ပအိုဝ်ႏလိုꩻမျိုꩻ ဖေႏကထိုꩻမားဗာႏမွုန်းနဝ်ꩻ

"ပအိုဝ်ႏလိုꩻမျိုꩻ ဖေႏနေးကထိုꩻမားဗာႏမွိုးနောဝ်ꩻ" လိုꩻမျိုꩻအမျိုꩻမုဲင်ꩻတယောဝ်း လိုꩻမျိုꩻပငါပရာꩻ နမ်းပဲင်ႏယေန်ႏငဲးမုꩻ အောဝ်ႏဗာႏဒျာႏဝင်ꩻ ပငါပရာꩻ၊ ကလဲဉ်းခိုႏချာ မဟာမစာႏ နေင်ႏပေါင်ꩻအာ လာပေါင်ꩻည တခေတ်ထွူတခေတ်၊ တစိုးထွူတစိုး နီမွိုးဖြားနီဖါဖြား ကအွဉ်ႏကုဲင်သေꩻခါꩻဖေႏဒါႏ အမွီႏဟောဝ်ယေန်ႏငဲမုꩻတွမ်ႏသမဲင်ꩻယို နီလꩻသေꩻခါꩻဗာႏနောဝ်ꩻသွူ။ ငေါဝ်းငွါ၊ လိတ်လုဲင်ꩻ၊ အကွဉ်အကꩻ၊ ဘာႏသာႏကိုꩻကွယ်ႏမုꩻ၊ ဂီတအနုပညာႏတွမ်ႏ ဓလေ့ꩻထွုံႏစံႏဖုံႏယို ထွာဒျာႏယေန်ႏငဲမုꩻလွဉ်းလွဉ်း၊ ယေန်ႏငဲမုꩻ မဉ်ႏအဲဉ်ထောဝ်းနောတ်ꩻ တွမ်ႏလိုꩻမျိုꩻအဲဉ်ထောဝ်းနောဝ်ꩻ ပီပီဝင်ꩻ၊ ယေန်ႏငဲမုꩻမဉ်ႏတဉ်ႏခွေါင်မꩻ လိုꩻမျိုꩻအီႏတဉ်ႏခွေါင်၊ ယေန်ႏငဲမုꩻမဉ်ႏထိုꩻမားနောဝ်ꩻ လိုꩻမျိုꩻပါထိုꩻမားဒါႏနောဝ်ꩻသွူ။

ပေါႏကမ္ဘာႏတသွုံꩻတောဝ်း (တကုဲင်တောဝ်း)နောဝ်ꩻ နီပအိုဝ်ႏလိုꩻမျိုꩻယို ဖေႏကအောဝ်ႏမွန်ဗန်တသေႏသေႏ၊ ဖေႏကအောဝ်ႏတဉ်ႏခွေါင်တသေႏသေႏဗာႏ တွမ်ႏနီပအိုဝ်ႏလိုꩻမျိုꩻ ဖေႏနေးကထိုꩻမားဗာႏမွိုန်းနောဝ်ꩻ ပအိုဝ်ႏလိုꩻမျိုꩻစွုမ်ႏဖြာꩻ ဖဝဖေႏတာႏဝွန်ႏ၊ သမဲင်ꩻဖေႏတာႏဝွန်ႏ အောဝ်ႏစွုမ်ႏဖြာꩻဖြာꩻနောဝ်ꩻသွူ။ လိုꩻတဖြာꩻယို ခွေနောဝ်ꩻ လိုꩻမျိုꩻမုဲင်ꩻ မဉ်ႏသေချာတောဝ်းဒွုမ်၊ မွိုးဖါကဖေႏဒါႏ ငေါဝ်းငွါ၊ လိတ်လုဲင်ꩻ၊ အကွဉ်အကꩻ ယေန်ႏငဲမုꩻ သင်္ကေတ (အမတ်အမုဲင်) တစွိုးတမျိုꩻ မဉ်ႏအဲဉ်ထောဝ်းဒွုမ်နောဝ်ꩻ ထွာထိုꩻလဲဉ်း လိုꩻမျိုꩻထိုꩻမားနောဝ်ꩻသွူ။ နီလိုꩻမျိုꩻ၊ ငေါဝ်းငွါ၊ လိတ်လုဲင်ꩻ၊ ယေန်ႏငဲမုꩻဖုံႏယို နီဖေႏကသေချာ၊ ဖေႏကဒါႏချာ၊ ဖေႏကမွန်ဗန်ချာ၊ ဖေႏကတဉ်ႏခွေါင်ချာယင်းနောဝ်ꩻ ပအိုဝ်ႏလိုꩻမျိုꩻစွုမ်ႏဖြာꩻ မဉ်ႏထိန်ꩻသိမ်ꩻချာမꩻ နီပအိုဝ်ႏလိုꩻမျိုꩻ ထိုꩻမားဗာႏတောဝ်းနောဝ်ꩻသွူ။

လိုꩻမျိုꩻတမျိုꩻ ကထိုꩻမားဗာႏ (၁၀၀%)ရျာꩻခေါင်ꩻအကိုနောဝ်ꩻ (၁၀%)ရျာꩻခေါင်ꩻနောဝ်ꩻ (ဝင်ꩻ)လိုꩻမျိုꩻမာꩻတဲင် ထိုꩻမား၊ (၉၀%)ရျာꩻခေါင်ꩻနောဝ်ꩻ နီလိုꩻမျိုꩻမာꩻချာတွော့ꩻ ထိုꩻမား။ ဥပမာႏ- (၁) နီငေါဝ်းအောဝ်ႏဒျာႏ - မဲဉ်ဒေါ့ꩻချာတောဝ်း၊ (၂) နီလိတ်အောဝ်ႏဒျာႏ - မဲဉ်သွဉ်ချာတောဝ်း၊ (၃) နီခွမ်ꩻလာꩻအောဝ်ႏဒျာႏ - မဉ်ကွဉ်ကꩻချာတောဝ်း၊ (၄) နီလိုꩻမျိုꩻအောဝ်ႏဒျာႏ - မဲဉ်တောႏလမ်းချာတောဝ်း၊ (၅) နီလိုꩻမျိုꩻသမဲင်ꩻအောဝ်ႏဒျာႏ - မဲဉ်ဟော်ꩻထွား (လေ့လာ)ချာတောဝ်း။ လိုꩻမျိုꩻတမျိုꩻယို လိုꩻဖြာꩻပေါင်ꩻ (လူဦးရေ)မဉ်အာခွိုင်းမုဲင်ꩻအာ မဉ်ႏတရက်ချာတောဝ်း အလိုꩻမျိုꩻ၊ မဉ်ႏလွောင်ႏဗူႏတောဝ်းလို့ဝင်ꩻ၊ မဉ်ႏတလွူးတောဝ်း လိုꩻတလမ်းချင်ႏသꩻဓာတ်၊ ခွေတစွိုး နာꩻတမျိုꩻ(ရက်ခွိုꩻသꩻဓာတ်တွမ်ႏ စီꩻကန်ꩻမဉ်ႏတအဲဉ်ထောဝ်း)နောဝ်ꩻ အဝ်ႏထာꩻအာ ထွာလွဉ်ထာꩻဆေ့ꩻ၊ အဝ်ႏထာꩻဆေ့ꩻ ထွာလွဉ်ဒါႏ ထာꩻထိုꩻမားနောဝ်ꩻသွူ။ လိုꩻမျိုꩻတမျိုꩻယို လိုꩻဖြာꩻပေါင်ꩻ (လူဦးရေ)မဲဉ်ဆေ့ꩻခွိုင်းမုဲင်ꩻဆေ့ꩻ မဉ်ႏရက်ချာဒျာႏ အလိုꩻမျိုꩻ၊ မဉ်ႏလွောင်ႏဗူႏလို့ဝင်ꩻ၊ စီꩻကန်ꩻလဲ့ယံ၊ ပညာႏလဲ့ မဉ်ႏအောဝ်ႏနောဝ်ꩻ အောဝ်ႏထာꩻဆေ့ꩻ ထွာလွဉ်ထာꩻအာ၊ အောဝ်ႏထာꩻအာ တယ်ႏထောင်ႏနွောင်ꩻဒါႏ ခမ်းထီနောဝ်ꩻသွူ။

ကမ္ဘာႏလောင်းယို လိုꩻကရက်ချာ အလိုꩻမျိုꩻနောဝ်ꩻ လွိုတောဝ်းအစ္စရေးလ်လိုꩻမျိုꩻ၊ အစ္စရေးလ်လိုꩻမျိုꩻနောဝ်ꩻ အောဝ်ႏသုဲင်ꩻကန္တာရခြာသွူတကာႏတောဝ်း အောဝ်ႏဗော့ꩻအောဝ်ႏကပ်ꩻအာရပ် ကမ္ဘာႏနုဲင်ႏငံႏနောဝ်ꩻသွူ။ အစ္စရေးလ်စဲ့ꩻတပ် မဉ်ႏအောဝ်ႏ (တဆ)နောဝ်ꩻ အာရပ်ကမ္ဘာႏစဲ့ꩻတပ် အာႏရဲင်ꩻအောဝ်ႏ အဆ(၄၀)၊ အစ္စရေးလ်လိုꩻဖြာꩻပေါင်ꩻ (လူဦးရေ)မဉ်ႏအောဝ်ႏ (တဆ)နောဝ်ꩻ အာရပ်ကမ္ဘာႏ လိုꩻဖြာꩻပေါင်ꩻ (လူဦးရေ)အောဝ်ႏ အဆ(၁၀၀)၊ အစ္စရေးလ်စူခွုမ် (လက်နက်)အာႏရဲင်ꩻ မဉ်ႏအောဝ်ႏ (တဆ)နဝ်ꩻ အာရပ်ကမ္ဘာႏစူခွုမ်(လက်နက်) အောဝ်ႏအဆ (၁၀၀၀)နောဝ်ꩻသွူ။ အစ္စရေးလ်လိုꩻမျိုꩻယို ရက်ခွိုꩻသꩻဓာတ်လဲ့ကျ၊ စီꩻကန်ꩻလဲ့ယံ၊ ပညာႏလဲ့ဒါႏနောဝ်ꩻမꩻ လိုꩻဖြာꩻပေါင်ꩻ (လူဦးရေ) ဆေ့ꩻစွဉ်ႏရိုꩻကီလဲ့ အာရပ်ကမ္ဘာႏနွောင်ꩻအံႏ လꩻတောဝ်းသွူတကာႏတဝ်း ယိုခါ အစ္စရေးလ်ခမ်းထီနောဝ်ꩻ ပါသော့ꩻငီꩻနွောင်ꩻ ကမ္ဘာ့ကုသလမဂ္ဂအစွိုꩻနွို့ ခမ်းထီတဖြုံႏနောဝ်ꩻသွူ။ အစ္စရေးလ်လိုꩻမျိုꩻယို အမဉ်ႏရက်ချာတောဝ်းအလိုꩻမျိုꩻ၊ စီꩻကန်ꩻလဲ့ မဉ်ႏအဲဉ်ထောဝ်း၊ ပညာႏလဲ့ မဉ်ႏအဲဉ်ထောဝ်းနောဝ်ꩻ ကမ္ဘာႏဟံႏပွုံႏ (ကမ္ဘာ့မြေပုံ)ကိုယို အစ္စရေးလ်လိုꩻမျိုꩻ တွမ်ႏအမဉ်ꩻနောဝ်ꩻ ထီႏဗာႏတောဝ်းဒွုမ်နဝ်ꩻသွူ။

ကွပ်နောဝ်ꩻမꩻ နီပအိုဝ်ႏလိုꩻမျိုꩻလဲ့ အချက်ဆꩻချာ (၅)ချက်ယို လိုꩻတွိုင်ꩻစွုမ်ႏဖြာꩻ မဉ်ႏထိန်ꩻသိမ်ꩻချာတောဝ်းနဝ်ꩻ အအာသွတ်ꩻ ထဲင်းနေင်ႏပေါင်ꩻ (၁၀၀)လွိုရပ်နောဝ်ꩻ မန်းခမ်းဟံႏပွုံႏ(မြန်မာ့မြေပုံ)ကိုယို ပအိုဝ်ႏလိုꩻမျိုꩻ အီႏထိုꩻမားထိုꩻတဲင် ဆုဲင်ꩻတနီꩻခါ ပအိုဝ်ႏလွိုးငါလဲ့ မဲ့ꩻထီႏဗာႏတောဝ်းနဝ်ꩻသွူ။ မန်းခမ်းဟံႏပွုံႏ (မြန်မာ့မြေပုံ)ကို ပအိုဝ်ႏလိုꩻမျိုꩻ ဖေႏနေးကအောဝ်ႏမွန်ဗန်တသေႏသေႏ၊ ဖေႏနေးကအောဝ်ႏတဉ်ႏခွေါင်တသေႏသေႏ၊ ခင်ႏလမ်းအုံခြုဲင်းမုꩻ မဉ်ႏအောဝ်ႏဗာႏစွဉ်ႏလဲ့ ပအိုဝ်ႏစွုမ်ႏဖြာꩻ ဖေႏနေးကအောဝ်ႏထွာစွူစွူဒျာႏ ပအိုဝ်ႏလိုꩻမျိုꩻနောဝ်ꩻ လွူးသွော့သꩻဓာတ်နုဲင်းအစ္စရေးလ် ကရိုꩻနောဝ်ꩻ ဒင်ႏပျꩻနယ်ဗာႏ ပအိုဝ်ႏခွန်နင်ꩻသီးအတာႏ တွမ်ႏရွမ်ဖြုဲင်ꩻယိုနောဝ်ꩻသွူ။ ဟံႏမဉ်ႏမျောႏလိုꩻနောဝ်ꩻ- လိုꩻလို့တဝ်း၊ လိုꩻချင်ꩻချင်ꩻ မဉ်ႏမျောႏနောဝ်ꩻ-လိုꩻလို့။ နမ်းသꩻနီပါꩻ ယံချမ်ꩻသာႏဒျာႏတဲင်-