊ အကျိုꩻဖေႏကီတဲ့ အဟဝ်ပါ အကုဲင်ပါ၊ ရော်ꩻရော်ꩻရယ်ꩻရယ်ꩻတဲင် "ချမ်ꩻသာႏတပယ်ꩻ-ဆင်ꩻရယ်ꩻတကျပ်"အဝ်ႏဒုက္ခမပ်မပ်နောဝ်ꩻသွူ။ ကွပ်နောဝ်ꩻမꩻ မဉ်ႏမာꩻသွူကုသိုလ်ႏနဝ်ꩻ စေႏတနာႏ(၃)ပါꩻ ကြောင်းကြောင်းစင်စင် သန်သန်တလာလာ ယံကထွာနဝ်ꩻ နေးတွမ်ႏဉာဏ်ႏသတိꩻ အဝ်ႏလိုႏမာꩻဒါႏဒါႏငါႏ မရေႏမရာႏနဝ်ꩻသွူ။

ဒါနကဗျာ[မွဉ်းဖျင် | မွဉ်းဖျင်အရွီးခိုႏ]

- သံႏသရာႏအကို - မူႏခိုတန်ပေႏ ခန္ဓာႏနီနမ်း - ကကမ်းအီလွေꩻ အုံအဝ်ႏကွဉ်ကꩻ - အံႏအွꩻမာꩻဖေႏ ယပ်ꩻအာငါႏ - ခန္ဓာႏနမ်းအရေꩻ။ - ကွုတ်ဖြားဆာသီ - ပူလီခွိုꩻငါႏ ယံလꩻနိဗ္ဗာန်ႏ - ဓိဋ္ဌာန်ႏကျိုꩻစာꩻ လူႏတန်ꩻခါꩻလွ - ဒါႏနရိက္ခာႏ နုဲင်းနဝ်ꩻမꩻ - ခွꩻသꩻ စိုးပန်ငါ။ - ကုသိုလ်ႏခွုမ်မာꩻ - သိုမ်ပါꩻစေႏတနာႏ စင်ႏကြယ်ႏမျိုꩻမꩻ - ကျိုꩻလꩻလွိုပါꩻ ရေႏခါꩻဓိဋ္ဌာန်ႏ - နိဗ္ဗာန်ႏချမ်ꩻသာႏ ကံႏဆꩻငါႏ - လꩻဗာႏ ယိုꩻယိုꩻမာꩻ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ပုညကြိယာႏဝတ္ထုပါꩻဆီ
  2. ပအိုဝ်ႏလိတ်လုဲင်ꩻစွစ်ꩻလီတာႏအစွိုꩻ