ဘဝအထီအသွီႏ

"လိုꩻဘဝ"ကရိုꩻနဝ်ꩻ ဗိုန်ပီနုဲး "သာꩻ"။ ကမာꩻဗာႏ"သာꩻ"နဝ်ꩻ အီႏထင်ႏကီအီတာႏနဝ်ꩻသွူ။ နုဲးနဝ်ꩻနေနေ ကလꩻလွဉ်လိုꩻဘဝနဝ်ꩻတဲ့ အီႏထင်ႏကီတာႏနဝ်ꩻသွူ။ ယံကထင်ႏကီဗာႏအတာႏ အဝ်ႏလိုႏဒါႏ "နမ်းအထီအသွီႏအဝ်ႏလိုꩻ"နဝ်ꩻသွူ။ အထီအသွီႏမဉ်ႏတအဲဉ်ထဝ်းနဝ်ꩻ အီႏထင်ႏကီဗာႏနဝ်ꩻ တယိုꩻတဝ်းလာꩻလာꩻသွူ။

အထီအသွီႏဖုံႏနဝ်ꩻ ထွာဒျာႏ "ဣန္ဒြေႏ ငတ်ꩻပါꩻ"နဝ်ꩻသွူ။ "ဣန္ဒြေႏ ငတ်ꩻပါꩻ"ကရိုꩻနဝ်ꩻ သဒ္ဓါႏ, ဝီရိယ, သတိ, သမာဓိ, ပညာႏ ယိုငတ်ꩻပါꩻသွူ။ အမဲဉ်ႏတဗာႏ အထီအသွီႏကရိုꩻနဝ်ꩻ ထွာ"ဣန္ဒြေႏ ငတ်ꩻပါꩻ"နုဲးယိုသွူ။

၁။ သဒ္ဓါႏ

ထာꩻယူမ်းအံႏမုꩻယို ဝင်ꩻဟဲ့ꩻ "သဒ္ဓါႏ"နဝ်ꩻသွူ။ ယူမ်းအံႏ ဖရာꩻ, တရာꩻ, သံႏဃာႏ ရတနာႏသိုမ်ပါꩻ။ ယူမ်းအံႏ"မီဉ်ႏမာꩻအဟဝ် လꩻချာအကျိုꩻဟဝ်၊ မီဉ်ႏမာꩻအကုဲ ခံႏဗာႏချာအကျိုꩻကုဲ"။ ကယူမ်းအံႏနုဲးယိုနဝ်ꩻ ဟဲ့ꩻ"သဒ္ဓါႏ"နဝ်ꩻသွူ။

"သဒ္ဓါႏ"မီဉ်ႏတအဲဉ်ထဝ်းလိုꩻနဝ်ꩻ ငမ်းတဝ်းဒူမ် ဝင်ꩻသꩻတဝ်းဒူမ်မုဲꩻမုဲꩻ။ အမဲဉ်ႏတဗာႏနဝ်ꩻ ကလိုႏငမ်းကိုယို ငမ်းဗာႏ။ ကလိုႏဝင်ꩻသꩻကိုယို ဝင်ꩻသꩻဗာႏ။ ယိုနဝ်ꩻ ငမ်းဒါႏတဝ်း ဝင်ꩻသꩻဒါႏတဝ်းထာꩻတဲင် စူရုဲးခင်ႏရုဲးမာꩻရုဲးစွဉ်ႏ အကုသိုလ်ႏသွူ။

ယင်ဟန်ႏသားနဝ်ꩻ ဒါႏပညာႏ။ သေနာႏဒါႏ ကူစွိုးစွိုး။ အွဉ်ႏနယ်တထာ ထီႏတသောင်ꩻ။ သွဉ်နယ်တစောမ်ꩻ သေတခြဲမ်။ ကွဲႏတွော့ꩻ သဒ္ဓါႏတရာꩻနဝ်ꩻ သမ်းတအဲဉ်ထဝ်းတစိꩻစိꩻ။

ဒါႏပညာႏထွူ သဒ္ဓါႏတရာꩻတအဲဉ်ထဝ်းလိုꩻနဝ်ꩻ သꩻကုဲးတကဲင်ႏတန်။ ဝွေꩻနဝ်ꩻ ဉာဏ်ႏဟွေႏဉာဏ်ႏကုဲအာတဲင် ထိုမ်ႏဖေႏဒုက္ခဒါႏပါꩻ။ နဝ်ꩻမꩻ ဟဝ်ငမ်းခရာႏငါႏ လိုꩻတဖြာꩻနဝ်ꩻသွူ။

အွိုးကရီးခါ ရဟန်ꩻသꩻတကဲင်ႏတပါꩻနဝ်ꩻ အဝ်ႏဖို။ အဗွဲ့မီဉ်ꩻနဝ်ꩻ ဟဲ့ꩻဖန်"ဗွေႏကပိလ"သွူ။ ဝွေꩻဗွေႏနဝ်ꩻ ဉာဏ်ႏထင်မွေးထာꩻတဲင်ဒါႏတဲပ် ဆောင်ႏအိုမ်နွောင်ꩻစွဉ်ႏ ပိဋကတ်သိုမ်ဘုံႏသွူ။ ကွဲႏတွော့ꩻ ဝွေꩻဗွေႏနဝ်ꩻ သဒ္ဓါႏတရာꩻ အဲဉ်ထဝ်းတစိꩻစိꩻသွူ။ နဝ်ꩻမꩻ ထီႏမထေရ်ႏတန်သီး ပုဂ္ဂိုလ်ႏတန်သီးအလောင်းနဝ်ꩻ အံႏသွင်ꩻတဝ်း။ အဆုဲꩻသုတ်ꩻ ကထွာအဝေး ရဟန္တာႏမထေရ်ႏငဝ်းငါတဲ့ နာႏနွောင်ꩻဒူမ်။ မဲဉ်မာꩻတမုဲꩻမာꩻ၊ မဲဉ်ဒေါ့ꩻတမုဲꩻဒေါ့ꩻခန်းဒျာႏ။ "တအပ်တဝ်းယို ရိုꩻအအပ်။ ကအပ်မျိုꩻယို ရိုꩻအပ်တဝ်း"ဖြေ့ꩻလီခန်းဒျာႏဝါႏဒနုဲးနဝ်ꩻသွူ။ ရဟန်ꩻဖိုင်ႏအချင်ꩻချင်ꩻ ပꩻလီထိုꩻဝင်ꩻတဲင် ထာꩻလွောင်ႏဗူႏအဲဉ်ထဝ်းဒူမ်နဝ်ꩻမꩻ သာႏသနာႏဖေ့သဲင်ꩻထိုꩻခန်းဒျာႏတလဲင်ႏတစိꩻနဝ်ꩻသွူ။

ဗွေႏကပိလနဝ်ꩻ ဗိုန်ပီပါꩻကတဲႏ(တံꩻတွိုင်ꩻ)တဖွောင်ꩻနဝ်ꩻအတွိုင်ꩻ ထွာစွဉ်ႏလိုꩻထင်ႏနွောင်ꩻစွဉ်ႏအွိုးကီ။ ကွဲႏတွော့ꩻ ထင်ႏကီနွောင်ꩻတဝ်းတဲင် ဗိုန်ပီပါꩻခူႏထာꩻအောင်အတွိုင်ꩻ ကွဲးလင်ꩻလလဗာႏဒျာႏသွူ။ ယိုနဝ်ꩻ ပွိုးတမုဲꩻနဲးတဲင် ကောပ်စွဉ်ႏ သဒ္ဓါႏတရာꩻအဲဉ်ထဝ်းနဝ်ꩻသွူ။ နဝ်ꩻမꩻ ထာꩻယူမ်းအံႏ မီဉ်ႏတအဲဉ်ထဝ်းနဝ်ꩻ ထွာကွို့ꩻဘာႏသာႏရေꩻပျသနာႏလူမ်ꩻမွေးတဝ်း၊ ဘဝပျသနာႏတဲ့ ထွာအီဗာႏနေနေသွူ။

သဒ္ဓါႏတရာꩻမီဉ်ႏတအဲဉ်ထဝ်းနဝ်ꩻ ထဲ့သော့နွောင်ꩻအပါယ်ႏလိစ်ꩻခြံကို အဓိပ္ပါယ်ႏအချုပ်အဝ်ႏနုဲးနဝ်ꩻသွူ။ နဝ်ꩻမꩻ သဒ္ဓါႏတရာꩻဖေႏကကုဲဗာႏမွုန်းယို ဟဝ်သတိငါႏဝင်ꩻသွူ။

၂။ ဝီရိယ ခံႏတဝ်းဆုတ်ꩻချာ ကသောင်ႏသာငါငါသꩻနဝ်ꩻနဝ်ꩻ ဟဲ့ꩻ"ဝီရိယ"သွူ။ လောကတခြောင်ႏကိုတဲ့နဝ်ꩻ ဓမ္မအခြာတဲ့နဝ်ꩻ ယံအောင်ႏမျင်ႏအတာႏ "ဝီရိယ"ယို အရေꩻတန်တန်သွူ။

နဝ်ꩻမꩻ သိပ္ပံပညာႏသျင်ႏ အဲစ်ဒီသီဉ် ကဒေါ့ꩻဖေႏငါႏ "ထာꩻအောင်ႏမျင်ႏကရိုꩻနဝ်ꩻ နေးတောမ်ႏ ဉာဏ်ႏအထီအသွီႏ ၁%တောမ်ႏ တသိုꩻထီတသိုꩻစက်ꩻ ၉၉%သီးတဲင် လꩻလွဉ်ဗာႏ အကျိုꩻတရာꩻဒျာႏ"နုဲးနဝ်ꩻသွူ။

ဝွေꩻနဝ်ꩻ ထင်ႏကျောင်ꩻခီင်ႏ လိတ်ဖဲ့ꩻညံးတန်။ ဆရာႏ ဆရဉႏမူႏသီး အွောန်ႏထွေဉ့ꩻဖေႏဝွေꩻ ကျောင်ꩻကိုနဝ်ꩻ ဉာဏ်ႏအထွိုင်ꩻသုတ်ꩻလိုꩻတဖြာꩻနုဲးနဝ်ꩻသွူ။

ကွဲႏတွော့ꩻ ကောပ်ဝွေꩻထာꩻသောင်ႏသာမုꩻတဲင် သက်ကလꩻ(၁၄)နေင်ႏအရွယ်ႏတွင်ꩻနဝ်ꩻ ထွားလွူꩻတွိုႏထင်ႏလွေꩻဗာႏစွောန်ႏ နယူတန် ရူပဗေဒနိယာမဖိုင်ႏ၊ ဓာတုဗေဒတောမ်ႏ သင်္ချာႏဘာႏသာႏအရန်းဖိုင်ႏနဝ်ꩻသွူ။

ဝွေꩻသက်ကလꩻ(၁၄)နေင်ႏတွင်ꩻနဝ်ꩻ မာꩻလွေꩻစစထာꩻမာꩻ မေႏရထာꩻဗူႏတာႏကိုနဝ်ꩻသွူ။ ပဲင်ႏရိုမ်ꩻသားတန်နဝ်ꩻ သွောန်ဖေႏဝွေꩻ တွဲယ်ႏတောင်ꩻဟော်(ကြေးနန်းရိုက်နည်း)နယ်ꩻပညာႏနဝ်ꩻသွူ။ ကထွိုင်ႏဒါႏလဲပ်လွောန်နဝ်ꩻ ဝွေꩻတဲယ်ႏထွင်ႏဖေႏ အဝ်ႏလွိုႏလွိုႏကာႏကာႏ ကတွဲယ်ႏနျꩻထန်ႏဖေႏဒါႏလိတ်ဖြိုင်ႏ တွဲယ်ႏနျꩻတောင်ꩻဟော်(ကြေးနန်းရိုက်)ကိရိယာႏနဝ်ꩻသွူ။ ယိုနဝ်ꩻ ထွာတွေꩻအောင်ႏမျင်ႏမုꩻ ပထမခင်ႏကာနဝ်ꩻသွူ။

အဝ်ႏနဝ်ꩻမꩻ တဲယ်ႏထွင်ႏတခြိုꩻအမျိုꩻမျိုꩻထွူ တဲယ်ႏထွင်ႏလွေꩻဗာႏစွောန်ႏ ခြွောန်းပေါင်ꩻ(၁၀၀၀)လွိုနဝ်ꩻသွူ။ ပါꩻကသေထွꩻအာအာသုတ်ꩻ ဝွေꩻကတဲယ်ႏထွင်ႏထာꩻနဝ်ꩻ ထွာဒျာႏ "မေႏတျာႏမေႏရာႏ"နဝ်ꩻသွူ။ နဝ်ꩻမꩻ တကမ္ဘာႏလူမ်းလူမ်း အွောန်ႏထွော့လွဝွေꩻ "သိပ္ပံပညာႏဗွေႏ"နုဲးနဝ်ꩻသွူ။ ဉာဏ်ႏအထွိုင်ꩻသုတ်ꩻလိုꩻတဖြာꩻ ကထွာကတွိုႏလွေꩻဗာႏ ကျောႏကမ္ဘာႏပုဂ္ဂိုလ်ႏတဖြာꩻနဝ်ꩻ ကောပ်ပွိုး ခံႏတဝ်းဆုတ်ꩻချာ သောင်ႏသာငါငါ ဝီရိယနဝ်ꩻသွူ။

နဝ်ꩻမꩻ ဗွေႏမျတ်ဖရာꩻ ဟောꩻသေꩻခါꩻဖေႏ "ဝီရိယဝတော ကိံ နာမ ကမ္မံ န သိဇ္ဈတိ- ဝီရိယ မီဉ်ႏအဝ်ႏနဝ်ꩻ တအောင်ႏမျင်ႏတဝ်းမျိုꩻနဝ်ꩻ တအဲန်ထဝ်း"နုဲးနဝ်ꩻသွူ။

မဲန်ႏ...။ နီဗွေႏဖရာꩻ ခါးလားကထွာဖရာꩻတွင်ꩻနဝ်ꩻ အဝ်ႏဟော်နန်ꩻလောင်းကီ ကျွꩻလွေꩻ ကံကျင်ꩻတရာꩻ သေင်ႏတမွူးဝါႏတမွူးဖဲ့ꩻလနဝ်ꩻသွူ။ ယလဲင်ႏလဲင်ႏ သူင်ꩻဒျာႏကွို့ꩻ ဒဲန်သောမ်တငွါပေႏထွူ ကံကျင်ꩻသုပ်ယင်းတရာꩻနဝ်ꩻသွူ။ ယလဲင်ႏလဲင်ႏ အွꩻဗာႏ ဗာႏခူꩻထီတဝန်ႏထွူ ကံကျင်ꩻလွေꩻယင်းတရာꩻနဝ်ꩻသွူ။ ကောပ်သောင်ႏသာကံကျင်ꩻလွေꩻနုဲးနဝ်ꩻမꩻ အဆုဲꩻသုတ်ꩻ ထွာလꩻ ဖရာꩻနဝ်ꩻသွူ။ နဝ်ꩻမꩻ ဖေႏကတွိုႏလွေꩻ နီကလိုႏရာꩻတဖူꩻသူꩻ ယူမ်းအံႏမုꩻကရိုꩻဒါႏသဒ္ဓါႏတရာꩻနဝ်ꩻ အရေꩻကတန်ငါႏအတွိုင်ꩻ သောင်ႏသာမုꩻကရိုꩻဒါႏဝီရိယနဝ်ꩻလဲ့ အရေꩻတန်မွေးမုဲးငါႏနေနေသွူ။ ။

၃။ သတိ

သတိနဝ်ꩻ အဗိုန်ပီနုဲး တသာႏ။ တသာႏနဝ်ꩻ ဒွိုႏဟန်ႏအိုတာႏ ကအဝ်ႏလိုႏသေႏသေႏငါႏနဝ်ꩻအတွိုင်ꩻ သတိယိုလဲ့ ကိစ္စတွိုင်ꩻကိစ္စတွိုင်ꩻ အဝ်ႏလိုႏငါႏနေနေသွူ။ ပေါႏသတိတဗာႏ လွောတ်ထိုꩻသွူနဝ်ꩻ ဘဝလဲ့ တဗူႏတဗန်ႏထိုꩻနွောင်ꩻစွောန်ႏသွူ။ နဝ်ꩻမꩻ နီဗွေႏဖရာꩻ ဆင်ႏဆင်ႏတဝ်းတဲ့ မိန်းဟောꩻဖေႏ "အပ္ပမာဒေန သမ္ပာဒေထ- အိုင်အဝ်ႏသေႏသေႏသွော့တောမ်ႏသတိ" နုဲးနဝ်ꩻသွူ။ ကောပ်အရေꩻတန်မွေးမုဲးငါႏမရေႏမရာႏတဲင် ဆင်ႏဆင်ႏတဝ်းတဲ့ နီဗွေႏဖရာꩻ အဝ်ႏမိန်းဟောꩻဖေႏနဝ်ꩻသွူ။

ကွဲႏတွော့ꩻ နီလိုꩻသီးဖိုင်ႏကဲန်းအာအာ ဆင်ႏဆင်ႏတဲ့ မီဉ်ႏဒေါ့ꩻနယ်နဝ်ꩻ အဟွုန်နားတရေင်ထာꩻသွူ။ "အဝ်ႏဒေါ့ꩻယင်းသွူ အငဝ်းလီꩻ"ဗွိုႏလွဝင်ꩻနုဲးနဝ်ꩻသွူ။ အမဲန်ႏတဗာႏနဝ်ꩻ ကယီင်းဒေါ့ꩻခွိုꩻခွိုꩻယို ကယီင်းလိုႏလက်ခံႏဗာႏထဲင်းနဝ်ꩻသွူ။

မွိုးဖာဒေါ့ꩻတယဝ်း၊ ဆရာႏဖိုင်ႏသွောန်တယဝ်း၊ လိုꩻတန်ရိုꩻတယဝ်း၊ ပါꩻမုဲꩻမုဲꩻဒေါ့ꩻတယဝ်း ဆင်ႏဆင်ႏတဲ့မီဉ်ႏဒေါ့ꩻနဝ်ꩻ ထွာဒျာႏ ဒေါ့ꩻငဝ်းရာႏလီꩻလွောန်းလွောန်းသွူ။ ရိုꩻခန်းငဝ်းလီꩻတယဝ်း ဟဝ်မုဲꩻတောင်ꩻဗာႏ ဘဝအတာႏ"ငဝ်းအရေꩻတန်ဒျာႏ"နုဲးနဝ်ꩻသွူ။

သဒ္ဓါႏ ဝီရိယဖိုင်ႏ မီဉ်ႏအဝ်ႏနဝ်ꩻ ဟဝ်ဒျာႏရို့ကီလဲ့ အမီဉ်ႏလွောန်ꩻထိုꩻနဝ်ꩻ အန္တရာယ်ႏအဝ်ႏသွူ။ ကွဲႏတွော့ꩻ သတိနဝ်ꩻတဲးတဲ့ အလွိုတအဲန်ထဝ်း၊ အဝ်ႏဒျာႏလူမ်ꩻ အလိုႏသေႏသေႏနဝ်ꩻသွူ။ နဝ်ꩻမꩻ မာꩻခန်းထာꩻမာꩻကိစ္စအမျိုꩻမုဲꩻမုဲꩻခန်းတယဝ်း "ခွေတခံႏတဝ်း သတိလွောတ်လိုꩻ"အဝ်ႏလိုႏအဓိဋ္ဌာန်ႏငါႏနုဲးနဝ်ꩻသွူ။

၄။ သမာဓိ

အာႏရုံႏဟဝ်တဗာႏဗာႏအလောင်းယို ကပွာꩻမျာꩻတဲးတဲးဝါးဝါးနဝ်ꩻ ဟဲ့ꩻ"သမာဓိ (တဝ်းလဲ့)သမထ"နဝ်ꩻသွူ။ ပွာꩻဂုဏ်ႏတောႏ၊ ရွောစ်ပူႏဇောႏ ပရိတ်, ပဋ္ဌာန်ꩻ၊ ထွားမတ် သာနွို့သာထန်ႏတလီꩻစတဲင်ဖိုင်ႏယို ကပွာꩻမျာꩻနုဲးနဝ်ꩻနဝ်ꩻ ထွာသမထကျင်ꩻရဲန်ႏသွူ။

ဒေါ့ꩻအလုဲးခြုဲးအဆွာꩻနဝ်ꩻ ဘာႏဝနာႏကရိုꩻနဝ်ꩻ ၁။ သမထဘာႏဝနာႏ၊ ၂။ ဝိပဿနာႏဘာႏဝနာႏ အဝ်ႏယိုနီမျိုꩻသွူ။ ယိုနီမျိုꩻအကို သမထဘာႏဝနာႏကရိုꩻနဝ်ꩻ ထွာတဲယ်ႏထောင်ႏသမာဓိ မာꩻစွူသꩻကျင်ꩻရဲန်ႏနဝ်ꩻသွူ။ ။

ပွိုးတမုဲꩻ မွော့ꩻတဲယ်ႏထောင်ႏဗာႏတွိုႏသမာဓိ၊ မာꩻစွူဗာႏတွိုႏသꩻဟောင်း?။ မီဉ်ႏအာႏထုတ်ဝိပဿနာႏတရာꩻခီင်ႏသူꩻ သꩻမီည်ႏတစွူတဝ်းနဝ်ꩻ ဉာဏ်ႏပေါႏထင်ႏနွောင်ꩻတဝ်း။ နဝ်ꩻမꩻ တဲယ်ႏထောင်ႏရီးဗာႏသမာဓိ၊ မာꩻစွူရီးဗာႏသꩻနဝ်ꩻသွူ။

မဲန်ႏ...။ သမာဓိအာႏမီဉ်ႏတလာမꩻ ဉာဏ်ႏလဲ့အာႏတလာလွောန်။ သမာဓိနဝ်ꩻ ထွာဉာဏ်ႏစူဖွို့ꩻ(အထူန်ႏ)နဝ်ꩻသွူ။ နဝ်ꩻမꩻ နီဗွေႏဖရာꩻ မိန်းဟောꩻဖေႏခါꩻ "တဲယ်ႏထောင်ႏလွသွော့ သမာဓိ"နုဲးနဝ်ꩻသွူ။

သမာဓိမီဉ်ႏတလာနဝ်ꩻ သꩻယိုတဲ့ ဗိုန်ပီနုဲးတလီꩻတမာတသျူတဝ်းကို ကအဝ်ႏတဲစ်ꩻခါꩻဒါႏမေႏတေန်ꩻနဝ်ꩻအတွိုင်ꩻ စွူဖြွိုးနုဲးနဝ်ꩻသွူ။ ။

သꩻမီဉ်ႏစွူနဝ်ꩻ ထာꩻယူႏတဲ့ဆေ့ꩻ။ ထာꩻယူႏမီဉ်ႏဆေ့ꩻနဝ်ꩻ လောဘ ဒေါသဖိုင်ႏလဲ့ ဆေ့ꩻလွောန်။ လောဘ ဒေါသမီဉ်ႏဆေ့ꩻလွောန်နဝ်ꩻ သꩻလဲ့ ငီမ်ꩻခွꩻဗာႏ။ ပေါႏငီမ်ꩻတဲ့ ခွꩻရျူႏစွောန်ႏနဝ်ꩻသွူ။ နဝ်ꩻမꩻ မီဉ်ႏမဲန်လꩻ ငီမ်ꩻခွꩻမုꩻနဝ်ꩻ ပွာꩻမျာꩻဗာႏ သမာဓိနဝ်ꩻသွူ။။

၅။ ပညာႏ

"ပညာႏ" ကရိုꩻနဝ်ꩻ ထာꩻချင်းခေႏတရာꩻ။ ထာꩻချင်းခေႏတရာꩻကအဝ်ႏဒါႏလိုꩻနဝ်ꩻ မာꩻမုဲꩻမုဲꩻယဝ်း ယူႏကဝ်းရီး။ အကျိုꩻအဝ်ႏနဲ့? အဲန်ထဝ်းနဲ့? ဝွေႏဖန်ႏ။ ထွာသင်ꩻနဲ့? သင်ꩻတဝ်းနဲ့? ချင်းခေႏ။ နဝ်ꩻမꩻ ပညာႏဗွေႏသား ကဒေါ့ꩻလွ (မန်းငဝ်းနေးနဝ်ꩻ)" နှိုင်းနှိုင်းချိန်ချိန် သုခမိန်"နုဲးနဝ်ꩻသွူ။

လိုꩻယဟန်ႏနဝ်ꩻ အဝ်ႏသေသေတဟဝ်တဝ်းနဝ်ꩻ"တွိုႏယိုခါမꩻ ထူꩻကဲးဒူမ်မုဲꩻ"ရိုꩻနဝ်ꩻတွော့ꩻ သတ်ဒုံးစွောန်ႏထာꩻ။ ယိုနဝ်ꩻ ထွာပညာႏတအဲန်ထဝ်းလက္ခဏာႏတန်ဒျာႏသွူ။

အကုသိုလ်ႏကရိုꩻနဝ်ꩻ မာꩻတလဲင်ႏ အပဲစ်အဝ်ႏတလဲင်ႏ။ မာꩻနီလဲင်ႏ အပဲစ်အဝ်ႏနီလဲင်ႏ။ ယီင်းမာꩻအာအာ အပဲစ်တဲ့ယီင်းအာအာ။ ယိုနဝ်ꩻ တပြောင်ꩻလုဲႏတဝ်း နိယာမသဖောꩻဒျာႏသွူ။

ကွဲႏတွော့ꩻ လိုꩻယဟန်ႏနဝ်ꩻ ရိုꩻ"ထာꩻလွိုက်ꩻကဲယ်ꩻမွူးကွို့ꩻနာꩻတအဲန်ထဝ်း"နုဲးနဝ်ꩻထွူ သတ်ဒုံးထာꩻ မာꩻထဲင်းထဲင်းတေားစွောန်ႏ ဒုစရဲက်ဖိုင်ႏသွူ။ ပုဂ္ဂိုလ်ႏနဝ်ꩻစားနဝ်ꩻ အီႏဒေါ့ꩻကဲယ်ꩻထဲင်းဗာႏ"လိုꩻမွိုက်ရွိုင်ꩻ"ငဝ်းနဝ်ꩻ အလင်အဲန်ထဝ်းဒူမ်။

နဝ်ꩻမꩻ မာꩻထာꩻမာꩻမုဲꩻမုဲꩻတယဝ်း၊ ဒေါ့ꩻငဝ်းမုဲꩻမုဲꩻတယဝ်း၊ လိုႏယူႏကဝ်းရီးငါႏနဝ်ꩻသွူ။ ယူႏကဝ်းရီးမꩻ အီႏသေဗာႏ အမဲန်ႏ အမာႏမွေးတဝ်းနဲ့?။ နဝ်ꩻမꩻ နီဗွေႏဖရာꩻ ဟောꩻသေꩻခါꩻဖေႏ "နီကကိုꩻကွဲယ်ႏဒါႏဘာႏသာႏနဝ်ꩻ သဘာဝယုတ္တိ အဝ်ႏနဲ့၊ အဲန်ထဝ်းနဲ့ ယူႏဗာႏ"နုဲးနဝ်ꩻသွူ။

ယဟန်ႏသားနဝ်ꩻ သဒ္ဓါႏတရာꩻသန်။ ထိုမ်ႏယူမ်းတငီတငါပါꩻ မီဉ်ꩻကကျောႏလွင်ꩻလွင်ꩻလီင်ꩻလီင်ꩻထာꩻ။ ယူႏယာႏတဝ်းဒူမ်ထာꩻ။ ယိုနဝ်ꩻ ဆီမ်ꩻမဲ့ယူမ်းတမွိုꩻတမာꩻထာꩻရိုꩻဗာႏနုဲးနဝ်ꩻသွူ။

နီဗွေႏဖရာꩻသက်အဝ်ႏမူန်နေကအတွင်ꩻ တိတ္ထိဆရာႏစွိုꩻဖိုင်ႏနဝ်ꩻ ဟောꩻမာႏမာႏမီႏမီႏလွဝင်ꩻ"ဓမ္မယို အဓမ္မ၊ အဓမ္မယို ဓမ္မ"နုဲးနဝ်ꩻသွူ။ ကယူမ်းသားတဲ့ ယူမ်းမွေးစွောန်ႏ။ သဘာဝယုတ္တိ အဝ်ႏနဲ့၊ အဲန်ထဝ်းနဲ့။ ယူႏဒူမ်။ ကိုꩻကွဲယ်ႏဗော့ꩻဒျာႏတောမ်ႏ ထာꩻယူမ်းအံႏတစွိုးလူမ်ꩻ။ ဆရာႏမီဉ်ႏမာႏ တသံႏသရာႏလူမ်း သူမ်ꩻကြောင်းယို သေနာႏတဝ်းဒူမ်ဖိုင်ႏ။ ယိုနဝ်ꩻ ထွာပညာႏအဲန်ထဝ်း အကျိုꩻနဝ်ꩻသွူ။

နဝ်ꩻမꩻ ဗွေႏဗိုန်ပွိုင်းလဲင်ႏ မိန်းဟောꩻသေꩻခါꩻ "သဒ္ဓါႏအာႏတလာထွူ ပညာႏမီဉ်ႏတပါတဝ်းနဝ်ꩻ ကုဲးကိုꩻကွဲယ်ႏဒါႏ အထုꩻအယောင်ႏဖိုင်ႏ။ ပညာႏထင်ထွူ သဒ္ဓါႏမီဉ်ႏတပါတဝ်းနဝ်ꩻ သꩻကုဲးတခွေႏထိုꩻဒါႏထာꩻ"နုဲးနဝ်ꩻသွူ။

နဝ်ꩻမꩻ ပညာႏယို လိုႏကမ်းဗာႏတောမ်ႏ သဒ္ဓါႏအတွိုင်ꩻ သဒ္ဓါႏယိုလဲ့ လိုႏထီင်ꩻဗာႏတောမ်ႏ ပညာႏနဝ်ꩻသွူ။ သဒ္ဓါႏတောမ်ႏ ပညာႏ ဖဲ့ꩻမီဉ်ႏတရျားဝင်ꩻမꩻ ဘဝတဖူꩻ အီႏစွို့ꩻစွောန်ႏခွꩻရျူႏဗာႏနဝ်ꩻသွူ။

ဣန္ဒြေႏ ငတ်ꩻပါꩻကရိုꩻနဝ်ꩻ ထွာဒျာႏ "ဘဝအထီအသွီႏ"နဝ်ꩻသွူ။ နဝ်ꩻမꩻ ဘဝအထီအသွီႏကထွာဒါႏ ဣန္ဒြေႏငတ်ꩻပါꩻယို ကထင်ထွူဖေႏနေးကယီင်းထင်ထင်နဝ်ꩻ အဝ်ႏလိုႏသောင်ႏသာကျိုꩻစာꩻငါႏသွူ။ ဣန္ဒြေႏငတ်ꩻပါꩻဖိုင်ႏ မီဉ်ႏထင်မꩻ တွိုက်ꩻထန်ႏနွောင်ꩻလောကဓံႏထွူ လွောတ်ထန်ႏထိုꩻနွောင်ꩻဝဋ်ဒုက္ခ အီႏလꩻနွောင်ꩻနိဗ္ဗာန်ႏချံꩻသာႏနဝ်ꩻသွူ။