နီပအိုဝ်ႏလိုꩻမျိုꩻကလꩻချာ
"နီပအိုဝ်ႏလိုꩻမျိုꩻ ကလꩻချာဗာႏ ပိဋကတ်သွံဘွုံႏသမဲင်ꩻအအဲဉ်ႏ" ပအိုဝ်ႏစွိုးခွိုꩻအစွိုꩻချွုတ် (PNO)ဥက္ကဋ္ဌ ဖြားတန်အောင်ႏခမ်းထီနောဝ်ꩻ ဖေႏကမော့ꩻခွဲ အုံကွံဒေါ့ꩻရီနွောင်ꩻတွမ်ႏ နဲင်ႏငံႏတောႏခေါင်းဆောင် အကဲႏအတန်ဖုံႏတဲင် နေင်ႏ ၁၃၅၄-ဗာႏ၊ ဝါႏဆိုႏလာဆန်ꩻ(၆)နီꩻ (၅-၇-၁၉၉၂)နီꩻ အောဝ်ႏဝေင်ꩻတောင်ႏကီꩻ ထန်ႏလင်ꩻဝေင်ꩻရန်ႏတကုန်ႏ လင်ꩻချꩻခင်ႏလမ်း အင်းယားအကွက်ꩻ(၁၆)ထဉ်ႏတယ်ꩻခင်ႏလမ်းကိုနောဝ်ꩻသွူ။ ဝါႏဆိုႏလာဆန်ꩻ (၇-၈)နီꩻ (၇-၇-၉၂)နီꩻ စွိုးခွိုꩻခေါင်းဆောင်တန် ဖြားတန်စင်ꩻဖါအောင်ႏခမ်းထီနောဝ်ꩻ လွေꩻဝုဲင်ႏကေႏညိုႏ ဝေင်ꩻရန်ႏတကုန်ႏကို ကအောဝ်ႏဒါႏ ဘုရာꩻတံꩻခိုꩻတန်ဖုံႏထွူတွော့ꩻ လွေꩻကေႏညိုႏပါ ဝေင်ꩻနယ်ႏဗဟန်း သာသနာ့ရိပ်သာတဖူꩻဖဲ့ꩻ ကအောဝ်ႏဒါႏ တောင်ႏကီꩻကျောင်ꩻတွိုက် ပဓာနနာယကဗွေႏဆရာႏတောႏ အဂ္ဂမဟာပဏ္ဍိတ ဘဒ္ဒန္တဥတ္တမနောဝ်ꩻသွူ။
ဝါႏဆိုႏလာဆန်ꩻ(၉)နီꩻ၊ (၈-၇-၉၂)နီꩻနောဝ်ꩻ စွိုးခွိုꩻခေါင်းဆောင်တန် ဖြားတန်စင်ꩻဖါအောင်ႏခမ်းထီ လွေꩻမော့ꩻခွဲအုံကွံတွမ်ႏ နဲင်ႏငံႏတောႏငြိမ်ဝပ်ပိပြားမှု တည်ဆောက်ရေးအဖွဲ့ အွဉ်အကိုရေꩻ(၁) အင်းယားအကွက်(၁၈) လက်ခံႏထဉ်ႏခင်ႏလမ်းကိုတဲင် အုံမွန်းဆွေꩻနွေꩻလွေꩻ ခမ်းထီအရေꩻ၊ ဘာႏသာႏသာႏသနာႏ ထင်ႏထိုရေꩻကိစ္စဖုံႏနောဝ်ꩻသွူ။ ဝါႏဆိုႏလာဆန်ꩻ(၁၀)နီꩻ (၉-၇-၉၂)နီꩻ စွိုးခွိုꩻခေါင်းဆောင်တန် ဖြားတန်စင်ꩻဖါအောင်ႏခမ်းထီနောဝ်ꩻ လွေꩻဝုဲင်ႏကေႏညိုႏ ဝေင်ꩻပဂိုꩻကိုကအောဝ်ႏဒါႏ တံꩻခိုꩻတန်ဘုရာꩻဖုံႏထွူတဲင် ဝါႏဆိုႏလာဆန်ꩻ(၁၁-၁၂)နီꩻနောဝ်ꩻ စွိုးခွိုꩻခေါင်းဆောင်တန် ဖြားတန်စင်ꩻဖါအောင်ႏခမ်းထီ အုံပဆားခိန်ႏတွင်ꩻ အာႏရွုံႏပျုလွေꩻ ရတနာႏသွံပါꩻ၊ မွိုးဖါဆရာႏသမာꩻဂွုဏ်ႏ၊ ခွိုꩻနွယ်ႏခမ်းသားမွိုးဖါကေꩻဇူꩻအခိန်ႏကို ဝွေꩻဖြားဆန္ဒပေါႏထန်ႏလွဉ် မဉ်ႏပင်ꩻပူႏဇောႏဗာႏ ပိဋကတ်သွံဘွုံႏနောဝ်ꩻ နမ်းလဲ့ချံꩻသာႏ သꩻလလဲ့ချမ်ꩻသာႏ ခမ်းထီလဲ့ အီႏငိမ်ꩻချံꩻသာႏယာႏလွဉ်ကရိုꩻနောဝ်ꩻ ဝွေꩻဖြားသွိုန်ႏဖူꩻသꩻကို မောင်ꩻကော့ꩻနုဲင်းနောဝ်ꩻသွူ။
ဝါႏဆိုႏလာဆန်ꩻ (၁၄)နီꩻ (၁၃-၇-၉၂)နီꩻ မွူးပင်ꩻ (၃)နားရီႏ ဗꩻတွိုႏလွေꩻ (၅း၀၀)အခိန်ႏ ဝင်ꩻရန်ႏတကွုန်ႏ အင်းယားအကွက်(၂၀)လက်ခံႏထဉ်ႏခင်ႏလမ်းကို စွိုးခွိုꩻခေါင်းဆောင်တန် ဖြားတန်စင်ꩻဖါအောင်ႏခမ်းထီ လွေꩻမော့ꩻခွဲဆွေꩻနွေꩻတွမ်ႏ နိုင်ငံတော်ငြိမ်ဝပ်ပိပြားမှု တည်ဆောက်ရေးအဖွဲ့ဥက္ကဋ္ဌ ဗိုလ်ချုပ်ကြီးသန်းရွှေ (ယိုခါ)ဗိုလ်ချုပ်မှူးကြီးသန်းရွှေ၊ အွဉ်အကိုရေꩻကဲႏ(၁)၊ ပါတွမ်ႏနဲင်ႏငံႏတောႏ အကဲႏအတန်ဖုံႏနောဝ်ꩻသွူ။ ကမော့ꩻခွဲးအုံကွံဒါႏလို့ဝင်ꩻအကို ပအိုဝ်ႏစွိုးခွိုꩻအစွိုꩻချွုတ် (PNO)ဥက္ကဋ္ဌ ဖြားတန်စင်ꩻဖါအောင်ႏခမ်းထီ ကမဲဉ်ပင်ꩻပူႏဇောႏကေႏညိုႏဒါႏ ပိဋကတ်သွံဘွုံႏနောဝ်ꩻ နိုင်ငံတော်ငြိမ်ဝပ်ပိပြားမှု တည်ဆောက်ရေးအဖွဲ့ဥက္ကဋ္ဌ၊ နဲင်ႏငံႏတောႏအကဲႏအတန်ဖုံႏ ထူႏတာႏဝွန်ႏတဲင် အီႏလူႏလွေꩻဖေႏအကျောင်ꩻ ဖေႏလွေꩻတွမ်ႏဖြောင်းကတိꩻတွော့ꩻ ဟွိုန်ထွꩻဗာႏ နဲင်ႏငံႏတောႏအကဲႏအတန် မေတ္တာႏစေႏတနာႏ အီႏလူႏဖေႏပိဋကတ်သွံဘွုံႏနုဲင်းယိုတဲင် ဟွိုန်ဟောဝ်နိစ်သက် စွုမ်းသꩻငါႏနောဝ်ꩻသွူ။ လွောင်ႏဗူႏရေꩻ ကအောဝ်ႏထွူလဲဉ်းဒါႏ ဖူးဝေးခမ်းရင်ꩻသား မဉ်ႏကေႏညိုႏဗာႏ ပိဋကတ်သွံဘွုံႏယိုနောဝ်ꩻ ခမ်းရင်ꩻသားအတာႏ အကျိုꩻလဲ့အီႏလꩻအာ၊ ခမ်းထီလဲ့ အီႏလွိုင်ႏကွိုန်ꩻသာႏယာႏလွဉ်အကျောင်ꩻ နဲင်ႏငံႏတောႏအကဲႏအတန် ကသွုပ်ဒေါ့ꩻလွေꩻဖေႏ ငေါဝ်းမင်္ဂလာႏနုဲင်းယိုနောဝ်ꩻ ဟွိုန်ထွꩻဗာႏတဲင် နီပါꩻနမ်းသꩻ ချံꩻသာႏထွူတကာႏတောဝ်း ပအိုဝ်ႏလိုꩻမျိုꩻအတာႏ ထွာစွဉ်ႏမွူးနီꩻထူꩻမွူးနီꩻမျတ်တနီꩻနောဝ်ꩻသွူ။
ဝါႏဆိုႏလောင်း(၄)နီꩻ၊ (၁၈-၇-၉၂)နီꩻနောဝ်ꩻ မွူးယာခိုႏ (၁၀)နားရီႏအခိန်ႏကို စွိုးခွိုꩻခေါင်းဆောင်တန် ဖြားတန်စင်ꩻဖါအောင်ႏခမ်းထီ လွေꩻထူႏလက်ခံႏပိဋကတ်သွံဘွုံႏ ကမ္ဘာအေးကွုံꩻလောင်းကို ကအောဝ်ဒါႏ သာႏသနာႏရေꩻဝွန်ႏတန်ဌာႏန ရွုမ်ꩻခန်ꩻကိုနောဝ်ꩻသွူ။ ကလွေꩻလက်ခံႏထူႏဒါႏ ပိဋကတ်သွံဘွုံႏကိုနောဝ်ꩻ သာႏသနာႏရေꩻ ဒု-ဝွန်ႏတန်တွမ်ႏ ပုဂ္ဂိုလ်ႏလိုꩻတန်အဖြာꩻ(၂၀)နောဝ်ꩻ ပိဋကတ်သွံဘွုံႏလိတ်အုပ်ယို အွဉ်ႏဒင်ႏအုပ်ꩻခံꩻလောင်းတွော့ꩻ ဖေႏအပ်လွေꩻ ပအိုဝ်ႏစွိုးခွိုꩻအစွိုꩻချွုတ် ဥက္ကဋ္ဌ ဖြားတန်စင်ꩻဖါအောင်ႏခမ်းထီထျꩻနောဝ်ꩻသွူ။ ကဖေႏအပ်လူႏလွေꩻဒါႏ ပိဋကတ်လိတ်စောင်ႏနုဲင်းယိုနောဝ်ꩻ သာႏသနာႏရေꩻ ဒုတိယဝွန်ႏတန်အနေႏ လူႏလွေꩻဖေႏမွေးတောဝ်း၊ နဲင်ႏငံႏတောႏအကဲႏအတန် လူႏလွေꩻဖေႏဒျာႏတဲင် ရိုႏရိုႏသေႏသေႏ ယံသဲင်ꩻပူႏဇောႏသွော့၊ မဉ်ႏသဲင်ꩻမာꩻပွာꩻစွစ်ꩻလီဖေႏနောတ်ꩻ ခမ်းထီလဲ့ အီႏလွိုင်ႏကွိုန်ꩻထင်ႏထို သာႏယာႏလွဉ်၊ ကလူႏဗာႏ ပိဋကတ်လိတ်စောင်ႏနုဲင်းယို ပုဂ္ဂိုလ်ႏလိုꩻလမ်း ကလူႏခံႏနောဝ်ꩻ အရီးသွတ်ꩻ အလူႏခံႏပုဂ္ဂိုလ်ႏယို ထွာဒျာႏပအိုဝ်ႏစွိုးခွိုꩻအစွိုꩻ (PNO)ဥက္ကဋ္ဌ ဖြားတန်စင်ꩻဖါအောင်ႏခမ်းထီအကျောင်ꩻ သာႏသနာႏရေꩻဝွန်ႏတန်ဌာႏန ကဒေါ့ꩻထန်ႏဒါႏ ငေါဝ်းမင်္ဂလာႏယို ဟွိုန်ဟောဝ်နိစ်သက် စွုမ်းသꩻငါႏနောဝ်ꩻသွူ။
ဝါႏဆိုႏလောင်း (၅)နီꩻ (၁၉-၇-၉၂)နီꩻ နဲင်ႏငံႏတောႏအကဲႏအတန် ကလူႏဖေႏဒါႏ ပိဋကတ်သွံဘွုံႏယို အောဝ်ႏဝေင်ꩻရန်ႏတကွုန်ႏ ဒင်ႏသဲင်ꩻတွမ်ႏသင်္ဘောꩻကျောင်ႏတဲင် ကထွိုင်ႏတွိုႏသဲင်ꩻ ဟုဲင်ꩻဟိုꩻသင်္ဘောꩻကျောင်ႏကွင်ꩻကိုနောဝ်ꩻ (ဟုဲင်ꩻဟိုꩻသင်္ဘောꩻကျောင်ႏကွင်ꩻကို ကအောဝ်ႏဒါႏ) တာႏဝွန်ႏအောဝ်ႏပုဂ္ဂိုလ်ႏလိုꩻတန်ဖုံႏ မင်္ဂလာႏဖေႏငေါဝ်းနုဲင်းယို- "ဟန်ႏနီꩻ တဖူꩻလွေꩻသား ကထုမ်းဒါႏသင်္ဘောꩻကျောင်ႏယိုတဆွိုင်ꩻနောဝ်ꩻ ကံႏယံဟောဝ်သွော့ဝင်ꩻ ပငါပရာꩻ"ဒေါ့ꩻထန်ႏနုဲင်းနောဝ်ꩻသွူ။ ပိဋကတ်သွံဘွုံႏ ကထွိုင်ႏတွိုႏသဲင်ꩻ ဝေင်ꩻတောင်ႏကီꩻနောဝ်ꩻ တနꩻစွဉ်ႏ မွူးနီꩻအာႏဇာႏနီႏနီꩻ မွူးရောဝ်ꩻခိုႏ (၁၀း၃၇)မိနစ်အခိန်ႏ တဲက်ဆဲင်ႏတနꩻစွဉ်ႏ အောဝ်ႏထွို့ꩻဥဩငေါဝ်းခိန်ႏနောဝ်ꩻသွူ။ ဝေင်ꩻတောႏတန်တောင်ႏကီꩻကို ပိဋကတ်သွံဘွုံႏ သဲင်ꩻသတင်ꩻသွုံꩻနီဟာ အခိန်ႏတွင်ꩻ ကအီႏပင်ꩻသဲင်ꩻနောဝ်ဒါႏ ပိဋကတ်သွံဘွုံႏကိစ္စယို (PNO)ဥက္ကဋ္ဌ ဖြားတန်စင်ꩻဖါအောင်ႏခမ်းထီ ဒင်ႏပျꩻဆွေꩻနွေꩻလွေꩻ ဆရာႏတောႏ သံႏဃာႏတောႏထျꩻဖုံႏနောဝ်ꩻသွူ။
ဝါႏဆိုႏလောင်း(၇)နီꩻ (၂၁-၇-၉၂)နီꩻနောဝ်ꩻ ပင်ꩻနောဝ်သဲင်ꩻ လွယ်ကောင်ꩻ ဖုဲင်မွိုန်း၊ မွူးဟာခိုႏ (၇း၀၀)အခိန်ႏ ဖျော်တွိုႏသဲင်ꩻ ဒုံနောင်ခုဲင်း၊ ဝါႏဆိုႏလောင်း(၉)နီꩻ (၂၃-၇-၉၂)နီꩻနောဝ်ꩻ သထွုံႏပေႏ (ဟဲ့ꩻ)ဝေင်ꩻသီႏသဲင်ႏ နဲင်ႏငံႏတောႏဩဝါဒါစရိယ ဇဝနာရာမပရိယတ္တိလိတ်သွဉ်တွိုက် ပဓာနနာယကဆရာႏတောႏ အဂ္ဂမဟာပဏ္ဍိတ ဘဒ္ဒန္တဇဝန သက်တောႏ(၈၈)နေင်ႏဗွေ လွူးဖွာꩻမွူးနီꩻကို ဖြားတန်စင်ꩻဖါအောင်ႏခမ်းထီ ကျွꩻလွေꩻကေႏညိုႏ ဗွေႏဗွန်ဖြား လွူးဖွာꩻမွူးနီꩻတဲင် ပွိုင်းဝွို့တွမ်ႏ နဲင်ႏငံႏတောႏ ကလူႏသဲင်ꩻပိဋကတ်သွံဘွုံႏ ကအီႏသတင်ꩻသွုံꩻသော့ꩻဒါႏ ဌာႏနခင်ႏလမ်းကိစ္စအတာႏ ခံႏထူႏလွေꩻဩဝါဒ ဗွေႏဗွန်ဖြားထျꩻနောဝ်ꩻသွူ။
ပအိုဝ်ႏတစွိုးခွိုꩻလွုမ်း ဆရာႏတကာႏ ပုဂ္ဂိုလ်ႏတန်ဖုံႏဆန္ဒတွမ်ႏ နဲင်ႏငံႏတောႏအကဲႏအတန် ဖေႏနေးကနိစ်သက်စွုမ်းသꩻတဲ့နောဝ်ꩻ၊ သာႏသနာႏအရောင်ႏ ဖေႏကလေတောင်ႏ နုဲင်းမွူးနုဲင်းလာတဲ့နောဝ်ꩻ အောင်ႏမျင်ႏမုꩻ ဖေႏကလꩻနွောင်ꩻအီအတာႏ နေင်ႏ ၁၃၅၄-ဗာႏ၊ ဝါႏဆိုႏဆန်ꩻ(၇)နီꩻ (၅-၈-၉၂)နီꩻ ဝေင်ꩻနယ်ႏတောင်ႏကီꩻ ဝေင်ꩻကျောက်တလွုံꩻတန်ကို ဒေႏသပေါင်ꩻစွုမ်ႏ ဗွေႏရဟန်ꩻသံႏဃာႏဖုံႏ ပအိုဝ်ႏစွိုးခွိုꩻအစွိုꩻချွုတ် (PNO)ဥက္ကဋ္ဌ ဖြားတန်စင်ꩻဖါအောင်ႏခမ်းထီ အခေါဝ်ကွဉ်ႏစဲ့ꩻဌာႏနချွုတ်နမ်းတင် ဗျူဟာမှူး ဒုတိယဗိုလ်မှူးတန်စိုးမြင့်၊ ဝေင်ꩻနယ်ႏတောင်ႏကီꩻ ဝေင်ꩻနယ်ႏငြိမ်ဝပ်ပိပြားမှုအစွိုꩻ ဥက္ကဋ္ဌ ဗိုလ်မှူးတင်ဝင်း၊ ဖြောဝ်ꩻခမ်းနယ်ႏ သာႏသနာႏရေꩻအွဉ်ငါဌာႏန အွဉ်ငါအရာႏအောဝ်ႏပုဂ္ဂိုလ်ႏ ဦးစိုးလှိုင်၊ လောဝ်းဟွိုန်ရေꩻဌာႏနတွမ်ႏ ခမ်းသားသွုပ်သံႏရေꩻ အွဉ်ငါဌာႏန အရာႏအောဝ်ႏပုဂ္ဂိုလ်ႏ ဦးညိုမြင့်သီးဖုံႏနောဝ်ꩻ ပိဋကတ်သွံဘွုံႏယို ကပ်လူႏလွေꩻဗွေႏသံႏဃာႏထျꩻတွမ်ႏ အခန်ꩻအနာꩻနောဝ်ꩻသွူ။
ပိဋကတ်တရာꩻတောႏ ဖေႏကထွန်ꩻကာꩻ၊ ဖေႏကစွစ်ꩻလီအီအတာႏ ပိဋကတ်ကအိႏသတင်ꩻသွုံꩻသော့ꩻခင်ႏလမ်း ကျောင်ꩻကိစ္စနောဝ်ꩻလဲ့ ဆရာႏတွမ်ႏတကာႏ လွောင်ႏလွောင်ႏဗူႏဗူႏ အွဉ်ႏထွော့ညီꩻနွောင်ꩻဝင်ꩻနောဝ်ꩻသွူ။ ပိဋကတ်ကအီႏသတင်ꩻသွုံꩻသော့ꩻဒါႏ ခင်ႏလမ်းယို နမ်းသꩻနီပါꩻ ဖေႏကခွꩻသꩻနွောင်ꩻအီတဲင် ဟဲ့ꩻဖန်လွေꩻဖေႏအမဉ်ꩻ "အောင်ႏဓမ္မစေႏတီႏတောႏ"နောဝ်ꩻသွူ။ လာတောႏလင်ꩻဆန်ꩻ (၁၃)နီꩻ (၉-၉-၉၂)နီꩻနောဝ်ꩻ ဝေင်ꩻကျောက်တလွုံꩻတန်ကို ဖေႏကတယ်ႏဆို့ꩻနွောင်ꩻ အောင်ႏဓမ္မစေႏတီႏ ဗိမာန်ႏတောႏခင်ႏလမ်းအတာႏ ဆရာႏတွမ်ႏတကာႏ မော့ꩻခွဲအုံကွံလို့ဝင်ꩻတွော့ꩻ ကျောက်တလွုံꩻတန် ဘုရာꩻကောင်လောင်း ကအောဝ်ႏဒါႏ ဗဟိုႏဌာႏန ဟံႏကွက်ကို ကအီႏတယ်ႏဆို့ꩻလွေꩻဒါႏ အောင်ႏဓမ္မစေႏတီႏ ဗိမာန်ႏတောႏ ဟံႏခင်ႏလမ်းတွမ်ႏ ကအီႏတယ်ႏဆို့ꩻလွေꩻဒါႏ အရံႏကျောင်ꩻဆောင် ငတ်ꩻဖြုံႏခင်ႏလမ်းအတာႏ ဟံႏကွက်ꩻလဲ့ အွဉ်ႏထွော့နွောင်ꩻနောဝ်ꩻသွူ။ လာတောႏလင်ꩻလောင်း(၉)နီꩻ (၂၀-၉-၉၂)နီꩻနောဝ်ꩻ ဒုံနောင်ပစ်ꩻ ဗွေႏဗွန်ကျောင်ꩻကို လွောင်ႏဗူႏလွေꩻယင်း ဗိမာန်ႏတောႏထွာနွောင်ꩻရေꩻ ဗဟိုႏကောႏမတီႏအစွိုꩻတွမ်ႏ အွိုင်ႏအရန်းကောႏမတီႏထွူတဲင် တသွုပ်ချင်ႏအပ်လွေꩻပါ တာႏဝွန်ႏနောဝ်ꩻသွူ။
နီပအိုဝ်ႏလိုꩻမျိုꩻစူကို ဗုဒ္ဓပိဋကတ်တောႏ ကတွိုႏသဲင်ꩻသတင်ꩻသွုံꩻလွဉ်ဗာႏနုဲင်းယိုနောဝ်ꩻ နိုင်ငံတော်ငြိမ်ဝပ်ပိပြားမှုတည်ဆောက်ရေးအဖွဲ့ဥက္ကဋ္ဌ၊ နဲင်ႏငံႏတောႏအကဲႏအတန်တွမ်ႏ (PNO)ဥက္ကဋ္ဌသီး ကထူႏလွေꩻငိမ်ꩻချံꩻရေꩻ ကထွိုင်ႏထွူနောဝ်ꩻ တဖြာꩻတွမ်ႏတဖြာꩻ မေတ္တာႏတွိုႏလို့ဝင်ꩻတဲင် သွိုန်ႏဖူꩻသꩻရာႏ ဖေႏကခွꩻသꩻတွော့ꩻ နဲင်ႏငံႏတောႏ အကဲႏအတန် ကလူႏဖေႏဒါႏ ပိဋကတ်လိတ်စောင်ႏယို ထွူႏထွူႏတွုမ်တွုမ် အောဝ်ႏလိုႏအွဉ်ႏလွေꩻအတန်ႏဖိုꩻ၊ ငိမ်ꩻချံꩻရေꩻ အထိန်ꩻအမုဲင်ကထွာဒါႏ ပိဋကတ်ကျောင်ꩻဆောင်ယို ထွာစွဉ်ႏနီပအိုဝ်ႏလိုꩻမျိုꩻ အတိတ်ဟောဝ်နိမိတ်ဟောဝ် ယူႏလꩻတောင်ꩻသေꩻ ပိဋကတ်ကျောင်ꩻဆောင်ကရိုꩻနောဝ်ꩻ လိတ်ထွားပရိသတ် ဖေႏကလွူꩻထွား သေထွꩻနွောင်ꩻတွော့ꩻ တတ်နွိုင်ႏသမျ တဲမ်းထန်ႏနယ်ဖေႏဗာႏ နီပအိုဝ်ႏလိုꩻမျိုꩻ ကလꩻချာဗာႏ ပိဋကတ်သွံဘွုံႏ သမဲင်ꩻအအဲဉ်ႏတဗာႏ နုဲင်းဆꩻကီယိုအကျောင်ꩻ ဖေႏသေလွေꩻဗာႏ ခမ်းသားမွိုးဖါသီးဖုံႏ နုဲင်းယိုနောဝ်ꩻသွူ။[၁][၂]