ဗက်ꩻထိုꩻဒေါသ
"ဓနဉ္စာနီသုတ် (ဗက်ꩻထိုꩻဒေါသ ခွဉ်ꩻထိုꩻသꩻလျား ယံစား ခွꩻကဒဲ့ꩻ)"
အွိုးခꩻတလဲင်ႏ နီဗွေႏဘုရာꩻအောဝ်ႏအုံ ရာႏဇဂျိုလ်ႏခမ်း ကျောင်ꩻဝေဠုဝွန်ႏကိုအတွင်ꩻ ကမဉ်ꩻဒါႏ "ဓနဉ္စာနီ"ပုဏ္ဏာꩻမူႏတဖြာꩻနဝ်ꩻ ကေႏညိုႏမွေးစွဉ်ႏ ဘုရာꩻ တရာꩻ သံဃာႏ ရတနာႏသွံပါꩻနောဝ်ꩻသွူ။ ခꩻတလဲင်ႏ ဗွော့ꩻလွဉ်ဖေႏအဝါꩻဒဲဉ်၊ တခူဗာႏထာꩻတွော့ꩻ ရွစ်စွော့ꩻစွဉ်ႏ "နမော တဿ ဘဂဝတော အရဟတော သမ္မာသမ္ဗုဒ္ဓဿ"နုဲင်းနဝ်ꩻ သွံလဲင်ႏစွဉ်ႏနောဝ်ꩻသွူ။ အဝါꩻပုဏ္ဏာꩻနဝ်ꩻရိုꩻ- "ပါꩻမူႏမွတန်နဝ်ꩻ တန်ႏတရာႏဒွုမ်ထာꩻမတောဝ်၊ နုဲင်းကွို့ꩻတခူထာꩻတဲ့ လဲင်ꩻဝုဲင်ႏခန်း ရဟန်ꩻကတူႏကြေင်းတန်နဝ်ꩻ၊ မုဲင်ꩻခါခါတဲ့ အံႏဖြာႏတိတ်ꩻတိတ်ꩻစွဉ်ႏ ရဟန်ꩻကတူႏကြေင်းကေꩻဇူꩻလွုမ်ꩻ၊ ပါꩻမူႏမွဟွေး-နာꩻဆရာႏ ပါꩻရဟန်ꩻကတူႏကြေင်းနဝ်ꩻ ခွေဒင်ႏပျꩻ ခွေဝါႏဒ၊ ခွေအီႏထင်ႏထေင်းက" "မဉ်ႏကျတဲ့ ထင်းထေင်ဟုဲင်း- နုဲင်းကွို့ꩻနာꩻ၊ ဘုရာꩻအမျိုꩻငမ်းနဲ့၊ လူꩻခွန်သုံဗျဟ္မာႏ လိုꩻတကမ္ဘာႏလိုမ်း၊ အီႏနွောင်ꩻဘုရာꩻ၊ တဖြာꩻဖြာꩻခွေထီႏတဝ်း၊ ကွဲႏတွော့ꩻ နာꩻလွေꩻဒေါ့ꩻစံꩻဟုဲင်း၊ နာꩻသေဗာႏသနယ်" အဝါꩻပုဏ္ဏာꩻတဲ့ ထင်ႏမွေးစွဉ်ႏဘုရာꩻထျꩻ၊ အွဉ်ႏဟိတ်အနမ်း ရီခန်းဗွေႏဘုရာꩻနုဲင်းယို- "ဂေါတမ- မဉ်ႏဗက်ꩻထဲ့ထိုꩻ တရာꩻအမျိုꩻမုဲင်ꩻနဝ်ꩻ အုံဗာႏချမ်ꩻချမ်ꩻသာႏသာႏ၊ မဉ်ႏခွဉ်ꩻထဲ့ထိုꩻ တရာꩻအမျိုꩻမုဲင်ꩻနဝ်ꩻ နန်းခရာႏလိုႏတဝ်း၊ နာꩻနဝ်ꩻကျွိုက်ငါႏ ဗက်ꩻထဲ့ထိုꩻ တရာꩻအမျိုꩻမုဲင်ꩻ၊ နာꩻနဝ်ꩻ နစ်သက်ငါႏ ခွဉ်ꩻထဲ့ထိုꩻတရာꩻအမျိုꩻမုဲင်ꩻဟောင်း" "ပုဏ္ဏာꩻဟွေး- 'မဉ်ႏဗက်ꩻထဲ့ထိုꩻ ဒေါသ'နဝ်ꩻ အုံဗာႏချမ်ꩻချမ်ꩻသာႏသာႏ၊ 'မဉ်ႏခွဉ်ꩻထဲ့ထိုꩻ ထာꩻသꩻလျား'နဝ်ꩻ နန်းခရာႏလိုႏတဝ်း၊ ဒေါသမဉ်ႏထွာနဝ်ꩻ-သꩻလျား၊ ပေါႏသꩻလျားနဝ်ꩻ ငမ်းဗာႏ၊ နန်းဗာႏ၊ ချမ်ꩻသာႏတဝ်း၊ ကွပ်နဝ်ꩻမꩻ ဘုရာꩻရဟန္တာႏ အရိယာႏသီးဖုံႏနဝ်ꩻ ကျွိုက်ငါႏ ဗက်ꩻထဲ့ထိုꩻ-ဒေါသ၊ နစ်သက်ငါႏ ခွဉ်ꩻထဲ့ထိုꩻ ထာꩻသꩻလျား"နောဝ်ꩻသွူ။ ပုဏ္ဏာꩻနဝ်ꩻနဝ်ꩻ လိုꩻဒေါသတန်၊ သꩻလျားပစော့ꩻပနျꩻဒါႏထာꩻ၊ ကွပ်ဒေါသတန်၊ ပွိုးသꩻလျားတွော့ꩻ ကမော့ꩻလွဉ်ထꩻတရေင်၊ ထာꩻခိုးထာꩻလျား၊ ထာꩻဒုက္ခတဲ့ ဒေါ့ꩻအလဲင်ႏအလင်ႏ သူႏသေသူႏသာဒွုမ်၊ ကွပ်ပွိုးနဝ်ꩻမꩻ ကထင်ႏဟွုန်ဗွေႏဘုရာꩻ ငေါဝ်းဆွုံꩻမꩻနဝ်ꩻ မဲဉ်ႏတနꩻသော့ꩻမွေး ဝွေꩻဘဝအထွာအကုဲင်တဲင် တလဲင်ႏချင်ꩻ လောဝ်းစွဉ်ႏဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- နီဗွေႏဘုရာꩻ ဩဝါဒနဝ်ꩻ ယံကျမွေးစွဉ်ႏထာꩻဗွေႏ၊ ယိုခါ ခွေသွဉ်းထွာသွူ ဗုဒ္ဓဘာႏသာႏဗွေႏဩ၊ ခွေသွဉ်းယိုနဝ်ꩻ မတ်သွော့ ဗုဒ္ဓဘာႏသာႏ ဥပါႏသကာႏ တဖြာꩻဗွေႏဩ" လောဝ်းနုဲင်းနဝ်ꩻထွူ ဗုဲင်စွဉ်ႏရဟန်ꩻ၊ အားထွုတ်မွေးတရာꩻ၊ ထွာစွဉ်ႏရဟန္တာႏနောဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ ဓနဉ္စာနီသုတ်)[၁][၂]