ဘာႏသာႏရေꩻအကျောင်ꩻ(၂)
နေင်ႏ ၁၃၆၂-ဗာႏ၊ ဒဲဉ်ကံလာဆန်ꩻ/လောင်း ( )နီꩻ၊ ဝေင်ꩻနယ်ႏ ----------၊ အွိုင်ႏ------- ၊ ကျောင်ꩻ -------------- ကို ကမာꩻဒါႏ ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏထောင်ထွားရေꩻအစွိုꩻ ပွယ်ꩻဟော်ꩻတရာꩻ အခန်ꩻအနာꩻကို ကကျွꩻလွဉ်ဒါႏ ဗွေႏသံႏဃာႏတွမ်ႏ တကာႏမူႏခိုသီးဖုံႏ ကားကအဝ်ႏ ကာယ စိတ္တ သုခချမ်ꩻသာႏ ယံကအဝ်ႏလွဒျာႏကရိုꩻနဝ်ꩻ ရီးသွတ်ꩻအစ ပုဗ္ဗမင်္ဂလာႏ ဆုတောင်ꩻဖေႏဒျာႏထွူတဲင် ရိုႏသေႏဂါရဝလွေꩻဒျာႏ ဗွေႏသံႏဃာႏသီး၊ ထီႏတန်ယွုမ်းအံႏဒျာႏ တကာႏမူႏခိုသီးနဝ်ꩻသွူ။ ဖျော်တွိုႏလွဉ်ဗာႏ ဗွေႏသံႏဃာႏသီးဒေႏသ တကာႏလုံတကာႏမသီးရပ်ရာႏနုဲင်းယိုတဲ့နဝ်ꩻ၊ လွဉ်ခွဲးရော့ꩻရော့ꩻ လွဉ်မော့ဟဝ်ဟဝ်ဗာႏ တွမ်ႏဗွေႏသံႏဃာႏသီး၊ နီတကာႏမူႏခိုသီးနုဲင်းယိုတဲ့နဝ်ꩻ၊ ကလွဉ်ဖေႏသုံꩻဗာႏ (ဘာႏသာႏရေꩻ) တရာꩻထီခွꩻ၊ ကလွဉ်ဖေႏအွꩻဗာႏ (ဘာႏသာႏရေꩻ) တရာꩻထီနွိုးနုဲင်းယိုတဲ့နဝ်ꩻ၊ စွိုးခွိုꩻအတာႏ၊ ဘာႏသာႏအတွက် ကဆောင်ႏရွက်ဗာႏနုဲင်းယိုတဲ့နဝ်ꩻ သꩻရောင်းသꩻရေꩻငါႏ မရေႏမရာႏနဝ်ꩻသွူ ။ ကနာႏတရာꩻသား ခွုင်းကားဗွေႏသံႏဃာႏသီး တွမ်ႏတကာႏအမျာꩻသီးတဲ့ သꩻရောင်းသꩻရေꩻ တောင်ꩻသေꩻထူႏတာႏ ဒွူႏနာႏလွသွော့၊ တောင်ꩻထူးဒါႏဒါႏ မဉ်ႏလွောက်ꩻနာႏလွဉ်ꩻမွေးနဝ်ꩻ သွတ်ꩻစိုးဝုဲင်ꩻသက် တိုꩻတက်စီꩻပွာꩻ ညဆွာꩻချမ်ꩻသာႏ လꩻဗာႏရင်ꩻရင်ꩻသွူ ။ သꩻရောင်းသꩻရေꩻ ကအီႏဟော်ꩻလွေꩻဒါႏ ဘာႏသာႏရေꩻအကျောင်ꩻ ခွေသွဉ်းယိုနဝ်ꩻ ဝေင်ꩻနယ်ႏ --------- ၊ ကျောင်ꩻ ------------- ၊ ဗွေႏ------------ သွူဩ။ ကကျွꩻလွဉ်ဒါႏ ဗွေႏသံႏဃာႏတွမ်ႏ တကာႏမူႏခိုသီးဖုံႏဟွေး - ကအီႏဟော်ꩻ ဘာႏသာႏရေꩻ အကျောင်ꩻယိုနဝ်ꩻ ရေႏရွယ်ႏဒျာႏ ဗုဒ္ဓဘာႏသာႏ၊ ဗုဒ္ဓကရိုꩻနဝ်ꩻ ဘုရာꩻ၊ ဘာႏသာႏကရိုꩻနဝ်ꩻ ငဝ်ꩻ၊ လိုꩻကယွုမ်းအံႏဘုရာꩻ၊ ကလွောက်ꩻနာႏ နေးထူႏဗွေႏဘုရာꩻငဝ်းနဝ်ꩻ ဟဲ့ꩻဗုဒ္ဓဘာႏသာႏ၊ ဗုဒ္ဓဘာႏသာႏတဖြာꩻ ယွုမ်းအံႏ ဘုရာꩻ တရာꩻ သံဃာႏ ရတနာႏသိုမ်ပါꩻနုဲင်းမုဲင်ꩻနဲးတဲင် - "ဘုရာꩻရတနာႏနဝ်ꩻ အမျတ်သွတ်ꩻ၊ လွိုဘုရာꩻရတနာႏယို အဲဉ်ထဝ်း၊ ခွေမဉ်ႏကိုꩻကွဲႏ၊ ခွေမဉ်ႏအာႏကွိုꩻ ဘုရာꩻရတနာႏနဝ်ꩻ ယိုခါဆုဲင်ꩻတာႏ ချမ်ꩻသာႏအီႏလꩻနွောင်ꩻ၊ ခွေကိုꩻကွယ်ႏ ဆယ်ꩻကပ်ဒျာႏ ဘုရာꩻရတနာႏယို" သꩻကိုခံႏထူႏနုဲင်းနဝ်ꩻထွူတဲင် "ဗုဒ္ဓံ သရဏံ ဂစ္ဆာမိ - ဗွေႏဘုရာꩻယို ခွေသွဉ်းကိုꩻကွဲႏ၊ ခွေသွဉ်းဆယ်ꩻကပ်၊ ခွေသွဉ်းအာႏကွိုꩻ ဗွေႏဩ" ခံႏထူႏတဉ်ႏတွော့ꩻစွဉ်ႏနုဲင်းနဝ်ꩻ ။ နဝ်ꩻထွူတွော့ꩻ အဝ်ႏကုဲင်တေားတရာꩻ၊ "တရာꩻတောႏမျတ်ယိုနဝ်ꩻ ဘုရာꩻဟော်ꩻသေꩻခါꩻ၊ ဗွေႏဘုရာꩻငဝ်းသွဉ်သင်တဲင် ခွေမဉ်ႏလွောက်ꩻနာႏ နေးထူႏလွဉ်ꩻ တရာꩻတောႏမျတ်အတွိုင်ꩻနဝ်ꩻ ယိုခါဆုဲင်ꩻတာႏ ချမ်ꩻသာႏအီႏလꩻနွောင်ꩻ၊ ခွေဆယ်ꩻကပ်အာႏကွိုꩻဒျာႏ တရာꩻတောႏယိုမꩻ" ချꩻသꩻနုဲင်းနဝ်ꩻထွူတဲင် "ဓမ္မံ သရဏံ ဂစ္ဆာမိ - တရာꩻတောႏမျတ်ယို ခွေသွဉ်းကိုꩻကွဲႏ၊ ခွေသွဉ်းဆယ်ꩻကပ်၊ ခွေသွဉ်းအာႏကွိုꩻ ဗွေႏဩ" ခံႏထူႏဆွော့ꩻကတဲ့ꩻစွဉ်ႏဒျာႏနုဲင်းနဝ်ꩻ ။ နဝ်ꩻထွူတွော့ꩻ အဝ်ႏကုဲင်တေားသံႏဃာႏ၊ "ဗွေႏသံႏဃာႏဖုံႏယိုနဝ်ꩻ ဗွေႏဘုရာꩻတပဲ့ꩻတောႏဖုံႏဒျာႏ၊ အဝ်ႏတွမ်ႏသီႏလ၊ အဝ်ႏတွမ်ႏသိက္ခာႏ၊ အဝ်ႏထောက်ထံꩻ ဘုရာꩻသာႏသနာႏတဲင် ခွေမဉ်ႏရိုႏသေႏဆယ်ꩻကပ် သံႏဃာႏတောႏမျတ်နဝ်ꩻ ယိုခါဆုဲင်ꩻတာႏ ချမ်ꩻသာႏအီႏလꩻနွောင်ꩻ၊ ရိုႏသေႏဆယ်ꩻကပ် အာႏကွိုꩻဒျာႏ သံႏဃာႏတောႏမျတ်နဝ်ꩻမꩻ" ချꩻသꩻနုဲင်းနဝ်ꩻထွူတဲင် "သံဃံ သရဏံ ဂစ္ဆာမိ - ခွေသွဉ်းရိုႏသေႏ ဆယ်ꩻကပ် အာႏကွိုꩻဒျာႏ သံႏဃာႏတောႏမျတ် ဗွေႏဩ" ခံႏထူႏခြေင်းခြဲ့စွဉ်ႏဒျာႏနုဲင်းနဝ်ꩻ ။ ဗွေႏသံႏဃာႏတွမ်ႏ တကာႏမူႏခိုသီးဖုံႏဟွေး - ပေါႏယွုမ်းအံႏ ယွုံႏကေႏ ရိုႏသေႏဆယ်ꩻကပ် ရတနာႏမျတ်သိုမ်ပါꩻနုဲင်းနဝ်ꩻနဝ်ꩻ ထွာသွူဗုဒ္ဓဘာႏသာႏ၊ ပေါႏထွာသွူဗုဒ္ဓဘာႏသာႏ တကာႏအမျာꩻနဝ်ꩻ ခံႏထူႏဗာႏထဲင်းက သီႏလငတ်ꩻပါꩻ၊ သီႏလငတ်ꩻပါꩻ အအဲဉ်ႏချုပ်နဝ်ꩻ ခံႏမာꩻသီတဝ်းဝင်ꩻသက်၊ ခံႏထူႏတခွန်ꩻတဝ်းဝင်ꩻတခြိုꩻ၊ ခံႏပဲစ်မာႏတဝ်း ဝင်ꩻပိုမာ၊ ခံႏဒေါ့ꩻလဲဉ်တဝ်းငဝ်း၊ ခံႏအွꩻတဝ်းဒဝ်၊ အကျင်ꩻဟဝ် ယို(၅)ချက်၊ အကျင်ꩻမျတ် ယို(၅)မျိုꩻနဝ်ꩻ လိုꩻလမ်းအတာႏ သိက္ခာႏသီႏလနဝ်ꩻသွူ ။ နီလိုꩻချင်ꩻချင်ꩻ အုံငီꩻလို့ဝင်ꩻအကို သီႏလ ယို(၅)ပါꩻ၊ နမ်းကျင်ꩻတရာꩻ ယို(၅)ရန်း မဉ်ႏတဖွောင်ꩻခန်းခါꩻတဝ်းနဝ်ꩻ အီႏထွာနုဲင်းမုဲင်ꩻကရိုꩻနဝ်ꩻ အီႏဟော်ꩻနယ်က ပဉ်ခန်ꩻခန်ꩻ၊ အီႏသျင်ꩻနယ်က ပဉ်ချက်ချက် - ဥပမာႏ - ပါဏာတိပါတာ နမ်းကျင်ꩻတရာꩻယိုတရန်း မဉ်ႏအဝ်ႏခန်းခါꩻတဝ်းနဝ်ꩻ တဖြာꩻတွမ်ႏတဖြာꩻ မာꩻငီႏငါ မာꩻသီချာငါလို့ဝင်ꩻ၊ ဝင်ꩻတဲ့အုံထာꩻ အဝ်ႏငမ်းဗာႏထာꩻသီ၊ နီတဲ့ အုံထာꩻအဝ်ႏငမ်းဗာႏစွဉ်ႏထာꩻမာႏ၊ ခိုးလျားဒုက္ခ၊ ယူႏလွသွော့ ခမ်းကလီ၊ စဉ်ꩻစာꩻချာသွော့ ထီကဖျꩻ၊ ကတွိုက်ꩻကခꩻလို့ဝင်ꩻ၊ အတွင်ꩻခမ်းကကုဲင်နဝ်ꩻ အုံဗာႏဟဝ်တဝ်း၊ လိုပ်ꩻဗာႏဟဝ်တဝ်း၊ လွေꩻသဲင်ꩻဗာႏဟဝ်တဝ်း၊ ဆင်ꩻရယ်ꩻဒုက္ခ အံႏမလို့ထာꩻ မွေးတဝ်းနဲ့? အွို ကွပ်ပွိုးနဝ်ꩻမꩻ ခွꩻသꩻခိုမူႏ သက်ထိုစိုးဆွာꩻ သင်ꩻရာꩻချမ်ꩻသာႏ ယံကလꩻဗာႏတဲင် "ပါဏာတိပါတ-ဝင်ꩻသက်မာꩻသီတဝ်း"နေးငဝ်းဖြောင်းထန်ႏ အာႏမခံႏခန်း သီႏလယိုတရန်းနဝ်ꩻသွူ ။ နဝ်ꩻလွုမ်ꩻထွူတဝ်း ခွေဥစ္စာႏ နာꩻတခွန်ꩻထိုꩻ၊ နာꩻတခြိုꩻ ခွေစိုန်ထူႏ၊ မဉ်ႏယားချာယားငါလူႏလုဲင်ႏလို့ဝင်ꩻထာꩻနဝ်ꩻ တဖြာꩻတွမ်ႏတဖြာꩻ ခိုးလျားလို့ဝင်ꩻ၊ လိုပ်ꩻမာꩻမထွာ၊ ဖြေꩻစာမလꩻ၊ ယပ်ꩻသꩻဒုက္ခ၊ အံႏမလို့ထာꩻ၊ ကွပ်ပွိုးနဝ်ꩻမꩻ ခွꩻသꩻခိုမူႏ၊ ယံတသွောင်းထိုစီꩻပွာꩻ၊ ထီႏအကျိုꩻတရာꩻနဝ်ꩻတဲင် " အဒိန္နာဒါနာ- ဝင်ꩻထာꩻခံႏတခွန်ꩻတဝ်း"နေးငဝ်းဖြောင်းထန်ႏ အာႏမခံႏဖျင်ခန်း သီႏလယိုတရန်းနဝ်ꩻသွူ ။ နဝ်ꩻလွုမ်ꩻလꩻထွူတဝ်း တဖြာꩻပိုမာ တဖြာꩻစောကာꩻ၊ တဖြာꩻပိုဝါꩻ တဖြာꩻပဲစ်မာႏ မဉ်ႏထွာနုဲင်းနဝ်ꩻတဲ့ တောႏလမ်းရေꩻ ထွာတဝ်းထာꩻသာႏယာႏ၊ တောႏပါႏရေꩻ ထွာတဝ်းထာꩻငိမ်ꩻချမ်ꩻ၊ ကွပ်ပွိုးနဝ်ꩻမꩻ တပိုဖါ တမာဝါꩻ သွတ်ꩻစိုးပဲင်ꩻရက်၊ ဝုဲင်ꩻသက်ထီꩻသင်ꩻ၊ လင်ꩻအဝ်ႏငီꩻ၊ လီꩻအဝ်ႏရဝ်း၊ တဲ့ꩻခဝ်းယံဖေႏ ရေႏနုဲင်းနဝ်ꩻတဲင် "ကာမေသုမိစ္ဆာ - ဝင်ꩻပိုမာပဲစ်မာႏတဝ်း"နေးငဝ်းဖြောင်းထန်ႏ အာႏမခံႏဖျင်ခန်း သီႏလယိုတရန်းနဝ်ꩻသွူ ။ နဝ်ꩻလွုမ်ꩻလꩻထွူတဝ်း အံႏလိန်ႏမပ်မပ်၊ အံႏသျပ်သေႏသေႏ၊ အံႏပွေႏခွိုꩻခွိုꩻ၊ ဒေါ့ꩻ မွိုꩻမုသာꩻ၊ မဉ်ႏမာꩻနုဲင်းနဝ်ꩻနဝ်ꩻ တရေင်အာငဝ်း၊ တဲ့ꩻခဝ်းဒွုမ်လို့ဝင်ꩻ၊ ကွပ်ပွိုးနဝ်ꩻမꩻ ခွꩻသꩻမေတ္တာႏ၊ သစ္စာႏတရာꩻ၊ တဖြာꩻတွမ်ႏတဖြာꩻ ယံအွဉ်ႏ၊ စွို့ꩻစွို့ꩻစွဉ်ႏစွဉ်ႏ ဖေႏနေးကထွာတဲင် "မုသာဝါဒါ - လဲဉ်ပါꩻဒေါ့ꩻတဝ်း"နေးငဝ်းဖြောင်းထန်ႏ အာႏမခံႏဖျင်ခန်း သီႏလယိုတရန်းနဝ်ꩻသွူ ။ နဝ်ꩻလွုမ်ꩻလꩻထွူတဝ်း ပါꩻမုဲင်ꩻတဲ့ယဝ်း ပေါႏစွယ်ꩻသွူသူႏရာႏ၊ ပေါႏဆွဉ်းဗာႏသွူယာဗွာ၊ ပေါႏစွယ်ꩻပါသွူ ယာဖြေင်းနဝ်ꩻ လို့ကြေင်းဥစ္စာႏ၊ ခိန်ႏခါႏလို့ခြေင်၊ တရေင်ယပ်ꩻအာ၊ ထာꩻဆာတဲ့ပေါႏ၊ ရောႏဂါႏတဲ့တွိုး၊ ကွဲးရွိုးရွိုးဗိုမ်းဖော်ꩻ၊ ရော်ꩻရယ်ꩻဝွေႏဒနာႏ၊ ယပ်ꩻတေားဒျာႏအပိုမာ၊ ညနေင်ႏလာယူႏပက်၊ အသက်တဲ့ ဒွေါင်ႏထိုꩻ၊ သဲင်ꩻထွာလိုꩻသွုမ်ꩻအာငါႏ၊ ကွပ်ပွိုးနဝ်ꩻမꩻ ဥစ္စာႏတခြိုꩻတဲ့ ဖေႏနေးကလို့ပျင်ႏထိုꩻမွုန်း၊ ထာꩻရွို့ꩻထာꩻရန်ႏတဲ့ ဖေႏကထွာမွုန်း၊ ထာꩻဆာရောႏဂါႏတဲ့ ဖေႏကမော့ꩻဗာႏမွုန်း၊ ဖေႏနေးကထွာဒျာႏ လိုꩻစွုန်းလိုꩻစွို့ꩻတဲင် "သုရာမေရယ - ခံႏအွꩻတဝ်းဒဝ်" ငဝ်းဟ၀်ဖြောင်းထန်ႏ အာႏမခံႏဖျင်ခန်း သီႏလယိုတရန်းနဝ်ꩻသွူ ။ မာꩻသီတဝ်းဝင်ꩻသက်၊ ထူႏတခွန်ꩻတဝ်းဝင်ꩻတခြိုꩻ၊ ပဲစ်မာႏတဝ်းဝင်ꩻပိုမာ၊ ဒေါ့ꩻတဝ်းငဝ်းလဲဉ်၊ အွꩻတဝ်းဒဝ်၊ အကျင်ꩻဟဝ်ယိုငတ်ꩻချက်၊ သီႏလမျတ်ယိုငတ်ꩻပါꩻ၊ စွုမ်ႏဖြာꩻခိုမူႏ၊ မဉ်ႏနေးထူႏတလမ်းလိုမ်း၊ တဒုံလိုမ်း၊ တရပ်လိုမ်း၊ တခမ်းလိုမ်း၊ တနဲင်ႏငန်ႏလိုမ်းနဝ်ꩻ စွုမ်ႏဖြာꩻ စွုမ်ႏဒုံ စွုမ်ႏရပ် စွုမ်ႏနဲင်ႏငန်ႏ ချမ်ꩻသာႏ သာႏယာႏဗာႏ အမန်ႏနဝ်ꩻသွူ ။ ဗွေႏသံႏဃာႏတွမ်ႏ တကာႏသီးဖုံႏဟွေး - ယွုမ်းအံႏဆယ်ꩻကပ် ရတနာႏမျတ်သိုမ်ပါꩻ၊ ထူႏခါꩻသီႏလနဝ်ꩻထွူတဲင် ဒါႏနတဲ့ လိုႏကျိုꩻစာꩻ၊ ဘာႏဝနာႏတဲ့ အဝ်ႏလိုႏမာꩻနေက၊ ဒါႏနခရာႏ၊ ဘာႏဝနာႏအကျောင်ꩻနဝ်ꩻ အခိန်ႏဗွေလဲဉ်းတဲင် တွိုႏဆုဲင်ꩻသူꩻမꩻ အီႏကျွꩻလွဉ်ဟော်ꩻထဲင်း၊ နိဗ္ဗာန်ႏသုခ ယံလꩻလွသွော့အကျောင်ꩻ ဆုတောင်ꩻထွူတဲင် ဘာႏသာႏရေꩻအတာႏ အွဉ်ႏထွူတခါႏက တခွုင်းယိုကွိုနဲးဟွေး ----------------- ။