ပရိယတ္တိပညာႏရေꩻလိတ်ရဲန်ႏ

အနယ်ꩻမဉ်ႏမဲဉ်ႏ , သွဉ်ဖေႏယံယံ , သွဉ်ထူႏယံယံ-ကရိုꩻနဝ်ꩻ

၁။ သွဉ်ဖေႏ ချꩻဖေႏ လိတ်အပုဒ်မုဲင်ꩻတရိုꩻတဝ်း ဆဲင်ႏရာꩻအဓိပ္ပါယ်ႏသဘော်ꩻယို ခြုဲင်းနယ်ဗာႏ။

၂။ သွဉ်ဖေႏ ချꩻဖေႏ လိတ်အပုဒ်မုဲင်ꩻတရိုꩻတဝ်း ဆဲင်ႏရာꩻငဝ်းရီငဝ်းစေပွုံႏစံႏ ပါဗာႏ။

၃။ သွဉ်ဖေႏ ချꩻဖေႏ လိတ်အပုဒ်မုဲင်ꩻတရိုꩻတဝ်း ဆဲင်ႏရာꩻ ငဝ်းသွဉ်ခန်ꩻ ငဝ်းဆွုံꩻမꩻ ပါဗာႏ။

၄။ ကေားသွဉ်ဖေႏသား ဆရာႏပုဂ္ဂိုလ်ႏသီးဖုံႏတဲ့နဝ်ꩻ ကေားသွဉ်ထူႏသား တပဲ့ꩻသီးဖုံႏတဲ့နဝ်ꩻ ပွာꩻအာအာဗာႏ ဗုဒ္ဓါနုဿတိဘာႏဝနာႏ-ယူႏစိဉ်ꩻစာꩻအာအာဗာႏ ဗွေႏမျတ်ဖရာꩻဂုဏ်ႏတောႏ၊ ပွာꩻအာအာဗာႏ မေတ္တာႏဘာႏဝနာႏ-ယူႏစိဉ်ꩻစာꩻအာအာဗာႏ အမျာꩻအကျိုꩻစီꩻပွာꩻ၊ ပွာꩻအာအာဗာႏ အသုဘဘာႏဝနာႏ-ယူႏစိဉ်ꩻစာꩻအာအာဗာႏ လိုꩻသီးနမ်းခြုံအပဲစ်၊ ပွာꩻအာအာဗာႏ မရဏဿတိဘာႏဝနာႏ-ယူႏစိဉ်ꩻစာꩻအာအာဗာႏ ထာꩻသီသဘော်ꩻတရာꩻဖုံႏနဝ်ꩻသွူ။

သာႏသနာႏခေ့ꩻထိုမားအီနွောင်ꩻအကျောင်ꩻ(၁၅)ပါꩻ

ရဟန်ꩻသီးခါ ဗွေႏငဝ်းငွါမျတ် ပိဋကတ်ယို

• - နာႏတဝ်း , ထူႏတဝ်း၊ ဆောင်ႏအိုမ်တဝ်း၊ ယူႏတဝ်း , ကျင်ꩻလွဉ်ꩻတဝ်း။ (၅-ပါꩻ)
• - သွဉ်တဝ်း , ဟော်ꩻတဝ်း၊ သွဉ်ဖေႏတဝ်း၊ ရွစ်တဝ်း , စဉ်ꩻစာꩻတဝ်း။ (၅-ပါꩻ)
• - သွဉ်ဗာႏ , ဒေါ့ꩻယပ်ꩻ၊ အရွီးဖြတ်ꩻ၊ လွောက်ꩻလာဘ် , လွောင်ႏဗူႏတဝ်း။ (၅-ပါꩻ)
• - တဆငတ်ꩻဗာႏ၊ တောင်ꩻသေႏချာႏ၊ သာႏသနာႏ ခေ့ꩻအီစဝ်း။

ကောပ်စွဉ်ႏဗွေႏမျတ်ဖရာꩻ ဟော်ꩻနယ်သေꩻခါꩻ သာႏသနာႏခေ့ꩻအီနွောင်ꩻ အကျောင်ꩻတရာꩻနုဲင်းနဝ်ꩻဖုံႏနဝ်ꩻမꩻ ဗွေႏမျတ်ဖရာꩻသာႏသနာႏ ယံကခေ့ꩻထိုꩻမားမွိုင်မွိုင်မွုန်း၊ ယံကလေလင်း ညညဆွာꩻဆွာꩻထဲင်းနဝ်ꩻ-

• ၁။ ဗွေႏမျတ်ဖရာꩻ ငဝ်းငွါပိဋကတ်ဖုံႏယို ယံကဒါႏလျင်ႏ ကေားသွဉ်ထူႏသားရဟန်ꩻသီး အဝ်ႏအာအာထဲင်းထဲင်းဗာႏ၊ ယံကဒါႏလျင်ႏ သွဉ်ဗာႏ။
• ၂။ ဒါႏလျင်ႏထွူခါ ကေားသွဉ်ဖေႏချာသား ဗွေႏရဟန်ꩻပုဂ္ဂိုလ်ႏတန်သီး အဝ်ႏအာထဲင်းထဲင်းဗာႏ။

နဝ်ꩻနီမျိုꩻအကိုလဲ့ ဒါႏလျင်ႏလိတ်ပိဋကတ်သား ကေားသွဉ်ဖေႏချာသားနဝ်ꩻ ထွာသာႏသနာႏအရွီးတဲင် သာႏသနာႏလေလင်းအီအတာႏ ယိင်းထွာထွာအဓိကအကျောင်ꩻတရာꩻသွူ။ ကေားသွဉ်ဖေႏချာသားနဝ်ꩻ ထွာဆရာႏအတန်အကယ်ꩻပုဂ္ဂိုလ်ႏတဲင် အနယ်ꩻမဲန်ႏမဲန်ႏ မိဉ်ႏသွဉ်ဖေႏယံယံနဝ်ꩻ ကေားသွဉ်ထူႏသား တပဲ့ꩻသျင်ႏရဟန်ꩻပေႏသီးဖုံႏလဲ့ထွာစွဉ်ႏပုဂ္ဂိုလ်ႏယံဖုံႏနဝ်ꩻသွူ။ ဆရာႏတွမ်ႏတပဲ့ꩻ တသွုပ်ထွူတသွုပ် အနယ်ꩻမဲန်ႏမဲန်ႏ သွဉ်ဖေႏယံယံ သွဉ်ထူႏယံယံတဲင် ထွာစွဉ်ႏပုဂ္ဂိုလ်ႏယံ အသွုပ်သွုပ်နဝ်ꩻသွူ။ ဖရာꩻသာႏသနာႏလဲ့ တသွုပ်ထွူတသွုပ် လေလင်းသွုပ်ငွုပ်ထဲင်း သေႏချာႏနဝ်ꩻသွူ။ ကေားသွဉ်ဖေႏသား ဆရာႏယံဖုံႏ မိဉ်ႏအဝ်ႏအာအာနဝ်ꩻ ကေားသွဉ်ထူႏသား အဝ်ႏအာလွဉ်ဒျာႏ သေႏချာႏနဝ်ꩻသွူ။