ပတ္တာနုမောဒန
ဝင်ꩻဝွေႏဖန်းဖေႏ ကုသိုလ်ႏတဲင် ကသာႏဓုဆွုမ်ႏနောဝ်ꩻ ဟဲ့ꩻ"ပတ္တာနုမောဒန"နောဝ်ꩻသွူ။ ယင်ဟန်ႏသားနဝ်ꩻ ကတိန်ႏသီတဲင် လွေꩻထွာပိတ္တာႏတဲ့ အဝ်ႏ၊ လွေꩻအံႏမအံႏအဝ်တဲင် မဉ်လꩻနာႏကုသိုလ်ႏ၊ ပေါႏဝင်ꩻဝွေႏဖန်း ကုသိုလ်ႏတဲင် ဝွေꩻသီးသာႏဓုဗာႏ၊ ဝွေꩻသီး လꩻနုဲင်းနုဲင်းကုသိုလ်ႏ၊ လွစ်လꩻထိုꩻ ပိတ္တာႏဘဝ၊ သုခချမ်ꩻသာႏ၊ လꩻစွဉ်ႏဒျာႏ ယိုခါအကျောင်ꩻ ပေတဝတ္ထု ပါဠိအဋ္ဌကထာႏကို ဟော်ꩻသေꩻခါꩻနုဲင်းယိုသွူ။ နီဗွေႏဘုရာꩻစိုးစခါ ခွန်ဗိမ္ဗိသာရ ဖူးဝေးလီꩻဖုံႏ လွေꩻထွာထိုꩻပိတ္တာႏတဲင် အောဝ်ႏမောင်ꩻနာႏ ခွန်ဗိမ္ဗိသာရ ဝွေႏဖန်ႏဖေႏကုသိုလ်ႏ။ ခွန်ဗိမ္ဗိသာရ ကတိန်ႏနာႏကျောင်ꩻ (ဝေဠုဝွန်ႏ)ကျိုꩻနောဝ်ꩻ သံးတဝွေႏဖန်းဖေႏဗာႏတောဝ်း ကုသိုလ်ႏတဲင် ပိတ္တာႏသီးဖုံႏတဲ့ တသာႏဓုဗာႏတောဝ်း။ နုဲင်းမွူးဟာတွော့ꩻ သဲင်ꩻအွဉ်ႏနယ်စွဉ်ႏအနမ်းတဲင် နုဲင်းမွူးရဝ်ꩻတွော့ꩻ ခွန်ထင်ႏလောဝ်းနယ် ဘုရာꩻ၊ နီဗွေႏဘုရာꩻ ဟော်ꩻကျာꩻနယ်ဖေႏ ပိတ္တာႏခရာႏတဲင် ခွန်ဗိမ္ဗိသာရတဲ့ လောင်ꩻယင်းစွဉ်ႏ သွမ်ꩻတလဲင်ႏ။ တွိုႏ(ဒုတိယ) အလဲင်ႏနဝ်ꩻမꩻ ဝွေႏဖန်းဖေႏယင်း ကုသိုလ်ႏတဲင် ပိတ္တာႏသီးဖုံႏတဲ့ သာႏဓုဗာႏ၊ လꩻခန်းထာꩻချမ်ꩻသာႏနဝ်ꩻသွူ။ "ပတ္တာနုမောဒနကဗျာ" - ထူႏတွာတွာသွော့ - ခဲမ်းခွေါ့ကုသိုလ်ႏ ဝင်ꩻဖန်း ဝင်ꩻဖေႏ - ဝင်ꩻရေႏဝင်ꩻရိုꩻ ဖူးဝေးအမျာꩻ - စွုမ်ႏဖြာꩻကျိုꩻလိုႏ ပတ္တာနု - သာႏဓု လꩻယိုꩻယိုꩻ။ [၁][၂]