ဓမ္မဒေသနာ

ကဟော်ꩻတရာꩻနဝ်ꩻ ဟဲ့ꩻ"ဓမ္မဒေသနာ"နောဝ်ꩻသွူ။ "ဟော်ꩻတရာꩻ"ကရိုꩻနဝ်ꩻ- ဝင်ꩻဖေႏနေး ကလꩻလောကီꩻ လောကုတ္တရာႏ ထာꩻချမ်ꩻသာႏတဲင် ဟော်ꩻဖေႏတရာꩻ၊ ဝင်ꩻအုံလွဉ်ꩻ အဝ်ႏလွဉ်ꩻ ဒေါ့ꩻဖြဝ်းလွဉ်ꩻ ဖေႏနေးကဒါႏတဲင် ဟော်ꩻဖေႏတရာꩻ၊ ဝင်ꩻထာꩻသေထာꩻဒါႏ ဉာဏ်ႏပညာႏ ဖေႏနေးကအဝ်ႏ၊ ဖေႏနေးကယိန်းအာတဲင် ဟော်ꩻဖေႏတရာꩻ၊ ဝင်ꩻသꩻဖေႏနေးကစွူ၊ ဝင်ꩻသꩻဖေႏကချမ်ꩻသာႏတဲင် ဟော်ꩻဖေႏတရာꩻ၊ နီနမ်းတဲ့ ကုသိုလ်ႏတရာꩻ ယံကတိုꩻပွါꩻတဲင် ဟော်ꩻဖေႏဝင်ꩻတရာꩻ-စတဲင် ကဟော်ꩻတရာꩻအမျိုꩻမျိုꩻ၊ ကဟွိုႏမော် အမျိုꩻမျိုꩻဖုံႏနဝ်ꩻ ထွာ"ဓမ္မဒေသနာ"လွဉ်းလွဉ်းနောဝ်ꩻသွူ။ "တောင်ꩻခါꩻ" ကချꩻလိတ်၊ ကတဲမ်းလိတ်၊ ကဖေႏဩဝါဒ ဆုမ္မꩻဝင်ꩻ၊ ကသွဉ်ဖေႏဝင်ꩻ အပဲစ်ကကင်ꩻဒါႏ စူပညာႏ၊ ဖြောင်းပညာႏ၊ ကသွဉ်ဖေႏ ထာꩻဒါႏအမျိုꩻမျိုꩻဖုံႏနဝ်ꩻတဲ့ ထွာ"ဓမ္မဒေသနာ"နောဝ်ꩻနေနေသွူ။ မဉ်ꩻဖေႏနေးကကျောႏ၊ လာဘ်ဖေႏနေးကအာတဲင် နေးတွမ်ႏသꩻယုတ်သꩻညမ်းတွော့ꩻ ကဟော်ꩻတရာꩻနဝ်ꩻ အကျိုꩻတတန်တဝ်း။ ရေႏရွယ်ႏအွဉ်ႏသꩻ ဝင်ꩻဖေႏနေးကလꩻ ကုသိုလ်ႏ၊ ဝင်ꩻဖေႏနေးကတွိုႏနိဗ္ဗာန်ႏ နေးတွမ်ႏစေႏတနာႏမဲဉ်ႏ သꩻမျတ်တဲင် ဟော်ꩻတရာꩻနောဝ်ꩻမꩻ အကျိုꩻတန်နောဝ်ꩻသွူ။ "ဓမ္မဒေသနာကဗျာ" - ဟောဝ်ဖဲ့ꩻကရိုꩻ - အမျိုꩻချမ်ꩻသာႏ ယံဖေႏကလꩻ - အွဉ်ႏသꩻဟော်ꩻကျာꩻ ရေႏလွေꩻဓိဋ္ဌာန်ႏ - နိဗ္ဗာန်ႏသူꩻဒျာႏ ဟော်ꩻနယ်ပျꩻ - ဓမ္မ ဒေသနာ။