ပွေꩻ-တညင်ꩻ
"ပွေꩻ-တညင်ꩻရောႏဂါႏတွမ်ႏ တသီႏနယ်ꩻဖုံႏ" ပွေꩻ-တညင်ꩻကရိုꩻယိုနဝ်ꩻ ရောႏဂါႏနမ်းယာႏကို တမွေးတဝ်း၊ ရောႏဂါႏနမ်းထန်ႏ ပီလောင်းဒျာႏတဲင် အီႏထွာစွဉ်ႏအသက်အန္တရာယ်ႏနဝ်ꩻ တထွာနောင်ꩻတဝ်းလဲ့ မာꩻတကုဲင်လိုꩻလွိုး၊ မာꩻတကုဲင်လိုꩻပီယာႏတွော့ꩻ ပါမုဲင်ꩻလဲ့ တမဲန်မော့ꩻ၊ မဲန်ထွာတဝ်းနေနေသွူ။ မိဉ်ႏမော့ꩻမိဉ်ႏထွာလွဉ်လဲ့ မဲန်မာꩻထိုꩻမား၊ မဲန်မာꩻဟဝ်ထိုꩻနေနေသွူ။ ပွေꩻ-တညင်ꩻရောႏဂါႏယို အနောက်တိုင်း တသီႏပညာႏနယ်ꩻအလꩻနဝ်ꩻ ထွာယာႏပီရောႏဂါႏတဲင် သေ့ꩻ(ရောဂါပိုး)မာꩻထွာဒျာႏ ရိုꩻနုဲင်းနဝ်ꩻသွူ။
တညင်ꩻရောႏဂါႏနဝ်ꩻ အဝ်ႏတမျိုꩻချင်ႏ၊ တပုံႏချင်ႏလွုမ်ꩻ၊ တဖြာꩻတွမ်ႏတဖြာꩻ ထွာပုံႏထွာနယ်ꩻ ဗွိုန်လွဝင်ꩻလဲ့ ပွေꩻရောႏဂါႏနဝ်ꩻ ပွေꩻတဲင်းကာꩻ၊ ပွေꩻသဲင်၊ ပွေꩻစိုႏ အဝ်ႏအမျိုꩻမျိုꩻသွူ။ ပွေꩻတဲင်းကာꩻနဝ်ꩻ အပေါႏတဝွန်ꩻတကွက်နေး ကတူႏလောင်း၊ မဲ့ငါလောင်း၊ စူလောင်း၊ နမ်းလောင်းဖုံႏသွူ။ (ပွေꩻကြိုႏ)ကရိုꩻနဝ်ꩻ ပေါႏအာကတူႏလောင်း၊ မဲ့ငါလောင်းသွူ၊ ပွေꩻစိုႏ (အိုမ်အမဉ်)နဝ်ꩻ ပေါႏအာကတူႏလောင်းသွူ၊ ယို ၃-မျိုꩻအကို ပွေꩻစိုႏနဝ်ꩻ ဟုဲင်းလွိုဝင်ꩻသွူ။ ပွေꩻတဲင်းကာ ပွေꩻသဲင်နဝ်ꩻ တမာꩻတကုဲင်ငါႏတဝ်း လိုꩻလွိုးလဲ့ ပွေꩻစိုႏယို ပေါႏတလိုမ်ꩻလာꩻမွိုင်တဝ်းနဝ်ꩻ ဟဝ်သွူလဲ့ ကလူꩻတဒေါ့ꩻနွောင်ꩻတဝ်းဒွုမ်၊ ထွာထိုꩻကတပူႏပဲင်တွော့ꩻ မာꩻတကုဲင်ဒါႏလိုꩻလွိုး တသက်လုမ်းသွူ။ တညင်ꩻနဝ်ꩻ ကဲဉ်းအာအာပေါႏဒျာႏ လိုꩻတန်၊ ပွေꩻနဝ်ꩻ ကဲဉ်းအာအာပေါႏလိုꩻပေႏသွူ၊ လိုꩻပေႏကရိုꩻလဲ့ ကလူꩻတဆွာꩻတဝ်း ဗွေႏသျင်ႏပေႏဖုံႏနဝ်ꩻ ပေါႏအာသွူ။ ဗွေႏသျင်ႏပေႏကအာဒါႏ နုဲင်းကျောင်ꩻနောင်တောင်ꩻ ဟိုပုံꩻယိုနဝ်ꩻ ပွေꩻသားပျတ်ဖိုတဝ်း၊ အဝ်ႏဒျာႏသေႏသေႏသွူ။ ပွိုင်းဝွို့တွမ်ႏပွေꩻယို အနောက်တိုင်းပညာႏ တသီႏနယ်ꩻအလꩻ ဆရာႏဝွန်ႏကလွဉ်ဖေႏဒါႏ ဗွေႏသျင်ႏနောင်တောင်ꩻ တသီႏသူꩻနဝ်ꩻ မုဲင်ꩻလဲင်ႏလဲင်ႏစွဉ်ႏလဲ့ အစွိုးတထဲ့အီတဝ်း၊ သက်သာႏအီနေးလွုမ်ꩻသွူ၊ အနောက်တိုင်း တသီႏနယ်ꩻအလꩻနဝ်ꩻ ပွေꩻအမျိုꩻမျိုꩻ ဟဝ်နွောင်ꩻအီဒါႏတသီႏနဝ်ꩻ အလွိုးတအဲန်ထဝ်းသွူ။
ပွေꩻ-တညင်ꩻကရိုꩻယိုနဝ်ꩻ ထွာဒျာႏနမ်းထန်ႏ ယာႏပီလောင်းတဲင် သေ့ꩻ (ရောဂါပိုး) မာꩻထွာဒျာႏ ရိုꩻနုဲင်းနဝ်ꩻတွော့ꩻ ဖေႏကထွာ ဖေႏကပေါႏပုဲင်ႏလဲ့နဝ်ꩻ၊ မီႏထွာမီႏပေါႏသွူလဲ့ ဖေႏကဟဝ်၊ ဖေႏကထိုꩻမားခွုန်ꩻလဲ့နဝ်ꩻ အဝ်ႏလိုႏငါႏ ကြောင်းစင်ရေꩻသွူ။ နီနမ်းယိုလဲ့ အဝ်ႏလိုႏလူးကုဲင်းကုဲင်းထီ၊ သင်္ကန်ꩻခွမ်ꩻလာꩻတွမ်ႏ ဟွမ်ဒို့ꩻထာꩻဒါမွဉ်ဖုံႏယိုလဲ့ အဝ်ႏလိုႏပဆျူႏကြောင်းကြောင်း၊ ပဆျူႏခွိုꩻခွိုꩻသွူ။ ပွေꩻတညင်ꩻသား ကလူးထီယို မီႏသုံꩻဒျာႏ သပ္ပျာႏတနျာႏ၊ သပ္ပျာႏကဘော်လိပ်နဝ်ꩻ ဟဝ်လဲဉ်း သပ္ပျာႏလင်သွူ။ မန်းခမ်းကို ကအဝ်ႏဖောႏစာဒါႏ တသီႏပွေꩻတညင်ꩻဖုံႏနဝ်ꩻ ပွေꩻအမျိုꩻမျိုꩻ ကဟဝ်နွောင်ꩻအီဒါႏ တသီႏမျိုꩻနဝ်ꩻ တအဝ်ႏကြွို့ꩻတဝ်း၊ တမျိုꩻမီႏဟဝ်လဲ့ တမျိုꩻဟဝ်တဝ်း၊ တဖြာꩻနဝ်ꩻ ဟဝ်အီလဲ့ တဖြာꩻနဝ်ꩻ ဟဝ်အီတဝ်း နုဲင်းနဝ်ꩻသွူ။ မီႏနုဲင်းခွန်ကုဝေ ကလိုမ်ꩻလာꩻဗာႏ ဗွေႏသျင်ႏနောင်တောင်ꩻနဝ်ꩻ ပွေꩻပေါႏကတူႏလောင်း ကအိုမ်နေးအမဉ်စုစုစိစိနဝ်ꩻ သူႏဖေႏတသီႏအင်္ဂလေက် "တက်ထရာစိုင်းကလင်း"တွမ်ႏနံးမန်ꩻမောက်အွန်မꩻဟဝ်သွူ။ ပွေꩻစုစုစိစိ ကပေါႏကတူႏလောင်းနုဲင်းယိုနဝ်ꩻ ကြော့ꩻထိုꩻကလူꩻလဲ့ တလꩻလို့တဝ်း၊ ကတူႏပူႏပူႏဗျို့ဗျို့နေးစွဉ်ႏသွူ။ ပေါႏထွာတန်နဝ်ꩻ ဟဝ်သွူလဲ့ အပဲင်အဝ်ႏကုဲင်တဲင် ကလူꩻတဒေါ့ꩻနွောင်ꩻလို့တဝ်းဒွုမ်သွူ။ ပွေꩻ-တညင်ꩻခရာႏနဝ်ꩻ ဝင်ꩻကအီႏတဲမ်းနယ်ဒါႏ ရွမ်ဖြုဲင်ꩻစုံႏစုံႏလင်ႏလင်ႏ၊ စဲင်းစဲင်းစဲ့စဲ့လဲ့ တအဝ်ႏကြွို့ꩻတဝ်း၊ ကတဲမ်းနယ်ဒါႏ တသီႏနယ်ꩻနုဲင်းငါယိုနဝ်ꩻလဲ့ အနယ်ꩻယိုနဝ်ꩻ ဟဝ်အီ ပွေꩻအမျိုꩻယိုနုဲင်းနဝ်ꩻလဲ့ တဒေါ့ꩻပါတဝ်း၊ တဲမ်းသာမညနေးဗော့ꩻ ပွေꩻတသီႏနယ်ꩻ နုဲင်းနဝ်ꩻလွုမ်ꩻသွူ။ နဝ်ꩻတွော့ꩻ ကတဲမ်းနယ်ဒါႏ တသီႏနယ်ꩻ နုဲင်းလယိုဖုံႏနဝ်ꩻ ထွာပွေꩻအမျိုꩻတဲင် အနယ်ꩻမုဲင်ꩻရဟဝ်အီအာကရိုꩻနဝ်ꩻ ချင်းဖောႏချင်းသုံꩻဗာႏဒျာႏသွူ။ ယနယ်ꩻနယ်ꩻလဲ့ ပွေꩻ၊ တညင်ꩻ-နီမျိုꩻ ဟဝ်အီနွောင်ꩻသွူတကာႏတဝ်း ပွေꩻတွမ်ႏတညင်ꩻယိုနဝ်ꩻ ပေါႏထွာယာႏပီလောင်းနုဲင်းနုဲင်းတွော့ꩻ ရွမ်ဖြုဲင်ꩻတဲ့ တဲမ်းညီꩻဗော့ꩻတဝင်ꩻ တပုဒ်ချင်ႏသွူ။
"ပွေꩻ-တညင်ꩻရောႏဂါႏ တသီႏနယ်ꩻဖုံႏ"
- ၁။ တသီႏပွေꩻနယ်ꩻနဝ်ꩻ လျꩻမောက်ကြင်ꩻလာႏတဲင် မောက်ကြင်ꩻလာႏမောင်ꩻယို ကထန်ႏလွဉ်ဒါႏ အစီႏဗွာဗွာယို ဒွူႏခါꩻတွမ်ႏတမျိုꩻမျိုꩻတွော့ꩻ ပေါႏလꩻဟံးအာသွူ တစေားအံႏဟန်ႏအိုရပ်နဝ်ꩻလဲ့ တွမ်ႏစူနုံသူႏချာ မောက်ကြင်ꩻလာႏ အချော်ꩻဖဲ့ꩻနဝ်ꩻတွော့ꩻ ဒပ်ꩻဒပ်ꩻအွောင်၊ ဒပ်ꩻဒပ်ꩻအွောင်သွော့ ပွေꩻတဲင်းကာꩻ ပွေꩻကြိုႏနဝ်ꩻနေား၊ ပေါႏမောက်ကြင်ꩻစီႏသဲင်ထိုꩻလို့ထိုꩻလဲ့ သူႏထဲင်း ဒပ်ꩻအွောင်ထဲင်းသွော့နေား၊ မာꩻနုဲင်းယို ၄-၅နီꩻငါလဲ့ မဲ့ꩻအဟဝ်ဒျာႏသွူ။ မာꩻနုဲင်းယိုနဝ်ꩻ အလွိုးဟဝ်အီနွောင်ꩻ ပွေꩻတဲင်းကာꩻတွမ်ႏ ပွေꩻကြိုႏလွုမ်ꩻသွူ။
- ၂။ တသီႏပွေꩻနယ်ꩻ ထဲင်းတနယ်ꩻနဝ်ꩻ ခဲဉ်ႏကလာꩻအော် (ခဲဉ်ႏပေႏ)လာႏယို လျꩻပေါင်းအာအာ အဝ်ႏဗဲင်းတဆုတ်ꩻပေႏပေႏငါတဲင် တနီႏပသာႏသွူတွော့ꩻ ပွစ်ဖေႏ (တီးတွစ်ဖေႏ)ညညသွော့ ပွေꩻနဝ်ꩻနေား၊ သွီႏဖေႏကစွုမ်းပသာႏသာႏနေးစွဉ်ႏနေား၊ တစဲင်တလျားတဝ်းသွူ။ ခဲဉ်ႏကလာꩻအော် မိဉ်ႏအဲဉ်ထဝ်းနဝ်ꩻ ခဲဉ်ႏရိုꩻရိုꩻလာႏလဲ့ အဝ်ႏဟဝ်ဒျာႏသွူ။ ပွစ်ဖေႏခဲဉ်ႏလာႏနုဲင်းယိုနဝ်ꩻ ကလူꩻလဲ့ဟဝ်ပိုႏသွူ။ ပွစ်တလဲင်ႏ မီႏဟဝ်တဝ်းလဲ့ ပွစ်တနီꩻတလဲင်ႏ၊ ပွစ်ဖေႏဗဲင်း နီသိုမ်နီꩻနေား။
- ၃။ တသီႏပွေꩻနယ်ꩻ ထဲင်းတနယ်ꩻနဝ်ꩻ သေင်ႏတရူးတုဲင် (ငုရွှေဝါ)အလာႏယို မာꩻပဲစ်ꩻထွူတွော့ꩻ စေ့ꩻအထီ၊ ကလꩻဒါႏ အထီယို ဖျောႏရော်ꩻတွမ်ႏမောက်ꩻဖါးထီတွော့ꩻ သူႏဖေႏသွော့ တနီꩻ ၂-၃ လဲင်ႏနေား၊ တနီꩻဟဝ်တဝ်းလဲ့ သူႏဖေႏသွော့ နီသိုမ်နီꩻနေား၊ မဲ့ꩻဟဝ်လွဉ်ဒျာႏသွူ။
- ၄။ တသီႏပွေꩻ တသီႏအံႏနယ်ꩻနဝ်ꩻ ပခေါ်တတောက် ၇-ဒီႏ၊ သင်္ဘောꩻမဲဇရီႏလာႏ ၇-ဗီႏ၊ ယို ၂-မျိုꩻနဝ်ꩻ မာꩻပဲစ်ꩻညီꩻသွူတဝင်ꩻတွော့ꩻ လုံꩻသွော့ ၇-လုံꩻ၊ အံႏသွော့ တနီꩻတလုံꩻနေား။
- ၅။ တသီႏပွေꩻနယ်ꩻ ထဲင်းတနယ်ꩻနဝ်ꩻ ပခေါ်တတောက်ဒီႏ ဟံးတန်တန်ယို အိုႏဗွာထွူတွော့ꩻ ကျာႏဗွောင်သွော့ အရွီးဖဲ့ꩻနဝ်ꩻနေား၊ ပခေါ်နဝ်ꩻ ပေါႏကျာႏဗွောင်လဲ့ အစီႏထန်ႏတဲင် ပွစ်ဖေႏခွိုꩻခွိုꩻ၊ ပွစ်ဖေႏအာအာသွော့ ပွေꩻနဝ်ꩻနေား။
- ၆။ တသီႏပွေꩻ ထဲင်းတနယ်ꩻနဝ်ꩻ သင်္ဘောꩻရာႏမိုယို ကျာႏကဲင်ပသာႏအပီတဲင် ပေါႏအစီႏထန်ႏလဲ့ သူႏဖေႏသွော့ပွေꩻနေား၊ သူႏတနီꩻတလဲင်ႏ နီလဲင်ႏထွူတဲင် သူႏဖေႏသွော့ မုဲင်ꩻနီꩻနီꩻနေား၊ တသီႏနဝ်ꩻ တသီႏသူႏလဲ့ သူႏတလဲင်ႏနီလဲင်ႏဟဝ်နဝ်ꩻ အဝ်ႏကြွို့ꩻတဝ်း၊ တသီႏအံႏလဲ့ အံႏတလဲင်ႏနီလဲင်ႏဟဝ်နဝ်ꩻလဲ့ အဝ်ႏကြွို့ꩻတဝ်းနေနေသွူ။
- ၇။ တသီႏပွေꩻနယ်ꩻ ထဲင်းတနယ်ꩻနဝ်ꩻ ပေန်နျာႏခူꩻဗွာဗွာအကိုတွမ်ႏ နန်းလုံးကြိုင်ရာႏအခူꩻယို အယာႏခဉ်ႏတတွာဝင်ꩻ ဖို့ꩻကျွမ်ꩻသွူမေႏတွော့ꩻ မာꩻဖွန်ႏဖျောႏတွမ်ႏနံးမန်ꩻထေင်ဗွာစဲစ်စဲစ်တဲင် သူႏဖေႏသွော့နေား၊ ပေန်နျာႏရာႏနဝ်ꩻ မန်းဟဲ့ꩻ "လုံညင်းသီး"၊ နန်းလုံးကြိုင်နဝ်ꩻ အမဉ်ꩻမန်းဒျာႏ ပအိုဝ်ႏနဝ်ꩻ အမဉ်ꩻအဲန်ထဝ်းသွူ။ လုံညင်းသီး (ပေန်နျာႏရာႏ)နဝ်ꩻ ဘယတသီႏဆဲင်ႏကို ဝင်ꩻကုဲင်းစာဒျာႏသွူ။
- ၈။ ပွေꩻဖေႏကဟဝ်နယ်ꩻ ဂါႏထာႏနေးနဝ်ꩻ "ဥုံ စိစိုးပိုး ပတ္တာ သွားဟ"ဂါႏထာႏယိုနဝ်ꩻ လျꩻသင်္ဘောꩻမဲဇရီႏလာႏ (၇)ဗီႏတွော့ꩻ စုတ်သွော့တွမ်ႏဂါႏထာႏယို (၇)ပြန်ႏနေား၊ ထွူနဝ်ꩻ တွမ်ႏသင်္ဘောꩻမဲဇရီႏလာႏစုတ်ထွူနဝ်ꩻ ပွစ်ညညဖေႏသွော့ပွေꩻနဝ်ꩻနေား၊ ပွစ်တလဲင်ႏဟဝ်တဝ်းလဲ့ ဆုဲင်ꩻတနီꩻစုတ်ဖျင်ပွစ်ဖျင်သွော့နေား၊ ပွေꩻနဝ်ꩻ မဲ့ꩻအဗေင်ႏအွောင်ဟူႏထိုꩻလို့ဒျာႏသွူ။
- ၉။ အဝ်ႏကုဲင်တညင်ꩻရောႏဂါႏတသီႏနယ်ꩻနဝ်ꩻ ကန်ꩻယို မီႏထွာအတူႏလဲ့ မူတွမ်ႏရေနံထီ၊ မီႏထွာအဖွန်ႏနေးလဲ့ ဖျောႏကွယ်ရော်ꩻ ရေနံထီတွော့ꩻ မွူးဟာခိုႏ အီႏဗေင်ႏထာꩻနဝ်ꩻ သူႏဖေႏသွော့ တညင်ꩻနဝ်ꩻနေား၊ ဖျောႏသူႏဗွေဗွေဖေႏသွော့ သိုမ်ဟာနေား၊ တညင်ꩻနဝ်ꩻ မဲ့ꩻအဗေင်ႏအွောင် ဟဝ်ထိုꩻဒျာႏသွူ။
- ၁၀။ တသီႏတညင်ꩻနယ်ꩻ ထဲင်းတနယ်ꩻနဝ်ꩻ မန်းဟဲ့ꩻ"ကြိတ်မှန်"၊ ဖြဝ်ꩻဟဲ့ꩻ "ယာဟွမ်ကျိုး"၊ ပအိုဝ်ႏဟဲ့ꩻ"ဖက်ꩻပွမ်းကောင်" အစော့ꩻအလာႏယို ပသေကြောင်းကြောင်း မာꩻပဲစ်ꩻတွော့ꩻ စေ့ꩻသွော့အထီနေား၊ ကလꩻဒါႏ သတ္တုထီယို သူႏဖေႏသွော့ တညင်ꩻ တနီꩻ ၂-၃လဲင်ႏနေား၊ သူႏဖေႏသွော့ မုဲင်ꩻနီꩻနီꩻနေား၊ ဖက်ပွမ်းကောင်ယိုနဝ်ꩻ အတလွိုင်ႏငါႏတဝ်း၊ အရပ်အဝ်ႏမꩻအဝ်ႏ၊ ကုဲင်းဒေါ့ꩻဒျာႏ ဒုံခါႏဝေင်ꩻခါႏ၊ ဒုံသောင်ဒုံထျꩻဖုံႏသွူ။ တမွူးမွူးယို ထွိုင်ႏတန်နဝ်ꩻ အပင်အလာႏ အာတန်ဒျာႏသွူ။ အလာႏပုံႏနဝ်ꩻ ပေါင်းဗွိုန်ဗွိုန် ဟန်ႏထွိုင်း၊ ဟန်ႏထွိုင်းနဝ်ꩻ အတုဲင်တသီး၊ အတုဲင်မဲ့ငါတမွန်ꩻဒျာႏ၊ ဖက်ပွမ်းကောင်ယိုနဝ်ꩻ အတုဲင်ဗွော၊ အတုဲင်မဲ့ငါတွောင်းဒျာႏသွူ။ ခမ်းခါမꩻ အမွူးပေႏပေႏဒေါ့ꩻအာသွူ။
- ၁၁။ တသီႏတညင်ꩻနယ်ꩻ ထဲင်းတနယ်ꩻနဝ်ꩻ ညိုးမွူးတန်အဆူႏပိုမ်ယို မူတွမ်ႏလိုꩻမူႏပိုမွိုးနဲန်းထီတွော့ꩻ သူႏဖေႏနဝ်ꩻ တညင်ꩻဟဝ်ဒျာႏသွူ။ ညွိုးမွူးပိုမ်မူထီအောက်ꩻယိုနဝ်ꩻ ဟဝ်အီတညင်ꩻလွုမ်ꩻတကာႏတဝ်း မဲ့ငါလောင်းကပေါႏဒါႏ တခစ်ဖုံႏနဝ်ꩻလဲ့ ဟဝ်အီနွောင်ꩻဒျာႏသွူ။
- ၁၂။ တညင်ꩻတသီႏနယ်ꩻ ထဲင်းတနယ်ꩻနဝ်ꩻ ကန်ꩻဖွန်ႏယို ရော်ꩻတွမ်ႏမောက်ꩻဖါးထီတွော့ꩻ သူႏဖေႏခွိုꩻခွိုꩻနဝ်ꩻလဲ့ တညင်ꩻရောႏဂါႏ ဟဝ်နွောင်ꩻဒျာႏနေနေသွူ။
- ၁၃။ တသီႏတညင်ꩻနယ်ꩻ ထဲင်းတနယ်ꩻနဝ်ꩻ မောက်ꩻစောက်ꩻရာႏကလွိုင်ႏဒါႏ တင်ꩻကျွစ်တထိန်ႏမာꩻငါနဝ်ꩻ အံႏထွူမောက်ꩻစောက်ꩻတွော့ꩻ ကအဝ်ႏကုဲင်အပီယို စိမ်ႏဆဲစ်ꩻလူးဖေႏ တညင်ꩻနဝ်ꩻလဲ့ ဟဝ်နွောင်ꩻအီနေနေသွူ။
- ၁၄။ တသီႏတညင်ꩻနယ်ꩻ ထဲင်းတနယ်ꩻနဝ်ꩻ နံႏသာႏဗွာ အကဲန်ယို တွမ်ႏထီမူသွူလုံးပဲန်လောင်းတွော့ꩻ ကလꩻဒါႏ မူအောက်ꩻတစေားအံႏဟန်ႏအိုရပ်ယို ရော်ꩻတွမ်ႏလက္ချားငိုးထွူ (လက္ချားမီႏဖောက်) တခြဲက်ꩻနီခြဲက်ꩻတွော့ꩻ သူႏဖေႏသွော့ တညင်ꩻ တနီꩻသိုမ်လဲင်ႏ၊ သူႏဖေႏသွော့ စွုမ်ႏနီꩻနီꩻနေား၊ မဲ့ꩻဟဝ်ဒျာႏသွူ။
- ၁၅။ တသီႏပွေꩻရောႏဂါႏ ထဲင်းတနယ်ꩻနဝ်ꩻ ဂါႏထာႏနေးဒျာႏသွူ။ ဂါႏထာႏနဝ်ꩻ "ဥုံ ကပ္ပိယံ ကရောဟိ၊ ကပ္ပိယံ ဘန္တေ၊ ကပ္ပိယံ ဘန္တေ၊ ကပ္ပိယံ ကရောဟိ"ယိုအတွိုင်ꩻသွူ။ ဂါႏထာႏယိုနဝ်ꩻ နံးမန်ꩻထေင်ဗွာတရိုꩻတဝ်း၊ နံးမန်ꩻမောက်ꩻအွန်တရိုꩻတဝ်း စုတ် (၃၇)ပြန်ႏတွော့ꩻ သူႏဖေႏပွေꩻနဝ်ꩻ ၂-၃နီꩻငါလဲ့ ဟဝ်ဒျာႏသွူ။[၁][၂]