မဉ်ႏလွေꩻမာꩻထာꩻမာꩻခမ်းထန်ႏနဝ်ꩻ
"မဉ်ႏလွေꩻမာꩻထာꩻမာꩻခမ်းထန်ႏနောဝ်ꩻ အောဝ်ႏလိုႏမာꩻနေးတွမ်ႏတရာꩻဝင်ႏ" ကွပ်စွဉ်ႏအကျောင်ꩻအမျိုꩻမျိုꩻတဲင် လိုꩻကအောဝ်ႏဒါႏ မြန်မာခမ်းသားဖုံႏနောဝ်ꩻ လွေꩻမာꩻထာꩻမာꩻခမ်းထန်ႏဖဲ့ꩻယို အောဝ်ႏအာငါႏသွူ၊ ပွိုင်းလဲင်ႏပွိုင်းရင်း ကွပ်စွဉ်ႏနဲင်ႏငံႏရေꩻစနစ်မာꩻထွာတဲင် ခမ်းကေန်ꩻထီကေန်ꩻ၊ ထာꩻမာꩻအခွင်ꩻအရေꩻဆေ့ꩻ၊ လုဲင်းလုပ်ꩻခြံမာꩻသားဘဝအနေႏ ကလုပ်ꩻအတွိုင်ꩻ၊ ကရွိုးအတွိုင်ꩻ ရွဉ်နွို့လꩻဆေ့ꩻတဲင်တွော့ꩻ ဖခမ်းညာꩻထီ လွေꩻမာꩻထာꩻမာꩻ ရွဉ်တန်ႏဖိုꩻကအာဒါႏ ထုဲင်ႏ၊ ဂျပန်၊ စင်္ကာပူစစွဉ်ႏခမ်းထန်ႏကိုဖုံႏနောဝ်ꩻသွူ၊ ယိုခါအနေႏ ထွာကီခန်း ဒီမိုကရေစီအုပ်ချုပ်ရေꩻစနစ်တဲ့ လိုꩻမန်းခမ်းသား ဘဝအီႏခြွေအီႏခြာႏ ဗွိုန်နုဲင်းခမ်းလင်တဲ့ တဗွိုန်တောဝ်းဒွိုန်း၊ စီꩻပွာꩻရေꩻအခေႏအနေႏတဲ့ ဟမ်းပေါင်းထူꩻချာလွဉ်ငါႏတောဝ်းဒွိုန်းတဲင် လိုꩻကလွေꩻမာꩻ ဝင်ꩻထာꩻမာꩻ၊ ဝင်ꩻခမ်းလင်နောဝ်ꩻ အောဝ်ႏအာနေကဒွိုန်းသွူ။ နောဝ်ꩻအကို နီသွဉ်းသီး ပအိုဝ်ႏခမ်းသားဖုံႏ ကလွေꩻမာꩻဒါႏထာꩻမာꩻ ခမ်းထန်ႏဖဲ့ꩻတဲ့ မနဲးအာတန်သွူ၊ လမ်းနားဟွိုန်ꩻအခေႏနေႏ အောဝ်ႏလိုႏလွူး၊ အောဝ်ႏလိုႏစွဲးကမ်း အမွိုးအဖါ၊ အောဝ်ႏလိုႏလွူး ပိုခို/ပိုမူႏဖုံႏနောဝ်ꩻမꩻ မန်းခမ်းကို လိုꩻဖုံႏနောဝ်ꩻ အဆင်ႏပြေႏရာꩻနုဲင်းမုဲင်ꩻ လွေꩻမာꩻလွထာꩻမာꩻ ခမ်းထန်ႏဖဲ့ꩻ၊ အလွေꩻနေးတွမ်ႏ ပတ်စပို့၊ တွမ်ႏဗီဇာဖုံႏလဲ့ အောဝ်ႏ၊ နေးတွမ်ႏတရာꩻတဝင်ႏတောဝ်း နွို့မာꩻတခွန်ꩻသားဖုံႏလဲ့ အောဝ်ႏဗောႏအောဝ်ႏအာတန်ဒျာႏသွူ၊ အဆင်ႏကပြေႏသားတဲ့ အောဝ်ႏ၊ အဆင်ႏတပြေႏတောဝ်းသားလဲ့ အောဝ်ႏသွူ၊ နောဝ်ꩻအကို ခွေသွဉ်းမဲဉ်ခြုဲင်းနယ်ဖေႏ ခွေသွဉ်းကလွေꩻမာꩻတခွန်ꩻဒါႏထာꩻမာꩻ ထုဲင်ꩻခမ်းကိုအကျောင်ꩻ အခရာႏဆေ့ꩻဆေ့ꩻနောဝ်ꩻသွူ။ ခွေသွဉ်းအနေႏ ကွပ်စွဉ်ႏလမ်းကို အဆင်ႏတပြေႏတောဝ်းတဲင် တဖူꩻထန်ႏ(ထွက်ပေါက်)အနေႏ ဟွိုန်လꩻခန်း သတင်ꩻတဗာႏနောဝ်ꩻသွူ၊ သတင်ꩻနောဝ်ꩻ "တမုဲင်ꩻမဲဉ်လွေꩻထုဲင်ႏနောဝ်ꩻ လို့လွေꩻကွို့ꩻရွဉ် လစ်ꩻငတ်ꩻသိန်ႏလွုမ်ꩻ၊ ထာꩻမာꩻတဲ့အောဝ်ႏအထွူ၊ ပွယ်ꩻစာꩻပေါလိန်းထုဲင်ႏကိုတဲ့ အုံပွေါးခါꩻလဲဉ်း" ကပသာဒါႏထုဲင်ꩻခမ်း ပွယ်ꩻစာꩻတဖြာꩻငေါဝ်းယို ခွေသွဉ်းအနေႏ ဟွိုန်လꩻခန်းနုဲင်းနောဝ်ꩻသွူ။ အောဝ်ႏနောဝ်ꩻ လိုꩻကလွေꩻဒါႏထုဲင်ႏခမ်း ယဖြာꩻဖြာꩻ အဆင်ႏကပြေႏသားနောဝ်ꩻ အသော့ꩻသဲင်ꩻရွဉ် တလာတလာယို နီသိန်ႏ သွံသိန်ႏသား အောဝ်ႏနောဝ်ꩻမꩻ ဟွိုန်တလွို့၊ မဲဉ်လွေꩻနုဲင်းနုဲင်းခန်းနုဲင်းနောဝ်ꩻသွူ၊ ကွဲးတွော့ꩻ ကအီႏလွေꩻတာႏ စူကို ရွဉ်လစ်ꩻငတ်ꩻသိန်ႏ သိမ်းတအောဝ်ႏတောဝ်းတဲင် ဒေါ့ꩻရီတွိုင်ႏပင်ႏခန်း အမွိုးတန် (အဒေါ်)နောဝ်ꩻမꩻ အမွိုးတန်တဲ့ အဆင်ႏဖေႏကပြေႏ ဖေႏထူႏငါးဖေႏခန်း ရွဉ်လစ်ꩻသိန်ႏခွယ်ꩻ၊ စူကို သမ်းအောဝ်ႏခါꩻ ငတ်ꩻသောင်ႏ၊ လို့လို့စင် နေးတွမ်ႏရွဉ်ငတ်ꩻသိန်ႏတဲင် လွေꩻထေ့ခန်း ပွယ်ꩻစာꩻထျꩻ၊ ဖေႏခန်းစာႏရင်ꩻ၊ ပွယ်ꩻစာꩻတဲ့ လိုꩻအဖြာꩻပေါင်ꩻ စာႏရင်ꩻထွိုင်ႏဗွေနောဝ်ꩻ ဟဲ့ꩻလွေꩻခန်းဒျာႏ နီသွဉ်းသီး လိုꩻတစွိုꩻ ဗꩻတွိုႏလွေꩻခန်း ဝေင်ꩻနယ်ႏစပ် တာချီလိတ်ကိုနောဝ်ꩻသွူ။ တွိုႏတာချီလိတ် မွူးဟာလင်ꩻခိန်ႏ(၆)နားရီႏရပ်နောဝ်ꩻ နွို့လွေꩻခန်း ထုဲင်ႏခမ်းကို၊ နေးတွမ်ႏလယ်ႏဆောင်းခွင်ꩻလက်မတ်တဲင် နွို့လွေꩻနောဝ်ꩻသွူ၊ အောဝ်ႏနောဝ်ꩻ ထွိုင်ႏတွိုႏလွေꩻ ထုဲင်ႏနယ်ႏကိုနောဝ်ꩻ ပွယ်ꩻစာꩻနောဝ်ꩻ ထုမ်ႏဖေႏကာꩻတဆွိုင်ꩻတဲင် ထွဉ်ႏလွေꩻပသာခန်း ဝွေꩻသီးကခဉ်ꩻဒါႏ ခင်ႏလမ်းတထွောင်းကိုနောဝ်ꩻသွူ။ နီသွဉ်းသီး ကထွုမ်းလွေꩻကာꩻနောဝ်ꩻ ကာꩻဝီဂိုး(ဖိုးဝီး)အဗွာ၊ ကာꩻကိုနောဝ်ꩻ နီသွဉ်းသီးလိုꩻအဖြာꩻတဆီလွိုလွို ဗေင်ႏယားအုံထပ်ဗာႏနေးဝင်ꩻ၊ လိုꩻမူႏခန်းတယောဝ်း အုံထပ်အုံထွိုင်ဗာႏနေး ဗွိုန်နုဲင်းဝင်ꩻကဒင်ႏထော့ꩻသီပွုံႏစံႏနုဲင်းနောဝ်ꩻ၊ ကွပ်စွဉ်ႏ သမုဒ္ဒရာႏ ဟို့ꩻတထာအတာႏ ခံႏဗာႏမဲ့ငါပေႏ၊ ခံႏဗာႏဂုဏ်ႏသိက္ခာႏထဲ့နောဝ်ꩻသွူ၊ အောဝ်ႏနောဝ်ꩻ ထွိုင်ႏတွိုႏကခဉ်ꩻဒါႏ ခင်ႏလမ်းကို သွုပ်ဆွုပ်တွမ်ႏ ပွယ်ꩻစာꩻဆꩻငါသားတဲင် အောဝ်ႏနောဝ်ꩻ အွဉ်ႏအုံခန်း နီသွဉ်းသီး ပွယ်ꩻစာꩻကငါးခါꩻဒါႏ တိုက်ခန်းကိုနောဝ်ꩻသွူ။ နီသွံနီꩻတောႏတွင်ꩻ နီသွဉ်းသီး ပွယ်ꩻစာꩻထုဲင်ႏကိုနောဝ်ꩻ ထုမ်ႏဖေႏခန်းထာꩻမာꩻ၊ ထာꩻမာꩻထွိုင်ႏလꩻနောဝ်ꩻ နွို့မာꩻခန်းဒျာႏ၊ ကွဲးတွော့ꩻ တရာꩻတဝင်ႏတောဝ်းတဲင် အခိန်ႏတရွေꩻတောဝ်း ယဲꩻထုဲင်ႏဖုံႏလွဉ်ရုပ်နွောင်ꩻနောဝ်ꩻမꩻ တွမ်ႏသꩻစိုꩻရန်ႏတွော့ꩻ မာꩻဗာႏထာꩻမာꩻသွူ။ ယဖြာꩻဖြာꩻ ထာꩻမာꩻထွိုင်ႏတလꩻစွဉ်ႏတောဝ်းတဲင် အောဝ်ႏအုံဗာႏလမ်းခန်ꩻကို ပဉ်လာလာတဲ့ အောဝ်ႏနေသွူ၊ ထာꩻမာꩻတန်ꩻလꩻတောဝ်းဒွိုန်း ယဲꩻဆွမ်ꩻထိုꩻသားတဲ့ အောဝ်ႏဗွေဗောႏထာꩻသွူ၊ ပွယ်ꩻစာꩻဆꩻချာ ကဒေါ့ꩻတွမ်ႏကထွာနောဝ်ꩻ တမဲဉ်ႏတောဝ်းလို့ဝင်ꩻ၊ ကထင်းအတွိုင်ꩻ အဆင်ႏတပြေႏတောဝ်းသွူ၊ ခွေသွဉ်းမာꩻခန်း ထာꩻမာꩻတလာရပ် ယဲꩻထုဲင်ႏလွဉ်စဲစ်ဆေꩻ၊ ထွိုင်ႏမော့ꩻနီသွဉ်းသီးနောဝ်ꩻ ဆွမ်ꩻလွေꩻခန်းဒျာႏ၊ ယဖြာꩻဖြာꩻ အောဝ်ႏမာꩻထာꩻမာꩻတွင်ꩻ ဗော့ꩻလီးဗော့ꩻလဲ့ꩻ တခြိုꩻတမုဲင်ꩻမုဲင်ꩻတဲ့ ထူႏလွေꩻပါတောဝ်းဒွိုန်း ယဲꩻထုဲင်ႏထွို့ꩻစွီႏလွေꩻခန်းဒျာႏသွူ။ အောဝ်ႏနောဝ်ꩻ နီသွဉ်းသီး အောဝ်ႏခံစွဉ်ႏအချွုတ်၊ အချွုတ်ကို လိုꩻဖုံႏသမ်းဆေ့ꩻနေကတဲင် အုံပွေါဗာႏဒွိုန်းက လိုꩻဗွေ၊ လိုꩻမဉ်ႏအောဝ်ႏ(၅၀-၆၀)ရပ်နောဝ်ꩻ ဒင်ႏသဲင်ꩻနေးတွမ်ႏယဲꩻကာꩻတန်တဲင် လွေꩻပသာနယ်ႏစပ် မြဝတီႏထျꩻ၊ အောဝ်ႏနောဝ်ꩻ ယဲꩻမန်းဖုံႏ အောဝ်ႏအုံပွေါးဆွုမ်ႏနီသွဉ်းသီး၊ ထွိုင်ႏတွိုႏနောဝ်ꩻကိုနောဝ်ꩻ ထိုꩻဗာႏစူမုဲင်ဖုံႏ၊ နျꩻဗာႏစူမွူးဖုံႏ၊ နောဝ်ꩻထွူ သဲင်ꩻချာခန်း မြဝတီႏကို၊ လိုꩻယဖြာꩻဖြာꩻ တဖူꩻသဲင်ꩻစရိပ် တအဲဉ်ထောဝ်းတဲင် သွုပ်သဲင်ꩻချာဗာႏဖုံႏ၊ ထွဉ်ႏဖူးဝေးဆꩻချာသား သော့ꩻလွဉ်ဖေႏစရိပ်နုဲင်းနောဝ်ꩻလဲ့ အောဝ်ႏ၊ တွိုႏမြဝတီႏထျꩻနောဝ်ꩻ ဗေင်ႏခန်း ပအိုဝ်ႏလမ်းတလမ်း၊ စူကိုတဲ့ ကားနဲ့ရွဉ်အောဝ်ႏကုဲင်ခါꩻ(၁)သိန်ႏရပ်၊ ဖျတ်ကာꩻလက်မတ် သဲင်ꩻချာခန်းဒျာႏ ရပ်ရာႏခမ်းကောင်နောဝ်ꩻသွူ။ ထင်းမတီး အဆင်ႏပြေႏတောဝ်း၊ လွေꩻမာꩻထာꩻမာꩻထုဲင်ႏ ယိန်းဟုဲင်းဟုဲင်းတေားဒျာႏသွူ၊ နီးလီꩻယိုတဲ့ အောဝ်ႏလိုႏတဲန်ꩻ၊ နမ်းတာႏတဲ့ အောဝ်ႏလိုႏထွုမ်ႏကျံႏ၊ ကွဲးတွော့ꩻ ယိုတလဲင်ႏတဲးတဲ့ ကျိုꩻစာꩻချာဗော့ꩻ ရပ်ရာႏဒေႏသကို၊ အောဝ်ႏနေးမုဲင်ꩻ အဆင်ႏဖေႏကပြေႏ အီႏကျံႏစယ်ႏလွေꩻဒျာႏ-သꩻကို အောဝ်ႏယူႏခါꩻထွူနုဲင်းနောဝ်ꩻသွူ။ ခွေသွဉ်းအနေႏ အွိုးကလဲဉ်းလဲဉ်း လိုꩻတောင်ႏကီꩻဆꩻနောဝ်ဖဲ့ꩻ ကလွေꩻဗာႏဖိုခယ်ႏခမ်းသားသီး သင်္ခန်းစာဘဝအကျောင်ꩻ အခရာႏယို ခွေသွဉ်းအနေႏ သမ်းတထူႏတောဝ်း သင်္ခန်းစာ၊ လွေꩻမာꩻတခွန်ꩻတေားဒျာႏထုဲင်ႏ၊ ဒုံတဒုံကို ကအောဝ်ႏဒါႏ လိုꩻယွဲးနောဝ်ꩻတဖြာꩻ တခြုဲင်းနယ်ဒါႏ ဝွေꩻသီးအခွဲးအကျုံႏနောဝ်ꩻ ဝွေꩻသီးပအိုဝ်ႏပေႏ လိုꩻယွဲးစွိုꩻ အလိုꩻအဖြာꩻပေါင်ꩻ(၃၀)ရပ်နောဝ်ꩻ စုဝင်ꩻတဲင် မဲဉ်လွေꩻမာꩻထာꩻမာꩻခယ်ႏခမ်းကိုတွော့ꩻ ပွယ်ꩻစာꩻဟဲ့ꩻလွေꩻခန်း ခယ်ႏခမ်းကိုနောဝ်ꩻသွူ။ ခယ်ႏခမ်းတွမ်ႏ မန်းခမ်းယို ပွိုင်းဝွို့တွမ်ႏ ပသာထာꩻမာꩻသား လိတ်ချွုတ်နုဲင်းနောဝ်ꩻ ခွုမ်ခါꩻသမ်းတအဲဉ်ထောဝ်းတဲင် မိဉ်ႏမဉ်မာꩻနောဝ်ꩻ အောဝ်ႏလုဲင်ႏကွို့ꩻ လွေꩻမာꩻတခွန်ꩻနေးလွုမ်ꩻနောဝ်ꩻသွူ၊ မိဉ်ႏလွေꩻမာꩻတခွန်ꩻ ခယ်ႏယဲꩻမဉ်ႏမော့ꩻနောဝ်ꩻ တယိုꩻတောဝ်းလာꩻလာꩻသွူ၊ မန်းခမ်းတွမ်ႏထုဲင်ႏခမ်းနောဝ်ꩻ ထိုꩻခါꩻလိတ်ချွုတ်အောဝ်ႏတဲင် ယဲꩻထုဲင်ႏဖုံႏ မဉ်ႏဆွမ်ꩻလꩻလိုꩻတဲ့ ဝင်ꩻပသာချာဖေႏယင်း မန်းခမ်းနယ်ႏစပ် အပ်လွေꩻဖေႏ ယဲꩻမန်းစူကိုသွူ။ ဝွေꩻသီးစွိုꩻနောဝ်ꩻ အောဝ်ႏတောင်ႏကီꩻ တွိုႏလွေꩻဝင်ꩻလားသျိုး၊ အောဝ်ႏဝေင်ꩻလားသျိုး လွေꩻခန်း ခယ်ႏနယ်ႏစပ်၊ ထွိုင်ႏတွိုႏလꩻ ခယ်ႏခမ်းကို ယဲꩻဖုံႏ သမ်းရီစဲစ်ဆေꩻတဲင် ဝွေꩻသီးကာꩻဖုံႏနောဝ်ꩻ လွေꩻငါတဲ့ အဆင်ႏတပြေႏတောဝ်း၊ အီႏသဲင်ꩻချာလဲ့ ရွဉ်သမ်းလို့အာလဲဉ်း၊ မိဉ်ႏလွေꩻငါငါ ပွယ်ꩻစာꩻသမ်းရိုꩻ "ခွေထူႏတာႏဝွန်ႏတောဝ်းသီကွေး"နုဲင်းနောဝ်ꩻတွော့ꩻ သဲင်ꩻချာဗာႏယင်းဒျာႏ၊ ကလွေꩻခိန်ႏနောဝ်ꩻ ရွဉ်ပါလွေꩻ(၁၀)သိန်ႏ၊ ထွိုင်ႏသဲင်ꩻတရတ်ချာဗာႏထာꩻနောဝ်ꩻ အောဝ်ႏကုဲင်ဒျာႏကွို့ꩻ(၅)သိန်ႏရပ်လွုမ်ꩻသွူ၊ ကလွေꩻကသဲင်ꩻနောဝ်ꩻ တဖူꩻလောင်း ညစွဉ်ႏ(၉)နီꩻ မာꩻငါမာꩻချာ ဖျော်ချာယင်းဒျာႏ ဒုံဇာႏတိရပ်ရာႏသွူ။ နောဝ်ꩻမꩻ မိဉ်ႏလွေꩻမာꩻထာꩻမာꩻ ခမ်းထန်ႏနောဝ်ꩻ အောဝ်ႏလိုႏလွေꩻမာꩻနေး တွမ်ႏတရာꩻဝင်ႏ၊ မိဉ်ႏထွာတရာꩻဝင်ႏနောဝ်ꩻ တငမ်းဗာႏတောဝ်းပါꩻ၊ မိဉ်ႏလꩻထာꩻမာꩻတဲ့ မာꩻဗာႏ သꩻချံꩻချံꩻသာႏသာႏ၊ ထာꩻမာꩻဗွေႏ မိဉ်ႏတဖေႏဗွေတောဝ်းလာတာႏတဲ့ လွေꩻတွိုင်ႏထေ့ မြန်မာသံရုံးဖုံႏလဲ့လꩻ၊ ပါꩻအံႏနွောင်ꩻလိုꩻတလꩻတောဝ်း၊ ထာꩻမာꩻသား ဥပဒေႏအတွိုင်ꩻ နီခံႏစာꩻခွင်ꩻအောဝ်ႏနောဝ်ꩻသွူ၊ ခါးလားကလွေꩻနောဝ်ꩻ အောဝ်ႏလိုႏရီစဲင်းစဲင်း "နီကအီႏလွေꩻမာꩻထာꩻမာꩻ ခင်ႏလမ်းမုဲင်ꩻ၊ အဗွေႏမုဲင်ꩻ"စစရာႏရာႏ အောဝ်ႏလိုႏရီစဲင်းစဲင်းငါႏသွူ၊ အောဝ်ႏလိုႏယွုမ်းကြွို့ꩻမွိုန်းတောဝ်း ပွယ်ꩻစာꩻငေါဝ်းဖုံႏသွူ။ မိဉ်ႏလွေꩻတခွန်ꩻထာꩻနောဝ်ꩻ ဝင်ꩻတေက်ꩻ၊ ဝင်ꩻနျꩻ၊ လွေꩻခါတဲ့ ပါꩻဒင်ႏထော့ꩻ၊ ပါꩻဒင်ႏဖိုးလိုꩻ၊ ထာꩻမာꩻမဉ်ႏလꩻတဲ့ ထာꩻမာꩻဗွေႏနောဝ်ꩻ ယလဲင်ႏလဲင်ႏ တဖေႏဗွေတောဝ်းလိုꩻလာတာႏ၊ လွေꩻတွိုင်ႏခန်းဝင်ꩻတဲ့ တလꩻတောဝ်း၊ ထွာလိုꩻနွို့တခွန်ꩻသားတဲင်တွော့ꩻ ဥပဒေႏအလꩻ ခံႏစာꩻခွင်ꩻယိုတဲ့ တလꩻတောဝ်း၊ မိဉ်ႏထွာလွဉ်တစွိုးစွိုး လွေꩻတွိုင်ႏဝင်ꩻထျꩻ သမ်းတလꩻတောဝ်းတဲင် ဖဝယိန်းဆာဆာဒါႏသွူ။ ပအိုဝ်ႏပို ကတွိုႏလွေꩻမာꩻဒါႏထာꩻမာꩻ ထုဲင်ႏခမ်းကိုနောဝ်ꩻ ကဲဉ်းအာအာ အမာꩻလွဒျာႏ သူႏတသီႏ၊ ပန်းရံ၊ ရေခဲတွိုက်ထာꩻမာꩻဖုံႏ၊ ပအိုဝ်ႏမူႏကဲဉ်းအာအာ အမာꩻဒျာႏ ဒွိုႏသွတ်ꩻ၊ ဖွစ်ꩻဖျိုး(အိမ်ဖော်)ထာꩻမာꩻတဲင် လမ်းဗွေႏမိဉ်ႏတဟောဝ်တောဝ်းနောဝ်ꩻ ဟွိုန်တရျိုးငါႏသွူ၊ လွေꩻငါငါ တွိုႏငါငါတဲင် နေးတောႏလမ်းတောႏပါႏဝင်ꩻတဲ့ ယိုꩻငါႏသွူ၊ မော့ꩻဒုက္ခနုဲင်းနုဲင်းဝင်ꩻ ခွဲးဝင်ꩻတဲင်တွော့ꩻ အုံငီꩻလꩻသွꩻခန်းဝင်ꩻ၊ နေးတောႏလမ်းတောႏပါႏခန်းဝင်ꩻ၊ အခိန်ႏမိဉ်ႏတွိုႏ မိဉ်ႏဖဝင်ꩻတဲ့ ဖခန်းဒျာႏ၊ မိဉ်ႏမော့ꩻယင်းတဖြာꩻတဲ့ တောႏလမ်းဖျင်၊ ကထွာနုဲင်းယိုတဲ့ အောဝ်ႏအာတန်ဒျာႏသွူ။ နောဝ်ꩻမꩻ ဖူးခို/ဖူးပေႏ၊ ဝေးမူႏ/ဖူးမူႏသီးဖုံႏဟွေး- ကွပ်စွဉ်ႏ အယပ်ꩻအခုဲင်ႏတဲင်တွော့ꩻ ဖခမ်း ဖထီ မဉ်ႏလွေꩻမာꩻထာꩻမာꩻဝင်ꩻခမ်းနောဝ်ꩻ အောဝ်ႏလိုႏမာꩻနေးဒျာႏ တွမ်ႏတရာꩻဝင်ႏ၊ မိဉ်ႏလွေꩻနောဝ်ꩻ စဲစ်ဆေꩻရီးရီး ကုမ္ပဏီႏမိဉ်ꩻ၊ ကုမ္ပဏီႏထာꩻမာꩻ၊ ကုမ္ပဏီႏ လိုင်စင်အောဝ်ႏနဲ့၊ အောဝ်ႏတောဝ်းနဲ့-စစွဉ်ႏအချက်အလျက်ဖုံႏယို အောဝ်ႏလိုႏစဲစ်ဆေꩻစဲင်းစဲင်းငါႏသွူ၊ နီပအိုဝ်ႏ ယဖြာꩻဖြာꩻ အောဝ်ႏညာꩻဝေင်ꩻ၊ အောဝ်ႏညာꩻအစိုႏရဌာႏနဆဲင်ႏရာꩻလဲ့ ပွိုင်းဝွိုတွမ်ႏ အချက်အလျက်ဖုံႏယို အောဝ်ႏလိုႏလွေꩻထေ့ရုဲင်းရုဲင်း၊ ရီရုဲင်းရုဲင်းသွော့ ထာꩻမာꩻသားဖဲ့ꩻဆဲင်ႏရာꩻ အစိုႏရဌာႏနဖုံႏ၊ ခါးလားကလွေꩻနောဝ်ꩻ အောဝ်ႏလိုႏသေစဲင်းစဲင်းငါႏ၊ မိဉ်ႏတသေစဲင်းတောဝ်း၊ မိဉ်ႏမာႏထိုꩻနောဝ်ꩻ နီအနီꩻအရင်ꩻ၊ နီအခိန်ႏဖုံႏယို သွုမ်ꩻတိန်ꩻကုဲင်ဒါႏသွူ၊ နောဝ်ꩻမꩻ မိဉ်ႏလွေꩻမာꩻထာꩻမာꩻ ဝင်ꩻခမ်းနောဝ်ꩻ လွေꩻနေးဒျာႏသွော့ တရာꩻဝင်ႏဝင်ႏ၊ မိဉ်ႏလꩻလဲဉ်းသွူထာꩻမာꩻလဲ့ ရွဉ်နောဝ်ꩻ ဖျုန်ꩻမွိုန်း၊ စုရွမ်ဟောဝ်ဟောဝ် တနီꩻခါ မိဉ်ႏတွိုႏသဲင်ꩻချာ ရပ်ချာတဲ့ ဖေႏနေးကတယ်ႏထောင်ႏနွောင်ꩻ နမ်းပဲင်ႏထာꩻမာꩻ၊ နမ်းပဲင်ႏဆဲင်ႏ၊ ဆꩻချာသားလဲ့ ဝင်ꩻကပသာလွဉ်ဒါႏ ရွဉ်ဖုံႏယို အောဝ်ႏလိုႏဖျုန်ꩻတောဝ်းအကျောင်ꩻ တဲမ်းဖြုဲင်ꩻဖေႏသေနယ်ဗာႏ တခွိုင်းယိုသွူ။[၁][၂]