ဗွေႏဘုရာꩻကျွꩻ

ဗွေႏဘုရာꩻ ကျွꩻနာဠန္ဒာဝေင်ꩻတွင်ꩻ (သီလက္ခန္ဓဝဂ္ဂအဋ္ဌကထာ-၄၀) ကဟွုန်ဖိုဒါႏ ငဝ်းနဝ်ꩻခါ ၊ ကျွꩻနာဠန္ဒာ ဝေင်ꩻအတွင်ꩻ ၊ ဗွေႏဘုရာꩻရင်ꩻ နမ်းတောႏကို ၊ သူပါꩻရောင်ႏယို ဆီမျက်နာႏ ၊ သောင်ꩻသွစ်ꩻဆီခါႏ အရပ်ကို ၊ အဝ်ႏနမ်းတောႏယို လွင်းအညာꩻ ၊ တဖဲ့ꩻသူꩻရာꩻ လွင်းထေ့ချာ ၊ ခါႏလယ်ႏတခြာ နဝ်ꩻကိုရပ် ၊ ရတနာႏစီႏခြပ် ကဝ်ႏပုံꩻကုံꩻ ၊ ရတနာႏခြွဉ်းရိုမ်ꩻ နုဲင်းပမာႏ ၊ ရော်ꩻရတနာႏ ဆွိုင်ႏသေꩻခါꩻ ၊ ခံꩻဆဲင်ꩻခွမ်ꩻလာꩻ ဆန်ꩻဟဝ်ငါႏ ၊ ခံꩻထီတနျာႏ နုဲင်းထောက်ꩻလီ ၊ ဆာႏအွိုးမို့ꩻကီ နုဲင်းကြွန်ꩻကြန်ꩻ ၊ ဗိုန်ကဝ်ႏရော်ꩻဝင်ꩻ ကသမ်းစွုမ်ႏ ၊ တလီꩻထွာႏနွန်ႏ အဖွန်ႏလီ ၊ တကုဲင်အွꩻထီ ယွိုင်ႏ အရောင်ႏ၊ တမျိုꩻမေႏတောင်ႏ လေတဆဝ် ၊ တွို့ꩻကွဉ်ႏထင်ꩻနဝ် ဆာႏပေႏဖုံႏ ၊ ရောင်ႏအဝ်ႏစုပြုံႏ နုဲင်းနဝ်ꩻတွိုင်ꩻ ၊ လက္ခဏာႏ ပေႏဆွိုင်ꩻ ပါꩻသွစ်ꩻဆီ ၊ ဗွေႏဘုရာꩻနမ်းကီ သပယ်ႏငါႏ ၊ ဗိုပဒုမ္မာႏ ပုဏ္ဍရိတ် ၊ တခွဉ်ႏဗွာဟိတ် တနျာႏထောင် ၊ စွူငါႏထီနောင် ဟဝ်အံႏဖြာႏ ၊ ဗွေႏမျတ်အဝ်ႏဒါႏ လက္ခဏာႏယို ၊ ထီနောင်အံႏအွို အဝ်ႏအံႏဖြာႏ ၊ မွူးလိုမ်းတုဲင်ဒါႏ လူꩻကဝ်ႏဆုံ ၊ ဘုရာꩻရောင်ႏစုံ မထွꩻခွုန်ꩻ ၊ ဆာႏအာရောင်ႏစွုမ်ႏ မို့ꩻလောင်းကီ ၊ ထွꩻတဝ်းဒွိုန်းအီ ဗွေႏဘုရာꩻ ၊ သွစ်ꩻဆီအပါꩻ လက္ခဏာႏ ၊ အပေႏလွုမ်ꩻဒျာႏ သနယ်ဩ။ တကာႏဒွိုန်းနေား ဗွေႏဘုရာꩻ ၊ သိုမ်ဆီနီပါꩻ လက္ခဏာႏ ၊ တကြဲမ်ခန္ဓာႏ နမ်းရောင်ႏယို ၊ လာခွန်တန်ယို သိုမ်ဆီနီ ၊ ထူးတွယ်ꩻလကီ အွဉ်ႏစဲဉ်ႏဗာႏ ၊ မွူးမင်ꩻရာႏဇာႏ ခွုင်းနဝ်ꩻနေ ၊ ထူးဆွိုင်ꩻစေႏထွေ အဝ်ႏရဲဉ်ႏဝင်ꩻ ၊ စက္ကဝတ်မင်ꩻ သိကျာꩻခွန် ၊ ဗျဟ္မာႏသီးခွန် ၃၂-တာႏ၊ ဝွေꩻသီးအာငါႏ ခွုင်းနဝ်ꩻလဲ့ ၊ ထွꩻတဝ်းဒွိုန်းတဲ့ ဗွေႏဘုရာꩻ ၊ သိုမ်ဆီနီပါꩻ လက္ခဏာႏ၊ အဝ်ႏရံႏသံႏဃာႏ လို့လို့စင် ၊ ထာꩻမဲဉ် လꩻထင် လွစ်အဝ်ႏဒါႏ ၊ ပစ္စေꩻလစ်ꩻဗာႏ ကွို့ꩻသꩻယိုꩻ ၊ ပျောႏသꩻအုံရိုꩻ ဝိဝေက ၊ ခွန်’မတ်တန်စ ကင်ꩻသျင်ꩻဒျာႏ ၊ လိုꩻကံကျင်ꩻမာႏ ကုဲင်းသွဉ်လွ ၊ ခွုင်းတဲင်ပါပ လွစ်အံႏဖြာႏ ၊ ဝင်ꩻငဝ်းဆျာႏခါႏ သယ်ꩻခံႏနွောင်ꩻ ၊ သီႏလတဖွေါင်ꩻ ကတဲပ်တဝ် ၊ ဈာန်ႏသꩻစွူဟဝ် ဗွေမွေးငါႏ ၊ ဝိပသ်-ပညာႏ တွမ်ႏမဂ်နော ၊ ဗွေခွꩻစုံခေါး အရဖိုလ်ႏ ၊ ဆင်ႏချင်ႏချာတွိုႏ ဉာဏ်ႏမျိုꩻထို ၊ ဘုရာꩻစဝ်းယို ကအဝ်ႏရံႏ ၊ ဂုဏ်ႏအဝ်ႏဗွေထင်ႏ နုဲင်းနဝ်ꩻသွူ။ နင်းဟွူထာႏဝ ဗွေႏဘုရာꩻ ၊ တနျာႏငါႏထာꩻ ကမ္ဗလာႏ ၊ တံꩻတွိုင်ꩻရဲးပါႏ နုဲင်းခံꩻကောင် ၊ ဗွန်ပဒုမ္မာႏနောင် ရောင်ႏတနျာႏ ၊ ကအဝ်ႏဖြုဲင်ꩻဒါႏ ဖြီꩻခံꩻတွိုင်ꩻ ၊ သန္တာႏစပ်ဆွိုင်ꩻ ရံႏခူဒါႏ ၊ မေႏပြုံႏပမာႏ နဝ်ꩻတမျိုꩻ၊ ဆာႏပေႏဖုံႏစွိုꩻ အဝ်ႏခူခါꩻ ၊ ဗွေမွေးစွဉ်ႏထာꩻ လာတန်ယို ၊ သောင်ꩻသား’ဝါးအွို မဲ့လဲင်ꩻခွꩻ ၊ နိစ်သက်စွုမ်းသꩻ ကဟဝ်မွေး ၊ လိုꩻလူꩻသီးဟွေး အမဲ့တာႏ ၊ ဒေါ့ꩻနယ်ခရာႏ လဲင်ꩻအဲဉ်ထဝ်း ၊ ဗွေႏဘုရာꩻစဝ်း ကကျွꩻငါ ၊ ဝေင်ꩻနာဠန္ဒာ အနီꩻတွင်ꩻ ၊ ကဲဉ်းအာအာရင်ꩻ ပါꩻသွစ်ꩻဆီ ၊ မထေရ်ႏဖုံႏအီ ရုံႏဗုဲင်ဒျာႏ ၊ ရောင်ႏအွူႏတနျာႏ ပံႏသကူႏ ၊ ပြေင်လောင်းဒင်ႏထူႏ ခွဉ်းထော့အီ ၊ အနမ်းလောင်းကီ အဝေါ်ꩻဒင်ႏ ၊ ပမာႏတွိုင်ꩻထင်ႏ ဆင်တန်ထို ၊ ကိလေႏပဲစ်ယို ကင်ꩻညာꩻလွ ၊ လာꩻထန်ႏထိုꩻဖြ ကိလေႏသာႏ ၊ ပြင်ꩻကိလေႏသာႏ တဏှာႏစေ ၊ ဖဲ့ဗက်ꩻဖြတ်ꩻထေ စွိုင်အကျꩻ ၊ အဝ်ႏရံႏသေꩻမꩻ ဗွေႏဘုရာꩻ။ ကရိုꩻထွူခါꩻ တွမ်ႏဂုဏ်ႏဖုံႏ ၊ အဝ်ႏဗွေအဝ်ႏပြုံႏ ဝွေꩻဗွေႏနမ်း ၊ ရာဂ ကင်ꩻသမ်း ရဟန္တာႏ ၊ အဝ်ႏရံႏလွဒါႏ ဗွေႏဘုရာꩻ ၊ ထဲင်းချင်တပါꩻ နမ်းဒေါသ ၊ ကင်ꩻထွူရျူႏခွꩻ ယဝ်းထွူခါ ၊ ရဟန္တာႏအာ ဗွန်ဗွန် ဒျာႏ ၊ မောဟအမာႏ ဖေ့ထိုꩻထွူ၊ ရဟန္တာႏသွူ နုဲင်းဝွေꩻဗွေႏ ၊ အဝ်ႏခူရံႏဖေႏ တဏှာႏညာꩻ ၊ ပက်ထန်ႏထွူခါꩻ ကိလေႏသာႏ ၊ အဲဉ် ထဝ်းဒွုမ်ဒျာႏ သစ္စာႏသေ ၊ သေလွဉ်ꩻထောင်ထွေ ရဟန္တာႏ ၊ အဝ်ႏရံႏလွဒျာႏ ဗွေႏဘုရာꩻ ၊ အလာႏခူခါꩻ ကဝ်ႏထဲင်ꩻတုဲင် ၊ လွီးဟွမ် လီပြုဲင် ကဝ်ႏဗိုလာႏ ၊ သွစ်ꩻသောင်ꩻရဲင်ꩻအာႏ အဝ်ႏရံႏလွ ၊ ဆင်ဆဒ္ဒန္တ ကွိုနဲးလောင်ꩻ ၊ ဟင်္သာႏကွတ်ꩻသောင်ꩻ အဝ်ႏခူလွ ၊ ဓတရဋ္ဌ ခွန်ဟင်္သာႏ ၊ လစ်ꩻပါꩻအင်္ဂါႏ စဲ့ꩻရံႏလွ ၊ စက္ကဝတ္တ ခွန်မင်ꩻတန် ၊ လူꩻဟဲ့ꩻတနံ ကအဝ်ႏပြုံႏ ၊ သိကျာꩻခွန်ဖုံႏ ပမာႏခါꩻ ၊ ဗျဟ္မာႏအာဖြာꩻ ထွာအတန် ၊ ဟာရိတဖန် ခွန်ဗျဟ္မာႏ ၊ တွက်လဲင်ꩻမဒါႏ ကမာꩻဖို ၊ ကုသိုလ်ႏစိုန်ꩻယို ကွပ်ဖေႏအာႏ ၊ တွိုင်ꩻနယ်ခရာႏ လဲင်ꩻအဲဉ် ထဝ်း ၊ ဘုရာꩻဗွေႏစဝ်း ကတင်ႏတယ်ႏ ၊ ဗိုန်လာအဝ်ႏလယ်ႏ မို့ꩻလောင်းကီ ၊ နီလိုꩻခမ်းထီ ကအဝ်ႏကျွꩻ ၊ ကီညိုႏယံထွꩻ ကျမ်ꩻ ဗွောင်ဖေႏ ၊ ငဝ်းဥပမေႏ ဗွေႏဘုရာꩻ ၊ သပယ်ႏငါႏထာꩻ ဒေါ့ꩻမဒါႏ ၊ နီကမာꩻဗာႏ ကုသိုလ်ႏယို ၊ ဗွေႏစဝ်းဗိုန်ထို ကွပ်ထွိုက်ငါႏ ၊ ငဝ်းခွိုင်ꩻပမာႏ အွဉ်ႏထွူယို။ အီႏတုံꩻသွမ်ꩻယို အခိန်ႏခါႏ ၊ ကေားဝွတ်ပတ်ဒါႏ သꩻယံသွိုꩻ ၊ ဗွေႏနမ်းတာႏရိုꩻ ယံဖွီသာႏ ၊ ထီမဲ့ဖြားဒျာႏ စတဲင်မာꩻ ၊ ကျွꩻတုံꩻသွမ်ꩻ ညာꩻ ခါးလားလꩻ ၊ အုံငိမ်ꩻခွꩻသꩻ တဆင်ႏတွင်ꩻ ၊ အခိန်ႏတွိုႏလင်ꩻ အီႏကျွꩻခါ ၊ ကန်ꩻပွိုင်ႏကွဉ်ပါ ပန်ꩻကျိုꩻစွိုင် ၊ သင်္ကန်ꩻလဲ့ထွိုင် သပိတ်ဖင်ꩻ ၊ ယလဲင်ႏခိန်ႏရင်ꩻ တပါꩻဒျာႏ ၊ ယလဲင်ႏခိန်ႏခါႏ သံႏဃာႏအာ ၊ ရံႏလွဉ်ꩻအဝ်ႏပါ ဗွေႏအထျ ၊ ဒုံဆောင်ႏနိဂမ တုံꩻသွမ်ꩻ တာႏ၊ နွို့လွေꩻခိန်ႏခါႏ အယံတွင်ꩻ ၊ ယလဲင်ႏနဝ်ꩻရင်ꩻ ရိုꩻရိုꩻနေး ၊ ယလဲင်ႏနဝ်ꩻကွေး တွမ်ႏတံꩻခိုꩻ ၊ အပုံႏမျိုꩻမျိုꩻ ကကျွꩻငါ။ တံꩻခိုꩻဖုံႏ အာ နုဲင်းမုဲင်ꩻဒါႏ ၊ ယံကသေဗာႏ သွုပ်ငါသမ်း ၊ လောကလိုꩻခမ်း ကကိုꩻကွယ်ႏ ၊ သာႏကီႏခွိုꩻနွယ်ႏ နီဘုရာꩻ ၊ အဝ်ႏကျွꩻလွေꩻကျာꩻ ဗွေႏဆꩻငါ ၊ တလီꩻသျုပေႏခါ ဖွစ်ꩻထာꩻအီႏ ၊ ခမ်းလော့တဆီႏ တဖူꩻလောင်း ၊ ဟံႏဖွန်ႏတဲပ်ကြောင်း ဗွေႏဆꩻကီ ၊ မျက်နာႏကျက် အီ လွဉ်အဝ်ႏတံꩻ ၊ တွို့ꩻကွဉ်ႏနဝ်ထင်ꩻ တလီꩻဖုံႏ ၊ ထွာႏအီလွဉ်ပြုံႏ ကဝ်ႏမျိုꩻအာ ၊ တဖူꩻသꩻခြာ အဝ်ႏခြွဉ်းတံꩻ ၊ ဟံႏပူႏရပ်ရင်ꩻ ဖွိုႏ ထိုꩻငါ ၊ အဗျို့ရပ်ခြာ ထိုစွဉ်ႏဒျာႏ ၊ ခင်ႏတောႏယမ်းဒါႏ ဟံႏအကို ၊ ပူႏဗျို့ဖွိုႏထို လွစ်အဝ်ႏဗာႏ ၊ တွောင်းငီႏဟဝ်ငါႏ နုဲင်းနဝ်ꩻဩ။ ကဝ်ႏဗိုတုဲင်နေား ပဒုမ္မာႏ ၊ ဘုရာꩻခင်ႏတာႏ အဝ်ႏဒါသေꩻ ၊ သဲစ်ကျွꩻတွိုႏလွေꩻ ဝေင်ꩻအကို ၊ ဝေင်ꩻတခါꩻယို ခင်ႏထွေချꩻ ၊ နမ်း တောႏဗွေႏထျꩻ ရောင်ႏသူပါꩻ ၊ သပယ်ႏငါႏထာꩻ နုဲင်းခံꩻဖွန်ႏ ၊ ကအဝ်ႏလူးကြုံႏ အယံတွင်ꩻ ၊ နုဲင်းခွမ်ꩻလာꩻဆန်ꩻ ကအဝ်ႏရံႏ ၊ ပျ သာဒ်စျူထင်ႏ စဲင်းဟဝ်လွို ၊ ချာတွမ်ႏငါယို အဝ်ႏလွင်းလယ်ႏ ၊ ဆင်’ဝါး’သေကယ်ႏ သꩻသားယို ၊ အုံခင်ႏလမ်းကို ပငါရာꩻ ၊ တလေ့ငါႏထာꩻ မာꩻအငဝ်း ၊ ဝေါက်သင်ႏဟွုန်လဝ်း မို့ꩻလောင်းကီ ၊ ထုံတန်-တိန်ႏပီ တူရိယာႏ ၊ လိုꩻလောင်းအဝ်ႏဒါႏ ခြွိုင်းခံꩻသဲင်၊ မာꩻငဝ်းအွီႏအဲင် ဗိုန်ဗိုန်ဒျာႏ ၊ တောင်ꩻအီနဝ်ꩻဒျာႏ လိုꩻသေငါꩻ။ ဗွေႏမျတ်ဘုရာꩻ ဟန်ႏနီꩻယို ၊ ကျွꩻတုံꩻသွမ်ꩻအွို နီရပ်ရာႏ ၊ သေအခ ရာႏ ထွူယဝ်းမꩻ ၊ ဖျင်ခြွိုင်းကွဉ်ကꩻ ပိတ်ဗန်ႏယာႏ ၊ ကဝ်ႏတွမ်ႏနံႏသာႏ စတဲင်မျိုꩻ ၊ ထူႏထွူထန်ႏထိုꩻ အွိုးလမ်းငါ ၊ တဖူꩻသꩻခြာ လွေꩻပွေါးတံꩻ ၊ ပူႏဇောႏလူႏတန်ꩻ ရိုႏရိုႏသေႏ ၊ ခေါက်ဝုဲင်ႏစဝ်းဗွေႏ ထွူတဲင်ခါ ၊ နေးတွမ်ႏငဝ်းငွါ လဝ်းစွဉ်ႏဒျာႏ ၊ “နီသွဉ်းသီးတာႏ ပါꩻတဆီ ၊ ရဟန်ꩻနီဆီ ငတ်ꩻဆီတာႏ ၊ တရျာꩻသံႏဃာႏ ယံဖလင်ꩻ” ၊ ကွီထင်ႏလွဝင်ꩻ ယဝ်းသေႏချာႏ ၊ လောႏထူႏစွဉ်ႏဒျာႏ ဘုရာꩻရင်ꩻ ၊ သပိတ်ထွူတွင်ꩻ တွမ်ႏထာꩻဒါ ၊ နဲစ်ထူႏလောႏဒါ ရိုႏရိုႏသေႏ ၊ သွမ်ꩻလောင်ꩻမျတ်ဗွေႏ ပူႏဇောႏလွ ၊ ဗွေႏသုံꩻကိစ္စ ယဝ်းသေႏ ချာႏ ၊ ထွားသွမ်ꩻတကာႏ သꩻခေႏနေႏ ၊ လွောက်ꩻရာꩻဟော်ꩻဖေႏ မျတ်တရာꩻ ၊ ပုဂ္ဂိုလ်ႏယင်ဖြာꩻ ဆယ်ꩻကပ်ဗာႏ ၊ သိုမ်ပါꩻသရဏာႏ ထူႏသီႏလ ၊ ယင်ဟန်ႏတွိုႏလွ ပ-မဂ်ဖိုလ်ႏ ၊ ယင်ဟန်ႏနဝ်ꩻတွိုႏ နီ-သိုမ်မဂ် ၊ အဆုဲင်ꩻသွတ်ꩻမဂ် အရ-ဖိုလ်ႏ ၊ ဖျော်ဗꩻလဲင်ꩻတွိုႏ မျတ်တရာꩻ ၊ ယိုနဝ်ꩻဘုရာာꩻ တံꩻခိုꩻနေး ၊ ကကျွꩻလွေꩻဟွေး အပုံႏစံႏ။